DKR-KABUM-02-KHA-050-02

🚧 This website is under continued development. We appreciate your patience!

First text in volume.Last text in volume.

Wylie title		page=1
Location	dil mgo mkhyen brtse bka' 'bum Volume 50, Text 2, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre

Tibetan Text

Wylie

[edit]

༈ རྒྱལ་བ་སྲས་དང་བཅས་པའི་ཡེ་ཤེས་ཀྱི་སྤྱི་གཟུགས་རྗེ་བཙུན་འཕགས་པ་འཇམ་དཔལ་དབྱངས་ལ་ཡིད་ཆེས་ཀྱིས་བསྟོད་པ་སྙན་ཚིག་རྒྱ་མཚོའི་སྒྲ་དབྱངས་ཞེས་བྱ་བ་བཞུགས་སོ། ན་མོ་གུ་རུ་མཉྫུ་གྷོ་ཥ་ཡེ། སྲས་བཅས་རྒྱལ་བའི་ཟག་མེད་ཡེ་ཤེས་སྐུ། །མཚན་དཔེའི་དཔལ་འབར་ཚངས་དབྱངས་གསུང་སྙན་སྒྲོགས། །ཟབ་གསལ་མཁྱེན་གཉིས་བསམ་མི་ཁྱབ་པའི་ཐུགས། །ངོ་མཚར་དཔག་ཡས་འདས་ལ་གུས་བསྟོད་བགྱི། །གཟོད་ནས་མངོན་སངས་རྒྱས་ཀྱང་འགྲོ་བའི་ཕྱིར། །རྒྱལ་སྲས་གཞོན་ནུའི་མཚན་དང་སྐུའི་བཀོད་པས། །ཕྱོགས་དུས་རབ་འབྱམས་ཞིང་ན་སྙན་གྲགས་པས། །ཕན་བདེ་ཟད་མི་ཤེས་པ་རྟག་ཏུ་སྟེར། །ཁྱོད་མཚན་དྲན་དང་རིགས་པའི་སྔགས་བཟླས་པས། །མི་ཟད་བློ་གྲོས་སྤོབས་པའི་མཆོག་སྩོལ་ཞིང༌། །སྲིད་དང་ཞི་བའི་དཔལ་ཀུན་སྩོལ་བ་ལ། །བསྙེལ་བ་མེད་པའི་གོ་ཆ་རྟག་ཏུ་བཞེས། །དམར་སེར་མདངས་ཀྱིས་སྐུ་མཆོག་བལྟ་ན་སྡུག །ཡེ་ཤེས་རལ་གྲི་སྲིད་རྩ་གཅོད་ཕྱིར་ཕྱར། །ཨུཏྤལ་གླེགས་བམ་ཕྱག་གཡོན་མཛེས་བཞིན་དུ། །ཞབས་ཟུང་སྐྱིལ་ཀྲུང་མི་གཡོའི་ཚུལ་གྱིས་བཞུགས། །གཞོན་མཛེས་ཨུཏྤལ་གསར་པའི་དྲི་བསུང་གིས། །རྐང་དྲུག་ཀུན་ཏུ་དགའ་བའི་མཆོག་སྟེར་བཞིན། །ཁྱོད་སྤྱན་བརྩེ་བས་གཡོ་བའི་འཕྲུལ་གྱིས་ཀྱང༌། །ཡིད་ལ་མི་ཟད་བློ་ཡིད་དཔལ་སྦྱིན་པ། །འཛུམ་པའི་མཆུ་སྒྲོས་བིམ་པ་ལྟར་དམར་ལས། །ཚངས་དབྱངས་གསུང་གིས་བདུད་རྩིའི་དཔལ་སྩོལ་མཛད། །མཛེས་སྡུག་རྫོགས་པའི་ཞལ་གྱི་དཀྱིལ་འཁོར་ནི། །ཉིན་མོར་བྱེད་བཞིན་ཡིད་ཀྱི་མུན་པ་སེལ། །མགོན་ཁྱོད་ཐུགས་བསྐྱེད་ཕྲིན་ལས་བསམ་མི་ཁྱབ། །ནམ་མཁའ་བཞིན་དུ་རབ་ཡངས་ཀུན་ལ་ཁྱབ། །དེ་ལས་དགེ་ལེགས་དཔལ་གྱི་ཡོན་ཏན་ཀྱང༌། །དཔྱིད་ཀྱི་དགའ་པའི་ཆར་སྤྲིན་བཞིན་དུ་འབེབས། །ཆོས་དབྱིངས་དང་མཉམ་སངས་རྒྱས་ཀུན་གྱི་དཔལ། །འཇམ་མགོན་གསང་བ་གསུམ་གྱི་རྒྱན་བཞིན་མཛེས། །རྗེ་བཙུན་ཟུར་ཕུད་ལྔ་པའི་རྣམ་ཐར་གྱིས། །སངས་རྒྱས་ཀུན་གྱི་མཛད་པ་མཛེས་ཤིང་སྟོན། །ཡེ་ཤེས་སྣང་བ་བརྒྱ་པས་མཁའ་ཁྱབ་ཀྱི། །ཀུན་རྨོངས་ཡིད་ཀྱིས་མུན་པ་སེལ་བའི་དཔེར། །དབང་སྔོན་མཛེས་བྱེད་བཅུ་གཉིས་བདག་པོ་ཡི། །གཟི་བརྗིད་ཕྲེང་བ་ཙམ་ལས་མེད་པར་ངེས། །ཡིད་ལ་ཀུན་དགའི་སིམ་སྟེར་ཟླ་བ་དང༌། །སྲིད་ཞིའི་གདུང་བ་སེལ་བའི་དཔྱིད་ཀྱི་དཔལ། །ཅི་མཆིས་མགོན་པོ་ཁྱོད་ཀྱིས་ཕྲིན་ལས་དང༌། །ཐུགས་བསྐྱེད་མཚོན་པའི་དཔལ་དུ་ཉེ་བར་གནས། །ལེགས་བྲིས་ཟས་མཆོག་མགོན་ཁྱོད་ཐུགས་རྗེའི་དཔལ། །མཚུངས་ཞེས་བདའ་དགུའི་རོ་ཙམ་མ་ཡིན་ཏེ། །གཏན་བདེའི་ལང་ཚོ་ཐོགས་མེད་སྦྱིན་པའི་མཐུ། །འཆི་མེད་བཅུད་ཀྱི་ལེན་དུ་གྱུར་འདིས་ཀྱང༌། །སངས་རྒྱས་ཀུན་གྱི་ཐུགས་གསང་དཔལ་བེའུར། །ཡེ་ཤེས་སེམས་དཔའ་གཞོན་ནུའི་ལང་ཚོ་ཅན། །མཚར་སྡུག་ཆ་ཤས་རྫོགས་པའི་ཨུཏྤ་ལར། །རྐང་དྲུག་མཛེས་པར་གཡེངས་དང་འབྱེད་ཆོས་དབེན། །ཡིད་འཕྲོག་ཀུན་དགའི་ཚལ་གྱིས་བལྟ་ན་སྡུག །གསལ་བྱེད་སྟེང་འཐུང་འཁྲི་ཤིང་སྙེམས་མའི་ཚལ། །རབ་འབྱམས་ཞིང་ན་འཇམ་མགོན་ཟུར་ཕུད་ལྔས། །རྣམ་ཐར་བཀོད་པ་འབུམ་ཕྲག་ཅི་ཡང་གསལ། །མཁའ་དབྱིངས་སྟོང་པས་སྣོད་བཅུད་འཇིག་རྟེན་ཁམས། །འཁྱུད་ཅེས་སྙེམས་པས་ཁེངས་འོས་ཅི་ཞིག་མཆིས། །རྒྱལ་ཀུན་ཡབ་ཅིག་ཐུགས་བསྐྱེད་ཞགས་པ་ཡིས། །མ་བཅིངས་ཡིད་ཅན་སྲིད་ཞིའི་ཁྱོན་མི་གནས། །མཐོ་རིས་བསོད་ནམས་དཔལ་གྱི་ལྷའི་རྔ་སྒྲ། །གདུལ་བྱའི་དབང་པོ་འབྱེད་པའི་བློ་ལྡན་ན། །ངག་གི་དབང་ཕྱུག་དགྱེས་པའི་རོལ་མོ་ཡིས། །ཟབ་རྒྱས་ཆོས་ཚུལ་འདོམས་དང་ཅིས་མི་མཚུངས། །ཀུན་མཁྱེན་ཡེ་ཤེས་མེ་ལོང་སྣང་བ་ཡིས། །དུས་གསུམ་ཤེས་བྱ་གཟིགས་པ་རྗེས་དྲན་པས། །དྭངས་ཤེལ་དཀྱིལ་འཁོར་གཟུགས་བརྒྱ་བཀྲ་བ་ལ། །དད་པའི་ཀུན་རྟོག་གཡོ་ལ་ཆས་སྙམ་བྱེད། །ལྷ་དབང་གཙུག་གི་ནོར་བུའི་སྣང་ཟེར་གྱིས། །སུམ་རྩེན་ཐ་གྲུར་ཁྱབ་པའི་དགའ་བའམ། །ཡབ་གཅིག་སྨྲ་བའི་ཉི་མའི་དགྱེས་ཞལ་ཟེར། །བདག་ལ་འཕོས་པ་མ་ཕྱེད་འཕྱང་མོ་ཉུག །ཡིད་ལ་དྲན་པས་ཕན་བདེའི་དབུགས་འབྱིན་ཞིང༌། །ལས་ཉོན་རྙོགས་པ་བགྲུངས་པའི་ཀེ་ཏ་ཀ །བདོག་པའི་ཆུ་གཏེར་འཕོས་པའི་དེ་མ་ཐག །འཇམ་མགོན་ཡེ་ཤེས་སྣང་བར་གཅིག་ཏུ་ངེས། །འཇམ་མཉེན་ཕྱག་གི་རལ་གྲིས་སྲིད་རྩ་གཅོད། །ཨུཏྤལ་མཁྱེན་བརྩེའི་དཔལ་གྱིས་སིམ་པ་སྟེར། །གླེགས་བམ་བསྣམས་པས་ཆོས་ཀུན་དེ་ཉིད་སྟོན། །ཡེ་ཤེས་སྣང་བ་བརྒྱ་པའི་དབུས་ན་མཛེས། །ནོར་བུའི་འོད་ཀྱིས་ས་འོག་མུན་སེལ་ཞིང༌། །སྣང་བྱེད་ཟུང་གིས་གླིང་བཞིའི་ཁྱོན་ཁྱབ་དང༌། །མཚུངས་པའི་སྣང་བ་འབུམ་འབྱེད་དཔལ་མཆིས་ན། །ངག་གི་དབང་པོའི་ཐུགས་རྗེའི་སྣང་སྟེར་མཚུངས། །མཛེས་སྡུག་དཔལ་དང་ཡིད་ལ་དགའ་སྟེར་ཞིང༌། །གཟི་བྱིན་སྣང་བའི་འོད་འབྱེད་བྱེད་པ་ཡིས། །འཇམ་མགོན་སྨྲ་བའི་ཉི་མ་བསྔགས་མིན་ཏེ། །དྲན་པས་ཐར་གྲོལ་པདྨ་བཞད་འདིས་ཀྱང༌། །རབ་འབྱམས་ཞིང་ན་རྒྱལ་དང་དེ་ཡི་སྲས། །བཟང་པོ་སྤྱོད་པ་རྒྱ་མཚོའི་རླབས་ཕྲེང་དང༌། །བདག་ཡིད་ངག་གི་དབང་ཕྱུག་སེམས་པ་ལས། །གཉིས་སུ་འབྱེད་ཆོས་བཙལ་ཀྱང་རྙེད་མི་སྲིད། །ཤེས་བྱའི་དངོས་ཀུན་གཟིགས་པའི་བློ་ལྡན་ཞེས། །རྒྱལ་ཀུན་ཡབ་གཅིག་ཐུགས་སྙེམས་མི་འཚལ་ཏེ། །ཆོས་དབྱིངས་དང་མཉམ་མགོན་པོ་ཐམས་ཅད་ཀྱང༌། །ཡེ་ཤེས་གཟིགས་པའི་སྤྱན་ཡངས་མངའ་ཞེས་གྲགས། །གསུང་འཕྲོ་ཅན།

[edit]

!___rgyal ba sras dang bcas pa'i ye shes kyi spyi gzugs rje btsun 'phags pa 'jam dpal dbyangs la yid ches kyis bstod pa snyan tshig rgya mtsho'i sgra dbyangs zhes bya ba bzhugs so/___na mo gu ru many+dzu g+ho Sha ye/__sras bcas rgyal ba'i zag med ye shes sku/__/mtshan dpe'i dpal 'bar tshangs dbyangs gsung snyan sgrogs/__/zab gsal mkhyen gnyis bsam mi khyab pa'i thugs/__/ngo mtshar dpag yas 'das la gus bstod bgyi/__/gzod nas mngon sangs rgyas kyang 'gro ba'i phyir/__/rgyal sras gzhon nu'i mtshan dang sku'i bkod pas/__/phyogs dus rab 'byams zhing na snyan grags pas/__/phan bde zad mi shes pa rtag tu ster/__/khyod mtshan dran dang rigs pa'i sngags bzlas pas/__/mi zad blo gros spobs pa'i mchog stsol zhing*/__/srid dang zhi ba'i dpal kun stsol ba la/__/bsnyel ba med pa'i go cha rtag tu bzhes/__/dmar ser mdangs kyis sku mchog blta na sdug__/ye shes ral gri srid rtsa gcod phyir phyar/__/ut+pal glegs bam phyag g.yon mdzes bzhin du/__/zhabs zung skyil krung mi g.yo'i tshul gyis bzhugs/__/gzhon mdzes ut+pal gsar pa'i dri bsung gis/__/rkang drug kun tu dga' ba'i mchog ster bzhin/__/khyod spyan brtse bas g.yo ba'i 'phrul gyis kyang*/__/yid la mi zad blo yid dpal sbyin pa/__/'dzum pa'i mchu sgros bim pa ltar dmar las/__/tshangs dbyangs gsung gis bdud rtsi'i dpal stsol mdzad/__/mdzes sdug rdzogs pa'i zhal gyi dkyil 'khor ni/__/nyin mor byed bzhin yid kyi mun pa sel/__/mgon khyod thugs bskyed phrin las bsam mi khyab/__/nam mkha' bzhin du rab yangs kun la khyab/__/de las dge legs dpal gyi yon tan kyang*/__/dpyid kyi dga' pa'i char sprin bzhin du 'bebs/__/chos dbyings dang mnyam sangs rgyas kun gyi dpal/__/'jam mgon gsang ba gsum gyi rgyan bzhin mdzes/__/rje btsun zur phud lnga pa'i rnam thar gyis/__/sangs rgyas kun gyi mdzad pa mdzes shing ston/__/ye shes snang ba brgya pas mkha' khyab kyi/__/kun rmongs yid kyis mun pa sel ba'i dper/__/dbang sngon mdzes byed bcu gnyis bdag po yi/__/gzi brjid phreng ba tsam las med par nges/__/yid la kun dga'i sim ster zla ba dang*/__/srid zhi'i gdung ba sel ba'i dpyid kyi dpal/__/ci mchis mgon po khyod kyis phrin las dang*/__/thugs bskyed mtshon pa'i dpal du nye bar gnas/__/legs bris zas mchog mgon khyod thugs rje'i dpal/__/mtshungs zhes bda' dgu'i ro tsam ma yin te/__/gtan bde'i lang tsho thogs med sbyin pa'i mthu/__/'chi med bcud kyi len du gyur 'dis kyang*/__/sangs rgyas kun gyi thugs gsang dpal be'ur/__/ye shes sems dpa' gzhon nu'i lang tsho can/__/mtshar sdug cha shas rdzogs pa'i ut+pa lar/__/rkang drug mdzes par g.yengs dang 'byed chos dben/__/yid 'phrog kun dga'i tshal gyis blta na sdug__/gsal byed steng 'thung 'khri shing snyems ma'i tshal/__/rab 'byams zhing na 'jam mgon zur phud lngas/__/rnam thar bkod pa 'bum phrag ci yang gsal/__/mkha' dbyings stong pas snod bcud 'jig rten khams/__/'khyud ces snyems pas khengs 'os ci zhig mchis/__/rgyal kun yab cig thugs bskyed zhags pa yis/__/ma bcings yid can srid zhi'i khyon mi gnas/__/mtho ris bsod nams dpal gyi lha'i rnga sgra/__/gdul bya'i dbang po 'byed pa'i blo ldan na/__/ngag gi dbang phyug dgyes pa'i rol mo yis/__/zab rgyas chos tshul 'doms dang cis mi mtshungs/__/kun mkhyen ye shes me long snang ba yis/__/dus gsum shes bya gzigs pa rjes dran pas/__/dwangs shel dkyil 'khor gzugs brgya bkra ba la/__/dad pa'i kun rtog g.yo la chas snyam byed/__/lha dbang gtsug gi nor bu'i snang zer gyis/__/sum rtsen tha grur khyab pa'i dga' ba'am/__/yab gcig smra ba'i nyi ma'i dgyes zhal zer/__/bdag la 'phos pa ma phyed 'phyang mo nyug__/yid la dran pas phan bde'i dbugs 'byin zhing*/__/las nyon rnyogs pa bgrungs pa'i ke ta ka__/bdog pa'i chu gter 'phos pa'i de ma thag__/'jam mgon ye shes snang bar gcig tu nges/__/'jam mnyen phyag gi ral gris srid rtsa gcod/__/ut+pal mkhyen brtse'i dpal gyis sim pa ster/__/glegs bam bsnams pas chos kun de nyid ston/__/ye shes snang ba brgya pa'i dbus na mdzes/__/nor bu'i 'od kyis sa 'og mun sel zhing*/__/snang byed zung gis gling bzhi'i khyon khyab dang*/__/mtshungs pa'i snang ba 'bum 'byed dpal mchis na/__/ngag gi dbang po'i thugs rje'i snang ster mtshungs/__/mdzes sdug dpal dang yid la dga' ster zhing*/__/gzi byin snang ba'i 'od 'byed byed pa yis/__/'jam mgon smra ba'i nyi ma bsngags min te/__/dran pas thar grol pad+ma bzhad 'dis kyang*/__/rab 'byams zhing na rgyal dang de yi sras/__/bzang po spyod pa rgya mtsho'i rlabs phreng dang*/__/bdag yid ngag gi dbang phyug sems pa las/__/gnyis su 'byed chos btsal kyang rnyed mi srid/__/shes bya'i dngos kun gzigs pa'i blo ldan zhes/__/rgyal kun yab gcig thugs snyems mi 'tshal te/__/chos dbyings dang mnyam mgon po thams cad kyang*/__/ye shes gzigs pa'i spyan yangs mnga' zhes grags/__/gsung 'phro can/