JKCL-KABUM-08-NYA-011-009

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 11, Text 9, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈གནས་དགོན་མཆོག་སྤྲུལ་ལ་གདམས་པ་བཞུགས། བློ་གསལ་ཆོས་ཀྱི་སྤྱན་ལྡན་ཞིང་། །ལུགས་གཉིས་གཟིགས་པ་རབ་ཡངས་པ། །ཁྱེད་ནི་ཤེས་བྱ་མཐའ་དག་ལ། །བརྒལ་བར་འདོད་པའི་སྙིང་སྟོབས་ཅན། །ད་ལྟ་ལང་ཚོ་གཞོན་ནུ་དེ། །སྐད་ཅིག་གཅིག་གིས་རྙིང་པར་འགྱུར། །རྒ་བའི་ཆད་པས་མནར་བ་དེ། །རྒྱང་རིང་ཞིག་ཏུ་མ་སེམས་ཤིག། སེམས་ཀྱི་རྟ་ཕོ་རྒོད་འདྲོགས་ཅན། །སྲབ་དང་སྒྲོག་གིས་འདུལ་འདྲ་བའི། །ངེས་འབྱུང་ཆོས་ཀྱིས་འདུལ་བར་མཛོད། །མ་བརྟགས་མ་དཔྱད་བྱ་བ་རྣམས། །རེ་ཞིག་གྲུབ་ཀྱང་མཐར་ནི་བརླག། དེ་བས་ལེགས་པར་བརྟགས་དཔྱད་ནས། །བྱ་བ་གང་བརྩམས་མཐར་ཕྱིན་གཅེས། །ད་ལྟ་ན་ཚོད་གཞོན་པའི་ཚེ། །ཐོས་བསམ་བསྙེན་སྒྲུབ་ཐམས་ཅད་ལ། །གཡག་ལྟོག་གིས་ནི་རྩྭ་ཟོས་བཞིན། །སྒོ་གསུམ་འབད་པ་དྲག་པོ་ཞིག། བྱ་བ་གལ་ཆེ་རྒས་པའི་དུས། །རྩ་ཐིག་རླུང་གསུམ་སྟོབས་བྲི་ནས། །དབང་པོ་རྒུད་པར་གྱུར་པའི་ཚེ། །ཡིད་ལ་དྲན་ཀྱང་ལུས་མི་འཁྱོལ། །མཆོག་བསྟན་ཉག་ཕྲའི་གནས་སྐབས་འདིར། །ཁྱེད་ཅག་སྤྲུལ་པ་ཡིན་པའི་ཕྱིར། །དེ་ཡི་ཟབ་གཏེར་བསྟན་པ་ལ། །བཤད་དང་སྒྲུབ་པ་སྤེལ་བར་འཚལ། །སྡིག་པའི་གྲོགས་ངན་སྤོང་བ་དང་། །ཕན་པར་གདམས་པ་དང་འགྲོགས་ཤིང་། །ཡང་དག་བཀའ་གཏེར་བསྟན་བཅོས་ལ། །འབད་པས་ནན་དུ་བལྟ་བར་བྱ། །སྨྲ་བ་མང་ན་ཀུན་གྱིས་བརྙས། །ནེ་ཙོ་སྨྲ་བས་གཟེབ་ཏུ་ཚུད། །སྨྲ་ལ་དགའ་བའི་ཉེས་པ་མང་། །དེ་ཕྱིར་སྨྲ་བ་ཚོད་ཟིན་བྱ། །རང་ཉིད་དམན་པའི་ས་བཟུང་ན། །རིམ་གྱིས་མཐོན་པོའི་གནས་སུ་ཕྱིན། །ད་ལྟ་རང་སྣང་མཐོན་པོ་ཡིས། །གཞན་ལ་ཁྱད་གསོད་ཟུར་ཟ་དང་། །བརྙས་བཅོས་ལ་སོགས་བྱས་པ་ན། །ཀུན་གྱིས་སྡང་ཞིང་བྱམས་མི་འགྱུར། །རང་ཉིད་དམན་པའི་གནས་ལྷུང་ནས། །འུག་རྒན་ཉིན་པར་རྒྱུ་བ་བཞིན། །རྟག་ཏུ་སྡོད་ནི་ཚུགས་པ་དགོས། །ཡུལ་ཀུན་འཁྱམ་ན་བྱུར་དང་འཕྲད། །གྲོང་པའི་ཁྱི་འཁྱམས་ཇི་བཞིན་དུ། །གཞན་གྱིས་བརྩི་བཀུར་བྱེད་པ་ཉུང་། །མི་ཁ་དག་ཀྱང་རབ་ལྡང་ཞིང་། །ཐོས་བསམ་སྒོམ་ལ་གཡེལ་བར་བྱེད། །མདོར་ན་དམ་པ་དམ་པའི་ལུགས། །འདྲིས་པ་བྱས་ན་རང་དོན་དང་། །གཞན་གྱི་དོན་ཀུན་འགྲུབ་པར་འགྱུར། །དེ་ཕྱིར་ཐུགས་ལ་ཕན་པའི་གསོས། །རྨོངས་རྒན་མུ་ཅོར་སྨྲ་པ་དེས། །རང་གི་མི་ཤེས་མི་བྱེད་བཞིན། །གཞན་ལ་གདམས་པ་ཁྲེལ་གྱུར་ཀྱང་། །དམ་པས་དམན་ལས་ལེགས་བཤད་ཀྱི། །དངོས་པོ་མཆིས་གང་བླང་མཛད་པས། །དེ་ཕྱིར་ཐུགས་ཀྱི་གསོས་སུ་ནི། །དྷརྨ་མ་ཏིས་ཕུལ་བ་དགེ། །།

[edit]

gnas dgon mchog sprul la gdams pa bzhugs/__blo gsal chos kyi spyan ldan zhing /__/lugs gnyis gzigs pa rab yangs pa/__/khyed ni shes bya mtha' dag la/__/brgal bar 'dod pa'i snying stobs can/__/da lta lang tsho gzhon nu de/__/skad cig gcig gis rnying par 'gyur/__/rga ba'i chad pas mnar ba de/__/rgyang ring zhig tu ma sems shig/__sems kyi rta pho rgod 'drogs can/__/srab dang sgrog gis 'dul 'dra ba'i/__/nges 'byung chos kyis 'dul bar mdzod/__/ma brtags ma dpyad bya ba rnams/__/re zhig grub kyang mthar ni brlag/__de bas legs par brtags dpyad nas/__/bya ba gang brtsams mthar phyin gces/__/da lta na tshod gzhon pa'i tshe/__/thos bsam bsnyen sgrub thams cad la/__/g.yag ltog gis ni rtswa zos bzhin/__/sgo gsum 'bad pa drag po zhig/__bya ba gal che rgas pa'i dus/__/rtsa thig rlung gsum stobs bri nas/__/dbang po rgud par gyur pa'i tshe/__/yid la dran kyang lus mi 'khyol/__/mchog bstan nyag phra'i gnas skabs 'dir/__/khyed cag sprul pa yin pa'i phyir/__/de yi zab gter bstan pa la/__/bshad dang sgrub pa spel bar 'tshal/__/sdig pa'i grogs ngan spong ba dang /__/phan par gdams pa dang 'grogs shing /__/yang dag bka' gter bstan bcos la/__/'bad pas nan du blta bar bya/__/smra ba mang na kun gyis brnyas/__/ne tso smra bas gzeb tu tshud/__/smra la dga' ba'i nyes pa mang /__/de phyir smra ba tshod zin bya/__/rang nyid dman pa'i sa bzung na/__/rim gyis mthon po'i gnas su phyin/__/da lta rang snang mthon po yis/__/gzhan la khyad gsod zur za dang /__/brnyas bcos la sogs byas pa na/__/kun gyis sdang zhing byams mi 'gyur/__/rang nyid dman pa'i gnas lhung nas/__/'ug rgan nyin par rgyu ba bzhin/__/rtag tu sdod ni tshugs pa dgos/__/yul kun 'khyam na byur dang 'phrad/__/grong pa'i khyi 'khyams ji bzhin du/__/gzhan gyis brtsi bkur byed pa nyung /__/mi kha dag kyang rab ldang zhing /__/thos bsam sgom la g.yel bar byed/__/mdor na dam pa dam pa'i lugs/__/'dris pa byas na rang don dang /__/gzhan gyi don kun 'grub par 'gyur/__/de phyir thugs la phan pa'i gsos/__/rmongs rgan mu cor smra pa des/__/rang gi mi shes mi byed bzhin/__/gzhan la gdams pa khrel gyur kyang /__/dam pas dman las legs bshad kyi/__/dngos po mchis gang blang mdzad pas/__/de phyir thugs kyi gsos su ni/__/d+harma ma tis phul ba dge/__//