གཞི་བདག་སྤྲེའུའི་མཆོད་གསོལ་བསྟན་དགྲ་ཚར་གཅོད།

🚧 This website is under continued development. We appreciate your patience!

Previous Text Back to Volume PageNext Text

Wylie title	gzhi bdag spre'u'i mchod gsol bstan dgra tshar gcod
Location	chos kyi blo gros bka' 'bum Volume 11, Text 90, Pages 463-465 (Folios 1a1 to 2a6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. gzhi bdag spre'u'i mchod gsol bstan dgra tshar gcod. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 463-465. Bir, H.P.: Khyentse Labrang, 2012.
Genre	Protector Rituals - gsol mchod
Colophon	།ཅེས་མགྲོན་གཤེགས་ལ་ཤིས་བརྗོད་བྱའོ། །ཅེས་པའང་དད་བློ་རབ་རྒྱས་བསྟན་བའི་སྦྱིན་བདག་ཕྲད་དཔལ་ཚང་གིས་སྐུ་མཆེད་གཉིས་ནས་འདི་ལྟར་བྲིས་ཞེས་བསྐུལ་ངོར་མཁྱེན་བརྩེའི་སྤྲུལ་མིང་འཛིན་པ་འཇམ་དབྱངས་བློ་གྲོས་རྒྱ་མཚོས་གང་དྲན་བྲིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །བི་ཛ་ཡནྟུ།།
	/ces mgron gshegs la shis brjod bya'o/__/ces pa'ang dad blo rab rgyas bstan ba'i sbyin bdag phrad dpal tshang gis sku mched gnyis nas 'di ltar bris zhes bskul ngor mkhyen brtse'i sprul ming 'dzin pa 'jam dbyangs blo gros rgya mtshos gang dran bris pa shin tu dge zhing bkra shis par gyur cig__/bi dza yan+tu//

1 Texts in this Section (sde tshan or chos tshan)

463-465	གཞི་བདག་སྤྲེའུའི་མཆོད་གསོལ་བསྟན་དགྲ་ཚར་གཅོད། gzhi bdag spre'u'i mchod gsol bstan dgra tshar gcod Protector Rituals - gsol mchod	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

གཞི་བདག་སྤྲེའུའི་མཆོད་གསོལ་བསྟན་དགྲ་ཚར་གཅོད་བཞུགས་སོ། །དཔལ་རྟ་མགྲིན་དབང་ཆེན་ལ་ཕྱག་འཚལ་ལོ། །ཤམ་པོ་རོང་གི་ཡུལ་སྐྱོང་སྤྲེའུ་ལ་བསང་མཆོད་བྱ་བར་འདོད་པས་གཏོར་མ་དཀར་དམར་གསེར་སྐྱེམས་ཕྱེ་མར་བསང་གི་དུད་སྤྲིན་འབུལ་བ་དང་བཅས། རྃ་ཡྃ་ཁྃ། ཨོཾ་ཨཱཿཧཱུྃ་གིས་མི་གཙང་བསྲེགས་གཏོར་བཀྲུས། །བསང་མཆོད་གཏོར་མ་གསེར་སྐྱེམས་ཟག་མེད་ཀྱི། །མཆོད་སྤྲིན་འདོད་པའི་ཡོན་ཏན་ལྔ་ལྡན་པས། །ས་དང་བར་སྣང་ནམ་མཁའ་གང་བར་གྱུར། །ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བརླབས་ལ། ཀྱཻ། དགུང་སྔོན་མཐོན་པོའི་དབྱིངས་རུམ་ནས། དཔལ་ལྡན་ལྷ་ཡི་སྲས་པོ་ནི། །རྡོ་རྗེ་དྲག་རྩལ་ཞེས་གྲགས་པ། །སྐུ་མདོག་སྔོན་པོ་བཻཌཱུའི་མདོག །རལ་གྲི་དང་ནི་ཐོད་ཁྲག་འཛིན། །སྐུ་ལ་ལྕགས་ཁྲབ་ལྕགས་རྨོག་གསོལ། །རྟ་མཆོག་སྔོན་པོའི་སྟེང་ན་ཆིབས། །རེས་འགའ་གནོད་སྦྱིན་ནོར་ལྷའི་གཙོ། །གསེར་མདོག་ནོར་བུ་དབང་རྒྱལ་དང་། །མདའ་གཞུ་འཛིན་ཅིང་བརྗིད་པའི་ཚུལ། །ཞི་བའི་ཚེ་ན་གསེར་ཁྲབ་དང་། །རིན་པོ་ཆེ་ཡི་ཕྲོག་ཞུ་ལ། །དར་སྣའི་ཅོད་པཎ་རབ་གཡོ་ཞིང་། །ཡུམ་མཆོག་ཀླུ་མོ་དཔལ་ལྷ་མོ། །དཀར་མོ་དུང་གི་ཐོར་ཚུགས་ཅན། །ཕྱག་གཉིས་ནོར་བུའི་གཞོང་པ་བསྣམས། །བློན་པོ་བཙན་རྒོད་དམར་པོ་སོགས། །བཀའ་ཡི་བྲན་གཡོགས་སྤྲིན་ལྟར་གཏིབ། །འདིར་བྱོན་བསང་མཆོད་གསེར་སྐྱེམས་བཞེས། །སྣང་སྲིད་འདོད་རྒུའི་དངོས་པོ་རྣམས། །མི་ཟད་ནམ་མཁའི་རྒྱན་དུ་འབུལ། །སྟེང་མཁར་རིག་པའི་ལྷ་མོ་ཡི། །དག་བྱེད་ཁྲུས་ཀྱི་བུམ་པ་ནས། །བདུད་རྩིའི་ཆུ་རྒྱུན་བབ་པ་ཡིས། །མི་གཙང་ཉམས་གྲིབ་ཐམས་ཅད་བཀྲུས། །ཕྱི་ལྟར་ལྷ་རིགས་གནོད་སྦྱིན་ཆེ། །ནང་དུ་ལྕང་ལོ་ཅན་གྱི་ཞིང་། །གསང་བ་དཔལ་ཆེན་གཞལ་མེད་ཁང་། །དེ་འདྲའི་གནས་མཆོག་ཆེན་པོ་ན། །ཡུལ་སྐྱོང་ཆེན་པོ་སྐུ་གཅིག་ལ། །མཚན་དང་རྣམ་འགྱུར་མཐའ་ཡས་སྟོན། །ལས་བཞིའི་ཕྲིན་ལས་ཤུགས་འཆང་བས། །དོན་རྣམས་འབད་མེད་སྒྲུབ་མཛད་ཅིང་། །ཁྱད་པར་དབང་ཆེན་རྟ་མགྲིན་དང་། །ཕྱག་རྡོར་པདྨ་འབྱུང་གནས་ཀྱིས། །དམ་ཚིག་རྡོ་རྗེ་གཙུག་ཏུ་བཀོད། །ཟབ་མོ་གཏེར་གྱི་སྲུང་མར་བསྐོས། །བདེ་གཤེགས་སྤོབས་པ་མཐའ་ཡས་དང་། །པདྨ་མདོ་སྔགས་གླིང་པ་ཡིས། །སླར་ཡང་དམ་གནོས་དྲན་གྱིས་ལ། །སྔ་འགྱུར་ཐེག་པའི་རྩེ་རྒྱལ་གྱི། །བསྟན་པ་རིན་ཆེན་འབྱུང་བའི་གནས། །འོག་མིན་ཀཿཐོག་རྡོ་རྗེའི་གདན། །གསང་སྔགས་ཕོ་བྲང་ཆེན་པོ་ཡིས། །ཕྱི་སྒོ་སྐྱོང་བའི་སྲུང་མ་མཛོད། །ཡུལ་ཕྱོགས་འདིར་གནས་ཁྱིམ་བདག་དང་། །སྐྱེ་འགྲོ་རྣམས་ལ་བདེ་ལེགས་སྤེལ། །ཁྱོད་ཐུགས་ཞི་བའི་ཆར་རྒྱུན་གྱིས། །ནད་གདོན་བགེགས་སོགས་ཞི་བ་དང་། །གསེར་ཞུན་རྒྱས་པའི་འོད་ཟེར་གྱིས། །ཚེ་བསོད་དཔལ་འབྱོར་རབ་རྒྱས་ཤིང་། །འོད་དམར་ལྕགས་ཀྱུ་རྣོན་པོ་ཡིས། །མོས་པ་རྣམ་བཞི་དབང་དུ་བསྡུས། །ཤུགས་དྲགས་བསྐལ་པའི་མེ་ལྕེ་ཡིས། །མི་དང་མི་མིན་དགྲ་བགེགས་དང་། །བྱད་ཕུར་རྦོད་གཏོང་གཞོམ་པར་མཛོད། །གཞི་བྱེས་ཀུན་ཏུ་སྲུང་སྐྱོབས་དང་། །བདག་ཅག་ལེགས་པའི་དབུ་རྨོག་བཙན། །དགེ་མཚན་དཔལ་ཡོན་རབ་རྒྱས་ཤིང་། །བཀྲ་ཤིས་ཀླུང་ཆེན་གཡས་སུ་འཁྱིལ། །ཕྱོགས་ལས་རྣམ་པར་རྒྱལ་བ་ཡིས། །བ་དན་དཀར་པོ་སྒྲེངས་གྱུར་ཅིག །ཀི་བསོ་ཆའོ་ལྷ་རྒྱལ་ལོ། །ཞེས་བརྗོད་ལ་གཏོར་མ་གསེར་སྐྱེམས་མཆོད། བསང་གཞུང་གཞན་དང་མ་འབྲེལ་ན། མ་འབྱོར་འཁྲུལ་པའི་ཚོགས་ཀུན་བཤགས། །བདག་ལ་དགྱེས་རབ་ཕུལ་གྱུར་ནས། །སོ་སོ་རང་རང་གནས་སུ་གཤེགས། །སླར་ཡང་དུས་སུ་འབྱོན་པར་མཛོད། །ཅེས་མགྲོན་གཤེགས་ལ་ཤིས་བརྗོད་བྱའོ། །ཅེས་པའང་དད་བློ་རབ་རྒྱས་བསྟན་བའི་སྦྱིན་བདག་ཕྲད་དཔལ་ཚང་གིས་སྐུ་མཆེད་གཉིས་ནས་འདི་ལྟར་བྲིས་ཞེས་བསྐུལ་ངོར་མཁྱེན་བརྩེའི་སྤྲུལ་མིང་འཛིན་པ་འཇམ་དབྱངས་བློ་གྲོས་རྒྱ་མཚོས་གང་དྲན་བྲིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །བི་ཛ་ཡནྟུ།། །།

[edit]

gzhi bdag spre'u'i mchod gsol bstan dgra tshar gcod bzhugs so/__/dpal rta mgrin dbang chen la phyag 'tshal lo/__/sham po rong gi yul skyong spre'u la bsang mchod bya bar 'dod pas gtor ma dkar dmar gser skyems phye mar bsang gi dud sprin 'bul ba dang bcas/__ra~M ya~M kha~M/__oM AHhU~M gis mi gtsang bsregs gtor bkrus/__/bsang mchod gtor ma gser skyems zag med kyi/__/mchod sprin 'dod pa'i yon tan lnga ldan pas/__/sa dang bar snang nam mkha' gang bar gyur/__/nam mkha' mdzod kyi sngags rgya lan gsum gyis brlabs la/__kyai/__dgung sngon mthon po'i dbyings rum nas/__dpal ldan lha yi sras po ni/__/rdo rje drag rtsal zhes grags pa/__/sku mdog sngon po baiDU'i mdog__/ral gri dang ni thod khrag 'dzin/__/sku la lcags khrab lcags rmog gsol/__/rta mchog sngon po'i steng na chibs/__/res 'ga' gnod sbyin nor lha'i gtso/__/gser mdog nor bu dbang rgyal dang /__/mda' gzhu 'dzin cing brjid pa'i tshul/__/zhi ba'i tshe na gser khrab dang /__/rin po che yi phrog zhu la/__/dar sna'i cod paN rab g.yo zhing /__/yum mchog klu mo dpal lha mo/__/dkar mo dung gi thor tshugs can/__/phyag gnyis nor bu'i gzhong pa bsnams/__/blon po btsan rgod dmar po sogs/__/bka' yi bran g.yogs sprin ltar gtib/__/'dir byon bsang mchod gser skyems bzhes/__/snang srid 'dod rgu'i dngos po rnams/__/mi zad nam mkha'i rgyan du 'bul/__/steng mkhar rig pa'i lha mo yi/__/dag byed khrus kyi bum pa nas/__/bdud rtsi'i chu rgyun bab pa yis/__/mi gtsang nyams grib thams cad bkrus/__/phyi ltar lha rigs gnod sbyin che/__/nang du lcang lo can gyi zhing /__/gsang ba dpal chen gzhal med khang /__/de 'dra'i gnas mchog chen po na/__/yul skyong chen po sku gcig la/__/mtshan dang rnam 'gyur mtha' yas ston/__/las bzhi'i phrin las shugs 'chang bas/__/don rnams 'bad med sgrub mdzad cing /__/khyad par dbang chen rta mgrin dang /__/phyag rdor pad+ma 'byung gnas kyis/__/dam tshig rdo rje gtsug tu bkod/__/zab mo gter gyi srung mar bskos/__/bde gshegs spobs pa mtha' yas dang /__/pad+ma mdo sngags gling pa yis/__/slar yang dam gnos dran gyis la/__/snga 'gyur theg pa'i rtse rgyal gyi/__/bstan pa rin chen 'byung ba'i gnas/__/'og min kaHthog rdo rje'i gdan/__/gsang sngags pho brang chen po yis/__/phyi sgo skyong ba'i srung ma mdzod/__/yul phyogs 'dir gnas khyim bdag dang /__/skye 'gro rnams la bde legs spel/__/khyod thugs zhi ba'i char rgyun gyis/__/nad gdon bgegs sogs zhi ba dang /__/gser zhun rgyas pa'i 'od zer gyis/__/tshe bsod dpal 'byor rab rgyas shing /__/'od dmar lcags kyu rnon po yis/__/mos pa rnam bzhi dbang du bsdus/__/shugs drags bskal pa'i me lce yis/__/mi dang mi min dgra bgegs dang /__/byad phur rbod gtong gzhom par mdzod/__/gzhi byes kun tu srung skyobs dang /__/bdag cag legs pa'i dbu rmog btsan/__/dge mtshan dpal yon rab rgyas shing /__/bkra shis klung chen g.yas su 'khyil/__/phyogs las rnam par rgyal ba yis/__/ba dan dkar po sgrengs gyur cig__/ki bso cha'o lha rgyal lo/__/zhes brjod la gtor ma gser skyems mchod/__bsang gzhung gzhan dang ma 'brel na/__ma 'byor 'khrul pa'i tshogs kun bshags/__/bdag la dgyes rab phul gyur nas/__/so so rang rang gnas su gshegs/__/slar yang dus su 'byon par mdzod/__/ces mgron gshegs la shis brjod bya'o/__/ces pa'ang dad blo rab rgyas bstan ba'i sbyin bdag phrad dpal tshang gis sku mched gnyis nas 'di ltar bris zhes bskul ngor mkhyen brtse'i sprul ming 'dzin pa 'jam dbyangs blo gros rgya mtshos gang dran bris pa shin tu dge zhing bkra shis par gyur cig__/bi dza yan+tu//__//