JKW-KABUM-19-DZA-001-031

🚧 This website is under continued development. We appreciate your patience!

Previous Text Back to Volume PageNext Text

ཀཿཐོག་རིག་འཛིན་ཚེ་དབང་ནོར་བུའི་རྣམ་ཐར་ཉུང་བསྡུས།

Wylie title	kaH thog rig 'dzin tshe dbang nor bu'i rnam thar nyung bsdus
Location	mkhyen brtse'i bka' 'bum Volume 19, sde tshan 1, Text 31, Pages 246-276 (Folios 123b6 to 138b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. kaH thog rig 'dzin tshe dbang nor bu'i rnam thar nyung bsdus. In 'jam dbyangs mkhyen brtse'i dbang po'i bka' 'bum, Vol. 19: 246-276. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

31 246-276	ཀཿཐོག་རིག་འཛིན་ཚེ་དབང་ནོར་བུའི་རྣམ་ཐར་ཉུང་བསྡུས། kaH thog rig 'dzin tshe dbang nor bu'i rnam thar nyung bsdus History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །རིག་འཛིན་སྟག་ཤམ་རྡོ་རྗེའི་གཏེར་ལུང་ལས། ཡོན་ཏན་གདུལ་བྱ་སྨད་ཀྱི་ཕྱོགས་ནས་འབྱུང་༔ རྡོ་རྗེའི་མིང་ཅན་བརྟུལ་ཞུགས་སྟོབས་པོ་ཆེ༔ ཕྱག་རྫོགས་ཀློང་གྱུར་རྟ་མགྲིན་བཀའ་བབས་དང་༔ བླ་མ་རྡོ་རྗེ་གྲོ་ལོད་ཞལ་མཇལ་བའི༔ སྐལ་ལྡན་སྐྱེས་བུ་དེ་ཡིས་གདུལ་བྱ་སྡུད༔ རྫུ་འཕྲུལ་སྤྲུལ་པའི་སྐལ་ལྡན་མང་འབྱུང་ནས༔ ཀཿཐོག་ཕྱོགས་སུ་སྟོན་པའི་དབང་དུ་འདུག༔ བཤད་སྒྲུབ་བསྟན་པ་གཞལ་དུ་མེད་པ་འབྱུང་༔ ཞེས་སོགས་རྡོ་རྗེའི་ལུང་བསྟན་དུ་མས་དཔང་པོ་བྱས་པ་བཞིན་དཔལ་རྡོ་རྗེ་སེམས་དཔའི་ཡེ་ཤེས་གཟུགས་གཞན་དུ་བསྒྱུར་བ་གསང་བདག་རྡོ་རྗེ་ཆོས། སངས་རྒྱས་དངོས་ཀྱི་བླ་མ་རྒྱལ་ཆེན་ཨིནྡྲ་བྷཱུ་ཏི། སློབ་དཔོན་ཧཱུྃ་ཆེན་ཀ་ར། གནུབས་ནམ་མཁའི་སྙིང་པོ། ཟུར་ཆུང་ཤེས་རབ་གྲགས། དྭགས་སྒོམ་ཚུལ་ཁྲིམས་སྙིང་པོ། ཞིག་པོ་ཉི་མ་སེང་གེ །གྲུབ་ཐོབ་མ་ཎི་རིན་ཆེན། ཤངས་སྟོན་རྒྱལ་མཚན་འབུམ། འཁོན་སྟོན་བཟང་པོ་དཔལ། རི་ཁྲོད་པ་དར་མ་རྒྱལ་མཚན། མུང་པོ་གཏེར་སྟོན་བྱང་ཆུབ་གླིང་པ་དཔལ་གྱི་རྒྱལ་མཚན། ཀཿཐོག་པ་ཚུལ་ཁྲིམས་འབུམ་པ། ཀོང་པོ་སངས་རྒྱས་གླིང་པའི་སྲས་བརྒྱུད་སངས་རྒྱས་བློ་གྲོས། སྟག་ལུང་པ་མཁས་གྲུབ་ངག་དབང་གྲགས་པ། ཕག་གྲུ་བདག་པོ་ཀུན་དགའ་ལེགས་པ། ཀུན་མཁྱེན་སངས་རྒྱས་འཕེལ། གོང་དཀར་རྡོ་རྗེ་གདན་པའི་སློབ་མ་རྒྱ་སྟོན་རིག་པའི་གློག་ཕྲེང་། འཁོན་རིགས་བདག་སྨྱོན་ཀུན་དགའ་ལེགས་པ། རཏྣའི་གདུང་བརྒྱུད་ཀུན་དགའ་བསྟན་འཛིན། འཁྲུལ་ཞིག་ཆེན་པོ་དབང་དྲག་རྒྱ་མཚོ། སྟག་བླ་གྲུབ་དབང་པདྨ་ནོར་བུ་སྟེ། དེ་རྣམས་ནི་རྗེ་ཉིད་ཀྱིས་སྩལ་བའི་སྐྱེ་ཕྲེང་གསོལ་འདེབས་ཡིད་བཞིན་དབང་གི་ཕྲེང་བ་ལས་བྱུང་བ་དང་། གཞན་ཡང་ཀློང་གསལ་སྟག་ཤམ་སོགས་ཀྱི་གཏེར་ལུང་དང་། རྗེ་ཉིད་ཀྱི་དག་པའི་གཟིགས་སྣང་སོགས་དང་བསྟུན་ན། སྟོན་པའི་སྤྱན་སྔར་དགྲ་བཅོམ་པ་ལྷ་མིག་རྣམ་པར་དག་པ་མ་འགག་པ། རྒྱ་གར་དུ་གྲུབ་ཆེན་ནག་པོ་སྤྱོད་པ་ཆེན་པོ། ཁ་ཆེ་རིན་ཆེན་རྡོ་རྗེ། གྲུབ་ཆེན་ལ་ལི་ཏའི་གཟུངས་མ། རྒྱ་གར་ཤར་ཕྱོགས་ཀྱི་རྒྱལ་པོ། ལྷོ་ཕྱོགས་རྒྱ་མཚོའི་འགྲམ་དུ་ཚོང་དཔོན་གྱི་རིགས་ལས་གྱུར་པའི་རྣལ་འབྱོར་པ། བོད་ཡུལ་དུ་ཀཿཐོག་པ་བྱམས་པ་འབུམ་པ། ལྷ་རི་པ་ནམ་མཁའ་འོད། ཙཱ་རི་རས་པ་བྱང་ཆུབ་འབུམ། ལྷོ་བྲག་པ་སློབ་དཔོན་ཨེ་མ། མཁས་པ་གཙང་ནག་པ། སྟག་ལུང་པ་སངས་རྒྱས་དབོན། དབུས་པ་བློ་གསལ། ས་བཟང་མ་ཏི་པཎ་ཆེན། འབྲི་གུང་པ་རྡོ་རྗེ་རྒྱལ་པོ། ཀུན་མཁྱེན་བོ་དོང་པའི་སློབ་མ་ཤངས་པ་རས་ཆེན་བསོད་ནམས་མཆོག་གྱུར། ཀུན་སྐྱོད་གླིང་པའི་སྲས་དབང་ཆེན་ཉི་ཟླ་བཟང་པོ། རྗེ་བཙུན་ཏཱ་ར་ནཱ་ཐ། དེ་དང་ཐུགས་རྒྱུད་གཅིག་པའི་རྒྱལ་ཚབ་ཡེ་ཤེས་རྒྱ་མཚོ། ལྷོ་འབྲུག་པ་མཐུ་ཆེན་ངག་དབང་རྣམ་རྒྱལ་སོགས་ཐོར་བུར་གསུངས་པས་མཚོན་མཁས་ཤིང་གྲུབ་པའི་སྐྱེས་རབས་མེ་ཏོག་མནྡཱ་རའི་ཕྲེང་བ་ལྟར་ཚར་དུ་དངར་བའི་མཐར། ཕྱོགས་དེར་ཡོངས་སུ་གྲགས་པ་ལྟར་ན་སྐུ་སྐྱེད་པའི་ཡབ་ཆེན་པོ་རྡུའི་རིགས་ཞེས་འོད་གསལ་ལྷ་བབས་ཀྱི་བརྒྱུད་པ་འགར་སྟོང་བཙན་ཡུལ་བཟུང་དང་། སྒོམ་སྟོན་བསོད་ནམས་རིན་ཆེན་སོགས་ཀྱི་རིགས་ལས་སོན་པའི་གོ་ས་ཟེའུ་སངས་ལྡིང་གི་རིགས་ལས་ཇོ་བོ་སྐྱབས་སུ་གྲགས་པའི་ཁྱིམ་བཙུན་སྦས་པའི་རྣལ་འབྱོར་པ་ཞིག་དང་། ཡུམ་ཆེ་བཙན་འབྲུའི་རིགས་སུ་སོན་པ་སྤྲུལ་པའི་གཏེར་སྟོན་པདྨ་བདེ་ཆེན་གླིང་པའི་ལྕམ་སྲིང་རྡོ་རྗེ་མཚོ་ཞེས་རང་གྲོལ་གྱི་རྣལ་འབྱོར་མ་ཞིག་གི་སྲས་སུ་སྲིད་པ་ཉེ་བར་བཟུང་བའི་ཚུལ་བསྟན། དོན་གྱིས་ནི་གནས་ཆེན་རི་བོ་བཀྲ་བཟང་གི་ཞིང་སྐྱོང་ཆེན་པོ་རྡོ་རྗེ་བྲག་བཙན་ཡིན་པར་བཞེད། གང་ལྟར་ཡང་གནས་ཆེན་དེ་ཉིད་ཀྱི་ནུབ་བྱང་དཔལ་གྱི་རི་བོའི་མགུལ་དུང་དཀར་གཡས་སུ་འཁྱིལ་པས་མཚན་པའི་སའི་ཐིག་ལེར། སྐུའི་སྐྱེ་བ་སྔ་མ་གྲུབ་དབང་པདྨ་ནོར་བུ་སྐུ་བལྟམས་ནས་བགྲང་བྱ་ང་དགུ་འདས་པ། རྗེ་ཉིད་ཀྱི་སྐུ་ཞང་པདྨ་བདེ་ཆེན་གླིང་པ་སྐུ་བལྟམས་ནས་དགུང་གྲངས་སོ་ལྔ་བཞེས་པའི་རབ་བྱུང་བཅུ་གཉིས་པའི་ནང་ཚན་ས་ཕོ་སྟག་གི་ལོའི་དཔྱིད་འབྲིང་བོད་ཟླ་བའི་དུས་ཚེས་དགེ་བར་སྐུ་བལྟམས། ཞག་བདུན་ཙམ་སོང་བ་ན་གཏེར་ཆེན་རིན་པོ་ཆེ་ཕེབས་ནས་འཆི་མེད་ཚེའི་དབང་གནང་། ཡེ་ཤེས་ཆེན་པོས་བྱིན་གྱིས་བརླབས། རྡོ་རྗེ་ཚེ་དབང་ནོར་བུ་ཞེས་པའི་མཚན་གྱི་ཅོད་པན་དཔྱང་། ཟླ་ངོ་གསུམ་ཙམ་ནས་ཚིག་གི་བརྡ་འཕྲོད་པ་དང་། བདུན་ནས་དྲི་བ་དང་ལན་འདེབས་པ་ལ་ཆགས་ཐོགས་མེད། མཁའ་འགྲོ་ཆོས་སྐྱོང་གིས་སྲུང་བའི་རྟགས་མཚན་གསལ། སྐུ་སྐྱེ་བ་སྔ་མའི་བག་ཆགས་ཐམས་ཅད་ཀྱང་རིམ་གྱིས་སད། ངེད་ནི་ནམ་མཁའི་སྙིང་པོ་ཡིན། །སྒྲུབ་གནས་ལྷོ་བྲག་མཁར་ཆུ་ཡིན། །ཞེས་དང་། བདག་གྲུབ་ཆེན་པདྨ་ནོར་བུའོ་ཞེས་འཇིགས་པ་མེད་པའི་སེང་གེའི་སྒྲ་ཐོལ་བྱུང་དུ་བསྒྲགས། གཏེར་ཆེན་རིན་པོ་ཆེས་ཀྱང་གནུབས་ནམ་མཁའི་སྙིང་པོ་དང་། གྲུབ་ཆེན་པདྨ་ནོར་བུ་དབྱེར་མེད་པའི་སྤྲུལ་པར་ངོས་བཟུང་ཞིང་། འགྲན་བྲལ་གྱི་སྐྱེས་བུ་ཆེན་པོ་རྩོད་མེད་གཅིག་ཏུ་ཡོང་བར་ལུང་བསྟན། སྐབས་དེ་རྣམས་སུ་སློབ་དཔོན་ཆེན་པོ་པདྨཱ་ཀ་རའི་ཞལ་ཡང་ཡང་མཇལ། སྐུ་ཚེ་སྔ་མའི་ཡོངས་འཛིན་མང་པོའི་མཚན་གསལ་བར་སྟོན། དབང་སྐུར་ཆོས་འཆད། ཏིང་འཛིན་སྒོམ་པ། ཟབ་གཏེར་འདོན་ཅིང་གནས་སྒོ་འབྱེད་པ་སོགས་ཕལ་པའི་སྤྱོད་ཡུལ་ལས་འདས་པའི་གཞོན་ནུ་རོལ་རྩེད་ཙམ་གྱིས་ཀྱང་དཔྱོད་ལྡན་རྣམས་ཡིད་རང་དབང་མེད་པར་འཕྲོག །གཞན་སེམས་མཁྱེན་པའི་མངོན་ཤེས་དང་། བདེ་གསལ་མི་རྟོག་པའི་ཉམས་མྱོང་རྩོལ་མེད་དུ་ཤར་བ་སོགས་སྒོ་དུ་མ་ནས་དམ་པའི་སྐྱེས་བུའི་སྤྲུལ་པར་ཡོངས་སུ་གྲགས་ཀྱང་། སྐལ་བ་དམན་པ་འགའ་ཞིག་གི་ལོག་རྟོག་བསལ་བའི་ཕྱིར་གོང་མའི་དཔོན་རིས་སུ་གཏོགས་པ་བླ་མ་ཀུན་བཟང་ཞེས་པ་ཞིག་གིས་རིག་འཛིན་སྟག་ཤམ་རྡོ་རྗེ་དང་། གཏེར་ཆེན་རོལ་པའི་རྡོ་རྗེ་ཟུང་ལ་ལུང་བསྟན་ཞུས་པ་འཁྲུལ་མེད་ཀྱི་གཟེངས་བསྟོད་གནང་བས་ཐེ་ཚོམ་གྱི་མུན་པ་དབྱིངས་སུ་སངས། གང་ལྟར་ཡང་དགུང་ལོ་ལྔ་པར་ལྗགས་ཀློག་ཕུལ་བས་ཚེགས་མེད་དུ་མཁྱེན། དྲུག་པར་གཏེར་ཆེན་བླ་མ་ལས་ཟབ་གསང་རྫོགས་པ་ཆེན་པོའི་སྨིན་གྲོལ་གསན་པ་ནས་བཟུང་ཕལ་ཆེར་འབྲལ་མེད་དུ་བཞུགས། དགུང་ལོ་བདུན་པར་རྡོ་རྗེ་གྲོ་ལོད་ཀྱི་ལས་བྱང་བློར་བཟུང་ཞིང་ཡི་དམ་མཛད་པས་བསྐྱེད་རིམ་གསལ་བརྟན་གྱད་དུ་གྱུར། བརྒྱད་པར་སངས་གླིང་གཏེར་བྱོན་ཐུགས་རྗེ་ཆེན་པོའི་རྒྱབ་ཆོས་ཡང་གསང་འོད་དྲལ་གཟིགས་པས་གོ་བ་དཔྱིས་ཕྱིན་པར་འཁྲུངས་ཤིང་། གསང་སྔགས་སྤྱིའི་ལྟ་སྤྱོད་ལ་ངེས་པ་རྙེད། བཅུ་པར་མདོ་སྔགས་ལ་མཁྱེན་པ་རྒྱས་པས་དཔྱོད་ལྡན་གྱི་ཁེངས་པའི་སྤོབས་པ་ཟིལ་གྱིས་མནན། བཅུ་གཅིག་པར་གཏེར་ཆེན་བླ་མ་ལས་རང་གཏེར་མཁའ་འགྲོ་སྙིང་ཏིག་གི་སྨིན་གྲོལ་ཟབ་རྒྱས་སུ་གསན་པས་གནས་ལུགས་ལ་འཕྲིག་ཚུད། མནལ་ལམ་ནམ་འདོད་དུ་ཟིན། དྲེགས་པ་ཅན་གྱིས་སྲོག་སྙིང་ཕུལ། བཅུ་གཉིས་པར་རིག་འཛིན་འགྱུར་མེད་རྡོ་རྗེའི་ཐུགས་སྲས་ཨོ་རྒྱན་རྣམ་གྲོལ་ལས་སྔ་འགྱུར་མདོ་སྒྱུ་སེམས་གསུམ་གྱི་སྨིན་གྲོལ་སོགས་རྒྱ་ཆེར་གསན། ཁྱད་པར་དགུང་གྲངས་བཅུ་གསུམ་བཞེས་སྐབས་གཏེར་ཆེན་བླ་མ་ལས་སྨར་ཚང་ལུགས་ཀྱི་ཕྱག་ཆེན་དང་། རང་གཏེར་རྫོགས་པ་ཆེན་པོའི་ཉམས་ཁྲིད་གནད་སྨིན་དུ་གསན་པས་རྟོགས་པའི་བོགས་ཐོན། ལོ་དེའི་མཇུག་ཏུ་འཇང་ཆུ་རི་བཀྲ་དགོན་དུ་སྤྱན་དྲངས་ནས་གྲུབ་ཆེན་མཆོག་གི་སྤྲུལ་པའི་སྐུར་མངའ་གསོལ། རྗེ་དབོན་བླ་མ་སྐལ་བཟང་ཨོ་རྒྱན་བསྟན་འཛིན་ནས་བརྩེ་བས་བསྐྱངས། བཅུ་བཞི་པར་ཀཿཐོག་རྒྱལ་སྲས་བསོད་ནམས་ལྡེ་བཙན་ཕྱོགས་དེར་ཕེབས། རྗེ་དབོན་བླ་མ་སྐལ་བཟང་ལས་བདུད་འདུལ་གཏེར་ཆོས་བཞུགས་སོ་འཚལ་དང་། རྩེ་ལེའི་བཀའ་འབུམ་སོགས་གསན། ཚུར་ཀློང་གསལ་རྩ་གསུམ་སྐོར་གྱི་དབང་ལུང་ཡོངས་རྫོགས་གནང་བ་སོགས་ལེགས་པར་གསན་ཅིང་། རྒྱལ་སྲས་མཆོག་ནས་ཕྱི་མཐའ་གཟིགས་པའི་ཐུགས་ལ་ཤིན་ཏུ་བཏགས། བར་ཁྲོད་ལྷ་ཁང་དུ་རིག་འཛིན་པདྨ་ཆོས་རྒྱལ་སྤྱན་དྲངས་ཤིང་བུམ་སྒྲུབ་བཙུགས་པའི་སྐབས་བླ་མ་སྐལ་བཟང་ནས་རྗེ་དེ་ཉིད་ཀྱི་གཏེར་གསར་ཤོག་སེར་ལས་ཕབ་གང་གྲུབ་གསན་པ་དང་མཉམ་དུ་གསན་བཞེས་དང་། ཟབ་གསང་ཆོས་ཀྱི་བགྲོ་བས་དུས་འདའ་བར་མཛད། དགུང་གྲངས་བཅོ་ལྔ་པར་གཏེར་ཆེན་པདྨའི་ཞབས་ལས་ཕྱག་ཆེན་ཁྲིད་ཡང་བསྐྱར་དུ་གསན་པས་ཞི་གནས་ཀྱི་ཉམས་བརྟན་པོ་འཁྲུངས། སྐྱེ་བདུན་སྒྲུབ་ཆེན་གྱི་གྲལ་དུའང་ཕེབས། བཅུ་དྲུག་པར་སླར་ཡང་གཏེར་ཆེན་བླ་མ་ལས་རྫོགས་ཆེན་སེམས་སྦྱོང་སྐོར་དང་། ཐབས་ལམ་ཟབ་མོའི་ཉམས་ཁྲིད་སྨིན་པར་བཞེས། ཡེ་ཤེས་འཕོ་བའི་དབང་བསྐུར་བརྙེས། ཆུ་མོ་སྦྲུལ་ལོ་དེར་གཏེར་ཆེན་རིན་པོ་ཆེ་དགུང་གྲངས་ལྔ་བཅུ་རྩ་གཅིག་བཞེས་པའི་ཧོར་ཟླ་བཅུ་གཅིག་པའི་གནམ་སྟོང་ཐོ་རངས་དགོངས་པའི་ཆོས་དབྱིངས་སུ་ཐིམ་པའི་ཚེ་དགོངས་རྫོགས་ཀྱང་བསྙེལ་མེད་དུ་བསྒྲུབ། ཐོས་བསམ་སྒོམ་པའི་གོ་ཆ་བརྟན་པོ་མཛད། བཅུ་བདུན་པར་སྐུ་མཚམས་བཅད་རྒྱ་ཅི་རིགས་གནང་། བཅོ་བརྒྱད་ལ་གཙང་ཁྲོ་སོགས་ཀྱི་གནས་མཇལ་ལ་ཕེབས་ཤིང་རྟོགས་པའི་བོགས་དབྱུང་། གནམ་ཆོས་འགའ་ཞིག་བབ་ཀྱང་ཆེད་གཉེར་མ་མཛད། ཨོ་རྒྱན་རིན་པོ་ཆེས་འབྱུང་འགྱུར་ལུང་བསྟན། བཅུ་དགུར་གཏེར་ཆེན་བླ་མའི་སྒྲུབ་གནས་སེང་ཁྲོམ་རི་ངོགས་སུ་ཐུགས་དམ་ལ་བཞུགས་པས། ཟབ་གཏེར་གྱི་བཀའ་ཐོབ་ཡོང་བའི་ངེས་ཤེས་འཁྲུངས་ཀྱང་རྟེན་འབྲེལ་འགའ་ཞིག་གིས་རྫས་གཏེར་ཙམ་ལས་ཕྱག་ཏུ་མ་སོན། ཉི་ཤུ་པར་དཔལ་གྱི་རི་བཀྲར་བསྙེན་མཚམས་དམ་པོར་མཛད་པས་ཡི་དམ་གྱི་ལྷས་རྗེས་སུ་བཟུང་། བར་ཆད་ཀྱི་གེགས་ལས་གྲོལ། ཡེ་ཤེས་ཀྱི་མཁའ་འགྲོ་མ་ལས་ཟབ་མོའི་སྙན་བརྒྱུད་འགའང་གསན། ཉེར་གཅིག་པར་སྟག་ཤམ་ནུས་ལྡན་པ་སོགས་ཀྱི་ཞལ་སློབ་སྦས་པའི་གྲུབ་དབང་སྐལ་བཟང་རིན་ཆེན་ལས་ཐབས་ལམ་གྱི་ཟབ་གནད་དང་། དྲག་སྔགས་ཀྱི་ཕྱག་བཞེས། གུར་དྲག་ཡེ་ཤེས་རབ་འབར་གྱི་དབང་ལུང་སོགས་སྨིན་རྒྱས་སུ་གསན། ཡེ་ཤེས་མཁའ་འགྲོ་མཚོ་རྒྱལ་མས་ཞལ་ཡང་ཡང་བསྟན་ཅིང་བྱིན་གྱིས་བརླབས། གསང་བ་མཆོག་གི་དབང་བསྐུར་སྩལ། ལོ་དེའི་འཇུག་ཉི་མ་ཕུག་ཏུ་ཨོ་རྒྱན་རྣམ་གྲོལ་ལས་དགོངས་འདུས་གསེར་ཆོས་ཀྱི་སྨིན་གྲོལ་རྫོགས་པར་གསན། སྣང་སེམས་དབྱེར་མེད་ཀྱི་དོན་མངོན་དུ་མཛད། ཉེར་གཉིས་པར་ཚོམ་ཆེན་དུ་ཟབ་ཁྲིད་ཐོག་མར་གསུངས། ཐབས་ལམ་ཟབ་མོའི་ཉམས་བཞེས་གཏན་ལ་ཕབ། ཤིང་དགུ་གངས་རར་ཉམས་རྟོགས་ཀྱི་བོགས་དབྱུང་། མངོན་སྤྱོད་ཀྱི་ལྟས་བསྟན། ལོ་མཇུག་ཏུ་སྟག་ཕུ་སེའུ་ལུང་གི་དབེན་པར་འདུས་པ་བརྒྱ་ཕྲག་ཙམ་ལ་ཟབ་ཁྲིད་སྩལ་བས་ཐམས་ཅད་ལ་ངོ་སྤྲོད་ཐེབས་པ་སོགས་ཁྲིད་ལམ་ལེགས་པ་བྱུང་། འདི་ནས་བཟུང་ཟབ་ཁྲིད་མང་དུ་མཛད་པར་སྣང་། ཙི་རོང་ཏིང་རི་རུ་རྒྱལ་སྲས་པདྨ་དབང་རྒྱལ་ལ་ཟབ་ལམ་རྩ་རླུང་གི་ཁྲིད་སྨིན་པར་སྩལ། ཉེར་གསུམ་པར་རྗེ་ཉིད་ཀྱི་ཕྱི་མོ་ཡེ་ཤེས་མཁའ་འགྲོ་ཆེན་མོ་དེའང་སྐུ་གཤེགས་པའི་ཚུལ་བསྟན་པས་དགོངས་རྫོགས་ལེགས་པར་བསྒྲུབས། ཌཱ་ཀི་མས་སྐུ་ཚེ་ལ་བར་ཆད་མེད་པའི་ལུང་བསྟན་སྩལ། ཉག་གཤིས་ཁ་དབེན་རྫོང་དུ་བཞུགས་སྐབས་དྲེགས་པ་རཱ་ཧུ་ལས་མི་བཟད་པའི་ཐོག་སེར་གྱི་ཆོ་འཕྲུལ་བསྟན་པས་ཡི་དམ་གྱི་གསལ་སྣང་དང་ལྟ་གདིངས་ཀྱི་ཟིལ་གྱིས་མནན། རིག་འཛིན་རོལ་པའི་རྡོ་རྗེ་མཇལ་བར་ཕེབས་བཞེད་གནང་ནའང་གཞན་རྐྱེན་གྱིས་བཤོལ་པས་ལྕགས་བྱི་ལོ་དེ་ཉིད་ཀྱི་ནག་ཟླའི་ཉེར་གསུམ་རིག་འཛིན་བླ་མ་ཞི་བར་གཤེགས་སྐབས་ཡེ་ཤེས་ཀྱི་སྐུས་རྗེས་སུ་བཟུང་བ་ཙམ་བྱུང་། གཏེར་ཆེན་དེ་ཉིད་དང་དངོས་སུ་མཇལ་ན་རྗེ་ཉིད་ལུས་མ་སྤངས་པར་མཁའ་སྤྱོད་དུ་གཤེགས་པའི་ལུང་བསྟན་ཡོད་པར་གྲགས། ལོ་དེའི་སྟོན་ཟུར་མང་རིག་འཛིན་གསུང་རབ་རྒྱ་མཚོའི་དྲུང་སྨར་ཁམས་དབེན་རྫོང་སྒར་དུ་ཕེབས། ཕྱག་ཆེན་སྙན་བརྒྱུད་ཀྱི་ཁྲིད། རྡོ་རྗེ་འཆང་གི་དབང་བསྐུར། རྫོགས་ཆེན་གསང་བ་ཡེ་ཤེས་ཀྱི་ཐོད་རྒལ་ངོ་སྤྲོད་སོགས་དང་། རོལ་རྡོར་གཅུང་ཨོ་རྒྱན་ལྷུན་གྲུབ་ལས་གཏེར་གསར་ཕྱག་རྡོར་དང་། སེང་གདོང་མའི་སྐོར་ཡོངས་རྫོགས་གསན། སྐབས་དེར་ཀུན་མཁྱེན་སི་ཏུ་རིན་པོ་ཆེའང་མཇལ་ཞིང་ཆོས་འབྲེལ་ཙམ་ནོས་ནས་ཕྱིར་ཕེབས། ཉེར་བཞི་པར་ཅེམ་ཆེན་དགོན་དུ་བླ་མ་སྐལ་བཟང་དང་ཞལ་ལྷན་རྒྱས་མཛད། དབྱར་དུས་རྒྱལ་སྲས་ཆོས་སྐྱོང་དཔལ་ལྡན་སོགས་ལ་རྫོགས་པ་ཆེན་པོའི་སྨིན་ཁྲིད་བཏབ། ཀུན་མཁྱེན་ཀློང་ཆེན་པས་ཞལ་བསྟན་ཅིང་རྗེས་སུ་གནང་བ་སྩལ། སྔགས་སྲུང་མས་ཕྲིན་ལས་སྒྲུབ་པར་གཡར་དམ་བཞེས། ཐུགས་དམ་བོགས་ཤིན་ཏུ་ཆེ་བར་འཁྲུངས། ཉེར་ལྔ་པ་ཡང་དེ་སྐོར་དུ་བཞུགས་ཏེ་སྒྲུབ་ཆེན་དང་ཟབ་ཁྲིད་སོགས་ཕྲིན་ལས་བསྐྱངས། ཁྱད་པར་དྲག་པོ་མངོན་སྤྱོད་ཀྱི་ལས་ལ་རྟགས་ཐོན་པར་མཛད། ཉེར་དྲུག་ཆུ་ཡོས་ལོའི་ཆོ་འཕྲུལ་ཟླ་བར་ཀཿཐོག་ཏུ་ཕེབས། རྒྱལ་སྲས་རིན་པོ་ཆེ་མཇལ། སྟག་ཤམ་པའི་ཐུགས་སྒྲུབ་ཞི་བ་དང་། རྩ་གསུམ་སྙིང་པོ་དོན་སྦྱོར་གྱི་དབང་ལུང་སོགས་ཟབ་ཆོས་གསན། རྗེ་ཉིད་ཀཿཐོག་རྡོ་རྗེ་གདན་གྱི་སེང་ཁྲིར་མངའ་གསོལ་ཞིང་བསྟན་པ་འཛིན་སྐྱོང་སྤེལ་བར་གདམས་པ་ལ་བརྟེན། ཀཿཐོག་རིག་འཛིན་ཆེན་མོ་ཞེས་གངས་ཅན་གྱི་ལྗོངས་འདིར་རླུང་ལྟར་གྲགས་པའང་དོན་དེ་ལས་བྱུང་བར་གསལ། གང་ལྟར་ཡང་དམ་པ་རྣམ་གཉིས་ཐུགས་ཡིད་གཅིག་འདྲེས་སུ་མཛད་ནས་རྒྱལ་ཁམས་ཕྱོགས་མེད་ལ་ཕེབས་རྒྱུའི་སྙན་ཞུ་དང་བཅས་ཐུགས་འཕྲེང་བཞིན་དུ་ཕྱིར་ཕེབས། ས་ག་ཟླ་བའི་ཚེས་ལྔ་ལ་རྒྱལ་སྲས་རིན་པོ་ཆེ་ཡང་གློ་བུར་དུ་ཞིང་གཤེགས། དབྱར་ཟླ་ར་བའི་ནང་གཏེར་ཆེན་པདྨ་བདེ་གླིང་གིས་སྐུ་གདུང་རྒྱལ་སྲས་པདྨ་དབང་རྒྱལ་དང་ལྷན་རྒྱས་ཀྱིས་ཞུགས་འབུལ་གནང་བས་རྟགས་མཚན་བསམ་གྱིས་མི་ཁྱབ་པ་གསལ། རྒྱལ་སྲས་བསྟན་འཕེལ་དགུང་ལོ་བདུན་བཞེས་པ་བླ་མའི་དམ་ཚིག་ལ་དགོངས་ནས་རྗེ་ཉིད་ཀྱིས་ཕྱོགས་དེར་གདན་དྲངས་ཤིང་མགོ་འདྲེན་བརྩེ་གཟིགས་རྒྱ་ཆེར་གནང་བར་གྲགས། ལོ་དེའི་སྟོན་ཀར་དབུས་སུ་འབྱོན་བཞེད་པས་བླ་མ་སྐལ་བཟང་གི་དྲུང་དུ་ཕྱི་ཕྱག་མཛད་པར་ཕེབས། དམ་བཅའི་ཡི་གེའང་བཀོད། བོད་ཡུལ་དུ་ཆིབས་ཁ་བསྒྱུར་བའི་ཐོག་མར་གོ་འཇོ་མཁོ་ཁྱིམ་དགོན་དུ་བྱོན། རྗེ་ཨོ་རྒྱན་རྣམ་གྲོལ་ལས་མཁའ་འགྲོ་སྙིང་ཏིག་གི་དབང་ལུང་ཁྲིད་སོགས་ཟབ་ཆོས་དུ་མ་གསན། རིམ་བཞིན་ཟུར་མང་བདུད་རྩི་དིལ་དུ་བྱོན། རིག་འཛིན་གསུང་རབ་རྒྱ་མཚོ་ལས་ཟུར་མང་སྙན་བརྒྱུད་ཀྱི་དབང་ལུང་ཁྲིད་གསུམ་སོགས་སྨིན་པར་གསན། ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། རྗེ་འདི་དང་པདྨ་བདེ་ཆེན་གླིང་པ་གཉིས་རྩ་བའི་བླ་མར་བཟུང་། ཕྱིས་ནས་ཞབས་དྲུང་ཏྲེ་ཧོ་དང་། ཇོ་ནང་ཀུན་བཟང་དབང་པོ་གཉིས་ཀྱང་བཀའ་དྲིན་ཆེ་བའི་བླ་མའི་མཆོག་ཏུ་བཀུར། གཏེར་དབོན་ཨོ་རྒྱན་ལྷུན་གྲུབ་ལས་ཀློང་གསལ་མ་གཏོགས་པ་རཏྣའི་སྐོར་ཚང་མའི་དབང་ལུང་སོགས་གསན། ཕར་རྫོགས་ཆེན་མཁའ་འགྲོ་སྙིང་ཏིག་གི་དབང་ལུང་ཁྲིད་གསུམ་སྨིན་རྒྱས་སུ་སྩལ་བས་འགྲོ་དོན་ཕྲིན་ལས་ཀྱི་རྟེན་འབྲེལ་འགྲིགས། ཉེར་བདུན་པར་ཀེ་རོང་རྡོ་རྗེ་ཅོང་ཕུག་ཏུ་བྱོན། དེར་རོལ་རྡོར་ཡང་གཏེར་དྲག་པོ་བདེ་གཤེགས་འདུས་པའི་སྨིན་བྱེད་སོགས་ཕྱག་ཏུ་བབས། ཀརྨ་ལྷ་སྟེང་བརྒྱུད། རི་བོ་ཆེར་ཞབས་དྲུང་འཕགས་པ་ལས་སངས་རྒྱས་དབོན་གྱི་ཐུགས་སྒྲུབ་གསན། ཕར་ཡང་ཆོས་འབྲེལ་འགའ་ཙམ་ཕུལ། སྤར་གླང་མ་ལུང་ཞེས་སྟག་ཤམ་པའི་གཏེར་གནས་མཇལ་ཞིང་། རིམ་པར་བརྒྱུད་སྤུ་བོ་འདོངས་ཆུ་བྱམས་པའི་ལྷ་ཁང་མཇལ། སྤུ་སྟོད་བདུད་འདུལ་གདུང་སྐུ་མཆེད་ལས་བདུད་འདུལ་གཏེར་ཁ་ཡོངས་རྫོགས་ཀྱི་སྨིན་གྲོལ་གསན། དེ་སྐབས་སྤུ་བོ་ནང་འཁྲུགས་དང་ཆུ་བོ་རྒྱས་པས་ཀློ་ལམ་འགག་སྟབས། རྗེ་ཉིད་གཅིག་པུར་གནས་ཆེན་རྨ་ཀུང་ལུང་གི་བར་སྒོ་དམ་ཅན་ཕོ་བྲང་གི་ཉེ་འདབས་དམ་རྫོགས་ཞེས་བྱའི་བྲག་སྐྱིབས་སུ་བཞུགས་ནས་འཕགས་མཆོག་ཐུགས་རྗེ་ཆེན་པོའི་བསྙེན་སྒྲུབ་རྟགས་ཐོན་གནང་། དེ་ནས་སྦས་ཡུལ་བྲ་གད་ལྗོངས་སུ་པདྨ་ཤེལ་ཕུག་ཏུ་བཞུགས། སླར་སྨན་ཆུ་སྤྲུལ་སྐུས་ཞུས་ངོར་སྤུ་བོ་ཡེ་གང་དུ་ཕེབས། དད་འདུས་སྟོང་ཕྲག་ཙམ་ལ་བཀའ་བརྒྱད་ཀྱི་དབང་ཆེན་དང་ཐུགས་སྒྲུབ་ཀྱི་དབང་ཁྲིད་དང་། ཡུལ་སྡེ་སོ་སོར་ཡང་ཡང་ཕྲིན་ལས་བསྐྱངས་ནས་དགེ་བསྐུལ་སྩལ། ཉེར་བརྒྱད་པར་སླར་བྲག་ལྗོངས་ནས་རྒྱངས་ཕུ་གངས་རར་ཕེབས། སྒྲུབ་པ་ལ་བཞུགས། དྲེགས་པ་ཅན་གྱི་ཆོ་འཕྲུལ་བརྟུལ་ཞུགས་ཀྱིས་སྤ་བཀོང་། ལོ་དེའི་དབྱར་ཐོག་རྟག་བརྟན་དེའུ་སོགས་ཀྱི་ལྷ་ཁང་རྟེན་དང་བརྟེན་པར་བཅས་པ་གསར་དུ་བཞེངས། ཆོས་ཀྱི་ཆར་ཕབ། སྟོན་བྲག་ལ་བརྒྱུད་ཕྱང་ཀོང་ཞེས་ཉང་པོ་གཞུང་ནས་འོལ་ཀ་སོགས་ལ་ལམ་མཛད། ཁྲ་འབྲུག་བསམ་ཡས་ལྷ་ས་སོགས་ལ་ཕྱག་མཆོད་གནང་ནས་མཚུར་ཕུར་ཕེབས། ཀརྨ་པ་བྱང་ཆུབ་རྡོ་རྗེ་དང་། ཞྭ་དམར་ཆོས་ཀྱི་དོན་གྲུབ་ལྷན་རྒྱས་སུ་མཇལ། ཞྭ་དམར་རིན་པོ་ཆེར་དགེ་བསྙེན་གྱི་སྡོམ་པ་བསྐྱར། ཀརྨ་བསྟན་པ་མཐའ་རྒྱས་ཞེས་མཚན་གསོལ། སྙིང་པོ་མདོ་ལྔའི་ལུང་། ཆོས་དྲུག་གསེར་ཞུན་མ་དང་། ཕྱག་ཆེན་སྙིང་པོ་དོན་གསལ་གྱི་ཁྲིད་སོགས་གསན། ཕྱི་ནང་གི་རྟེན་འབྲེལ་ཐམས་ཅད་འགྲིགས་ཞེས་གསུངས། ཉེར་དགུ་པར་མེ་རྟ་ལོའི་ཟླ་བ་དང་པོར་ཡབ་སྲས་ལ་བརྟན་བཞུགས་ཕུལ། དཔལ་སྟག་སྣ་དགོན་དུ་ཕེབས། མ་ལ་སྤང་ཏྲེ་ཧོ་རིན་པོ་ཆེ་བྱང་ཆུབ་ཆོས་ཀྱི་དབང་པོ་མཇལ། ཞབས་བརྟན་དང་བཀྲ་ཤིས་རྫས་རྟགས་རྒྱལ་སྲིད་གསེར་སྲང་བཅུ་སོགས་ཕུལ། ཆོས་གླིང་རྫོང་ཆེན་དབང་ཁྲིད་ངོ་སྤྲོད་བཅས་གསན། ཐུགས་ཡིད་གཅིག་ཏུ་འདྲེས། དཔལ་རིག་པ་འཛིན་པ་ཆེན་པོ་ཞེས་མཚན་གསོལ། ཞབས་བརྟན་དང་ལམ་ཡིག་བསྔགས་བརྗོད་ཤིན་ཏུ་ཆེ་བ་ཅན་གནང་བས་ཕྱོགས་ཐམས་ཅད་དུ་གྲགས་པའི་སྣང་ཆེན་བརྡལ། ཇོ་ནང་བཀའ་འབུམ་དང་སྦྱོར་དྲུག་གི་ཁྲིད་སོགས་གསན་པར་བཞེད་པ་ནག་ཙང་རུ་ལག་གི་བྱང་ཕྱོགས་གཡུ་རྩེ་འབྲས་སྤུངས་པ་ཆོས་རྗེ་ཀུན་བཟང་དབང་པོའི་དྲུང་དུ་བྱོན་ན་ལེགས་ཚུལ་དང་། སྐུ་རྫོང་སོགས་ཟབ་རྒྱས་བསྟར། རེ་ཞིག་ཤངས་ཟབ་བུ་ལུང་དུ་གནས་འབྲེལ་ལ་ཕེབས། རྩ་བ་གསུམ་གྱི་བསྙེན་སྒྲུབ་ཚད་དུ་བསྐྱལ། ཁམས་ནས་སྤྲུལ་སྐུ་བསོད་ནམས་ནོར་བུ་བྱོན་པར་བླ་མ་སྐལ་བཟང་གི་སྐུ་ཚེའི་ཚད་དང་ཡང་སྲིད་ཕྱི་མ་སོགས་དུས་གསུམ་སྒྲིབ་མེད་དུ་ལུང་བསྟན། འདུས་པ་རྣམས་ལ་སྙིང་ཏིག་གི་དབང་ལུང་ཁྲིད་གསུམ་དང་བླ་མ་དགོངས་འདུས་སོགས་ཆོས་ཆར་ཕབ། སླར་སྟག་སྣར་བྱོན་ནས་ཆོས་འབྲེལ་སོགས་གསན། དེ་ནས་བྱ་བཏང་དཀྱུས་མའི་ཚུལ་གྱིས་རིམ་པར་ཐེག་ཆེན་ཕུན་ཚོགས་གླིང་དང་། ཇོ་མོ་ནང་སོགས་མཇལ། གཡུ་རྩེ་འབྲས་སྤུངས་སུ་ཕེབས་ནས་ཞག་གསུམ་བཞུགས་ཀྱང་དེ་རེས་ཆོས་རྗེ་ཀུན་བཟང་དབང་པོ་མཇལ་མ་ཐུབ་པས་ལམ་བསྲངས་ནས་ལ་སྟོད་དིང་རི་དང་སྙེ་ནམ་སོགས་བརྒྱུད་བལ་ཡུལ་དུ་ཕེབས། གནས་གཟིགས་དང་ཐུགས་སྨོན་རྒྱ་ཆེར་སྩལ། སླར་དགུང་ལོ་སུམ་ཅུ་བར་མང་ཡུལ་སྐྱིད་གྲོང་དུ་བྱོན། འཕགས་པ་ཝ་ཏི་མཇལ། རི་བོ་དཔལ་འབར་དུ་བསྙེན་སྒྲུབ་མཛད་པས་ཞིང་སྐྱོང་མ་མོས་ཚོགས་འཁོར་ཕུལ། སྐྱིང་གྲོང་འཇམ་དཔལ་གླིང་བླ་མར་གསར་རྙིང་གི་ཆོས་རྒྱུན་དཀོན་པ་ཅི་རིགས་གསན། ཕྱོགས་དེར་དབང་ལུང་ཁྲིད་ཆོས་ཀྱི་ཆར་ཕབ། མི་ལའི་རྫོང་དྲུག་དང་། གུང་ཐང་རྒྱལ་ཁབ་ཀྱི་རྟེན་མཇལ་སོགས་མཛད། ར་ལ་ཟ་འོག་ཕུག་ཏུ་རེ་ཞིག་བཞུགས། གསེར་བཟང་ཀུན་སྤངས་ཡོན་ཏན་རྒྱ་མཚོ་སོགས་ལ་གདམས་ཟབ་བཏབ། ནུབ་རིར་སྦས་པའི་རྣལ་འབྱོར་པ་འགའ་ཞིག་ལ་འབྲུག་ལུགས་ཕྱག་ཆེན་གྱི་ཁྲིད་སོགས་ཁྲིད་རྒྱུན་དཀོན་པ་ཅི་རིགས་གསན། དབང་ལུང་ཁྲིད་གསུམ་མང་དུ་སྩལ། དགུང་གྲངས་སོ་གཅིག་པར་མི་དབང་བསོད་ནམས་སྟོབས་རྒྱས་ཀྱི་ལུང་གིས་བསྐུལ་ནས་བལ་ཡུལ་མཆོད་རྟེན་བྱ་རུང་ཁ་ཤོར་ལ་རབ་གནས་སྩལ། ཡར་མར་གྱི་ཕེབས་ལམ་དུ་མི་དབང་གི་བཙུན་མོ་ལའང་དབང་བཀའ་གནང་། རི་བོ་དཔལ་འབར་བདུད་རྩི་ཕུག་ཏུ་བཞུགས་ནས་བསྟན་འགྲོའི་བདེ་ཐབས་སུ་མཁའ་འགྲོ་གཏོར་ཆེན། ཕུར་པའི་སྒྲུབ་ཟློག །གླིང་བཞི་སྤྱི་མདོས་སོགས་རྒྱས་པར་མཛད། བོ་དོང་པཎ་ཆེན་གྱི་བཞུགས་གནས་དཔལ་མོ་ཆོས་སྡིངས་སུ་ཕེབས། སྤང་རོང་རྗེ་དབོན་སོགས་ལ་སྨིན་གྲོལ་གྱི་གདམས་པ་སྩལ། ལ་ཕྱི་ཆུ་བར་དུ་ཕེབས་པས་ཉམས་རྟོགས་ཀྱི་རྩལ་རྫོགས། དིང་རི་གླང་འཁོར་དུ་ལོ་པཎ་བླ་མར་ཆོས་དབང་རྫོགས་ཆེན་གྱི་ཁྲིད་ལུང་དང་། བྱང་གཏེར་བདེ་ཆེན་རྒྱ་མཚོའི་སྐོར་སོགས་གསན། ཕར་ཡང་སྙིང་ཏིག་གི་ཁྲིད་ཀ་སྩལ། རྒྱལ་གྱི་ཤྲཱིའི་ཕྱོགས་བཞིར་གཏོར་ཚོགས་རྒྱས་པར་གནང་། གྲངས་སོ་རྫོང་ཕུ་སྤྲུལ་སྐུ་ཕྲིན་ལས་རབ་བརྟན་ལས། བོ་དོང་ལུགས་ཀྱི་འཇིགས་བྱེད་དགྱེས་རྡོར་གསང་འདུས་ལུགས་གཉིས། བདེ་མཆོག་མཻ་ཏྲི་པ་དང་དམ་པའི་ལུགས། གསོ་རིག་གི་ཁྲིད་ཀ །ཁོང་པས་གྲུབ་ཆེན་རང་རིག་རས་པ་འཇམ་དཔལ་བཤེས་གཉེན་ལས་གསན་པའི་བར་འབྲུག་གི་ཆོས་སྐོར་ཆ་ཚང་སོགས་ཀྱང་གསན། ཕར་ཡང་བྱང་གཏེར་ཕུར་པའི་དབང་བཀའ་རྒྱས་པར་ཕུལ། སླར་ང་ལ་བརྒྱུད་ནས་གཡུ་རྩེ་འབྲས་སྤུངས་སུ་གྲུབ་ཆེན་ཀུན་བཟང་དབང་པོའི་སྤྱན་སྔར་ཟླ་བ་གསུམ་ལྷག་ཙམ་བཞུགས། གཞན་སྟོང་དབུ་མའི་ལྟ་ཁྲིད་དང་དཔལ་དུས་ཀྱི་འཁོར་ལོའི་སྨིན་གྲོལ་གྱིས་གཙོས་ཇོ་ནང་ཡབ་སྲས་ལས་བརྒྱུད་པའི་ཟབ་ཆོས་ཤིན་ཏུ་མང་བ་གསན། ཉམས་རྟོགས་རྒྱ་ཆེར་འཕེལ། གཞན་སྟོང་དབུ་མ་ཆེན་པོའི་བག་ཆགས་ཆེས་ཆེར་སད། དགུང་ལོ་སོ་གཉིས་པར་རུ་ལག་གྲམ་པ་རྒྱང་དུ་དུས་འཁོར་ལྗགས་བསྙེན་སྩལ་བ་གྲོལ་ནས་ཕྱོགས་དེར་ཆོས་ཆར་ཕབ། བསམ་གླིང་དུ་རིག་འཛིན་པད་ཕྲིན་གྱི་ཐུགས་སྲས་ཁམ་ལུང་པ་རིག་འཛིན་དབང་རྒྱལ་གྱི་ཞབས་པད་བསྙེན། བི་མ་སྙིང་ཐིག་གི་དབང་ལུང་ཡོངས་རྫོགས། ཀརྨ་སྙིང་ཏིག །བྱང་གཏེར་སྐོར་ཅི་རིགས། མདོ་དབང་ཆེན་མོའི་གཏད་རྒྱ་སོགས་གསན། རྫོགས་ཆེན་གྱི་བསྟན་འཛིན་མཆོག་ཏུ་བསྔགས་པ་སྩལ། ཕར་གཞན་ལའང་དབང་ཁྲིད་མང་དུ་གནང་། མངའ་རིས་རྫོང་དཀར་བརྒྱུད་ནུབ་རི་སྒང་ཆེན་དུ་སྨན་སྒོམ་ཆོས་བཟང་ལ་འདོད་ཆོས་ཤིན་ཏུ་སྨར་བ་དང་། རྟ་ལར་གྲུབ་མཆོག་ཤཱཀྱ་སེང་གེ་ལས་རས་ཆུང་སྙན་བརྒྱུད་གསར་མའི་དབང་ལུང་ཁྲིད་བཅས་གསན། ཕྱོགས་ཐམས་ཅད་དུ་ཆོས་འབྲེལ་རྒྱ་ཆེར་སྩལ་ནས་གློ་བོ་ཕྱོགས་སུ་བྱོན། མུམྨུ་ནེའི་གནས་ཆུ་མིག་བརྒྱ་རྩ་དང་། རྡོ་ཆུ་མེ་འབར་སོགས་སུ་གནས་འབྲེལ་མཛད། གློ་བོ་མངའ་བདག་པས་ཞབས་ནས་བཏེགས། དོལ་པོ་ཕྱོགས་སུ་ཕེབས། འདི་སྐོར་ཕྲིན་ལས་རྒྱས། ཛུམ་ལང་རྒྱལ་པོ་རྗེ་འབངས་ནས་ཀྱང་བསྙེན་བཀུར་བསྟབས། རྟ་གྲུར་གྲུབ་མཆོག་ཨོ་རྒྱན་བསྟན་འཛིན་དང་མཇལ། བྱང་གཏེར་ཉོན་མོངས་རང་གྲོལ་གྱི་དབང་ཁྲིད་ལུང་གསུམ། བདུད་འདུལ་བའི་རྫོགས་ཆེན་ཀུན་བཟང་འཇའ་སྐུའི་ཉམས་ཁྲིད། གར་དབང་ཟླ་བ་རྒྱལ་མཚན་གྱི་ཟབ་ཏིག་དང་། ཐུགས་རྗེ་ཆེན་པོ་རྩ་གསུམ་སྙིང་ཏིག་སོགས་ཤིན་ཏུ་སྨིན་པར་གསན། ཕར་ཡང་པདྨ་བདེ་གླིང་གི་སྙིང་ཏིག་གི་དབང་ལུང་ཁྲིད་གསུམ་སྨིན་པར་མཛད་ནས་ཆོས་ཀྱི་བདག་པོར་དབུགས་དབྱུང་། རྟ་རབ་སྒང་དྲག་པོའི་གནས་ཆེན་འབུམ་པར་ལྗགས་བསྙེན་ཁ་གསོ་དང་། ཆོས་འཁོར་བསྐོར། དགུང་ལོ་སོ་གསུམ་པར་སླར་སྟག་སྣ་དགོན་དུ་ཕེབས། ཆོས་རྗེ་ཏྲེ་ཧོ་ཞི་བར་གཟིམས་པའི་གདུང་རྟེན་ལ་རབ་གནས་མཛད། སི་ཏུ་རིན་པོ་ཆེ་དབུས་སུ་ལན་ལྔར་ཕེབས་པའི་གསུམ་པའི་སྐབས་སྤྲེལ་ཟླའི་ཚེས་བཅུར་གནས་དེར་མཇལ་འཕྲད་མཛད། ཐོག་མའི་རྟེན་འབྱུང་དུ་ཇོ་ལུགས་སྒྲོལ་དཀར་གྱི་རྗེས་གནང་དང་ལུང་སོགས་ཕུལ། སྐུ་ཞབས་ལས་སྤྱན་རས་གཟིགས་དང་མགོན་པོའི་རྗེས་གནང་གསན། ཚེ་དབང་བརྒྱ་རྩ་སོགས་ཕུལ་ཞིང་ཟབ་བུ་ལུང་དུའང་མཇལ་འཕྲད་དང་། ཚོགས་འཁོར་ཞུ་རེས། མདོ་སྔགས་ཀྱི་ཆོས་ཚུལ་མང་པོའི་གསུང་འཕྲོས་མཛད་པས་འདི་ནས་བཟུང་ཐུགས་ཡིད་གཅིག་འདྲེས་སུ་གྱུར། འདི་ཡན་ཆོད་རྗེ་ཉིད་ཀྱི་རྣམ་ཐར་ལམ་ཡིག་སོགས་ཚིགས་བཅད་ཐོར་བུར་བཞུགས་པའི་དགོངས་དོན་འཁྲུལ་མེད་མདོར་བསྡུས་སུ་བཀོད་པ་ཡིན་ལ། འདི་ཕྱིན་ཟིན་ཐོ་སོགས་མི་བཞུགས་པས་ཞིབ་པར་འབྲི་བ་རྔོ་མ་ཐོགས་ཀྱང་། སི་ཏུ་རིན་པོ་ཆེའི་རྣམ་ཐར་ཆེན་མོ་སོགས་དང་བསྟུན་ནས་ལམ་ཙམ་བཤད་ན། དགུང་གྲངས་སོ་གསུམ་པར་དེ་ནས་བཟུང་སོ་བརྒྱད་པར་ལ་སྟོད་མན་ཀོང་པོ་ཡན་དབུས་གཙང་ལྷོ་བྱང་ཀུན་ཏུ་ཞབས་བསྐྱོད་ནས་ཐུགས་དམ་ཉམས་གཞེས། དབང་ལུང་ཁྲིད་སོགས་གསན་བསམ། གདུལ་བྱ་རྒྱ་མཚོར་ཆོས་ཀྱི་འཁོར་ལོ་མཐའ་ཡས་པ་བསྐོར་བ་སོགས་ཕྲིན་ལས་རྒྱ་ཆེར་བསྐྱངས། དགུང་གྲངས་སོ་དགུ་པ་མེ་འབྲུག་ལོར་མཚུར་ཕུར་ཕེབས། སི་ཏུ་རིན་པོ་ཆེ། དཔའ་བོ་གཙུག་ལག་དགའ་བ། ཏྲེ་ཧོའི་ཡང་སྲིད་སོགས་ལ་སྒྲུབ་ཐབས་རིན་འབྱུང་ནས་བཞེད་སྦྱར་གྱི་རྗེས་གནང་སོགས་མང་དུ་སྩལ། ལྷ་ས་བར་ཁང་དུ་ཕུར་བུ་ལྕོག་པ་ངག་དབང་བྱམས་པ་དང་ཆོས་ཀྱི་འབེལ་གཏམ་མཛད། འབྲུག་པ་བཀའ་བརྒྱུད་ཕྲིན་ལས་ཤིང་རྟར་སྒྲུབ་ཐབས་རིན་འབྱུང་སོགས་གནང་། ཀོང་པོ་བུ་ཆུ་ནས་སྒྲོལ་མ་དམར་མོའི་སྒྲུབ་ཐབས་ལུང་བྱང་དང་བཅས་པ་གཏེར་ནས་བཞེས་ཏེ་རྒྱལ་དབང་སྐལ་བཟང་རྒྱ་མཚོར་ཕུལ་བ་བར་ཆད་ཞི་བའི་རྟེན་འབྱུང་འགྲིགས། རྒྱལ་དབང་རིན་པོ་ཆེས་ཀྱང་གཟིགས་པ་ཆེ་བར་གནང་། དཔོན་པོ་ཕོ་ལྷ་བ་ཡབ་སྲས་ཀྱིས་ཏི་ཤྲཱིར་བཀུར། བཞི་བཅུ་པ་མེ་སྦྲུལ་ལོར་རྒྱལ་དབང་ཀརྨ་པ་བཅུ་གསུམ་བདུད་འདུལ་རྡོ་རྗེ་སེང་གེའི་ཁྲིར་མངའ་གསོལ་བ་ལ་བར་ཆད་ཞི་བའི་ཕྱིར་ཀོང་ཡུལ་དུ་བྱོན་ནས་བཞུགས་པས་རྟ་ལོར་ཀརྨ་པ་སེང་ཁྲིར་གེགས་མེད་དུ་འཁོད་གྲུབ་པ་བྱུང་བས་ཀརྨ་བཀའ་བརྒྱུད་ཀྱི་བསྟན་པ་ལ་སྨན་ཡོན་ཆེན་པོར་གྱུར། འདི་ནས་བཟུང་དགུང་གྲངས་ཞེ་བརྒྱད་བཞེས་པ་ཤིང་མོ་གླང་གི་ལོའི་བར་གཙོ་ཆེར་ཀོང་ཡུལ་སྟོད་སྨད་དུ་བཞུགས། ཞྭ་དམར་གྱི་མཆོག་སྤྲུལ་རྣམ་གཉིས་ཀྱི་ཞབས་བརྟན་རྒྱ་ཆེར་གནང་། བྱར་ཡུལ་དང་། གཉན་ལོ་རོ་མན། སྤུ་བོ་ཡན་ཆད་དུ་ཡང་ཡང་ཕེབས་ནས་སྨིན་གྲོལ་གསན་བཞེས། བསྒོམ་སྒྲུབ། འཆད་སྤེལ་སོགས་གོང་འཕེལ་དུ་མཛད། ཉང་ཆོས། རྡོར་གླིང་། སངས་གླིང་། པད་གླིང་སོགས་གཏེར་རྙིང་རྒྱུན་དཀོན་རིགས་དང་། ལྷག་པར་ཀོང་པོ་བཙན་རི་གྲུབ་ཆེན་ཀུན་བཟང་རང་གྲོལ་ལས་བླ་མ་དགོངས་འདུས་ཀྱི་དབང་ལུང་ཁྲིད་གསུམ་ཤིན་ཏུ་ཞིབ་པར་གསན། གར་དབང་ལས་འཕྲོ་གླིང་པའི་གདུང་བརྒྱུད་ལྔ་པ་ལས་རྗེ་དེ་ཉིད་ཀྱི་ཆོས་སྐོར་ཡོངས་རྫོགས་གསན་པ་རྒྱ་ཆེར་མཛད་པའང་འདི་སྐབས་སྔ་ཕྱི་རྣམས་སུ་ངེས། སྤྱིར་རིག་འཛིན་གཏེར་བདག་གླིང་པ་ཡབ་སྲས་ཀྱི་རྗེས་ནས་རྙིང་མ་གཏེར་མའི་ཕྱོགས་ལ་རྗེ་འདི་ཁོ་ན་གསན་རྒྱ་ཆེ། དེར་མ་ཟད་ཞྭ་ལུ། གངས་དཀར་བོ་དོང་ཕྱོགས། ལྷག་པར་ཇོ་ནང་པ་སོགས་ལས་གསང་སྔགས་གསར་མའི་དབང་ཁྲིད་ལུང་གསུམ་ཁོ་ནའང་མཐའ་ཡས་པར་གསན་ཅིང་ཉམས་བཞེས་གནང་། ཀྱེ་རེ་ལོ་ཆེན་ངག་དབང་བཀྲ་ཤིས་རྣམ་རྒྱལ་ལས་སྒྲ་ཀ་ཙཱན་དབྱངས་གསུམ་ཀའི་ཕྱག་ཁྲིད་གསན་པ་སོགས། བཟོ་གསོ་སྒྲ་ཚད་སྙན་ངག་སྡེབ་སྦྱོར་རྩིས་སྐར་ནག་དབྱངས་འཆར་སོགས་ཐ་སྙད། རིག་ལམ་རྒྱ་མཚོར་དཔྱད་བརྡར་དང་། ཐ་ན་ལོ་རྒྱུས་དེབ་ཐེར་ཡན་ཆོད་ཁུངས་བཙུན་ངེས་འདྲོངས་ཤིན་ཏུ་ཞིབ་པར་གནང་། དགུང་གྲངས་ཞེ་བརྒྱད་པ་ཤིང་གླང་ཟླ་བ་དྲུག་པའི་གནམ་སྟོང་ལ་ཀོང་པོ་བོང་རིང་རིག་འཛིན་འཇའ་ཚོན་སྙིང་པོའི་གཟིམས་སྤྱིལ་དུ་འཇམ་མགོན་སི་ཏུ་རིན་པོ་ཆེ་དབུས་ཕེབས་བཞི་པའི་སྐབས་ཐོག་མའི་མཇལ་འཕྲད་མཛད་པས་རྟེན་འབྱུང་གི་སྒོ་འཕར་བྱེ། སྦས་གནས་ལྗོན་པ་ལུང་གི་ཕུར་སྐུ་ཞབས་རྣམ་གཉིས་ཞལ་འཛོམ། ཇོ་ནང་ལུགས་ཀྱི་དུས་འཁོར། དགྱེས་རྡོར། འཇིགས་བྱེད། བདེ་མཆོག་སྟོད་འགྲེལ། སྒྲོལ་མ་རྣལ་འབྱོར་མ། རྡོ་རྗེ་གླིང་པའི་གུར་དྲག་སོགས་དབང་ཆེན། གཙུག་ཏོར་རྣམ་རྒྱལ་སོགས་རྗེས་གནང་། དུས་འཁོར་སྦྱོར་དྲུག་དང་། ཕྱག་ཆེན་གྭའུ་མ་སོགས་ཁྲིད་ཀ་མང་དུ་སྩལ། ཨོ་རྒྱན་གླིང་པའི་གཏེར་བྱོན་སྐུ་ཚབ་ཉེར་ལྔའི་གཉིས་པ། སྒྲོལ་མ་རྣལ་འབྱོར་མའི་སྐུ་དང་རྒྱུད་ཀྱི་དཔེ་ཇོ་ནང་རྗེ་བཙུན་རིན་པོ་ཆེའི་ཕྱག་བྲིས། གྲུབ་ཆེན་ཁྱུང་པོའི་ཐུགས་ཀྱི་རིང་བསྲེལ་དྲུག་ཅུ་རྩ་ལྔ་ལྷག་པ་སོགས། རྟེན་བྱིན་ཅན་མང་པོ་དང་། སྔ་ཕྱིར་རྒྱ་དཔེའི་རིགས་ཀྱང་མང་དུ་གནང་ནས་སྒྱུར་བར་བསྐུལ། སི་ཏུ་རིན་པོ་ཆེ་ལས་བེར་ཅན་ཞལ་སྦྱོར་གྱི་དབང་སོགས་གསན། རྗེ་སི་ཏུས་ཀྱང་བཀའ་འགྱུར་རིན་པོ་ཆེ་སོགས་འབུལ་དཔངས་བསྟོད། འཕགས་ཡུལ་གྱི་ཤིང་རྟ་ཆེན་པོ་རྣམས་དང་མཁྱེན་རྟོགས་མཉམ་པའི་བསྔགས་བརྗོད་ཤིན་ཏུ་ཆེ་ཞིང་རྩ་བའི་བླ་མ་གཅིག་པུར་མཛད། སི་ཏུ་དབུས་སུ་ཕེབས་རྗེས་དགུང་གྲངས་ཞེ་དགུ་པ་མེ་སྟག་དབོ་ཟླ་བའི་ནང་རྗེ་ཉིད་ཀྱང་ལྷ་སར་བྱོན། གཞུང་ས་རྩེ་ཤོད་དུ་ཞྭ་དམར་མཆོག་སྤྲུལ་སྐོར་གྱི་ཞུ་དོན་མཛད། མཚུར་ཕུར་ཕེབས་ནས་སི་ཏུ་རིན་པོ་ཆེ་སོགས་དང་ཞལ་རྒྱས། ཀརྨ་པར་ཚེ་དཔག་མེད་དཀར་པོའི་རྗེས་གནང་དང་ཞབས་བརྟན་སོགས་ཕུལ། སི་ཏུར་ཏཱ་རའི་ཡིག་ཆ་ལས་ལམ་རིམ་གྱི་ཁྲིད་སོགས་དབང་ལུང་མང་དུ་གནང་། ལྷ་སར་ལྷན་རྒྱས་སུ་ཕེབས། ཇོ་བོར་སྟོང་མཆོད་ཕུལ། རྗེ་ཉིད་ཀྱི་དགོངས་གཏེར་བསམ་པ་ལྷུན་གྲུབ་མའི་སྐོར་སི་ཏུ་རིན་པོ་ཆེར་ཐོག་མའི་མཇལ་ཁར་གནང་། ཞྭ་དམར་བཅུ་པའི་སྐུ་དོན་བརྟག་དྲིལ་འཕངས་ནས་གསེར་ཁྲིར་མངའ་གསོལ། དགུང་གྲངས་ལྔ་བཅུ་པ་རབ་བྱུང་བཅུ་གསུམ་པའི་ཐོག་མ་མེ་ཡོས་ཤར་བའི་ལོ་གསར་མཛད། སི་ཏུ་རིན་པོ་ཆེར་ཞབས་བརྟན་ཕུལ། མགོན་པོ་པར་བུའི་བཀའ་བབས་གཏད། དཔོན་པོ་ཝང་ལ་བདེ་གླིང་མཁའ་འགྲོ་སྙིང་ཏིག་གི་ཁྲིད་སོགས་སྩལ། ཤར་རི་མངའ་བདག་པར་དུས་འཁོར་གྱི་དབང་དང་། སྟག་ལུང་ཤག་ཏུ་སི་ཏུ་དཔའ་བོ་བཅས་པར་བདག་པོ་ཆེན་པོའི་དབང་བསྐུར་ཕུལ། སི་ཏུ་རིན་པོ་ཆེ་ལེགས་སྦྱར་གྱི་གཞུང་ལ་འཕགས་ཡུལ་པཎ་ཆེན་རྣམས་དང་དབྱེར་མེད་པའི་མཁྱེན་རྟོགས་རྒྱས་ནའང་། ཁྲིད་རྒྱུན་ཙམ་ལ་དགོངས་ནས་རྗེ་འདི་ཉིད་ལས་ཀ་ཙཱ་ན་དབྱངས་གསུམ་གྱི་རི་མོའི་རྒྱུན་དཔྱིས་ཕྱིན་པར་གསན། རྗེ་ཉིད་ནས་ཀྱང་ཙཱནྡྲ་པའི་འགྲེལ་ཆེན་རྩོམ་པར་བསྐུལ་བས་བརྡ་སྤྲོད་སྨྲ་བ་རྣམས་ཀྱི་ལྟ་བའི་མིག་གཅིག་ཏུ་གྱུར། མཚུར་ཕུར་ཕེབས་ནས་ཞྭ་དམར་ནག་ལྷན་རྒྱས་ལ་ཚེ་དབང་སོགས་ཕུལ། དགུང་གྲངས་ང་གཅིག་པ་ས་འབྲུག་ལོར་སྟོད་ཕྱོགས་སུ་ཆིབས་བསྒྱུར། གཙང་ཚོང་དུས་འགུར་མོར་སི་ཏུ་རིན་པོ་ཆེ་དང་ཞལ་འཛོམ་པ་ནས་བཟུང་ཕལ་ཆེར་ལྷན་ཅིག་ལྟ་བུས་བལ་ཡུལ་དུ་ཕེབས། མཆོད་རྟེན་ཆེན་པོའི་མདུན་དུ་བི་མ་སྙིང་ཐིག་གི་ཁྲིད་སྩལ། གཞན་སྟོང་གི་ལྟ་ཁྲིད་དང་གྲུབ་མཐའ་འཛིན་དགོས་པར་གདམས། ཡེ་ཤེས་རྒྱ་མཚོའི་རེག་ཟིག་གི་སྟེང་ནས་ཞི་སྦས་ལུགས་ཀྱི་སྦྱོར་དྲུག་གི་ཁྲིད་གནང་། མཆོད་རྟེན་ཆེན་མོར་ཞིག་གསོ་རབ་གནས་མཛད། སྙིང་ཏིག་སྤྲོས་བཅས་ཀྱི་དབང་རྡུལ་ཚོན་ལ་བརྟེན་ནས་མཛད། བལ་པོའི་རྒྱལ་པོར་རྣམ་འཇོམས་ཀྱི་དབང་ཁྲུས་སྩལ། གཞན་ཡང་སི་ཏུར་མཁའ་འགྲོ་སྙིང་ཏིག་གི་བཀའ་གཏད་དང་ཚེ་དབང་བརྒྱ་ལྷག་སོགས་སྩལ་ནས་སྨོན་ལམ་རྒྱ་ཆེར་གནང་སྟེ་སི་ཏུ་རིན་པོ་ཆེ་བོད་ཕྱོགས་སུ་སྔོན་དུ་ཆིབས་ཀ་བསྒྱུར། རྗེ་ཉིད་ཀྱང་རིམ་བཞིན་བོད་དུ་ཕེབས། སི་ཏུ་རིན་པོ་ཆེར་རྒྱང་རིང་པོ་ནས་བྱིན་འབེབས་གནང་བས་ཡེ་ཤེས་པ་བཅུག་པའི་གསལ་སྣང་མངོན་དུ་བརྙེས། མང་ཡུལ་སྐྱིད་གྲོང་དུ་བྱོན། དགུང་གྲངས་ང་གཉིས་པར། སྦས་པའི་རྣལ་འབྱོར་པ་ཞིག་ལས་སྒྱུ་འཕྲུལ་གསང་བ་སྙིང་པོའི་དབང་ལུང་མན་ངག་དང་བཅས་པ་གསན། ས་སྐྱོང་སྡེ་དགེར་ངེས་དོན་མདོ་སྡེའི་སྤར་གཞི་དང་། རིན་ཆེན་གཉིས་པ་སྲང་འཁོར་སུམ་བརྒྱ་སོགས་གནང་ནས་པུསྟི་དྲུག་གི་ཆོས་སྦྱིན་རྒྱ་ཆེར་སྤེལ། དེ་ནས་བཟུང་དགུང་གྲངས་ང་བཞི་པ་ལྕགས་ལུག་ལོའི་བར་ཕལ་ཆེར་ཕྱོགས་དེར་བཞུགས། དེ་ནས་ཤངས་ཟབ་བུར་ཕེབས། ཕུག་གཙུག་ཏུ་སྐུ་བརྙན་ཉམས་པར་ཞིག་གསོ་གནང་། རྟག་བརྟན་དུ་ཕེབས། རྣལ་འབྱོར་མ་རིགས་བརྒྱའི་མཆོད་ཆོག་བཙུགས་པ་སོགས་ད་ལྟའི་བར་གནས། སྤྱིར་ཡང་སྔ་ཕྱིར་ཇོ་ནང་ལུགས་ཀྱི་དབང་ལུང་ཁྲིད་གསུམ་མང་དུ་མཛད། རྗེ་ངག་དབང་རྣམ་རྒྱལ་སོགས་བུ་སློབ་མང་དུ་བྱུང་བའི་རྒྱུན་ད་ལྟའི་བར་ཅི་རིགས་སུ་སྣང་བས་ཀུན་མཁྱེན་ཡབ་སྲས་ཀྱི་བསྟན་པའི་མེ་རོ་གསོས། བལ་ཡུལ་དུ་ཡམ་བུ་རྒྱལ་པོར་མཆོད་རྟེན་གྱི་ཉམས་གསོའི་ཞལ་འདེབས་དང་། གོཪྵ་རྒྱལ་པོར་སྲོག་ཤིང་འདྲེན་དགོས་པའི་བཀའ་ཐམ་གནང་བ་དེ་བཞིན་ཞུ་བའི་ཞུ་ཡིག་འབྱོར་བས་རིམ་པར་བལ་པོར་ཆིབས་བསྐྱོད། ལམ་བར་རྣམས་སུ་མཆོད་རྟེན་བཞེངས་པའི་ཆ་རྐྱེན་ཀྱང་བསྒྲུབ། གོཪྵ་རྒྱལ་པོའི་བསུ་བ་འབྱོར་ཞིང་མཇལ་འཕྲད་གནང་། ཡམ་བུ་རྒྱལ་པོ་དང་འཕགས་པ་ཤིང་ཀུན་གྱི་རྩེར་མཇལ་ཞིང་མཆོད་རྟེན་བཟོ་བའི་བཀའ་བཀོད་སྩལ། དགུང་གྲངས་ང་ལྔ་བཞེས་སྐབས་ལ་དྭགས་སྟོད་སྨད་ཀྱི་རྒྱལ་བློན་ནང་འཁྲུགས་ནས་སྟོད་ཧོར་གྱི་དམག་དྲངས་པས་འཁྲུགས་ལོང་མི་བཟད་པའི་གཞི་བཏིང་བ་ལ་རྒྱལ་དབང་སྐལ་བཟང་རྒྱ་མཚོས་རྗེ་ཉིད་བར་འདུམས་སུ་ཕེབས་དགོས་པའི་བཀའ་རྒྱ་ལན་གྲངས་སྩལ་བར་བརྟེན་ལ་དྭགས་སུ་ཕེབས་ནས་ལོ་ངོ་གཉིས་ཙམ་བཞུགས། ཟློས་གཞིའི་རྩ་བ་ཤོ་གམ་དོན་གཙང་ཆོད་གནང་བའི་ཁྲ་མ་མཐའ་བསྡོམས་བཅས་གྲུབ་པས་ཕྱོགས་དེའི་བསྟན་འགྲོར་སྨན་ཡོན་བླ་ན་མེད་པར་གྱུར། དགུང་གྲངས་ང་དྲུག་པར་སླར་ཡང་བལ་ཡུལ་དུ་ཕེབས། མཆོད་རྟེན་གྱི་ལས་གྲྭ་ཚུགས། གོཪྵ་རྒྱལ་པོས་ཅུང་ཟད་མ་གུས་པར་རྫུ་འཕྲུལ་གྱིས་བཏུལ། མཆོད་རྟེན་བརྩིགས་པའི་རྡོ་གཏེར་ཆེན་པོ་བཏོན། ལྷ་འདྲེ་རྣམས་ཀྱིས་ལས་བྱེད་པ་དང་། གསེར་མི་ཁུར་བཅོ་ལྔ་ཕུལ། ལོ་གཉིས་སུ་བཞུགས། མཆོད་རྟེན་ཆོས་འཁོར་མན་གྲུབ། དགུང་གྲངས་ལྔ་བཅུ་རྩ་བརྒྱད་བཞེས་པ་ཤིང་ཕག་ལོར་མང་ཡུལ་སྐྱིད་གྲོང་དུ་ཕེབས། འབྲུག་པ་རིན་པོ་ཆེ་དང་ཞལ་འཛོམ་གནང། དབང་བཀའ་དང་ཁྲིད་སོགས་རྒྱ་ཆེར་སྩལ། རྡོ་བ་ལ་ཞབས་ཟུང་གི་རྗེས་བཀོད། དངོས་གྲུབ་ཕུག་ཏུ་བཞུགས་སྐབས་འབྲུག་པའི་གཟིམ་གུར་སྟེང་རྡོ་ཆེན་པོ་ཁང་ཆུང་ཙམ་ཞིག་འདྲིལ་བྱུང་བ་ལ་སྡིགས་མཛུབ་གཏད་པའི་མོད་ཐད་ཀར་འདྲིལ་བ་སོགས་གྲུབ་པ་ཆེན་པོའི་ཆོ་འཕྲུལ་ཅིའང་བསྟན། ལོ་དེའི་སྟོན་འབྲིང་ཁྲུམས་ཟླའི་མགོ་ནས་བསྙུན་བབ་ལྕི་ཙམ་བྱུང་བའི་སྐབས། སླད་ནས་གང་ཅིའི་ཐད་ཐམས་ཅད་ཀྱི་བསླབ་སྟོན་ཞལ་ཆེམས་ཡི་གེར་གནང་སྟེ། ཁྱེད་རྣམས་ཀྱིས་ཅི་མཐོང་གིན་ཡོད། བདག་གི་སྣང་བ་འདི་ཐམས་ཅད་བདེ་བ་ཅན་གྱི་ཞིང་གི་བཀོད་པ་ཁོ་ནར་འཆར་གྱིན་འདུག་ཅེས་སོགས་དག་པའི་གཟིགས་སྣང་འབྱམས་ཀླས་པའི་ངང་དམར་ཕྱོགས་མཁའ་འགྲོ་འདུ་བའི་ཉིན་མོར་དཔལ་མངོན་པར་དགའ་བའི་ཞིང་དུ་གདོད་མའི་རྒྱལ་བ་རྡོ་རྗེ་སེམས་དཔའི་ཐུགས་ཀློང་དུ་རོ་གཅིག་པར་ཐིམ་པའི་ཚུལ་བསྟན་པར་གྱུར་ཏོ། །དེ་ནས་རྗེ་ཉིད་ཀྱི་ཞལ་བཀོད་ལྟར་མཆོད་དཔོན་བསྟན་འཛིན་རྡོ་རྗེ་སོགས་ཀྱིས་བལ་ཡུལ་མཆོད་རྟེན་ཞིག་གསོའང་ལེགས་པར་གྲུབ་པ་དང་། རྗེ་རིག་པ་འཛིན་པ་མཆོག་གིས་རྒྱལ་ཚབ་ཆེན་པོར་དབང་བསྐུར་བའི་ཐུགས་སྲས་ཀྱི་གཙོ་བོ་དཔལ་བོ་སྤྲུལ་པའི་སྐུ་རྡོ་རྗེ་གཙུག་ལག་དགའ་བ་བྱོན་ནས་རབ་གནས་མཛད། རྗེ་རིག་འཛིན་ཆེན་མོའི་སྐུ་གདུང་མང་ཡུལ་རི་བོ་དཔལ་འབར་དུ་ཞུགས་སུ་སྦྱངས་ཤིང་སྤུར་ཐལ་རྣམས་རྡོ་བ་བཟང་པོས་བརྩིགས་པའི་བྱང་ཆུབ་མཆོད་རྟེན་རྒྱར་ཁྲུ་ལྔ། དཔངས་སུ་ཁྲུ་བཅུ་ཡོད་པའི་ནང་དུ་བཞུགས། བུམ་སྒོར་གུ་རུ་རྡོ་རྗེ་དྲག་རྩལ་ཡབ་ཡུམ་གྱི་རྡོ་སྐུ་བྱོན་ལེགས་ཚོན་རྫོགས་ཁྲུ་གང་བ་རྔ་ཡབ་གླིང་དུ་ཞལ་ཕྱོགས་ནས་བཞུགས་པ་དང་། ཁམས་ནས་སི་ཏུ་རིན་པོ་ཆེས་མཆོད་རྟེན་ཞལ་འདེབས་གསེར་སྲང་བཅོ་ལྔ་གནང་བ་སོགས་ཀྱིས་ཆོས་འཁོར་གདུགས་ཤོག་གསེར་ཟངས་སྒྲོས་ལེགས་དང་། ཕྱིའི་བཞུགས་ཁང་རྒྱ་ཕིབས་གཡམ་ཐོག་དང་བཅས་པ་དང་། རླུང་དྲིལ་མཆོད་རྫས་སོགས་ཆ་འགྲིགས། སྒོ་སྲུང་ཇོ་མོ་རྒྱ་གར་མའི་རྟེན། ཁོར་སའི་རྡོ་གཅལ་བཅས་བཀོད་ལེགས་སུ་བཞེངས་པས་མཚོན་དགོངས་པ་རྫོགས་པའི་མཆོད་སྦྱིན་རྒྱ་ཆེར་སྤེལ། རྗེ་འདི་ཉིད་ཀྱིས་སྐུ་ཚེ་རིལ་པོར་གསན་བསམ་སྒོམ་གསུམ་དང་འཆད་རྩོད་རྩོམ་གསུམ་གཙོ་བོར་གྱུར་པའི་བསྟན་འགྲོ་བདེ་ཐབས་ཕྲིན་ལས་མཁའ་ཁྱབ་ཏུ་བརྡལ། གསུང་རྩོམ་གླེགས་བམ་ཆེན་པོ་བཞི་དང་། ས་གཏེར་སྒྲོལ་མ་དམར་མོ། ཡང་གཏེར་རོལ་པའི་རྡོ་རྗེའི་དྲག་སྒྲུབ་ཀྱི་དབང་བཀའ། དགོངས་གཏེར་བསམ་པ་ལྷུན་གྲུབ་མའི་སྐོར་སོགས་ཞལ་སློབ་རྣམས་ཀྱི་ཟིན་བྲིས་དང་བཅས་ཏེ་ད་ལྟའི་བར་དུའང་རྒྱུན་ཅི་རིགས་པར་བཞུགས། སློབ་མའི་གཙོ་བོ་ཞྭ་དམར་ནག་ཟུང་། ཁྱད་པར་ནང་ཐུགས་ཀྱི་སྲས་གཅིག་པུ་སི་ཏུ་འཇམ་པའི་དབྱངས་བསྟན་པའི་ཉིན་བྱེད། རྒྱལ་ཚབ་དཔའ་བོ་གཙུག་ལག་དགའ་བ། འབྲུག་ཐམས་ཅད་མཁྱེན་པ་ཀར་རྒྱུད་ཕྲིན་ལས་ཤིང་རྟ། ཞབས་དྲུང་ཏྲེ་ཧོ་དང་། ལྷོ་བྲག་ལྡི་ཚང་སྤྲུལ་སྐུ། འཇུག་པ་ཏྲིའུ་ལྷས་སྤྲུལ་སྐུ། ནཱ་ལེནྡྲའི་བཅོ་བརྒྱད་མཁན་པོ། གསེར་བཟང་སྤྲུལ་སྐུ་པདྨ་འགྱུར་མེད། གྲུབ་མཆོག་ཨོ་རྒྱན་བསྟན་འཛིན། སྤུ་བོ་སྨན་ཆུ་སྤྲུལ་སྐུ། ཟུར་མང་ཨོ་རྒྱན་ལྷུན་གྲུབ། བདེ་གླིང་གཏེར་སྲས་པདྨ་དབང་རྒྱལ་དང་། ཆོས་སྐྱོང་དཔལ་ལྡན། ལུང་རིག་སྨྲ་བ་ཨོ་རྒྱན་ཕྲིན་ལས་བསྟན་འཛིན། འཛམ་གླིང་བླ་མ་བློ་གྲོས་ཆོས་འཕེལ། འབའ་ར་བ་ཨོ་རྒྱན་ངག་དབང་ཡེ་ཤེས། རྟ་ནག་པ་པདྨ་ཀུན་གསལ། ཞབས་དྲུང་སྙིང་རི་བ་སོགས་རྩ་བའི་བརྒྱུད་འཛིན་ཤིན་ཏུ་མང་བ་དང་། གཞན་ཡང་རྡོར་སྨིན། ཀོང་པོ་བོང་རི། སྙི་ཕུ། རྩེ་ལེ་གོང་འོག་སོགས་རྙིང་མ་དང་། ཞྭ་ལུ། གོང་དཀར། བོ་དོང་། ཇོ་ནང་པ་སོགས་ཟབ་ཆོས་གསན་པའི་བླ་མ་དགེ་བཤེས་བགྲང་ལས་འདས་པའི་རྒྱུན་ད་ལྟའི་བར་དུའང་ཅི་རིགས་པར་གསན་པས་མཚོན་གངས་ཅན་གྱི་ལྗོངས་ཙམ་ན་ཡོངས་སུ་གྲགས་ཤིང་གྲུབ་པས་ཕྲིན་ལས་མཐའ་རྒྱས་སུ་གྱུར། རྗེ་ཉིད་དང་ཐོག་མཉམ་པའི་ཐུགས་རྒྱུད་གཅིག་པ་ཁམས་པ་ངག་དབང་ཀུན་དགའ་བསྟན་འཛིན་དང་། ཞང་ཞུང་གི་ཡུལ་མཐར་མོན་གྱི་ལིང་པ། མ་ཧཱ་ཙི་ནར་སྨད་འཚོང་མའི་གཟུགས་སོགས་སྤྲུལ་པའི་རྣམ་རོལ་ཅིར་ཡང་ཤར་བ་དང་། སྐུའི་སྐྱེ་བ་ཕྱི་མའང་མ་ཧཱ་ཙཱི་ནའི་རྒྱལ་པོར་གྱུར་ནས་འབྲེལ་ཚད་དོན་ལྡན་གྱི་ཕྲིན་ལས་རྒྱས་པ་དང་། ལྷོ་བྲག་ཕྱོགས་སུ་སྤྲུལ་པའི་གཏེར་སྟོན་ཆེན་པོར་སྐྱེ་བ་བཞེས་ཏེ་མཁར་ཆུ་ནས་སངས་རྒྱས་ཐམས་ཅད་ཀྱི་ཕྲིན་ལས་དགོངས་པ་འདུས་པ་ཞེས་རྡོ་རྗེ་ཕུར་པའི་ཆོས་སྐོར་ཆེ་བ་ཞིག་སོགས་སྤྱན་དྲངས་པར་གསུངས་པ་དང་། གཞན་ཡང་བདེ་བ་ཅན་དང་། མངོན་པར་དགའ་བ། འགྲོ་ལྡིང་རྣམས་སུ་སྐུའི་བཀོད་པ་སྟོན་པར་གསུངས་པས་མཆོག་གི་སྤྲུལ་པའི་རྣམ་རོལ་མཐའ་ཡས་པ་སྟོན་ཅིང་། མཐར་དཔལ་ཆེན་པོ་ཧེ་རུ་ཀ་ནམ་མཁའི་སྙིང་པོའི་ཐུགས་ཀློང་དུ་ཉི་མ་ལ་ཟེར་འདུ་བ་བཞིན་རོ་གཅིག་ཏུ་ཐིམ་པར་འཇིགས་པ་མེད་པའི་སེང་གེའི་སྒྲ་ཆེན་པོས་ཞལ་གྱིས་བཞེས་པ་ཡིན་ནོ། །རྣམ་ཐར་རྒྱས་པ་ནི་སྤྲུལ་པའི་སྐུ་བྱང་ཆུབ་ཆོས་ཀྱི་སེང་གེ་བློ་གྲོས་རྣམ་པར་སྣང་བས་རྗེ་ཉིད་ཀྱི་ཞལ་གསུང་ཐོར་བུར་བཞུགས་པ་སོགས་ཕྱོགས་གཅིག་ཏུ་བསྡེབས་པ། དཔལ་རིག་འཛིན་ཚེ་དབང་ནོར་བུའི་རྣམ་པར་ཐར་པའི་གཏམ་འཛམ་གླིང་དགའ་བར་བྱེད་པའི་རྣ་རྒྱན་ཞེས་བྱ་༡༤༡བ་ལས་ཤེས་པར་བྱའོ། །སརྦ་དྭ་མངྒ་ལཾ།། །། ༈

[edit]

kaHthog rig 'dzin tshe dbang nor bu'i rnam thar nyung bsdus/[ ] @#/_/rig 'dzin stag sham rdo rje'i gter lung las/__yon tan gdul bya smad kyi phyogs nas 'byung :__rdo rje'i ming can brtul zhugs stobs po che:__phyag rdzogs klong gyur rta mgrin bka' babs dang :__bla ma rdo rje gro lod zhal mjal ba'i:__skal ldan skyes bu de yis gdul bya sdud:__rdzu 'phrul sprul pa'i skal ldan mang 'byung nas:__kaHthog phyogs su ston pa'i dbang du 'dug:__bshad sgrub bstan pa gzhal du med pa 'byung :__zhes sogs rdo rje'i lung bstan du mas dpang po byas pa bzhin dpal rdo rje sems dpa'i ye shes gzugs gzhan du bsgyur ba gsang bdag rdo rje chos/__sangs rgyas dngos kyi bla ma rgyal chen in+d+ra b+hU ti/__slob dpon hU~M chen ka ra/__gnubs nam mkha'i snying po/__zur chung shes rab grags/__dwags sgom tshul khrims snying po/__zhig po nyi ma seng ge__/grub thob ma Ni rin chen/__shangs ston rgyal mtshan 'bum/__'khon ston bzang po dpal/__ri khrod pa dar ma rgyal mtshan/__mung po gter ston byang chub gling pa dpal gyi rgyal mtshan/__kaHthog pa tshul khrims 'bum pa/__kong po sangs rgyas gling pa'i sras brgyud sangs rgyas blo gros/__stag lung pa mkhas grub ngag dbang grags pa/__phag gru bdag po kun dga' legs pa/__kun mkhyen sangs rgyas 'phel/__gong dkar rdo rje gdan pa'i slob ma rgya ston rig pa'i glog phreng /__'khon rigs bdag smyon kun dga' legs pa/__rat+na'i gdung brgyud kun dga' bstan 'dzin/__'khrul zhig chen po dbang drag rgya mtsho/__stag bla grub dbang pad+ma nor bu ste/__de rnams ni rje nyid kyis stsal ba'i skye phreng gsol 'debs yid bzhin dbang gi phreng ba las byung ba dang /__gzhan yang klong gsal stag sham sogs kyi gter lung dang /__rje nyid kyi dag pa'i gzigs snang sogs dang bstun na/__ston pa'i spyan sngar dgra bcom pa lha mig rnam par dag pa ma 'gag pa/__rgya gar du grub chen nag po spyod pa chen po/__kha che rin chen rdo rje/__grub chen la li ta'i gzungs ma/__rgya gar shar phyogs kyi rgyal po/__lho phyogs rgya mtsho'i 'gram du tshong dpon gyi rigs las gyur pa'i rnal 'byor pa/__bod yul du kaHthog pa byams pa 'bum pa/__lha ri pa nam mkha' 'od/__tsA ri ras pa byang chub 'bum/__lho brag pa slob dpon e ma/__mkhas pa gtsang nag pa/__stag lung pa sangs rgyas dbon/__dbus pa blo gsal/__sa bzang ma ti paN chen/__'bri gung pa rdo rje rgyal po/__kun mkhyen bo dong pa'i slob ma shangs pa ras chen bsod nams mchog gyur/__kun skyod gling pa'i sras dbang chen nyi zla bzang po/__rje btsun tA ra nA tha/__de dang thugs rgyud gcig pa'i rgyal tshab ye shes rgya mtsho/__lho 'brug pa mthu chen ngag dbang rnam rgyal sogs thor bur gsungs pas mtshon mkhas shing grub pa'i skyes rabs me tog man+dA ra'i phreng ba ltar tshar du dngar ba'i mthar/__phyogs der yongs su grags pa ltar na sku skyed pa'i yab chen po rdu'i rigs zhes 'od gsal lha babs kyi brgyud pa 'gar stong btsan yul bzung dang /__sgom ston bsod nams rin chen sogs kyi rigs las son pa'i go sa ze'u sangs lding gi rigs las jo bo skyabs su grags pa'i khyim btsun sbas pa'i rnal 'byor pa zhig dang /__yum che btsan 'bru'i rigs su son pa sprul pa'i gter ston pad+ma bde chen gling pa'i lcam sring rdo rje mtsho zhes rang grol gyi rnal 'byor ma zhig gi sras su srid pa nye bar bzung ba'i tshul bstan/__don gyis ni gnas chen ri bo bkra bzang gi zhing skyong chen po rdo rje brag btsan yin par bzhed/__gang ltar yang gnas chen de nyid kyi nub byang dpal gyi ri bo'i mgul dung dkar g.yas su 'khyil pas mtshan pa'i sa'i thig ler/__sku'i skye ba snga ma grub dbang pad+ma nor bu sku bltams nas bgrang bya nga dgu 'das pa/__rje nyid kyi sku zhang pad+ma bde chen gling pa sku bltams nas dgung grangs so lnga bzhes pa'i rab byung bcu gnyis pa'i nang tshan sa pho stag gi lo'i dpyid 'bring bod zla ba'i dus tshes dge bar sku bltams/__zhag bdun tsam song ba na gter chen rin po che phebs nas 'chi med tshe'i dbang gnang /__ye shes chen pos byin gyis brlabs/__rdo rje tshe dbang nor bu zhes pa'i mtshan gyi cod pan dpyang /__zla ngo gsum tsam nas tshig gi brda 'phrod pa dang /_bdun nas dri ba dang lan 'debs pa la chags thogs med/__mkha' 'gro chos skyong gis srung ba'i rtags mtshan gsal/__sku skye ba snga ma'i bag chags thams cad kyang rim gyis sad/__nged ni nam mkha'i snying po yin/__/sgrub gnas lho brag mkhar chu yin/__/zhes dang /__bdag grub chen pad+ma nor bu'o zhes 'jigs pa med pa'i seng ge'i sgra thol byung du bsgrags/__gter chen rin po ches kyang gnubs nam mkha'i snying po dang /__grub chen pad+ma nor bu dbyer med pa'i sprul par ngos bzung zhing /__'gran bral gyi skyes bu chen po rtsod med gcig tu yong bar lung bstan/__skabs de rnams su slob dpon chen po pad+mA ka ra'i zhal yang yang mjal/__sku tshe snga ma'i yongs 'dzin mang po'i mtshan gsal bar ston/__dbang skur chos 'chad/__ting 'dzin sgom pa/__zab gter 'don cing gnas sgo 'byed pa sogs phal pa'i spyod yul las 'das pa'i gzhon nu rol rtsed tsam gyis kyang dpyod ldan rnams yid rang dbang med par 'phrog__/gzhan sems mkhyen pa'i mngon shes dang /__bde gsal mi rtog pa'i nyams myong rtsol med du shar ba sogs sgo du ma nas dam pa'i skyes bu'i sprul par yongs su grags kyang /__skal ba dman pa 'ga' zhig gi log rtog bsal ba'i phyir gong ma'i dpon ris su gtogs pa bla ma kun bzang zhes pa zhig gis rig 'dzin stag sham rdo rje dang /__gter chen rol pa'i rdo rje zung la lung bstan zhus pa 'khrul med kyi gzengs bstod gnang bas the tshom gyi mun pa dbyings su sangs/__gang ltar yang dgung lo lnga par ljags klog phul bas tshegs med du mkhyen/__drug par gter chen bla ma las zab gsang rdzogs pa chen po'i smin grol gsan pa nas bzung phal cher 'bral med du bzhugs/__dgung lo bdun par rdo rje gro lod kyi las byang blor bzung zhing yi dam mdzad pas bskyed rim gsal brtan gyad du gyur/__brgyad par sangs gling gter byon thugs rje chen po'i rgyab chos yang gsang 'od dral gzigs pas go ba dpyis phyin par 'khrungs shing /__gsang sngags spyi'i lta spyod la nges pa rnyed/__bcu par mdo sngags la mkhyen pa rgyas pas dpyod ldan gyi khengs pa'i spobs pa zil gyis mnan/__bcu gcig par gter chen bla ma las rang gter mkha' 'gro snying tig gi smin grol zab rgyas su gsan pas gnas lugs la 'phrig tshud/__mnal lam nam 'dod du zin/__dregs pa can gyis srog snying phul/__bcu gnyis par rig 'dzin 'gyur med rdo rje'i thugs sras o rgyan rnam grol las snga 'gyur mdo sgyu sems gsum gyi smin grol sogs rgya cher gsan/__khyad par dgung grangs bcu gsum bzhes skabs gter chen bla ma las smar tshang lugs kyi phyag chen dang /__rang gter rdzogs pa chen po'i nyams khrid gnad smin du gsan pas rtogs pa'i bogs thon/__lo de'i mjug tu 'jang chu ri bkra dgon du spyan drangs nas grub chen mchog gi sprul pa'i skur mnga' gsol/__rje dbon bla ma skal bzang o rgyan bstan 'dzin nas brtse bas bskyangs/__bcu bzhi par kaHthog rgyal sras bsod nams lde btsan phyogs der phebs/__rje dbon bla ma skal bzang las bdud 'dul gter chos bzhugs so 'tshal dang /__rtse le'i bka' 'bum sogs gsan/__tshur klong gsal rtsa gsum skor gyi dbang lung yongs rdzogs gnang ba sogs legs par gsan cing /__rgyal sras mchog nas phyi mtha' gzigs pa'i thugs la shin tu btags/__bar khrod lha khang du rig 'dzin pad+ma chos rgyal spyan drangs shing bum sgrub btsugs pa'i skabs bla ma skal bzang nas rje de nyid kyi gter gsar shog ser las phab gang grub gsan pa dang mnyam du gsan bzhes dang /__zab gsang chos kyi bgro bas dus 'da' bar mdzad/__dgung grangs bco lnga par gter chen pad+ma'i zhabs las phyag chen khrid yang bskyar du gsan pas zhi gnas kyi nyams brtan po 'khrungs/__skye bdun sgrub chen gyi gral du'ang phebs/__bcu drug par slar yang gter chen bla ma las rdzogs chen sems sbyong skor dang /__thabs lam zab mo'i nyams khrid smin par bzhes/__ye shes 'pho ba'i dbang bskur brnyes/__chu mo sbrul lo der gter chen rin po che dgung grangs lnga bcu rtsa gcig bzhes pa'i hor zla bcu gcig pa'i gnam stong tho rangs dgongs pa'i chos dbyings su thim pa'i tshe dgongs rdzogs kyang bsnyel med du bsgrub/__thos bsam sgom pa'i go cha brtan po mdzad/__bcu bdun par sku mtshams bcad rgya ci rigs gnang /__bco brgyad la gtsang khro sogs kyi gnas mjal la phebs shing rtogs pa'i bogs dbyung /__gnam chos 'ga' zhig bab kyang ched gnyer ma mdzad/__o rgyan rin po ches 'byung 'gyur lung bstan/__bcu dgur gter chen bla ma'i sgrub gnas seng khrom ri ngogs su thugs dam la bzhugs pas/__zab gter gyi bka' thob yong ba'i nges shes 'khrungs kyang rten 'brel 'ga' zhig gis rdzas gter tsam las phyag tu ma son/__nyi shu par dpal gyi ri bkrar bsnyen mtshams dam por mdzad pas yi dam gyi lhas rjes su bzung /__bar chad kyi gegs las grol/__ye shes kyi mkha' 'gro ma las zab mo'i snyan brgyud 'ga'ang gsan/__nyer gcig par stag sham nus ldan pa sogs kyi zhal slob sbas pa'i grub dbang skal bzang rin chen las thabs lam gyi zab gnad dang /__drag sngags kyi phyag bzhes/__gur drag ye shes rab 'bar gyi dbang lung sogs smin rgyas su gsan/__ye shes mkha' 'gro mtsho rgyal mas zhal yang yang bstan cing byin gyis brlabs/__gsang ba mchog gi dbang bskur stsal/__lo de'i 'jug nyi ma phug tu o rgyan rnam grol las dgongs 'dus gser chos kyi smin grol rdzogs par gsan/__snang sems dbyer med kyi don mngon du mdzad/__nyer gnyis par tshom chen du zab khrid thog mar gsungs/__thabs lam zab mo'i nyams bzhes gtan la phab/__shing dgu gangs rar nyams rtogs kyi bogs dbyung /__mngon spyod kyi ltas bstan/__lo mjug tu stag phu se'u lung gi dben par 'dus pa brgya phrag tsam la zab khrid stsal bas thams cad la ngo sprod thebs pa sogs khrid lam legs pa byung /__'di nas bzung zab khrid mang du mdzad par snang /__tsi rong ting ri ru rgyal sras pad+ma dbang rgyal la zab lam rtsa rlung gi khrid smin par stsal/__nyer gsum par rje nyid kyi phyi mo ye shes mkha' 'gro chen mo de'ang sku gshegs pa'i tshul bstan pas dgongs rdzogs legs par bsgrubs/__DA ki mas sku tshe la bar chad med pa'i lung bstan stsal/__nyag gshis kha dben rdzong du bzhugs skabs dregs pa rA hu las mi bzad pa'i thog ser gyi cho 'phrul bstan pas yi dam gyi gsal snang dang lta gdings kyi zil gyis mnan/__rig 'dzin rol pa'i rdo rje mjal bar phebs bzhed gnang na'ang gzhan rkyen gyis bshol pas lcags byi lo de nyid kyi nag zla'i nyer gsum rig 'dzin bla ma zhi bar gshegs skabs ye shes kyi skus rjes su bzung ba tsam byung /__gter chen de nyid dang dngos su mjal na rje nyid lus ma spangs par mkha' spyod du gshegs pa'i lung bstan yod par grags/__lo de'i ston zur mang rig 'dzin gsung rab rgya mtsho'i drung smar khams dben rdzong sgar du phebs/__phyag chen snyan brgyud kyi khrid/__rdo rje 'chang gi dbang bskur/__rdzogs chen gsang ba ye shes kyi thod rgal ngo sprod sogs dang /__rol rdor gcung o rgyan lhun grub las gter gsar phyag rdor dang /__seng gdong ma'i skor yongs rdzogs gsan/__skabs der kun mkhyen si tu rin po che'ang mjal zhing chos 'brel tsam nos nas phyir phebs/__nyer bzhi par cem chen dgon du bla ma skal bzang dang zhal lhan rgyas mdzad/__dbyar dus rgyal sras chos skyong dpal ldan sogs la rdzogs pa chen po'i smin khrid btab/__kun mkhyen klong chen pas zhal bstan cing rjes su gnang ba stsal/__sngags srung mas phrin las sgrub par g.yar dam bzhes/__thugs dam bogs shin tu che bar 'khrungs/__nyer lnga pa yang de skor du bzhugs te sgrub chen dang zab khrid sogs phrin las bskyangs/__khyad par drag po mngon spyod kyi las la rtags thon par mdzad/__nyer drug chu yos lo'i cho 'phrul zla bar kaHthog tu phebs/__rgyal sras rin po che mjal/__stag sham pa'i thugs sgrub zhi ba dang /__rtsa gsum snying po don sbyor gyi dbang lung sogs zab chos gsan/__rje nyid kaHthog rdo rje gdan gyi seng khrir mnga' gsol zhing bstan pa 'dzin skyong spel bar gdams pa la brten/__kaHthog rig 'dzin chen mo zhes gangs can gyi ljongs 'dir rlung ltar grags pa'ang don de las byung bar gsal/__gang ltar yang dam pa rnam gnyis thugs yid gcig 'dres su mdzad nas rgyal khams phyogs med la phebs rgyu'i snyan zhu dang bcas thugs 'phreng bzhin du phyir phebs/__sa ga zla ba'i tshes lnga la rgyal sras rin po che yang glo bur du zhing gshegs/__dbyar zla ra ba'i nang gter chen pad+ma bde gling gis sku gdung rgyal sras pad+ma dbang rgyal dang lhan rgyas kyis zhugs 'bul gnang bas rtags mtshan bsam gyis mi khyab pa gsal/__rgyal sras bstan 'phel dgung lo bdun bzhes pa bla ma'i dam tshig la dgongs nas rje nyid kyis phyogs der gdan drangs shing mgo 'dren brtse gzigs rgya cher gnang bar grags/__lo de'i ston kar dbus su 'byon bzhed pas bla ma skal bzang gi drung du phyi phyag mdzad par phebs/__dam bca'i yi ge'ang bkod/__bod yul du chibs kha bsgyur ba'i thog mar go 'jo mkho khyim dgon du byon/__rje o rgyan rnam grol las mkha' 'gro snying tig gi dbang lung khrid sogs zab chos du ma gsan/__rim bzhin zur mang bdud rtsi dil du byon/__rig 'dzin gsung rab rgya mtsho las zur mang snyan brgyud kyi dbang lung khrid gsum sogs smin par gsan/__phyag rgya chen po'i rtogs pa mngon du gyur/__rje 'di dang pad+ma bde chen gling pa gnyis rtsa ba'i bla mar bzung /__phyis nas zhabs drung tre ho dang /__jo nang kun bzang dbang po gnyis kyang bka' drin che ba'i bla ma'i mchog tu bkur/__gter dbon o rgyan lhun grub las klong gsal ma gtogs pa rat+na'i skor tshang ma'i dbang lung sogs gsan/__phar rdzogs chen mkha' 'gro snying tig gi dbang lung khrid gsum smin rgyas su stsal bas 'gro don phrin las kyi rten 'brel 'grigs/__nyer bdun par ke rong rdo rje cong phug tu byon/__der rol rdor yang gter drag po bde gshegs 'dus pa'i smin byed sogs phyag tu babs/__karma lha steng brgyud/__ri bo cher zhabs drung 'phags pa las sangs rgyas dbon gyi thugs sgrub gsan/__phar yang chos 'brel 'ga' tsam phul/__spar glang ma lung zhes stag sham pa'i gter gnas mjal zhing /__rim par brgyud spu bo 'dongs chu byams pa'i lha khang mjal/__spu stod bdud 'dul gdung sku mched las bdud 'dul gter kha yongs rdzogs kyi smin grol gsan/__de skabs spu bo nang 'khrugs dang chu bo rgyas pas klo lam 'gag stabs/__rje nyid gcig pur gnas chen rma kung lung gi bar sgo dam can pho brang gi nye 'dabs dam rdzogs zhes bya'i brag skyibs su bzhugs nas 'phags mchog thugs rje chen po'i bsnyen sgrub rtags thon gnang /__de nas sbas yul bra gad ljongs su pad+ma shel phug tu bzhugs/__slar sman chu sprul skus zhus ngor spu bo ye gang du phebs/__dad 'dus stong phrag tsam la bka' brgyad kyi dbang chen dang thugs sgrub kyi dbang khrid dang /__yul sde so sor yang yang phrin las bskyangs nas dge bskul stsal/__nyer brgyad par slar brag ljongs nas rgyangs phu gangs rar phebs/__sgrub pa la bzhugs/__dregs pa can gyi cho 'phrul brtul zhugs kyis spa bkong /__lo de'i dbyar thog rtag brtan de'u sogs kyi lha khang rten dang brten par bcas pa gsar du bzhengs/__chos kyi char phab/__ston brag la brgyud phyang kong zhes nyang po gzhung nas 'ol ka sogs la lam mdzad/__khra 'brug bsam yas lha sa sogs la phyag mchod gnang nas mtshur phur phebs/__karma pa byang chub rdo rje dang /__zhwa dmar chos kyi don grub lhan rgyas su mjal/__zhwa dmar rin po cher dge bsnyen gyi sdom pa bskyar/__karma bstan pa mtha' rgyas zhes mtshan gsol/__snying po mdo lnga'i lung /__chos drug gser zhun ma dang /__phyag chen snying po don gsal gyi khrid sogs gsan/__phyi nang gi rten 'brel thams cad 'grigs zhes gsungs/__nyer dgu par me rta lo'i zla ba dang por yab sras la brtan bzhugs phul/__dpal stag sna dgon du phebs/__ma la spang tre ho rin po che byang chub chos kyi dbang po mjal/__zhabs brtan dang bkra shis rdzas rtags rgyal srid gser srang bcu sogs phul/__chos gling rdzong chen dbang khrid ngo sprod bcas gsan/__thugs yid gcig tu 'dres/__dpal rig pa 'dzin pa chen po zhes mtshan gsol/__zhabs brtan dang lam yig bsngags brjod shin tu che ba can gnang bas phyogs thams cad du grags pa'i snang chen brdal/__jo nang bka' 'bum dang sbyor drug gi khrid sogs gsan par bzhed pa nag tsang ru lag gi byang phyogs g.yu rtse 'bras spungs pa chos rje kun bzang dbang po'i drung du byon na legs tshul dang /__sku rdzong sogs zab rgyas bstar/__re zhig shangs zab bu lung du gnas 'brel la phebs/__rtsa ba gsum gyi bsnyen sgrub tshad du bskyal/__khams nas sprul sku bsod nams nor bu byon par bla ma skal bzang gi sku tshe'i tshad dang yang srid phyi ma sogs dus gsum sgrib med du lung bstan/__'dus pa rnams la snying tig gi dbang lung khrid gsum dang bla ma dgongs 'dus sogs chos char phab/__slar stag snar byon nas chos 'brel sogs gsan/__de nas bya btang dkyus ma'i tshul gyis rim par theg chen phun tshogs gling dang /__jo mo nang sogs mjal/__g.yu rtse 'bras spungs su phebs nas zhag gsum bzhugs kyang de res chos rje kun bzang dbang po mjal ma thub pas lam bsrangs nas la stod ding ri dang snye nam sogs brgyud bal yul du phebs/__gnas gzigs dang thugs smon rgya cher stsal/__slar dgung lo sum cu bar mang yul skyid grong du byon/__'phags pa wa ti mjal/__ri bo dpal 'bar du bsnyen sgrub mdzad pas zhing skyong ma mos tshogs 'khor phul/__skying grong 'jam dpal gling bla mar gsar rnying gi chos rgyun dkon pa ci rigs gsan/__phyogs der dbang lung khrid chos kyi char phab/__mi la'i rdzong drug dang /__gung thang rgyal khab kyi rten mjal sogs mdzad/__ra la za 'og phug tu re zhig bzhugs/__gser bzang kun spangs yon tan rgya mtsho sogs la gdams zab btab/__nub rir sbas pa'i rnal 'byor pa 'ga' zhig la 'brug lugs phyag chen gyi khrid sogs khrid rgyun dkon pa ci rigs gsan/__dbang lung khrid gsum mang du stsal/__dgung grangs so gcig par mi dbang bsod nams stobs rgyas kyi lung gis bskul nas bal yul mchod rten bya rung kha shor la rab gnas stsal/__yar mar gyi phebs lam du mi dbang gi btsun mo la'ang dbang bka' gnang /__ri bo dpal 'bar bdud rtsi phug tu bzhugs nas bstan 'gro'i bde thabs su mkha' 'gro gtor chen/__phur pa'i sgrub zlog__/gling bzhi spyi mdos sogs rgyas par mdzad/__bo dong paN chen gyi bzhugs gnas dpal mo chos sdings su phebs/__spang rong rje dbon sogs la smin grol gyi gdams pa stsal/__la phyi chu bar du phebs pas nyams rtogs kyi rtsal rdzogs/__ding ri glang 'khor du lo paN bla mar chos dbang rdzogs chen gyi khrid lung dang /__byang gter bde chen rgya mtsho'i skor sogs gsan/__phar yang snying tig gi khrid ka stsal/__rgyal gyi shrI'i phyogs bzhir gtor tshogs rgyas par gnang /__grangs so rdzong phu sprul sku phrin las rab brtan las/__bo dong lugs kyi 'jigs byed dgyes rdor gsang 'dus lugs gnyis/__bde mchog mai tri pa dang dam pa'i lugs/__gso rig gi khrid ka__/khong pas grub chen rang rig ras pa 'jam dpal bshes gnyen las gsan pa'i bar 'brug gi chos skor cha tshang sogs kyang gsan/__phar yang byang gter phur pa'i dbang bka' rgyas par phul/__slar nga la brgyud nas g.yu rtse 'bras spungs su grub chen kun bzang dbang po'i spyan sngar zla ba gsum lhag tsam bzhugs/__gzhan stong dbu ma'i lta khrid dang dpal dus kyi 'khor lo'i smin grol gyis gtsos jo nang yab sras las brgyud pa'i zab chos shin tu mang ba gsan/__nyams rtogs rgya cher 'phel/__gzhan stong dbu ma chen po'i bag chags ches cher sad/__dgung lo so gnyis par ru lag gram pa rgyang du dus 'khor ljags bsnyen stsal ba grol nas phyogs der chos char phab/__bsam gling du rig 'dzin pad phrin gyi thugs sras kham lung pa rig 'dzin dbang rgyal gyi zhabs pad bsnyen/__bi ma snying thig gi dbang lung yongs rdzogs/__karma snying tig__/byang gter skor ci rigs/__mdo dbang chen mo'i gtad rgya sogs gsan/__rdzogs chen gyi bstan 'dzin mchog tu bsngags pa stsal/__phar gzhan la'ang dbang khrid mang du gnang /__mnga' ris rdzong dkar brgyud nub ri sgang chen du sman sgom chos bzang la 'dod chos shin tu smar ba dang /__rta lar grub mchog shAkya seng ge las ras chung snyan brgyud gsar ma'i dbang lung khrid bcas gsan/__phyogs thams cad du chos 'brel rgya cher stsal nas glo bo phyogs su byon/__mum+mu ne'i gnas chu mig brgya rtsa dang /__rdo chu me 'bar sogs su gnas 'brel mdzad/__glo bo mnga' bdag pas zhabs nas btegs/__dol po phyogs su phebs/__'di skor phrin las rgyas/__dzum lang rgyal po rje 'bangs nas kyang bsnyen bkur bstabs/__rta grur grub mchog o rgyan bstan 'dzin dang mjal/__byang gter nyon mongs rang grol gyi dbang khrid lung gsum/__bdud 'dul ba'i rdzogs chen kun bzang 'ja' sku'i nyams khrid/__gar dbang zla ba rgyal mtshan gyi zab tig dang /__thugs rje chen po rtsa gsum snying tig sogs shin tu smin par gsan/__phar yang pad+ma bde gling gi snying tig gi dbang lung khrid gsum smin par mdzad nas chos kyi bdag por dbugs dbyung /__rta rab sgang drag po'i gnas chen 'bum par ljags bsnyen kha gso dang /__chos 'khor bskor/__dgung lo so gsum par slar stag sna dgon du phebs/__chos rje tre ho zhi bar gzims pa'i gdung rten la rab gnas mdzad/__si tu rin po che dbus su lan lngar phebs pa'i gsum pa'i skabs sprel zla'i tshes bcur gnas der mjal 'phrad mdzad/__thog ma'i rten 'byung du jo lugs sgrol dkar gyi rjes gnang dang lung sogs phul/__sku zhabs las spyan ras gzigs dang mgon po'i rjes gnang gsan/__tshe dbang brgya rtsa sogs phul zhing zab bu lung du'ang mjal 'phrad dang /__tshogs 'khor zhu res/__mdo sngags kyi chos tshul mang po'i gsung 'phros mdzad pas 'di nas bzung thugs yid gcig 'dres su gyur/__'di yan chod rje nyid kyi rnam thar lam yig sogs tshigs bcad thor bur bzhugs pa'i dgongs don 'khrul med mdor bsdus su bkod pa yin la/__'di phyin zin tho sogs mi bzhugs pas zhib par 'bri ba rngo ma thogs kyang /__si tu rin po che'i rnam thar chen mo sogs dang bstun nas lam tsam bshad na/__dgung grangs so gsum par de nas bzung so brgyad par la stod man kong po yan dbus gtsang lho byang kun tu zhabs bskyod nas thugs dam nyams gzhes/__dbang lung khrid sogs gsan bsam/__gdul bya rgya mtshor chos kyi 'khor lo mtha' yas pa bskor ba sogs phrin las rgya cher bskyangs/__dgung grangs so dgu pa me 'brug lor mtshur phur phebs/__si tu rin po che/__dpa' bo gtsug lag dga' ba/__tre ho'i yang srid sogs la sgrub thabs rin 'byung nas bzhed sbyar gyi rjes gnang sogs mang du stsal/__lha sa bar khang du phur bu lcog pa ngag dbang byams pa dang chos kyi 'bel gtam mdzad/__'brug pa bka' brgyud phrin las shing rtar sgrub thabs rin 'byung sogs gnang /__kong po bu chu nas sgrol ma dmar mo'i sgrub thabs lung byang dang bcas pa gter nas bzhes te rgyal dbang skal bzang rgya mtshor phul ba bar chad zhi ba'i rten 'byung 'grigs/__rgyal dbang rin po ches kyang gzigs pa che bar gnang /__dpon po pho lha ba yab sras kyis ti shrIr bkur/__bzhi bcu pa me sbrul lor rgyal dbang karma pa bcu gsum bdud 'dul rdo rje seng ge'i khrir mnga' gsol ba la bar chad zhi ba'i phyir kong yul du byon nas bzhugs pas rta lor karma pa seng khrir gegs med du 'khod grub pa byung bas karma bka' brgyud kyi bstan pa la sman yon chen por gyur/__'di nas bzung dgung grangs zhe brgyad bzhes pa shing mo glang gi lo'i bar gtso cher kong yul stod smad du bzhugs/__zhwa dmar gyi mchog sprul rnam gnyis kyi zhabs brtan rgya cher gnang /__byar yul dang /__gnyan lo ro man/__spu bo yan chad du yang yang phebs nas smin grol gsan bzhes/__bsgom sgrub/__'chad spel sogs gong 'phel du mdzad/__nyang chos/__rdor gling /__sangs gling /__pad gling sogs gter rnying rgyun dkon rigs dang /__lhag par kong po btsan ri grub chen kun bzang rang grol las bla ma dgongs 'dus kyi dbang lung khrid gsum shin tu zhib par gsan/__gar dbang las 'phro gling pa'i gdung brgyud lnga pa las rje de nyid kyi chos skor yongs rdzogs gsan pa rgya cher mdzad pa'ang 'di skabs snga phyi rnams su nges/__spyir rig 'dzin gter bdag gling pa yab sras kyi rjes nas rnying ma gter ma'i phyogs la rje 'di kho na gsan rgya che/__der ma zad zhwa lu/__gangs dkar bo dong phyogs/__lhag par jo nang pa sogs las gsang sngags gsar ma'i dbang khrid lung gsum kho na'ang mtha' yas par gsan cing nyams bzhes gnang /__kye re lo chen ngag dbang bkra shis rnam rgyal las sgra ka tsAn dbyangs gsum ka'i phyag khrid gsan pa sogs/__bzo gso sgra tshad snyan ngag sdeb sbyor rtsis skar nag dbyangs 'char sogs tha snyad/__rig lam rgya mtshor dpyad brdar dang /__tha na lo rgyus deb ther yan chod khungs btsun nges 'drongs shin tu zhib par gnang /__dgung grangs zhe brgyad pa shing glang zla ba drug pa'i gnam stong la kong po bong ring rig 'dzin 'ja' tshon snying po'i gzims spyil du 'jam mgon si tu rin po che dbus phebs bzhi pa'i skabs thog ma'i mjal 'phrad mdzad pas rten 'byung gi sgo 'phar bye/__sbas gnas ljon pa lung gi phur sku zhabs rnam gnyis zhal 'dzom/__jo nang lugs kyi dus 'khor/__dgyes rdor/__'jigs byed/__bde mchog stod 'grel/__sgrol ma rnal 'byor ma/__rdo rje gling pa'i gur drag sogs dbang chen/__gtsug tor rnam rgyal sogs rjes gnang /__dus 'khor sbyor drug dang /__phyag chen gwa'u ma sogs khrid ka mang du stsal/__o rgyan gling pa'i gter byon sku tshab nyer lnga'i gnyis pa/__sgrol ma rnal 'byor ma'i sku dang rgyud kyi dpe jo nang rje btsun rin po che'i phyag bris/__grub chen khyung po'i thugs kyi ring bsrel drug cu rtsa lnga lhag pa sogs/__rten byin can mang po dang /__snga phyir rgya dpe'i rigs kyang mang du gnang nas sgyur bar bskul/__si tu rin po che las ber can zhal sbyor gyi dbang sogs gsan/__rje si tus kyang bka' 'gyur rin po che sogs 'bul dpangs bstod/__'phags yul gyi shing rta chen po rnams dang mkhyen rtogs mnyam pa'i bsngags brjod shin tu che zhing rtsa ba'i bla ma gcig pur mdzad/__si tu dbus su phebs rjes dgung grangs zhe dgu pa me stag dbo zla ba'i nang rje nyid kyang lha sar byon/__gzhung sa rtse shod du zhwa dmar mchog sprul skor gyi zhu don mdzad/__mtshur phur phebs nas si tu rin po che sogs dang zhal rgyas/__karma par tshe dpag med dkar po'i rjes gnang dang zhabs brtan sogs phul/__si tur tA ra'i yig cha las lam rim gyi khrid sogs dbang lung mang du gnang /__lha sar lhan rgyas su phebs/__jo bor stong mchod phul/__rje nyid kyi dgongs gter bsam pa lhun grub ma'i skor si tu rin po cher thog ma'i mjal khar gnang /__zhwa dmar bcu pa'i sku don brtag dril 'phangs nas gser khrir mnga' gsol/__dgung grangs lnga bcu pa rab byung bcu gsum pa'i thog ma me yos shar ba'i lo gsar mdzad/__si tu rin po cher zhabs brtan phul/__mgon po par bu'i bka' babs gtad/__dpon po wang la bde gling mkha' 'gro snying tig gi khrid sogs stsal/__shar ri mnga' bdag par dus 'khor gyi dbang dang /__stag lung shag tu si tu dpa' bo bcas par bdag po chen po'i dbang bskur phul/__si tu rin po che legs sbyar gyi gzhung la 'phags yul paN chen rnams dang dbyer med pa'i mkhyen rtogs rgyas na'ang /__khrid rgyun tsam la dgongs nas rje 'di nyid las ka tsA na dbyangs gsum gyi ri mo'i rgyun dpyis phyin par gsan/__rje nyid nas kyang tsAn+d+ra pa'i 'grel chen rtsom par bskul bas brda sprod smra ba rnams kyi lta ba'i mig gcig tu gyur/__mtshur phur phebs nas zhwa dmar nag lhan rgyas la tshe dbang sogs phul/__dgung grangs nga gcig pa sa 'brug lor stod phyogs su chibs bsgyur/__gtsang tshong dus 'gur mor si tu rin po che dang zhal 'dzom pa nas bzung phal cher lhan cig lta bus bal yul du phebs/__mchod rten chen po'i mdun du bi ma snying thig gi khrid stsal/__gzhan stong gi lta khrid dang grub mtha' 'dzin dgos par gdams/__ye shes rgya mtsho'i reg zig gi steng nas zhi sbas lugs kyi sbyor drug gi khrid gnang /__mchod rten chen mor zhig gso rab gnas mdzad/__snying tig spros bcas kyi dbang rdul tshon la brten nas mdzad/__bal po'i rgyal por rnam 'joms kyi dbang khrus stsal/__gzhan yang si tur mkha' 'gro snying tig gi bka' gtad dang tshe dbang brgya lhag sogs stsal nas smon lam rgya cher gnang ste si tu rin po che bod phyogs su sngon du chibs ka bsgyur/__rje nyid kyang rim bzhin bod du phebs/__si tu rin po cher rgyang ring po nas byin 'bebs gnang bas ye shes pa bcug pa'i gsal snang mngon du brnyes/__mang yul skyid grong du byon/__dgung grangs nga gnyis par/__sbas pa'i rnal 'byor pa zhig las sgyu 'phrul gsang ba snying po'i dbang lung man ngag dang bcas pa gsan/__sa skyong sde dger nges don mdo sde'i spar gzhi dang /__rin chen gnyis pa srang 'khor sum brgya sogs gnang nas pusti drug gi chos sbyin rgya cher spel/__de nas bzung dgung grangs nga bzhi pa lcags lug lo'i bar phal cher phyogs der bzhugs/__de nas shangs zab bur phebs/__phug gtsug tu sku brnyan nyams par zhig gso gnang /__rtag brtan du phebs/__rnal 'byor ma rigs brgya'i mchod chog btsugs pa sogs da lta'i bar gnas/__spyir yang snga phyir jo nang lugs kyi dbang lung khrid gsum mang du mdzad/__rje ngag dbang rnam rgyal sogs bu slob mang du byung ba'i rgyun da lta'i bar ci rigs su snang bas kun mkhyen yab sras kyi bstan pa'i me ro gsos/__bal yul du yam bu rgyal por mchod rten gyi nyams gso'i zhal 'debs dang /__goR+Sha rgyal por srog shing 'dren dgos pa'i bka' tham gnang ba de bzhin zhu ba'i zhu yig 'byor bas rim par bal por chibs bskyod/__lam bar rnams su mchod rten bzhengs pa'i cha rkyen kyang bsgrub/__goR+Sha rgyal po'i bsu ba 'byor zhing mjal 'phrad gnang /__yam bu rgyal po dang 'phags pa shing kun gyi rtser mjal zhing mchod rten bzo ba'i bka' bkod stsal/__dgung grangs nga lnga bzhes skabs la dwags stod smad kyi rgyal blon nang 'khrugs nas stod hor gyi dmag drangs pas 'khrugs long mi bzad pa'i gzhi bting ba la rgyal dbang skal bzang rgya mtshos rje nyid bar 'dums su phebs dgos pa'i bka' rgya lan grangs stsal bar brten la dwags su phebs nas lo ngo gnyis tsam bzhugs/__zlos gzhi'i rtsa ba sho gam don gtsang chod gnang ba'i khra ma mtha' bsdoms bcas grub pas phyogs de'i bstan 'gror sman yon bla na med par gyur/__dgung grangs nga drug par slar yang bal yul du phebs/__mchod rten gyi las grwa tshugs/__goR+Sha rgyal pos cung zad ma gus par rdzu 'phrul gyis btul/__mchod rten brtsigs pa'i rdo gter chen po bton/__lha 'dre rnams kyis las byed pa dang /__gser mi khur bco lnga phul/__lo gnyis su bzhugs/__mchod rten chos 'khor man grub/__dgung grangs lnga bcu rtsa brgyad bzhes pa shing phag lor mang yul skyid grong du phebs/__'brug pa rin po che dang zhal 'dzom gnang/__dbang bka' dang khrid sogs rgya cher stsal/__rdo ba la zhabs zung gi rjes bkod/__dngos grub phug tu bzhugs skabs 'brug pa'i gzim gur steng rdo chen po khang chung tsam zhig 'dril byung ba la sdigs mdzub gtad pa'i mod thad kar 'dril ba sogs grub pa chen po'i cho 'phrul ci'ang bstan/__lo de'i ston 'bring khrums zla'i mgo nas bsnyun bab lci tsam byung ba'i skabs/__slad nas gang ci'i thad thams cad kyi bslab ston zhal chems yi ger gnang ste/__khyed rnams kyis ci mthong gin yod/__bdag gi snang ba 'di thams cad bde ba can gyi zhing gi bkod pa kho nar 'char gyin 'dug ces sogs dag pa'i gzigs snang 'byams klas pa'i ngang dmar phyogs mkha' 'gro 'du ba'i nyin mor dpal mngon par dga' ba'i zhing du gdod ma'i rgyal ba rdo rje sems dpa'i thugs klong du ro gcig par thim pa'i tshul bstan par gyur to/__/de nas rje nyid kyi zhal bkod ltar mchod dpon bstan 'dzin rdo rje sogs kyis bal yul mchod rten zhig gso'ang legs par grub pa dang /__rje rig pa 'dzin pa mchog gis rgyal tshab chen por dbang bskur ba'i thugs sras kyi gtso bo dpal bo sprul pa'i sku rdo rje gtsug lag dga' ba byon nas rab gnas mdzad/__rje rig 'dzin chen mo'i sku gdung mang yul ri bo dpal 'bar du zhugs su sbyangs shing spur thal rnams rdo ba bzang pos brtsigs pa'i byang chub mchod rten rgyar khru lnga/__dpangs su khru bcu yod pa'i nang du bzhugs/__bum sgor gu ru rdo rje drag rtsal yab yum gyi rdo sku byon legs tshon rdzogs khru gang ba rnga yab gling du zhal phyogs nas bzhugs pa dang /__khams nas si tu rin po ches mchod rten zhal 'debs gser srang bco lnga gnang ba sogs kyis chos 'khor gdugs shog gser zangs sgros legs dang /__phyi'i bzhugs khang rgya phibs g.yam thog dang bcas pa dang /__rlung dril mchod rdzas sogs cha 'grigs/__sgo srung jo mo rgya gar ma'i rten/__khor sa'i rdo gcal bcas bkod legs su bzhengs pas mtshon dgongs pa rdzogs pa'i mchod sbyin rgya cher spel/__rje 'di nyid kyis sku tshe ril por gsan bsam sgom gsum dang 'chad rtsod rtsom gsum gtso bor gyur pa'i bstan 'gro bde thabs phrin las mkha' khyab tu brdal/__gsung rtsom glegs bam chen po bzhi dang /__sa gter sgrol ma dmar mo/__yang gter rol pa'i rdo rje'i drag sgrub kyi dbang bka'/__dgongs gter bsam pa lhun grub ma'i skor sogs zhal slob rnams kyi zin bris dang bcas te da lta'i bar du'ang rgyun ci rigs par bzhugs/__slob ma'i gtso bo zhwa dmar nag zung /__khyad par nang thugs kyi sras gcig pu si tu 'jam pa'i dbyangs bstan pa'i nyin byed/__rgyal tshab dpa' bo gtsug lag dga' ba/__'brug thams cad mkhyen pa kar rgyud phrin las shing rta/__zhabs drung tre ho dang /__lho brag ldi tshang sprul sku/__'jug pa tri'u lhas sprul sku/__nA len+d+ra'i bco brgyad mkhan po/__gser bzang sprul sku pad+ma 'gyur med/__grub mchog o rgyan bstan 'dzin/__spu bo sman chu sprul sku/__zur mang o rgyan lhun grub/__bde gling gter sras pad+ma dbang rgyal dang /__chos skyong dpal ldan/__lung rig smra ba o rgyan phrin las bstan 'dzin/__'dzam gling bla ma blo gros chos 'phel/__'ba' ra ba o rgyan ngag dbang ye shes/__rta nag pa pad+ma kun gsal/__zhabs drung snying ri ba sogs rtsa ba'i brgyud 'dzin shin tu mang ba dang /__gzhan yang rdor smin/__kong po bong ri/__snyi phu/__rtse le gong 'og sogs rnying ma dang /__zhwa lu/__gong dkar/__bo dong /__jo nang pa sogs zab chos gsan pa'i bla ma dge bshes bgrang las 'das pa'i rgyun da lta'i bar du'ang ci rigs par gsan pas mtshon gangs can gyi ljongs tsam na yongs su grags shing grub pas phrin las mtha' rgyas su gyur/__rje nyid dang thog mnyam pa'i thugs rgyud gcig pa khams pa ngag dbang kun dga' bstan 'dzin dang /__zhang zhung gi yul mthar mon gyi ling pa/__ma hA tsi nar smad 'tshong ma'i gzugs sogs sprul pa'i rnam rol cir yang shar ba dang /__sku'i skye ba phyi ma'ang ma hA tsI na'i rgyal por gyur nas 'brel tshad don ldan gyi phrin las rgyas pa dang /__lho brag phyogs su sprul pa'i gter ston chen por skye ba bzhes te mkhar chu nas sangs rgyas thams cad kyi phrin las dgongs pa 'dus pa zhes rdo rje phur pa'i chos skor che ba zhig sogs spyan drangs par gsungs pa dang /__gzhan yang bde ba can dang /__mngon par dga' ba/__'gro lding rnams su sku'i bkod pa ston par gsungs pas mchog gi sprul pa'i rnam rol mtha' yas pa ston cing /__mthar dpal chen po he ru ka nam mkha'i snying po'i thugs klong du nyi ma la zer 'du ba bzhin ro gcig tu thim par 'jigs pa med pa'i seng ge'i sgra chen pos zhal gyis bzhes pa yin no/__/rnam thar rgyas pa ni sprul pa'i sku byang chub chos kyi seng ge blo gros rnam par snang bas rje nyid kyi zhal gsung thor bur bzhugs pa sogs phyogs gcig tu bsdebs pa/__dpal rig 'dzin tshe dbang nor bu'i rnam par thar pa'i gtam 'dzam gling dga' bar byed pa'i rna rgyan zhes bya 141ba las shes par bya'o/__/sarba dwa mang+ga laM//____//_!