JKCL-KABUM-08-NYA-011-034

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 11, Text 34, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཐེག་པ་ཆེན་པོའི་ལམ་རིམ་སྙིང་པོ་ཐེག་མཆོག་བདུད་རྩིའི་ཟིལ་མངར་ཞེས་བྱ་བ་བཞུགས་སོ། །བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །གང་ཞིག་ཡིད་མཁར་དྲན་པ་ཙམ་གྱིས་ཀྱང་། །རྨོངས་པའི་མུན་པ་སྟུག་པོ་སེལ་མཛད་པ། །རྗེ་བཙུན་མཁྱེན་པའི་གཏེར་ཆེན་རྡོ་རྗེ་རྣོན། །གང་གི་ཞབས་རྡུལ་བདེ་ཆེན་འཁོར་ལོར་མཆོད། །ཐེག་ཆེན་བཀའ་གཞུང་ཟབ་ཅིང་རྒྱ་ཆེ་བ། །བདག་བློ་ཁབ་རྩེའི་ཁུངས་བུར་ཚུད་མིན་ཀྱང་། །ཐེག་མཆོག་དགེ་བའི་བཤེས་ཀྱིས་བསྐུལ་བ་ན། །སྔོན་བྱོན་མཁས་གྲུབ་ཞལ་ལུང་ལྟར་དབྱེ་བྱ། །སྲིད་མཚོར་ཐོག་མ་མེད་པའི་དུས་ཤེད་ནས། །ཡེ་གྲོལ་ཆོས་དབྱིངས་བདེ་གཤེགས་སྙིང་པོ་ཡི། །གནས་ལུགས་མ་རྟོགས་འཁོར་བའི་གནས་སུ་འཁྱམས། །ལས་དང་ཉོན་མོངས་སྒྲིབ་པའི་སྦུབས་རྒྱར་འཐུམ། །ད་རེས་སྔོན་བསགས་བཟང་པོའི་འབྲས་སྨིན་པས། །མངོན་མཐོའི་རྟེན་བཟང་ངེས་ལེགས་ཐར་པའི་གཞི། །དལ་དང་འབྱོར་པས་བརྒྱན་པའི་རིན་ཆེན་ལུས། །ཚངས་དབང་བདེ་འབྱུང་བརྒྱ་བྱིན་ལས་ཀྱང་ལྷག། འདི་འདྲ་ཐོབ་ཀྱང་མི་ཚེ་སོས་དལ་དུ། །སྐྱེ་རྒ་ན་འཆི་བཞི་ཡི་མཐར་གཏུང་ན། །དེ་ལས་གྱོང་བརྡབ་ཆེ་བ་གཞན་མ་མཆིས། །མྱུར་བ་ཉིད་དུ་དམ་ཆོས་སྒྲུབ་ལ་འབུངས། །འཇིག་རྟེན་ཆོས་བརྒྱད་འདོད་ཡོན་སྒོག་མོ་ཡི། །བསླུ་བྲིད་དབང་ཤོར་མི་ཚེ་སྣུམ་ཟད་ཀྱི། །མར་མེ་བཞིན་དུ་བསྣོན་པ་འོང་མེད་ཅིང་། །དེ་ཚེ་མགོན་སྐྱབས་དཔུང་གཉེན་ཅང་མ་མཆིས། །སྲིད་ལས་ངེས་པར་འབྱུང་བའི་བློ་བསྐྱེད་ཅིང་། །སྲིད་པའི་དཔལ་ཡོན་ཅི་ཙམ་འབྱོར་གྱུར་ཀྱང་། །ཐམས་ཅད་མི་རྟག་སྒྱུ་མའི་ལོངས་སྤྱོད་བཞིན། །སྙིང་པོ་མེད་པའི་དོན་དེ་མངོན་དུ་བྱ། །གང་ལ་ནོར་ཡོད་དེ་ལ་སྡུག་བསྔལ་ཡོད། །འདོད་ལ་ཆགས་པའི་ཉེས་པ་ངང་གི་འཕེལ། །དེར་བརྟེན་ང་རྒྱལ་ཕྲག་དོག་ཀུན་ཀྱང་འབྱུང་། །ཉེས་བརྒྱའི་རྩ་བ་ཚང་ཚིང་ཆེན་པོ་འདི། །གཞོམ་པར་མཛོད་ལ་འདོད་ཆུང་ཆོག་ཤེས་བརྟེན། །ཡ་གི་སྲིད་རྩེ་མ་གི་མནར་མེད་ཡན། །བདེ་བའི་གོ་སྐབས་སྐྲ་རྩེའི་ཁྱོན་ཙམ་མེད། །སྡུག་བསྔལ་གསུམ་གྱི་རྟག་པར་མནར་བ་དེ། །ཡིད་ལ་བྱ་ཞིང་སྐྱོ་ཤས་དྲན་པ་གཅེས། །སྐྱེས་པའི་མཐའ་མ་འཆི་བའི་རང་བཞིན་དང་། །བསགས་པའི་ནོར་ཡང་ཡོངས་སུ་འཛད་པར་འགྱུར། །མཐོ་བའི་མཐའ་ཡང་དམའ་བའི་གནས་སུ་ལྟུང་། །འདུས་མཐའ་སོ་སོར་འགྱེས་པ་ཆོས་ཉིད་ཡིན། །ཐམས་ཅད་ཐམས་ཅད་མྱུར་དུ་འཇིག་ཅིང་འགགས། །མི་རྟག་མི་བརྟན་སྐྱེས་བུའི་ཚེ་སྲོག་ནི། །ཆུ་ཡི་ཆུ་བུར་བས་ཀྱང་མི་བརྟན་པའི། །འདུ་ཤེས་ཡང་ཡང་དྲན་པས་བློ་སྣ་བསྟུངས། །འཁོར་བ་རིགས་དྲུག་གང་ནས་གང་སྐྱེས་ཀྱང་། །སྡུག་བསྔལ་མེ་འོབས་སྲིན་མོའི་གླིང་བཞིན་དུ། །ཤེས་པས་གནས་རིས་དྲུག་པོ་དེ་རྣམས་ལས། །སྒྲོལ་ཕྱིར་ངེས་ལེགས་ཐར་པའི་ལམ་ལ་འབད། །ཆོས་རྣམས་རྒྱུ་དང་རྐྱེན་ལ་རག་ལས་ཤིང་། །རྟེན་ཅིང་འབྲེལ་འབྱུང་འགགས་མེད་སྣང་བའི་ཆོས། །ནམ་ཡང་མི་བསླུ་ཚད་མར་གྲུབ་པ་ལ། །ཡིད་ཆེས་བསྐྱེད་ནས་ལས་འབྲས་སྤང་བླང་བྱ། །ལས་དང་ཉོན་མོངས་ཀུན་འབྱུང་བདེན་པ་ཡི། །བསྐྱེད་པའི་འབྲས་བུ་སྡུག་བསྔལ་བདེན་པ་སྟེ། །དེ་འགོགས་པ་ནི་འཕགས་པའི་རྟོགས་རིགས་ཏེ། །དེ་མངོན་བྱ་ཕྱིར་ལམ་བདེན་སྒྲུབ་ལ་བརྩོན། །སྡོམ་པའི་གཞི་རྟེན་མཆོག་གསུམ་སྐྱབས་སུ་བསྙེན། །ཡིད་ཆེས་ངེས་ཤེས་དད་པ་བརྟན་པོ་དང་། །ཐེག་ཆེན་ལམ་རྩ་གཞན་ཕན་ལྷག་བསམ་བཟང་། །རིན་ཆེན་བྱང་ཆུབ་སེམས་མཆོག་བསྐྱེད་པར་བྱ། །ཐོག་མེད་དུས་ནས་མཁའ་ཁྱབ་སེམས་ཅན་རྣམས། །རང་གི་ཕ་མ་ཡིན་པ་ཤེས་བྱས་ནས། །ཀུན་ལ་བཀའ་དྲིན་ཆེ་བར་དྲན་བྱས་ནས། །བདག་གཞན་བརྗེ་བའི་བློ་སྦྱོང་སྒོམ་པ་དང་། །རིགས་དྲུག་ཕ་མའི་དྲིན་ལན་མཇལ་བར་བསླབ། །བདག་ཏུ་འཛིན་པའི་འཁྲི་ཤིང་དྲུངས་ནས་ཕྱུངས། །བདག་སྐྱིད་འདོད་པའི་བློ་ངན་དེ་གཞོམ་ནས། །གཞན་བདེ་ཐོབ་ཕྱིར་སྒོ་གསུམ་དགེ་ལ་འབད། །དེར་ཡང་ཞེན་མེད་སྒྱུ་མ་ལྟར་རྟོགས་ཤིང་། །ཐབས་དང་ཤེས་རབ་ཟུང་དུ་འཇུག་པ་ཡི། །ཉེས་སྤྱོད་སྤངས་ཤིང་དགེ་བའི་ཆོས་སྡུད་དང་། །སེམས་ཅན་དོན་རབ་སྒྲུབ་ལ་རྟག་ཏུ་བརྩོན། །ཕ་རོལ་ཕྱིན་དྲུག་རྒྱལ་སྲས་སྤྱོད་པའི་གཞུང་། །བསྡུ་དངོས་བཞི་ཡི་འགྲོ་བ་ཡོངས་སུ་འདུལ། །ཤེས་རབ་ཟབ་མོས་སྲིད་ཞིའི་མཐའ་ལས་བརྒལ། །སྒྲིབ་གཉིས་དྲྭ་བ་མཐའ་དག་གཞོམ་པར་བྱ། །བདག་མེད་རྟོགས་པའི་ཤེས་རབ་ཟབ་མོ་འདི། །དང་པོ་ཐོས་བསམ་ལ་བརྟེན་གོ་བ་བསྐྱེད། །བར་དུ་རྩོལ་བ་དང་བཅས་སྒོམ་པས་མྱོང་། །ཐ་མ་ངེས་དོན་རང་བཞིན་མངོན་སུམ་རྟོགས། །མ་རིག་སྒོ་ངའི་སྦུབས་རྒྱ་བྲལ་བ་དང་། །རྟོགས་པའི་ཡེ་ཤེས་མུན་པར་ཉི་འོད་བཞིན། །དེ་ཡང་རྡོ་རྗེ་ཐེག་པ་དང་འབྲེལ་ན། །ཐབས་མང་བདེ་མྱུར་དཀའ་བ་མེད་པའི་ཕྱིར། །བློ་མཆོག་རྣམས་ཀྱིས་འདི་ལ་གཙོ་བོར་བསྟེན། །ཕྱི་རྒྱུད་སྡེ་གསུམ་ལམ་རྣམས་ཅུང་ཟད་བུལ། །ནང་པ་ཕ་མ་གཉིས་མེད་རྒྱུད་གསུམ་ལ། །མོས་པ་གང་ཡོད་དེ་ཐོས་དེ་སྒོམ་སྒྲུབ། །མཚན་ཉིད་ཀུན་ལྡན་རྡོ་རྗེ་སློབ་དཔོན་ལས། །དཀྱིལ་འཁོར་ཟབ་མོར་དབང་མནོས་དེང་ཕྱིན་ནས། །ཅི་མཛད་ལེགས་པར་མཐོང་བའི་མོས་གུས་ཀྱིས། །རྡོ་རྗེ་འཆང་དང་རྣམ་དབྱེར་མེད་པར་བལྟ། །དེ་སྒོམ་དེ་སྒྲུབ་ལམ་གྱིས་སྙིང་པོར་བསྟེན། །དམ་ཚིག་ཉམས་ན་དམྱལ་མེ་བཟོད་དཀས་བསྲེགས། །དམ་བསྲུངས་ལམ་ཉིད་བསྒོམ་པར་མ་བྱས་ཀྱང་། །སྐྱེ་བ་བདུན་ནམ་བཅུ་དྲུག་ནས་གྲོལ་འགྱུར། །བསྐྱེད་དང་རྫོགས་པའི་ལམ་རིམ་གང་བསྒོམ་ཀྱང་། །ཀུན་གྱི་སྲོག་སྙིང་ལྟ་བ་གཏན་འབེབས་བྱ། །དེ་ཡང་རང་སེམས་ཝ་ལེ་ཁྱུག་གེ་བ། །འདི་ཡི་ངོ་བོ་ཤེས་རབ་ཟབ་མོས་བརྟགས། །བརྟགས་པས་མི་མཐོང་ངོ་བོ་ངོས་བཟུང་བྲལ། །སྤྲོས་མཚན་ལས་འདས་རབ་ཞི་ཆོས་ཀྱི་དབྱིངས། །འདི་ནི་སྟོང་པ་ཕྱང་ཆད་མ་ཡིན་ཏེ། །རང་བཞིན་འོད་གསལ་དོན་དམ་འདུས་མ་བྱས། །འགྱུར་མེད་བྲི་གང་བསལ་བཞག་ལས་འདས་པ། །རང་གི་རིག་པས་མངོན་སུམ་རྗེན་པར་རྟོགས། །དེ་ཡང་བླ་མའི་དྲིན་གྱི་དུས་ཐབས་བསྟེན། །འདི་མེད་ལམ་རྣམས་ཆུ་ཤིང་སྟོང་པ་བཞིན། །སྙིང་པོ་མེད་ཅིང་སྲིད་རྩ་མི་ཆོད་པས། །སེམས་ཀྱི་གསང་ཤེས་དུས་གསུམ་རྒྱལ་བ་ཡི། །བསྒྲོད་པ་གཅིག་དང་དགོངས་པ་གཅིག་ཏུ་གོ །དེ་དང་ལྡན་པས་བུམ་དབང་བསྐྱེད་པའི་ལམ། །སྣང་སྟོང་ཟུང་འཇུག་ཆུ་ཟླ་ལྟ་བུ་དང་། །རང་བཞིན་བདེ་བ་ཆེན་པོའི་སྐུ་རུ་བསྐྱེད། །གསང་དབང་ལམ་ནི་ངག་རླུང་དག་བྱ་སྟེ། །མི་གཡོ་བྱེད་བཅིངས་རྩོལ་བ་ལ་བརྟེན་པའི། །ཐབས་ཀྱི་ལས་རླུང་ཡོན་པོ་དབུ་མར་སྡུད། །རིན་ཆེན་ཀུམྦྷ་ཀ་ཡི་བརྟན་པར་བྱ། །ཤེར་དབང་སྔོན་འགྲོ་ཐིག་ལེའི་རྣལ་འབྱོར་ལ། །རླུང་ལ་གོམས་པས་འཁོར་ལོ་བཞིར་འགྲོ་ལྡོག། ལེགས་པར་འབྱངས་པས་དངོས་གཞི་ཕོ་ཉ་མོར། །བསྟེན་པས་དྭངས་མ་འཁོར་ལོའི་ལྟེ་བར་བརྟེན། །རྩ་ཡི་མདུད་གྲོལ་རླུང་ཐིག་སྟོབས་རྒྱས་ཤིང་། །འཆི་མེད་གྲུབ་པའི་ལང་ཚོ་རྒྱས་པ་དང་། །མཐར་ཕྱིན་རྡོ་རྗེ་སེམས་དཔའི་གོ་འཕང་ཐོབ། །དེ་ལས་དཔེ་ཡི་ཡེ་ཤེས་དྭངས་པའི་མཐར། །བཞི་པའི་དབང་གི་རྦ་རླབས་སྒོམ་པ་དང་། །ཁྱད་པར་དབེན་གསུམ་བསྟེན་ཤིང་མ་བཅོས་བཞག། གཉུག་མ་ལྷན་སྐྱེས་ཡེ་ཤེས་སྐྱོན་མེད་པ། །མཁའ་དབྱིངས་རྡོ་རྗེ་ནམ་མཁའི་དཀྱིལ་ལྟ་བུ། །མངོན་དུ་འགྱུར་བས་ཁམས་གསུམ་འཁྲུལ་པ་ཟད། །ཆོས་སྐུའི་ཡེ་ཤེས་སྙིང་པོར་གྱུར་པ་ཡི། །སྐུ་གསུམ་འདུ་འབྲལ་མེད་པར་མངོན་བྱང་ཆུབ། །གཞན་དོན་འགྲོ་སྒྲོལ་རྟག་ཁྱབ་ལྷུན་གྲུབ་འགྱུར། །དེ་རྣམས་ཀུན་གྱི་གེགས་སེལ་བོགས་འདོན་ཡང་། །མཁས་གྲུབ་ཚད་མའི་གསུང་ལ་བལྟ་བ་དང་། །ཁྱད་པར་བླ་མར་མོས་གུས་མི་འབྲལ་ཞིང་། །ཐུགས་ཡིད་བསྲེ་ཞིང་ལམ་དབང་ཡང་ཡང་བླངས། །དམ་ཚིག་གསོ་བའི་ཚོགས་སྐོང་བཟླས་པར་འབད། །དེས་ནི་བསྐྱེད་རྫོགས་ཀུན་ལ་བོགས་འདོན་འགྱུར། །རྟག་ཏུ་དྲན་ཤེས་བག་ཡོད་བསྟེན་པ་དང་། །ཁས་བླངས་སྡོམ་པ་མིག་གི་འབྲས་བཞིན་བསྲུངས། །ངེས་འབྱུང་བྱང་སེམས་ཡང་དག་ལྟ་བ་རྣམས། །གཅིག་གྲོགས་གཅིག་གིས་བྱས་པས་ཆོས་སུ་འགྲོ། །ཆོས་ལམ་འགྲོ་ཞིང་ལམ་གྱི་འཁྲུལ་བ་ཞི། །འཁྲུལ་བ་ཡེ་ཤེས་ཉིད་དུ་འཆར་བར་བྱེད། །སངས་རྒྱས་བསྟན་པ་གངས་རིའི་ཁྲོད་འདི་རུ། །རྣམ་དག་ཇི་སྙེད་བྱོན་རྣམས་དགོངས་པ་གཅིག། དེ་ཕྱིར་བསྟན་པ་ཀུན་ལ་དག་སྣང་བསྐྱེད། །འགྲོ་ལ་གཡོ་ཟོལ་མེད་པའི་སྙིང་རྗེ་སྒོམ། །དགེ་ཚོགས་བསྔོ་ཞིང་སྨོན་ལམ་བཟང་པོ་གདབ། །རྟག་པར་བསྟན་འགྲོར་བདེ་སྐྱིད་སྤེལ་ལ་རེམ། །དེང་སང་སྙིགས་མ་ཚེ་ཐུང་ནད་འཁྲུགས་ཀྱི། །མནར་བའི་སྐབས་འདིར་གུ་རུ་པདྨ་དང་། །རྗེ་བཙུན་སྒྲོལ་མ་ཐུགས་རྗེ་མྱུར་བས་ན། །རང་གཞན་དོན་ཕྱིར་གསོལ་འདེབས་ཐུགས་དམ་བསྐུལ། །བོད་ཁམས་བདེ་བའི་སྨོན་ལམ་ཡང་ཡང་འདེབས། །ཡོངས་རྫོགས་བསྟན་པའི་མངའ་བདག་ས་སྐྱ་པའི། །ཟབ་རྒྱས་གདམས་པའི་ཡང་རྩེ་བྱིན་རླབས་ཀྱི། །བརྒྱུད་པ་ཉམས་མེད་བྱིན་འབྲས་མངོན་སུམ་དུ། །སྣང་བ་ནཱ་རོ་མཁའ་སྤྱོད་བསྐྱེད་རྫོགས་ལ། །ཆིག་དྲིལ་འབད་པས་དོན་གཉིས་ལྷུན་གྱིས་གྲུབ། །དེ་སྐད་ཁྱབ་བདག་བཀའ་འགྱུར་པ་མཆོག་གི །གསུང་གིས་གླིང་བུས་རང་མྱོང་དང་མཐུན་པའི། །ཞལ་གདམས་རྟོགས་པ་བརྗོད་པ་དགོས་གསུང་ཀྱང་། །མྱོང་བ་མ་མཆིས་མི་ཚེར་དཀོར་ལ་གཡེང་། །འོན་ཀྱང་དམ་པའི་བཀའ་ནི་མ་གཅོག་ཙམ། །ཆོས་མེད་དྲེད་པོ་ཆོས་ཀྱི་བློ་གྲོས་པས། །རང་ཉམས་མ་བླངས་དམ་པའི་གསུང་བཞིན་དུ། །ཆུ་འབྲུག་ནག་ཟླའི་དགའ་བ་གསུམ་པ་ལ། །བྲིས་པའི་དགེ་ཚོགས་འགྲོ་བ་ཡོངས་ལ་བསྔོ། །གཞན་ལ་ཕན་པའི་སྨོན་ལམ་དང་བཅས་དགེ། སརྦ་མངྒ་ལཾ།། །།

[edit]

!_theg pa chen po'i lam rim snying po theg mchog bdud rtsi'i zil mngar zhes bya ba bzhugs so/__/bla ma dang mgon po 'jam dpal dbyangs la phyag 'tshal lo/__/gang zhig yid mkhar dran pa tsam gyis kyang /__/rmongs pa'i mun pa stug po sel mdzad pa/__/rje btsun mkhyen pa'i gter chen rdo rje rnon/__/gang gi zhabs rdul bde chen 'khor lor mchod/__/theg chen bka' gzhung zab cing rgya che ba/__/bdag blo khab rtse'i khungs bur tshud min kyang /__/theg mchog dge ba'i bshes kyis bskul ba na/__/sngon byon mkhas grub zhal lung ltar dbye bya/__/srid mtshor thog ma med pa'i dus shed nas/__/ye grol chos dbyings bde gshegs snying po yi/__/gnas lugs ma rtogs 'khor ba'i gnas su 'khyams/__/las dang nyon mongs sgrib pa'i sbubs rgyar 'thum/__/da res sngon bsags bzang po'i 'bras smin pas/__/mngon mtho'i rten bzang nges legs thar pa'i gzhi/__/dal dang 'byor pas brgyan pa'i rin chen lus/__/tshangs dbang bde 'byung brgya byin las kyang lhag/__'di 'dra thob kyang mi tshe sos dal du/__/skye rga na 'chi bzhi yi mthar gtung na/__/de las gyong brdab che ba gzhan ma mchis/__/myur ba nyid du dam chos sgrub la 'bungs/__/'jig rten chos brgyad 'dod yon sgog mo yi/__/bslu brid dbang shor mi tshe snum zad kyi/__/mar me bzhin du bsnon pa 'ong med cing /__/de tshe mgon skyabs dpung gnyen cang ma mchis/__/srid las nges par 'byung ba'i blo bskyed cing /__/srid pa'i dpal yon ci tsam 'byor gyur kyang /__/thams cad mi rtag sgyu ma'i longs spyod bzhin/__/snying po med pa'i don de mngon du bya/__/gang la nor yod de la sdug bsngal yod/__/'dod la chags pa'i nyes pa ngang gi 'phel/__/der brten nga rgyal phrag dog kun kyang 'byung /__/nyes brgya'i rtsa ba tshang tshing chen po 'di/__/gzhom par mdzod la 'dod chung chog shes brten/__/ya gi srid rtse ma gi mnar med yan/__/bde ba'i go skabs skra rtse'i khyon tsam med/__/sdug bsngal gsum gyi rtag par mnar ba de/__/yid la bya zhing skyo shas dran pa gces/__/skyes pa'i mtha' ma 'chi ba'i rang bzhin dang /__/bsags pa'i nor yang yongs su 'dzad par 'gyur/__/mtho ba'i mtha' yang dma' ba'i gnas su ltung /__/'dus mtha' so sor 'gyes pa chos nyid yin/__/thams cad thams cad myur du 'jig cing 'gags/__/mi rtag mi brtan skyes bu'i tshe srog ni/__/chu yi chu bur bas kyang mi brtan pa'i/__/'du shes yang yang dran pas blo sna bstungs/__/'khor ba rigs drug gang nas gang skyes kyang /__/sdug bsngal me 'obs srin mo'i gling bzhin du/__/shes pas gnas ris drug po de rnams las/__/sgrol phyir nges legs thar pa'i lam la 'bad/__/chos rnams rgyu dang rkyen la rag las shing /__/rten cing 'brel 'byung 'gags med snang ba'i chos/__/nam yang mi bslu tshad mar grub pa la/__/yid ches bskyed nas las 'bras spang blang bya/__/las dang nyon mongs kun 'byung bden pa yi/__/bskyed pa'i 'bras bu sdug bsngal bden pa ste/__/de 'gogs pa ni 'phags pa'i rtogs rigs te/__/de mngon bya phyir lam bden sgrub la brtson/__/sdom pa'i gzhi rten mchog gsum skyabs su bsnyen/__/yid ches nges shes dad pa brtan po dang /__/theg chen lam rtsa gzhan phan lhag bsam bzang /__/rin chen byang chub sems mchog bskyed par bya/__/thog med dus nas mkha' khyab sems can rnams/__/rang gi pha ma yin pa shes byas nas/__/kun la bka' drin che bar dran byas nas/__/bdag gzhan brje ba'i blo sbyong sgom pa dang /__/rigs drug pha ma'i drin lan mjal bar bslab/__/bdag tu 'dzin pa'i 'khri shing drungs nas phyungs/__/bdag skyid 'dod pa'i blo ngan de gzhom nas/__/gzhan bde thob phyir sgo gsum dge la 'bad/__/der yang zhen med sgyu ma ltar rtogs shing /__/thabs dang shes rab zung du 'jug pa yi/__/nyes spyod spangs shing dge ba'i chos sdud dang /__/sems can don rab sgrub la rtag tu brtson/__/pha rol phyin drug rgyal sras spyod pa'i gzhung /__/bsdu dngos bzhi yi 'gro ba yongs su 'dul/__/shes rab zab mos srid zhi'i mtha' las brgal/__/sgrib gnyis drwa ba mtha' dag gzhom par bya/__/bdag med rtogs pa'i shes rab zab mo 'di/__/dang po thos bsam la brten go ba bskyed/__/bar du rtsol ba dang bcas sgom pas myong /__/tha ma nges don rang bzhin mngon sum rtogs/__/ma rig sgo nga'i sbubs rgya bral ba dang /__/rtogs pa'i ye shes mun par nyi 'od bzhin/__/de yang rdo rje theg pa dang 'brel na/__/thabs mang bde myur dka' ba med pa'i phyir/__/blo mchog rnams kyis 'di la gtso bor bsten/__/phyi rgyud sde gsum lam rnams cung zad bul/__/nang pa pha ma gnyis med rgyud gsum la/__/mos pa gang yod de thos de sgom sgrub/__/mtshan nyid kun ldan rdo rje slob dpon las/__/dkyil 'khor zab mor dbang mnos deng phyin nas/__/ci mdzad legs par mthong ba'i mos gus kyis/__/rdo rje 'chang dang rnam dbyer med par blta/__/de sgom de sgrub lam gyis snying por bsten/__/dam tshig nyams na dmyal me bzod dkas bsregs/__/dam bsrungs lam nyid bsgom par ma byas kyang /__/skye ba bdun nam bcu drug nas grol 'gyur/__/bskyed dang rdzogs pa'i lam rim gang bsgom kyang /__/kun gyi srog snying lta ba gtan 'bebs bya/__/de yang rang sems wa le khyug ge ba/__/'di yi ngo bo shes rab zab mos brtags/__/brtags pas mi mthong ngo bo ngos bzung bral/__/spros mtshan las 'das rab zhi chos kyi dbyings/__/'di ni stong pa phyang chad ma yin te/__/rang bzhin 'od gsal don dam 'dus ma byas/__/'gyur med bri gang bsal bzhag las 'das pa/__/rang gi rig pas mngon sum rjen par rtogs/__/de yang bla ma'i drin gyi dus thabs bsten/__/'di med lam rnams chu shing stong pa bzhin/__/snying po med cing srid rtsa mi chod pas/__/sems kyi gsang shes dus gsum rgyal ba yi/__/bsgrod pa gcig dang dgongs pa gcig tu go__/de dang ldan pas bum dbang bskyed pa'i lam/__/snang stong zung 'jug chu zla lta bu dang /__/rang bzhin bde ba chen po'i sku ru bskyed/__/gsang dbang lam ni ngag rlung dag bya ste/__/mi g.yo byed bcings rtsol ba la brten pa'i/__/thabs kyi las rlung yon po dbu mar sdud/__/rin chen kum+b+ha ka yi brtan par bya/__/sher dbang sngon 'gro thig le'i rnal 'byor la/__/rlung la goms pas 'khor lo bzhir 'gro ldog/__legs par 'byangs pas dngos gzhi pho nya mor/__/bsten pas dwangs ma 'khor lo'i lte bar brten/__/rtsa yi mdud grol rlung thig stobs rgyas shing /__/'chi med grub pa'i lang tsho rgyas pa dang /__/mthar phyin rdo rje sems dpa'i go 'phang thob/__/de las dpe yi ye shes dwangs pa'i mthar/__/bzhi pa'i dbang gi rba rlabs sgom pa dang /__/khyad par dben gsum bsten shing ma bcos bzhag/__gnyug ma lhan skyes ye shes skyon med pa/__/mkha' dbyings rdo rje nam mkha'i dkyil lta bu/__/mngon du 'gyur bas khams gsum 'khrul pa zad/__/chos sku'i ye shes snying por gyur pa yi/__/sku gsum 'du 'bral med par mngon byang chub/__/gzhan don 'gro sgrol rtag khyab lhun grub 'gyur/__/de rnams kun gyi gegs sel bogs 'don yang /__/mkhas grub tshad ma'i gsung la blta ba dang /__/khyad par bla mar mos gus mi 'bral zhing /__/thugs yid bsre zhing lam dbang yang yang blangs/__/dam tshig gso ba'i tshogs skong bzlas par 'bad/__/des ni bskyed rdzogs kun la bogs 'don 'gyur/__/rtag tu dran shes bag yod bsten pa dang /__/khas blangs sdom pa mig gi 'bras bzhin bsrungs/__/nges 'byung byang sems yang dag lta ba rnams/__/gcig grogs gcig gis byas pas chos su 'gro/__/chos lam 'gro zhing lam gyi 'khrul ba zhi/__/'khrul ba ye shes nyid du 'char bar byed/__/sangs rgyas bstan pa gangs ri'i khrod 'di ru/__/rnam dag ji snyed byon rnams dgongs pa gcig/__de phyir bstan pa kun la dag snang bskyed/__/'gro la g.yo zol med pa'i snying rje sgom/__/dge tshogs bsngo zhing smon lam bzang po gdab/__/rtag par bstan 'gror bde skyid spel la rem/__/deng sang snyigs ma tshe thung nad 'khrugs kyi/__/mnar ba'i skabs 'dir gu ru pad+ma dang /__/rje btsun sgrol ma thugs rje myur bas na/__/rang gzhan don phyir gsol 'debs thugs dam bskul/__/bod khams bde ba'i smon lam yang yang 'debs/__/yongs rdzogs bstan pa'i mnga' bdag sa skya pa'i/__/zab rgyas gdams pa'i yang rtse byin rlabs kyi/__/brgyud pa nyams med byin 'bras mngon sum du/__/snang ba nA ro mkha' spyod bskyed rdzogs la/__/chig dril 'bad pas don gnyis lhun gyis grub/__/de skad khyab bdag bka' 'gyur pa mchog gi__/gsung gis gling bus rang myong dang mthun pa'i/__/zhal gdams rtogs pa brjod pa dgos gsung kyang /__/myong ba ma mchis mi tsher dkor la g.yeng /__/'on kyang dam pa'i bka' ni ma gcog tsam/__/chos med dred po chos kyi blo gros pas/__/rang nyams ma blangs dam pa'i gsung bzhin du/__/chu 'brug nag zla'i dga' ba gsum pa la/__/bris pa'i dge tshogs 'gro ba yongs la bsngo/__/gzhan la phan pa'i smon lam dang bcas dge/__sarba mang+ga laM//___//