JKCL-KABUM-08-NYA-012-061

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 61, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ བླ་མ་རྒྱང་འབོད་ཀྱི་གསོལ་འདེབས་སྲིད་ཞིའི་གདུང་སེལ་ཞེས་བྱ་བ་བཞུགས་སོ། །འེ་འེ། །བླ་མ་མཁྱེན་ནོ། །མཁྱེན་ནོ་མཁྱེན་ནོ་བླ་མ་མཁྱེན་ནོ། །སངས་རྒྱས་ཀུན་འདུས་ཀྱི་ངོ་བོ། །དམ་ཆོས་རིན་ཆེན་གྱི་འབྱུང་གནས། །འཕགས་ཚོགས་དགེ་འདུན་གྱི་མངའ་བདག། རྩ་བའི་བླ་མ་རང་མཁྱེན་ནོ། །རྩ་བརྒྱུད་བླ་མ་ཡི་སྤྲོ་གཞི། །ཡི་དམ་ཞི་ཁྲོ་ཀུན་འདུས་པ། །མཁའ་འགྲོ་ཆོས་སྐྱོང་གི་གཏེར་མཛོད། །བླ་མ་བཀའ་དྲིན་ཅན་མཁྱེན་ནོ། །ཞེས་པའི་རྒྱང་འབོད་ལན་གསུམ་སོགས་ཀྱིས་བོས་ནས། ལས་ངན་བདག་ལ་ཐུགས་རྗེས་གཟིགས་ཤིག། སྐལ་དམན་སྐྱེ་ངན་སྡུག་བསྔལ་མཚོ་ལས། །བྱམས་པའི་ཕྱག་གིས་དྲོངས་པར་མཛོད་ཅིག། ཐར་པའི་སྐམ་སར་དབུགས་དབྱུང་སྩོལ་ཅིག། ཀྱེ་མ་བདག་འདྲའི་སེམས་ཅན་ལས་ངན་རྣམས། །དལ་འབྱོར་ཐོབ་ཀྱང་དོན་མེད་ཆུད་ཟོས་བཏང་། །འཆི་བ་མི་དྲན་འདིར་སྣང་དབང་དུ་སོང་། །ཉིན་རེ་བཞིན་དུ་སྒོ་གསུམ་སྡིག་པར་སྤྱོད། །དགེ་བའི་ལས་ནི་སྐྲ་རྩེའི་ཆུ་ཐིག་ཙམ། །དྲན་དང་ཤེས་བཞིན་མེད་དེ་སྨྱོན་པ་འདྲ། །བག་ཡོད་སྟོར་ནས་བག་མེད་རྣམ་གཡེང་ངང་། །མི་ཚེ་ཉི་མ་ནུབ་རིའི་ཕག་ཏུ་བསྐྱལ། །ཕ་མ་འབྱོར་ལྡན་ཁྱིམ་དུ་སྐྱེས་པའམ། །འབྱོར་མེད་དབུལ་པོའི་ཁྱིམ་དུ་སྐྱེས་ཀྱང་རུང་། །གཅེས་ཕྲུག་རྒྱ་ཡན་གང་བྱུང་གང་ཤར་གྱིས། །རང་བློ་ནང་དུ་མ་ཁུག་ངན་གོམས་ཀྱི། །ཆུ་ངན་ལམ་རྒྱུག་དབང་དུ་ཤོར་བ་དང་། །དམ་ཆོས་བྱེད་བློ་མ་ཤར་སེམས་འདི་ནི། །རྡོ་བ་དང་མཚུངས་འཆི་བ་འོང་སྙམ་མེད། །ཉིན་མཚན་ཐམས་ཅད་སྐྱིད་ཀྱི་ངང་དུ་ཟད། །ཡང་ན་སྡུག་གི་ངང་དུ་དུས་འདའ་ཞིང་། །སྐྱིད་འདོད་སྡུག་བསྔལ་ཉོ་བ་ཀྱེ་མ་ཧུད། །ལང་ཚོ་མཛེས་པའི་བཀྲག་མདངས་མྱུར་དུ་ཡལ། །གཤིན་རྗེའི་མཆེ་བའི་བར་དུ་བཟུང་ནས་འདུག། སོ་ཡི་མ་བཏབ་ཙམ་ན་ཁ་རྗེ་ཆེ། །འཆི་བ་ཞེས་བྱའི་བདུད་པོ་ངམ་ནག་དེས། །ཞགས་པ་བཟུང་ནས་གམ་ན་སླེབས་པའི་དུས། །ཁ་བཤད་མཁས་པས་མགོ་བསྐོར་བྱ་ས་མེད། །རྒྱུ་ནོར་ཆེ་བས་བསླུ་རུ་མི་བཏུབ་ཅིང་། །མཐུ་དང་ནུས་པའི་སྟོབས་ཀྱིས་བཟློག་ཏུ་མེད། །ལག་པ་བྲང་འཐབ་མིག་སྒོར་མཆི་མ་ལུག། གྲོགས་དང་མཛའ་བཤེས་ཁང་ཁྱིམ་ནོར་རྫས་སོགས། །ཤུལ་དུ་བཞག་ནས་འགྲོ་བའི་དུས་ཤིག་འོང་། །དེ་ཚེ་སྡིག་བསགས་ལས་ཀྱི་ཁུར་པོ་ནི། །ལྷུན་པོའི་གཏོས་ཙམ་ཁྱེར་ནས་བར་དོར་འཁྱམས། །དགེ་བའི་བསགས་པ་རྡུལ་ཕྲན་ཙམ་མཆིས་ཀྱང་། །དེ་ཚེ་བསོད་ནམས་སྐྱབས་ཤིག་ཡོད་ན་ཡང་། །ད་ལྟ་མ་བསགས་དེ་དུས་ཁྱེར་རྒྱུ་མེད། །བར་དོར་འཇིགས་སྐྲག་སྡུག་བསྔལ་དཔག་མེད་མྱོང་། །ངན་སོང་གནས་ལྟུང་སྡུག་བསྔལ་བཟོད་བླག་མེད། །ད་ལྟ་མེ་སྟག་ཕོག་དང་ཉིན་གཅིག་གི །འཆག་ལྟོག་མི་བཟོད་དེ་དུས་ག་ལ་བཟོད། །ཤུགས་དྲག་རྒྱུན་རིང་བཟོད་དཀའི་སྡུག་བསྔལ་དེ། །ལེགས་པར་བསམ་ནས་དམ་ཆོས་སྙིང་ནས་སྒྲུབ། །སྒོ་གསུམ་དགེ་ལ་འབད་ནུས་བྱིན་གྱིས་རློབས། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །དལ་འབྱོར་ཐོབ་པ་ད་རེས་ཙམ་ཞིག་ཡིན། །ཕྱིས་ནས་འདི་འདྲ་ཐོབ་པ་སྲིད་མཐའ་ཙམ། །གལ་ཏེ་མཐའ་འཁོབ་ཀླ་ཀློ་ཆོས་མེད་སར། །མི་ལུས་ཐོབ་ཀྱང་སྙིང་པོ་ཅུང་ཟད་མེད། །དེ་རུ་མི་སྐྱེ་བ་ཡི་སྨོན་ལམ་ཐོབ། །ལྷ་ཡི་གནས་སུ་སྐྱེས་ཀྱང་དགོས་པ་ཆུང་། །ཟག་བཅས་བདེ་འབྲས་ཟད་ནས་ངན་འགྲོར་ལྟུང་། །དེས་ན་རྙེད་དཀའི་མི་ལུས་རིན་ཆེན་འདི། །ནོར་བུ་བརྒྱ་སྟོང་ཐོབ་པའི་དཔེས་མི་མཚོན། །འདི་ཐོབ་སྡིག་ལ་སྤྱོད་པ་ཤིན་ཏུ་བླུན། །དཔེར་ན་ནོར་བུ་འདམ་རྫབ་འཕང་བཞིན་གྱུར། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །ལེགས་ན་ཐར་པའི་གྲུ་གཟིངས་ལུས་འདི་ཡིན། །ཉེས་ན་འཁོར་བའི་གཏིང་རྡོ་འདིས་བྱེད་པས། །ཡར་འགྲོ་མར་འགྲོའི་ས་མཚམས་ད་རེས་ཡིན། །རྟ་ཁ་སྲབ་ཀྱིས་བསྒྱུར་བ་ཇི་བཞིན་དུ། །ཉེས་སྤྱོད་ལམ་ལས་ལྡོག་ཅིག་བླ་མ་མཁྱེན། །འདོད་པ་ལ་ཆགས་ཕུང་ཁྲོལ་བསྐྱེད་པའི་རྒྱུ། །གསོག་དཀའ་སྤེལ་དཀའ་སེར་སྣའི་མདུད་པ་དམ། །སྦྱིན་འབྲས་མེད་ན་སྦྲང་མའི་སྦྲང་རྩི་བཞིན། །སྔོན་བསགས་བསོད་ནམས་ཡོད་ན་འབད་མེད་འབྱོར། །དེ་བས་མཆོད་སྦྱིན་ནུས་པར་བླ་མ་མཁྱེན། །ཁྱིམ་ན་གནས་པ་ཉེས་པ་ཀུན་གྱི་གཞི། །ཆགས་སྡང་གཉིས་ཀྱིས་ཉིན་མཚན་ཐམས་ཅད་འདའ། །དགྲ་འདུལ་གཉེན་སྐྱོང་སོ་ནམ་ཅི་བྱས་ཀྱང་། །ཟིན་པའི་དུས་མེད་ཕྱི་ཕྱིར་ཇེ་ཆེར་འཕེལ། །འདོད་པའི་དོན་མ་གྲུབ་པའི་སྡུག་གིས་གཙེར། །རང་སྡུག་རང་ཉོ་མ་དགོས་བླ་མ་མཁྱེན། །འཁོར་བའི་གནས་ནི་མེ་ཡི་འོབ་དང་མཚུངས། །སྲིན་མོའི་གླིང་དང་རལ་གྲི་རྣོན་པོའི་སོ། །དུག་དང་འདྲ་བའི་ཉེས་དམིགས་དྲན་བྱས་ནས། །སྲིད་ལས་ངེས་འབྱུང་སྐྱེ་བར་བླ་མ་མཁྱེན། །འཁོར་བ་ངན་སོང་སྡུག་བསྔལ་མཐའ་དག་ལས། །སྐྱོབས་པར་ནུས་པ་བླ་མ་དཀོན་མཆོག་ཡིན། །དེ་ལས་གཞན་པའི་སྐྱོབས་པ་སུ་ཡང་མེད། །དང་འདོད་ཡིད་ཆེས་དད་མོས་དྲག་པོ་ཡིས། །སྐྱབས་གསུམ་རང་ངོ་ཤེས་པར་བླ་མ་མཁྱེན། །སེམས་ཅན་ཐམས་ཅད་ཕ་མར་མ་གྱུར་མེད། །ད་ལྟ་འཁྲུལ་ཏེ་བདག་གཞན་ཕྱོགས་རིས་འབྱེད། །ཆགས་དང་སྡང་བའི་སྒྲོག་གིས་བཅིང་བ་འདིའི། །རྩ་བ་བདག་ཏུ་འཛིན་པ་ངོས་ཟིན་ནས། །བདག་མེད་གནས་ལུགས་རྟོགས་པར་བླ་མ་མཁྱེན། །འགྲོ་ཀུན་ཕ་མར་གྱུར་པ་ཤེས་བྱས་ཏེ། །དྲིན་གཟོ་ཕན་འདོད་ལྷག་བསམ་བཟང་པོ་ཡི། །བྱམས་དང་སྙིང་རྗེ་བྱང་ཆུབ་སེམས་མཆོག་ལ། །ཡང་ཡང་བློ་སྦྱོང་ནུས་པར་བླ་མ་མཁྱེན། །ཚོགས་གཉིས་མ་བསགས་སྒྲིབ་པ་མ་བྱང་ན། །སྐུ་བཞིའི་གོ་འཕང་ནམ་ཡང་མི་ཐོབ་པས། །འདྲེ་བཀྲེན་ཡི་དྭགས་སྐྱེ་བའི་རྒྱུ་སྤངས་ནས། །བསོད་ནམས་ཚོགས་ཆེན་བསགས་ལ་འབད་པ་དང་། །དེ་ཡང་དངོས་ཞེན་བདེན་འཛིན་གྱིས་མ་བསླད། །ཆོས་ཀུན་སྒྱུ་མ་སྒྱུ་མའི་རང་བཞིན་སྟོང་། །འཁོར་གསུམ་དམིགས་པ་མེད་པའི་ཤེས་རབ་ལ། །བློ་བཞག་ཡེ་ཤེས་ཚོགས་ཆེན་བསགས་པ་དང་། །འདིས་མཚོན་དགེ་བ་ནམ་མཁའི་མཐའ་ཁྱབ་ཀྱི། །འགྲོ་ལ་ཡོངས་བསྔོ་འཇམ་དཔལ་དཔའ་བོ་ཡི། །རྗེས་སུ་ཞུགས་ནས་བསྔོས་བཞིན་འགྲུབ་པ་དང་། །ལན་དང་རྣམ་པར་སྨིན་ལ་མི་ལྟོས་པར། །འཁོར་གསུམ་ཡོངས་དག་ནུས་པར་བླ་མ་མཁྱེན། །ཐོག་མེད་དུས་ནས་བསགས་པའི་སྡིག་སྒྲིབ་ཀྱིས། །བདེ་གཤེགས་སྙིང་པོའི་རང་ཞལ་བསྒྲིབས་པས་ན། །མ་རིག་གིས་བསྐྱེད་དུག་གསུམ་གྱིས་བསླང་བའི། །མི་དགེའི་ལས་རྣམས་སྟོབས་བཞི་ཚང་བས་བཤགས། །འགྱོད་དང་བསྡམ་སེམས་མེད་ན་མི་འདག་པས། །སྙིང་ནས་གནོང་འགྱོད་དྲག་པོས་མཐོལ་ཞིང་བཤགས། །མ་བཤགས་ཉེས་པ་ཕྲ་མོ་ཞིག་གིས་ཀྱང་། །རྩ་ཡི་ཕུང་པོར་མེ་ནི་འཛིན་པ་བཞིན། །རང་རྒྱུད་བསྲེགས་ཤིང་འཁོར་བར་འཕེན་པས་ན། །བཤགས་པས་སྡིག་སྒྲིབ་དག་པར་བླ་མ་མཁྱེན། །རང་གི་སེམས་ཀྱི་གནས་ལུགས་མ་རྟོགས་ན། །ཁ་བཤད་མཁས་དང་རྣམ་རྟོག་བསྒོམས་པ་ཡིས། །བྱང་ཆུབ་ཆེན་པོ་ནམ་ཡང་མི་ཐོབ་པས། །རང་གི་སེམས་ཀྱི་རྩ་བ་ཆོད་པ་དང་། །ཇི་ལྟར་སྣང་བ་སེམས་ཀྱི་ཆོ་འཕྲུལ་ཡིན། །འཁོར་འདས་རེ་དོགས་སེམས་ཀྱི་འཛིན་སྟངས་ཏེ། །སེམས་ཉིད་རྩ་བ་བཅད་ན་གཞི་རྩ་བྲལ། །མེད་སྣང་སྟོང་པའི་རང་གཟུགས་ཁོ་ན་ལ། །བྱིས་པ་རྣམས་ཀྱི་བདེན་པར་བཟུང་བ་སྟེ། །ཇི་ལྟར་མཁའ་ལ་སྐྲ་ཤད་སྣང་བ་བཞིན། །སྣང་བ་ཉིད་ནས་རང་གི་ངོ་བོས་སྟོང་། །དེས་ན་སེམས་ཉིད་ཡེ་སྟོང་ཀ་ནས་དག། ཡོད་པ་མ་ཡིན་རྒྱལ་བས་ཀྱང་མ་གཟིགས། །མེད་པ་མ་ཡིན་འཁོར་འདས་གཞིར་གྱུར་ཀྱང་། །དངོས་པོ་མཚན་མ་ཅན་དུ་གྲུབ་པ་མེད། །རྒྱ་ཆད་ཕྱོགས་བྲལ་ནམ་མཁའི་དཔེ་ཡིས་མཚོན། །ངོ་བོ་སྟོང་ལ་རང་བཞིན་འོད་གསལ་བ། །ཐུགས་རྗེ་རིག་པ་འཁོར་འདས་ཀུན་ལ་ཁྱབ། །རིག་རྩལ་དག་དང་མ་དག་ཅིར་ཡང་ཤར། །གསུམ་དུ་ཕྱེ་ཡང་དོན་ལ་རིག་པར་གཅིག། གཞི་ཡི་གནས་ལུགས་རྟོགས་པར་བླ་མ་མཁྱེན། །དེ་ཉིད་བླ་མའི་དྲིན་གྱིས་ངོ་འཕྲོད་ནས། །སྤྲོས་པའི་སྒྲོ་འདོགས་ཆོད་པའི་ལྟ་བ་དང་། །མ་བཅོས་ཡེངས་མེད་འཛིན་བྲལ་སྒོམ་པའི་གནད། །གང་ཤར་རང་གྲོལ་འགྲོ་བ་སྤྱོད་པ་སྟེ། །དེ་གསུམ་དབྱེར་མེད་ཤེས་པ་བླ་མ་མཁྱེན། །གདོད་ནས་ལྷུན་གྲུབ་སྐུ་གསུམ་ཆེན་པོར་བཞུགས། །གཉིས་ཆོས་ཀ་ནས་དག་པ་དབུ་མ་ཆེ། །ཐབས་ཤེས་དབྱེར་མེད་ཕྱག་རྒྱ་ཆེན་པོ་དང་། །རིག་སྟོང་འོད་གསལ་རྫོགས་པ་ཆེན་པོ་ཡི། །རང་བཞིན་མངོན་སུམ་རྟོགས་པ་མཐར་ཕྱིན་ནས། །འབྲས་བུ་ཆོས་སྐུ་རིག་པའི་བཙན་ས་ཟིན། །འཁོར་བ་དོང་ནས་སྤྲུགས་ནུས་བླ་མ་མཁྱེན། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །ངན་སོང་སྒོ་ཆེན་ཆོད་ཅིག་བླ་མ་མཁྱེན། །ལས་ངན་སྡིག་སྒྲིབ་དག་པར༴ །རྐྱེན་ངན་བྱང་ཆུབ་ལམ་ཁྱེར༴ །སྐྱིད་སྡུག་རོ་སྙོམས་ནུས་པར༴ །འཁོར་འདས་དབྱེར་མེད་རྟོགས་པར༴ །སྣང་སེམས་གཞི་གྲོལ་འགྱུར་བ༴ །སྐུ་གསུམ་རང་ཞལ་མཇལ་བར༴ །འཇའ་ལུས་ཆོས་སྐུ་འགྲུབ་པར༴ །མཁྱེན་ནོ་མཁྱེན་ནོ་རྗེ་བཙུན་བླ་མ་མཁྱེན། །རེ་ས་གཞན་ན་མེད་དོ་ཐུགས་རྗེས་ཟུངས། །ཅེས་དད་གདུང་དྲག་པོས་འབོད་པར་བྱའོ། །ཞེས་པའང་ཌཱ་ཀིའི་དབང་མོ་ཚེ་རིང་ཆོས་སྒྲོན་ནས་གསུང་བསྐུལ་ངོར། ཆོས་མེད་དྲེད་པོ་ཆོས་ཀྱི་བློ་གྲོས་པས་བྲིས་པའོ།། །།

[edit]

!_bla ma rgyang 'bod kyi gsol 'debs srid zhi'i gdung sel zhes bya ba bzhugs so/__/'e 'e/__/bla ma mkhyen no/__/mkhyen no mkhyen no bla ma mkhyen no/__/sangs rgyas kun 'dus kyi ngo bo/__/dam chos rin chen gyi 'byung gnas/__/'phags tshogs dge 'dun gyi mnga' bdag/__rtsa ba'i bla ma rang mkhyen no/__/rtsa brgyud bla ma yi spro gzhi/__/yi dam zhi khro kun 'dus pa/__/mkha' 'gro chos skyong gi gter mdzod/__/bla ma bka' drin can mkhyen no/__/zhes pa'i rgyang 'bod lan gsum sogs kyis bos nas/__las ngan bdag la thugs rjes gzigs shig/__skal dman skye ngan sdug bsngal mtsho las/__/byams pa'i phyag gis drongs par mdzod cig/__thar pa'i skam sar dbugs dbyung stsol cig/__kye ma bdag 'dra'i sems can las ngan rnams/__/dal 'byor thob kyang don med chud zos btang /__/'chi ba mi dran 'dir snang dbang du song /__/nyin re bzhin du sgo gsum sdig par spyod/__/dge ba'i las ni skra rtse'i chu thig tsam/__/dran dang shes bzhin med de smyon pa 'dra/__/bag yod stor nas bag med rnam g.yeng ngang /__/mi tshe nyi ma nub ri'i phag tu bskyal/__/pha ma 'byor ldan khyim du skyes pa'am/__/'byor med dbul po'i khyim du skyes kyang rung /__/gces phrug rgya yan gang byung gang shar gyis/__/rang blo nang du ma khug ngan goms kyi/__/chu ngan lam rgyug dbang du shor ba dang /__/dam chos byed blo ma shar sems 'di ni/__/rdo ba dang mtshungs 'chi ba 'ong snyam med/__/nyin mtshan thams cad skyid kyi ngang du zad/__/yang na sdug gi ngang du dus 'da' zhing /__/skyid 'dod sdug bsngal nyo ba kye ma hud/__/lang tsho mdzes pa'i bkrag mdangs myur du yal/__/gshin rje'i mche ba'i bar du bzung nas 'dug/__so yi ma btab tsam na kha rje che/__/'chi ba zhes bya'i bdud po ngam nag des/__/zhags pa bzung nas gam na slebs pa'i dus/__/kha bshad mkhas pas mgo bskor bya sa med/__/rgyu nor che bas bslu ru mi btub cing /__/mthu dang nus pa'i stobs kyis bzlog tu med/__/lag pa brang 'thab mig sgor mchi ma lug/__grogs dang mdza' bshes khang khyim nor rdzas sogs/__/shul du bzhag nas 'gro ba'i dus shig 'ong /__/de tshe sdig bsags las kyi khur po ni/__/lhun po'i gtos tsam khyer nas bar dor 'khyams/__/dge ba'i bsags pa rdul phran tsam mchis kyang /__/de tshe bsod nams skyabs shig yod na yang /__/da lta ma bsags de dus khyer rgyu med/__/bar dor 'jigs skrag sdug bsngal dpag med myong /__/ngan song gnas ltung sdug bsngal bzod blag med/__/da lta me stag phog dang nyin gcig gi__/'chag ltog mi bzod de dus ga la bzod/__/shugs drag rgyun ring bzod dka'i sdug bsngal de/__/legs par bsam nas dam chos snying nas sgrub/__/sgo gsum dge la 'bad nus byin gyis rlobs/__/kye ma kyi hud rig 'dzin pad+ma 'byung /__/blo sna chos la sgyur cig bla ma mkhyen/__/dal 'byor thob pa da res tsam zhig yin/__/phyis nas 'di 'dra thob pa srid mtha' tsam/__/gal te mtha' 'khob kla klo chos med sar/__/mi lus thob kyang snying po cung zad med/__/de ru mi skye ba yi smon lam thob/__/lha yi gnas su skyes kyang dgos pa chung /__/zag bcas bde 'bras zad nas ngan 'gror ltung /__/des na rnyed dka'i mi lus rin chen 'di/__/nor bu brgya stong thob pa'i dpes mi mtshon/__/'di thob sdig la spyod pa shin tu blun/__/dper na nor bu 'dam rdzab 'phang bzhin gyur/__/kye ma kyi hud rig 'dzin pad+ma 'byung /__/blo sna chos la sgyur cig bla ma mkhyen/__/legs na thar pa'i gru gzings lus 'di yin/__/nyes na 'khor ba'i gting rdo 'dis byed pas/__/yar 'gro mar 'gro'i sa mtshams da res yin/__/rta kha srab kyis bsgyur ba ji bzhin du/__/nyes spyod lam las ldog cig bla ma mkhyen/__/'dod pa la chags phung khrol bskyed pa'i rgyu/__/gsog dka' spel dka' ser sna'i mdud pa dam/__/sbyin 'bras med na sbrang ma'i sbrang rtsi bzhin/__/sngon bsags bsod nams yod na 'bad med 'byor/__/de bas mchod sbyin nus par bla ma mkhyen/__/khyim na gnas pa nyes pa kun gyi gzhi/__/chags sdang gnyis kyis nyin mtshan thams cad 'da'/__/dgra 'dul gnyen skyong so nam ci byas kyang /__/zin pa'i dus med phyi phyir je cher 'phel/__/'dod pa'i don ma grub pa'i sdug gis gtser/__/rang sdug rang nyo ma dgos bla ma mkhyen/__/'khor ba'i gnas ni me yi 'ob dang mtshungs/__/srin mo'i gling dang ral gri rnon po'i so/__/dug dang 'dra ba'i nyes dmigs dran byas nas/__/srid las nges 'byung skye bar bla ma mkhyen/__/'khor ba ngan song sdug bsngal mtha' dag las/__/skyobs par nus pa bla ma dkon mchog yin/__/de las gzhan pa'i skyobs pa su yang med/__/dang 'dod yid ches dad mos drag po yis/__/skyabs gsum rang ngo shes par bla ma mkhyen/__/sems can thams cad pha mar ma gyur med/__/da lta 'khrul te bdag gzhan phyogs ris 'byed/__/chags dang sdang ba'i sgrog gis bcing ba 'di'i/__/rtsa ba bdag tu 'dzin pa ngos zin nas/__/bdag med gnas lugs rtogs par bla ma mkhyen/__/'gro kun pha mar gyur pa shes byas te/__/drin gzo phan 'dod lhag bsam bzang po yi/__/byams dang snying rje byang chub sems mchog la/__/yang yang blo sbyong nus par bla ma mkhyen/__/tshogs gnyis ma bsags sgrib pa ma byang na/__/sku bzhi'i go 'phang nam yang mi thob pas/__/'dre bkren yi dwags skye ba'i rgyu spangs nas/__/bsod nams tshogs chen bsags la 'bad pa dang /__/de yang dngos zhen bden 'dzin gyis ma bslad/__/chos kun sgyu ma sgyu ma'i rang bzhin stong /__/'khor gsum dmigs pa med pa'i shes rab la/__/blo bzhag ye shes tshogs chen bsags pa dang /__/'dis mtshon dge ba nam mkha'i mtha' khyab kyi/__/'gro la yongs bsngo 'jam dpal dpa' bo yi/__/rjes su zhugs nas bsngos bzhin 'grub pa dang /__/lan dang rnam par smin la mi ltos par/__/'khor gsum yongs dag nus par bla ma mkhyen/__/thog med dus nas bsags pa'i sdig sgrib kyis/__/bde gshegs snying po'i rang zhal bsgribs pas na/__/ma rig gis bskyed dug gsum gyis bslang ba'i/__/mi dge'i las rnams stobs bzhi tshang bas bshags/__/'gyod dang bsdam sems med na mi 'dag pas/__/snying nas gnong 'gyod drag pos mthol zhing bshags/__/ma bshags nyes pa phra mo zhig gis kyang /__/rtsa yi phung por me ni 'dzin pa bzhin/__/rang rgyud bsregs shing 'khor bar 'phen pas na/__/bshags pas sdig sgrib dag par bla ma mkhyen/__/rang gi sems kyi gnas lugs ma rtogs na/__/kha bshad mkhas dang rnam rtog bsgoms pa yis/__/byang chub chen po nam yang mi thob pas/__/rang gi sems kyi rtsa ba chod pa dang /__/ji ltar snang ba sems kyi cho 'phrul yin/__/'khor 'das re dogs sems kyi 'dzin stangs te/__/sems nyid rtsa ba bcad na gzhi rtsa bral/__/med snang stong pa'i rang gzugs kho na la/__/byis pa rnams kyi bden par bzung ba ste/__/ji ltar mkha' la skra shad snang ba bzhin/__/snang ba nyid nas rang gi ngo bos stong /__/des na sems nyid ye stong ka nas dag/__yod pa ma yin rgyal bas kyang ma gzigs/__/med pa ma yin 'khor 'das gzhir gyur kyang /__/dngos po mtshan ma can du grub pa med/__/rgya chad phyogs bral nam mkha'i dpe yis mtshon/__/ngo bo stong la rang bzhin 'od gsal ba/__/thugs rje rig pa 'khor 'das kun la khyab/__/rig rtsal dag dang ma dag cir yang shar/__/gsum du phye yang don la rig par gcig/__gzhi yi gnas lugs rtogs par bla ma mkhyen/__/de nyid bla ma'i drin gyis ngo 'phrod nas/__/spros pa'i sgro 'dogs chod pa'i lta ba dang /__/ma bcos yengs med 'dzin bral sgom pa'i gnad/__/gang shar rang grol 'gro ba spyod pa ste/__/de gsum dbyer med shes pa bla ma mkhyen/__/gdod nas lhun grub sku gsum chen por bzhugs/__/gnyis chos ka nas dag pa dbu ma che/__/thabs shes dbyer med phyag rgya chen po dang /__/rig stong 'od gsal rdzogs pa chen po yi/__/rang bzhin mngon sum rtogs pa mthar phyin nas/__/'bras bu chos sku rig pa'i btsan sa zin/__/'khor ba dong nas sprugs nus bla ma mkhyen/__/kye ma kyi hud rig 'dzin pad+ma 'byung /__/blo sna chos la sgyur cig bla ma mkhyen/__/ngan song sgo chen chod cig bla ma mkhyen/__/las ngan sdig sgrib dag par=__/rkyen ngan byang chub lam khyer=__/skyid sdug ro snyoms nus par=__/'khor 'das dbyer med rtogs par=__/snang sems gzhi grol 'gyur ba=__/sku gsum rang zhal mjal bar=__/'ja' lus chos sku 'grub par=__/mkhyen no mkhyen no rje btsun bla ma mkhyen/__/re sa gzhan na med do thugs rjes zungs/__/ces dad gdung drag pos 'bod par bya'o/__/zhes pa'ang DA ki'i dbang mo tshe ring chos sgron nas gsung bskul ngor/__chos med dred po chos kyi blo gros pas bris pa'o//___//