JKW-KABUM-11-DA-014-013

🚧 This website is under continued development. We appreciate your patience!

Previous Text Back to Volume PageNext Text

ཇོ་བོ་ལུགས་ཀྱི་སྲུང་བའི་ལྷ་མོ་ལྔའི་སྒྲུབ་ཐབས་རྗེས་གནང་དང་བཅས་པའི་ཐོ་ཡིག་ཕན་བདེའི་སྤྲིན་ཆར།

Wylie title	jo bo lugs kyi srung ba'i lha mo lnga'i sgrub thabs rjes gnang dang bcas pa'i tho yig phan bde'i sprin char
Location	mkhyen brtse'i bka' 'bum Volume 11, sde tshan 14, Text 13, Pages 549-557 (Folios 74a3 to 78a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ཞུ་ཆེན་ཚུལ་ཁྲིམས་རིན་ཆེན་ (zhu chen tshul khrims rin chen)
Associated People	ཇོ་བོ་རྗེ་ཨ་ཏི་ཤ་ (Atiśa)
Citation	'jam dbyangs mkhyen brtse'i dbang po. jo bo lugs kyi srung ba'i lha mo lnga'i sgrub thabs rjes gnang dang bcas pa'i tho yig phan bde'i sprin char. In 'jam dbyangs mkhyen brtse'i dbang po'i bka' 'bum, Vol. 11: 549-557. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Deity	srung ba'i lha mo lnga
Colophon	།ཞེས་པའང་རང་གཞན་ལ་ཉེ་བར་མཁོ་བའི་སླད་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཞུ་ཆེན་མ་ཧཱ་པཎྜི་ཏ་ཚུལ་ཁྲིམས་རིན་ཆེན་གྱི་གསུང་རབ་ལྟར་ངག་འདོན་བཀླགས་ཆོག་ཏུ་སྦྱར་བ་སྟེ། དགེ་བས་མཐའ་ཡས་པའི་སེམས་ཅན་ཐམས་ཅད་མི་མཐུན་རྒུད་པའི་གདུང་བ་མཐའ་དག་ཞི་ཞིང་། ཕན་བདེའི་དཔལ་གྱི་འབྱོར་བ་ལ་འདོད་རྒུར་རྩེན་པའི་རྒྱུར་གྱུར་ཅིག །མངྒ་ལཾ།།
	zhes pa'ang rang gzhan la nye bar mkho ba'i slad bya bral ba 'jam dbyangs mkhyen brtse'i dbang pos zhu chen ma hA paN+Di ta tshul khrims rin chen gyi gsung rab ltar ngag 'don bklags chog tu sbyar ba ste/__dge bas mtha' yas pa'i sems can thams cad mi mthun rgud pa'i gdung ba mtha' dag zhi zhing /__phan bde'i dpal gyi 'byor ba la 'dod rgur rtsen pa'i rgyur gyur cig__/mang+ga laM//

1 Texts in this Section (sde tshan or chos tshan)

13 549-557	ཇོ་བོ་ལུགས་ཀྱི་སྲུང་བའི་ལྷ་མོ་ལྔའི་སྒྲུབ་ཐབས་རྗེས་གནང་དང་བཅས་པའི་ཐོ་ཡིག་ཕན་བདེའི་སྤྲིན་ཆར། jo bo lugs kyi srung ba'i lha mo lnga'i sgrub thabs rjes gnang dang bcas pa'i tho yig phan bde'i sprin char Notes - zin bris   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཇོ་བོ་ལུགས་ཀྱི་སྲུང་བའི་ལྷ་མོ་ལྔའི་སྒྲུབ་ཐབས་རྗེས་གནང་དང་བཅས་པའི་ཐོ་ཡིག་ཕན་བདེའི་སྤྲིན་ཆར་ཞེས་བྱ་བ་བཞུགས་སོ། །ན་མོ་གུ་རུ་པཉྩ་རཀྵ་དེ་ཝཱི་བྷྱཿ། འདིར་གནས་སྐབས་དང་མཐར་ཐུག་གི་ཉེར་འཚེ་ཐམས་ཅད་ཞི་ཞིང་། ཕན་བདེའི་དཔལ་འབྱོར་རྒྱས་པར་བྱ་བའི་ཕྱིར་བསྡུས་པའི་ཚུལ་གྱིས་འཕགས་མ་རིག་པའི་རྒྱལ་མོ་ལྔའི་རྣལ་འབྱོར་བསྒོམ་པར་འདོད་པས། ཁྲུས་དང་གཙང་སྦྲ་ལ་གནས་ཤིང་། བྱང་ཆུབ་ཀྱི་སེམས་གཉིས་ཡིད་ལ་བྱས་ཏེ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །སོགས་སྐྱབས་སེམས་ཅི་ནུས་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམས་པས་བསོད་ནམས་དང་། སྭ་བྷཱ་བས་ཆོས་ཐམས་ཅད་སྟོང་པ་ཉིད་དུ་སྦྱངས་པས་ཡེ་ཤེས་ཀྱི་ཚོགས་བསགས་ཏེ་ཚོགས་གཉིས་ཀྱི་རང་འབྲས་སྣང་སྟོང་ཟུང་འཇུག་ལྷའི་སྐུར་ལྡངས་པ་ནི། སྟོང་པའི་ངང་ལས་སྐད་ཅིག་གིས་རྡོ་རྗེའི་ས་གཞིར་གུར་བླ་བྲེ། ཡེ་ཤེས་ཀྱི་མེ་འབར་བ་དང་བཅས་པའི་དབུས་སུ་རི་རབ་ཀྱི་སྟེང་དུ་ཧཱུྃ་ལས་བྱུང་བའི་སྣ་ཚོགས་རྡོ་རྗེའི་ལྟེ་བར་པྃ་ལས་སྣ་ཚོགས་པདྨ་འདབ་མ་བརྒྱད་པའི་ལྟེ་བ་དང་ཕྱོགས་བཞིའི་འདབ་མའི་སྟེང་དུ་ཨ་ལས་ཟླ་བའི་དཀྱིལ་འཁོར་རེ་རེ། དབུས་སུ་པྲྃ་སེར་པོ། ཤར་དུ་མཱྃ་ལྗང་གུ། ལྷོར་ཧཱུྃ་དཀར་པོ། ནུབ་ཏུ་མྃ་ནག་པོ། བྱང་དུ་ཤྃ་དམར་པོ། དེ་རྣམས་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་ལྔར་གྱུར་པ་ནི། དབུས་སུ་རང་ཉིད་སོ་སོར་འབྲང་མ་སྐུ་མདོག་སེར་མོ། སེར་ནག་དཀར་བའི་ཞལ་གསུམ་ཕྱག་བཅུ་མ། ཕྱག་གཡས་པ་རྣམས་ན་རིམ་པ་བཞིན། རལ་གྲི། རྡོ་རྗེ། མདའ། མཆོག་སྦྱིན། ཐུགས་ཀར་གདུགས་བསྣམས་པའོ། །གཡོན་རྣམས་ན་གཞུ། རྒྱལ་མཚན། རིན་པོ་ཆེའི་ཆུན་པོ། དགྲ་སྟྭ། དུང་བསྣམས་པ། ཤ་འགག་ནག་པོ་དང་། སྟོད་གཡོགས་དམར་པོས་བརྒྱན་པ། སྐྱིལ་ཀྲུང་ཕྱེད་པས་འགྱིང་ཞིང་བཞུགས་པ། ལྷའི་རྒྱན་དང་གོས་ཐམས་ཅད་ཀྱིས་བརྒྱན་པ། ཤར་དུ་རྨ་བྱ་ཆེན་མོ་སྐུ་མདོག་ལྗང་གུ་ཞལ་གཅིག་ཕྱག་གཉིས་མ་མཛེས་ཤིང་ཡིད་དུ་འོང་བ། ཕྱག་གཡས་རྨ་བྱའི་མདོངས་དང་གཡོན་མཆོག་སྦྱིན་མཛད་པ། ལྷོར་སྟོང་ཆེན་མོ་རབ་ཏུ་འཇོམས་མ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། གཡས་རྨ་བྱའི་མདོངས་དང་གཡོན་མཆོག་སྦྱིན་མཛད་པ། ནུབ་ཏུ་གསང་སྔགས་རྗེས་འཛིན་སྐུ་མདོག་ནག་མོ་ཞལ་གཅིག་ཕྱག་བཞི་མ། གཡས་གཉིས་ན་རལ་གྲི་དང་མཆོག་སྦྱིན་གྱི་ཕྱག་རྒྱ། གཡོན་གཉིས་དགྲ་སྟྭ་དང་ཞགས་པ་བསྣམས་པ། བྱང་དུ་བསིལ་བའི་ཚལ་ཆེན་མོ་སྐུ་མདོག་དམར་མོ་ཞལ་གཅིག་ཕྱག་བཞི་མ། གཡས་གཉིས་ན་རལ་གྲི་དང་མཆོག་སྦྱིན་གྱི་ཕྱག་རྒྱ། གཡོན་གཉིས་ན་དགྲ་སྟྭ་དང་ཞགས་པ་འཛིན་པ། ཐུགས་ཀར་ཟླ་བའི་སྟེང་དུ་རང་རང་གི་ས་བོན་གྱིས་མཚན་པ། དེ་ལས་འོད་ཟེར་འཕྲོས་པས། རང་བཞིན་གྱི་གནས་ནས་ཡེ་ཤེས་སེམས་དཔའ་འཕགས་མ་སོ་སོར་འབྲང་མ་གཙོ་བོར་གྱུར་པའི་སྲུང་བའི་ལྷ་མོ་ལྔ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲང་། ཨོཾ་བཛྲ་ཨརྒྷཾ་ནས་ཤཔྡ་པྲ་ཏཱི་ཙྪ་སྭཱ་ཧཱའི་བར་གྱིས་མཆོད། ཛཿཧཱུྃ་བྃ་ཧོཿཞེས་པས་གཉིས་སུ་མེད་པར་ཐིམ། དེ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་རྣམས་ཀྱིས་བདུད་རྩིས་གང་བའི་བུམ་པ་ཐོགས་ནས། ཇི་ལྟར་བལྟམས་པ་སོགས་དང་། ཨོཾ་སརྦ་ཏ་ཐཱ་ག་ཏ་ཨབྷི་ཥི་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་དབང་བསྐུར། སྐུ་གང་། དྲི་མ་དག །ཆུའི་ལྷག་མ་སྤྱི་བོར་ལུད་པ་ལས་སོ་སོར་འབྲང་མ་ལ་རིན་ཆེན་འབྱུང་ལྡན། གསང་སྔགས་རྗེས་འཛིན་ལ་མི་བསྐྱོད་པ། སྟོང་ཆེན་རབ་འཇོམས་ལ་རྣམ་སྣང་། རྨ་བྱ་ཆེན་མོ་ལ་དོན་གྲུབ། བསིལ་བའི་ཚལ་ཆེན་མོ་ལ་འོད་དཔག་མེད་ཀྱིས་དབུར་བརྒྱན་པར་བསམ། སྔགས་བཟླ་བ་ནི། ལྷ་མོ་སོ་སོའི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་རང་གི་ས་བོན་གྱི་མཐར་སྔགས་ཀྱིས་བསྐོར་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་འོད་ཀྱི་རྣམ་པར་བསྡུས་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམས་ལ། ཨོཾ་མ་ཎི་དྷཱ་རཱི་བཛྲི་ཎི་མ་ཧཱ་པྲ་ཏི་སཱ་རེ་ནོར་བུ་འཛིན་མ་རྡོ་རྗེ་ཅན་མ་སོ་སོར་འབྲང་མ་ཆེན་མོ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། སོ་སོར་འབྲང་མའི་སྔགས་སོ། །ཨོཾ་ཨམྲྀ་ཏེ་ཨམྲྀ་ཏ་བ་རེ་བ་རེ་བི་ཤུདྡྷེ་བདུད་རྩི་བདུད་རྩི་མཆོག་མ་མཆོག་མ་རྣམ་པར་དག་པ་མ། ཧཱུྃ་ཕཊ་སྭཱ་ཧཱ། སྟོང་ཆེན་རབ་འཇོམས་ཀྱི་སྔགས་སོ། །ཨོཾ་ཨམྲྀ་ཏེ་བི་ལོ་ཀི་ནི་གརྦྷ་སཾ་རཀྵ་ཎ་ཨཱ་ཀཪྵ་ཎི་བདུད་རྩི་མ་རྣམ་པར་གཟིགས་མ་སྙིང་པོ་ཡང་དག་པར་སྲུང་བ་འགུགས་མ། །ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྨ་བྱ་ཆེན་མོའི་སྔགས་སོ། །ཨོཾ་བི་མ་ལེ་བི་པུ་ལེ་ཛ་ཡ་བ་རེ་ཛ་ཡ་བ་ཏི་ནི་ཨམྲྀ་ཏ་མྲྀ་ཛཿ དྲི་མེད་མ་ཡངས་བ་མ་རྒྱལ་བ་མཆོག་མ་རྒྱལ་བ་ཅན་མ་འཇམ་པའི་བདུད་རྩི་མ། །ཧཱུྃ་ཧཱུྃ་ཕཊ་ཕཊ་སྭཱ་ཧཱ། གསང་སྔགས་རྗེས་འཛིན་མའི་སྔགས་སོ། །ཨོཾ་བྷ་ར་བྷ་ར་སཾ་བྷ་ར་སཾ་བྷ་ར་ཨིནྡྲ་ཡ་བཱ་ལ་བི་ཤོདྷ་ནི་རུ་རུ་ཙ་ལེ་རྒྱས་པ་རྒྱས་པ་ཡང་དག་པར་རྒྱས་པ་ཡང་དག་པར་རྒྱས་པ་དབང་པོའི་ཆེད་དུ་སྟོབས་རྣམ་པར་སྦྱོང་བ་སྒྲ་སྒྲོག་སྤྱོད་མ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། བསིལ་བའི་ཚལ་ཆེན་མོའི་སྔགས་སོ། །དེ་ལྟར་སོར་འབྲང་མ་གཙོ་བོར་བཏོན་པའི་སྔགས་རྣམས་ཅི་ནུས་བཟླས། ཐུན་མཚམས་སུ། བདག་བསྐྱེད་ཀྱི་ཡེ་ཤེས་པ་རྣམས་མདུན་གྱི་ནམ་མཁར་བྱོན་པར་བསམས་ལ། དེ་ལ། ཨོཾ་སརྦ་ཏ་ཐཱ་ག་ཏ་པཉྩ་རཀྵ་དེ་བཱི་ས་པ་རི་ཝཱ་ར་ཨརྒྷཾ་ནས། ཤཔྡའི་བར་གྱིས་མཆོད། གང་གི་བྱིན་རླབས་རྡོ་རྗེའི་གོ་ཆ་ཡིས། །མི་མཐུན་ཚོགས་རྣམས་ཞི་ཞིང་སྲུང་བ་དང་། །ཕན་དང་བདེ་བའི་འབྱོར་པ་རྒྱས་མཛད་མ། །རིག་པའི་རྒྱལ་མོ་ལྔ་ལ་ཕྱག་འཚལ་ལོ། །ཞེས་བསྟོད། བཅོམ་ལྡན་འདས་མ་འཁོར་དང་བཅས་པས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་ཞུས་ལ། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ་བཛྲ་མུཿཞེས་པས་ཡེ་ཤེས་པ་རང་བཞིན་གྱི་གནས་སུ་གཤེགས། ཉེར་བསྡུ་ནི། རང་གི་སྙིང་ག་ནས་འོད་ཟེར་འཕྲོས་པས་འཁོར་རྣམས་རང་ལ་ཐིམ། རང་ཉིད་ལྷ་སྐུ་གདན་དང་བཅས་པ་འོད་དུ་ཞུ་ནས་ཐུགས་ཀའི་ས་བོན་ལ་ཐིམ། དེའང་ནཱ་དའི་བར་དུ་ཐིམ་ཞིང་ནཱ་དའང་མི་དམིགས་པའི་ངང་དུ་མཉམ་པར་གཞག །དེ་ལས་ལྡང་བ་ན་སླར་ཡང་རང་སྐད་ཅིག་གིས་སོ་སོར་འབྲང་མོའི་སྐུར་གྱུར། དགེ་བ་འདི་ཡིས་མྱུར་དུ་བདག །སྲུང་བ་ལྷ་ལྔ་འགྲུབ་གྱུར་ནས། །སོགས་བསྔོ་སྨོན་གྱིས་རྒྱས་གདབ་ལ་ཐུན་མཚམས་ཀྱི་བྱ་བ་ལ་འཇུག་གོ། །བསྙེན་པ་བྱེད་ན། གནས་དབེན་པར་འདི་ཉིད་ཀྱི་བྲིས་སྐུ་སོགས་ཡོད་ན་དགྲམ་པའི་སྤྱན་སྔར་དང་། གང་ལྟར་ཡང་སྟེགས་ཀྱི་ཁར་འབུལ་གཏོར་དཀར་ཟླུམ་ཆུ་གཉིས་སྔོན་འགྲོའི་ཉེར་སྤྱོད་བཅས་བཤམ། གཟའ་ཚེས་དགེ་བ་ནས་བརྩམས་ཏེ་ཐུན་བཞིའམ་གསུམ་གྱི་རིམ་པས་རྣལ་འབྱོར་ལ་འཇུག །བསྙེན་ཚད་སོ་འབྲང་མའི་སྔགས་འབུམ་ཕྲག་བཞི་དང་། གཞན་རྣམས་ཁྲི་ཕྲག་བཞི་རེ་ཙམ་བཟླ། ཐུན་གཉིས་སམ་སྔ་ཐུན་གྱི་མཇུག་ཏུ་གཏོར་མ་འབུལ་བ་ནི། བདག་བསྐྱེད་ཉེར་བསྡུའི་རྗེས་རང་དམ་ཚིག་པའི་ང་རྒྱལ་ལ་གནས། གཏོར་མ་ཨོཾ་ཨཱཿབིགྷྣཱན་ཏ་ཀྲྀ་ཏ་ཧཱུྃ་ཕཊ། ཀྱིས་བསང་། སྭ་བྷཱ་བས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ། རྒྱས་པར་སྤྲོ་ན། གཏོར་མའི་སྟེང་གི་ནམ་མཁར་པྃ་ལས་སྣ་ཚོགས་པདྨ་སོགས་ནས། འོད་དཔག་མེད་ཀྱིས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ། རང་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་ཞེས་པའི་ཚབ་ཏུ་འདི་ལ་ཞེས་བསྒྱུར་བ་ཙམ་ཁྱད་པར་རོ། །བསྡུ་ན། རང་གི་སྙིང་གའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་སྲུང་པའི་ལྷ་མོ་ལྔ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲང་། གང་ལྟར་ཡང་། རྡོ་རྗེ་ཐལ་མོ་ཁ་ཕྱེ་བའི་ཕྱག་རྒྱ་དང་། ཨོཾ་པཉྩ་རཀྵ་དེ་ཝཱི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ལན་གསུམ་གྱིས་ཕུལ་ལ། བདག་བསྐྱེད་ཀྱི་མཇུག་ལྟར་མཆོད་ཅིང་བསྟོད། རིག་པའི་རྒྱལ་མོ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་འདོད་དོན་གསོལ། ཡིག་བརྒྱ་དང་། ནོངས་བཤགས། རྟེན་ཡོད་ན་བརྟན་བཞུགས། རྟེན་མེད་ན་མདུན་བསྐྱེད་རྒྱས་པའི་ཚེ་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། སྤྱན་དྲངས་པ་ཡིན་ན་གཤེགས་གསོལ་རྐྱང་པ་བྱ། བསྔོ་སྨོན་ཤིས་བརྗོད་རྒྱས་པར་བྱའོ། །ཆོས་སྲུང་གི་གཏོར་མ་འབུལ་བར་སྤྲོ་ན། ལྷ་གཏོར་གྱི་རྗེས་སུ་རྒྱལ་ཆེན་སྡེ་བཞི་ལ་གཏོར་བསྔོ་སྤྱི་ལྟར་བགྱིས་ན་འབྲེལ་ཆགས་པར་འགྱུར། གཞན་མཚམས་ཀྱི་སྤང་བླང་སོགས་སྤྱི་ལྟར་ཤེས་པར་བྱས་ལ་ཉམས་སུ་བླང་ངོ་། །རྗེས་གནང་བྱེད་ན། སྦྱོར་བའི་སྐབས་སུ་མཎྜལར་སྣ་ཚོགས་པདྨ་འདབ་བརྒྱད་བྲིས་པའི་དབུས་དང་ཕྱོགས་བཞིར་ཟླ་གདན་ལ་ལྷའི་སྐུ་མདོག་དང་མཐུན་པའི་ཚོམ་བུ་རེ་བཀོད། དེའི་མདུན་དུ་མཆོད་གཏོར་དང་། རང་གི་ཉེ་ལོགས་སུ་བུམ་པ་གཉིས་སོགས་དགོས་པའི་ཡོ་བྱད་ཐམས་ཅད་འདུ་བྱ། དངོས་གཞི་མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་གོང་ལྟར་དང་། བུམ་བཟླས། མདུན་བསྐྱེད་སློབ་མའི་བྱ་བ། རྗེས་ཆོག་སོགས་སྣར་ཐང་བརྒྱ་རྩའི་ཆིངས་སྤྱི་ཁོ་བོས་བྱས་པའི་ཇོ་བོ་ལུགས་ཀྱི་མི་འཁྲུགས་པ་གཙོ་རྐྱང་གི་སྐབས་ལྟར། འགྲོ་ལ། ལྷའི་གདན་དང་། ས་བོན། མངོན་རྟོགས། རིགས་བདག །ལྷ་སྔགས་མཆོད་བསྟོད། ལྷའི་མཚན་སོགས་དམིགས་བསལ་གྱི་ཁྱད་ཆོས་རྣམས་མ་འཁྲུལ་བར་སྦྱར་བས་གྲུབ་བོ། །ཞེས་པའང་རང་གཞན་ལ་ཉེ་བར་མཁོ་བའི་སླད་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཞུ་ཆེན་མ་ཧཱ་པཎྜི་ཏ་ཚུལ་ཁྲིམས་རིན་ཆེན་གྱི་གསུང་རབ་ལྟར་ངག་འདོན་བཀླགས་ཆོག་ཏུ་སྦྱར་བ་སྟེ། དགེ་བས་མཐའ་ཡས་པའི་སེམས་ཅན་ཐམས་ཅད་མི་མཐུན་རྒུད་པའི་གདུང་བ་མཐའ་དག་ཞི་ཞིང་། ཕན་བདེའི་དཔལ་གྱི་འབྱོར་བ་ལ་འདོད་རྒུར་རྩེན་པའི་རྒྱུར་གྱུར་ཅིག །མངྒ་ལཾ།། །། ༈

[edit]

jo bo lugs kyi srung ba'i lha mo lnga'i sgrub thabs rjes gnang dang bcas pa'i tho yig phan bde'i sprin char/ @#/_/jo bo lugs kyi srung ba'i lha mo lnga'i sgrub thabs rjes gnang dang bcas pa'i tho yig phan bde'i sprin char zhes bya ba bzhugs so/__/na mo gu ru pany+tsa rak+Sha de wI b+h+yaH/__'dir gnas skabs dang mthar thug gi nyer 'tshe thams cad zhi zhing /__phan bde'i dpal 'byor rgyas par bya ba'i phyir bsdus pa'i tshul gyis 'phags ma rig pa'i rgyal mo lnga'i rnal 'byor bsgom par 'dod pas/__khrus dang gtsang sbra la gnas shing /__byang chub kyi sems gnyis yid la byas te/__/sangs rgyas chos dang tshogs kyi mchog rnams la/__/sogs skyabs sems ci nus dang /__sems can thams cad bde ba dang sogs tshad med bzhi bsgoms pas bsod nams dang /__swa b+hA bas chos thams cad stong pa nyid du sbyangs pas ye shes kyi tshogs bsags te tshogs gnyis kyi rang 'bras snang stong zung 'jug lha'i skur ldangs pa ni/__stong pa'i ngang las skad cig gis rdo rje'i sa gzhir gur bla bre/__ye shes kyi me 'bar ba dang bcas pa'i dbus su ri rab kyi steng du hU~M las byung ba'i sna tshogs rdo rje'i lte bar pa~M las sna tshogs pad+ma 'dab ma brgyad pa'i lte ba dang phyogs bzhi'i 'dab ma'i steng du a las zla ba'i dkyil 'khor re re/__dbus su pra~M ser po/__shar du mA~M ljang gu/__lhor hU~M dkar po/__nub tu ma~M nag po/__byang du sha~M dmar po/__de rnams las 'od zer 'phros/__'phags pa mchod/__sems can gyi don byas/__tshur 'dus yongs su gyur pa las lha mo lngar gyur pa ni/__dbus su rang nyid so sor 'brang ma sku mdog ser mo/__ser nag dkar ba'i zhal gsum phyag bcu ma/__phyag g.yas pa rnams na rim pa bzhin/__ral gri/__rdo rje/__mda'/__mchog sbyin/__thugs kar gdugs bsnams pa'o/__/g.yon rnams na gzhu/__rgyal mtshan/__rin po che'i chun po/__dgra s+t+wa/__dung bsnams pa/__sha 'gag nag po dang /__stod g.yogs dmar pos brgyan pa/__skyil krung phyed pas 'gying zhing bzhugs pa/__lha'i rgyan dang gos thams cad kyis brgyan pa/__shar du rma bya chen mo sku mdog ljang gu zhal gcig phyag gnyis ma mdzes shing yid du 'ong ba/__phyag g.yas rma bya'i mdongs dang g.yon mchog sbyin mdzad pa/__lhor stong chen mo rab tu 'joms ma sku mdog dkar mo zhal gcig phyag gnyis ma/__g.yas rma bya'i mdongs dang g.yon mchog sbyin mdzad pa/__nub tu gsang sngags rjes 'dzin sku mdog nag mo zhal gcig phyag bzhi ma/__g.yas gnyis na ral gri dang mchog sbyin gyi phyag rgya/__g.yon gnyis dgra s+t+wa dang zhags pa bsnams pa/__byang du bsil ba'i tshal chen mo sku mdog dmar mo zhal gcig phyag bzhi ma/__g.yas gnyis na ral gri dang mchog sbyin gyi phyag rgya/__g.yon gnyis na dgra s+t+wa dang zhags pa 'dzin pa/__thugs kar zla ba'i steng du rang rang gi sa bon gyis mtshan pa/__de las 'od zer 'phros pas/__rang bzhin gyi gnas nas ye shes sems dpa' 'phags ma so sor 'brang ma gtso bor gyur pa'i srung ba'i lha mo lnga oM badz+ra sa mA dzaH__zhes pas spyan drang /__oM badz+ra ar+g+haM nas shap+da pra tI ts+tsha swA hA'i bar gyis mchod/__dzaHhU~M ba~M hoHzhes pas gnyis su med par thim/__de rnams kyi spyi bor oM dkar po/__mgrin par AHdmar po/__thugs kar hU~M sngon po/__slar yang thugs ka'i sa bon las 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__oM badz+ra ar+g+haM sogs kyis mchod/__de bzhin gshegs pa thams cad kyis bdag la mngon par dbang bskur du gsol/__zhes gsol ba btab pas de rnams kyis bdud rtsis gang ba'i bum pa thogs nas/__ji ltar bltams pa sogs dang /__oM sarba ta thA ga ta ab+hi Shi ka te sa ma ya shri ye hU~M/__zhes gsung zhing dbang bskur/__sku gang /__dri ma dag__/chu'i lhag ma spyi bor lud pa las so sor 'brang ma la rin chen 'byung ldan/__gsang sngags rjes 'dzin la mi bskyod pa/__stong chen rab 'joms la rnam snang /__rma bya chen mo la don grub/__bsil ba'i tshal chen mo la 'od dpag med kyis dbur brgyan par bsam/__sngags bzla ba ni/__lha mo so so'i thugs kar zla ba'i dkyil 'khor gyi dbus su rang gi sa bon gyi mthar sngags kyis bskor ba las 'od zer 'phros/__'phags pa mchod/__sems can gyi don byas/__sangs rgyas dang byang chub sems dpa' thams cad kyi thugs rje byin rlabs nus mthu thams cad 'od kyi rnam par bsdus nas rang la thim pas rgyud byin gyis brlabs par bsams la/__oM ma Ni d+hA rI badz+ri Ni ma hA pra ti sA re nor bu 'dzin ma rdo rje can ma so sor 'brang ma chen mo/__hU~M hU~M phaT phaT swA hA/__so sor 'brang ma'i sngags so/__/oM amr-i te amr-i ta ba re ba re bi shud+d+he bdud rtsi bdud rtsi mchog ma mchog ma rnam par dag pa ma/__hU~M phaT swA hA/__stong chen rab 'joms kyi sngags so/__/oM amr-i te bi lo ki ni gar+b+ha saM rak+Sha Na A kaR+Sha Ni bdud rtsi ma rnam par gzigs ma snying po yang dag par srung ba 'gugs ma/__/hU~M hU~M phaT phaT swA hA/__rma bya chen mo'i sngags so/__/oM bi ma le bi pu le dza ya ba re dza ya ba ti ni amr-i ta mr-i dzaH__dri med ma yangs ba ma rgyal ba mchog ma rgyal ba can ma 'jam pa'i bdud rtsi ma/__/hU~M hU~M phaT phaT swA hA/__gsang sngags rjes 'dzin ma'i sngags so/__/oM b+ha ra b+ha ra saM b+ha ra saM b+ha ra in+d+ra ya bA la bi shod+ha ni ru ru tsa le rgyas pa rgyas pa yang dag par rgyas pa yang dag par rgyas pa dbang po'i ched du stobs rnam par sbyong ba sgra sgrog spyod ma/__hU~M hU~M phaT phaT swA hA/__bsil ba'i tshal chen mo'i sngags so/__/de ltar sor 'brang ma gtso bor bton pa'i sngags rnams ci nus bzlas/__thun mtshams su/__bdag bskyed kyi ye shes pa rnams mdun gyi nam mkhar byon par bsams la/__de la/__oM sarba ta thA ga ta pany+tsa rak+Sha de bI sa pa ri wA ra ar+g+haM nas/__shap+da'i bar gyis mchod/__gang gi byin rlabs rdo rje'i go cha yis/__/mi mthun tshogs rnams zhi zhing srung ba dang /__/phan dang bde ba'i 'byor pa rgyas mdzad ma/__/rig pa'i rgyal mo lnga la phyag 'tshal lo/__/zhes bstod/__bcom ldan 'das ma 'khor dang bcas pas bdag dang sems can thams cad la mchog dang thun mong gi dngos grub ma lus pa stsal du gsol/__zhes 'dod don zhus la/__ma 'byor pa dang sogs kyis nongs pa bzod par gsol/__oM badz+ra muHzhes pas ye shes pa rang bzhin gyi gnas su gshegs/__nyer bsdu ni/__rang gi snying ga nas 'od zer 'phros pas 'khor rnams rang la thim/__rang nyid lha sku gdan dang bcas pa 'od du zhu nas thugs ka'i sa bon la thim/__de'ang nA da'i bar du thim zhing nA da'ang mi dmigs pa'i ngang du mnyam par gzhag__/de las ldang ba na slar yang rang skad cig gis so sor 'brang mo'i skur gyur/__dge ba 'di yis myur du bdag__/srung ba lha lnga 'grub gyur nas/__/sogs bsngo smon gyis rgyas gdab la thun mtshams kyi bya ba la 'jug go/__/bsnyen pa byed na/__gnas dben par 'di nyid kyi bris sku sogs yod na dgram pa'i spyan sngar dang /__gang ltar yang stegs kyi khar 'bul gtor dkar zlum chu gnyis sngon 'gro'i nyer spyod bcas bsham/__gza' tshes dge ba nas brtsams te thun bzhi'am gsum gyi rim pas rnal 'byor la 'jug__/bsnyen tshad so 'brang ma'i sngags 'bum phrag bzhi dang /__gzhan rnams khri phrag bzhi re tsam bzla/__thun gnyis sam snga thun gyi mjug tu gtor ma 'bul ba ni/__bdag bskyed nyer bsdu'i rjes rang dam tshig pa'i nga rgyal la gnas/__gtor ma oM AHbig+h+nAn ta kr-i ta hU~M phaT/__kyis bsang /__swa b+hA bas sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa ye shes kyi bdud rtsi'i rgya mtsho chen por gyur/__oM AHhU~M lan gsum/__rgyas par spro na/__gtor ma'i steng gi nam mkhar pa~M las sna tshogs pad+ma sogs nas/__'od dpag med kyis dbur brgyan zhes pa'i bar bdag bskyed ltar la/__rang nyid ces pa'i tshig dor/__bdag la mngon par dbang bskur zhes pa'i tshab tu 'di la zhes bsgyur ba tsam khyad par ro/__/bsdu na/__rang gi snying ga'i sa bon las 'od zer 'phros pas rang bzhin gyi gnas nas srung pa'i lha mo lnga la sangs rgyas dang byang chub sems dpa'i tshogs kyis bskor ba oM badz+ra sa mA dzaH__zhes pas spyan drang /__gang ltar yang /__rdo rje thal mo kha phye ba'i phyag rgya dang /__oM pany+tsa rak+Sha de wI sa pa ri wA ra i daM ba liM ta kha kha khA hi khA hi lan gsum gyis phul la/__bdag bskyed kyi mjug ltar mchod cing bstod/__rig pa'i rgyal mo 'khor bcas rnams/__/mchod sbyin gtor ma 'di bzhes la/__/sogs kyis 'dod don gsol/__yig brgya dang /__nongs bshags/__rten yod na brtan bzhugs/__rten med na mdun bskyed rgyas pa'i tshe ye shes pa gshegs/__dam tshig pa rang la bstim/__spyan drangs pa yin na gshegs gsol rkyang pa bya/__bsngo smon shis brjod rgyas par bya'o/__/chos srung gi gtor ma 'bul bar spro na/__lha gtor gyi rjes su rgyal chen sde bzhi la gtor bsngo spyi ltar bgyis na 'brel chags par 'gyur/__gzhan mtshams kyi spang blang sogs spyi ltar shes par byas la nyams su blang ngo /__/rjes gnang byed na/__sbyor ba'i skabs su maN+Dalar sna tshogs pad+ma 'dab brgyad bris pa'i dbus dang phyogs bzhir zla gdan la lha'i sku mdog dang mthun pa'i tshom bu re bkod/__de'i mdun du mchod gtor dang /__rang gi nye logs su bum pa gnyis sogs dgos pa'i yo byad thams cad 'du bya/__dngos gzhi mchod pa byin rlabs sngon du 'gro bas bdag bskyed gong ltar dang /__bum bzlas/__mdun bskyed slob ma'i bya ba/__rjes chog sogs snar thang brgya rtsa'i chings spyi kho bos byas pa'i jo bo lugs kyi mi 'khrugs pa gtso rkyang gi skabs ltar/__'gro la/__lha'i gdan dang /__sa bon/__mngon rtogs/__rigs bdag__/lha sngags mchod bstod/__lha'i mtshan sogs dmigs bsal gyi khyad chos rnams ma 'khrul bar sbyar bas grub bo/__/zhes pa'ang rang gzhan la nye bar mkho ba'i slad bya bral ba 'jam dbyangs mkhyen brtse'i dbang pos zhu chen ma hA paN+Di ta tshul khrims rin chen gyi gsung rab ltar ngag 'don bklags chog tu sbyar ba ste/__dge bas mtha' yas pa'i sems can thams cad mi mthun rgud pa'i gdung ba mtha' dag zhi zhing /__phan bde'i dpal gyi 'byor ba la 'dod rgur rtsen pa'i rgyur gyur cig__/mang+ga laM//____//__!_