JKW-KABUM-04-NGA-001-012

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	mkhyen brtse'i bka' babs Volume 1, Text 12, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation
Genre	Revelations - gter ma
Karchag page	JKW-KABAB-Volume-01-KA-Karchag

Tibetan Text

Wylie

[edit]

འབྲལ་སྤང་མའི་རྟེན་བཞེངས་ཚུལ། ཨོཾ་སྭ་སྟི་སིདྡྷཾ། འདིར་འབྲལ་སྤང་མའི་རྟེན་བཞེངས་ཚུལ་ལ། ཐུགས་རྟེན་རྣམ་རྒྱལ་ལྟ་བུ་ཕྱག་ཚད་དང་ལྡན་པ་སོར་བརྒྱད་པའི་ནང་དུ། སངས་རྒྱས་ཀྱི་འཕེལ་གདུང་འཁྲུལ་མེད། སྡོམ་པ་གསུམ་གྱི་བླ་མ་བརྒྱུད་པའི་མཚན་སྔགས། རྡོ་རྗེ་སློབ་དཔོན་གོང་མ་ཞི་བར་གཤེགས་པ་མཚན་ཉིད་དང་ལྡན་པའི་གདུང་རུས་སཱཙྪར་བསྒྲུབས་པ་དང་། དབུ་ལོ། ཕྱག་སེན་བཅས། ཁྱད་པར་གསུང་རྟེན་རྒྱུད་སྡེ་བཞིའི་རིགས་གཙོ་བསྡུས་ཀྱི་སྔགས་དང་། སྡེ་སྣོད་དང་རྒྱུད་སྡེ་ཐམས་ཅད་ཀྱི་སྙིང་པོ་ཡེ་དྷརྨཱ་དང་། ཐུབ་པའི་སྔོན་གྱི་གསོ་སྦྱོང་། སྡིག་པ་ཅི་ཡང་མི་བྱ་ཞིང་། སོགས་མཐིང་ཤོག་ལ་གསེར་གྱིས་བྲིས་པ། གདན་ཁྲིའི་མཚམས་སུ་ཆོས་སྲུང་ནོར་ལྷ་སྤྱིའི་སྙིང་པོ་དང་། བཀྲ་ཤིས་དང་འདོད་གསོལ་ཤློ་ཀ་གང་རིགས་བཅུག །བུམ་སྒོར་སྐུ་རྟེན་སྟོན་པའི་སྐུ་ཆུང་དུ་ཕྱག་ཚད་དང་ལྡན་པ་ཞིག་གི་མཛོད་སྤུར་རིང་བསྲེལ་གྱི་ཕྲས་བཏབ་པ་ཞིག་བཞག་སྟེ། དེ་ལྟར་སྐུ་གསུང་ཐུགས་ཡོངས་སུ་རྫོགས་པའི་རྟེན་དེ་ཉིད་ཟག་པ་ཆེ་ཆུང་འདོར་སྐབས་མ་གཏོགས་ལུས་ལ་བཅངས་ཤིང་བླ་མ་མཆོད་པ་དང་། སེམས་བསྐྱེད། གསོ་སྦྱོང་སོགས་ཀྱི་རྟེན་ཐམས་ཅད་འདིས་རུང་བས་ཤིན་ཏུ་གལ་ཆེ་བ་ཡིན་ནོ། །ཞེས་རབ་འབྱམས་སྨྲ་བ་སུམ་ཏིའི་གསུང་རྒྱུན་ལྟར་བྲིས་པའོ།། །། ༈ མཎྜལ་འབུལ་བའི་འབྲུ་ལ་རླན་ཡོད་པ་གལ་ཆེ་སྟེ། ངེས་འབྱུང་དང་བྱང་ཆུབ་ཀྱི་སེམས་སྐྱེ་བའི་རྟེན་འབྲེལ་ཁྱད་པར་ཅན་ཡིན། རྡུལ་ཕྱི་བ་ཡང་དག་པའི་ལྟ་བ་སྐྱེ་བའི་རྟེན་འབྲེལ། མགྲོན་བུ་བསྲེ་བ་སྔགས་ཀྱི་སྐབས་ཞིང་སྔགས་ལྷན་སྐྱེས་ཀྱི་མཁའ་འགྲོ་འདུ་བའི་རྟེན་འབྲེལ་ཏེ། བདེ་སྟོང་གི་ཡེ་ཤེས་སྐྱེ་བའི་ཉེར་ལེན་ནོ། །མདའ་རྒྱུ་དམར་པོ་བསྲེ་བ་ཤེས་རབ་ཆེ་བའི་རྟེན་འབྲེལ་དུ་བཞེད་གསུངས་སོ།། །། ༈ ཆོས་གྲྭར་ཚོགས་པའི་ཚེ། མཆིལ་ལྷྭམ་ཕུད། རྐང་པ་བཀྲུ། ཁ་བཤལ། ཤིན་ཏུ་གུས་པས་ཡན་ལག་སྨད་ལྔ་ས་ལ་རེག་པའི་ཕྱག་གསུམ་དལ་བུར་བྱ། དེ་ནས་བསླབ་གྲལ་དང་མཐུན་པར་རང་གི་གདིང་བ་བཏིང་། ཆོས་གོས་ཡོད་ན་བཞེས། མེད་ན་གཟན་ཕབས་ཏེ་སྡོད། བླ་མ་ལ་གདོང་ཕྱོགས་པས་པུས་མོ་བཙུགས། ཐལ་མོ་སྦྱར་བ་སྔོན་དུ་འགྲོ་བས་མཎྜལ་སོགས་ལ་འཇུག་པ་སྟེ། འདི་དག་གི་རྣམ་བཞག་ཞིབ་པར་བླ་མ་ལྔ་བཅུ་པ་རྩ་འགྲེལ་སོགས་ལས་ཤེས་པར་བྱ་བ་གལ་ཆེའོ།། །། ༈ བཙན་དྲཱིཾས་ར། སྒོ་སྟེང་དུ་ཚུལ་ཤིང་། གཡས་གཡོན་དུ་རྒྱལ་ཆེན་བཞི་དང་། སོ་སོར་ཁ་བྱང་ཚིག་རིང་བི་བརྟ་བཅས། གཡས་སྒོའི་ལྟག་ཏུ་གནོད་སྦྱིན་དང་། དེའི་གཤམ་འབྱུང་པོ་གང་དག་སོགས་ཚིགས་བཅད་སུམ་བིད། སྒོ་སྟེང་དུ་རྟེན་འབྲེལ་བཅུ་གཉིས་འགགས་ཚུལ་ཚིག་ལྷུག་དང་། ཆོས་རྣམས་གང་དག་སོགས་ཚིགས་བཅད། གཡས་སྒོའི་འོག་ཏུ་སྲིད་པ་འཁོར་ལོ་ཆ་ལྔ་པའི་སྟེང་གི་གཡས་གཡོན་དུ་ཐུབ་དབང་འཁོར་ལོ་དཀར་པོ་རྩིབས་བརྒྱད། གཤམ་དུ། བརྩམ་པར་བྱ་ཞིང་སོགས་སུམ་བིད། གཡོན་སྒོའི་སྟེང་དུ་བཀྲ་ཤིས་གང་ཞིག་སོགས་དང་། ཕུན་སུམ་ཚོགས་པ་མངའ་བ་སོགས་ཚིགས་བཅད། ལྟག་ཏུ་གནོད་སྦྱིན་ལག་ན་གཞོང་ཐོགས་དང་། འོག་ཏུ་སྣོད་བཅུད་ཆགས་ཚུལ། ཞལ་ནང་ལྟའི་གཡས་སུ་ཆེད་བརྗོད་ཚིགས་བཅད་དང་། གཡོན་དུ་ཚིག་ལྷུག་པ་རྣམས་བྲིའོ། །གོང་སྨོས་ཕལ་ཆེར་འདུལ་བ་གནས་མལ་གྱི་གཞི་ལས་ཇི་ལྟར་འབྱུང་བའི་མཚན་ཉིད་དང་བཀོད་པ་ཕུན་སུམ་ཚོགས་པ་དཔྱོད་ལྡན་ཡོད་ན་འདི་ཁོ་ནས་ཀྱང་དད་པའི་པདྨོ་རྒྱས་པར་སྣང་ངོ་། །འོན་ཀྱང་བླུན་པོ་གསེར་དངུལ་གྱིས་མིག་བྲིད་པ་རྣམས་ཀྱིས་ནི་རྟོག་དཔྱོད་ཙམ་ཡང་ག་ལ་ཡོད།། །། ༈

[edit]

'bral spang ma'i rten bzhengs tshul/__ oM swa sti sid+d+haM/__'dir 'bral spang ma'i rten bzhengs tshul la/__thugs rten rnam rgyal lta bu phyag tshad dang ldan pa sor brgyad pa'i nang du/__sangs rgyas kyi 'phel gdung 'khrul med/__sdom pa gsum gyi bla ma brgyud pa'i mtshan sngags/__rdo rje slob dpon gong ma zhi bar gshegs pa mtshan nyid dang ldan pa'i gdung rus sAts+tshar bsgrubs pa dang /__dbu lo/__phyag sen bcas/__khyad par gsung rten rgyud sde bzhi'i rigs gtso bsdus kyi sngags dang /__sde snod dang rgyud sde thams cad kyi snying po ye d+harmA dang /__thub pa'i sngon gyi gso sbyong /__sdig pa ci yang mi bya zhing /__sogs mthing shog la gser gyis bris pa/__gdan khri'i mtshams su chos srung nor lha spyi'i snying po dang /__bkra shis dang 'dod gsol sh+lo ka gang rigs bcug__/bum sgor sku rten ston pa'i sku chung du phyag tshad dang ldan pa zhig gi mdzod spur ring bsrel gyi phras btab pa zhig bzhag ste/__de ltar sku gsung thugs yongs su rdzogs pa'i rten de nyid zag pa che chung 'dor skabs ma gtogs lus la bcangs shing bla ma mchod pa dang /__sems bskyed/__gso sbyong sogs kyi rten thams cad 'dis rung bas shin tu gal che ba yin no/__/zhes rab 'byams smra ba sum ti'i gsung rgyun ltar bris pa'o//____//__! maN+Dal 'bul ba'i 'bru la rlan yod pa gal che ste/__nges 'byung dang byang chub kyi sems skye ba'i rten 'brel khyad par can yin/__rdul phyi ba yang dag pa'i lta ba skye ba'i rten 'brel/__mgron bu bsre ba sngags kyi skabs zhing sngags lhan skyes kyi mkha' 'gro 'du ba'i rten 'brel te/__bde stong gi ye shes skye ba'i nyer len no/__/mda' rgyu dmar po bsre ba shes rab che ba'i rten 'brel du bzhed gsungs so//____//__! chos grwar tshogs pa'i tshe/__mchil l+h+wam phud/__rkang pa bkru/__kha bshal/__shin tu gus pas yan lag smad lnga sa la reg pa'i phyag gsum dal bur bya/__de nas bslab gral dang mthun par rang gi gding ba bting /__chos gos yod na bzhes/__med na gzan phabs te sdod/__bla ma la gdong phyogs pas pus mo btsugs/__thal mo sbyar ba sngon du 'gro bas maN+Dal sogs la 'jug pa ste/__'di dag gi rnam bzhag zhib par bla ma lnga bcu pa rtsa 'grel sogs las shes par bya ba gal che'o//____//__! btsan drIMs ra/__sgo steng du tshul shing /__g.yas g.yon du rgyal chen bzhi dang /__so sor kha byang tshig ring bi brta bcas/__g.yas sgo'i ltag tu gnod sbyin dang /__de'i gsham 'byung po gang dag sogs tshigs bcad sum bid/__sgo steng du rten 'brel bcu gnyis 'gags tshul tshig lhug dang /__chos rnams gang dag sogs tshigs bcad/__g.yas sgo'i 'og tu srid pa 'khor lo cha lnga pa'i steng gi g.yas g.yon du thub dbang 'khor lo dkar po rtsibs brgyad/__gsham du/__brtsam par bya zhing sogs sum bid/__g.yon sgo'i steng du bkra shis gang zhig sogs dang /__phun sum tshogs pa mnga' ba sogs tshigs bcad/__ltag tu gnod sbyin lag na gzhong thogs dang /__'og tu snod bcud chags tshul/__zhal nang lta'i g.yas su ched brjod tshigs bcad dang /__g.yon du tshig lhug pa rnams bri'o/__/gong smos phal cher 'dul ba gnas mal gyi gzhi las ji ltar 'byung ba'i mtshan nyid dang bkod pa phun sum tshogs pa dpyod ldan yod na 'di kho nas kyang dad pa'i pad+mo rgyas par snang ngo /_/'on kyang blun po gser dngul gyis mig brid pa rnams kyis ni rtog dpyod tsam yang ga la yod//____//__!