JKW-KABUM-15-BA-022

🚧 This website is under continued development. We appreciate your patience!

Previous Section Back to Volume PageNext Section

གསང་སྤྱོད་མཁའ་འགྲོ་སྙན་བརྒྱུད་ཀྱི་བསྙེན་པའི་ཟིན་ཐོ།

Wylie title	gsang spyod mkha' 'gro snyan brgyud kyi bsnyen pa'i zin tho
Location	mkhyen brtse'i bka' 'bum Volume 15, sde tshan 22, Pages 417-422 (Folios 1a to 3b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཐང་སྟོང་རྒྱལ་པོ་ (thang stong rgyal po)
Citation	'jam dbyangs mkhyen brtse'i dbang po. gsang spyod mkha' 'gro snyan brgyud kyi bsnyen pa'i zin tho. In 'jam dbyangs mkhyen brtse'i dbang po'i bka' 'bum, Vol. 15: 417-422. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris
Cycle	གསང་སྤྱོད་མཁའ་འགྲོ་སྙན་བརྒྱུད་ (gsang spyod mkha' 'gro snyan brgyud)
Colophon	།ཞེས་པའང་མཉྫུ་གྷོ་ཥས་བརྗེད་བྱང་དུ་བྲིས་པ་དགེ། །མངྒ་ལཾ་བྷ་བ་ཏུ།
	zhes pa'ang many+dzu g+ho Shas brjed byang du bris pa dge/__/mang+ga laM b+ha ba tu/

1 Texts in this Section (sde tshan or chos tshan)

417-422	གསང་སྤྱོད་མཁའ་འགྲོའི་སྙན་བརྒྱུད་ཀྱི་བསྙེན་པའི་ཟིན་ཐོ། gsang spyod mkha' 'gro'i snyan brgyud kyi bsnyen pa'i zin tho Notes - zin bris   ·   Recitation Manual - bsnyen yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །གསང་སྤྱོད་མཁའ་འགྲོའི་སྙན་བརྒྱུད་ཀྱི་བསྙེན་པ་སོགས་ཀྱི་ཟིན་ཐོ་བཞུགས་སོ། །

ན་མོ་གུ་རུ་ཌཱ་ཀི་ནཱི་ཡེ། ཐོག་མར་སྐུ་ཕག་མོའི་བསྙན་པ་ནི། བྲིས་སྐུ་སོགས་ཀྱི་མདུན་འབུལ་གཏོར་དང་ཉེར་སྤྱོད་བཤམ། སྔོན་འགྲོ་སྤྱི་ལྟར་ལ། དངོས་གཞིར་སྐྱབས་སེམས་ཚོགས་བསགས་ནས་བཟླས་པའི་བར། བཟླས་པ་གྲོལ་ཁར་གཏོར་མ་གཉིས་འབུལ། དེ་ནས་འོད་གསལ་དུ་བསྡུ་ལྡང་བསྔོ་ཤིས་སོགས་བྱ། དེ་ལྟ་བུས་ཨོཾ་ཨཱཿཧཱུྃ་སོགས་འབུམ་ཕྲག་དང་། ཧ་རི་ནི་ས་ཁྲི་བཞི་བཟླའོ། །བསྙེན་པ་གྲོལ་ཁར་ཕྱི་རོལ་མཆོད་པ་ཞག་ཤས་གྲུབ་ན་ལེགས། གསུང་ཕཊ྄་བསྙེན་ཉིན་ཞག་རེར་ཐུན་དྲུག་གི་ཐུན་རེ་བཞིན་ཆོག་བསྒྲིགས་ལྟར་བླ་མ་མ་གཅིག་རང་ལ་བསྟིམ། མཉམ་པར་བཞག་པའི་བར་དཀྱུས་བཞིན། ལུས་གནད་བཅས། དུག་གསུམ་རླུང་འབུད་དམིགས་པ་བཅས་དམིགས་རྫོང་ནང་བཞིན། ཕཊ་སྐོར་ལྔ་འཕོ་རྒྱབ། དམིགས་རྫོང་ནས། ནམ་མཁའ་ཤིན་ཏུ་དྭངས་པའི་ངོས་ནས་སྤྲིན་དཀར་པོ་ཏོ་ལ་སྐྱེས་སུ་བྱུང་བ་ལྟར། ཞེས་པ་ནས། ཨོཾ་ཨཱཿཧཱུྃ། ལན་གསུམ་བར་དཀར་འགྱེད་བཞིན། འདི་གའི་བསྙེན་ཐབས་ནང་ནས་ཐུགས་ཀ་ནས་སྤྲོས་པའི་ལས་བྱེད་མཁའ་འགྲོ་མ་བསམ་གྱིས་མི་ཁྱབ་པས་འཁོར་འདས་ཀྱི་མགྲོན་སོ་སོར་བདུད་རྩི་འབུལ་པའི་ཕཊ྄་རེ་དང་འཛིན་པ་གཅོད་པའི་ཕཊ྄་རེ་ཟུང་བསྡེབ། གྲངས་བཟུང་བ་བརྒྱ་རྩ་གཅིག །ཐུན་རེ་སོང་རྗེས། ཆོས་རྣམས་ཐམས་ཅད་རྒྱུ་ལས་བྱུང་། །སོགས་བསྔོ་སྨོན་ཆོག་ཁྲིགས་ལྟར། ཞག་བདུན་ལ་ཐུན་ཞེ་གཉིས་བྱ། ཕཊ྄་སྒྲུབ་ནི་ཕཊ྄་ཆོས་ནང་བཞིན་ཐུན་གཅིག་གོ། །ཐུགས་ཡུམ་ཆེན་མོའི་བསྙེན་པར། སྟེགས་བུའི་ཁར་འབུལ་གཏོར་དཀར་ཟླུམ་པད་འདབ་བཞི་པ་བཤམ། ཉམས་ལེན་དངོས་བསྙེན་ཐབས་བཞིན་ལ། ཨོཾ་ཨཱཿཧྲཱིཿསོགས་འབུམ་ཕྲག་བདུན་ནམ་གཅིག །ཐུན་ཐམས་ཅད་མཐར་མཆོད་བསྟོད་དང་། དབྱངས་གསལ་ཚར་གསུམ། ཡིག་བརྒྱ་༣། མཆོད་བསྟོད། ཨ་བརྒྱ་རྩ། བསྔོ་སྨོན་སོགས་བྱ། གཏོར་མ་འབུལ། སྲོད་ཐུན་གྱི་མཇུག་ཏུ་ཤེར་སྙིང་བདུད་བཟློག་བཅས་ཚར་གསུམ་རེ་བྱའོ། །ཡོན་ཏན་མཁའ་འགྲོ་སྡེ་ལྔའི་བསྙེན་པར་ཟླུམ་གཏོར་པད་རྙིང་མ་དབུས་སུ་དཀར་པོ་ཆེ་བ། ཤར་སྔོ། ལྷོ་སེར། ནུབ་དམར། བྱང་ལྗང་། ཐེབ་ཀྱུས་བསྐོར་བ་དང་ཉེར་སྤྱོད་སོགས་བཤམ། སྒྲུབ་ཐབས་དངོས་གཞི་བསྙེན་ཐབས་ལྟར་ལ། རིགས་ལྔའི་བསྙེན་པ་རེ་རེ་ནས་འབུམ་ཕྲག་རེ་བཟླ། གཏོར་བསྔོ་བྱིན་རླབས་ནམ་མཁའ་སྒོ་འབྱེད་ལྟར་བྱ། འོད་གསལ་དུ་བསྡུ་ལྡང་དང་བསྔོ་སྨོན་སོགས་དཀྱུས་འགྲེའོ། །ཕྲིན་ལས་ཆོས་བདག་ཕག་ཞལ་ཅན་གྱི་བསྙེན་པར། གཏོར་མ་ཆོས་འབྱུང་བསྣོལ་མའི་སྟེང་དམར་གཏོར་ཟུར་གསུམ་རྩེ་མོར་ཕག་ཞལ་མཚན་པ་རྒྱན་ལྡན་བཤམ། དངོས་གཞི་ཐུན་བཞི་པ་ནས་མགོ་བརྩམས། ཉིན་ཞག་རེར་ཐུན་དྲུག་གི་ས་བཅད་ཙམ་ལས་ཐུན་མཚམས་ཆེར་མེད་པར་རྩེ་གཅིག་ཏུ་འབད། གཏོར་བསྔོ་ཚར་རེ་ནམ་ཕྱེད་ཀྱི་ཐུན་མཐར་བཏང་། གཏོར་མགྲོན་མི་བསྡུ་བར་བཀྲ་ལམ་མེར་བཞུགས་པར་བསམ། སྔགས་འབུམ་ཕྲག་གཅིག་ཁ་སྐོང་བཅས། དེ་རྗེས་ཀླུ་འདུལ་སྔགས། ནཱ་ག་དུ་སོགས་འབུམ་ཕྲག་གཅིག་གྲུབ་ན་ལེགས་སོ། །དེའང་ཟབ་ལམ་འདིའི་ཉམས་ལེན་ཚུལ་བཞིན་བྱེད་ན། ཐུན་མོང་དང་ཐུན་མོང་མ་ཡིན་པའི་སྔོན་འགྲོས་རྒྱུད་སྦྱངས། ཡུམ་ཆེན་མོའི་བསྙེན་པ། ཕཊྲ་བསྙེན་ཕག་མོ་རྣམས་རིམ་བཞིན་བཏང་རྗེས། རྫོགས་རིམ་རྡོ་རྗེ་གསུམ་གྱི་ཉམས་ལེན་ལ་གནད་དུ་བསྣུན། ཆོས་བདག་གི་བསྙེན་པ་བྱ། དྲོད་ཅུང་ཟད་ཐོབ་པ་ན། ཆུ་མིག་བརྒྱ་རྩ་དང་གཉན་ཁྲོད་འགྲིམ་པ་སོགས་ཀྱིས་རྟོགས་པ་བོགས་དབྱུང་སྟེ། མཁའ་འགྲོ་སྡེ་ལྔའི་བསྙེན་པ་མཐར་ཕྱིན་པས་ལས་ཚོགས་རབ་འབྱམས་ཀྱིས་རང་གཞན་གྱི་དོན་སྒྲུབ་པ་སོགས་ལ་འབད་ཅིང་། རྣམ་པ་ཀུན་ཏུ་ཟུང་འཇུག་བརྒྱུད་པ་བཞི་ལྡན་སྙིང་པོ་དོན་གྱི་མན་ངག་ཕྱག་རྒྱ་ཆེན་པོའི་ཉམས་ལེན་ལས་མ་གཡོས་བཞིན། མཆོག་དང་ཐུན་མོང་གི་དངོས་གྲུབ་སྒྲུབ་པའི་མངོན་རྟོགས་རྣམས་ཚུལ་བཞིན་དུ་ཉམས་སུ་བསྟར་བ་ནི་རྗེ་གྲུབ་ཐོབ་ཆེན་པོ་ནས་མཆོག་གཟིགས་ཀྱི་བརྒྱུད་པ་བར་མ་ཆད་པར་བྱོན་པའི་དམ་པ་རྣམས་ཀྱི་བཞེད་སྲོལ་བླ་ན་མེད་པའོ། །ཞེས་པའང་མཉྫུ་གྷོ་ཥས་བརྗེད་བྱང་དུ་བྲིས་པ་དགེ། །མངྒ་ལཾ་བྷ་བ་ཏུ། །

[edit]

gsang spyod mkha' 'gro snyan brgyud kyi bsnyen pa'i zin tho/ @#/__/gsang spyod mkha' 'gro'i snyan brgyud kyi bsnyen pa sogs kyi zin tho bzhugs so/__/ na mo gu ru DA ki nI ye/__thog mar sku phag mo'i bsnyan pa ni/__bris sku sogs kyi mdun 'bul gtor dang nyer spyod bsham/__sngon 'gro spyi ltar la/__dngos gzhir skyabs sems tshogs bsags nas bzlas pa'i bar/__bzlas pa grol khar gtor ma gnyis 'bul/__de nas 'od gsal du bsdu ldang bsngo shis sogs bya/__de lta bus oM AHhU~M sogs 'bum phrag dang /__ha ri ni sa khri bzhi bzla'o/__/bsnyen pa grol khar phyi rol mchod pa zhag shas grub na legs/__gsung phaTa? bsnyen nyin zhag rer thun drug gi thun re bzhin chog bsgrigs ltar bla ma ma gcig rang la bstim/__mnyam par bzhag pa'i bar dkyus bzhin/__lus gnad bcas/__dug gsum rlung 'bud dmigs pa bcas dmigs rdzong nang bzhin/__phaT skor lnga 'pho rgyab/__dmigs rdzong nas/__nam mkha' shin tu dwangs pa'i ngos nas sprin dkar po to la skyes su byung ba ltar/__zhes pa nas/__oM AHhU~M/__lan gsum bar dkar 'gyed bzhin/__'di ga'i bsnyen thabs nang nas thugs ka nas spros pa'i las byed mkha' 'gro ma bsam gyis mi khyab pas 'khor 'das kyi mgron so sor bdud rtsi 'bul pa'i phaTa? re dang 'dzin pa gcod pa'i phaTa? re zung bsdeb/__grangs bzung ba brgya rtsa gcig__/thun re song rjes/__chos rnams thams cad rgyu las byung /__/sogs bsngo smon chog khrigs ltar/__zhag bdun la thun zhe gnyis bya/__phaTa? sgrub ni phaTa? chos nang bzhin thun gcig go/__/thugs yum chen mo'i bsnyen par/__stegs bu'i khar 'bul gtor dkar zlum pad 'dab bzhi pa bsham/__nyams len dngos bsnyen thabs bzhin la/__oM AHhrIHsogs 'bum phrag bdun nam gcig__/thun thams cad mthar mchod bstod dang /__dbyangs gsal tshar gsum/__yig brgya 3/__mchod bstod/__a brgya rtsa/__bsngo smon sogs bya/__gtor ma 'bul/__srod thun gyi mjug tu sher snying bdud bzlog bcas tshar gsum re bya'o/__/yon tan mkha' 'gro sde lnga'i bsnyen par zlum gtor pad rnying ma dbus su dkar po che ba/__shar sngo/__lho ser/__nub dmar/__byang ljang /__theb kyus bskor ba dang nyer spyod sogs bsham/__sgrub thabs dngos gzhi bsnyen thabs ltar la/__rigs lnga'i bsnyen pa re re nas 'bum phrag re bzla/__gtor bsngo byin rlabs nam mkha' sgo 'byed ltar bya/__'od gsal du bsdu ldang dang bsngo smon sogs dkyus 'gre'o/__/phrin las chos bdag phag zhal can gyi bsnyen par/__gtor ma chos 'byung bsnol ma'i steng dmar gtor zur gsum rtse mor phag zhal mtshan pa rgyan ldan bsham/__dngos gzhi thun bzhi pa nas mgo brtsams/__nyin zhag rer thun drug gi sa bcad tsam las thun mtshams cher med par rtse gcig tu 'bad/__gtor bsngo tshar re nam phyed kyi thun mthar btang /__gtor mgron mi bsdu bar bkra lam mer bzhugs par bsam/__sngags 'bum phrag gcig kha skong bcas/__de rjes klu 'dul sngags/__nA ga du sogs 'bum phrag gcig grub na legs so/__/de'ang zab lam 'di'i nyams len tshul bzhin byed na/__thun mong dang thun mong ma yin pa'i sngon 'gros rgyud sbyangs/__yum chen mo'i bsnyen pa/__phaT+ra bsnyen phag mo rnams rim bzhin btang rjes/__rdzogs rim rdo rje gsum gyi nyams len la gnad du bsnun/__chos bdag gi bsnyen pa bya/__drod cung zad thob pa na/__chu mig brgya rtsa dang gnyan khrod 'grim pa sogs kyis rtogs pa bogs dbyung ste/__mkha' 'gro sde lnga'i bsnyen pa mthar phyin pas las tshogs rab 'byams kyis rang gzhan gyi don sgrub pa sogs la 'bad cing /__rnam pa kun tu zung 'jug brgyud pa bzhi ldan snying po don gyi man ngag phyag rgya chen po'i nyams len las ma g.yos bzhin/__mchog dang thun mong gi dngos grub sgrub pa'i mngon rtogs rnams tshul bzhin du nyams su bstar ba ni rje grub thob chen po nas mchog gzigs kyi brgyud pa bar ma chad par byon pa'i dam pa rnams kyi bzhed srol bla na med pa'o/__/zhes pa'ang many+dzu g+ho Shas brjed byang du bris pa dge/__/mang+ga laM b+ha ba tu/__/__