JKW-KABUM-19-DZA-001-059

🚧 This website is under continued development. We appreciate your patience!

Previous Text Back to Volume PageNext Text

ཚར་པ་ཆོས་རྗེ་འཁྲུངས་ཡུལ་ནི།

Wylie title	tshar pa chos rje 'khrungs yul ni
Location	mkhyen brtse'i bka' 'bum Volume 19, sde tshan 1, Text 59, Pages 430-434 (Folios 215b6 to 217b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. tshar pa chos rje 'khrungs yul ni. In 'jam dbyangs mkhyen brtse'i dbang po'i bka' 'bum, Vol. 19: 430-434. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

59 430-434	ཚར་པ་ཆོས་རྗེ་འཁྲུངས་ཡུལ་ནི། tshar pa chos rje 'khrungs yul ni History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཚར་པ་ཆོས་རྗེ་འཁྲུངས་ཡུལ་ནི། གྲུབ་ཆེན་གྷ་ཡ་དྷ་རས་ཆུ་ལ་མུ་གུ་ཞེས་པའི་སྒྲས་ཀུ་མུ་ཏ་སྟེ་རྣམ་པར་གྲོལ་བའི་དཔལ་མཚོན་པར་བསྔགས་པའི་གནས་དང་འདབས་འབྱོར་བར་མ་སང་གི་རིགས་ལས་སོན་པའི་དཔོན་ཆེན་དགེ་བཤེས་རིན་བརྩོན་པའི་བརྒྱུད་པ་ལས། ཡབ་ཡི་དམ་གྱི་ལྷས་རྗེས་སུ་བཟུང་ཞིང་སྟག་ཞོན་བྲན་དུ་འཁོལ་བ་རིན་ཆེན་དཔལ་བཟང་དང་། ཡུམ་དགེ་བའི་ཆོས་ལ་དཀར་བ་དབེན་རྩ་ཁ་བའི་སྲས་མོ་བཀྲ་ཤིས་ཞེས་པའི་སྲས་སུ་ཆུ་མོ་ཕག་ལོའི་དཔྱིད་འབྲིང་གི་ཚེས་བཅུར་ངོ་མཚར་བའི་ལྟས་དང་བཅས་པར་འཁྲུངས། ཡུམ་གྱི་མནལ་ལམ་དུ་ཨོ་རྒྱན་སྐུ་ཐུགས་ཀར་ཐིམ་པ་སོགས་བྱུང་བས་ཨོ་རྒྱན་ཆེན་པོའི་སྤྲུལ་པར་ངེས་ཏེ། རྒྱལ་དབང་གིས། གཙང་བྱེད་པདྨའི་སྦུབས་ནས་བྱོན་པའི་ཅོ། །འདྲི་བའི་རྫུན་མིན་བདེན་གཏམ་སྐྱ་རེངས་མས། །མངལ་སྐྱེས་ཉེར་དྲངས་ཚེ་དབང་རིག་འཛིན་ནི། །ཤར་བའི་འོད་སྟོང་འབར་ལ་སུ་ཡིས་བསྙོན། །ཞེས་སོ། །ཆུང་ངུའི་དུས་ནས་དག་སྣང་མཐའ་ཡས་པ་ཤར། དགུང་ལོ་དགུ་པར་ཆོས་ལུང་འཛིན་གྱི་གཙུག་ལག་ཁང་དུ་ཡོངས་འཛིན་བློ་གྲོས་རྒྱལ་མཚན་ལས་ཚངས་སྤྱོད་དགེ་བསྙེན་སྡོམ་པ་གསན་ནས་དཔལ་ལྡན་ཨ་ཏི་ཤས་ལུང་བསྟན་པའི་བཀྲ་ཤིས་ལྷུན་པོའི་ཆོས་གྲར་ཞུགས། འབྲོམ་སྟོན་སྤྲུལ་པ་རྒྱལ་བ་དགེ་འདུན་རྒྱ་མཚོའི་དྲུང་དུ་རབ་ཏུ་བྱུང་། མཚན་བློ་བཟང་རྒྱ་མཚོར་གསོལ། མདོ་ཕྱོགས་ལ་སློབ་གཉེར་ཕུལ་ཕྱིན་མཛད། རྗེ་བཙུན་མས་དངོས་སུ་བསྐུལ་ནས་ཁའུ་བྲག་རྫོང་དུ་རྡོ་རིང་པའི་མདུན་དུ་ཕེབས་ནས། གཙོ་བོར་ཡབ་བདག་ཆེན་དང་། མུས་ཆེན་པ་གཉིས་ཅར་གྱིས་རྡོ་རྗེ་འཆང་བློ་གྲོས་རྒྱལ་མཚན་ལ་གནང་བའི་ལམ་འབྲས་སློབ་བཤད་སོགས་ཀྱིས་མཚོན་དཔལ་ས་སྐྱ་པ་ཆེན་པོའི་སྙན་བརྒྱུད་ཀྱི་སྐོར་ཐམས་ཅད་ཡོངས་སུ་རྫོགས་པ་དང་། གཞན་ཡང་རྗེ་ཉིད་ལ་མངའ་བའི་ཟབ་དོན་རྣམས་དགུང་ལོ་བཅུ་བདུན་ནས་ལོ་ངོ་བདུན་གྱི་བར་ལ་ཞབས་པད་བསྟེན་ཏེ་གསན། སྙན་བརྒྱུད་བཞིའི་སྤྲོས་པ་ཆོད། གཞན་ཡང་ཡོངས་འཛིན་དུ་མ་ལས་ཟབ་ཆོས་རྒྱ་མཚོ་ལྟ་བུ་གསན། མཐུ་སྟོབས་ཀྱི་དབང་ཕྱུག་དྲང་སྲོང་བཀའ་བཞི་པ་ལས་རྟ་མགྲིན་ཡང་གསང་སོགས་དང་། ཉང་གི་སྔགས་འཆང་ཆོས་སྐྱོང་བསོད་ནམས་བཀྲ་ཤིས་ལ་གཏེར་ཁ་ཉི་ཤུ་ཙམ་གྱི་དབང་ལུང་སོགས་གསན་རྒྱ་ཧ་ཅང་ཆེ། མདོར་ན་ཡོངས་འཛིན་དྲུག་ཅུ་རྩ་གསུམ་བསྟེན། ཨོ་རྒྱན་ཆེན་པོ་དང་། རྣལ་འབྱོར་མ་སོགས་ལྷག་པའི་ལྷ་རབ་འབྱམས་ཞལ་གཟིགས། ཁྱད་པར་རྡོ་རིང་པས་དུས་རྒྱུན་དུ་རྗེས་སུ་བཟུང་། ཉམས་རྟོགས་ཀྱི་མཛོད་བརྡོལ། ཆོས་སྐྱོང་བྲན་དུ་འཁོལ། ཞྭ་ལུ་པའི་གདན་ས་བཅུ་གསུམ་པར་ལོ་གསུམ་མཛད། དགུང་ལོ་སོ་གཅིག་པར་ཆོས་ལུང་ཚོགས་སུ་མཁན་ཆེན་གྲགས་པ་རྒྱལ་མཚན་དཔལ་བཟང་པོ་ལས་བསྙེན་པར་རྫོགས། མཚན་སྔ་མའི་མཐར་དཔལ་བཟང་པོར་བཏགས། ཐུགས་སྲས་ཀྱི་གཙོ་བོ་རྗེ་མཁྱེན་བརྩེ་དང་། གཞན་ཡང་བྱ་རྒོད་གཤོང་གི་མཁན་ཆེན་ཀླུ་སྒྲུབ་པ། བོད་མཁར་བ་བྱམས་པ་དོན་གྲུབ། རྩེ་ཚོགས་མཁན་པོ་གཞོན་ནུ་བློ་གྲོས། བོ་དོང་མཁན་ཆེན་བསླབ་གསུམ་རྒྱལ་མཚན། ཆོས་འཁོར་ཡང་རྩེའི་མཁན་ཆེན་བསོད་ནམས་ཆོས་འཕེལ་སོགས་བསམ་གྱིས་མི་ཁྱབ་པ་བསྐྲུན་ནས་དགུང་ལོ་རེ་བཞི་མེ་སྟག་ལོར་ངོ་མཚར་བའི་ལྟས་དང་བཅས་ཏེ་གཤེགས་སོ། །སྐུ་གཤེགས་ནས་ཀྱང་དམ་པ་མང་པོར་ཡེ་ཤེས་ཀྱི་སྐུས་རྗེས་སུ་བཟུང་ངོ་། །ས་སྐྱའི་མི་འགྱུར་བའི་གཟེར་བཞི་ནི། །ཤར་དུ་བྱ་འགྱུར་བ་རྡོ་རྗེའི་བྲག །ལྷོར་ཕུལ་བྱུང་བདུད་པོ་བྲག །ནུབ་ཏུ་ཆ་ལུང་རྡོ་རྗེའི་བྲག །བྱང་དུ་ག་ར་ག་ཡའི་བྲག །ཅེས་སྣང་། ཡབ་རྗེ་རྡོ་རིང་པའི་སློབ་མ་རྗེ་བཙུན་རྡོ་རྗེ་འཆང་ཀུན་དགའ་ལེགས་པའི་བློ་གྲོས་རྒྱལ་མཚན་དཔལ་བཟང་པོའི་རྣམ་ཐར་ཡིད་བཞིན་ཆུ་གཏེར་བཞད་པ་ཞེས་མཁྱེན་བརྩེས་མཛད་༨༠པར། ས་སྐྱ་ཉེ་བའི་དཔའ་ལུང་ཞེས་པར་གཙང་རོང་གི་མེས་སྟོན་ཆེན་པོའི་བརྒྱུད་ལས་ཡབ་གྲུབ་ཐོབ་ཆེན་པོ་བློ་གྲོས་རྒྱ་མཚོ་དང་། ཡུམ་ཤྲཱི་ཡོན་ཏན་རྒྱ་མཚོའི་དབོན་མོ་ཧོར་མོ་དཔལ་ལ་ཞེས་པའི་སྲས་སུ་འཁྲུངས། བཅུ་པའི་དུས་བདག་ཆེན་བློ་གྲོས་རྒྱལ་མཚན་ལས་རབ་ཏུ་བྱུང་། དེ་ནས་མདོ་སྔགས་ཀྱི་ཕྱོགས་ལ་སྦྱངས་པ་མཐར་ཕྱིན། དགུང་ལོ་བཅུ་བདུན་པར་བདག་ཆེན་རིན་པོ་ཆེ་ལས་ལམ་འབྲས་སོགས་ས་སྐྱ་པའི་ཆོས་ཕལ་ཆེར་གསན། སླར་རྗེ་བཙུན་རྡོ་རིང་པའི་དྲུང་ནས་སྙན་བརྒྱུད་ཀྱི་སྤྲོས་པ་ཞིབ་མོར་བཅད། དགུང་ལོ་ཉི་ཤུ་པར་ཡོངས་འཛིན་དཀོན་མཆོག་འཕེལ་བར་བསྙེན་རྫོགས་བཞེས། གཞན་ཡང་ཡོངས་འཛིན་བསམ་གྱིས་མི་ཁྱབ་པ་བསྟེན། སློབ་མ་ཡང་ཚར་པ། དབོན་ངག་དབང་བསྟན་རྡོར། རྗེ་མཁྱེན་བརྩེ་སོགས་མང་། དགུང་ལོ་རེ་བརྒྱད་པར་གཤེགས།། །། ༈

[edit]

tshar pa chos rje 'khrungs yul ni/ tshar pa chos rje 'khrungs yul ni/__grub chen g+ha ya d+ha ras chu la mu gu zhes pa'i sgras ku mu ta ste rnam par grol ba'i dpal mtshon par bsngags pa'i gnas dang 'dabs 'byor bar ma sang gi rigs las son pa'i dpon chen dge bshes rin brtson pa'i brgyud pa las/__yab yi dam gyi lhas rjes su bzung zhing stag zhon bran du 'khol ba rin chen dpal bzang dang /__yum dge ba'i chos la dkar ba dben rtsa kha ba'i sras mo bkra shis zhes pa'i sras su chu mo phag lo'i dpyid 'bring gi tshes bcur ngo mtshar ba'i ltas dang bcas par 'khrungs/__yum gyi mnal lam du o rgyan sku thugs kar thim pa sogs byung bas o rgyan chen po'i sprul par nges te/__rgyal dbang gis/__gtsang byed pad+ma'i sbubs nas byon pa'i co/__/'dri ba'i rdzun min bden gtam skya rengs mas/__/mngal skyes nyer drangs tshe dbang rig 'dzin ni/__/shar ba'i 'od stong 'bar la su yis bsnyon/__/zhes so/__/chung ngu'i dus nas dag snang mtha' yas pa shar/__dgung lo dgu par chos lung 'dzin gyi gtsug lag khang du yongs 'dzin blo gros rgyal mtshan las tshangs spyod dge bsnyen sdom pa gsan nas dpal ldan a ti shas lung bstan pa'i bkra shis lhun po'i chos grar zhugs/__'brom ston sprul pa rgyal ba dge 'dun rgya mtsho'i drung du rab tu byung /__mtshan blo bzang rgya mtshor gsol/__mdo phyogs la slob gnyer phul phyin mdzad/__rje btsun mas dngos su bskul nas kha'u brag rdzong du rdo ring pa'i mdun du phebs nas/__gtso bor yab bdag chen dang /__mus chen pa gnyis car gyis rdo rje 'chang blo gros rgyal mtshan la gnang ba'i lam 'bras slob bshad sogs kyis mtshon dpal sa skya pa chen po'i snyan brgyud kyi skor thams cad yongs su rdzogs pa dang /__gzhan yang rje nyid la mnga' ba'i zab don rnams dgung lo bcu bdun nas lo ngo bdun gyi bar la zhabs pad bsten te gsan/__snyan brgyud bzhi'i spros pa chod/__gzhan yang yongs 'dzin du ma las zab chos rgya mtsho lta bu gsan/__mthu stobs kyi dbang phyug drang srong bka' bzhi pa las rta mgrin yang gsang sogs dang /__nyang gi sngags 'chang chos skyong bsod nams bkra shis la gter kha nyi shu tsam gyi dbang lung sogs gsan rgya ha cang che/__mdor na yongs 'dzin drug cu rtsa gsum bsten/__o rgyan chen po dang /__rnal 'byor ma sogs lhag pa'i lha rab 'byams zhal gzigs/__khyad par rdo ring pas dus rgyun du rjes su bzung /__nyams rtogs kyi mdzod brdol/__chos skyong bran du 'khol/__zhwa lu pa'i gdan sa bcu gsum par lo gsum mdzad/__dgung lo so gcig par chos lung tshogs su mkhan chen grags pa rgyal mtshan dpal bzang po las bsnyen par rdzogs/__mtshan snga ma'i mthar dpal bzang por btags/__thugs sras kyi gtso bo rje mkhyen brtse dang /__gzhan yang bya rgod gshong gi mkhan chen klu sgrub pa/__bod mkhar ba byams pa don grub/__rtse tshogs mkhan po gzhon nu blo gros/__bo dong mkhan chen bslab gsum rgyal mtshan/__chos 'khor yang rtse'i mkhan chen bsod nams chos 'phel sogs bsam gyis mi khyab pa bskrun nas dgung lo re bzhi me stag lor ngo mtshar ba'i ltas dang bcas te gshegs so/__/sku gshegs nas kyang dam pa mang por ye shes kyi skus rjes su bzung ngo /__/sa skya'i mi 'gyur ba'i gzer bzhi ni/__/shar du bya 'gyur ba rdo rje'i brag__/lhor phul byung bdud po brag__/nub tu cha lung rdo rje'i brag__/byang du ga ra ga ya'i brag__/ces snang /__yab rje rdo ring pa'i slob ma rje btsun rdo rje 'chang kun dga' legs pa'i blo gros rgyal mtshan dpal bzang po'i rnam thar yid bzhin chu gter bzhad pa zhes mkhyen brtses mdzad 80par/__sa skya nye ba'i dpa' lung zhes par gtsang rong gi mes ston chen po'i brgyud las yab grub thob chen po blo gros rgya mtsho dang /__yum shrI yon tan rgya mtsho'i dbon mo hor mo dpal la zhes pa'i sras su 'khrungs/__bcu pa'i dus bdag chen blo gros rgyal mtshan las rab tu byung /__de nas mdo sngags kyi phyogs la sbyangs pa mthar phyin/__dgung lo bcu bdun par bdag chen rin po che las lam 'bras sogs sa skya pa'i chos phal cher gsan/__slar rje btsun rdo ring pa'i drung nas snyan brgyud kyi spros pa zhib mor bcad/__dgung lo nyi shu par yongs 'dzin dkon mchog 'phel bar bsnyen rdzogs bzhes/__gzhan yang yongs 'dzin bsam gyis mi khyab pa bsten/__slob ma yang tshar pa/__dbon ngag dbang bstan rdor/__rje mkhyen brtse sogs mang /__dgung lo re brgyad par gshegs//____//_!