JKW-KABUM-02-KHA-002-034

Previous Text Back to Volume PageNext Text

འཇམ་མགོན་བླ་མར་བསྟོད་པ་ཤློ་ཀ་མཚན་བཟང་གི་གྲངས་ལྡན་རྣམ་པར་སྣང་མཛད་ཅེས་པ།

Wylie title	'jam mgon bla mar bstod pa sh+lo ka mtshan bzang gi grangs ldan rnam par snang mdzad ces pa
Location	mkhyen brtse'i bka' 'bum Volume 2, sde tshan 2, Text 32, Pages 330-335 (Folios 24b2 to 27a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. jam mgon bla mar bstod pa sh+lo ka mtshan bzang gi grangs ldan rnam par snang mdzad ces pa. In jam dbyangs mkhyen brtse'i dbang po'i bka' 'bum, Vol. 2: 330-335. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Deity	'jam mgon kong sprul
Colophon	།ཅེས་པའང་རྗེ་བླ་མ་ཉིད་ནས་གསུང་རྩོམ་འཕྲོ་ལུས་པ་རྨོངས་ཚིག་གིས་ཁ་འགེངས་ཤློ་ཀ་གཉིས་འཇམ་དབྱངས་ཆོས་ཀྱི་བློ་གྲོས་པས་ཞུས་སོ།།
	ces pa'ang rje bla ma nyid nas gsung rtsom 'phro lus pa rmongs tshig gis kha 'gengs sh+lo ka gnyis 'jam dbyangs chos kyi blo gros pas zhus so

1 Texts in this Section (sde tshan or chos tshan)

34 330-335	འཇམ་མགོན་བླ་མར་བསྟོད་པ་ཤློ་ཀ་མཚན་བཟང་གི་གྲངས་ལྡན་རྣམ་པར་སྣང་མཛད་ཅེས་པ། 'jam mgon bla mar bstod pa sh+lo ka mtshan bzang gi grangs ldan rnam par snang mdzad ces pa Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྣ༷མ་པར་སྣ༷ང་མཛད་ཆེན་པོའི་ཡེ་ཤེས་ཀྱི། །སྒྱུ་འཕྲུལ་ང༷ག་གི༷་དབ༷ང་ཕྱུག༷་འཇིག་རྟེན་མིག །འགྱུར་མེད་བདེ་ཆེན་རྡོ་རྗེར་བྱང་ཆུབ་པ། །ཡོན་ཏན་རྒྱ་མཚོར་འཆར་ལ་གསོལ་བ་འདེབས། ༡ །མགོན་ཁྱོད་གཟོད་ནས་གཞི་ལམ་རྣམ་མཁྱེན་གྱི། །ཆོས་རྣམས་ཀུན་གྱི་དེ་ཉིད་རབ་གཟིགས་ཤིང་། །སྦྱོར་བཞིའི་རྣལ་འབྱོར་ཟབ་མོ་ལ་བརྟེན་ནས། །ཚོགས་གཉིས་ཕ་མཐར་སོན་ལ་གསོལ་བ་འདེབས། ༢ །དེ་ལས་སྤངས་རྟོགས་ཕྲིན་ལས་རྫོགས་པའི་ཟླ། །དམིགས་མེད་ཆོས་སྐུའི་མཁའ་ལ་དགྱེས་རོལ་བཞིན། །གྲངས་མེད་གདུལ་བྱའི་རྫིང་བུར་དེ་སྙེད་ཀྱི། །རྣམ་འཕྲུལ་ཅིར་ཡང་སྣང་ལ༴ ༣ །ཁྱད་པར་བོད་ཆེན་ལྡན་གྱི་ནོར་འཛིན་གཞིར། །དཔལ་ལྡན་ཁྱུང་པོའི་རིགས་ཀྱི་དགའ་ཚལ་དུ། །བསམས་བཞིན་ཐུབ་བསྟན་ཉིན་མོར་མཛད་པའི་སླད། །མཚན་དཔེའི་དཔག་བསམ་འཁྲུངས་ལ༴ ༤ ཐོག་མ་ཉིད་ནས་རང་བཞིན་དག་པའི་ཁམས། །ལེགས་བྱས་བདུད་རྩིའི་རྒྱུན་གྱིས་བསྐྱེད་བསྲིངས་པས། །སྦྱོར་བའི་དོན་དུ་ཚད་མེད་སྙིང་རྗེ་སོགས། །རིགས་ཀྱི་མེ་ཏོག་རྒྱས་དེར་གསོལ༴ ༥ བཻ་རོའི་རྣམ་འཕྲུལ་བརྩོན་འགྲུས་མགོན་པོ་ཡི། །བྱང་ཆུབ་སྤྱོད་པའི་དགེ་མཚན་སད་པ་ལས། །འཇིག་རྟེན་ཕན་བདེ་སྤེལ་བའི་ལམ་གྱི་སྲོལ། །ཚུལ་བཞིན་ཁོང་དུ་ཆུད་ལ༴ ༦ སྐྱེ་བས་ཐོབ་པའི་རླབས་ཆེན་མཁྱེན་རབ་ནི། །འཇམ་པའི་དབྱངས་དང་གཉིས་སུ་མི་ཕྱེད་ཀྱང་། །ཇི་སྙེད་ཤེས་དང་ཤེས་བྱའི་ཆོས་ཀུན་ལ། །འཇུག་པའི་ཐབས་མཁས་བཟུང་དེར༴ ༧ དེ་ཚེ་འཇམ་དཔལ་རབ་དགྱེས་ཀུན་ཤེས་པའི། །བློ་གྲོས་ལང་ཚོ་དར་བབས་ཡོངས་འཛིན་མཆོག །གཙོར་གྱུར་རིས་མེད་མཁས་གྲུབ་རྒྱ་མཚོ་ཡི། །ཞབས་པད་གུས་པས་བསྙེན་ལ༴ ༨ ཁྱད་པར་རིགས་དང་དཀྱིལ་འཁོར་རྒྱ་མཚོའི་བདག །རྡོ་རྗེ་འཆང་དངོས་པདྨ་དབང་ཆེན་གྱི། །སྒྲུབ་བརྒྱུད་སྙིང་པོའི་ཤིང་རྟ་མཐའ་དག་གི །ཐུགས་ཀྱི་སྲས་སུ་གྱུར་ལ༴ ༩ གང་ལས་སྒོ་གསུམ་ཉམས་འགྱུར་བཻ་ཌཱུཪྻས། །འདོད་དགུའི་ཆར་འབེབས་བཟོ་གནས་རིག་པ་ལ། །བི་ཤྭ་ཀརྨའི་ཁེངས་པ་བསྙིལ་བྱེད་པའི། །ངོ་མཚར་སྣང་བ་རྒྱས་ལ༴ ༡༠ ལུས་དང་ནད་ཀྱི་མཚན་ཉིད་ལེགས་རྟོགས་ནས། །གསོ་བའི་ཚུལ་དང་གང་ཟག་དང་བཅས་པའི། །གཞུང་བརྒྱ་འཆད་ལ་དཔལ་ལྡན་དཔའ་བོ་ཡི། །རྗེས་སུ་ཞབས་པད་བཀོད་ལ་གསོལ༴ ༡༡ བྱིངས་དང་མིང་གི་རང་བཞིན་རྐྱེན་བདུན་དང་། །རྣམ་འགྱུར་ཟུང་གིས་བསྒྲུབས་ལས་སྒྲ་དོན་མཐའ། །ཇི་བཞིན་འཆད་ལ་ཙཱནྡྲ་གཽ་མཱིའི་ཞབས། །ལྗོངས་འདིར་མངོན་སུམ་སྣང་ལ་གསོལ་བ་འདེབས། ༡༢ །གནས་གསུམ་གཞལ་བྱ་ཚད་མ་རྣམ་གསུམ་གྱིས། །འཁྲུལ་མེད་གཞལ་ནས་སྒྲུབ་དང་སུན་འབྱིན་པའི། །རིག་ཚུལ་ཀུན་ལ་ཕྱོགས་ཀྱི་གླང་པོ་ཡི། །རྣམ་ཐར་ངང་གིས་བཟུང་ལ༴ ༡༣ ཚིག་རྒྱན་ཀུན་གྱི་ཕུལ་གྱུར་དཎྜི་སྟེ། །སྡེབ་ལེགས་སྦྱོར་བ་རིན་འབྱུང་ཞི་བའི་དངོས། །མིང་ཚིག་ཀུན་ཤེས་འཆི་མེད་སེང་གེ་ཡི། །སྤོབས་པ་མཐའ་དག་བཟུང་ལ༴ ༡༤ ཕྱི་རོལ་གཏན་འབེབས་དུས་ཀྱི་འཁོར་ལོ་དང་། །སྤོར་ཐང་དབྱངས་ཀྱི་ངེས་པ་འཆར་བའི་གཞུང་། །མ་འདྲེས་འཆད་ལ་རིགས་ལྡན་འཇམ་པའི་དབྱངས། །གཙུག་ན་ཟླ་བར་གྲགས་དེར་གསོལ༴ ༡༥ གཞན་ཡང་ཡིད་འཕྲོག་ཟློས་པའི་གར་ལ་སོགས། །བློ༷་གཏེ༷ར་ར༷བ་དག༷འི་རིག་གཞུང་རྒྱ་མཚོ་ལ། །ཚང༷ས་བྱུང༷་སྙེམ༷ས་པའི༷་རྣམ་དཔྱོད་མཐུ་གྲུབ་པའི། །ལ༷ང་ཚོ༷འི་ཟླ་སྣང་གསལ་ལ་གསོལ༴ ༡༦ རྒྱ་ཆེན་ཤེས་བྱའི་མ་མོ་མངོན་པ་དང་། །གནང་བཀག་སྒྲུབ་པའི་གནས་སྟོན་འདུལ་བའི་གཞུང་། །འཆད་ལ་དབྱིག་གཉེན་ཤཱཀྱ་ཡོན་ཏན་འོད། །གངས་རིའི་ཡུལ་དུ་ཤར་ལ༴ ༡༧ རྣམ་གསུམ་གྲུབ་མཐའི་སྤོ་ནས་ཟབ་རྒྱས་དང་། །ངེས་དོན་དབུ་མར་ལྟ་བའི་སྙིང་པོའི་ལམ། །ཇི་བཞིན་གཟིགས་ལ་ཀླུ་སྒྲུབ་ཡབ་སྲས་དང་། །ཐོགས་མེད་མཁྱེན་པ་བརྙེས་ལ༴ ༡༨ ཕྱི་རོལ་བྱ་དང་ཏིང་འཛིན་མཉམ་སྤྱོད་དང་། །ཟབ་མོའི་རྣལ་འབྱོར་གཙོར་བཏོན་རྒྱུད་སྡེའི་གཞུང་། །སངས་རྒྱས་གསང་བ་ཀུན་དགའ་སྙིང་པོ་ཡི། །བཞེད་སྲོལ་འཁྲུལ་མེད་མཁྱེན་ལ༴ ༡༩ ཁྱད་པར་ནང་གི་རྣལ་འབྱོར་བླ་མེད་པའི། །རྒྱུད་སྡེ་རྒྱ་མཚོ་འཆད་དང་སྤེལ་བ་ལ། །དཔལ་ལྡན་གས༷ང་བའི་བད༷ག་པོ་སྒྲོལ༷་མགོ༷ན་ཞབས། །བསམས་བཞིན་སྲིད་པར་བཟུང་ལ༴ ༢༠ བྱེ་བྲག་བསྐྱེད་རྫོགས་སྡེ་གསུམ་ཤིང་རྟའི་སྲོལ། །སྔོན་གོམས་སྤོབས་པའི་ཕྱག་རྒྱས་འབྱེད་པ་ལ། །འགྱུར་མེད་གྲུབ་པ་མཚོ་སྐྱེས་རྡོ་རྗེའི་ཞབས། །ངུར་སྨྲིག་གར་དུ་ཟློས་ལ༴ ༢༡ དེ་ལྟར་ཕྱི་ནང་རིག་གཞུང་རྒྱ་མཚོ་ལ། །གསན་དང་བསམ་པའི་སྒྲོ་འདོགས་ལེགས་ཆོད་ནས། །མཐར་གྱིས་ཉམས་སུ་བཞེས་པའི་རྣམ་ཐར་ལ། །སྲས་བཅས་རྒྱལ་བས་བསྔགས་ལ༴ ༢༢ དཔལ་ལྡན་ཀ༷རྨ༷འི་རིང་ལུགས་ལས་འོངས་པའི། །སོ་ཐར་གདམས་ང༷ག་བཅས་ལ་དབ༷ང་འབྱོར་པས། །བརྟན་མཁས་ཕན་འདོགས་ཡན་ལག་ཡོངས་རྫོགས་པ། །ཡོ༷ན་ཏ༷ན་རྒྱ༷་མཚོ༷འི་གཏེར་ལ༴ ༢༣ གཞན་ལ་ཕན་དགོངས་བསླབ་གཞི་ལེགས་བཟུང་ནས། །སྡོམ་དང་ཆོས་སྡུད་སེམས་ཅན་དོན་ བྱེད་པའི། །བྱང་ཆུབ་སྤྱོད་དང་སྐད་ཅིག་མི་འབྲལ་བ། །བློ་གྲོས་ཕ་མཐའ་ཡས་ལ༴ ༢༤ གསང་སྔགས་རྒྱུད་སྡེ་རྣམ་བཞིའི་སྨིན་བྱེད་ཀྱིས། །ལུས་ངག་གདུལ་ཞིང་ཐུགས་རྒྱུད་རབ་སྦྱངས་པས། །དངོས་ཀུན་ལྷ་དང་ཡེ་ཤེས་མི་ཕྱེད་པའི། །ཁྱབ་བདག་བདེ་བའི་རྡོ་རྗེར་གསོལ་བ༴ ༢༥ ཤིན་ཏུ་དབེན་ཞིང་ཉམས་དགའི་ནགས་ཚལ་དུ། །བསྐྱེད་རྫོགས་ཟབ་མོའི་དོན་ལ་མཉམ་གཞག་མཐུས། །མཆོག་ཐུན་གྲུབ་པ་རྒྱ་མཚོའི་མཐར་སོན་པས། །པདྨ་གར་གྱི་དབང་པོར་གསོལ༴ ༢༦ ཏིང་འཛིན་ཕྱག་རྒྱས་སྤོབས་པའི་གཏེར་མཛོད་གྲོལ། །རྩ་གསུམ་རྒྱ་མཚོས་བྱིན་བརླབས་གཟི་བྱིན་སྐྱེད། །རྡོ་རྗེའི་ཆོས་སྲུང་བྲན་བཞིན་ལས་སྒྲུབ་པའི། །བརྟུལ་ཞུགས་སྤྱོད་པའི་དབང་པོར༴ ༢༧ འཆད་མཁས་ཞལ་གྱི་གྲྭ་ཟུར་གཡོ་བ་ན། །མ་ཕམ་ཞབས་དང་གཉིས་སུ་མི་ཕྱེད་པས། །གཟུར་གནས་གློ་གསལ་དོན་གཉིས་མཐའ་ཡས་པའི། །བློ་གྲོས་སྒོ་བརྒྱ་འབྱེད་ལ༴ ༢༨ རྩོད་ངག་སེང་གེའི་རྒྱུད་མང་བསྒྲགས་པའི་མོད། །ཕས་རྒོལ་ལག་ལྡན་མྱོས་པའི་ཚོགས་རྣམས་ཀུན། །མི་སྨྲའི་དམ་བཅའ་བྱིན་ལ་མགོན་ཁྱོད་དང་། །ཆོས་ཀྱི་གྲགས་པ་མཚུངས་ལ༴ ༢༩ ལྷག་པར་སོ་སྐྱེའི་བློ་ཡིས་བསྐྲུན་མིན་པའི། །རྩོམ་ཕྲེང་ནམ་མཁའ་མཛོད་ཀྱི་གཏེར་བརྡོལ་པས། །ཉམས་འགྱུར་བྱེ་བས་རབ་མཛེས་ཞི་བའི་ལྷའི། །བཟོད་པ་སླར་ཡང་སྙན་དེར་གསོལ༴ ༣༠ ལྟ་བ་མ་འཁྲུལ་སྤྱོད་པ་ཤིན་ཏུ་བཙུན། །རིག་དང་བརྩེ་དང་ནུས་པ་ཕུལ་དུ་སོན། །ཤེས་དང་ཤེས་བྱ་རོ་གཅིག་མངོན་གྱུར་ཕྱིར། །རྣམ་ཐར་མཚུངས་པ་སྤངས་ལ༴ ༣༡ མདོར་ན་སྲས་བཅས་རྒྱལ་བའི་ཡེ་ཤེས་སྐུ། །རིགས་ཀུན་ཁྱབ་བདག་དཔལ་ལྡན་འཇམ་པའི་དབྱངས། །ཐེག་མཆོག་དགེ་བའི་བཤེས་ཀྱི་ཚུལ་བཟུང་བ། །སྐྱབས་གནས་ཀུན་འདུས་ངོ་བོར་གསོལ་བ་འདེབས།༣༢ །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་སོགས་ཚེ་རིང་ནད་མེད་ཆོས་བཞིན་སྤྱོད། །ཡོངས་འཛིན་བཤེས་གཉེན་མཆོག་གིས་རྗེས་བཟུང་ནས། །མྱུར་དུ་བྱང་ཆུབ་གོ་འཕང་ཐོབ་པར་ཤོག །དེང་ནས་བཟུང་སྟེ་བྱང་ཆུབ་མ་ཐོབ་པར། །དཔལ་ལྡན་བླ་མས་འབྲལ་བ་མེད་པ་རུ། །རྗེས་བཟུང་དབང་དང་བྱིན་རླབས་ཀུན་སྩོལ་ཞིང་། །རིམ་གཉིས་སྡོམ་པ་ཉམས་པ་མེད་པ་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པའང་རྗེ་བླ་མ་ཉིད་ནས་གསུང་རྩོམ་འཕྲོ་ལུས་པ་རྨོངས་ཚིག་གིས་ཁ་འགེངས་ཤློ་ཀ་གཉིས་འཇམ་དབྱངས་ཆོས་ཀྱི་བློ་གྲོས་པས་ཞུས་སོ།། །། ༈

[edit]

'jam mgon bla mar bstod pa sh+lo ka mtshan bzang gi grangs ldan rnam par snang mdzad ces pa/__ rnaXm par snaXng mdzad chen po'i ye shes kyi/_/sgyu 'phrul ngaXg giX dbaXng phyugaX 'jig rten mig__/'gyur med bde chen rdo rjer byang chub pa/_/yon tan rgya mtshor 'char la gsol ba 'debs/_1__/mgon khyod gzod nas gzhi lam rnam mkhyen gyi/_/chos rnams kun gyi de nyid rab gzigs shing /_/sbyor bzhi'i rnal 'byor zab mo la brten nas/_/tshogs gnyis pha mthar son la gsol ba 'debs/_2__/de las spangs rtogs phrin las rdzogs pa'i zla/_/dmigs med chos sku'i mkha' la dgyes rol bzhin/_/grangs med gdul bya'i rdzing bur de snyed kyi/_/rnam 'phrul cir yang snang la=__3__/khyad par bod chen ldan gyi nor 'dzin gzhir/_/dpal ldan khyung po'i rigs kyi dga' tshal du/_/bsams bzhin thub bstan nyin mor mdzad pa'i slad/_/mtshan dpe'i dpag bsam 'khrungs la=__4__thog ma nyid nas rang bzhin dag pa'i khams/_/legs byas bdud rtsi'i rgyun gyis bskyed bsrings pas/_/sbyor ba'i don du tshad med snying rje sogs/_/rigs kyi me tog rgyas der gsol=__5__bai ro'i rnam 'phrul brtson 'grus mgon po yi/_/byang chub spyod pa'i dge mtshan sad pa las/_/'jig rten phan bde spel ba'i lam gyi srol/_/tshul bzhin khong du chud la=__6__skye bas thob pa'i rlabs chen mkhyen rab ni/_/'jam pa'i dbyangs dang gnyis su mi phyed kyang /_/ji snyed shes dang shes bya'i chos kun la/_/'jug pa'i thabs mkhas bzung der=__7__de tshe 'jam dpal rab dgyes kun shes pa'i/_/blo gros lang tsho dar babs yongs 'dzin mchog__/gtsor gyur ris med mkhas grub rgya mtsho yi/_/zhabs pad gus pas bsnyen la=__8__khyad par rigs dang dkyil 'khor rgya mtsho'i bdag__/rdo rje 'chang dngos pad+ma dbang chen gyi/_/sgrub brgyud snying po'i shing rta mtha' dag gi__/thugs kyi sras su gyur la=__9__gang las sgo gsum nyams 'gyur bai DUR+Yas/_/'dod dgu'i char 'bebs bzo gnas rig pa la/_/bi shwa karma'i khengs pa bsnyil byed pa'i/_/ngo mtshar snang ba rgyas la=__10__lus dang nad kyi mtshan nyid legs rtogs nas/_/gso ba'i tshul dang gang zag dang bcas pa'i/_/gzhung brgya 'chad la dpal ldan dpa' bo yi/_/rjes su zhabs pad bkod la gsol=__11__byings dang ming gi rang bzhin rkyen bdun dang /_/rnam 'gyur zung gis bsgrubs las sgra don mtha'/_/ji bzhin 'chad la tsAn+d+ra gau mI'i zhabs/_/ljongs 'dir mngon sum snang la gsol ba 'debs/_12__/gnas gsum gzhal bya tshad ma rnam gsum gyis/_/'khrul med gzhal nas sgrub dang sun 'byin pa'i/_/rig tshul kun la phyogs kyi glang po yi/_/rnam thar ngang gis bzung la=__13__tshig rgyan kun gyi phul gyur daN+Di ste/_/sdeb legs sbyor ba rin 'byung zhi ba'i dngos/_/ming tshig kun shes 'chi med seng ge yi/_/spobs pa mtha' dag bzung la=__14__phyi rol gtan 'bebs dus kyi 'khor lo dang /_/spor thang dbyangs kyi nges pa 'char ba'i gzhung /_/ma 'dres 'chad la rigs ldan 'jam pa'i dbyangs/_/gtsug na zla bar grags der gsol=__15__gzhan yang yid 'phrog zlos pa'i gar la sogs/_/bloX gteXr raXb dgaX'i rig gzhung rgya mtsho la/_/tshangaXs byungaX snyemaXs pa'iX rnam dpyod mthu grub pa'i/_/laXng tshoX'i zla snang gsal la gsol=__16__rgya chen shes bya'i ma mo mngon pa dang /_/gnang bkag sgrub pa'i gnas ston 'dul ba'i gzhung /_/'chad la dbyig gnyen shAkya yon tan 'od/_/gangs ri'i yul du shar la=__17__rnam gsum grub mtha'i spo nas zab rgyas dang /_/nges don dbu mar lta ba'i snying po'i lam/_/ji bzhin gzigs la klu sgrub yab sras dang /_/thogs med mkhyen pa brnyes la=__18__phyi rol bya dang ting 'dzin mnyam spyod dang /_/zab mo'i rnal 'byor gtsor bton rgyud sde'i gzhung /_/sangs rgyas gsang ba kun dga' snying po yi/_/bzhed srol 'khrul med mkhyen la=__19__khyad par nang gi rnal 'byor bla med pa'i/_/rgyud sde rgya mtsho 'chad dang spel ba la/_/dpal ldan gsaXng ba'i bdaXg po sgrolaX mgoXn zhabs/_/bsams bzhin srid par bzung la=__20__bye brag bskyed rdzogs sde gsum shing rta'i srol/_/sngon goms spobs pa'i phyag rgyas 'byed pa la/_/'gyur med grub pa mtsho skyes rdo rje'i zhabs/_/ngur smrig gar du zlos la=__21__de ltar phyi nang rig gzhung rgya mtsho la/_/gsan dang bsam pa'i sgro 'dogs legs chod nas/_/mthar gyis nyams su bzhes pa'i rnam thar la/_/sras bcas rgyal bas bsngags la=__22__dpal ldan kaXrmaX'i ring lugs las 'ongs pa'i/_/so thar gdams ngaXg bcas la dbaXng 'byor pas/_/brtan mkhas phan 'dogs yan lag yongs rdzogs pa/_/yoXn taXn rgyaX mtshoX'i gter la=__23__gzhan la phan dgongs bslab gzhi legs bzung nas/_/sdom dang chos sdud sems can don _byed pa'i/_/byang chub spyod dang skad cig mi 'bral ba/_/blo gros pha mtha' yas la=__24__gsang sngags rgyud sde rnam bzhi'i smin byed kyis/_/lus ngag gdul zhing thugs rgyud rab sbyangs pas/_/dngos kun lha dang ye shes mi phyed pa'i/_/khyab bdag bde ba'i rdo rjer gsol ba=__25__shin tu dben zhing nyams dga'i nags tshal du/_/bskyed rdzogs zab mo'i don la mnyam gzhag mthus/_/mchog thun grub pa rgya mtsho'i mthar son pas/_/pad+ma gar gyi dbang por gsol=__26__ting 'dzin phyag rgyas spobs pa'i gter mdzod grol/_/rtsa gsum rgya mtshos byin brlabs gzi byin skyed/_/rdo rje'i chos srung bran bzhin las sgrub pa'i/_/brtul zhugs spyod pa'i dbang por=__27__'chad mkhas zhal gyi grwa zur g.yo ba na/_/ma pham zhabs dang gnyis su mi phyed pas/_/gzur gnas glo gsal don gnyis mtha' yas pa'i/_/blo gros sgo brgya 'byed la=__28__rtsod ngag seng ge'i rgyud mang bsgrags pa'i mod/_/phas rgol lag ldan myos pa'i tshogs rnams kun/_/mi smra'i dam bca' byin la mgon khyod dang /_/chos kyi grags pa mtshungs la=__29__lhag par so skye'i blo yis bskrun min pa'i/_/rtsom phreng nam mkha' mdzod kyi gter brdol pas/_/nyams 'gyur bye bas rab mdzes zhi ba'i lha'i/_/bzod pa slar yang snyan der gsol=__30__lta ba ma 'khrul spyod pa shin tu btsun/_/rig dang brtse dang nus pa phul du son/_/shes dang shes bya ro gcig mngon gyur phyir/_/rnam thar mtshungs pa spangs la=__31__mdor na sras bcas rgyal ba'i ye shes sku/_/rigs kun khyab bdag dpal ldan 'jam pa'i dbyangs/_/theg mchog dge ba'i bshes kyi tshul bzung ba/_/skyabs gnas kun 'dus ngo bor gsol ba 'debs/32__/de ltar gsol ba btab pa'i byin rlabs kyis/_/bdag sogs tshe ring nad med chos bzhin spyod/_/yongs 'dzin bshes gnyen mchog gis rjes bzung nas/_/myur du byang chub go 'phang thob par shog__/deng nas bzung ste byang chub ma thob par/_/dpal ldan bla mas 'bral ba med pa ru/_/rjes bzung dbang dang byin rlabs kun stsol zhing /_/rim gnyis sdom pa nyams pa med pa nas/_/rdo rje 'chang gi go 'phang myur thob shog__/ces pa'ang rje bla ma nyid nas gsung rtsom 'phro lus pa rmongs tshig gis kha 'gengs sh+lo ka gnyis 'jam dbyangs chos kyi blo gros pas zhus so//___//_!_