JKW-KABUM-21-ZHA-022-002

🚧 This website is under continued development. We appreciate your patience!

Previous Text Back to Volume PageLast text in section.

གྲུབ་ཐོབ་རིལ་དཀར་གྱི་སྒོམ་ལུང་དང་ཕྱག་ལེན་འཕོགས་ཚུལ་ཐང་སྟོང་དགོངས་རྒྱན།

Wylie title	grub thob ril dkar gyi sgom lung dang phyag len 'phogs tshul thang stong dgongs rgyan
Location	mkhyen brtse'i bka' 'bum Volume 21, sde tshan 22, Text 2, Pages 582-593 (Folios 3b5 to 9a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub thob ril dkar gyi sgom lung dang phyag len 'phogs tshul thang stong dgongs rgyan. In 'jam dbyangs mkhyen brtse'i dbang po'i bka' 'bum, Vol. 21: 582-593. Khams sde dge rdzong sar dgon: Rdzong sar blo gros phun tshogs, 2020.
Genre	Medicinal Pills - Making and Activating Practices - sman sgrub
Colophon	།ཅེས་པ་འདི་ནི་གདན་ས་ཆེན་པོ་དཔལ་ལྡན་ས་སྐྱར་ནད་རིམས་མི་གཅིག་པ་སྣ་ཚོགས་བྱུང་བར། སྔགས་བོན་རྣམས་ཀྱིས་མདོས་གཏོར་སྨན་སྔགས་སྲུང་བ་སོགས་གང་བསྒྲུབས་ཀྱང་མ་ཕན་པར་གདན་ས་སྟོངས་ལ་ཐུག་པའི་སྐབས། རྗེ་གྲུབ་ཐོབ་ཆེན་པོས་མ་ནམ་མཁའ་མའི་སྐྱབས་འགྲོ་གྱིས། མ་ཎི་བསྒྲངས། སྨོན་ལམ་འདི་ཐོབ་ཅེས་བཀའ་སྩལ་བ་བཞིན་བགྱིས་པ་ལ་བརྟེན་ནད་ཡམས་ཐམས་ཅད་འཕྲལ་དུ་ཆད་པས། ས་སྐྱ་ནད་གྲོལ་མའི་སྨོན་ལམ་ཞེས་རྡོ་རྗེའི་གསུངས་བྱིན་རླབས་ཀྱི་སྤྲིན་ཕུང་འཕྲོ་བར་གྲགས་སོ། །མངྒ་ལཾ།།
	ces pa 'di ni gdan sa chen po dpal ldan sa skyar nad rims mi gcig pa sna tshogs byung bar/__sngags bon rnams kyis mdos gtor sman sngags srung ba sogs gang bsgrubs kyang ma phan par gdan sa stongs la thug pa'i skabs/__rje grub thob chen pos ma nam mkha' ma'i skyabs 'gro gyis/__ma Ni bsgrangs/__smon lam 'di thob ces bka' stsal ba bzhin bgyis pa la brten nad yams thams cad 'phral du chad pas/_sa skya nad grol ma'i smon lam zhes rdo rje'i gsungs byin rlabs kyi sprin phung 'phro bar grags so/__/mang+ga laM//

1 Texts in this Section (sde tshan or chos tshan)

2 582-593	གྲུབ་ཐོབ་རིལ་དཀར་གྱི་སྒོམ་ལུང་དང་ཕྱག་ལེན་འཕོགས་ཚུལ་ཐང་སྟོང་དགོངས་རྒྱན། grub thob ril dkar gyi sgom lung dang phyag len 'phogs tshul thang stong dgongs rgyan Medicinal Pills - Making and Activating Practices - sman sgrub	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

གྲུབ་ཐོབ་རིལ་དཀར་གྱི་སྒོམ་ལུང་དང་ཕྱག་ལེན་འཕོགས་ཚུལ་ཐང་སྟོང་དགོངས་རྒྱན་བཞུགས་སོ།། །།ན་མོ་གུ་རུ་དེ་ཝ་ཌཱ་ཀི་ནཱི་བྷྱཿ འདིར་གྲུབ་ཐོབ་ཡོངས་ཀྱི་གཙུག་རྒྱན་དམ་པ་ལྕགས་ཟམ་པ་ཐང་སྟོང་རྒྱལ་པོའི་གདམས་པ་རིལ་དཀར་གྱི་སྒོམ་ལུང་དང་ཕྱག་ལེན་བཅས་འབོགས་པར་འདོད་ན། །ཐོད་པ་མཚན་ལྡན་བྱུང་ན་རབ། དེ་མིན་རིན་པོ་ཆེའི་སྣོད་གས་ཆག་མེད་པ་ཅི་རིགས་ཤིག་ཆང་བཟང་པོས་བཀང་བ་དང་། འཐོར་ནས་རྣམས་ཚོགས་པར་བསགས་ལ། དེ་ནས་སློབ་དཔོན་གྱིས་འདི་སྐད་བརྗོད་དོ། །ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་གྲུབ་ཐོབ་རིལ་དཀར་གྱི་སྒོམ་ལུང་ཕྱག་ལེན་དང་བཅས་པ་གསན་སྙམ་པའི་འདུན་པ་རྩེ་གཅིག་པ་མཛོད། །དེ་ཡང་གདམས་པ་འདིའི་ལོ་རྒྱུས་ཅུང་ཞིག་གླེང་ན། གྲུབ་པའི་དབང་ཕྱུག་དམ་པ་ཐང་སྟོང་རྒྱལ་པོ་དེ་ཉིད། དཔའ་ལྕགས་ཟམ་རི་བོ་ཆེའི་རྩེ་ན་ཏིང་ངེ་འཛིན་ལ་བཞུགས་པའི་ཚེ་སྐབས་ཞིག་ན། སྔར་མ་བྱུང་ཞིང་ཕྱིས་འབྱུང་བར་མི་འགྱུར་བའི་ནམ་མཁའ་ལ་འཇའ་དང་འོད་དང་སྒྲ་ལ་སོགས་པ་ལྟས་ཁྱད་པར་ཅན་དུ་མ་བྱུང་བས་གྲུབ་ཐོབ་ཆེན་པོས་འདི་ཅི་ཡིན་སྙམ་དུ་དགོངས་པའི་ཚེ། ཏིང་ངེ་འཛིན་གྱིས་བརྟགས་པས། རིག་འཛིན་ཆེན་པོ་པདྨ་འབྱུང་གནས་ཀྱི་ཐུགས་རྗེའི་འོད་ཟེར་དུ་རིག་སྟེ། ནམ་མཁའི་མཐོངས་ལ་གཟིགས་པས། ཨོ་རྒྱན་གྱིས་ཡུལ་ནས་འོད་སྐྱ་ཐལ་ལེ་བ་དར་ལམ་བརྐྱང་བ་ལྟ་བུའི་སྣ་ལ། མཁའ་འགྲོ་མ་སྐུ་མདོག་དཀར་སེར་དམར་ལྗང་མཐིང་ག་ཞལ་གཅིག་ཕྱག་གཉིས་མ། གཡས་ཌཱ་མ་རུ་འཁྲོལ་ཞིང་། གཡོན་ཐོད་པ་བདུད་རྩིས་གང་བའི་སྟེང་ན་སྨན་གྱིས་གང་བའི་པར་བུ་བསྣམས་ཤིང་། གྲུ་མོ་ན་ཁ་ཊྭཱྃ་ག་བཀལ་བ་བརྐྱང་བསྐུམ་གར་སྟབས་མཛད་ཅིང་བྱོན་ནས། མཁའ་འགྲོ་མ་དེ་རྣམས་ཀྱི་ནང་ནས་དབུས་མའི་ཞལ་ནས་དཔའ་བོ་ཆེན་པོ་ཁྱེད་ཀྱིས་འགྲོ་བ་སེམས་ཅན་ཐམས་ཅད་ཀྱི་སེམས་ཀྱི་སྡུག་བསྔལ་རྣམས་ཞི་བར་མཛད་པ་ལ་བདག་ཀྱང་ཡི་རང་མོད། ད་ནི་ལུས་ཀྱི་ནད་ཐམས་ཅད་སེལ་བའི་གདམས་པ། ཚེགས་ཆུང་ལ་དོན་རྒྱ་ཆེ་བ་ཡུལ་དུས་གནས་སྐབས་དང་མཚུངས་པའི་མན་ངག་ཟབ་མོ་འདི་ཉམས་སུ་ལོངས་ལ་འགྲོ་བའི་དོན་རྒྱ་ཆེན་པོ་གྱིས་ཤིག་གསུངས། དུག་ལ་སོགས་པ་ལ་ཕན་པའི་གདམས་པ་འགའ་ཞིག་གནང་ཡང་གདུལ་བྱའི་དབང་གི་རྩལ་དུ་མ་བཏོན་ལ། འདིར་ནད་བརྒྱ་སྨན་གཅིག་གི་གདམས་པ་རྣམས་རྫོགས་པར་གདུལ་བྱའི་དུས་བབས་ཀྱི་དབང་གིས་རྩལ་དུ་བཏོན་པ་ཡིན། དེ་ལྟ་བུའི་གདམས་པ་ཟབ་མོའི་ཕྱག་ལེན་དང་བཅས་པ་རྩ་བའི་བླ་མའི་བར་དུ་བརྒྱུད་པའི་སྲོལ་མ་ཉམས་པར་བཞུགས་པ་འདི་ཉིད་ཀྱི་སྒོམ་ལུང་ཕྱག་ལེན་དང་བཅས་འབུལ་བ་ཡིན་པས། ཐོག་མར་སྒོམ་ལུང་གི་སླད་དུ་དམིགས་པ་འདི་བཞིན་དུ་མཛོད། བླ་མ་དང་དཔལ་ཐང་སྟོང་རྒྱལ་པོ་དབྱེར་མ་མཆིས་པ་སྐུ་མདོག་སྨུག་ནག་རལ་པའི་ཐོར་ཅོག་ཅན་ཞལ་གཅིག་ཕྱག་གཉིས་པ། ཕྱག་གཡས་མཆོག་སྦྱིན་གྱི་ཕྱག་རྒྱ་དང་། གཡོན་ཚེའི་བུམ་པ་བསྣམས་པ། ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པའི་སྤྱི་བོར་པད་འདབ་བཞི་དབུས་དང་བཅས་པ་ལ་ཡེ་ཤེས་ཀྱི་མཁའ་འགྲོ་སྡེ་ལྔ་དཀར་སེར་དམར་ལྗང་མཐིང་གའི་མདོག་ཅན། ཞལ་གཅིག་ཕྱག་གཉིས་མ་གཡས་ཌཱ་མ་རུ་དང་གཡོན་ཐོད་པ་བསྣམས་པ། གྲུ་མོ་ན་ཁ་ཊྭཱྃ་ག་བཀལ་བ་དར་དང་རིན་པོ་ཆེས་བརྒྱན་པ་ལྔ་བཞུགས་པའི་དབུས་ཀྱི་གཙོ་མོའི་སྤྱི་གཙུག་ཏུ་ཡི་དམ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་སྐུ་མདོག་གངས་རི་ལྟར་དཀར་བ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། འོག་མ་གཉིས་ཤེལ་ཕྲེང་དང་པད་དཀར་འཛིན་པ། དར་དང་རིན་པོ་ཆེའི་རྒྱན་གྱིས་སྦུད་པ། རི་དྭགས་ཀྱི་པགས་པས་ནུ་མ་གཡོན་པ་བཀབ་པ། ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པར་གསལ་བཏབ་ནས། གསོལ་བ་དྲག་ཏུ་བཏབ་པས། དེའི་མཐུས་ལྷ་རྣམས་ཡས་ནས་རིམ་གྱིས་རང་བཞིན་འཆི་བ་མེད་པ་བདུད་རྩིའི་རྣམ་པར་ཞུ་ཞིང་གཅིག་ལ་གཅིག་ཐིམ་ནས་མཐར་སློབ་དཔོན་གྱི་སྤྱི་གཙུག་ཏུ་ཐིམ་པས་སློབ་དཔོན་ཉིད་ལྷ་དང་བླ་མ་ཀུན་འདུས་སུ་གྱུར། དེ་སླར་ཡང་འབྲུ་བཅུད་ནས་སློབ་དཔོན་གྱིས་ཧུབ་གང་གསོལ་བས། ཐུགས་རྗེ་བྱིན་རླབས་ནུས་མཐུ་ཐམས་ཅད་ཞལ་གྱི་སྒོ་ནས་འོད་དང་བཅས་པ་སྐྱ་ཆིལ་སྟེ་ཐོན་འབྲུ་བཅུད་ལ་ཐིམ། དེ་ཉིད་ཁྱེད་རང་གིས་འཐུང་བས་སློབ་དཔོན་གྱི་བདུད་རྩི་ཐམས་ཅད་ཁྱེད་རང་གི་རྒྱུད་ལ་ཐིམ་ནས་རྩ་བརྒྱུད་བླ་མ་ལྷ་དང་བཅས་པའི་ཐུགས་རྗེ་བྱིན་རླབས་ནུས་མཐུ་ཐམས་ཅད་རང་གི་རྒྱུད་ལ་ཞུགས་བྱུང་སྙམ་པའི་འདུན་པ་མཛད་ནས་འབྲུ་བཅུད་ཀྱི་བདུད་རྩི་འདི་ལྷག་མ་མ་ལུས་པར་འཐུང་བར་ཞུ། ཞེས་བརྗོད་ཅིང་བདུད་རྩི་སྦྱིན། དེ་ནས་གཞུང་ཚིགས་བཅད་མའི་ལུང་འབོགས། ལུང་ཚར་བ་དང་། སློབ་དཔོན་གྱིས་མེ་ཏོག་འཐོར་ཞིང་། རྒྱལ་བ་སྨན་གྱི་བླ་མ། སྤྲུལ་སྐུ་པདྨ་འབྱུང་གནས། ཡེ་ཤེས་ཀྱི་མཁའ་འགྲོ་མཆེད་ལྔ། གྲུབ་པའི་དབང་ཕྱུག་ཐང་སྟོང་རྒྱལ་པོ་ལ་སོགས་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱིས་དད་ལྡན་འདི་རྣམས་རང་རྒྱུད་སྨིན་ཅིང་འགྲོ་དོན་འབྱུང་བར་བྱིན་གྱིས་བརླབ་ཏུ་གསོལ། ཞེས་ལན་གསུམ་བརྗོད། གཉིས་པ་ཕྱག་ལེན་བསྟན་པ་ལ་གསུམ། སྦྱོར་བ་རིལ་བུ་སྦྱོར་ཐབས། དངོས་གཞི་བྱིན་གྱིས་བརླབས་ཚུལ། རྗེས་བཏང་ཚུལ་ཕན་ཡོན་དང་བཅས་པའོ། །དང་པོ་ནི། འདུ་བ་སྤྱི་སྙོམས་ཨ་རུ་ར་གསེར་མདོག་ཆུ་དྲུག །སྲིད་པའི་བཅུད་བསྡུས་ཅོང་ཞི་སྟེ། དེ་ཡང་ཕོ་ལ་མོ་ཅོང་། མོ་ལ་ཕོ་ཅོང་། གཉིས་ཀ་ལ་མ་ནིང་ཅོང་ཞི་བསྔགས་པས་དམིགས་ཕྱེ་སྟེ་བཏང་བའམ། སྤྱི་ཁྱབ་ཏུ་ཕོ་ཅོང་རྟ་སོ་བཅག་པ་ལྟ་བུ་ཉིད་བཏང་བ་ཕྱག་ལེན་དུ་མཛད་པས་ཆ་གསུམ། ཀུན་བྱེད་རྒྱལ་པོ་རྩ་བའི་ཡི་གེའི་མཆན་བུར་སྔོ་སྨན་ཞེས་པ་ཙམ་ལས་གསལ་བར་མ་གསུངས་པས། ཟུར་ལུགས་སུ་སྤང་རྩི་དོ་བོ། བྱང་ལུགས་ཧོང་ལེན། གཞན་འགའ་ཞིག་གིས་རེ་སྐོན་ལའང་ངོས་འཛིན་སྲོལ་བཅས་ནད་གཞི་དང་བསྟུན་པའི་བཏང་ལུགས་བྱས་ཀྱང་མི་འགལ་རུང་། བརྒྱུད་པ་འདིའི་ཕྱག་བཞེས་སུ་སྤང་རྩི་དོ་བོ་ལ་བཞེད་པས་ཆ་གསུམ་དང་། རིན་ཆེན་སྙིང་པོ། བྲག་ཞུན་ལྷད་མེད་ཆ་ཕྱེད་གཉིས། ཁོང་ནད་ཀྱི་གཉེན་པོའི་སྨན་པུཥྐར་མཱུ་ལ་སྟེ་ཁམས་རུས་ཆ་གསུམ། ཁ་བསྒྱུར་རིགས་བཏང་ན་ཆ་རེ་རྣམས་རྩི་བཞིན་དུ་བཏགས། གྲུབ་ཐོབ་ཆེན་པོ་ནས་བརྒྱུད་པ་བར་མ་ཆད་པ་ལས་བྱུང་བའི་ཕབས་གཏའི་རིགས་ཡོད་ན་བསྲེ། མེ་ཏོག་བཅུད་ཆེན་སྦྲང་རྩིས་མགོ་བསྡུས་ལ་རིལ་བུ་ཆུང་ན་བྲ་རིལ་ཙམ་དང་། ཆེན་སྲན་འཕོས་ཙམ་དྲིལ། རིལ་ཆགས་ཐེམ་པར་བྱས་ལ་སྐམ་པ་དང་རིན་པོ་ཆེའི་སྣོད་དམ། ཐོད་པ་མཚན་ལྡན་གྱི་ནང་དུ་བླུགས། སྟེགས་ཀྱི་ཁར་འབྲུ་དཀར་གྱི་གཡུང་དྲུང་རིས་བྲིས་པའི་དབུས་སུ་བཀོད། ཁ་དར་དམར་པོས་བཅད་ལ་བཞག་གོ། །།གཉིས་པ་ནི། བདག་བསྐྱེད་ཐུགས་རྗེ་ཆེན་པོ་ཕྱག་བཞི་ལ་གཙོ་རྐྱང་སོགས་གང་ཡང་རུང་བའི་སྒོམ་བཟླས་སྔོན་དུ་འགྲོ་བས། མདུན་གྱི་རིལ་བུའི་ཞལ་ཁེབས་བསལ། རང་གི་ཐུགས་ཀ་ནས་ཁྲོ་བོ་བདུད་རྩི་འཁྱིལ་བའི་ཚོགས་དཔག་ཏུ་མེད་པ་སྤྲོས་ཏེ་རྫས་ཀྱི་མ་དག་པའི་ཉེས་པ་ཐམས་ཅད་བསངས་ཤིང་བགེགས་རྣམས་རྒྱང་རིང་དུ་བསྐྲད་པར་གྱུར། ཨ་མྲྀ་ཏ་བཟླ་ཞིང་གུ་གུལ་གྱིས་བདུག །ཡུངས་ཀར་གྱིས་བྲབས། སྭ་བྷཱ་བས་སྦྱངས། འོད་གསལ་སྟོང་ཉིད་སྙིང་རྗེའི་ངང་། །བྷྲཱུྃ་ལས་རིན་ཆེན་སྣོད་མཆོག་ཏུ། །ཁ་དོག་དྲི་རོ་ནུས་བཅུད་ཀུན། །ཕུན་ཚོགས་སྨན་གྱི་རིལ་བུས་གང་། །དེ་དབུས་ཟླ་བའི་དཀྱིལ་འཁོར་སྟེང་། །དབུས་སུ་རྡོ་རྗེ་མཁའ་འགྲོ་མཐིང་། །ཤར་དུ་སངས་རྒྱས་མཁའ་འགྲོ་དཀར། །ལྷོ་རུ་རིན་ཆེན་མཁའ་འགྲོ་སེར། །ནུབ་ཏུ་པདྨ་མཁའ་འགྲོ་དམར། །བྱང་དུ་ལས་ཀྱི་མཁའ་འགྲོ་ལྗང་། །ཀུན་ཀྱང་ཞལ་གཅིག་ཕྱག་གཉིས་མ། །གཡས་པས་རིན་ཆེན་ཌཱ་མ་རུ། །གཡོན་པས་བདུད་རྩིའི་ཐོད་པ་བསྣམས། །བརྐྱང་བསྐུམ་གར་སྟབས་ཁ་ཊྭཱྃ་འཁྱུད། །དར་དང་རིན་ཆེན་རུས་པས་བརྒྱན། །འོད་ཟེར་སྣ་ལྔའི་ཀློང་ན་བཞེངས། །དབུས་ཀྱི་གཙོ་མོའི་སྤྱི་གཙུག་ཏུ། །ཡི་དམ་ཐུགས་རྗེ་ཆེན་པོ་ནི། །དཀར་གསལ་ཞལ་གཅིག་ཕྱག་བཞི་པ། །རྩ་ཕྱག་ཐུགས་ཀར་ཐལ་མོ་སྦྱར། །འོག་མ་ཤེལ་ཕྲེང་པད་དཀར་བསྣམས། །དར་དང་རིན་ཆེན་རྒྱན་གྱིས་མཛེས། །ཞི་འཛུམ་མཚན་དཔེའི་འོད་ཟེར་འཕྲོ། །སྣང་སྟོང་འཇའ་ཚོན་ལྟ་བུའི་སྐུ། །དམ་ཚིག་ཡེ་ཤེས་དབྱེར་མེད་པར། །སྐད་ཅིག་དྲན་རྫོགས་གསལ་བར་གྱུར། །ཅེས་གསལ་བཏབ་ལ། ཨོཾ་མ་ཎི་པདྨེ་ཧཱུྃ། སྟོང་ཕྲག་གཅིག་བཟླས། མཐར་ཐལ་མོ་སྦྱར་ལ། །ཡི་དམ་ཐུགས་རྗེ་ཆེན་པོ་ཡིས། །རིལ་བུ་མཐོང་ཐོས་དྲན་རེག་ཀུན། །རྒྱུ་འབྲས་ནད་རྣམས་སེལ་བྱེད་པའི། །བདུད་རྩིར་བྱིན་གྱིས་བརླབ་ཏུ་གསོལ། །ཐུགས་རྗེ་ཆེན་པོ་བདུད་རྩིར་ཞུ། །ཡེ་ཤེས་མཁའ་འགྲོ་ལྔ་ལ་ཐིམ། །དེ་རྣམས་ཐུགས་ཀའི་འོད་ཟེར་གྱིས། །ཕྱོགས་བཅུའི་ཞིང་ཁམས་ཁྱབ་པར་འཕྲོས། །བརྟན་གཡོའི་སྨན་བཅུད་དྭངས་མ་དང་། །རྩ་གསུམ་རིག་འཛིན་ཆོས་སྐྱོང་གི། །ཐུགས་རྗེའི་བྱིན་རླབས་ནུས་མཐུ་ཀུན། །སྤྱན་དྲངས་སོ་སོའི་སྐུ་ལ་ཐིམ། །དེ་ལས་བདུད་རྩིའི་རྒྱུན་བབས་པ། །རིལ་བུ་རྣམས་དང་དབྱེར་མེད་འདྲེས། །སྨན་གྱི་བདུད་རྩི་མཆོག་ཏུ་གྱུར། །ཨོཾ་བུདྡྷ་ཌཱ་ཀི་ནཱི། བཛྲ་ཌཱ་ཀི་ནཱི། རཏྣ་ཌཱ་ཀི་ནཱི། པདྨ་ཌཱ་ཀི་ནཱི། ཀརྨ་ཌཱ་ཀི་ནཱི། ཨོཾ་ཨཱཿཧཱུྃ། ཞེས་ལྔ་བརྒྱ་བཟླས་མཐར། ཡེ་ཤེས་མཁའ་འགྲོ་རིགས་ལྔ་ཡིས། སོགས་གོང་ལྟར་གསོལ་བ་བཏབ། མཁའ་འགྲོ་ལྔ་ཡང་བདུད་རྩིར་ཞུ། །སྨན་གྱི་རིལ་བུར་ཐིམ་པ་ཡིས། །མཐོང་ཐོས་དྲན་རེག་འགྲོ་བ་ཀུན། །རྒྱུ་འབྲས་ནད་རྣམས་སེལ་བྱེད་པའི། །ཡེ་ཤེས་བདུད་རྩིའི་མཆོག་ཏུ་གྱུར། །དབྱངས་གསལ་དང་རྟེན་འབྲེལ་སྙིང་པོ་ལན་མང་དུ་བཟླས་པའི་མེ་ཏོག་གཏོར་ལ་བྱིན་རླབས་ཀྱི་རྒྱུན་བརྟན་པར་བྱ། རྗེ་གྲུབ་ཐོབ་ཆེན་པོའི་གསུང་། གང་དག་ཕྱོགས་བཅུའི་འཇིག་རྟེན་ན། །སེམས་ཅན་ནད་པ་ཇི་སྙེད་པ། །དེ་དག་བདག་གི་བསོད་ནམས་ཀྱིས། །ནད་མེད་བདེ་དགའ་ཐོབ་པར་ཤོག །བདག་དང་སྨན་འདིའི་མིང་ཙམ་གྱིས། །འགྲོ་བ་ཀུན་གྱི་ལུས་སེམས་ཀྱི། །ནད་དང་སྡུག་བསྔལ་རབ་ཞི་ནས། །བདེ་བ་དམ་པ་ཐོབ་པར་ཤོག །བདག་གི་སྨོན་ལམ་སྟོབས་དག་དང་། །རྒྱལ་བ་སྲས་བཅས་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །ཇི་སྲིད་འཁོར་བ་མ་སྟོངས་བར། །འགྲོ་དོན་ཇི་ལྟར་སྨོན་པ་བཞིན། །འབད་མེད་ལྷུན་གྱིས་གྲུབ་པར་ཤོག །ཅེས་སོགས་བསྔོ་སྨོན་དང་། བགེགས་རིགས་སྟོང་ཕྲག་བརྒྱུད་ཅུ་ཞི་བ་དང་། །སོགས་ཤིས་བརྗོད་རྒྱས་པར་བྱ་ཞིང་མེ་ཏོག་གི་ཆར་དབབས། སྤར་བུ་ལྟ་བུའི་སྣོད་བཟང་པོར་བླུགས་ལ་རླུང་མི་འཆར་བར་ཚགས་བྱའོ། །གསུམ་པ་ནི། དེ་ལྟར་སྦྱར་ཞིང་བསྒྲུབ་པའི་རིལ་བུ་དེ་ཉིད་ལྔ་བདུན་དགུ་སོགས་ནད་སྟོབས་དང་སྦྱར་ལ་ཚ་བའི་རིགས་ལ་ཆུ་བསིལ། གྲང་པ་ལ་ཆང་། སྤྱིར་བཏབ་ཆུ་བསྐོལ་ཚ་མོས་ཕུལ་ལ་བཏང་བས། སྨན་གྱི་ནུས་པ་དང་། སྔགས་ཀྱི་བྱིན་རླབས་གཉིས་ཚོགས་པའི་རྟེན་ཅིང་འབྲེལ་བར་འབྱུང་བའི་མཐུ་བསམ་གྱིས་མི་ཁྱབ་པས། རིལ་བུ་བསྟེན་པ་དང་དྲི་ཚོར་བ་ཚུན་ཆད་ཀྱང་སྤྱིར་ནད་ཐམས་ཅད་ཞི། གདོན་ཀུན་ལས་གྲོལ། ལུས་ཟུངས་དང་ཚེ་དང་བསོད་ནམས་རྒྱས་པ་སོགས་གནས་སྐབས་དང་། མཐར་ཐུག་འཕགས་མཆོག་ཐུགས་རྗེ་ཆེན་པོའི་ཕྲིན་ལས་ཀྱིས་ཁྱབ་པས་འཁོར་བ་དང་ངན་སོང་གི་སྡུག་བསྔལ་ལས་ཐར་བས་མཚོན་ཕན་ཡོན་མཐའ་ཡས། ཁྱད་པར་ཁྲག་མཁྲིས་བད་ཀན་སྐྱ་སྨུག །ཕོ་ནད་གསར་རྙིང་། རིམས་དང་ཚད་གསར་སོགས་ལ་ཤིན་ཏུ་ཕན་ཅིང་། ནད་གཞན་གང་ལའང་མི་གནོད་པ་མྱོང་བས་གྲུབ། འདི་ཁོ་ནས་ནད་ཐམས་ཅད་གསོ་བའི་སྨན་གྱི་གྲུབ་ཐོབ་རིག་པ་འཛིན་པ་ད་ལྟའི་བར་རྒྱུན་མ་ཆད་པར་བྱུང་བས་ཀྱང་ཤིན་ཏུ་ཡིད་ཆེས་བའི་གནས་སུ་བཟུང་ངོ་། །ནད་སོ་སོར་ཁ་བསྒྱུར་སྦྱར་ཚུལ་ནི་གཞུང་དུ་གསལ་ལ་སེ་བའི་མེ་ཏོག་བུངས་ཆེར་བསྣན་པ་རིལ་དཀར་པད་སྡོང་མ་ཞེས་བད་མཁྲིས་ལ་ཤིན་ཏུ་ཕན་ནོ། །དེ་ལྟར་ན་དཔལ་གྲུབ་པའི་དབང་ཕྱུག་ཐང་སྟོང་རྒྱལ་པོ་ལ་ཡེ་ཤེས་ཀྱི་མཁའ་འགྲོ་སྡེ་ལྔས་དངོས་སུ་ཕུལ་བའི་ནད་བརྒྱ་སྨན་གཅིག་རིལ་བུ་དཀར་པོའི་སྒོམ་ལུང་ཕྱག་ལེན་དང་བཅས་པ་ལེགས་པར་ཕུལ་བ་ཡིན་པས་བྱང་ཆུབ་སེམས་ཀྱི་རྩིས་ཟིན་པའི་སྒོ་ནས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། སློབ་དཔོན་ལྷན་དུ་བསྔོ་སྨོན་ཤིས་བརྗོད་རྒྱས་པར་བྱའོ། །ཞེས་རྗེ་གྲུབ་ཐོབ་ཆེན་པོའི་ལུགས་ཀྱི་རིལ་བུ་དཀར་པོའི་བསྒོམ་ལུང་ཡན་ཆད་ཡིག་ཆ་རྙིང་པ་ལ། ཕྱག་ལེན་གྱི་གསལ་བྱེད་ཁ་འགེངས་པ་དང་བཅས་མང་དུ་ཐོས་པའི་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་དག་པར་བྲིས་པའི་དགེ་བས་མཁའ་ཁྱབ་ཀྱི་འགྲོ་ཀུན་རྒྱུ་དང་འབྲས་བུའི་ནད་ཀྱི་གདུང་བ་མཐའ་དག་ཞི་ཞིང་། སྨན་པ་ཆེ་མཆོག་ཐམས་ཅད་གཟིགས་པའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །མངྒ་ལཾ། ། ༈ ལས་དང་གློ་བུར་རྐྱེན་ལས་གྱུར་པ་ཡི། །གདོན་དང་ནད་དང་འབྱུང་པོའི་འཚེ་བ་སོགས། །སེམས་ཅན་ཡིད་མི་བདེ་བའི་ནད་རྣམས་ཀུན། །འཇིག་རྟེན་ཁམས་སུ་འབྱུང་བར་མ་གྱུར་ཅིག །ཇི་ལྟར་གཤེད་མས་འཁྲིད་པའི་བསད་བྱ་བཞིན། །སྐད་ཅིག་གཅིག་ལ་ལུས་སེམས་འབྲལ་བྱེད་པའི། །སྲོག་འཕྲོག་ནད་ཀྱི་སྡུག་བསྔལ་ཇི་སྙེད་པ། །འཇིག་རྟེན་ཁམས་སུ་འབྱུང་བར་མ་གྱུར་ཅིག །འཆི་བདག་གཤིན་རྗེའི་ཁ་ནང་ཚུད་པ་ལྟར། །ནད་ཀྱི་མིང་ཙམ་ཐོས་པས་སྐྲག་བྱེད་པའི། །ཉིན་གཅིག་པ་དང་རྟག་པའི་རིམས་སོགས་ཀྱིས། །ལུས་ཅན་ཀུན་ལ་གནོད་པར་མ་གྱུར་ཅིག །གནོད་པའི་བགེགས་རིགས་སྟོང་ཕྲག་བརྒྱད་ཅུ་དང་། །གློ་བུར་ཡེ་འདྲོག་སུམ་བརྒྱ་དྲུག་ཅུ་དང་། །བཞི་བརྒྱ་རྩ་བཞིའི་ནད་ལ་སོགས་པ་ཡིས། ལུས་ཅན་ཀུན་ལ་འཚེ་བར་མ་གྱུར་ཅིག །ལུས་སེམས་བདེ་བ་མ་ལུས་འཕྲོག་བྱེད་པའི། །འབྱུང་བཞི་འཁྲུགས་པའི་སྡུག་བསྔལ་ཇི་སྙེད་པ། །མ་ལུས་ཞི་ཞིང་མདངས་སྟོབས་ལྡན་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །བླ་མ་དཀོན་མཆོག་གསུམ་གྱི་ཐུགས་རྗེ་དང་། །མཁའ་འགྲོ་ཆོས་སྐྱོང་སྲུང་མའི་ནུས་མཐུ་དང་། །ལས་འབྲས་བསླུ་བ་མེད་པའི་བདེན་སྟོབས་ཀྱིས། །བསྔོ་བ་སྨོན་ལམ་བཏབ་ཚད་འགྲུབ་པར་ཤོག །ཅེས་པ་འདི་ནི་གདན་ས་ཆེན་པོ་དཔལ་ལྡན་ས་སྐྱར་ནད་རིམས་མི་གཅིག་པ་སྣ་ཚོགས་བྱུང་བར། སྔགས་བོན་རྣམས་ཀྱིས་མདོས་གཏོར་སྨན་སྔགས་སྲུང་བ་སོགས་གང་བསྒྲུབས་ཀྱང་མ་ཕན་པར་གདན་ས་སྟོངས་ལ་ཐུག་པའི་སྐབས། རྗེ་གྲུབ་ཐོབ་ཆེན་པོས་མ་ནམ་མཁའ་མའི་སྐྱབས་འགྲོ་གྱིས། མ་ཎི་བསྒྲངས། སྨོན་ལམ་འདི་ཐོབ་ཅེས་བཀའ་སྩལ་བ་བཞིན་བགྱིས་པ་ལ་བརྟེན་ནད་ཡམས་ཐམས་ཅད་འཕྲལ་དུ་ཆད་པས། ས་སྐྱ་ནད་གྲོལ་མའི་སྨོན་ལམ་ཞེས་རྡོ་རྗེའི་གསུངས་བྱིན་རླབས་ཀྱི་སྤྲིན་ཕུང་འཕྲོ་བར་གྲགས་སོ། །མངྒ་ལཾ།། །།

[edit]

grub thob ril dkar gyi sgom lung dang phyag len 'phogs tshul thang stong dgongs rgyan/ grub thob ril dkar gyi sgom lung dang phyag len 'phogs tshul thang stong dgongs rgyan bzhugs so//__//na mo gu ru de wa DA ki nI b+h+yaH__'dir grub thob yongs kyi gtsug rgyan dam pa lcags zam pa thang stong rgyal po'i gdams pa ril dkar gyi sgom lung dang phyag len bcas 'bogs par 'dod na/__/thod pa mtshan ldan byung na rab/__de min rin po che'i snod gas chag med pa ci rigs shig chang bzang pos bkang ba dang /__'thor nas rnams tshogs par bsags la/__de nas slob dpon gyis 'di skad brjod do/__/nam mkha' dang mnyam pa'i sems can thams cad kyi don du rdzogs pa'i sangs rgyas kyi go 'phang thob par bya/__de'i ched du grub thob ril dkar gyi sgom lung phyag len dang bcas pa gsan snyam pa'i 'dun pa rtse gcig pa mdzod/__/de yang gdams pa 'di'i lo rgyus cung zhig gleng na/__grub pa'i dbang phyug dam pa thang stong rgyal po de nyid/__dpa' lcags zam ri bo che'i rtse na ting nge 'dzin la bzhugs pa'i tshe skabs zhig na/__sngar ma byung zhing phyis 'byung bar mi 'gyur ba'i nam mkha' la 'ja' dang 'od dang sgra la sogs pa ltas khyad par can du ma byung bas grub thob chen pos 'di ci yin snyam du dgongs pa'i tshe/__ting nge 'dzin gyis brtags pas/__rig 'dzin chen po pad+ma 'byung gnas kyi thugs rje'i 'od zer du rig ste/__nam mkha'i mthongs la gzigs pas/__o rgyan gyis yul nas 'od skya thal le ba dar lam brkyang ba lta bu'i sna la/__mkha' 'gro ma sku mdog dkar ser dmar ljang mthing ga zhal gcig phyag gnyis ma/__g.yas DA ma ru 'khrol zhing /__g.yon thod pa bdud rtsis gang ba'i steng na sman gyis gang ba'i par bu bsnams shing /__gru mo na kha T+wA~M ga bkal ba brkyang bskum gar stabs mdzad cing byon nas/__mkha' 'gro ma de rnams kyi nang nas dbus ma'i zhal nas dpa' bo chen po khyed kyis 'gro ba sems can thams cad kyi sems kyi sdug bsngal rnams zhi bar mdzad pa la bdag kyang yi rang mod/__da ni lus kyi nad thams cad sel ba'i gdams pa/__tshegs chung la don rgya che ba yul dus gnas skabs dang mtshungs pa'i man ngag zab mo 'di nyams su longs la 'gro ba'i don rgya chen po gyis shig gsungs/__dug la sogs pa la phan pa'i gdams pa 'ga' zhig gnang yang gdul bya'i dbang gi rtsal du ma bton la/__'dir nad brgya sman gcig gi gdams pa rnams rdzogs par gdul bya'i dus babs kyi dbang gis rtsal du bton pa yin/__de lta bu'i gdams pa zab mo'i phyag len dang bcas pa rtsa ba'i bla ma'i bar du brgyud pa'i srol ma nyams par bzhugs pa 'di nyid kyi sgom lung phyag len dang bcas 'bul ba yin pas/__thog mar sgom lung gi slad du dmigs pa 'di bzhin du mdzod/__bla ma dang dpal thang stong rgyal po dbyer ma mchis pa sku mdog smug nag ral pa'i thor cog can zhal gcig phyag gnyis pa/__phyag g.yas mchog sbyin gyi phyag rgya dang /__g.yon tshe'i bum pa bsnams pa/__zhabs gnyis rgyal po rol pa'i stabs su bzhugs pa'i spyi bor pad 'dab bzhi dbus dang bcas pa la ye shes kyi mkha' 'gro sde lnga dkar ser dmar ljang mthing ga'i mdog can/__zhal gcig phyag gnyis ma g.yas DA ma ru dang g.yon thod pa bsnams pa/__gru mo na kha T+wA~M ga bkal ba dar dang rin po ches brgyan pa lnga bzhugs pa'i dbus kyi gtso mo'i spyi gtsug tu yi dam thugs rje chen po 'phags pa spyan ras gzigs sku mdog gangs ri ltar dkar ba zhal gcig phyag bzhi pa/__phyag dang po gnyis thugs kar thal mo sbyar ba/__'og ma gnyis shel phreng dang pad dkar 'dzin pa/__dar dang rin po che'i rgyan gyis sbud pa/__ri dwags kyi pags pas nu ma g.yon pa bkab pa/__zhabs gnyis rdo rje'i skyil krung gis bzhugs par gsal btab nas/__gsol ba drag tu btab pas/__de'i mthus lha rnams yas nas rim gyis rang bzhin 'chi ba med pa bdud rtsi'i rnam par zhu zhing gcig la gcig thim nas mthar slob dpon gyi spyi gtsug tu thim pas slob dpon nyid lha dang bla ma kun 'dus su gyur/__de slar yang 'bru bcud nas slob dpon gyis hub gang gsol bas/__thugs rje byin rlabs nus mthu thams cad zhal gyi sgo nas 'od dang bcas pa skya chil ste thon 'bru bcud la thim/__de nyid khyed rang gis 'thung bas slob dpon gyi bdud rtsi thams cad khyed rang gi rgyud la thim nas rtsa brgyud bla ma lha dang bcas pa'i thugs rje byin rlabs nus mthu thams cad rang gi rgyud la zhugs byung snyam pa'i 'dun pa mdzad nas 'bru bcud kyi bdud rtsi 'di lhag ma ma lus par 'thung bar zhu/__zhes brjod cing bdud rtsi sbyin/__de nas gzhung tshigs bcad ma'i lung 'bogs/__lung tshar ba dang /__slob dpon gyis me tog 'thor zhing /__rgyal ba sman gyi bla ma/__sprul sku pad+ma 'byung gnas/__ye shes kyi mkha' 'gro mched lnga/__grub pa'i dbang phyug thang stong rgyal po la sogs rtsa ba dang brgyud par bcas pa'i bla ma dam pa rnams kyis dad ldan 'di rnams rang rgyud smin cing 'gro don 'byung bar byin gyis brlab tu gsol/__zhes lan gsum brjod/__gnyis pa phyag len bstan pa la gsum/__sbyor ba ril bu sbyor thabs/__dngos gzhi byin gyis brlabs tshul/__rjes btang tshul phan yon dang bcas pa'o/__/dang po ni/__'du ba spyi snyoms a ru ra gser mdog chu drug__/srid pa'i bcud bsdus cong zhi ste/__de yang pho la mo cong /__mo la pho cong /__gnyis ka la ma ning cong zhi bsngags pas dmigs phye ste btang ba'am/__spyi khyab tu pho cong rta so bcag pa lta bu nyid btang ba phyag len du mdzad pas cha gsum/__kun byed rgyal po rtsa ba'i yi ge'i mchan bur sngo sman zhes pa tsam las gsal bar ma gsungs pas/__zur lugs su spang rtsi do bo/__byang lugs hong len/__gzhan 'ga' zhig gis re skon la'ang ngos 'dzin srol bcas nad gzhi dang bstun pa'i btang lugs byas kyang mi 'gal rung /__brgyud pa 'di'i phyag bzhes su spang rtsi do bo la bzhed pas cha gsum dang /__rin chen snying po/__brag zhun lhad med cha phyed gnyis/__khong nad kyi gnyen po'i sman puSh+kar mU la ste khams rus cha gsum/__kha bsgyur rigs btang na cha re rnams rtsi bzhin du btags/__grub thob chen po nas brgyud pa bar ma chad pa las byung ba'i phabs gta'i rigs yod na bsre/__me tog bcud chen sbrang rtsis mgo bsdus la ril bu chung na bra ril tsam dang /__chen sran 'phos tsam dril/__ril chags them par byas la skam pa dang rin po che'i snod dam/__thod pa mtshan ldan gyi nang du blugs/__stegs kyi khar 'bru dkar gyi g.yung drung ris bris pa'i dbus su bkod/__kha dar dmar pos bcad la bzhag go/__//gnyis pa ni/__bdag bskyed thugs rje chen po phyag bzhi la gtso rkyang sogs gang yang rung ba'i sgom bzlas sngon du 'gro bas/__mdun gyi ril bu'i zhal khebs bsal/__rang gi thugs ka nas khro bo bdud rtsi 'khyil ba'i tshogs dpag tu med pa spros te rdzas kyi ma dag pa'i nyes pa thams cad bsangs shing bgegs rnams rgyang ring du bskrad par gyur/__a mr-i ta bzla zhing gu gul gyis bdug__/yungs kar gyis brabs/__swa b+hA bas sbyangs/__'od gsal stong nyid snying rje'i ngang /__/b+h+rU~M las rin chen snod mchog tu/__/kha dog dri ro nus bcud kun/__/phun tshogs sman gyi ril bus gang /__/de dbus zla ba'i dkyil 'khor steng /__/dbus su rdo rje mkha' 'gro mthing /__/shar du sangs rgyas mkha' 'gro dkar/__/lho ru rin chen mkha' 'gro ser/__/nub tu pad+ma mkha' 'gro dmar/__/byang du las kyi mkha' 'gro ljang /__/kun kyang zhal gcig phyag gnyis ma/__/g.yas pas rin chen DA ma ru/__/g.yon pas bdud rtsi'i thod pa bsnams/__/brkyang bskum gar stabs kha T+wA~M 'khyud/__/dar dang rin chen rus pas brgyan/__/'od zer sna lnga'i klong na bzhengs/__/dbus kyi gtso mo'i spyi gtsug tu/__/yi dam thugs rje chen po ni/__/dkar gsal zhal gcig phyag bzhi pa/__/rtsa phyag thugs kar thal mo sbyar/__/'og ma shel phreng pad dkar bsnams/__/dar dang rin chen rgyan gyis mdzes/__/zhi 'dzum mtshan dpe'i 'od zer 'phro/__/snang stong 'ja' tshon lta bu'i sku/__/dam tshig ye shes dbyer med par/__/skad cig dran rdzogs gsal bar gyur/__/ces gsal btab la/__oM ma Ni pad+me hU~M/__stong phrag gcig bzlas/__mthar thal mo sbyar la/__/yi dam thugs rje chen po yis/__/ril bu mthong thos dran reg kun/__/rgyu 'bras nad rnams sel byed pa'i/__/bdud rtsir byin gyis brlab tu gsol/__/thugs rje chen po bdud rtsir zhu/__/ye shes mkha' 'gro lnga la thim/__/de rnams thugs ka'i 'od zer gyis/__/phyogs bcu'i zhing khams khyab par 'phros/__/brtan g.yo'i sman bcud dwangs ma dang /__/rtsa gsum rig 'dzin chos skyong gi/__/thugs rje'i byin rlabs nus mthu kun/__/spyan drangs so so'i sku la thim/__/de las bdud rtsi'i rgyun babs pa/__/ril bu rnams dang dbyer med 'dres/__/sman gyi bdud rtsi mchog tu gyur/__/oM bud+d+ha DA ki nI/__badz+ra DA ki nI/__rat+na DA ki nI/__pad+ma DA ki nI/__karma DA ki nI/__oM AHhU~M/__zhes lnga brgya bzlas mthar/__ye shes mkha' 'gro rigs lnga yis/__sogs gong ltar gsol ba btab/__mkha' 'gro lnga yang bdud rtsir zhu/__/sman gyi ril bur thim pa yis/__/mthong thos dran reg 'gro ba kun/__/rgyu 'bras nad rnams sel byed pa'i/__/ye shes bdud rtsi'i mchog tu gyur/__/dbyangs gsal dang rten 'brel snying po lan mang du bzlas pa'i me tog gtor la byin rlabs kyi rgyun brtan par bya/__rje grub thob chen po'i gsung /__gang dag phyogs bcu'i 'jig rten na/__/sems can nad pa ji snyed pa/__/de dag bdag gi bsod nams kyis/__/nad med bde dga' thob par shog__/bdag dang sman 'di'i ming tsam gyis/__/'gro ba kun gyi lus sems kyi/__/nad dang sdug bsngal rab zhi nas/__/bde ba dam pa thob par shog__/bdag gi smon lam stobs dag dang /__/rgyal ba sras bcas sbyin stobs dang /__/chos kyi dbyings kyi stobs rnams kyis/__/ji srid 'khor ba ma stongs bar/__/'gro don ji ltar smon pa bzhin/__/'bad med lhun gyis grub par shog__/ces sogs bsngo smon dang /__bgegs rigs stong phrag brgyud cu zhi ba dang /__/sogs shis brjod rgyas par bya zhing me tog gi char dbabs/__spar bu lta bu'i snod bzang por blugs la rlung mi 'char bar tshags bya'o/__/gsum pa ni/__de ltar sbyar zhing bsgrub pa'i ril bu de nyid lnga bdun dgu sogs nad stobs dang sbyar la tsha ba'i rigs la chu bsil/__grang pa la chang /__spyir btab chu bskol tsha mos phul la btang bas/__sman gyi nus pa dang /__sngags kyi byin rlabs gnyis tshogs pa'i rten cing 'brel bar 'byung ba'i mthu bsam gyis mi khyab pas/__ril bu bsten pa dang dri tshor ba tshun chad kyang spyir nad thams cad zhi/__gdon kun las grol/__lus zungs dang tshe dang bsod nams rgyas pa sogs gnas skabs dang /__mthar thug 'phags mchog thugs rje chen po'i phrin las kyis khyab pas 'khor ba dang ngan song gi sdug bsngal las thar bas mtshon phan yon mtha' yas/__khyad par khrag mkhris bad kan skya smug__/pho nad gsar rnying /__rims dang tshad gsar sogs la shin tu phan cing /__nad gzhan gang la'ang mi gnod pa myong bas grub/__'di kho nas nad thams cad gso ba'i sman gyi grub thob rig pa 'dzin pa da lta'i bar rgyun ma chad par byung bas kyang shin tu yid ches ba'i gnas su bzung ngo /__/nad so sor kha bsgyur sbyar tshul ni gzhung du gsal la se ba'i me tog bungs cher bsnan pa ril dkar pad sdong ma zhes bad mkhris la shin tu phan no/__/de ltar na dpal grub pa'i dbang phyug thang stong rgyal po la ye shes kyi mkha' 'gro sde lngas dngos su phul ba'i nad brgya sman gcig ril bu dkar po'i sgom lung phyag len dang bcas pa legs par phul ba yin pas byang chub sems kyi rtsis zin pa'i sgo nas rang gzhan gyi don rgya chen po mdzad par zhu/__slob dpon lhan du bsngo smon shis brjod rgyas par bya'o/__/zhes rje grub thob chen po'i lugs kyi ril bu dkar po'i bsgom lung yan chad yig cha rnying pa la/__phyag len gyi gsal byed kha 'gengs pa dang bcas mang du thos pa'i spong ba pa 'jam dbyangs mkhyen brtse'i dbang pos dag par bris pa'i dge bas mkha' khyab kyi 'gro kun rgyu dang 'bras bu'i nad kyi gdung ba mtha' dag zhi zhing /__sman pa che mchog thams cad gzigs pa'i go 'phang myur du thob pa'i rgyur gyur cig__/mang+ga laM/___/___!_las dang glo bur rkyen las gyur pa yi/__/gdon dang nad dang 'byung po'i 'tshe ba sogs/__/sems can yid mi bde ba'i nad rnams kun/__/'jig rten khams su 'byung bar ma gyur cig__/ji ltar gshed mas 'khrid pa'i bsad bya bzhin/__/skad cig gcig la lus sems 'bral byed pa'i/__/srog 'phrog nad kyi sdug bsngal ji snyed pa/__/'jig rten khams su 'byung bar ma gyur cig__/'chi bdag gshin rje'i kha nang tshud pa ltar/__/nad kyi ming tsam thos pas skrag byed pa'i/__/nyin gcig pa dang rtag pa'i rims sogs kyis/__/lus can kun la gnod par ma gyur cig__/gnod pa'i bgegs rigs stong phrag brgyad cu dang /__/glo bur ye 'drog sum brgya drug cu dang /__/bzhi brgya rtsa bzhi'i nad la sogs pa yis/__lus can kun la 'tshe bar ma gyur cig__/lus sems bde ba ma lus 'phrog byed pa'i/__/'byung bzhi 'khrugs pa'i sdug bsngal ji snyed pa/__/ma lus zhi zhing mdangs stobs ldan pa dang /__/tshe ring nad med bde skyid ldan par shog__/bla ma dkon mchog gsum gyi thugs rje dang /__/mkha' 'gro chos skyong srung ma'i nus mthu dang /__/las 'bras bslu ba med pa'i bden stobs kyis/__/bsngo ba smon lam btab tshad 'grub par shog__/ces pa 'di ni gdan sa chen po dpal ldan sa skyar nad rims mi gcig pa sna tshogs byung bar/__sngags bon rnams kyis mdos gtor sman sngags srung ba sogs gang bsgrubs kyang ma phan par gdan sa stongs la thug pa'i skabs/__rje grub thob chen pos ma nam mkha' ma'i skyabs 'gro gyis/__ma Ni bsgrangs/__smon lam 'di thob ces bka' stsal ba bzhin bgyis pa la brten nad yams thams cad 'phral du chad pas/_sa skya nad grol ma'i smon lam zhes rdo rje'i gsungs byin rlabs kyi sprin phung 'phro bar grags so/__/mang+ga laM//__//