བདེ་ཆེན་འོད་དཀར་སོགས། རྡོ་རྗེ་ཕག་མོ་བདེ་ཆེན་དཀར་མོའི་ཚེ་དང་ཡེ་ཤེས་སྤེལ་བའི་བྱིན་རླབས་དབང་གི་རིམ་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bde chen 'od dkar sogs/ rdo rje phag mo bde chen dkar mo'i tshe dang ye shes spel ba'i byin rlabs dbang gi rim pa
Location	dil mgo mkhyen brtse bka' 'bum Volume 6, Text 36, Pages 288-292 (Folios 1a1 to 5a2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	Khyentse, Dilgo. Bde chen 'od dkar sogs rdo rje phag mo bde chen dkar mo'i tshe dang ye shes spel ba'i byin rlabs dbang gi rim pa. In Skyabs rje dil mgo mkhyen brtse rin po che'i bka' 'bum, Vol. 6: 288-292. Delhi: Shechen Publications, 1994.
Genre	Empowerment Ritual - dbang chog - dbang skur
Cycle	རྩ་གསུམ་འོད་གསལ་སྙིང་ཏིག་ (rtsa gsum 'od gsal snying tig)
Deity	phag dkar
Colophon	།རྡོ་རྗེ་ལྟ་བུའི་ཡེ་ཤེས་གསུང༌། །གཟུ་ལུམ་ཚིག་གིས་བསླད་མིན་ཡང༌། །ཐུགས་མཆོག་དྭངས་མ་གསང་བའི་ཚིག །མཛེས་རྒྱན་སྲི་ཞུའི་བསྙེན་བཀུར་ཕུལ།།
	/rdo rje lta bu'i ye shes gsung*/_/gzu lum tshig gis bslad min yang*/_/thugs mchog dwangs ma gsang ba'i tshig_/mdzes rgyan sri zhu'i bsnyen bkur phul//

Tibetan Text

Wylie

[edit]

༄༅། །བདེ་ཆེན་འོད་དཀར་བདུད་རྩིའི་མྱོས་པའི་མ། །རྡོ་རྗེ་ཚེ་དང་ཡེ་ཤེས་གཟི་བརྗིད་དཔལ། །ལྷན་སྐྱེས་དཀྱིལ་འཁོར་རྫོགས་པའི་ལྷར་འཆར་བར། །བཏུད་ནས་འཆི་མེད་དབང་གི་དགའ་སྟོན་འགྱེད། །རྩ་གསུམ་འོད་གསལ་སྙིང་ཐིག་གི་རྡོ་རྗེ་ཕག་མོ་བདེ་ཆེན་དཀར་མོའི་ཚེ་དང་ཡེ་ཤེས་སྤེལ་བའི་བྱིན་རླབས་དབང་གི་རིམ་པ་གཉིས་སུ་བཞུགས་པ་ལས། སྔ་མ་ཇི་ལྟར་བྱ་བའི་ཚུལ་ནི་གཞུང་མཐུན་གྱི་དཀྱིལ་འཁོར་དབུས་སུ་ཚེ་འབྲང་ཐབས་ཤེས་ཀྱི་རྫས་ཚེ་རིལ་ཆང་གཡས་གཡོན་དུ་བཀོད་ལ། ཉེར་སྤྱོད་མཆོད་པས་བསྐོར། སྨན་རཀ་གཏོར་མ། དཀར་བགེགས་ཚོགས་མཆོད་སོགས་ཉེར་མཁོ་འདུ་བྱས་ལ་ལས་གཞུང་བསྲང༌། བདག་མདུན་གྱི་དམིགས་བཟླས་ཚེ་སྒྲུབ་ལྟར་སྦྱར་ལ། མཆོད་བསྟོད་དང་ཚེ་འགུགས་རྒྱས་གདབ་མཐར། ལས་ཐམས་ཅད་པའི་བསང་ཆུ། ཨོཾ་ས་ཀརྨ་དྷཱ་ཀི་ནི་ཕཊ། བརྒྱ་རྩ་བཟླས་པས་ནུས་ལྡན་དུ་སྒྲུབ། མདུན་བསྐྱེད་ལས་འོད་ཟེར་ཆུ་རྒྱུན་གཅིག་པའི་དབང་བླང་ལ་གནང་བ་ཞུ། དོན་དུ་གཉེར་བའི་སློབ་མ་ཁྲུས་ནས་དབྱུང༌། བགེགས་བསྐྲད། སྲུང་འཁོར་གསལ་བཏབ་རྗེས། རྡོ་རྗེ་ཐེག་པའི་དངོས་གྲུབ་ཀྱི་སྒོ་ཐམས་ཅད་ཀྱི་རྩ་བ་ནི་ལྷན་ཅིག་སྐྱེས་པའི་ཡེ་ཤེས་ཆེན་པོའི་གསང་བ་མངོན་དུ་བྱེད་པ་འབའ་ཞིག་ལ་རག་ལས་ཤིང༌། ཡེ་ཤེས་ཆེན་པོ་ནམ་མཁའི་གཟུགས་ཅན་དེ་མངོན་དུ་གྱུར་ན་ཇི་ལྟར་འདོད་པའི་ལས་རབ་འབྱམས་ཐོགས་མེད་དུ་སྒྲུབ་པ་ལ་དཀའ་བ་མེད་པ་བདེ་བླག་ཏུ་དབང་འབྱོར་བར་འགྱུར་བས། ཡེ་ཤེས་ཉིད་ཀྱང་དོན་གྱི་རྡོ་རྗེ་བཙུན་མོ་ཆོས་སྐུ་རྡོ་རྗེ་ཕག་མོའམ་འཕགས་གཞི་འབྱུང་གནས་ཡུམ་ཆེན་མོའི་དེ་ཉིད་དེ། དེ་མངོན་དུ་བྱ་ཕྱིར་བརྡ་དང་རྟགས་ཀྱི་རྡོ་རྗེ་ཕག་མོ་ཟབ་གསལ་མཁའ་འགྲོའི་ལྷ་སྔགས་ཏིང་ངེ་འཛིན་གྱི་མྱུར་ལམ་ཟབ་མོའི་ཐབས་ལ་བརྟེན་ནས་མྱུར་དུ་རྟོགས་ནུས་པའི་ཕྱིར་མཁའ་འགྲོ་སྒྲུབ་པའི་དབང་དང་སྒྲུབ་ཐབས་དུ་མ་འབྱུང་ཞིང༌། དེ་ལའང་རིགས་དང་ཡེ་ཤེས་ཕྲིན་ལས་ཀྱི་དབྱེ་བས་མཚན་དང་སྐུའི་བཀོད་པ་དཀྱིལ་འཁོར་གྱི་སྤྲོ་བསྡུའི་ཆོ་འཕྲུལ་ཟད་མི་ཤེས་པ་བཞུགས་པ་ལས། འདིར་བཅོམ་ལྡན་འདས་མ་སྐུ་དེ་བཞིན་གཤེགས་རིགས་རྡོ་རྗེ་ཕག་མོ་ཞི་བྱེད་དཀར་མོའི་ཚེ་དང་ཡེ་ཤེས་སྤེལ་བའི་ལྷ་སྔགས་ཟབ་མྱུར་བྱིན་བརླབ་ཀྱི་ཚན་ཀ་མཚུངས་པ་མེད་པ་འདི་ཉིད་ཤིན་ཏུ་རྣམ་པར་དག་པའི་དགོངས་མཛོད་ཡེ་ཤེས་ཀྱི་རང་སྣང༌། ཆོས་རྒྱུན་གྱི་ཏིང་ངེ་འཛིན་གྱི་བྱེད་ལས་སྐད་ཅིག་རེ་རེར་ཡང་སངས་རྒྱས་དང་བྱང་སེམས། ལྷ་དང་ཌཱ་ཀིའི་ཟབ་རྒྱས་ཀྱི་རྒྱུད་ལུང་མན་ངག་གི་མཛོད་གཏད་པས་གསང་བ་ཟབ་མོ་སྤེལ་བ་དང་སྡུད་པའི་བྱིན་རླབས་ཀྱི་མཚན་མ་བརྙེས་པའི་ངོ་མཚར་ཟད་མི་ཤེས་པའི་བདག་ཉིད་ཆེན་པོ་འོད་གསལ་སྤྲུལ་པའི་རྡོ་རྗེ་ལ་བཀའ་བབས་བདུན་དུ་བཞུགས་པའི་བྱེ་བྲག །དགོངས་གཏེར་རྩ་གསུམ་འོད་གསལ་སྙིང་ཐིག་གི་ཕྲིན་ལས་རྩ་བ་མཁའ་འགྲོའི་སྒྲུབ་ཐབས། རིགས་ལྔ་ཡེ་ཤེས་ཀྱི་ཌཱ་ཀི་སྤྱི་དང་བྱེ་བྲག་གིས་ལས་དང་དངོས་གྲུབ་སྒྲུབ་པའི་ཐབས་ཟབ་རྒྱས་སུ་བཞུགས་པ་ལས་རྡོ་རྗེ་ཕག་མོ་དཀར་མོའི་འཆི་མེད་ཚེ་སྒྲུབ་པའི་དབང་གི་ཆོ་ག་བགྱིད་པ་ལ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཧོཿ བདེ་ཆེན་ཡེ་ཤེས་སྣང་བ་ཅན༔ ཁྱབ་བདག་རྡོ་རྗེ་བཙུན་མོ་དང༔ དབྱེར་མེད་དཔལ་ལྡན་བླ་མ་ཡིས༔ ཚེ་དང་ཡེ་ཤེས་དབང་མཆོག་སྩོལ༔ ལན་གསུམ། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྗེ་བཙུན་རྡོ་རྗེ་ཕག་མོའི་ལྷ་ཚོགས་ལ་བདག་གཞན་ཡིད་ཅན་ཐམས་ཅད་བྱང་ཆུབ་མ་ཐོབ་བར་སྐྱབས་སུ་འགྲོ་བས་ཐུགས་རྗེས་བཟུང་དུ་གསོལ་སྙམ་ལ་འདིའི་རྗེས་ཟློས་མཛོད། ན་མོཿ ཕྱོགས་དུས་རྒྱལ་བ་རབ་འབྱམས་ཀྱི༔ ཡེ་ཤེས་ཆེན་པོའི་ངོ་བོ་ཉིད༔ བླ་མ་རྡོ་རྗེ་རྣལ་འབྱོར་མར༔ མི་ཕྱེད་གུས་པས་སྐྱབས་སུ་མཆི༔ ལན་གསུམ། མཁའ་ཁྱབ་ཀྱི་སེམས་ཅན་བླ་ན་མེད་པའི་བྱང་ཆུབ་ལ་འགོད་པའི་ཆེད་དུ་ཡེ་ཤེས་མཁའ་འགྲོའི་དཀྱིལ་འཁོར་ལ་ཞུགས་ནས་དབང་གིས་སྨིན་པར་སློབ་སྙམ་པས་སེམས་བསྐྱེད་པའི་རྗེས་ཟློས་མཛོད། ཧོཿ གཟུང་འཛིན་འཁྲུལ་པའི་འགྲོ་བ་རྣམས༔ འོད་གསལ་རྣམ་ཀུན་མཆོག་ལྡན་དབྱིངས༔ འཕོ་འགྱུར་མེད་པ་རོ་གཅིག་ཕྱིར༔ རྡོ་རྗེ་བཙུན་མོར་བསྒོམ་པར་བགྱི༔ ལན་གསུམ། བསགས་སྦྱང་གི་སྙིང་པོ་རྒྱུན་བཤགས་ཡན་ལག་བརྒྱད་པ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་སོགས་ལན་གསུམ། དེ་ནས་དབང་གི་གཞི་འགོད་པའི་ཕྱིར་ཡེ་ཤེས་པ་དབབ་པ་ལ་དམིགས་པ་འདི་བཞིན་མཛོད། ལས་སྔགས་ཀྱིས་བསང༌། སྭ་བྷཱ་ཝས་སྦྱངས། གཟུང་འཛིན་གྱི་སྣང་བ་ཐམས་ཅད་འོད་གསལ་སྟོང་ཉིད་ཀྱི་དབྱིངས་སུ་སྦྱངས། སྟོང་པའི་ངང་ལས་སྣོད་རྣམ་པར་དག་པ་འོག་མིན་བདེ་ཆེན་མཁའ་ལ་སྤྱོད་པའི་ཞིང་ཁམས་ངོ་མཚར་བཀོད་པ་འབྱམས་ཀླས་པའི་དབུས་སུ། བཅུད་རྣམ་པར་དག་པ་ཁྱེད་རང་རྣམས་གང་དུ་གནས་པའི་གོ་སར་པདྨ་རབ་ཏུ་རྒྱས་པའི་ལྟེ་བར་ཉི་མའི་དཀྱིལ་འཁོར་བམ་རོ་དང་བཅས་པའི་གདན་གྱི་སྟེང་དུ། རང་རིག་བདེ་བ་ཆེན་པོའི་ངོ་བོ་བཾ་ཡིག་དཀར་པོ་ལས་འོད་ཟེར་འཕྲོ་འདུས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ཁྱེད་རང་རྣམས་རྗེ་བཙུན་རྡོ་རྗེ་ཕག་མོ་སྟོན་ཀའི་ཟླ་བ་རྒྱས་པའི་མདངས་ཅན། ཞལ་གཅིག་ཁྲོ་ཞིང་འཛུམ་པའི་དབུ་གཙུག་ཏུ་ཕག་ཞལ་ངུར་སྒྲ་སྒྲོགས་པ་ཕྱག་གཉིས་ཀྱི་གཡས་རྡོ་རྗེའི་གྲི་གུག་འཕྱར་སྟབས་སུ་འཛིན་ཅིང༌། གཡོན་པས་ཐོད་ཁྲག་ཐུགས་ཀར་བསྣམས་པ། མཆན་ཁུང་གཡོན་ན་ཁ་ཊྭཱཾ་ག་རྩེ་གསུམ་པས་མཚན་པ་གཞོན་ཚུལ་ཆགས་པའི་ཉམས་ཅན་མཚན་དཔེའི་གཟི་མདངས་འབར་བ། དར་དང་རིན་པོ་ཆེ་རུས་པའི་རྒྱན་གྱིས་སྤྲས་ཤིང་ཞབས་གཡས་བསྐུམ་གཡོན་བརྐྱང་བའི་གར་སྟབས་ཀྱིས་རྟོག་མེད་བམ་རོའི་སྙིང་གར་བརྫིས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་འོད་འབར་བའི་ཀློང་ན་བཞུགས་པའི་གནས་གསུམ་དུ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་ཨོཾ་ཨཱཿ་ཧཱུྃ་གིས་མཚན་པར་གསལ་ཐོབ་ལ། རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ། སློབ་དཔོན་ལ་རྣལ་འབྱོར་མ་དངོས་ཡིན་སྙམ་པའི་མོས་གུས་དྲག་པོ་བྱས་པས་ཐུགས་ཀ་ནས་བདེ་བ་ཆེན་པོའི་ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས། སྐུ་གསུམ་གྱི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་རྣམས་དང༌། ཁྱད་པར་ཀུན་བཟང་རྡོ་རྗེ་རྣལ་འབྱོར་མའི་ཐུགས་རྒྱུད་རང་དབང་མེད་པར་བསྐུལ་ཏེ་གསང་བ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་ཁ་ཆར་བུ་ཡུག་འཚུབས་པ་བཞིན་བྱོན་ཏེ་ཁྱེད་རང་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཅེས་བརྡ་སྦྱར་ལ་སྤོས་རོལ་ཌཱ་དྲིལ་དབྱངས་དང་བཅས་པས། ཧཱུྃ༔ བཞེངས་ཤིག་སྐུ་གསུམ་སོགས་ཕྲིན་ལས་ལྟར་བྱིན་འབེབས་སྔགས་བཅས་བརྗོད་དེ་དབབ། ཏིཥྛ་བཛྲས་བརྟན་པར་བྱ། དེ་ནས་འཆི་མེད་རྡོ་རྗེ་ཚེ་ཡི་དབང་བསྐུར་བ་ལ། ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ། བདག་མདུན་གྱི་ལྷ་ཚོགས་རྣམས་ཀྱི་སྐུ་ལས་འོད་ཟེར་འཕྲོས་པས་ཕྱོགས་བཅུའི་ཞིང་རབ་འབྱམས་ཐམས་ཅད་དུ་ཁྱབ། ཕྱོགས་དུས་རྒྱལ་བ་སྲས་དང་བཅས་པའི་མཁྱེན་བརྩེ་ནུས་པའི་ཡེ་ཤེས་དང་ཡོན་ཏན། ཕྱི་སྣོད་འབྱུང་བ་བཞིའི་དྭངས་མ། ནང་བཅུད་སྐྱེ་འགྲོའི་ཚེ་བསོད་དཔལ་འབྱོར་དབང་ཐང༌། ཆོས་སྲིད། སྒྲུབ་བྱ་རང་རང་གི་བླ་ཚེ་འཁྱམས་པ། ཡར་བ། གདོན་གྱི་ཁྱེར་བ། བརྐུས་པ། གཞོམ་པ་དང༌། བན་བོན་མཐུ་བོ་ཆེའི་ངན་སྔགས་ཀྱི་སྦྱོར་བས་ཚེ་སྲོག་འཕྲོག་པ་སོགས་རང་དབང་མེད་པར་འཆི་མེད་ཡེ་ཤེས་ཀྱི་བདུད་རྩིའི་ཟེགས་མའི་རྣམ་པར་བསྡུས་ཏེ། སློབ་མ་དང་ཚེ་ཡི་རྫས་རྣམས་ལ་བསྟིམས་པས་འཆི་མེད་ཡེ་ཤེས་ཀྱི་བདུད་རྩིར་གྱུར་ཅིང༌། སློབ་མ་རྣམས་ལ་ཐིམ་པས་བདུད་རྩིའི་དྭངས་མ་སྲོག་གི་ཟུངས་སུ་སྨིན་ཅིང༌། རྡོ་རྗེ་གསུམ་གྱི་གསང་བ་གཞོམ་མེད་ཡེ་ཤེས་ཀྱི་ཕྱག་རྒྱར་གྲུབ་པར་མོས་ཤིག །མདའ་དར་གཡབ་སྟེ། ཨོཾ༔ མེ་ལོང་ལྟ་བུའི་ཡེ་ཤེས་སོགས་ཀྱིས་ཚེ་འགུགས་བསྐུལ་མཐར།ཚེ་འབྲང་འཆི་མེད་རྡོ་རྗེ་ཚེ་ཡི་ཕོ་བྲང་གི་དབུས་སུ་བཅོམ་ལྡན་འདས་མ་རྡོ་རྗེ་ཕག་མོ་འཆི་མེད་ཚེ་ཡི་ལྷ་ཚོགས་བཞུགས་པའི་སྐུ་ལས་ཡེ་ཤེས་བདུད་རྩིའི་ཟིལ་མངར་བར་མ་ཆད་པ་བྱུང༌། མ་ཤོང་བ་ཁ་ནས་ལུད་བཞིན་སྤྱི་བོར་བཞག་པས་ཚངས་བུག་ནས་ལུས་ཀྱི་ནང་ཐམས་ཅད་གང༌། ཟག་བཅས་སྐྱེ་འཆིའི་རྒུད་པ་གསོས། ནད་གདོན་བར་ཆད་མ་ལུས་པ་བསལ། སྣང་སྟོང་སྒྱུ་མ་ལྟ་བུའི་བདེ་ཆེན་རྡོ་རྗེའི་སྐུ་འགྲུབ་པར་མོས་མཛོད། ཚེ་འབྲང་སྤྱི་བོར་བཞག་ལ། ཨོཾ༔ མི་འགྱུར་རྟག་པའི་ཡེ་ཤེས་སྐུ༔ བདེ་གཤེགས་ཚེ་ཡི་དབང་བསྐུར་བས༔ ལུས་ཀྱི་སྒྲིབ་པ་ཀུན་དག་ནས༔ འཕོ་མེད་རྡོ་རྗེའི་སྐུ་འགྲུབ་ཤོག༔ ཀཱ་ཡ་ཨ་བྷི་ཥིཉྩ་ཨོཾ༔ སྟོང་ཉིད་དབྱིངས་ཀྱི་བྷཉྫར་བདེ་ཆེན་བྱང་ཆུབ་སེམས་ཀྱི་བདུད་རྩི་བྱིན་པས་རླུང་གི་འཕོ་བ་དྷུ་ཏིའི་སྲོག་ཏུ་ཞུགས་གནས་ཐིམ་གསུམ་གྱིས་གཞོམ་མེད་རྡོ་རྗེ་ནཱ་དའི་ཚེ་ཡི་དངོས་གྲུབ་ཐོབ་པར་མོས་མཛོད། བདུད་རྩི་བྱིན་ལ། ཨཱཿ འགགས་མེད་ནཱ་དའི་ཡེ་ཤེས་གསུང༔ པདྨ་ཚེ་ཡི་དབང་བསྐུར་བས༔ ངག་གི་སྒྲིབ་པ་ཀུན་དག་ནས༔ མི་ཕྱེད་རྡོ་རྗེའི་གསུང་འགྲུབ་ཤོག༔ ཝཱཀ་ཨ་བྷི་ཥིཉྩ་ཨཱཿ སྙིང་དབུས་མི་ཤིགས་དྭངས་མ་ལྔ་འདུས་ཀྱི་རིལ་བུ་བྱིན་པ་རྡོ་རྗེ་ལྕེ་ཡི་ལམ་བརྒྱུད་སྙིང་གར་ཡེ་ཤེས་སེམས་དཔའ་སྐྱེ་འཆི་བགྲེས་རྒུད་དང་བྲལ་བར་བཞུགས་ནས་ཡེ་ཤེས་རྡོ་རྗེ་ཚེ་ཡི་དངོས་གྲུབ་མངོན་སུམ་དུ་འགྲུབ་པར་མོས་མཛོད། རིལ་བུ་སྙིང་གར་བཏུགས་ཤིང་ཁར་བྱིན་ལ། ཧཱུྃ༔ འོད་གསལ་གཉུག་མའི་ཡེ་ཤེས་ཐུགས༔ རྡོ་རྗེ་ཚེ་ཡི་དབང་བསྐུར་བས༔ ཡིད་ཀྱི་སྒྲིབ་པ་ཀུན་དག་ནས༔ མཁའ་ཁྱབ་རྡོ་རྗེའི་ཐུགས་འགྲུབ་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ལྟར་རྡོ་རྗེ་གསུམ་གྱི་བྱིན༔ བདུད་རྩིའི་ལུས་ཀྱི་ནང་གང་བས༔ ཚེ་དང་ཡེ་ཤེས་མཆོག་འགྲུབ་ཅིང༔ དྭངས་མ་སྙིང་དབུས་ཧྲཱིཿལ་ཐིམ༔ མི་ཕྱེད་རྡོ་རྗེའི་སྲོག་ཐོབ་གྱུར༔ ཚེ་མདའ་སྤྱི་བོར་རྒྱ་གྲམ་དུ་བཀོད་ལ། ཨཿ སྲིད་ཞི་དྭངས་བཅུད་སྙིང་དབུས་ཀྱི༔ མི་ཤིགས་ཐུགས་སྲོག་ལྷ་ལ་ཐིམ༔ རྡོ་རྗེའི་གོ་ཆས་རྒྱས་བཏབ་པས༔ འཕོ་མེད་གཉུག་མའི་སྲོག་འགྲུབ་ཤོག༔ ཛྙཱ་ན་བཛྲ་རཀྵ་རཀྵ་ཧཱུྃ༔ སྐབས་སུ་བབ་པའི་ཤིས་པ་བརྗོད་ཅིང་མེ་ཏོག་འཐོར། དེ་དག་གིས་ཞི་བྱེད་དཀར་མོ་རྡོ་རྗེ་མཁའ་འགྲོའི་ཚེ་ཡི་དབང་བསྐུར་གྲུབ་པ་ཡིན་པས་དམ་ཚིག་ཁས་བླང་གཏང་རག་མཎྜལ་ལུས་འབུལ་བྱ་ཞིང་དགེ་བ་བསྔོ། ཚོགས་མཆོད་སོགས་ལས་བྱང་གི་རྗེས་རིམ་མཐར་དབྱུང་བས་གྲུབ་པའོ། །རྡོ་རྗེ་ལྟ་བུའི་ཡེ་ཤེས་གསུང༌། །གཟུ་ལུམ་ཚིག་གིས་བསླད་མིན་ཡང༌། །ཐུགས་མཆོག་དྭངས་མ་གསང་བའི་ཚིག །མཛེས་རྒྱན་སྲི་ཞུའི་བསྙེན་བཀུར་ཕུལ།། །།

[edit]

@#/__/bde chen 'od dkar bdud rtsi'i myos pa'i ma/__/rdo rje tshe dang ye shes gzi brjid dpal/_/lhan skyes dkyil 'khor rdzogs pa'i lhar 'char bar/__/btud nas 'chi med dbang gi dga' ston 'gyed/_/rtsa gsum 'od gsal snying thig gi rdo rje phag mo bde chen dkar mo'i tshe dang ye shes spel ba'i byin rlabs dbang gi rim pa gnyis su bzhugs pa las/_snga ma ji ltar bya ba'i tshul ni gzhung mthun gyi dkyil 'khor dbus su tshe 'brang thabs shes kyi rdzas tshe ril chang g.yas g.yon du bkod la/__nyer spyod mchod pas bskor/_sman raka gtor ma/_dkar bgegs tshogs mchod sogs nyer mkho 'du byas la las gzhung bsrang*/__bdag mdun gyi dmigs bzlas tshe sgrub ltar sbyar la/_mchod bstod dang tshe 'gugs rgyas gdab mthar/_las thams cad pa'i bsang chu/__oM sa karma d+hA ki ni phaT/_brgya rtsa bzlas pas nus ldan du sgrub/__mdun bskyed las 'od zer chu rgyun gcig pa'i dbang blang la gnang ba zhu/_don du gnyer ba'i slob ma khrus nas dbyung*/_bgegs bskrad/_srung 'khor gsal btab rjes/__rdo rje theg pa'i dngos grub kyi sgo thams cad kyi rtsa ba ni lhan cig skyes pa'i ye shes chen po'i gsang ba mngon du byed pa 'ba' zhig la rag las shing*/_ye shes chen po nam mkha'i gzugs can de mngon du gyur na ji ltar 'dod pa'i las rab 'byams thogs med du sgrub pa la dka' ba med pa bde blag tu dbang 'byor bar 'gyur bas/__ye shes nyid kyang don gyi rdo rje btsun mo chos sku rdo rje phag mo'am 'phags gzhi 'byung gnas yum chen mo'i de nyid de/_de mngon du bya phyir brda dang rtags kyi rdo rje phag mo zab gsal mkha' 'gro'i lha sngags ting nge 'dzin gyi myur lam zab mo'i thabs la brten nas myur du rtogs nus pa'i phyir mkha' 'gro sgrub pa'i dbang dang sgrub thabs du ma 'byung zhing*/_de la'ang rigs dang ye shes phrin las kyi dbye bas mtshan dang sku'i bkod pa dkyil 'khor gyi spro bsdu'i cho 'phrul zad mi shes pa bzhugs pa las/__'dir bcom ldan 'das ma sku de bzhin gshegs rigs rdo rje phag mo zhi byed dkar mo'i tshe dang ye shes spel ba'i lha sngags zab myur byin brlab kyi tshan ka mtshungs pa med pa 'di nyid shin tu rnam par dag pa'i dgongs mdzod ye shes kyi rang snang*/_chos rgyun gyi ting nge 'dzin gyi byed las skad cig re rer yang sangs rgyas dang byang sems/_lha dang DA ki'i zab rgyas kyi rgyud lung man ngag gi mdzod gtad pas gsang ba zab mo spel ba dang sdud pa'i byin rlabs kyi mtshan ma brnyes pa'i ngo mtshar zad mi shes pa'i bdag nyid chen po 'od gsal sprul pa'i rdo rje la bka' babs bdun du bzhugs pa'i bye brag_/dgongs gter rtsa gsum 'od gsal snying thig gi phrin las rtsa ba mkha' 'gro'i sgrub thabs/_rigs lnga ye shes kyi DA ki spyi dang bye brag gis las dang dngos grub sgrub pa'i thabs zab rgyas su bzhugs pa las rdo rje phag mo dkar mo'i 'chi med tshe sgrub pa'i dbang gi cho ga bgyid pa la maN+Dal phul/_gsol ba gdab pa 'di'i rjes zlos mdzod/_hoH_bde chen ye shes snang ba can:_khyab bdag rdo rje btsun mo dang:_dbyer med dpal ldan bla ma yis:_tshe dang ye shes dbang mchog stsol:_lan gsum/_mdun gyi nam mkhar bla ma dang gnyis su med pa'i rje btsun rdo rje phag mo'i lha tshogs la bdag gzhan yid can thams cad byang chub ma thob bar skyabs su 'gro bas thugs rjes bzung du gsol snyam la 'di'i rjes zlos mdzod/_na moH_phyogs dus rgyal ba rab 'byams kyi:_ye shes chen po'i ngo bo nyid:_bla ma rdo rje rnal 'byor mar:_mi phyed gus pas skyabs su mchi:_lan gsum/_mkha' khyab kyi sems can bla na med pa'i byang chub la 'god pa'i ched du ye shes mkha' 'gro'i dkyil 'khor la zhugs nas dbang gis smin par slob snyam pas sems bskyed pa'i rjes zlos mdzod/_hoH_gzung 'dzin 'khrul pa'i 'gro ba rnams:_'od gsal rnam kun mchog ldan dbyings:_'pho 'gyur med pa ro gcig phyir:_rdo rje btsun mor bsgom par bgyi:_lan gsum/_bsags sbyang gi snying po rgyun bshags yan lag brgyad pa 'di'i rjes zlos mdzod/_rdo rje slob dpon sangs rgyas sogs lan gsum/_de nas dbang gi gzhi 'god pa'i phyir ye shes pa dbab pa la dmigs pa 'di bzhin mdzod/__las sngags kyis bsang*/_swa b+hA was sbyangs/_gzung 'dzin gyi snang ba thams cad 'od gsal stong nyid kyi dbyings su sbyangs/_stong pa'i ngang las snod rnam par dag pa 'og min bde chen mkha' la spyod pa'i zhing khams ngo mtshar bkod pa 'byams klas pa'i dbus su/_bcud rnam par dag pa khyed rang rnams gang du gnas pa'i go sar pad+ma rab tu rgyas pa'i lte bar nyi ma'i dkyil 'khor bam ro dang bcas pa'i gdan gyi steng du/_rang rig bde ba chen po'i ngo bo baM yig dkar po las 'od zer 'phro 'dus don gnyis byas/_tshur 'dus yongs su gyur pa las khyed rang rnams rje btsun rdo rje phag mo ston ka'i zla ba rgyas pa'i mdangs can/_zhal gcig khro zhing 'dzum pa'i dbu gtsug tu phag zhal ngur sgra sgrogs pa phyag gnyis kyi g.yas rdo rje'i gri gug 'phyar stabs su 'dzin cing*/_g.yon pas thod khrag thugs kar bsnams pa/_mchan khung g.yon na kha T+wAM ga rtse gsum pas mtshan pa gzhon tshul chags pa'i nyams can mtshan dpe'i gzi mdangs 'bar ba/_dar dang rin po che rus pa'i rgyan gyis spras shing zhabs g.yas bskum g.yon brkyang ba'i gar stabs kyis rtog med bam ro'i snying gar brdzis pa/_sku las skyes pa'i ye shes kyi me 'od 'bar ba'i klong na bzhugs pa'i gnas gsum du sangs rgyas thams cad kyi rdo rje gsum gyi rang bzhin oM AH hU~M gis mtshan par gsal thob la/_rgyud rnam par dag pa ye shes lha'i gzi byin dbab pa'i slad du/_slob dpon la rnal 'byor ma dngos yin snyam pa'i mos gus drag po byas pas thugs ka nas bde ba chen po'i ye shes kyi 'od zer mkha' khyab tu 'phros/_sku gsum gyi zhing khams rab 'byams na bzhugs pa'i rgyal ba sras dang bcas pa rnams dang*/_khyad par kun bzang rdo rje rnal 'byor ma'i thugs rgyud rang dbang med par bskul te gsang ba gsum gyi byin rlabs dang dngos grub thams cad sku phyag rgya/_gsung yig 'bru/_thugs phyag mtshan gyi rnam pa kha char bu yug 'tshubs pa bzhin byon te khyed rang la sib sib thim pas rgyud byin gyis brlabs pa'i mos pa mdzod/_ces brda sbyar la spos rol DA dril dbyangs dang bcas pas/__hU~M:_bzhengs shig sku gsum sogs phrin las ltar byin 'bebs sngags bcas brjod de dbab/__tiSh+Tha badz+ras brtan par bya/_de nas 'chi med rdo rje tshe yi dbang bskur ba la/_thog mar tshe 'gugs shing bcud bsdu ba'i slad du/_bdag mdun gyi lha tshogs rnams kyi sku las 'od zer 'phros pas phyogs bcu'i zhing rab 'byams thams cad du khyab/_phyogs dus rgyal ba sras dang bcas pa'i mkhyen brtse nus pa'i ye shes dang yon tan/_phyi snod 'byung ba bzhi'i dwangs ma/_nang bcud skye 'gro'i tshe bsod dpal 'byor dbang thang*/_chos srid/_sgrub bya rang rang gi bla tshe 'khyams pa/_yar ba/_gdon gyi khyer ba/_brkus pa/_gzhom pa dang*/_ban bon mthu bo che'i ngan sngags kyi sbyor bas tshe srog 'phrog pa sogs rang dbang med par 'chi med ye shes kyi bdud rtsi'i zegs ma'i rnam par bsdus te/_slob ma dang tshe yi rdzas rnams la bstims pas 'chi med ye shes kyi bdud rtsir gyur cing*/_slob ma rnams la thim pas bdud rtsi'i dwangs ma srog gi zungs su smin cing*/_rdo rje gsum gyi gsang ba gzhom med ye shes kyi phyag rgyar grub par mos shig_/mda' dar g.yab ste/_oM:_me long lta bu'i ye shes sogs kyis tshe 'gugs bskul mthar/tshe 'brang 'chi med rdo rje tshe yi pho brang gi dbus su bcom ldan 'das ma rdo rje phag mo 'chi med tshe yi lha tshogs bzhugs pa'i sku las ye shes bdud rtsi'i zil mngar bar ma chad pa byung*/_ma shong ba kha nas lud bzhin spyi bor bzhag pas tshangs bug nas lus kyi nang thams cad gang*/_zag bcas skye 'chi'i rgud pa gsos/_nad gdon bar chad ma lus pa bsal/_snang stong sgyu ma lta bu'i bde chen rdo rje'i sku 'grub par mos mdzod/_tshe 'brang spyi bor bzhag la/__oM:_mi 'gyur rtag pa'i ye shes sku:_bde gshegs tshe yi dbang bskur bas:_lus kyi sgrib pa kun dag nas:_'pho med rdo rje'i sku 'grub shog:_kA ya a b+hi Shiny+tsa oM:_stong nyid dbyings kyi b+hany+dzar bde chen byang chub sems kyi bdud rtsi byin pas rlung gi 'pho ba d+hu ti'i srog tu zhugs gnas thim gsum gyis gzhom med rdo rje nA da'i tshe yi dngos grub thob par mos mdzod/_bdud rtsi byin la/__AH__'gags med nA da'i ye shes gsung:_pad+ma tshe yi dbang bskur bas:_ngag gi sgrib pa kun dag nas:_mi phyed rdo rje'i gsung 'grub shog:_wAka a b+hi Shiny+tsa AH__snying dbus mi shigs dwangs ma lnga 'dus kyi ril bu byin pa rdo rje lce yi lam brgyud snying gar ye shes sems dpa' skye 'chi bgres rgud dang bral bar bzhugs nas ye shes rdo rje tshe yi dngos grub mngon sum du 'grub par mos mdzod/_ril bu snying gar btugs shing khar byin la/_hU~M:_'od gsal gnyug ma'i ye shes thugs:_rdo rje tshe yi dbang bskur bas:_yid kyi sgrib pa kun dag nas:__mkha' khyab rdo rje'i thugs 'grub shog:_tsit+ta a b+hi Shiny+tsa hU~M:_de ltar rdo rje gsum gyi byin:_bdud rtsi'i lus kyi nang gang bas:_tshe dang ye shes mchog 'grub cing:_dwangs ma snying dbus hrIHla thim:_mi phyed rdo rje'i srog thob gyur:_tshe mda' spyi bor rgya gram du bkod la/__aH_srid zhi dwangs bcud snying dbus kyi:_mi shigs thugs srog lha la thim:_rdo rje'i go chas rgyas btab pas:_'pho med gnyug ma'i srog 'grub shog:_dz+nyA na badz+ra rak+Sha rak+Sha hU~M:_skabs su bab pa'i shis pa brjod cing me tog 'thor/__de dag gis zhi byed dkar mo rdo rje mkha' 'gro'i tshe yi dbang bskur grub pa yin pas dam tshig khas blang gtang rag maN+Dal lus 'bul bya zhing dge ba bsngo/_tshogs mchod sogs las byang gi rjes rim mthar dbyung bas grub pa'o/__/rdo rje lta bu'i ye shes gsung*/_/gzu lum tshig gis bslad min yang*/_/thugs mchog dwangs ma gsang ba'i tshig_/mdzes rgyan sri zhu'i bsnyen bkur phul//___//