བསང་མཆོད་ནམ་མཁའ་ཀུན་ཁྱབ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bsang mchod nam mkha' kun khyab
Location	mdo mkhyen brtse bka' 'bum Volume 7, Text 6, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre	Smoke Offerings - bsangs mchod - lha bsang
Colophon	རྒྱུན་བསང་རང་དང་རྒྱུད་འཛིན་ལ། །ཕན་བློས་ཁྲག་འཐུང་དཔའ་བོ་ཡིས། །ཐོལ་བྱུང་ཤར་བཞིན་ཐོགས་མེད་དུ། །སྨྲས་འདི་དམ་ཅན་སྲུང་མའི་ཚོགས། །ཐུགས་ཀྱི་དགྱེས་པ་སྐོང་གྱུར་ཅིག །
	rgyun bsang rang dang rgyud 'dzin la/_/phan blos khrag 'thung dpa' bo yis/_/thol byung shar bzhin thogs med du/_/smras 'di dam can srung ma'i tshogs/_/thugs kyi dgyes pa skong gyur cig_/

Tibetan Text

[edit]

༄༅། །བསང་མཆོད་ནམ་མཁའ་ཀུན་ཁྱབ་བཞུགས།« དྲིན་ཆེན་བླ་མའི་ཞབས་ལ་འདུད། བསང་མཆོད་ནམ་མཁའ་ཀུན་ཁྱབ་ནི།» རཾ་ཡཾ་ཁཾ། «ལན་གསུམ།» རཾ་ཡཾ་ཁཾ་གིས་མ་དག་ཉེས་པའི་ཚོགས། །བསྲེགས་གཏོར་བཀྲུས་ཤིང་ཨོཾ་ཨཱཿཧཱུྃ་གསུམ་གྱིས། །དུད་པ་ཕུན་ཚོགས་དྲི་མཆོག་དྭངས་མའི་རྒྱུན། །ཟེགས་མ་འདོད་ཡོན་བདུད་རྩིའི་ཆར་འབེབས་གྱུར། །ཨོཾ་ཨཱཿཧཱུྃ། «ལན་བདུན་བརྗོད།» ཀྱེ་སངས་རྒྱས་སྤྱན་མའི་ཀློང་ལས་བྱུང་བ་ཡི། ཤིང་རྩི་འབྲུ་སྨན་ཕྱེ་མར་ཟས་སྣ་སྦྱར། །གོས་དཀར་མོ་ཡི་ཀློང་དུ་ལེགས་བཞུས་ཏེ། །དྲི་ཞིམ་དུད་པ་འདོད་ཡོན་ལྔ་ལྡན་འཕྲོ། །དམ་ཚིག་སྒྲོལ་མའི་ཤུགས་ཀྱིས་བསྐྱོད་པ་ལས། །དགོས་འདོད་ཀུན་འབྱུང་ལོངས་སྤྱོད་ཆར་ལྟར་འབེབས། །ཟེར་ལས་མཱ་ཀི་བདུད་རྩིའི་ཆར་འབེབས་པས། །དྲི་མ་འཁྲུད་ཅིང་དགའ་བདེའི་གཟི་བྱིན་བསྐྱེད། །དབྱིངས་ཕྱུག་མ་ཡི་མཁའ་ཀློང་ཀུན་ཁྱབ་པའི། །ཡོན་ཏན་ཕུན་ཚོགས་བསང་གི་མཆོད་པ་ཡིས། །བསླུ་མེད་དཀོན་མཆོག་རིན་ཆེན་རྣམ་པ་གསུམ། །ཕྱོགས་བཅུའི་རྒྱལ་བ་སྲས་དང་བཅས་པ་བསང༌། །བྱིན་རླབ་འབྱུང་གནས་བཀའ་རྒྱུད་བླ་མ་དང༌། །བཀའ་དྲིན་སུམ་ལྡན་རྩ་བའི་བླ་མ་བསང༌། །ཡི་དམ་ཞི་བ་རྡོ་རྗེ་དབྱིངས་ཀྱི་ལྷ། །ཁྲག་འཐུང་ཁྲོ་བོ་རོལ་པའི་ཚོགས་བཅས༴ །དབྱིངས་དང་ཡེ་ཤེས་ལས་དང་དམ་ཚིག་དབང༌། །ཤ་ཟ་འཇིག་རྟེན་མཁའ་འགྲོའི་ཚོགས་བཅས་བསང༌། །ཁྱད་པར་བཅུ་བདུན་རྒྱུད་ཀྱི་བཀའ་སྲུང་ཆེ། །སྔགས་ཀྱི་བདག་མོ་ཨེ་ཀ་ཙ་ཏི༴ །སྐུ་གསུང་ཐུགས་ཡོན་ཕྲིན་ལས་སྤྲུལ་སྲས་དང༌། །འཁོར་གྱི་མ་མོ་བྱེ་བ་འབུམ་སྡེ༴ །ཕོ་རྒྱུད་ཀུན་འདུས་དཔལ་མགོན་མ་ནིང་ནག །དཔལ་མགོན་སྡེ་ལྔ་སྤྲུལ་འཁོར་བཅས་པ༴ །དྲང་སྲོང་ཆེན་པོ་གཟའ་མཆོག་རཱ་ཧུ་ལ། །གཟའ་བརྒྱད་གདོང་མོ་རྒྱུ་སྐར་འཁོར་ཚོགས༴ །སྒྲོལ་གིང་སྐྱེས་མཆོག་བཛྲ་ཐིག་ལེ་རྩལ། །སྤྲུལ་པ་མཆེད་འཁོར་སུམ་བརྒྱ་དྲུག་ཅུ༴ །པདྨ་ཀཱ་རའི་གསང་ཡུམ་ཚེ་རིང་མ། །མཆེད་ལྔ་སྨན་བཙུན་བསྟན་མར་བཅས་རྣམས་བསང༌། །གཡུ་སྒྲོན་མཆེད་ལྔ་བསྟན་སྐྱོང་གཤོག་རྒོད་མ། །མིང་པོ་ཀླུ་རྗེ་འཁོར་དང་བཅས་པ་བསང༌། །ཕུར་སྲུང་མ་མོ་བཅུ་གཉིས་གིང་ཆེན་བཞི། །དུར་ཁྲོད་ལྷ་མོ་མིང་སྲིང་འཁོར་བཅས༴ །བདུད་མགོན་ཡབ་ཡུམ་བམ་རོ་ཕོ་མོ་དང༌། །ལས་ལ་དབང་སྒྱུར་སྤྲུལ་འཁོར་ཚོགས་བཅས་བསང༌། །ཁྱད་པར་གཏེར་གྱི་སྲུང་མ་དམ་ཚིག་ཅན། །ཀླུ་ཡི་དགེ་བསྙེན་བསྙོ་ཁ་འཁོར་བཅས་བསང༌། །ལྷ་གཤིན་མ་བདུད་གཟའ་བཙན་གནོད་སྦྱིན་ཀླུ། །དྲེགས་པའི་སྡེ་དཔོན་འཁོར་དང་བཅས་པ་བསང༌། །རྡོ་རྗེ་འབར་བ་རྡོ་རྗེ་དྲག་རྩལ་དང༌། །རྡོ་རྗེ་ལས་དབང་རྡོ་རྗེ་ཐོགས་མེད་བསང༌། །བཙན་རྒོད་ཆེན་པོ་རྡོ་རྗེ་དགྲ་འཇོམས་རྩལ། །རོལ་པ་རྐྱ་བདུན་འབར་བ་སྤུན་བདུན་བསང༌། །གཞན་ཡང་འཛམ་གླིང་དཀར་ཕྱོགས་སྐྱོང་བ་ཡི། །མངའ་རིའི་དབུས་གཙང་མདོ་ཁམས་གཞི་བདག་བསང༌། །ཡུལ་ཕྱོགས་འདིར་གནས་ཟོ་དོར་མཐུ་བོ་ཆེ། །བཀའ་དང་དམ་ལ་གནས་པའི་ཚོགས་ཀུན་བསང༌། །དགོས་སུ་རྣལ་འབྱོར་བདག་ལ་འཁོར་བ་ཡི། །སློབ་དཔོན་ཕ་མྱེས་རྒྱུད་ཀྱི་སྲུང་མ་བསང༌། །ཕ་ལྷ་མ་ལྷ་སྲོག་ལྷ་ལེའུའི་ལྷ། །དགྲ་ལྷ་མཐུ་ཆེན་འཁོར་བཅས་ཐམས་ཅད་བསང༌། །དྲི་ཞིམ་བསང་གི་དུད་པས་བསངས་གྱུར་ཅིག །འདོད་པའི་ཡོན་ཏན་ལྔ་ཡིས་མཉེས་གྱུར་ཅིག །རོ་བརྒྱ་བདུད་རྩིའི་ཆར་གྱིས་ཚིམ་གྱུར་ཅིག །བསང་དང་ཞི་བའི་མཆོད་པ་འདི་ཕུལ་བས། །བཀྲག་མདངས་གཟི་བརྗིད་བསྐྱེད་ལ་དབུ་འཕང་བསྟོད། །གཞི་བྱེས་ལམ་གསུམ་གར་འགྲོ་གར་འདུག་ཀྱང༌། །དགྲ་ལྷ་གཉན་པོ་མི་དང་མ་འབྲལ་ཞིག །གསར་བྱུང་ནག་ཕྱོགས་འབྱུང་པོ་གདུག་པ་ཅན། །ལྷ་རུ་བརྫུ་ཞིང་བསྟན་སེལ་སྡེ་འཁྲུགས་སློང༌། །གཤིན་པོར་བརྫུ་ཞིང་འགྲོ་ཀུན་སྡུག་ལ་སྦྱོར། །དེ་རིགས་ཚེ་བསོད་བསྡུས་ལ་རྗེས་མེད་ཐོངས། །ཕྱོགས་ལས་རྣམ་པར་རྒྱལ་བའི་རྒྱལ་རྔ་བརྡུང༌། །ཕ་རོལ་སྤ་བཀོང་ཟིལ་གནོན་དབང་དུ་བསྡུས། །རྣལ་འབྱོར་འདོད་པའི་དོན་དང་གཉེར་བའི་གནས། །མྱུར་འགྲུབ་བཀྲ་ཤིས་བདེ་སྐྱིད་དཔལ་འབར་མཛོད།« །རྒྱུན་བསང་རང་དང་རྒྱུད་འཛིན་ལ། །ཕན་བློས་ཁྲག་འཐུང་དཔའ་བོ་ཡིས། །ཐོལ་བྱུང་ཤར་བཞིན་ཐོགས་མེད་དུ། །སྨྲས་འདི་དམ་ཅན་སྲུང་མའི་ཚོགས། །ཐུགས་ཀྱི་དགྱེས་པ་སྐོང་གྱུར་ཅིག ། །།