JKW-KABUM-08-NYA-007-003

🚧 This website is under continued development. We appreciate your patience!

Previous Text Back to Volume PageNext Text

ཞར་ལ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་པ།

Wylie title	zhar la bsnyen pa byed tshul gyi lag len cung zad bshad pa
Location	mkhyen brtse'i bka' 'bum Volume 8, sde tshan 7, Text 3, Pages 127-130 (Folios 10a4 to 11b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ཚེམ་བུ་པ་ (Kantalipa)
Citation	'jam dbyangs mkhyen brtse'i dbang po. zhar la bsnyen pa byed tshul gyi lag len cung zad bshad pa. In 'jam dbyangs mkhyen brtse'i dbang po'i bka' 'bum, Vol. 8: 127-130. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig
Cycle	ཐུགས་ཆེན་དམར་ཁྲིད་ཚེམ་བུ་ལུགས་ (thugs chen dmar khrid tshem bu lugs)
Deity	thugs rje chen po

1 Texts in this Section (sde tshan or chos tshan)

3 127-130	ཞར་ལ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་པ། zhar la bsnyen pa byed tshul gyi lag len cung zad bshad pa Recitation Manual - bsnyen yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཞར་ལ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་ན། གནས་དབེན་ཞིང་རང་དབང་འདུས་པའི་སར་ཟླ་བ་གང་ཡང་རུང་བའི་མར་ངོའི་གཟའ་སྐར་སྦྱོར་བྱེད་ཤིས་པའི་སྔ་དྲོ་གནས་ཁང་ཕྱག་དར་བྱ། ཐུགས་རྗེ་ཆེན་པོའི་སྐུ་བྲིས་འབུར་ཇི་ལྟར་རིགས་པའི་མདུན་འབུལ་གཏོར་དཀར་ཟླུམ་དང་། ཆུ་གཉིས་སྔོན་འགྲོའི་ཉེར་སྤྱོད་སོགས་དགོས་པའི་ཡོ་བྱད་རྣམས་འདུ་བྱ། ཕྱི་དྲོའི་ཚེ་ཆ་གསུམ་ཡིད་ཆེས་པ་གཏང་། གྲུབ་ན་རྒྱལ་ཆེན་ཐོ་འཛུ གས་རྨོར་ཆེན་གྱིས་མཛད་པ་ལྟར་བྱ། གང་ལྟར་ཡང་སྒོ་དྲུང་དུ་ཐོ་བརྟན་པོར་གཟུགས། ནང་དུ་ལོགས་ལ། བརྒྱུད་འདེབས་ཡན་སྔར་ལྟར་ལ། གནས་དང་ཡོ་བྱད་རྣམས་ཨམྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་གནས་ཁང་བྷྲཱུྃ་ལས་ཐར་པ་ཆེན་པོའི་གཞལ་ཡས་ཁང་གི་དབུས་སུ་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བར་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་དང་། དྷརྨཱ་ར་ཎི་ཏས་བྱིན་དབབ། སྐྱབས་འགྲོ་ནས། སླར་ཡང་རང་སྐད་ཅིག་གིས་ཐུགས་རྗེ་ཆེན་པོའི་སྐུར་གྱུར། ཅེས་པའི་བར་སྔར་བཞིན་ལ། དེ་ནས་གཏོར་མ། ཨ་མྲྀ་ཏས་བས ང་། སྭ་བྷཱ་ཝས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཞུ་བ་ལས་བྱུང་བའི་གཏོར་མ་ལྷའི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། རང་གི་སྙིང་ག་ནས་འོད་ཟེར་འཕྲོས་པས་ལྷོ་ཕྱོགས་པོ་ཏ་ལ་ནས་འཕགས་པ་སྤྱན་རས་གཟིགས་དབང་ཕྱུག་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ པདྨ་ཀ་མ་ལཱ་ཡ་སྟཱཾ་གྱིས་གདན་དབུལ། ལྗགས་རྡོ་རྗེའི་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམས་ལ། ནམ་མཁའ་མཛོད་ཀྱི་ཕྱག་རྒྱ་དང་། ཨོཾ་ཨཱཪྻ་ཨ་ཝ་ལོ་ཀི་ཏེ་ཤྭ་ར་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་དབུལ། མཚན་སྔགས་དེ་ཉིད་ཀྱི་མཐར། ཨརྒྷཾ་ནས། ཤབྡའི་བར་སྦྱར་བས་མཆོད། སྐྱོན་གྱིས་མ་གོས་སོགས་ཀྱིས་བསྟོད། ཇོ་བོ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བདག་དང་སེམས་ཅན་ཐམས་ཅད་ལ་བྱམས་པ་དང་། སྙིང་རྗེ། བྱང་ཆུབ་ཀྱི་སེམས་བཅོས་མ་མ་ཡིན་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། མྱུར་དུ་རྗེ་བཙུན་སྤྱན་རས་གཟིགས་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་འདོད་དོན་གསོལ། གཏོར་མ་གཉིས་པ་གཏོང་བར་སྤྲོ་ན་མཁའ་འགྲོ་སྤྱི་གཏོར་གྱི་ཆོ་གས་གཏང་། ཡི་གེ་བརྒྱ་བ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། རྟེན་ཡོད་ན་བརྟན་བཞུགས་དང་། མེད་ན། ཨོཾ་ཁྱེད་ཀྱིས་སེམས་ཅན་དོན་ཀུན་མཛད་སོགས་ཀྱི་མཐར། བཛྲ་མུཿས། གཏོར་མགྲོན་གྱི་ཡེ་ཤེས་པ་གཤེགས། རང་གི་དཔྲལ་བར་ཨོཾ་དཀར་པོ་སོགས་གནས་གསུམ་བསྲུང་། བསྔོ་སྨོན་བཀྲ་ཤིས་བྱ། སླར་སྲོད་ཐུན་ལ་སྐྱབས་འགྲོ་ནས་བཟུང་སྟེ་བསྐྱེད་རིམ་འོད་གསལ་དུ་བསྡུ་བའི་བར་བདག་བསྐྱེད་བཞིན་ཉམས་སུ་བླངས་ལ་ཉལ་ལུགས་རྣམ་གཉིས་གང་རུང་གིས་ཉལ། ཐོ་རངས་ལྡང་བའི་རྣལ་འབྱོར་ཀྱིས་ལྡངས་ལ། སྲོད་ཐུན་གྱི་མཇུག་གི་བསྔོ་སྨོན་ཤིས་བརྗོད་སོགས་བྱ། སླར་ཐོར་ཐུན་ལ་བརྒྱུད་འདེབས་དང་སྐྱབས་འགྲོ་ནས་བཟུང་བསྔོ་སྨོན་བར་བྱས་ལ་ཉི་ཤར་ཙམ་ལ་གྲོལ། གཏོར་མ་བརྒྱ་རྩ་སོགས་བྱ། གུང་ཐུན་ལའང་སྐྱབས་འགྲོ་ནས་བསྔོ་སྨོན་བར་བྱས་ལ་ཉིན་གུང་མ་ཟིན་ཙམ་ལ་གྲོལ་ནས་ཟས་ཀྱི་རྣལ་འབྱོར་སོགས་ལ་འཇུག །དགོང་ཐུན་གྱི་ཐོག་མར་བརྒྱུད་འདེབས་དང་། གནས་ཡོ་བྱིན་རླབས། མཇུག་ཏུ་གཏོར་མ་འབུལ་བ་སོགས་བཤད་མ་ཐག་པ་ལྟར་བྱ། དེ་ནས་སྲོད་ཐུན་ལ་འཇུག་པ་སྟེ་ཐུན་བཞིའི་ཚུལ་གྱིས་ཉམས་སུ་བླང་། མཚན་མེད་ཀྱི་རྫོགས་རིམ་ནི་ཐུན་ཐམས་ཅད་ཀྱི་མཇུག་ཏུ་བསྒོམ་ཞིང་། མཚན་བཅས་རྡོ་རྗེའི་བཟླས་པ་དང་། འཕོ་བའི་རྣལ་འབྱོར་ཀྱང་ཐུན་གཉིས་ཙམ་གྱི་མཇུག་ཏུ་མ་ཆག་པར་བྱ། དེའང་བསྙེན་པ་ཡུན་རིང་དུ་བྱེད་ན། སྔོན་འགྲོ་སྐྱབས་འགྲོ། ཡིག་བརྒྱ། མཎྜལ་རྣམས་འབུམ་ཐེར་རེའམ། རྟགས་མ་བྱུང་བར་དུ་འབད། དེ་དག་གི་སྐབས་དངོས་གཞི་རྣམས་ཐུན་གྲོལ་ཁར་མ་ཆག་ཙམ་བྱ། བསྙེན་པ་ཟླ་བ་གཅིག་ཏུ་བྱེད་ན་སྔོན་འགྲོ་གསུམ་ཞག་རེ་གཏོང་བས་མཚོན་རིགས་འགྲེ། དངོས་གཞིའི་བསྙེན་པའི་གྲངས་ཚད་ནི་འབུམ་ཕྲག་ཉི་ཤུ་རྩ་བཞི་ཡིན་ལ། གཞན་མཚན་མ་ཐོབ་པ་སོགས་ཀྱི་བར་དུ་བཟླ། མཚམས་གྲོལ་བ་ནི་ཡར་ངོའི་སྔ་ཐུན་གྱི་འཇུག་ཏུ་གྲོལ། སྦྱིན་སྲེག་བྱེད་ན་འདི་ཉིད་ཀྱི་སྦྱིན་སྲེག་འཇམ་མགོན་ཀུན་དགའ་བློ་གྲོས་ཀྱིས་མཛད་པའམ། མཁན་ཆེན་སངས་རྒྱས་ཕུན་ཚོགས་པའི་ཐུགས་རྗེ་ཆེན་པོ་ལྷ་གསུམ་པའི་སྦྱིན་སྲེག་ལྷ་བསྐྱེད་ཁ་བསྒྱུར་ཏེ་བཅུ་ཆ་སོགས་ཇི་ཙམ་ནུས་པ་དབུལ་ལོ། །མ་གྲུབ་ན་སྔགས་ཀྱི་ལྷག་ཆད་ཁ་སྐོང་བའི་ཆེད་དུ་དམིགས་ཏེ་ཡི་གེ་བརྒྱ་པ་སྔགས་ཀྱི་བཅུ་ཆ་བཟླས་པས་ཀྱང་རུང་གསུངས། གཞན་ཐུན་དངོས་དང་ཐུན་སྐབས་ཀྱི་བྱ་བ་སོགས་ཞིབ་པར་བསྙེན་ཡིག་སྤྱི་འགྲོ་ལྟར་ཤེས་པར་བྱ།། །།

[edit]

zhar la bsnyen pa byed tshul gyi lag len cung zad bshad pa/ zhar la bsnyen pa byed tshul gyi lag len cung zad bshad na/__gnas dben zhing rang dbang 'dus pa'i sar zla ba gang yang rung ba'i mar ngo'i gza' skar sbyor byed shis pa'i snga dro gnas khang phyag dar bya/__thugs rje chen po'i sku bris 'bur ji ltar rigs pa'i mdun 'bul gtor dkar zlum dang /__chu gnyis sngon 'gro'i nyer spyod sogs dgos pa'i yo byad rnams 'du bya/__phyi dro'i tshe cha gsum yid ches pa gtang /__grub na rgyal chen tho 'dzu_gas rmor chen gyis mdzad pa ltar bya/__gang ltar yang sgo drung du tho brtan por gzugs/__nang du logs la/__brgyud 'debs yan sngar ltar la/__gnas dang yo byad rnams amr-i tas bsang /__swa b+hA was sbyang /__stong pa'i ngang las gnas khang b+h+rU~M las thar pa chen po'i gzhal yas khang gi dbus su oM las byung ba'i rin po che las grub pa'i snod yangs shing rgya che bar oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri chab/__zhal zas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shab+da'i bar dang /__d+harmA ra Ni tas byin dbab/__skyabs 'gro nas/__slar yang rang skad cig gis thugs rje chen po'i skur gyur/__ces pa'i bar sngar bzhin la/__de nas gtor ma/__a mr-i tas bas_nga /__swa b+hA was sbyang /__stong pa'i ngang las rin po che las grub pa'i snod yangs shing rgya che ba'i nang du oM zhu ba las byung ba'i gtor ma lha'i bdud rtsi kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M/__lan gsum/__rang gi snying ga nas 'od zer 'phros pas lho phyogs po ta la nas 'phags pa spyan ras gzigs dbang phyug la sangs rgyas dang byang chub sems dpa'i tshogs kyis bskor ba oM badz+ra sa mA dzaH__dzaHhU~M ba~M hoH__pad+ma ka ma lA ya stAM gyis gdan dbul/__ljags rdo rje'i 'od zer gyi sbu gus gtor ma'i bcud drangs te gsol bar bsams la/__nam mkha' mdzod kyi phyag rgya dang /__oM AR+Ya a wa lo ki te shwa ra sa pa ri wA ra oM a kA ro sogs lan gsum gyis dbul/__mtshan sngags de nyid kyi mthar/__ar+g+haM nas/__shab+da'i bar sbyar bas mchod/__skyon gyis ma gos sogs kyis bstod/__jo bo thugs rje chen po 'phags pa spyan ras gzigs dbang phyug gis bdag dang sems can thams cad la byams pa dang /__snying rje/__byang chub kyi sems bcos ma ma yin pa rgyud la skye bar byin gyis brlab tu gsol/__myur du rje btsun spyan ras gzigs kyi go 'phang thob par byin gyis brlab tu gsol/__zhes 'dod don gsol/__gtor ma gnyis pa gtong bar spro na mkha' 'gro spyi gtor gyi cho gas gtang /__yi ge brgya ba lan gsum dang /__ma 'byor pa dang sogs kyis nongs pa bzod par gsol/__rten yod na brtan bzhugs dang /__med na/__oM khyed kyis sems can don kun mdzad sogs kyi mthar/__badz+ra muHsa/__gtor mgron gyi ye shes pa gshegs/__rang gi dpral bar oM dkar po sogs gnas gsum bsrung /__bsngo smon bkra shis bya/__slar srod thun la skyabs 'gro nas bzung ste bskyed rim 'od gsal du bsdu ba'i bar bdag bskyed bzhin nyams su blangs la nyal lugs rnam gnyis gang rung gis nyal/__tho rangs ldang ba'i rnal 'byor kyis ldangs la/__srod thun gyi mjug gi bsngo smon shis brjod sogs bya/__slar thor thun la brgyud 'debs dang skyabs 'gro nas bzung bsngo smon bar byas la nyi shar tsam la grol/__gtor ma brgya rtsa sogs bya/__gung thun la'ang skyabs 'gro nas bsngo smon bar byas la nyin gung ma zin tsam la grol nas zas kyi rnal 'byor sogs la 'jug__/dgong thun gyi thog mar brgyud 'debs dang /__gnas yo byin rlabs/__mjug tu gtor ma 'bul ba sogs bshad ma thag pa ltar bya/__de nas srod thun la 'jug pa ste thun bzhi'i tshul gyis nyams su blang /__mtshan med kyi rdzogs rim ni thun thams cad kyi mjug tu bsgom zhing /__mtshan bcas rdo rje'i bzlas pa dang /__'pho ba'i rnal 'byor kyang thun gnyis tsam gyi mjug tu ma chag par bya/__de'ang bsnyen pa yun ring du byed na/__sngon 'gro skyabs 'gro/__yig brgya/__maN+Dal rnams 'bum ther re'am/__rtags ma byung bar du 'bad/__de dag gi skabs dngos gzhi rnams thun grol khar ma chag tsam bya/__bsnyen pa zla ba gcig tu byed na sngon 'gro gsum zhag re gtong bas mtshon rigs 'gre/__dngos gzhi'i bsnyen pa'i grangs tshad ni 'bum phrag nyi shu rtsa bzhi yin la/__gzhan mtshan ma thob pa sogs kyi bar du bzla/__mtshams grol ba ni yar ngo'i snga thun gyi 'jug tu grol/__sbyin sreg byed na 'di nyid kyi sbyin sreg 'jam mgon kun dga' blo gros kyis mdzad pa'am/__mkhan chen sangs rgyas phun tshogs pa'i thugs rje chen po lha gsum pa'i sbyin sreg lha bskyed kha bsgyur te bcu cha sogs ji tsam nus pa dbul lo/_/ma grub na sngags kyi lhag chad kha skong ba'i ched du dmigs te yi ge brgya pa sngags kyi bcu cha bzlas pas kyang rung gsungs/__gzhan thun dngos dang thun skabs kyi bya ba sogs zhib par bsnyen yig spyi 'gro ltar shes par bya//__//