JKCL-KABUM-08-NYA-012-027

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 27, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ངོ་མཚར་སྤྲོ་བ་བསྐྱེད་པ་ལྷ་ཡི་གླུ་དབྱངས་ཞེས་བྱ་བ། ཨེ་མ་ཧོ། སྟེང་འཆི་མེད་མཁའ་དབྱིངས་དགུང་སྔོན་གྱི་དཀྱིལ་ན། །འོད་ཉི་ཟླའི་དཀྱིལ་འཁོར་བཀྲག་མདངས་ནི་འཚེར་ཞིང་། །འཁོར་གཟའ་དང་རྒྱུ་སྐར་ཚོམ་བུ་ནི་བཀྲ་བས། །རྗེ་བརྒྱུད་གསུམ་རིག་འཛིན་བླ་མ་རྣམས་དྲན་བྱུང་། །གནས་ཁྱད་འཕགས་སྦས་ཡུལ་འབྲས་གཤོངས་ཀྱི་བཀོད་པ། །གངས་དཀར་པོ་རྩེ་མོ་དགུང་དུ་ནི་ཟུག་སྟེ། །དྭངས་བསིལ་གྱི་རི་བྲན་ཚར་དུ་ནི་དངར་ཞིང་། །སྤོས་ངད་དང་ལྡན་པའི་ནགས་ཚལ་གྱི་དྲྭ་བ། །བྲག་རིན་ཆེན་ཁམས་ལྡན་ཁ་དོག་ནི་སྣ་ཚོགས། །བརྒྱ་སྟོང་ཕྲག་མང་པོའི་ཚོམ་བུ་ནི་བརྡལ་དང་། །ངོས་འཇམ་གསལ་སྣ་ཚོགས་གཟུགས་བརྙན་ནི་ཆེས་བཀྲ། །ལྷ་རྩ་གསུམ་ཞི་ཁྲོ་རབ་འབྱམས་ཀྱི་བཞུགས་གནས། །ལྗོངས་ཆེན་པོའི་སྒོ་མོ་འཕྲང་ཆེན་གྱིས་བཅད་པ། །ཕྱོགས་མཚམས་སུ་རབ་ཡངས་མཱ་ཀི་ཡི་ལྷ་མོ། །ཆིལ་ཆིལ་དུ་མུ་ཏིག་དཀར་པོ་ནི་འཐོར་བཞིན། །རྐང་གར་སྟབས་བསྒྱུར་ཞིང་གྱ་གྱུ་རུ་ལྡེམ་ལྡེམ། །བྱ་རི་དྭགས་སྤུ་སྡུག་གསུང་སྙན་ནི་སྒྲོགས་ཚེ། །མ་ཨོ་རྒྱན་མཁའ་འགྲོའི་གླིང་ཆེན་དེ་དྲན་བྱུང་། །བཟོ་མ་དགོས་རང་བྱུང་རྡོ་བ་ཡི་ཕུག་ཆེན། །ལྷ་རང་འཁྲུངས་རྩ་གསུམ་རབ་འབྱམས་ཀྱི་དཀྱིལ་འཁོར། །ཆོས་ནོར་གྱི་གཏེར་ཁ་འཛད་མེད་དུ་གཏམས་ཤིང་། །མ་ཌཱ་ཀིའི་བྲོ་གར་འདུ་འཕྲོ་ནི་ཆད་མེད། །ཕ་ཨོ་རྒྱན་པདྨའི་ཐུགས་བསྐྱེད་ཀྱི་ཞིང་མཆོག། དཔལ་པདྨ་འོད་ཀྱི་འདྲ་ཅོག་ནི་འདི་ལགས། །ལྷ་རྩ་གསུམ་རབ་འབྱམས་དགྱེས་དགུ་རུ་རོལ་པའི། །གནས་འདི་ངང་མཇལ་བའི་རྣལ་འབྱོར་ང་སྐྱིད་དོ། །ཡར་བལྟས་པས་བྱིན་རླབས་སྤྲིན་ཕུང་ནི་ཐིབ་ཐིབ། །བར་དངོས་གྲུབ་སྦྲང་ཆར་སི་ལི་ལི་འབེབས་ཤིང་། །ཐང་སྔོ་ལྗང་གཡུ་ཡི་མཎྜལ་གྱི་སྟེང་དུ། །ལྷ་བཟང་ཤིང་སྣ་ཚོགས་སྨན་དྲི་ནི་འཐུལ་ཏེ། །སེམས་མེད་ཀྱི་རྐང་འཐུང་གར་བརྒྱ་ཡི་རྩེད་འཇོ། །བཟའ་ཤིང་འབྲས་སྣ་ཚོགས་མགོ་ཅོག་ནི་དུད་དེ། །རོ་ཞིམ་མངར་ཕན་ཚུན་འགྲན་པ་ལ་ཆས་བཞིན། །མ་ཚོགས་ཀྱི་འདུ་བའི་དགའ་སྟོན་ནི་འབད་མེད། །དུས་འཁོར་མོ་ཡུག་ཏུ་འབྲས་བཟང་གི་སྙེ་མ། །ལྗགས་རོ་མངར་བརྒྱ་ལྡན་ལྷ་ཡུལ་གྱི་བདུད་རྩི། །ནམ་ཅི་དགར་སྤྱོད་པའི་སྐལ་བཟང་ང་སྐྱིད་དོ། །གྲོགས་དཔའ་བོ་དཔའ་མོ་མཛའ་ཕྲུག་གི་གཞོན་ནུ། །དར་པཉྩ་ལི་ཀ་ལྷ་རྫས་ཀྱི་ན་བཟའ། །རྒྱན་རིན་ཆེན་སྣ་ཚོགས་འཕྱང་འཕྲུལ་ནི་མཛེས་ཤིང་། །རྐང་ངང་མོ་བཞིན་དུ་གདུ་བུ་ཡི་སྒྲ་ལྡན། །གླུ་སྙན་འཇེབས་རྣ་བའི་དཔྱིད་དུ་ནི་སོན་ཞིང་། །བཟོ་རིག་པ་ངོ་མཚར་སྒྱུ་མ་ཡི་འཕྲུལ་ཆེ། །དུས་མིག་འཛུམ་ཙམ་ལ་བརྒྱ་ཕྲག་ནི་ངོམས་དང་། །བཅུད་བཟང་པོའི་ཉིང་ཁུ་དྲི་བཟང་གི་ངད་ལྡན། །ལན་ཇི་ཙམ་མྱོང་ཡང་སུན་པ་ནི་མི་སྐྱེད། །མ་མཁའ་འགྲོའི་ཚོགས་དང་སྐལ་བ་ནི་མཉམ་པའི། ཐབས་རྨད་བྱུང་གསང་བའི་ཚོགས་ཁང་ལ་ཞུགས་ནས། །ལུས་རྡོ་རྗེའི་བྲོ་གར་གར་སྟབས་ནི་སྒྱུར་ཞིང་། །ཆོས་ཟབ་མོ་རྩ་གསུམ་རིག་འཛིན་གྱི་སྲོག་སྒྲུབ། །རང་ཅི་དགར་སྤྱོད་པའི་རྟེན་འབྲེལ་ལ་ཡག་བྱུང་། །སྔོན་ཁྲག་འཐུང་ཧེ་རུ་ཀ་དཔལ་གྱི་དཔའ་བོ། །དུས་དེང་སང་འཇིགས་མེད་ནམ་མཁའ་ཡི་རྡོ་རྗེ། །བུ་དེ་ལ་རྣལ་འབྱོར་དབང་ཕྱུག་གིས་བྱིན་ཕོབ། །ལུས་འཆི་མེད་རྡོ་རྗེའི་ལང་ཚོ་ནི་རྒྱས་ཤིང་། །ཚེ་བདུད་ཀྱི་བར་ཆད་སྐྱེ་མེད་དུ་བསྒྲལ་ནས། །ངག་གྲགས་སྟོང་གཞོམ་མེད་ཆོས་རྔ་ནི་ལྡིར་བཞིན། །ཡིད་རིག་སྟོང་བརྡལ་ཁྱབ་ཆེན་པོ་ལས་མ་གཡོས། །མཆོག་ཐུན་མོང་དངོས་གྲུབ་བགོ་སྐལ་ལ་སྤྱོད་དེ། །ཕྱོགས་ཀུན་ལས་རྣམ་པར་རྒྱལ་བ་ཡི་བཀྲ་ཤིས། །དབྱངས་སྙན་པོ་མི་ནུབ་དར་རྒྱས་སུ་གྱུར་ནས། །ས་གསུམ་ཀུན་དགེ་ཞིང་ལེགས་པ་རུ་ཤོག་ཅིག། །ཅེས་པའང་འབྲས་ལྗོངས་སྒང་ཐོག་ཏུ་འཇིགས་མེད་ནམ་མཁའི་རྡོ་རྗེས་གླུར་བླང་བ་དགེ་ལེགས་སུ་གྱུར་ཅིག། །།

[edit]

!_ngo mtshar spro ba bskyed pa lha yi glu dbyangs zhes bya ba/__e ma ho/__steng 'chi med mkha' dbyings dgung sngon gyi dkyil na/__/'od nyi zla'i dkyil 'khor bkrag mdangs ni 'tsher zhing /__/'khor gza' dang rgyu skar tshom bu ni bkra bas/__/rje brgyud gsum rig 'dzin bla ma rnams dran byung /__/gnas khyad 'phags sbas yul 'bras gshongs kyi bkod pa/__/gangs dkar po rtse mo dgung du ni zug ste/__/dwangs bsil gyi ri bran tshar du ni dngar zhing /__/spos ngad dang ldan pa'i nags tshal gyi drwa ba/__/brag rin chen khams ldan kha dog ni sna tshogs/__/brgya stong phrag mang po'i tshom bu ni brdal dang /__/ngos 'jam gsal sna tshogs gzugs brnyan ni ches bkra/__/lha rtsa gsum zhi khro rab 'byams kyi bzhugs gnas/__/ljongs chen po'i sgo mo 'phrang chen gyis bcad pa/__/phyogs mtshams su rab yangs mA ki yi lha mo/__/chil chil du mu tig dkar po ni 'thor bzhin/__/rkang gar stabs bsgyur zhing gya gyu ru ldem ldem/__/bya ri dwags spu sdug gsung snyan ni sgrogs tshe/__/ma o rgyan mkha' 'gro'i gling chen de dran byung /__/bzo ma dgos rang byung rdo ba yi phug chen/__/lha rang 'khrungs rtsa gsum rab 'byams kyi dkyil 'khor/__/chos nor gyi gter kha 'dzad med du gtams shing /__/ma DA ki'i bro gar 'du 'phro ni chad med/__/pha o rgyan pad+ma'i thugs bskyed kyi zhing mchog/__dpal pad+ma 'od kyi 'dra cog ni 'di lags/__/lha rtsa gsum rab 'byams dgyes dgu ru rol pa'i/__/gnas 'di ngang mjal ba'i rnal 'byor nga skyid do/__/yar bltas pas byin rlabs sprin phung ni thib thib/__/bar dngos grub sbrang char si li li 'bebs shing /__/thang sngo ljang g.yu yi maN+Dal gyi steng du/__/lha bzang shing sna tshogs sman dri ni 'thul te/__/sems med kyi rkang 'thung gar brgya yi rtsed 'jo/__/bza' shing 'bras sna tshogs mgo cog ni dud de/__/ro zhim mngar phan tshun 'gran pa la chas bzhin/__/ma tshogs kyi 'du ba'i dga' ston ni 'bad med/__/dus 'khor mo yug tu 'bras bzang gi snye ma/__/ljags ro mngar brgya ldan lha yul gyi bdud rtsi/__/nam ci dgar spyod pa'i skal bzang nga skyid do/__/grogs dpa' bo dpa' mo mdza' phrug gi gzhon nu/__/dar pany+tsa li ka lha rdzas kyi na bza'/__/rgyan rin chen sna tshogs 'phyang 'phrul ni mdzes shing /__/rkang ngang mo bzhin du gdu bu yi sgra ldan/__/glu snyan 'jebs rna ba'i dpyid du ni son zhing /__/bzo rig pa ngo mtshar sgyu ma yi 'phrul che/__/dus mig 'dzum tsam la brgya phrag ni ngoms dang /__/bcud bzang po'i nying khu dri bzang gi ngad ldan/__/lan ji tsam myong yang sun pa ni mi skyed/__/ma mkha' 'gro'i tshogs dang skal ba ni mnyam pa'i/__thabs rmad byung gsang ba'i tshogs khang la zhugs nas/__/lus rdo rje'i bro gar gar stabs ni sgyur zhing /__/chos zab mo rtsa gsum rig 'dzin gyi srog sgrub/__/rang ci dgar spyod pa'i rten 'brel la yag byung /__/sngon khrag 'thung he ru ka dpal gyi dpa' bo/__/dus deng sang 'jigs med nam mkha' yi rdo rje/__/bu de la rnal 'byor dbang phyug gis byin phob/__/lus 'chi med rdo rje'i lang tsho ni rgyas shing /__/tshe bdud kyi bar chad skye med du bsgral nas/__/ngag grags stong gzhom med chos rnga ni ldir bzhin/__/yid rig stong brdal khyab chen po las ma g.yos/__/mchog thun mong dngos grub bgo skal la spyod de/__/phyogs kun las rnam par rgyal ba yi bkra shis/__/dbyangs snyan po mi nub dar rgyas su gyur nas/__/sa gsum kun dge zhing legs pa ru shog cig/__/ces pa'ang 'bras ljongs sgang thog tu 'jigs med nam mkha'i rdo rjes glur blang ba dge legs su gyur cig/__//