ཨོཾ་སྭསྟི། ས་གསུམ་ཀུན་དགའི་སྣང་བ་འབུམ་འཕྲོ་བའི་སོགས་ས་སྐྱའི་གདུང་སྲས་རྫོང་སར་ཁྲི་གསོལ་སྐབས།

🚧 This website is under continued development. We appreciate your patience!

Previous Text Back to Volume PageNext Text

Wylie title	oM swasti/ sa gsum kun dga'i snang ba 'bum 'phro ba'i sogs sa skya'i gdung sras rdzong sar khri gsol skabs
Location	chos kyi blo gros bka' 'bum Volume 12, Text 28, Pages 101-107 (Folios 1a1 to 4a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. oM swasti sa gsum kun dga'i snang ba 'bum 'phro ba'i sogs sa skya'i gdung sras rdzong sar khri gsol skabs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 101-107. Bir, H.P.: Khyentse Labrang, 2012.
Genre	Official Letters - chab shog

1 Texts in this Section (sde tshan or chos tshan)

101-107	ཨོཾ་སྭསྟི། ས་གསུམ་ཀུན་དགའི་སྣང་བ་འབུམ་འཕྲོ་བའི་སོགས་ས་སྐྱའི་གདུང་སྲས་རྫོང་སར་ཁྲི་གསོལ་སྐབས། oM swasti/ sa gsum kun dga'i snang ba 'bum 'phro ba'i sogs sa skya'i gdung sras rdzong sar khri gsol skabs Official Letters - chab shog	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཨོཾ་སྭསྟི། ས་གསུམ་ཀུན་དགའི་སྣང་བ་འབུམ་འཕྲོ་བའི། །བློ་གྲོས་ཟིལ་མངར་དང་བཅས་ཟླ་བ་ནི། །བརྩེ་ཆེན་བདུད་རྩིའི་སྙིང་པོར་གྱུར་པའི་དཔྱིད། །འཇམ་མགོན་བླ་མ་དགྱེས་པའི་ཞབས་པདྨོར། །རབ་དྭངས་ཡིད་ཀྱི་ཆུ་གཏེར་གསར་པའི་ངོགས། །དང་པའི་རླུང་གིས་དལ་གྱིས་གཡོས་པ་ལས། །གུས་ཕྱག་ཀུ་མུད་ལྡེམ་པའི་གར་དང་བཅས། །བསྟོད་བསྔགས་སྦྲང་རྩིའི་མཆོད་སྤྲིན་མཛེས་པར་བསྟར། །གཟོད་ནས་རབ་ཞིའི་དབྱིངས་སུ་སྙོམས་ཞུགས་ཀྱང་། །གདུལ་བྱར་རྗེས་བརྩེ་སྙིང་རྗེའི་གཞན་དབང་གིས། །སྲིད་པའི་མཐར་ཡང་རྒྱལ་བའི་མྱུ་གུའི་གཟུགས། །མཚན་དཔེའི་མེ་ཏོག་གཞོན་ནུའི་ཚུལ་དུ་ཤར། །དེ་ལྟ་ན་ཡང་ཟག་མེད་ཡོན་ཏན་ནི། །ནོར་བུའི་ཁམས་བཞིན་རིགས་ཀྱི་མཐུ་བརྟས་པས། །དཔག་མེད་མཁྱེན་བརྩེ་ནུས་པ་མཐའ་ཀླས་ཕྱིར། །དགེ་ལེགས་འདོད་དགུའི་དཔལ་འབྱོར་ཟད་མི་ཤེས། །དཔལ་ལྡན་མཁས་གྲུབ་ཚོགས་ཀྱིས་ལེགས་མཛེས་མཛེས་སྡུག་འཇམ་མགོན་དགྱེས་པའི་སྤོར། །དཔལ་ལྡན་ཡོན་ཏན་གདོང་ལྔས་རབ་བརྗིད་བརྗིད་ལྡན་ཐེག་མཆོག་གད་རྒྱངས་ཅན། །དཔལ་ལྡན་ཕྲིན་ལས་མཛད་བཟང་རབ་དཀར་དཀར་མཛེས་ཕན་བདེའི་གསེར་གྱི་སྤྲིན། །དཔལ་ལྡན་སྐལ་བཟང་རི་སྐྱེས་ལེགས་འདུལ་འདུལ་བཞིའི་ཆོ་འཕྲུལ་རྨད་དུ་བྱུང་། །ཁྱད་པར་སྙིགས་མ་ལྔ་ཡིས་གདུང་བའི་དུས། །ངོ་མཚར་ཐུགས་བསྐྱེད་ཆུ་འཛིན་འཛུམ་དཀར་ལས། །ནང་གི་མུན་སེལ་ཆོས་ཀྱི་གྲུ་ཆར་གྱིས། །སིམ་སྟེར་འགྲོ་བའི་དཔལ་མགོན་ཁྱེད་ཀྱི་མཐུ། །ཕྱོགས་དུས་ཞིང་གི་ཁྱོན་མཛེས་པའི། །འཇམ་དཔལ་གཞོན་ནུའི་ཡེ་ཤེས་ཀྱི། །སྣང་བ་གསར་བའི་དགའ་སྟོན་ཆེས། །ཀུན་ཏུ་ཤིས་པའི་མེ་ཏོག་སྩོལ། །ཅེས་བཀྲ་ཤིས་པའི་ཚིག་གི་མེ་ཏོག་པདྨ་དཀར་པོའི་ཆར་ཅུང་ཟད་འཐོར་བས་དགེ་ལེགས་སུ་བྱས་ཏེ། དེང་གི་ཆར་ཕྱོགས་དུས་གནས་སྐབས་ཀུན་ཏུ་དགེ་བའི་དཔལ་ཡོན་འབུམ་ཕྲག་གིས་མངོན་བར་གཏམས་པའི་གནས་དུས་ཕུན་སུམ་ཚོགས་པར་རྒྱལ་བ་ཀུན་གྱི་མཁྱེན་རབ་ཡེ་ཤེས་ཀྱི་ཕུང་པོ་གཅིག་ཏུ་འཁྱིལ་བའི་གོང་བུ་རྗེ་བཙུན་བརྟན་པའི་འཁོར་ལོ་ཟུར་ཕུད་ལྔ་པ་ཉིད་སྙིགས་དུས་སྐྱོབས་པའི་དཔུང་གཉེན་ཡོངས་རྫོགས་བསྟན་པའི་ཤིང་རྟར་བྱོན་པ་བཀའ་བབ་བདུན་ལྡན་འཇམ་དབྱངས་མཁྱེན་བརྩེའི་དབང་པོའི་ཐུགས་ཀྱི་ཡེ་ཤེས་སྒྱུ་མ་རོལ་པའི་བདག་ཉིད་མཁྱེན་ནུས་བརྩེ་བའི་ཡེ་ཤེས་འགྲན་ཟླ་དང་བྲལ་བའི་མཚུངས་མེད་གྲུབ་པའི་དབང་ཕྱུག་བདག་ཆེན་ཁྲི་འཛིན་རྡོ་རྗེ་འཆང་ངག་དབང་མཐུ་སྟོབས་དབང་ཕྱུག་དྲག་ཤུལ་ཡོན་ཏན་རྒྱ་མཚོས་གང་སླར་ཡང་འཇམ་མགོན་ས་སྐྱ་པའི་བསྟན་པ་གཞིར་བཞེངས་སུ་བསླང་ཕྱིར་བསམ་བཞིན་སྲིད་པ་ཉེ་བར་བཟུང་སྟེ། འཆི་མེད་འོད་གསལ་ལྷའི་གཙང་མའི་རིགས་ཀྱི་ཐིག་ལེ་ཁམས་གསུམ་གྱི་བདུད་དགྲ་ནག་པོའི་ཕྱོགས་དག་རྒྱང་རིང་དུ་སྤྲད་དེ་དགེ་ལེགས་ཕྱོགས་ཐམས་ཅད་ལས་རྣམ་པར་རྒྱལ་བ་ཆེན་པོའི་རྒྱལ་རྔ་སྙན་པར་སྒྲོགས་ཤིང་། གྲགས་དཀར་གྱི་བ་དན་འཇིག་རྟེན་གསུམ་གྱི་འཁོར་ཡུགས་ན་མངོན་པར་མཐོ་བ་དཔལ་ས་སྐྱ་པ་ཆེན་པོའི་རྒྱལ་བའི་སྲས་ཀྱི་རིགས་ཀྱི་མྱུ་གུ་དམ་པ་མདོ་ཁམས་སའི་ཐིག་ལེ་དོན་ཀུན་གྲུབ་པའི་ཆོས་ཀྱི་དགའ་ཚལ་གྱི་དོ་རར་མཚན་དཔེའི་པདྨོ་གསར་པ། རབ་བྱུང་བཅུ་དྲུག་པའི་བྱེ་བྲག་ལེགས་སྦྱར་དུ་བི་ཛ་ཡ་ཞེས་རྣམ་པར་རྒྱལ་བ་འབྱུང་བ་གཉིས་ལྡན་ཆུ་མོ་སྦྲུལ་གྱི་ལོར་ལྷར་བཅས་འགྲོ་བའི་བསོད་ནམས་ཀྱི་དབྱིག་ཏུ་འཁྲུངས་པའི་དུས་སྟོན་ཆེན་པོ་གསར་དུ་བཞད་པའི་སྐབས་སུ་བབ་པ་ན། སྡེ་བཞི་དགེ་བ་བཅུ་ཡི་དཔལ་ཡོན་བྱེ་བས་མཛེས་པར་བྱས་ཤིང་། གསེར་ལྡན་དལ་འབབས་ཀྱི་ཀླུང་གིས་ཐ་གྲུར་བསྐོར་བའི་གཡོན་ཟུར། མདོ་ཙམ་ན་འགྲན་ཟླས་སྤང་བའི་གནམ་སའི་དབང་ཕྱུག་ཆེན་པོ་ས་སྐྱོང་སྡེ་དགེ་རྒྱལ་ཁབ་ཀྱི་ཕོ་བྲང་ཕུན་ཚོགས་ལུགས་བརྒྱའི་མདུན་ས་དཔལ་ལྡན་ལྷུན་གྲུབ་སྟེང་གི་ཆོས་གྲྭའི་ཤར་ཕྱོགས། ཤོད་ཆེན་ཚན་བཞི་ཡི་ཡ་གྱལ་སྨན་ཤོད་ཅེས་ཆོས་ནོར་འདོད། ཐར་སྡེ་བཞི་ཡི་དཔལ་གྱིས་འཁྱུད་ཅིང་། རྒྱལ་དབང་པདྨ་ཀཱ་རས་བྱིན་གྱིས་བརླབས་པའི་རྡོ་རྗེའི་གནས་ཆེན་དང་གནས་ཕྲན་གྱི་ར་བས་མངོན་པར་བསྐོར་བའི་ས་འཛིན་གྱི་ལྟེ་བ། རྫོང་སར་བཀྲ་ཤིས་ལྷ་རྩེ་ཞེས་དཔལ་ལྡན་ས་ངོར་ཚར་གསུམ་གྱི་རིང་ལུགས་དྲི་མ་མེད་པ་གཙོ་བོར་གྱུར་པའི་རྒྱལ་བསྟན་ཕྱོགས་དང་རིས་སུ་མ་ཆད་པའི་མདོ་སྔགས་བསྟན་པ་རྒྱ་མཚོའི་ཆུ་ཀླུང་གཅིག་ཏུ་འཁྱིལ་བའི་གནས་ཤྲཱི་ན་ལེནྡྲ་གཉིས་པ་གྲགས་པའི་གཙུག་ལག་ཁང་བསྐལ་བཟང་ཆོས་ཀྱི་དགའ་ཚལ་དང་འདབ་འབྱོར་བའི་འཕགས་པ་རིགས་གསུམ་མགོན་པོ་རྟག་ཏུ་དགྱེས་དགུར་རོལ་པའི་རང་བྱུང་སྤྲུལ་པའི་གནྡྷོ་ལ། ས་བཅུའི་དབང་ཕྱུག་རྒྱལ་ཚབ་ལྷ་བརྒྱའི་མགོན་པོའི་ཡེ་ཤེས་ཀྱི་སྐུ་ཉིན་མོར་བྱེད་པའི་གཟི་འོད་རྟེན་མཆོག་ནོར་བུའི་ལྷུན་པོ་དང་དབྱེར་མེད་དུ་བཞུགས་པའི་མི་ཕམ་ཆོས་ཀྱི་མདུན་ས་བཤད་སྒྲུབ་དར་རྒྱས་གླིང་གི་ཀུན་དགའ་ར་བར་སྲིད་གསུམ་ཆེ་རྒུའི་ཚངས་གནས་སུ་ཞབས་སེན་གྱི་ནོར་བུ་མངོན་པར་བཀོད་པས་ནག་པོའི་རྩ་ལག་ཟིལ་གྱིས་གནོན་པའི་འཇིགས་བྲལ་གདོང་ལྔའི་ཁྲི་ལ་སྐུ་མཛེས་སྡུག་གི་བརྟན་པ་བསོད་ནམས་བརྒྱ་ལས་གྲུབ་པའི་མཚན་དཔེའི་གཟི་བྱིན་འབར་བས་མཐོང་ན་མི་མཐུན་པ་མེད་པ། གསུང་ཚངས་པའི་དབྱངས་ཀྱི་ཆོས་ཆར་སྐལ་ལྡན་གདུལ་བྱ་རྒྱ་མཚོའི་རྣ་བར་འཇེབས་པས་ལྷར་བཅས་སྐྱེ་འགྲོའི་ཡིད་འཕྲོག་པ། ཐུགས་ཟབ་ཞི་འོད་གསལ་བདེ་སྟོང་མཆོག་གི་རོལ་པ་ལས་ནམ་ཡང་མི་འདའ་བས་མཁྱེན་གཉིས་ཤེས་རབ་ཀྱི་དཀྱིལ་འཁོར་གཅིག་ཆར་རྫོགས་པའི་འཁོན་གདུང་རྒྱལ་བའི་མྱུ་གུ་ཉིད། ཛཾ་གླིང་བསྟན་འགྲོ་མཐའ་དག་གི་དགེ་མཚན་བདུད་རྩིའི་སྣང་བ་འབུམ་གྱི་འབྱུང་གནས། མཁས་གྲུབ་བཟང་སོགས་དམ་པའི་རྣམ་ཐར་གྱི་ཆ་ཤས་མ་ལུས་པ་ཡོངས་སུ་རྫོགས་ཏེ། རྩོད་དུས་འཇིགས་དང་སྡུག་བསྔལ་གྱི་མུན་པ་ཀུན་ནས་འཇོམས་ཤིང་། བདུད་དང་ཕས་རྒོལ་བར་ཆད་མི་མཐུན་པའི་ཕྱོགས་ལས་རྣམ་པར་རྒྱལ་བ། རྒྱལ་བསྟན་ཡོངས་རྫོགས་བཤད་སྒྲུབ་ལས་གསུམ་གྱི་ཆུ་གཏེར་སྤེལ་ཞིང་སྲུང་བའི་བྱེད་པོ་གཅིག་པུར་ཞིང་འདིར་གསང་གསུམ་གཞན་དུ་མི་འགྱུར་བ་རྟག་ཅིང་བརྟན་ལ་ནམ་ཡང་མི་གཡོ་བའི་ཁྲི་འཕང་མཐོན་པོར་ནམ་མཁའ་ཇི་སྲིད་བར་བཞུགས་པར་གསོལ་བ་འདེབས་པའི་ཕྱིར་གུས་འབངས་མཁྱེན་བརྩེའི་སྤྲུལ་མིང་འཛིན་པ་འཇམ་དབྱངས་ཆོས་ཀྱི་བློ་གྲོས་ནས་ལེགས་འབུལ་གྱི་དགའ་སྟོན་དུ་བཀྲ་ཤིས་པའི་ལྷ་རེག་ནང་མཛོད་སྲིད་དུ་རིང་བ། གང་སྐུ་མཁྱེན་གཉིས་ཡེ་ཤེས་ཀྱིས་གཏེར་མཛོད་རྗེ་བཙུན་འཇམ་དཔལ་དབྱངས་དང་གཉིས་མེད་ཀྱི་ངོ་བོར་གཟོད་ནས་གབ་པའི་རྟགས་སུ་ཕྲན་རང་གི་དད་རྟེན་དུ་བཟུང་བའི་འཇམ་མགོན་མཁྱེན་པའི་བདག་པོའི་སྣང་བརྙན་རྒྱ་གར་ལི་མ་བྱིན་ལྡན། གང་གསུམ་ཟབ་རྒྱས་ཆོས་ཀྱི་སྒྲ་དབྱངས་རྒྱུན་མི་ཆད་པར་སྒྲོགས་པའི་བརྡར་ཚེ་དང་ཡེ་ཤེས་དཔག་མེད་ཀྱི་མདོ་སྡེ་རིན་པོ་ཆེ་དང་པོའི་ཞུན་མས་བྲིས་པའི་གླེགས་བམ་དང་མཁྱེན་བརྩེའི་བཀའ་འབུམ་ཡོངས་རྫོགས་ཀྱི་གླེགས་བམ་བཅུ་གསུམ་པའི་གྲངས་ལྡན། གང་ཐུགས་གཟུངས་སྤོབས་ཏིང་འཛིན་གྱི་འཇུག་ལྡང་མཐའ་ཀླས་པར་རང་དབང་བསྒྱུར་ཕྱིར་རྡོར་དྲིལ༴ བཅས་འབུལ་ལམ་ཞུ་ན་དངོས་པོ་སྐྲ་རྩེའི་བླང་བའི་ཆུ་ཐིག་གི་ཟེགས་མ་ལས་ཕྲ་ཡང་དད་དམ་བསམ་སྦྱོར་གཙང་མའི་ཉེར་ལེན་གྱིས་བརྩེ་ཆེན་ཡེ་ཤེས་ཀྱི་གཟིགས་པའི་འབབ་སྟེགས་སུ་ཡུད་ཙམ་སྨིན་པ་དང་། སླར་ཡང་། འཆི་མེད་རྟག་པ་དམ་པའི་སྣང་བ་དང་། །ལྷན་ཅིག་ཚོགས་གཉིས་ཆ་རྫོགས་ཉིན་མོར་བྱེད། །ཚེ་མཆོག་གྲུབ་པའི་ཁྱབ་བདག་རྣམ་གསུམ་གྱིས། །མི་ཤིག་རྡོ་རྗེའི་གསང་གསུམ་བརྟན་གྱུར་ཅིག །དྲི་མེད་མཁྱེན་གཉིས་མེ༵་ལོང༵་རབ་གསལ་དུག་གསུམ་ནད་འཇོམས་གི༵འུ༵་ཧ༵ཾ། །ཕུལ་བྱུང་ཚོགས་ཟུང་ཞོ༵་ཡི་བཅུད་འཁྱིལ་དགེ་ལེགས་དུཪྺའི༵་ལྗོན་བའི་ཚལ། །དོན་གཉིས་ལྷུན་གྲུབ་བི༵ལྦའི༵་འབྲས་སྨིན་གྲགས་སྙན་ཆོས་ཀྱི་དུང༵་གི་སྒྲས། །ཁམས་གསུམ་དབང་སྡུད་ལི༵་ཁྲིའི༵་ཚོན་བཀྲ་མཐར་བྱེད་ནུས་པའི་ཡུང༵ས་དཀར༵་མཐུས། །བཀྲ་ཤིས་སྲིད་ཞིའི་དགེ་མཚན་ཀུན་གྱི་གཞི། །བསྟན་དང་དེ་འཛིན་ཞབས་པད་གཡོ་མེད་བརྟན། །བཤད་སྒྲུབ་ལས་ཀྱི་མངའ་ཐང་མི་ཉམས་པའི། །དགའ་སྟོད་ས་གསུམ་ཁྱོན་དུ་མཛེས་གྱུར་ཅིག །སརྦ་དཱ་ཀ་ལྱཱ་ཎཾ་བྷ་ཝ་ཏུ།། །།

[edit]

oM swasti/__sa gsum kun dga'i snang ba 'bum 'phro ba'i/__/blo gros zil mngar dang bcas zla ba ni/__/brtse chen bdud rtsi'i snying por gyur pa'i dpyid/__/'jam mgon bla ma dgyes pa'i zhabs pad+mor/__/rab dwangs yid kyi chu gter gsar pa'i ngogs/__/dang pa'i rlung gis dal gyis g.yos pa las/__/gus phyag ku mud ldem pa'i gar dang bcas/__/bstod bsngags sbrang rtsi'i mchod sprin mdzes par bstar/__/gzod nas rab zhi'i dbyings su snyoms zhugs kyang /__/gdul byar rjes brtse snying rje'i gzhan dbang gis/__/srid pa'i mthar yang rgyal ba'i myu gu'i gzugs/__/mtshan dpe'i me tog gzhon nu'i tshul du shar/__/de lta na yang zag med yon tan ni/__/nor bu'i khams bzhin rigs kyi mthu brtas pas/__/dpag med mkhyen brtse nus pa mtha' klas phyir/__/dge legs 'dod dgu'i dpal 'byor zad mi shes/__/dpal ldan mkhas grub tshogs kyis legs mdzes mdzes sdug 'jam mgon dgyes pa'i spor/__/dpal ldan yon tan gdong lngas rab brjid brjid ldan theg mchog gad rgyangs can/__/dpal ldan phrin las mdzad bzang rab dkar dkar mdzes phan bde'i gser gyi sprin/__/dpal ldan skal bzang ri skyes legs 'dul 'dul bzhi'i cho 'phrul rmad du byung /__/khyad par snyigs ma lnga yis gdung ba'i dus/__/ngo mtshar thugs bskyed chu 'dzin 'dzum dkar las/__/nang gi mun sel chos kyi gru char gyis/__/sim ster 'gro ba'i dpal mgon khyed kyi mthu/__/phyogs dus zhing gi khyon mdzes pa'i/__/'jam dpal gzhon nu'i ye shes kyi/__/snang ba gsar ba'i dga' ston ches/__/kun tu shis pa'i me tog stsol/__/ces bkra shis pa'i tshig gi me tog pad+ma dkar po'i char cung zad 'thor bas dge legs su byas te/__deng gi char phyogs dus gnas skabs kun tu dge ba'i dpal yon 'bum phrag gis mngon bar gtams pa'i gnas dus phun sum tshogs par rgyal ba kun gyi mkhyen rab ye shes kyi phung po gcig tu 'khyil ba'i gong bu rje btsun brtan pa'i 'khor lo zur phud lnga pa nyid snyigs dus skyobs pa'i dpung gnyen yongs rdzogs bstan pa'i shing rtar byon pa bka' bab bdun ldan 'jam dbyangs mkhyen brtse'i dbang po'i thugs kyi ye shes sgyu ma rol pa'i bdag nyid mkhyen nus brtse ba'i ye shes 'gran zla dang bral ba'i mtshungs med grub pa'i dbang phyug bdag chen khri 'dzin rdo rje 'chang ngag dbang mthu stobs dbang phyug drag shul yon tan rgya mtshos gang slar yang 'jam mgon sa skya pa'i bstan pa gzhir bzhengs su bslang phyir bsam bzhin srid pa nye bar bzung ste/__'chi med 'od gsal lha'i gtsang ma'i rigs kyi thig le khams gsum gyi bdud dgra nag po'i phyogs dag rgyang ring du sprad de dge legs phyogs thams cad las rnam par rgyal ba chen po'i rgyal rnga snyan par sgrogs shing /__grags dkar gyi ba dan 'jig rten gsum gyi 'khor yugs na mngon par mtho ba dpal sa skya pa chen po'i rgyal ba'i sras kyi rigs kyi myu gu dam pa mdo khams sa'i thig le don kun grub pa'i chos kyi dga' tshal gyi do rar mtshan dpe'i pad+mo gsar pa/__rab byung bcu drug pa'i bye brag legs sbyar du bi dza ya zhes rnam par rgyal ba 'byung ba gnyis ldan chu mo sbrul gyi lor lhar bcas 'gro ba'i bsod nams kyi dbyig tu 'khrungs pa'i dus ston chen po gsar du bzhad pa'i skabs su bab pa na/__sde bzhi dge ba bcu yi dpal yon bye bas mdzes par byas shing /__gser ldan dal 'babs kyi klung gis tha grur bskor ba'i g.yon zur/__mdo tsam na 'gran zlas spang ba'i gnam sa'i dbang phyug chen po sa skyong sde dge rgyal khab kyi pho brang phun tshogs lugs brgya'i mdun sa dpal ldan lhun grub steng gi chos grwa'i shar phyogs/__shod chen tshan bzhi yi ya gyal sman shod ces chos nor 'dod/__thar sde bzhi yi dpal gyis 'khyud cing /__rgyal dbang pad+ma kA ras byin gyis brlabs pa'i rdo rje'i gnas chen dang gnas phran gyi ra bas mngon par bskor ba'i sa 'dzin gyi lte ba/__rdzong sar bkra shis lha rtse zhes dpal ldan sa ngor tshar gsum gyi ring lugs dri ma med pa gtso bor gyur pa'i rgyal bstan phyogs dang ris su ma chad pa'i mdo sngags bstan pa rgya mtsho'i chu klung gcig tu 'khyil ba'i gnas shrI na len+d+ra gnyis pa grags pa'i gtsug lag khang bskal bzang chos kyi dga' tshal dang 'dab 'byor ba'i 'phags pa rigs gsum mgon po rtag tu dgyes dgur rol pa'i rang byung sprul pa'i gan+d+ho la/__sa bcu'i dbang phyug rgyal tshab lha brgya'i mgon po'i ye shes kyi sku nyin mor byed pa'i gzi 'od rten mchog nor bu'i lhun po dang dbyer med du bzhugs pa'i mi pham chos kyi mdun sa bshad sgrub dar rgyas gling gi kun dga' ra bar srid gsum che rgu'i tshangs gnas su zhabs sen gyi nor bu mngon par bkod pas nag po'i rtsa lag zil gyis gnon pa'i 'jigs bral gdong lnga'i khri la sku mdzes sdug gi brtan pa bsod nams brgya las grub pa'i mtshan dpe'i gzi byin 'bar bas mthong na mi mthun pa med pa/__gsung tshangs pa'i dbyangs kyi chos char skal ldan gdul bya rgya mtsho'i rna bar 'jebs pas lhar bcas skye 'gro'i yid 'phrog pa/__thugs zab zhi 'od gsal bde stong mchog gi rol pa las nam yang mi 'da' bas mkhyen gnyis shes rab kyi dkyil 'khor gcig char rdzogs pa'i 'khon gdung rgyal ba'i myu gu nyid/__dzaM gling bstan 'gro mtha' dag gi dge mtshan bdud rtsi'i snang ba 'bum gyi 'byung gnas/__mkhas grub bzang sogs dam pa'i rnam thar gyi cha shas ma lus pa yongs su rdzogs te/__rtsod dus 'jigs dang sdug bsngal gyi mun pa kun nas 'joms shing /__bdud dang phas rgol bar chad mi mthun pa'i phyogs las rnam par rgyal ba/__rgyal bstan yongs rdzogs bshad sgrub las gsum gyi chu gter spel zhing srung ba'i byed po gcig pur zhing 'dir gsang gsum gzhan du mi 'gyur ba rtag cing brtan la nam yang mi g.yo ba'i khri 'phang mthon por nam mkha' ji srid bar bzhugs par gsol ba 'debs pa'i phyir gus 'bangs mkhyen brtse'i sprul ming 'dzin pa 'jam dbyangs chos kyi blo gros nas legs 'bul gyi dga' ston du bkra shis pa'i lha reg nang mdzod srid du ring ba/__gang sku mkhyen gnyis ye shes kyis gter mdzod rje btsun 'jam dpal dbyangs dang gnyis med kyi ngo bor gzod nas gab pa'i rtags su phran rang gi dad rten du bzung ba'i 'jam mgon mkhyen pa'i bdag po'i snang brnyan rgya gar li ma byin ldan/__gang gsum zab rgyas chos kyi sgra dbyangs rgyun mi chad par sgrogs pa'i brdar tshe dang ye shes dpag med kyi mdo sde rin po che dang po'i zhun mas bris pa'i glegs bam dang mkhyen brtse'i bka' 'bum yongs rdzogs kyi glegs bam bcu gsum pa'i grangs ldan/__gang thugs gzungs spobs ting 'dzin gyi 'jug ldang mtha' klas par rang dbang bsgyur phyir rdor dril=__bcas 'bul lam zhu na dngos po skra rtse'i blang ba'i chu thig gi zegs ma las phra yang dad dam bsam sbyor gtsang ma'i nyer len gyis brtse chen ye shes kyi gzigs pa'i 'bab stegs su yud tsam smin pa dang /__slar yang /__'chi med rtag pa dam pa'i snang ba dang /__/lhan cig tshogs gnyis cha rdzogs nyin mor byed/__/tshe mchog grub pa'i khyab bdag rnam gsum gyis/__/mi shig rdo rje'i gsang gsum brtan gyur cig__/dri med mkhyen gnyis me~X longa~X rab gsal dug gsum nad 'joms gi~X'u~X ha~XM/__/phul byung tshogs zung zho~X yi bcud 'khyil dge legs duR+Wa'i~X ljon ba'i tshal/__/don gnyis lhun grub bi~Xlba'i~X 'bras smin grags snyan chos kyi dunga~X gi sgras/__/khams gsum dbang sdud li~X khri'i~X tshon bkra mthar byed nus pa'i yunga~Xs dkara~X mthus/__/bkra shis srid zhi'i dge mtshan kun gyi gzhi/__/bstan dang de 'dzin zhabs pad g.yo med brtan/__/bshad sgrub las kyi mnga' thang mi nyams pa'i/__/dga' stod sa gsum khyon du mdzes gyur cig__/sarba dA ka l+yA NaM b+ha wa tu//___//