JKCL-KABUM-11-DA-067

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 11, Text 67, Pages (Folios 1a to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: . Bir, H.P.: Khyentse Labrang, 2012.
Genre	Protector Rituals - gsol mchod

1 Texts in this Section (sde tshan or chos tshan)

343-355	སྨན་བསང་བདུད་རྩིའི་ཆར་འབེབས། sman bsang bdud rtsi'i char 'bebs Smoke Offerings - bsangs mchod - lha bsang	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །སྨན་བསང་བདུད་རྩིའི་ཆར་འབེབས་ཞེས་བྱ་བ་བཞུགས་སོ། ། ཨོཾ་སྭསྟི། རིག་པའི་རྒྱལ་པོ་སྨན་གྱི་བླ་མ་དང་། །རྩ་གསུམ་ཀུན་འདུས་ཨོ་རྒྱན་བླ་མ་ལ། །གུས་པས་བཏུད་ནས་བསང་མཆོད་ཉུང་དུ་བྲི། །སྨན་སྐྱོང་སྲུང་མས་དགྱེས་པའི་ཞལ་བཟང་ངོམས། །དེ་ལ་འདིར་ཞི་བྱེད་སྨན་གྱི་ལས་དང་རྗེས་སུ་འབྲེལ་བའི་རྩ་གསུམ་ལྷ་ཚོགས་ལ་བསང་མཆོད་འབུལ་བར་འདོད་པས། ཕྱེ་ཕུད་མཆོད་གཏོར་གསེར་སྐྱེམས་ཤིང་རྩི་དྲི་བཟང་གི་དུད་པ་དང་དར་དཀར་མདའ་དར་རྔ་གླིང་རོལ་མོའི་སྒྲ་དང་བཅས། ཨོཾ་ལས་རིན་པོ་ཆེའི་སྣོད་ཡངས་པར། །ཨཱཿལས་བསང་རྫས་ཟག་མེད་བདུད་རྩི་ཆེ། །ཧཱུྃ་གིས་གང་འདོད་ནམ་མཁའ་མཛོད་ཀྱི་སྤྲིན། །རྒྱ་ཆེན་རྒྱུན་མི་ཆད་པའི་འཁོར་ལོར་གྱུར། །ཨོཾ་ཨཱཿཧཱུྃ། ལན་གསུམ་དང་ནམ་མཁའ་མཛོད་ཀྱི་སྔགས་ལན་གསུམ། བཛྲ་སྥ་ར་ཎ་ཁཾ་གྱིས་རྒྱས་པར་སྤེལ། སྤྱན་འདྲེན་པ་ནི། ཀྱེ། བླ་མ་རིགས་འདུས་སྨན་རྒྱལ་རྡོ་རྗེ་འཆང་། །རིགས་ལྔ་ཡབ་ཡུམ་དབང་ཆེན་རྟ་མཆོག་དཔལ། །རྡོ་རྗེ་ཕག་མོ་མཁའ་འགྲོ་སྡེ་ལྔ་དང་། །ཞང་བློན་ཆེན་པོ་རྡོ་རྗེ་བདུད་འདུལ་སོགས། །རྩ་གསུམ་ལྷ་ཚོགས་བསང་མཆོད་གནས་འདིར་གཤེགས། བཛྲ་ས་མཱ་ཡ་ཛཿཞེས་སྤྱན་དྲངས། རིན་ཆེན་སེང་ཁྲི་པད་ཟླ་ཉི་མ་དང་། །རོ་གདན་དར་ཟབ་འབོལ་ཆེན་བརྩེགས་པ་སོགས། །རང་རང་དགྱེས་པའི་གདན་ཁྲི་ལ་བཞུགས་ནས། །དགྱེས་པའི་ཞལ་བཟང་ངོམ་བཞིན་མཆོད་པ་བཞེས། །པདྨ་ཀ་མ་ལཱ་ཡ་སྟྭཾ། ཨོཾ་གཙང་མར་སྦྱར་བའི་མཆོད་པ་རྣམ་མང་ནི། །ལྷ་ཡི་ཆུ་བོའི་མཆོད་ཡོན་མཚོ་ལྟར་འཁྱིལ། །དག་ཅིང་དྲི་བྲལ་ཞབས་བསིལ་གངྒའི་རྒྱུན། །ཐང་སྐྱེས་ཆུ་སྐྱེས་རྣམ་བཀྲའི་མེ་ཏོག་ཚལ། །སྦྱར་དང་ལྷན་སྐྱེས་སྤོས་དུད་སྤྲིན་ལྟར་གཏིབ། །ཉི་ཟླ་རིན་ཆེན་སྒྲོན་མེའི་སྣང་གསལ་དང་། །ག་བུར་ཙནྡན་གུར་གུམ་དྲི་བཟང་ཆབ། །རོ་བརྒྱ་ལྡན་པའི་ཞལ་ཟས་རྣམ་མང་པོ། །རྔ་ཆེན་སིལ་སྙན་དུང་གླིང་རོལ་མོའི་ཚོགས། །འབུལ་ལོ་བཞེས་ནས་མཆོག་ཐུན་དངོས་གྲུབ་སྩོལ། །ཁྱད་པར་དབྱིངས་ཕྱུག་སྤྱན་མའི་ཐབ་ཁུང་དུ། དམ་ཚིག་ཌཱ་ཀིའི་ཤུགས་ཀྱིས་བསྐུལ་བ་ལས། །ལྷ་མོ་གོས་དཀར་འབར་བའི་ཀློང་ཆེན་པོར། །རིན་ཆེན་འབྲུ་སྨན་དར་ཟབ་བཟའ་བཏུང་སོགས། ལྷ་ཤིང་ཤུག་པ་ཙནྡན་ཨ་ག་རུ། །ཤ་ཀ་རུ་དང་དུ་རུ་ཀ་དང་ནི། །སྤོས་དཀར་མཁན་སེར་བ་ལུ་ཕུར་དཀར་སོགས། །བཟང་ཤིང་སྣ་ཚོགས་རྣམས་དང་སྦྱར་བ་ཉིད། །བསྲེགས་པའི་དུད་སྤྲིན་གཟུགས་ཀྱི་ལྷ་མོ་ནི། །ཕྱག་གཡས་ཁྲུས་བུམ་གཡོན་པས་སྨན་གཞོང་བསྣམས། །མི་གཙང་རྨུ་གབ་རོ་བག་གྲིབ་ལ་སོགས། །བཀྲུས་ཤིང་སྨན་སྤྲིན་དཔག་མེད་འཐིབ་པ་ལས། །ལྷ་ཀླུ་ས་བདག་གཉན་གྱི་ནད་རྣམས་གསོས། །འགོ་བའི་རིམས་སོགས་བཞི་བརྒྱ་རྩ་བཞིའི་ནད། །ཞི་བྱེད་སྨན་གྱི་ལྷ་མོའི་ཐུགས་རྗེའི་ཆར། །དལ་གྱིས་འབེབས་པས་སྣོད་བཅུད་དགེ་མཚན་རྒྱས། །དུད་སྤྲིན་སྤོས་ཀྱི་གླང་པོའི་གོམ་སྟབས་ལས། །གཟུགས་སྒྲ་དྲི་རོ་རེག་བྱ་འདོད་ཡོན་སྤྲོ། །རེ་རེས་བྱེ་བ་བརྒྱ་ཕྲག་མང་པོ་ཡི། །ས་དང་བར་སྣང་མ་ལུས་ཀུན་ཏུ་ཁྱབ། །གཞན་ཡང་གླིང་བཞི་གླིང་ཕྲན་རི་རབ་དང་། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །གཏེར་ཆེན་བུམ་པ་བཟང་དང་དཔག་བསམ་ཤིང་། །མ་རྨོས་ལོ་ཏོག་འདོད་པ་འཇོ་བའི་བ། །རྟ་མཆོག་སྤུ་སྡུག་ཤིན་ཏུ་མཛེས་པ་ནི། །དཀར་སེར་དམར་སྔོ་ནག་དང་མཚལ་ལུ་པོ། །སྤྲིན་གྱི་ཤུགས་འཆང་ཅང་ཤེས་ཚོགས་རྣམས་ལ། །རིན་ཆེན་སྒ་སྲབ་མཛེས་པའི་རྒྱན་ཆ་དང་། །གླང་ཆེན་མ་ཧེ་བ་གླང་གནག་ལུག་ར། །ལྷ་གཡག་དཀར་ནག་ཚོགས་རྣམས་སྤུ་ཞོལ་བརྗིད། རྣོ་བའི་རྭ་གཉིས་གནམ་དུ་བསྙེགས་པར་བརྐྱང་། །ལྕེ་དམར་གློག་འོད་ལྟ་བུར་འཕྲོ་བ་ཡིས། །འཇིགས་པའི་ངར་སྒྲ་དང་བཅས་ཕྱོགས་ཀུན་རྒྱུག །ཁྱི་ནག་དོམ་བུ་མང་པོས་ཁྲག་རྗེས་གཅོད། །ཤ་རྐྱང་རྣ་དགོ་བསེ་རུ་ལ་སོགས་པ། །མཛེས་ཤིང་ཡིད་དུ་འོང་བའི་རི་དྭགས་དང་། །གཤོག་རྩལ་ལྷབ་ཞིང་སྐད་སྙན་སྒྲོགས་པ་ཡི། །བྱ་དང་བྱེའུ་བསྒྲང་ལས་འདས་པ་དང་། །ཡན་ལག་བརྒྱད་ལྡན་རོལ་མཚོ་འཁྱིལ་པའི་ནང་། །ཀླུ་དབང་ཀླུ་ནོར་དཀོར་ཆས་གཏམས་པ་དང་། །དར་ཟབ་སྣ་ཚོགས་གསེར་དངུལ་བཻཌཱུཪྻ། །མུ་ཏིག་བྱེ་རུ་མུ་མེན་ཕ་ལམ་དང་། །ཚ་གྲང་ནད་སེལ་བཟང་དྲུག་སྨན་ལ་སོགས། །རོ་ནུས་ལྡན་པའི་སྨན་སྣ་མང་པོ་དང་། །དགོས་འབྱུང་བསམ་འཕེལ་དབང་གི་རྒྱལ་པོ་སོགས། །བརྟན་གཡོའི་དངོས་པོ་ཁྱད་པར་འཕགས་པ་ཡི། །བསང་མཆོད་དམ་པ་འབུལ་གྱིས་དགྱེས་པར་བཞེས། །ཕྱེ་མར་གངས་ཀྱི་རི་བོ་ལྟར་སྤུངས་ཤིང་། །དཀར་མངར་གསེར་སྐྱེམས་མ་དྲོས་མཚོ་ལྟར་འཁྱིལ། །རོལ་མོའི་ཚོགས་ཀྱིས་སྲིད་གསུམ་ཀུན་ཏུ་ཁྱབ། །གདུགས་དང་རྒྱལ་མཚན་འཕན་ཆེན་བླ་བྲེ་ཆེ། །བཀྲ་ཤིས་དུང་གི་སྒྲ་ཆེན་ཕྱོགས་བརྒྱར་སྒྲོགས། །དེ་ལྟར་ཀུན་བཟང་མཆོད་པའི་སྤྲིན་ཆེན་པོ། །བསང་དུད་ཟག་མེད་བདུད་རྩིའི་སྤྲིན་ཕུང་འདིས། །ཕྱོགས་བཅུ་དུས་གསུམ་བསྐལ་བཟང་སངས་རྒྱས་དང་། །རིགས་གསུམ་མགོན་པོ་སེམས་དཔའ་སེམས་མའི་ཚོགས། །གསུང་རབ་དམ་པའི་ཆོས་ཀྱི་གཏེར་ཆེན་དང་། །ཐེག་པ་ཆེ་ཆུང་དགེ་འདུན་ཐམས་ཅད་ཀྱིས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་རྒྱུ་འབྲས་ནད་རྣམས་འཇོམས་མཛད་པ། །ཐུགས་བསྐྱེད་རྨད་བྱུང་བདེ་གཤེགས་མཚན་ལེགས་དང་། །གཟི་བརྗིད་སྒྲ་དབྱངས་གསེར་བཟང་དྲི་མེད་དཔལ། །མྱ་ངན་མེད་དང་ཆོས་གྲགས་རྒྱ་མཚོའི་དབྱངས། །མངོན་མཁྱེན་རྒྱལ་པོ་བཻཌཱུཪྻ་ཡི་འོད། །ཤཱཀྱ་ཐུབ་པ་འཇམ་དབྱངས་སྐྱབས་གྲོལ་དང་། །ཕྱག་རྡོར་ལ་སོགས་བདེ་གཤེགས་སྲས་བཅས་རྣམས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །རིགས་འདུས་བླ་མ་སྨན་རྒྱལ་རྡོ་རྗེ་འཆང་། །རྣམ་སྣང་རིན་འབྱུང་སྣང་མཐའ་དོན་ཡོད་གྲུབ། །དབྱིངས་ཕྱུག་སྤྱན་མ་མཱ་ཀཱི་གོས་དཀར་དང་། །དམ་ཚིག་སྒྲོལ་མ་ལ་སོགས་རིགས་ལྔའི་ཚོགས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །བདེ་གཤེགས་ཞི་བ་བཞི་བཅུ་རྩ་གཉིས་དང་། །འབར་བ་ཁྲག་འཐུང་ལྔ་བཅུ་རྩ་བརྒྱད་ལྷ། །ཞི་དང་ཁྲོ་བོའི་རོལ་གར་མཐའ་ཡས་དང་། །དཔའ་བོ་མཁའ་འགྲོ་དམ་ཅན་སྲུང་མའི་ཚོགས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །སྨན་རྒྱུད་ལེགས་སྟོན་ཆོས་ཀྱི་མཛོད་འཛིན་པ། །དྲང་སྲོང་ཆེན་པོ་ཡིད་ལས་སྐྱེས་པ་དང་། །རིག་པའི་ཡེ་ཤེས་ཆེན་པོ་རྣམ་པ་གཉིས། །རྒྱུན་ཤེས་ནབས་སོ་སྐྱེས་དང་ཐང་ལ་འབར། །དཀའ་གཉིས་སྤྱོད་དང་འདྲོ་སྐྱོང་མེ་བཞིན་འཇུག །ལུག་ནག་རྒྱ་སྐྱེགས་སྣ་དང་ཟླ་བའི་མཆོག །ལན་ཚྭའི་མཆོག་དང་དཔལ་ལྡན་ཕྲེང་བ་དང་། །དཔལ་ལྡན་ཕུན་ཚོགས་དྲང་སྲོང་བཤོལ་འགྲོ་སྐྱེས། །ཉི་སྙིང་ཟླ་བའི་འོད་ཟེར་ཀུན་དགའ་བོ། །འཚོ་བྱེད་གཞོན་ནུ་ཀླུ་སྒྲུབ་སྙིང་པོ་དང་། །དཔལ་ལྡན་དགའ་དང་ཟླ་མངོན་བཻ་རོའི་ཞབས། །མཁན་ཆེན་ཞི་འཚོ་ཁྲི་སྲོང་ལྡེའུ་བཙན། །ཆོས་རྒྱལ་རིམ་བྱོན་དཱི་པཾ་ཀ་ར་དང་། །གྲྭ་པ་མངོན་ཤེས་དབུས་པ་དར་གྲགས་ཞབས། །དགེ་སློང་དཀོན་སྐྱབས་གཡུ་ཐོག་ཡོན་ཏན་མགོན། །ཡེ་ཤེས་གཟུངས་དང་འབོ་སེ་ཀུན་དགའ་དང་། །ཟླ་འོད་གཞོན་ནུ་དྭགས་པོ་ཙནྡྲ་པ། །འཚོ་མཛད་རྒྱལ་པོ་ཚར་ལུང་གཡུ་ཐོག་པ། །བན་མོ་ག་ག་བྲང་ཏི་དཀོན་མཆོག་སྐྱབས། །འཇམ་དཔལ་རྒྱལ་མཚན་ཉི་མགོན་གཟི་བརྗིད་འབར། །སེམས་དཔའ་ཞང་སྟོན་དགེ་འབུམ་སྨན་མོ་ཆེ། །དཔལ་ལྡན་གཞོན་ནུ་སངས་རྒྱས་རིན་ཆེན་དང་། །བཛྲ་དོན་གྲུབ་རྒྱལ་མཚན་དཀོན་མཆོག་སྐྱབས། །དཔལ་ལྡན་འཚོ་བྱེད་ཟུལ་ཕུ་སྨན་མོ་ཆེ། །བསོད་དབང་མཚུངས་མེད་རི་ཁྲོད་ཟུར་མཁར་རྗེ། །དཀོན་དཔལ་ནམ་མཁའ་བདུད་འཇོམས་མངྒའི་མཚན། །ཆོས་དབྱིངས་རང་གྲོལ་རྡོ་རྗེ་ཐོགས་མེད་རྩལ། །འགྱུར་མེད་རྡོ་རྗེ་རིན་རྣམ་ཆོས་ཉིད་མཚན། །པདྨ་བཤེས་གཉེན་ཀུན་བཟང་བདུད་འདུལ་དང་། །མཆོག་གྲུབ་བློ་གསལ་དཔལ་བཟང་བྱམས་མགོན་གྲུབ། །ཆོས་དབང་དྷརྨ་ཀཱི་རྟི་དཀོན་ལྷུན་དང་། །ཕྲིན་བཟང་བསྟན་འཛིན་དཀོན་མཆོག་དོན་གྲུབ་དང་། །བསྟན་པའི་ཉིན་བྱེད་མཆོག་དགའ་འོད་གསལ་རྗེ། །མཁྱེན་བརྩེའི་དབང་པོ་བློ་གྲོས་མཐའ་ཡས་ཞབས། །མི་ཕམ་རྣམ་པར་རྒྱལ་བའི་མཚན་ཅན་སོགས། །ཁྱད་པར་ཟུར་བྱང་བརྒྱུད་པའི་ཕྲེང་མཛེས་ཀྱི། །དྲང་སྲོང་འཚོ་བྱེད་བརྒྱུད་པའི་བླ་མའི་ཚོགས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །གྲུབ་པའི་སྦྱོར་བ་བཅུད་ལེན་སྲོལ་འབྱེད་ཆེ། །བྱཱ་ད་ལི་དང་ཀླུ་སྒྲུབ་ཀར་ཎ་རི། །ཡེ་ཤེས་ཌཱཀྐཱི་མཁས་གྲུབ་ཨོ་རྒྱན་པ། །ཀུན་མཁྱེན་རང་བྱུང་རྡོ་རྗེ་ལ་སོགས་པ། །མན་ངག་བརྒྱུད་པའི་བླ་མའི་ཚོགས་རྣམས་ཀྱིས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། ཀྱེ། བདུད་རྩི་གྲུབ་པའི་སློབ་དཔོན་བདེ་བ་ཆེ། །པདྨ་འབྱུང་གནས་གཉགས་ཆེན་ཛྙཱ་ན་སོགས། །ངོ་མཚར་གྲུབ་པའི་སློབ་དཔོན་ཚོགས་རྣམས་དང་། །དཔལ་ཆེན་ཆེ་མཆོག་གནམ་ཞལ་དབྱིངས་ཕྱུག་མ། །མཁའ་འགྲོའི་གཙོ་མོ་དཔལ་ལྡན་ཕྲེང་བ་སོགས། །སྣོད་བཅུད་གདོད་ནས་དག་པའི་བདུད་རྩི་ཆེའི། །དཀྱིལ་འཁོར་ལྷ་ཚོགས་བཀའ་སྡོད་བཅས་པ་དང་། །དཔལ་ལྡན་མགོན་པོ་རྡོ་རྗེ་ནག་པོ་ཆེ། །འདོད་ཁམས་དབང་ཕྱུག་མ་ཧཱ་ཀཱ་ལི་དང་། །ཞིང་སྐྱོངས་སྟོབས་འཕྲོག་དབང་པོ་དུར་ཁྲོད་བདག །ཚངས་དང་དབང་ཕྱུག་བརྒྱ་བྱིན་ཕྱོགས་སྐྱོང་དང་། །འཇིགས་བྱེད་དགུ་དང་མ་མོ་འབར་མ་བདུན། །རྒྱལ་ཆེན་སྡེ་བཞི་གཟའ་དང་རྒྱུ་སྐར་ཚོགས། །ཀླུ་རྒྱལ་ཝཱ་རུ་ཎ་དང་འཇོག་པོ་སོགས། །གཙང་རིགས་དཔལ་མགོན་དཀར་ཕྱོགས་སྐྱོང་རྣམས་དང་། །དེ་བཞིན་བོད་ཁམས་སྐྱོང་བའི་བརྟན་མ་ཆེ། །རྡོ་རྗེ་གཡུ་སྒྲོན་ཐང་ལྷ་སྤོམ་ར་གཉེན། །གེ་སར་རྡོ་རྗེ་ཚེ་ཡི་རྒྱལ་པོ་སོགས། །ལྷ་ཀླུ་གཞི་བདག་དགེ་བསྙེན་རྨུ་བདུད་བཙན། །རྒྱལ་པོ་གིང་ཆེན་གནོད་སྦྱིན་ཐེའུ་རང་སོགས། །ཁྱད་པར་སྨན་སྲུང་ལྷ་མོ་དཀར་མོ་ནི། །ཕྱག་ན་རིན་ཆེན་པི་ཝཾ་སྒྲོགས་པ་དང་། །དེ་བཞིན་སེར་མོ་བྱ་རྒོད་གླིང་བུ་བསྒྱུར། །དམར་མོ་མི་རྐང་གླིང་བུ་ཙེ་རེ་རེ། །ལྗང་མོ་དངུལ་དཀར་མེ་ལོང་སྟོན་པ་དང་། །སྨན་གྱི་ལྷ་མོ་ཆེན་མོ་རྣམ་པ་བརྒྱད། །དཀར་མོ་མ་བདུན་དུས་ཚོད་རྒྱུ་བའི་ལྷ། །རྩི་ཤིང་སྨན་དང་ནགས་ཀྱི་ལྷ་མོའི་ཚོགས། །སྨན་གྱི་གཉེར་འཛིན་བྱེ་བ་བསམ་ལས་འདས། །བཀའ་སྲུང་ཀུན་གྱི་སྡེ་དཔོན་གནོད་སྦྱིན་ཆེ། །ཞང་བློན་ཆེན་པོ་རྡོ་རྗེ་བདུད་འདུལ་དང་། །ཨེ་ཀ་ཛ་ཊཱི་ཁྱབ་འཇུག་ལྕེ་སྤྱང་གདོང་། །ཤན་པ་དམར་པོ་སྲོག་གི་སྤུ་གྲི་ཆེ། །སྲིན་མོ་བདུད་མོ་སྲོག་བདག་ལ་སོགས་པ། །བཀའ་སྡོད་བྲན་གཡོག་སྤྲུལ་དང་ཡང་འཁོར་བཅས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །ཇི་འཇིགས་ལ་སོགས་གནོད་སྦྱིན་བཅུ་གཉིས་དང་། །ལེགས་ཉེས་མངོན་ཤེས་ཉེ་བར་སྟོན་མཛད་པའི། །དུང་གི་ཁྱེའུ་ཆུང་གཡུ་ཡི་ཟུར་ཕུད་ཅན། །མདའ་དར་མེ་ལོང་སྦ་གླིང་སྙན་པ་འགྱུར། །ཡེ་ཤེས་ལྷ་མོ་དཀར་དང་སྨྲ་བྱེད་སེར། །རྣོ་བྱེད་ལྷ་མོ་དམར་དང་དྲང་སྲོང་ཚོགས། མངོན་ཤེས་རྫུ་འཕྲུལ་མཐུ་དང་ལྡན་པ་རྣམས། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །མངོན་ཤེས་སྟོན་མཁས་དྲང་སྲོང་སེར་སྐྱ་ནི། །ཕྱག་གཉིས་གཙག་བུ་བདུད་རྩིའི་བུམ་པ་བསྣམས། །གཅུང་པོ་སྔོ་སྐྱ་སྐམ་པ་མེ་ལོང་འཛིན། །ཁྱེའུ་དམར་སྐྱ་ནེ་ཙོ་ཁྱེའུ་ཁྲིད། །སྣང་གསལ་པྲ་ཡི་དངོས་གྲུབ་སྩོལ་བའི་ཕྱིར། །བསང་མཆོད་འདོད་ཡོན་བདུད་རྩིའི་སྤྲིན་ཕུང་བཞེས། །མནོལ་བ་སངས་ལ་འཐིབ་པ་དྭངས་གྱུར་ཅིག །བདག་ཅག་རྣམས་ཀྱི་མི་ཤེས་རྨོངས་པ་ཡིས། །རྩ་བ་ཡན་ལག་དམ་ཚིག་ཉམས་པ་དང་། །རྒྱུད་འགྲེལ་མན་ངག་ལག་ཏུ་མ་ལོན་ཞིང་། །འགྲོ་ལ་བརྩེ་བྲལ་སྨན་སྦྱོར་ལོག་པ་སོགས། །ནོངས་པར་གྱུར་པའི་ཚོགས་རྣམས་མཐོལ་ཞིང་བཤགས། །བཟོད་པར་བཞེས་ལ་ཚངས་པ་སྩལ་དུ་གསོལ། ཀྱེ། དེ་ལྟར་བསང་མཆོད་མགྲོན་དུ་གྱུར་པ་རྣམས། །འདོད་ཡོན་བདུད་རྩིའི་མཆོད་པ་འདི་བཞེས་ལ། །བདག་ཅག་དཔོན་སློབ་ཡུལ་ཕྱོགས་སྣོད་བཅུད་ཀྱི། །ཉེས་པ་ཀུན་ཞི་ཚེ་བསོད་ཡེ་ཤེས་རྒྱས། །སྣང་བ་དབང་འདུས་ལོག་འདྲེན་རྩད་ནས་ཆོད། །ཁྱད་པར་སྨན་རྒྱུད་མན་ངག་ལག་ལེན་རྣམས། །དར་ཞིང་རྒྱས་ནས་གཞན་ཕན་འབྱུང་བ་དང་། །བཞི་བརྒྱ་རྩ་བཞིའི་ནད་རྣམས་སེལ་བ་ལ། །འཇོམས་བྱེད་གཉེན་པོ་སྟོབས་སུ་གྱུར་པ་དང་། །ལྷ་མིན་ཀླ་ཀློའི་སྨན་གྱི་སྦྱོར་ངན་རྣམས། །ནུས་མེད་ཐལ་སྐྱ་བཞིན་དུ་འགྱུར་བ་དང་། །དུས་འཁྲུགས་ཞི་ཞིང་ལོ་ཕྱུགས་རྟག་ཏུ་ལེགས། །བསྟན་པ་དར་རྒྱས་བསྟན་འཛིན་དབུ་འཕང་མཐོ། །བསྟན་པའི་སྦྱིན་བདག་ཆབ་སྲིད་དབུ་རྨོག་བཙན། །མངའ་ཐང་ལོངས་སྤྱོད་འཕེལ་ཞིང་རྒྱས་པ་དང་། །སྣོད་བཅུད་དགེ་བའི་ཕྲིན་ལས་མཛད་དུ་གསོལ། །སྲིད་དང་ཞི་བའི་སྨན་བཅུད་རྣམས། །འོད་ཟེར་ལྕགས་ཀྱུས་སྡུད་ནས་ནི། སྨན་སྦྱོར་རྣམས་ལ་བསྟིམ་པ་དང་། །འཇིག་རྟེན་སྨན་གྱི་ཕྱྭ་གཡང་རྣམས། །གནས་འདིར་མྱུར་བ་ཉིད་དུ་ཁུག །དཀར་ཕྱོགས་ལྷ་རྣམས་དགྱེས་པའི་རུ་མཚོན་ཕྱར། །ཀི་བསྭོ་ལྷ་རྒྱལ་ཆ་སྒྲ་འབྲུག་ལྟར་སྒྲོགས། །ཕྱོགས་ལས་རྣམ་པར་རྒྱལ་བའི་བཀྲ་ཤིས་སྩོལ། །སྨན་སྲུང་དགྲ་ལྷ་བདག་གི་ལུས་ཞུགས་ནས། །སྟོབས་རྩལ་མཐུ་ནུས་བསྐལ་པའི་མེ་བཞིན་འབར། །གནས་སྐབས་བཅུད་ལེན་གྲུབ་པས་ལུས་སྟོབས་རྒྱས། །ལོ་བརྒྱར་འཚོ་ཞིང་དམ་པའི་ཆོས་སྤྱོད་ནས། །མཐར་ཐུག་ལྟ་ན་སྡུག་གི་ཞིང་ཁམས་སུ། །སྨན་རྒྱལ་བླ་མའི་དྲུང་དུ་བརྫུས་སྐྱེས་ནས། །བྱང་ཆུབ་ལུང་བསྟན་ཐོབ་ཅིང་ས་ལམ་བགྲོད། །སྨན་པའི་རྒྱལ་པོའི་གསང་བ་གསུམ་པོ་དང་། །དབྱེར་མེད་རོ་གཅིག་འགྱུར་བའི་ཕྲིན་ལས་མཛོད། །སྨན་གྱི་དྲང་སྲོང་གདམས་ངག་རང་བྱན་ཚུད། །སྨན་མཆོག་ནད་ལ་ཐིངས་པ་ཙམ་གྱིས་ཆོག །སྨན་གྱི་ནུས་པས་རྒྱུ་འབྲས་ནད་རྣམས་སེལ། །སྨན་གྱི་འབྲས་བུས་བདེ་དགའ་སྤྱོད་པར་ཤོག །ཅེས་བརྗོད་ལ་མཆོད་གཏོར་འབུལ། རྗེས་ཀྱི་ཆོ་ག་ཡིག་བརྒྱ་ལན་གསུམ་དང་། མ་འབྱོར་པ་དང་ཉམས་པ་སོགས་ཀྱིས་བཟོད་པར་གསོལ། ཨོཾ་ཁྱེད་ཀྱི་སེམས་ཅན་སོགས་དང་། བསང་མཆོད་གནས་འདིར་སོགས་ནས། སརྦ་བྷུ་ཏ་གཙྪས་གཤེགས་གསོལ། དགེ་བསྔོ་དང་ཤིས་བརྗོད་སྤྱི་ལྟར་རོ། །དགེ་འདིས་བདག་གཞན་སེམས་ཅན་ཀུན། །སྨན་གྱི་ལོངས་སྤྱོད་ཆེར་འཕེལ་ཞིང་། །མཐར་ཐུག་ལྟ་ན་སྡུག་ཞིང་དུ། །སྐྱེས་ནས་བྱང་ཆུབ་ཐོབ་པར་ཤོག །ཅེས་པའང་རབ་བྱུང་༡༦པའི་ཆུ་བྱ་ལོར་རྫོང་གསར་བཀྲ་ཤིས་ལྷ་རྩེར་རིན་ཆེན་སྨན་གྱི་སྦྱོར་བ་བགྱིས་པའི་སྐབས་ཁྲུམས་ཟླ་༨པའི་དཀར་ཕྱོགས་ཀྱི་རྒྱལ་བ་དང་པོ་ལ་འཇམ་དབྱངས་བློ་གྲོས་རྒྱ་མཚོས་བྲིས་པ་བཀྲ་ཤིས་དགེ་མཚན་མཆོག་ཏུ་རྒྱས་པར་གྱུར་ཅིག །སརྦ་མངྒ་ལཾ།། །།

[edit]

@#/__/sman bsang bdud rtsi'i char 'bebs zhes bya ba bzhugs so/__/ oM swasti/__rig pa'i rgyal po sman gyi bla ma dang /__/rtsa gsum kun 'dus o rgyan bla ma la/__/gus pas btud nas bsang mchod nyung du bri/__/sman skyong srung mas dgyes pa'i zhal bzang ngoms/__/de la 'dir zhi byed sman gyi las dang rjes su 'brel ba'i rtsa gsum lha tshogs la bsang mchod 'bul bar 'dod pas/__phye phud mchod gtor gser skyems shing rtsi dri bzang gi dud pa dang dar dkar mda' dar rnga gling rol mo'i sgra dang bcas/__oM las rin po che'i snod yangs par/__/AHlas bsang rdzas zag med bdud rtsi che/__/hU~M gis gang 'dod nam mkha' mdzod kyi sprin/__/rgya chen rgyun mi chad pa'i 'khor lor gyur/__/oM AHhU~M/__lan gsum dang nam mkha' mdzod kyi sngags lan gsum/__badz+ra s+pha ra Na khaM gyis rgyas par spel/__spyan 'dren pa ni/__kye/__bla ma rigs 'dus sman rgyal rdo rje 'chang /__/rigs lnga yab yum dbang chen rta mchog dpal/__/rdo rje phag mo mkha' 'gro sde lnga dang /__/zhang blon chen po rdo rje bdud 'dul sogs/__/rtsa gsum lha tshogs bsang mchod gnas 'dir gshegs/__badz+ra sa mA ya dzaHzhes spyan drangs/__rin chen seng khri pad zla nyi ma dang /__/ro gdan dar zab 'bol chen brtsegs pa sogs/__/rang rang dgyes pa'i gdan khri la bzhugs nas/__/dgyes pa'i zhal bzang ngom bzhin mchod pa bzhes/__/pad+ma ka ma lA ya s+t+waM/__oM gtsang mar sbyar ba'i mchod pa rnam mang ni/__/lha yi chu bo'i mchod yon mtsho ltar 'khyil/__/dag cing dri bral zhabs bsil gang+ga'i rgyun/__/thang skyes chu skyes rnam bkra'i me tog tshal/__/sbyar dang lhan skyes spos dud sprin ltar gtib/__/nyi zla rin chen sgron me'i snang gsal dang /__/ga bur tsan+dan gur gum dri bzang chab/__/ro brgya ldan pa'i zhal zas rnam mang po/__/rnga chen sil snyan dung gling rol mo'i tshogs/__/'bul lo bzhes nas mchog thun dngos grub stsol/__/khyad par dbyings phyug spyan ma'i thab khung du/__dam tshig DA ki'i shugs kyis bskul ba las/__/lha mo gos dkar 'bar ba'i klong chen por/__/rin chen 'bru sman dar zab bza' btung sogs/__lha shing shug pa tsan+dan a ga ru/__/sha ka ru dang du ru ka dang ni/__/spos dkar mkhan ser ba lu phur dkar sogs/__/bzang shing sna tshogs rnams dang sbyar ba nyid/__/bsregs pa'i dud sprin gzugs kyi lha mo ni/__/phyag g.yas khrus bum g.yon pas sman gzhong bsnams/__/mi gtsang rmu gab ro bag grib la sogs/__/bkrus shing sman sprin dpag med 'thib pa las/__/lha klu sa bdag gnyan gyi nad rnams gsos/__/'go ba'i rims sogs bzhi brgya rtsa bzhi'i nad/__/zhi byed sman gyi lha mo'i thugs rje'i char/__/dal gyis 'bebs pas snod bcud dge mtshan rgyas/__/dud sprin spos kyi glang po'i gom stabs las/__/gzugs sgra dri ro reg bya 'dod yon spro/__/re res bye ba brgya phrag mang po yi/__/sa dang bar snang ma lus kun tu khyab/__/gzhan yang gling bzhi gling phran ri rab dang /__/bkra shis rdzas rtags rgyal srid rin chen bdun/__/gter chen bum pa bzang dang dpag bsam shing /__/ma rmos lo tog 'dod pa 'jo ba'i ba/__/rta mchog spu sdug shin tu mdzes pa ni/__/dkar ser dmar sngo nag dang mtshal lu po/__/sprin gyi shugs 'chang cang shes tshogs rnams la/__/rin chen sga srab mdzes pa'i rgyan cha dang /__/glang chen ma he ba glang gnag lug ra/__/lha g.yag dkar nag tshogs rnams spu zhol brjid/__rno ba'i rwa gnyis gnam du bsnyegs par brkyang /__/lce dmar glog 'od lta bur 'phro ba yis/__/'jigs pa'i ngar sgra dang bcas phyogs kun rgyug__/khyi nag dom bu mang pos khrag rjes gcod/__/sha rkyang rna dgo bse ru la sogs pa/__/mdzes shing yid du 'ong ba'i ri dwags dang /__/gshog rtsal lhab zhing skad snyan sgrogs pa yi/__/bya dang bye'u bsgrang las 'das pa dang /__/yan lag brgyad ldan rol mtsho 'khyil pa'i nang /__/klu dbang klu nor dkor chas gtams pa dang /__/dar zab sna tshogs gser dngul baiDUR+Ya/__/mu tig bye ru mu men pha lam dang /__/tsha grang nad sel bzang drug sman la sogs/__/ro nus ldan pa'i sman sna mang po dang /__/dgos 'byung bsam 'phel dbang gi rgyal po sogs/__/brtan g.yo'i dngos po khyad par 'phags pa yi/__/bsang mchod dam pa 'bul gyis dgyes par bzhes/__/phye mar gangs kyi ri bo ltar spungs shing /__/dkar mngar gser skyems ma dros mtsho ltar 'khyil/__/rol mo'i tshogs kyis srid gsum kun tu khyab/__/gdugs dang rgyal mtshan 'phan chen bla bre che/__/bkra shis dung gi sgra chen phyogs brgyar sgrogs/__/de ltar kun bzang mchod pa'i sprin chen po/__/bsang dud zag med bdud rtsi'i sprin phung 'dis/__/phyogs bcu dus gsum bskal bzang sangs rgyas dang /__/rigs gsum mgon po sems dpa' sems ma'i tshogs/__/gsung rab dam pa'i chos kyi gter chen dang /__/theg pa che chung dge 'dun thams cad kyis/__/bsang mchod 'dod yon bdud rtsi'i sprin phung bzhes/__/mtshan tsam thos pas ngan 'gro'i sdug bsngal sel/__/dug gsum rgyu 'bras nad rnams 'joms mdzad pa/__/thugs bskyed rmad byung bde gshegs mtshan legs dang /__/gzi brjid sgra dbyangs gser bzang dri med dpal/__/mya ngan med dang chos grags rgya mtsho'i dbyangs/__/mngon mkhyen rgyal po baiDUR+Ya yi 'od/__/shAkya thub pa 'jam dbyangs skyabs grol dang /__/phyag rdor la sogs bde gshegs sras bcas rnams/__/bsang mchod 'dod yon bdud rtsi'i sprin phung bzhes/__/rigs 'dus bla ma sman rgyal rdo rje 'chang /__/rnam snang rin 'byung snang mtha' don yod grub/__/dbyings phyug spyan ma mA kI gos dkar dang /__/dam tshig sgrol ma la sogs rigs lnga'i tshogs/__/bsang mchod 'dod yon bdud rtsi'i sprin phung bzhes/__/bde gshegs zhi ba bzhi bcu rtsa gnyis dang /__/'bar ba khrag 'thung lnga bcu rtsa brgyad lha/__/zhi dang khro bo'i rol gar mtha' yas dang /__/dpa' bo mkha' 'gro dam can srung ma'i tshogs/__/bsang mchod 'dod yon bdud rtsi'i sprin phung bzhes/__/sman rgyud legs ston chos kyi mdzod 'dzin pa/__/drang srong chen po yid las skyes pa dang /__/rig pa'i ye shes chen po rnam pa gnyis/__/rgyun shes nabs so skyes dang thang la 'bar/__/dka' gnyis spyod dang 'dro skyong me bzhin 'jug__/lug nag rgya skyegs sna dang zla ba'i mchog__/lan tshwa'i mchog dang dpal ldan phreng ba dang /__/dpal ldan phun tshogs drang srong bshol 'gro skyes/__/nyi snying zla ba'i 'od zer kun dga' bo/__/'tsho byed gzhon nu klu sgrub snying po dang /__/dpal ldan dga' dang zla mngon bai ro'i zhabs/__/mkhan chen zhi 'tsho khri srong lde'u btsan/__/chos rgyal rim byon dI paM ka ra dang /__/grwa pa mngon shes dbus pa dar grags zhabs/__/dge slong dkon skyabs g.yu thog yon tan mgon/__/ye shes gzungs dang 'bo se kun dga' dang /__/zla 'od gzhon nu dwags po tsan+d+ra pa/__/'tsho mdzad rgyal po tshar lung g.yu thog pa/__/ban mo ga ga brang ti dkon mchog skyabs/__/'jam dpal rgyal mtshan nyi mgon gzi brjid 'bar/__/sems dpa' zhang ston dge 'bum sman mo che/__/dpal ldan gzhon nu sangs rgyas rin chen dang /__/badz+ra don grub rgyal mtshan dkon mchog skyabs/__/dpal ldan 'tsho byed zul phu sman mo che/__/bsod dbang mtshungs med ri khrod zur mkhar rje/__/dkon dpal nam mkha' bdud 'joms mang+ga'i mtshan/__/chos dbyings rang grol rdo rje thogs med rtsal/__/'gyur med rdo rje rin rnam chos nyid mtshan/__/pad+ma bshes gnyen kun bzang bdud 'dul dang /__/mchog grub blo gsal dpal bzang byams mgon grub/__/chos dbang d+harma kI rti dkon lhun dang /__/phrin bzang bstan 'dzin dkon mchog don grub dang /__/bstan pa'i nyin byed mchog dga' 'od gsal rje/__/mkhyen brtse'i dbang po blo gros mtha' yas zhabs/__/mi pham rnam par rgyal ba'i mtshan can sogs/__/khyad par zur byang brgyud pa'i phreng mdzes kyi/__/drang srong 'tsho byed brgyud pa'i bla ma'i tshogs/__/bsang mchod 'dod yon bdud rtsi'i sprin phung bzhes/__/grub pa'i sbyor ba bcud len srol 'byed che/__/byA da li dang klu sgrub kar Na ri/__/ye shes DAk+kI mkhas grub o rgyan pa/__/kun mkhyen rang byung rdo rje la sogs pa/__/man ngag brgyud pa'i bla ma'i tshogs rnams kyis/__/bsang mchod 'dod yon bdud rtsi'i sprin phung bzhes/__kye/__bdud rtsi grub pa'i slob dpon bde ba che/__/pad+ma 'byung gnas gnyags chen dz+nyA na sogs/__/ngo mtshar grub pa'i slob dpon tshogs rnams dang /__/dpal chen che mchog gnam zhal dbyings phyug ma/__/mkha' 'gro'i gtso mo dpal ldan phreng ba sogs/__/snod bcud gdod nas dag pa'i bdud rtsi che'i/__/dkyil 'khor lha tshogs bka' sdod bcas pa dang /__/dpal ldan mgon po rdo rje nag po che/__/'dod khams dbang phyug ma hA kA li dang /__/zhing skyongs stobs 'phrog dbang po dur khrod bdag__/tshangs dang dbang phyug brgya byin phyogs skyong dang /__/'jigs byed dgu dang ma mo 'bar ma bdun/__/rgyal chen sde bzhi gza' dang rgyu skar tshogs/__/klu rgyal wA ru Na dang 'jog po sogs/__/gtsang rigs dpal mgon dkar phyogs skyong rnams dang /__/de bzhin bod khams skyong ba'i brtan ma che/__/rdo rje g.yu sgron thang lha spom ra gnyen/__/ge sar rdo rje tshe yi rgyal po sogs/__/lha klu gzhi bdag dge bsnyen rmu bdud btsan/__/rgyal po ging chen gnod sbyin the'u rang sogs/__/khyad par sman srung lha mo dkar mo ni/__/phyag na rin chen pi waM sgrogs pa dang /__/de bzhin ser mo bya rgod gling bu bsgyur/__/dmar mo mi rkang gling bu tse re re/__/ljang mo dngul dkar me long ston pa dang /__/sman gyi lha mo chen mo rnam pa brgyad/__/dkar mo ma bdun dus tshod rgyu ba'i lha/__/rtsi shing sman dang nags kyi lha mo'i tshogs/__/sman gyi gnyer 'dzin bye ba bsam las 'das/__/bka' srung kun gyi sde dpon gnod sbyin che/__/zhang blon chen po rdo rje bdud 'dul dang /__/e ka dza TI khyab 'jug lce spyang gdong /__/shan pa dmar po srog gi spu gri che/__/srin mo bdud mo srog bdag la sogs pa/__/bka' sdod bran g.yog sprul dang yang 'khor bcas/__/bsang mchod 'dod yon bdud rtsi'i sprin phung bzhes/__/ji 'jigs la sogs gnod sbyin bcu gnyis dang /__/legs nyes mngon shes nye bar ston mdzad pa'i/__/dung gi khye'u chung g.yu yi zur phud can/__/mda' dar me long sba gling snyan pa 'gyur/__/ye shes lha mo dkar dang smra byed ser/__/rno byed lha mo dmar dang drang srong tshogs/__mngon shes rdzu 'phrul mthu dang ldan pa rnams/__/bsang mchod 'dod yon bdud rtsi'i sprin phung bzhes/__/mngon shes ston mkhas drang srong ser skya ni/__/phyag gnyis gtsag bu bdud rtsi'i bum pa bsnams/__/gcung po sngo skya skam pa me long 'dzin/__/khye'u dmar skya ne tso khye'u khrid/__/snang gsal pra yi dngos grub stsol ba'i phyir/__/bsang mchod 'dod yon bdud rtsi'i sprin phung bzhes/__/mnol ba sangs la 'thib pa dwangs gyur cig__/bdag cag rnams kyi mi shes rmongs pa yis/__/rtsa ba yan lag dam tshig nyams pa dang /__/rgyud 'grel man ngag lag tu ma lon zhing /__/'gro la brtse bral sman sbyor log pa sogs/__/nongs par gyur pa'i tshogs rnams mthol zhing bshags/__/bzod par bzhes la tshangs pa stsal du gsol/__kye/__de ltar bsang mchod mgron du gyur pa rnams/__/'dod yon bdud rtsi'i mchod pa 'di bzhes la/__/bdag cag dpon slob yul phyogs snod bcud kyi/__/nyes pa kun zhi tshe bsod ye shes rgyas/__/snang ba dbang 'dus log 'dren rtsad nas chod/__/khyad par sman rgyud man ngag lag len rnams/__/dar zhing rgyas nas gzhan phan 'byung ba dang /__/bzhi brgya rtsa bzhi'i nad rnams sel ba la/__/'joms byed gnyen po stobs su gyur pa dang /__/lha min kla klo'i sman gyi sbyor ngan rnams/__/nus med thal skya bzhin du 'gyur ba dang /__/dus 'khrugs zhi zhing lo phyugs rtag tu legs/__/bstan pa dar rgyas bstan 'dzin dbu 'phang mtho/__/bstan pa'i sbyin bdag chab srid dbu rmog btsan/__/mnga' thang longs spyod 'phel zhing rgyas pa dang /__/snod bcud dge ba'i phrin las mdzad du gsol/__/srid dang zhi ba'i sman bcud rnams/__/'od zer lcags kyus sdud nas ni/__sman sbyor rnams la bstim pa dang /__/'jig rten sman gyi phywa g.yang rnams/__/gnas 'dir myur ba nyid du khug__/dkar phyogs lha rnams dgyes pa'i ru mtshon phyar/__/ki bswo lha rgyal cha sgra 'brug ltar sgrogs/__/phyogs las rnam par rgyal ba'i bkra shis stsol/__/sman srung dgra lha bdag gi lus zhugs nas/__/stobs rtsal mthu nus bskal pa'i me bzhin 'bar/__/gnas skabs bcud len grub pas lus stobs rgyas/__/lo brgyar 'tsho zhing dam pa'i chos spyod nas/__/mthar thug lta na sdug gi zhing khams su/__/sman rgyal bla ma'i drung du brdzus skyes nas/__/byang chub lung bstan thob cing sa lam bgrod/__/sman pa'i rgyal po'i gsang ba gsum po dang /__/dbyer med ro gcig 'gyur ba'i phrin las mdzod/__/sman gyi drang srong gdams ngag rang byan tshud/__/sman mchog nad la things pa tsam gyis chog__/sman gyi nus pas rgyu 'bras nad rnams sel/__/sman gyi 'bras bus bde dga' spyod par shog__/ces brjod la mchod gtor 'bul/__rjes kyi cho ga yig brgya lan gsum dang /__ma 'byor pa dang nyams pa sogs kyis bzod par gsol/__oM khyed kyi sems can sogs dang /__bsang mchod gnas 'dir sogs nas/__sarba b+hu ta gats+tshas gshegs gsol/__dge bsngo dang shis brjod spyi ltar ro/__/dge 'dis bdag gzhan sems can kun/__/sman gyi longs spyod cher 'phel zhing /__/mthar thug lta na sdug zhing du/__/skyes nas byang chub thob par shog__/ces pa'ang rab byung 16pa'i chu bya lor rdzong gsar bkra shis lha rtser rin chen sman gyi sbyor ba bgyis pa'i skabs khrums zla 8pa'i dkar phyogs kyi rgyal ba dang po la 'jam dbyangs blo gros rgya mtshos bris pa bkra shis dge mtshan mchog tu rgyas par gyur cig__/sarba mang+ga laM//__//