JKCL-KABUM-08-NYA-011-005

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 11, Text 5, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ཞལ་གདམས་མགུར་གླུ་རིན་ཆེན་མགུལ་རྒྱན་ཞེས་བྱ་བ། རྗེ་བླ་མ་རྣམས་ལ་ཕྱག་འཚལ་ལོ། །སྒོས་བཀའ་དྲིན་ཅན་གྱི་བྱིན་གྱིས་རློབས། །གྲོགས་ཁྱོད་ནས་མགུར་མ་དགོས་ཞེས་ཟེར། །མི་ང་ལ་མགུར་མ་སྙན་པོ་མེད། །མགུར་རྡོ་རྗེའི་ཐོལ་གླུ་ཞེས་པ་དེ། །རྗེ་གྲུབ་ཐོབ་རྣམས་ཀྱི་དོ་ཧ་ཟེར། །ད་སྤྲང་པོ་ང་ཡི་བླུན་གཏམ་གྱིས། །བུ་ཁྱོད་ལ་གདམས་ངག་གསལ་འདེབས་ཞུ། །རྗེ་དུས་གསུམ་སངས་རྒྱས་འགྲོ་བའི་མགོན། །ཕ་དྲིན་ཅན་རྩ་བའི་བླ་མ་ལ། །ཡིད་ཁྱེད་ཤེས་དད་མོས་དྲག་པོ་ཡིས། །ཁ་ཙམ་མིན་སྙིང་ནས་གསོལ་བ་ཐོབ། །གསོལ་བ་དེ་ཅི་ཙམ་བཏབ་པ་དང་། །མོས་གུས་ཀྱི་གཟེར་ཆེན་སྙིང་ལ་ཐེབས། །དམ་ཚིག་གི་ས་གཞི་གཙང་གྱུར་ན། །ཉམས་རྟོགས་ཀྱི་དཔག་བསམ་སྡོང་པོ་འཁྲུངས། །མཆོག་ཐུན་མོང་དངོས་གྲུབ་འབྱུང་བར་ངེས། །སྔོན་བསགས་ཀྱི་དགེ་བའི་འབྲས་བུ་ལས། །དུས་ད་རེས་དལ་འབྱོར་མི་ལུས་ཐོབ། །འདི་ནོར་བུ་རྙེད་པས་དོ་ཟླ་མེད། །ཚེ་ཕྱི་མའི་དོན་ཆེན་བསྒྲུབ་འདོད་ན། །དུས་ད་རེས་སྙོམ་ལས་མ་གཏོང་ཞིག། ད་ཕན་ཆོད་དགོས་མེད་བྱ་བས་གཡེང་། །མདོ་སྔགས་ཀྱི་གཞུང་ཆེན་འགའ་སྦྱངས་ཀྱང་། །ཁ་ཤོག་ལྕེ་རླུང་གིས་བསྐྱོད་པ་ལས། །དོན་ཡང་དག་རྒྱུད་ལ་འབྱོར་པ་དཀོན། །དེ་བསམ་གྱིན་བསམ་གྱིན་སྙིང་རླུང་ལྡང་། །མི་ཚེ་ཉི་མ་སྟོང་ཟད་ཐལ། །དགྲ་འཆི་བདག་གཤིན་རྗེས་མདུན་ནས་བསྒུག། ཁོས་ཞགས་པ་ནམ་བཏབ་མི་ཤེས་པས། །དུས་མྱུར་བ་ཉིད་དུ་འཆི་རན་གདའ། །ལོ་ཟླ་བ་ཞག་དང་ཉིན་མཚན་ཟད། །ཚེ་སྲོག་ནི་མར་མེ་རླུང་བདས་མཚུངས། །རྐྱེན་ཅི་འབྱུང་ངེས་པ་ཆ་མེད་པས། །ཆོས་སང་བྱེད་གནང་བྱེད་དབང་མ་གཏོང་། །འཕྲལ་འཕྲལ་དུ་ལག་ལེན་ཐེབས་པར་མཛོད། །འཆི་བ་ནི་ནམ་འོང་ཆ་མེད་ཅིང་། །འཆི་རྐྱེན་ལ་ངེས་པ་མེད་པས་ན། །དུས་ད་རེས་ཐོབ་པའི་ལུས་རྟེན་འདི། །ཡག་ཉེས་གཉིས་ཀྱི་ས་མཚམས་ཡིན། །གྱོང་བལྡབས་ན་དེ་ལས་ཕོངས་པ་མེད། །ཁེ་ཐོབ་ན་ཚེ་འདིར་སངས་རྒྱས་འགྲུབ། །ཚེ་འདི་ཕྱིའི་ལེགས་ཚོགས་ཅི་མཆིས་པ། །ལུས་འདི་ཡི་སྟེང་ནས་འགྲུབ་པ་ཡིན། །དེ་ཡང་ཡང་ཐུགས་ལ་ངེས་པར་གྱིས། །ལས་འབྲས་ལ་ཡིད་ཆེས་བསྐྱེད་བྱས་ནས། །དགེ་སྡིག་སྤང་བླང་ནན་ཏན་གྱིས། །ལས་མི་དགེས་ངན་སོང་གནས་སུ་འཕེན། །ཟག་བཅས་ཀྱི་དགེ་བས་མཐོ་རིས་སྐྱེ། །དེ་འང་གཏན་དུ་ཐར་པ་མིན། །དམན་ཉན་རང་གཏན་དུ་ཐར་གྱུར་ཀྱང་། །ལམ་གྱི་བགྲོད་པ་བུལ་བ་དང་། །རང་ཞི་བདེའི་མཐའ་ལ་ལྷུང་བས་ན། །གཞན་ཕན་གྱི་བསམ་པ་རྒྱ་ཆེན་པོས། །ཆོས་ཐེག་པ་ཆེན་པོ་ཉམས་སུ་ལེན། །དུས་དེང་སང་རང་གི་དོན་དུ་ནི། །མཚམས་བསྙེན་སྒྲུབ་ཐོས་བསམ་བྱས་ལོ་རྣམས། །མིང་ཐེག་པ་ཆེན་པོར་ཁས་འཆེ་ཡང་། །དོན་དམན་ལམ་ཙམ་ལས་ཡར་མ་ཕྱིན། །བདག་གཅེས་འཛིན་གྱི་འགོང་པོ་འདིས་ཕུང་བས། །བདག་མེད་ཀྱི་དོན་ལ་བསམ་པར་གྱིས། །དེ་རིག་པས་དཔྱད་ན་ཀླུ་སྒྲུབ་ཀྱི། །དབུ་མའི་གཞུང་ལྟར་གཏན་ལ་ཕབ། །དེས་བདག་འཛིན་མགོ་བོ་ནོན་པར་འགྱུར། །ཆོས་ཟབ་མོ་གསང་སྔགས་རྡོ་རྗེའི་ཐེག། དེའི་ཡང་རྩེ་དགྱེས་པ་རྡོ་རྗེ་ཡི། །དཔལ་ས་སྐྱའི་རྗེ་བཙུན་གོང་མ་ལ། །བཀའ་བབས་པའི་གསུང་ངག་རིན་པོ་ཆེ། །ཉམས་ལེན་གྱི་ཞུན་མཐར་བཅད་པར་འཚལ། །ཆོས་ཟབ་མོ་རྫོགས་པ་ཆེན་པོ་ཡི། །གནད་ཟབ་མོ་བླ་མའི་དྲིན་རྙེད་དང་། །དཔལ་བིཪྺ་པ་ཡི་སྙན་བརྒྱུད་ཀྱི། །གསུང་ངག་ཡིད་བཞིན་ནོར་བུ་གཉིས། །ཁྲིད་ཚུལ་ལ་རིམ་དང་ཅིག་ཅར་གྱི། །ཁྱད་ཙམ་ལས་དོན་གནད་གཅིག་ཏུ་འབབས། །ལར་གྲུབ་མཐའ་ཀུན་ལ་ཕྱོགས་རིས་སྤོངས། །ངེས་དོན་གྱི་གནས་ལུགས་ཟབ་མོ་ལ། །ཡིད་ཆེས་དང་དད་མོས་བརྟན་པོ་གྱིས། །བསམ་རྒྱུ་དང་དྲན་རྒྱུ་མ་མང་བར། །འདོད་ཆུང་དང་ཆོག་ཤེས་རྒྱུན་དུ་བསྟེན། །ལུས་པོ་དེ་ཇི་མི་སྙམ་མ་བྱེད། །ཟས་གོས་ནི་གང་འཛོམ་ལེགས་པོ་བརྟེན། །དུས་ད་ལྟ་ལུས་ལ་དཀའ་སྤྱད་ན། །རྩ་ཐིག་རླུང་གསུམ་མྱུར་དུ་རྒུད། །དེ་རྒུད་ན་ཉམས་ལེན་བྱེད་མི་ནུས། །དེ་བས་ན་ལུས་ལ་གཅེས་སྤྲས་འཚལ། །དཔལ་ཀྱེ་ཡི་རྡོ་རྗེའི་ལམ་དབང་དེ། །མ་ཆགས་པ་རྒྱུན་དུ་གསུང་བར་ཞུ། །ཆོས་བཤད་སྒྲུབ་གཉིས་ལས་སྒྲུབ་པ་གཙོ། །སྒྲུབ་མ་ནུས་ཡེ་ཤེས་རྟོགས་པ་ཅི། །ནུས་ཕྲ་མོ་ཙམ་ཡང་ཐོབ་པར་དཀའ། །བུ་དེ་ཕྱིར་གསང་སྔགས་སྒྲུབ་ལ་བརྩོན། །ཨ་ཧོ་ཡེ། ཆོས་ཐམས་ཅད་གདོད་ནས་ཀ་དག་ལ། །སེམས་གློ་བུར་འཁྲུལ་པའི་དྲི་མས་སྒྲིབ། །དྲི་མ་དེ་གཤིས་ལ་ཞུགས་པ་མེད། །དེ་ཆོས་ཀྱི་དབྱིངས་སུ་རང་དེངས་ཐོང་། །འོད་གསལ་བའི་ཡེ་ཤེས་སྣང་བ་ཡི། །ཁམས་གསུམ་གྱི་འཁྲུལ་པ་ཟད་དེ་ཐལ། །འཁྲུལ་མ་མྱོང་སྐུ་གསུམ་རང་བཞིན་ལ། །ད་བླ་མའི་དྲིན་གྱིས་གཤིས་དེར་འབྱམས། །གཟུགས་སྣང་བ་ཐམས་ཅད་འལ་མ་འོལ། །སྒྲ་གྲགས་ཀུན་བྲག་ཅ་ལྟ་བུར་ཟད། །སེམས་འགྱུར་བ་ཝལ་པོ་རྗེས་མེད་སོང་། །ང་རྣལ་འབྱོར་རྟོགས་པའི་ཁྱད་ཆོས་ཡིན། །ལུས་ན་བ་སྙམ་ཡང་ན་བ་མེད། །ཅིར་སྣང་ཀུན་དེ་ལ་དེར་འཛིན་མེད། །སྤྱོད་པ་ལ་རྩིས་གདབ་དང་བྲལ་བ། །ང་རྣལ་འབྱོར་སྨྱོན་པའི་སྤྱོད་ཚུལ་ཡིན། །ཡར་སངས་རྒྱས་ཞེས་པའི་སྒྲ་བོ་ཆེ། །མར་འཁོར་བ་ཞེས་པའི་སྡུག་སྐད་དེ། །ང་གཉིས་མེད་རྟོགས་པའི་རྟོགས་ལྡན་ལ། །རེ་བ་དོགས་པ་ཅང་མ་མཆིས། །འབྲས་སྐུ་གསུམ་གཞན་ནས་བཙལ་མི་དགོས། །བུ་ཨ་ཕོ་རང་ལ་ཚང་ནས་གདའ། །ཚིག་དེ་སྐད་ཁ་ཕོ་ཆེ་སོང་ཡང་། །ང་གྲུབ་ཐོབ་བརྒྱུད་པའི་བུ་ཡིན་པས། །གཤིས་མ་བཅོས་ངང་ནས་ཐོལ་གྱིས་བྱུང་། །སློབ་བུ་མདོ་མེད་ཧྲལ་པོ་ལ་གདམས་པའོ།། །།

[edit]

! zhal gdams mgur glu rin chen mgul rgyan zhes bya ba/__rje bla ma rnams la phyag 'tshal lo/__/sgos bka' drin can gyi byin gyis rlobs/__/grogs khyod nas mgur ma dgos zhes zer/__/mi nga la mgur ma snyan po med/__/mgur rdo rje'i thol glu zhes pa de/__/rje grub thob rnams kyi do ha zer/__/da sprang po nga yi blun gtam gyis/__/bu khyod la gdams ngag gsal 'debs zhu/__/rje dus gsum sangs rgyas 'gro ba'i mgon/__/pha drin can rtsa ba'i bla ma la/__/yid khyed shes dad mos drag po yis/__/kha tsam min snying nas gsol ba thob/__/gsol ba de ci tsam btab pa dang /__/mos gus kyi gzer chen snying la thebs/__/dam tshig gi sa gzhi gtsang gyur na/__/nyams rtogs kyi dpag bsam sdong po 'khrungs/__/mchog thun mong dngos grub 'byung bar nges/__/sngon bsags kyi dge ba'i 'bras bu las/__/dus da res dal 'byor mi lus thob/__/'di nor bu rnyed pas do zla med/__/tshe phyi ma'i don chen bsgrub 'dod na/__/dus da res snyom las ma gtong zhig/__da phan chod dgos med bya bas g.yeng /__/mdo sngags kyi gzhung chen 'ga' sbyangs kyang /__/kha shog lce rlung gis bskyod pa las/__/don yang dag rgyud la 'byor pa dkon/__/de bsam gyin bsam gyin snying rlung ldang /__/mi tshe nyi ma stong zad thal/__/dgra 'chi bdag gshin rjes mdun nas bsgug/__khos zhags pa nam btab mi shes pas/__/dus myur ba nyid du 'chi ran gda'/__/lo zla ba zhag dang nyin mtshan zad/__/tshe srog ni mar me rlung bdas mtshungs/__/rkyen ci 'byung nges pa cha med pas/__/chos sang byed gnang byed dbang ma gtong /__/'phral 'phral du lag len thebs par mdzod/__/'chi ba ni nam 'ong cha med cing /__/'chi rkyen la nges pa med pas na/__/dus da res thob pa'i lus rten 'di/__/yag nyes gnyis kyi sa mtshams yin/__/gyong bldabs na de las phongs pa med/__/khe thob na tshe 'dir sangs rgyas 'grub/__/tshe 'di phyi'i legs tshogs ci mchis pa/__/lus 'di yi steng nas 'grub pa yin/__/de yang yang thugs la nges par gyis/__/las 'bras la yid ches bskyed byas nas/__/dge sdig spang blang nan tan gyis/__/las mi dges ngan song gnas su 'phen/__/zag bcas kyi dge bas mtho ris skye/__/de 'ang gtan du thar pa min/__/dman nyan rang gtan du thar gyur kyang /__/lam gyi bgrod pa bul ba dang /__/rang zhi bde'i mtha' la lhung bas na/__/gzhan phan gyi bsam pa rgya chen pos/__/chos theg pa chen po nyams su len/__/dus deng sang rang gi don du ni/__/mtshams bsnyen sgrub thos bsam byas lo rnams/__/ming theg pa chen por khas 'che yang /__/don dman lam tsam las yar ma phyin/__/bdag gces 'dzin gyi 'gong po 'dis phung bas/__/bdag med kyi don la bsam par gyis/__/de rig pas dpyad na klu sgrub kyi/__/dbu ma'i gzhung ltar gtan la phab/__/des bdag 'dzin mgo bo non par 'gyur/__/chos zab mo gsang sngags rdo rje'i theg/__de'i yang rtse dgyes pa rdo rje yi/__/dpal sa skya'i rje btsun gong ma la/__/bka' babs pa'i gsung ngag rin po che/__/nyams len gyi zhun mthar bcad par 'tshal/__/chos zab mo rdzogs pa chen po yi/__/gnad zab mo bla ma'i drin rnyed dang /__/dpal biR+Wa pa yi snyan brgyud kyi/__/gsung ngag yid bzhin nor bu gnyis/__/khrid tshul la rim dang cig car gyi/__/khyad tsam las don gnad gcig tu 'babs/__/lar grub mtha' kun la phyogs ris spongs/__/nges don gyi gnas lugs zab mo la/__/yid ches dang dad mos brtan po gyis/__/bsam rgyu dang dran rgyu ma mang bar/__/'dod chung dang chog shes rgyun du bsten/__/lus po de ji mi snyam ma byed/__/zas gos ni gang 'dzom legs po brten/__/dus da lta lus la dka' spyad na/__/rtsa thig rlung gsum myur du rgud/__/de rgud na nyams len byed mi nus/__/de bas na lus la gces spras 'tshal/__/dpal kye yi rdo rje'i lam dbang de/__/ma chags pa rgyun du gsung bar zhu/__/chos bshad sgrub gnyis las sgrub pa gtso/__/sgrub ma nus ye shes rtogs pa ci/__/nus phra mo tsam yang thob par dka'/__/bu de phyir gsang sngags sgrub la brtson/__/a ho ye/__chos thams cad gdod nas ka dag la/__/sems glo bur 'khrul pa'i dri mas sgrib/__/dri ma de gshis la zhugs pa med/__/de chos kyi dbyings su rang dengs thong /__/'od gsal ba'i ye shes snang ba yi/__/khams gsum gyi 'khrul pa zad de thal/__/'khrul ma myong sku gsum rang bzhin la/__/da bla ma'i drin gyis gshis der 'byams/__/gzugs snang ba thams cad 'al ma 'ol/__/sgra grags kun brag ca lta bur zad/__/sems 'gyur ba wal po rjes med song /__/nga rnal 'byor rtogs pa'i khyad chos yin/__/lus na ba snyam yang na ba med/__/cir snang kun de la der 'dzin med/__/spyod pa la rtsis gdab dang bral ba/__/nga rnal 'byor smyon pa'i spyod tshul yin/__/yar sangs rgyas zhes pa'i sgra bo che/__/mar 'khor ba zhes pa'i sdug skad de/__/nga gnyis med rtogs pa'i rtogs ldan la/__/re ba dogs pa cang ma mchis/__/'bras sku gsum gzhan nas btsal mi dgos/__/bu a pho rang la tshang nas gda'/__/tshig de skad kha pho che song yang /__/nga grub thob brgyud pa'i bu yin pas/__/gshis ma bcos ngang nas thol gyis byung /__/slob bu mdo med hral po la gdams pa'o//___//