JKCL-KABUM-08-NYA-011-007

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 11, Text 7, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཞལ་གདམས་ཐར་པའི་འཁྲི་ཤིང་ཞེས་བྱ་བ་བཞུགས་སོ། །ཨོཾ་སྭསྟི། རྗེ་བླ་མ་རྣམས་ལ་ཕྱག་འཚལ་ལོ། །སྒོས་བཀའ་དྲིན་ཅན་གྱི་བྱིན་གྱིས་རློབས། །མི་ང་དང་ང་འདྲའི་སེམས་ཅན་རྣམས། །ལམ་ཐར་པ་དམ་པར་འདྲེན་དུ་གསོལ། །བློ་སྣང་བ་དམ་པའི་ཆོས་ལ་བསྒྱུར། །རྐྱེན་ངན་པའི་དབང་དུ་མ་གཏོང་ཞིག། དུས་ད་རེས་དལ་འབྱོར་ལུས་རྟེན་འདི། །ཕོ་རྩལ་ཤུགས་ཆེ་བས་ཐོབ་པ་མིན། །སྔོན་བསོད་ནམས་བསགས་པའི་འབྲས་བུ་ཡིན། །དེ་ཆུད་ཟོས་མ་གཏོང་ཨ་རོཊ་ཚོ། །འདི་ཆུད་ཟོས་གྱུར་ན་གྱོང་ཆེན་བསྡབ། །ད་ཕྱི་ནས་འདི་འདྲ་རྙེད་པ་མེད། །འདི་འདྲའི་ལུས་རྟེན་ཐོབ་དགོས་ན། །གཞི་ཚུལ་ཁྲིམས་རྣམ་པར་དག་པ་བསྲུང་། །དེ་བསྲུངས་པས་ལུས་རྟེན་ཁྱད་འཕགས་ཐོབ། །དུས་ད་ལྟ་ཐོབ་པའི་ལུས་རྟེན་འདི། །ཡུན་མི་རྟག་རླུང་གསེབ་མར་མེ་འདྲ། །དགྲ་འཆི་བདག་ནམ་འོང་ཆ་མེད་པས། །སོས་དལ་དུ་སྡོད་པའི་ལོང་ཁོམ་མེད། །དོན་མེད་ཀྱི་རྣམ་གཡེང་ངག་འཆལ་དང་། །འཇིག་རྟེན་གྱི་ལྟད་མོ་སྣ་ཚོགས་ཀྱིས། །སེམས་གྱ་གྱུ་འདི་ཉིད་བསླུས་བསླུས་པས། །མི་ཚེ་ཉི་མ་སྟོང་ཟད་ཐལ། །ད་ལག་པ་བྲང་ཐོག་བཞག་བྱས་ཏེ། །སེམས་ནང་དུ་ཁུག་ལ་བསམ་བློ་ཐོངས། །སྔར་ཕན་ཆོད་དགེ་བ་ཉུང་ཟད་ཙམ། །སྒོ་གསུམ་གྱི་སྡིག་བསགས་གྲངས་མི་ཆོད། །ད་འགྲོ་ས་དམྱལ་བ་ལས་མི་གདའ། །དེ་བསམ་ན་སྙིང་རླུང་ལྡང་རེ་རན། །ད་མ་རན་དགུ་རན་དམ་ཆོས་སྒྲུབས། །སྙིང་ཐག་པ་ནས་དམ་པ་རྣམ་གསུམ་གྱི། །ཐབས་མཁས་པས་ཟིན་པའི་ལྷ་ཆོས་འབད། །ལས་རྒྱུ་འབྲས་ནམ་ཡང་བསླུ་བ་མེད། །ལས་བསགས་པ་རང་གི་སྟེང་དུ་སྨིན། །དེ་གཞན་ལ་འཕོ་བའི་གོ་སྐབས་མེད། །རང་བྱས་དེ་རང་གི་སྟེང་དུ་མྱོང་། །དེ་བས་ནས་དགེ་སྡིག་བླང་དོར་བརྩོན། །རྒྱུ་དགེ་སྡིག་སྤང་བླང་མ་བྱས་ན། །ནམ་འཆི་དུས་འགྱོད་པ་ཆེན་པོ་འོང་། །དུས་དེ་ཚེ་འགྱོད་པས་ཅི་བྱར་ཡོད། །ཚེ་ཕྱི་མའི་ལམ་ནི་ཤུལ་ཐག་རིང་། །གནས་གར་འགྲོའི་ངེས་པ་ཆ་མེད་ཅིང་། །གྲོགས་ལོངས་སྤྱོད་མཛའ་བཤེས་རྗེས་མི་འབྲང་། །རང་གཅིག་པུ་ཕྱི་མའི་ལམ་ལ་ཐེག། དུས་དེ་ཚེ་སྐྱབས་གནས་བླ་མ་ཡིན། །དེ་མིན་པ་སུས་ཀྱང་སྐྱོབ་མི་ནུས། །གནས་འཁོར་བའི་གཅོང་རོང་ཉམས་རེ་ང་། །ཚ་གྲང་གི་སྡུག་བསྔལ་བཟོད་པར་དཀའ། །དེ་དྲན་པ་ཙམ་གྱིས་སྙིང་རླུང་ལྡང་། །དུས་ད་ལྟ་རང་དབང་ཡོད་དུས་འདིར། །དེར་མི་སྐྱེའི་ཐབས་ལ་འབད་པར་བྱ། །རང་གཅིག་པུ་ཐར་བས་ཕན་པ་མེད། །མ་འགྲོ་དྲུག་སེམས་ཅན་ཐམས་ཅད་ལ། །ཕན་འདོད་ཀྱི་ལྷག་བསམ་བཟང་པོ་བསྐྱེད། །སྒོ་གསུམ་གྱི་དགེ་བ་ཅི་བྱས་རྣམས། །རང་ལེགས་འདོད་ཀྱི་འཁྲི་བ་ངན་པ་ཐོངས། །གཞན་གཅེས་འཛིན་དེ་རྣམས་དོན་དུ་སྤྱོད། །དུས་རྟག་ཏུ་སྨོན་ལམ་བཟང་པོ་ཐོབ། །གཞན་གནོད་ཀྱི་བསམ་སྦྱོར་ངན་པ་ཐོངས། །གཞན་ཕན་གྱི་ལྷག་བསམ་བཟང་པོ་བསྐྱེད། །བློ་བསམ་ངན་རྒྱུད་ལ་འཆང་བ་དེར། །ལས་ངན་གྱི་མཚོན་ཆ་རང་ལ་འཁོར། །རང་གཞན་ཀུན་འདི་ཕྱི་གཉིས་ཀ་ཕུང་། །དེ་བས་ན་ལྷག་བསམ་བཟང་པོར་བྱ། །ཁམས་བདེ་གཤེགས་སྙིང་པོ་བྱང་ཆུབ་ཀྱི། །ཟག་མེད་ཡོན་ཏན་ནི་ལྷུན་གྲུབ་ཀྱང་། །དཔེ་མེ་ལོང་རྡུལ་ཅན་དང་མཚུངས་བས། །དེ་བསལ་ཐབས་བསགས་སྦྱངས་གཉིས་ལ་འབད། །སྒོ་གསུམ་ལ་ཡེ་ཤེས་འབེབས་པ་དེ། །རྗེ་བླ་མའི་བྱིན་རླབས་ལ་རག་པས། །ལམ་ཟབ་མོ་བླ་མའི་རྣལ་འབྱོར་ལ། །རྒྱུད་དད་དང་དག་སྣང་རྣམ་དག་གིས། །ཁ་ཙམ་མིན་མོས་གུས་དྲག་པོ་ཡིས། །གསོལ་འདེབས་དང་དབང་བླང་ཐུགས་ཡིད་བསྲེ། །ཉམས་ལེན་གྱི་སྙིང་པོ་དེ་རུ་དྲིལ། །གསང་སྔགས་ཀྱི་དབང་བསྐུར་གྲངས་མང་ནོད། །དེའི་དབང་བཞིའི་དམ་ཚིག་བསྲུང་བའི་ཆེད། །ཡི་དམ་གྱི་བསྙེན་སྒྲུབ་བརྩོན་པར་བྱ། །ལམ་དུས་ཀྱི་དབང་བླང་མ་ཆགས་ན། །དམ་ཚིག་ཉམས་པ་གསོ་བྱེད་ཀྱི། །ཐབས་མཆོག་ཏུ་གྱུར་པ་ཡིན་པར་འདུག། དུས་རྟག་ཏུ་ལུས་ནི་ལྷ་རུ་བསྒོམ། །ངག་སྔགས་ཀྱི་བཟླས་བརྗོད་བརྩོན་པ་དང་། །སེམས་འཁྲུལ་པ་རྒྱ་འབྱམས་མི་གཏོང་བར། །རིག་སྟོང་ཆོས་ཉིད་འོད་གསལ་ངང་། །མ་ཡེངས་རྟག་ཏུ་སྐྱོང་བ་གཅེས། །དེ་ལྟར་ཉམས་ལེན་གདམས་པ་འདི། །རང་གི་རྒྱུད་ལ་མི་གནས་ཀྱང་། །ཁྱོད་ཀྱི་བསྐུལ་ངོ་མ་ལྡོག་ཙམ། །དམ་པ་གོང་མའི་གསུངས་བཞིན་དུ། །བྲིས་པའི་དགེ་བས་ཤེས་རྒྱུད་ལ། །ཕན་བ་ཅུང་ཟད་འབྱུང་བ་དང་། །བསྟན་དང་འགྲོ་བའི་ལེགས་བྱས་ཀུན། །དར་ཞིང་རྒྱས་པའི་ཆེད་དུ་བསྔོ། །ཀུན་ཀྱང་བྱང་ཆུབ་མཆོག་ཐོབ་ཤོག། ཅེས་པའང་ཧོར་གདོང་ཐོག་གྲྭ་བསམ་འགྲུབ་ཀྱིས་བསྐུལ་ངོར་ཆོས་ཀྱི་བློ་གྲོས་པས་བསམ་ཡས་བྲག་དམར་ཀེ་ཚང་དུ་བྲིས་པ་དགེ། །།

[edit]

!_zhal gdams thar pa'i 'khri shing zhes bya ba bzhugs so/__/oM swasti/__rje bla ma rnams la phyag 'tshal lo/__/sgos bka' drin can gyi byin gyis rlobs/__/mi nga dang nga 'dra'i sems can rnams/__/lam thar pa dam par 'dren du gsol/__/blo snang ba dam pa'i chos la bsgyur/__/rkyen ngan pa'i dbang du ma gtong zhig/__dus da res dal 'byor lus rten 'di/__/pho rtsal shugs che bas thob pa min/__/sngon bsod nams bsags pa'i 'bras bu yin/__/de chud zos ma gtong a roT tsho/__/'di chud zos gyur na gyong chen bsdab/__/da phyi nas 'di 'dra rnyed pa med/__/'di 'dra'i lus rten thob dgos na/__/gzhi tshul khrims rnam par dag pa bsrung /__/de bsrungs pas lus rten khyad 'phags thob/__/dus da lta thob pa'i lus rten 'di/__/yun mi rtag rlung gseb mar me 'dra/__/dgra 'chi bdag nam 'ong cha med pas/__/sos dal du sdod pa'i long khom med/__/don med kyi rnam g.yeng ngag 'chal dang /__/'jig rten gyi ltad mo sna tshogs kyis/__/sems gya gyu 'di nyid bslus bslus pas/__/mi tshe nyi ma stong zad thal/__/da lag pa brang thog bzhag byas te/__/sems nang du khug la bsam blo thongs/__/sngar phan chod dge ba nyung zad tsam/__/sgo gsum gyi sdig bsags grangs mi chod/__/da 'gro sa dmyal ba las mi gda'/__/de bsam na snying rlung ldang re ran/__/da ma ran dgu ran dam chos sgrubs/__/snying thag pa nas dam pa rnam gsum gyi/__/thabs mkhas pas zin pa'i lha chos 'bad/__/las rgyu 'bras nam yang bslu ba med/__/las bsags pa rang gi steng du smin/__/de gzhan la 'pho ba'i go skabs med/__/rang byas de rang gi steng du myong /__/de bas nas dge sdig blang dor brtson/__/rgyu dge sdig spang blang ma byas na/__/nam 'chi dus 'gyod pa chen po 'ong /__/dus de tshe 'gyod pas ci byar yod/__/tshe phyi ma'i lam ni shul thag ring /__/gnas gar 'gro'i nges pa cha med cing /__/grogs longs spyod mdza' bshes rjes mi 'brang /__/rang gcig pu phyi ma'i lam la theg/__dus de tshe skyabs gnas bla ma yin/__/de min pa sus kyang skyob mi nus/__/gnas 'khor ba'i gcong rong nyams re nga /__/tsha grang gi sdug bsngal bzod par dka'/__/de dran pa tsam gyis snying rlung ldang /__/dus da lta rang dbang yod dus 'dir/__/der mi skye'i thabs la 'bad par bya/__/rang gcig pu thar bas phan pa med/__/ma 'gro drug sems can thams cad la/__/phan 'dod kyi lhag bsam bzang po bskyed/__/sgo gsum gyi dge ba ci byas rnams/__/rang legs 'dod kyi 'khri ba ngan pa thongs/__/gzhan gces 'dzin de rnams don du spyod/__/dus rtag tu smon lam bzang po thob/__/gzhan gnod kyi bsam sbyor ngan pa thongs/__/gzhan phan gyi lhag bsam bzang po bskyed/__/blo bsam ngan rgyud la 'chang ba der/__/las ngan gyi mtshon cha rang la 'khor/__/rang gzhan kun 'di phyi gnyis ka phung /__/de bas na lhag bsam bzang por bya/__/khams bde gshegs snying po byang chub kyi/__/zag med yon tan ni lhun grub kyang /__/dpe me long rdul can dang mtshungs bas/__/de bsal thabs bsags sbyangs gnyis la 'bad/__/sgo gsum la ye shes 'bebs pa de/__/rje bla ma'i byin rlabs la rag pas/__/lam zab mo bla ma'i rnal 'byor la/__/rgyud dad dang dag snang rnam dag gis/__/kha tsam min mos gus drag po yis/__/gsol 'debs dang dbang blang thugs yid bsre/__/nyams len gyi snying po de ru dril/__/gsang sngags kyi dbang bskur grangs mang nod/__/de'i dbang bzhi'i dam tshig bsrung ba'i ched/__/yi dam gyi bsnyen sgrub brtson par bya/__/lam dus kyi dbang blang ma chags na/__/dam tshig nyams pa gso byed kyi/__/thabs mchog tu gyur pa yin par 'dug/__dus rtag tu lus ni lha ru bsgom/__/ngag sngags kyi bzlas brjod brtson pa dang /__/sems 'khrul pa rgya 'byams mi gtong bar/__/rig stong chos nyid 'od gsal ngang /__/ma yengs rtag tu skyong ba gces/__/de ltar nyams len gdams pa 'di/__/rang gi rgyud la mi gnas kyang /__/khyod kyi bskul ngo ma ldog tsam/__/dam pa gong ma'i gsungs bzhin du/__/bris pa'i dge bas shes rgyud la/__/phan ba cung zad 'byung ba dang /__/bstan dang 'gro ba'i legs byas kun/__/dar zhing rgyas pa'i ched du bsngo/__/kun kyang byang chub mchog thob shog/__ces pa'ang hor gdong thog grwa bsam 'grub kyis bskul ngor chos kyi blo gros pas bsam yas brag dmar ke tshang du bris pa dge/__//