JKCL-KABUM-08-NYA-012-009

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 9, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཀུན་མཁྱེན་ཆོས་ཀྱི་རྒྱལ་པོ་རྗེས་དྲན་གྱི་གླུ་ཀ་ལ་པིངྐའི་དབྱངས་སྙན་ཞེས་བྱ་བ། །ཕ་བླ་མའི་ཞབས་ལ་ཕྱག་འཚལ་ལོ། །གནས་རང་སྣང་ལྔ་ལྡན་འཇའ་ཟེར་གྱི་ཀློང་ན། །རྗེ་ཀུན་མཁྱེན་ངག་གི་དབང་པོ་དེ་བཞུགས་ཡོད། །སྐུ་མཚན་དཔེའི་གཟི་བྱིན་ལྷམ་མེ་རུ་གསལ་ལ། །གསུང་ཚངས་དབྱངས་ཆོས་སྒྲ་འགགས་མེད་དུ་སྒྲོགས་ཤིང་། །ཐུགས་མཁའ་ཁྱབ་འོད་གསལ་རྡོ་རྗེ་ཡི་ཀློང་ན། །དུས་རྟག་ཏུ་མཉམ་པར་མ་བཞག་པ་མི་མངའ། །རྗེ་དུས་གསུམ་སངས་རྒྱས་སྲས་བཅས་ཀྱི་རང་གཟུགས། །མགོན་ཀུན་མཁྱེན་ཆོས་རྗེ་སྙིང་དབུས་ནས་དྲན་བྱུང་། །ཤར་རི་རྒྱལ་སྤང་བྲག་རྫ་རི་ཡི་རྩེ་མོ། །དགུང་སྔོན་པོར་སྙེགས་འདྲའི་སྔོ་བསང་གི་མཁའ་ལ། །སྤྲིན་དཀར་པོ་ལང་ལོང་གར་སྟབས་སུ་སྒྱུར་ཚེ། །རྗེ་ཀུན་མཁྱེན་རྡོ་རྗེ་གཟི་བརྗིད་དེ་དྲན་བྱུང་། །དུས་ནམ་དྲན་སྙིང་ལ་མོས་གུས་ཀྱི་གཟེར་ཆེན། །ཡིད་བཟོད་མེད་གདུང་བས་ཤུགས་རིང་ཞིག་འདོན་ཚེ། །ལུས་བ་སྤུ་གཡོ་བའི་དད་མོས་ཀྱི་སྣང་བ། །མིག་མཆི་མ་འཁྲུགས་བཞིན་གསོལ་འདེབས་ལ་འབད་ཚེ། །ཕ་ཀུན་མཁྱེན་གདོད་མའི་མགོན་པོ་ཡི་དགྱེས་ཞལ། །མི་བདག་གི་མིག་སྔར་མངོན་སུམ་དུ་སྟོན་ཅིག། སྐུ་བེམ་པོ་མ་ཡིན་ཡེ་ཤེས་ཀྱི་ལུས་ཅན། །འོད་སེར་པོ་བྱེ་བ་ཕྲག་བརྒྱ་ནི་འབར་ཞིང་། །གསུང་ཟབ་རྒྱས་གདམས་པའི་སིལ་སྙན་གྱི་ང་རོས། །བདག་མི་ཤེས་གཉིད་ལས་ད་ལྟ་རང་བཀྲོག་མཛོད། །ཐུགས་ལྔ་ལྡན་ལྷུན་གྲུབ་འོད་གསལ་གྱི་གོང་བུ། །དུས་ད་ལྟ་བདག་གི་སྙིང་དབུས་སུ་བསྟིམ་མཛོད། །གཞི་རིག་སྟོང་དབྱེར་མེད་སྐུ་གསུམ་གྱི་བླ་མ། །དོན་མ་བཅོས་མ་བསྒྲུབ་རང་ཞལ་ནི་མཇལ་ཏེ། །ཅིར་སྣང་བ་ཡེ་ཤེས་འཁོར་ལོ་ཡི་རྒྱན་དུ། །རང་ཤར་ནས་འཛིན་མེད་རང་གྲོལ་གྱི་སྤྱོད་པས། །བོགས་འདོན་ཏེ་ཆོས་ཅན་སྤྲོས་པ་ཡི་དྲྭ་བ། །གཞི་ཀ་དག་ཆོས་ཟད་ཆེན་པོ་རུ་ཐིམ་ནས། །དབྱིངས་ཕྱིར་གསལ་སྐུ་དང་ཞིང་ཁམས་ཀྱི་བཀོད་པ། །མ་འགྲོ་དྲུག་འཁོར་བ་དོང་སྤྲུགས་སུ་གྱུར་ཅིག། ཚིག་དེ་སྐད་མགྲིན་པའི་དབྱངས་སྙན་དུ་འཁྲོལ་ན། །རྗེ་ཀུན་མཁྱེན་བླ་མས་བྱིན་གྱིས་རང་རློབས་ཤིགབུ་བློ་གྲོས་བླུན་རྒན་ལས་ངན་གྱི་གདུང་བས། །ཡིད་རྩེ་གཅིག་གུས་པས་གསོལ་བ་རང་འདེབས་སོ། །ཤིང་ཁྱི་ཟླ་བརྒྱད་ཚེས་ཉེར་དགུ་ལའོ།། །།

[edit]

!_kun mkhyen chos kyi rgyal po rjes dran gyi glu ka la ping+ka'i dbyangs snyan zhes bya ba/__/pha bla ma'i zhabs la phyag 'tshal lo/__/gnas rang snang lnga ldan 'ja' zer gyi klong na/__/rje kun mkhyen ngag gi dbang po de bzhugs yod/__/sku mtshan dpe'i gzi byin lham me ru gsal la/__/gsung tshangs dbyangs chos sgra 'gags med du sgrogs shing /__/thugs mkha' khyab 'od gsal rdo rje yi klong na/__/dus rtag tu mnyam par ma bzhag pa mi mnga'/__/rje dus gsum sangs rgyas sras bcas kyi rang gzugs/__/mgon kun mkhyen chos rje snying dbus nas dran byung /__/shar ri rgyal spang brag rdza ri yi rtse mo/__/dgung sngon por snyegs 'dra'i sngo bsang gi mkha' la/__/sprin dkar po lang long gar stabs su sgyur tshe/__/rje kun mkhyen rdo rje gzi brjid de dran byung /__/dus nam dran snying la mos gus kyi gzer chen/__/yid bzod med gdung bas shugs ring zhig 'don tshe/__/lus ba spu g.yo ba'i dad mos kyi snang ba/__/mig mchi ma 'khrugs bzhin gsol 'debs la 'bad tshe/__/pha kun mkhyen gdod ma'i mgon po yi dgyes zhal/__/mi bdag gi mig sngar mngon sum du ston cig/__sku bem po ma yin ye shes kyi lus can/__/'od ser po bye ba phrag brgya ni 'bar zhing /__/gsung zab rgyas gdams pa'i sil snyan gyi nga ros/__/bdag mi shes gnyid las da lta rang bkrog mdzod/__/thugs lnga ldan lhun grub 'od gsal gyi gong bu/__/dus da lta bdag gi snying dbus su bstim mdzod/__/gzhi rig stong dbyer med sku gsum gyi bla ma/__/don ma bcos ma bsgrub rang zhal ni mjal te/__/cir snang ba ye shes 'khor lo yi rgyan du/__/rang shar nas 'dzin med rang grol gyi spyod pas/__/bogs 'don te chos can spros pa yi drwa ba/__/gzhi ka dag chos zad chen po ru thim nas/__/dbyings phyir gsal sku dang zhing khams kyi bkod pa/__/ma 'gro drug 'khor ba dong sprugs su gyur cig/__tshig de skad mgrin pa'i dbyangs snyan du 'khrol na/__/rje kun mkhyen bla mas byin gyis rang rlobs shigabu blo gros blun rgan las ngan gyi gdung bas/__/yid rtse gcig gus pas gsol ba rang 'debs so/__/shing khyi zla brgyad tshes nyer dgu la'o//___//