JKCL-KABUM-08-NYA-011-042

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 11, Text 42, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ གདམས་པའི་རིམ་པ་གཞན་གསོས་མགྲིན་གླུ་ཅེས་བྱ་བ་བཞུགས་སོ། །ཨོཾ་སྭསྟི། ཕ་རིགས་ཀུན་འདུས་ཞལ་བླ་མ་རྗེ། །བུ་བདག་གི་སྤྱི་བོའི་རྒྱན་དུ་བཞུགས། །གྲོགས་ཁྱོད་ཀྱིས་གསུང་གི་བསྐུལ་བ་ལས། །མི་བདག་ལ་ཡོན་ཏན་མེད་ངེས་ཀྱང་། །ཆོས་ཐོས་པའི་བག་ཆགས་ཕྲན་བུ་ལས། །ཚིག་ཉུང་ངུས་གདམས་པ་འདི་འབུལ་ལོ། །གནས་ཁམས་གསུམ་རིགས་དྲུག་གར་སྐྱེས་ཀྱང་། །རྒྱུ་སྡུག་བསྔལ་འབྲས་བུ་ཁོ་ན་ལས། །གཏན་བདེ་བའི་འབྲས་བུ་མེད་པས་ན། །ཡིད་འཁོར་བ་འདི་ལས་ངེས་འབྱུང་མཛོད། །ཚེ་མི་རྟག་ནམ་མཁའི་སྤྲིན་དང་འདྲ། །འདུས་བྱས་ཚད་མི་རྟག་མྱུར་དུ་འཇིག། དགྲ་འཆི་བདག་ནམ་འོང་ཆ་མེད་པས། །གྲོགས་ཁྱེད་ཉིད་གཡེང་བའི་ངང་མ་ཤོར། །རྒྱུ་དཀར་ནག་ལས་ནི་ཅི་བསགས་པ། །དུས་བསྐལ་པ་བརྒྱར་ཡང་ཆུད་མི་ཟ། །ལས་བྱས་པ་རང་གི་སྟེང་སྨིན་པས། །བུ་དགེ་སྡིག་སྤང་བླང་ཞིབ་པར་གཅེས། །རྟེན་དལ་དང་འབྱོར་པའི་འབྲས་བཟང་འདི། །སྔོན་སྨོན་ལམ་བཟང་པོའི་དུས་སྨིན་པས། །ཚེ་འདི་ལ་ཐོབ་པའི་དོན་མེད་དུ། །ཆུད་ཟོས་པར་མ་བྱེད་སྙིང་པོ་ལོངས། །དུས་འདི་དང་ཕྱི་མ་ཐམས་ཅད་དུ། །སྐྱབས་མི་བསླུ་ངེས་པ་དཀོན་མཆོག་གསུམ། །བུ་དེ་ལ་འདུན་པ་རྩེ་གཅིག་གཏོད། །དུས་ནམ་ཡང་བསླུ་བ་མེད་དོ་ཨང་། །རང་ཐར་པ་འདོད་པའི་བློ་ངན་དེ། །རྒྱང་རིང་དུ་བསྐྱུར་ལ་གཞན་ཕན་གྱི། །སེམས་བཟང་པོ་ལྷག་པའི་བསམ་པ་དེ། །ཕྱོགས་རིས་སུ་མ་བཅད་སྙོམས་པར་བསྐྱེད། །ཚེ་ཐོག་མེད་ནས་བསགས་སྡིག་ལྟུང་གི །གཞི་བདེ་གཤེགས་སྙིང་པོའི་རང་ཞལ་སྒྲིབ། །ངོ་མཐོང་དུ་མི་སྟེར་བར་དུ་གཅོད། །དེ་སྟོབས་བཞིའི་གནད་ཀྱིས་ཕྱི་བར་མཛོད། །རིགས་རྒྱས་པར་འགྱུར་བའི་མཐུན་པའི་རྐྱེན། །ཚོགས་དམིགས་བཅས་དམིགས་མེད་ཟུང་འཇུག་ཏུ། །ཐབས་མཁས་ཀྱི་སྤྱོད་པ་བརླབ་པོ་ཆེ། །དུས་བསྐལ་པ་སྐད་ཅིག་ལ་འདུམས་མཛོད། །གཞི་སྨིན་པར་བྱེད་པའི་དབང་མནོས་ནས། །ལམ་གྲོལ་བྱེད་བསྐྱེད་རྫོགས་ཟབ་མོ་ལ། །ཆེས་འབད་པ་དྲག་པོས་བརྩོན་བྱས་ནས། །མཆོག་ཐུན་མོང་དངོས་གྲུབ་བརྙེས་པར་མཛོད། །གྲོགས་དམ་ཚིག་གཙང་མའི་ས་གཞི་ལ། །སྔགས་འབྲས་བུའི་སྙེ་མ་ལེགས་པར་འཁྲུངས། །རང་སེམས་ལ་ནག་ནོག་མེད་པ་ཡི། །ཐུགས་ཤེལ་དཀར་བུམ་པ་དྲི་མེད་མཛོད། །ཕ་ཀུན་བཟང་བླ་མ་རྡོ་རྗེ་འཆང་། །གྲོགས་ཁྱེད་ཀྱི་སྙིང་དང་སྤྱི་གཙུག་ལ། །དུས་སྐད་ཅིག་ཙམ་ཡང་མི་འབྲལ་བར། །སྙིང་རུས་པའི་གཏིང་ནས་གསོལ་འདེབས་ཞུ། །ཅིར་སྣང་ཀུན་བླ་མའི་རོལ་པར་ཤར། །སྒྲ་གྲགས་ཚད་དཔལ་ལྡན་བླ་མའི་གསུང་། །ཡིད་འགྱུར་རྟོག་བླ་མའི་ཐུགས་སུ་ཤར། །སྐྱབས་བླ་མའི་ལམ་ཁྱེར་བསྒོམ་པར་ཞུ། །སེམས་མ་རིག་འཁྲུལ་པའི་རྫུན་ཕུགས་གཏིབ། །གཞི་ལྟ་བ་ཀ་དག་སྤྲོས་བྲལ་ཆེ། །ཡེ་གདོད་མའི་སྟོང་ཆེན་ནང་གསལ་ཆེར། །མཐར་འཛིན་གྱི་སྒྲོ་འདོགས་ཆོད་པར་མཛོད། །ལམ་བསྒོམ་པས་ཉམས་སུ་བླངས་བ་ན། །སེམས་འདུ་བྱེད་ཀྱི་དྲན་འཛིན་རྟོད་ཕུར་ཕྱུངས། །མ་ཡེངས་ཀློང་ཡངས་མ་བཅོས་ངང་ལྡན་པས། །གཤིས་རང་བབས་ངང་ལ་ཆམ་མེར་ཞོག། འཁོར་འདས་ཀྱི་སྣང་གྲགས་དྲན་རྟོག་ཀུན། །གཞི་ཐུགས་རྗེའི་རྩལ་ལས་མདངས་ཤར་བས། །ཤར་དེ་ལ་དགག་སྒྲུབ་ཀུན་བསྐྱུར་ལ། །སྤྱོད་པ་ཀུན་རང་གྲོལ་ཆེན་པོར་ཐོངས། །དོན་ཆོས་ཉིད་རིག་པའི་ངང་དེ་རུ། །བཅས་བཅོས་དང་སྤྲོ་བསྡུ་མི་བྱེད་ཅིང་། །ཡེངས་པ་དང་ཕྱལ་བར་མ་ཤོར་བར། །རིག་ཆ་ལ་གསལ་དྭངས་ཕྱེད་པར་ཞོག། དེས་ཤེས་རབ་རང་བྱུང་སྒྲོན་མེ་འབར། །དེ་འབར་བས་ཆོས་ཀྱི་གཏེར་མཛོད་བརྡོལ། །བསྒོམ་བྱུང་གི་ཤེས་རབ་ཉ་རྒྱས་ནས། །ཆེས་འཕགས་པའི་བདེན་པ་མངོན་སུམ་མཐོང་། །ཆོས་རྫོགས་ཆེན་ལམ་གྱི་ཐུན་མིན་གནད། །གཞི་ལྷུན་རྫོགས་འོད་གསལ་ཆེན་པོ་དེ། །རྗེན་ཅེར་དུ་ལམ་གྱིས་སྣང་བར་འདྲེན། །རྩལ་རྫོགས་ནས་དབྱིངས་སུ་ཟད་སར་སྐྱེལ། །འཕོ་ཆེན་གྱི་སྐུ་མཆོག་བརྙེས་པ་དང་། །ནང་དབྱིངས་སུ་ཐིམ་ལ་མ་རྨུགས་ཤིང་། །ཕྱིར་གསལ་གྱི་སྐུ་དང་ཡེ་ཤེས་དང་། །ཡོན་ཏན་དང་མཛད་པ་མཐའ་ཡས་པའི། །དཔལ་བཟང་པོས་བརྒྱན་པའི་འབྲས་ཐོབ་འགྱུར། །ཚིག་དེ་སྐད་ཉུང་ངུར་གདམས་པ་འདི། །གྲོགས་ཁྱེད་ཀྱི་གསུང་ནན་མ་ལྡོག་པས། །རང་རྒྱུད་ལ་མྱོང་བ་མ་མཆིས་ཀྱང་། །ཕ་རིག་འཛིན་བརྒྱུད་པའི་གསུང་བཞིན་དུ། །མི་མདོ་མེད་སྤྲང་ཕྲུག་བློ་གྲོས་པས། །ཀུན་རྟོགས་ཀྱི་ངོས་སུ་འཆར་བ་རྣམས། །བྲིས་འདི་ཡི་དགེ་བས་བདག་གཞན་རྣམས། །ཕྱམ་གཅིག་ཏུ་ཀུན་བཟང་སར་འགོད་ཤོག། སརྦ་དཱ་མངྒ་ལཾ།། །།རང་བྱུང་རིག་པའི་ངང་དེ་ལ། །གཟུང་འཛིན་དྲི་མས་མ་སླད་པ། །མ་བཅོས་ལྷུག་པར་བཞག་པ་དེ། །སངས་རྒྱས་ཆོས་སྐུའི་དགོངས་པའོ། །གྲགས་བླ་བྱམས་པས་ཞུས་ངོར་མཁྱེན་སྤྲུལ་པས་སོ། །དགེའོ།། །།

[edit]

!_gdams pa'i rim pa gzhan gsos mgrin glu ces bya ba bzhugs so/__/oM swasti/__pha rigs kun 'dus zhal bla ma rje/__/bu bdag gi spyi bo'i rgyan du bzhugs/__/grogs khyod kyis gsung gi bskul ba las/__/mi bdag la yon tan med nges kyang /__/chos thos pa'i bag chags phran bu las/__/tshig nyung ngus gdams pa 'di 'bul lo/__/gnas khams gsum rigs drug gar skyes kyang /__/rgyu sdug bsngal 'bras bu kho na las/__/gtan bde ba'i 'bras bu med pas na/__/yid 'khor ba 'di las nges 'byung mdzod/__/tshe mi rtag nam mkha'i sprin dang 'dra/__/'dus byas tshad mi rtag myur du 'jig/__dgra 'chi bdag nam 'ong cha med pas/__/grogs khyed nyid g.yeng ba'i ngang ma shor/__/rgyu dkar nag las ni ci bsags pa/__/dus bskal pa brgyar yang chud mi za/__/las byas pa rang gi steng smin pas/__/bu dge sdig spang blang zhib par gces/__/rten dal dang 'byor pa'i 'bras bzang 'di/__/sngon smon lam bzang po'i dus smin pas/__/tshe 'di la thob pa'i don med du/__/chud zos par ma byed snying po longs/__/dus 'di dang phyi ma thams cad du/__/skyabs mi bslu nges pa dkon mchog gsum/__/bu de la 'dun pa rtse gcig gtod/__/dus nam yang bslu ba med do ang /__/rang thar pa 'dod pa'i blo ngan de/__/rgyang ring du bskyur la gzhan phan gyi/__/sems bzang po lhag pa'i bsam pa de/__/phyogs ris su ma bcad snyoms par bskyed/__/tshe thog med nas bsags sdig ltung gi__/gzhi bde gshegs snying po'i rang zhal sgrib/__/ngo mthong du mi ster bar du gcod/__/de stobs bzhi'i gnad kyis phyi bar mdzod/__/rigs rgyas par 'gyur ba'i mthun pa'i rkyen/__/tshogs dmigs bcas dmigs med zung 'jug tu/__/thabs mkhas kyi spyod pa brlab po che/__/dus bskal pa skad cig la 'dums mdzod/__/gzhi smin par byed pa'i dbang mnos nas/__/lam grol byed bskyed rdzogs zab mo la/__/ches 'bad pa drag pos brtson byas nas/__/mchog thun mong dngos grub brnyes par mdzod/__/grogs dam tshig gtsang ma'i sa gzhi la/__/sngags 'bras bu'i snye ma legs par 'khrungs/__/rang sems la nag nog med pa yi/__/thugs shel dkar bum pa dri med mdzod/__/pha kun bzang bla ma rdo rje 'chang /__/grogs khyed kyi snying dang spyi gtsug la/__/dus skad cig tsam yang mi 'bral bar/__/snying rus pa'i gting nas gsol 'debs zhu/__/cir snang kun bla ma'i rol par shar/__/sgra grags tshad dpal ldan bla ma'i gsung /__/yid 'gyur rtog bla ma'i thugs su shar/__/skyabs bla ma'i lam khyer bsgom par zhu/__/sems ma rig 'khrul pa'i rdzun phugs gtib/__/gzhi lta ba ka dag spros bral che/__/ye gdod ma'i stong chen nang gsal cher/__/mthar 'dzin gyi sgro 'dogs chod par mdzod/__/lam bsgom pas nyams su blangs ba na/__/sems 'du byed kyi dran 'dzin rtod phur phyungs/__/ma yengs klong yangs ma bcos ngang ldan pas/__/gshis rang babs ngang la cham mer zhog/__'khor 'das kyi snang grags dran rtog kun/__/gzhi thugs rje'i rtsal las mdangs shar bas/__/shar de la dgag sgrub kun bskyur la/__/spyod pa kun rang grol chen por thongs/__/don chos nyid rig pa'i ngang de ru/__/bcas bcos dang spro bsdu mi byed cing /__/yengs pa dang phyal bar ma shor bar/__/rig cha la gsal dwangs phyed par zhog/__des shes rab rang byung sgron me 'bar/__/de 'bar bas chos kyi gter mdzod brdol/__/bsgom byung gi shes rab nya rgyas nas/__/ches 'phags pa'i bden pa mngon sum mthong /__/chos rdzogs chen lam gyi thun min gnad/__/gzhi lhun rdzogs 'od gsal chen po de/__/rjen cer du lam gyis snang bar 'dren/__/rtsal rdzogs nas dbyings su zad sar skyel/__/'pho chen gyi sku mchog brnyes pa dang /__/nang dbyings su thim la ma rmugs shing /__/phyir gsal gyi sku dang ye shes dang /__/yon tan dang mdzad pa mtha' yas pa'i/__/dpal bzang pos brgyan pa'i 'bras thob 'gyur/__/tshig de skad nyung ngur gdams pa 'di/__/grogs khyed kyi gsung nan ma ldog pas/__/rang rgyud la myong ba ma mchis kyang /__/pha rig 'dzin brgyud pa'i gsung bzhin du/__/mi mdo med sprang phrug blo gros pas/__/kun rtogs kyi ngos su 'char ba rnams/__/bris 'di yi dge bas bdag gzhan rnams/__/phyam gcig tu kun bzang sar 'god shog/__sarba dA mang+ga laM//___//rang byung rig pa'i ngang de la/__/gzung 'dzin dri mas ma slad pa/__/ma bcos lhug par bzhag pa de/__/sangs rgyas chos sku'i dgongs pa'o/__/grags bla byams pas zhus ngor mkhyen sprul pas so/__/dge'o//___//