JKW-KABUM-22-ZA-012-044

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 44, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

44 486-490	སྙིང་ཐིག་བསྟན་པ་འཛིན་པའི་མངའ་བདག་ཆེན་པོ་བརྒྱུད་པར་བཅས་པ་རྣམས་ལ་གསོལ་བ་འདེབས་པ་རྡོ་རྗེའི་ཐོལ་གླུ་ཟུང་འཇུག་འོད་གསལ་གཉུག་མའི་སྒྲ་དབྱངས། snying thig bstan pa 'dzin pa'i mnga' bdag chen po brgyud par bcas pa rnams la gsol ba 'debs pa rdo rje'i thol glu zung 'jug 'od gsal gnyug ma'i sgra dbyangs Seminal Essence Texts - snying thig   ·   Supplications - gsol 'debs   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྙིང་ཐིག་བསྟན་པ་འཛིན་པའི་མངའ་བདག་ཆེན་པོ་བརྒྱུད་པར་བཅས་པ་རྣམས་ལ་གསོལ་བ་འདེབས་པ་རྡོ་རྗེའི་ཐོལ་གླུ་ཟུང་འཇུག་འོད་གསལ་གཉུག་མའི་སྒྲ་དབྱངས། སྙིང་ཐིག་བསྟན་པ་འཛིན་པའི་མངའ་བདག་ཆེན་པོ་བརྒྱུད་པར་བཅས་པ་རྣམས་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཟུང་འཇུག་འོད་གསལ་གཉུག་མའི་སྒྲ་དབྱངས་ཞེས་བྱ་བ། ན་མ་ཛྙཱ་ན་གུ་རུ་བྷྱཿ ཡེ་གྲོལ་འགྱུར་མེད་རྡུལ་བྲལ་ཤེར་ཕྱིན་གྱི་ངོ་བོ། །ཡེ་ཤེས་ནང་གསལ་རྣམ་ཐར་གསུམ་ལྡན་གྱི་མཁའ་དབྱིངས། །ཡེ་ནས་འཕོ་འགྱུར་བྲལ་བའི་བདེ་སྟོང་གི་མཚན་དཔེ། །ཡེ་རྫོགས་ཀུན་བཟང་ཡབ་ཡུམ་སྙིང་དབུས་ནས་དྲན་བྱུང་། །ཀ་དག་རང་ངོར་གྲོལ་བར་བྱིན་གྱིས་རང་རློབས་ཤིག །ཚད་ཕེབས་བཀོད་པ་མཐར་ཕྱིན་ཕྱིར་གསལ་གྱི་རོལ་པ། །ཚད་མེད་ཡན་ལག་བདུན་ལྡན་ཁ་སྦྱོར་གྱི་དཀྱིལ་འཁོར། །ཚད་བཟུང་མུ་མཐའ་བྲལ་བའི་སྣང་སྟོང་གི་ངོ་བོ། །ཚད་མའི་སྟོན་པ་ལོངས་སྐུའི་སངས་རྒྱས་དེ་དྲན་བྱུང་། །ལྷུན་གྲུབ་འོད་སྐུར་གྲོལ་བར་བྱིན་གྱིས་རང་རློབས་ཤིག །དགའ་ཆེན་སྒྱུ་མར་རོལ་པའི་ཡེ་ཤེས་ཀྱི་ཀློང་ནས། །དགའ་ལྡན་ལྷ་བརྒྱའི་མགོན་དུ་ཞབས་པད་དུ་བཀོད་ཅིང་། །དགའ་བཞིའི་མྱུ་གུ་གསར་པ་འཛམ་གླིང་དུ་བསྒྱུར་བའི། །དགའ་རབ་དགྱེས་པ་རྡོ་རྗེ་སྙིང་དབུས་ནས་དྲན་བྱུང་། །ཟབ་མོའི་བསྟན་པ་འཛིན་པར་བྱིན་གྱིས་རང་རློབས་ཤིག །སྙིང་པོར་གྱུར་པའི་ངེས་གསང་འབྲས་བུ་ཡི་ཐེག་པ། །སྙིང་ནས་བསྒྲེང་བའི་ཐུགས་བསྐྱེད་རྨད་བྱུང་དང་ལྡན་ཅིང་། །སྙིང་ཏིག་སྡེ་གསུམ་བསྟན་པ་སྐལ་བཟང་ལ་སྤེལ་བའི། །སྙིང་རྗེའི་གཟུགས་སྐུ་མཉྫུ་མི་ཏྲ་དེ་དྲན་བྱུང་། །བླ་མེད་དོན་མཆོག་མཐོང་བར་བྱིན་གྱིས་རང་རློབས་ཤིག །དཔལ་ལྡན་རྒྱལ་བའི་སྒྱུ་འཕྲུལ་འགོགས་མེད་དུ་རྒྱུ་བས། །དཔལ་སྟུག་འདྲེན་པ་ཡོངས་ཀྱི་ཐུགས་རྗེ་ཡི་རོལ་པ། །དཔལ་མཆོག་འོད་གསལ་དྲྭ་བའི་འཁོར་ལོ་རུ་རོལ་པའི། །དཔལ་གྱི་སེང་གེར་གྲགས་པ་སྙིང་དབུས་ནས་དྲན་བྱུང་། །ཟབ་དོན་དགོངས་པ་རྟོགས་པར་བྱིན་གྱིས་རང་རློབས་ཤིག །རྣམ་བཅས་མཚན་མའི་ཆོས་ཀུན་ཟུང་འཇུག་ཏུ་ཐིམ་པས། །རྣམ་མང་མཁྱེན་པའི་གཏེར་མཛོད་རང་བྱུང་དུ་རྡོལ་ཅིང་། །རྣམ་དག་འཇའ་ལུས་རྡོ་རྗེའི་ཕྱག་རྒྱ་རུ་རོལ་པའི། །རྣལ་འབྱོར་ཛྙཱ་ན་སཱུ་ཏྲ་སྙིང་དབུས་ནས་དྲན་བྱུང་། །སྲིད་ཞི་དབྱེར་མེད་རྟོགས་པར་བྱིན་གྱིས་རང་རློབས་ཤིག །འོད་གསལ་འཕོ་བ་ཆེན་པོའི་ཡེ་ཤེས་སུ་སྨིན་པའི། །འོད་གསལ་རྫོགས་ཆེན་སྤེལ་ཕྱིར་གཟུགས་སྐུ་ཡི་སྒྱུ་འཕྲུལ། །འོད་གསལ་འཛིན་རྟོག་བྲལ་བའི་བདེ་ཆེན་གྱི་ལང་ཚོ། །འོད་གསལ་བི་མ་མི་ཏྲ་སྙིང་དབུས་ནས་དྲན་བྱུང་། །འཁོར་འདས་རང་སར་གྲོལ་བར་བྱིན་གྱིས་རང་རློབས་ཤིག །ཟག་མེད་འདུས་བྱས་བྲལ་བའི་སྣང་སྟོང་གི་ཡེ་ཤེས། །ཟག་བཅས་གདན་གསུམ་བྲལ་བའི་འཁོར་ལོ་རུ་བཞེངས་ཀྱང་། །ཟག་ཟད་མཁྱེན་བརྩེའི་ཡེ་ཤེས་མཁའ་མཐའ་རུ་གདལ་བའི། །ཟག་བྲལ་མཚོ་སྐྱེས་རྡོ་རྗེ་སྙིང་དབུས་ནས་དྲན་བྱུང་། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །རང་རིག་བརྗོད་པ་བྲལ་བའི་ཆོས་ཉིད་ཀྱི་ཀློང་ནས། །རང་སྣང་འགྲོ་བ་འདུལ་ཕྱིར་གཟུགས་སྐུ་ཡི་རོལ་པ། །རང་བྱུང་པདྨས་རྗེས་བཟུང་རྣལ་འབྱོར་གྱི་དབང་ཕྱུག །རང་གྲོལ་རྗེ་འབངས་ཉེར་ལྔ་སྙིང་དབུས་ནས་དྲན་བྱུང་། །ཚེ་འདིར་གྲུབ་མཐའ་རྙོག་པར་བྱིན་གྱིས་རང་རློབས་ཤིག །ཀློང་ལྔ་མི་ཤིགས་ཟབ་དོན་བདུད་རྩི་ལ་རོལ་པས། །ཀློང་ཡངས་འོད་གསལ་རྟོགས་པའི་ངོ་བོ་རུ་མྱོས་ཏེ། །ཀློང་གསལ་སྣང་བ་བརྡ་དང་དཔེ་ཆ་རུ་ཤར་བའི། །ཀློང་ཆེན་དྲི་མེད་འོད་ཟེར་སྙིང་དབུས་ནས་དྲན་བྱུང་། །དབང་བཞིའི་དོན་རྒྱུད་སྨིན་པར་བྱིན་གྱིས་རང་རློབས་ཤིག །ཀུན་ཏུ་སྤྲོས་བྲལ་ཆོས་སྐུའི་ངོ་བོ་ལས་མ་གཡོས། །ཀུན་སྣང་སྟོང་དང་སྙིང་རྗེ་ཟུང་འཇུག་གི་རོལ་པ། །ཀུན་ཁྱབ་སྤྲུལ་པའི་སྒྱུ་འཕྲུལ་དྲྭ་བ་རུ་བཞེངས་པའི། །ཀུན་མཁྱེན་འཇིགས་མེད་གླིང་པ་སྙིང་དབུས་ནས་དྲན་བྱུང་། །དགོངས་བརྒྱུད་འཕོ་བ་ཐོབ་པར་བྱིན་གྱིས་རང་རློབས་ཤིག །འཕོ་མེད་སྣང་སྟོང་ཟུང་འཇུག་གདན་གསུམ་གྱི་གཟུགས་སྐུ། །ཟག་མེད་གསང་སྔགས་འཁོར་ལོ་བདེན་གཉིས་ཀྱི་སྒྲ་དབྱངས། །སྤྲོས་མེད་གཉུག་མར་རོལ་པའི་བདེ་སྟོང་གི་ཡེ་ཤེས། །བླ་མེད་ཁྱབ་བདག་བླ་མ་སྙིང་དབུས་ནས་དྲན་བྱུང་། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རང་རློབས་ཤིག །ཨ་ཧོ། ཕུང་ཁམས་སྐྱེ་མཆེད་སྣང་སྟོང་སྒྱུ་འཕྲུལ་གྱི་དྲྭ་བ། །སྲོག་རྩོལ་རླུང་ཀུན་མཉམ་རོལ་ཟུང་འཇུག་གི་ངོ་བོ། །རྟོག་ཚོགས་གང་ཤར་སྐྱེ་འགག་མཐའ་གྲོལ་གྱི་ཡེ་ཤེས། །རྣལ་འབྱོར་གསུམ་གྱི་དངོས་གྲུབ་རང་ངོ་རུ་སྩོལ་ཤོག །སྒྲོན་དྲུག་ལམ་ནས་ཐོན་པའི་སྣང་བཞི་ཡི་རོལ་པར། །ཟག་བཅས་འཁྲུལ་པའི་ཆོས་རྣམས་མ་ལུས་ཀུན་ཐིམ་པས། །དངོས་སྣང་འོད་གསལ་ཆེན་པོའི་དྲྭ་བ་རུ་བསྡམས་པའི། །ཡིད་བྱེད་རྟོག་པ་བྲལ་བའི་དངོས་གྲུབ་དེ་སྩོལ་ཤོག །རྩ་ཁམས་དབུ་མར་ཐིམ་པའི་བདེ་སྟོང་གི་གཟུགས་སྐུ། །ཁམས་གཉིས་ནཱ་དར་བཅིངས་པའི་རྡོ་རྗེ་ཡི་གསུང་མཆོག །རླུང་སེམས་ཐིག་ལེར་མཉམ་སྦྱོར་འཕོ་མེད་ཀྱི་ཡེ་ཤེས། །སྒོ་གསུམ་འཁྲུལ་པ་ཟད་པར་བྱིན་གྱིས་རང་རློབས་ཤིག །གཞན་གནོད་གཞི་བཅས་སྤངས་པ་ཉན་ཐོས་ཀྱི་ཚུལ་ཁྲིམས། །གཞན་ཕན་ཡོངས་སུ་བསྒྲུབས་པ་བྱང་སེམས་ཀྱི་ལམ་མཆོག །གཉིས་ཀ་ཐབས་ཀྱིས་ཟིན་པ་གསང་སྔགས་ཀྱི་དམ་ཚིག །སྡོམ་གསུམ་ཉམས་མེད་བསྲུང་བར་བྱིན་གྱིས་རང་རློབས་ཤིག །དེ་སྐད་འབར་འཛག་བདུད་རྩིའི་ཐིག་ཕྲེང་གི་གཡོ་བས། །རླུང་སེམས་སྣང་བ་གཏད་མེད་རང་ངོ་རུ་གྲོལ་ཚེ། །གང་ཤར་གསོལ་བ་འདེབས་པའི་རྡོ་རྗེ་ཡི་ཐོལ་གླུས། །འགྲོ་རྣམས་དཔལ་ལྡན་བླ་མའི་གོང་འཕང་དེ་ཐོབ་ཤོག། །། ༈

[edit]

snying thig bstan pa 'dzin pa'i mnga' bdag chen po brgyud par bcas pa rnams la gsol ba 'debs pa rdo rje'i thol glu zung 'jug 'od gsal gnyug ma'i sgra dbyangs/__ snying thig bstan pa 'dzin pa'i mnga' bdag chen po brgyud par bcas pa rnams la gsol ba 'debs pa'i rdo rje'i thol glu zung 'jug 'od gsal gnyug ma'i sgra dbyangs zhes bya ba/__na ma dz+nyA na gu ru b+h+yaH__ye grol 'gyur med rdul bral sher phyin gyi ngo bo/__/ye shes nang gsal rnam thar gsum ldan gyi mkha' dbyings/__/ye nas 'pho 'gyur bral ba'i bde stong gi mtshan dpe/__/ye rdzogs kun bzang yab yum snying dbus nas dran byung /__/ka dag rang ngor grol bar byin gyis rang rlobs shig__/tshad phebs bkod pa mthar phyin phyir gsal gyi rol pa/__/tshad med yan lag bdun ldan kha sbyor gyi dkyil 'khor/__/tshad bzung mu mtha' bral ba'i snang stong gi ngo bo/__/tshad ma'i ston pa longs sku'i sangs rgyas de dran byung /__/lhun grub 'od skur grol bar byin gyis rang rlobs shig__/dga' chen sgyu mar rol pa'i ye shes kyi klong nas/__/dga' ldan lha brgya'i mgon du zhabs pad du bkod cing /__/dga' bzhi'i myu gu gsar pa 'dzam gling du bsgyur ba'i/__/dga' rab dgyes pa rdo rje snying dbus nas dran byung /_/zab mo'i bstan pa 'dzin par byin gyis rang rlobs shig__/snying por gyur pa'i nges gsang 'bras bu yi theg pa/__/snying nas bsgreng ba'i thugs bskyed rmad byung dang ldan cing /__/snying tig sde gsum bstan pa skal bzang la spel ba'i/__/snying rje'i gzugs sku many+dzu mi tra de dran byung /__/bla med don mchog mthong bar byin gyis rang rlobs shig__/dpal ldan rgyal ba'i sgyu 'phrul 'gogs med du rgyu bas/__/dpal stug 'dren pa yongs kyi thugs rje yi rol pa/__/dpal mchog 'od gsal drwa ba'i 'khor lo ru rol pa'i/__/dpal gyi seng ger grags pa snying dbus nas dran byung /__/zab don dgongs pa rtogs par byin gyis rang rlobs shig__/rnam bcas mtshan ma'i chos kun zung 'jug tu thim pas/__/rnam mang mkhyen pa'i gter mdzod rang byung du rdol cing /__/rnam dag 'ja' lus rdo rje'i phyag rgya ru rol pa'i/__/rnal 'byor dz+nyA na sU tra snying dbus nas dran byung /__/srid zhi dbyer med rtogs par byin gyis rang rlobs shig__/'od gsal 'pho ba chen po'i ye shes su smin pa'i/__/'od gsal rdzogs chen spel phyir gzugs sku yi sgyu 'phrul/__/'od gsal 'dzin rtog bral ba'i bde chen gyi lang tsho/__/'od gsal bi ma mi tra snying dbus nas dran byung /__/'khor 'das rang sar grol bar byin gyis rang rlobs shig__/zag med 'dus byas bral ba'i snang stong gi ye shes/__/zag bcas gdan gsum bral ba'i 'khor lo ru bzhengs kyang /__/zag zad mkhyen brtse'i ye shes mkha' mtha' ru gdal ba'i/__/zag bral mtsho skyes rdo rje snying dbus nas dran byung /__/don gnyis lhun gyis grub par byin gyis rang rlobs shig__/rang rig brjod pa bral ba'i chos nyid kyi klong nas/__/rang snang 'gro ba 'dul phyir gzugs sku yi rol pa/__/rang byung pad+mas rjes bzung rnal 'byor gyi dbang phyug__/rang grol rje 'bangs nyer lnga snying dbus nas dran byung /__/tshe 'dir grub mtha' rnyog par byin gyis rang rlobs shig__/klong lnga mi shigs zab don bdud rtsi la rol pas/__/klong yangs 'od gsal rtogs pa'i ngo bo ru myos te/__/klong gsal snang ba brda dang dpe cha ru shar ba'i/__/klong chen dri med 'od zer snying dbus nas dran byung /__/dbang bzhi'i don rgyud smin par byin gyis rang rlobs shig__/kun tu spros bral chos sku'i ngo bo las ma g.yos/__/kun snang stong dang snying rje zung 'jug gi rol pa/__/kun khyab sprul pa'i sgyu 'phrul drwa ba ru bzhengs pa'i/__/kun mkhyen 'jigs med gling pa snying dbus nas dran byung /__/dgongs brgyud 'pho ba thob par byin gyis rang rlobs shig__/'pho med snang stong zung 'jug gdan gsum gyi gzugs sku/__/zag med gsang sngags 'khor lo bden gnyis kyi sgra dbyangs/__/spros med gnyug mar rol pa'i bde stong gi ye shes/__/bla med khyab bdag bla ma snying dbus nas dran byung /__/thugs yid gcig tu 'dres par byin gyis rang rlobs shig__/a ho/__phung khams skye mched snang stong sgyu 'phrul gyi drwa ba/__/srog rtsol rlung kun mnyam rol zung 'jug gi ngo bo/__/rtog tshogs gang shar skye 'gag mtha' grol gyi ye shes/__/rnal 'byor gsum gyi dngos grub rang ngo ru stsol shog__/sgron drug lam nas thon pa'i snang bzhi yi rol par/__/zag bcas 'khrul pa'i chos rnams ma lus kun thim pas/__/dngos snang 'od gsal chen po'i drwa ba ru bsdams pa'i/__/yid byed rtog pa bral ba'i dngos grub de stsol shog__/rtsa khams dbu mar thim pa'i bde stong gi gzugs sku/__/khams gnyis nA dar bcings pa'i rdo rje yi gsung mchog__/rlung sems thig ler mnyam sbyor 'pho med kyi ye shes/__/sgo gsum 'khrul pa zad par byin gyis rang rlobs shig__/gzhan gnod gzhi bcas spangs pa nyan thos kyi tshul khrims/__/gzhan phan yongs su bsgrubs pa byang sems kyi lam mchog__/gnyis ka thabs kyis zin pa gsang sngags kyi dam tshig__/sdom gsum nyams med bsrung bar byin gyis rang rlobs shig__/de skad 'bar 'dzag bdud rtsi'i thig phreng gi g.yo bas/__/rlung sems snang ba gtad med rang ngo ru grol tshe/__/gang shar gsol ba 'debs pa'i rdo rje yi thol glus/__/'gro rnams dpal ldan bla ma'i gong 'phang de thob shog/___//__!_