DKR-KABUM-09-TA-035

🚧 This website is under continued development. We appreciate your patience!

Previous Text"TA" is not a number. Back to Volume Page"TA" is not a number.Next Text "TA" is not a number.

Wylie title
Location	dil mgo mkhyen brtse bka' 'bum Volume , Text 35, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"TA" is not a number.

"TA" is not a number.

Tibetan Text

Wylie

[edit]

༄༅། རྫོགས་པ་ཆེན་པོ་སྡེ་གསུམ་གྱི་རྩ་གསུམ་ཀུན་བཟང་དོན་གྱི་ཕྲིན་ལས་ཀྱི་བྱང་བུ་སྤྱིའི་བསྐང་བ་རིན་ཆེན་སྣང་བ་བཀོད་པའི་སྤྲིན་ཆེན་ཞེས་བྱ་བ་བཞུགས། ཧཱུྃ་ཧྲཱིཿ ཆོས་ཀུན་ཀུན་བྱེད་བྱང་ཆུབ་སེམས་ཀྱི་དབྱིངས། །མ་བཅོས་མཉམ་པའི་དཀྱིལ་འཁོར་ལྷུན་གྱིས་གྲུབ། །ཀློང་ཡངས་བརྡལ་བ་ཆེན་པོ་ཆོས་སྐུའི་ངང༌། །བདེ་ཆེན་འདུ་འབྲལ་མེད་པའི་རྩ་གསུམ་ལྷ། །ཀུན་བཟང་སྒྱུ་འཕྲུལ་རྒྱན་གྱི་རོལ་མོ་ཆེ། །རང་སྣང་ལོངས་སྤྱོད་ཡོངས་རྫོགས་ཆེན་པོའི་སྤྲིན། །དག་པའི་སྣོད་བཅུད་ཀུན་བཟང་རྡོ་རྗེའི་ཞིང༌། །བླ་ན་མེད་པའི་ངོ་མཚར་བཀོད་པ་ནི། །ཕྱི་སྣོད་འོག་མིན་རྡོ་རྗེའི་གཞལ་མེད་ཁང༌། །རབ་འབྱམས་མཆོད་པའི་བཀོད་པ་བསམ་ལས་འདས། །ནང་བཅུད་ཡེ་ཤེས་ལྷ་དང་ཌཱ་ཀིའི་ཚོགས། །རྡོ་རྗེའི་གླུ་གར་རོལ་མོ་དང་བཅས་ཏེ། །ཕུལ་བྱུང་འདོད་ཡོན་བཀོད་པ་མ་ཚང་མེད། །ཟག་མེད་དཔལ་གྱི་འབྱོར་པ་རྒྱས་པ་འདིས། །བརྒྱུད་གསུམ་ཀུན་འདུས་རིག་རྩལ་དབང་ཐོབ་པས། །སྲིད་ཞིའི་སྤྱི་དཔལ་ཧེ་རུ་ཀ་ཆེན་པོ། །སྣང་སྲིད་ཟིལ་གནོན་འཇིགས་བྲལ་བརྟུལ་ཞུགས་གྲུབ། །རིག་འཛིན་ཤྲཱི་སེང་ཧའི་ཐུགས་དམ་བསྐང༌། །ཡེ་ཤེས་དགོངས་བརྒྱུད་ཀློང་ཡངས་གཅིག་ཏུ་སིམ། །རྣམ་འགྱུར་གང་འདུལ་སྐུ་དང་མཛད་པ་ཡིས། །ལས་དང་སྒྱུ་འཕྲུལ་རོལ་པ་འགག་མེད་སྟོན། །འགྲོ་འདུལ་སུམ་ཅུ་རྩ་གཅིག་ཐུགས་དམ་བསྐང༌། །མཆོག་ཏུ་མི་འགྱུར་ཡེ་ཤེས་བདེ་བ་ཆེ། །རྣམ་ཀུན་མཆོག་ལྡན་སྙེམས་མར་དགྱེས་རོལ་པས། །ཁ་སྦྱོར་བདུན་ལྡན་ཁྱབ་བདག་རྡོ་རྗེ་སེམས། །ཞི་བ་རྡོ་རྗེ་དབྱིངས་ཀྱི་ཐུགས་དམ་བསྐང༌། །སེམས་ཀྱི་འཁྲུལ་རྟོག་གཉུག་མའི་ངོ་བོར་དག །ཡུལ་དང་ཡུལ་ཅན་ཆོས་ཉིད་རྒྱན་དུ་ཤར། །གདོད་ནས་ལྷུན་གྲུབ་རྡོ་རྗེའི་དཀྱིལ་འཁོར་ཆེར། །ཀུན་བྱེད་བྱང་ཆུབ་སེམས་ཀྱི་དབྱིངས་གྲོལ་ཤོག །ཆོས་དབྱིངས་བྱང་ཆུབ་སེམས་ཀྱི་བདུད་རྩིའི་མཚོ། །ངོ་བོ་སྟོང་པར་རྗེས་ཆགས་རཀྟའི་སྐྱེམས། །ཀུན་བཟང་མཁའ་ཁྱབ་རང་ཤར་བ་ལིཾ་ཏ། །དམ་རྫས་རྒྱན་གྱི་མཆོད་པ་རྨད་བྱུང་བས། །མཁའ་ལྟར་མི་གཡོ་ཆོས་ཉིད་དགོངས་པ་དག །རང་བྱུང་ལྷུན་གྲུབ་ཐུགས་རྗེའི་འགྲོ་བ་འདུལ། །ཆོས་ཀྱི་དབྱིངས་སུ་མངོན་པར་བྱང་ཆུབ་པའི། །རིག་འཛིན་བླ་མ་བཅོ་ལྔའི་ཐུགས་དམ་བསྐང༌། །ཀུན་བཟང་གདོད་མའི་མགོན་པོའི་ཡེ་ཤེས་ཉིད། །གང་འདུལ་རོལ་པ་སྟོན་པ་བཅུ་གཉིས་ཚུལ། །སྐུ་ལྔའི་སངས་རྒྱས་ཐེག་མཆོག་ཆོས་འཁོར་བསྐོར། །ཞི་བ་མངོན་རྫོགས་དཀྱིལ་འཁོར་ཐུགས་དམ་བསྐང༌། །འཕགས་པའི་སྤངས་རྟོགས་ས་ལམ་ཡོན་ཏན་གཟུགས། །འགྲོ་སྒྲོལ་སླད་དུ་ཐེག་རིམ་དགུའི་དཀྱིལ་འཁོར། །ཡེ་ཤེས་ཀློང་དགུ་བདེ་གཤེགས་འདུས་པའི་ལྷ། །ཁྲག་འཐུང་མངོན་རྫོགས་རྒྱལ་པོའི་ཐུགས་དམ་བསྐང༌། །སྐྱེ་མེད་དབྱིངས་ཀྱི་རྒྱལ་མོ་རང་བྱུང་ལྷ། །འགག་མེད་བདེ་སྟོང་དགྱེས་མའི་རོལ་གར་ཆེ། །ཁྲག་འཐུང་སྒྲུབ་སྡེ་བརྒྱད་ཀྱི་ཡུམ་ཆེན་ཚུལ། །མཁའ་འགྲོ་རོ་ལངས་བདེ་མའི་ཐུགས་དམ་བསྐང༌། །ཀློང་ཆེན་དབྱིངས་སུ་བཅོས་མའི་ལྟ་སྒོམ་དག །ཆོས་ཉིད་མཁའ་ལས་ནམ་ཡང་འདུ་འབྲལ་མེད། །ཐུགས་རྗེའི་དབྱིངས་སུ་སྐུ་བཞི་ལྷུན་གྲུབ་པའི། །ལྟ་སྒོམ་སྤྱོད་པ་མཐར་སོན་བྱིན་གྱིས་རློབས། །མངོན་སུམ་ཆོས་ཉིད་ཡངས་པའི་བྷཉྫ་རུ། །སྣང་ཉམས་འོད་གསལ་ཚོགས་ཀྱི་དམ་ཚིག་རྫས། །རིག་པ་ཚད་ལ་ཕེབས་པའི་དགའ་སྟོན་དུ། །བློ་འདས་ཡིད་བྱེད་བྲལ་བས་ཐུགས་དམ་བསྐང༌། །ཀ་དག་དབྱིངས་སུ་སྟོན་འཁོར་དགོངས་པ་གཅིག །ལྷུན་གྲུབ་སྣང་ཆ་བརྡ་བརྒྱུད་རིག་འཛིན་དང༌། །སྙན་བརྒྱུད་བླ་མས་ཐེག་མཆོག་ལམ་སྟོན་མཛད། །བརྒྱུད་གསུམ་རིག་འཛིན་བླ་མའི་ཐུགས་དམ་བསྐང༌། །ཞི་བ་ལྷུན་གྱིས་གྲུབ་པའི་ཡེ་ཤེས་རྩལ། །འཇོམས་བྱེད་ཁྲོ་བོ་རོལ་པའི་དཀྱིལ་འཁོར་དུ། །ལྷུན་རྫོགས་གདན་གསུམ་ཡོངས་རྫོགས་འཁོར་ལོའི་སྤྲིན། །ཀུན་ཏུ་འབར་འཕྲོའི་ལྷ་ཡི་ཐུགས་དམ་བསྐང༌། །ཁྱབ་བརྡལ་ཡེ་ཤེས་ཀློང་ཆེན་རྣམ་དགུའི་མདངས། །མི་ཟད་རྒྱན་གྱི་འཁོར་ལོ་འབར་བའི་གཟུགས། །རིགས་ལྔ་ཕྱག་རྒྱའི་སྤྲིན་ཕུང་ཡོངས་རྫོགས་པ། །བདེ་གཤེགས་སྒྲུབ་པ་བཀའ་བརྒྱད་ཐུགས་དམ་བསྐང༌། །དབྱིངས་ཀྱི་ལྟ་བས་འཁྲུལ་རྟོག་གྲོང་ཁྱེར་འཇོམས། །འོད་གསལ་སྒོམ་པས་ཁམས་གསུམ་སྦུབས་ལས་གྲོལ། །སྣང་སྤྱོད་ཡེ་ཤེས་དབང་བསྒྱུར་སྤྱོད་པ་ཡིས། །ལྷུན་གྲུབ་འབྲས་བུའི་བཙན་ས་ཟིན་པར་མཛོད། །བདེ་ཆེན་རྡོ་རྗེ་བཙུན་མོའི་དབྱིངས་སྦྱོར་བས། །རྒྱུད་དྲུག་འཁྲུལ་པའི་རུ་ཏྲ་ཀློང་དུ་བསྒྲལ། །མཉམ་ཉིད་ཕྱོགས་ལྷུང་ཀུན་བྲལ་དེ་ཁོ་ན། །རོལ་པ་ཆེན་པོའི་མཆོད་པས་ཐུགས་དམ་བསྐང༌། །དབྱིངས་ཕྱུག་ཆོས་ཀྱི་གཉེར་འཛིན་མཁའ་འགྲོ་དགུ། །ཡེ་ཤེས་ཆོ་འཕྲུལ་འབར་མ་གཤོག་རྒོད་མ། །རྡོ་རྗེ་ལེགས་པ་ལྷ་བཙན་ཀླུའི་རྒྱལ་པོ། །བཀའ་གཏེར་ཆོས་སྲུང་རྒྱ་མཚོའི་ཐུགས་དམ་བསྐང༌། །ཡུལ་དང་དབང་པོའི་གཉིས་རྟོག་ལས་འདས་པའི། །རང་སྣང་ཡེ་ཤེས་རྒྱན་གྱི་རོལ་པ་ཆེ། །གདོད་ནས་ཤར་གྲོལ་གཉིས་མེད་ཆོས་སྐུའི་ཀློང༌། །དུས་གསུམ་མཉམ་ཉིད་དགྱེས་པས་ཐུགས་དམ་བསྐང༌། །ཧཱུྃ་ཧྲཱིཿ སྣང་བ་རྣམ་དག་ཡུམ་མཁའི་བྷཉྫ་རུ། །སྲིད་པ་བདེ་ཆེན་ཤར་བའི་ཚོགས་ཀྱི་རྫས། །དབང་ཡུལ་གཟུང་འཛིན་ལས་འདས་མཆོད་སྤྲིན་འདིས། །བུམ་དབང་དམ་སྐོང་སྤྲུལ་སྐུའི་དངོས་གྲུབ་སྩོལ། །མི་རྟོག་ཨ་ཝ་དྷཱུ་ཏིའི་བྷཉྫ་རུ། །རྩ་རླུང་ཐིག་ལེའི་བཅུད་ཀྱི་ཚོགས་རྫས་བཤམས། །འཕོ་འགྱུར་སྲེད་ལེན་ལས་འདས་མཆོད་སྤྲིན་འདིས། །གསང་དབང་དམ་སྐོང་ལོངས་སྐུའི་དངོས་གྲུབ་སྩོལ། །རྣམ་ཐར་སྒོ་གསུམ་ཡུམ་ལྔའི་བྷཉྫ་རུ། །ཐབས་མཆོག་ཡབ་ཀྱི་རྡོ་རྗེའི་ཚོགས་རྫས་བཤམས། །འཛག་བདེའི་ཞེན་གྲོལ་མཉམ་སྦྱོར་དགའ་བ་བཞིས། །ཤེར་དབང་དམ་སྐོང་ཆོས་སྐུའི་དངོས་གྲུབ་སྩོལ། །ཆོས་དབྱིངས་རང་བྱུང་གསང་བའི་བྷཉྫ་རུ། །རིག་པ་འོད་གསལ་ཆེན་པོའི་ཚོགས་གཏོར་བཤམས། །འཁོར་འདས་རང་གྲོལ་རྡོ་རྗེའི་མཆོད་པ་ཆེས། །བཞི་པའི་དམ་སྐོང་ངོ་བོ་ཉིད་སྐུར་སྩོལ། །དབྱིངས་སྣང་བརྡལ་བ་ཆེན་པོའི་བྷཉྫ་རུ། །ལྷུན་གྲུབ་སྣང་བཞིའི་སྤྲིན་གྱི་ཚོགས་རྫས་བཤམས། །ཟག་པ་རང་ཟད་དོན་གྱི་མཆོད་པ་ཆེས། །རིག་རྩལ་དམ་སྐོང་མི་འགྱུར་རྡོ་རྗེར་སྡོམ། །བསྐང་ངོ་ཡེ་ཤེས་དབྱིངས་ཀྱི་རྩ་གསུམ་ལྷ། །མཆོད་དོ་རྟག་ཏུ་དགྱེས་པའི་དཔལ་ལ་རོལ། །བསྐུལ་ལོ་རྟག་རྒྱུན་ཤུགས་ཀྱིས་ཐུགས་རྗེ་བསྐུལ། །མཛོད་ཅིག་ལས་དང་དངོས་གྲུབ་ཀུན་མཛོད་ཅིག །དབང་བཞིའི་དམ་ཚིག་རྡོ་རྗེ་བཞི་དབྱིངས་བསྐང༌། །ལྟ་བའི་དམ་ཚིག་དམིགས་གཏད་བྲལ་བར་བསྐང༌། །སྒོམ་པའི་དམ་ཚིག་རྩོལ་སྒྲུབ་འདས་པར་བསྐང༌། །སྤྱོད་པའི་དམ་ཚིག་བླང་དོར་མེད་པར་བསྐང༌། །སྣོད་བཅུད་རྒྱུད་གསུམ་ལྷ་སྔགས་ཡེ་ཤེས་ཤར། །རྩ་རླུང་ཐིག་ལེ་དྷཱུ་ཏིའི་སྦུབས་སུ་ཆུད། །ཅིར་སྣང་ཡེ་ཤེས་རྒྱན་གྱི་འཁོར་ལོ་ཆེ། །གཟུང་འཛིན་མཚན་རྟོག་འདས་པས་ཐུགས་དམ་བསྐང༌། །སྒྲུབ་ཏུ་མེད་པའི་ལྷ་མཆོག་རང་ཞིག་རྟོགས། །མཆོད་བསྐང་ཀུན་བྲལ་དགྱེས་པ་ཆེན་པོའི་ཀློང༌། །འོད་གསལ་སྣང་བཞིའི་གདངས་རྩལ་མཐར་ཕྱིན་ནས། །བྱར་མེད་ཆོས་སྐུའི་རྒྱལ་ས་ཟིན་པར་མཛོད། །རིག་རྩལ་དབང་གིས་འཁོར་འདས་རང་དབང་བསྒྱུར། །རྒྱལ་ཐབས་སྤྱི་བླུགས་དཀྱིལ་འཁོར་བདག་པོར་གྲུབ། །ལྷ་དང་གཉིས་མེད་རྒྱུད་ལུང་མན་ངག་མཛོད། །འཆད་རྩོམ་སྒྲུབ་པའི་ཆུ་བོ་བཞི་རྫོགས་ཤོག །སྐྱེ་འཆིའི་མཚན་རྟོག་ཀ་དག་དབྱིངས་སུ་ཟད། །རྡོས་བཅས་འཁྲུལ་པ་འོད་གསལ་མེ་ཡིས་སྦྱངས། །ཡེ་ཤེས་ཆེན་པོའི་དམ་ཚིག་ཡེ་སྲུང་གི །ཐིག་ལེ་གཅིག་ཏུ་གཉིས་མེད་སངས་རྒྱས་ཤོག །ཅེས་པའང་རང་ལོ་དྲུག་ཅུ་རྩ་གཅིག་ཏུ་སོན་པའི་སྐབས་རྫོགས་ཆེན་སྡེ་གསུམ་གྱི་ཆོས་སྐོར་ལ་བྲིས་སྤེལ་བགྱིས་པའི་སྐབས་ཉིང་འཁྲུལ་གྱི་སྣང་ཆར་པདྨ་ཤེལ་ཕུག་ཏུ་འཇམ་པའི་རྡོ་རྗེ་ཆོས་ཀྱི་བློ་གྲོས་རིན་པོ་ཆེ་དང༌། སྐྱབས་རྗེ་རབ་འབྱམས་གོང་མ་དང་ལྷན་ཅིག་རང་གི་དབུ་མཛད་ཀྱིས་ཡང་གཏེར་རྩ་གསུམ་དྲིལ་སྒྲུབ་ཀྱི་ཚོགས་འཁོར་ཞིག་བཏང་མུར་བསྐང་བའི་དབུར་སླེབས་པ་དང་རབ་འབྱམས་རིན་པོ་ཆེས་ཕྲན་ནས་སྟོང་ཚོགས་ཞིག་བསྒྲིགས་རྒྱུ་ཡིན་པས་ཅུང་ཟད་སྡོད་གསུངས་པས་རང་ནས་ཚོགས་བསྡུས་ཁ་ཤས་གྲངས་བསགས་པ་དང་ཕྱི་ནང་གསང་བ་དེ་ཁོ་ན་ཉིད་ཀྱི་ཚོགས་འཁོར་གྱི་གོ་དོན་ཁྱད་པར་ཅན་ཞིག་རིག་ངོར་གསལ་མ་ཐག་བསྐང་བཤགས་བཏང་བར་རྨིས་པས་ཡིད་བསྒུལ་ཏེ་འོད་གསལ་སྣ་ཚོགས་རང་གྲོལ་བཀྲ་ཤིས་དཔལ་འབྱོར་གྱིས་བྲིས་པ་སྐྱེ་ཀུན་ཐེག་པ་མཆོག་གི་སྟོན་དང་བསྟན་པ་དང་མི་འབྲལ་བར་ལོངས་སུ་སྤྱོད་པའི་རྒྱུར་གྱུར་ཅིག །།

[edit]

@#/_rdzogs pa chen po sde gsum gyi rtsa gsum kun bzang don gyi phrin las kyi byang bu spyi'i bskang ba rin chen snang ba bkod pa'i sprin chen zhes bya ba bzhugs/_hU~M hrIH_chos kun kun byed byang chub sems kyi dbyings/_/ma bcos mnyam pa'i dkyil 'khor lhun gyis grub/_/klong yangs brdal ba chen po chos sku'i ngang*/_/bde chen 'du 'bral med pa'i rtsa gsum lha/_/kun bzang sgyu 'phrul rgyan gyi rol mo che/_/rang snang longs spyod yongs rdzogs chen po'i sprin/_/dag pa'i snod bcud kun bzang rdo rje'i zhing*/_/bla na med pa'i ngo mtshar bkod pa ni/_/phyi snod 'og min rdo rje'i gzhal med khang*/_/rab 'byams mchod pa'i bkod pa bsam las 'das/_/nang bcud ye shes lha dang DA ki'i tshogs/_/rdo rje'i glu gar rol mo dang bcas te/_/phul byung 'dod yon bkod pa ma tshang med/_/zag med dpal gyi 'byor pa rgyas pa 'dis/_/brgyud gsum kun 'dus rig rtsal dbang thob pas/_/srid zhi'i spyi dpal he ru ka chen po/_/snang srid zil gnon 'jigs bral brtul zhugs grub/_/rig 'dzin shrI seng ha'i thugs dam bskang*/_/ye shes dgongs brgyud klong yangs gcig tu sim/_/rnam 'gyur gang 'dul sku dang mdzad pa yis/_/las dang sgyu 'phrul rol pa 'gag med ston/_/'gro 'dul sum cu rtsa gcig thugs dam bskang*/_/mchog tu mi 'gyur ye shes bde ba che/_/rnam kun mchog ldan snyems mar dgyes rol pas/_/kha sbyor bdun ldan khyab bdag rdo rje sems/_/zhi ba rdo rje dbyings kyi thugs dam bskang*/_/sems kyi 'khrul rtog gnyug ma'i ngo bor dag_/yul dang yul can chos nyid rgyan du shar/_/gdod nas lhun grub rdo rje'i dkyil 'khor cher/_/kun byed byang chub sems kyi dbyings grol shog_/chos dbyings byang chub sems kyi bdud rtsi'i mtsho/_/ngo bo stong par rjes chags rak+ta'i skyems/_/kun bzang mkha' khyab rang shar ba liM ta/_/dam rdzas rgyan gyi mchod pa rmad byung bas/_/mkha' ltar mi g.yo chos nyid dgongs pa dag_/rang byung lhun grub thugs rje'i 'gro ba 'dul/_/chos kyi dbyings su mngon par byang chub pa'i/_/rig 'dzin bla ma bco lnga'i thugs dam bskang*/_/kun bzang gdod ma'i mgon po'i ye shes nyid/_/gang 'dul rol pa ston pa bcu gnyis tshul/_/sku lnga'i sangs rgyas theg mchog chos 'khor bskor/_/zhi ba mngon rdzogs dkyil 'khor thugs dam bskang*/_/'phags pa'i spangs rtogs sa lam yon tan gzugs/_/'gro sgrol slad du theg rim dgu'i dkyil 'khor/_/ye shes klong dgu bde gshegs 'dus pa'i lha/_/khrag 'thung mngon rdzogs rgyal po'i thugs dam bskang*/_/skye med dbyings kyi rgyal mo rang byung lha/_/'gag med bde stong dgyes ma'i rol gar che/_/khrag 'thung sgrub sde brgyad kyi yum chen tshul/_/mkha' 'gro ro langs bde ma'i thugs dam bskang*/_/klong chen dbyings su bcos ma'i lta sgom dag_/chos nyid mkha' las nam yang 'du 'bral med/_/thugs rje'i dbyings su sku bzhi lhun grub pa'i/_/lta sgom spyod pa mthar son byin gyis rlobs/_/mngon sum chos nyid yangs pa'i b+hany+dza ru/_/snang nyams 'od gsal tshogs kyi dam tshig rdzas/_/rig pa tshad la phebs pa'i dga' ston du/_/blo 'das yid byed bral bas thugs dam bskang*/_/ka dag dbyings su ston 'khor dgongs pa gcig_/lhun grub snang cha brda brgyud rig 'dzin dang*/_/snyan brgyud bla mas theg mchog lam ston mdzad/_/brgyud gsum rig 'dzin bla ma'i thugs dam bskang*/_/zhi ba lhun gyis grub pa'i ye shes rtsal/_/'joms byed khro bo rol pa'i dkyil 'khor du/_/lhun rdzogs gdan gsum yongs rdzogs 'khor lo'i sprin/_/kun tu 'bar 'phro'i lha yi thugs dam bskang*/_/khyab brdal ye shes klong chen rnam dgu'i mdangs/_/mi zad rgyan gyi 'khor lo 'bar ba'i gzugs/_/rigs lnga phyag rgya'i sprin phung yongs rdzogs pa/_/bde gshegs sgrub pa bka' brgyad thugs dam bskang*/_/dbyings kyi lta bas 'khrul rtog grong khyer 'joms/_/'od gsal sgom pas khams gsum sbubs las grol/_/snang spyod ye shes dbang bsgyur spyod pa yis/_/lhun grub 'bras bu'i btsan sa zin par mdzod/_/bde chen rdo rje btsun mo'i dbyings sbyor bas/_/rgyud drug 'khrul pa'i ru tra klong du bsgral/_/mnyam nyid phyogs lhung kun bral de kho na/_/rol pa chen po'i mchod pas thugs dam bskang*/_/dbyings phyug chos kyi gnyer 'dzin mkha' 'gro dgu/_/ye shes cho 'phrul 'bar ma gshog rgod ma/_/rdo rje legs pa lha btsan klu'i rgyal po/_/bka' gter chos srung rgya mtsho'i thugs dam bskang*/_/yul dang dbang po'i gnyis rtog las 'das pa'i/_/rang snang ye shes rgyan gyi rol pa che/_/gdod nas shar grol gnyis med chos sku'i klong*/_/dus gsum mnyam nyid dgyes pas thugs dam bskang*/_/hU~M hrIH_snang ba rnam dag yum mkha'i b+hany+dza ru/_/srid pa bde chen shar ba'i tshogs kyi rdzas/_/dbang yul gzung 'dzin las 'das mchod sprin 'dis/_/bum dbang dam skong sprul sku'i dngos grub stsol/_/mi rtog a wa d+hU ti'i b+hany+dza ru/_/rtsa rlung thig le'i bcud kyi tshogs rdzas bshams/_/'pho 'gyur sred len las 'das mchod sprin 'dis/_/gsang dbang dam skong longs sku'i dngos grub stsol/_/rnam thar sgo gsum yum lnga'i b+hany+dza ru/_/thabs mchog yab kyi rdo rje'i tshogs rdzas bshams/_/'dzag bde'i zhen grol mnyam sbyor dga' ba bzhis/_/sher dbang dam skong chos sku'i dngos grub stsol/_/chos dbyings rang byung gsang ba'i b+hany+dza ru/_/rig pa 'od gsal chen po'i tshogs gtor bshams/_/'khor 'das rang grol rdo rje'i mchod pa ches/_/bzhi pa'i dam skong ngo bo nyid skur stsol/_/dbyings snang brdal ba chen po'i b+hany+dza ru/_/lhun grub snang bzhi'i sprin gyi tshogs rdzas bshams/_/zag pa rang zad don gyi mchod pa ches/_/rig rtsal dam skong mi 'gyur rdo rjer sdom/_/bskang ngo ye shes dbyings kyi rtsa gsum lha/_/mchod do rtag tu dgyes pa'i dpal la rol/_/bskul lo rtag rgyun shugs kyis thugs rje bskul/_/mdzod cig las dang dngos grub kun mdzod cig_/dbang bzhi'i dam tshig rdo rje bzhi dbyings bskang*/_/lta ba'i dam tshig dmigs gtad bral bar bskang*/_/sgom pa'i dam tshig rtsol sgrub 'das par bskang*/_/spyod pa'i dam tshig blang dor med par bskang*/_/snod bcud rgyud gsum lha sngags ye shes shar/_/rtsa rlung thig le d+hU ti'i sbubs su chud/_/cir snang ye shes rgyan gyi 'khor lo che/_/gzung 'dzin mtshan rtog 'das pas thugs dam bskang*/_/sgrub tu med pa'i lha mchog rang zhig rtogs/_/mchod bskang kun bral dgyes pa chen po'i klong*/_/'od gsal snang bzhi'i gdangs rtsal mthar phyin nas/_/byar med chos sku'i rgyal sa zin par mdzod/_/rig rtsal dbang gis 'khor 'das rang dbang bsgyur/_/rgyal thabs spyi blugs dkyil 'khor bdag por grub/_/lha dang gnyis med rgyud lung man ngag mdzod/_/'chad rtsom sgrub pa'i chu bo bzhi rdzogs shog_/skye 'chi'i mtshan rtog ka dag dbyings su zad/_/rdos bcas 'khrul pa 'od gsal me yis sbyangs/_/ye shes chen po'i dam tshig ye srung gi_/thig le gcig tu gnyis med sangs rgyas shog_/ces pa'ang rang lo drug cu rtsa gcig tu son pa'i skabs rdzogs chen sde gsum gyi chos skor la bris spel bgyis pa'i skabs nying 'khrul gyi snang char pad+ma shel phug tu 'jam pa'i rdo rje chos kyi blo gros rin po che dang*/_skyabs rje rab 'byams gong ma dang lhan cig rang gi dbu mdzad kyis yang gter rtsa gsum dril sgrub kyi tshogs 'khor zhig btang mur bskang ba'i dbur slebs pa dang rab 'byams rin po ches phran nas stong tshogs zhig bsgrigs rgyu yin pas cung zad sdod gsungs pas rang nas tshogs bsdus kha shas grangs bsags pa dang phyi nang gsang ba de kho na nyid kyi tshogs 'khor gyi go don khyad par can zhig rig ngor gsal ma thag bskang bshags btang bar rmis pas yid bsgul te 'od gsal sna tshogs rang grol bkra shis dpal 'byor gyis bris pa skye kun theg pa mchog gi ston dang bstan pa dang mi 'bral bar longs su spyod pa'i rgyur gyur cig_//