JKW-KABUM-17-TSA-003-009

🚧 This website is under continued development. We appreciate your patience!

Previous Text Back to Volume PageNext Text

ཐུགས་སྒྲུབ་བར་ཆད་ཀུན་སེལ་གྱི་བྲིས་སྐུའི་འབྲི་ཡིག་བཀྲ་ཤིས་ནོར་བུའི་མེ་ལོང་།

Wylie title	thugs sgrub bar chad kun sel gyi bris sku'i 'bri yig bkra shis nor bu'i me long
Location	mkhyen brtse'i bka' 'bum Volume 17, sde tshan 3, Text 9, Pages 530-548 (Folios 44b3 to 53b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. thugs sgrub bar chad kun sel gyi bris sku'i 'bri yig bkra shis nor bu'i me long. In 'jam dbyangs mkhyen brtse'i dbang po'i bka' 'bum, Vol. 17: 530-548. Khams sde dge rdzong sar dgon: Rdzong sar blo gros phun tshogs, 2020.
Genre	Art - rtsom rig / ri mo / bris cha  ·  Guides to Paintings - bri yig
Cycle	བླ་མའི་ཐུགས་སྒྲུབ་བར་ཆད་ཀུན་ (bla ma'i thugs sgrub bar chad kun sel)
Colophon	།ཞེས་པའང་ཟབ་གཏེར་ལས་བྱུང་ཞལ་གདམས་ཡན་ལག་དང་བཅས་པ་གཞིར་བཞག །དེར་མི་གསལ་བ་རྣམས་བྲིས་རྒྱུན་ཚད་ལྡན་གྱི་རྗེས་སུ་འབྲངས་ཏེ་མཉྫུ་གྷོ་ཥས་ཟིན་བྲིས་སུ་བསྟར་བ། སརྦ་དཱ་ཤྲེ་ཡོ་བྷ་བ་ཏུ།།
	zhes pa'ang zab gter las byung zhal gdams yan lag dang bcas pa gzhir bzhag__/der mi gsal ba rnams bris rgyun tshad ldan gyi rjes su 'brangs te many+dzu g+ho Shas zin bris su bstar ba/__sarba dA shre yo b+ha ba tu

1 Texts in this Section (sde tshan or chos tshan)

9 530-548	ཐུགས་སྒྲུབ་བར་ཆད་ཀུན་སེལ་གྱི་བྲིས་སྐུའི་འབྲི་ཡིག་བཀྲ་ཤིས་ནོར་བུའི་མེ་ལོང་། thugs sgrub bar chad kun sel gyi bris sku'i 'bri yig bkra shis nor bu'i me long Art - rtsom rig / ri mo / bris cha   ·   Guides to Paintings - bri yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐུགས་སྒྲུབ་བར་ཆད་ཀུན་སེལ་གྱི་བྲིས་སྐུའི་འབྲི་ཡིག་བཀྲ་ཤིས་ནོར་བུའི་མེ་ལོང་ཞེས་བྱ་བ་བཞུགས་སོ། །ཨོཾ་སྭ་སྟི། དུས་གསུམ་མཁྱེན་པ་ཨོ་རྒྱན་ཆེན་པོའི་ཐུགས་བཅུད་བོད་ཡུལ་ས་འོག་ཀུན་གྱི་གཏེར་གཅིག །བླ་མའི་ཐུགས་སྒྲུབ་བར་ཆད་ཀུན་སེལ་གྱི་རྩ་བའི་དཀྱིལ་འཁོར་པ་རྣམས་གཙོ་བོར་གྱུར་པའི་རྩ་གསུམ་ཆོས་སྲུང་དང་བཅས་པའི་དམ་ཚིག་གི་བྲིས་སྐུ་ཇི་ལྟར་འབྲི་བའི་བཀོད་པ་ལ། ༡ ཐོག་མར་དབུས་སུ་གཙོ་བོ་ནི་སྣང་སྲིད་ཟིལ་གནོན་སྤྲུལ་སྐུ་པདྨ་འབྱུང་གནས་ཏེ། དེ་ཡང་སེང་གེས་བཏེགས་པའི་རིན་པོ་ཆེའི་ཁྲི། དེ་སྟེང་སྣ་ཚོགས་པདྨ། ཉི་མ། ཟླ་བ་རྣམས་རིམ་པར་བརྩེགས་པའི་གདན་གྱི་སྟེང་དུ། གུ་རུ་རིན་པོ་ཆེ་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས། ཞི་ཞིང་འཛུམ་ལ་ཅུང་ཟད་ཁྲོས་པའི་ཉམས་ཅན། སྐུ་འགྱིང་བའི་ཉམས་ཀྱིས་ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ནམ་མཁར་འཕྱར་ཐབས་སུ་འཛིན་པ། གཡོན་བརླ་གཡོན་པའི་སྟེང་མཉམ་གཞག་གི་ཕྱག་རྒྱས་ཐོད་པ་དུམ་བུ་གསུམ་པ་བདུད་རྩི་དཀར་ལ་དམར་མདངས་ཆགས་པས་གང་བའི་དབུས་སུ་གསེར་གྱི་བུམ་པ་ནོར་བུའི་བརྒྱན་པ་དང་། གྲུ་མོ་གཡོན་དུ་ཁ་ཊྭཱྃ་རྩེ་གསུམ། ཐོད་པ་སྐམ་རློན་རྙིང་གསུམ་བརྩེགས་པ་དར་དཔྱངས་ཌཱ་རུ་དྲིལ་གཡེར་གྱིས་མཚན་པ་བསྣམས་པ། ན་བཟའ་ནང་དུ་གསང་གོས་དཀར་པོ། དེ་སྟེང་ཕོད་ཀ་སྔོ་ནག་ལ་སྤྲིན་ཁྲའམ་གསེར་རིས་དང་། སྟོད་དུ་བབ་ལེ་གཞི་སེར་པོ་སྤྲིན་ཁྲ་སུམ་མདངས་ཅན། སྐུ་སྨད་ཤམས་ཐབས་ལེའུ་མ་དམར་ཆེན་སྐུ་རགས་ལྗང་སེར་གྱིས་བཅིངས་པ། ཆོས་གོས་དམར་སེར་གསེར་གྱི་ཧ་ཚོན་ཅན་གྱི་སྟེང་དུ་ཟབ་བེར་དམར་སྨུག་ལྷུབ་གྱོན་མཛད་པ། དབུ་ཞྭ་འདབ་ལྡན་རིགས་ལྔའམ་པདྨ་མཐོང་གྲོལ་འཇའ་སུམ་བསྒྲིགས་མ་རྒོད་ལྡེམ་མེ་ལོང་དར་དཔྱངས་སོགས་ཀྱིས་བརྒྱན་པ་སྟེ། དོན་ཏུ་དེང་སང་བྲིས་རྒྱུན་ཡོངས་གྲགས་ཀཿཐོག་རིག་འཛིན་ཆེན་མོའི་དག་སྣང་མཚན་བརྒྱད་དང་བསམ་ལྷུན་གྱི་གཙོ་བོའི་དབུ་ཞྭ་ཇི་ལྟ་བ། མགུལ་རྒྱན། སྙན་རྒྱན། ཕྱག་གདུབ་རྣམས་གསེར་གྱི་གཞི་ལ་རིན་པོ་ཆེའི་ཕྲས་བཏབ་པ། ཞབས་གཡས་པུས་མོ་ཅུང་ཟད་བསླང་བའི་ཉམས་ལ། གཡོན་སྐྱིལ་ཀྲུང་རྒྱལ་པོ་རོལ་སྟབས་ཅན། སག་ལྷྭམ་གཞི་ལྗང་གུ་འཇའ་རིས་ཅན་མནབ་པ། ༢ །དེའི་དབུ་གཙུག་འཇའ་ཟེར་གྱི་ཀློང་དུ་པདྨ་དཀར་པོ་སྡོང་བུ་དང་བཅས་པའི་སྟེང་དུ་ཉི་ཟླའི་གདན་ལ་ལོངས་སྐུ་ཐུགས་རྗེ་ཆེན་པོ་དཀར་པོ་རྒྱལ་པོ་ལུགས་འགྲོ་འདུལ་ཕྱག་བཞི་པ་སྤྱི་འགྲེ། འདི་ལ་རི་དྭགས་པགས་པས་ནུ་གཡོན་བཀབ་པ་མ་ཆད་པ་དགོས། ༣ །དེའི་དབུ་གཙུག་ཏུ་འཇའ་ཟེར་ཀློང་དུ་པད་མ་དཀར་པོ་དང་ཟླ་བའི་གདན་ལ་ཆོས་སྐུ་སྣང་མཐའ་ཚེ་དཔག་མེད་དམར་པོ་ཕྱག་མཉམ་གཞག་སྟེང་གསེར་གྱི་བུམ་པ་དཔག་བསམ་ཤིང་གིས་ཁ་བརྒྱན་པ་བསྣམས་པ། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། སྐ་རགས། དོ་ཤལ། སེ་མོ་དོ་སྟེ་རྒྱན་བརྒྱད་ཀྱིས་སྤྲས་ཤིང་། དར་དམར་པོའི་སྟོད་གཡོགས། ཁ་དོག་སྣ་ཚོགས་པའི་སྨད་དཀྲིས་ཀྱི་སྟེང་དུ་སྨད་གཡོགས་སྔོ་དམར། ༤ །དེ་ནས་གཙོ་བོའི་མདུན་གཡོན་གུ་རུ་རྒྱལ་བའི་གདུང་འཛིན། སྐུ་མདོག་དཀར་ལ་དམར་ཤས་ཆེ་བའི་མདངས་ཅན། ཞལ་ཅུང་ཟད་གདངས་པས་ཚེམས་དང་མཆེ་བ་གསལ་བའི་རྣམ་པ་ཅན་ཁྲོ་ཞིང་འཛུམ་ལ་ཆགས་ཉམས་རྒྱས་པ། སྤྱན་ཧུར་བག་གི་རྣམ་པས་ལྟ་སྟངས་ནམ་མཁར་གཟིགས་པ། སྐུ་འགྱིང་བག་དང་བཅས་པས་གཡས་རལ་གྲི་ནམ་མཁར་འཕྱར་ཞིང་། གཡོན་པདྨའི་ལྕགས་ཀྱུ་གདེངས་ཤིང་འདེབས་པའི་རྣམ་པ་ཅན་དབུ་སྐྲ་ནག་པོ་ཐོར་ཅོག་དར་སྔོན་པོས་བཅིངས་པ། སྐུ་གཅེར་བུ་སྟག་ཤམ། ཐོད་སྐམ་གྱི་དབུ་རྒྱན། རུས་པའི་སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། སེ་རལ་ཁ་སྟེ་རུས་རྒྱན་དྲུག་གིས་བརྒྱན་པ། ཞབས་གཡོན་བརྐྱང་པའི་དོར་སྟབས་ཀྱིས་པད་ཉིའི་གདན་ལ་བཞེངས་པ་སྟེ། སྐུའི་རྣམ་འགྱུར་མཚན་བརྒྱད་ཀྱི་ཉི་མ་འོད་ཟེར་ལྟ་བུ་རྣལ་འབྱོར་པ་རྟུལ་ཞུགས་སྤྱོད་པའི་ཉམས་ཅན། ༥ །གཙོ་བོའི་གཡས་འོག་ལྷོ་སྟོད་གུ་རུ་སྨྲ་བའི་སེང་གེ་སྐུ་མདོག་དཀར་གསལ་ཞི་ཞིང་འཛུམ་པ་པཎྜི་ཏའི་ཆ་བྱད་ཅན། དབུ་ལ་པཎ་ཞྭ་སྣེ་རིང་དུར་ཁ། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པའི་མཐེབ་མཛུབ་གཉིས་ཀྱི་བར་དུ་པདྨའི་ཡུ་བ་བཟུང་བ། འདབ་མ་སྙན་གཡས་གཡོན་གྱི་ཐད་ཀར་ཁ་བྱེ་བའི་ཟེའུ་འབྲུར། གཡས་སུ་གླེགས་བམ་བསྒྲིལ་ཚས་སེར་པོ་དང་། གཡོན་སྔོན་པོ་ཅན་བསྣམས་པ། ཞབས་རྡོ་རྗེའི་སྐྱིལ་ཀྲུང་གིས་པད་ཟླ་ལ་བཞུགས་པ། ༦ །གཙོ་བོའི་སྟེང་གཡས་ནུབ་སྟོད་དུ་གུ་རུ་སྐྱེས་མཆོག་ཚུལ་བཟང་སྐུ་མདོག་གསེར་མདངས། སྐུ་ཤ་རྒྱས་ལ་སྒེག་ཅིང་བརྗིད་ཆགས་པ། གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་ལྟེ་བའི་ཐད་དུ་མཉམ་གཞག་གི་སྟེང་རིན་པོ་ཆེའི་ཟ་མ་ཏོག་བསྣམས་པ། ན་བཟའ་ནང་ཤ་འགགས་སྔོ་སྐྱ། དེ་སྟེང་ཤམ་ཐབས་ལེའུ་མ་དམར་ཆེན། ཆོས་གོས་དམར་སེར། ཟབ་བེར་དམར་སྨུག་རྣམས་བརྩེགས་མར་གསོལ་བ། ཞབས་རྡོ་རྗེའི་སྐྱིལ་ཀྲུང་གིས་པད་ཟླའི་སྟེང་དུ་བཞུགས་པ། ༧ །གཙོ་བོའི་གཡོན་སྟེང་བྱང་སྟོད་གུ་རུ་བདུད་ཀྱི་གཤེད་ཆེན། སྐུ་མདོག་དམར་སྨུག་ལ་དཀར་བའི་མདངས་ཆགས་པ། ཁྲོ་ཞིང་གཏུམ་པའི་ཉམས་ཅན། ཟུར་ཞལ་གཡོན་དུ་གཟིག་པ་ཕྱག་གཡས་ལྕགས་ཀྱི་ཕུར་པ་ཁྲོ་ཞལ་ཅན་དཔལ་སོ་ཕྱིར་བསྟན་ནས་དཀུ་གཡས་ལ་བསྟེན་པ། གཡོན་ཕུར་པ་ཁྲོ་ཞལ་མེད་པ་བསྡིགས་མཛུབ་དང་བཅས་འདེབས་ཚུལ་གྱིས་འཛིན་པ། ན་བཟའ་ནང་དུ་གསང་གོས་དཀར་པོ། དེ་སྟེང་ཕོད་ཁ་ལྗང་གུ། ཤམས་ཐབས་དམར་ཆེན། ཆོས་གོས་དམར་སེར། དབུ་ལ་ཤ་བའི་སྙན་ཞུ། ཞབས་གཡོན་བརྐྱང་པའི་དོར་སྟབས་ཀྱིས་པད་ཉིའི་གདན་ལ་བཞེངས་པ། ༨ །གཙོ་བོའི་མདུན་གཡས་ཤར་སྨད་གུ་རུ་ཛཾ་གླིང་རྒྱན་མཆོག་སྐུ་མདོག་མཐིང་ནག་རལ་པ་དམར་སེར་གྱེན་དུ་བརྫེས་པ། ཐོད་སྐམ་རིགས་ལྔའི་དབུ་རྒྱན་རིན་པོ་ཆེའི་རྩེ་བྲན་ཅན། སྤྱན་གསུམ་སྡང་མིག་ཏུ་བགྲད་ཅིང་མཆེ་བ་བཞི་གཙིགས་པ། སྨར་སྨིན་དམར་སེར་རཀྟའི་ཐིག་ལེ་སོགས་ཁྲོ་ཉམས་སྤྱི་འགྲེ། ཕྱག་གཡས་ནམ་མཁར་གདེངས་ཤིང་། གཡོན་སྟ་ཟུར་གྱི་ཐད་དུ་བརྐྱང་པ། གཉིས་ཀས་ལྕགས་ཕུར་ཁྲོ་ཞལ་མེད་པ་གསོར་བའི་ཚུལ་གྱིས་འཛིན་པ། ན་བཟའ་གསང་གོས་དཀར། བེར་ནང་མ་ལྗང་གུ་ལ་སྐུ་རེག་སྔོན་པོ་གསེར་མདངས་ཅན། བཅིངས་པའི་བར་དུ་ཕུར་པ་ཁྲོ་ཞལ་ཡོད་པ་དར་མཐིང་ཁྲའི་ཅོད་པན་བཙུགས་པ། སྐུ་སྟོད་གླང་ཀོ་དང་ཞིང་ལྤགས། སྐུ་སྨད་སྟག་ཤམ། སྦྲུལ་ཆུན། དེ་སྟེང་འཇོལ་བེར་མཐིང་ནག་གོང་སླག་གསེར་མདངས་ཅན་མནབས་ཤིང་མགོ་རློན་གྱི་ཕྲེང་བ། ཞབས་གཡོན་བརྐྱང་པའི་དོར་བསྟབས་ཀྱིས་པད་ཉིའི་སྟེང་ན་བཞེངས་པ། ༩ །གཙོ་བོའི་གཡས་སྟེང་ལྷོ་སྨད་པདྨ་འབྱུང་གནས་མཐིང་གསལ་རྡོར་དྲིལ་ཐུགས་ཀར་བསྣོལ་ནས་མཚོ་རྒྱལ་དཀར་མོ་ཕྱག་གཡས་རྡོ་རྗེ་འཛིན་པས་ཡབ་ཀྱི་མགུལ་ནས་འཁྱུད་པ། གཡོན་པས་ཐོད་པ་བདུད་རྩི་དཀར་པོས་གང་བ་ཡབ་ལ་སྟོབས་པའི་ཚུལ་ཅན་དང་འཁྲིལ་བ། ཡབ་ཡུམ་གཉིས་ཀར་དར་དང་རིན་ཆེན་རུས་རྒྱན་སོགས་གུ་རུ་མཚན་བརྒྱད་ཀྱི་པདྨ་འབྱུང་གནས་ཇི་ལྟ་བ། ཞབས་རྡོ་རྗེའི་སྐྱིལ་ཀྲུང་གིས་པད་ཟླར་བཞུགས་པ། ༡༠ །གཙོ་བོའི་སྟེང་གཡོན་ནུབ་སྨད་ཁྱད་པར་འཕགས་པའི་རིག་འཛིན་སྐུ་མདོག་དཀར་གསལ་དམར་མདངས་ཅུང་ཟད་ཆགས་པ། ཞི་ཞིང་འཛུམ་ལ་སྤྱན་མིག་ཧུར་རེ་བ་ཅུང་ཁྲོ་ཉམས་ཅན། ཕྱག་གཡས་བརྐྱང་པས་གསེར་གྱི་རྡོ་རྗེ་རྩེ་ལྔ་པ་ལམ་སྟོན་པའི་ཚུལ་གྱིས་འཛིན་པ། གཡོན་སྟ་ཟུར་གྱི་ཐད་དུ་ཁ་ཊྭཱྃ་རྩེ་གསུམ་འཁར་བའི་ཚུལ་གྱིས་བཙུགས་པ། ཞལ་ཟུར་ཞལ་གྱི་རྣམ་པ་ཅན་ནམ་སྟབས་གང་བདེ། ན་བཟའ་གསང་གོས་དཀར་པོ། བེར་ཆེན་སྔོ་ཁྲ། ཤམ་ཐབས་དམར་པོ། སྣམ་སྦྱར་དམར་སེར་རྣམས་བརྩེགས་ཏེ་གསོལ་བ། དབུ་ལ་ཤེ་འུའི་སྙན་ཞུ། ཞབས་གཉིས་མཆིལ་ལྷྭམ་འགགས་བཅད་གསོལ་ནས་པད་ཟླའི་གདན་ལ་གཤེགས་པའི་སྟབས་ཀྱིས་བཞེངས་པ། ༡༡ །གཙོ་བོའི་གཡོན་འོག་བྱང་སྨད་གུ་རུ་རྫུ་འཕྲུལ་མཐུ་ཆེན། སྐུ་མདོག་དམར་སྨུག །ཞལ་ཁྲོ་གཉེར་ཨཾ་གཙིགས་ཅན། ཕྱག་གཡས་གནམ་ལྕགས་ཀྱི་རྡོ་རྗེ་གསོར་བ། གཡོན་ཕུར་བུ་གཟིར་བ། རབ་བྱུང་ཆ་ལུགས་མ་མགོ་ཕྲེང་དང་རུས་རྒྱན་འཕྱང་བ། ཞབས་གཉིས་སྟག་གི་གདན་ལ་དོར་སྟབས་ཀྱིས་འགྱིང་བ། དབུ་སྐྲ་སྣམ་འཁྱིལ་དང་། སྙན་ལ་དུང་གི་ཝང་མིག་སོགས་མདོར་ན་གུ་རུ་མཚན་བརྒྱད་ཀྱི་རྡོ་རྗེ་གྲོ་ལོད་ཇི་ལྟ་བའོ། ༡༢ །གཙོ་བོའི་གཡས་འོག་ཤར་ལྷོར་གུ་རུ་རྡོ་རྗེ་དྲག་པོ་རྩལ། སྐུ་མདོག་དམར་པོ། གཡས་གནམ་ལྕགས་ཀྱི་རྡོ་རྗེ་རྩེ་དགུ་ནམ་མཁར་གསོར་ཞིང་། གཡོན་ལྕགས་སྡིག་མགོ་དགུ་གཟིར་བ། ན་བཟའ་གླང་ཀོའི་སྟོད་གཡོགས། ཞིང་ལྤགས་རྐེད་དཀྲིས། སྟག་ཤམ། ཐོད་རློན་དོ་ཤལ། སྦྲུལ་རྒྱན་སོགས་དུར་ཁྲོད་ཀྱི་ཆས་བརྒྱད་དང་། ཐོད་སྐམ་དབུ་རྒྱན་སོགས་རུས་པའི་རྒྱན་དྲུག་གིས་བརྒྱན་པ། ཞབས་གཡོན་བརྐྱང་པའི་དོར་སྟབས་ཀྱིས་པད་ཟླ་ཉི་མ་རྒྱལ་འགོང་ཕོ་མོའི་སྟེང་ན་བཞེངས་པ། ཡུམ་མཐིང་ནག་ཐོད་སྐམ་གྱི་དོ་ཤལ་དང་། གཟིག་ཤམ་ཅན། གྲི་ཐོད་འཛིན་པས་འཁྱུད་པ། ཞབས་གཡོན་ཡབ་ཀྱི་རྐེད་ལ་འཁྲིལ་ཞིང་གཡས་བརྐྱང་པ། མདོར་ན་གུ་རུ་དྲག་པོ་ཡུམ་ཅན་སྤྱི་འགྲེ ༡༣ །གཙོ་བོའི་གཡས་སྟེང་ལྷོ་ནུབ་གུ་རུ་སྐལ་ལྡན་འདྲེན་མཛད་སྐུ་མདོག་མཐིང་ནག །གནོད་སྦྱིན་ཁྲོས་པའི་ཉམས་ཅན། ཕྱག་གཡས་གནམ་ལྕགས་རྡོ་རྗེ་རྩེ་ལྔ་པ་དང་། གཡོན་ཐོད་པ་ཁྲག་གིས་གང་བ་ཐུགས་ཀར་སྟེང་འོག་ཏུ་འཛིན་པས་ཡུམ་ལ་འཁྱུད་པ། གླང་ཀོའི་སྟོད་གཡོགས་སོགས་དུར་ཁྲོད་ཀྱི་ཆས་དང་། རྡོ་རྗེའི་གཤོག་པ་སོགས་དཔལ་གྱི་ཆས་ཡོངས་སུ་རྫོགས་པ། མདོར་ན་ཆ་ལུགས་བཀའ་བརྒྱད་ཀྱི་ཆེ་མཆོག་ཇི་ལྟ་བ་ཞབས་དོར་སྟབས་ཀྱིས་པད་ཉི་དྲེགས་པ་ཕོ་མོའི་གདན་ལ་བཞེངས་པ། ཡུམ་སྔོ་སྐྱ་གཡས་གྲི་གུག་གིས་ཡབ་ཀྱི་མགུལ་ནས་འཁྱུད་པ། གཡོན་ཐོད་ཁྲག་ཡབ་ལ་སྟོབ་པ། སེ་རལ་ཁ་མ་གཏོགས་པའི་རུས་རྒྱན་ལྔ། ཞབས་གཡོན་ཡབ་ཀྱི་རྐེད་ལ་འཁྲིལ་ཞིང་། གཡོན་བརྐྱང་བ། ༡༤ །གཙོ་བོའི་གཡོན་སྟོད་ནུབ་བྱང་དུ་རཀྴ་ཐོད་ཕྲེང་སྐུ་མདོག་སྨུག་ནག་སྲིན་པོ་ཁྲོས་པའི་ཉམས་ཅན། ཕྱག་གཡས་རྡོ་རྗེ་རྩེ་ལྔ་པ། གཡོན་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། ཡུམ་མཐིང་སྐྱ་གྲི་ཐོད་འཛིན་པས་འཁྱུད་པ། ཡབ་ཀྱི་སྐུ་སྟོད་ལ་ཞིང་ལྤགས་ཀྱི་སྟོད་གཡོགས་དང་། སྟག་ཤམ་དབུ་སྐྲ་དམར་སེར་གྱེན་དུ་བརྫེས་ཤིང་ཐོད་སྐམ་དབུ་རྒྱན་སོགས་རུས་པའི་རྒྱན་དྲུག །ཐོད་རློན་གྱི་སེ་རལ་ཁ། ཞབས་དོར་སྟབས་ཀྱིས་པད་ཉི་སྲིན་པོ་ཕོ་མོའི་གདན་ལ་བཞེངས་པ། ཡུམ་ལ་སེ་རལ་ཁ་མ་གཏོགས་པའི་རུས་རྒྱན་ལྔ། ཞིང་གི་སྟོད་གཡོགས། གཟིག་ཤམ། ཞབས་གཡོན་ཡབ་ཀྱི་རྐེད་ལ་འཁྲིལ་ཞིང་། གཡས་བརྐྱང་བ། ༡༥ །གཙོ་བོའི་གཡོན་འོག་བྱང་ཤར་གུ་རུ་བདེ་ཆེན་རྒྱལ་པོ་པདྨ་བཛྲ་སྐུ་མདོག་དམར་པོ་དྲང་སྲོང་ཁྲོས་པའི་ཉམས་ཅན། ཕྱག་གཉིས་རྡོ་རྗེ་དྲིལ་བུ་ཐུགས་ཀར་བསྣོལ་བས་ཡུམ་ལ་འཁྱུད་པ། ཞི་ཆགས་ཅུང་ཟད་ཁྲོ་ཉམས་མཆེ་བའི་མྱུ་གུ་ཡིད་ཙམ་གཙིགས་པ། སྤྱན་གསུམ་པ། དབུ་སྐྲ་གནག་སྣུམ་ཐོར་ཅོག་རྩེར་ནོར་བུས་མཚན་ཅིང་དར་དམར་གྱིས་བཅིངས་པ། ཐོད་སྐམ་གྱི་དབུ་རྒྱན་རིན་པོ་ཆེའི་རྩེ་བྲན་ཅན་སོགས་རུས་པའི་རྒྱན་དྲུག །སྐུ་སྟོད་ལ་དར་ལྗང་གུའི་དར་དཔྱངས་ཀྱིས་སྟོད་གཡོགས་པའི་ཚུལ་དང་། སྐུ་སྨད་སྟག་ཤམ་བརླ་ཡི་སྟེང་དུ་ལྷོད་པོར་གྲོལ་བའི་ཚུལ་ཅན། ཞབས་གཡོན་ཅུང་ཟད་བརྐྱང་བའི་དོར་སྟབས་ཀྱིས་པད་ཉིའི་གདན་ལ་བཞེངས་པ། ཡུམ་དམར་སྐྱ་གྲི་ཐོད་འཛིན་པས་ཡབ་ལ་འཁྱུད་པ། རུས་པའི་སེ་རལ་ཁ་མ་གཏོགས་པའི་རྒྱན་ལྔ་དང་། ཐོད་སྐམ་གྱི་དོ་ཤལ། དབུ་སྐྲ་ནག་པོ་སིལ་བུ་གྲོལ་བ། གཟིག་ཤམ་ཅན། ཞབས་གཉིས་གཡོན་ཡབ་ཀྱི་རྐེད་ལ་འཁྲིལ་ཞིང་། གཡས་བརྐྱང་པ། རྩ་བའི་ལྷ་དེ་རྣམས་ཀྱི་ཕྱི་རོལ་གྲ་བཞིའི། ༡༦ །ཤར་དུ་རྡོ་རྗེ་དཔའ་བོ་སྐུ་མདོག་དཀར་པོ། ཕྱག་གཡས་རྡོ་རྗེའི་ཡུ་བ་བྱས་པའི་གྲི་གུག་ནམ་མཁར་གདེངས་ཤིང་། གཡོན་ཐོད་ཁྲག་ཐུགས་ཀར་བསྣམས་པ། རང་འདྲའི་ཡུམ་གྲི་ཐོད་འཛིན་པས་འཁྱུད་པ། གཉིས་ཀའང་ཞི་ཞིང་འཛུམ་པའི་ཉམས་ཅན། ༡༧ །ལྷོ་རུ་རིན་ཆེན་དཔའ་བོ་སྐུ་མདོག་སེར་པོ་གཡས་ནོར་བུས་ཡུ་བ་བྱས་པའི་གྲི་གུག །གཡོན་ཐོད་ཁྲག །རང་འདྲའི་ཡུམ་དང་འཁྲིལ་བ། གཉིས་ཀའང་སྐུ་ཤ་རྒྱས་ཤིང་སྒེག་པའི་ཉམས་ཅན། ༡༨ །ནུབ་ཏུ་པདྨ་དཔའ་བོ་སྐུ་མདོག་དམར་པོ། གཡས་པདྨ་དམར་པོས་ཡུ་བ་བྱས་པའི་གྲི་གུག །གཡོན་ཐོད་ཁྲག །རང་འདྲའི་ཡུམ་དང་འཁྲིལ་བ་གཉིས་ཀ་ཤིན་ཏུ་ཆགས་པའི་ཉམས་ཅན། ༡༩ །བྱང་དུ་ལས་ཀྱི་དཔའ་བོ་སྐུ་མདོག་ལྗང་གུ། གཡས་སྣ་ཚོགས་རྡོ་རྗེས་ཡུ་བ་བྱས་པའི་གྲི་གུག །གཡོན་ཐོད་ཁྲག །རང་འདྲའི་ཡུམ་དང་འཁྲིལ་བ། གཉིས་ཀ་ཁྲོས་པའི་ཉམས་ཅན། དེ་ལྟ་བུའི་དཔའ་བོ་རིགས་བཞི་ཐམས་ཅད་ཀྱང་དབུ་སྐྲ་ཐོར་ཅོག་ནོར་བུས་མཚན་ཅིང་གསེར་གྱི་འཁྱུད་མོས་བསྡམས་པ། ཐོད་སྐམ་གྱི་དབུ་རྒྱན་རིན་པོ་ཆེའི་རྩེ་བྲན་ཅན་སོགས་ཡབ་རྣམས་ལ་རུས་པའི་རྒྱན་དྲུག་དང་། ཡུམ་རྣམས་ལ་རུས་པའི་རྒྱན་ལྔ་རིན་པོ་ཆེའི་ཕྲས་བཏབ་པས་མཛེས་པ། དར་མཐིང་ཁྲའི་ཟི་ལྡིར། དར་དཔྱངས་ལྗང་གུ། སྟོད་གཡོགས་སྐུ་ཡི་ཚོན་དང་མ་ཟློས་པའི་ཅི་མཛེས། སྐུ་སྨད་ལ་འཇའ་དཀྲིས། ཡབ་རྣམས་ལ་སྟག་ཤམ། ཡུམ་རྣམས་ལ་གཟིག་ཤམ། ཡབ་རྣམས་ཞབས་གཡོན་ཅུང་ཟད་བརྐྱང་བའི་དོར་སྟབས། ཡུམ་རྣམས་གཡོན་ཡབ་ཀྱི་རྐེད་ལ་འཁྲིལ་བ། གཡས་བརྐྱང་པ་རྣམས་ཏེ་རྩ་བའི་དཀྱིལ་འཁོར་གྱི་ལྷ་ཚོགས་སོ། །ཞར་བྱུང་ཆོས་བདག་བར་ཆད་སེལ་བའི་ཆོས་བཀའ་བཞིའི་ལྷ་མགྲོན་ལ། ༢༠ །ཐུགས་རྗེ་ཆེན་པོའི་གཡས་སུ་སྒྲོལ་ལྗང་སྤྱི་འགྲེ། ༢༡ །ཚེ་དཔག་གཡས་སུ་མི་གཡོ་བ་སྐུ་མདོག་དཀར་པོ་ཁྲོ་ཞིང་བརྗིད་པའི་ཉམས་ཅན་ཞལ་ཨཾ་གཙིགས་བསྡམས་པ། སྐྲ་དམར་སེར་གྱེན་དུ་བརྫེས་པ་ཅུང་ཟད་འཁྱིལ་བའི་རྣམ་པ་སྦྲུལ་དཀར་ཁྲས་བཅིངས་པ། ཕྱག་གཡས་རལ་གྲི་མེ་འབར་བ་འཕྱར་སྟབས། གཡོན་ཐུགས་ཀར་སྡིགས་མཛུབ་དང་བཅས་པས་ཞགས་པ་སྣེ་མོ་གཅིག་རྡོ་རྗེ་དང་། གཅིག་ཏུ་ཨ་ལོང་དང་ལྕགས་ཀྱུས་མཚན་པའི་སྣེ་ཕྲག་པ་གཡོན་པའི་གོང་དུ་ལྡིང་བ། དར་ལྗང་གུའི་དར་དཔྱངས། མགུལ་དུ་སྦྲུལ་སེར་ཁྲའི་ཆུན་པོ་དང་། རིན་པོ་ཆེའི་དོ་ཤལ། ཕྱག་ཞབས་ལ་སྦྲུལ་དང་གསེར་ལས་བྱས་པའི་གདུ་བུ། སྐུ་སྨད་སྟག་ཤམ། ཞབས་གཡས་ཅུང་ཟད་བརྐྱང་པའི་དོར་སྟབས་ཀྱིས་པད་ཉི་འཆི་བདག་གི་བདུད་ནག་པོ་དང་བཅས་པའི་སྟེང་དུ་བཞེངས་པ། ༢༢ །ཚེ་དཔག་གཡོན་ཏུ་ཕྱག་རྡོར་སྐུ་མདོག་མཐིང་ནག་གནོད་སྦྱིན་ཁྲོས་པའི་ཉམས་ཅན། སྤྱན་གསུམ་ཞལ་བགྲད་མཆེ་བ་བཞི་གཙིགས་པ། དབུ་སྐྲ་དང་སྨར་སྨིན་དམར་སེར། ཕྱག་གཡས་གནམ་ལྕགས་རྡོ་རྗེ་རྩེ་ལྔ་ནམ་མཁར་གསོར་བ། གཡོན་ཐུགས་ཀར་སྡིགས་མཛུབ་བསྒྲེང་བའི་མཛུབ་མོའི་རྩེ་ལས་མེ་དུད་ཀྱི་ཞགས་པ་འཕྲོ་བའི་རྩེར་སྙན་གཡོན་པའི་ཐད་ཙམ་དུ་བྱ་ཁྱུང་ནག་པོ་ལྡིང་བའི་རྣམ་པ་ཅན། དར་སྔོན་པོའི་སྟོད་གཡོགས། སྟག་ཤམ། ཕྱག་ཞབས་དང་མགུལ་སོགས་སྦྲུལ་བརྒྱད་ཀྱིས་བརྒྱན་པ། ཐོད་སྐམ་དབུ་རྒྱན། ཐོད་རློན་དོ་ཤལ། ཞབས་གཡོན་བརྐྱང་པའི་དོར་སྟབས་ཀྱིས་པདྨ་དང་ཉི་མ་དང་། བདུད་དཀར་སེར་དམར་ནག་བཞི་གཡས་གཡོན་ཏུ་གཉིས་ཏེ་བསྣོལ་བའི་སྟེང་དུ་བཞེངས་པ། ༢༣ །ཐུགས་རྗེ་ཆེན་པོའི་གཡོན་ཏུ་སྨེ་བ་བརྩེགས་པ། སྐུ་མདོག་མཐིང་ནག་སྲིན་པོ་ཁྲོས་པའི་ཉམས་ཅན། ཞལ་གདངས་ལྗགས་འདྲིལ་མཆེ་བ་བཞི་གཙིགས་པ། སྤྱན་གསུམ་པ། དབུ་སྐྲ་ཁམས་ནག་གྱེན་བརྗེས་སྦྲུལ་གྱིས་བཅིངས་ཤིང་རྩེར་རྡོ་རྗེ་ཕྱེད་པས་མཚན་པ། ཐོད་སྐམ་ལྔའི་དབུ་རྒྱན་རིན་པོ་ཆེའི་རྩེ་བྲན་ཅན་ལ་གཤམས་རྡོ་རྗེའི་ཕྲེང་བ་འཁྱུད་མོའི་ཚུལ་གྱིས་བསྡམས་པ་བདེ་མཆོག་གི་དབུ་རྒྱན་ལྟ་བུ་སོགས་རུས་པའི་རྒྱན་དྲུག་ལ་རིན་པོ་ཆེའི་ཕྲས་བཏབ་པ། གླང་ཀོ་སོགས་དུར་ཁྲོད་ཀྱི་ཆས་བརྒྱད་དང་། རིང་ཐུང་ཐོད་རློན་གྱི་དོ་ཤལ་དང་མཚུངས་པའི་རྡོ་རྗེ་སྔོ་སྐྱའི་ཕྲེང་བ། ཞབས་གཡོན་བརྐྱངས་པའི་དོར་སྟབས་ཀྱིས་པད་ཉིའི་གདན་ལ་བཞེངས་པའོ། །བླ་བརྒྱུད་ལ། ༢༤ །སྟེང་གི་མི་གཡོ་བའི་གཡས་སུ་ཁྲི་སྲོང་བོད་ཆོས་རྒྱལ་གྱི་ཆས་ཅན་ཡོངས་གྲགས་ལ། ཕྱག་མཉམ་གཞག་སྟེང་གསེར་འཁོར་འཛིན་པ། ༢༥ །དེའི་འོག་ཏུ་ལྷ་སྲས་རོལ་པ་རྩལ། ཆོས་རྒྱལ་ཆས་སྤྱི་ལྟར་ལ། ཕྱག་གཡས་པུས་སྟེང་མཆོག་སྦྱིན་ཚུལ་དང་། གཡོན་མཉམ་གཞག་སྟེང་ནོར་བུ་བསྣམས་པ། ༢༦ །ཕྱག་རྡོར་གཡོན་ཏུ། མཚོ་རྒྱལ་བོད་མོའི་ཆས་ཅན་ཡོངས་གྲགས་ལྟར་ལ་ཕྱག་གཡས་བསྙེན་ཕུར་པུས་མོའི་སྟེང་དུ་བསྡིགས་ཤིང་། གཡོན་མཉམ་གཞག་སྟེང་དཔེ་ཚེམ་བསྣམས་པ། ༢༧ །དེའི་འོག་ཏུ་གཏེར་སྟོན་མཆོག་གྱུར་བདེ་ཆེན་གླིང་པ། སྐུ་དཀར་ལ་དམར་སྨུག་གི་མདངས་ཅན། སྤྱན་གཉིས་ཧུར་རེ་གཟིགས་པ། ཕྱག་གཡས་ཐུགས་ཀར་ཆོས་འཆད་ཀྱི་ཕྱག་རྒྱ་དང་། གཡོན་མཉམ་གཞག་སྟེང་གཏེར་སྒྲོམ་རིན་པོ་ཆེའི་ཟ་མ་ཏོག་ལྟ་བུ་འཛིན་པ། དབུ་སྐྲ་རལ་པ་སིལ་བུ། དབུ་ཞྭ་དེང་སང་ཡོངས་གྲགས་སྨིན་གླིང་གངས་ཞུའི་རྣམ་པ་ལ། རྒྱུ་གོས་ཆེན་དམར་ཆེན་ནོར་བུ་ཆ་བདུན་གསེར་མ་ལས་གྲུབ་ཅིང་། ཁ་འདྲིལ་སྔོ་ནག་སྤྲིན་རིས་ཅན་གྱིས་བྱས་པ། ན་བཟའ་ནང་དུ་གསང་གོས་དཀར་པོ། སྐུ་འགགས་ལྗང་ཁྲ། སྐུ་ཤམ་དཀར་པོ། སྐུ་ཆིངས་ལྗང་སེར། སྐུ་སྐེད་དུ་ཕུར་པ་ཁྲོ་ཞལ་ཅན་མཐིང་ཁྲའི་ཅོད་པན་ཅན་གཟིར་བ། སྐུ་གཟན་མོན་ཁ། དེ་སྟེང་ཟབ་བེར་དམར་སྨུག་སྤྲིན་ཁྲ་ཅན། ཞབས་ལ་སག་ལྷྭམ་འཇའ་ཅན་མནབས་ཤིང་གཡས་ཅུང་ཟད་བརྐྱང་པའི་ཕྱེད་སྐྱིལ་གྱིས་བཞུགས་པ། ཆོས་རྒྱལ་སོགས་བླ་བརྒྱུད་བཞི་པོའི་གདན་ཐམས་ཅད་དར་འབོལ་བཀོད་པ་ཅི་མཛེས་སུ་བྲི། ཆོས་སྐྱོང་སྐོར་ལ། ༢༨ །འོག་གི་དབུས་སུ་ལ་ཕྱི་ཆུ་བར་གྱི་གངས་རི་བྲིས་རྒྱུན་གྱི་དཔེ་དམིགས་བསལ་རྙེད་ན་དང་། གང་ལྟར་ཡང་གངས་རི་བཀོད་མཛེས་ཀྱི་མགུལ་དུ་སྤྲིན་དང་ན་བུན་འཁྲིགས་པ། འོག་གི་ཆར་སྤངས་ལྗོངས་དང་སྐྱེད་ཚལ་སོགས་བཀོད་པ་ཤིན་ཏུ་མཛེས་ཤིང་ཉམས་དགའ་བའི་དབུས་སུ། བྲི་བཀོད་བདེ་ན་དར་དཀར་གྱི་ལྡིང་གུར་རླུང་བསྐྱོད་ཀྱི་རྣམ་པའི་དབུས་ཀྱི་ཆར། གདན་པད་དཀར་དང་ཟླ་བའི་སྟེང་དུ་སེང་གེ་དཀར་མོ་དྲེགས་ཤིང་རྒྱགས་པ་འགྱིང་སྟབས་སུ་གནས་པ། དེའི་སྟེང་དུ་གཙོ་མོ་བཀྲ་ཤིས་ཚེ་རིང་མ་སྐུ་མདོག་དཀར་རྐྱང་ཞི་ཞིང་འཛུམ་ལ། དབུ་སྐྲ་ཐོར་ཚུགས་དུང་དཀར་གཡས་འཁྱིལ་གྱིས་མཚན་པ། སྐྲ་མཚམས་སུ་རིན་པོ་ཆེའི་པྲོག་ཞུ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་དང་བཅས་མདའ་དར་སྣ་ལྔ་དུང་ཤྭ་མེ་ལོང་གིས་མཚན་པ་གཡོབ་པའི་ཚུལ་ཅན། གཡོན་པས་གསེར་གྱི་བུམ་པ། ནོར་བུ། དཔལ་བེ། གཡུང་དྲུང་འཁྱིལ་བ་གསུམ་གྱིས་ཁ་བརྒྱན་པ་ཐུགས་ཀར་བསྣམས་པ། ན་བཟའ་ནང་དུ་གསང་གོས་ལྗང་གུ། དེ་སྟེང་བེར་དམར་པོ་སྐེ་རགས་ལྗང་སེར་གྱིས་བཅིངས་པ། དེ་སྟེང་བེར་དཀར་པོ་ལྷུབ་གྱོན། ཕྱག་ཞབས་སུ་གསེར་གྱི་གདུ་བུ་དང་སྙན་རྒྱན། མགུལ་དུ་རིན་པོ་ཆེའི་ཕྲས་བཏབ་པའི་མགུལ་རྒྱན་དང་དོ་ཤལ་ཞབས་རྗེན་གཡོན་ཅུང་ཟད་བརྐྱང་པའི་ཕྱེད་སྐྱིལ་བཙུན་མོ་རོལ་སྟབས་ཀྱིས་བཞུགས་པ། ༢༩ །དེའི་མདུན་གཡས་སུ་ཤར་མཐིང་གི་ཞལ་བཟང་སྐུ་མདོག་མཐིང་གསལ། ཕྱག་གཡོན་དངུལ་དཀར་མེ་ལོང་ཐུགས་ཀར་བསྣམས་པ། རྐྱང་བུ་ཁ་དཀར་ལ་ཆིབས་ཤིང་། དབུ ་སྐྲ་ཐོར་ཅོག་མུ་མེད་གྱི་ཐོར་ཚུགས་ཅན། ༣༠ །སྟེང་གཡས་མི་གཡོ་གླང་བཟང་སེར་མོ། གཡོན་གསེར་གྱི་པད་གཞོང་ཤིང་ཏོག་དང་ཁ་ཟས་སྣ་ཚོགས་ཀྱིས་གང་བ་ཐུགས་ཀར་བསྣམས་པ། སྟག་མོ་གྲུས་མ་ལ་ཆིབས་ཤིང་། གསེར་གྱི་ཐོར་ཚུགས་ཅན། ༣༡ །སྟེང་གཡོན་ནུ་བཅོད་པན་མགྲིན་བཟང་སྐུ་མདོག་དམར་གསལ། གཡོན་ནེའུ་ལེ་ནོར་བུ་སྐྱུགས་པ་དཀུར་བརྟེན་ནས་འཛིན་པ། ཤ་བ་ཡུ་མོ་ལ་ཆིབས་ཤིང་། བྱེ་རུའི་ཐོར་ཚུགས་ཅན། ༣༢ །འོག་གཡོན་བྱང་ཏལ་དཀར་འགྲོ་བཟང་ལྗང་གསལ། གཡོན་རྩྭ་དུར་བའི་ཆུན་པོ་ཐུགས་ཀར་བསྣམས་པ། གཡུ་འབྲུག་སྔོན་མོ་ལ་ཆིབས་ཤིང་། བཻཌཱུཪྻའི་ཐོར་ཚུགས་ཅན། དེ་ཐམས་ཅད་ཀྱང་ཕྱག་གཡས་པས་མདའ་དར་གཡབ་པའི་ཚུལ་གྱིས་འཛིན་པ། ན་བཟའ་དང་། རྒྱན་ཆ་མ་གཞི་གཙོ་མོ་དང་འདྲ་བ་ལ། ཁ་དོག་སྐུ་མདོག་དང་མ་འདྲེས་པའི་ཚོན་མདངས་གང་མཛེས་སུ་བྲིའོ། ༣༣ །གཡས་ཀྱི་འཁོར་གཉིས་ཀྱི་བར་གྱི་ཐད་ཀར། ཚེ་རིང་མའི་སྦས་པའི་ཡབ་ཚོགས་བདག་དཀར་པོ་གླང་པོ་ཆེའི་གདོང་པ་ཅན། ཕྱག་གཡས་ལ་ཕུག་ལོ་མ་དང་བཅས་པ་ཞལ་གྱི་ཐད་དུ་ཉེ་བར་འཛིན་ཅིང་གཡོན་ནོར་བུ་སྐྱུགས་པའི་ནེའུ་ལེ་དཀུ་གཡོན་པར་བརྟེན་པ། རིན་པོ་ཆེའི་མགུལ་རྒྱན། ཕྱག་ཞབས་གསེར་གདུབ། སྐུ་སྟོད་ལ་དར་དཔྱངས་ལྗང་གུ། སྐུ་སྨད་ལ་དར་དམར་ཤམ་ཐབས། ཞབས་ཕྱེད་སྐྱིལ་གྱིས་པད་ཟླར་བཞུགས་པ། ༣༤ །གཡོན་དུ་གཏེར་སྲུང་ཁ་རག་ཁྱུང་བཙུན་མ། སྐུ་མདོག་དམར་སེར་སྒེག་ཅིང་ཆགས་པའི་ཉམས་ཅན། གཡས་སྙན་གྱི་ཐད་ཀར་ཐོད་པའི་ཌཱ་རུ་འཁྲོལ་བ། གཡོན་ཐུགས་ཀར་དངུལ་གྱི་མེ་ལོང་བསྣམས་པ། རྒྱན་ཆ་ལུགས་ཚེ་རིང་མ་ལྟར་ལ། ཁྱུང་ཆེན་ལྡིང་བའི་ཚུལ་ལ་ཞོན་པའོ། །ཚེ་རིང་མའི་མདུན་འོག་གི་ཆར་བཀྲ་ཤིས་རྫས་བརྒྱད། རྟགས་བརྒྱད། རྒྱལ་སྲིད་སྣ་བདུན་སོགས། ས་མཐོང་ཆེ་ཆུང་དང་བསྟུན་པའི་བཀོད་མཛེས་སུ་བྲིའོ། །སྤྱིར་ཞི་བ་རྣམས་ལ་འཇའ་འོད་དང་དབུ་གོར། ཁྲོ་བོ་རྣམས་ལ་མེ་རི། གྲོ་ལོད་ལ་མེ་དུད། ཞི་མ་ཁྲོའི་ཉམས་ཅན་རྣམས་ལ་མེ་རི་པ་ཏྲ་ཕྱག་མཚན་རིགས་རྣམས་ཚོན་རྫོགས་མ་མ་གཏོགས་གསེར་གྱི་ཐོག་བཞག་འོད་ཀོར་དང་འདྲེས་འགྲོ་བ་དེ་འདྲ་མི་བྱེད། དབུ་གོར་དང་རྒྱབ་འཇའ་སོགས་འཇའ་འོད་དྭངས་གསལ་མ་གཏོགས་ཚོན་ཆེན་ལེབ་བཞག་མི་ལེགས། མདོར་ན་རྒྱུད་དང་མན་ངག་ཚད་ལྡན་གྱི་རྗེས་སུ་འབྲང་བའི་ཐིག་དང་ཕྱག་ཚད་མ་འཁྲུལ་པ་གཞིར་བཞག་སྟེ། བྱེ་བྲག་ཞི་བ་རྣམས་སྒར་བྲིས་ཀྱི་ལུགས་སྐུ་དྭངས་ལ་མ་རྙོགས་པ། གོས་རིས་དང་བཅད་མདངས་སོགས་ཀྱི་མང་ཉུང་མཚམས་ཤིང་རྒྱན་ཆ་སོགས་ཀྱང་མ་འཛིང་པའི་བཀོད་ལེགས་དང་། ཁྲོ་བོ་རྣམས་གཙོ་བོར་རྣམ་འགྱུར་སོགས་སྨན་བྲིས་རྙིང་མ་གཞིར་བཞག་ལ་སྒར་བྲིས་ཀྱིས་མཛེས་ཆ་བཏོན་པ། སྟེང་གི་ནམ་མཁར་སྤྲིན་ཁྲ་ཤིན་ཏུ་དྭངས་ཉམས་ཅན། བར་གྱི་ཆར་སྤང་ལྗོངས་གཞི་སེར་དུ་མ་སོང་བའི་དབྱར་ཉམས་ཆགས་པ། འོག་གི་ཆར་རི་དང་། ཆུ་དང་། མེ་ཏོག་དང་། སྐྱེད་ཚལ་སོགས་ཀྱང་ཟིང་ཟིང་མ་ཡིན་པའི་བཀོད་ལེགས་ཡིད་ཆགས་ཤིང་མཛེས་པར་བྲིའོ། །དེ་ལྟར་ལེགས་པར་གྲུབ་ནས་གོང་གཤམ་ཞལ་ཁེབས་སོགས་བཀོད་མཛེས་སུ་སྦྱར། རྒྱབ་ཏུ་གནས་ཡིག་དང་སྙིང་པོས་མཚོན་པ་བྲིས་ཏེ་ཡར་ངོའི་ཚེས་བཅུ་ལྟ་བུའི་དུས་ཚེས་དགེ་བར་ཟབ་མོ་ཐུགས་ཀྱི་སྒྲུབ་པའི་ཕྲིན་ལས་དང་འབྲེལ་བར་རབ་ཏུ་གནས་པས། མངའ་གསོལ་བའི་བྲིས་སྐུ་ཉིད་གང་དུ་བཞུགས་པའི་ས་ཕྱོགས་ཀུན་ཏུ་ཨོ་རྒྱན་རིན་པོ་ཆེའི་ཐུགས་རྗེའི་བྱིན་རླབས་ལྷག་པར་འཇུག་པས་ཕྱི་ནང་གསང་བའི་བར་ཆད་ཐམས་ཅད་ཞི་ཞིང་། ཕན་བདེའི་འདོད་རྒུ་ལྷུན་གྱིས་གྲུབ་པར་སྤྱི་དང་བྱེ་བྲག་གི་ལུང་ལས་གསལ་བའི་ཕྱིར། དད་འབྱོར་དང་ལྡན་པ་རྣམས་ཀྱིས་བསམ་སྦྱོར་རྣམ་པར་དག་པས་བསྒྲུབས་ན་འདི་ཕྱིའི་དགེ་ལེགས་མཆོག་ཏུ་རྒྱས་པར་འགྱུར་རོ། །ཞེས་པའང་ཟབ་གཏེར་ལས་བྱུང་ཞལ་གདམས་ཡན་ལག་དང་བཅས་པ་གཞིར་བཞག །དེར་མི་གསལ་བ་རྣམས་བྲིས་རྒྱུན་ཚད་ལྡན་གྱི་རྗེས་སུ་འབྲངས་ཏེ་མཉྫུ་གྷོ་ཥས་ཟིན་བྲིས་སུ་བསྟར་བ། སརྦ་དཱ་ཤྲེ་ཡོ་བྷ་བ་ཏུ།། །། ༈

[edit]

thugs sgrub bar chad kun sel gyi bris sku'i 'bri yig bkra shis nor bu'i me long /_ @#/_/thugs sgrub bar chad kun sel gyi bris sku'i 'bri yig bkra shis nor bu'i me long zhes bya ba bzhugs so/_/oM swa sti/__dus gsum mkhyen pa o rgyan chen po'i thugs bcud bod yul sa 'og kun gyi gter gcig__/bla ma'i thugs sgrub bar chad kun sel gyi rtsa ba'i dkyil 'khor pa rnams gtso bor gyur pa'i rtsa gsum chos srung dang bcas pa'i dam tshig gi bris sku ji ltar 'bri ba'i bkod pa la/__1_thog mar dbus su gtso bo ni snang srid zil gnon sprul sku pad+ma 'byung gnas te/__de yang seng ges btegs pa'i rin po che'i khri/__de steng sna tshogs pad+ma/__nyi ma/__zla ba rnams rim par brtsegs pa'i gdan gyi steng du/__gu ru rin po che sku mdog dkar la dmar ba'i mdangs chags pa/__zhal gcig phyag gnyis/__zhi zhing 'dzum la cung zad khros pa'i nyams can/__sku 'gying ba'i nyams kyis phyag g.yas gser gyi rdo rje rtse lnga pa nam mkhar 'phyar thabs su 'dzin pa/__g.yon brla g.yon pa'i steng mnyam gzhag gi phyag rgyas thod pa dum bu gsum pa bdud rtsi dkar la dmar mdangs chags pas gang ba'i dbus su gser gyi bum pa nor bu'i brgyan pa dang /__gru mo g.yon du kha T+wA~M rtse gsum/__thod pa skam rlon rnying gsum brtsegs pa dar dpyangs DA ru dril g.yer gyis mtshan pa bsnams pa/__na bza' nang du gsang gos dkar po/__de steng phod ka sngo nag la sprin khra'am gser ris dang /__stod du bab le gzhi ser po sprin khra sum mdangs can/__sku smad shams thabs le'u ma dmar chen sku rags ljang ser gyis bcings pa/__chos gos dmar ser gser gyi ha tshon can gyi steng du zab ber dmar smug lhub gyon mdzad pa/__dbu zhwa 'dab ldan rigs lnga'am pad+ma mthong grol 'ja' sum bsgrigs ma rgod ldem me long dar dpyangs sogs kyis brgyan pa ste/__don tu deng sang bris rgyun yongs grags kaHthog rig 'dzin chen mo'i dag snang mtshan brgyad dang bsam lhun gyi gtso bo'i dbu zhwa ji lta ba/__mgul rgyan/__snyan rgyan/__phyag gdub rnams gser gyi gzhi la rin po che'i phras btab pa/__zhabs g.yas pus mo cung zad bslang ba'i nyams la/__g.yon skyil krung rgyal po rol stabs can/__sag l+h+wam gzhi ljang gu 'ja' ris can mnab pa/__2__/de'i dbu gtsug 'ja' zer gyi klong du pad+ma dkar po sdong bu dang bcas pa'i steng du nyi zla'i gdan la longs sku thugs rje chen po dkar po rgyal po lugs 'gro 'dul phyag bzhi pa spyi 'gre/__'di la ri dwags pags pas nu g.yon bkab pa ma chad pa dgos/__3__/de'i dbu gtsug tu 'ja' zer klong du pad ma dkar po dang zla ba'i gdan la chos sku snang mtha' tshe dpag med dmar po phyag mnyam gzhag steng gser gyi bum pa dpag bsam shing gis kha brgyan pa bsnams pa/__rin po che'i dbu rgyan/__snyan rgyan/__mgul rgyan/__phyag gdub/__zhabs gdub/__ska rags/__do shal/__se mo do ste rgyan brgyad kyis spras shing /__dar dmar po'i stod g.yogs/__kha dog sna tshogs pa'i smad dkris kyi steng du smad g.yogs sngo dmar/__4__/de nas gtso bo'i mdun g.yon gu ru rgyal ba'i gdung 'dzin/__sku mdog dkar la dmar shas che ba'i mdangs can/__zhal cung zad gdangs pas tshems dang mche ba gsal ba'i rnam pa can khro zhing 'dzum la chags nyams rgyas pa/__spyan hur bag gi rnam pas lta stangs nam mkhar gzigs pa/__sku 'gying bag dang bcas pas g.yas ral gri nam mkhar 'phyar zhing /__g.yon pad+ma'i lcags kyu gdengs shing 'debs pa'i rnam pa can dbu skra nag po thor cog dar sngon pos bcings pa/__sku gcer bu stag sham/__thod skam gyi dbu rgyan/__rus pa'i snyan rgyan/__mgul rgyan/__phyag gdub/__zhabs gdub/__se ral kha ste rus rgyan drug gis brgyan pa/__zhabs g.yon brkyang pa'i dor stabs kyis pad nyi'i gdan la bzhengs pa ste/__sku'i rnam 'gyur mtshan brgyad kyi nyi ma 'od zer lta bu rnal 'byor pa rtul zhugs spyod pa'i nyams can/__5__/gtso bo'i g.yas 'og lho stod gu ru smra ba'i seng ge sku mdog dkar gsal zhi zhing 'dzum pa paN+Di ta'i cha byad can/__dbu la paN zhwa sne ring dur kha/__phyag gnyis thugs kar chos 'chad kyi phyag rgya mdzad pa'i mtheb mdzub gnyis kyi bar du pad+ma'i yu ba bzung ba/__'dab ma snyan g.yas g.yon gyi thad kar kha bye ba'i ze'u 'brur/__g.yas su glegs bam bsgril tshas ser po dang /__g.yon sngon po can bsnams pa/__zhabs rdo rje'i skyil krung gis pad zla la bzhugs pa/__6__/gtso bo'i steng g.yas nub stod du gu ru skyes mchog tshul bzang sku mdog gser mdangs/__sku sha rgyas la sgeg cing brjid chags pa/__g.yas gser gyi rdo rje rtse lnga pa thugs kar gtod de 'dzin pa/__g.yon lte ba'i thad du mnyam gzhag gi steng rin po che'i za ma tog bsnams pa/__na bza' nang sha 'gags sngo skya/__de steng sham thabs le'u ma dmar chen/__chos gos dmar ser/__zab ber dmar smug rnams brtsegs mar gsol ba/__zhabs rdo rje'i skyil krung gis pad zla'i steng du bzhugs pa/__7__/gtso bo'i g.yon steng byang stod gu ru bdud kyi gshed chen/__sku mdog dmar smug la dkar ba'i mdangs chags pa/__khro zhing gtum pa'i nyams can/__zur zhal g.yon du gzig pa phyag g.yas lcags kyi phur pa khro zhal can dpal so phyir bstan nas dku g.yas la bsten pa/__g.yon phur pa khro zhal med pa bsdigs mdzub dang bcas 'debs tshul gyis 'dzin pa/__na bza' nang du gsang gos dkar po/__de steng phod kha ljang gu/__shams thabs dmar chen/__chos gos dmar ser/__dbu la sha ba'i snyan zhu/__zhabs g.yon brkyang pa'i dor stabs kyis pad nyi'i gdan la bzhengs pa/__8_/gtso bo'i mdun g.yas shar smad gu ru dzaM gling rgyan mchog sku mdog mthing nag ral pa dmar ser gyen du brdzes pa/__thod skam rigs lnga'i dbu rgyan rin po che'i rtse bran can/__spyan gsum sdang mig tu bgrad cing mche ba bzhi gtsigs pa/__smar smin dmar ser rak+ta'i thig le sogs khro nyams spyi 'gre/__phyag g.yas nam mkhar gdengs shing /__g.yon sta zur gyi thad du brkyang pa/__gnyis kas lcags phur khro zhal med pa gsor ba'i tshul gyis 'dzin pa/__na bza' gsang gos dkar/__ber nang ma ljang gu la sku reg sngon po gser mdangs can/__bcings pa'i bar du phur pa khro zhal yod pa dar mthing khra'i cod pan btsugs pa/__sku stod glang ko dang zhing lpags/__sku smad stag sham/__sbrul chun/__de steng 'jol ber mthing nag gong slag gser mdangs can mnabs shing mgo rlon gyi phreng ba/__zhabs g.yon brkyang pa'i dor bstabs kyis pad nyi'i steng na bzhengs pa/__9__/gtso bo'i g.yas steng lho smad pad+ma 'byung gnas mthing gsal rdor dril thugs kar bsnol nas mtsho rgyal dkar mo phyag g.yas rdo rje 'dzin pas yab kyi mgul nas 'khyud pa/__g.yon pas thod pa bdud rtsi dkar pos gang ba yab la stobs pa'i tshul can dang 'khril ba/__yab yum gnyis kar dar dang rin chen rus rgyan sogs gu ru mtshan brgyad kyi pad+ma 'byung gnas ji lta ba/__zhabs rdo rje'i skyil krung gis pad zlar bzhugs pa/__10__/gtso bo'i steng g.yon nub smad khyad par 'phags pa'i rig 'dzin sku mdog dkar gsal dmar mdangs cung zad chags pa/__zhi zhing 'dzum la spyan mig hur re ba cung khro nyams can/__phyag g.yas brkyang pas gser gyi rdo rje rtse lnga pa lam ston pa'i tshul gyis 'dzin pa/__g.yon sta zur gyi thad du kha T+wA~M rtse gsum 'khar ba'i tshul gyis btsugs pa/__zhal zur zhal gyi rnam pa can nam stabs gang bde/__na bza' gsang gos dkar po/__ber chen sngo khra/__sham thabs dmar po/__snam sbyar dmar ser rnams brtsegs te gsol ba/__dbu la she 'u'i snyan zhu/__zhabs gnyis mchil l+h+wam 'gags bcad gsol nas pad zla'i gdan la gshegs pa'i stabs kyis bzhengs pa/__11__/gtso bo'i g.yon 'og byang smad gu ru rdzu 'phrul mthu chen/__sku mdog dmar smug__/zhal khro gnyer aM gtsigs can/__phyag g.yas gnam lcags kyi rdo rje gsor ba/__g.yon phur bu gzir ba/__rab byung cha lugs ma mgo phreng dang rus rgyan 'phyang ba/__zhabs gnyis stag gi gdan la dor stabs kyis 'gying ba/__dbu skra snam 'khyil dang /__snyan la dung gi wang mig sogs mdor na gu ru mtshan brgyad kyi rdo rje gro lod ji lta ba'o/__12__/gtso bo'i g.yas 'og shar lhor gu ru rdo rje drag po rtsal/__sku mdog dmar po/__g.yas gnam lcags kyi rdo rje rtse dgu nam mkhar gsor zhing /__g.yon lcags sdig mgo dgu gzir ba/__na bza' glang ko'i stod g.yogs/__zhing lpags rked dkris/__stag sham/__thod rlon do shal/__sbrul rgyan sogs dur khrod kyi chas brgyad dang /__thod skam dbu rgyan sogs rus pa'i rgyan drug gis brgyan pa/__zhabs g.yon brkyang pa'i dor stabs kyis pad zla nyi ma rgyal 'gong pho mo'i steng na bzhengs pa/__yum mthing nag thod skam gyi do shal dang /__gzig sham can/__gri thod 'dzin pas 'khyud pa/__zhabs g.yon yab kyi rked la 'khril zhing g.yas brkyang pa/__mdor na gu ru drag po yum can spyi 'gre_13__/gtso bo'i g.yas steng lho nub gu ru skal ldan 'dren mdzad sku mdog mthing nag__/gnod sbyin khros pa'i nyams can/__phyag g.yas gnam lcags rdo rje rtse lnga pa dang /__g.yon thod pa khrag gis gang ba thugs kar steng 'og tu 'dzin pas yum la 'khyud pa/__glang ko'i stod g.yogs sogs dur khrod kyi chas dang /__rdo rje'i gshog pa sogs dpal gyi chas yongs su rdzogs pa/__mdor na cha lugs bka' brgyad kyi che mchog ji lta ba zhabs dor stabs kyis pad nyi dregs pa pho mo'i gdan la bzhengs pa/__yum sngo skya g.yas gri gug gis yab kyi mgul nas 'khyud pa/__g.yon thod khrag yab la stob pa/__se ral kha ma gtogs pa'i rus rgyan lnga/__zhabs g.yon yab kyi rked la 'khril zhing /__g.yon brkyang ba/__14__/gtso bo'i g.yon stod nub byang du rak+sha thod phreng sku mdog smug nag srin po khros pa'i nyams can/__phyag g.yas rdo rje rtse lnga pa/__g.yon thod khrag thugs kar steng 'og tu 'dzin pa/__yum mthing skya gri thod 'dzin pas 'khyud pa/__yab kyi sku stod la zhing lpags kyi stod g.yogs dang /__stag sham dbu skra dmar ser gyen du brdzes shing thod skam dbu rgyan sogs rus pa'i rgyan drug__/thod rlon gyi se ral kha/__zhabs dor stabs kyis pad nyi srin po pho mo'i gdan la bzhengs pa/__yum la se ral kha ma gtogs pa'i rus rgyan lnga/__zhing gi stod g.yogs/__gzig sham/__zhabs g.yon yab kyi rked la 'khril zhing /__g.yas brkyang ba/__15__/gtso bo'i g.yon 'og byang shar gu ru bde chen rgyal po pad+ma badz+ra sku mdog dmar po drang srong khros pa'i nyams can/__phyag gnyis rdo rje dril bu thugs kar bsnol bas yum la 'khyud pa/__zhi chags cung zad khro nyams mche ba'i myu gu yid tsam gtsigs pa/__spyan gsum pa/__dbu skra gnag snum thor cog rtser nor bus mtshan cing dar dmar gyis bcings pa/__thod skam gyi dbu rgyan rin po che'i rtse bran can sogs rus pa'i rgyan drug__/sku stod la dar ljang gu'i dar dpyangs kyis stod g.yogs pa'i tshul dang /__sku smad stag sham brla yi steng du lhod por grol ba'i tshul can/__zhabs g.yon cung zad brkyang ba'i dor stabs kyis pad nyi'i gdan la bzhengs pa/__yum dmar skya gri thod 'dzin pas yab la 'khyud pa/__rus pa'i se ral kha ma gtogs pa'i rgyan lnga dang /__thod skam gyi do shal/__dbu skra nag po sil bu grol ba/__gzig sham can/__zhabs gnyis g.yon yab kyi rked la 'khril zhing /__g.yas brkyang pa/__rtsa ba'i lha de rnams kyi phyi rol gra bzhi'i/__16__/shar du rdo rje dpa' bo sku mdog dkar po/__phyag g.yas rdo rje'i yu ba byas pa'i gri gug nam mkhar gdengs shing /__g.yon thod khrag thugs kar bsnams pa/__rang 'dra'i yum gri thod 'dzin pas 'khyud pa/__gnyis ka'ang zhi zhing 'dzum pa'i nyams can/__17__/lho ru rin chen dpa' bo sku mdog ser po g.yas nor bus yu ba byas pa'i gri gug__/g.yon thod khrag__/rang 'dra'i yum dang 'khril ba/__gnyis ka'ang sku sha rgyas shing sgeg pa'i nyams can/__18__/nub tu pad+ma dpa' bo sku mdog dmar po/__g.yas pad+ma dmar pos yu ba byas pa'i gri gug__/g.yon thod khrag__/rang 'dra'i yum dang 'khril ba gnyis ka shin tu chags pa'i nyams can/__19__/byang du las kyi dpa' bo sku mdog ljang gu/__g.yas sna tshogs rdo rjes yu ba byas pa'i gri gug__/g.yon thod khrag__/rang 'dra'i yum dang 'khril ba/__gnyis ka khros pa'i nyams can/__de lta bu'i dpa' bo rigs bzhi thams cad kyang dbu skra thor cog nor bus mtshan cing gser gyi 'khyud mos bsdams pa/__thod skam gyi dbu rgyan rin po che'i rtse bran can sogs yab rnams la rus pa'i rgyan drug dang /__yum rnams la rus pa'i rgyan lnga rin po che'i phras btab pas mdzes pa/__dar mthing khra'i zi ldir/__dar dpyangs ljang gu/__stod g.yogs sku yi tshon dang ma zlos pa'i ci mdzes/__sku smad la 'ja' dkris/__yab rnams la stag sham/__yum rnams la gzig sham/__yab rnams zhabs g.yon cung zad brkyang ba'i dor stabs/__yum rnams g.yon yab kyi rked la 'khril ba/__g.yas brkyang pa rnams te rtsa ba'i dkyil 'khor gyi lha tshogs so/__/zhar byung chos bdag bar chad sel ba'i chos bka' bzhi'i lha mgron la/__20_/thugs rje chen po'i g.yas su sgrol ljang spyi 'gre/__21__/tshe dpag g.yas su mi g.yo ba sku mdog dkar po khro zhing brjid pa'i nyams can zhal aM gtsigs bsdams pa/__skra dmar ser gyen du brdzes pa cung zad 'khyil ba'i rnam pa sbrul dkar khras bcings pa/__phyag g.yas ral gri me 'bar ba 'phyar stabs/__g.yon thugs kar sdigs mdzub dang bcas pas zhags pa sne mo gcig rdo rje dang /__gcig tu a long dang lcags kyus mtshan pa'i sne phrag pa g.yon pa'i gong du lding ba/__dar ljang gu'i dar dpyangs/__mgul du sbrul ser khra'i chun po dang /__rin po che'i do shal/__phyag zhabs la sbrul dang gser las byas pa'i gdu bu/__sku smad stag sham/__zhabs g.yas cung zad brkyang pa'i dor stabs kyis pad nyi 'chi bdag gi bdud nag po dang bcas pa'i steng du bzhengs pa/__22__/tshe dpag g.yon tu phyag rdor sku mdog mthing nag gnod sbyin khros pa'i nyams can/__spyan gsum zhal bgrad mche ba bzhi gtsigs pa/__dbu skra dang smar smin dmar ser/__phyag g.yas gnam lcags rdo rje rtse lnga nam mkhar gsor ba/__g.yon thugs kar sdigs mdzub bsgreng ba'i mdzub mo'i rtse las me dud kyi zhags pa 'phro ba'i rtser snyan g.yon pa'i thad tsam du bya khyung nag po lding ba'i rnam pa can/__dar sngon po'i stod g.yogs/__stag sham/__phyag zhabs dang mgul sogs sbrul brgyad kyis brgyan pa/__thod skam dbu rgyan/__thod rlon do shal/__zhabs g.yon brkyang pa'i dor stabs kyis pad+ma dang nyi ma dang /__bdud dkar ser dmar nag bzhi g.yas g.yon tu gnyis te bsnol ba'i steng du bzhengs pa/__23__/thugs rje chen po'i g.yon tu sme ba brtsegs pa/__sku mdog mthing nag srin po khros pa'i nyams can/__zhal gdangs ljags 'dril mche ba bzhi gtsigs pa/__spyan gsum pa/__dbu skra khams nag gyen brjes sbrul gyis bcings shing rtser rdo rje phyed pas mtshan pa/__thod skam lnga'i dbu rgyan rin po che'i rtse bran can la gshams rdo rje'i phreng ba 'khyud mo'i tshul gyis bsdams pa bde mchog gi dbu rgyan lta bu sogs rus pa'i rgyan drug la rin po che'i phras btab pa/__glang ko sogs dur khrod kyi chas brgyad dang /__ring thung thod rlon gyi do shal dang mtshungs pa'i rdo rje sngo skya'i phreng ba/__zhabs g.yon brkyangs pa'i dor stabs kyis pad nyi'i gdan la bzhengs pa'o/__/bla brgyud la/__24_/steng gi mi g.yo ba'i g.yas su khri srong bod chos rgyal gyi chas can yongs grags la/__phyag mnyam gzhag steng gser 'khor 'dzin pa/__25__/de'i 'og tu lha sras rol pa rtsal/__chos rgyal chas spyi ltar la/__phyag g.yas pus steng mchog sbyin tshul dang /__g.yon mnyam gzhag steng nor bu bsnams pa/__26__/phyag rdor g.yon tu/__mtsho rgyal bod mo'i chas can yongs grags ltar la phyag g.yas bsnyen phur pus mo'i steng du bsdigs shing /__g.yon mnyam gzhag steng dpe tshem bsnams pa/__27__/de'i 'og tu gter ston mchog gyur bde chen gling pa/__sku dkar la dmar smug gi mdangs can/__spyan gnyis hur re gzigs pa/__phyag g.yas thugs kar chos 'chad kyi phyag rgya dang /__g.yon mnyam gzhag steng gter sgrom rin po che'i za ma tog lta bu 'dzin pa/__dbu skra ral pa sil bu/__dbu zhwa deng sang yongs grags smin gling gangs zhu'i rnam pa la/__rgyu gos chen dmar chen nor bu cha bdun gser ma las grub cing /__kha 'dril sngo nag sprin ris can gyis byas pa/__na bza' nang du gsang gos dkar po/__sku 'gags ljang khra/__sku sham dkar po/__sku chings ljang ser/__sku sked du phur pa khro zhal can mthing khra'i cod pan can gzir ba/__sku gzan mon kha/__de steng zab ber dmar smug sprin khra can/_zhabs la sag l+h+wam 'ja' can mnabs shing g.yas cung zad brkyang pa'i phyed skyil gyis bzhugs pa/__chos rgyal sogs bla brgyud bzhi po'i gdan thams cad dar 'bol bkod pa ci mdzes su bri/__chos skyong skor la/__28__/'og gi dbus su la phyi chu bar gyi gangs ri bris rgyun gyi dpe dmigs bsal rnyed na dang /__gang ltar yang gangs ri bkod mdzes kyi mgul du sprin dang na bun 'khrigs pa/__'og gi char spangs ljongs dang skyed tshal sogs bkod pa shin tu mdzes shing nyams dga' ba'i dbus su/__bri bkod bde na dar dkar gyi lding gur rlung bskyod kyi rnam pa'i dbus kyi char/__gdan pad dkar dang zla ba'i steng du seng ge dkar mo dregs shing rgyags pa 'gying stabs su gnas pa/__de'i steng du gtso mo bkra shis tshe ring ma sku mdog dkar rkyang zhi zhing 'dzum la/__dbu skra thor tshugs dung dkar g.yas 'khyil gyis mtshan pa/__skra mtshams su rin po che'i prog zhu/__phyag g.yas gser gyi rdo rje rtse lnga pa dang bcas mda' dar sna lnga dung shwa me long gis mtshan pa g.yob pa'i tshul can/__g.yon pas gser gyi bum pa/__nor bu/__dpal be/__g.yung drung 'khyil ba gsum gyis kha brgyan pa thugs kar bsnams pa/__na bza' nang du gsang gos ljang gu/__de steng ber dmar po ske rags ljang ser gyis bcings pa/__de steng ber dkar po lhub gyon/__phyag zhabs su gser gyi gdu bu dang snyan rgyan/__mgul du rin po che'i phras btab pa'i mgul rgyan dang do shal zhabs rjen g.yon cung zad brkyang pa'i phyed skyil btsun mo rol stabs kyis bzhugs pa/__29__/de'i mdun g.yas su shar mthing gi zhal bzang sku mdog mthing gsal/__phyag g.yon dngul dkar me long thugs kar bsnams pa/__rkyang bu kha dkar la chibs shing /__dbu_ skra thor cog mu med gyi thor tshugs can/__30__/steng g.yas mi g.yo glang bzang ser mo/__g.yon gser gyi pad gzhong shing tog dang kha zas sna tshogs kyis gang ba thugs kar bsnams pa/__stag mo grus ma la chibs shing /__gser gyi thor tshugs can/__31__/steng g.yon nu bcod pan mgrin bzang sku mdog dmar gsal/__g.yon ne'u le nor bu skyugs pa dkur brten nas 'dzin pa/__sha ba yu mo la chibs shing /__bye ru'i thor tshugs can/__32__/'og g.yon byang tal dkar 'gro bzang ljang gsal/__g.yon rtswa dur ba'i chun po thugs kar bsnams pa/__g.yu 'brug sngon mo la chibs shing /__baiDUR+Ya'i thor tshugs can/__de thams cad kyang phyag g.yas pas mda' dar g.yab pa'i tshul gyis 'dzin pa/__na bza' dang /__rgyan cha ma gzhi gtso mo dang 'dra ba la/__kha dog sku mdog dang ma 'dres pa'i tshon mdangs gang mdzes su bri'o/__33__/g.yas kyi 'khor gnyis kyi bar gyi thad kar/__tshe ring ma'i sbas pa'i yab tshogs bdag dkar po glang po che'i gdong pa can/__phyag g.yas la phug lo ma dang bcas pa zhal gyi thad du nye bar 'dzin cing g.yon nor bu skyugs pa'i ne'u le dku g.yon par brten pa/__rin po che'i mgul rgyan/__phyag zhabs gser gdub/__sku stod la dar dpyangs ljang gu/__sku smad la dar dmar sham thabs/__zhabs phyed skyil gyis pad zlar bzhugs pa/__34_/g.yon du gter srung kha rag khyung btsun ma/__sku mdog dmar ser sgeg cing chags pa'i nyams can/__g.yas snyan gyi thad kar thod pa'i DA ru 'khrol ba/__g.yon thugs kar dngul gyi me long bsnams pa/__rgyan cha lugs tshe ring ma ltar la/__khyung chen lding ba'i tshul la zhon pa'o/__/tshe ring ma'i mdun 'og gi char bkra shis rdzas brgyad/__rtags brgyad/__rgyal srid sna bdun sogs/__sa mthong che chung dang bstun pa'i bkod mdzes su bri'o/__/spyir zhi ba rnams la 'ja' 'od dang dbu gor/__khro bo rnams la me ri/__gro lod la me dud/__zhi ma khro'i nyams can rnams la me ri pa tra phyag mtshan rigs rnams tshon rdzogs ma ma gtogs gser gyi thog bzhag 'od kor dang 'dres 'gro ba de 'dra mi byed/__dbu gor dang rgyab 'ja' sogs 'ja' 'od dwangs gsal ma gtogs tshon chen leb bzhag mi legs/__mdor na rgyud dang man ngag tshad ldan gyi rjes su 'brang ba'i thig dang phyag tshad ma 'khrul pa gzhir bzhag ste/__bye brag zhi ba rnams sgar bris kyi lugs sku dwangs la ma rnyogs pa/__gos ris dang bcad mdangs sogs kyi mang nyung mtshams shing rgyan cha sogs kyang ma 'dzing pa'i bkod legs dang /__khro bo rnams gtso bor rnam 'gyur sogs sman bris rnying ma gzhir bzhag la sgar bris kyis mdzes cha bton pa/__steng gi nam mkhar sprin khra shin tu dwangs nyams can/__bar gyi char spang ljongs gzhi ser du ma song ba'i dbyar nyams chags pa/__'og gi char ri dang /__chu dang /__me tog dang /__skyed tshal sogs kyang zing zing ma yin pa'i bkod legs yid chags shing mdzes par bri'o/__/de ltar legs par grub nas gong gsham zhal khebs sogs bkod mdzes su sbyar/__rgyab tu gnas yig dang snying pos mtshon pa bris te yar ngo'i tshes bcu lta bu'i dus tshes dge bar zab mo thugs kyi sgrub pa'i phrin las dang 'brel bar rab tu gnas pas/__mnga' gsol ba'i bris sku nyid gang du bzhugs pa'i sa phyogs kun tu o rgyan rin po che'i thugs rje'i byin rlabs lhag par 'jug pas phyi nang gsang ba'i bar chad thams cad zhi zhing /__phan bde'i 'dod rgu lhun gyis grub par spyi dang bye brag gi lung las gsal ba'i phyir/__dad 'byor dang ldan pa rnams kyis bsam sbyor rnam par dag pas bsgrubs na 'di phyi'i dge legs mchog tu rgyas par 'gyur ro/__/zhes pa'ang zab gter las byung zhal gdams yan lag dang bcas pa gzhir bzhag__/der mi gsal ba rnams bris rgyun tshad ldan gyi rjes su 'brangs te many+dzu g+ho Shas zin bris su bstar ba/__sarba dA shre yo b+ha ba tu//____//__!_