འཆི་མེད་འཕགས་མའི་སྙིང་ཏིག་གི་བདག་འཇུག་ངག་འདོན་ཡེ་ཤེས་དྭངས་བཅུད།

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med 'phags ma'i snying tig gi bdag 'jug ngag 'don ye shes dwangs bcud
Location	mkhyen brtse'i bka' babs Volume 13, Text 24, Pages 209-217 (Folios 1a to 5a6)
Author	འཇམ་མགོན་ཀོང་སྤྲུལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam mgon kong sprul. 'chi med 'phags ma'i snying tig gi bdag 'jug ngag 'don ye shes dwangs bcud. In Rdzong sar 'jam dbyangs mkhyen brtse'i dbang po'i bka' babs, Vol. 13: 209-217. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Self-Initiation - bdag 'jug
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma yid bzhin 'khor lo
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHI-022
Colophon	།ཅེས་པའང་རྗེ་བཙུན་བླ་མ་གང་གིས་གསང་གསུམ་ཡེ་ཤེས་སྣང་བས་བྱིན་གྱིས་བརླབས་པའི་གཞལ་མེད་ཁང་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བློ་གྲོས་མཐའ་ཡས་ཀྱིས་བྲིས་པ་དགེ་ལེགས་འཕེལ།།
	ces pa'ang rje btsun bla ma gang gis gsang gsum ye shes snang bas byin gyis brlabs pa'i gzhal med khang bkra shis 'chi med grub pa'i dga' tshal du blo gros mtha' yas kyis bris pa dge legs 'phel

Tibetan Text

Wylie

[edit]

༄༅། །འཆི་མེད་འཕགས་མའི་སྙིང་ཏིག་གི་བདག་འཇུག་ངག་འདོན་ཡེ་ཤེས་དྭངས་བཅུད་ཅེས་བྱ་བ་བཞུགས་སོ།།གང་སྐུའི་དཀྱིལ་འཁོར་ཡིད་ལ་ཤར་ཙམ་གྱིས། །གྲུབ་གཉིས་ཟིལ་དངར་བདེ་བླག་སྩོལ་མཛད་པ། །བླ་མ་ཡིད་བཞིན་འཁོར་ལོར་གུས་བཏུད་ན། །དབང་བཞིའི་ཡེ་ཤེས་ཟབ་མོས་རྒྱུད་སྨིན་མཛོད། དེའང་ལམ་དུས་ཀྱི་དམ་ཚིག་གསོ་ཞིང་ཡེ་ཤེས་སྤེལ་བ་ལ་ཤིན་ཏུ་གལ་ཆེ་ཞིང༌། སྒྲུབ་མཆོད་སོགས་ཀྱི་སྐབས་སུའང་ཉེ་བར་མཁོ་བ་བདག་ཉིད་དཀྱིལ་འཁོར་དུ་འཇུག་པའི་ཆོ་ག །ཡང་ཟབ་དགོངས་པའི་གཏེར་ཁ་རྒྱ་མཚོའི་ཡང་བཅུད་འཆི་མེད་ཚེ་ལྷ་རྣམ་གསུམ་གྱི་དྲིལ་སྒྲུབ་སྒྲོལ་དཀར་འཕགས་མའི་སྙིང་ཏིག་གི་བདག་འཇུག་མདོར་བསྡུས་ཏེ་བླང་བའི་ཚུལ་ནི། ལས་བྱང་གི་གཞུང་བསྲངས་ནས་བསྙེན་སྒྲུབ་ལས་གསུམ་གྱི་བཟླས་པའི་མཇུག་ཏུ་དབང་དོན་དུ་རྣམ་བུམ་བསང་སྦྱང༌། སྟོང་པའི་ངང་ལས་པད་ཟླའི་སྟེང་༔ ཁ་དོག་ལྔ་ལྡན་ཡི་གེ་བྷྲཱུྃ༔ ཡོངས་གྱུར་ཕྱི་ནི་རིན་པོ་ཆེའི༔ རང་བཞིན་བུམ་པ་བཟང་པོ་ཆེ༔ མཚན་ཉིད་ཡོངས་རྫོགས་འོད་དུ་འབར༔ ནང་ནི་ལྷ་ཚོགས་བཞུགས་པའི་གནས༔ རིན་ཆེན་གཞལ་མེད་ཁང་ཆེན་པོར༔ གཙོ་འཁོར་སྤྲུལ་པར་བཅས་པ་ཡི༔ དཀྱིལ་འཁོར་འཁོར་ལོ་རབ་འབྱམས་ཀུན༔ སྣང་སྟོང་ཆུ་ཟླ་ལྟ་བུར་གསལ༔ ཀུན་ཀྱང་སྤྱི་མགྲིན་ཐུགས་ཀ་རུ༔ རྡོ་རྗེ་གསུམ་གྱི་ཡི་གེས་མཚན༔ ཞེས་སོགས་གནས་གསུམ་བྱིན་བརླབ་ནས་བཟུང། མཆོད་བསྟོད་པར་ལས་རིམ་རྒྱས་བསྡུས་ཅི་རིགས་བྱ། དེ་ནས་གཟུངས་ཐག་བླངས་ལ། རང་གི་ཐུགས་ནས་སྔགས་ཀྱི་ཕྲེང་༔ རྡོ་རྗེའི་གཟུངས་ཐག་ལས་བརྒྱུད་དེ༔ བུམ་ལྷའི་ཐུགས་དམ་རྒྱུད་བསྐུལ་བས༔ བདེ་སྟོང་རོལ་པའི་འོད་ཟེར་སྤྲིན༔ མཁའ་ཁྱབ་ཀུན་ཏུ་སྣང་བ་ཡིས༔ འཕགས་མཆོད་འགྲོ་བའི་དོན་ཀུན་བསྒྲུབས༔ ཚུར་འདུས་ཐུགས་ཀྱི་དཔལ་བེར་འཁྱིལ༔ སྐུ་དང་སྔགས་ལས་བདུད་རྩིའི་རྒྱུན༔ དཔག་མེད་བྱུང་ནས་བུམ་པའི་བཅུད༔ དངོས་གྲུབ་ཀུན་གྱི་སྙིང་པོར་གྱུར༔ ཅེས་གསལ་བཏབ་ནས་བསྙེན་སྒྲུབ་ལས་སྦྱོར་གྱི་བཟླས་པ་གཙོ་འཁོར་གྱི་འགྲོས་སྦྱར་བ་ཅི་ནུས་མཐར་དབྱངས་གསལ་རྟེན་སྙིང༌། མཆོད་བསྟོད། ཡིག་བརྒྱ། ཨོཾ་ཨཱཿཧཱུྃ་གིས་བདུད་རྩིའི་མཆོད་ཡོན་ཕུལ། བུམ་ལྷ་འོད་ཞུ་བདུད་རྩིར་གྱུར༔ ལས་བུམ་ལ་དམིགས་ཏེ། ལས་བུམ་ནང་དུ་པད་ཉིའི་སྟེང་༔ པདྨ་རྟ་མགྲིན་སྐུ་མདོག་དམར༔ ཕྱག་གཉིས་པདྨ་དྲིལ་བུ་འཛིན༔ དུར་ཁྲོད་ཆས་རྫོགས་དོར་སྟབས་བཞུགས༔ སྐུ་ལས་རྡོ་རྗེ་བདུད་རྩིའི་རྒྱུན༔ བབས་པས་བུམ་པ་གང་བར་གྱུར༔ ཨོཾ་ཧྲཱིཿཔདྨན་ཏ་ཀྲྀ་ཏ་སརྦ་བིགྷཱན་ཧ་ན་ཧ་ན་ཧཱུྃ་ཕཊ༔ ཅི་རིགས་བཟླས་མཐར་ཁ་རྒྱན་གྱིས་བུམ་ཆུ་བླངས་ཏེ་འཐོར་ཞིང༌། ཧཱུྃ༔ ཁྲོ་བོ་ཆེན་པོས་དབང་གི་བྱ་བ་མ་གྲུབ་བར་བགེགས་ཐམས་ཅད་ཟློག་པའི་ཕྲིན་ལས་མཛོད་ཅིག །ཅེས་གསོལ་བས་ཞལ་གྱིས་བཞེས་ཏེ་ལྷ་འོད་དུ་ཞུ་བ་ལས་ཆུ་དབང་དྲག་གི་ནུས་པ་དང་ལྡན་པར་གྱུར། དེ་ནས་ཚེ་འགུགས་སོགས་ནས་ཚོགས་མཆོད་བར་དཀྱུས་ལྟར་བྱ། བདག་འཇུག་དངོས་ལ། ལས་བུམ་གྱི་ཆུས་ཁྲུས་བྱ། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུྃ་ཞེས་གུ་གུལ་ཡུངས་ཀར་རོལ་མོའི་ཚམ་རྔམས་དང་བཅས་བགེགས་བསྐྲད། བཛྲ་ཛྙཱ་ན་ཨཿཧཱུྃ་གིས་སྲུང་འཁོར་གསལ་གདབ། མཎྜལ་ཕུལ་ལ། ཨོཾ་ཙཀྵུཿབྷནྡྷ་བ་ར་མ་ཎ་ཡ་སྭཱ་ཧཱ་དང༌། ཨཱ་ཁཾ་བཱི་ར་ཧཱུྃ་གིས་མིག་དར་འཆིང་ཚུལ་དང་མེ་ཏོག་བླང༌། ཧོཿ བདེ་ཆེན་དགྱེས་པའི་ཡེ་ཤེས་སྐུ༔ རྡོ་རྗེ་འཛིན་པ་དགོངས་སུ་གསོལ༔ ཐར་པ་མཆོག་གི་གྲོང་ཁྱེར་དུ༔ སློབ་དཔོན་ཆེན་པོས་བདག་གཞུག་གསོལ༔ ལན་གསུམ། ན་མོ༔ བདག་སོགས་སོགས་དང༌། ཧོཿ མཁའ་མཉམ་སོགས་དང༌། ཧོཿ ཕྱོགས་དུས་སོགས་ལན་གསུམ་གྱིས་སྐྱབས་སེམས་ཚོགས་བསག །པདྨའི་རིགས་མཆོག་བླ་མ་དང་༔ དཀྱིལ་འཁོར་ལྷ་ཚོགས་དགོངས་སུ་གསོལ༔ བདག་གིས་དུས་འདི་ནས་བཟུང་སྟེ༔ བྱང་ཆུབ་སྙིང་པོར་མཆིས་ཀྱི་བར༔ མཐའ་ཡས་འགྲོ་ཀུན་སྒྲོལ་བའི་ཕྱིར༔ གཞན་གནོད་གཞིར་བཅས་ཡོངས་སུ་སྤང་༔ གཞན་ཕན་བྱང་ཆུབ་སེམས་མཆོག་བསྐྱེད༔ གཉིས་ཀ་མཉམ་པ་ཆེན་པོ་ཡི༔ ཐབས་ཆེན་གསང་བ་སྔགས་ཀྱི་སྲོག༔ སྤྱི་དང་ཁྱད་པར་ལྷག་པ་ཡི༔ རིག་པ་འཛིན་པའི་དམ་ཚིག་དང་༔ སྡོམ་པ་མ་ལུས་ཡོངས་སུ་གཟུང་༔ ཚུལ་བཞིན་དུ་ནི་བསླབ་པར་བགྱི༔ ལན་གསུམ་གྱིས་སྡོམ་གཟུང་བྱ། བྷྲཱུྃ་ཛྙཱ་ན་པྲ་བེ་ཤ་ཡ་ཕཊ་ཀྱིས་སྒོ་དབྱེ། ཛཿཧཱུྃ་བྂ་ཧོཿས་ནང་དུ་གཞུག ཨོཾ་ན་མ་སྟེ་ཧཱུྃ༔ ཨོཾ་ན་མཱ་མི་ཧཱུྃ༔ ཨོཾ་ན་མོ་ན་མ་ཧཱུྃ་གིས་ཕྱག་གསུམ་བྱ། ཧཱུྃ༔ འཐུངས་ཤིག་རྡོ་རྗེ་བདུད་རྩིའི་ཆུ༔ ལྕེ་ལ་བཞག་ཀྱང་སྙིང་དཀྱིལ་ཐིམ༔ མ་བསྲུངས་འདོད་པའི་དངོས་གྲུབ་ཉམས༔ བསྲུངས་ན་ཡེ་ཤེས་ཚེ་འདིར་རྙེད༔ ས་མ་ཡ་ཨ་མྲྀཏ་ཨུ་ད་ཀ་ཧཱུྃ་གིས་དམ་ཆུ་མྱང་༔ ཡེ་ཤེས་དབབ་པ་ནི། སྣོད་ནི་པདྨ་བཀོད་པའི་ཞིང་༔ བཅུད་ཀྱི་རྟོག་པ་འཕགས་མའི་སྐུ༔ རང་འོད་ཡབ་དང་མཉམ་སྦྱོར་བའི༔ ཐུགས་སྲོག་ཏཱྃ་ལ་སེམས་བཟུང་ཞིང་༔ སྙོམས་འཇུག་སྒྲ་དང་འོད་ཟེར་སྤྲིན༔ གདུང་བའི་གླུ་ཡིས་ཐུགས་དམ་བསྐུལ༔ སྐུ་གསུང་ཐུགས་ཀྱི་ཕྱག་རྒྱ་ནི༔ ཆར་བཞིན་བབས་ཏེ་དབྱེར་མེད་ཐིམ༔ ཡེ་ཤེས་ཆེན་པོའི་བྱིན་ཐོབ་གྱུར༔ སྤོས་རོལ་བཅས། ཨོཾ་ཨཱཿཧཱུྃ༔ ཨ་ལ་ལ་ཧོཿསོགས་ལས་བྱང་ལྟར་དབབ། རྡོ་རྗེ་སྤྱི་བོར་བཞག །ཨོཾ་བཛྲ་ཛྙཱ་ན་ཏིཥྛ་བྷཱུྃ༔ གྱིས་བརྟན། ཨོཾ་རཏྣ་པུཥྤེ་པྲ་ཏཱིཙྪ་ཧོཿས་མེ་ཏོག་དོར་ཞིང༌། ཨོཾ་པྲ་ཏི་གྲྀཧྣ་ཨི་མཾ་ས་ཏྭ་མ་ཧཱ་བ་ལ་ཏིཥྛ་ཨོཾ་ཀྱིས་འཆིང༌། ཨོཾ་བཛྲ་ཛྙཱ་ན་ཙཀྵུཿཔྲ་བེ་ཤ་ཡ་ཕཊ་ཀྱིས་མིག་དར་བསལ། འཆི་མེད་འཕགས་མའི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་དུ་མཐོང་བར་གྱུར། དངོས་གཞིའི་སླད་དུ་མཎྜལ་ཕུལ། ཧོཿ རིགས་རྣམས་ཀུན་བདག་སློབ་དཔོན་གྱིས༔ ཐུགས་རྗེས་བརྩེ་བས་ཉེར་བཟུང་ནས༔ གོ་འཕང་མཆོག་ཏུ་དབུགས་དབྱུང་ཕྱིར༔ ཡེ་ཤེས་དབང་བསྐུར་སྩལ་དུ་གསོལ༔ ལན་གསུམ་གྱིས་གསོལ་བ་གདབ། བླ་མ་དང་དཀྱིལ་འཁོར་གྱི་གཙོ་མོ་དབྱེར་མེད་པའི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་ནམ་མཁའ་གང་བར་སྤྱན་དྲངས་ནས་བཀྲ་ཤིས་པའི་རྣམ་པ་དུ་མ་དང་བཅས་དགྱེས་བཞིན་དུ་དབང་བསྐུར་བར་གྱུར། བུམ་པ་སྤྱི་བོར་བླངས་ལ། ཨོཾ་ཨཱཿཧཱུྃ༔ དཀྱིལ་འཁོར་རབ་འབྱམས་ཐམས་ཅད་ཀྱི༔ ཡེ་ཤེས་བདུད་རྩིའི་བཅུད་ལྡན་པའི༔ བཀྲ་ཤིས་བུམ་པས་དབང་བསྐུར་བས༔ སྐུ་དང་ཡེ་ཤེས་ཡོངས་རྫོགས་ཤོག༔ བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ༔ སུ་ར་ཏཱ་སྟཱཾ་ཨ་ཧཾ༔ སྐུ་གང་སྒྲིབ་དག་ནུས་པ་བཞག༔ ཆུ་ལྷག་གྱེན་དུ་འཁྱིལ་བ་ལས༔ རྡོ་རྗེ་སེམས་དཔས་དབུ་བརྒྱན་གྱུར༔ ཛཿཧཱུྃ་བྃ་ཧོ༔ ནམ་མཁར་བཞུགས་པའི་དབང་ལྷ་རྣམས་རང་ལ་ཐིམ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱའ་ས་མེ་ཏོག་སྤྱི་བོར་བཞག་ཅིང་བརྟན། ཨོཾ་བཛྲ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱའ་ས་མཆོད། ཤིས་བརྗོད་གང་རིག་བྱ། དེ་ལྟར་ན་བུམ་པའི་དབང་ཐོབ། ལུས་ཀྱི་དྲི་མ་དག །ལམ་བསྙེན་པའི་རྣལ་འབྱོར་བསྐྱེད་རིམ་སྒོམ་པ་ལ་དབང༌། འབྲས་བུ་སྐུ་རྡོ་རྗེ་སྤྲུལ་པའྀ་སྐུ་འགྲུབ་པའི་སྐལ་བ་ཅན་དུ་བྱས་པའོ། །གསང་དབང་ནི། བླ་མ་དང་དཀྱིལ་འཁོར་གྱི་གཙོ་མོ་ཐ་མི་དད་པ་རང་འོད་ཀྱི་ཡབ་དང་སྙོམས་པར་ཞུགས་པའི་བྱང་ཆུབ་ཀྱི་སེམས་བདུད་རྩི་ལྕེ་ཐོག་ཏུ་བཞག་པར་གྱུར། ཐོད་པའི་བདུད་རྩི་ཐོགས་ལ། ཨཱཿ དགའ་བ་མཆོག་གིས་དྲངས་པའི་བཅུད༔ བྱང་ཆུབ་སེམས་ཀྱི་དམ་ཚིག་གིས༔ རྩ་ཁམས་རླུང་ལ་དབང་བསྐུར་བས༔ བསལ་སྟོང་ཟུང་འཇུག་ཉམས་མྱོང་ཤོག༔ ཨོཾ་བོ་དྷི་ཙིཏྟ་ཨ་བྷི་ཥིཉྩ་ཨཱཿ བདུད་རྩི་མྱང༌། དེ་ལྟར་ན་གསང་བའི་དབང་ཐོབ། ངག་གི་དྲི་མ་དག །ལམ་ཉེ་བསྙེན་རྩ་རླུང་གཏུམ་མོ་སྒོམ་པ་ལ་དབང། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་འགྲུབ་པའི་སྐལ་བ་ཅན་དུ་བྱས་པའོ། །ཤེར་དབང་ནི། རང་ཉིད་སྐད་ཅིག་གིས་དཔལ་གར་གྱི་དབང་ཕྱུག་ཏུ་གསལ་བ་ལ་མདུན་བསྐྱེད་ཀྱི་ཐུགས་ཀ་ནས་རིགས་དང་ལང་ཚོ་རྫོགས་པའི་རིག་མ་འཆི་མེད་འཕགས་མའི་ངོ་བོ་ཅན་རེ་སྤྲོས་ཏེ་ཐར་པ་བསྟེན་པར་བསྐུལ་བར་གྱུར། རིག་ཙཀ་གམ་དྲིལ་བུ་བླངས་ལ། ཧཱུྃ༔ རྣམ་པ་ཀུན་ལྡན་ཡེ་ཤེས་ནི༔ རིག་མའི་བརྟུལ་ཞུགས་བླ་ན་མེད༔ འདུ་ཤེས་གསུམ་གྱིས་མཉམ་སྦྱོར་བས༔ དཔེ་ཡི་ལྷན་སྐྱེས་རྟོགས་པར་ཤོག༔ ཨོཾ་ཀརྨ་མུ་དྲཱ་ཛྙཱ་ན་ཨ་བྷི་ཥིཉྩ་ཧཱུྃ༔ རང་དང་རིག་མ་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་དགའ་བ་བཞིའི་རིམ་པས་ལྷན་སྐྱེས་ཀྱི་བདེ་བ་རྒྱུད་ལ་སྐྱེས་པར་གྱུར། འཁྱུད་རྒྱ་བྱ། དེ་ལྟར་ན་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་སྒྲུབ་པ་ཕོ་ཉའི་རྣལ་འབྱོར་སྒོམ་པ་ལ་དབང༌། འབྲས་བུ་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པའོ། །དབང་བཞི་པ་ནི། རྡོ་རྗེ་སེམས་དཔའི་མེ་ལོང་འཇའ་ཤེལ་བཟུང་ལ། ཧོ༔ དབྱིངས་ནི་རྣམ་དག་ཤེལ་ལྟ་བུ༔ རིག་པ་ཡེ་ཤེས་འཇའ་ལྟར་ཤར༔ ཟུང་འཇུག་འདུས་མ་བྱས་པའི་ངང་༔ དོན་གྱི་དགོངས་པ་མངོན་གྱུར་ཤོག༔ ཨོཾ་དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཧོ༔ ཞེས་དཔེའི་བརྡ་ཐབས་ཀྱིས་མཚོན་ཏེ༔ ཨཱཿ ལྟ་བ་བློ་འདས་གདོད་མའི་བབས༔ སྒོམ་པ་མ་བཅོས་ལྷུག་པར་བཞག༔ སྤྱོད་པ་རང་གྲོལ་གཉུག་མའི་ངང་༔ འབྲས་བུ་གཞི་སྣང་ཆེན་པོར་རྫོགས༔ ཨ་ཨ་ཨ༔ ཞེས་དགོངས་པ་བསྐྱང༌། དེ་ལྟར་ན་དབང་བཞི་པ་ཐོབ། བག་ཆགས་ཀྱི་དྲི་མ་དག །ལམ་སྒྲུབ་པ་ཆེན་པོ་དབྱིངས་རིག་ཟུང་འཇུག་སྒོམ་པ་ལ་དབང༌། འབྲས་བུ་ངོ་བོ་ཉིད་སྐུ་འགྲུབ་པའི་སྐལ་བ་ཅན་དུ་བྱས་པའོ། རྗེས། གཙོ་བོས་ཇི་ལྟར་སོགས། མཎྜལ། དེང་ནས་བརྩམས་ཏེ་སོགས་སྤྱི་ལྟར་དང༌། ཚོགས་རྫས་འཆི་མེད་ཀྱི་བདུད་རྩིར་བརླབས་ཤིང་རོལ་པ་དང་ལྷག་མ་སོགས་བཀྲ་ཤིས་བར་ཕྲིན་ལས་ལྟར་མཐར་དབྱུང་ངོ༌། །འདིའི་སྒོ་ནས་སློབ་མ་རྗེས་སུ་བཟུང་ན་སྔ་འགྱུར་སྤྱིའི་བཞེད་སྲོལ་ལྟར་དོན་དབང་གི་སྨིན་བྱེད་དུ་འགྱུར་བས་མཚམས་སྦྱོར་ཇི་ལྟར་རིགས་པ་དང་བཅས་འདི་ཁོ་ན་ལྟར་བསྒྲུབས་པས་ཆོག་ཅིང༌། ཅུང་ཟད་སྤྲོ་ན་བུམ་དབང་གི་རྗེས། ནང་ནུས་པ་འཇུག་པའི་སྐུ་གསུང་ཐུགས་ཀྱི་དབང་དང༌། དབང་བཞི་པའི་མཐར་མཎྜལ་གསོལ་གདབ་ནས་བཟུང་ཐུན་མོང་ཚེའི་རྗེས་གནང་རྒྱས་གདབ་དང་བཅས་པ་བགྱིས་ན་སྐབས་སུ་བབ་ཅིང་ལེགས་པར་འགྱུར་ལ། མཐར་བཀྲ་ཤིས་རྫས་རྟགས་སྣ་བདུན་བཅས་སྦྱིན་པ་དང༌། ཤིས་བརྗོད་ཇི་ལྟར་རིགས་པའང་བྱའོ། །ལྷག་པའི་ལྷ་གང་ལ་བརྟེན་ཀྱང་རིམ་པ་གཉིས་ཉམས་སུ་ལེན་པའི་ཆ་རྐྱེན་ལམ་དུས་ཀྱི་དབང་ལེན་པ་འདི་ཉིད་མེད་དུ་མི་རུང་བ་ཡིན་ཀྱང་སྔ་འགྱུར་གྱི་རིང་ལུགས་འཛིན་པ་ཕྱིས་བྱོན་ཕལ་མོ་ཆེ་སླ་ཆོས་ཁོ་ནའི་དབང་དུ་སོང་བ་ལ་སྔ་འགྱུར་བསྟན་པའི་ཉི་མ་གཏེར་ཆེན་འགྱུར་མེད་རྡོ་རྗེས་ལམ་སྲོལ་གསར་དུ་སྣང་བར་མཛད་པ་ལྟར་འདིར་ཡང་ཤིན་ཏུ་གལ་པོ་ཆེའི་གནད་གསང་ཇི་བཞིན་གཟིགས་ནས་ཟབ་གཏེར་འདི་ཉིད་ཀྱི་མངའ་བདག་གཏེར་ཆེན་བླ་མ་ཐམས་ཅད་མཁྱེན་པ་པདྨ་འོད་གསལ་མདོ་སྔགས་གླིང་པས་བཀས་གནང་བའི་ཞལ་ལུང་གཙང་མ་ཡིད་བརྟན་དུ་རུང་བའོ། །བཅོམ་ལྡན་འདས་མའི་རྡོ་རྗེའི་ཡེ་ཤེས་བཞིའི། །བྱིན་རླབས་སྒོ་གསུམ་ཐིག་ལེར་འབད་མེད་ཞུགས། །འཆི་མེད་རྟག་བརྟན་གཡུང་དྲུང་དཔལ་བརྙེས་ཏེ། །སྲིད་ཞིའི་ཁྱབ་བདག་འཁོར་ལོའི་མགོན་གྱུར་ཅིག །ཅེས་པའང་རྗེ་བཙུན་བླ་མ་གང་གིས་གསང་གསུམ་ཡེ་ཤེས་སྣང་བས་བྱིན་གྱིས་བརླབས་པའི་གཞལ་མེད་ཁང་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བློ་གྲོས་མཐའ་ཡས་ཀྱིས་བྲིས་པ་དགེ་ལེགས་འཕེལ།། །།

[edit]

@#/__/'chi med 'phags ma'i snying tig gi bdag 'jug ngag 'don ye shes dwangs bcud ces bya ba bzhugs so//gang sku'i dkyil 'khor yid la shar tsam gyis/__/grub gnyis zil dngar bde blag stsol mdzad pa/__/bla ma yid bzhin 'khor lor gus btud na/__/dbang bzhi'i ye shes zab mos rgyud smin mdzod/__de'ang lam dus kyi dam tshig gso zhing ye shes spel ba la shin tu gal che zhing*/__sgrub mchod sogs kyi skabs su'ang nye bar mkho ba bdag nyid dkyil 'khor du 'jug pa'i cho ga__/yang zab dgongs pa'i gter kha rgya mtsho'i yang bcud 'chi med tshe lha rnam gsum gyi dril sgrub sgrol dkar 'phags ma'i snying tig gi bdag 'jug mdor bsdus te blang ba'i tshul ni/__las byang gi gzhung bsrangs nas bsnyen sgrub las gsum gyi bzlas pa'i mjug tu dbang don du rnam bum bsang sbyang*/__stong pa'i ngang las pad zla'i steng :__kha dog lnga ldan yi ge b+h+rU~M:__yongs gyur phyi ni rin po che'i:__rang bzhin bum pa bzang po che:__mtshan nyid yongs rdzogs 'od du 'bar:__nang ni lha tshogs bzhugs pa'i gnas:__rin chen gzhal med khang chen por:__gtso 'khor sprul par bcas pa yi:__dkyil 'khor 'khor lo rab 'byams kun:__snang stong chu zla lta bur gsal:__kun kyang spyi mgrin thugs ka ru:__rdo rje gsum gyi yi ges mtshan:__zhes sogs gnas gsum byin brlab nas bzung/__mchod bstod par las rim rgyas bsdus ci rigs bya/__de nas gzungs thag blangs la/__rang gi thugs nas sngags kyi phreng :__rdo rje'i gzungs thag las brgyud de:__bum lha'i thugs dam rgyud bskul bas:__bde stong rol pa'i 'od zer sprin:__mkha' khyab kun tu snang ba yis:__'phags mchod 'gro ba'i don kun bsgrubs:__tshur 'dus thugs kyi dpal ber 'khyil:__sku dang sngags las bdud rtsi'i rgyun:__dpag med byung nas bum pa'i bcud:__dngos grub kun gyi snying por gyur:__ces gsal btab nas bsnyen sgrub las sbyor gyi bzlas pa gtso 'khor gyi 'gros sbyar ba ci nus mthar dbyangs gsal rten snying*/__mchod bstod/__yig brgya/__oM AHhU~M gis bdud rtsi'i mchod yon phul/__bum lha 'od zhu bdud rtsir gyur:__las bum la dmigs te/__las bum nang du pad nyi'i steng :__pad+ma rta mgrin sku mdog dmar:__phyag gnyis pad+ma dril bu 'dzin:__dur khrod chas rdzogs dor stabs bzhugs:__sku las rdo rje bdud rtsi'i rgyun:__babs pas bum pa gang bar gyur:__oM hrIHpad+man ta kr-i ta sarba big+hAn ha na ha na hU~M phaT:__ci rigs bzlas mthar kha rgyan gyis bum chu blangs te 'thor zhing*/__hU~M:__khro bo chen pos dbang gi bya ba ma grub bar bgegs thams cad zlog pa'i phrin las mdzod cig__/ces gsol bas zhal gyis bzhes te lha 'od du zhu ba las chu dbang drag gi nus pa dang ldan par gyur/__de nas tshe 'gugs sogs nas tshogs mchod bar dkyus ltar bya/__bdag 'jug dngos la/__las bum gyi chus khrus bya/__hU~M hU~M hU~M bi shwa badz+ra kro d+ha dz+wa la maN+Da la phaT phaT phaT ha la ha la ha la hU~M zhes gu gul yungs kar rol mo'i tsham rngams dang bcas bgegs bskrad/__badz+ra dz+nyA na aHhU~M gis srung 'khor gsal gdab/__maN+Dal phul la/__oM tsak+ShuHb+han+d+ha ba ra ma Na ya swA hA dang*/___A khaM bI ra hU~M gis mig dar 'ching tshul dang me tog blang*/__hoH__bde chen dgyes pa'i ye shes sku:__rdo rje 'dzin pa dgongs su gsol:__thar pa mchog gi grong khyer du:__slob dpon chen pos bdag gzhug gsol:__lan gsum/__na mo:__bdag sogs sogs dang*/__hoH__mkha' mnyam sogs dang*/__hoH__phyogs dus sogs lan gsum gyis skyabs sems tshogs bsag__/pad+ma'i rigs mchog bla ma dang :__dkyil 'khor lha tshogs dgongs su gsol:__bdag gis dus 'di nas bzung ste:__byang chub snying por mchis kyi bar:__mtha' yas 'gro kun sgrol ba'i phyir:__gzhan gnod gzhir bcas yongs su spang :__gzhan phan byang chub sems mchog bskyed:__gnyis ka mnyam pa chen po yi:__thabs chen gsang ba sngags kyi srog:__spyi dang khyad par lhag pa yi:__rig pa 'dzin pa'i dam tshig dang :__sdom pa ma lus yongs su gzung :__tshul bzhin du ni bslab par bgyi:__lan gsum gyis sdom gzung bya/__b+h+rU~M dz+nyA na pra be sha ya phaT kyis sgo dbye/__dzaHhU~M ba~M` hoHsa nang du gzhug__oM na ma ste hU~M:__oM na mA mi hU~M:__oM na mo na ma hU~M gis phyag gsum bya/__hU~M:__'thungs shig rdo rje bdud rtsi'i chu:__lce la bzhag kyang snying dkyil thim:__ma bsrungs 'dod pa'i dngos grub nyams:__bsrungs na ye shes tshe 'dir rnyed:__sa ma ya a mr-ita u da ka hU~M gis dam chu myang :__ye shes dbab pa ni/__snod ni pad+ma bkod pa'i zhing :__bcud kyi rtog pa 'phags ma'i sku:__rang 'od yab dang mnyam sbyor ba'i:__thugs srog tA~M la sems bzung zhing :__snyoms 'jug sgra dang 'od zer sprin:__gdung ba'i glu yis thugs dam bskul:__sku gsung thugs kyi phyag rgya ni:__char bzhin babs te dbyer med thim:__ye shes chen po'i byin thob gyur:__spos rol bcas/__oM AHhU~M:__a la la hoHsogs las byang ltar dbab/__rdo rje spyi bor bzhag__/oM badz+ra dz+nyA na tiSh+Tha b+hU~M:_gyis brtan/__oM rat+na puSh+pe pra tIts+tsha hoHsa me tog dor zhing*/__oM pra ti gr-ih+na i maM sa twa ma hA ba la tiSh+Tha oM kyis 'ching*/__oM badz+ra dz+nyA na tsak+ShuHpra be sha ya phaT kyis mig dar bsal/__'chi med 'phags ma'i dkyil 'khor rten dang brten par bcas pa mngon sum du mthong bar gyur/__dngos gzhi'i slad du maN+Dal phul/__hoH__rigs rnams kun bdag slob dpon gyis:__thugs rjes brtse bas nyer bzung nas:__go 'phang mchog tu dbugs dbyung phyir:__ye shes dbang bskur stsal du gsol:__lan gsum gyis gsol ba gdab/__bla ma dang dkyil 'khor gyi gtso mo dbyer med pa'i thugs ka nas 'od zer 'phros pas dbang gi lha nam mkha' gang bar spyan drangs nas bkra shis pa'i rnam pa du ma dang bcas dgyes bzhin du dbang bskur bar gyur/__bum pa spyi bor blangs la/__oM AHhU~M:__dkyil 'khor rab 'byams thams cad kyi:__ye shes bdud rtsi'i bcud ldan pa'i:__bkra shis bum pas dbang bskur bas:__sku dang ye shes yongs rdzogs shog:__badz+ra ka la sha a b+hi Shiny+tsa hU~M:__su ra tA stAM a haM:__sku gang sgrib dag nus pa bzhag:__chu lhag gyen du 'khyil ba las:__rdo rje sems dpas dbu brgyan gyur:__dzaHhU~M ba~M ho:__nam mkhar bzhugs pa'i dbang lha rnams rang la thim/__oM su pra tiSh+Tha badz+rA ya swA hA' sa me tog spyi bor bzhag cing brtan/__oM badz+ra ar+g+haM nas shab+da pra tIts+tsha swA hA' sa mchod/__shis brjod gang rig bya/__de ltar na bum pa'i dbang thob/__lus kyi dri ma dag__/lam bsnyen pa'i rnal 'byor bskyed rim sgom pa la dbang*/__'bras bu sku rdo rje sprul pa'-i sku 'grub pa'i skal ba can du byas pa'o/__/gsang dbang ni/__bla ma dang dkyil 'khor gyi gtso mo tha mi dad pa rang 'od kyi yab dang snyoms par zhugs pa'i byang chub kyi sems bdud rtsi lce thog tu bzhag par gyur/__thod pa'i bdud rtsi thogs la/__AH__dga' ba mchog gis drangs pa'i bcud:__byang chub sems kyi dam tshig gis:__rtsa khams rlung la dbang bskur bas:__bsal stong zung 'jug nyams myong shog:__oM bo d+hi tsit+ta a b+hi Shiny+tsa AH__bdud rtsi myang*/__de ltar na gsang ba'i dbang thob/__ngag gi dri ma dag__/lam nye bsnyen rtsa rlung gtum mo sgom pa la dbang/__'bras bu gsung rdo rje longs spyod rdzogs sku 'grub pa'i skal ba can du byas pa'o/__/sher dbang ni/__rang nyid skad cig gis dpal gar gyi dbang phyug tu gsal ba la mdun bskyed kyi thugs ka nas rigs dang lang tsho rdzogs pa'i rig ma 'chi med 'phags ma'i ngo bo can re spros te thar pa bsten par bskul bar gyur/__rig tsaka gam dril bu blangs la/__hU~M:__rnam pa kun ldan ye shes ni:__rig ma'i brtul zhugs bla na med:__'du shes gsum gyis mnyam sbyor bas:__dpe yi lhan skyes rtogs par shog:__oM karma mu drA dz+nyA na a b+hi Shiny+tsa hU~M:__rang dang rig ma 'du shes gsum ldan gyis snyoms par zhugs pas dga' ba bzhi'i rim pas lhan skyes kyi bde ba rgyud la skyes par gyur/__'khyud rgya bya/__de ltar na shes rab ye shes kyi dbang thob/__yid kyi dri ma dag__/lam sgrub pa pho nya'i rnal 'byor sgom pa la dbang*/__'bras bu thugs rdo rje chos kyi sku 'grub pa'i skal ba can du byas pa'o/__/dbang bzhi pa ni/__rdo rje sems dpa'i me long 'ja' shel bzung la/__ho:__dbyings ni rnam dag shel lta bu:__rig pa ye shes 'ja' ltar shar:__zung 'jug 'dus ma byas pa'i ngang :__don gyi dgongs pa mngon gyur shog:__oM d+harma d+hA tu dz+nyA na a b+hi Shiny+tsa ho:__zhes dpe'i brda thabs kyis mtshon te:__AH__lta ba blo 'das gdod ma'i babs:__sgom pa ma bcos lhug par bzhag:__spyod pa rang grol gnyug ma'i ngang :__'bras bu gzhi snang chen por rdzogs:__a a a:__zhes dgongs pa bskyang*/__de ltar na dbang bzhi pa thob/__bag chags kyi dri ma dag__/lam sgrub pa chen po dbyings rig zung 'jug sgom pa la dbang*/__'bras bu ngo bo nyid sku 'grub pa'i skal ba can du byas pa'o/__rjes/__gtso bos ji ltar sogs/__maN+Dal/__deng nas brtsams te sogs spyi ltar dang*/__tshogs rdzas 'chi med kyi bdud rtsir brlabs shing rol pa dang lhag ma sogs bkra shis bar phrin las ltar mthar dbyung ngo*/__/'di'i sgo nas slob ma rjes su bzung na snga 'gyur spyi'i bzhed srol ltar don dbang gi smin byed du 'gyur bas mtshams sbyor ji ltar rigs pa dang bcas 'di kho na ltar bsgrubs pas chog cing*/__cung zad spro na bum dbang gi rjes/__nang nus pa 'jug pa'i sku gsung thugs kyi dbang dang*/__dbang bzhi pa'i mthar maN+Dal gsol gdab nas bzung thun mong tshe'i rjes gnang rgyas gdab dang bcas pa bgyis na skabs su bab cing legs par 'gyur la/__mthar bkra shis rdzas rtags sna bdun bcas sbyin pa dang*/__shis brjod ji ltar rigs pa'ang bya'o/__/lhag pa'i lha gang la brten kyang rim pa gnyis nyams su len pa'i cha rkyen lam dus kyi dbang len pa 'di nyid med du mi rung ba yin kyang snga 'gyur gyi ring lugs 'dzin pa phyis byon phal mo che sla chos kho na'i dbang du song ba la snga 'gyur bstan pa'i nyi ma gter chen 'gyur med rdo rjes lam srol gsar du snang bar mdzad pa ltar 'dir yang shin tu gal po che'i gnad gsang ji bzhin gzigs nas zab gter 'di nyid kyi mnga' bdag gter chen bla ma thams cad mkhyen pa pad+ma 'od gsal mdo sngags gling pas bkas gnang ba'i zhal lung gtsang ma yid brtan du rung ba'o/__/bcom ldan 'das ma'i rdo rje'i ye shes bzhi'i/__/byin rlabs sgo gsum thig ler 'bad med zhugs/__/'chi med rtag brtan g.yung drung dpal brnyes te/__/srid zhi'i khyab bdag 'khor lo'i mgon gyur cig__/ces pa'ang rje btsun bla ma gang gis gsang gsum ye shes snang bas byin gyis brlabs pa'i gzhal med khang bkra shis 'chi med grub pa'i dga' tshal du blo gros mtha' yas kyis bris pa dge legs 'phel//__//__