JKW-KABUM-22-ZA-007-016

🚧 This website is under continued development. We appreciate your patience!

Previous Text Back to Volume PageNext Text

བླ་མའི་རྣལ་འབྱོར་རྡོ་རྗེའི་ཡེ་ཤེས་འབེབས།

Wylie title	bla ma'i rnal 'byor rdo rje'i ye shes 'bebs
Location	mkhyen brtse'i bka' 'bum Volume 22, sde tshan 7, Text 16, Pages 234-238 (Folios 25b4 to 27b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bla ma'i rnal 'byor rdo rje'i ye shes 'bebs. In 'jam dbyangs mkhyen brtse'i dbang po'i bka' 'bum, Vol. 22: 234-238. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Colophon	།ཅེས་པའང་འཁོར་ལོའི་དབང་ཕྱུག་དཔལ་ལྡན་བླ་མ་དམ་པའི་སྐུའི་དབོན་མཁྱེན་བརྩེའི་གཏེར་ཆེན་བཤེས་གཉེན་ཆེན་པོ་པྲ་ཛྙཱ་དྷྭ་ཛས་ལྷ་རྫས་ཀྱི་མེ་ཏོག་དང་བཅས་ནན་དུ་བསྐུལ་བ་ལས། རང་ཉིད་ལ་ཟབ་མོའི་ལམ་དངོས་སུ་སྟོན་པའི་བླ་མ་དམ་པ་སྤྱི་ལའང་སྦྱར་ཆོག་པའི་དབང་དུ་བྱས་ཏེ། རྒྱུད་སྡེའི་དགོངས་པ་གྲུབ་པའི་མན་ངག་གིས་ཕྱེ་བའི་རྗེས་སུ་འབྲངས་ནས་ལམ་ཡོངས་སུ་རྫོགས་པའི་ཚུལ་དུ་རིག་འཛིན་གྱི་བཙུན་པ་མཉྫུ་གྷོ་ཥས་གྲོ་བཞིན་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་ཀྱི་ཉི་ཤར་ལ་གང་ཤར་ཤར་མར་སྤེལ་བ་དགེ་ལེགས་སུ་གྱུར་ཅིག།
	ces pa'ang 'khor lo'i dbang phyug dpal ldan bla ma dam pa'i sku'i dbon mkhyen brtse'i gter chen bshes gnyen chen po pra dz+nyA d+h+wa dzas lha rdzas kyi me tog dang bcas nan du bskul ba las/__rang nyid la zab mo'i lam dngos su ston pa'i bla ma dam pa spyi la'ang sbyar chog pa'i dbang du byas te/_rgyud sde'i dgongs pa grub pa'i man ngag gis phye ba'i rjes su 'brangs nas lam yongs su rdzogs pa'i tshul du rig 'dzin gyi btsun pa many+dzu g+ho Shas gro bzhin zla ba'i dmar phyogs mkha' 'gro 'du ba'i dus kyi nyi shar la gang shar shar mar spel ba dge legs su gyur cig

1 Texts in this Section (sde tshan or chos tshan)

16 234-238	བླ་མའི་རྣལ་འབྱོར་རྡོ་རྗེའི་ཡེ་ཤེས་འབེབས། bla ma'i rnal 'byor rdo rje'i ye shes 'bebs Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བླ་མའི་རྣལ་འབྱོར་རྡོ་རྗེའི་ཡེ་ཤེས་འབེབས་པ་ཞེས་བྱ་བ། ན་མོ་གུ་རུ་བྷྱཿ འདིར་ལམ་ཟབ་མོ་བླ་མའི་རྣལ་འབྱོར་ལ་བརྟེན་ནས་རྡོ་རྗེའི་ཡེ་ཤེས་ཀྱི་ཉི་མ་སྙིང་དབུས་སུ་འཆར་བ་འདོད་པས། གནས་དབེན་པར་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ་འདི་ལྟར་བསམ་པར་བྱའོ། །སྲས་བཅས་རྒྱལ་བ་ཀུན་གྱི་ཡེ་ཤེས་སྐུ། །བཀའ་དྲིན་མཉམ་མེད་ཁྱབ་བདག་འཁོར་ལོའི་མགོན། །སྤྱི་བོའི་པདྨོར་འབྲལ་མེད་རྟག་བཞུགས་ནས། །བདག་རྒྱུད་བྱིན་རླབས་ཆར་ཆེན་དབབ་ཏུ་གསོལ། །རྙེད་དཀའ་དོན་ལྡན་དལ་འབྱོར་རྟེན་ཐོབ་ཀྱང་། །དོ་ནུབ་ཙམ་ཡང་མི་འཆིའི་གདིང་མེད་ཅིང་། །ཤི་བའི་འོག་ཏུ་ལས་ཀྱི་རྗེས་འབྲངས་ནས། །འཁོར་བ་གར་སྐྱེས་སྡུག་བསྔལ་རང་བཞིན་ཕྱིར། །བདག་གཞན་སྲིད་ལས་ངེས་པར་འབྱུང་བའི་བློས། །མཆོག་གསུམ་འདུས་ཞལ་དཔལ་ལྡན་བླ་མ་ལ། །སྙིང་ནས་སྐྱབས་མཆི་སྨོན་དང་འཇུག་པ་ཡི། །བྱང་ཆུབ་སེམས་གཉིས་རྟག་ཏུ་བསྐྱེད་པར་བགྱི། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ་྅ཧཾ། གནས་ཡུལ་སྣོད་བཅུད་མི་དམིགས་སྟོང་པའི་ངང་། །རྣམ་ཀུན་མཆོག་ལྡན་རྡོ་རྗེའི་ཡེ་ཤེས་ནི། །དག་པའི་གཞན་དབང་སྐུ་དང་ཞིང་ཁམས་ཀྱི། །བཀོད་པ་ཚད་མེད་ཅིར་ཡང་འཆར་བ་ལས། །ཕྱི་སྣོད་བདེ་ཆེན་འོད་མཐའ་ཡས་པའི་ཞིང་། །ཡིད་འཕྲོག་ངོ་མཚར་སྣང་བ་འབྱམས་ཀླས་པའི། །མདུན་གྱི་ནམ་མཁར་མཆོད་སྤྲིན་རྒྱ་མཚོའི་དབུས། །སེང་གེས་བཏེགས་པའི་རིན་ཆེན་སྣ་ཚོགས་ཁྲིར། །པད་དཀར་འདབ་བརྒྱ་རབ་ཏུ་བཞད་པ་དང་། །ཐབས་ཤེས་ཉི་མ་ཟླ་བའི་དཀྱིལ་འཁོར་སྟེང་། །ཟུང་འཇུག་དང་པོའི་མགོན་པོ་རྡོ་རྗེ་སེམས། །རིགས་རྣམས་སྣ་ཚོགས་སྤྲོ་དང་བསྡུ་བའི་གཞི། །སྐྱབས་གནས་ཀུན་འདུས་དྲིན་ཅན་བླ་མ་ནི། །རྣམ་པ་ཁྱབ་བདག་དཔལ་ལྡན་རྡོ་རྗེ་འཆང་། །སྐུ་མདོག་ཨིནྡྲ་ནཱི་ལའི་ལྷུན་པོ་ལ། །ཉིན་བྱེད་བྱེ་བས་འཁྱུད་པའི་གཟི་བྱིན་འབར། །ཞལ་གཅིག་ཕྱག་གཉིས་རྡོ་རྗེ་དྲིལ་བུ་བསྣམས། །རང་འོད་ཡུམ་འཁྱུད་དར་དང་རིན་ཆེན་བརྒྱན། །ཞབས་གཉིས་རྡོ་རྗེ་པདྨའི་སྐྱིལ་ཀྲུང་གིས། །སྣང་སྟོང་འཇའ་ཟེར་འཁྲིགས་པའི་ཀློང་ན་རོལ། །སྐུ་ལས་སྐྱེས་པའི་འོད་ཀྱི་དཀྱིལ་འཁོར་དབུས། །རྩ་བརྒྱུད་བླ་མ་ཡི་དམ་ལྷ་ཚོགས་དང་། །གནས་གསུམ་དཔའ་བོ་དང་ནི་རྣལ་འབྱོར་མ། །ཆོས་སྲུང་ནོར་ལྷ་རྒྱ་མཚོ་སྤྲིན་ལྟར་གཏིབས། །སྐྱབས་ཀུན་འདུས་པའི་ངོ་བོར་ལྷམ་མེར་གསལ། །སྲས་བཅས་རྒྱལ་ཀུན་ཡབ་གཅིག་འཇ༷མ་པའི་དབྱང༷ས། །དེང་འདིར་བཤེས་གཉེན་མཆོག་གི་རྣམ་རོལ་ཅན། །མཁྱེན༷་བརྩེ༷འི་དབ༷ང་པོ༷་དཔལ་ལྡན་བླ་མ་ལ། །གུས་པས་ཕྱག་འཚལ་སྐྱབས་མཆི་གསོལ་བ་འདེབས། །ལུས་དང་ལོངས་སྤྱོད་མཆོད་སྤྲིན་རྒྱ་མཚོར་དབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རངས། །ཆོས་འཁོར་བསྐོར་བཞིན་བསྐལ་བརྒྱར་བཞུགས་གསོལ་འདེབས། །འདིས་མཚོན་དགེ་ཚོགས་བྱང་ཆུབ་སྙིང་པོར་བསྔོ། །ཁྱོད་ཐུགས་གཟོད་ནས་རྣམ་གྲོལ་རྫོགས་སངས་རྒྱས། །གསུང་གསང་བདེན་གཉིས་དབྱེར་མེད་དམ་པའི་ཆོས། །སྐུ་ནི་རིག་གྲོལ་མཐར་ཕྱིན་དགེ་འདུན་ཏེ། །ཡོན་ཏན་དགོས་འདོད་ཆར་འབེབས་ནོར་གྱི་ལྷ། །ཕྲིན་ལས་མཁའ་འགྲོ་ཆོས་སྐྱོང་འདུས་པའི་ཞལ། །དྲན་པས་སྲིད་ཞིའི་གདུང་བ་ཀུན་སེལ་བའི། །བསྔགས་བརྗོད་རྡོ་རྗེའི་ཚིག་གི་དབྱངས་སྙན་པོ། །རིག་པ་འཛིན་པའི་རྒྱུད་དུ་བླངས་པའི་ཚུལ། །ཡང་ཡང་ཡིད་ལ་གོམས་པ་ལས་བྱུང་བའི། །མི་ཕྱེད་གདུང་ཤུགས་དྲག་པོས་གསོལ་འདེབས་ན། བྱིན་རླབས་ཆར་ཆེན་ཕོབ་ཅིག་བླ་མ་རྗེ། །དལ་འབྱོར་རྙེད་དཀའ་མཐོང་བར་བྱིན་གྱིས་རློབས། །ནམ་འཆི་ངེས་མེད་དྲན་པར༴ ལས་འབྲས་བླང་དོར་ནུས་པར༴ སྲིད་ལས་ངེས་འབྱུང་སྐྱེ་བར༴ བྱང་ཆུབ་སེམས་གཉིས་འབྱོང་པར༴ ངེས་དོན་ལྟ་བ་རྟོགས་པར་བྱིན་གྱིས་རློབས། །ཅི་སྣང་ལྷ་སྐུར་ཤར་བར༴ ལྷར་སྣང་བདེ་ཆེན་འཆར་བར་བྱིན་གྱིས་རློབས། །གནས་སྐབས་ཉེ་རྒྱུའི་སྤྱོད་པ་ལ་བརྟེན་ནས། །སློབ་པའི་འོད་གསལ་ཟུང་འཇུག་མངོན་གྱུར་ཅིང་། །མཐར་ཐུག་སློབ་པ་མིན་པའི་འོད་གསལ་ལས། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །མདོར་ན་དམ་ཚིག་སྡོམ་པ་རྣམ་པར་དག །ཐོས་བསམ་སྒོམ་པའི་ཡོན་ཏན་ཕ་མཐར་སོན། །བླ་མའི་བྱིན་རླབས་སྙིང་ལ་ཞུགས་པ་ལས། །དོན་གཉིས་མྱུར་དུ་འགྲུབ་པར་བྱིན་གྱིས་རློབས། །ཨོཾ་ཨཱཿགུ་རུ་བཛྲ་དྷཱ་ར་ཧཱུྃ། ཞེས་པས་གསོལ་བཏབ་བླ་མ་རྡོ་རྗེ་འཆང་། །ཡབ་ཡུམ་མཉམ་སྦྱོར་བདེ་ཆེན་བདུད་རྩིའི་རྒྱུན། །བདག་གི་འཁོར་ལོ་རྣམ་བཞིར་སོན་པ་ལས། །སྒྲིབ་དག་དབང་དང་བྱིན་རློབས་དངོས་གྲུབ་ཐོབ། །མཐར་ནི་སྐྱབས་ཡུལ་འོད་ཞུ་རང་ཉིད་ལ། །ཐིམ་པས་རང་གི་གཉུག་མའི་སྒོ་གསུམ་དང་། །ཁྱབ་བདག་བླ་མའི་གསང་གསུམ་དབྱེར་མེད་ངང་། །གསལ་སྟོང་ཟུང་འཇུག་གདོད་མའི་རང་ཞལ་བལྟ། །དགེ་བ་འདི་ཡིས་བདག་སོགས་སེམས་ཅན་ཀུན། །འདི་ནས་བཟུང་སྟེ་བྱང་ཆུབ་སྙིང་པོའི་བར། །དཔལ་ལྡན་བླ་མས་འབྲལ་མེད་རྗེས་བཟུང་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པའང་འཁོར་ལོའི་དབང་ཕྱུག་དཔལ་ལྡན་བླ་མ་དམ་པའི་སྐུའི་དབོན་མཁྱེན་བརྩེའི་གཏེར་ཆེན་བཤེས་གཉེན་ཆེན་པོ་པྲ་ཛྙཱ་དྷྭ་ཛས་ལྷ་རྫས་ཀྱི་མེ་ཏོག་དང་བཅས་ནན་དུ་བསྐུལ་བ་ལས། རང་ཉིད་ལ་ཟབ་མོའི་ལམ་དངོས་སུ་སྟོན་པའི་བླ་མ་དམ་པ་སྤྱི་ལའང་སྦྱར་ཆོག་པའི་དབང་དུ་བྱས་ཏེ། རྒྱུད་སྡེའི་དགོངས་པ་གྲུབ་པའི་མན་ངག་གིས་ཕྱེ་བའི་རྗེས་སུ་འབྲངས་ནས་ལམ་ཡོངས་སུ་རྫོགས་པའི་ཚུལ་དུ་རིག་འཛིན་གྱི་བཙུན་པ་མཉྫུ་གྷོ་ཥས་གྲོ་བཞིན་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་ཀྱི་ཉི་ཤར་ལ་གང་ཤར་ཤར་མར་སྤེལ་བ་དགེ་ལེགས་སུ་གྱུར་ཅིག། །། ༈

[edit]

bla ma'i rnal 'byor rdo rje'i ye shes 'bebs/ @#/_/bla ma'i rnal 'byor rdo rje'i ye shes 'bebs pa zhes bya ba/__na mo gu ru b+h+yaH__'dir lam zab mo bla ma'i rnal 'byor la brten nas rdo rje'i ye shes kyi nyi ma snying dbus su 'char ba 'dod pas/__gnas dben par bde ba'i stan la bsam gtan gyi spyod lam dang ldan pas 'dug ste 'di ltar bsam par bya'o/__/sras bcas rgyal ba kun gyi ye shes sku/__/bka' drin mnyam med khyab bdag 'khor lo'i mgon/__/spyi bo'i pad+mor 'bral med rtag bzhugs nas/__/bdag rgyud byin rlabs char chen dbab tu gsol/__/rnyed dka' don ldan dal 'byor rten thob kyang /__/do nub tsam yang mi 'chi'i gding med cing /__/shi ba'i 'og tu las kyi rjes 'brangs nas/__/'khor ba gar skyes sdug bsngal rang bzhin phyir/__/bdag gzhan srid las nges par 'byung ba'i blos/__/mchog gsum 'dus zhal dpal ldan bla ma la/__/snying nas skyabs mchi smon dang 'jug pa yi/__/byang chub sems gnyis rtag tu bskyed par bgyi/__/oM shU n+ya tA dz+nyA na badz+ra swa b+hA wa At+ma ko \u0f85haM/__gnas yul snod bcud mi dmigs stong pa'i ngang /__/rnam kun mchog ldan rdo rje'i ye shes ni/__/dag pa'i gzhan dbang sku dang zhing khams kyi/__/bkod pa tshad med cir yang 'char ba las/__/phyi snod bde chen 'od mtha' yas pa'i zhing /__/yid 'phrog ngo mtshar snang ba 'byams klas pa'i/__/mdun gyi nam mkhar mchod sprin rgya mtsho'i dbus/__/seng ges btegs pa'i rin chen sna tshogs khrir/__/pad dkar 'dab brgya rab tu bzhad pa dang /__/thabs shes nyi ma zla ba'i dkyil 'khor steng /__/zung 'jug dang po'i mgon po rdo rje sems/__/rigs rnams sna tshogs spro dang bsdu ba'i gzhi/__/skyabs gnas kun 'dus drin can bla ma ni/__/rnam pa khyab bdag dpal ldan rdo rje 'chang /__/sku mdog in+d+ra nI la'i lhun po la/__/nyin byed bye bas 'khyud pa'i gzi byin 'bar/__/zhal gcig phyag gnyis rdo rje dril bu bsnams/__/rang 'od yum 'khyud dar dang rin chen brgyan/__/zhabs gnyis rdo rje pad+ma'i skyil krung gis/__/snang stong 'ja' zer 'khrigs pa'i klong na rol/_/sku las skyes pa'i 'od kyi dkyil 'khor dbus/__/rtsa brgyud bla ma yi dam lha tshogs dang /__/gnas gsum dpa' bo dang ni rnal 'byor ma/__/chos srung nor lha rgya mtsho sprin ltar gtibs/__/skyabs kun 'dus pa'i ngo bor lham mer gsal/__/sras bcas rgyal kun yab gcig 'jaXm pa'i dbyangaXs/__/deng 'dir bshes gnyen mchog gi rnam rol can/__/mkhyenaX brtseX'i dbaXng poX dpal ldan bla ma la/__/gus pas phyag 'tshal skyabs mchi gsol ba 'debs/__/lus dang longs spyod mchod sprin rgya mtshor dbul/__/sdig ltung kun bshags dge la rjes yi rangs/__/chos 'khor bskor bzhin bskal brgyar bzhugs gsol 'debs/__/'dis mtshon dge tshogs byang chub snying por bsngo/__/khyod thugs gzod nas rnam grol rdzogs sangs rgyas/__/gsung gsang bden gnyis dbyer med dam pa'i chos/__/sku ni rig grol mthar phyin dge 'dun te/__/yon tan dgos 'dod char 'bebs nor gyi lha/__/phrin las mkha' 'gro chos skyong 'dus pa'i zhal/__/dran pas srid zhi'i gdung ba kun sel ba'i/__/bsngags brjod rdo rje'i tshig gi dbyangs snyan po/__/rig pa 'dzin pa'i rgyud du blangs pa'i tshul/__/yang yang yid la goms pa las byung ba'i/__/mi phyed gdung shugs drag pos gsol 'debs na/__byin rlabs char chen phob cig bla ma rje/__/dal 'byor rnyed dka' mthong bar byin gyis rlobs/__/nam 'chi nges med dran par=__las 'bras blang dor nus par=__srid las nges 'byung skye bar=__byang chub sems gnyis 'byong par=__nges don lta ba rtogs par byin gyis rlobs/__/ci snang lha skur shar bar=__lhar snang bde chen 'char bar byin gyis rlobs/__/gnas skabs nye rgyu'i spyod pa la brten nas/__/slob pa'i 'od gsal zung 'jug mngon gyur cing /__/mthar thug slob pa min pa'i 'od gsal las/__/zung 'jug go 'phang thob par byin gyis rlobs/__/mdor na dam tshig sdom pa rnam par dag__/thos bsam sgom pa'i yon tan pha mthar son/__/bla ma'i byin rlabs snying la zhugs pa las/__/don gnyis myur du 'grub par byin gyis rlobs/__/oM AHgu ru badz+ra d+hA ra hU~M/__zhes pas gsol btab bla ma rdo rje 'chang /__/yab yum mnyam sbyor bde chen bdud rtsi'i rgyun/__/bdag gi 'khor lo rnam bzhir son pa las/__/sgrib dag dbang dang byin rlobs dngos grub thob/__/mthar ni skyabs yul 'od zhu rang nyid la/__/thim pas rang gi gnyug ma'i sgo gsum dang /__/khyab bdag bla ma'i gsang gsum dbyer med ngang /__/gsal stong zung 'jug gdod ma'i rang zhal blta/__/dge ba 'di yis bdag sogs sems can kun/__/'di nas bzung ste byang chub snying po'i bar/__/dpal ldan bla mas 'bral med rjes bzung nas/__/don gnyis lhun gyis grub pa'i bkra shis shog__/ces pa'ang 'khor lo'i dbang phyug dpal ldan bla ma dam pa'i sku'i dbon mkhyen brtse'i gter chen bshes gnyen chen po pra dz+nyA d+h+wa dzas lha rdzas kyi me tog dang bcas nan du bskul ba las/__rang nyid la zab mo'i lam dngos su ston pa'i bla ma dam pa spyi la'ang sbyar chog pa'i dbang du byas te/_rgyud sde'i dgongs pa grub pa'i man ngag gis phye ba'i rjes su 'brangs nas lam yongs su rdzogs pa'i tshul du rig 'dzin gyi btsun pa many+dzu g+ho Shas gro bzhin zla ba'i dmar phyogs mkha' 'gro 'du ba'i dus kyi nyi shar la gang shar shar mar spel ba dge legs su gyur cig/__//__!__