JKW-KABUM-22-ZA-007-020

🚧 This website is under continued development. We appreciate your patience!

Previous Text Back to Volume PageNext Text

བླ་མ་སྨྲ་བའི་སེང་གེའི་རྣལ་འབྱོར་ཤེས་རབ་མཆོག་སྦྱིན།

Wylie title	bla ma smra ba'i seng ge'i rnal 'byor shes rab mchog sbyin
Location	mkhyen brtse'i bka' 'bum Volume 22, sde tshan 7, Text 20, Pages 250-252 (Folios 33b3 to 34b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bla ma smra ba'i seng ge'i rnal 'byor shes rab mchog sbyin. In 'jam dbyangs mkhyen brtse'i dbang po'i bka' 'bum, Vol. 22: 250-252. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Deity	'jam dpal smra ba'i seng ge
Colophon	།ཞེས་པའང་དད་པ་དང་ལྡན་པས་ནན་དུ་བསྐུལ་བའི་རེ་བ་སྐོང་ཕྱིར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གང་ཤར་བྲིས་པ་དོན་དང་ལྡན་པར་གྱུར་ཅིག །
	zhes pa'ang dad pa dang ldan pas nan du bskul ba'i re ba skong phyir bya bral ba 'jam dbyangs mkhyen brtse'i dbang pos gang shar bris pa don dang ldan par gyur cig

1 Texts in this Section (sde tshan or chos tshan)

20 250-252	བླ་མ་སྨྲ་བའི་སེང་གེའི་རྣལ་འབྱོར་ཤེས་རབ་མཆོག་སྦྱིན། bla ma smra ba'i seng ge'i rnal 'byor shes rab mchog sbyin Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བླ་མ་སྨྲ་བའི་སེང་གེའི་རྣལ་འབྱོར་ཤེས་རབ་མཆོག་སྦྱིན་ཅེས་བྱ་བ་བཞུགས་སོ། །ན་མོ་གུ་རུ་བཱ་དི་སིཾ་ཧཱ་ཡ། སྐྱབས་སེམས་སྔོན་དུ་འགྲོ་བས། ཨོཾ་སྭ་བྷཱ་བ་སོགས། ཆོས་ཀུན་གཟོད་ནས་འོད་གསལ་སྟོང་པའི་ངང་། །རྟེན་ཅིང་འབྲེལ་འབྱུང་སྒྱུ་མའི་སྣང་ཆ་ལས། །ཡིད་འཕྲོག་བཀོད་པ་དུ་མས་མངོན་འཕགས་པ། །མགོན་པོ་ཀུན་ཏུ་གཟིགས་ཀྱི་ཞིང་ཁམས་དབུས། །པད་ཟླའི་གདན་ལ་རང་ཉིད་མཚོ་བྱུང་མ། །ནམ་མཁའི་མདངས་ཅན་ཁྲོ་འཛུམ་ལང་ཚོས་སྒེག །ཕྱག་གཉིས་ཐབས་ཤེས་རལ་གྲི་པུསྟི་འཛིན། །དར་དང་རིན་ཆེན་རྒྱན་རྫོགས་བཞེངས་པའི་སྟབས། །མདུན་གྱི་ནམ་མཁར་སེང་ཁྲི་པད་ཟླའི་སྟེང་། །རྩ་བའི་བླ་མ་རྗེ་བཙུན་འཇམ་པའི་དབྱངས། །སྨྲ་བའི་སེང་གེ་གུར་གུམ་གཞོན་ནུའི་མདོག །ཞི་ཞིང་འཛུམ་ལ་སྒེག་པའི་ངང་ཚུལ་ཅན། །ཕྱག་གཡས་ཤེས་རབ་རལ་གྲི་ནམ་མཁར་འཕྱར། །གཡོན་པས་ཨུཏྤ་ལར་གནས་གླེགས་བམ་བསྣམས། །ཟུར་ཕུད་ལྔ་ལྡན་དར་དང་རིན་ཆེན་བརྒྱན། །ཞབས་ཟུང་རྡོ་རྗེའི་སྐྱིལ་མོ་ཀྲུང་གིས་བཞུགས། །གསང་གསུམ་རྡོ་རྗེའི་ཡི་གེ་འབྲུ་གསུམ་ལས། །འོད་འཕྲོས་བླ་མ་སངས་རྒྱས་བྱང་ཆུབ་སེམས། །ཡི་དམ་ལྷ་ཚོགས་འཁོར་བཅས་སྤྱན་དྲངས་ཐིམ། །སྐྱབས་གནས་མ་ལུས་འདུས་པའི་ངོ་བོར་གྱུར། །འཇམ་དབྱངས་གཞོན་ནུ་སྲས་བཅས་རྒྱལ་བའི་ཡབ། །མཁྱེན་བརྩེའི་དབང་པོ་དཔལ་ལྡན་བླ་མ་ལ། །སྒོ་གསུམ་གུས་པས་ཕྱག་འཚལ་གསོལ་བ་འདེབས། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབ་བསགས་པའི་སྡིག་ལྟུང་མཐོལ་ཞིང་བཤགས། །བྱང་ཆུབ་སྤྱོད་པ་རྒྱ་མཚོར་རྗེས་ཡི་རངས། །ཆོས་འཁོར་བསྐོར་བཞིན་རྟག་པར་བཞུགས་སུ་གསོལ། །བསོད་ནམས་དངོས་ཀུན་བྱང་ཆུབ་སྙིང་པོར་བསྔོ། །མཎྜལ་རྒྱས་བསྡུས་གང་རིགས་དང་། གསོལ་འདེབས་ཅི་ཤེས་བྱ། སྔགས་བཟླ་བར་སྤྲོ་ན། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མུྃ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷཱིཿསྭཱ་ཧཱ། ཞེས་དང་། ཨོཾ་ཨཱཿགུ་རུ་མཉྫུ་གྷོ་ཥ་ཛྙཱ་ན་ཀྲྀ་པེནྡྲ་སརྦ་སིདྡྷི་མྨེ་པྲ་ཡཙྪ་ཧཱུྃ། ཞེས་པའང་ཅི་ནུས་བཟླ། བླ་མའི་གནས་གསུམ་རྡོ་རྗེའི་ཡི་གེའི་འོད། །རང་གི་གནས་གསུམ་རིམ་དང་ཅིག་ཅར་དུ། །ཐིམ་པས་སྒྲིབ་དག་དབང་དང་དངོས་གྲུབ་ཐོབ། །སོ་སོར་རྟོག་པའི་ཡེ་ཤེས་རྒྱས་པར་གྱུར། །ཅེས་བརྗོད་ཅིང་བསམ། མོས་གུས་དད་བརྒྱས་འདུད་པའི་སྤྱི་བོ་དང་། སྙིང་གའི་ཆུ་སྐྱེས་ཐིག་ལེར་རྟག་བཞུགས་ནས། །ཕྱི་ནང་འགལ་རྐྱེན་མཐའ་དག་ཞི་བ་དང་། །ཕན་བདེའི་ལེགས་ཚོགས་འཕེལ་བར་བྱིན་གྱིས་རློབས། །བསོད་ནམས་འདི་ཡིས་དཔལ་ལྡན་བླ་མ་མཆོག །རྗེ་བཙུན་འཇམ་པའི་དབྱངས་དང་དབྱེར་མེད་པས། །ཚེ་རབས་ཀུན་ཏུ་དགེ་བའི་བཤེས་མཛད་ནས། །དོན་གཉིས་ཡིད་བཞིན་འགྲུབ་པའི་བཀྲ་ཤིས་སྩོལ། །ཅེས་སོགས་བསྔོ་སྨོན་ཤིས་བརྗོད་ཀྱིས་མཚམས་སྦྱར་ཏེ་སྤྱོད་ལམ་ལ་འཇུག་པར་བྱའོ། །ཞེས་པའང་དད་པ་དང་ལྡན་པས་ནན་དུ་བསྐུལ་བའི་རེ་བ་སྐོང་ཕྱིར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གང་ཤར་བྲིས་པ་དོན་དང་ལྡན་པར་གྱུར་ཅིག ། ༈

[edit]

bla ma smra ba'i seng ge'i rnal 'byor shes rab mchog sbyin/ @#/_/bla ma smra ba'i seng ge'i rnal 'byor shes rab mchog sbyin ces bya ba bzhugs so/__/na mo gu ru bA di siM hA ya/__skyabs sems sngon du 'gro bas/__oM swa b+hA ba sogs/__chos kun gzod nas 'od gsal stong pa'i ngang /__/rten cing 'brel 'byung sgyu ma'i snang cha las/__/yid 'phrog bkod pa du mas mngon 'phags pa/__/mgon po kun tu gzigs kyi zhing khams dbus/__/pad zla'i gdan la rang nyid mtsho byung ma/__/nam mkha'i mdangs can khro 'dzum lang tshos sgeg__/phyag gnyis thabs shes ral gri pusti 'dzin/__/dar dang rin chen rgyan rdzogs bzhengs pa'i stabs/__/mdun gyi nam mkhar seng khri pad zla'i steng /__/rtsa ba'i bla ma rje btsun 'jam pa'i dbyangs/__/smra ba'i seng ge gur gum gzhon nu'i mdog__/zhi zhing 'dzum la sgeg pa'i ngang tshul can/__/phyag g.yas shes rab ral gri nam mkhar 'phyar/__/g.yon pas ut+pa lar gnas glegs bam bsnams/__/zur phud lnga ldan dar dang rin chen brgyan/__/zhabs zung rdo rje'i skyil mo krung gis bzhugs/__/gsang gsum rdo rje'i yi ge 'bru gsum las/__/'od 'phros bla ma sangs rgyas byang chub sems/__/yi dam lha tshogs 'khor bcas spyan drangs thim/__/skyabs gnas ma lus 'dus pa'i ngo bor gyur/__/'jam dbyangs gzhon nu sras bcas rgyal ba'i yab/__/mkhyen brtse'i dbang po dpal ldan bla ma la/__/sgo gsum gus pas phyag 'tshal gsol ba 'debs/__/lus dang longs spyod kun bzang mchod sprin 'bul/__/tshe rab bsags pa'i sdig ltung mthol zhing bshags/__/byang chub spyod pa rgya mtshor rjes yi rangs/__/chos 'khor bskor bzhin rtag par bzhugs su gsol/__/bsod nams dngos kun byang chub snying por bsngo/__/maN+Dal rgyas bsdus gang rigs dang /__gsol 'debs ci shes bya/__sngags bzla bar spro na/__oM hrIHd+hIHma me dI paM many+dzu shrI mu~M hrIHpradz+nyA war+d+ha ni hrIHd+hIHswA hA/__zhes dang /__oM AHgu ru many+dzu g+ho Sha dz+nyA na kr-i pen+d+ra sarba sid+d+hi m+me pra yats+tsha hU~M/__zhes pa'ang ci nus bzla/__bla ma'i gnas gsum rdo rje'i yi ge'i 'od/__/rang gi gnas gsum rim dang cig car du/__/thim pas sgrib dag dbang dang dngos grub thob/__/so sor rtog pa'i ye shes rgyas par gyur/__/ces brjod cing bsam/__mos gus dad brgyas 'dud pa'i spyi bo dang /__snying ga'i chu skyes thig ler rtag bzhugs nas/__/phyi nang 'gal rkyen mtha' dag zhi ba dang /__/phan bde'i legs tshogs 'phel bar byin gyis rlobs/__/bsod nams 'di yis dpal ldan bla ma mchog__/rje btsun 'jam pa'i dbyangs dang dbyer med pas/__/tshe rabs kun tu dge ba'i bshes mdzad nas/__/don gnyis yid bzhin 'grub pa'i bkra shis stsol/__/ces sogs bsngo smon shis brjod kyis mtshams sbyar te spyod lam la 'jug par bya'o/__/zhes pa'ang dad pa dang ldan pas nan du bskul ba'i re ba skong phyir bya bral ba 'jam dbyangs mkhyen brtse'i dbang pos gang shar bris pa don dang ldan par gyur cig__/__!