JKCL-KABUM-04-NGA-055

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	chos kyi blo gros bka' 'bum Volume 4, Text 55, Pages (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '*. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: . Bir, H.P.: Khyentse Labrang, 2012.*
Genre	Biographies - Hagiography - rnam thar

1 Texts in this Section (sde tshan or chos tshan)

593-683	མཁན་ཆེན་རྡོ་རྗེ་འཆང་ངག་དབང་བསམ་གཏན་བློ་གྲོས་ཀྱི་རྣམ་པར་ཐར་པ་བཀྲ་ཤིས་འདོད་འཇོ། mkhan chen rdo rje 'chang ngag dbang bsam gtan blo gros kyi rnam par thar pa bkra shis 'dod 'jo Biographies - Hagiography - rnam thar	Text page View PDF
	[[\|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

[edit]

༄༅། །མཁན་ཆེན་རྡོ་རྗེ་འཆང་ངག་དབང་བསམ་གཏན་བློ་གྲོས་ཀྱི་རྣམ་པར་ཐར་པ་བཀྲ་ཤིས་འདོད་འཇོ་ཞེས་བྱ་བ་བཞུགས་སོ། ། བླ་མ་དཔལ་ལྡན་རྡོ་རྗེ་སེམས། །བདེ་ཆེན་ཁ་སྦྱོར་བདུན་གྱི་བདག །དངོས་རྣམས་ཀུན་གྱི་བྱེད་པོ་དེར། །མི་འགྱུར་རྟག་པར་ཕྱག་བགྱིའོ། །སྲིད་དང་ཞི་བའི་མཐའ་ལས་རབ་འདས་ཆོས་དབྱིངས་དགའ་མར་སྙོམས་ཞུགས་ཀྱང་། །ལོངས་སྤྱོད་ཡོངས་རྫོགས་བདེ་བ་ཆེན་པོ་མི་ཟད་རྒྱན་གྱི་རོལ་མོ་འཁྲོལ། །གང་འདུལ་ཕྲིན་ལས་ནམ་མཁའི་མཐའ་ཀླས་ཁྱབ་བདག་དཔལ་ལྡན་བླ་མ་རྗེའི། །ཞབས་ལ་སྒོ་གསུམ་དངོས་ཀུན་བཏུད་དོ་བྱང་ཆུབ་བར་དུ་འབྲལ་མེད་སྐྱོངས། །ཐབས་ཤེས་ཟུང་འཇུག་དང་པོའི་སངས་རྒྱས་བླ་མ་དཔལ་ལྡན་ཀྱེ་རྡོ་རྗེ། །མཁའ་འགྲོ་སྒྱུ་མ་བདེ་བའི་མཆོག་གར་ས་གསུམ་རོལ་མཛད་ཡེ་ཤེས་སྐུ། །ཐོག་མཐའ་དབུས་བྲལ་ཤིན་ཏུ་བརྟག་དཀའ་ཟབ་ཅིང་རྒྱ་ཆེའི་བདག་ཉིད་ཅན། །སྐུ་བཞིའི་བདག་ཉིད་ཧེ་རུ་ཀ་དཔལ་བདུད་བཞི་མནན་མཛད་གང་དེ་རྒྱལ། །དུས་རྣམས་ཟ་བྱེད་དུས་དགྲའི་དབང་པོ་རྣོ་དཀར་མཆེ་བ་རབ་ལྡན་ཞིང་། །གཏི་མུག་འཇོམས་བྱེད་མ་ཧེའི་ཞལ་ཅན་དཔལ་ལྡན་ལྷག་པའི་ལྷ་མཆོག་ནི། །འཇམ་དཔལ་རྡོ་རྗེ་དྲག་པོར་ཁྲོས་པ་ཤིན་ཏུ་མི་བཟད་འཇིགས་རུང་སྐུ། །ཁྲོ་བོ་ཀུན་གྱི་སྤྱི་དཔལ་དམ་པ་གར་དགུའི་ཉམས་ལྡན་དེ་ལ་འདུད། །རབ་འཇིགས་དུས་མཐའི་མེ་ལྟར་འབར་ཞིང་དུག་ཆེན་ཧ་ལའི་མདོག་ལྟར་གནག །དྲག་ཤུལ་སྟོབས་ལྡན་དཔའ་བོ་ཆེན་པོ་མིའུ་ཐུང་གེལ་པའི་འདུག་སྟངས་ཅན། །རྣམ་འཕྲུལ་མཐའ་ཡས་གཎྜི་འཛིན་པས་བདུད་ཀྱི་གཡུལ་ངོ་ཟློག་བྱེད་པ། །བླ་མ་རྡོ་རྗེ་ནག་པོ་ཆེན་པོས་འབྲལ་བ་མེད་པར་སྐྱོངས་ཤིག་ཀྱེ། །འཇམ་དཔལ་དབྱངས་དངོས་བླ་ཆེན་ས་སྐྱ་པ། །རྒྱལ་བས་ལུང་བསྟན་བརྙེས་པ་ཀུན་དགའ་བཟང་། །སྙན་བརྒྱུད་བསྟན་པའི་སྲོག་ཤིང་ཚར་པ་རྗེ། །མཚུངས་མེད་བླ་མ་བརྒྱུད་པར་བཅས་ལ་འདུད། །རྣལ་འབྱོར་མ་དཔལ་རྗེ་བཙུན་རིགས་བྱེད་མ། །ཚོགས་ཀྱི་བདག་པོ་འདོད་པའི་རྒྱལ་པོ་དང་། །ཞིང་སྐྱོང་སྟོབས་འཕྲོག་དབང་པོ་ལ་སོགས་པ། །མཁའ་འགྲོ་སྲུང་མར་བཅས་པས་ཤིས་པ་སྩོལ། །དཔལ་ལྡན་བླ་མ་ཡོན་ཏན་རྒྱ་མཚོའི་གཏེར། །སྙན་བརྒྱུད་རྒྱ་མཚོའི་ཆུ་ཀླུང་འབུམ་ཕྲག་འཁྱིལ། །རྣམ་ཐར་དཔག་ཡས་བདག་འདྲའི་སྤྱོད་ཡུལ་ལས། །བརྒལ་ཡང་མོས་གུས་ས་བོན་ཙམ་དུ་སྤེལ། །འདི་ལ་ཁྱབ་བདག་བླ་མ་ཡིས། །ཐོག་མཐའ་བར་གསུམ་དགེ་ལེགས་ཀྱི། །བྱིན་རླབས་བཀྲ་ཤིས་མེ་ཏོག་གི། ཆར་ཆེན་རྒྱས་པར་དབབ་ཏུ་གསོལ། །ཞེས་ཤིས་པའི་ཚིག་གིས་ལམ་ཡངས་པོར་ཕྱེས་ནས། དེ་ལ་འདིར་བདག་ཅག་གི་དཔལ་ལྡན་བླ་མ་དམ་པ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་༧ངག་དབང་བསམ་གཏན་བློ་གྲོས་སྙན་བརྒྱུད་བསྟན་པའི་རྒྱལ་མཚན་དཔལ་བཟང་པོ་ཞེས་སྲིད་པ་གསུམ་ན་མཚན་གྱི་གྲགས་སྙན་དངར་པོས་ཁྱབ་པ་དེ་ཉིད་ཀྱི་རྣམ་ཐར་ཉུང་ངུ་འཆད་པ་ལ་དོན་གསུམ་སྟེ། སྐུའི་སྐྱེ་བ་སྔོན་མ་ཇི་ལྟར་བྱུང་ཚུལ་དང་། ད་ལྟའི་རྣམ་ཐར་ཅུང་ཟད་རྒྱས་པར་བཤད་པ་དང་། འདས་རྗེས་ཀྱི་རྣམ་ཐར་མདོ་ཙམ་སྨོས་ནས་མཇུག་བསྡུ་བའོ། །དང་པོ་ནི། དཔལ་ལྡན་བླ་མ་མཐུ་སྟོབས་ཀྱི་དབང་ཕྱུག་འདི་ཉིད་ངེས་པའི་དོན་དུ་གདོད་མ་ནས་སྐྱེ་འཆིའི་སྤྲོས་པ་ལས་འདས་པའི་བྱང་ཆུབ་ཆེན་པོའི་གོ་འཕང་དམ་པ་མངོན་དུ་མཛད་ཟིན་ནའང་། སངས་རྒྱས་རྣམས་ཀྱི་ཕྲིན་ལས་འགོག་པ་མེད་པ་ནི་ཆོས་ཉིད་ཅན་ཡིན་པས་གང་འདུལ་གཟུགས་སྐུའི་རོལ་མོ་མཐའ་ཡས་པ་ཞིང་འདི་དང་ཞིང་ཁམས་གཞན་དག་ཏུ་འབྱམས་ཀླས་པར་བྱོན་པ་ལས། རེ་ཞིག་གླིང་བཞི་པའི་འཇིག་རྟེན་གྱི་ཁམས་ལས་ཛམྦུའི་ཤིང་གིས་བརྒྱན་པའི་ལྷོ་ཕྱོགས་ཀྱི་དབུས་བསྐལ་བཟང་གི་སངས་རྒྱས་རྣམས་མངོན་པར་བྱང་ཆུབ་བརྙེས་པའི་གནས་འཕགས་པའི་ཡུལ་དུའང་པཎྜི་ཏ་དང་གྲུབ་ཐོབ་རྣལ་འབྱོར་ཕོ་མོ་སོགས་སྐྱེ་བའི་ཕྲེང་བ་མང་པོ་དང་། རྡོ་རྗེ་གདན་གྱི་བྱང་ཕྱོགས་སྤུར་རྒྱལ་བོད་ཀྱི་ལྗོངས་འཕགས་པ་སྤྱན་རས་གཟིགས་ཀྱིས་བསྲུང་བའི་ཞིང་འདིར་ཡང་རྒྱལ་པོ་དང་། ལོ་པཎ་མཁས་གྲུབ་མང་པོའི་སྐུ་ཡི་ཕྲེང་བ་གྲངས་མེད་སྟོན་པར་མཛད་པ་གོར་མ་ཆག་ཀྱང་རེ་རེ་ནས་བརྗོད་པའི་སྤོབས་པ་ཟད་པར་གྱུར་ཏོ། །དེ་ཅི་ཞིག་ཅེ་ན། རྗེ་བླ་མ་དེ་ཉིད་དུས་ཀུན་ཏུ་དམན་ས་ཁོ་ན་འཛིན་པ་ལས་སྐྱེ་བའི་ཕྲེང་བ་མཐོན་པོར་རློམ་པ་སོགས་ཀྱི་ང་རྒྱལ་མི་མངའ་བས་ཡོན་ཏན་ཐམས་ཅད་བུམ་ནང་གི་མར་མེ་ལྟར་སྦ་ཞིང་། སྐྱེ་བའི་ཕྲེང་བ་འདིའོ་ཞེས་ཞལ་ནས་དངོས་སུ་ཐོས་པ་མེད་ཅིང་གསང་བ་སྲུང་བ་ལ་ཐུགས་ཤིན་ཏུ་སྒམ་པ་ཡིན་ནོ། །དེ་ལྟ་ནའང་ཁམས་སྟོན་གྲུབ་པའི་དབང་ཕྱུག་ཆེན་པོ་སངས་རྒྱས་རྒྱ་མཚོའི་བག་ཆགས་རང་ཤུགས་ཀྱིས་ཤིན་ཏུ་མཐུག་པོ་རྗེས་སུ་དྲན་པར་མངའ་བ་ཡིན་ཞེས་ཐོས་ལ། དེ་ནི་རྗེ་ཚར་ཆེན་གྱི་རྣམ་འཕྲུལ་ཡིན་པ་དང་། ཡང་ལ་ལས་སྡེ་དགེ་ས་དབང་བླ་ཆེན་བྱམས་པ་སངས་རྒྱས་ཀུན་དགའ་བསྟན་པའི་རྒྱལ་མཚན་གྱི་སྐྱེ་བ་དྲན་པར་གསུངས་ཞེས་བཤད་ལ། དེ་ལྟར་ན་ཤིན་ཏུ་འབྲེལ་ཆགས་ཤིང་བླ་ཆེན་དེ་ཉིད་སངས་རྒྱས་རྒྱ་མཚོའི་སྐྱེ་བར་གྲགས་པ་དང་། རྡོ་རྗེ་འཆང་མཁྱེན་རབ་བྱམས་པའི་སྤྲུལ་པར་ཡང་བླ་མ་དག་གསུངས་སོ། །འདི་ལའང་གཏན་ཚིགས་ཤིག་འདུག་སྟེ། ས་སྐྱ་པའི་སྙན་བརྒྱུད་ལ་ཐུགས་རྩིས་ཆེ་ཞིང་ཕྱག་བཞེས་མཁས་པ་དང་། གཤིན་རྗེ་དང་ཆོས་སྐྱོང་ལ་རྩལ་འདོན་གནང་བ་དང་། དབང་དྲག་གི་ལས་ལ་རྣོ་མྱུར་ཆེ་ལུགས། དཔལ་དུས་ཀྱི་འཁོར་ལོར་བག་ཆགས་ཆེ་བ། སྡེ་དགེ་ཡབ་ཆེན་གྱི་གསུངས་ལ་ཐུགས་གཙིགས་གནང་ཚུལ། ལྷུན་གྲུབ་སྟེང་ལ་གཟིགས་བསྐྱངས་རྩལ་དྲག་པ། ནག་ཟླའི་ཚེས་༢༤ལ་ཞིང་གཤེགས་པ་སོགས་སྔོན་གྱི་རྣམ་ཐར་དང་ཆོས་མཚུངས་པས་སོ། །དོན་ལ་མཁས་གྲུབ་མང་པོའི་སྐུ་ཡི་སྐྱེ་བ་བརྒྱུད་མར་བཞེས་པ་ནི་ཚར་ཆེན་རིན་པོ་ཆེའི་རྣམ་ཐར་དང་། སྐྱེས་རབས་ལས་འབྱུང་བ་ལྟར་ཡིན་ཏེ། འཕགས་ཡུལ་དུ་རྣལ་འབྱོར་གྱི་དབང་ཕྱུག་བིཪྺ་པ། སྠ་ཝཱི་རའི་གནས་བརྟན་རིགས་སྔགས་འཛིན། ཁ་ཆེ་དྷརྨ་པཱ་ལ། པཎ་ཆེན་ག་ཡ་དྷ་ར། མཁས་གྲུབ་ཁྱུང་པོ་རྣལ་འབྱོར། མ་བྱོན་སངས་རྒྱས་རབ་གསལ་གྱི་རྣམ་འཕྲུལ་ཁ་ཆེ་པཎ་ཆེན་ཤཱཀྱ་ཤྲཱི་བྷ་དྲ། སངས་རྒྱས་གཉན་སྟོན། ཀུན་མཁྱེན་ཆོས་སྐུ་འོད་ཟེར། བུ་སྟོན་ཐམས་ཅད་མཁྱེན་པ། ཡར་ཀླུང་པ་སེངྒེ་རྒྱལ་མཚན། ཤངས་ཆོས་པ་བསོད་ནམས་བཟང་པོ། གྲུབ་ཆེན་རྣལ་འབྱོར་དབང་མོ། ཚར་ཆེན་རྡོ་རྗེ་འཆང་ཉིད་ཀྱི་སྤྲུལ་པ་བཀའ་འགྱུར་བ་མགོན་པོ་བསོད་ནམས་མཆོག་ལྡན། མཐུ་ཆེན་སྦས་པའི་རྣལ་འབྱོར་ཁམས་སྟོན་སངས་རྒྱས་རྒྱ་མཚོ་ཞེས་གནས་གསར་རྡོ་རྗེ་འཆང་གི་བླ་མར་བསྟེན་ཅིང་ལུང་རྟོགས་ཀྱི་ཡོན་ཏན་དཔག་ཏུ་མེད་པ་དང་ལྡན་པ་སྟེ། དེ་ལྟར་སྐྱེས་རབས་ཨུ་དུཝ་རའི་ཕྲེང་མཛེས་ལྟར་བྱོན་པས་བསྟན་པ་རིན་པོ་ཆེ་བཤད་སྒྲུབ་ལས་གསུམ་གྱིས་སྐུ་ཚེ་སྔ་མ་རྣམས་སུའང་སྤེལ་བར་མཛད་པའོ། །དེ་ལྟ་བུའི་སྐྱེས་རབས་ཀྱི་ཕྲེང་བ་བྱོན་པའང་བྱང་ཆུབ་སེམས་དཔའ་ཆེན་པོ་རྣམས་དམིགས་པ་མེད་པའི་སྙིང་རྗེ་ཆེན་པོའི་གཞན་དབང་དུ་གྱུར་པ་དང་། སྨོན་ལམ་གྱི་མཐུ་བཙན་པས་གཟུགས་སྐུའི་སྒྱུ་འཕྲུལ་གྱི་རོལ་མོ་འབྱམས་ཀླས་པས་བསྟན་འགྲོའི་དོན་མཐའ་ཡས་པ་སྒྲུབ་པ་ལ་སུས་ཀྱང་འགོག་པ་མེད་པའི་ཆོས་ཉིད་མངོན་དུ་གྱུར་པ་ཡིན་ཏེ། ཆོ་འཕྲུལ་བསྟན་པའི་མདོ་ལས། ཀྱེ་རྒྱལ་བའི་སྲས་དག་དེ་བཞིན་གཤེགས་པའི་ཐབས་མཁས་པ་དང་། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ་། །སེམས་ཅན་རྣམས་ཀྱི་བསམ་པ་ཇི་ལྟ་བུ་དང་། ཇི་ལྟར་འདུལ་བ་དང་། དགེ་བའི་རྩ་བ་ཇི་ལྟ་བུ་དང་། སེམས་ཅན་རྣམས་ཀྱི་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏོ། །སེམས་ཅན་ཁ་ཅིག་ནི་བྱང་ཆུབ་སེམས་དཔས་འདུལ། ཁ་ཅིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་སྟོན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་ནི་རིང་བསྲེལ་གྱིས་འདུལ། ཞེས་སོགས་རྒྱ་ཆེར་གསུངས་པ་ལྟར་རོ། །ཀྱེ་མ་སྐྱེ་སོགས་སྤྲོས་པ་རབ་ཞི་ཡང་། །སྐྱེ་བའི་ཚུལ་གྱིས་སྤྲུལ་པའི་རྩེད་འཇོ་ནི། །མཐའ་ཀླས་མིག་འཕྲུལ་ལྟ་བུར་སྟོན་པ་ལ། །ངལ་བ་མེད་པའི་སྙིང་སྟོབས་ཆེན་པོ་གང་། །ཆགས་མེད་རྡུལ་དང་བྲལ་བའི་ཡེ་ཤེས་ཀྱི། །རང་གཟུགས་སྲིད་པར་འཕོས་པས་འགྲོ་བ་རྣམས། །ཐུགས་རྗེ་ཐབས་མཁས་མཛད་པ་རྣམ་མང་གིས། །བྱང་ཆུབ་མཆོག་གི་ས་བོན་ཐེབ་པར་བྱས། །ཨེ་མ་འདི་ནི་ལྷར་བཅས་དགའ་བའི་གཏེར། །འགྲོ་བའི་ཉེར་འཚོ་དཔག་བསམ་ལྗོན་པ་བཟང་། །སྣ་ཚོགས་འབྲས་བུ་དུས་སུ་སྨིན་པ་ལ། །སྟེན་པར་མི་བྱེད་སེམས་ལྡན་སུ་ཞིག་ཡོད། །ཅེས་བར་སྐབས་ཀྱི་ཚིགས་སུ་བཅད་པའོ། །གཉིས་པ་སྐུ་ཚེ་འདི་ཉིད་ཀྱི་རྣམ་པར་ཐར་པ་ཅུང་ཟད་རྒྱས་པར་བཤད་པ་ལ་སྐུ་སྐྱེ་བ་བཞེས་པའི་ཚུལ། རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ། མྱ་ངན་ལས་འདས་ཀྱང་མཛད་པ་རྒྱུན་མི་འཆད་པའི་ཚུལ་དང་གསུམ། དང་པོ་ནི། འདྲེན་པ་དམ་པ་ཆོས་ཀྱི་དབང་ཕྱུག་ཆེན་པོ་འདི་ནི་དོན་དམ་པར་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོར་མངོན་པར་བྱང་ཆུབ་ཆེན་པོའི་རྒྱལ་ཐབས་ལས་མ་གཡོས་ཤིང་ཚུ་རོལ་མཐོང་བའི་བློ་ཅན་རྣམས་ཀྱི་ངོར། མདོ་སྡེ་རྒྱན་ལས། །དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ཏེ། །ཞེས་པ་ལྟར་གཞན་གྱིས་མ་བསྐུལ་བར་རང་ཉིད་ཀྱིས་བསམ་བཞིན་དུ་ཀུན་མཁྱེན་ཉི་མའི་གཉེན་གྱི་བསྟན་པ་རིན་པོ་ཆེ་སྤྱི་དང་། བྱེ་བྲག་འཇམ་དཔལ་དབྱངས་དངོས་རྗེ་བཙུན་ས་སྐྱ་པའི་བསྟན་པ་རིན་པོ་ཆེ་མཐའ་དག་དང་། ཡང་སྒོས་ཚར་ཆེན་རྡོ་རྗེ་འཆང་ཆེན་པོའི་སྙན་བརྒྱུད་ཀྱི་བསྟན་པ་སྤེལ་བ་ལ་དེ་ཉིད་དངོས་སུ་འབྱོན་པ་ལྟ་བུའི་རྣམ་ཐར་གཙང་མ་ཆུ་དང་འོ་མ་མ་འདྲེས་པ་སོ་སོར་འབྱེད་པ་ངང་པའི་རྒྱལ་པོ་ལྟ་བུ་མཁྱེན་རབ་ཀྱི་རྣམ་དཔྱོད་མཚུངས་ཟླ་མ་མཆིས་ཤིང་། མི་འཕྲོག་པའི་སྤོབས་པ་བསྟན་པ་ཆོས་ཐམས་ཅད་ཀྱི་ཉིང་ཁུ་གསང་སྔགས་རྡོ་རྗེ་ཐེག་པའི་ཟབ་དོན་རྒྱ་མཚོའི་གཏེར་མཛོད་ཆེན་པོར་གྱུར་པ་འདི་ཉིད་ཀྱི་སྐུའི་སྐྱེ་བ་བཞེས་པའི་ཡུལ་ནི་འཛམ་གླིང་གི་ལྟེ་བ་རྡོ་རྗེ་གདན་གྱི་བྱང་ཕྱོགས་ཁ་བའི་རྡུལ་གྱིས་དཀྲིགས་པའི་ལྗོངས་འདིར་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཏུ་གྲགས་པ་ལས་མདོ་ཁམས་ཀྱི་ལྗོངས་འབྲི་ཀླུང་དམ་པ་ཆོས་ཀྱི་འབྱོར་པས་ཕྱུག་པའི་འབྲི་རྫ་སྒང་གི་ས་ཡི་ཆར། སྡེ་བཞི་དགེ་བཅུའི་དཔལ་གྱི་འབྱོར་པ་ཆེན་པོས་མངོན་པར་གཏམས་པའི་རྒྱལ་ཁབ་ཆེན་པོ་ལྷུན་གྲུབ་སྟེང་དང་ཉེ་བའི་ཆབ་འབངས། ཟིལ་ལྷ་སྡེ་དཀར་པོའི་ནང་གསེས་དངུལ་ཕུ་ནང་ཞེས་པར། རུས་ནི་སི་ཏུ་ཀུན་མཁྱེན་ཆོས་ཀྱི་འབྱུང་གནས་ཀྱི་ཐུགས་སྲས་ཀྱི་ཐུ་བོ་མཁས་གྲུབ་ཆེན་པོ་འབེ་ལོ་ཙཱ་བ་ཚེ་དབང་ཀུན་ཁྱབ་ཅེས་འབེ་རྫ་ཉིན་དམ་ཐོག་སྒང་དུ་ཨ་ལྕགས་འབྲུའི་རུས་ལས་འབེ་སྤོ་རུ་བྱམས་ཆོས་པ་ཞེས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གྱི་ཐུགས་སྲས་འཇམ་དབྱངས་གོང་མ་ཆེན་པོའི་བཀའ་ལུང་གིས་མངོན་པར་མཐོ་བ་དེ་ཉིད་སོགས་སྐྱེས་བུ་དམ་པ་མང་དུ་བྱོན་པའི་ཕྱི་མ། འབེ་སྒྲོལ་མ་མགོན་དང་། ཐོན་མི་སཾ་བྷོ་ཊའི་གདུང་རིགས་བསོད་ནམས་སྒྲོན་མའི་སྲས་སུ་སྐུ་འཁྲུངས་པ་དེ་ཉིད་ཀྱི་དབོན་རབས་མི་བརྒྱུད་བར་མ་ཆད་པ་ལས་བཟོ་གནས་རྒྱ་མཚོའི་གནས་ལ་བྱང་ཆུབ་པ། ཀར་ཤོད་རྫ་སྟོད་ལྷ་བྲིས་པ་དབུ་མཛད་བསོད་ནམས་དབང་ཕྱུག་ཅེས་པ་ལྷ་སྐུ་བྲིས་འབུར་གང་ལའང་མཁྱེན་དཔྱོད་འགྲན་ཟླ་མེད་པ་དེ་ཉིད། སྡེ་དགེ་ཆོས་རྒྱལ་ཆེན་པོས་ལྷ་བྲིས་རྟེན་བཞེངས་སྐབས་གདན་དྲངས་པ་ན་སྐུ་ཚེ་མཐར་མ་ཕྱིན་ཏེ། གེགས་ཆག་ཏུ་གྱུར་པ་ན། ཆོས་རྒྱལ་ཆེན་པོས་རྫོང་སྒོ་གཅིག་བརླག་པ་ལས་ཀྱང་གྱོང་ཆེ་ཞེས་ཐུགས་སྐྱོ་ཆེན་པོ་མཛད་པར་གྲགས་པ་དེ་ཉིད་ནི་རྗེ་འདིའི་ཡབ་དང་། ཡུམ་ནི་བོ་ཆུང་ཟེར་བ་གཤིས་བཟང་ཞིང་སྙིང་རྗེ་དང་ལྡན་པ། དཀོན་མཆོག་ལ་གུས་ཤིང་གཏོང་ཕོད་ཅན་དགེ་བའི་ཕྱོགས་ལ་འདུན་པ་དེ་ཉིད་ལ་སྲས་མིང་སྲིང་གསུམ་ལས་རྗེ་བླ་མ་འདི་སྲས་འབྲིང་བ་ཡིན་ནོ། །དེ་ཡང་རབ་བྱུང་བཅོ་ལྔ་པའི་སྟོད་འགྲེལ་བའི་བི་རྟ་བ་སྟེ་རྣམ་བྱུང་ཞེས་པ་ས་ཕོ་འབྲུག་གི་ལོར་སྐུ་བལྟམས་པ་དང་། ཡུམ་གྱི་མངལ་དུ་བཞུགས་པ་ནའང་ཡུམ་ལ་གནོད་པ་མེད་ཅིང་ཡབ་ཡུམ་གཉིས་ཆར་ལ་མཚན་ལྟས་རྨི་ལམ་བཟང་ཞིང་སྐུ་ལུས་བདེ་ལ་ཟོ་མདོག་བཟང་བ་དང་། སྐུའི་ཆུ་འཛིན་མངལ་སྦུབས་ལས་གྲོལ་བ་ནའང་ཉེས་སྐྱོན་གྱིས་མ་གོས་ཤིང་ཧ་ཅང་འབྱོར་པ་དང་རྒུད་པའི་མཐའ་གཉིས་སུ་མ་ལྷུང་བ། བྱང་ཆུབ་སྒྲུབ་པ་ལ་འགལ་རྐྱེན་དང་བྲལ་བའི་བར་མའི་རིགས་རྣམ་པར་དག་པ་ལས་མཚན་དཔེའི་ཉིན་བྱེད་དབང་པོ་བཞད་པར་གྱུར་ཏོ། །སྐུ་ན་ཕྲ་མོའི་དུས་དེར་ཡང་དམ་པའི་རིགས་སད་པས་བྱིས་པའི་ཐལ་རྩེད་ཕལ་གྱིས་མ་རྙོགས་ཤིང་། དབང་སྐུར་ཆོས་འཆད་ཀྱི་རྣམ་པ་དང་། འདོན་རྟ་གདངས་དབྱངས་ལྷ་ཡི་མཆོད་ཆ་སོགས་དང་། བླ་མ་གྲྭ་པར་དགའ་བའི་རྣམ་འགྱུར་དང་། རང་ཉིད་ཀྱི་ན་བཟའ་ཡང་དམར་མདོག་ལ་སྤྲོ་ཞིང་། སེམས་ཅན་ལ་སྙིང་རྗེ་རང་ཤུགས་ཀྱིས་ལྡན་པ་ཕལ་པའི་སྤྱོད་ཡུལ་ལས་ཁྱད་པར་དུ་གྱུར་པ་ཞིག་ཡིན་པར་གྲགས་ཤིང་། སྐུ་ཤིན་ཏུ་གཞོན་དུས་ཞབས་གཉིས་ཀྱི་མཐིལ་ལ་ཡིག་འབྲུ་ལྟ་བུའི་རི་མོ་ཁྱད་འཕགས་ཤིག་ཡོད་ཀྱང་ཕྱིས་སུ་གྲིབ་རྐྱེན་ལས་མི་མངོན་པར་གྱུར་ཅེས་ཐོས་སོ། །མགོན་པོ་ཤར་རིའི་ཕྲག་ནས་ལེགས་འོངས་པའི། །ཟླ་གཞོན་བཅུ་དྲུག་གསར་པའི་ལང་ཚོ་ཅན། །རྒྱལ་སྲས་སྙིང་རྗེས་ཡོངས་གང་མིག་མི་འཛུམ། །ས་འདིར་སྣང་བའི་སྐལ་བཟང་ཐོག་མར་འཆར། །མཐོང་ན་མི་མཐུན་མེད་པ་དག་ཅིང་གཙང་། །རྒྱུ་མཐུན་འབྲས་བུ་སྨིན་པ་མཚན་དཔེའི་རྒྱན། །ཆ་ཤས་རྫོགས་པས་ལྷར་བཅས་དགའ་བའི་དཔྱིད། །གཟུགས་སྐུའི་དཀྱིལ་འཁོར་སྒྲིབ་མེད་མངོན་སུམ་སྣང་། །གཉིས་པ་རང་གཞན་གྱི་དོན་གཉིས་ལྷུན་གྱིས་གྲུབ་པའི་ཚུལ་ལ་གསུམ། རང་དོན་ཚུལ་གནས་ཐོས་བསམ་སྒོམ་པའི་མཐར་སོན་པ་དང་། གཞན་དོན་འཆད་རྩོད་རྩོམ་པས་བསྟན་པ་རིན་པོ་ཆེ་རྒྱས་པར་མཛད་པ་དང་། གཉིས་ཀའི་དོན་དུ་མཁས་བཙུན་བཟང་གསུམ་གྱི་ཡོན་ཏན་རྒྱ་མཚོར་དབང་འབྱོར་བའི་ཚུལ་ལོ། །དང་པོ་ལའང་། འཕགས་པ་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། ཞེས་པ་ལྟར། གཞི་ཆོས་འདུལ་རིན་པོ་ཆེའི་སྙིང་པོ་ཚུལ་ཁྲིམས་ཀྱི་བསླབ་པས་ཐུགས་རྒྱུད་སྡོམ་པའི་ཚུལ་ནི། སྐུ་འཁྲུངས་ནས་རིམ་གྱིས་ནར་སོན་པ་ན་དད་དང་ངེས་འབྱུང་སྙིང་རྗེ་སོགས་དམ་པའི་རིགས་ཡོངས་སུ་གསལ་བར་སད་པའི་མཐུ་ལས། ཆོས་གྲྭ་ཆེན་པོ་དཔལ་ལྡན་ལྷུན་གྲུབ་སྟེང་གི་གྲྭ་སར་ཞུགས་ནས་དགུང་གྲངས་བརྒྱད་པའི་དུས་ཀློག་སློབ་པ་ན། སློབ་དཔོན་གྱིས་ངལ་བ་ཆེར་མ་དགོས་ཤིང་། རྗེ་འདིས་ཀྱང་སྐུ་ལ་དཀའ་སྤྱད་མ་བཞེས་པར་ཡིག་དཀར་ནག་ཐམས་ཅད་ལེགས་པར་ཀློག་པ་ལ་དཀའ་ཚེགས་མེད་པར་མཁྱེན། དགོན་པའི་བསྒྲིགས་ཀྱི་ཚོགས་འདོན་སྐོར་རྣམས་ཐུགས་འཛིན་གནང་བ་ནའང་ཚར་ཁ་ཤས་རེ་བཀླགས་པས་ཐུགས་སུ་ཆུབ་པ་ན་ཐམས་ཅད་ཀྱིས་བཙུན་ཆུང་འདི་ནི་སྔོན་སྦྱངས་ཅན་ཞིག་ཡིན་པར་འདུག །འདི་འདྲའི་ཤེས་རབ་ཆེ་ལུགས་ལ་དཔག་ན་གཞན་ལས་ཁྱད་པར་དུ་འཕགས་པ་ཞིག་འབྱུང་བར་འདུག་ཅེས་གླེངས། ཆོ་གའི་ཕྱག་བཞེས་དང་འདོན་རྟ་དབྱངས་འབུད་བརྡུང་དཀྲོལ་གསུམ། དཀྱིལ་འཁོར་བྲི་ཐིག་རྣམས་སྔོ་གནའ་བླ་མ་དོན་གྲུབ་རྒྱལ་མཚན་ལས་གསན་པས་མཁས་པའི་ཕུལ་དུ་ཕྱིན། དགུང་གྲངས་ཉེར་གསུམ་སོན་པ་ལྕགས་སྟག་ལོར་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝྃ་ཆོས་ལྡན་དུ་གྲྭ་སར་ཕེབས། སྙིགས་དུས་ཀྱི་རྒྱལ་བ་གཉིས་པ་རྡོ་རྗེ་འཆང་ཀུན་དགའ་བཟང་པོའི་ཆོས་ཀྱི་ཁྲི་ལ་བཞུགས་པའི་ཆོས་འདུལ་རྒྱ་མཚོའི་ཕ་རོལ་ཏུ་སོན་པ་ཁང་གསར་མཁན་ཆེན་ངག་དབང་བློ་གྲོས་སྙིང་པོ་དང་། ལས་སློབ་སོགས་གྲངས་ཚང་བ་ལས་ཚིག་གསུམ་བར་མ་ཆད་དུ་བཞེས་པས་ཐུབ་པའི་རྒྱལ་མཚན་ཉམས་པ་མེད་པར་བཟུང་། མཚན་ངག་དབང་བསམ་གཏན་བློ་གྲོས་གསོལ། དེ་ཕྱིན་ཉམས་པ་དང་། བཅོམ་པ་དང་། ཕམ་པར་གྱུར་པའི་ལྟུང་བའི་རྡུལ་དང་དྲི་མ་ལས་འདས་པའི་ཚུལ་ཁྲིམས་སྟིང་འཐུང་དཀར་པོ་ལས་བྱུང་བའི་བསྔགས་འོས་ཀྱི་དྲི་བསུང་ཞིམ་པོས་ཕྱོགས་ཐམས་ཅད་དུ་ཁྱབ་པར་གྱུར་ཅིང་རྒྱལ་བ་དགྱེས་པའི་བརྟུལ་ཞུགས་མཆོག་ལ་རྟག་ཏུ་གནས་ཤིང་། རྗེ་ཉིད་ཀྱི་ཞལ་ནས་ཀྱང་ངོར་ནས་བསྙེན་རྫོགས་ཐོབ་ཕྱིན་ཆད་སྡོམ་པ་ལ་གནོང་འགྱོད་གཏན་ནས་མེད་ཅེས་གསུང་པའོ། །དད་དང་མོས་གུས་ཆུ་མཚོ་དྭངས་པ་ལ། །དྲང་སྲོང་ཐུབ་པའི་གཟུགས་བརྙན་འཆར་བ་ན། མོས་གུས་ཟླ་བ་གསར་པའི་བདུད་རྩི་ཡང་། །ལྷན་ཅིག་ཆུ་གཏེར་ཆེ་ལ་རོལ་པར་བྱེད། །མི་གཙང་འདམ་གྱི་དྲི་མས་མ་སྦགས་པར། །ཤིན་ཏུ་དངར་བའི་མ་ལ་ཡ་ཡི་དྲིས། །གང་གི་ལུས་ལ་རེག་པ་དེ་ཡི་མོད། བརྒྱ་བྱིན་ངུར་སྨྲིག་སྟོབས་ལ་རེངས་པར་ཆས། །དམར་སེར་མཚམས་སྤྲིན་གསར་པས་བཀླུབས་པ་དང་། །དབང་པོ་ཀུན་ཞི་དུལ་བར་གནས་པ་ཡི། །སྤྱོད་པ་ཁོ་ནས་དགྲ་བཅོམ་གནས་བརྟན་ཆེ། །མངོན་སུམ་སྣང་བས་ཐུབ་བསྟན་མཛེས་པར་བྱས། །ཞེས་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཐོས་པ་རྒྱ་མཚོའི་མཐར་སོན་པའི་ཚུལ་ནི། དེའང་སྐུ་ན་གཞོན་དུས་བྱང་ཕྱོགས་ཐུབ་པའི་རྒྱལ་ཚབ་ཡོངས་རྫོགས་བསྟན་པ་རྒྱ་མཚོའི་མངའ་བདག་འཇམ་དཔལ་དབྱངས་དངོས་མཁྱེན་བརྩེའི་དབང་པོ་མཇལ་བར་རྫོང་སར་བཀྲ་ཤིས་ལྷ་རྩེར་ཕེབས་ནས། རྗེ་འཇམ་པའི་དབྱངས་དེ་ཉིད་ཀྱིས་བསོད་ནམས་བརྒྱ་ལས་གྲུབ་པའི་ཕྱག་མཐོང་ན་མི་མཐུན་པ་མེད་པ་གླང་པོ་ཆེའི་སྣ་ལྟར་བརྐྱངས་ནས་རྗེ་འདིའི་དབུ་ལ་བཀོད་དེ་ཞལ་ནས་ཧྲཱིཿཥྚི་དང་། བཞད་པ་བརྒྱད་ཀྱི་སྔགས་གསུངས་ཤིང་ཐུགས་དགྱེས་པ་ཆེན་པོའི་མདངས་ཕྱུང་བ་དང་བཅས། འདི་ཉིད་ཀྱིས་བསྟན་པ་ལ་ཕན་པ་རྒྱ་ཆེན་འབྱུང་བར་འགྱུར་རོ་ཞེས་པའི་ལུང་བསྟན་སྩལ་བ་དང་། ཐང་རྒྱལ་ལུགས་ཀྱི་ཚེ་དབང་དང་། གང་བློ་མའི་རིག་གཏད་དང་ལུང་གསན་ཅིང་བྱིན་རླབས་བཀའ་བསྒོ་དང་སྨོན་ལམ་རྒྱས་པར་ཐོབ་པས་རྟེན་འབྲེལ་ཤིན་ཏུ་དགེ་བར་གྱུར། ལྔ་རིག་སྨྲ་བ་མཁས་དབང་འཇམ་དབྱངས་མཁྱེན་རབ་མཐའ་ཡས་ལས། སུམ་ཅུ་པ་དང་རྟགས་ཀྱི་འཇུག་པའི་གཞུང་གི་བཤད་པ་ཞིབ་མོ། བརྡ་དག་གསལ་བར་བྱེད་པའི་བསྟན་བཅོས་ངག་གི་སྒྲོན་མེ། ནག་རྩིས་དང་། སྐར་རྩིས་ཀྱི་དགུ་མཐའ། སྒྲ་ཀཱ་ལ་པའི་མཚམས་སྦྱོར་མིང་ལེ་བཅས་ཀྱི་རི་མོ། སྡོམ་གསུམ་འཇམ་དབྱངས་བླ་མའི་དགོངས་རྒྱན། ངོར་ཆེན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་ཚུལ་གསུམ་མཛེས་རྒྱན་དང་། ལྗོན་ཤིང་མཛེས་རྒྱན། དབུ་མ་འཇུག་པ། དབུ་མ་རྒྱན། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱུད་བླ་མ། བཤེས་པའི་སྤྲིང་ཡིག་སོགས་ཀྱི་བཤད་པ་ཞིབ་མོ་གནང་བ་རྣམས་ལ་གསན་སྦྱངས་ཀྱིས་བརྩོན་པ་ཆེར་བསྐྱེད་པས་སློབ་གཉེར་གྱི་གཞི་ཐིངས་པར་གྱུར། གངས་ཁྲོད་སྨྲ་བའི་སེངྒེ་མི་ཕམ་འཇམ་པའི་དབྱངས་ལས། མདོ་སྡུད་འགྲེལ་པ་ལུགས་གཉིས་ཀྱི་བཤད་ལུང་། འབྱེད་རྣམ་གཉིས་ཀྱི་བཤད་པ་རྣམས་གསན། སྔོ་གནའ་བླ་མ་དོན་རྒྱལ་ལས། དཀར་ནག་རྩིས་ཀྱི་ལག་ལེན། གོ་ལའི་རྣམ་བཞག །གསོ་དཔྱད་ཀྱི་སྐོར་ཕལ་ཆེར་དང་། འཚོ་བྱེད་མཁས་པའི་དབང་པོ་ཞྭ་ཆེན་བླ་སྨན་པ་དང་། བློ་གྲོས་ཕུན་ཚོགས་གཉིས་ལས། རྩ་མདོ་ཆུ་མདོ་དང་། ལྡུམ་བུ་ངོ་སྤྲད། སྨན་གྱི་བསྡུ་སྦྱོར་སོགས་གསན་ནས་ལག་ལེན་ཡང་མཛད། ཀུན་གཟིགས་མཁན་ཆེན་གཞན་ཕན་ཆོས་ཀྱི་སྣང་བ་ལས་སྤྱོད་འཇུག་དང་། རིགས་ཚོགས་ལྔ་དང་། དབུ་མ་འཇུག་པའི་བཤད་པ། རྟོགས་ལྡན་ལྷག་བསམ་ལས། སུམ་རྟགས་བཤད་པ་དང་། སྡེབ་སྦྱོར་རིན་འབྱུང་ཀཱ་ལ་པའི་རི་མོ་འགྲོ་ལུགས་རྣམས་དང་། མཁས་དབང་དབྱངས་ཅན་སྙེམས་པའི་ལང་ཚོ་ལས། དབྱངས་ཅན་སྒྲ་མདོ། སྙན་ངག་ལེ་བར། སྤྱོད་འཇུག་ཤེར་ལེ་བཅས་ཀྱི་གོ་ཁྲིད་གསན། དགུང་གྲངས་བཅུ་གསུམ་པར་སྡེ་སྣོད་འཛིན་པ་རྒྱ་མཚོའི་གཙུག་རྒྱན་ས་ཡི་སྟེང་ན་ཡོངས་སུ་གྲགས་པའི་མཁས་པ་ཆེན་པོ་ཀུན་བཟང་བསོད་ནམས་མདུན་ནས། རྡོ་རྗེ་འཆང་བློ་གཏེར་ཞབས་དང་ལྷན་ཅིག་རྒྱལ་བའི་བཀའ་འགྱུར་རིན་པོ་ཆེ་ཚང་མའི་བཀླག་ལུང་གསན་སྐབས་བཞུགས་ཚུགས་སོགས་ཤིན་ཏུ་ལེགས་པས་རྡོ་རྗེ་འཆང་དང་། བླ་མ་རིན་པོ་ཆེ་ཐུགས་ཤིན་ཏུ་དགྱེས། དེའི་ཉེ་གནས་མཁས་དབང་ཨ་དཔལ་ལས། ཚུལ་ཁྲིམས་རྣམ་དག་གི་མདོ་འགྲེལ་དང་། སྤྱོད་ཊཱིཀi། གང་བློའི་འགྲེལ་པ་སོགས་ཀྱི་བཤད་ལུང་རྣམས་གསན། མི་ཕམ་རིན་པོ་ཆེའི་ཉེ་གནས་བླ་མ་ཆོས་དབྱིངས་འོད་གསལ་ལས། ཚིག་བདུན་བླ་མའི་རྣལ་འབྱོར། ཚོགས་མཆོད། རྣམ་བཤད་པདྨ་དཀར་པོ། དབུ་མ་རྒྱན་གྱི་འགྲེལ་ཆེན། བསྟོད་ཚོགས་སྐོར་དང་། འཇམ་དབྱངས་མཆོད་ཆོག་སོགས་ཀྱི་ལུང་དང་། རིགས་བརྒྱའི་ཁྱབ་བདག་མཁན་ཆེན་རྡོ་རྗེ་འཆང་ངག་དབང་བློ་གྲོས་སྙིང་པོ་ངོར་གྱི་ཁྲི་ཐོག་མཛད་སྐབས་འདུལ་སྡོམ་སྔར་བཤད་པ་ལྟར་དང་། ལམ་འབྲས་ལུགས་ཀྱི་སེམས་བསྐྱེད། དཔལ་ཀྱེ་རྡོ་རྗེའི་རྒྱུ་ལམ་གྱི་དབང་དང་། ལམ་འབྲས་ཚོགས་བཤད་ཀྱི་བྱིན་རླབས་རྗེས་གནང་ཁྲིད། པོད་ལུང་རྣམས་བཅས་ཤིན་ཏུ་རྒྱས་པ་དང་། ཕན་ཁང་རིན་པོ་ཆེ་དཔལ་ལྡན་བློ་གྲོས་རྒྱལ་མཚན་ལས། དཔལ་རྡོ་རྗེ་འཇིགས་བྱེད་རྭ་ལུགས་ལྷ་བཅུ་གསུམ་མའི་དབང་ལུང་ཁྲིད་གསུམ། དྲི་མེད་རྣམ་གཉིས་ཀྱི་དབང་ལུང་བཅས་དང་། སྒྲུབ་ཐབས་རིན་པོ་ཆེ་ཀུན་ལས་བཏུས་པ་ཉིན་ལྔ་དྲུག་རྗེས་མ་ཟིན་པས་ཆད་པ་ལས་དེ་འཕྲོས་ཡོངས་རྫོགས་གསན། ཕན་བདེ་མཁན་ངག་དབང་ཀུན་དགའ་བསྟན་པའི་རྒྱལ་མཚན་ལས། ངོར་ལུགས་འཇིགས་བྱེད་ལྷ་དགུའི་དབང་ཁྲིད་ལུང་། རྒྱལ་བས་ལུང་བསྟན་བརྙེས་པ་འཛམ་གླིང་ཆོས་ཀྱི་འཁོར་ལོས་སྒྱུར་བ་འཇམ་མགོན་མ་ཧཱ་པཎྜི་ཏ་བློ་གྲོས་མཐའ་ཡས་པའི་ཞལ་སྔ་ནས་སྨིན་གླིང་ཐུགས་རྗེ་ཆེན་པོ་གར་དབང་བདེ་གཤེགས་ཀུན་འདུས་ཀྱི་དབང་ལུང་དང་། གསང་མཚན་པདྨ་བདེ་བ་རྩལ་འདོགས་པར་མཛད། འབྲུག་ལུགས་གྲུབ་བརྒྱའི་བྱིན་རླབས། བླ་མ་ནོར་ལྷའི་དབང་ལུང་ལྷ་མོ་དཔལ་གྱི་སྒོམ་ལུང་། འཇམ་དབྱངས་དང་། སྒྲོལ་དཀར་རྗེས་གནང་། གང་བློ་མའི་ལྗགས་བཤད་བཅས་གསན་པར་མཛད། ལྗགས་མི་བདེ་ཙམ་ཡོད་པ་འཇམ་མགོན་རིན་པོ་ཆེའི་གསང་ཆབ་བཞེས་པས་ལྗགས་ཇེ་བདེར་གྱུར་གསུང་། ཁྱད་པར་དུ་ཚེ་རབས་ཀྱི་ཕྲེང་བ་མང་པོ་ནས་འབྲེལ་བ་ཐོབ་པའི་རྩ་བའི་བླ་མ་ཐུབ་བསྟན་རྒྱ་མཚོ་གསལ་བའི་ཉི་མ། སྲས་བཅས་རྒྱལ་བའི་མཁྱེན་བརྩེ་ནུས་གསུམ་གཅིག་ཏུ་བསྡུས་པའི་རང་གཟུགས་རྒྱུད་སྡེ་རྒྱ་མཚོའི་གསང་མཛོད་འཛིན་ཅིང་བཀའ་ཡི་སྡུད་པོ་རྡོ་རྗེ་ཆོས་དང་རྣམ་དབྱེར་མེད་པ། ཐར་རྩེ་ཞབས་དྲུང་རྡོ་རྗེ་འཆང་འཇམ་དབྱངས་བློ་གཏེར་དབང་པོ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཞབས་པད་མཉེས་པ་གསུམ་གྱིས་བསྙེན་པ་ལས་སྒྲུབ་ཐབས་རིན་པོ་ཆེ་ཀུན་ལས་བཏུས་པའི་གཞུང་རྩ་བ་དང་། ཁ་སྐོང་བཅས་ཀྱི་དབང་རྗེས་གནང་། རིག་གཏད། སྒོམ་ལུང་། བྱིན་རླབས་བཅས་ཤིན་ཏུ་གྲངས་མང་བ་སོ་སོའི་སྒྲུབ་ཐབས་ལས་ཚོགས་མན་ངག་བཅས་པའི་ལུང་དང་ཁྲིད་བཅས་རྒྱས་པ་བུམ་པ་གང་བྱོའི་ཚུལ་དུ་སྩལ། རྒྱུད་སྡེ་རིན་པོ་ཆེ་ཀུན་ལས་བཏུས་པར་རྒྱུད་སྡེ་བཞི་དང་འབྲེལ་བའི་དབང་ཁྲིད། ལུང་བཅས་རྡོ་རྗེ་འཆང་དེ་ཉིད་ལས་བྱ་སྤྱོད་སྐོར་ཕལ་ཆེར་དང་། བདེ་མཆོག་སྐོར་ཡོངས་རྫོགས། དུས་འཁོར། ཀྱེ་རྡོར་སྐོར་སོགས་གསན་པ་དང་། རྗེ་དེ་ཉིད་ཀྱི་ཐུགས་སྲས་བེ་ཚང་ཆོས་རྗེ་མཁས་གྲུབ་རྒྱ་མཚོ་ལས་དབང་ཆེན་དཀའ་གྲས་རྗེ་གསང་བའི་བདག་པོའི་མདུན་ནས་གནང་མ་གྲུབ་པ་རྣམས་གསན་ཏེ་མདོར་ན་ཡབ་སྲས་གཉིས་ཀ་ལས་རྒྱུད་བཏུས་སྨིན་གྲོལ་ཡོངས་རྫོགས་ཀཿཐོག་སི་ཏུ་པཎ་ཆེན། མཁས་དབང་འཇམ་དབྱངས་མཁྱེན་རབ་སོགས་དང་ལྷན་ཅིག་གསན་པར་མཛད། རྗེ་བཙུན་ས་སྐྱ་པའི་གདམས་ངག་གི་ཉིང་ཁུ་ཆེ་བ་བཅུ་གཅིག་དང་ལྡན་པའི་གསུང་ངག་རིན་པོ་ཆེ་ཐུན་མོང་བ་རྣམས་ལས་ཁྱད་པར་དུ་གྱུར་པ། བརྒྱུད་པ་གསུམ་འདུས་ཁའུ་བྲག་རྫོང་པའི་ཁྱད་ཆོས་ལམ་འབྲས་བུ་དང་བཅས་པའི་སྨིན་གྲོལ་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ་གདམས་ངག་གི་སརྒ་མ་ལོག་པ། མོས་གུས་ཀྱི་བསམ་པ་ཚིམ་པར་ནུས་པ་སྟེ། ཚད་མ་སྙན་བརྒྱུད་བཞིའི་སྒོ་ནས་མན་ངག་སློབ་བཤད་ཟབ་མོའི་སྐོར་སྔོན་འགྲོ་སྣང་གསུམ་གྱི་སྐབས་འདི་པའི་ལུགས་ཀྱི་སེམས་བསྐྱེད། སློབ་མ་རྗེས་འཛིན་སྔོན་དུ་འགྲོ་བའི། རྒྱུ་ལམ་གྱི་དབང་། བདག་མེད་མའི་དབང་དང་བྱིན་རླབས། གཞན་ལམ་ཟབ་སོགས་བྱིན་རླབས་སྐོར་ཡོངས་རྫོགས། རྒྱུད་གསུམ་གྱི་ཁྲིད་ཀྱི་སྐབས་འཁོར་འདས་དབྱེར་མེད་ཀྱི་ལྟ་ཁྲིད་རིག་ཐོག་ནས་གདར་ཤ་ཆོད་ངེས་པ་སོགས་ཉམས་ཁྲིད་ཤིན་ཏུ་སྨིན་པ། རྒྱབ་རྟེན་བླ་མའི་རྣམ་ཐར་དང་། པོད་ལུང་ཡོངས་རྫོགས་རྗེ་རྡོ་རྗེ་འཆང་ཉིད་ཀྱིས་མཛད་པའི་འཆད་ཐབས་ལྟར་རྒྱས་པ་དང་། ཀྱེ་རྡོར་རྒྱུད་གསུམ་གྱི་བཤད་པ་སྒྲོ་འདོགས་ཆོད་པར་ཞིབ་རྒྱས་གསན། གཞན་ཡང་དཔལ་མ་ཧཱ་ཀཱ་ལ་གུར་གྱི་མགོན་པོའི་བཀའ་བབ་བཞིའི་དབང་། རྗེས་གནང་ཕྱི་ནང་གསང་ཁྲིད་བཅས་དང་། ནཱ་རོ་མཁའ་སྤྱོད་མའི་བྱིན་རླབས་ཁྲིད་བཅས། དབུ་མ་ལུགས་དང་། རྒྱ་ཆེན་སྤྱོད་བརྒྱུད་ཀྱི་སེམས་བསྐྱེད་སྡོམ་ཆོག །བློ་སྦྱོང་གི་ཁྲིད་ལེགས་བཤད་ཀུན་བཏུས། སྙན་བརྒྱུད་ཆེན་མོ་སོགས་བློ་སྦྱོང་སྐོར་མང་པོ་དང་། ས་སྐྱ་གོང་མ་རྣམ་ལྔའི་གསུང་འབུམ་ལུང་། རྗེ་ཉིད་ཀྱི་གསུང་རབ་རྣམས་ཀྱི་ལུང་སོགས་ཟབ་རྒྱས་ཆོས་ཚུལ་རྒྱ་མཚོ་གསན་པས་རིགས་བརྒྱའི་ཁྱབ་བདག་འགྲན་གྱི་དོ་མེད་སྐྱབས་གནས་གཅིག་ཆོག་ཏུ་བཟུང་བར་མཛད་དོ། །མང་དུ་ཐོས་པ་རྒྱ་མཚོའི་ཕ་རོལ་སོན་པ་ཐུབ་བསྟན་ལེགས་བཤད་བཟང་པོ་ལས། ཇོ་ནང་རྗེ་བཙུན་ཆེན་པོས་བཀའ་བསྡུ་གནང་བའི་སྒྲུབ་ཐབས་རིན་འབྱུང་དེའི་ཁ་སྐོང་བླ་མ་ཉིད་ཀྱིས་བསྒྲིགས་པའི་རྗེས་གནང་ལུང་བཅས། ཁང་སར་ཞབས་དྲུང་རིན་པོ་ཆེ་བཀྲ་ཤིས་རྒྱ་མཚོའི་མདུན་ནས་ཆག་མེད་རྣམ་བཞིའི་དབང་། བྱིན་རླབས། དམར་པོ་སྐོར་གསུམ་གྱི་པོད་ལུང་བཀའ་གདམས་གླེགས་བམ་རིན་པོ་ཆེའི་ལུང་སོགས་མང་དུ་གསན། མཁན་ཆེན་བཀྲ་ཤིས་འོད་ཟེར་ལས་ཀར་ལུགས་ཕྱོགས་ཀྱི་བདེ་མཆོག་དབང་རྗེས་གནང་། ཕྱག་ཆེན་ཁྲིད་སོགས་མང་པོ་གསན་པར་མཛད། ཤར་ཆེན་འཇམ་དབྱངས་ཆོས་ཀྱི་ཉི་མ་ལས་ཚེ་དཔག་ལྷ་དགུའི་དབང་། རྫོགས་སྤྲུལ་ལྔ་པ་ལས། དཀོན་སྤྱིའི་ཚེ་དབང་དང་། ཉི་གྲགས་ཐུགས་ཆེན་དང་། བདུད་རྩི་སྨན་གྱི་སྒྲུབ་དབང་། དགེ་མང་སྐུ་ཞབས་ལས། གཞན་ཕན་མཐའ་ཡས་གྱི་ཞལ་གདམས་གསུང་མགུར་སོགས་ཀྱི་ལུང་། སེམས་ཁྲིད་རྣམས་གསན། ཀཿཐོག་སི་ཏུ་རིན་པོ་ཆེ་ལས་མཁྱེན་བརྩེའི་དབང་པོའི་དགོངས་གཏེར་རྩ་གསུམ་འོད་གསལ་སྙིང་ཐིག །འཁོན་ལུགས་རྡོ་རྗེ་ཕུར་པ་ཇོ་ནང་ནས་བརྒྱུད་པའི་སྨིན་གྲོལ། སྔ་འགྱུར་བཀའ་མིའི་སྒྱུ་འཕྲུལ་ཞི་ཁྲོ། ཐུགས་སྒྲུབ་བར་ཆད་ཀུན་སེལ་སོགས་ཆོས་བཀའ་རྒྱ་ཆེ་ཙམ་གསན། ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ་ལས། ཕུར་པ་ཡང་གསང་སྤུ་གྲིའི་དབང་ལུང་། རྒྱལ་ཐང་པའི་གཅོད་དབང་ཁྲིད། པོད་ལུང། ཀར་གླིང་ཞི་ཁྲོ་འགྲོ་དྲུག་རང་གྲོལ་གྱི་དབང་། བར་དོ་དྲུག་ཁྲིད། རྗེ་མཁྱེན་བརྩེའི་སྙན་བརྒྱུད་ཡང་དག་ཕུར་པ། གྲུབ་ཐོབ་ཐུགས་ཐིག་ཡང་ཕུར་སྦྲགས་མ་རྣམས་ཀྱི་དབང་། རྗེ་ཉིད་མཛད་རང་བྱུང་རྡོ་རྗེའི་བླ་སྒྲུབ་ལུང་དང་ཁྲིད་བཅས་གསན། ཀུན་གཟིགས་བླ་མ་རིན་པོ་ཆེ་ངག་དབང་ལེགས་པ་ལས། ས་འཇམ་སྦག་སྒྲུབ་ཀྱི་བྱིན་རླབས། ཚ་ཆུ་བླ་མ་རིན་པོ་ཆེ་ཤྲཱི་མ་ཧཱ་ཀཱ་ལ་དང་། འཕགས་མ་སྒྲོལ་མས་རྗེས་སུ་བཟུང་བ། འཇམ་དབྱངས་བསྟན་འཕེལ་ལས། མཁའ་སྤྱོད་མའི་བྱིན་རླབས། ཡེ་ན་བླ་མ་སངས་རྒྱས་བསྟན་འཛིན་ལས། སྒྲུབ་ཐབས་ཀུན་བཏུས་པོད་དགུའི་ལུང་དང་། དཀོན་མཆོག་ལྷུན་གྲུབ་དང་། ཞུ་ཆེན་མ་ཧཱ་པཎྜི་ཏ་རྣམས་ཀྱི་བཀའ་འབུམ་ལུང་མང་པོ། བླ་མ་དཀོན་མཆོག་རྒྱལ་མཚན་ལས་ངོར་ཆེན་བཀའ་འབུམ། རྒྱུད་སྡེ་ཀུན་བཏུས་ཀྱི་ལུང་ཡོངས་རྫོགས། བླ་མ་དོན་རྒྱལ་ལས། མགོན་པོའི་རྗེས་གནང་། མཁའ་སྤྱོད་བྱིན་རླབས་སོགས་དབང་བཀའ་མང་བ་དང་། ཤར་བླ་མ་ངག་དབང་བློ་གྲོས་ལས། གུར་མགོན་གྱི་གཞུང་པོད་ཡོངས་རྫོགས་དང་། ཞལ་པོད་གཉིས་དང་། ལས་གཤིན་དང་། བེག་རྩེའི་པོད་བཅས་ཀྱི་ལུང་། མཐུ་སྟོབས་ཀྱི་དབང་ཕྱུག་དཔལ་ལྡན་འཇམ་དབྱངས་ལས། དཔལ་མགོན་ཞལ་གྱི་རྗེས་གནང་ཡོངས་རྫོགས། ཁྲིད་པོད་ལུང་། ངོར་ལུགས་རྭ་པོད་ཀྱི་ལུང་། བླ་མ་ངག་དབང་བསྟན་པ་ལས། དཔལ་བདེ་མཆོག་མཁའ་འགྲོ་རྒྱ་མཚོའི་དབང་ཆེན་དང་། མཁའ་སྤྱོད་བེ་བུམ་གྱི་ལུང་། རྗེ་དབོན་གཞན་ཕན་ཀུན་དགའ་ལས། ཆོས་སྤྱོད་པོད་ཆུང་སོགས་ཅི་རིགས་གསན་པ་དང་། འབྲུ་འཇམ་དབྱངས་གྲགས་པ་ལས། ཇོ་ལུགས་དུས་འཁོར་གྱི་ཁྲིད་ལུང་དང་། མི་ཕམ་རིན་པོ་ཆེའི་འགྲེལ་ཆེན་བཤད་ལུང་། ལམ་རིམ་ཡེ་ཤེས་སྙིང་པོའི་ལུང་སོགས་དང་། རྫོགས་ཆེན་མཁན་བློ་གསལ་ལས་དཔལ་སྤྲུལ་བཀའ་འབུམ་ལུང་། མཁས་བཙུན་བླ་མ་འཇམ་དབྱངས་རྒྱལ་མཚན་ལས་དབུ་མ་བཞི་བརྒྱ་པ། རྒྱུད་སྡེ་སྤྱིའི་རྣམ་བཞག །མངོན་རྟོགས་རྗོན་ཤིང་ཆེན་མོ་སོགས་གསན། གཏེར་སྟོན་དྲི་མེད་འོད་ཟེར་ལས། རང་གཏེར་མཁན་ཆེན་ཞི་འཚོའི་བྱིན་རླབས། དུས་ཆེན་སྟོན་པའི་མཆོད་ཐབས་ཀྱི་ལུང་སོགས། ཀཿཐོག་རྨོག་སྤྲུལ་ལས། རང་གཏེར་ཕག་དཀར་དབང་ཁྲིད་སོགས་མདོར་ན་རྗེ་བླ་མ་འདི་ཆོས་ཚོལ་བ་ལ་ཤིན་ཏུ་བརྩོན་པས་གང་ཟག་མཆོག་དམན་ལ་མ་ལྟོས་པར་བརྒྱུད་པ་ལ་ངེས་འདྲོངས་ཡོད་ན་གུས་པས་བཏུད་དེ་གསན་པར་མཛད་ཅིང་། ཤིན་ཏུ་དམན་པ་བདག་ལྟ་བུ་ལས་ཀྱང་། མཁའ་འགྲོ་གསང་འདུས་ཀྱི་དབང་ཁྲིད་ལུང་། གྲུབ་ཐོབ་ཐུགས་ཏིག་གི་རྩ་དབང་། ཐུགས་སྒྲུབ་རྣམ་གཉིས་སོགས་མང་དུ་བཞེས་པར་མཛད་པས་མཚོན་གསར་རྙིང་རིས་མེད་ཀྱི་དབང་ཁྲིད་གདམས་པ་ལུང་གི་རྣམ་གྲངས་སོགས་ཆེས་མང་བ་གསན་ཀྱང་ཆེ་ལོང་ཙམ་ལས་ཞིབ་ཏུ་འགོད་པར་མ་ནུས་ལ། མདོར་ན། ཕྱི་སོ་ཐར། ནང་བྱང་སེམས། གསང་བ་སྔགས་ཀྱི་ཐེག་པ་ལ་རྒྱུད་སྡེ་རིན་པོ་ཆེ་རྣམ་པ་བཞི་དང་རྗེས་སུ་འབྲེལ་བ་གངས་རིའི་ཁྲོད་འདིར་རྒྱུན་བཞུགས་པ་ཕལ་མོ་ཆེ་ལ་ཐུགས་གཉེར་གནང་བས་མང་དུ་ཐོས་པའི་ཆུ་གཏེར་ཆེན་པོར་གནས་བཅས་པ་ཡིན་ནོ། །ཤེས་བྱ་མུ་མེད་བརྗོད་པའི་ཡུལ་ལས་འདས། །ཐམས་ཅད་མཁྱེན་པའི་སྤྱོད་ཡུལ་ཁོ་ན་ལས། །བློ་གྲོས་ཁང་བུར་དཀྲིགས་པ་མིན་ན་ཡང་། །རྣམ་པ་ཀུན་མཁྱེན་བྱེད་པའི་ཉེ་རྒྱུ་མཆོག །ཕྱི་ནང་ཤེས་བྱར་སློབ་ལ་རྟག་ཏུ་བརྩོན། བསླབ་པར་མ་བྱས་ཀུན་མཁྱེན་འགྱུར་བ་ནི། །སྲིད་པའི་ཁོངས་འདིར་མཁའ་ཡི་པདྨོ་མཚུངས། །རྒྱུ་འབྲས་མི་བསླུ་ཚད་མར་རྒྱལ་བས་གསུངས། །དེས་ན་དམ་པ་རྣམས་ཀྱིས་བརྩོན་བྱ་ནི། །མཐའ་ཀླས་ཆོས་ཚུལ་རྒྱ་མཚོར་འཇུག་འདི་ལགས། དེ་ཕྱིར་དམ་པ་རྒྱུ་སྐར་མགོན་འདིས་ཀྱང་། །བློ་གྲོས་གཏེར་ཆེན་འཕེལ་བའི་ཐབས་མཆོག་བསྐྲུན། །ཞེས་ཀྱང་སྨྲས་སོ། །གསུམ་པ་བསམ་བྱུང་རིག་པས་སྒྲོ་འདོགས་ཇི་ལྟར་བཅད་པའི་ཚུལ་ནི། དེ་ལྟར་སྨོས་མ་ཐག་པའི་ཡོངས་འཛིན་བཤེས་གཉེན་དམ་པ་རྣམས་ལས་གསན་པ་དེ་དག་ཀྱང་ཐོས་པ་ཙམ་གྱིས་ཆོག་པར་འཛིན་པ་དང་། བུན་ཡིག་ལྟ་བུའི་ཐོབ་ཚོགས་ཀྱི་པོད་ཁ་མཐོ་བ་ལ་གཟིགས་པ་མིན་པར་ཇི་ལྟར་ཐོས་པའི་རྣམ་གྲངས་དེ་དག་གི་དོན་དང་ཚིག་གི་ཆ་ལ་བསམ་བྱུང་གི་ཤེས་རབ་ཀྱི་ཉི་མ་སྟོང་ཕྲག་འབར་བས་མ་རྟོགས་ལོག་རྟོག་ཕྱོགས་རྟོགས་དང་། ཡང་དག་པར་མ་རྟོགས་པའི་མི་ཤེས་པའི་མུན་པ་དྲུང་ནས་ཕྱུང་སྟེ། ཕྱི་ནང་རིག་གནས་དང་བཅས་པའི་པད་ཚལ་གྱི་ཁ་ཡོངས་སུ་འབྱེད་པས་མདོ་སྔགས་གཞུང་ལུགས་ཀུན་གྱི་རང་དང་སྤྱིའི་མཚན་ཉིད་ཀྱི་དོན། མངོན་སུམ་དང་། ལྐོག་གྱུར། ཤིན་ཏུ་ལྐོག་གྱུར་གྱི་གཞལ་བྱའི་ཡུལ་ལ། འཇལ་བྱེད་མངོན་སུམ་དང་། རིགས་པ་ཚད་མ་དང་། ལུང་རྣམ་དག་གི་ཚད་མ་གསུམ་གྱིས་འཇལ་བས་འགལ་འབྲེལ་གཅོད་པ་ལ་བློ་གྲོས་ཀྱི་སྒོ་བརྒྱ་དབང་མེད་དུ་འབྱེད་པའི་སྤོབས་པ་མི་ཟད་པའི་གཏེར་ཆེན་བརྡོལ་བ་ནི་དཔྱོད་ལྡན་རྣམས་ཀྱིས་ཉེ་བར་བརྟགས་ན་གསུང་གི་སྣང་བ་དང་། ལེགས་བཤད་ཀྱི་ཚོགས་རྣམས་ལས་ཤེས་པར་འགྱུར་ཞིང་། དེའང་ཚིག་གི་ལྦུ་བ་དང་གཞན་ཟེར་ཅལ་སྒྲོགས་ཀྱི་རྗེས་རྒྱུག་ཙམ་མིན་པར་རང་ལུགས་ས་སྐྱའི་རྗེ་བཙུན་གོང་མ་འཇམ་པའི་དབྱངས་དང་ཞལ་མི་གཉིས་པ་རྣམས་ཀྱི་གསུང་རབ་དྲི་མ་མེད་པའི་དགོངས་དོན་ཇི་ལྟར་གནས་པ་ལ་གཞན་གྱིས་འཕྲོག་ཏུ་མེད་པའི་ངེས་ཤེས་ཐེ་ཚོམ་དང་བྲལ་བ་ཡང་དག་པར་བརྙེས་པའོ། །འདབ་སྟོང་བཞད་པའི་ལྷ་ཡི་སྐྱེད་ཚལ་དུ། །སྐལ་བཟང་བུང་བ་གཞོན་ནུ་རོལ་པ་ལས། །ངེས་དོན་སྦྲང་རྩིའི་བཅུད་ཀྱིས་མྱོས་པ་ན། །ལེགས་བཤད་དབྱངས་སུ་སྒྲོགས་ལ་འགོག་པ་མེད། །ལོག་རྟོག་དུག་ཆུའི་བསམ་པས་རྙོགས་པ་རྣམས། །མཁྱེན་དཔྱོད་ཀེ་ཏ་ཀ་ཡིས་བགྲུངས་པ་ན། །ཐོས་བསམ་མཆོད་ཡོན་གཙང་མའི་ལྦུ་ཕྲེང་གཡོ། །སྲས་བཅས་རྒྱལ་རྣམས་དགྱེས་ཕྱིར་གུས་པས་འབུལ། །དཀར་འཇམ་ཤོག་བུའི་ངོགས་སུ་འཆར་བ་རྣམས། །མཁྱེན་རབ་མེ་ལོང་གཙང་མའི་དབྱིངས་སུ་སྡུད། །བསྙེལ་བ་མེད་ཅིང་མ་འདྲེས་ས་ལེར་བཀྲ། །གང་དེ་རྗེ་བཙུན་བརྟན་པའི་འཁོར་ལོ་དངོས། །ཞེས་བར་སྐབས་ཀྱི་ཚིགས་སུ་བཅད་པའོ། །བཞི་པ་མཐར་ཐུག་བསྒོམས་པས་ཡེ་ཤེས་བརྙེས་པའི་ཚུལ་ལ། བསྒོམ་པ་ཇི་ལྟར་མཛད་ཚུལ་དང་། དེ་ལས་བརྩམ་སྟེ་ཐུན་མོང་ནང་གི་རྣམ་ཐར་དང་། ཐུན་མིན་གསང་བའི་རྣམ་ཐར་འཆད་པ་དང་གསུམ། དང་པོ་ནི། དེའང་མཆོག་ཏུ་མི་འགྱུར་བ་རྡོ་རྗེ་སེམས་དཔའ་ཁ་སྦྱོར་ཡན་ལག་བདུན་ལྡན་གྱི་དངོས་གྲུབ་ནི་ལམ་བསྒོམས་པས་སྤང་བྱ་སྤངས་རིམ་དང་། རྟོགས་བྱ་རྟོགས་རིམ་ལས་ཐོབ་པ་ཡིན་ལ་རྟོགས་པ་དེ་མེད་ན་མི་འབྱུང་བའི་ཐབས་ཀྱིས་མཐར་ཐུག་རྩེ་གཅིག་སྒྲུབ་པ་ཁོ་ན་ལ་གཞོལ་དགོས། དེའང་ངེས་འབྱུང་། བྱང་སེམས། སྤྲོས་བྲལ་གྱི་ལྟ་བ་རྣམས་གཅིག་གྲོགས་གཅིག་གིས་བྱས་ཤིང་། སྣོད་བཅུད་ལྷར་ཤར་བའི་བསྐྱེད་རིམ་དང་། རྡོ་རྗེའི་ལུས་ཀྱི་ཕུང་ཁམས་སྐྱེ་མཆེད་རྟེན་དང་བརྟེན་པ་ལ་གནད་དུ་བསྣུན་པའི་རྫོགས་རིམ་ཐུན་མོང་དང་ཐུན་མིན་ཏེ། རྡོ་རྗེ་ཐེག་པའི་ལམ་ཟབ་མོ་དག་ལ་རྩེ་གཅིག་ཏུ་གཞོལ་བས་མཆོག་དངོས་རྙེད་པར་འགྱུར་ལ། དེ་རྙེད་པས་ཐུན་མོང་གི་དངོས་གྲུབ་ཞར་ལ་འབྱུང་བ་ཡིན་པར་དགོངས་ཏེ་ངོར་ནས་ཕྱིར་ཕེབས་པ་ན། དཔལ་ཕྱག་ན་རྡོ་རྗེ་འབྱུང་པོ་འདུལ་བྱེད། བཅོམ་ལྡན་འདས་དཔལ་དགྱེས་པ་རྡོ་རྗེའི་གཞིའི་བསྙེན་ཆེན། ངན་སོང་ཐམས་ཅད་ཡོངས་སུ་སྦྱོང་བ་བཅོམ་ལྡན་འདས་ཀུན་ཏུ་རིག་པའི་བསྙེན་ཆེན་རྣམས་བརྒྱུད་པའི་ཕྱག་བཞེས་བཞིན་ཚད་ལྡན་བཅུ་ཆའི་སྦྱིན་སྲེག་བཅས་མཐར་ཕྱིན་པ་མཛད། དེ་ལས་ཀྱང་རི་ཁྲོད་དབེན་པར་བསྟེན་ན་འདོད་ཡོན་གྱི་གཡེང་བ་ཆུང་ཞིང་། སེམས་འདུལ་བ་ལ་གནས་དབེན་པ་ཉིད་རྒྱལ་བས་བསྔགས་པ་དང་། སེམས་འདུལ་བ་ནི་ཆོས་ཀྱི་སྙིང་པོ་སྟེ། འཕགས་པ་ཀླུས། ཉིད་ཀྱིས་ཐུགས་དུལ་མཛོད་ཅིག་བཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །ཞེས་པ་ལྟར། དེ་བཞིན་གཤེགས་པས་ཆོས་བསྟན་པ་ཐམས་ཅད་གདུལ་བྱའི་སེམས་ཀྱི་ཐ་བ་འདུལ་བའི་ཐབས་ཟབ་མོ་ཁོ་ན་སྟེ། ཐོས་པས་ནི་སྒོ་གསུམ་ཞི་དུལ། བསམ་པས་ནི་ཉོན་མོངས་མགོ་གནོན། བསྒོམ་པས་ནི་ཉོན་མོངས་པ་དྲུང་ནས་འབྱིན་པར་བྱེད་ལ། ཐོས་བསམ་བྱས་ཀྱང་བསྒོམ་པ་མ་བྱས་ན་འཆི་ཁ་ཐ་མལ་དུ་ལུས་ནས་ཉམས་ཉེས་སུ་འགྱུར་བ་ཡིན་ཏེ། ཕལ་པོ་ཆེ་ལས། ཇི་ལྟར་མཉན་པ་མཁས་པ་ཞིག །སྐྱེ་བོ་མང་པོ་སྒྲོལ་བྱེད་ཀྱང་། །རང་ཉིད་ཀྱིས་ནི་མ་ཐོས་ལྟར། །མ་བསྒོམ་ཆོས་ཀྱང་དེ་དང་འདྲ། །ཇི་ལྟར་འོན་པ་རོལ་མོ་མཁན། །སྐྱེ་བོ་མང་པོ་མགུ་བྱེད་ཀྱང་། །རང་ཉིད་ཀྱིས་ནི་མ་ཐོས་ལྟར། །མ་བསྒོམ་ཆོས་ཀྱང་དེ་དང་འདྲ། །ཇི་ལྟར་སྐྱེ་བོ་སྐོམ་པ་དག །ཆུ་ནི་མཐོང་དང་ཐོས་པ་ཡིས། །སྐོམ་པའི་སྡུག་བསྔལ་མི་སེལ་ལྟར། །མ་བསྒོམ་ཆོས་ཀྱང་དེ་དང་འདྲ། །ཞེས་གསུངས་པ་ལྟར། རྩ་བའི་བླ་མ་རྣམས་ལས་ཇི་ལྟར་ཐོས་ཤིང་དབང་དུས་སུ་གཙོ་བོས་ཇི་ལྟར་གདམས་པ་ཁས་བླང་གི་གནས་ལས་མི་འདའ་བ་དང་། བྱས་ཤེས་ཀྱི་བཀའ་དྲིན་རྗེས་སུ་གསོབ་པའི་ཆེད་དུ་རྡོ་རྗེའི་གནས་ཡུལ་ཆེན་པོ་ཨ་ལོ་བཀྲ་ཤིས་གནས་སུ་ཕེབས་ནས་ཟབ་པའི་མཐར་ཐུག་དཔལ་ཀྱེ་རྡོ་རྗེའི་སྔོན་འགྲོ་རེ་རེ་བཞིན་བསགས་སྦྱོང་སོ་སོར་འབུམ་ཕྲག་ཐོན་པ་དང་། སླར་ཡང་ཡི་དམ་དེ་ཉིད་ཀྱི་ཐུགས་དམ་ཟབ་མོར་བཞུགས་ནས་སྦྱོང་གཞི་སྦྱོང་བྱེད་གནད་དུ་བསྣུན་པ་དང་། གཙོ་བོར་ལམ་ཟབ་བླ་མའི་རྣལ་འབྱོར་དང་། འཁོར་འདས་དབྱེར་མེད་ཀྱི་ལྟ་བ་ལ་མྱོང་བ་ཐོན་པར་བསྒོམས་པས་སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ལས་བྱུང་ཞིང་། དེའང་སྟོང་ཉིད་བརྗོད་པ་ཐམས་ཅད་དང་བྲལ་བའི་ངང་དུ་ཆོས་ཐམས་ཅད་རོ་མཉམ་ཞིང་དེ་ལས་འདའ་བ་མེད་པའི་གནས་ལུགས་ཟབ་མོ་ཇི་ལྟ་བ་བཞིན་བླ་མ་དང་ལྷག་པའི་ལྷའི་བྱིན་རླབས་ཀྱིས་རྟོགས་པར་གྱུར་ནས། བཀའ་ལས་ཀྱང་དེ་ཕྱིན་གནས་ལུགས་ཀྱི་ངོ་བོ་ལ་ཡིན་མིན་གྱི་ཐེ་ཚོམ་ཙམ་ཡང་མི་འདུག་རྟོགས་པའི་ངོ་བོ་ལ་འཕོ་འགྱུར་མེད་ཅེས་གསུངས་སོ། །གཞན་ཡང་སྔ་རྗེས་རྣམས་སུ་རིགས་གསུམ་སྤྱི། རྣམ་སྣང་མངོན་བྱང་། རྡོར་དབྱིངས། གསང་བདེ། རྣལ་འབྱོར་མ། ཁྱད་པར་རྡོ་རྗེ་འཇིགས་བྱེད་ངོར་ཚར་གཉིས་ཀྱི་བཀའ་སྲོལ་སོ་སོར་བསྙེན་ཆེན་རྒྱས་པར་གནང་སྟེ་རྒྱུན་དུ་ཐུགས་དམ་གྱི་སྙིང་པོར་མཛད། ལྷ་འདི་དང་མགོན་པོ་གཉིས་ལས་མཐུ་སྟོབས་ནུས་པའི་དབང་ཕྱུག་ཏུ་གྱུར། དཔལ་དུས་ཀྱི་འཁོར་ལོ། རྡོ་རྗེ་ཕུར་པ་སོགས་རྒྱུད་སྡེ་མང་པོའི་བསྙེན་པ་དང་། མི་འཁྲུགས། ཚེ་དཔག་ལྷ་དགུ། སྒྲོལ་མ་དཀར་དམར། རྣམ་རྒྱལ་འཇོམས། རྟ་མགྲིན། འཇམ་དཀར། དབྱངས་ཅན་མ། རིགས་བྱེད་ལྷ་མོ། ཐང་ལུགས་ཚེ་སྒྲུབ། གྲུབ་རྒྱལ་ཚེ་སྒྲུབ་སོགས་ལྷག་པའི་ལྷ་ཡི་བསྙེན་པ་མང་པོ། མགོན་པོ་ཆེ་ཆུང་། རྙིང་ལུགས་འཇའ་ཚོན་ཟབ་གཏེར་དཀོན་མཆོག་སྤྱི་འདུས་ཀྱི་བསྙེན་སྒྲུབ་ལས་གསུམ་ཚད་ལྡན། མཁྱེན་བརྩེའི་ཟབ་གཏེར་འཆི་མེད་འཕགས་མའི་སྙིང་ཏིག་གི་བསྙེན་སྒྲུབ་གནང་བས་མཚོན། རྗེ་ཉིད་ཀྱིས་གསུང་ལས། ཡི་དམ་གྱི་ལྷ་གཅིག་འགྲུབ་ན་གཞན་ཀུན་འགྲུབ་པ་ཡིན་ཀྱང་བླ་མ་ལས་དབང་ཐོབ་པའི་དོན་གོ་རེད་པས་གསར་རྙིང་གི་ལྷག་པའི་ལྷ་མང་པོར་བསྙེན་ཚད་རེ་མ་འཇོག་པ་མེད་གསུང་། དུས་རྒྱུན་དུའང་ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བའི་ངང་། ལམ་ཟབ་ཕྱི་ནང་། རྣལ་འབྱོར་དབང་ཕྱུག་གི་སྲུང་བ་ཐུན་མོང་དང་ཐུན་མིན། དཔལ་ཀྱེ་རྡོ་རྗེའི་མངོན་རྟོགས་ལམ་དུས་ཀྱི་དབང་རྒྱས་པ་བླང་བ་དང་། འཁོར་ལོ་བཞི་ལ་བརྟེན་པའི་རྫོགས་རིམ་རྒྱུན་རིང་པོར་མཛད་ནས་བཟླས་པ་བརྒྱ་རྩ་རེ་ཉུང་མཐའ་བྱས་པ་དང་། རྣལ་འབྱོར་མའི་བཟླས་སྒོམ་བཅས་ཐུགས་དལ་དུས་ཐུན་གསུམ། ཐུགས་བྲེལ་ཆེ་དུས་ཐུན་གཉིས་རེ་དང་། ལམ་དུས་ཐུན་གཅིག་ལ་བསྡུས་པ་མཛད། དཔལ་རྡོ་རྗེ་འཇིགས་བྱེད། མགོན་པོ་ཆེ་བ་རྣམས་ཆག་མེད་དང་། ཡི་དམ་ཆོས་སྐྱོང་ལ་གཏོར་བསྔོ་ཤིན་ཏུ་རྒྱས་པ་ཁོམ་ལྕོགས་མེད་དུས་ངོར་ལུགས་དང་། ཕལ་ཆེར་ཚར་ལུགས་ལྟར་གསུང་། དུས་བཞི་ལ་བསྐང་བ་ཤིན་ཏུ་རྒྱས་པ་དང་། དཀར་ཆ་བཞི། གཏོར་མ་བརྒྱ་རྩ་སོགས་ཤིན་ཏུ་རྒྱས་པ། མེ་གསུར། བསྔོ་སྨོན་སོགས་ཆག་མེད་མཛད་པ་སྟེ་འདི་རིགས་ཕྱོགས་ཙམ་ལས་ཕྱག་ཐོ་སོགས་ཞིབ་ཆ་མེད་པས་ཇི་བཞིན་སྨྲ་བ་མ་སྤོབས་ཀྱང་མདོར་ན་སྒོ་གསུམ་ཐ་མལ་དུ་སྐད་ཅིག་ཙམ་ཡང་མི་བཞུགས་པར་དབང་བསྐུར་ཆོས་འཆད། བསྟན་བཅོས་བརྩམ་པ། དེ་མིན་ཐུགས་དམ་ཁོ་ནར་བཞུགས་པས་དེ་ལས་ཐོབ་པའི་ནང་གི་ཡོན་ཏན་དཀར་པོའི་ཕྱོགས་ཀྱི་ཟླ་བ་བཞིན་འཕེལ་བ་ལས་གྲུབ་གཉིས་ཀྱི་བདུད་རྩིའི་གཏེར་གྱིས་གཏམས་པ་ཡིན་ནོ། །ཨ་ཧོ། ཏིང་འཛིན་སྒེག་མོའི་འགྲམ་ཆང་གིས་མྱོས་པས། །སྒོ་གསུམ་ཐ་མལ་འཁྲུལ་པ་དབྱིངས་སུ་ཐིམ། །ཡེ་ཤེས་རྡོ་རྗེ་འབར་བའི་མེ་འོད་ཀྱིས། །བདག་རྟོག་བག་ཆགས་རྩྭ་སྦུར་བཞིན་དུ་བསྲེགས། །རྡོ་རྗེ་གསུམ་གྱི་དཔྱིད་ཀྱི་ཐིག་ལེ་ཆེ། །རྣལ་འབྱོར་ནང་གི་ཉི་མས་དྲོས་པ་ལས། །རྒྱུ་དང་མི་རྒྱུ་དྷཱུ་ཏིའི་དབྱིངས་སུ་འཆིང་། །ཧེ་རུ་ཀ་དཔལ་བཅོམ་ལྡན་གྲུབ་པའི་གཙོ། །ཁ་ཅིག་འདོད་ལྡན་རྨོངས་པ་བསྒོམ་བྱས་པས། །སེམས་རྟོག་བག་རེར་འགགས་པས་ཁེངས་བྱེད་ཀྱང་། །རྐྱེན་དང་འཕྲད་ཚེ་རང་མཚང་གསལ་སྟོན་པ། །དེ་ཀོ་རྣམས་ལས་ཆེས་ཆེར་མཆོག་ཏུ་འཕགས། །དཔལ་ལྡན་བླ་མ་རྣལ་འབྱོར་དབང་ཕྱུག་ནི། །ཕྱི་རུ་ཉན་ཐོས་སྤྱོད་པ་བསྐྱངས་བྱས་ཤིང་། །ནང་དུ་འདུས་པའི་དོན་ལ་རབ་དགའ་བས། །འདུས་པ་གསུམ་གྱི་འཕྲང་ལས་བརྒལ་བར་བྱས། །སྒྲོ་འདོགས་ཆོད་པའི་ལྟ་བ་སྤྲོས་བྲལ་དང་། །ཏིང་འཛིན་སྐྱོན་མེད་སྒོམ་པ་རྒྱུན་ཆད་མེད། །སྤྱོད་པའི་རྒྱལ་པོ་འཆིང་ཞེན་མེད་པ་ཡིས། །འབྲས་བུ་ཧེ་རུ་ཀ་དཔལ་གོ་འཕང་བརྙེས། །ཞེས་ཀྱང་ཆེད་དུ་བརྗོད་དོ། །གཉིས་པ་བསྒོམས་པ་ལས་དངོས་གྲུབ་བརྙེས་པའི་ཚུལ་ལས་བརྩམས་ཏེ་ཐུན་མོང་གི་རྟགས་མཚན་དང་འབྲེལ་བའི་ནང་གི་རྣམ་ཐར་ནི། ངོར་དུ་རྒྱུ་དབང་གསན་སྐབས་དབང་གི་ཡེ་ཤེས་ཀྱི་བྱིན་རླབས་མཆོག་ཏུ་འབར་བས་བདེ་སྟོང་གི་ཉམས་སྐྱེས། དེས་མཚོན་ལམ་འབྲས་ཀྱི་དབང་བྱིན་རླབས་ཐམས་ཅད་ལ་བྱིན་རླབས་ཀྱི་བབ་རེ་བྱུང་གསུང་། ངོར་ཆེན་རྡོ་རྗེ་འཆང་གི་འདྲ་ཞལ་མདུན་གསོལ་བཏབ་མཛད་པས་ཚེ་རབས་ཐམས་ཅད་དུ་ཐུགས་རྗེས་འཛིན་པའི་མཚན་མ་རྙེད། རྨི་ལམ་དུའང་རྗེ་བཙུན་ངོར་པ་ཆེན་པོས་བྱིན་རླབས་ཀྱི་མཚན་མ་ཅི་རིགས་ཐོབ། དབང་ཁང་སྦུག་གི་མགོན་པོ་རླུང་ཞོན་མ་ཡེ་ཤེས་པ་དངོས་སུ་མཐོང་། ངོར་གྱི་གླིང་གསེབ་ཅིག་ལ་མི་རྒན་སྨ་ར་སེ་ཁྱུག་གེ་བ་ཞིག་འགྲོ་བ་མཐོང་བས་རྗེས་སོར་དཔྱད་པས་གནས་སྲུང་ཞལ་བཞི་པ་ཡིན་འདྲ་གསུང་། ས་སྐྱར་རྗེ་བཙུན་མ་རྟ་མགྲིན་དབང་མོ་མཇལ་ཚེ་ཞལ་རས་བྱེ་རུ་ལྟར་དམར་བ་ལ་སྤྱན་གསུམ་ཧྲིག་གེར་གཡོ་བ་མཇལ། དགོན་ཆེན་དུ་ཀྱེ་རྡོར་གཞི་བསྙེན་བཞུགས་སྐབས། ཐུན་བཅད་བཞིན་པའི་སྐབས་གཟིམས་སྒོ་ཕྱེ་བྱུང་བ་མི་ནག་པོ་མིའུ་ཐུང་ཨང་རག་གྱོན་པ་ཞིག་བྱུང་ནས་ཁྱོད་ཀྱི་མཐུན་རྐྱེན་ངས་སྒྲུབ། བར་ཆད་ཀྱང་ངས་སེལ་ཞེས་སྨྲས་ནས་ཡལ། ཁང་པ་གནམ་མཐོང་ཅན་ཞིག་ཏུ་མགོན་པོའི་གསང་སྒྲུབ་བསྙེན་སྐབས། ཁང་སྟེང་ཕྱོགས་ནས་སྒྲ་ཆེན་ཞིག་གྲགས། ཡར་བལྟས་པས། མེ་དཔུང་འབར་བའི་ནང་དུ་གུར་མགོན་ཆ་བྱད་དཀྱུས་ལྟར་ལ་ཧ་ཅང་ཁྲོ་བ་མིན་པ་ཁྲུ་གང་ཙམ་མཐོང་བ་དང་། ཤེས་པ་བརྒྱལ་བའི་རྣམ་པ་བྱུང་། དེ་ནས་གསོལ་འདེབས་བྱས་པས། སྐུ་དེ་མེ་དཔུང་དང་བཅས་པ་ཧཱུྃ་མཐིང་ནག་ཏུ་གྱུར་ནས་རང་ལ་ཐིམ། ཐུན་གྲོལ་སྐབས་བསྐྱེད་རིམ་གསལ་བརྟན་འབྱམས་ཀླས་པས་བསྡུ་མི་ནུས་པ་ལྟ་བུའི་ང་རྒྱལ་བརྟན་པོ་བྱུང་གསུང་། རྗེ་བཙུན་གྲགས་པའི་སྐུ་བསྟོད་ཆོས་རྣམས་མ་འབུམ་ཐེར་ལྔ་བསགས་སྐབས་དངོས་ཉམས་རྨི་ལམ་དུ་ཞལ་མཐོང་གསུང་གི་དབུགས་དབྱུང་ཐོབ། དེའང་སྐུ་ན་སྨིན་པ་སྔགས་བན་ཆ་ལུགས་ཅན་ཞིག་མཇལ་ནས་བུ་ཁྱོད་དང་ང་དུས་རྟག་ཏུ་འབྲལ་བ་མེད་པ་ཡོད་གསུངས་པ་ཐོས། རྗེ་བཙུན་རིན་པོ་ཆེ་འདི་ལ་ཐུན་མོང་མིན་པའི་མོས་གུས་ཆེས་ཆེར་མཛད། ས་སྐྱ་པའི་སྔགས་ཀྱི་ཉམས་ལེན་ལ་བརྩོན་པ་ཞིག་ཡིན་ན་འདིའི་གསུང་ལ་ཡང་ཡང་ལྟ་བ་དང་འདི་ཁོ་ནར་གསོལ་བ་འདེབས་པ་ཟབ་ཅེས་ཡང་ཡང་བཀའ་སྩལ་ཏོ། །བླ་མ་ཉིད་ཡི་དམ་དུ་དངོས་སུ་མཇལ་ཏེ། དེའང་རྡོ་རྗེ་འཆང་བློ་གཏེར་ཞབས་ལྷུན་གྲུབ་སྟེང་དབྱར་གནས་ཁང་དུ་བཞུགས་སྐབས་ཉིན་གཅིག་སྐུ་བཅར་ཞུས་པ་གཟིམ་ཁྲི་ནང་མིའུ་ཐུང་མདོག་ནག་ཁྲོ་གཏུམ་ཉམས་ལྡན་ཕྱག་གཡས་རྡོ་རྗེ་འཕྱར། གཡོན་སྡིག་མཛུབ་མཛད་པ་མེ་འོད་འཕྲོ་བ་མཐོང་བས་མཇལ་མ་ཕོད་པར་ཕྱིར་ལོག །དེ་ཕྱིན་བླ་མ་གསང་བའི་བདག་པོར་དངོས་སུ་ཐག་བཅད། འཇིགས་རུང་ལག་ན་རྡོ་རྗེའི་རྣམ་པར་འཕྲུལ། ཞེས་སོགས་བརྒྱུད་འདེབས་གསར་རྩོམ་ལ་བྱུང་བའང་གནད་དེ་ཡིན་གསུང་། ཚར་འཇིགས་བསྙེན་སྐབས་དུས་དགྲའི་དབང་པོ་མ་ཧེའི་གདོང་ཅན་གྱི་ཞལ་བསྟན་སྐབས་དེར་བསྟོད་པའང་མཛད། དེ་ཕྱིན་ཆོས་རྣམས་མི་བརྗེད་པ་དང་། ཁྱད་པར་རྨི་ལམ་གྱི་སྐབས་སུ་རླུང་སེམས་ལྷ་སྐུར་ལྡང་བ་དང་། རྫོགས་རིམ་གྱི་འོད་གསལ་ལ་ཉིན་མཚན་འབྱམས་པའང་བྱུང་། བསྟོད་པ་འདིའང་རང་བཞིན་རྩོམ་པ་མིན་པས་བྱིན་རླབས་ཡོད་ཅེས་གསུང་། རྒྱ་མིའི་འཁྲུགས་འཛིངས་སྐབས། དྲུག་ཅུ་ཉིན་བཅུ་བཞིར་གནང་བའི་ཟོར་གཏོར་ལས་སྒྲོན་མེ་ལྟར་གསལ་བའི་མེ་འབར་བ་མངོན་སུམ་བྱུང་། ཟོར་འཕེན་སྐབས་ཅུང་ཟད་མ་ཐེབ་པ་ནི་རྒྱ་མི་ཡུན་རིང་ཙམ་གནས་པའི་ལྟས་སུ་མངོན། ཡང་སྐབས་དེར་མི་བསྲུན་པ་འགའ་ཞིག་གིས་བསྟན་དགོན་ལ་འཚེ་བ་ན་ཐང་རྒྱལ་ཁང་དུ་གསོལ་བསྐང་དང་དྲག་བསྐུལ་མཛད་པས་ལྷ་ཁང་གི་ཆོས་སྐྱོང་ལྡེབ་བྲིས་ཀྱི་མགོན་པོའི་ཞལ་དང་ཐོད་པ་ནས་རཀྟའི་ཞམ་ཆུ་འབེབས་ཕ་རོལ་པོ་དེའང་ལྔ་པའི་ལམ་དུ་གྱུར་སྐད། ལྕགས་རའི་མགོན་ཁང་དུ་བཤགས་པ་ཕྲིན་བཅོལ་མཛད། ཕྱག་གིས་ནས་བཤར་རྒྱབ་སྐབས་མགོན་སྐུ་ལས་མེ་སྟག་འཕྲོ་བ་ཀུན་གྱིས་མཐོང་། སྡེ་དགེས་མགོན་ཁང་གསར་བཞེངས་དུས། པུ་ཊའི་ལྕགས་སྙིང་སྒྲུབ་སྐབས་དེ་སྟེང་བྱ་ནག་བབ་པར་ཀུན་གྱིས་མཐོང་། བྱ་ནག་རབ་གསལ་ནང་ནས་ཕྱིར་འཕུར། ལྕགས་སྙིང་ལ་དྲོད་ཆེན་པོ་འབར་བ་དེ་འཕྲལ་ནང་རྟེན་དུ་བཞུགས། སྡེ་སྲས་ཨ་ཇ་གཉན་ལྡང་ལྷ་གསོལ་བྱོན་སྐབས། རྗེ་བླ་མ་གདན་འདྲེན་ཞུས་པ་ལམ་བར་ཆིབས་འབྲོགས་བྱུང་བ་སྐུ་ས་ལ་མ་ཡལ་བར་བར་སྣང་དུ་རྫུ་འཕྲུལ་གྱིས་བསྐྱོད་ནས་ཕ་བོང་ཞིག་གི་སྟེང་བྱ་བབ་པ་ལྟར་བཞུགས། ཚེ་ཐར་རྣམས་ལ་ཕྱག་ནས་འཐོར་སྐབས་ཕྱག་ནས་ལས་མེ་སྟག་འཕྲོ་བ་མཐོང་། གཉན་ལྡང་དབུ་རྩེའི་ལ་བཙས་ཉེ་ཆར་ནས་གནམ་ལྕགས་རྡོ་རྗེ་རྩེ་དགུ་ཞིག་བཞེས་པ་ཕྱིས་དཔལ་མཆོག་མཆོད་རྟེན་ནང་བཞུགས་མཛད། བསམ་འགྲུབ་མཐོང་གྲོལ་ཆེན་མོའི་ངོར་ཆེན་འདྲ་ཞལ་ནམ་མཇལ་དུས་ཕལ་ཆེར་སྤྱན་གསུམ་ཁྲོ་འཛུམ་ཅན་སོགས་མཐོང་ཚུལ་མི་འདྲ་བ་མཇལ་གསུང་། ཐེག་ཆེན་སྦྱོར་ལམ་ཐོབ་པའི་རྟགས་སྐུ་ལུས་ལ་ཤིག་སྲོ་མི་འབྱུང་བ་དང་། ཆོས་ཉིད་ཀྱི་གནས་ལུགས་མཐོང་བ་ན་ཆོས་ཅན་ལྷ་ཡི་འཁོར་ལོ་འཆར་བ་ཞིག་ངང་གིས་འོང་རྒྱུ་རེད་འདུག་ཕེབས་པའང་རྗེ་བླ་མ་ཉིད་ལ་དེ་ལྟར་འབྱུང་བ་ཤུགས་ཀྱིས་གོ། ལྕགས་རར་དབྱར་གནས་ཀྱི་མཁན་པོ་མཛད་སྐབས་མནལ་ལམ་དུ། རླུང་འཚུབ་ཀྱི་ནང་མི་དམར་མདུང་ཐོགས་པ་ཞིག་གིས་དཔལ་གཤིན་རྗེའི་གཤེད་ཀྱི་ཕོ་བྲང་ཉམས་པས་གསོ་བར་བསྐུལ་མ་བྱུང་བཞིན། ཕྱི་ཉིན་མཁར་ཧྲུལ་དུ་ཕེབས་ནས་ལྷ་ཐོ་བརྩིག །བཙན་རྒོད་ལ་གསོལ་མཆོད་ཕྲིན་ལས་བཅོལ་བས་དགྱེས་པའི་རྟགས་མཚན་མངོན་དུ་བྱུང་། དེའི་ནུབ་མོ་མནལ་ལམ་དུ་བཙན་རྒོད་ཨ་བསེབ་དང་། བེཀྩེའི་ལས་མཁན་སྲོག་བདག་དམར་པོ། ཕྲིན་ལས་རྒྱལ་པོའི་ཨ་ཙ་ར་སོགས་བྱུང་སྟེ། ཁོང་རྣམས་སློབ་དཔོན་པདྨའི་བཀའ་དང་དམ་ལ་གནས་པ་ཞིག་ཡིན་ཟེར། མི་གཞོན་གོས་དཀར་ཅན་ཞིག་འོངས་ནས་མི་སྣང་བར་གྱུར་ཏོ་གསུང་། འཇིགས་བྱེད་ལྷ་ཁང་རབ་གནས་སྐབས་འབྲུག་ལྡིར་བ་ལྟ་བུའི་སྒྲ་ཆེན་པོ་བྱུང་བས་ཡེ་ཤེས་པ་དངོས་སུ་བསྟིམ་པར་མཛད། ལྷ་ཁང་གསར་བཞེངས་ཕྱོགས་འདིར་འཇམ་དཔལ་གཤིན་རྗེའི་གཤེད་ཀྱི་གནས་ཁྱད་པར་ཅན་ཡིན་ཞིང་ལས་དག་པ་ཡིན་ན་དུར་ཁྲོད་ཆེན་པོ་བརྒྱད་ཀྱི་དབུས་ན་འཇམ་དཔལ་གཤིན་རྗེའི་དཀྱིལ་འཁོར་རང་བྱུང་དུ་ཡོད་པ་མཇལ་རྒྱུ་ཡོད་དོ་གསུང་། ཡང་ཕྱོགས་དེར་དབྱར་བཞུགས་སྐབས་ཤིག །རྡུལ་འཕྱག་སྐབས་གོས་ཁ་དོག་སྣ་ཚོགས་པའི་ཟེགས་མ་མང་པོ་འདུག་པར་ཅི་ཡིན་ཞུས་པས། དགྲ་བཅོམ་གནས་བརྟན་རྣམས་བྱོན་པའི་ན་བཟའ་ཟག་པ་ཡིན་གསུང་། ལོ་དེར་སྔར་ཡེ་མི་སྐྱེ་བའི་མེ་ཏོག་དམར་པོས་ཕྱོགས་ཐམས་ཅད་ཁྱབ་པར་སྐྱེ་བ་བྱུང་། འཇིགས་བྱེད་ལྷ་ཁང་དུ་གཞུང་གི་ཞབས་བརྟན་འཇམ་དཔལ་ཁྲོ་བོའི་ལས་སྦྱོར་སྐབས་གཏོར་མ་དང་ལིངྒ་ལས་ཁྲག་གི་ཞམ་ཆུའི་རྒྱུན་ཆེན་པོ་འབབ་པ་དང་། ལས་གཏད་གཏོར་མ་ཕྱག་གིས་བསྐུལ་མ་དགོས་པར་དགྲ་ཡུལ་དུ་ཐེགས། དྲྭ་སྒང་སྒྲུབ་སྡེར་གཏོར་སྒྲུབ་སྐབས་མགོན་ཆེན་གཏོར་མ་ལས་རླངས་པ་འཕྱུར་ཞིང་གཏོར་མ་སྣོད་དང་བཅས་པར་ལྕགས་བསྲེག་ལྟ་བུའི་དྲོད་འབར་ཞིང་རེག་ཏུ་མི་བཏུབ་པ་ཉིན་མང་པོར་གནས་པ་ཀུན་གྱིས་ཤེས། ཞལ་གྱི་བསྐང་བ་རྒྱས་རེས་ཉིན་དེ་རིང་རྒས་པོ་ཕེབས་ཡོད་པ་འདུག་གསུང་། བྲག་རྫོང་མའི་ཁྲིད་གནང་སྐབས་སྒོ་མ་བཞིའི་ཞལ་གཟིགས་དང་ལུང་བསྟན་བྱུང་ནའང་ཞིབ་པར་མ་གསུངས། ཐང་སྟོང་རྒྱལ་པོས་ལན་གཉིས་ཙམ་ཞལ་བསྟན་ནས་བྱིན་གྱིས་བརླབས། གྲུབ་རྗེར་བསྟོད་པ་དང་ཉམས་མགུར་དཔྱིད་ཀྱི་རྒྱལ་མོའི་གླུ་དབྱངས་ཀྱིས་ཀྱང་བསྔགས་པ་མཛད། ལྷུན་གྲུབ་ཡང་རྩེའི་དབེན་ཁྲོད་དུ་བཞུགས་སྐབས་ནུབ་གཅིག་ཤིང་ལེབ་ལྟ་བུ་ཞིག་གི་སྟེང་རྗེ་བཙུན་དཀར་པོ་རྣམ་གསུམ་འཛུམ་མུ་ལེ་བཞུགས་པ་མཇལ་གསུང་། ཕྱིར་ཉིན་བླ་མ་ས་ཆེན་གྱི་བླ་མའི་རྣལ་འབྱོར་མཛད། དངུལ་སྲིབ་ཕྱོགས་ཀྱི་སྤངས་ལྗོངས་ལ་སྐྱོ་བསངས་སྐབས་མནལ་ལམ་དུ་ཕ་རིལ་སེ་མགོར་རྡོ་རྗེ་འཆང་བློ་གཏེར་ཞབས་སྐུ་ཚད་རི་དིལ་ཙམ་ངུར་སྨྲིག་གིས་བཀླུབས་པ། གཡས་སུ་ཞལ་རྒྱན་ཅན་གྱི་བླ་མ་སྐུ་ན་སྨིན་པ། གཡོན་དུ་ཞལ་རྒྱན་ཅུང་ཡོད་པའི་བླ་མ་གཞོན་ནུ་ཞིག་ལ་ལྷ་མི་མང་པོས་ཕྱག་མཆོད་བྱེད་འདུག་པ་ངོ་ཤེས་པའི་མི་གཅིག་འདུག་པར། གཡས་གཡོན་གཉིས་སུ་རེད་དྲིས་པས་གཡས་ཕྱོགས་དེ་ཡོངས་འཛིན་དཔལ་ལྡན་ཆོས་ཀྱི་རྒྱལ་མཚན། གཡོན་དེ་དཔོན་སློབ་ངག་དབང་ལེགས་གྲུབ་རེད་ཟེར། འཇམ་དབྱངས་ཀྱི་སྤྲུལ་པ་གསུམ་གྱི་ཞལ་མཇལ་སྐལ་བ་བཟང་སྙམ་ནས། འཇམ་དབྱངས་བླ་མ་གསུམ་ལ་གསོལ་བ་འདེབས། །འཇམ་དབྱངས་བླ་མ་གསུམ་གྱིས་བྱིན་གྱིས་རློབས། །བརྗོད་བཞིན་ཕྱག་མང་པོ་འཚལ་བས་གསུམ་གྱི་ཞལ་ནས་སྒྲ་མཐུན་པར་གསུང་ངག་རྒྱུད་གསུམ་གྱི་ཁྲིད་གནང་། སེམས་ལ་སྔར་མ་གོ་བའི་ངེས་ཤེས་དུ་མ་སྐྱེས་ངང་མནལ་སད། ཞེ་ཆེན་དུ་ཕེབས་ནས་མི་ཕམ་རིན་པོ་ཆེའི་གདུང་རྟེན་མདུན་ཞག་གཅིག་བཞུགས་པའི་ཕྱིར་ནང་མདང་ངས་མི་ཕམ་རིན་པོ་ཆེ་དངོས་སུ་མཇལ་གསུང་། དེ་དུས་ཀྱི་རྒྱུས་ཡོད་ཞིག་གིས་གླེང་། ཡང་དད་ལྡན་གྱི་སློབ་མས་རྣམ་ཐར་ཞུས་པ་ན། ང་དཀོར་ནག་གིས་ཕོ་བ་བརྒྱགས་རབས། རྟ་རྔམ་གོས་རྔམ་ཆེ་རབས། བདུད་ཀྱི་ཕྱེ་གཏོར་སྙན་གྲགས་ཆེ་རབས་སོགས་བྲིས་ན་ལས། ཕྱི་མ་དམྱལ་ཟངས་སུ་འཚེད་ངེས་ཤིང་ང་དང་ལས་ངན་དུ་རྒྱུ་འདུག་གསུང་མཉམ་བཞག་མཛད་ཅིང་ཕཊ་མང་པོ་གསུངས། ཡང་སྐབས་ཤིག་ན། བླ་མ་ལས་དབང་དང་གདམས་ངག་ཞུས་ཕྱིན་དེ་ལ་ཡོན་ཏན་མེད་ནའང་སངས་རྒྱས་སུ་ཤེས་ན་དེའི་གོ་འཕང་མངོན་དུ་བྱེད། བླ་མ་ཐ་མལ་པར་མཐོང་ན་རང་ཉིད་འཁོར་བའི་སྡུག་བསྔལ་ལས་ཐར་དུས་མེད་པས་དེས་ན་སངས་རྒྱས་དངོས་ཀྱི་འདུ་ཤེས་བསྐྱེད་ན། རྡོ་རྗེ་འཆང་ནས་བརྩམས་བརྒྱུད་པའི་བླ་མ་ཐམས་ཅད་ཀྱི་བྱིན་རླབས་བླ་མའི་ཐུགས་ལ་འདུས། བླ་མའི་ཐུགས་དེ་རང་སེམས་ཀྱི་ངོ་བོ་རིག་པ་གསལ་ལ་མ་འགགས་པ་དེའི་རང་ངོ་སྐྱོང་ནས་ལམ་གྱི་ཐུན་བཞི་ལ་དབང་བླངས་པ་མ་ཆག་པར་གྱིས་དང་གསུངས་ནས་བྱིན་གྱིས་བརླབས་པར་མཛད་ཕྱག་གིས་མེ་ཏོག་གཏོར་ནས། བླ་མ་དམ་པའི་ཡོན་ཏན་ལ། །ལོག་ལྟ་སྐད་ཅིག་མི་སྐྱེ་བར། །བྱིན་རླབས་གཅིག་བསྡུས་བླ་མ་དེ། །རང་སེམས་ཤེས་པའི་བཀྲ་ཤིས་ཨཿ གསུངས་ནས་སྐུ་ཆུང་དུས་ནས་བརྩམས་སྔོན་གྱི་རིགས་སད་ལུགས་དང་། སྡོམ་པ་སུམ་ལྡན་མཛད་ཚུལ་སོགས་རག་རིམ་གསུང་ཞིང་སྒྲོལ་དཀར་གྱི་བསྙེན་སྒྲུབ་ཟླ་བ་བཅུ་གསུམ་མཛད་པ་ན་མནལ་ལམ་དུ་བུད་མེད་གཅེར་བུ་རྒྱན་མེད་པ་ཞིག་གིས་དཔའ་བོ་ཁྱོད་ཀྱི་བློ་གྲོས་རྒྱས་པར་འགྱུར་ཞེས་གསུངས་པ་དང་མནལ་སད། དེ་ཕྱིན་ནས་ཤེར་ཕྱིན་མངོན་རྟོགས་རྒྱན་རྩ་འགྲེལ་ལ་ཐུགས་ལེགས་པར་སྦྱོང་ཞིང་ཡུམ་རྒྱས་པ་དང་མདོ་སྦྱར་མཛད་པས་ཕར་ཕྱིན་ཐེག་པའི་ལྟ་བ་ཕྱིན་ཅི་མ་ལོག་པ་ལེགས་པར་གོ་གསུངས། དེ་སྐབས་སྒྲོལ་དཀར་བཅུད་ལེན་རིལ་བུ་སྒྲུབ་པ་ཉིས་འགྱུར་དུ་འཕེལ་བ་ལས་ཁ་དོག་དྲི་བསུང་བདུད་རྩིའི་ཟིལ་དངར་དང་ལྡན་པའི་རོ་ནུས་ཕུན་སུམ་ཚོགས་པ་གང་གིས་ཀྱང་མཚོན་དུ་མེད་པ་བྱུང་བ་དང་། ཡང་སྐབས་ཤིག་ན་ཤྲཱི་མ་ཧཱ་ཀཱ་ལའི་རྣལ་འབྱོར་པ་ནུབ་བླ་མ་དཀོན་མཆོག་རྒྱལ་མཚན་གྱིས་མདུན་དུ་ཤོག་གསུངས་ནས་བྱོན་པ་ན། ཁྱེད་བསྟན་པ་ལ་ཕན་པའི་སྐྱེས་བུ་དམ་པར་འདུག་། སྐུ་ཚེའི་བར་ཆད་ཡོད་ཤས་ཆེ། ང་ཡི་རྨི་ལམ་ན་ནམ་མཁའ་དྭངས་པར་ཉི་མ་བཞི་ཤར་བ་ཆུ་ཚོད་རེ་རེའི་ཡུན་གྱིས་འགྲིབ་སོང་བ་ཞིག་བྱུང་བས། ཁྱེད་ལ་ཞལ་དཀར་པོའི་ཚེ་དབང་ཞིག་ཕུལ་དགོས་གསུང་ནས་གནང་བར་མཛད་པས་སྐུ་ཚེའི་བར་ཆད་གྱི་འཕྲང་ལས་གྲོལ། མཁན་ཆེན་དཔལ་ལྡན་བློ་གྲོས་རྒྱལ་མཚན་གྱི་མདུན་དུ་བྱོན་པ་ན་ཁྱོད་ཀྱི་ཚེ་རབས་ལས་ལྷ་འཇམ་དཔལ་གཤིན་རྗེའི་གཤེད་ཡིན་ནོ་གསུངས། དཔེ་ཁྲོད་ནས་པུསྟི་གཅིག་ཁྱེར་ཤོག་གསུང་པ་བཞིན་བསྣམས་ནས་ཕུལ་བས་འཇིགས་བྱེད་ལྷ་བཅུ་གསུམ་མའི་དཀྱིལ་ཆོག་ནག་འགྲོས་ཅན་ཞིག་རེད་འདུག་པར་ངས་བྱས་པ་དེ་བཞིན་རེད་འདུག་གསུངས་ནས་འཇིགས་བྱེད་དབང་ཁྲིད་རྒྱས་པ་གནང་། རྡོ་རྗེ་འཆང་བློ་གཏེར་ཞབས་ཀྱིས་འཇིགས་བྱེད་དབང་གནང་སྐབས། རལ་གྲི། གྲི་གུག །ཐོད་པ་ཁྲག་གིས་བཀང་བ་སོགས་རྗེ་འདི་ལ་སྩལ། ལས་གཤིན་ཐུན་མོང་དང་། ཐུན་མོང་མིན་པའི་རྗེས་གནང་སྐོར་ཚང་བར་གནང་ནས་འཇིགས་བྱེད་ཆེན་པོའི་ཉམས་ལེན་ལ་བརྩོན་པར་གྱིས་ཤིག་ཅེས་གདམས་པར་མཛད་པ་བཞིན་བརྩོན་པས་གྲུབ་པའི་འབྲས་བུ་མངོན་དུ་གྱུར། རྡོ་རྗེ་ནག་པོ་ཆེན་པོའི་ཕྱི་ནང་གསང་གསུམ་བསྙེན་སྒྲུབ་ཚད་ལྡན་དང་། ཡི་གེ་བདུན་པ་དུང་ཕྱུར་གཅིག་བགྲང་ཚུལ་སོགས་བཀའ་སྩལ་བ་ན་དད་ལྡན་སློབ་མས་འདི་སྐོར་རྣམ་ཐར་དུ་བྲིས་ན་ཞུས་པས་ཕོ་རྒོད་ལས་དག་པ་རྣམས་ཀྱི་རྣམ་ཐར་ལ་བསམ་ན་མཐོང་བ་ཙམ་གྱིས་ཤེས་མེད་ས་རྡོ་ཡིན་ཡང་དད་གུས་སྐྱེད་ཐུབ་པ་ཡོད་རྒྱུ་ལས་འདི་འདྲའི་ཚིག་གིས་དད་གུས་སྐྱེད་ཐུབ་པ་ཅིའང་མེད་ཅེས་གསུངས། ནག་ཕྱོགས་འཚུབ་འགྱུར་ལྡང་སྐབས། རྗེ་བཙུན་བཅོམ་ལྡན་འདས་མ་རིགས་བྱེད་དབང་མོའི་ཏིང་ངེ་འཛིན་གྱིས། རྒྱ་མིའི་དཔོན་ཆེན་ཁ་ཤས་ཡིད་ཀྱི་བརྟན་པ་དབང་མེད་དུ་ཕྲོགས་ནས་གུས་ཤིང་འདུད་པར་བྱས། རྒྱ་ཡི་དམག་མི་གཅིག་གིས་ཁྱོད་ཀྱི་ལུས་ལ་མེ་འབར་འདུག་ཅེས་རྒྱ་ཡི་སྐད་ཀྱིས་ཟེར་ནས་གུས་པས་བཏུད་པར་བྱུང་། མཁར་མདོ་དགོན་པར་བོན་པོའི་བྱད་ཁ་ལྡང་བར་རྗེ་ཉིད་ཀྱིས་སྲུང་བཟློག་མཛད་ཅིང་སེང་གདོང་བཟློག་པ་རེ་མ་བཅད་གསུངས་ནས་མི་འཇིགས་པ་སྦྱིན་པར་མཛད། མདའ་དཔོན་བཀྲས་མཐོང་པའི་ཞབས་རིམ་དབང་གི་སྦྱིན་སྲེག་སྐབས་མེ་རང་འབར་བྱུང་བར་གྲྭ་འཁོར་རྣམས་ངོ་མཚར་སྐྱེས། ཤིང་གླང་ཟླ་བ་དགུ་པའི་ཚེས་བཅུ་དགུའི་ནང་མོར་དངུལ་ཕུར་སྨན་ལུམ་མཛད་སྐབས། ཆབ་བསིལ་ཕེབས་པར་ཤར་ཕྱོགས་ནས་གོ་བོ་ཞིག་འཕུར་བྱུང་བ། རྗེ་བླ་མའི་དབུ་ཀླད་ཙམ་དུ་སླེབས་པ་དང་། སྡིགས་མཛུབ་མཛད་ནས་ཕཊ་དྲག་པོ་གསུང་པ་དང་ཐང་ལ་ལྷུང་། དེ་ནས་སྨན་ལུམ་ཁར་ཕེབས་ནས་དེ་སྐོར་གྱི་གླེང་མོ་ཅི་ཡང་མི་གསུངས་ཤིང་། དེ་རིང་གི་ཉི་མ་ལ་དཔལ་གཤིན་རྗེའི་གཤེད་ཀྱི་བླ་མ་བརྒྱུད་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྣམ་ཐར་རྣམས་དྲན་ནས་ངེས་འབྱུང་སྐྱེ་འདུག །སྨན་ལུམ་གྱི་འགེབས་བསལ་ཞིང་སྐུ་རྔུལ་བ་ཕྱིས་པ་ན། སྐུ་ལུས་ལས་ཚག་ཚག་གི་སྒྲ་དང་བཅས་དམར་འོད་འཁྱུག་པ་ན། འཚོ་བྱེད་པ་སྙིང་འདར་ཞིང་ཅུང་ཟད་དྲན་མེད་དུ་བརྒྱལ། བརྒྱལ་བ་སངས་པ་ན། བླ་མས་སྤྱན་མའི་སྔགས་གསུང་བཞིན་བཞུགས་འདུག་ཟེར། དེ་ནས་གཟིམ་ཁང་དུ་ཕེབས་ནས་དེའི་མཚན་ཧྲིལ་པོར་གྲུབ་ཆེན་རོལ་པའི་རྡོ་རྗེ་ཁྱེད་བདག་གི་སྙིང་དབུས་སུ་དྲན་ནོ་སོགས་བླ་མ་མང་པོའི་མཚན་གསུང་མགུར་གྱི་རྟ་ལ་དྲངས་ཏེ་བཞུགས། དེའི་ནང་མོ་གོ་བོ་ཤི་ཚར་འདུག་ཞུས་པས། དམ་སྲི་གདུག་པ་ཅན་རྣམས་བྱ་ཁྱི་ལ་རྫུས་པ་རེད། ཁ་སང་ངས་ལས་ཤིན་ཏུ་སྡུག་པོ་རེད་སོང་གཞན་སུ་ལ་མ་སྨྲ་བཀའ་ཆད་འོང་གསུངས། ཅི་ལགས་ཞུས་པས། ད་ལྟའི་ལུས་འདི་ཁྱི་རྒན་འཁྱམས་འདྲ་སྟེ། །སྔོན་གྱི་ལས་འཕྲོ་སེངྒེ་དཀར་མོ་འདྲ། ཟེར་བ་ཡོད་དམ་གསུངས། ཀུ་སེ་གྱེ་རང་གཞུང་ནས་བྱོན་སྐབས། གཤིན་རྗེའི་གཤེད་ཀྱི་གསལ་སྣང་ལ་གནས་བཞིན་བྱོན་པས་ཆུ་བྲག་འཐབ་པའི་སྒྲ་ཐམས་ཅད། ཧཱུྃ་དང་། ཧྲཱིཿཥྚིའི་སྒྲ་གྲགས་པར་ཐོས་པས་དེར་གཤིན་རྗེའི་གནས་ཁྱད་པར་ཅན་ཞིག་ཡིན་འདུག་ཕེབས། དགོན་ཆེན་འདུ་བའི་དབུ་བཞུགས་མཛད་སྐབས་ལན་གཅིག་སྣང་བ་ཐམས་ཅད་དབྱིངས་སུ་ཐིམ་པའི་སྟོང་ཆེན་གྱི་ཉམས་ཤར། ཡང་ལན་གཅིག་འཇིགས་བྱེད་སྒྲུབ་པའི་སྐབས་བཙན་ཇག་པ་མེ་ལེན་བྱུང་བར་ཅུང་ཟད་སྐྲག་ནས་ཧྲཱིཿཥྚྲཱི་བཟླས་པས་ཁོ་སྐྲག་ནས་ཁྱོད་ཀྱི་ཕྲིན་ལས་ཐམས་ཅད་ཁོས་སྒྲུབ་ཟེར་བའི་སྣང་བ་བྱུང་། ལན་གཅིག་ཉེ་གནས་དགོང་མོ་གཟིམ་སྒོའི་རྒྱབ་ན་ཁོ་རང་ཉལ་བས་རྗེ་བླ་མའི་མདུན་ཞུ་བ་ཞུ་ལན་མང་པོ་བྱེད་པ་ཞིག་ཐོས་ཟེར། འདི་ཡང་མི་མ་ཡིན་བྲན་དུ་ཁོལ་བའི་རྟགས་སུ་འདུག །དྲྭ་སྒང་མཚམས་གྲྭར་བྱོན་པའི་ལམ་བར་དང་། སྒྲུབ་མཆོད་དང་འབྲེལ་བའི་རབ་གནས་མཛད་སྐབས་སོགས་འཇའ་སྤྲིན་ངོ་མཚར་ཆེ་བ་འཆར་བ་སོགས་འདི་འདྲའི་རིགས་བརྗོད་ཀྱིས་མི་ལོངས། དགོན་ཆེན་གྲྭ་པ་བྱམས་དགེ་ཟེར་བ། མཁར་ལྟུག་བུས་གསོད་པ་ལ་ལས་སྦྱོར་གནང་སྐབས་བྱད་ལྟེ་ཧོམ་ཁར་དངོས་སུ་འགུགས་པ་མང་པོས་མཐོང་སྐད། དྲྭ་སྒང་མཚམས་གྲྭ་ཞིག་སྨྱོ་ནད་ཀྱིས་ཐེབས་པ་ན། བཀའ་བསྒོ་མཛད་པས། ཁོས་བླ་མ་ཨ་ཙི་སྐྲག་རྒྱུ་མེ་སྟག་དམར་ཚུབ་ཚུབ་འདུག་ཟེར། ཡང་ལན་གཅིག་སྨྱོ་བ་ན་དཔལ་མགོན་གདོང་བཞི་པའི་ང་རྒྱལ་གྱིས་བརྡེག་པས་ཁོས་ང་རྒྱལ་པོ་བསེ་ཐེབ་ཅན་ཡིན་ཟེར། ཁྱོད་བསྟན་བཤིག་བསྟན་སྲུང་གང་ཡིན་གསུང་པས། བསྟན་བཤིག་ཡིན་ཟེར། སླར་ཡང་འབོད་རྦད་ཀྱི་སྔགས་དྲག་ཏུ་བགྲངས་ནས་གཟིར་ཞིང་བརྡེག་པས་ཁོ་ངུ་ཞིང་། ང་བསྟན་སྲུང་ཡིན་ཟེར། དེ་འཕྲལ་དྲན་པ་རྙེད་དེ་གདོན་དང་བྲལ་བར་གྱུར། དྲྭ་སྒང་སྒོ་ཁང་གཏིབས་འོག་ཏུ་རྒན་མོ་ཤི་བའི་རོ་དབྱར་གཞུང་ཁེལ་ཡང་ཇོ་བོ་ལ་སྐེད་སྐྱེལ་ནས། དེ་ནུབ་སེར་བ་དྲག་པོ་བྱུང་བ་གདོང་རྫོགས་མཛད་སྐབས་སྐུ་ལས་མེ་སྟག་འཕྲོ་བ་ཉེ་གནས་པས་མཐོང་། སྒྲུབ་གྲྭར་ཞལ་གྱི་གསང་ཁྲིད་གནང་སྐབས་ཁ་བ་འདབ་མ་བཞི་པའི་དབྱིབས་ཅན་བབ། དབྱར་ལྗོངས་ཀྱི་ཚེ་དབང་གནང་སྐབས་ནུབ་གཅིག་ཆར་རྒྱུན་ཐུང་ཙམ་བབས་པ་འཆི་མེད་ཚེའི་ཆུ་རྒྱུན་ཡིན་ཞེས་ཞལ་རྩེད་ལྟ་བུ་མཛད། སྨན་ཤོད་ཛཾ་ནང་གནས་འདུས་སྐབས་སྒྲུབ་ཕུག་ནང་ཅུང་ཟད་མནལ་བཞིན་པའི་ངང་ད་ལྟའི་མི་མང་པོ་དེ་རྣམས་སུ་རེད་གསུང་བྱུང་བས་དེ་མ་ཐག་གཟིམ་སད་པ་དང་། ཉེ་གནས་ཀྱིས་དཔའ་བོ་མཁའ་འགྲོ་ཨི་རེད་ཞུས་པས་ཡོང་ཡོང་གསུང་། རིགས་གསུམ་སྒྲུབ་ཕུག་མཇལ་དུ་ཕེབས་པས་ཨ་ཙི་ངོ་མཚར་ཆེན་པོ་ཞེས་གསུང་པ་འདི་རྣམས་ལ་དཔག་ན་དག་པ་ཡེ་ཤེས་ཀྱི་འཁོར་ལོའི་གཟིགས་སྣང་རྒྱུན་དུ་ཡོད་པ་དང་། ལྐོག་གྱུར་མཁྱེན་པའི་མངོན་ཤེས་སོགས་དགོས་མི་དགོས་ཐམས་ཅད་ལ་ནམ་རྒྱུན་གསུང་བར་མི་མཛད་ཀྱི་སྐབས་རེར་ཤུགས་འབྱུང་དུ་ཐལ་བ་ན་དེ་བཞིན་མངོན་དུ་གྱུར་པ་ནི། དཔེར་ན་ལྷ་སར་བྱོན་སྐབས་བྱང་ལམ་བརྒྱུད་ནས་བྱོན་པ་དེ་རིང་ངེད་ཅག་འགྲོ་མི་ཉན་གསུང་། བཅག་མལ་མཛད་ནས་ཉིན་གསུམ་ལ་བཞུགས་པ་སྐབས་དེར་འགྲོ་ན་ཇག་པ་དང་ཐུག་རྒྱུ་འདུག་ཀྱང་འཚེ་མ་ནུས་པ་དང་། བླ་མ་ཀུན་དགའ་བཀྲ་ཤིས་སོག་ཡུལ་ནས་ཚུར་འབྱོན་མི་ཐུབ་གསུངས་པའང་དེ་བཞིན་གྱུར་པ་སོགས་ཆེས་མང་ཞིང་། དེ་ལྟར་མཁྱེན་བརྩེ་ནུས་པའི་ཡོན་ཏན་ཚད་མེད་ཀྱང་སྙེམས་པ་དང་དྲེགས་པ་ཅུང་ཟད་ཀྱང་མི་མཛད་པར་སོ་སྐྱེ་ཐ་མལ་པའི་ངང་ཚུལ་ལྟར་སྟོན་ནས་བཞུགས་པ་སྔོན་གྱི་བཀའ་གདམས་པའི་བཤེས་གཉེན་ཆེན་པོ་རྣམས་དང་ངེས་པར་ཆོས་མཚུངས་པ་ཞིག་ཏུ་བཞུགས་སོ། །ཡང་སྨྲས་པ། །ལྔ་བརྒྱ་ཐ་མར་གནས་པའི་སེམས་ཅན་རྣམས། །མགུ་བར་སླ་བས་བདུད་ཀྱིས་བྱིན་བརླབས་པའི། །སྤྲུལ་པ་རེས་འགའ་རྫུ་བ་ཉི་ཚེ་ལས། །ངོ་མཚར་བསྟོད་པའི་རོལ་མོ་འཁྲོལ་བར་བྱེད། །ཀྱེ་མ་དེ་འདྲའི་མི་ཤེས་རྨོངས་ལྡན་རྣམས། །ངོ་མཚར་བྱེད་ཀྱང་དམ་པས་བརྟག་གྱུར་ཚེ། །བྲག་ཆ་བཞིན་དུ་སྟོང་ལ་བརྫུན་ཕུག་རྡིབ། །ཆུ་ཤིང་བཞིན་དུ་སྙིང་པོ་མེད་པར་གྱུར། །དེ་ལྟར་མ་ཡིན་བསྒོམ་པའི་ལག་རྗེས་ལས། །ནང་གི་ཡོན་ཏན་ཕྱི་རུ་འཆར་བ་ལ། །ནམ་མཁའ་སྤར་མོས་ཁེབས་པ་མི་སྲིད་བཞིན། རྟོགས་པའི་ཡོན་ཏན་འབྱུང་བ་རང་གཤིས་ཡིན། །གླིང་བཞིའི་མཁའ་ལ་སྣང་བྱེད་རྒྱུ་བ་ན། །འོད་ཟེར་འབྱེད་པ་ཆོས་ཉིད་ཡིན་པ་ལྟར། །དཔལ་ལྡན་བླ་མའི་ཡོན་ཏན་མཐའ་ཀླས་ཀྱང་། །ཐུན་མོང་ཕྱོགས་རེར་སྣང་བ་འདི་ཙམ་ཞིག །དད་པའི་གསོས་སུ་སྣང་བའང་བླ་མའི་དྲིན། །རྟོགས་པའི་ཡོན་ཏན་འཛད་པ་མེད་པའི་གཏེར། །འཕགས་ཆེན་རྣམས་ཀྱང་བརྗོད་ལ་ངལ་གྱུར་ན། །བདག་འདྲས་བསྐལ་པར་བརྗོད་ཀྱང་ག་ལ་ལྡང་། །ཞེས་སྨྲས་སོ། །གསུམ་པ་གཞན་དང་ཐུན་མོང་མ་ཡིན་པའི་གསང་བའི་རྣམ་ཐར་ལས་ཆ་ཤས་ཙམ་ཞིག་བཤད་པ་ནི། དེའང་སྤྲེལ་ལོའི་ཟླ་བ་བཅུ་གཉིས་པའི་ཚེས་བརྒྱད་ལ་ཉམས་ཀྱི་སྣང་ཆར། ཡུལ་རྐྱེན་སྒྱུ་མ་ལྟ་བུའི་སྣང་བས་བསྐུལ་བ་ལས་ཐ་མལ་གྱི་སྣང་བ་དབྱིངས་སུ་ཐིམ་སྟེ། ཡུལ་ཤིན་ཏུ་ཉམས་དགའ་ལ་བྱིན་ཆགས་པར་མཚོ་ཤིན་ཏུ་དྭངས་ལ་སྔོ་བ་ཞིག་གི་ཁར་སླེབས་པ་ན། མཚོ་དེའི་ནང་དུ་རིགས་དྲུག་གི་སྣང་བ་མུ་མེད་པ་ཞིག་ཤར་བ་ལ་སྙིང་རྗེ་བཟོད་མེད་སྐྱེས་ནས་མཚོ་ནང་དུ་ཚམ་ཚོམ་མེད་པར་འཇུག་སྟེ། དེ་ནང་གི་སེམས་ཅན་རྣམས་ལ་ཕན་པ་རྒྱ་ཆེར་མཛད་དེ་སླར་གསལ་སྣང་དེ་འགག །ད་རེས་ཀྱི་ལུས་རྟེན་གཅིག་ལ་དེ་བས་དོན་ཆེ་བ་འོང་རྒྱུ་མེད་གསུང་། ས་རྟ་ལོར་ཉམས་ཀྱི་སྣང་ཆར་རྒྱ་གར་ཡུལ་གྱི་བྱེ་བྲག་བྷ་ཊ་ཏ་ཞེས་བྱ་བར་སླེབས་པས་ཡུལ་ཉམས་དགའ་བར་ལུང་པ་རི་སྣ་སྣོལ་བའི་འདབ་ཞིག་ཏུ་ཕེབས། དེ་ནས་ལམ་སྐྱ་ཐལ་ལེ་འདུག་པས་ཡར་ཕྱིན་པ་ན། ལྗོན་ཤིང་དང་བྲག་རི་སོགས་ཡོད་པ་དེ་ན་རྣལ་འབྱོར་པ་བགྲེས་ཉམས་ཅན་སྐུ་བོང་ཐུང་ལ་སྐུ་ཤ་རྒྱས་པ་མེ་ཏོག་གི་ཕྲེང་བས་ཐོད་བཅིངས་པ་ཞིག་དང་འཕྲད། ཁྱེད་སུ་ལགས་ཞུས་པས། ང་ནི་ཁྱེད་ཚོའི་བརྒྱུད་པའི་གྲལ་མགོ་ན་ཡོད་པའི་གནས་བརྟན་རྒན་པོ་དེ་ཡིན་གསུངས་པ་དང་། རྣལ་འབྱོར་དབང་ཕྱུག་བི་རཱུ་པ་ཡིན་པར་ཤེས་ཏེ་ཞབས་ལ་བཏུད་ཅིང་གསོལ་བ་བཏབ་པས་དགྱེས་རྡོར་རྩ་རྒྱུད་ལམ་འབྲས་རྡོ་རྗེའི་ཚིག་རྐང་། དེའི་མན་ངག་དམར་ཁྲིད། བརྟུལ་ཞུགས་ལམ་ཁྱེར་སོགས་བོད་ལ་གྲགས་པ་དང་མ་གྲགས་པའི་ཟབ་ཆོས་དུ་མ་གསུང་། བིཪྺའི་ཞལ་ནས་ཁྱོད་ངེད་ཀྱི་རྗེས་སུ་སློབ་པར་འདོད་ན་འདི་ནས་བྱང་ཤར་གྱི་མཚམས་སུ་ང་ཡི་བསྟི་གནས་སཽ་ཝ་ནཱ་ཐ་ཞེས་བྱ་བ་ཡོད་པས་དེར་སོངས་ལ་བརྟུལ་ཞུགས་ལམ་ཁྱེར་གྱི་གདམས་ངག་འདི་ཉིད་ཉམས་སུ་ལོངས་ལ་ཚོགས་ཀྱི་འདུ་བར་སྤྱོད་ཅིག་གསུང་། དེ་བཞིན་བགྱིས་ཏེ་སཽ་རཱཥྚར་ཕྱིན་ནས་དཔའ་བོའི་ཚོགས་དང་དགྱེས་རྒུར་སྤྱོད་དེ་བརྟུལ་ཞུགས་ཀྱི་སྤྱོད་པ་སྐྱོང་བས་ས་ལམ་བཙན་ཐབས་སུ་བགྲོད་ཆོག་པའི་མངོན་རྟགས་བརྙེས། ཡང་ལྕགས་སྤྲེལ་ལོར་ལྕགས་ར་ཐུབ་བསྟན་ནོར་བུའི་གླིང་དུ་བཞུགས་པའི་གསལ་སྣང་ལ། ནམ་མཁའ་ལ་བྱ་ལྟར་འཕུར་ཏེ་བྱོན་པས་རི་ཐང་མཚོ་གླིང་དུ་མ་བརྒལ་བ་ན་ལྗོངས་ཤིན་ཏུ་ཡངས་པར་གྲོང་ཁྱེར་ཆེན་པོ་ཡིད་དུ་འོང་བ་དུ་མ་མཐོང་ཙ་ན་ང་རང་བུ་སྟོན་རིན་ཆེན་གྲུབ་ཀྱི་སྐྱེ་བ་བཞེས་སྐབས་ཀྱི་མཐོང་སྣང་དེ་འདི་རེད་འདུག་སྙམ་པའི་ངང་ནས་གྲོང་ཁྱེར་དེར་ཞུགས་ཤིང་རྒྱུ་བ་ན། རང་གི་བསྟི་གནས་ཡིན་སྙམ་པའི་ཕོ་བྲང་ཆེན་པོ་ཐོག་རིམ་དགུ་བརྩེགས་ལྕགས་རི་མུ་ཁྱུད་སྒོ་བཞི་ཅན་ཞིག་གི་ཤར་སྒོ་ནས་ཞུགས་པས་དེར་རྣལ་འབྱོར་པ་དབྱུག་པ་ཐོགས་པ་ཞིག་གིས་ཁྱོད་འདི་ནས་མ་འོང་། ཤར་ལྷོ་ནུབ་གསུམ་གྱི་སྒོ་གསུམ་བགྲོད་ཟིན་ཚར་བས། ད་རེས་བྱང་སྒོ་ནས་ཞུགས་ཤིག་ཟེར་བས་ཕྱིར་ལོག་སྟེ་དེ་བཞིན་འཇུག་པས། དེ་ན་རྡོ་རྗེ་འཆང་བློ་གཏེར་དབང་པོ་འདྲ་བའི་རྣལ་འབྱོར་པ་ཞིག་འདུག་པ་ལ། ད་ང་གང་དུ་འགྲོ་སྨྲས་པས་ཁྱོད་ཀྱི་ལམ་སྣ་ངས་བྱེད་གསུངས་ནས་ལག་པ་ལ་བཟུང་སྟེ་ཁྲིད་པས་སྒོ་ཁྱམས་ཤིན་ཏུ་ཡངས་པ་ཞིག་ཏུ་སླེབས། རྣལ་འབྱོར་པ་དེ་ལ་ད་ལྟའི་གྲོང་ཁྱེར་དེ་གང་རེད་དྲིས་པས། འདི་བྱང་ཤམ་བྷ་ལའི་གྲོང་ཁྱེར་ཀ་ལཱ་པ་སྟེ་ཆ་བསགས་བྱེ་བ་འབུམ་སྡེ་ཟེར། ཕོ་བྲང་འདི་དུས་འཁོར་བློས་བསླངས་རེད་ཟེར་མ་ཐག་སྔར་ལས་ཀྱང་དགའ་བ་ཞིག་བྱུང་། བཅོམ་ལྡན་འདས་ནམ་མཇལ་སྙམ་ནས་ཕྱིན་པའི་ངང་དེར་ལྷ་མོ་མང་པོ་འདུས་ནས་མེ་ཏོག་དོར་ཟེར་བས་སེམས་ཀྱིས་དོར་ན་ལོས་ཆོག་བྱས་པས་ཆོག་ཡོང་ཟེར་བས་མེ་ཏོག་ལྗང་གུ་ཞིག་དོར་བའི་མོས་པ་བགྱིས་པའི་དེ་མ་ཐག་ཕྲིན་ལས་དུས་ཀྱི་འཁོར་ལོའི་དཀྱིལ་འཁོར་གྱི་བཀོད་པ་བཀྲ་ལམ་མེར་མཐོང་། གཙོ་འཁོར་ཀུན་དགྱེས་པའི་གར་དང་བཅས་པའི་ཞལ་ནས། སྣང་སྟོང་དུས་ཀྱི་དབང་། གྲགས་སྟོང་འཁོར་ལོའི་དབང་། རིག་སྟོང་མཉམ་ཉིད་ཀྱི་དབང་། མཐར་ཐུག་དྲན་པ་མཁའ་ཡི་རྡོ་རྗེའི་དབང་ཞེས་བྱ་བ་རྣམས་བརྡ་དང་སྤྲོས་པ་དུ་མ་དང་བཅས་ཏེ་སྩོལ་བའི་མཐར། རྟེན་དང་བརྟེན་པ་འོད་ཀྱི་རྣམ་པར་རང་ལ་ཐིམ་པའི་ངང་ནས་ཕྱིར་འོང་བས་ཀུན་དགའ་ར་བ་མཛེས་པ་ཞིག་ཏུ་རིན་པོ་ཆེ་སྣ་ཚོགས་ལས་གྲུབ་པའི་ཁྲི་སྟོང་པ་ཞིག་ལ་ལྷ་མོ་མང་པོས་མཆོད་འདུག་པ་ལྷ་མོ་གཅིག་ལ་འདི་སུའི་ཁྲི་རེད་སྨྲས་པས། བོད་ཡུལ་དུ་མི་ཕམ་ཞེས་པ་དེ་ད་ལྟ་ཆོས་རྒྱལ་ཀ་ལཱ་པའི་སྲས་སུ་འཁྲུངས་ཡོད་པས་ད་ཕན་ལོ་བརྒྱད་ཙམ་ན་དེ་རྒྱལ་ཐབས་ལ་དབང་བསྐུར་བའི་ཁྲི་ཡིན་ཟེར། དེ་ལ་མཚན་ཅི་ལགས་དྲིས་པས། གཽ་ཤམ་བྷ་ལའི་སྐད་དུ་གསང་འཛིན་གོ་གསུང་། མཆན། རི་མ་འགགས་པ་མཚན་ཟེར་བ་དེ་འདྲ་ཞིག་གི་ངང་གསལ་སྣང་དེ་འགགས། ཡང་དུས་གཅིག་ནམ་མཁའ་ནས་ཨེ་ཝཾ་ཞེས་པའི་སྒྲ་གྲགས་པ་དང་། ཉམས་སྣང་ལ་དཔལ་དུས་ཀྱི་འཁོར་ལོའི་དཀྱིལ་འཁོར་རྟེན་དང་བརྟེན་པ་ཤིན་ཏུ་གསལ་བར་མཐོང་། བུ་སྟོན་རིན་ཆེན་གྲུབ་ཏུ་སྐྱེ་བ་བཞེས་པ་ཡང་དྲན། གཙོ་བའི་ཞལ་ནས་སྔགས་བཏུ་ཞིག་ལ་ཨ་བྷི་ཥེས་བརྒྱན་པ་ཨེ་ཝཾ་མཱ་ཡཱ་ཞེས་བྱ་བའི་གདམས་པ་ཐོབ་པ་དང་། ཡང་མནལ་ལམ་གྱི་ཚུལ་དུ། ཐོད་པ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་ནང་དུ་མི་མགོ་སྐམ་རློན་རྙིང་གསུམ་གྱི་བརྩིགས་པ་བྱས་པའི་གཞལ་ཡས་ཁང་ནང་ལྷ་ངོ་མི་ཤེས་པའི་ཞི་བ་དང་ཁྲོ་བོ་ཉམས་མཚར་བ་མང་པོའི་ཞལ་ནས། ཀཱ་ལ་ཙཀྲ་ཨེ་ཝཾ་སོགས་ལེགས་སྦྱར་གྱི་སྐད་དུ་རྒྱུད་ཀྱི་ཚིག་འདྲ་བ་མང་པོ་གསུངས་པའི་ཉམས་དེ་ལས་སད་པ་ན་སྔར་དང་མི་འདྲ་བའི་གསལ་སྟོང་གི་ཉམས་སྐྱེས། གང་ཅིར་ཟབ་ལམ་རྡོ་རྗེའི་རྣལ་འབྱོར་ལ་ཚེ་སྔོན་མའི་བག་ཆགས་ཤིན་ཏུ་མཐུག་པ་ཞིག་ཡོད་པས་ཚེ་འདིར་དུས་འཁོར་ལ་ཉམས་ལེན་མཐའ་འཁྱོལ་བྱེད་རྒྱུ་བྱུང་ན་ལམ་གཞན་ལ་འབད་པ་བས་འདིས་མྱུར་སྙམ་གསུང་། ཀུ་སེ་གསེར་ལྗོངས་དགོན་དུ་བཞུགས་སྐབས། ནུབ་གཅིག་གི་ཐོ་རངས་ཁར་རྗེ་བཙུན་ཨེ་ཝཾ་པ་ཆེན་པོ་ཉིད་ཧ་ཅང་མི་གསལ་བ་མི་ཚད་ཙམ་ཞིག་བར་སྣང་དུ་བཞུགས་པ་མཐོང་མ་ཐག་གསོལ་འདེབས་རབ་དཀར་མ་དབྱངས་རྟ་སྙན་པར་དྲངས་ཏེ། རྩེ་གཅིག་གུས་པས་གསོལ་བ་བཏབ་པ་ན། ངོར་ཆེན་ཉིད་དཔལ་དགྱེས་རྡོར་ཡབ་ཡུམ་དུ་གྱུར་ཏེ། དབང་གི་སྣོད་རུང་ངོ་ཞེས་པའི་སྒྲ་ཞིག་ནམ་མཁའ་ནས་གྲགས་པ་དང་། ནམ་མཁར་དབང་ལྷ་རྣམས་འདུས་ཏེ་དབང་བཞི་ཅིག་ཅར་དུ་བསྐུར། དབང་གསུམ་པའི་སྐབས། རྡོ་རྗེ་བདག་མེད་མ་ལས་གཉིས་པ་ཞིག་ཆད་དེ་རང་ལ་འཁྲིལ་བ་དང་། དབང་ལྷ་རྣམས་ནས། རྡོ་རྗེ་སྙེམས་མའི་བདག་པོར་དབང་། །ཞེས་པའི་སྒྲ་དང་བཅས་བདེ་སྟོང་གི་ཏིང་ངེ་འཛིན་གྱི་ངང་དུ་ཡུན་རིང་པོར་འབྱམས་ཀླས་པའི་ངང་ཉམས་སད་པ་ན་གཙོ་བོ་དབང་ལྷ་དང་བཅས་པ་ཡལ། དེ་ཕྱིན་བདེ་སྟོང་གི་ཉམས་སྔར་ལས་ཀྱང་ཆེ་བ་བྱུང་གསུངས། དེ་སྐབས་ངོར་ཆེན་བླ་མའི་རྣལ་འབྱོར་ཁྱད་པར་འཕགས་པའང་རྩོམ་པར་མཛད་དོ། །ཆུ་ཁྱི་ཟླ་བ་བདུན་པའི་ཚེས་བཅུ་གསུམ་གྱི་ནུབ་མོ་རྨི་ལམ་འོད་གསལ་གྱི་སྣང་ཆར། ལྷ་མོ་རྡོ་རྗེ་རབ་བརྟན་མ་བྱུང་ནས། ད་རེས་བྱང་ཕྱོགས་ལྕང་ལོ་ཅན་དུ་ཕེབས་ན་དུས་ལ་བབ་ཟེར། ང་ལ་ཁྱོད་ཀྱིས་གྲོགས་བྱས་ན་འགྲོའོ་སྨྲས་པས། ད་ཕེབས་ཟེར་ནས་དྲེའུ་ཞིག་ཆིབས་ཏེ་ལྷ་མོའི་པང་ཐོག་ཏུ་བཞག་ནས་བར་སྣང་ནས་ཕར་ཕྱིན་པས་མུན་པ་འཁྲིགས་པའི་ནང་ཞིག་ཏུ་སོང་བ་དང་། གནོད་སྦྱིན་འཇིགས་སུ་རུང་བ་བགྲང་ལས་འདས་པས་ཤ་ཁྲག་ལ་རོལ་ཞིང་འཇིགས་པའི་རྐན་སྒྲ་རྡེབ་ཅིང་འདུག་པ་འཇིགས་དངངས་ཆེར་མ་སྐྱེས་པའི་ངང་ཉི་མ་ཤར་བ་ལྟ་བུའི་འོད་ཀྱིས་ཁྱབ་པར་གྱུར་པས་སྤྲོ་བ་ཆེར་བརྟས་པའི་ངང་། ཤིན་ཏུ་འཇིགས་ཤིང་སྐྱི་གཡའ་བའི་ཕོ་བྲང་དཀྱིལ་འཁོར་གྱི་བློས་བསླངས་ལྟ་བུ་ཞིག་མཐོང་། དེ་ཡི་ནུབ་སྒོ་ནས་ཞུགས་ཏེ་རིམ་གྱིས་བགྲོད་པས་དཔལ་ཕྱག་ན་རྡོ་རྗེ་ཉིད་ཤིན་ཏུ་ཁྲོ་བོའི་གཟུགས་ཅན་མཇལ་བས་ཤེས་པ་བརྒྱལ་ཐབས་སུ་གྱུར། དེ་ལས་སད་པ་ན་གསོལ་བ་རྩེ་གཅིག་བཏབ་པས། ཞལ་ནས་ཧཱུྃ་ཞེས་པའི་སྒྲ་འབྲུག་ལྟར་སྒྲོགས་པས་གནོད་སྦྱིན་སྲིན་པོ་ཕྲ་མེན་མང་པོ་འདུས་ནས་རོལ་ཅིག་ཁ་རྃ་ཁཱ་ཧི་ཞེས་ཟེར་བ་དང་མཉམ་དུ་དེ་ཐམས་ཅད་ཀྱིས་སྐུ་ལུས་ཟོས་སོང་བས་ཅུང་ཟད་འཇིགས་པའི་ངང་། ཡང་གཙོ་བོའི་ཞལ་ནས་ཧཱུྃ་སྒྲ་སྒྲོགས་པ་དང་མཉམ་དུ་སེམས་གཙོ་བོའི་ཐུགས་ཀར་ཐིམ་པས་ཐུགས་ཡིད་དབྱེར་མེད་དུ་འདྲེས་པའི་ཏིང་ངེ་འཛིན་ལ་འབྱམས་ཀླས་པའི་ངང་མནལ་སད། ས་འབྲུག་ལོར་དྲྭ་སྒང་བཞུགས་སྐབས་ཟླ་བ་དྲུག་པའི་ཚེས་བཅུའི་ཐོ་རངས་ཁར། མཁའ་འགྲོ་སྡེ་བཞི་རེད་སྙམ་པའི་བུད་མེད་དཀར་སེར་དམར་ལྗང་བཞི་ལྷག་གིས་ཐོན་ནས་ད་འགྲོ་ཟེར་བས། གར་འགྲོ་སྨྲས་པས་རྔ་ཡབ་གླིང་དུ་འགྲོ་ཟེར་བ་དང་འདུན་པ་གཏད་པ་ཙམ་གྱིས་རྔ་ཡབ་གླིང་ཡིན་སྙམ་པའི་ཟངས་རི་མང་པོ་ཡོད་པ་ཞིག་ཏུ་མཁའ་འགྲོ་བཞི་དང་བཅས་ཏེ་སླེབས། ཨོ་རྒྱན་དཔལ་རི་གར་ཡོད་བྱས་པས་འདི་རེད་ཟེར། འདིར་གཞལ་ཡས་ཁང་སོགས་མི་འདུག་བྱས་པས་ཁྱེད་ནས་ཨོ་རྒྱན་གྱི་ཆོས་དང་། བརྒྱུད་འཛིན་ལ་སྐུར་འདེབས་བྱས་པས་སྒྲིབ་ཟེར། སེམས་ལ་གནོང་རྣམས་དྲན་ཏེ་བཤགས་སྡོམ་དང་གསོལ་འདེབས་དྲག་ཏུ་བྱས་པ་དང་། སྐད་ཅིག་དེར་པདྨ་འོད་ཀྱི་གཞལ་མེད་ཁང་རྟེན་དང་བརྟེན་པ་མཇལ་དགའ་སྤྲོ་དད་གུས་ཚད་མེད་པ་སྐྱེས་པའི་ངང་ནས་ཕོ་བྲང་གི་ལྕགས་རིའི་སྒོ་བརྒྱུད་དེ་ནང་སྒོར་སླེབས་པ་དང་། ཕོ་བྲང་གི་དབུས་སུ། ཨོ་རྒྱན་མ་ཧཱ་གུ་རུ། མཐའ་སྐོར་དུ་རིག་འཛིན་བརྒྱད། རྗེ་འབངས་ཉེར་ལྔ། ཆོས་རྒྱལ་ཡབ་སྲས། གཏེར་སྟོན་བན་སྔགས་ཀྱི་ཆ་བྱད་ཅན་དུ་མ་དང་། མཁྱེན་བརྩེའི་དབང་པོ། རྗེ་གུ་ཎ་རྣམས་ཀྱང་བཞུགས་འདུག །སློབ་དཔོན་ཆེན་པོར་གསོལ་བ་བཏབ་པས། ཨོ་རྒྱན་རིན་པོ་ཆེའི་ཞལ་ནས། འཁོར་འདས་དབྱེར་མེད་ལྟ་བའི་གཞི་ཀློང་དུ། །སྣང་སྟོང་ཟུང་འཇུག་སྒོམ་པ་ལྷུན་གྱིས་གྲུབ། །གང་ཤར་རང་བྱུང་སྤྱོད་པ་སྐྱོང་བྱས་ན། །འབྲས་བུ་མངོན་རྫོགས་རྒྱལ་པོ་ཨེ་མ་ཧོཿཞེས་པ་དེ་གཟིགས་སྣང་འདི་མ་བྱུང་བའི་སྔོན་དུ་ཨོ་རྒྱན་མ་ཧཱ་གུ་རུ་ཐེངས་གཅིག་མཇལ་བ་ན་གསུངས་པ་དེ་སླར་ཡང་གསུངས་མཛད་པས་ལྟ་སྒོམ་སྤྱོད་འབྲས་ཀྱི་གནད་ལ་སྔར་བས་ཀྱང་ངེས་ཤེས་གཏིང་ཚུགས་པ་སྐྱེས་ཤིང་ཐུགས་ཡིད་བསྲེས་ཏེ་མཉམ་པར་བཞག །ཡང་གུ་རུའི་ཞལ་ནས་ཁྱོད་ཀྱིས་ང་ལ་བརྙས་པའི་ཀུན་སློང་མ་བྱེད་ཅིག །ཁྱོད་གཏེར་སྟོན་རྒྱ་ཞང་ཁྲོམ་གྱི་ལུས་བླངས་སྐབས་དཔལ་གཤིན་རྗེའི་གཤེད་ཀྱི་དཀྱིལ་འཁོར་དུ་བཅུག་པ་པོ་དེ་ང་ཡིན། སྔགས་ཀྱི་སྡོམ་པ་ནི་བྱང་ཆུབ་བར་དུ་སྲུང་དགོས་སོགས་ཀྱི་ཞལ་གདམས་མང་པོ་གནང་བའི་མུར། ཁྱོད་མ་འོངས་པ་ན་འཇིག་རྟེན་གྱི་ཁམས་རྣམ་པར་སྣང་བ་འོད་ཀྱིས་ཀུན་ནས་འགེངས་པའི་ཞིང་དུ་སངས་རྒྱས་དྲི་མེད་གྲགས་པའི་རྒྱལ་པོར་འཚང་རྒྱ་བའི་གྲོགས་སུ་ངས་ཀྱང་བགྱིའོ་ཞེས་པའི་ལུང་གིས་དབུགས་དབྱུང་ཐོབ་པའི་ངང་གསལ་སྣང་དེ་ལས་སད། དེ་རྗེས་ཟླ་བ་གཅིག་ཙམ་ལ་གཉིས་སྣང་གི་རྟོག་པ་ཡེ་མ་སྐྱེས་གསུངས། ཡང་སྔ་མོ་ཞིག་ཨོ་རྒྱན་གསོལ་འདེབས་དུས་གསུམ་སངས་རྒྱས་འབུམ་ཐེར་ལྷག་བསོགས་སྐབས་ཨོ་རྒྱན་རྡོ་རྗེ་འཆང་གི་གསང་གསུམ་བྱིན་རླབས་དངོས་སུ་ཐོབ་པ་དང་གོང་དུ་བསྟན་པའི་ལྟ་སྒོམ་སྤྱོད་འབྲས་གནད་དྲིལ་དེ་གསུངས་པ་ཡིན་འདུག །ཡང་རྨུགས་སངས་སུ་གནམ་ཆོས་མི་འགྱུར་རྡོ་རྗེའི་སྐུ་གདུང་ལ་ཞབས་སྐོར་བསོགས་སྐབས། འོད་ཕུང་གི་ཀློང་དུ་སྟོན་པ་སངས་རྒྱས་བཅོམ་ལྡན་འདས་གཙོ་འཁོར་གསུམ་ཞལ་གཟིགས་པ་ན། ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་ཐུགས་འདུན་རྩེ་གཅིག་མཛད་མཐར། སྟོན་པ་གཙོ་འཁོར་གསུམ་རྗེ་ཉིད་ལ་ཐིམ་ཞེས་ཞལ་སློབ་འགའ་ཡི་ངག་ལས་ཐོས་སོ། །འདི་རྣམས་ནི་འཕགས་ཆེན་ཡེ་ཤེས་གཟིགས་པའི་སྤྱོད་ཡུལ་ཅན་རྣམས་ཀྱི་གཟིགས་སྣང་དང་མཉམ་ལ་ཤིན་ཏུ་ངོ་མཚར་ཆེ་ཞིང་གཞན་ལས་ཁྱད་པར་འཕགས་པ་ཤིན་ཏུ་གསང་བར་འོས་ན་ཡང་དད་ལྡན་སློབ་མ་རྣམས་སྤྲོ་བ་བསྐྱེད་པའི་ཆེད་དུ་བཀོད་པ་ལ་བླ་མ་དང་ཡེ་ཤེས་མཁའ་འགྲོ་རྣམས་བཟོད་པར་མཛོད་ཅིག །རྡོ་རྗེའི་ལམ་ནས་རྡོ་རྗེའི་སྦས་པ་མངོན་མཛད་བླ་མ་རྡོ་རྗེ་འཆང་། །རྒྱལ་བ་རྣམས་དང་དགོངས་པ་རོ་གཅིག་རྒྱལ་བའི་མཛད་པ་མཐའ་ཀླས་པ། །ཉི་ཚེའི་བློ་ཡིས་དཔག་པར་དཀའ་ཞིང་ཡེ་ཤེས་དག་པའི་གཟིགས་མོ་ལ། །ཉིན་མཚན་དབྱེར་མེད་འོད་གསལ་ཆེན་པོར་དགོངས་པ་རབ་འབྱམས་གང་དེར་འདུད། །ཤིན་ཏུ་གསང་བ་མཆོག་གི་རྣམ་པར་ཐར། །དཀྱིལ་འཁོར་ཁྱབ་བདག་ཉིད་ཀྱིས་དགོངས་པ་སྟེ། །གསང་གསུམ་མི་ཟད་རྒྱན་གྱི་འཁོར་ལོ་ཡི། །ཡོན་ཏན་རིན་ཆེན་ཚོམ་བུ་རྣམ་པར་བཀྲ། །སྐལ་མེད་སྲིན་བྱའི་ཚོགས་ལ་མུན་པར་སྣང་། །སྐལ་བཟང་བློ་གྲོས་ཅན་ལ་དད་པའི་གཉེན། །འདི་ལ་དཔྱད་ན་རྒྱལ་སྲས་འཕགས་ཆེན་དང་། །མི་ཕྱེད་དགོངས་པ་རོ་གཅིག་ཉིད་དུ་ངེས། །གང་ཞིག་ལྷུན་པོའི་རྩེ་མོར་ཕྱིན་པ་དང་། །མཚུངས་པའི་གཟིགས་སྣང་ཆུ་ཟླའི་རོལ་གར་འདི། །རྡུལ་དང་མ་འདྲེས་དངུལ་ཆུའི་ཁྱད་པར་བཞིན། །དཔལ་ལྡན་བླ་མ་ཁོ་ནའི་སྤྱོད་ཡུལ་ལགས། །གང་ཞིག་རྗེས་སུ་བརྩེ་བའི་ཏམྦུ་ར། །སྐལ་བཟང་རྣ་བའི་བཅུད་དུ་ལྷུང་བ་ན། །དད་གུས་སྤྲོ་བའི་སྤུ་ལོང་ཆེར་གཡོས་ཤིང་། །ད་ལྟ་མཇལ་དུ་ཡོད་ན་ཅི་མ་རུང་། །ཞེས་བར་སྐབས་ཀྱི་ཚིགས་སུ་བཅད་པའོ། །གཉིས་པ་གཞན་དོན་དུ་འཆད་རྩོད་རྩོམ་པའི་ཕྲིན་ལས་ལ་མངའ་བརྙེས་པའི་ཚུལ་ལ་གསུམ་ལས། དང་པོ་འཆད་པ་ཉི་མའི་འོད་ཀྱིས་དཔྱོད་ལྡན་བློ་ཡི་པདྨོ་རྒྱས་པར་མཛད་པའི་ཚུལ་ནི། དེ་ཡང་རྗེ་བླ་མ་གསང་བདག་རྡོ་རྗེ་འཛིན་པ་ཆེན་པོ་འཇམ་དབྱངས་བློ་གཏེར་དབང་པོའི་ཐུགས་སྲས་ཀྱི་ཐུ་བོར་གྱུར་པ་མ་ཟད་རྗེ་དེ་ཉིད་སྡེ་དགེ་ནས་སྒ་སྟོད་དུ་ཕེབས་ཁར་ཆོས་ཀྱི་རྒྱལ་ཚབ་ཏུ་འཇོག་པར་མཛད་པ་དང་། རྗེ་བླ་མའི་བཀའ་ལས་མཁན་བསམ་བློ་འདི་སྦྱངས་སྟོབས་ཀྱི་ཤེས་རབ་རྒྱ་མ་ཆེ་རུང་སྒོམ་བྱུང་གི་ཤེས་རབ་བརྡོལ་བ་ཡིན་ཞེས་ཞལ་ནས་དངོས་སུ་ཐོས། ཀཿཐོག་སྐྱབས་མགོན་སི་ཏུ་མ་ཧཱ་པཎྜི་ཏས་ཀྱང་མཁན་བསམ་བློ་འདི་དེང་སང་ས་སྐྱའི་བསྟན་པའི་སྲོག་ཤིང་ལྟ་བུ་རེད་འདུག །འདི་ལས་ཡོན་ཏན་ལྷག་པ་གདན་ས་གོང་འོག་ནའང་དཀོན་ན་ཅི་ཤེས་ཁོང་གིས་ཀྱང་ལམ་འབྲས་ཞུ་སྙམ། ཁྱེད་ནས་ཀྱང་དབང་ལུང་ཇི་ཐོབ་གྱིས། ཁྱད་པར་ཀྱེ་རྡོར་རྒྱུད་གསུམ་ལ་གོ་བ་བཟང་ཞེས་ཕེབས་པས་མཚོན་རིས་མེད་ཀྱི་བསྟན་འཛིན་ཆེན་པོ་རྣམས་ཀྱིས་བསྔགས་པའི་མེ་ཏོག་པུཎྜ་རཱི་ཀ་འཐོར་བ་ཡང་དོན་ལ་གནས་ཤིང་མདོ་སྔགས་ཀྱི་གཞུང་གང་འཆད་པ་ནའང་ཚིག་ཉུང་དོན་འདུས་བརྗོད་པ་གསལ་བ་སྐབས་སུ་བབ་པའི་ཚིག་དོན་འབྲེལ་ཆགས་པས་འཆད་ཅིང་གཞན་རྒྱུད་ཀྱི་ཐེ་ཚོམ་ཆོད་ངེས་མཛད། ཁྱད་པར་རྡོ་རྗེ་ཐེག་པའི་རྒྱུད་སྡེ་རིན་པོ་ཆེ་རྣམ་པ་བཞི་ལ་སོ་སོའི་བབ་ཀྱི་ཆོ་གའི་འགྲོས་ཕྱག་བཞེས་ཐམས་ཅད་མ་ནོར་མ་འཁྲུགས་ཤིང་། ཕོ་ཚོད་དང་སླ་ཆོས། དེས་ཆོག་མི་མཛད་པར་རྡོ་རྗེ་འཆང་ཀུན་དགའ་བཟང་པོའི་ཕྱག་བཞེས་རྣམ་པར་དག་པ་ཇི་ལྟ་བ་བཞིན་མཛད་པ་དང་། བཀའ་ལས་ཆོས་སྐྱོང་སོགས་སྙན་བརྒྱུད་ལ་ཚར་ལུགས་གནད་ཆེ་ཡང་རྒྱུད་སྡེའི་ཕྱག་བཞེས་ངོར་པ་འདྲ་མེད་པས་དེ་རྗེས་འབྲངས་དགོས་གསུངས། དེ་ལྟར་འཆད་པ་དེ་ཡང་རང་ཉིད་མཁྱེན་སྟོབས་རྫོགས་པའི་བདག་རྐྱེན་ལས་བྱུང་བ་ཡིན་ཏེ། སྐུ་ན་ཕྲ་མོའི་དུས་རྒྱུད་སྡེ་མི་འདྲ་བ་བཅུ་གཅིག་ཙམ་ཞིག་གི་སྒྲུབ་ཐབས་དཀྱིལ་ཆོག་ཐུགས་སུ་ཆུབ་པ་དང་། ས་ངོར་ཚར་གསུམ་གྱི་ཆོ་གའི་ཕྱག་བཞེས་འདོན་རྟ་དབྱངས་བརྡུངས་དཀྲོལ། དཀྱིལ་འཁོར་བྲི་ཐིག་རྣམས་ལེགས་པར་མཁྱེན་ཞིང་། ཉིན་རེ་ཤོག་ལྡེབ་མདའ་ཚད་ལྔ་དྲུག་རེ་རྟག་པར་འཛིན་ནུས་ཤིང་གཞུང་རིག་གནས་སོགས་ཀྱི་རྩ་བ་འགའ་རེ་ཡང་ཐུགས་ལ་བཟུང་། གཞུང་གི་བཀའ་གནད། བླ་མའི་རྣམ་ཐར་ལྟ་བུ་དྲིས་ན་དེ་དང་དེའི་ཐད་ནས་ཚིག་དོན་མ་འཁྲུལ་པ་ཤར་གྱིས་ཐོན་པ་དང་མཁས་པའི་བཞེད་པ་རྣམས་འདི་དང་འདི་ལྟར་ཡིན་ཞེས་མ་འདྲེས་པ་ལེགས་པར་བཤད་པར་མཛད། དབང་བསྐུར་གྱི་དུས་སུའང་ཕལ་ཆེར་ཐུགས་ཐོག་ནས་གསུང་། ཕལ་ཆེར་དབང་བཤད་དང་ཁྲིད་དཔེ་ཡོད་པ་ཙམ་ལ་མ་ལྟོས་པའི་གསུང་བཤད་ཟུར་རྒྱན་གྱིས་ངོ་སྤྲོད་གནད་དུ་ཐེབས་པར་མཛད་པ་དང་། ཁྱད་པར་རྡོ་རྗེ་འཆང་ཚར་པ་ཡབ་སྲས་ཀྱི་སྙན་བརྒྱུད་ཟབ་དོན་སྐོར་གྱི་ཕྱག་བཞེས་ལ་རྗེ་འདི་ལྟ་བུའི་མཁྱེན་དཔྱོད་ཅན་འབྱུང་བར་དཀའ་ཞིང་ཅིའི་ཕྱིར་ཞེ་ན་སྔོན་གོམས་ཀྱི་བག་ཆགས་སྟོབས་སུ་གྱུར་པ་དང་། སྙན་བརྒྱུད་ཀྱི་དཔེ་ལ་དཔྱད་དོན་རྫོགས་ཤིང་། བླ་མ་རྡོ་རྗེ་འཆང་གི་མན་ངག་ཟབ་མོས་ལེགས་པར་བརྒྱན་པས་རྗེ་འདིའི་ཕྱག་བཞེས་ལ་ཡིད་རྟོན་གྱིས་མི་ཉམས་པར་གཟུང་བ་གཅེས་སོ། །དེ་ལྟར་མཁྱེན་རླབས་ཀྱི་དཀྱིལ་འཁོར་རྒྱས་པ་ལས་བྱུང་བའི་འཆད་པའི་རྣམ་གྲངས་ཀྱང་། རྩ་བའི་བླ་མ་བློ་གཏེར་ཞབས་ཀྱིས་སྦྱིན་བདག་མཛད་ནས་ལྷུན་གྲུབ་སྟེང་དབྱར་གནས་ལྷ་ཁང་དུ་ཨ་མདོ་དྷཱི་ཕུ་ཆོས་རྗེ་སོགས་འདུས་པ་བརྒྱ་ཕྲག་ལ་རྒྱལ་བཀའ་རིན་པོ་ཆེའི་བཀླག་ལུང་ལན་གཅིག །བྲག་ར་ཞབས་དྲུང་བཀྲ་ཤིས་རིན་པོ་ཆེ་སོགས་ལ་ཚར་གཅིག་གསུངས་པས་བྲག་ར་རིན་པོ་ཆེས་ཚར་གསུམ་གནང་བས་ཕྲིན་ལས་ཆེ་བར་བྱུང་། དེའི་སྔ་རྗེས་དུས་ཚོད་གང་ཡིན་མ་ངེས་ཀྱང་རྒྱལ་བཀའ་བཀླག་ལུང་ཚར་གཅིག་སྟེ་སྔ་ཕྱི་ཚར་གསུམ་གནང་། ཁོ་བོས་སྒྲུབ་ཐབས་ཀུན་ལས་བཏུས་པ་བློ་གཏེར་ཞབས་ལ་གསོལ་བ་བཏབ་ཀྱང་ཞལ་ནས་མཁན་པོ་ཉིད་མཁྱེན་བརྩེ་ནུས་གསུམ་འགྲན་ཟླ་མེད་ཅིང་བུམ་པ་གང་བྱོའི་ཚུལ་དུ་ཡོད་པས་དེར་ཞུས་ན་ཁོང་ལས་ཐོབ་པ་དང་ཁྱད་པར་མེད་ངེས་ཡིན་གསུངས་པ་དང་། སྔར་ལ་སེ་མགོར་ཐོག་མར་མཇལ་ཞིང་བླ་མ་ས་ཆེན་གྱི་བསྟོད་པ་ཚངས་དབང་གཙུག་ནོར་མའི་ཆོས་འབྲེལ་སྩོལ་བ་ནས་བརྩམས་ཐུགས་བརྩེ་བ་ཆེན་པོས་དགྱེས་བཞིན་དུ་རྗེས་སུ་བཟུང་ལྷག་པར་ཆུ་ཡོས་ལོར་རྫོང་སར་དུ་ཕེབས། སྒྲུབ་ཐབས་རིན་པོ་ཆེ་ཟླ་བ་བཞིའི་བར་ཤིན་ཏུ་རྒྱས་པ། དབང་རྗེས་བྱིན་རླབས་ཁྲིད་ལུང་བཅས་གནང་བར་མཛད། གཞན་ཡང་། མཁའ་སྤྱོད་བྱིན་རླབས། དམར་པོ་སྐོར་གསུམ་གྱི་རྗེས་གནང་ཐུན་མིན། མགོན་པོ་ཆེ་ཆུང་གི་རྗེས་གནང་ཐུན་མོང་ཐུན་མིན་ཁ་ཤས། མཁའ་སྤྱོད་བེ་བུམ་ལུང་། དམར་པོ་སྐོར་གསུམ་གཞུང་ཧྲག་བསྡུས་དང་། གཅེས་བཏུས་པོད་རྫོང་སར་འདུས་སྡེ་ལས་ངོར་གྱི་འདོན་ཆོག་སྐོར་ཡོངས་སུ་རྫོགས་པ་དང་། ཆོས་སྤྱོད་པོད་ཆུང་ལུང་། སྔ་རྗེས་འགའ་ཞིག་ཏུ་ཀྱེ་རྡོར་ལམ་དབང་སོགས་མང་དུ་མནོས་པའི་མཐར་ཛེ་ཏཱ་རའི་ཚེ་དཔག་ལྷ་དགུའི་དབང་ཐོབ་པ་གསུང་གི་བདུད་རྩི་དངོས་ཀྱིས་ཐོབ་པའི་ཐ་མའོ། །ལྷུན་གྲུབ་སྟེང་དུ་ས་ལུག་ལོར་སྒྲུབ་བཏུས་ཕྱེད་ཙམ་དང་། འཕྲོས་ལྕགས་བྱར་གནང་། ཤིང་བྱི་ཟླ་བ་དགུ་པའི་ཡར་ཚེས་ལ་ཡེ་ན་དགོན་པས་ཆེད་དུ་གདན་འདྲེན་ཞུས་ཏེ་དབང་ལུང་མང་དུ་གསུངས་ཤིང་དེ་སྐོར་གྱི་དངོས་རྫས་བྱུང་བ་རྣམས་དགོན་དེར་མི་འཁྲུགས་པའི་སྟོང་སྐུ་བརྒྱ་ཕྲག་ལྷག་ལྡེབས་བྲིས་གནང་བར་མཛད། མེ་སྟག་ཟླ་བ་བདུན་པའི་ནང་གསེར་ལྗོངས་སུ་ཕེབས། ངོར་དཀྱིལ་བདུན། མཁའ་སྤྱོད་སོགས་དབང་ཆོས་མང་དུ་སྩལ། འདིའི་རྣལ་འབྱོར་མའི་བྱིན་རླབས་སྐབས་བདུད་རྩི་མདོག་དམར་པོ་འཕྱུར་བ་ཐམས་ཅད་ཀྱིས་མཐོང་། འདུ་ཁང་དུ་བྱོན་པ་ན་དཔལ་སྤུངས་དཀོར་བདག་ཞིག་ལོགས་བྲིས་ཡོད་པ་སྔོན་དུ་དེ་འདྲ་ཡོད་རྒྱུ་དགོངས་པར་མི་མངའ་ཡང་ཕེབས་འཕྲལ་དུ་བསུབ་པར་མཛད་དེ་ཤུལ་དུ་ཛཾ་དམར་བྲི་བར་མཛད། དེ་སྐབས་ཀྱི་དངོས་རྫས་ཕལ་ཆེར་གྱིས་དགོན་དེར་ཆོ་འཕྲུལ་ཟླ་བའི་ཚེས་གཅིག་ནས་བཅོ་ལྔའི་བར་བསྟན་པ་རྒྱས་ཆོག་གི་ཐེབས་སོགས་གནང་། མེ་ཡོས་ལོར་ཐར་རྩེ་མཁན་ཆུང་རིན་པོ་ཆེ་སོགས་ལ་མགོན་པོ་བཀའ་བབ་བཞིའི་དབང་རྗེས། བྲག་རྫོང་ཕྱི་ཁྲིད། ཞལ་གྱི་རྗེས་གནང་དང་། གསང་ཁྲིད། ཞལ་པོད་བཅས་དང་། ལོ་དེའི་ཟླ་བ་ལྔ་པའི་ནང་དྲྭ་སྒང་དུ་ཕེབས། འཇམ་རྒྱལ་རིན་པོ་ཆེ་དང་། སྒ་ཐར་ལམ་སྡེ་གཞུང་མཆོག་སྤྲུལ་སོགས། བླ་སྤྲུལ་དགེ་འདུན་དྲུག་ཅུ་སྐོར་ལ་ས་སྐྱ་བཀའ་འབུམ་གྱི་ལྗགས་ལུང་། ཚར་ལུགས་འཇིགས་བྱེད་དབང་ཁྲིད། རྭ་པོད་བཅས་གནང་། སྔ་མོ་ཞིག་ཏུ་བྲག་ར་རིན་པོ་ཆེ་སོགས་ལ་ས་སྐྱ་བཀའ་འབུམ་ཚར་གཅིག་གསུངས། ལྕགས་རྟ་ལོར་ཟླ་བ་བདུན་པའི་ཚེས་སྐོར་ཡེ་ན་དགེ་སློང་ཤེས་རབ་ཕུན་ཚོགས་གཙོས་བདུན་ལ་ཚར་ལུགས་འཇིགས་བྱེད་དབང་ཁྲིད་ཤིན་ཏུ་རྒྱས་པ། རྗེ་ཉིད་ཀྱི་གསུང་རྩོམ་ཕལ་ཆེར་གྱི་ལུང་གནང་། དེའི་སྔ་རྗེས་ཞིག་ཏུ་ཀྱེ་རྡོར་རྒྱུད་ཀྱི་བཤད་པ་ཤིན་ཏུ་རྒྱས་པ་རབ་བརྟན་མཁན་པོ་སོགས་ཉུང་བསྡུས་ལ་གནང་། སྔ་ཐོག་ཞིག་ཏུ་སྐྱབས་རྗེ་སི་ཏུ་པཎྜི་ཏས་ཀཿཐོག་ཏུ་གདན་འདྲེན་མཛད་དེ་སྒྲུབ་བཏུས་སྔར་མཁྱེན་བརྩེ་རིན་པོ་ཆེའི་མདུན་ནས་མ་གསན་པའི་ཁ་སྐོང་སྐོར་དང་། ཀྱེ་རྡོར་རྒྱུད་བཤད་གསན་པར་མཛད། རྗེ་བླ་མ་འདི་གཉིས་ཐུགས་ཡིད་གཅིག་འདྲེས་སུ་གྱུར་ཅིང་རྗེ་འདིས་ཀྱང་། དེང་དུས་རྒྱལ་བསྟན་རིས་མེད་ལ་ཆོས་ཀྱི་སྤྱན་རས་ཡངས་ཤིང་མདོ་སྔགས་གང་ལའང་གཟིགས་རྒྱ་དང་མཁྱེན་དཔྱོད་འདི་དང་མཚུངས་པ་སུའང་མེད་ཅིང་ངེས་པར་མ་ཧཱ་པཎྜི་ཏ་ཡིན་འདུག་ཅེས་བསྔགས་པའི་གླིང་བུ་འཁྲོལ། རྗེས་སོར་སི་ཏུ་པཎ་ཆེན་སྐུ་གཤེགས་པ་ནའང་རྒྱལ་ཁམས་མུན་རུབ། དགུང་ལོ་ཉུང་བ་སྐུ་ཚེ་མཐར་མ་ཕྱིན་པ་དེ་འདྲ་གྱོང་ཆེ་བ་འོངས་རྒྱུ་མེད་ཅེས་སྤྱན་ཆབ་བསིལ་བ་ཙམ་གྱི་ཐུགས་ངལ་ཆེན་པོ་མཛད་དོ། །ཞེ་ཆེན་དུ་མཁས་གྲུབ་གཉིས་ལྡན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་མཇལ་བར་ཕེབས་སྐབས་གོང་དུ་སྨོས་པའི་དབང་ཆོས་རྣམས་ཚུར་གསན་པ་དང་། ཕར་ལའང་ཀླུ་དབང་རྒྱལ་པོའི་རྗེས་གནང་ལུང་། ཉེ་སྲས་བརྒྱད་ཀྱི་སྒོམ་ལུང་། ས་འཇམ་སྦག་སྒྲུབ། ཐོགས་མེད་བཀའ་འབུམ་གྱི་ལུང་རྣམས་ཕུལ། ཟླ་བ་གཅིག་ལྷག་བཞུགས། ཆོས་དང་མན་ངག་གི་བགྲོ་གླེང་མང་པོ་མཛད་པས་དེ་ལས་སྐྱིད་པ་མ་བྱུང་། རྒྱལ་ཚབ་རིན་པོ་ཆེ་ཆོས་ཀྱི་གཏམ་ཅི་ཙམ་གསུངས་ཀྱང་མཐར་རྫོགས་ཆེན་གྱི་ནང་དུ་འགྲོ་བ་ཞིག་འདུག་ངོ་མཚར་གསུངས། རྒྱལ་ཚབ་ཀྱི་བསྟན་བཅོས་རྣམས་ལའང་ཤིན་ཏུ་བསྔགས་ཤིང་གཅེས་སྤྲས་ཆེན་པོ་མཛད། དཔལ་སྤུངས་སུ་སྐུ་ཞབས་སི་ཏུ་རིན་པོ་ཆེས་སྔ་རྗེས་གཉིས་ལ་གདན་འདྲེན་ཚེ་དབང་སོགས་དང་ཞབས་བརྟན་གསུང་སྒྲུབ་དང་། ལན་རྗེས་མའི་སྐབས་རྟེན་བརྟེན་པ་གསར་བཞེངས་ལ་རབ་གནས་ཤིན་ཏུ་རྒྱས་པ་མཛད། དྲྭ་སྒང་མཚམས་གྲྭ་སྒྲུབ་ཐེངས་གཉིས་ཀྱི་རིང་དབང་ཁྲིད་མན་ངག་ཕྱག་བཞེས་རྣམས་སྐུ་ངལ་ཁྱད་དུ་བསད་དེ་གནང་ཞིང་སྒྲུབ་མཆོད་སོགས་ཀྱི་དབུར་ཕེབས་པས་བསྒྲིགས་ལམ་ཚགས་སུ་ཚུད་པ་དང་། ལྕགས་རར་ཞབས་བརྟན་འཇིགས་བྱེད་སྒྲུབ་གྲྭ་ལའང་དེ་མཚུངས་གནང་བས་སྒྲུབ་གྲྭ་འདི་གཉིས་ལ་ལུགས་གཉིས་ཀྱི་སྒོ་ནས་བཀའ་དྲིན་གཞལ་བར་དཀའ་བའོ། །དེ་ལྟར་འཆད་པ་རྣམ་པར་དག་པ་ཐུགས་བརྩེ་བ་ཆེན་པོས་བར་མེད་དུ་གནང་བས་གསུང་ལས་སྐྱེས་པའི་སློབ་མ་ཡང་། རྣལ་འབྱོར་གྱི་དབང་ཕྱུག་ཆེན་པོ་བྲག་ར་བླ་མ་རིན་པོ་ཆེ་བཀྲ་ཤིས་རྒྱ་མཚོ། ཐར་རྩེའི་མཁན་པོ་རྣམ་གཉིས། ཁང་སར་གྱི་མཁན་པོ་དོན་དཔལ། མཁས་ཤིང་གྲུབ་པ་བརྙེས་པའི་བླ་མ་རིན་པོ་ཆེ་ངག་དབང་ལེགས་པར་ཡང་མགོན་པོད་སོགས་ཀྱི་ལུང་གནང་། ཨ་མདོ་རྡཱི་ཕུ་སྤྲུལ་སྐུ་རྣམ་གཉིས། སི་ཏུ་གོང་འོག་གཉིས། སྡོམ་བརྩོན་སྡེ་སྣོད་འཛིན་པ་ཆེན་པོ་བླ་མ་འཇམ་རྒྱལ་རིན་པོ་ཆེ། ཞེ་ཆེན་རྒྱལ་ཚབ་རིན་པོ་ཆེ། ཀཿཐོག་རྨོག་ཚ། རྒྱ་གར་ནུབ་ཕྱོགས་ཀྱི་རྒྱུད་དུ་བྱུང་བ་མཁས་པ་བསྟན་འཛིན་རྒྱལ་མཚན། ཨ་མདོ་དགེ་བཤེས་མཁས་པ་ཆེན་པོ་འཇམ་དཔལ་རོལ་པའི་བློ་གྲོས། ཟུར་མང་མཁས་གྲུབ་པདྨ་རྣམ་རྒྱལ། ས་ཕུར་གྱང་གསུམ་གྱི་ཆོས་རྗེ་སྔ་རྗེས་བྱོན་པ་རྣམས་དང་། ཆོས་སྡེ་ཁག་གི་མཁན་སློབ་འདུས་སྡེ་སོགས་མཁས་པའི་རྣམ་དཔྱོད། གྲུབ་པའི་རྟགས་མཚན་ལྡན་པ་བསྟན་པར་བྱ་བ་རླབས་ཆེན་སྒྲུབ་ནུས་པ་དུ་མ་དང་། ཆེས་བླུན་རྨོངས་བདག་ལྟ་བུའང་བཀའ་འབངས་ཀྱི་གྲལ་མཐར་ཚུད་པས་མཚོན། གསར་རྙིང་གི་སྤྲུལ་སྐུ། མཁན་པོ། ཆོས་རྗེ། སློབ་དཔོན་སོགས་གྲངས་མེད་པ་དང་། བསྟན་པའི་སྦྱིན་བདག་ཆེན་པོ་སྡེ་དགེ་ས་སྐྱོང་པ་ཡབ་སྲས། གཞུང་གི་སྐུ་དྲག་ཁྱུང་རམ། བཀྲས་མཐོང་། ཐང་དཔོན་སོགས་སྔ་རྗེས་ཕེབས་པ་རྣམས་ལའང་དབང་ཆོས་བྱད་ཁྲོལ་སོགས་ཀྱིས་ཐུགས་བཞེད་སྐོང་བས་མཚོན་རྒྱལ་པོ། དཔོན་པོ། ཁྱིམ་བདག་སོགས་དད་སྦྱིན་གྱི་འཁོར་ཚད་མེད་པ་ལ་སོ་སོའི་འདོད་ཆོས་བྱིན་རླབས་བཀའ་བསྒོ་གནང་བས་རེ་བ་རྫོགས་པར་མཛད་པའོ། །འཆད་མཁས་བློ་གསལ་རྣ་བར་འཇེབ་པ་དང་། །དོན་བཟང་ཡིད་ཀྱི་སྒྲོ་འདོགས་བཅད་པ་ལ། །རབ་མཁས་སྨྲ་བ་ཟླ་མེད་ངག་གི་དབང་། །སྙིང་དང་མགྲིན་པར་རོལ་པ་མིན་ནམ་ཅི། །ཕྱི་ནང་གསང་བའི་དེ་ཉིད་བཅུ་ལྡན་ཞིང་། །སྨིན་གྲོལ་ཆོ་གའི་ཐབས་ལ་མཁས་པ་ཡི། །སྐལ་ལྡན་སྐུ་བཞིའི་ས་བོན་འདེབས་མཛད་ཅིང་། །རྡོ་རྗེ་འཆང་གི་ཕྲིན་ལས་སྤེལ་བའི་བདག །གང་ཁྱོད་སྙིང་ལ་རྡོ་རྗེ་སེམས་དཔའ་ཞུགས། །ལག་ན་ཐབས་ཤེས་རྡོར་དྲིལ་རྟགས་འཆང་ཞིང་། །འཇིགས་རུང་ཉམས་དང་ཅུང་ཟད་ལྡན་གྱུར་ན། །གསང་བའི་བདག་པོ་གཞན་དུ་འགའ་མ་མཆིས། །ཞེས་བསྔགས་སོ། །གཉིས་པ་རྩོད་པ་རྡོ་རྗེའི་མཚོན་ཆས་ཕས་རྒོལ་གྱི་ལོག་རྟོག་བཅོམ་པའི་ཚུལ་ནི། ཡིད་ཆེས་ཀྱི་ལུང་ཚད་མ་དང་། ལུང་དོན་འདྲེན་བྱེད་ཀྱི་དངོས་སྟོབས་རིག་པ་ཚད་མའི་ལམ་ནས་དྲངས་ཏེ་འཆད་རྩོམ་གང་གི་སྐབས་སུའང་ཕ་རོལ་གྱི་རྒོལ་བའི་སྤོབས་པ་འཕྲོག་ཅིང་ཁེངས་པའི་རུ་མཚོན་བསྙིལ་ནས་རང་ལུགས་ཡང་དག་པའི་ཚད་མར་སྒྲུབ་ནུས་པ་དང་། སློབ་གཉེར་ཅུང་ཤེས་པ་ཞིག་སྐུ་མདུན་དུ་ཕྱིན་ནའང་དགྱེས་ཉམས་ཆེན་པོས་སློབ་གཉེར་གྱི་དྲི་བ་ལ་ཞུགས་ཤིང་སྐབས་རེར་རྩོད་པའང་མཛད་པ་ན་རང་ཉིད་ཀྱི་དམ་བཅས་པ་ལ་ཕྱིར་རྒོལ་གྱིས་ཇི་ཙམ་ཟློག་ཀྱང་གཏིང་ཇེ་ཟབ་ཏུ་འགྲོ་བ་ལས་རྒོལ་བའི་ནུས་པ་ཟད་པ་དང་། དངོས་སུའང་རྩོད་པའི་ལན་ཐོར་བུ་མཛད་ཡོད་པར་གྲགས་སོ། །སྨྲ་བ་ངན་པའི་ལྕེ་བརྒྱ་གཅོད་པ་ལ། །རིག་པའི་རྣོ་ངར་ཚད་མའི་རལ་གྲི་ནི། །ཕྱོགས་ལས་རྣམ་པར་རྒྱལ་བའི་སྤོབས་པ་ཡི། །དཔུང་ཤེད་བཙན་པོས་དགུང་སྔོན་མཐོན་པོར་འཕྱར། །གསུམ་པ་རྩོམ་པ་རིན་པོ་ཆེའི་ཕྲེང་མཛེས་ཀྱིས་ཐུབ་བསྟན་མཆོད་སྡོང་ཆེན་པོར་བརྒྱན་པའི་ཚུལ་ནི། དེའང་བསྟན་བཅོས་རྩོམ་པའི་རྒྱུ་ཚོགས་མཐའ་དག་ནི་ཚང་། བཀའ་དང་བསྟན་བཅོས་ཀྱི་དགོངས་དོན་ནི་ཡང་དག་པར་མཁྱེན། ཕྱི་རིག་པའི་གནས་རྣམས་ལའང་བྱང་བར་བྱས་པས་སྡེབ་ལེགས་མཁས་པ་དགྱེས་པའི་བསྟན་བཅོས་པོད་ཚོགས་མང་པོར་སྤེལ་ནའང་ཐོགས་པ་མེད་ཀྱང་སྔོན་བྱོན་བླ་མ་གོང་མའི་གསུང་རྣམས་ཀྱང་རྡུལ་ཁྲོད་དུ་དོར་བའི་དུས་ངན་འདི་ལ་གསར་དུ་རྩོམ་པས་ཅི་ཞིག་བྱ། སྔར་ཡོད་རྣམས་ལ་ལྟ་རྟོགས་བྱེད་ཐུབ་ན་ཆོག་ཅེས་རྒྱུན་དུ་གསུངས་ལ། ཞུ་བ་པོའི་ངོར་གསུངས་པ་རྣམས་ཀྱང་སོ་སོར་གཏོད་པ་ལས་རང་ཉིད་ཀྱི་བཀའ་འབུམ་དུ་རློམ་པའི་ཚགས་སྡུད་གཏན་ནས་མི་མཛད་པས་ཕྱོགས་ཐམས་ཅད་དུ་འཐོར་བས་ད་ལྟ་ཆེར་མ་བཞུགས་ཀྱང་། འདི་ཕྱོགས་དཔེ་ཡོད་པ་ནི། དཀོན་མཆོག་རྗེས་དྲན་མདོ་འགྲེལ་པད་དཀར་ཕྲེང་མཛེས། འཕགས་པ་འཇམ་དཔལ་དབྱངས་སོགས་ཀྱི་རྟོགས་བརྗོད་སྒོ་བཞི་པ། དབྱངས་ཅན་མའི་བསྟོད་པ། སྤྱོད་འཇུག་ཤེར་འགྲེལ་ཚིགས་བཅད་ཅན། སྡེ་སྣོད་གསུམ་གྱི་ཚིགས་བཅད་ཀྱི་བཤད་སྦྱར། ས་ཆེན་གྱི་བླ་མའི་རྣལ་འབྱོར། ངོར་ཆེན་རིན་པོ་ཆེའི་བླ་མའི་རྣལ་འབྱོར། བསྟོད་པ། རྗེ་བཙུན་རིན་པོ་ཆེའི་བླ་རྣམ། ཀུན་མཁྱེན་གོ་རམས་པའི་བསྟོད་པ། གཏོར་མའི་དོན་འགྲེལ། ཚོགས་གླུ་ཚན་གསུམ། འོད་ཟེར་ཅན་མའི་བསྟོད་པ། ཐང་རྒྱལ་བསྟོད་པ་དང་། ཀུན་འཁོར། གསོལ་འདེབས་ཀྱི་མགུར་མ། བླ་མ་རིན་འབྱུང་དང་། མགོན་པོའི་བསང་། རྭ་ལོའི་གྲུབ་རྟགས་ཉེར་གསུམ་གྱི་བསྟོད་པའི་ཁ་སྐོང་། བླ་མ་ལེགས་པའི་བླ་སྒྲུབ། རྩ་བའི་བླ་མ་སྤྱིའི་རྒྱང་འབོད་གསོལ་འདེབས། རྗེ་ཉིད་ཀྱི་གསོལ་འདེབས་ཚན་བཞི། རྡོ་རྗེ་འཆང་བློ་གཏེར་དབང་པོའི་རྣམ་ཐར། ཞལ་གྱི་གསང་ཁྲིད་ཐུན་མིན་ཟུར་འདེབས། ལས་གཤིན་བསྙེན་ཐབས། རྭ་ལོའི་སྦྱིན་སྲེག་ཞལ་ཤེས་ཐུན་མིན་སྦྱར་བའི་ངག་འདོན། གླིང་མགུ་ཟིའི་མགོན་པོ་དང་། ཞལ་ལ་བསྟོད་པ། རྭ་ཁྲིད་མཁའ་འགྲོ་སྙན་བརྒྱུད་ཀྱི་བླ་མའི་རྣལ་འབྱོར། མཁན་ཆེན་གཞན་ཕན་སྣང་བ། ཕན་བདེ་མཁན་པོ། བླ་མ་འཇམ་དབྱངས་རྒྱལ་མཚན་རྣམས་ཀྱི་ཞབས་བརྟན། རིས་མེད་བསྟན་འཛིན་རྣམས་ལ་བསྟོད་པའི་གླུ་མཆོད། བླ་མ་རིན་འབྱུང་གི་མཆོད་ཆོག་ཚིགས་བཅད། ཟིལ་ཕྲོམ། གཉན་ལྡང་། རྡོ་རྗེ་ཐོག་སྲས། རྒོད་འབྲང་། སྐར་རྒྱལ་ཞི་ར། ནགས་ཚལ་ལྷ་མོ་སོགས་ཀྱི་བསང་ཡིག་མང་པོ་དང་། བཙན་རྒོད་ཇག་ལེན་མཆོད་ཐབས་རྒྱས་བསྡུས། ཁོ་བོ་ཕྲིན་སྤྲུལ་པའི་བླ་མའི་རྣལ་འབྱོར། སེམས་ངོར་གསོལ་འདེབས། མཁྱེན་བརྩེ་དབང་པོའི་དགོངས་གཏེར་གྲུབ་ཐོབ་ཐུགས་ཐིག་ལ་མདུན་བསྐྱེད་བདག་འཇུག །འོད་ཟེར་ཅན་མའི་སྒྲུབ་ཐབས། ཆོས་སྲུང་སྤྱི་ལ་གསོལ་མཆོད་བཅས་བཞུགས་པ་དེ་དག་ཐམས་ཅད་ཀྱང་ངག་དང་ཡིད་ལ་དབྱངས་ཅན་ཞུགས་ཤིང་མགྲིན་པའི་རོལ་མཚོ་བརྡོལ་བ་ལས་བྱུང་བའི་ཚིག་དོན་སྡེབ་ལེགས་སྙན་བརྗིད་གཞན་ཡིད་འཕྲོག་པ་མཁས་རྣམས་དགྱེས་པའི་ལེགས་བཤད་རྨད་དུ་བྱུང་བ་ཤ་སྟག་གོ། ཆེ་འདོད་གྲགས་སེམས་གཡའ་ཡིས་མ་གོས་ཤིང་། །ཀུན་མཁྱེན་མེ་ལོང་གཙང་མའི་ངོགས་ཉིད་ལ། །ཇི་ལྟར་འཆར་བ་བརྩེ་བས་ལེགས་སྟོན་པ། །སྨྲ་བའི་སེང་གེ་ཉིད་དུ་ངེས་པར་གྲུབ། །འཆད་རྩོད་རྩོམ་པའི་གཡུ་རལ་བསིག་པ་ན། །བསྟན་ལ་འཁུ་བའི་ཝ་སྐྱེས་ཁུང་བུར་ཞུགས། །དྲེགས་ལྡན་སྡེར་བཅས་ཕྱེ་མར་འཐག་མཛད་པ། །ཀུན་མཁྱེན་སྟོབས་ལྡན་གདོང་ལྔའི་དབང་པོ་རྒྱལ། །ཚིག་ཚོགས་མང་ཡང་ཆུ་བུར་ལྟ་བུ་ཡི། །སྙིང་པོ་མེད་ལ་འགལ་འདུས་ལྕི་གྱུར་པའི། །སྙིགས་དུས་མཁས་གྲགས་ཕལ་གྱི་བསྟན་བཅོས་དང་། །མཚུངས་མིན་མཁས་རྣམས་ལེགས་པར་དཔྱོད་དང་ཤེས། །ཞེས་ཚིགས་སུ་བཅད་པས་དོན་བསྡུ་བའོ། །གསུམ་པ་གཉིས་ཀའི་དོན་དུ་མཁས་བཙུན་བཟང་པོའི་ཡོན་ཏན་ལྷུན་གྱིས་གྲུབ་པའི་ཚུལ་ནི། མཁས་པའི་རྣམ་དཔྱོད་གོང་དུ་སྨོས་མ་ཐག་པ་དེ་རྣམས་ལས་ཀྱང་ཤེས་ཤིང་། དེ་ཡང་གང་ཟག་ལ་མི་རྟོན་ཆོས་ལ་རྟོན། ཚིག་ལ་མི་རྟོན་དོན་ལ་རྟོན། དྲང་དོན་ལ་མི་རྟོན་ངེས་དོན་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན་པ་སྟེ་བཞི་པོ་ཚང་བ་ལ་མཁས་པ་ཟེར་ཞིང་། དེ་ཡང་ནང་དུ་ཡེ་ཤེས་ལ་རང་དབང་འབྱོར་ཞིང་ཆོས་ཉིད་སྐྱེ་མེད་ཀྱི་དོན་ལ་མཁས་པའི་རང་རྩལ་ལས་སྐུ་ཚེ་འདིར་ལོ་ཟླ་མང་པོའི་སྡུག་ཡུས་ཀྱིས་སྦྱངས་བརྩོན་བྱས་པ་ལྟ་བུ་མིན་ཀྱང་མཁྱེན་རབ་ཀྱི་ཀློང་བརྡོལ། ཆོས་ཐམས་ཅད་རང་གྲོལ་དུ་ཤེས་པའི་མཁས་པ་ཆེན་པོ་དོན་དང་ལྡན་པ། ཕྱི་འདུལ་མངོན་མདོ་སྡེ་གསུམ་དང་། ནང་བྱ་སྤྱོད་རྣལ་འབྱོར་བླ་མེད་དེ་རྒྱུད་སྡེ་བཞིའི་ཚིག་དོན་ཐམས་ཅད་ལ་བསྙེལ་བ་མི་མངའ་ཞིང་མི་འཕྲོག་པའི་མཁྱེན་རབ་དང་ཐུགས་རྗེ་གཉིས་འཛོམ་པས་རང་གཞན་གྱི་དོན་ཐམས་ཅད་བདེ་བླག་ཏུ་སྒྲུབ་ནུས་ཤིང་། ཆོས་ཐམས་ཅད་མི་བརྗེད་པའི་གཟུངས་དང་མངོན་པར་ཤེས་པ་མངའ་བས་སློབ་མའི་རྒྱུད་དང་མཚམས་པར་འདོམས་པའི་སྟོན་པ་སྨྲ་བའི་དབང་ཕྱུག་ཟླ་མེད་པ་ཡིན་ནོ། །དེ་སྐད་དུ་ཡང་། མཁས་མཁས་ཡང་དག་རིག་པའི་དོན་ལ་མཁས། །ཇི་ལྟ་ཇི་སྙེད་ཤེས་བྱ་ཐམས་ཅད་མཁྱེན། །ཀུན་མཁྱེན་བླ་མ་གངས་ཅན་འཛིན་མའི་ཁྲོད། །མང་ཐོས་བློ་གསལ་དབུས་ན་ཆེས་མཁས་མཁས། །གཉིས་པ་བཙུན་པའི་ངང་ཚུལ་འགྲན་ཟླས་དབེན་པ་ནི། ཕྱི་སོ་ཐར་གྱི་སྡོམ་པའི་དབང་དུ་ན། དགེ་ཚུལ་སློང་གི་སྡོམ་པའི་གནས་ཕྲ་རགས་ཐམས་ཅད་ལ་འཇུག་ལྡོག་ཤིན་ཏུ་གཟབས་པ་དང་། རྒྱུན་དུ་ངུར་སྨྲིག་གི་རྟགས་འཆང་ཞིང་སྐུ་ཚེ་དེར་དགུང་བཅད་ཁོ་ན་མཛད་པས་དུས་འདའ། ནང་བྱང་ཆུབ་སེམས་དཔའི་དབང་དུ་བྱས་ན་ཚུལ་ཁྲིམས་རྣམ་པ་གསུམ་ལ་ཉེས་པའི་དྲི་མས་མ་གོས་ཤིང་སྙིང་རྗེ་ཆེན་པོའི་གཞན་དབང་དུ་གྱུར་པས་གསོལ་བ་ཤ་གཏན་ནས་མི་བཞེས་ནའང་སྐུ་ཉམས་རྒྱས་ཤིང་གཟི་བརྗིད་དང་ལྡན་ལ། སྐྱེ་བོ་ངན་པ་གཞན་གྱི་ལོག་སྒྲུབ་ཐམས་ཅད་བཟོད་པའི་ངང་ཚུལ་ཅན་དང་། གསང་སྔགས་རྡོ་རྗེ་ཐེག་པའི་དབང་དུ་བྱས་ན་སྤྱི་དང་བྱེ་བྲག་གི་དམ་ཚིག་གི་གནས་ལས་མི་འདའ་ཞིང་རྟག་ཏུ་རྡོར་དྲིལ་གླེགས་བམ་འབྲལ་མེད་དང་། བདུད་རྩི་རིལ་བུ་བསྟེན་པ་སོགས་རྒྱུན་དུ་མཛད། ཞལ་ནས་ཀྱང་དེང་དུས་སྔགས་ལ་ཞུགས་པ་རྣམས་འདུལ་བའི་དབང་དུ་བྱས་ན་ཆོས་གོས་རྣམ་གསུམ་འབྲལ་མེད་བྱེད་པ་མང་པོ་འདུག་ཀྱང་ཕལ་ཆེར་ཚུལ་འཆོས་ཤས་ཆེ་ཞིང་། སྔགས་ཀྱི་ལུགས་ལ་རྡོར་དྲིལ་ཙམ་ཡང་འབྲལ་མེད་བཅངས་མཁན་མི་འདུག་ཅེས་ཐུགས་གཅོང་བའི་ཚུལ་བསྟན། རྒྱུན་དུ་ཆོས་གསུང་པའི་སྐབས་མ་གཏོགས་ཐུན་བཞིར་བཞུགས་ནས་མཚན་བཅས་མཚན་མེད་ཀྱི་ཏིང་ངེ་འཛིན་ཁོ་ནར་བརྩོན། ཞལ་ཏ་གནང་ནའང་བླ་མ་རྣམས་ཀྱི་ལོ་རྒྱུས་རྣམ་ཐར། ཆོས་ཀྱི་བགྲོ་གླེང་ལས་དོན་མེད་ཀྱི་རྩེད་མོ་ཀུ་རེ་ངག་འཁྱལ་ཆགས་སྡང་གི་རིགས་གཏན་ནས་མི་གསུང་པས་མཚོན་བཙུན་པའི་ཁྱུ་མཆོག་ཆེན་པོར་བཞུགས་པའོ། །གང་ཐུགས་ཉེས་པའི་དྲི་མ་རྣམས་དང་མི་མཛའ་ཞིང་། །གང་ཞིག་སྒོ་གསུམ་བག་མེད་འཆོལ་བར་སྤྱོད་པ་ནི། །གང་གི་སྤྱན་སྔར་དགྲ་བོ་ལྟར་གྱུར་མངོན་མཐོང་བས། །གང་ཁྱོད་ཐ་མལ་ཡན་པར་ཤོར་བའི་གཏམ་གྱིས་དབེན། །རྟག་ཏུ་དྲན་ཤེས་ནོར་དང་མི་འབྲལ་ཞིང་། །དགོངས་སྤྱོད་ཟབ་མོ་རྒྱ་མཚོའི་འཇིང་ཇི་བཞིན། །ཇི་ཙམ་བརྟགས་ཀྱང་ཁྱེད་ཀྱི་གཏིང་མི་དཔོག །ཡོན་ཏན་རིན་ཆེན་ནམ་མཁའི་དབྱིངས་དང་མཚུངས། །གསུམ་པ་བཟང་པོའི་ཕྲིན་ལས་ཀྱིས་བྱ་བ་ལས་ཀྱི་འཁོར་ལོ་མཛད་པའི་ཚུལ་ནི། སྡེ་དགེ་ཡབ་ཆེན་བོད་ཕྱོགས་བྱོན་ཤུལ་དངུལ་གདུང་བླ་མ་ཟླ་བ་བཅོ་བརྒྱད་ཀྱི་བར་དུ་མཛད་ནས་ཞབས་བརྟན་སྒྲུབ་པ་དང་། རྒྱལ་བའི་བསྟན་པ་འཇིག་རྟེན་གྱི་ཁམས་སུ་ཡོད་མེད་ནི་འདུལ་བ་གཞི་གསུམ་གྱི་ཆོ་ག་ཡོད་མེད་ལ་ལྟོས་པ་ཅན་ཡིན་པས་ལྷུན་གྲུབ་སྟེང་དུ་དབྱར་གནས་ཀྱི་མཁན་པོར་རྗེ་འདི་ཉིད་ལྕགས་གླང་ལོར་མངའ་གསོལ་ནས་ས་རྟ་ལོའི་བར་དུ་ལོ་བཅོ་བརྒྱད་ལ་མཁན་པོའི་འགན་བཞེས་ནས་འདུལ་བའི་ཕྱག་བཞེས་ཞིབ་ཐེར་དང་། དབྱར་གནས་པའི་དགེ་འདུན་ཞལ་གྲངས་བརྒྱ་ཕྲག་ཐལ་བར་འཕེལ་ཞིང་སྒྲིག་ལམ་ཤིན་ཏུ་དམ་པ་དང་། གསུང་ཆོག་རིགས་ཀྱང་སྦྱིན་བདག་གི་ཚོགས་རྫོགས་ངེས་མཛད་ཅིང་དབྱར་གནས་ཀྱི་དེབ་ཡིག་གསར་བཀོད་དང་གཏན་བཞག་སོགས་རྒྱ་ཆེར་མཛད། རྒྱ་ཟིང་གི་འཚུབས་ཆེ་སྐབས་ཀྱང་ཆོས་སྡེ་ཆེན་པོའི་སྲོག་ཤིང་མཁན་ཆེན་འདི་ཉིད་ཀྱིས་བཟུང་སྟེ་དགེ་འདུན་རྣམས་ལ་མོ་བཅའ་ཆང་ཁྲིམས་སྡོམ་པས་རྒྱུད་ཆུད་མ་ཟོས་པ་དང་། དགོན་པའི་བཅའ་སྒྲིག་མ་ཉམས་ཤིང་ཚེས་དུས་སྒྲུབ་མཆོད་མ་ཆག་པ་དང་། བླ་མ་ལྷ་སྲུང་གི་ཐུགས་དམ་རྒྱུད་བསྐུལ་ཁོ་ནར་བརྩོན་པའི་བྱིན་མཐུས་འཚུབ་འགྱུར་ཞི་ཞིང་སྡེ་དགེའི་ཆབ་སྲིད་རང་འཇགས་དང་། གཞུང་ས་ཆེན་པོའི་ཕྲིན་ལས་ཀྱི་འཇུག་པས་ཅི་བདེ་བར་ཁྱབ། བསྟན་དགོན་ཡང་སྔར་ལས་ཇེ་རྒྱས་སུ་གྱུར་པ་ཡང་རྗེ་འདི་ཁོ་ནའི་བཀའ་དྲིན་ཡིན་པ་ནི་དྲང་པོར་གནས་པ་རྣམས་ཀྱི་ཐུགས་ལ་གསལ་བ་དང་། བླ་མ་རིན་འབྱུང་མཆོད་ཆོག་དབྱར་གནས་སྐབས་འཛུགས་པར་མཛད། དགོན་འདིར་ལོངས་སྤྱོད་འཕེལ་བ་བླ་མ་རིན་འབྱུང་གི་བྱིན་རླབས་ཡིན་པའི་རྨི་ལམ་བྱུང་གསུང་། འགའ་ཞིག་གིས་འདུལ་འཛིན་གསེར་ཐེབས་ཅན་མཆོད་པའི་འབྲས་བུ་ཡིན་པར་སེམས་པ་མཆིས་ཀྱང་། དགེ་འདུན་སྤྱི་ནས་སྒྲོལ་མ་གསུང་ཆེས་པ་དང་། བླ་མ་རིན་འབྱུང་གི་བྱིན་རླབས་ཡིན་པར་ཐེ་ཚོམ་བྲལ། ཆོས་སྡེ་ཆེན་པོར་འདུ་བ་ཆེན་མོའི་དབུ་བཞུགས་རྒྱ་དུས་སུ་ལོ་ནར་བཞིན་མཛད་པ་དང་། ཕྱིས་སུའང་ལན་གཉིས་ཙམ་མཛད་ཅིང་ལོ་བསྟར་བཞིན་འདུས་པ་རྒྱ་མཚོར་གསུང་ཆོག་དང་འབྲེལ་བའི་སྐུ་ཡོན་ཕྱག་འགྱེད་དང་། མང་ཇའི་བསྙེན་བཀུར། གཙུག་ལག་ཁང་དུ་འཕན་དང་ཡོ་བྱད་སོགས་རྒྱ་ཆེར་བཞེངས། ས་དཀར་དགོན་དང་ལྕགས་ར་དགོན་སོགས་ལའང་དབྱར་གནས་ཀྱི་མཁན་པོ་མཛད་ཐོག་ཕྱག་བཞེས་ཞིབ་བཅའ་འཁྲིད་མཛད་པ་དང་། དྲྭ་སྒང་ཡར་མན། འཇིགས་བྱེད་སྒྲུབ་གྲྭ་སོགས་ལའང་ལུགས་གཉིས་ཀྱི་སྒོ་ནས་བླ་དཔོན་གྱི་ཐུགས་དམ་རྒྱུད་བསྐུལ་དང་འབྲེལ་རྟེན་ཐེབས་སྦྱོར་འཇགས་དང་། ཉམས་གསོས་འབྱུང་བའི་ལྷན་ཅིག་བྱེད་རྐྱེན་ལ་སྐུ་ཤེད་རྩལ་ཕྱུངས་མཛད་པས་བཤད་སྒྲུབ་ཀྱི་བསྟན་པའི་གཞི་རྩ་ཐེངས་པ་དང་། དྲྭ་སྒང་སྒྲུབ་སྡེར་རྗེ་ཉིད་དང་། དཔལ་འཇམ་ཞིང་གཤེགས་ཀྱི་ཕྱག་རྫས་བཅས་ཀྱིས་གཏན་བཞག་ཤིན་ཏུ་རྒྱ་ཆེན་མཛད། མདོར་ན་དད་རྫས་ཐམས་ཅད་གནས་མིན་དུ་མ་ཤོར་བ་དཀོན་མཆོག་གི་ཞིང་སར་འགྲོ་ངེས་གནང་བ་ལས་ལོག་འཚོའི་གཟི་བྱིན་མི་སྒྲུབ། རྗེ་ཉིད་ཀྱང་སྐུ་ཆས་ངན་ངོན་ཙམ་གྱིས་ཆོག་ཤེས་པར་མཛད། དུས་རྟག་ཏུ་རང་གི་དོན་དུ་འདོད་ཆུང་ཆོག་ཤེས་ཁོ་ནར་མཛད་ཅིང་། གཞན་ལ་ཕན་པ་དངོས་དང་བརྒྱུད་ནས་ཅི་འགྱུར་མཛད་དོ། །གཞན་ཡང་སྡེ་དགེ་སྲས་ཆུང་གི་མགོན་ཁང་གསར་བཞེངས་ལ་ཕྱི་ནང་གསང་བའི་རྟེན་རྣམས་ཕྱག་བཞེས་དང་། ཐོག་མཐའ་བར་གྱི་འགན་བཞེས་རབ་གནས་དཀར་ཆག་བཅས་མཛད། དཔལ་མཆོག་རིགས་ལྔ་མཆོད་རྟེན་འཇིག་ལ་ཉེ་བ་ཉམས་པ་གསོས། ལྕགས་རའི་འཇིགས་བྱེད་ལྷ་ཁང་གསར་བཞེངས་ལ་མཐུན་འགྱུར་གནང་། ཆུ་ཁྱི་ལོར། སྤར་དཔོན་ངག་དབང་འཇིགས་མེད་མཆོག་ནས་བསྟན་དང་འགྲོ་བའི་དཔལ་གྱུར་བསྔགས་འོས་ཟངས་གསེར་གྱི་མགོན་པོ་བཞེངས་སྐབས་དམ་པ་དེ་ཉིད་ཀྱིས་རྟེན་བཞུགས་མཛད་པས་མགོན་པོའི་སྐུ་ལ་གཟི་འོད་ཀྱི་བྱིན་ཆགས། ཡེ་ཤེས་པ་མངོན་སུམ་ཐིམ་པའི་རྣམ་འགྱུར་ས་གཡོ་བའི་སྒྲ་ཆེར་བྱུང་བར་མཁས་བླུན་ཀུན་གྱི་རྣ་བར་ཐོས། ལྷག་པར་ཞལ་དང་ལྷ་མོའི་གསང་འཁོར་བྲི་སྐབས་རས་གཞི་ལ་རྗེ་ཉིད་ཀྱིས་བྱང་སེམས་བྱུགས་པ་ཙམ་གྱིས་འཁོར་ལོའི་རི་མོ་ལྷ་བྲིས་ལས་གསལ་བར་ཡིད་ཆེས་པའི་གནས་སུ་གྱུར་ཅིང་ཕྱིས་སུ་གཟུངས་འབུལ་མཁན་རྣམས་ཀྱིས་ཀྱང་མངོན་སུམ་མཇལ་རྒྱུ་ཡོད་པ་བྱུང་བས་ད་ལྟ་ཞལ་གྱི་སྐུ་ནང་བཞུགས། མགོན་པོའི་གཟུངས་ཆས་ཉེར་མཁོ་གྲི་རྐང་གྲི་རུས་ཕྱོགས་ཀུན་བཙལ་ཡང་མ་རྙེད་ཅིང་དེ་ལྟར་རྒྱུ་མཚན་ཞུ་འཕྲལ་ཡེ་ཤེས་སྤྱན་གྱིས་ཉེ་བར་གཟིགས་ཏེ་སྤར་ཁང་དུ་ཡོད་པའི་མངོན་སུམ་ལུང་དུ་སྟོན་པ་ལྟར་གྲུབ་པ་མ་ཟད། དགེ་བའི་བཤེས་གཉེན་ངག་དབང་འཇིགས་མེད་ལ་གཞན་ཡང་ཞལ། ཡུམ་ཆེན། ལྷ་མོ། དམག་ཟོར་མ། དུར་ཁྲོད་བདག་པོ། པུ་ཏྲ་ལྷ་ལྔ་བཅས་བཞེངས་ལུགས་ཞལ་བཀོད་གནང་བ་བཞིན་ཆུ་སྤྲེལ་ལོར་འདི་བཞིན་གྲུབ་པས་དུས་གསུམ་མངོན་པར་མཁྱེན་པའི་ཡེ་ཤེས་སྒྲིབ་པའི་དྲི་མ་ཙམ་གྱིས་མ་གོས་པ་ཚད་མས་གྲུབ་པ་དང་། ལྷུན་གྲུབ་སྟེང་གི་ལྷ་ཁང་ཐམས་ཅད་ལ་ཉམས་གསོས་རྗེ་ཉིད་དང་གཞན་ལ་བསྐུལ་བས་མཚོན་གནད་དུ་སྨིན་པ་དང་། གཟིམ་ཁང་དུའང་སྐུ་འདྲ་གསར་རྙིང་མང་པོ་དང་། གསུང་རབ་ཀྱི་ཚོགས་མང་པོ། རྒྱུད་སྡེའི་ཙཀ་དཀྱིལ་དབང་ཆས་སོགས་བཞེངས་པར་མཛད། ཚོགས་དང་། མཆོད་པ། བསྐང་བ་རྣམས་ཆ་ཅན་ཆ་འཕར་ཤིན་ཏུ་རྒྱས་སྤྲོས་གནང་། སྡེ་དགེའི་རྡོ་ཁོར་རྣམ་རྒྱལ་མཆོད་རྟེན་ལའང་ཞལ་འདེབས་རྒྱ་ཆེར་གནང་ཞིང་རྟེན་རྩ་ཆེན་སྣེ་མང་འཇོག་པར་མཛད། ངོས་ཀྱི་མཁྱེན་བརྩེའི་བཀའ་འབུམ་སྤར་ནང་ལའང་ཞལ་འདེབས་གནང་བས་མཚོན་གཞན་དགེ་བ་བྱེད་པ་དག་ལའང་གནང་སྦྱིན་ཞལ་འདེབས་དང་། ཆོས་དོན་གཉེར་བ་རྣམས་ལའང་གསོལ་རས་སོགས་ཆད་མེད་སྦྱིན་པར་མཛད་པས་བྱང་ཆུབ་སེམས་དཔའ་གཏོང་བ་ལ་དགའ་ཞིང་སྦྱིན་པའི་ཕར་ཕྱིན་རྫོགས་པར་མཛད་པ་འདི་ཁོ་ནས་ཀྱང་ཐུབ་བསྟན་སྤྱི་དང་བྱེ་བྲག་ཐམས་ཅད་གསལ་བར་བྱེད་པའི་དཔལ་ཡོན་ཆེན་པོར་བཞུགས་པས་བཟང་པོའི་ཕྲིན་ལས་སྲིད་མཐར་ཁྱབ་པར་མཛད་པའོ། །རང་འདོད་སྦྲུལ་གདུག་ངན་པ་ཀུན་བཅོམ་ཞིང་། །གཞན་ཕན་སྤོས་ཀྱི་གླང་པོས་ཁུར་ཆེན་ཁྱེར། །ཕྱིན་དྲུག་གསེར་གྱི་དྲྭ་བས་ལེགས་པར་མཛེས། །འཕགས་པ་ཀུན་ཏུ་བཟང་པོའི་རྣམ་ཐར་སྙོགས། །ཆོས་བརྒྱད་བདུད་ཀྱི་སྒེག་མོའི་བཞིན་རས་ལ། །ཐལ་བས་བྱུག་ཅིང་བསྟན་འགྲོའི་མཆོད་སྡོང་ཆེར། །ཛམ་བུའི་གསེར་གྱིས་ལན་སྟོང་བྱུག་པ་ལ། །ངལ་ངུབ་སྤངས་པའི་ཚངས་པ་ཆེན་པོ་གང་། །འགྲོ་ཁམས་རྒྱ་མཚོར་བརྩེ་བའི་གྲུ་ཆར་འབེབས། །བྱང་ཆུབ་སེམས་ཀྱི་ཀླུ་དབང་རོལ་པ་ལས། །གནས་སྐབས་མཐར་ཐུག་ཕན་བདེའི་ནོར་བུ་སྦྱིན། །སྦྱིན་མཁས་དཔལ་ལྡན་བླ་མ་ཁོ་ནར་ངེས། །དམ་པ་མང་ཡང་གཞན་ལ་ཕན་པ་དཀོན། །ནོར་བུ་མང་ཡང་ཕོངས་པ་སེལ་བ་དཀོན། །བདག་གི་འདྲེན་མཆོག་དཔལ་ལྡན་སྲིད་ཞིའི་མགོན། །དེ་ནི་གཞན་དོན་གཉེར་བས་དུས་འདའོ། །བསྟན་པ་རིན་ཆེན་རྒྱ་མཚོའི་མཐའ་ཁྱབ་པའི། །ཕྲིན་ལས་བཟང་པོ་དང་ལྡན་བླ་མ་རྗེའི། །སྐུ་ཡི་སྣང་བ་གསུང་གི་ཟེར་ཕྲེང་ནི། །ཡང་ཡང་དྲན་པས་ཡིད་ལ་གདུང་བ་སྟེར། །དེ་ལྟ་ན་ཡང་དྲན་པའི་མཆོག་རབ་ནི། །བླ་མ་དྲན་པས་སྲིད་ཞིའི་འཇིགས་པ་འཕྲོག །དགེ་ལེགས་སྣང་སྟེར་མུན་སེལ་སྒྲོན་མེ་ཆེར། །ཀུན་ཏུ་བཟང་པོའི་ཕྱག་མཆོད་སྟོབ་པར་བགྱི། །བཅས་རང་ཉེས་ལྟུང་གངྒཱའི་ཆབ་ཀྱིས་བཀྲུས། །གཞན་གྱི་དགེ་ལ་ཕྲག་པ་མི་དོག་ཅིང་། །མྱ་ངན་མི་འདའ་ཆོས་ཀྱི་ཁྲི་ལ་བཞུགས། །དགེ་ཚོགས་གྲུབ་པ་བསྟན་འགྲོའི་དོན་དུ་བསྔོ། །ཞེས་བཀའ་དྲིན་དྲན་ཞིང་ཡན་ལག་བདུན་པའི་མཆོད་སྤྲིན་གྱི་ཚིགས་སུ་བཅད་པའོ། །སྤྱི་དོན་གསུམ་པ་ཡོངས་སུ་མྱ་ངན་ལས་འདའ་བའི་མཛད་པ་ཐ་མ་སྟོན་པའི་ཚུལ་ནི། དེ་ཡང་རྟག་འཛིན་ཅན་རྣམས་བཟློག་པའི་ཆེད་དུ་ཞིང་འདིའི་གདུལ་བྱ་རེ་ཞིག་རྫོགས་པ་དང་། ཞིང་གཞན་དུ་རྫོགས་སྨིན་སྦྱོང་བ་མཛད་པའི་དགོངས་པ་ལ་ཐུགས་ཉེ་བར་གཞོལ་བ་ན་གཟུགས་སྐུའི་བཀོད་པ་བསྡུ་བའི་ཚུལ་བསྟན་པར་བཞེད་ནས་ལྕགས་རྟ་ལོར་འཇིགས་བྱེད་སྒྲུབ་མཆོད་གནང་སྐབས་ཉིན་གཅིག་ཤེར་དབང་མཐར་དབྱངས་གསལ་བཟླ་བ་ན་སྐུ་འཕར་གཡོ་མང་དུ་མཛད་པ་དང་། དེའི་ཕྱི་ཉིན་དབང་བཞི་པའི་མཐར་མཉམ་བཞག་ཡུན་རིང་ཆེས་པས་འགའ་ཞིག་གིས་གཟིམ་འགྲོ་བ་རེད་སྙམ་ཟེར། དེ་ལོ་སྒྲུབ་མཆོད་དེས་ཐུགས་ལ་འགྱུར་བ་ཆེན་པོ་བྱུང་གསུངས། ཉིན་གཅིག་ཞབས་ཅུང་ཟད་སྐྲངས་པས་དེ་སྔ་ཡན་ཆད་བད་སྨུག་ཞིག་གིས་ཅུང་ཟད་མནར་བ་ལས་ན་ཚ་མ་མྱོང་། དེ་མི་ཚེ་གཅིག་ལ་མི་ན་མི་ཚ་བ་མི་འོངས། ལོའང་ཆེན་པོ་ཡིན་ན་ཚོད་ཤི་ཚོད་ཡིན་གསུང་པ་དེ་ནས་བརྩམས་བསྙུང་གཞིའི་མགོ་ཟུག །སྟོན་རྒྱབ་བསྙུང་གཞི་ཡར་དྭངས་སྐབས་ད་ཕྱིན་འཕར་ལྡང་གཅིག་བྱུང་ན་སང་ཕོད་དཔྱིད་ཀ་ཙམ་ཡིན་འདུག་ཅེས་དེར་ཡོད་ཞིག་ལ་གསུངས་པ་ཐོས། ལོ་གཅིག་ལྷག་ཙམ་སྙུང་ཚུལ་བསྟན་ཀྱང་སྐུ་ལྕི་ཉམས་ཙམ་ལས་བསྙུན་ཟུག་ཅི་ཡང་མེད་པར་ཐུགས་དམ་རྒྱུན་ལྟར་དང་། མཛད་འཕྲིན་མཐའ་སྡུད་ཀྱི་ཚུལ་དུ་འཆད་རྩོམ་རྒྱུན་མར་གནང་། འཇིགས་བྱེད་རྭ་ལུགས་ཐུན་མོང་མ་ཡིན་པའི་སྨིན་གྲོལ་ཟབ་རྒྱས་ལན་གཉིས་བསྩལ། སྡེ་སྣོད་འཛིན་པ་ཐུབ་བསྟན་འཕེལ་རྒྱས་ལ། ཀྱེ་རྡོར་རྩ་རྒྱུད་བརྟག་གཉིས་གསུང་བཤད་འཕྲོ་རྒྱས་སྤྲོས་ཀྱིས་གསུངས། བསྟན་པའི་སྦྱིན་བདག་ཆོས་སྐྱོང་བའི་རྒྱལ་སྲས་ཐའི་ཇི་༢ཚེ་དབང་བདུད་འདུལ། རྒྱ་གར་ནུབ་ཕྱོགས་ཀྱི་རྒྱུད་དུ་བྱུང་བ་ལྔ་རིག་སྨྲ་བའི་སློབ་དཔོན་བསྟན་འཛིན་རྒྱལ་མཚན། ཡོངས་འཛིན་བླ་མ་ཀུན་དགའ་སེང་གེ། འཚོ་བྱེད་མཁས་དབང་བླ་མ་ཨ་ཚངས་སོགས་རྒྱལ་སྲིད་རིན་པོ་ཆེའི་གྲངས་ལ། འཇིགས་བྱེད་རྭ་ལུགས་ཐུན་མིན་སྨིན་གྲོལ་ལུང་བཅས་ཟབ་རྒྱས་ཕུལ་གནང་མཛད། གཞན་ཡང་སྐལ་ལྡན་གྱི་སློབ་ཚོགས་རྣམས་ལ། གསུང་ཆོས་སྐོར་དང་མདོ་སྔགས་གང་ལ་གང་འདོད་ཀྱི་ཁྲིད་ལུང་རྒྱ་ཆེར་གནང་བས་དུས་འདའ། དེ་སྐོར་བརྩེ་བ་ཆེན་པོའི་རིང་ལུགས་འཛིན་པ་ས་དགོན་ཉེར་བདུན་ལ་ཞབས་བརྟན་དགེ་བསྐུལ་འབྲེལ་འཇོག་རྟེན་དངོས་རྫས་གྱ་ནོམ་པ་རྒྱ་མ་ཆུང་བ་ཕུལ་བས། བྱ་རྒྱུད་ཚེ་དཔག་ལྷ་དགུའི་དཀྱིལ་འཁོར་གྱི་ཚེ་ཆོག་ཁྲི་ཚར་མ་ལོང་ཙམ་དང་། དཔོན་ཁག་སོ་སོས་ཞབས་བརྟན་རྒྱ་ཆེར་ཕུལ་༢རྒྱལ་བཀའ་རིན་པོ་ཆེ་དག་ཚར་གསུམ་ཡང་སྒྲུབ། དེ་ནས་དགུང་གྲངས་རེ་བཞིར་ཕེབས་པའི་ལྕགས་ལུག་ཟླ་བ་གསུམ་པའི་ནང་གཞུང་གི་རིམ་གྲོ་དྲུག་ཅུ་ཉིན་དྲུག་བསྙུན་བཞིན་པའི་ངང་ནས་གནང་བས་དུས་འགྱུར་ཕྱིར་བསྲིངས་འདི་ཁོ་ནའི་སྐུ་དྲིན་ཀྱང་གཞལ་བར་དཀའ། ཞལ་ནས་ཀྱང་ང་ཡི་ལུས་སྲོག་འདི་བསྟན་དོན་དུ་བསྔོས་ཟིན་པས། མངོན་སྤྱོད་ཀྱི་ལས་ཇི་ལྟར་བརྩམ་དགོས་ན་དོགས་པ་ཅིའང་མེད་ཅེས་ཕེབས། ཡང་སློབ་མ་འགའ་རེ་སྐུ་མདུན་ཕྱིན་ནས་བསྙུན་དྲིས་ཞུས་པ་ན། ནད་ཟུག་གཟེར་ཆེར་མེད་ན་བ་འདིས་ཉམས་ལེན་ལ་བོགས་ཆེ་ཆོས་ཐམས་ཅད་འཁོར་འདས་དབྱེར་མེད་ཀྱི་ངང་ལས་མི་འདའ་བར་འདུག་སྣང་བ་ཤིན་ཏུ་སྐྱིད་དོ་གསུངས། སྐབས་དེའི་སྔ་རྗེས་ཐམས་ཅད་དུ་དབོན་རྣམ་གཉིས་ཀྱིས་འཚོ་བྱེད་བོས་ཏེ། སྨན་དཔྱད་དང་ཞབས་རིམ་ས་དགོན་རྣམས་ཀྱིས་གཙོས་ཐམས་ཅད་ལ་རྒྱ་ཆེར་སྒྲུབ་པ་དང་། དགོན་ཆེན་དུའང་སྤྱི་སྒེར་སོ་སོ་ནས་ཞབས་བརྟན་ཤིན་ཏུ་རྒྱ་ཆེན་དང་། བླ་མ་འཇམ་དབྱངས་རྒྱལ་མཚན་གདན་ཞུས་ཀྱིས་ཚེ་དབང་སྐུ་ཁྲུས་སོགས་ཉིན་མང་པོར་གསུང་པ་དེ་རྣམས་དོན་ཡོད་པར་འགྱུར་བའི་ཕྱིར་བསྙུང་གཞི་སེང་དྭངས་ལྟ་བུར་ཉིན་མང་པོར་སྟོན་པར་མཛད། བླ་མ་འཇམ་རྒྱལ་ལ། ནད་འདི་ཕོག་ནས་རྣམ་རྟོག་ཡེ་མེད་པ་ལྟ་བུ་ཞིག་རེད། ནད་འདིས་སྒྲིབ་པའི་ལྷག་མ་ཐམས་ཅད་བྱང་བ་ཡིན་པ་འདྲ། ང་ཤི་ནའང་དོན་མ་འགྲུབ་པ་གསུམ་ཡོད་དེ། དགོན་འདིར་སློབ་གྲྭ་ཞིག་འཛུགས་རྒྱུ། དྲྭ་སྒང་སྒྲུབ་གྲྭ་ལྔ་བཅུ་བར་ཁ་འགེངས་རྒྱུ། དགོན་ཆེན་གྲྭ་རྒྱུན་རྣམས་དང་པོར་ལམ་བསྒོམ་ཤེས་ཀྱི་ཐོས་བསམ་ཞིག་བྱས། དེ་ནས་བསྙེན་པ་ཚད་ལྡན་རེ་སློབ་དཔོན་མཁས་པ་ཞིག་གིས་མགོ་འཛིན་དང་འབྲེལ་མཚམས་གྲྭ་ལྟ་བུ་ཞིག་འཇོག་དགོས་པ་གསུམ་ཡིན། དེ་ལས་གཞན་དུ་འགྱོད་པ་ཅི་ཡང་མེད་གསུང་པ་ནི་རྗེ་རྡོ་རྗེ་འཆང་ཀུན་དགའ་བཟང་པོའི་འདའ་ཀའི་ཞལ་ཆེམས་དང་མཚུངས་པར་སྣང་། ཧོར་ཟླ་༣ཚེས་༢༣ཉིན་སྙུང་ཁམས་ཆེར་འཁྲུགས་པའི་ཚུལ་སྟོན་པ་ན། ཉེ་གནས་རྣམས་ཀྱིས་དུས་འཁོར་ཆོག་གྲྭར་ཞབས་རིམ་སྒྲུབ་རྟེན་ཕུལ། མཁན་ཆེན་ལ་དགོངས་བརྟག་དང་འཚོ་བྱེད་དྲངས་རྒྱུ་སོགས་བྲེལ་རྟབ་མྱ་ངན་གྱིས་ཉམ་ཐག་པ་ན་ཉེ་འབྲེལ་ལྟོས་བཅས་སྡུག་བསྔལ་གྱི་དབུགས་དབྱུང་ཕྱིར་ཉིན་གུང་སྙུང་ཁམས་དྭངས་ཚུལ་བསྟན་ནས་བུ་སློབ་སྒྲུབ་བརྩོན་དམ་ཆོས་བསྟན་པས་བསྐུལ་བའི་ངོར་འཇམ་མགོན་བློ་གཏེར་དབང་པོའི་གསུང་པོད་སྤར་བྱང་ཚན་གཉིས་སམ་བཀྲ་ངོས་གསུང་རྩོམ་གནང་། དཔལ་སྤུངས་སྐྱབས་མགོན་སི་ཏུ་རིན་པོ་ཆེའི་མདུན་ཕུལ་རྒྱུར། གུར་མགོན་སྤར་སྐུ་བརྒྱད་ཕྱག་སྦྱར་མཛད། སྙུང་ཁམས་ཤིན་ཏུ་དྭངས་ཞིང་དགྱེས་ཉམས་ཀྱིས་འཇམ་མགོན་རིན་པོ་ཆེའི་རྣམ་ཐར་སོགས་དང་། ཆོས་ཀྱི་འབེལ་གཏམ་མང་པོ་དབོན་ཚུལ་དཔལ་ལ་གསུངས། ཚེས་༢༤ནམ་ལང་ཁར་བསྙུན་འདྲི་ཞུས་པས་ད་ནང་ཤེས་པ་ཡེ་དང་མེད་ལུས་ཅི་འདྲ་མ་ངེས་རླུང་ཁམས་ཅུང་ཟད་འཁྲུག་འདུག་གསུང་། ཞལ་ཟས་ཕུལ་བས་བཞེས་ཏེ་ཕྱེད་དབོན་ཆེ་བ་ལ་གནང་། ཅུང་ཞིག་ནས་དུས་རྒྱུན་དང་མ་འདྲ་བར་སྐུ་བཞེངས་ཏེ། དེ་རིང་གཟའ་ཅི་ཡིན་གསུང་། རེས་གཟའ་ཟླ་བ་ལགས་ཞུས་པས་དབུལ་ཉི་རེད་ཀྱང་། ཕལ་པས་བཟང་པོར་བརྩི་བས་སྐྱོན་མེད་དེ་རིང་འདིར་ཆེར་མ་འོང་གསུང་ནས། གྲི་ལྕགས་ལས་གྲུབ་སོར་གདུབ་ཆུང་ངུ་ཞིག་ཡོད་པ་ཚུལ་དཔལ་ལ་གནང་ནས་སྐུ་ཆིངས་གསོལ་གཟན་ཤམ་མནབ་ནས་ལམ་དུས། ཆབ་གཏོར། གཏོར་བསྔོ་བཅས་གྲུབ་པར་མཛད། ཉེ་གནས་པས་ཉི་མ་སྔ་གྲོ་རེད་གཏོར་བསྔོས་མཛད་མི་རན་ཞུས་པར། ང་འཁྲུལ་འདུག་སྔ་ཕྱི་ནམ་འདོན་ན་འདྲ་གསུངས། དེ་ནས་རྟེན་སྒམ་ཁྱེར་ཤོག་གསུང་ནས་འཕེལ་གདུང་ཁག་དང་། བྱིན་རྟེན་སྐོར་ཡོངས་རྫོགས་བཞེས། རྔ་རོལ་མང་པོ་བྱེད་གྲགས་ཆོས་ཉིད་མའི་སྒྲུབ་མཆོད་གྲོལ་བ་ཨི་རེད་གསུང་། ཉེར་གནས་ཀྱིས་ཁར་སེང་སྔ་མོ་ནས་གྲོལ་ཚར་ངེད་ནས་ཅི་ཡང་མི་གོ་འདུག་ཞུས་པས་ཅིའང་མི་གསུང་། ཞལ་ནུབ་ཏུ་ཕྱོགས་དགོས་གསུང་ནས་རྗེ་རྡོ་རྗེ་འཆང་བློ་གཏེར་ཞབས་ཀྱིས་གནང་བའི་དབུ་རྒྱན། རྡོར་དྲིལ་དང་ཆོས་གོས་སྣམ་སྦྱར་ཁྱེར་ཤོག་གསུངས་པས་དེ་རྣམས་བླངས་ཏེ་མདུན་ཅོག་ཁར་བཞག །དབོན་ཚུལ་དཔལ་ནས་ཕན་བདེ་མཁན་ཆེན་སོགས་ལ་སྙན་གསན་ཕུལ་སོང་འཕྲལ་དེ་རྣམས་བྱོན་པ་ན་ཅིའང་མི་གསུང་བར་བཞུགས། ཉིན་ཕྱེད་ཡོལ་ཙམ་ན། ཕཊ་དྲག་པོ་གསུམ་གསུང་པ་དང་སྐུ་དྲང་པོར་བསྲངས་ཏེ་བླ་མ་རིན་ཆེན་འབྱུང་ལྡན་གྱི་ཕྱག་སྟབས་དང་བཅས་དགོངས་པ་ཆོས་དབྱིངས་སུ་བསྡུ་བའི་ཚུལ་བསྟན་ནས་རྣམ་ཀུན་མཆོག་ལྡན་གྱི་སྟོང་ཉིད་དང་། མཆོག་ཏུ་མི་འགྱུར་བའི་བདེ་བ་ཆེན་པོ་གཉིས་ཟུང་དུ་འཇུག་པའི་འོད་གསལ་ཕྱག་རྒྱ་ཆེན་པོའི་ངང་དུ་མཉམ་པར་བཞག་པར་གྱུར་ཏོ། །དེར་བཞུགས་པའི་ཕྱི་ནང་གི་རྟགས་རྣམས་ཀྱང་གསལ་བར་བྱུང་ཞིང་ཐུགས་དམ་གསལ་འདེབས་དང་ཆོས་ཀྱི་དབྱིངས་ལས་གཟུགས་སྐུར་བཞེངས་བསྐུལ་ཕན་བདེ་མཁན་ཆེན་རིན་པོ་ཆེས་མཛད། ཐུགས་དམ་གྲོལ་བའི་རྟགས་གསལ་བར་བྱུང་བ་ན་སྐུ་གདུང་གི་ཞབས་འདེགས་ཞུས་སྐབས་འདོམས་ཀྱི་སྦ་བ་སྦུབས་སུ་ཚུད་པ་སོགས་མི་སློབ་པའི་ཟུང་འཇུག་མངོན་དུ་མཛད་པ་ལ་སོམ་ཉི་མ་མཆིས་སོ། །ཀྱེ་མ་བསྟན་པའི་ཉི་མ་ནུབ་རིར་གཤེགས་པ་ཡི། །གཏམ་འདི་ཐོས་པས་བདག་སྙིང་འགས་སམ་སྙམ། །འདི་ཚུལ་བརྗོད་པས་གདུང་བ་འཕེལ་བྱེད་ན། །དངོས་སུ་མཐོང་བ་སེམས་ལྡན་སུ་ཞིག་བཟོད། །འཇིག་རྟེན་སྒྲོན་མེ་གང་དུ་གཤེགས་པར་གྱུར། །བསྟན་པ་རིན་ཆེན་འདམ་རྫབ་ཁྲོད་དུ་བྱིངས། །ཐར་འདོད་རྣམས་ཀྱི་དཔྲལ་བའི་མིག་སྟོར་ཞིང་། །གླིང་འདིར་མུན་པ་ཆེན་པོས་ཁྱབ་པར་གྱུར། །ཀྱེ་མ་ཀྱི་ཧུད་མགོན་པོ་དབྱིངས་སུ་གཤེགས། །བདག་ཅག་སློབ་འབངས་ཚོགས་རྣམས་ཤུལ་དུ་ལུས། །འདི་འདྲའི་སྡུག་བསྔལ་ཁྲོད་དུ་འདོར་ཕོད་དམ། །བསྟན་པའི་སྣང་བྱེད་མྱུར་དུ་བཞེངས་སུ་གསོལ། །སྐྱབས་གཅིག་བླ་མ་རྡོ་རྗེ་འཆང་དབང་གི། ཐུགས་རྗེ་ཆེན་པོས་ངེས་པར་དགོངས་ནས་སུ། །འདི་ནས་བཟུང་སྟེ་བྱང་ཆུབ་མ་ཐོབ་བར། །ཁྱེད་ཀྱིས་བདག་ཅག་ནམ་ཡང་མ་གཏོང་ཞིག །ཉིན་མཚན་ཀུན་ཏུ་གསོལ་བ་འདེབས་བྱེད་ན། །བུ་གཅིག་མ་ཡིས་བརྩེ་བ་ཇི་བཞིན་དུ། །ལེགས་ཉེས་སྐྱིད་སྡུག་ཅི་དང་ཅི་བྱུང་ཡང་། །རྡོ་རྗེ་འཆང་དངོས་བླ་མ་ཁྱེད་རང་མཁྱེན། །ཞེས་པའི་གདུང་དབྱངས་ཀྱང་ཐལ་ལོ། །དེ་ནས་ཆོས་ཀྱི་དབྱིངས་སྟོང་པ་ཆེན་པོ་ལས་ལོངས་སྤྱོད་རྫོགས་པའི་སྐུར་བཞེངས་ཏེ། དེ་ཡང་། སྒྲུབ་ཐབས་རིན་ཆེན་འབར་བ་ལས། །རང་ཉིད་ལྷ་ཡི་རྣལ་འབྱོར་ལས། །བདུད་རྩི་འཁྱིལ་པ་བཟླས་པ་ཡི། །དྲི་ཞིམ་ཆུ་ཡིས་དང་པོར་བཀྲུ། །རྣམ་སྣང་མཛད་དུ་དེ་བསམས་ནས། །ཞེས་དང་། ཀྱེ་རྡོར་རྒྱས་པ་ལས། སྐུ་གསུང་ཐུགས་ཀྱི་རིག་སྔགས་གདགས། །རང་གི་ལྷའམ་གཞན་ཡང་རུང་། །སྙིང་པོ་སྙིང་གར་གདགས་པར་བྱ། །ཁྲུས་ཀྱིས་དག་བྱས་བདུད་རྩི་བྱུགས། །ཞེས་འབྱུང་བ་ལྟར་རྣམ་སྨེའི་ཁྲུས་སྒྲུབ་སྟེ་སྐུ་ཁྲུས་གསོལ། གནས་ཡིག་ཕུལ། ལོངས་སྤྱོད་རྫོགས་པའི་ཆས་ཀྱིས་བཞུགས་སུ་གསོལ་ནས་བླ་མཆོད་དང་འབྲེལ་བའི་མཆོད་པ་རྒྱ་ཆེར་ཕུལ། ཧོར་ཟླ་བཞི་པའི་ཚེས་གཅིག་ལ་སྐུ་གདུང་རིན་པོ་ཆེ་དཀྱིལ་འཁོར་བཞི་ལ་བརྟེན་མཁན་ཆེན་རིན་པོ་ཆེའི་དབུས་བྱས་པ་རྣམས་ཀྱིས་ཞུགས་འབུལ་བྱས། གདུང་ཞལ་དབྱེ་བ་ན། ཤེལ་ལྟར་དག་པ་དང་། ནམ་མཁའ་ལྟར་སྔོ་བའི་ཞུན་ཐིགས་ཆེ་ཕྲ་མང་པོ་དང་། རིང་བསྲེལ་གྱི་ཚོགས་མང་དུ་བྱུང་ཞིང་གདུང་རྣམས་དགུང་ཞག་མ་རྫོགས་བར་སྤྱི་བྱེ་ནས་ཀུན་ཏུ་བཟང་པོའི་མཆོད་སྤྲིན་རྒྱ་ཆེར་སྟོབས། །རྗེ་དབོན་རྣམ་གཉིས་ནས་དགོངས་རྫོགས་ཀྱི་མཆོད་སྤྲིན་རྒྱ་ཆེར་སྤྲོ་བ་ལ་ཞུགས་ཏེ་གདན་ས་ཆེན་པོ་དཔལ་ལྡན་ས་སྐྱར་ཁྲི་ཆེན་རིན་པོ་ཆེ་དང་། གདུང་སྲས། ཕུན་ཚོགས་ཕོ་བྲང་གི་གདུང་སྲས་རྣམ་གཉིས། གཞན་སྐུ་ངོ་ཁག་རྣམས་དང་། ཨེ་ཝཾ་བླ་གཞུང་མཁན་ཆེན། བླ་ཁག་མཁན་ཞབས་ཐམས་ཅད་དང་། སྡེ་ཁུལ་ཀཿདཔལ་ཞེ་རྫོགས་དཔལ་སྤུངས་སོགས་བླ་ཆེན་ཁག་རྣམས་ལ་མཆོད་བསྔོ་སྤུས་ནོམ་ལྡན་པ། ངོས་ལའང་ཆིབས་འགྲོས་ལྡན་སོགས་མཆོད་བསྔོ་རྟེན་རྒྱ་ཆེར་སྩོལ་ཞིང་། བླ་མ་འཇམ་རྒྱལ། བྲག་ར་རྡོ་རྗེ་འཆང་ལ་སོགས་པ་རིན་པོ་ཆེ་རྣམས་ཀྱི་མདུན་དུ་དགོངས་རྫོགས་མཆོད་སྤྲིན་རྒྱ་ཆེར་སྟོབ། ལྷུན་གྲུབ་སྟེང་རང་དུ། ཕན་བདེ་མཁན་ཆེན་དབུས། དབྱར་མཁན། ཤར་ནུབ། རྒྱལ་མཚན། དབུ་ཟུར་ཁག་རྣམས་དབུས་བྱས། ཆོག་གྲྭ་མང་བ་རེ་དང་བཅས་དགུང་ཚིགས་བདུན་ཕྲག་གསུམ་ལ་བླ་མ་རྡོ་རྗེ་འཆང་གི་ཐུགས་དམ་སྙིང་པོ་འཇིགས་བྱེད་ལྷ་བཅུ་གསུམ་མའི་སྒྲུབ་མཆོད་དང་། དེ་རྗེས་མཁའ་སྤྱོད། ཀུན་རིག་དགུང་བདུན་རིང་རྒྱུན་འདོན། མི་འཁྲུགས་སྒྲུབ་མཆོད་བདུན་ཕྲག་གཅིག །དགུང་ཚིགས་བདུན་པར་ངོས་དབུས་བྱས་པས་ཀྱེ་རྡོར་སྒྲུབ་མཆོད་དང་། རྫོགས་པའི་ཉིན་གཙུག་ལག་ཁང་བསམ་འགྲུབ་མཐོང་གྲོལ་ཆེན་མོར་ཚོགས་པ་ཞིབ་རྒྱས་ཀྱིས་ཀུན་རིག་ཆོ་ག་དང་འབྲེལ་བར་ཡོན་འབུལ་རྒྱ་ཆེར་སྟོབ། ངོས་འདུས་པར་བཅས་པས་དགེ་རྩ་རྫོགས་བྱང་དུ་བསྔོ་བའི་ཁུལ་བྱས། དེ་དག་གི་སྐབས་སུ། སྤོས་མར་མེ་ཞལ་ཟས་རྣམས་ཤིན་ཏུ་རྒྱ་ཆེ་བར་ཕུལ། མདོར་ན་དངོས་རྫས་ཐམས་ཅད་ཡོད་དགུ་རྩལ་སྤྲུགས་ཀྱིས་བླ་མ་རྡོ་རྗེ་འཆང་གི་དགོངས་པ་རྫོགས་ཐབས་ལ་འབད་པ་ལྷུར་བླངས་ཤིང་། གདུང་རུས་རྣམས་ལ་རུས་སྦྱོང་གི་ཆོ་ག་གྲུབ་རྗེས་དྲི་བཟང་གི་ཆུས་བཏུལ་ནས་སྐུ་དང་སཱཙྪ་གྲངས་མེད་བཏབ། ནང་རྟེན་དུ་གཙུག་ལག་ཁང་ཆེན་པོར་བཞུགས་རྒྱུའི་འཇམ་དཔལ་དབྱངས་གསེར་ཟངས་ལས་གྲུབ་པ་རྒྱང་མཐོ་བརྒྱད་པར་བྱོན་ལེགས་རྟེན་ཁྱད་པར་འཕགས་པ་དུ་མ་དང་། རིང་བསྲེལ་རྣམ་བཞིས་ཕྱུར་བུར་གཏམས་པ་དང་། འཇིགས་བྱེད་ཀྱི་སྣང་བརྙན། བླ་མ་རྡོ་རྗེ་འཆང་ཉིད་ཀྱི་འདྲ་ཞལ། ཕྱི་རྟེན་ཁང་བུ་བརྩེགས་པའི་མཆོད་རྟེན་བཞེངས་རྒྱུ་སོགས་རྗེ་དབོན་ཟུང་ནས་མཛད་དང་མཛད་འགྱུར་ཡིན་ལ་འདི་སྐོར་རྒྱུ་འགྲོས་ཞིབ་བཅའ་བརྗོད་ན་དགེ་བ་ངོམ་པའི་སྐྱོན་དུ་འགྱུར་བས་མ་བྲིས་སོ། །དེ་ལྟར་ཟག་མེད་ཆོས་ཀྱི་དབྱིངས་སུ་ཐིམ་ཡང་བརྩེ་ཆེན་ཐུགས་རྗེའི་ཤུགས་ཀྱིས་བསྐུལ་བས་ཞིང་འདི་དང་གཞན་དག་ཏུ་སྤྲུལ་པའི་རོལ་གར་ངེས་པ་དང་མ་ངེས་པ་སྣ་ཚོགས་པས་གདུལ་བྱ་རྒྱ་མཚོར་གང་ལ་གང་འདུལ་གྱི་ཐབས་མཁས་ཟབ་མོས་འདུལ་བར་མཛད་པ་ནི། གཞན་དོན་རྒྱུན་མི་འཆད་པ་ཐེག་ཆེན་འཕགས་པའི་ཁྱད་ཆོས་བླ་ན་མེད་པ་ཡིན་ཏེ། སྤྱོད་འཇུག་ལས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ་། །ཞེས་དང་། རྒྱུད་བླ་མ་ལས། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་དང་། རྒྱུད་རྡོ་རྗེ་གུར་ལས། འདུལ་བའི་འཇིག་རྟེན་སྣང་ནས་ནི། །འདི་ཡིས་གཟུགས་ནི་དུ་མར་བྱེད། །སངས་རྒྱས་སེམས་ཅན་བསྐྱབ་བཞེད་པས། །སངས་རྒྱས་གར་ནི་རོལ་པར་མཛད། །ཅེས་གསུངས་པ་ལྟར་རྣམ་རོལ་མཐའ་ཡས་པ་འབྱུང་བ་ནི་ཡང་དག་པའི་ཚད་མས་ངེས་པའོ། །གང་ཞིག་དད་པས་བླ་མ་མཆོད་བྱེད་ན། །ཕྱོགས་བཅུའི་རྒྱལ་བ་མཆོད་དང་བསོད་ནམས་མཉམ། །དེ་ཡི་ཕན་ཡོན་བརྗོད་ལས་འདས་པ་ཞིག །བདེན་པར་སྨྲ་བས་བཀའ་སྩལ་དེ་ཡི་ཕྱིར། །དད་གུས་ལྷག་བསམ་དྲག་པོས་བརྩོན་པ་རྣམས། །འདི་ཕྱིའི་དོན་ཆེན་ད་ལྟ་ཉིད་ནས་འགྲུབ། །བླ་མ་མཆོག་ཉིད་མངོན་འཚང་རྒྱ་བའི་ཚེ། །འདུས་པ་དང་པོར་སྐྱེ་བར་གདོན་མི་ཟ། །དྲང་དོན་གཟུགས་སྐུ་སྣང་བར་མ་གྱུར་ཀྱང་། །ངེས་པའི་དོན་ལ་སྐྱེ་འཕོའི་ཆོས་ལས་འདས། །ད་ནི་རང་སེམས་བླ་མ་ཧེ་རུ་ཀར། །ཤེས་པའི་ངང་ནས་འབྲལ་མེད་རྟག་ཏུ་མཇལ། །འོག་མིན་ཞིང་ཞེས་རིང་བར་མི་སེམས་ཤིང་། །རང་སྣང་གར་ཁྱབ་འོག་མིན་གཞལ་མེད་ཁང་། །དེ་ན་བླ་མ་བཞུགས་པས་བདག་ཡིད་སྤྲོ། །ཅིར་སྣང་ཐམས་ཅད་བླ་མའི་རོལ་པར་བལྟ། །ཞེས་རང་གིས་རང་ལ་དབུགས་དབྱུང་བས་ཉམས་དགའ་བར་བྱས་སོ། །དེ་རྣམས་ཀྱིས་བླ་མ་རྡོ་རྗེ་འཆང་གི་རྣམ་ཐར་དོན་གྱི་སྙིང་པོར་དྲིལ་བ་ལས། གཞན་བྱོན་བཞུགས་དང་འགྲོ་དོན་མཛད་ཚུལ་གྱི་ཟླ་ཚོད་ཚེས་གྲངས་སོགས་ཞིབ་ཆ་ཕྱག་ཐོ་འཁོད་མེད་པར་མ་ཟད་རྗེ་ཉིད་ཀྱིས་ཞལ་ནས། བླ་མ་རྣམས་ཀྱི་རྣམ་ཐར་ནང་། རྟ་མཛོ་སོགས་འབུལ་བ་བྱུང་རབས། ཕར་བཤད་ཚུར་བཤད་བྱས་ཚུལ་སོགས་བྲི་བར་འདུག་པ་དགོས་པ་མེད་ཅེས་ཡང་ཡང་ཕེབས་པས་དེ་འདྲའི་ངལ་བ་ལ་ཞུགས་པར་མ་བྱས་སོ། །སླར་སྨྲས་པ། བདག་བློ་སྐྱེས་སྦྱངས་པད་སྣལ་ལྟ་བུར་ཆེས་ཕྲ་ཡང་། །དད་དང་མོས་གུས་དབྱར་རྔས་བསྐུལ་བའི་མདོང་མཐའ་བཞིན། །ཤིན་ཏུ་དད་སྤྲོའི་ཚུལ་འདི་འབྲི་བར་བརྩོན་པ་ལས། །བྱུང་བའི་དགེ་བ་རྒྱ་མཚོའི་རྡུལ་སྙེད་ཐོབ་པ་རྣམས། ༡། ཀུན་མཁྱེན་ཀུན་དགའི་རྒྱལ་ཚབ་བླ་མ་རྗེའི། །ཟག་མེད་ཐུགས་ཀྱི་དགོངས་པ་རྫོགས་ཕྱིར་འབུལ། །བླ་མའི་བྱིན་རླབས་སེམས་ལ་ཞུགས་པ་དང་། །རྡོ་རྗེ་འཆང་གི་གོ་འཕང་མྱུར་ཐོབ་ཤོག༢། སྐྱེ་བའི་ཕྲེང་བ་ཀུན་ཏུ་བླ་མ་རྗེའི། །ཞབས་མཐིལ་བདེ་ཆེན་འཁོར་ལོར་བཀོད་བྱས་ནས། །གསུང་གསང་གདམས་པའི་ཀེ་ལ་ཤ་ཡི་རྒྱུན། །སྤྱི་བོ་ནས་ཞུགས་བདག་རྒྱུད་སྨིན་པར་ཤོག༣། མཐའ་ཡས་འགྲོ་བའི་སྡིག་ལྟུང་ཚང་ཚིང་མ་ལུས་སྲེག །ཡེ་ཤེས་རྡོ་རྗེས་བདག་ཏུ་རྟོག་པའི་བྲག་རི་བཅོམ། །ལུས་ཀྱི་དལ་ལ་དཀྱིལ་འཁོར་བཞི་པོ་རབ་སྨིན་ནས། །སྐུ་བཞིའི་རྒྱལ་ཐབས་དཀའ་བ་མེད་པར་རྙེད་གྱུར་ཅིག༤། བཀྲ་ཤིས་གང་ཞིག་ཀུན་འདུས་བླ་མ་ཡིད་བཞིན་ནོར་བུའི་སྤྲིན་ཆེན་ལས། །བྱུང་བའི་གྲུ་ཆར་དལ་གྱིས་འབེབས་པས་འཛམ་གླིང་ཡངས་པའི་ཁྱོན་ཀུན་ཁྱབ། །ཕན་བདེའི་སྣང་བ་བརྒྱ་ཕྲག་གསར་པ་བདོ་བས་མི་མཐུན་རྒུད་པ་ཞི། །བསྟན་དང་བསྟན་འཛིན་དར་ཞིང་རྒྱས་ལ་ཕུན་ཚོགས་ཕྱོགས་ལས་རྣམ་རྒྱལ་ཤོག༥། ཅེས་མཁན་ཆེན་རྡོ་རྗེ་འཆང་ངག་དབང་བསམ་གཏན་བློ་གྲོས་ཀྱི་རྣམ་པར་ཐར་པ་སྙིང་པོར་དྲིལ་བ་བཀྲ་ཤིས་འདོད་འཇོ་ཞེས་བྱ་བ་འདིའང་རྗེ་དེ་ཉིད་ལ་དད་པ་དང་དམ་ཚིག་འགྱུར་བ་མེད་པ་གུས་སློབ་ཡེ་ན་དགེ་སློང་ཤེས་རབ་ཕུན་ཚོགས་ནས་བཀྲ་ཤིས་པའི་ལྷ་རྫས། ལི་མེ་སྤུས་ལྡན་གྱི་སྐྱེས་དང་བཅས་འདི་ལྟར་བྲིས་ཞེས་བསྐུལ་བ་ན་རྣམ་ཐར་རྩ་ཐོ་བྱུང་ན་དེ་བཞིན་བགྱི་བར་ཁས་བླངས་པ་བཞིན་སྐུལ་བ་པོ་ཉིད་ནས་དཀའ་ཚེགས་ཆེན་པོས་ཞིབ་མོར་བྲིས་ཏེ་རྩ་ཐོ་བྱུང་བ་རྣམས་དང་། མཁན་ཆེན་ཉིད་ཀྱི་ཞལ་འཕྲོས་གནང་བ་དང་། གསང་བའི་རྣམ་ཐར་བཀའ་དྲིན་ཆེན་པོས་སྩལ་བའི་ཤོག་དྲིལ་ཉིད་དོན་གྱི་སྙིང་པོར་བཟུང་སྟེ། འཇམ་དབྱངས་བླ་མ་མཁྱེན་བརྩེའི་དབང་པོའི་བྱིན་རླབས་ཀྱི་ཟེགས་མ་ཙམ་ཐོབ་ཅིང་འཁོར་ལོའི་མགོན་པོ་འདི་ཉིད་ལས་ཟབ་རྒྱས་ཆོས་ཚུལ་རྒྱ་མཚོ་ཙམ་ཐོབ་པའི་བཀའ་དྲིན་གྱིས་འཚོ་ཞིང་སློབ་འབངས་ཀྱི་ཐ་ཆུང་ཆོས་མེད་སྙོམ་ལས་པ་རྨོངས་བརྟུལ་འཇམ་དབྱངས་ཆོས་ཀྱི་བློ་གྲོས་པས་ལྕགས་ལུག་ཐ་སྐར་ཟླ་བ་དགུ་པའི་ཚེས་བཅུ་ནས་དབུ་བརྩམས། ཟླ་བ་དེའི་ཚེས་བཅུ་གཉིས་སྔ་ཆར་གྲུབ་པར་བགྱིས་པའི་སྐབས་སྔ་རྗེས་སུ་ཀུན་མཁྱེན་བླ་མ་དེ་ཉིད་ས་ནས་སར་འཕགས་པའི་ལྟས་ས་ཆེན་པོ་སྔ་ཕྱི་ལན་བདུན་དུ་གཡོ་བའི་ལྟས་མཚན་བཟང་པོ་དང་བཅས་བྲིས་པ་ཚེ་རབས་ཐམས་ཅད་དུ་མགོན་པོ་མཆོག་དེས་ཐུགས་རྗེས་རྗེས་སུ་འཛིན་པའི་རྒྱུར་གྱུར་ཅིག །ཤུ་བྷཾ་མ་སྟུ་སརྦ་ཛ་ག་ཏཾ། མངྒ་ལཾ། ། ༈ རྡོ་རྗེ་འཆང་དང་གཉིས་སུ་མི་ཕྱེད་པའི། །ཁྱབ་བདག་དཔལ་ལྡན་བླ་མ་མཆོག་གི་སྐུ། །ལྕགས་ལུག་ནག་པ་ཟླ་བ་ཉེར་བཞིའི་དུས། །བདེ་ཆེན་ཆོས་སྐུའི་དབྱིངས་སུ་གཤེགས་པར་མཛད། །ཁུ་བོ་ཆོས་ཀྱི་ཉི་མ་ནུབ་པ་ནི། །དམུས་ལོང་ཁང་པ་ཆེན་པོའི་གཡང་དུ་ལྷུང་། །འོན་ཀྱང་ཟབ་དགོངས་ཡོངས་སུ་རྫོགས་པའི་ཕྱིར། །བདོག་པའི་དངོས་པོས་བླ་མ་དམ་པ་ལ། །རྣམ་དག་མཆོད་པའི་ཚུལ་ལ་བརྩོན་པར་བྱས། །རྣམ་ཀུན་མཆོག་ལྡན་མཉམ་པ་གྲོལ་མཚམས་སུ། །རྒྱུད་སྡེ་རྣམ་བཞིའི་དཀྱིལ་འཁོར་ལ་བརྟེན་ཏེ། །སྐུ་གདུང་རིན་ཆེན་ཞུགས་ལ་ཕུལ་བའི་སྐབས། །མཁའ་ལ་ཡེ་ཤེས་ལྔ་ཡི་འོད་འཕྲོ་ཞིང་། །འཁོར་ལོ་དཔལ་བེའུ་ལ་སོགས་སྣ་ཚོགས་མཐོང་། །སྒལ་ཚིགས་སོ་གཉིས་དཀྱིལ་འཁོར་སྣ་ཚོགས་བྱོན། །གདུང་རུས་རིན་པོ་ཆེ་ཡི་སྙིང་པོར་གྱུར། །དེར་ཡང་གཅིག་ལས་གཉིས་ཆད་བསམ་མི་ཁྱབ། །བདག་ཅག་དད་པའི་ཞིང་དུ་ངོ་མཚར་རྨད། །དེ་ལྟའི་དྲིན་ཆེན་ཆོས་ཀྱི་རྒྱལ་པོ་ལ། །མི་ཕྱེད་སྙིང་ནས་དད་པས་ཕྱག་བགྱིས་ཏེ། །རྣམ་དག་འདུས་པའི་བྱེ་བྲག་སྡེ་གསུམ་གྱིས། །རྣམ་གསུམ་བསོད་ནམས་ཞིང་ལ་སྤྱན་འདྲེན་ནས། །རྣམ་དཀར་བླ་མ་མཆོད་པའི་ཆོ་ག་དང་། །རྣམ་མང་ཐུགས་དམ་གཙོ་བོའི་སྒྲུབ་མཆོད་བསྐོར། །རྣམ་འདྲེན་ཐམས་ཅད་རིག་པའི་དཀྱིལ་འཁོར་ཆེར། །རྣམ་ཀུན་དགུང་བདུན་བར་དུ་སྒྲུབ་ཅིང་མཆོད། །རྣམ་མཁྱེན་བླ་མའི་དགུང་ཞག་མ་རྫོགས་བར། །རྣམ་གྲོལ་སྒྲུབ་ཁག་ལྔ་ལ་མཆོད་བསྙེན་དང་། །ཁྱད་པར་ཚོགས་མང་བསྙེན་བཀུར་བརྒྱད་ཙམ་ཕུལ། །གཞན་ཡང་གསར་རྙིང་དགོན་གནས་སོ་དྲུག་དང་། །སྒྲུབ་བརྩོན་དབེན་རིར་བཞུགས་པའི་བླ་མ་སོགས། །ཀུན་ལ་དངོས་པོའི་འབྱོར་པ་གྱ་ནོམ་ཕུལ། །འགྲོ་བ་ཀུན་གྱི་བསོད་ནམས་ཞིང་མཆོག་ཏུ། །འཇམ་དཔལ་ཞི་ཁྲོ་གསང་བའི་བདག་པོ་དང་། །རྡོར་སེམས་ཡབ་ཡུམ་ཚེ་སྦྱིན་མགོན་པོ་དང་། །འཕགས་མ་སྒྲོལ་མ་ས་སྐྱ་པཎ་ཆེན་ཞབས། །གསེར་ཟངས་ལས་གྲུབ་རིང་བསྲེལ་སྙིང་པོ་ཅན། །རྣམ་རྒྱལ་མཆོད་སྡོང་དམ་པའི་འདྲ་ཞལ་སོགས། །སྐུ་གསུང་ཐུགས་རྟེན་ཕྲ་རགས་དུ་མ་ཡང་། །བྱིན་རླབས་གཟི་འོད་འབར་བའི་རྟེན་དུ་བཞུགས། །མདོ་ཙམ་སྨོས་པའི་དགེ་བའི་མཆོད་སྤྲིན་དང་། །ཚོགས་གཉིས་རིན་ཆེན་དུས་གསུམ་བསགས་པའི་དགེས། །དྲིན་ཆེན་ཆོས་ཀྱི་རྗེ་ཡི་སྤྱན་ལམ་དུ། །རྣམ་དག་མཆོད་སྤྲིན་རྒྱ་མཚོར་འགྱུར་བར་ཤོག །སླར་ཡང་རབ་འབྱམས་ཞིང་ན་སྐུ་སྤྲུལ་སྟེ། །བསྟན་འགྲོའི་དོན་ཀུན་ལྷུན་གྱིས་གྲུབ་པ་དང་། །བདག་ཀྱང་འཁོར་གྱི་ཐོག་མར་རྗེས་བཟུང་ཞིང་། །མགོན་པོ་ཁྱེད་དང་འབྲལ་བ་མེད་པར་ཤོག །ཅེས་ཁུ་བོ་རྡོ་རྗེ་འཆང་གི་སྤྱན་སྔར་དགེ་བའི་མཆོད་སྤྲིན་འབུལ་བའི་བར་གྱི་ཤོ་ལོ་ཀ་བཅུ་གཉིས་འདི་རྣམས་རྩེ་གཅིག་ཏུ་སྨོན་པའོ།། །།

[edit]

@#/__/mkhan chen rdo rje 'chang ngag dbang bsam gtan blo gros kyi rnam par thar pa bkra shis 'dod 'jo zhes bya ba bzhugs so/__/ bla ma dpal ldan rdo rje sems/__/bde chen kha sbyor bdun gyi bdag__/dngos rnams kun gyi byed po der/__/mi 'gyur rtag par phyag bgyi'o/__/srid dang zhi ba'i mtha' las rab 'das chos dbyings dga' mar snyoms zhugs kyang /__/longs spyod yongs rdzogs bde ba chen po mi zad rgyan gyi rol mo 'khrol/__/gang 'dul phrin las nam mkha'i mtha' klas khyab bdag dpal ldan bla ma rje'i/__/zhabs la sgo gsum dngos kun btud do byang chub bar du 'bral med skyongs/__/thabs shes zung 'jug dang po'i sangs rgyas bla ma dpal ldan kye rdo rje/__/mkha' 'gro sgyu ma bde ba'i mchog gar sa gsum rol mdzad ye shes sku/__/thog mtha' dbus bral shin tu brtag dka' zab cing rgya che'i bdag nyid can/__/sku bzhi'i bdag nyid he ru ka dpal bdud bzhi mnan mdzad gang de rgyal/__/dus rnams za byed dus dgra'i dbang po rno dkar mche ba rab ldan zhing /__/gti mug 'joms byed ma he'i zhal can dpal ldan lhag pa'i lha mchog ni/__/'jam dpal rdo rje drag por khros pa shin tu mi bzad 'jigs rung sku/__/khro bo kun gyi spyi dpal dam pa gar dgu'i nyams ldan de la 'dud/__/rab 'jigs dus mtha'i me ltar 'bar zhing dug chen ha la'i mdog ltar gnag__/drag shul stobs ldan dpa' bo chen po mi'u thung gel pa'i 'dug stangs can/__/rnam 'phrul mtha' yas gaN+Di 'dzin pas bdud kyi g.yul ngo zlog byed pa/__/bla ma rdo rje nag po chen pos 'bral ba med par skyongs shig kye/__/'jam dpal dbyangs dngos bla chen sa skya pa/__/rgyal bas lung bstan brnyes pa kun dga' bzang /__/snyan brgyud bstan pa'i srog shing tshar pa rje/__/mtshungs med bla ma brgyud par bcas la 'dud/__/rnal 'byor ma dpal rje btsun rigs byed ma/__/tshogs kyi bdag po 'dod pa'i rgyal po dang /__/zhing skyong stobs 'phrog dbang po la sogs pa/__/mkha' 'gro srung mar bcas pas shis pa stsol/__/dpal ldan bla ma yon tan rgya mtsho'i gter/__/snyan brgyud rgya mtsho'i chu klung 'bum phrag 'khyil/__/rnam thar dpag yas bdag 'dra'i spyod yul las/__/brgal yang mos gus sa bon tsam du spel/__/'di la khyab bdag bla ma yis/__/thog mtha' bar gsum dge legs kyi/__/byin rlabs bkra shis me tog gi/__char chen rgyas par dbab tu gsol/__/zhes shis pa'i tshig gis lam yangs por phyes nas/__de la 'dir bdag cag gi dpal ldan bla ma dam pa mtshan brjod par dka' yang don gyi slad du mtshan nas smos na 7ngag dbang bsam gtan blo gros snyan brgyud bstan pa'i rgyal mtshan dpal bzang po zhes srid pa gsum na mtshan gyi grags snyan dngar pos khyab pa de nyid kyi rnam thar nyung ngu 'chad pa la don gsum ste/__sku'i skye ba sngon ma ji ltar byung tshul dang /__da lta'i rnam thar cung zad rgyas par bshad pa dang /__'das rjes kyi rnam thar mdo tsam smos nas mjug bsdu ba'o/__/dang po ni/__dpal ldan bla ma mthu stobs kyi dbang phyug 'di nyid nges pa'i don du gdod ma nas skye 'chi'i spros pa las 'das pa'i byang chub chen po'i go 'phang dam pa mngon du mdzad zin na'ang /__sangs rgyas rnams kyi phrin las 'gog pa med pa ni chos nyid can yin pas gang 'dul gzugs sku'i rol mo mtha' yas pa zhing 'di dang zhing khams gzhan dag tu 'byams klas par byon pa las/__re zhig gling bzhi pa'i 'jig rten gyi khams las dzam+bu'i shing gis brgyan pa'i lho phyogs kyi dbus bskal bzang gi sangs rgyas rnams mngon par byang chub brnyes pa'i gnas 'phags pa'i yul du'ang paN+Di ta dang grub thob rnal 'byor pho mo sogs skye ba'i phreng ba mang po dang /__rdo rje gdan gyi byang phyogs spur rgyal bod kyi ljongs 'phags pa spyan ras gzigs kyis bsrung ba'i zhing 'dir yang rgyal po dang /__lo paN mkhas grub mang po'i sku yi phreng ba grangs med ston par mdzad pa gor ma chag kyang re re nas brjod pa'i spobs pa zad par gyur to/__/de ci zhig ce na/__rje bla ma de nyid dus kun tu dman sa kho na 'dzin pa las skye ba'i phreng ba mthon por rlom pa sogs kyi nga rgyal mi mnga' bas yon tan thams cad bum nang gi mar me ltar sba zhing /__skye ba'i phreng ba 'di'o zhes zhal nas dngos su thos pa med cing gsang ba srung ba la thugs shin tu sgam pa yin no/__/de lta na'ang khams ston grub pa'i dbang phyug chen po sangs rgyas rgya mtsho'i bag chags rang shugs kyis shin tu mthug po rjes su dran par mnga' ba yin zhes thos la/__de ni rje tshar chen gyi rnam 'phrul yin pa dang /__yang la las sde dge sa dbang bla chen byams pa sangs rgyas kun dga' bstan pa'i rgyal mtshan gyi skye ba dran par gsungs zhes bshad la/__de ltar na shin tu 'brel chags shing bla chen de nyid sangs rgyas rgya mtsho'i skye bar grags pa dang /__rdo rje 'chang mkhyen rab byams pa'i sprul par yang bla ma dag gsungs so/__/'di la'ang gtan tshigs shig 'dug ste/__sa skya pa'i snyan brgyud la thugs rtsis che zhing phyag bzhes mkhas pa dang /__gshin rje dang chos skyong la rtsal 'don gnang ba dang /__dbang drag gi las la rno myur che lugs/__dpal dus kyi 'khor lor bag chags che ba/__sde dge yab chen gyi gsungs la thugs gtsigs gnang tshul/__lhun grub steng la gzigs bskyangs rtsal drag pa/__nag zla'i tshes 24la zhing gshegs pa sogs sngon gyi rnam thar dang chos mtshungs pas so/__/don la mkhas grub mang po'i sku yi skye ba brgyud mar bzhes pa ni tshar chen rin po che'i rnam thar dang /__skyes rabs las 'byung ba ltar yin te/__'phags yul du rnal 'byor gyi dbang phyug biR+Wa pa/__s+tha wI ra'i gnas brtan rigs sngags 'dzin/__kha che d+harma pA la/__paN chen ga ya d+ha ra/__mkhas grub khyung po rnal 'byor/__ma byon sangs rgyas rab gsal gyi rnam 'phrul kha che paN chen shAkya shrI b+ha dra/__sangs rgyas gnyan ston/__kun mkhyen chos sku 'od zer/__bu ston thams cad mkhyen pa/__yar klung pa seng+ge rgyal mtshan/__shangs chos pa bsod nams bzang po/__grub chen rnal 'byor dbang mo/__tshar chen rdo rje 'chang nyid kyi sprul pa bka' 'gyur ba mgon po bsod nams mchog ldan/__mthu chen sbas pa'i rnal 'byor khams ston sangs rgyas rgya mtsho zhes gnas gsar rdo rje 'chang gi bla mar bsten cing lung rtogs kyi yon tan dpag tu med pa dang ldan pa ste/__de ltar skyes rabs u duwa ra'i phreng mdzes ltar byon pas bstan pa rin po che bshad sgrub las gsum gyis sku tshe snga ma rnams su'ang spel bar mdzad pa'o/__/de lta bu'i skyes rabs kyi phreng ba byon pa'ang byang chub sems dpa' chen po rnams dmigs pa med pa'i snying rje chen po'i gzhan dbang du gyur pa dang /__smon lam gyi mthu btsan pas gzugs sku'i sgyu 'phrul gyi rol mo 'byams klas pas bstan 'gro'i don mtha' yas pa sgrub pa la sus kyang 'gog pa med pa'i chos nyid mngon du gyur pa yin te/__cho 'phrul bstan pa'i mdo las/__kye rgyal ba'i sras dag de bzhin gshegs pa'i thabs mkhas pa dang /__sems can yongs su smin par bya ba ni mang ngo /__/sems can rnams kyi bsam pa ji lta bu dang /__ji ltar 'dul ba dang /__dge ba'i rtsa ba ji lta bu dang /__sems can rnams kyi mos pa sna tshogs kyi spyod pa mkhyen nas chos ston to/__/sems can kha cig ni byang chub sems dpas 'dul/__kha cig ni nyan thos kyis 'dul/__kha cig ni rang sangs rgyas kyis 'dul/__kha cig ni lhas 'dul/__kha cig ni brgya byin gyis 'dul/__kha cig ni tshangs pas 'dul/__kha cig ni klus 'dul/__kha cig ni rdzu 'phrul chen pos 'dul/__kha cig ni rgyal pos 'dul/__kha cig ni ting nge 'dzin gyis 'dul/__kha cig ni chos ston pas 'dul/__kha cig ni cho 'phrul gyis 'dul/__kha cig ni de bzhin gshegs pa mya ngan las 'das pas 'dul/__kha cig ni ring bsrel gyis 'dul/__zhes sogs rgya cher gsungs pa ltar ro/__/kye ma skye sogs spros pa rab zhi yang /__/skye ba'i tshul gyis sprul pa'i rtsed 'jo ni/__/mtha' klas mig 'phrul lta bur ston pa la/__/ngal ba med pa'i snying stobs chen po gang /__/chags med rdul dang bral ba'i ye shes kyi/__/rang gzugs srid par 'phos pas 'gro ba rnams/__/thugs rje thabs mkhas mdzad pa rnam mang gis/__/byang chub mchog gi sa bon theb par byas/__/e ma 'di ni lhar bcas dga' ba'i gter/__/'gro ba'i nyer 'tsho dpag bsam ljon pa bzang /__/sna tshogs 'bras bu dus su smin pa la/__/sten par mi byed sems ldan su zhig yod/__/ces bar skabs kyi tshigs su bcad pa'o/__/gnyis pa sku tshe 'di nyid kyi rnam par thar pa cung zad rgyas par bshad pa la sku skye ba bzhes pa'i tshul/__rang gzhan gyi don gnyis lhun gyis grub pa'i tshul/__mya ngan las 'das kyang mdzad pa rgyun mi 'chad pa'i tshul dang gsum/__dang po ni/__'dren pa dam pa chos kyi dbang phyug chen po 'di ni don dam par sangs rgyas thams cad kyi thugs rdo rje'i ngo bor mngon par byang chub chen po'i rgyal thabs las ma g.yos shing tshu rol mthong ba'i blo can rnams kyi ngor/__mdo sde rgyan las/__/de yis chos kun sgyu ma lta bu dang /__/skye ba skyed mos tshal 'gro ltar rtogs te/__/zhes pa ltar gzhan gyis ma bskul bar rang nyid kyis bsam bzhin du kun mkhyen nyi ma'i gnyen gyi bstan pa rin po che spyi dang /__bye brag 'jam dpal dbyangs dngos rje btsun sa skya pa'i bstan pa rin po che mtha' dag dang /__yang sgos tshar chen rdo rje 'chang chen po'i snyan brgyud kyi bstan pa spel ba la de nyid dngos su 'byon pa lta bu'i rnam thar gtsang ma chu dang 'o ma ma 'dres pa so sor 'byed pa ngang pa'i rgyal po lta bu mkhyen rab kyi rnam dpyod mtshungs zla ma mchis shing /__mi 'phrog pa'i spobs pa bstan pa chos thams cad kyi nying khu gsang sngags rdo rje theg pa'i zab don rgya mtsho'i gter mdzod chen por gyur pa 'di nyid kyi sku'i skye ba bzhes pa'i yul ni 'dzam gling gi lte ba rdo rje gdan gyi byang phyogs kha ba'i rdul gyis dkrigs pa'i ljongs 'dir stod mnga' ris skor gsum/__bar dbus gtsang ru bzhi/__smad mdo khams sgang drug tu grags pa las mdo khams kyi ljongs 'bri klung dam pa chos kyi 'byor pas phyug pa'i 'bri rdza sgang gi sa yi char/__sde bzhi dge bcu'i dpal gyi 'byor pa chen pos mngon par gtams pa'i rgyal khab chen po lhun grub steng dang nye ba'i chab 'bangs/__zil lha sde dkar po'i nang gses dngul phu nang zhes par/__rus ni si tu kun mkhyen chos kyi 'byung gnas kyi thugs sras kyi thu bo mkhas grub chen po 'be lo tsA ba tshe dbang kun khyab ces 'be rdza nyin dam thog sgang du a lcags 'bru'i rus las 'be spo ru byams chos pa zhes/__dpal ldan bla ma dam pa bsod nams rgyal mtshan gyi thugs sras 'jam dbyangs gong ma chen po'i bka' lung gis mngon par mtho ba de nyid sogs skyes bu dam pa mang du byon pa'i phyi ma/__'be sgrol ma mgon dang /__thon mi saM b+ho Ta'i gdung rigs bsod nams sgron ma'i sras su sku 'khrungs pa de nyid kyi dbon rabs mi brgyud bar ma chad pa las bzo gnas rgya mtsho'i gnas la byang chub pa/__kar shod rdza stod lha bris pa dbu mdzad bsod nams dbang phyug ces pa lha sku bris 'bur gang la'ang mkhyen dpyod 'gran zla med pa de nyid/__sde dge chos rgyal chen pos lha bris rten bzhengs skabs gdan drangs pa na sku tshe mthar ma phyin te/__gegs chag tu gyur pa na/__chos rgyal chen pos rdzong sgo gcig brlag pa las kyang gyong che zhes thugs skyo chen po mdzad par grags pa de nyid ni rje 'di'i yab dang /__yum ni bo chung zer ba gshis bzang zhing snying rje dang ldan pa/__dkon mchog la gus shing gtong phod can dge ba'i phyogs la 'dun pa de nyid la sras ming sring gsum las rje bla ma 'di sras 'bring ba yin no/__/de yang rab byung bco lnga pa'i stod 'grel ba'i bi rta ba ste rnam byung zhes pa sa pho 'brug gi lor sku bltams pa dang /__yum gyi mngal du bzhugs pa na'ang yum la gnod pa med cing yab yum gnyis char la mtshan ltas rmi lam bzang zhing sku lus bde la zo mdog bzang ba dang /__sku'i chu 'dzin mngal sbubs las grol ba na'ang nyes skyon gyis ma gos shing ha cang 'byor pa dang rgud pa'i mtha' gnyis su ma lhung ba/__byang chub sgrub pa la 'gal rkyen dang bral ba'i bar ma'i rigs rnam par dag pa las mtshan dpe'i nyin byed dbang po bzhad par gyur to/__/sku na phra mo'i dus der yang dam pa'i rigs sad pas byis pa'i thal rtsed phal gyis ma rnyogs shing /__dbang skur chos 'chad kyi rnam pa dang /__'don rta gdangs dbyangs lha yi mchod cha sogs dang /__bla ma grwa par dga' ba'i rnam 'gyur dang /__rang nyid kyi na bza' yang dmar mdog la spro zhing /__sems can la snying rje rang shugs kyis ldan pa phal pa'i spyod yul las khyad par du gyur pa zhig yin par grags shing /__sku shin tu gzhon dus zhabs gnyis kyi mthil la yig 'bru lta bu'i ri mo khyad 'phags shig yod kyang phyis su grib rkyen las mi mngon par gyur ces thos so/__/mgon po shar ri'i phrag nas legs 'ongs pa'i/__/zla gzhon bcu drug gsar pa'i lang tsho can/__/rgyal sras snying rjes yongs gang mig mi 'dzum/__/sa 'dir snang ba'i skal bzang thog mar 'char/__/mthong na mi mthun med pa dag cing gtsang /__/rgyu mthun 'bras bu smin pa mtshan dpe'i rgyan/__/cha shas rdzogs pas lhar bcas dga' ba'i dpyid/__/gzugs sku'i dkyil 'khor sgrib med mngon sum snang /__/gnyis pa rang gzhan gyi don gnyis lhun gyis grub pa'i tshul la gsum/__rang don tshul gnas thos bsam sgom pa'i mthar son pa dang /__gzhan don 'chad rtsod rtsom pas bstan pa rin po che rgyas par mdzad pa dang /__gnyis ka'i don du mkhas btsun bzang gsum gyi yon tan rgya mtshor dbang 'byor ba'i tshul lo/__/dang po la'ang /__'phags pa dbyig gnyen gyis/__tshul gnas thos dang bsam ldan pas/__/sgom pa la ni rab tu sbyor/__zhes pa ltar/__gzhi chos 'dul rin po che'i snying po tshul khrims kyi bslab pas thugs rgyud sdom pa'i tshul ni/__sku 'khrungs nas rim gyis nar son pa na dad dang nges 'byung snying rje sogs dam pa'i rigs yongs su gsal bar sad pa'i mthu las/__chos grwa chen po dpal ldan lhun grub steng gi grwa sar zhugs nas dgung grangs brgyad pa'i dus klog slob pa na/__slob dpon gyis ngal ba cher ma dgos shing /__rje 'dis kyang sku la dka' spyad ma bzhes par yig dkar nag thams cad legs par klog pa la dka' tshegs med par mkhyen/__dgon pa'i bsgrigs kyi tshogs 'don skor rnams thugs 'dzin gnang ba na'ang tshar kha shas re bklags pas thugs su chub pa na thams cad kyis btsun chung 'di ni sngon sbyangs can zhig yin par 'dug__/'di 'dra'i shes rab che lugs la dpag na gzhan las khyad par du 'phags pa zhig 'byung bar 'dug ces glengs/__cho ga'i phyag bzhes dang 'don rta dbyangs 'bud brdung dkrol gsum/__dkyil 'khor bri thig rnams sngo gna' bla ma don grub rgyal mtshan las gsan pas mkhas pa'i phul du phyin/__dgung grangs nyer gsum son pa lcags stag lor yon tan rin po che du ma'i 'byung gnas dpal e wa~M chos ldan du grwa sar phebs/__snyigs dus kyi rgyal ba gnyis pa rdo rje 'chang kun dga' bzang po'i chos kyi khri la bzhugs pa'i chos 'dul rgya mtsho'i pha rol tu son pa khang gsar mkhan chen ngag dbang blo gros snying po dang /__las slob sogs grangs tshang ba las tshig gsum bar ma chad du bzhes pas thub pa'i rgyal mtshan nyams pa med par bzung /__mtshan ngag dbang bsam gtan blo gros gsol/__de phyin nyams pa dang /__bcom pa dang /__pham par gyur pa'i ltung ba'i rdul dang dri ma las 'das pa'i tshul khrims sting 'thung dkar po las byung ba'i bsngags 'os kyi dri bsung zhim pos phyogs thams cad du khyab par gyur cing rgyal ba dgyes pa'i brtul zhugs mchog la rtag tu gnas shing /__rje nyid kyi zhal nas kyang ngor nas bsnyen rdzogs thob phyin chad sdom pa la gnong 'gyod gtan nas med ces gsung pa'o/__/dad dang mos gus chu mtsho dwangs pa la/__/drang srong thub pa'i gzugs brnyan 'char ba na/__mos gus zla ba gsar pa'i bdud rtsi yang /__/lhan cig chu gter che la rol par byed/__/mi gtsang 'dam gyi dri mas ma sbags par/__/shin tu dngar ba'i ma la ya yi dris/__/gang gi lus la reg pa de yi mod/__brgya byin ngur smrig stobs la rengs par chas/__/dmar ser mtshams sprin gsar pas bklubs pa dang /__/dbang po kun zhi dul bar gnas pa yi/__/spyod pa kho nas dgra bcom gnas brtan che/__/mngon sum snang bas thub bstan mdzes par byas/__/zhes bar skabs kyi tshigs su bcad pa'o/__/gnyis pa thos pa rgya mtsho'i mthar son pa'i tshul ni/__de'ang sku na gzhon dus byang phyogs thub pa'i rgyal tshab yongs rdzogs bstan pa rgya mtsho'i mnga' bdag 'jam dpal dbyangs dngos mkhyen brtse'i dbang po mjal bar rdzong sar bkra shis lha rtser phebs nas/__rje 'jam pa'i dbyangs de nyid kyis bsod nams brgya las grub pa'i phyag mthong na mi mthun pa med pa glang po che'i sna ltar brkyangs nas rje 'di'i dbu la bkod de zhal nas hrIHSh+Ti dang /__bzhad pa brgyad kyi sngags gsungs shing thugs dgyes pa chen po'i mdangs phyung ba dang bcas/__'di nyid kyis bstan pa la phan pa rgya chen 'byung bar 'gyur ro zhes pa'i lung bstan stsal ba dang /__thang rgyal lugs kyi tshe dbang dang /__gang blo ma'i rig gtad dang lung gsan cing byin rlabs bka' bsgo dang smon lam rgyas par thob pas rten 'brel shin tu dge bar gyur/__lnga rig smra ba mkhas dbang 'jam dbyangs mkhyen rab mtha' yas las/__sum cu pa dang rtags kyi 'jug pa'i gzhung gi bshad pa zhib mo/__brda dag gsal bar byed pa'i bstan bcos ngag gi sgron me/__nag rtsis dang /__skar rtsis kyi dgu mtha'/__sgra kA la pa'i mtshams sbyor ming le bcas kyi ri mo/__sdom gsum 'jam dbyangs bla ma'i dgongs rgyan/__ngor chen thams cad mkhyen pa dkon mchog lhun grub kyi tshul gsum mdzes rgyan dang /__ljon shing mdzes rgyan/__dbu ma 'jug pa/__dbu ma rgyan/__byang chub sems dpa'i spyod pa la 'jug pa/__rgyud bla ma/__bshes pa'i spring yig sogs kyi bshad pa zhib mo gnang ba rnams la gsan sbyangs kyis brtson pa cher bskyed pas slob gnyer gyi gzhi things par gyur/__gangs khrod smra ba'i seng+ge mi pham 'jam pa'i dbyangs las/__mdo sdud 'grel pa lugs gnyis kyi bshad lung /__'byed rnam gnyis kyi bshad pa rnams gsan/__sngo gna' bla ma don rgyal las/__dkar nag rtsis kyi lag len/__go la'i rnam bzhag__/gso dpyad kyi skor phal cher dang /__'tsho byed mkhas pa'i dbang po zhwa chen bla sman pa dang /__blo gros phun tshogs gnyis las/__rtsa mdo chu mdo dang /__ldum bu ngo sprad/__sman gyi bsdu sbyor sogs gsan nas lag len yang mdzad/__kun gzigs mkhan chen gzhan phan chos kyi snang ba las spyod 'jug dang /__rigs tshogs lnga dang /__dbu ma 'jug pa'i bshad pa/__rtogs ldan lhag bsam las/__sum rtags bshad pa dang /__sdeb sbyor rin 'byung kA la pa'i ri mo 'gro lugs rnams dang /__mkhas dbang dbyangs can snyems pa'i lang tsho las/__dbyangs can sgra mdo/__snyan ngag le bar/__spyod 'jug sher le bcas kyi go khrid gsan/__dgung grangs bcu gsum par sde snod 'dzin pa rgya mtsho'i gtsug rgyan sa yi steng na yongs su grags pa'i mkhas pa chen po kun bzang bsod nams mdun nas/__rdo rje 'chang blo gter zhabs dang lhan cig rgyal ba'i bka' 'gyur rin po che tshang ma'i bklag lung gsan skabs bzhugs tshugs sogs shin tu legs pas rdo rje 'chang dang /__bla ma rin po che thugs shin tu dgyes/__de'i nye gnas mkhas dbang a dpal las/__tshul khrims rnam dag gi mdo 'grel dang /__spyod TIka[i]/__gang blo'i 'grel pa sogs kyi bshad lung rnams gsan/__mi pham rin po che'i nye gnas bla ma chos dbyings 'od gsal las/__tshig bdun bla ma'i rnal 'byor/__tshogs mchod/__rnam bshad pad+ma dkar po/__dbu ma rgyan gyi 'grel chen/__bstod tshogs skor dang /__'jam dbyangs mchod chog sogs kyi lung dang /__rigs brgya'i khyab bdag mkhan chen rdo rje 'chang ngag dbang blo gros snying po ngor gyi khri thog mdzad skabs 'dul sdom sngar bshad pa ltar dang /__lam 'bras lugs kyi sems bskyed/__dpal kye rdo rje'i rgyu lam gyi dbang dang /__lam 'bras tshogs bshad kyi byin rlabs rjes gnang khrid/__pod lung rnams bcas shin tu rgyas pa dang /__phan khang rin po che dpal ldan blo gros rgyal mtshan las/__dpal rdo rje 'jigs byed rwa lugs lha bcu gsum ma'i dbang lung khrid gsum/__dri med rnam gnyis kyi dbang lung bcas dang /__sgrub thabs rin po che kun las btus pa nyin lnga drug rjes ma zin pas chad pa las de 'phros yongs rdzogs gsan/__phan bde mkhan ngag dbang kun dga' bstan pa'i rgyal mtshan las/__ngor lugs 'jigs byed lha dgu'i dbang khrid lung /__rgyal bas lung bstan brnyes pa 'dzam gling chos kyi 'khor los sgyur ba 'jam mgon ma hA paN+Di ta blo gros mtha' yas pa'i zhal snga nas smin gling thugs rje chen po gar dbang bde gshegs kun 'dus kyi dbang lung dang /__gsang mtshan pad+ma bde ba rtsal 'dogs par mdzad/__'brug lugs grub brgya'i byin rlabs/__bla ma nor lha'i dbang lung lha mo dpal gyi sgom lung /__'jam dbyangs dang /__sgrol dkar rjes gnang /__gang blo ma'i ljags bshad bcas gsan par mdzad/__ljags mi bde tsam yod pa 'jam mgon rin po che'i gsang chab bzhes pas ljags je bder gyur gsung /__khyad par du tshe rabs kyi phreng ba mang po nas 'brel ba thob pa'i rtsa ba'i bla ma thub bstan rgya mtsho gsal ba'i nyi ma/__sras bcas rgyal ba'i mkhyen brtse nus gsum gcig tu bsdus pa'i rang gzugs rgyud sde rgya mtsho'i gsang mdzod 'dzin cing bka' yi sdud po rdo rje chos dang rnam dbyer med pa/__thar rtse zhabs drung rdo rje 'chang 'jam dbyangs blo gter dbang po bkra shis grags pa'i rgyal mtshan dpal bzang po'i zhabs pad mnyes pa gsum gyis bsnyen pa las sgrub thabs rin po che kun las btus pa'i gzhung rtsa ba dang /__kha skong bcas kyi dbang rjes gnang /__rig gtad/__sgom lung /__byin rlabs bcas shin tu grangs mang ba so so'i sgrub thabs las tshogs man ngag bcas pa'i lung dang khrid bcas rgyas pa bum pa gang byo'i tshul du stsal/__rgyud sde rin po che kun las btus par rgyud sde bzhi dang 'brel ba'i dbang khrid/__lung bcas rdo rje 'chang de nyid las bya spyod skor phal cher dang /__bde mchog skor yongs rdzogs/__dus 'khor/__kye rdor skor sogs gsan pa dang /__rje de nyid kyi thugs sras be tshang chos rje mkhas grub rgya mtsho las dbang chen dka' gras rje gsang ba'i bdag po'i mdun nas gnang ma grub pa rnams gsan te mdor na yab sras gnyis ka las rgyud btus smin grol yongs rdzogs kaHthog si tu paN chen/__mkhas dbang 'jam dbyangs mkhyen rab sogs dang lhan cig gsan par mdzad/__rje btsun sa skya pa'i gdams ngag gi nying khu che ba bcu gcig dang ldan pa'i gsung ngag rin po che thun mong ba rnams las khyad par du gyur pa/__brgyud pa gsum 'dus kha'u brag rdzong pa'i khyad chos lam 'bras bu dang bcas pa'i smin grol dbang gi chu bo ma nub pa/__byin rlabs kyi brgyud pa ma nyams pa gdams ngag gi sarga ma log pa/__mos gus kyi bsam pa tshim par nus pa ste/__tshad ma snyan brgyud bzhi'i sgo nas man ngag slob bshad zab mo'i skor sngon 'gro snang gsum gyi skabs 'di pa'i lugs kyi sems bskyed/__slob ma rjes 'dzin sngon du 'gro ba'i/__rgyu lam gyi dbang /__bdag med ma'i dbang dang byin rlabs/__gzhan lam zab sogs byin rlabs skor yongs rdzogs/__rgyud gsum gyi khrid kyi skabs 'khor 'das dbyer med kyi lta khrid rig thog nas gdar sha chod nges pa sogs nyams khrid shin tu smin pa/__rgyab rten bla ma'i rnam thar dang /__pod lung yongs rdzogs rje rdo rje 'chang nyid kyis mdzad pa'i 'chad thabs ltar rgyas pa dang /__kye rdor rgyud gsum gyi bshad pa sgro 'dogs chod par zhib rgyas gsan/__gzhan yang dpal ma hA kA la gur gyi mgon po'i bka' bab bzhi'i dbang /__rjes gnang phyi nang gsang khrid bcas dang /__nA ro mkha' spyod ma'i byin rlabs khrid bcas/__dbu ma lugs dang /__rgya chen spyod brgyud kyi sems bskyed sdom chog__/blo sbyong gi khrid legs bshad kun btus/__snyan brgyud chen mo sogs blo sbyong skor mang po dang /__sa skya gong ma rnam lnga'i gsung 'bum lung /__rje nyid kyi gsung rab rnams kyi lung sogs zab rgyas chos tshul rgya mtsho gsan pas rigs brgya'i khyab bdag 'gran gyi do med skyabs gnas gcig chog tu bzung bar mdzad do/__/mang du thos pa rgya mtsho'i pha rol son pa thub bstan legs bshad bzang po las/__jo nang rje btsun chen pos bka' bsdu gnang ba'i sgrub thabs rin 'byung de'i kha skong bla ma nyid kyis bsgrigs pa'i rjes gnang lung bcas/__khang sar zhabs drung rin po che bkra shis rgya mtsho'i mdun nas chag med rnam bzhi'i dbang /__byin rlabs/__dmar po skor gsum gyi pod lung bka' gdams glegs bam rin po che'i lung sogs mang du gsan/__mkhan chen bkra shis 'od zer las kar lugs phyogs kyi bde mchog dbang rjes gnang /__phyag chen khrid sogs mang po gsan par mdzad/__shar chen 'jam dbyangs chos kyi nyi ma las tshe dpag lha dgu'i dbang /__rdzogs sprul lnga pa las/__dkon spyi'i tshe dbang dang /__nyi grags thugs chen dang /__bdud rtsi sman gyi sgrub dbang /__dge mang sku zhabs las/__gzhan phan mtha' yas gyi zhal gdams gsung mgur sogs kyi lung /__sems khrid rnams gsan/__kaHthog si tu rin po che las mkhyen brtse'i dbang po'i dgongs gter rtsa gsum 'od gsal snying thig__/'khon lugs rdo rje phur pa jo nang nas brgyud pa'i smin grol/__snga 'gyur bka' mi'i sgyu 'phrul zhi khro/__thugs sgrub bar chad kun sel sogs chos bka' rgya che tsam gsan/__zhe chen rgyal tshab 'gyur med pad+ma rnam rgyal las/__phur pa yang gsang spu gri'i dbang lung /__rgyal thang pa'i gcod dbang khrid/__pod lung/__kar gling zhi khro 'gro drug rang grol gyi dbang /__bar do drug khrid/__rje mkhyen brtse'i snyan brgyud yang dag phur pa/__grub thob thugs thig yang phur sbrags ma rnams kyi dbang /__rje nyid mdzad rang byung rdo rje'i bla sgrub lung dang khrid bcas gsan/__kun gzigs bla ma rin po che ngag dbang legs pa las/__sa 'jam sbag sgrub kyi byin rlabs/__tsha chu bla ma rin po che shrI ma hA kA la dang /__'phags ma sgrol mas rjes su bzung ba/__'jam dbyangs bstan 'phel las/__mkha' spyod ma'i byin rlabs/__ye na bla ma sangs rgyas bstan 'dzin las/__sgrub thabs kun btus pod dgu'i lung dang /__dkon mchog lhun grub dang /__zhu chen ma hA paN+Di ta rnams kyi bka' 'bum lung mang po/__bla ma dkon mchog rgyal mtshan las ngor chen bka' 'bum/__rgyud sde kun btus kyi lung yongs rdzogs/__bla ma don rgyal las/__mgon po'i rjes gnang /__mkha' spyod byin rlabs sogs dbang bka' mang ba dang /__shar bla ma ngag dbang blo gros las/__gur mgon gyi gzhung pod yongs rdzogs dang /__zhal pod gnyis dang /__las gshin dang /__beg rtse'i pod bcas kyi lung /__mthu stobs kyi dbang phyug dpal ldan 'jam dbyangs las/__dpal mgon zhal gyi rjes gnang yongs rdzogs/__khrid pod lung /__ngor lugs rwa pod kyi lung /__bla ma ngag dbang bstan pa las/__dpal bde mchog mkha' 'gro rgya mtsho'i dbang chen dang /__mkha' spyod be bum gyi lung /__rje dbon gzhan phan kun dga' las/__chos spyod pod chung sogs ci rigs gsan pa dang /__'bru 'jam dbyangs grags pa las/__jo lugs dus 'khor gyi khrid lung dang /__mi pham rin po che'i 'grel chen bshad lung /__lam rim ye shes snying po'i lung sogs dang /__rdzogs chen mkhan blo gsal las dpal sprul bka' 'bum lung /__mkhas btsun bla ma 'jam dbyangs rgyal mtshan las dbu ma bzhi brgya pa/__rgyud sde spyi'i rnam bzhag__/mngon rtogs rjon shing chen mo sogs gsan/__gter ston dri med 'od zer las/__rang gter mkhan chen zhi 'tsho'i byin rlabs/__dus chen ston pa'i mchod thabs kyi lung sogs/__kaHthog rmog sprul las/__rang gter phag dkar dbang khrid sogs mdor na rje bla ma 'di chos tshol ba la shin tu brtson pas gang zag mchog dman la ma ltos par brgyud pa la nges 'drongs yod na gus pas btud de gsan par mdzad cing /__shin tu dman pa bdag lta bu las kyang /__mkha' 'gro gsang 'dus kyi dbang khrid lung /__grub thob thugs tig gi rtsa dbang /__thugs sgrub rnam gnyis sogs mang du bzhes par mdzad pas mtshon gsar rnying ris med kyi dbang khrid gdams pa lung gi rnam grangs sogs ches mang ba gsan kyang che long tsam las zhib tu 'god par ma nus la/__mdor na/__phyi so thar/__nang byang sems/__gsang ba sngags kyi theg pa la rgyud sde rin po che rnam pa bzhi dang rjes su 'brel ba gangs ri'i khrod 'dir rgyun bzhugs pa phal mo che la thugs gnyer gnang bas mang du thos pa'i chu gter chen por gnas bcas pa yin no/__/shes bya mu med brjod pa'i yul las 'das/__/thams cad mkhyen pa'i spyod yul kho na las/__/blo gros khang bur dkrigs pa min na yang /__/rnam pa kun mkhyen byed pa'i nye rgyu mchog__/phyi nang shes byar slob la rtag tu brtson/__bslab par ma byas kun mkhyen 'gyur ba ni/__/srid pa'i khongs 'dir mkha' yi pad+mo mtshungs/__/rgyu 'bras mi bslu tshad mar rgyal bas gsungs/__/des na dam pa rnams kyis brtson bya ni/__/mtha' klas chos tshul rgya mtshor 'jug 'di lags/__de phyir dam pa rgyu skar mgon 'dis kyang /__/blo gros gter chen 'phel ba'i thabs mchog bskrun/__/zhes kyang smras so/__/gsum pa bsam byung rig pas sgro 'dogs ji ltar bcad pa'i tshul ni/__de ltar smos ma thag pa'i yongs 'dzin bshes gnyen dam pa rnams las gsan pa de dag kyang thos pa tsam gyis chog par 'dzin pa dang /__bun yig lta bu'i thob tshogs kyi pod kha mtho ba la gzigs pa min par ji ltar thos pa'i rnam grangs de dag gi don dang tshig gi cha la bsam byung gi shes rab kyi nyi ma stong phrag 'bar bas ma rtogs log rtog phyogs rtogs dang /__yang dag par ma rtogs pa'i mi shes pa'i mun pa drung nas phyung ste/__phyi nang rig gnas dang bcas pa'i pad tshal gyi kha yongs su 'byed pas mdo sngags gzhung lugs kun gyi rang dang spyi'i mtshan nyid kyi don/__mngon sum dang /__lkog gyur/__shin tu lkog gyur gyi gzhal bya'i yul la/__'jal byed mngon sum dang /__rigs pa tshad ma dang /__lung rnam dag gi tshad ma gsum gyis 'jal bas 'gal 'brel gcod pa la blo gros kyi sgo brgya dbang med du 'byed pa'i spobs pa mi zad pa'i gter chen brdol ba ni dpyod ldan rnams kyis nye bar brtags na gsung gi snang ba dang /__legs bshad kyi tshogs rnams las shes par 'gyur zhing /__de'ang tshig gi lbu ba dang gzhan zer cal sgrogs kyi rjes rgyug tsam min par rang lugs sa skya'i rje btsun gong ma 'jam pa'i dbyangs dang zhal mi gnyis pa rnams kyi gsung rab dri ma med pa'i dgongs don ji ltar gnas pa la gzhan gyis 'phrog tu med pa'i nges shes the tshom dang bral ba yang dag par brnyes pa'o/__/'dab stong bzhad pa'i lha yi skyed tshal du/__/skal bzang bung ba gzhon nu rol pa las/__/nges don sbrang rtsi'i bcud kyis myos pa na/__/legs bshad dbyangs su sgrogs la 'gog pa med/__/log rtog dug chu'i bsam pas rnyogs pa rnams/__/mkhyen dpyod ke ta ka yis bgrungs pa na/__/thos bsam mchod yon gtsang ma'i lbu phreng g.yo/__/sras bcas rgyal rnams dgyes phyir gus pas 'bul/__/dkar 'jam shog bu'i ngogs su 'char ba rnams/__/mkhyen rab me long gtsang ma'i dbyings su sdud/__/bsnyel ba med cing ma 'dres sa ler bkra/__/gang de rje btsun brtan pa'i 'khor lo dngos/__/zhes bar skabs kyi tshigs su bcad pa'o/__/bzhi pa mthar thug bsgoms pas ye shes brnyes pa'i tshul la/__bsgom pa ji ltar mdzad tshul dang /__de las brtsam ste thun mong nang gi rnam thar dang /__thun min gsang ba'i rnam thar 'chad pa dang gsum/__dang po ni/__de'ang mchog tu mi 'gyur ba rdo rje sems dpa' kha sbyor yan lag bdun ldan gyi dngos grub ni lam bsgoms pas spang bya spangs rim dang /__rtogs bya rtogs rim las thob pa yin la rtogs pa de med na mi 'byung ba'i thabs kyis mthar thug rtse gcig sgrub pa kho na la gzhol dgos/__de'ang nges 'byung /__byang sems/__spros bral gyi lta ba rnams gcig grogs gcig gis byas shing /__snod bcud lhar shar ba'i bskyed rim dang /__rdo rje'i lus kyi phung khams skye mched rten dang brten pa la gnad du bsnun pa'i rdzogs rim thun mong dang thun min te/__rdo rje theg pa'i lam zab mo dag la rtse gcig tu gzhol bas mchog dngos rnyed par 'gyur la/__de rnyed pas thun mong gi dngos grub zhar la 'byung ba yin par dgongs te ngor nas phyir phebs pa na/__dpal phyag na rdo rje 'byung po 'dul byed/__bcom ldan 'das dpal dgyes pa rdo rje'i gzhi'i bsnyen chen/__ngan song thams cad yongs su sbyong ba bcom ldan 'das kun tu rig pa'i bsnyen chen rnams brgyud pa'i phyag bzhes bzhin tshad ldan bcu cha'i sbyin sreg bcas mthar phyin pa mdzad/__de las kyang ri khrod dben par bsten na 'dod yon gyi g.yeng ba chung zhing /__sems 'dul ba la gnas dben pa nyid rgyal bas bsngags pa dang /__sems 'dul ba ni chos kyi snying po ste/__'phags pa klus/__nyid kyis thugs dul mdzod cig bcom ldan gyis/__/sems ni chos kyi rtsa ba lags par gsungs/__/zhes pa ltar/__de bzhin gshegs pas chos bstan pa thams cad gdul bya'i sems kyi tha ba 'dul ba'i thabs zab mo kho na ste/__thos pas ni sgo gsum zhi dul/__bsam pas ni nyon mongs mgo gnon/__bsgom pas ni nyon mongs pa drung nas 'byin par byed la/__thos bsam byas kyang bsgom pa ma byas na 'chi kha tha mal du lus nas nyams nyes su 'gyur ba yin te/__phal po che las/__ji ltar mnyan pa mkhas pa zhig__/skye bo mang po sgrol byed kyang /__/rang nyid kyis ni ma thos ltar/__/ma bsgom chos kyang de dang 'dra/__/ji ltar 'on pa rol mo mkhan/__/skye bo mang po mgu byed kyang /__/rang nyid kyis ni ma thos ltar/__/ma bsgom chos kyang de dang 'dra/__/ji ltar skye bo skom pa dag__/chu ni mthong dang thos pa yis/__/skom pa'i sdug bsngal mi sel ltar/__/ma bsgom chos kyang de dang 'dra/__/zhes gsungs pa ltar/__rtsa ba'i bla ma rnams las ji ltar thos shing dbang dus su gtso bos ji ltar gdams pa khas blang gi gnas las mi 'da' ba dang /__byas shes kyi bka' drin rjes su gsob pa'i ched du rdo rje'i gnas yul chen po a lo bkra shis gnas su phebs nas zab pa'i mthar thug dpal kye rdo rje'i sngon 'gro re re bzhin bsags sbyong so sor 'bum phrag thon pa dang /__slar yang yi dam de nyid kyi thugs dam zab mor bzhugs nas sbyong gzhi sbyong byed gnad du bsnun pa dang /__gtso bor lam zab bla ma'i rnal 'byor dang /__'khor 'das dbyer med kyi lta ba la myong ba thon par bsgoms pas snang srid 'khor 'das kyi chos thams cad sems las byung zhing /__de'ang stong nyid brjod pa thams cad dang bral ba'i ngang du chos thams cad ro mnyam zhing de las 'da' ba med pa'i gnas lugs zab mo ji lta ba bzhin bla ma dang lhag pa'i lha'i byin rlabs kyis rtogs par gyur nas/__bka' las kyang de phyin gnas lugs kyi ngo bo la yin min gyi the tshom tsam yang mi 'dug rtogs pa'i ngo bo la 'pho 'gyur med ces gsungs so/__/gzhan yang snga rjes rnams su rigs gsum spyi/__rnam snang mngon byang /__rdor dbyings/__gsang bde/__rnal 'byor ma/__khyad par rdo rje 'jigs byed ngor tshar gnyis kyi bka' srol so sor bsnyen chen rgyas par gnang ste rgyun du thugs dam gyi snying por mdzad/__lha 'di dang mgon po gnyis las mthu stobs nus pa'i dbang phyug tu gyur/__dpal dus kyi 'khor lo/__rdo rje phur pa sogs rgyud sde mang po'i bsnyen pa dang /__mi 'khrugs/__tshe dpag lha dgu/__sgrol ma dkar dmar/__rnam rgyal 'joms/__rta mgrin/__'jam dkar/__dbyangs can ma/__rigs byed lha mo/__thang lugs tshe sgrub/__grub rgyal tshe sgrub sogs lhag pa'i lha yi bsnyen pa mang po/__mgon po che chung /__rnying lugs 'ja' tshon zab gter dkon mchog spyi 'dus kyi bsnyen sgrub las gsum tshad ldan/__mkhyen brtse'i zab gter 'chi med 'phags ma'i snying tig gi bsnyen sgrub gnang bas mtshon/__rje nyid kyis gsung las/__yi dam gyi lha gcig 'grub na gzhan kun 'grub pa yin kyang bla ma las dbang thob pa'i don go red pas gsar rnying gi lhag pa'i lha mang por bsnyen tshad re ma 'jog pa med gsung /__dus rgyun du'ang lta ba 'khor 'das dbyer med kyi nyams len dang ma bral ba'i ngang /__lam zab phyi nang /__rnal 'byor dbang phyug gi srung ba thun mong dang thun min/__dpal kye rdo rje'i mngon rtogs lam dus kyi dbang rgyas pa blang ba dang /__'khor lo bzhi la brten pa'i rdzogs rim rgyun ring por mdzad nas bzlas pa brgya rtsa re nyung mtha' byas pa dang /__rnal 'byor ma'i bzlas sgom bcas thugs dal dus thun gsum/__thugs brel che dus thun gnyis re dang /__lam dus thun gcig la bsdus pa mdzad/__dpal rdo rje 'jigs byed/__mgon po che ba rnams chag med dang /__yi dam chos skyong la gtor bsngo shin tu rgyas pa khom lcogs med dus ngor lugs dang /__phal cher tshar lugs ltar gsung /__dus bzhi la bskang ba shin tu rgyas pa dang /__dkar cha bzhi/__gtor ma brgya rtsa sogs shin tu rgyas pa/__me gsur/__bsngo smon sogs chag med mdzad pa ste 'di rigs phyogs tsam las phyag tho sogs zhib cha med pas ji bzhin smra ba ma spobs kyang mdor na sgo gsum tha mal du skad cig tsam yang mi bzhugs par dbang bskur chos 'chad/__bstan bcos brtsam pa/__de min thugs dam kho nar bzhugs pas de las thob pa'i nang gi yon tan dkar po'i phyogs kyi zla ba bzhin 'phel ba las grub gnyis kyi bdud rtsi'i gter gyis gtams pa yin no/__/a ho/__ting 'dzin sgeg mo'i 'gram chang gis myos pas/__/sgo gsum tha mal 'khrul pa dbyings su thim/__/ye shes rdo rje 'bar ba'i me 'od kyis/__/bdag rtog bag chags rtswa sbur bzhin du bsregs/__/rdo rje gsum gyi dpyid kyi thig le che/__/rnal 'byor nang gi nyi mas dros pa las/__/rgyu dang mi rgyu d+hU ti'i dbyings su 'ching /__/he ru ka dpal bcom ldan grub pa'i gtso/__/kha cig 'dod ldan rmongs pa bsgom byas pas/__/sems rtog bag rer 'gags pas khengs byed kyang /__/rkyen dang 'phrad tshe rang mtshang gsal ston pa/__/de ko rnams las ches cher mchog tu 'phags/__/dpal ldan bla ma rnal 'byor dbang phyug ni/__/phyi ru nyan thos spyod pa bskyangs byas shing /__/nang du 'dus pa'i don la rab dga' bas/__/'dus pa gsum gyi 'phrang las brgal bar byas/__/sgro 'dogs chod pa'i lta ba spros bral dang /__/ting 'dzin skyon med sgom pa rgyun chad med/__/spyod pa'i rgyal po 'ching zhen med pa yis/__/'bras bu he ru ka dpal go 'phang brnyes/__/zhes kyang ched du brjod do/__/gnyis pa bsgoms pa las dngos grub brnyes pa'i tshul las brtsams te thun mong gi rtags mtshan dang 'brel ba'i nang gi rnam thar ni/__ngor du rgyu dbang gsan skabs dbang gi ye shes kyi byin rlabs mchog tu 'bar bas bde stong gi nyams skyes/__des mtshon lam 'bras kyi dbang byin rlabs thams cad la byin rlabs kyi bab re byung gsung /__ngor chen rdo rje 'chang gi 'dra zhal mdun gsol btab mdzad pas tshe rabs thams cad du thugs rjes 'dzin pa'i mtshan ma rnyed/__rmi lam du'ang rje btsun ngor pa chen pos byin rlabs kyi mtshan ma ci rigs thob/__dbang khang sbug gi mgon po rlung zhon ma ye shes pa dngos su mthong /__ngor gyi gling gseb cig la mi rgan sma ra se khyug ge ba zhig 'gro ba mthong bas rjes sor dpyad pas gnas srung zhal bzhi pa yin 'dra gsung /__sa skyar rje btsun ma rta mgrin dbang mo mjal tshe zhal ras bye ru ltar dmar ba la spyan gsum hrig ger g.yo ba mjal/__dgon chen du kye rdor gzhi bsnyen bzhugs skabs/__thun bcad bzhin pa'i skabs gzims sgo phye byung ba mi nag po mi'u thung ang rag gyon pa zhig byung nas khyod kyi mthun rkyen ngas sgrub/__bar chad kyang ngas sel zhes smras nas yal/__khang pa gnam mthong can zhig tu mgon po'i gsang sgrub bsnyen skabs/__khang steng phyogs nas sgra chen zhig grags/__yar bltas pas/__me dpung 'bar ba'i nang du gur mgon cha byad dkyus ltar la ha cang khro ba min pa khru gang tsam mthong ba dang /__shes pa brgyal ba'i rnam pa byung /__de nas gsol 'debs byas pas/__sku de me dpung dang bcas pa hU~M mthing nag tu gyur nas rang la thim/__thun grol skabs bskyed rim gsal brtan 'byams klas pas bsdu mi nus pa lta bu'i nga rgyal brtan po byung gsung /__rje btsun grags pa'i sku bstod chos rnams ma 'bum ther lnga bsags skabs dngos nyams rmi lam du zhal mthong gsung gi dbugs dbyung thob/__de'ang sku na smin pa sngags ban cha lugs can zhig mjal nas bu khyod dang nga dus rtag tu 'bral ba med pa yod gsungs pa thos/__rje btsun rin po che 'di la thun mong min pa'i mos gus ches cher mdzad/__sa skya pa'i sngags kyi nyams len la brtson pa zhig yin na 'di'i gsung la yang yang lta ba dang 'di kho nar gsol ba 'debs pa zab ces yang yang bka' stsal to/__/bla ma nyid yi dam du dngos su mjal te/__de'ang rdo rje 'chang blo gter zhabs lhun grub steng dbyar gnas khang du bzhugs skabs nyin gcig sku bcar zhus pa gzim khri nang mi'u thung mdog nag khro gtum nyams ldan phyag g.yas rdo rje 'phyar/__g.yon sdig mdzub mdzad pa me 'od 'phro ba mthong bas mjal ma phod par phyir log__/de phyin bla ma gsang ba'i bdag por dngos su thag bcad/__'jigs rung lag na rdo rje'i rnam par 'phrul/__zhes sogs brgyud 'debs gsar rtsom la byung ba'ang gnad de yin gsung /__tshar 'jigs bsnyen skabs dus dgra'i dbang po ma he'i gdong can gyi zhal bstan skabs der bstod pa'ang mdzad/__de phyin chos rnams mi brjed pa dang /__khyad par rmi lam gyi skabs su rlung sems lha skur ldang ba dang /__rdzogs rim gyi 'od gsal la nyin mtshan 'byams pa'ang byung /__bstod pa 'di'ang rang bzhin rtsom pa min pas byin rlabs yod ces gsung /__rgya mi'i 'khrugs 'dzings skabs/__drug cu nyin bcu bzhir gnang ba'i zor gtor las sgron me ltar gsal ba'i me 'bar ba mngon sum byung /__zor 'phen skabs cung zad ma theb pa ni rgya mi yun ring tsam gnas pa'i ltas su mngon/__yang skabs der mi bsrun pa 'ga' zhig gis bstan dgon la 'tshe ba na thang rgyal khang du gsol bskang dang drag bskul mdzad pas lha khang gi chos skyong ldeb bris kyi mgon po'i zhal dang thod pa nas rak+ta'i zham chu 'bebs pha rol po de'ang lnga pa'i lam du gyur skad/__lcags ra'i mgon khang du bshags pa phrin bcol mdzad/__phyag gis nas bshar rgyab skabs mgon sku las me stag 'phro ba kun gyis mthong /__sde dges mgon khang gsar bzhengs dus/__pu Ta'i lcags snying sgrub skabs de steng bya nag bab par kun gyis mthong /__bya nag rab gsal nang nas phyir 'phur/__lcags snying la drod chen po 'bar ba de 'phral nang rten du bzhugs/__sde sras a ja gnyan ldang lha gsol byon skabs/__rje bla ma gdan 'dren zhus pa lam bar chibs 'brogs byung ba sku sa la ma yal bar bar snang du rdzu 'phrul gyis bskyod nas pha bong zhig gi steng bya bab pa ltar bzhugs/__tshe thar rnams la phyag nas 'thor skabs phyag nas las me stag 'phro ba mthong /__gnyan ldang dbu rtse'i la btsas nye char nas gnam lcags rdo rje rtse dgu zhig bzhes pa phyis dpal mchog mchod rten nang bzhugs mdzad/__bsam 'grub mthong grol chen mo'i ngor chen 'dra zhal nam mjal dus phal cher spyan gsum khro 'dzum can sogs mthong tshul mi 'dra ba mjal gsung /__theg chen sbyor lam thob pa'i rtags sku lus la shig sro mi 'byung ba dang /__chos nyid kyi gnas lugs mthong ba na chos can lha yi 'khor lo 'char ba zhig ngang gis 'ong rgyu red 'dug phebs pa'ang rje bla ma nyid la de ltar 'byung ba shugs kyis go/__lcags rar dbyar gnas kyi mkhan po mdzad skabs mnal lam du/__rlung 'tshub kyi nang mi dmar mdung thogs pa zhig gis dpal gshin rje'i gshed kyi pho brang nyams pas gso bar bskul ma byung bzhin/__phyi nyin mkhar hrul du phebs nas lha tho brtsig__/btsan rgod la gsol mchod phrin las bcol bas dgyes pa'i rtags mtshan mngon du byung /__de'i nub mo mnal lam du btsan rgod a bseb dang /__bek+tse'i las mkhan srog bdag dmar po/__phrin las rgyal po'i a tsa ra sogs byung ste/__khong rnams slob dpon pad+ma'i bka' dang dam la gnas pa zhig yin zer/__mi gzhon gos dkar can zhig 'ongs nas mi snang bar gyur to gsung /__'jigs byed lha khang rab gnas skabs 'brug ldir ba lta bu'i sgra chen po byung bas ye shes pa dngos su bstim par mdzad/__lha khang gsar bzhengs phyogs 'dir 'jam dpal gshin rje'i gshed kyi gnas khyad par can yin zhing las dag pa yin na dur khrod chen po brgyad kyi dbus na 'jam dpal gshin rje'i dkyil 'khor rang byung du yod pa mjal rgyu yod do gsung /__yang phyogs der dbyar bzhugs skabs shig__/rdul 'phyag skabs gos kha dog sna tshogs pa'i zegs ma mang po 'dug par ci yin zhus pas/__dgra bcom gnas brtan rnams byon pa'i na bza' zag pa yin gsung /__lo der sngar ye mi skye ba'i me tog dmar pos phyogs thams cad khyab par skye ba byung /__'jigs byed lha khang du gzhung gi zhabs brtan 'jam dpal khro bo'i las sbyor skabs gtor ma dang ling+ga las khrag gi zham chu'i rgyun chen po 'bab pa dang /__las gtad gtor ma phyag gis bskul ma dgos par dgra yul du thegs/__drwa sgang sgrub sder gtor sgrub skabs mgon chen gtor ma las rlangs pa 'phyur zhing gtor ma snod dang bcas par lcags bsreg lta bu'i drod 'bar zhing reg tu mi btub pa nyin mang por gnas pa kun gyis shes/__zhal gyi bskang ba rgyas res nyin de ring rgas po phebs yod pa 'dug gsung /__brag rdzong ma'i khrid gnang skabs sgo ma bzhi'i zhal gzigs dang lung bstan byung na'ang zhib par ma gsungs/__thang stong rgyal pos lan gnyis tsam zhal bstan nas byin gyis brlabs/__grub rjer bstod pa dang nyams mgur dpyid kyi rgyal mo'i glu dbyangs kyis kyang bsngags pa mdzad/__lhun grub yang rtse'i dben khrod du bzhugs skabs nub gcig shing leb lta bu zhig gi steng rje btsun dkar po rnam gsum 'dzum mu le bzhugs pa mjal gsung /__phyir nyin bla ma sa chen gyi bla ma'i rnal 'byor mdzad/__dngul srib phyogs kyi spangs ljongs la skyo bsangs skabs mnal lam du pha ril se mgor rdo rje 'chang blo gter zhabs sku tshad ri dil tsam ngur smrig gis bklubs pa/__g.yas su zhal rgyan can gyi bla ma sku na smin pa/__g.yon du zhal rgyan cung yod pa'i bla ma gzhon nu zhig la lha mi mang pos phyag mchod byed 'dug pa ngo shes pa'i mi gcig 'dug par/__g.yas g.yon gnyis su red dris pas g.yas phyogs de yongs 'dzin dpal ldan chos kyi rgyal mtshan/__g.yon de dpon slob ngag dbang legs grub red zer/__'jam dbyangs kyi sprul pa gsum gyi zhal mjal skal ba bzang snyam nas/__'jam dbyangs bla ma gsum la gsol ba 'debs/__/'jam dbyangs bla ma gsum gyis byin gyis rlobs/__/brjod bzhin phyag mang po 'tshal bas gsum gyi zhal nas sgra mthun par gsung ngag rgyud gsum gyi khrid gnang /__sems la sngar ma go ba'i nges shes du ma skyes ngang mnal sad/__zhe chen du phebs nas mi pham rin po che'i gdung rten mdun zhag gcig bzhugs pa'i phyir nang mdang ngas mi pham rin po che dngos su mjal gsung /__de dus kyi rgyus yod zhig gis gleng /__yang dad ldan gyi slob mas rnam thar zhus pa na/__nga dkor nag gis pho ba brgyags rabs/__rta rngam gos rngam che rabs/__bdud kyi phye gtor snyan grags che rabs sogs bris na las/__phyi ma dmyal zangs su 'tshed nges shing nga dang las ngan du rgyu 'dug gsung mnyam bzhag mdzad cing phaT mang po gsungs/__yang skabs shig na/__bla ma las dbang dang gdams ngag zhus phyin de la yon tan med na'ang sangs rgyas su shes na de'i go 'phang mngon du byed/__bla ma tha mal par mthong na rang nyid 'khor ba'i sdug bsngal las thar dus med pas des na sangs rgyas dngos kyi 'du shes bskyed na/__rdo rje 'chang nas brtsams brgyud pa'i bla ma thams cad kyi byin rlabs bla ma'i thugs la 'dus/__bla ma'i thugs de rang sems kyi ngo bo rig pa gsal la ma 'gags pa de'i rang ngo skyong nas lam gyi thun bzhi la dbang blangs pa ma chag par gyis dang gsungs nas byin gyis brlabs par mdzad phyag gis me tog gtor nas/__bla ma dam pa'i yon tan la/__/log lta skad cig mi skye bar/__/byin rlabs gcig bsdus bla ma de/__/rang sems shes pa'i bkra shis aH_gsungs nas sku chung dus nas brtsams sngon gyi rigs sad lugs dang /__sdom pa sum ldan mdzad tshul sogs rag rim gsung zhing sgrol dkar gyi bsnyen sgrub zla ba bcu gsum mdzad pa na mnal lam du bud med gcer bu rgyan med pa zhig gis dpa' bo khyod kyi blo gros rgyas par 'gyur zhes gsungs pa dang mnal sad/__de phyin nas sher phyin mngon rtogs rgyan rtsa 'grel la thugs legs par sbyong zhing yum rgyas pa dang mdo sbyar mdzad pas phar phyin theg pa'i lta ba phyin ci ma log pa legs par go gsungs/__de skabs sgrol dkar bcud len ril bu sgrub pa nyis 'gyur du 'phel ba las kha dog dri bsung bdud rtsi'i zil dngar dang ldan pa'i ro nus phun sum tshogs pa gang gis kyang mtshon du med pa byung ba dang /__yang skabs shig na shrI ma hA kA la'i rnal 'byor pa nub bla ma dkon mchog rgyal mtshan gyis mdun du shog gsungs nas byon pa na/__khyed bstan pa la phan pa'i skyes bu dam par 'dug /__sku tshe'i bar chad yod shas che/__nga yi rmi lam na nam mkha' dwangs par nyi ma bzhi shar ba chu tshod re re'i yun gyis 'grib song ba zhig byung bas/__khyed la zhal dkar po'i tshe dbang zhig phul dgos gsung nas gnang bar mdzad pas sku tshe'i bar chad gyi 'phrang las grol/__mkhan chen dpal ldan blo gros rgyal mtshan gyi mdun du byon pa na khyod kyi tshe rabs las lha 'jam dpal gshin rje'i gshed yin no gsungs/__dpe khrod nas pusti gcig khyer shog gsung pa bzhin bsnams nas phul bas 'jigs byed lha bcu gsum ma'i dkyil chog nag 'gros can zhig red 'dug par ngas byas pa de bzhin red 'dug gsungs nas 'jigs byed dbang khrid rgyas pa gnang /__rdo rje 'chang blo gter zhabs kyis 'jigs byed dbang gnang skabs/__ral gri/__gri gug__/thod pa khrag gis bkang ba sogs rje 'di la stsal/__las gshin thun mong dang /__thun mong min pa'i rjes gnang skor tshang bar gnang nas 'jigs byed chen po'i nyams len la brtson par gyis shig ces gdams par mdzad pa bzhin brtson pas grub pa'i 'bras bu mngon du gyur/__rdo rje nag po chen po'i phyi nang gsang gsum bsnyen sgrub tshad ldan dang /__yi ge bdun pa dung phyur gcig bgrang tshul sogs bka' stsal ba na dad ldan slob mas 'di skor rnam thar du bris na zhus pas pho rgod las dag pa rnams kyi rnam thar la bsam na mthong ba tsam gyis shes med sa rdo yin yang dad gus skyed thub pa yod rgyu las 'di 'dra'i tshig gis dad gus skyed thub pa ci'ang med ces gsungs/__nag phyogs 'tshub 'gyur ldang skabs/__rje btsun bcom ldan 'das ma rigs byed dbang mo'i ting nge 'dzin gyis/__rgya mi'i dpon chen kha shas yid kyi brtan pa dbang med du phrogs nas gus shing 'dud par byas/__rgya yi dmag mi gcig gis khyod kyi lus la me 'bar 'dug ces rgya yi skad kyis zer nas gus pas btud par byung /__mkhar mdo dgon par bon po'i byad kha ldang bar rje nyid kyis srung bzlog mdzad cing seng gdong bzlog pa re ma bcad gsungs nas mi 'jigs pa sbyin par mdzad/__mda' dpon bkras mthong pa'i zhabs rim dbang gi sbyin sreg skabs me rang 'bar byung bar grwa 'khor rnams ngo mtshar skyes/__shing glang zla ba dgu pa'i tshes bcu dgu'i nang mor dngul phur sman lum mdzad skabs/__chab bsil phebs par shar phyogs nas go bo zhig 'phur byung ba/__rje bla ma'i dbu klad tsam du slebs pa dang /__sdigs mdzub mdzad nas phaT drag po gsung pa dang thang la lhung /__de nas sman lum khar phebs nas de skor gyi gleng mo ci yang mi gsungs shing /__de ring gi nyi ma la dpal gshin rje'i gshed kyi bla ma brgyud pa rnams kyi sku gsung thugs yon tan phrin las kyi rnam thar rnams dran nas nges 'byung skye 'dug__/sman lum gyi 'gebs bsal zhing sku rngul ba phyis pa na/__sku lus las tshag tshag gi sgra dang bcas dmar 'od 'khyug pa na/__'tsho byed pa snying 'dar zhing cung zad dran med du brgyal/__brgyal ba sangs pa na/__bla mas spyan ma'i sngags gsung bzhin bzhugs 'dug zer/__de nas gzim khang du phebs nas de'i mtshan hril por grub chen rol pa'i rdo rje khyed bdag gi snying dbus su dran no sogs bla ma mang po'i mtshan gsung mgur gyi rta la drangs te bzhugs/__de'i nang mo go bo shi tshar 'dug zhus pas/__dam sri gdug pa can rnams bya khyi la rdzus pa red/__kha sang ngas las shin tu sdug po red song gzhan su la ma smra bka' chad 'ong gsungs/__ci lags zhus pas/__da lta'i lus 'di khyi rgan 'khyams 'dra ste/__/sngon gyi las 'phro seng+ge dkar mo 'dra/__zer ba yod dam gsungs/__ku se gye rang gzhung nas byon skabs/__gshin rje'i gshed kyi gsal snang la gnas bzhin byon pas chu brag 'thab pa'i sgra thams cad/__hU~M dang /__hrIHSh+Ti'i sgra grags par thos pas der gshin rje'i gnas khyad par can zhig yin 'dug phebs/__dgon chen 'du ba'i dbu bzhugs mdzad skabs lan gcig snang ba thams cad dbyings su thim pa'i stong chen gyi nyams shar/__yang lan gcig 'jigs byed sgrub pa'i skabs btsan jag pa me len byung bar cung zad skrag nas hrIHSh+T+rI bzlas pas kho skrag nas khyod kyi phrin las thams cad khos sgrub zer ba'i snang ba byung /__lan gcig nye gnas dgong mo gzim sgo'i rgyab na kho rang nyal bas rje bla ma'i mdun zhu ba zhu lan mang po byed pa zhig thos zer/__'di yang mi ma yin bran du khol ba'i rtags su 'dug__/drwa sgang mtshams grwar byon pa'i lam bar dang /__sgrub mchod dang 'brel ba'i rab gnas mdzad skabs sogs 'ja' sprin ngo mtshar che ba 'char ba sogs 'di 'dra'i rigs brjod kyis mi longs/__dgon chen grwa pa byams dge zer ba/__mkhar ltug bus gsod pa la las sbyor gnang skabs byad lte hom khar dngos su 'gugs pa mang pos mthong skad/__drwa sgang mtshams grwa zhig smyo nad kyis thebs pa na/__bka' bsgo mdzad pas/__khos bla ma a tsi skrag rgyu me stag dmar tshub tshub 'dug zer/__yang lan gcig smyo ba na dpal mgon gdong bzhi pa'i nga rgyal gyis brdeg pas khos nga rgyal po bse theb can yin zer/__khyod bstan bshig bstan srung gang yin gsung pas/__bstan bshig yin zer/__slar yang 'bod rbad kyi sngags drag tu bgrangs nas gzir zhing brdeg pas kho ngu zhing /__nga bstan srung yin zer/__de 'phral dran pa rnyed de gdon dang bral bar gyur/__drwa sgang sgo khang gtibs 'og tu rgan mo shi ba'i ro dbyar gzhung khel yang jo bo la sked skyel nas/__de nub ser ba drag po byung ba gdong rdzogs mdzad skabs sku las me stag 'phro ba nye gnas pas mthong /__sgrub grwar zhal gyi gsang khrid gnang skabs kha ba 'dab ma bzhi pa'i dbyibs can bab/__dbyar ljongs kyi tshe dbang gnang skabs nub gcig char rgyun thung tsam babs pa 'chi med tshe'i chu rgyun yin zhes zhal rtsed lta bu mdzad/__sman shod dzaM nang gnas 'dus skabs sgrub phug nang cung zad mnal bzhin pa'i ngang da lta'i mi mang po de rnams su red gsung byung bas de ma thag gzim sad pa dang /__nye gnas kyis dpa' bo mkha' 'gro i red zhus pas yong yong gsung /__rigs gsum sgrub phug mjal du phebs pas a tsi ngo mtshar chen po zhes gsung pa 'di rnams la dpag na dag pa ye shes kyi 'khor lo'i gzigs snang rgyun du yod pa dang /__lkog gyur mkhyen pa'i mngon shes sogs dgos mi dgos thams cad la nam rgyun gsung bar mi mdzad kyi skabs rer shugs 'byung du thal ba na de bzhin mngon du gyur pa ni/__dper na lha sar byon skabs byang lam brgyud nas byon pa de ring nged cag 'gro mi nyan gsung /__bcag mal mdzad nas nyin gsum la bzhugs pa skabs der 'gro na jag pa dang thug rgyu 'dug kyang 'tshe ma nus pa dang /__bla ma kun dga' bkra shis sog yul nas tshur 'byon mi thub gsungs pa'ang de bzhin gyur pa sogs ches mang zhing /__de ltar mkhyen brtse nus pa'i yon tan tshad med kyang snyems pa dang dregs pa cung zad kyang mi mdzad par so skye tha mal pa'i ngang tshul ltar ston nas bzhugs pa sngon gyi bka' gdams pa'i bshes gnyen chen po rnams dang nges par chos mtshungs pa zhig tu bzhugs so/__/yang smras pa/__/lnga brgya tha mar gnas pa'i sems can rnams/__/mgu bar sla bas bdud kyis byin brlabs pa'i/__/sprul pa res 'ga' rdzu ba nyi tshe las/__/ngo mtshar bstod pa'i rol mo 'khrol bar byed/__/kye ma de 'dra'i mi shes rmongs ldan rnams/__/ngo mtshar byed kyang dam pas brtag gyur tshe/__/brag cha bzhin du stong la brdzun phug rdib/__/chu shing bzhin du snying po med par gyur/__/de ltar ma yin bsgom pa'i lag rjes las/__/nang gi yon tan phyi ru 'char ba la/__/nam mkha' spar mos khebs pa mi srid bzhin/__rtogs pa'i yon tan 'byung ba rang gshis yin/__/gling bzhi'i mkha' la snang byed rgyu ba na/__/'od zer 'byed pa chos nyid yin pa ltar/__/dpal ldan bla ma'i yon tan mtha' klas kyang /__/thun mong phyogs rer snang ba 'di tsam zhig__/dad pa'i gsos su snang ba'ang bla ma'i drin/__/rtogs pa'i yon tan 'dzad pa med pa'i gter/__/'phags chen rnams kyang brjod la ngal gyur na/__/bdag 'dras bskal par brjod kyang ga la ldang /__/zhes smras so/__/gsum pa gzhan dang thun mong ma yin pa'i gsang ba'i rnam thar las cha shas tsam zhig bshad pa ni/__de'ang sprel lo'i zla ba bcu gnyis pa'i tshes brgyad la nyams kyi snang char/__yul rkyen sgyu ma lta bu'i snang bas bskul ba las tha mal gyi snang ba dbyings su thim ste/__yul shin tu nyams dga' la byin chags par mtsho shin tu dwangs la sngo ba zhig gi khar slebs pa na/__mtsho de'i nang du rigs drug gi snang ba mu med pa zhig shar ba la snying rje bzod med skyes nas mtsho nang du tsham tshom med par 'jug ste/__de nang gi sems can rnams la phan pa rgya cher mdzad de slar gsal snang de 'gag__/da res kyi lus rten gcig la de bas don che ba 'ong rgyu med gsung /__sa rta lor nyams kyi snang char rgya gar yul gyi bye brag b+ha Ta ta zhes bya bar slebs pas yul nyams dga' bar lung pa ri sna snol ba'i 'dab zhig tu phebs/__de nas lam skya thal le 'dug pas yar phyin pa na/__ljon shing dang brag ri sogs yod pa de na rnal 'byor pa bgres nyams can sku bong thung la sku sha rgyas pa me tog gi phreng bas thod bcings pa zhig dang 'phrad/__khyed su lags zhus pas/__nga ni khyed tsho'i brgyud pa'i gral mgo na yod pa'i gnas brtan rgan po de yin gsungs pa dang /__rnal 'byor dbang phyug bi rU pa yin par shes te zhabs la btud cing gsol ba btab pas dgyes rdor rtsa rgyud lam 'bras rdo rje'i tshig rkang /__de'i man ngag dmar khrid/__brtul zhugs lam khyer sogs bod la grags pa dang ma grags pa'i zab chos du ma gsung /__biR+Wa'i zhal nas khyod nged kyi rjes su slob par 'dod na 'di nas byang shar gyi mtshams su nga yi bsti gnas sau wa nA tha zhes bya ba yod pas der songs la brtul zhugs lam khyer gyi gdams ngag 'di nyid nyams su longs la tshogs kyi 'du bar spyod cig gsung /__de bzhin bgyis te sau rASh+Tar phyin nas dpa' bo'i tshogs dang dgyes rgur spyod de brtul zhugs kyi spyod pa skyong bas sa lam btsan thabs su bgrod chog pa'i mngon rtags brnyes/__yang lcags sprel lor lcags ra thub bstan nor bu'i gling du bzhugs pa'i gsal snang la/__nam mkha' la bya ltar 'phur te byon pas ri thang mtsho gling du ma brgal ba na ljongs shin tu yangs par grong khyer chen po yid du 'ong ba du ma mthong tsa na nga rang bu ston rin chen grub kyi skye ba bzhes skabs kyi mthong snang de 'di red 'dug snyam pa'i ngang nas grong khyer der zhugs shing rgyu ba na/__rang gi bsti gnas yin snyam pa'i pho brang chen po thog rim dgu brtsegs lcags ri mu khyud sgo bzhi can zhig gi shar sgo nas zhugs pas der rnal 'byor pa dbyug pa thogs pa zhig gis khyod 'di nas ma 'ong /__shar lho nub gsum gyi sgo gsum bgrod zin tshar bas/__da res byang sgo nas zhugs shig zer bas phyir log ste de bzhin 'jug pas/__de na rdo rje 'chang blo gter dbang po 'dra ba'i rnal 'byor pa zhig 'dug pa la/__da nga gang du 'gro smras pas khyod kyi lam sna ngas byed gsungs nas lag pa la bzung ste khrid pas sgo khyams shin tu yangs pa zhig tu slebs/__rnal 'byor pa de la da lta'i grong khyer de gang red dris pas/__'di byang sham b+ha la'i grong khyer ka lA pa ste cha bsags bye ba 'bum sde zer/__pho brang 'di dus 'khor blos bslangs red zer ma thag sngar las kyang dga' ba zhig byung /__bcom ldan 'das nam mjal snyam nas phyin pa'i ngang der lha mo mang po 'dus nas me tog dor zer bas sems kyis dor na los chog byas pas chog yong zer bas me tog ljang gu zhig dor ba'i mos pa bgyis pa'i de ma thag phrin las dus kyi 'khor lo'i dkyil 'khor gyi bkod pa bkra lam mer mthong /__gtso 'khor kun dgyes pa'i gar dang bcas pa'i zhal nas/__snang stong dus kyi dbang /__grags stong 'khor lo'i dbang /__rig stong mnyam nyid kyi dbang /__mthar thug dran pa mkha' yi rdo rje'i dbang zhes bya ba rnams brda dang spros pa du ma dang bcas te stsol ba'i mthar/__rten dang brten pa 'od kyi rnam par rang la thim pa'i ngang nas phyir 'ong bas kun dga' ra ba mdzes pa zhig tu rin po che sna tshogs las grub pa'i khri stong pa zhig la lha mo mang pos mchod 'dug pa lha mo gcig la 'di su'i khri red smras pas/__bod yul du mi pham zhes pa de da lta chos rgyal ka lA pa'i sras su 'khrungs yod pas da phan lo brgyad tsam na de rgyal thabs la dbang bskur ba'i khri yin zer/__de la mtshan ci lags dris pas/__gau sham b+ha la'i skad du gsang 'dzin go gsung /__mchan/__ri ma 'gags pa mtshan zer ba de 'dra zhig gi ngang gsal snang de 'gags/__yang dus gcig nam mkha' nas e waM zhes pa'i sgra grags pa dang /__nyams snang la dpal dus kyi 'khor lo'i dkyil 'khor rten dang brten pa shin tu gsal bar mthong /__bu ston rin chen grub tu skye ba bzhes pa yang dran/__gtso ba'i zhal nas sngags btu zhig la a b+hi Shes brgyan pa e waM mA yA zhes bya ba'i gdams pa thob pa dang /__yang mnal lam gyi tshul du/__thod pa phyi dkar la nang dmar ba yangs shing rgya che ba'i nang du mi mgo skam rlon rnying gsum gyi brtsigs pa byas pa'i gzhal yas khang nang lha ngo mi shes pa'i zhi ba dang khro bo nyams mtshar ba mang po'i zhal nas/__kA la tsakra e waM sogs legs sbyar gyi skad du rgyud kyi tshig 'dra ba mang po gsungs pa'i nyams de las sad pa na sngar dang mi 'dra ba'i gsal stong gi nyams skyes/__gang cir zab lam rdo rje'i rnal 'byor la tshe sngon ma'i bag chags shin tu mthug pa zhig yod pas tshe 'dir dus 'khor la nyams len mtha' 'khyol byed rgyu byung na lam gzhan la 'bad pa bas 'dis myur snyam gsung /__ku se gser ljongs dgon du bzhugs skabs/__nub gcig gi tho rangs khar rje btsun e waM pa chen po nyid ha cang mi gsal ba mi tshad tsam zhig bar snang du bzhugs pa mthong ma thag gsol 'debs rab dkar ma dbyangs rta snyan par drangs te/__rtse gcig gus pas gsol ba btab pa na/__ngor chen nyid dpal dgyes rdor yab yum du gyur te/__dbang gi snod rung ngo zhes pa'i sgra zhig nam mkha' nas grags pa dang /__nam mkhar dbang lha rnams 'dus te dbang bzhi cig car du bskur/__dbang gsum pa'i skabs/__rdo rje bdag med ma las gnyis pa zhig chad de rang la 'khril ba dang /__dbang lha rnams nas/__rdo rje snyems ma'i bdag por dbang /__/zhes pa'i sgra dang bcas bde stong gi ting nge 'dzin gyi ngang du yun ring por 'byams klas pa'i ngang nyams sad pa na gtso bo dbang lha dang bcas pa yal/__de phyin bde stong gi nyams sngar las kyang che ba byung gsungs/__de skabs ngor chen bla ma'i rnal 'byor khyad par 'phags pa'ang rtsom par mdzad do/__/chu khyi zla ba bdun pa'i tshes bcu gsum gyi nub mo rmi lam 'od gsal gyi snang char/__lha mo rdo rje rab brtan ma byung nas/__da res byang phyogs lcang lo can du phebs na dus la bab zer/__nga la khyod kyis grogs byas na 'gro'o smras pas/__da phebs zer nas dre'u zhig chibs te lha mo'i pang thog tu bzhag nas bar snang nas phar phyin pas mun pa 'khrigs pa'i nang zhig tu song ba dang /__gnod sbyin 'jigs su rung ba bgrang las 'das pas sha khrag la rol zhing 'jigs pa'i rkan sgra rdeb cing 'dug pa 'jigs dngangs cher ma skyes pa'i ngang nyi ma shar ba lta bu'i 'od kyis khyab par gyur pas spro ba cher brtas pa'i ngang /__shin tu 'jigs shing skyi g.ya' ba'i pho brang dkyil 'khor gyi blos bslangs lta bu zhig mthong /__de yi nub sgo nas zhugs te rim gyis bgrod pas dpal phyag na rdo rje nyid shin tu khro bo'i gzugs can mjal bas shes pa brgyal thabs su gyur/__de las sad pa na gsol ba rtse gcig btab pas/__zhal nas hU~M zhes pa'i sgra 'brug ltar sgrogs pas gnod sbyin srin po phra men mang po 'dus nas rol cig kha ra~M khA hi zhes zer ba dang mnyam du de thams cad kyis sku lus zos song bas cung zad 'jigs pa'i ngang /__yang gtso bo'i zhal nas hU~M sgra sgrogs pa dang mnyam du sems gtso bo'i thugs kar thim pas thugs yid dbyer med du 'dres pa'i ting nge 'dzin la 'byams klas pa'i ngang mnal sad/__sa 'brug lor drwa sgang bzhugs skabs zla ba drug pa'i tshes bcu'i tho rangs khar/__mkha' 'gro sde bzhi red snyam pa'i bud med dkar ser dmar ljang bzhi lhag gis thon nas da 'gro zer bas/__gar 'gro smras pas rnga yab gling du 'gro zer ba dang 'dun pa gtad pa tsam gyis rnga yab gling yin snyam pa'i zangs ri mang po yod pa zhig tu mkha' 'gro bzhi dang bcas te slebs/__o rgyan dpal ri gar yod byas pas 'di red zer/__'dir gzhal yas khang sogs mi 'dug byas pas khyed nas o rgyan gyi chos dang /__brgyud 'dzin la skur 'debs byas pas sgrib zer/__sems la gnong rnams dran te bshags sdom dang gsol 'debs drag tu byas pa dang /__skad cig der pad+ma 'od kyi gzhal med khang rten dang brten pa mjal dga' spro dad gus tshad med pa skyes pa'i ngang nas pho brang gi lcags ri'i sgo brgyud de nang sgor slebs pa dang /__pho brang gi dbus su/__o rgyan ma hA gu ru/__mtha' skor du rig 'dzin brgyad/__rje 'bangs nyer lnga/__chos rgyal yab sras/__gter ston ban sngags kyi cha byad can du ma dang /__mkhyen brtse'i dbang po/__rje gu Na rnams kyang bzhugs 'dug__/slob dpon chen por gsol ba btab pas/__o rgyan rin po che'i zhal nas/__'khor 'das dbyer med lta ba'i gzhi klong du/__/snang stong zung 'jug sgom pa lhun gyis grub/__/gang shar rang byung spyod pa skyong byas na/__/'bras bu mngon rdzogs rgyal po e ma hoHzhes pa de gzigs snang 'di ma byung ba'i sngon du o rgyan ma hA gu ru thengs gcig mjal ba na gsungs pa de slar yang gsungs mdzad pas lta sgom spyod 'bras kyi gnad la sngar bas kyang nges shes gting tshugs pa skyes shing thugs yid bsres te mnyam par bzhag__/yang gu ru'i zhal nas khyod kyis nga la brnyas pa'i kun slong ma byed cig__/khyod gter ston rgya zhang khrom gyi lus blangs skabs dpal gshin rje'i gshed kyi dkyil 'khor du bcug pa po de nga yin/__sngags kyi sdom pa ni byang chub bar du srung dgos sogs kyi zhal gdams mang po gnang ba'i mur/__khyod ma 'ongs pa na 'jig rten gyi khams rnam par snang ba 'od kyis kun nas 'gengs pa'i zhing du sangs rgyas dri med grags pa'i rgyal por 'tshang rgya ba'i grogs su ngas kyang bgyi'o zhes pa'i lung gis dbugs dbyung thob pa'i ngang gsal snang de las sad/__de rjes zla ba gcig tsam la gnyis snang gi rtog pa ye ma skyes gsungs/__yang snga mo zhig o rgyan gsol 'debs dus gsum sangs rgyas 'bum ther lhag bsogs skabs o rgyan rdo rje 'chang gi gsang gsum byin rlabs dngos su thob pa dang gong du bstan pa'i lta sgom spyod 'bras gnad dril de gsungs pa yin 'dug__/yang rmugs sangs su gnam chos mi 'gyur rdo rje'i sku gdung la zhabs skor bsogs skabs/__'od phung gi klong du ston pa sangs rgyas bcom ldan 'das gtso 'khor gsum zhal gzigs pa na/__tshul khrims kyi phung po yongs su rdzogs pa'i thugs 'dun rtse gcig mdzad mthar/__ston pa gtso 'khor gsum rje nyid la thim zhes zhal slob 'ga' yi ngag las thos so/__/'di rnams ni 'phags chen ye shes gzigs pa'i spyod yul can rnams kyi gzigs snang dang mnyam la shin tu ngo mtshar che zhing gzhan las khyad par 'phags pa shin tu gsang bar 'os na yang dad ldan slob ma rnams spro ba bskyed pa'i ched du bkod pa la bla ma dang ye shes mkha' 'gro rnams bzod par mdzod cig__/rdo rje'i lam nas rdo rje'i sbas pa mngon mdzad bla ma rdo rje 'chang /__/rgyal ba rnams dang dgongs pa ro gcig rgyal ba'i mdzad pa mtha' klas pa/__/nyi tshe'i blo yis dpag par dka' zhing ye shes dag pa'i gzigs mo la/__/nyin mtshan dbyer med 'od gsal chen por dgongs pa rab 'byams gang der 'dud/__/shin tu gsang ba mchog gi rnam par thar/__/dkyil 'khor khyab bdag nyid kyis dgongs pa ste/__/gsang gsum mi zad rgyan gyi 'khor lo yi/__/yon tan rin chen tshom bu rnam par bkra/__/skal med srin bya'i tshogs la mun par snang /__/skal bzang blo gros can la dad pa'i gnyen/__/'di la dpyad na rgyal sras 'phags chen dang /__/mi phyed dgongs pa ro gcig nyid du nges/__/gang zhig lhun po'i rtse mor phyin pa dang /__/mtshungs pa'i gzigs snang chu zla'i rol gar 'di/__/rdul dang ma 'dres dngul chu'i khyad par bzhin/__/dpal ldan bla ma kho na'i spyod yul lags/__/gang zhig rjes su brtse ba'i tam+bu ra/__/skal bzang rna ba'i bcud du lhung ba na/__/dad gus spro ba'i spu long cher g.yos shing /__/da lta mjal du yod na ci ma rung /__/zhes bar skabs kyi tshigs su bcad pa'o/__/gnyis pa gzhan don du 'chad rtsod rtsom pa'i phrin las la mnga' brnyes pa'i tshul la gsum las/__dang po 'chad pa nyi ma'i 'od kyis dpyod ldan blo yi pad+mo rgyas par mdzad pa'i tshul ni/__de yang rje bla ma gsang bdag rdo rje 'dzin pa chen po 'jam dbyangs blo gter dbang po'i thugs sras kyi thu bor gyur pa ma zad rje de nyid sde dge nas sga stod du phebs khar chos kyi rgyal tshab tu 'jog par mdzad pa dang /__rje bla ma'i bka' las mkhan bsam blo 'di sbyangs stobs kyi shes rab rgya ma che rung sgom byung gi shes rab brdol ba yin zhes zhal nas dngos su thos/__kaHthog skyabs mgon si tu ma hA paN+Di tas kyang mkhan bsam blo 'di deng sang sa skya'i bstan pa'i srog shing lta bu red 'dug__/'di las yon tan lhag pa gdan sa gong 'og na'ang dkon na ci shes khong gis kyang lam 'bras zhu snyam/__khyed nas kyang dbang lung ji thob gyis/__khyad par kye rdor rgyud gsum la go ba bzang zhes phebs pas mtshon ris med kyi bstan 'dzin chen po rnams kyis bsngags pa'i me tog puN+Da rI ka 'thor ba yang don la gnas shing mdo sngags kyi gzhung gang 'chad pa na'ang tshig nyung don 'dus brjod pa gsal ba skabs su bab pa'i tshig don 'brel chags pas 'chad cing gzhan rgyud kyi the tshom chod nges mdzad/__khyad par rdo rje theg pa'i rgyud sde rin po che rnam pa bzhi la so so'i bab kyi cho ga'i 'gros phyag bzhes thams cad ma nor ma 'khrugs shing /__pho tshod dang sla chos/__des chog mi mdzad par rdo rje 'chang kun dga' bzang po'i phyag bzhes rnam par dag pa ji lta ba bzhin mdzad pa dang /__bka' las chos skyong sogs snyan brgyud la tshar lugs gnad che yang rgyud sde'i phyag bzhes ngor pa 'dra med pas de rjes 'brangs dgos gsungs/__de ltar 'chad pa de yang rang nyid mkhyen stobs rdzogs pa'i bdag rkyen las byung ba yin te/__sku na phra mo'i dus rgyud sde mi 'dra ba bcu gcig tsam zhig gi sgrub thabs dkyil chog thugs su chub pa dang /__sa ngor tshar gsum gyi cho ga'i phyag bzhes 'don rta dbyangs brdungs dkrol/__dkyil 'khor bri thig rnams legs par mkhyen zhing /__nyin re shog ldeb mda' tshad lnga drug re rtag par 'dzin nus shing gzhung rig gnas sogs kyi rtsa ba 'ga' re yang thugs la bzung /__gzhung gi bka' gnad/__bla ma'i rnam thar lta bu dris na de dang de'i thad nas tshig don ma 'khrul pa shar gyis thon pa dang mkhas pa'i bzhed pa rnams 'di dang 'di ltar yin zhes ma 'dres pa legs par bshad par mdzad/__dbang bskur gyi dus su'ang phal cher thugs thog nas gsung /__phal cher dbang bshad dang khrid dpe yod pa tsam la ma ltos pa'i gsung bshad zur rgyan gyis ngo sprod gnad du thebs par mdzad pa dang /__khyad par rdo rje 'chang tshar pa yab sras kyi snyan brgyud zab don skor gyi phyag bzhes la rje 'di lta bu'i mkhyen dpyod can 'byung bar dka' zhing ci'i phyir zhe na sngon goms kyi bag chags stobs su gyur pa dang /__snyan brgyud kyi dpe la dpyad don rdzogs shing /__bla ma rdo rje 'chang gi man ngag zab mos legs par brgyan pas rje 'di'i phyag bzhes la yid rton gyis mi nyams par gzung ba gces so/__/de ltar mkhyen rlabs kyi dkyil 'khor rgyas pa las byung ba'i 'chad pa'i rnam grangs kyang /__rtsa ba'i bla ma blo gter zhabs kyis sbyin bdag mdzad nas lhun grub steng dbyar gnas lha khang du a mdo d+hI phu chos rje sogs 'dus pa brgya phrag la rgyal bka' rin po che'i bklag lung lan gcig__/brag ra zhabs drung bkra shis rin po che sogs la tshar gcig gsungs pas brag ra rin po ches tshar gsum gnang bas phrin las che bar byung /__de'i snga rjes dus tshod gang yin ma nges kyang rgyal bka' bklag lung tshar gcig ste snga phyi tshar gsum gnang /__kho bos sgrub thabs kun las btus pa blo gter zhabs la gsol ba btab kyang zhal nas mkhan po nyid mkhyen brtse nus gsum 'gran zla med cing bum pa gang byo'i tshul du yod pas der zhus na khong las thob pa dang khyad par med nges yin gsungs pa dang /__sngar la se mgor thog mar mjal zhing bla ma sa chen gyi bstod pa tshangs dbang gtsug nor ma'i chos 'brel stsol ba nas brtsams thugs brtse ba chen pos dgyes bzhin du rjes su bzung lhag par chu yos lor rdzong sar du phebs/__sgrub thabs rin po che zla ba bzhi'i bar shin tu rgyas pa/__dbang rjes byin rlabs khrid lung bcas gnang bar mdzad/__gzhan yang /__mkha' spyod byin rlabs/__dmar po skor gsum gyi rjes gnang thun min/__mgon po che chung gi rjes gnang thun mong thun min kha shas/__mkha' spyod be bum lung /__dmar po skor gsum gzhung hrag bsdus dang /__gces btus pod rdzong sar 'dus sde las ngor gyi 'don chog skor yongs su rdzogs pa dang /__chos spyod pod chung lung /__snga rjes 'ga' zhig tu kye rdor lam dbang sogs mang du mnos pa'i mthar dze tA ra'i tshe dpag lha dgu'i dbang thob pa gsung gi bdud rtsi dngos kyis thob pa'i tha ma'o/__/lhun grub steng du sa lug lor sgrub btus phyed tsam dang /__'phros lcags byar gnang /__shing byi zla ba dgu pa'i yar tshes la ye na dgon pas ched du gdan 'dren zhus te dbang lung mang du gsungs shing de skor gyi dngos rdzas byung ba rnams dgon der mi 'khrugs pa'i stong sku brgya phrag lhag ldebs bris gnang bar mdzad/__me stag zla ba bdun pa'i nang gser ljongs su phebs/__ngor dkyil bdun/__mkha' spyod sogs dbang chos mang du stsal/__'di'i rnal 'byor ma'i byin rlabs skabs bdud rtsi mdog dmar po 'phyur ba thams cad kyis mthong /__'du khang du byon pa na dpal spungs dkor bdag zhig logs bris yod pa sngon du de 'dra yod rgyu dgongs par mi mnga' yang phebs 'phral du bsub par mdzad de shul du dzaM dmar bri bar mdzad/__de skabs kyi dngos rdzas phal cher gyis dgon der cho 'phrul zla ba'i tshes gcig nas bco lnga'i bar bstan pa rgyas chog gi thebs sogs gnang /__me yos lor thar rtse mkhan chung rin po che sogs la mgon po bka' bab bzhi'i dbang rjes/__brag rdzong phyi khrid/__zhal gyi rjes gnang dang /__gsang khrid/__zhal pod bcas dang /__lo de'i zla ba lnga pa'i nang drwa sgang du phebs/__'jam rgyal rin po che dang /__sga thar lam sde gzhung mchog sprul sogs/__bla sprul dge 'dun drug cu skor la sa skya bka' 'bum gyi ljags lung /__tshar lugs 'jigs byed dbang khrid/__rwa pod bcas gnang /__snga mo zhig tu brag ra rin po che sogs la sa skya bka' 'bum tshar gcig gsungs/__lcags rta lor zla ba bdun pa'i tshes skor ye na dge slong shes rab phun tshogs gtsos bdun la tshar lugs 'jigs byed dbang khrid shin tu rgyas pa/__rje nyid kyi gsung rtsom phal cher gyi lung gnang /__de'i snga rjes zhig tu kye rdor rgyud kyi bshad pa shin tu rgyas pa rab brtan mkhan po sogs nyung bsdus la gnang /__snga thog zhig tu skyabs rje si tu paN+Di tas kaHthog tu gdan 'dren mdzad de sgrub btus sngar mkhyen brtse rin po che'i mdun nas ma gsan pa'i kha skong skor dang /__kye rdor rgyud bshad gsan par mdzad/__rje bla ma 'di gnyis thugs yid gcig 'dres su gyur cing rje 'dis kyang /__deng dus rgyal bstan ris med la chos kyi spyan ras yangs shing mdo sngags gang la'ang gzigs rgya dang mkhyen dpyod 'di dang mtshungs pa su'ang med cing nges par ma hA paN+Di ta yin 'dug ces bsngags pa'i gling bu 'khrol/__rjes sor si tu paN chen sku gshegs pa na'ang rgyal khams mun rub/__dgung lo nyung ba sku tshe mthar ma phyin pa de 'dra gyong che ba 'ongs rgyu med ces spyan chab bsil ba tsam gyi thugs ngal chen po mdzad do/__/zhe chen du mkhas grub gnyis ldan rgyal tshab rin po che 'gyur med pad+ma rnam rgyal mjal bar phebs skabs gong du smos pa'i dbang chos rnams tshur gsan pa dang /__phar la'ang klu dbang rgyal po'i rjes gnang lung /__nye sras brgyad kyi sgom lung /__sa 'jam sbag sgrub/__thogs med bka' 'bum gyi lung rnams phul/__zla ba gcig lhag bzhugs/__chos dang man ngag gi bgro gleng mang po mdzad pas de las skyid pa ma byung /__rgyal tshab rin po che chos kyi gtam ci tsam gsungs kyang mthar rdzogs chen gyi nang du 'gro ba zhig 'dug ngo mtshar gsungs/__rgyal tshab kyi bstan bcos rnams la'ang shin tu bsngags shing gces spras chen po mdzad/__dpal spungs su sku zhabs si tu rin po ches snga rjes gnyis la gdan 'dren tshe dbang sogs dang zhabs brtan gsung sgrub dang /__lan rjes ma'i skabs rten brten pa gsar bzhengs la rab gnas shin tu rgyas pa mdzad/__drwa sgang mtshams grwa sgrub thengs gnyis kyi ring dbang khrid man ngag phyag bzhes rnams sku ngal khyad du bsad de gnang zhing sgrub mchod sogs kyi dbur phebs pas bsgrigs lam tshags su tshud pa dang /__lcags rar zhabs brtan 'jigs byed sgrub grwa la'ang de mtshungs gnang bas sgrub grwa 'di gnyis la lugs gnyis kyi sgo nas bka' drin gzhal bar dka' ba'o/__/de ltar 'chad pa rnam par dag pa thugs brtse ba chen pos bar med du gnang bas gsung las skyes pa'i slob ma yang /__rnal 'byor gyi dbang phyug chen po brag ra bla ma rin po che bkra shis rgya mtsho/__thar rtse'i mkhan po rnam gnyis/__khang sar gyi mkhan po don dpal/__mkhas shing grub pa brnyes pa'i bla ma rin po che ngag dbang legs par yang mgon pod sogs kyi lung gnang /__a mdo rdI phu sprul sku rnam gnyis/__si tu gong 'og gnyis/__sdom brtson sde snod 'dzin pa chen po bla ma 'jam rgyal rin po che/__zhe chen rgyal tshab rin po che/__kaHthog rmog tsha/__rgya gar nub phyogs kyi rgyud du byung ba mkhas pa bstan 'dzin rgyal mtshan/__a mdo dge bshes mkhas pa chen po 'jam dpal rol pa'i blo gros/__zur mang mkhas grub pad+ma rnam rgyal/__sa phur gyang gsum gyi chos rje snga rjes byon pa rnams dang /__chos sde khag gi mkhan slob 'dus sde sogs mkhas pa'i rnam dpyod/__grub pa'i rtags mtshan ldan pa bstan par bya ba rlabs chen sgrub nus pa du ma dang /__ches blun rmongs bdag lta bu'ang bka' 'bangs kyi gral mthar tshud pas mtshon/__gsar rnying gi sprul sku/__mkhan po/__chos rje/__slob dpon sogs grangs med pa dang /__bstan pa'i sbyin bdag chen po sde dge sa skyong pa yab sras/__gzhung gi sku drag khyung ram/__bkras mthong /__thang dpon sogs snga rjes phebs pa rnams la'ang dbang chos byad khrol sogs kyis thugs bzhed skong bas mtshon rgyal po/__dpon po/__khyim bdag sogs dad sbyin gyi 'khor tshad med pa la so so'i 'dod chos byin rlabs bka' bsgo gnang bas re ba rdzogs par mdzad pa'o/__/'chad mkhas blo gsal rna bar 'jeb pa dang /__/don bzang yid kyi sgro 'dogs bcad pa la/__/rab mkhas smra ba zla med ngag gi dbang /__/snying dang mgrin par rol pa min nam ci/__/phyi nang gsang ba'i de nyid bcu ldan zhing /__/smin grol cho ga'i thabs la mkhas pa yi/__/skal ldan sku bzhi'i sa bon 'debs mdzad cing /__/rdo rje 'chang gi phrin las spel ba'i bdag__/gang khyod snying la rdo rje sems dpa' zhugs/__/lag na thabs shes rdor dril rtags 'chang zhing /__/'jigs rung nyams dang cung zad ldan gyur na/__/gsang ba'i bdag po gzhan du 'ga' ma mchis/__/zhes bsngags so/__/gnyis pa rtsod pa rdo rje'i mtshon chas phas rgol gyi log rtog bcom pa'i tshul ni/__yid ches kyi lung tshad ma dang /__lung don 'dren byed kyi dngos stobs rig pa tshad ma'i lam nas drangs te 'chad rtsom gang gi skabs su'ang pha rol gyi rgol ba'i spobs pa 'phrog cing khengs pa'i ru mtshon bsnyil nas rang lugs yang dag pa'i tshad mar sgrub nus pa dang /__slob gnyer cung shes pa zhig sku mdun du phyin na'ang dgyes nyams chen pos slob gnyer gyi dri ba la zhugs shing skabs rer rtsod pa'ang mdzad pa na rang nyid kyi dam bcas pa la phyir rgol gyis ji tsam zlog kyang gting je zab tu 'gro ba las rgol ba'i nus pa zad pa dang /__dngos su'ang rtsod pa'i lan thor bu mdzad yod par grags so/__/smra ba ngan pa'i lce brgya gcod pa la/__/rig pa'i rno ngar tshad ma'i ral gri ni/__/phyogs las rnam par rgyal ba'i spobs pa yi/__/dpung shed btsan pos dgung sngon mthon por 'phyar/__/gsum pa rtsom pa rin po che'i phreng mdzes kyis thub bstan mchod sdong chen por brgyan pa'i tshul ni/__de'ang bstan bcos rtsom pa'i rgyu tshogs mtha' dag ni tshang /__bka' dang bstan bcos kyi dgongs don ni yang dag par mkhyen/__phyi rig pa'i gnas rnams la'ang byang bar byas pas sdeb legs mkhas pa dgyes pa'i bstan bcos pod tshogs mang por spel na'ang thogs pa med kyang sngon byon bla ma gong ma'i gsung rnams kyang rdul khrod du dor ba'i dus ngan 'di la gsar du rtsom pas ci zhig bya/__sngar yod rnams la lta rtogs byed thub na chog ces rgyun du gsungs la/__zhu ba po'i ngor gsungs pa rnams kyang so sor gtod pa las rang nyid kyi bka' 'bum du rlom pa'i tshags sdud gtan nas mi mdzad pas phyogs thams cad du 'thor bas da lta cher ma bzhugs kyang /__'di phyogs dpe yod pa ni/__dkon mchog rjes dran mdo 'grel pad dkar phreng mdzes/__'phags pa 'jam dpal dbyangs sogs kyi rtogs brjod sgo bzhi pa/__dbyangs can ma'i bstod pa/__spyod 'jug sher 'grel tshigs bcad can/__sde snod gsum gyi tshigs bcad kyi bshad sbyar/__sa chen gyi bla ma'i rnal 'byor/__ngor chen rin po che'i bla ma'i rnal 'byor/__bstod pa/__rje btsun rin po che'i bla rnam/__kun mkhyen go rams pa'i bstod pa/__gtor ma'i don 'grel/__tshogs glu tshan gsum/__'od zer can ma'i bstod pa/__thang rgyal bstod pa dang /__kun 'khor/__gsol 'debs kyi mgur ma/__bla ma rin 'byung dang /__mgon po'i bsang /__rwa lo'i grub rtags nyer gsum gyi bstod pa'i kha skong /__bla ma legs pa'i bla sgrub/__rtsa ba'i bla ma spyi'i rgyang 'bod gsol 'debs/__rje nyid kyi gsol 'debs tshan bzhi/__rdo rje 'chang blo gter dbang po'i rnam thar/__zhal gyi gsang khrid thun min zur 'debs/__las gshin bsnyen thabs/__rwa lo'i sbyin sreg zhal shes thun min sbyar ba'i ngag 'don/__gling mgu zi'i mgon po dang /__zhal la bstod pa/__rwa khrid mkha' 'gro snyan brgyud kyi bla ma'i rnal 'byor/__mkhan chen gzhan phan snang ba/__phan bde mkhan po/__bla ma 'jam dbyangs rgyal mtshan rnams kyi zhabs brtan/__ris med bstan 'dzin rnams la bstod pa'i glu mchod/__bla ma rin 'byung gi mchod chog tshigs bcad/__zil phrom/__gnyan ldang /__rdo rje thog sras/__rgod 'brang /__skar rgyal zhi ra/__nags tshal lha mo sogs kyi bsang yig mang po dang /__btsan rgod jag len mchod thabs rgyas bsdus/__kho bo phrin sprul pa'i bla ma'i rnal 'byor/__sems ngor gsol 'debs/__mkhyen brtse dbang po'i dgongs gter grub thob thugs thig la mdun bskyed bdag 'jug__/'od zer can ma'i sgrub thabs/__chos srung spyi la gsol mchod bcas bzhugs pa de dag thams cad kyang ngag dang yid la dbyangs can zhugs shing mgrin pa'i rol mtsho brdol ba las byung ba'i tshig don sdeb legs snyan brjid gzhan yid 'phrog pa mkhas rnams dgyes pa'i legs bshad rmad du byung ba sha stag go/__che 'dod grags sems g.ya' yis ma gos shing /__/kun mkhyen me long gtsang ma'i ngogs nyid la/__/ji ltar 'char ba brtse bas legs ston pa/__/smra ba'i seng ge nyid du nges par grub/__/'chad rtsod rtsom pa'i g.yu ral bsig pa na/__/bstan la 'khu ba'i wa skyes khung bur zhugs/__/dregs ldan sder bcas phye mar 'thag mdzad pa/__/kun mkhyen stobs ldan gdong lnga'i dbang po rgyal/__/tshig tshogs mang yang chu bur lta bu yi/__/snying po med la 'gal 'dus lci gyur pa'i/__/snyigs dus mkhas grags phal gyi bstan bcos dang /__/mtshungs min mkhas rnams legs par dpyod dang shes/__/zhes tshigs su bcad pas don bsdu ba'o/__/gsum pa gnyis ka'i don du mkhas btsun bzang po'i yon tan lhun gyis grub pa'i tshul ni/__mkhas pa'i rnam dpyod gong du smos ma thag pa de rnams las kyang shes shing /__de yang gang zag la mi rton chos la rton/__tshig la mi rton don la rton/__drang don la mi rton nges don la rton/__rnam shes la mi rton ye shes la rton pa ste bzhi po tshang ba la mkhas pa zer zhing /__de yang nang du ye shes la rang dbang 'byor zhing chos nyid skye med kyi don la mkhas pa'i rang rtsal las sku tshe 'dir lo zla mang po'i sdug yus kyis sbyangs brtson byas pa lta bu min kyang mkhyen rab kyi klong brdol/__chos thams cad rang grol du shes pa'i mkhas pa chen po don dang ldan pa/__phyi 'dul mngon mdo sde gsum dang /__nang bya spyod rnal 'byor bla med de rgyud sde bzhi'i tshig don thams cad la bsnyel ba mi mnga' zhing mi 'phrog pa'i mkhyen rab dang thugs rje gnyis 'dzom pas rang gzhan gyi don thams cad bde blag tu sgrub nus shing /__chos thams cad mi brjed pa'i gzungs dang mngon par shes pa mnga' bas slob ma'i rgyud dang mtshams par 'doms pa'i ston pa smra ba'i dbang phyug zla med pa yin no/__/de skad du yang /__mkhas mkhas yang dag rig pa'i don la mkhas/__/ji lta ji snyed shes bya thams cad mkhyen/__/kun mkhyen bla ma gangs can 'dzin ma'i khrod/__/mang thos blo gsal dbus na ches mkhas mkhas/__/gnyis pa btsun pa'i ngang tshul 'gran zlas dben pa ni/__phyi so thar gyi sdom pa'i dbang du na/__dge tshul slong gi sdom pa'i gnas phra rags thams cad la 'jug ldog shin tu gzabs pa dang /__rgyun du ngur smrig gi rtags 'chang zhing sku tshe der dgung bcad kho na mdzad pas dus 'da'/__nang byang chub sems dpa'i dbang du byas na tshul khrims rnam pa gsum la nyes pa'i dri mas ma gos shing snying rje chen po'i gzhan dbang du gyur pas gsol ba sha gtan nas mi bzhes na'ang sku nyams rgyas shing gzi brjid dang ldan la/__skye bo ngan pa gzhan gyi log sgrub thams cad bzod pa'i ngang tshul can dang /__gsang sngags rdo rje theg pa'i dbang du byas na spyi dang bye brag gi dam tshig gi gnas las mi 'da' zhing rtag tu rdor dril glegs bam 'bral med dang /__bdud rtsi ril bu bsten pa sogs rgyun du mdzad/__zhal nas kyang deng dus sngags la zhugs pa rnams 'dul ba'i dbang du byas na chos gos rnam gsum 'bral med byed pa mang po 'dug kyang phal cher tshul 'chos shas che zhing /__sngags kyi lugs la rdor dril tsam yang 'bral med bcangs mkhan mi 'dug ces thugs gcong ba'i tshul bstan/__rgyun du chos gsung pa'i skabs ma gtogs thun bzhir bzhugs nas mtshan bcas mtshan med kyi ting nge 'dzin kho nar brtson/__zhal ta gnang na'ang bla ma rnams kyi lo rgyus rnam thar/__chos kyi bgro gleng las don med kyi rtsed mo ku re ngag 'khyal chags sdang gi rigs gtan nas mi gsung pas mtshon btsun pa'i khyu mchog chen por bzhugs pa'o/__/gang thugs nyes pa'i dri ma rnams dang mi mdza' zhing /__/gang zhig sgo gsum bag med 'chol bar spyod pa ni/__/gang gi spyan sngar dgra bo ltar gyur mngon mthong bas/__/gang khyod tha mal yan par shor ba'i gtam gyis dben/__/rtag tu dran shes nor dang mi 'bral zhing /__/dgongs spyod zab mo rgya mtsho'i 'jing ji bzhin/__/ji tsam brtags kyang khyed kyi gting mi dpog__/yon tan rin chen nam mkha'i dbyings dang mtshungs/__/gsum pa bzang po'i phrin las kyis bya ba las kyi 'khor lo mdzad pa'i tshul ni/__sde dge yab chen bod phyogs byon shul dngul gdung bla ma zla ba bco brgyad kyi bar du mdzad nas zhabs brtan sgrub pa dang /__rgyal ba'i bstan pa 'jig rten gyi khams su yod med ni 'dul ba gzhi gsum gyi cho ga yod med la ltos pa can yin pas lhun grub steng du dbyar gnas kyi mkhan por rje 'di nyid lcags glang lor mnga' gsol nas sa rta lo'i bar du lo bco brgyad la mkhan po'i 'gan bzhes nas 'dul ba'i phyag bzhes zhib ther dang /__dbyar gnas pa'i dge 'dun zhal grangs brgya phrag thal bar 'phel zhing sgrig lam shin tu dam pa dang /__gsung chog rigs kyang sbyin bdag gi tshogs rdzogs nges mdzad cing dbyar gnas kyi deb yig gsar bkod dang gtan bzhag sogs rgya cher mdzad/__rgya zing gi 'tshubs che skabs kyang chos sde chen po'i srog shing mkhan chen 'di nyid kyis bzung ste dge 'dun rnams la mo bca' chang khrims sdom pas rgyud chud ma zos pa dang /__dgon pa'i bca' sgrig ma nyams shing tshes dus sgrub mchod ma chag pa dang /__bla ma lha srung gi thugs dam rgyud bskul kho nar brtson pa'i byin mthus 'tshub 'gyur zhi zhing sde dge'i chab srid rang 'jags dang /__gzhung sa chen po'i phrin las kyi 'jug pas ci bde bar khyab/__bstan dgon yang sngar las je rgyas su gyur pa yang rje 'di kho na'i bka' drin yin pa ni drang por gnas pa rnams kyi thugs la gsal ba dang /__bla ma rin 'byung mchod chog dbyar gnas skabs 'dzugs par mdzad/__dgon 'dir longs spyod 'phel ba bla ma rin 'byung gi byin rlabs yin pa'i rmi lam byung gsung /__'ga' zhig gis 'dul 'dzin gser thebs can mchod pa'i 'bras bu yin par sems pa mchis kyang /__dge 'dun spyi nas sgrol ma gsung ches pa dang /__bla ma rin 'byung gi byin rlabs yin par the tshom bral/__chos sde chen por 'du ba chen mo'i dbu bzhugs rgya dus su lo nar bzhin mdzad pa dang /__phyis su'ang lan gnyis tsam mdzad cing lo bstar bzhin 'dus pa rgya mtshor gsung chog dang 'brel ba'i sku yon phyag 'gyed dang /__mang ja'i bsnyen bkur/__gtsug lag khang du 'phan dang yo byad sogs rgya cher bzhengs/__sa dkar dgon dang lcags ra dgon sogs la'ang dbyar gnas kyi mkhan po mdzad thog phyag bzhes zhib bca' 'khrid mdzad pa dang /__drwa sgang yar man/__'jigs byed sgrub grwa sogs la'ang lugs gnyis kyi sgo nas bla dpon gyi thugs dam rgyud bskul dang 'brel rten thebs sbyor 'jags dang /__nyams gsos 'byung ba'i lhan cig byed rkyen la sku shed rtsal phyungs mdzad pas bshad sgrub kyi bstan pa'i gzhi rtsa thengs pa dang /__drwa sgang sgrub sder rje nyid dang /__dpal 'jam zhing gshegs kyi phyag rdzas bcas kyis gtan bzhag shin tu rgya chen mdzad/__mdor na dad rdzas thams cad gnas min du ma shor ba dkon mchog gi zhing sar 'gro nges gnang ba las log 'tsho'i gzi byin mi sgrub/__rje nyid kyang sku chas ngan ngon tsam gyis chog shes par mdzad/__dus rtag tu rang gi don du 'dod chung chog shes kho nar mdzad cing /__gzhan la phan pa dngos dang brgyud nas ci 'gyur mdzad do/__/gzhan yang sde dge sras chung gi mgon khang gsar bzhengs la phyi nang gsang ba'i rten rnams phyag bzhes dang /__thog mtha' bar gyi 'gan bzhes rab gnas dkar chag bcas mdzad/__dpal mchog rigs lnga mchod rten 'jig la nye ba nyams pa gsos/__lcags ra'i 'jigs byed lha khang gsar bzhengs la mthun 'gyur gnang /__chu khyi lor/__spar dpon ngag dbang 'jigs med mchog nas bstan dang 'gro ba'i dpal gyur bsngags 'os zangs gser gyi mgon po bzhengs skabs dam pa de nyid kyis rten bzhugs mdzad pas mgon po'i sku la gzi 'od kyi byin chags/__ye shes pa mngon sum thim pa'i rnam 'gyur sa g.yo ba'i sgra cher byung bar mkhas blun kun gyi rna bar thos/__lhag par zhal dang lha mo'i gsang 'khor bri skabs ras gzhi la rje nyid kyis byang sems byugs pa tsam gyis 'khor lo'i ri mo lha bris las gsal bar yid ches pa'i gnas su gyur cing phyis su gzungs 'bul mkhan rnams kyis kyang mngon sum mjal rgyu yod pa byung bas da lta zhal gyi sku nang bzhugs/__mgon po'i gzungs chas nyer mkho gri rkang gri rus phyogs kun btsal yang ma rnyed cing de ltar rgyu mtshan zhu 'phral ye shes spyan gyis nye bar gzigs te spar khang du yod pa'i mngon sum lung du ston pa ltar grub pa ma zad/__dge ba'i bshes gnyen ngag dbang 'jigs med la gzhan yang zhal/__yum chen/__lha mo/__dmag zor ma/__dur khrod bdag po/__pu tra lha lnga bcas bzhengs lugs zhal bkod gnang ba bzhin chu sprel lor 'di bzhin grub pas dus gsum mngon par mkhyen pa'i ye shes sgrib pa'i dri ma tsam gyis ma gos pa tshad mas grub pa dang /__lhun grub steng gi lha khang thams cad la nyams gsos rje nyid dang gzhan la bskul bas mtshon gnad du smin pa dang /__gzim khang du'ang sku 'dra gsar rnying mang po dang /__gsung rab kyi tshogs mang po/__rgyud sde'i tsaka dkyil dbang chas sogs bzhengs par mdzad/__tshogs dang /__mchod pa/__bskang ba rnams cha can cha 'phar shin tu rgyas spros gnang /__sde dge'i rdo khor rnam rgyal mchod rten la'ang zhal 'debs rgya cher gnang zhing rten rtsa chen sne mang 'jog par mdzad/__ngos kyi mkhyen brtse'i bka' 'bum spar nang la'ang zhal 'debs gnang bas mtshon gzhan dge ba byed pa dag la'ang gnang sbyin zhal 'debs dang /__chos don gnyer ba rnams la'ang gsol ras sogs chad med sbyin par mdzad pas byang chub sems dpa' gtong ba la dga' zhing sbyin pa'i phar phyin rdzogs par mdzad pa 'di kho nas kyang thub bstan spyi dang bye brag thams cad gsal bar byed pa'i dpal yon chen por bzhugs pas bzang po'i phrin las srid mthar khyab par mdzad pa'o/__/rang 'dod sbrul gdug ngan pa kun bcom zhing /__/gzhan phan spos kyi glang pos khur chen khyer/__/phyin drug gser gyi drwa bas legs par mdzes/__/'phags pa kun tu bzang po'i rnam thar snyogs/__/chos brgyad bdud kyi sgeg mo'i bzhin ras la/__/thal bas byug cing bstan 'gro'i mchod sdong cher/__/dzam bu'i gser gyis lan stong byug pa la/__/ngal ngub spangs pa'i tshangs pa chen po gang /__/'gro khams rgya mtshor brtse ba'i gru char 'bebs/__/byang chub sems kyi klu dbang rol pa las/__/gnas skabs mthar thug phan bde'i nor bu sbyin/__/sbyin mkhas dpal ldan bla ma kho nar nges/__/dam pa mang yang gzhan la phan pa dkon/__/nor bu mang yang phongs pa sel ba dkon/__/bdag gi 'dren mchog dpal ldan srid zhi'i mgon/__/de ni gzhan don gnyer bas dus 'da'o/__/bstan pa rin chen rgya mtsho'i mtha' khyab pa'i/__/phrin las bzang po dang ldan bla ma rje'i/__/sku yi snang ba gsung gi zer phreng ni/__/yang yang dran pas yid la gdung ba ster/__/de lta na yang dran pa'i mchog rab ni/__/bla ma dran pas srid zhi'i 'jigs pa 'phrog__/dge legs snang ster mun sel sgron me cher/__/kun tu bzang po'i phyag mchod stob par bgyi/__/bcas rang nyes ltung gang+gA'i chab kyis bkrus/__/gzhan gyi dge la phrag pa mi dog cing /__/mya ngan mi 'da' chos kyi khri la bzhugs/__/dge tshogs grub pa bstan 'gro'i don du bsngo/__/zhes bka' drin dran zhing yan lag bdun pa'i mchod sprin gyi tshigs su bcad pa'o/__/spyi don gsum pa yongs su mya ngan las 'da' ba'i mdzad pa tha ma ston pa'i tshul ni/__de yang rtag 'dzin can rnams bzlog pa'i ched du zhing 'di'i gdul bya re zhig rdzogs pa dang /__zhing gzhan du rdzogs smin sbyong ba mdzad pa'i dgongs pa la thugs nye bar gzhol ba na gzugs sku'i bkod pa bsdu ba'i tshul bstan par bzhed nas lcags rta lor 'jigs byed sgrub mchod gnang skabs nyin gcig sher dbang mthar dbyangs gsal bzla ba na sku 'phar g.yo mang du mdzad pa dang /__de'i phyi nyin dbang bzhi pa'i mthar mnyam bzhag yun ring ches pas 'ga' zhig gis gzim 'gro ba red snyam zer/__de lo sgrub mchod des thugs la 'gyur ba chen po byung gsungs/__nyin gcig zhabs cung zad skrangs pas de snga yan chad bad smug zhig gis cung zad mnar ba las na tsha ma myong /__de mi tshe gcig la mi na mi tsha ba mi 'ongs/__lo'ang chen po yin na tshod shi tshod yin gsung pa de nas brtsams bsnyung gzhi'i mgo zug__/ston rgyab bsnyung gzhi yar dwangs skabs da phyin 'phar ldang gcig byung na sang phod dpyid ka tsam yin 'dug ces der yod zhig la gsungs pa thos/__lo gcig lhag tsam snyung tshul bstan kyang sku lci nyams tsam las bsnyun zug ci yang med par thugs dam rgyun ltar dang /__mdzad 'phrin mtha' sdud kyi tshul du 'chad rtsom rgyun mar gnang /__'jigs byed rwa lugs thun mong ma yin pa'i smin grol zab rgyas lan gnyis bstsal/__sde snod 'dzin pa thub bstan 'phel rgyas la/__kye rdor rtsa rgyud brtag gnyis gsung bshad 'phro rgyas spros kyis gsungs/__bstan pa'i sbyin bdag chos skyong ba'i rgyal sras tha'i ji 2tshe dbang bdud 'dul/__rgya gar nub phyogs kyi rgyud du byung ba lnga rig smra ba'i slob dpon bstan 'dzin rgyal mtshan/__yongs 'dzin bla ma kun dga' seng ge/__'tsho byed mkhas dbang bla ma a tshangs sogs rgyal srid rin po che'i grangs la/__'jigs byed rwa lugs thun min smin grol lung bcas zab rgyas phul gnang mdzad/__gzhan yang skal ldan gyi slob tshogs rnams la/__gsung chos skor dang mdo sngags gang la gang 'dod kyi khrid lung rgya cher gnang bas dus 'da'/__de skor brtse ba chen po'i ring lugs 'dzin pa sa dgon nyer bdun la zhabs brtan dge bskul 'brel 'jog rten dngos rdzas gya nom pa rgya ma chung ba phul bas/__bya rgyud tshe dpag lha dgu'i dkyil 'khor gyi tshe chog khri tshar ma long tsam dang /__dpon khag so sos zhabs brtan rgya cher phul 2rgyal bka' rin po che dag tshar gsum yang sgrub/__de nas dgung grangs re bzhir phebs pa'i lcags lug zla ba gsum pa'i nang gzhung gi rim gro drug cu nyin drug bsnyun bzhin pa'i ngang nas gnang bas dus 'gyur phyir bsrings 'di kho na'i sku drin kyang gzhal bar dka'/__zhal nas kyang nga yi lus srog 'di bstan don du bsngos zin pas/__mngon spyod kyi las ji ltar brtsam dgos na dogs pa ci'ang med ces phebs/__yang slob ma 'ga' re sku mdun phyin nas bsnyun dris zhus pa na/__nad zug gzer cher med na ba 'dis nyams len la bogs che chos thams cad 'khor 'das dbyer med kyi ngang las mi 'da' bar 'dug snang ba shin tu skyid do gsungs/__skabs de'i snga rjes thams cad du dbon rnam gnyis kyis 'tsho byed bos te/__sman dpyad dang zhabs rim sa dgon rnams kyis gtsos thams cad la rgya cher sgrub pa dang /__dgon chen du'ang spyi sger so so nas zhabs brtan shin tu rgya chen dang /__bla ma 'jam dbyangs rgyal mtshan gdan zhus kyis tshe dbang sku khrus sogs nyin mang por gsung pa de rnams don yod par 'gyur ba'i phyir bsnyung gzhi seng dwangs lta bur nyin mang por ston par mdzad/__bla ma 'jam rgyal la/__nad 'di phog nas rnam rtog ye med pa lta bu zhig red/__nad 'dis sgrib pa'i lhag ma thams cad byang ba yin pa 'dra/__nga shi na'ang don ma 'grub pa gsum yod de/__dgon 'dir slob grwa zhig 'dzugs rgyu/__drwa sgang sgrub grwa lnga bcu bar kha 'gengs rgyu/__dgon chen grwa rgyun rnams dang por lam bsgom shes kyi thos bsam zhig byas/__de nas bsnyen pa tshad ldan re slob dpon mkhas pa zhig gis mgo 'dzin dang 'brel mtshams grwa lta bu zhig 'jog dgos pa gsum yin/__de las gzhan du 'gyod pa ci yang med gsung pa ni rje rdo rje 'chang kun dga' bzang po'i 'da' ka'i zhal chems dang mtshungs par snang /__hor zla 3tshes 23nyin snyung khams cher 'khrugs pa'i tshul ston pa na/__nye gnas rnams kyis dus 'khor chog grwar zhabs rim sgrub rten phul/__mkhan chen la dgongs brtag dang 'tsho byed drangs rgyu sogs brel rtab mya ngan gyis nyam thag pa na nye 'brel ltos bcas sdug bsngal gyi dbugs dbyung phyir nyin gung snyung khams dwangs tshul bstan nas bu slob sgrub brtson dam chos bstan pas bskul ba'i ngor 'jam mgon blo gter dbang po'i gsung pod spar byang tshan gnyis sam bkra ngos gsung rtsom gnang /__dpal spungs skyabs mgon si tu rin po che'i mdun phul rgyur/__gur mgon spar sku brgyad phyag sbyar mdzad/__snyung khams shin tu dwangs zhing dgyes nyams kyis 'jam mgon rin po che'i rnam thar sogs dang /__chos kyi 'bel gtam mang po dbon tshul dpal la gsungs/__tshes 24nam lang khar bsnyun 'dri zhus pas da nang shes pa ye dang med lus ci 'dra ma nges rlung khams cung zad 'khrug 'dug gsung /__zhal zas phul bas bzhes te phyed dbon che ba la gnang /__cung zhig nas dus rgyun dang ma 'dra bar sku bzhengs te/__de ring gza' ci yin gsung /__res gza' zla ba lags zhus pas dbul nyi red kyang /__phal pas bzang por brtsi bas skyon med de ring 'dir cher ma 'ong gsung nas/__gri lcags las grub sor gdub chung ngu zhig yod pa tshul dpal la gnang nas sku chings gsol gzan sham mnab nas lam dus/__chab gtor/__gtor bsngo bcas grub par mdzad/__nye gnas pas nyi ma snga gro red gtor bsngos mdzad mi ran zhus par/__nga 'khrul 'dug snga phyi nam 'don na 'dra gsungs/__de nas rten sgam khyer shog gsung nas 'phel gdung khag dang /__byin rten skor yongs rdzogs bzhes/__rnga rol mang po byed grags chos nyid ma'i sgrub mchod grol ba i red gsung /__nyer gnas kyis khar seng snga mo nas grol tshar nged nas ci yang mi go 'dug zhus pas ci'ang mi gsung /__zhal nub tu phyogs dgos gsung nas rje rdo rje 'chang blo gter zhabs kyis gnang ba'i dbu rgyan/__rdor dril dang chos gos snam sbyar khyer shog gsungs pas de rnams blangs te mdun cog khar bzhag__/dbon tshul dpal nas phan bde mkhan chen sogs la snyan gsan phul song 'phral de rnams byon pa na ci'ang mi gsung bar bzhugs/__nyin phyed yol tsam na/__phaT drag po gsum gsung pa dang sku drang por bsrangs te bla ma rin chen 'byung ldan gyi phyag stabs dang bcas dgongs pa chos dbyings su bsdu ba'i tshul bstan nas rnam kun mchog ldan gyi stong nyid dang /__mchog tu mi 'gyur ba'i bde ba chen po gnyis zung du 'jug pa'i 'od gsal phyag rgya chen po'i ngang du mnyam par bzhag par gyur to/__/der bzhugs pa'i phyi nang gi rtags rnams kyang gsal bar byung zhing thugs dam gsal 'debs dang chos kyi dbyings las gzugs skur bzhengs bskul phan bde mkhan chen rin po ches mdzad/__thugs dam grol ba'i rtags gsal bar byung ba na sku gdung gi zhabs 'degs zhus skabs 'doms kyi sba ba sbubs su tshud pa sogs mi slob pa'i zung 'jug mngon du mdzad pa la som nyi ma mchis so/__/kye ma bstan pa'i nyi ma nub rir gshegs pa yi/__/gtam 'di thos pas bdag snying 'gas sam snyam/__/'di tshul brjod pas gdung ba 'phel byed na/__/dngos su mthong ba sems ldan su zhig bzod/__/'jig rten sgron me gang du gshegs par gyur/__/bstan pa rin chen 'dam rdzab khrod du byings/__/thar 'dod rnams kyi dpral ba'i mig stor zhing /__/gling 'dir mun pa chen pos khyab par gyur/__/kye ma kyi hud mgon po dbyings su gshegs/__/bdag cag slob 'bangs tshogs rnams shul du lus/__/'di 'dra'i sdug bsngal khrod du 'dor phod dam/__/bstan pa'i snang byed myur du bzhengs su gsol/__/skyabs gcig bla ma rdo rje 'chang dbang gi/__thugs rje chen pos nges par dgongs nas su/__/'di nas bzung ste byang chub ma thob bar/__/khyed kyis bdag cag nam yang ma gtong zhig__/nyin mtshan kun tu gsol ba 'debs byed na/__/bu gcig ma yis brtse ba ji bzhin du/__/legs nyes skyid sdug ci dang ci byung yang /__/rdo rje 'chang dngos bla ma khyed rang mkhyen/__/zhes pa'i gdung dbyangs kyang thal lo/__/de nas chos kyi dbyings stong pa chen po las longs spyod rdzogs pa'i skur bzhengs te/__de yang /__sgrub thabs rin chen 'bar ba las/__/rang nyid lha yi rnal 'byor las/__/bdud rtsi 'khyil pa bzlas pa yi/__/dri zhim chu yis dang por bkru/__/rnam snang mdzad du de bsams nas/__/zhes dang /__kye rdor rgyas pa las/__sku gsung thugs kyi rig sngags gdags/__/rang gi lha'am gzhan yang rung /__/snying po snying gar gdags par bya/__/khrus kyis dag byas bdud rtsi byugs/__/zhes 'byung ba ltar rnam sme'i khrus sgrub ste sku khrus gsol/__gnas yig phul/__longs spyod rdzogs pa'i chas kyis bzhugs su gsol nas bla mchod dang 'brel ba'i mchod pa rgya cher phul/__hor zla bzhi pa'i tshes gcig la sku gdung rin po che dkyil 'khor bzhi la brten mkhan chen rin po che'i dbus byas pa rnams kyis zhugs 'bul byas/__gdung zhal dbye ba na/__shel ltar dag pa dang /__nam mkha' ltar sngo ba'i zhun thigs che phra mang po dang /__ring bsrel gyi tshogs mang du byung zhing gdung rnams dgung zhag ma rdzogs bar spyi bye nas kun tu bzang po'i mchod sprin rgya cher stobs/__/rje dbon rnam gnyis nas dgongs rdzogs kyi mchod sprin rgya cher spro ba la zhugs te gdan sa chen po dpal ldan sa skyar khri chen rin po che dang /__gdung sras/__phun tshogs pho brang gi gdung sras rnam gnyis/__gzhan sku ngo khag rnams dang /__e waM bla gzhung mkhan chen/__bla khag mkhan zhabs thams cad dang /__sde khul kaHdpal zhe rdzogs dpal spungs sogs bla chen khag rnams la mchod bsngo spus nom ldan pa/__ngos la'ang chibs 'gros ldan sogs mchod bsngo rten rgya cher stsol zhing /__bla ma 'jam rgyal/__brag ra rdo rje 'chang la sogs pa rin po che rnams kyi mdun du dgongs rdzogs mchod sprin rgya cher stob/__lhun grub steng rang du/__phan bde mkhan chen dbus/__dbyar mkhan/__shar nub/__rgyal mtshan/__dbu zur khag rnams dbus byas/__chog grwa mang ba re dang bcas dgung tshigs bdun phrag gsum la bla ma rdo rje 'chang gi thugs dam snying po 'jigs byed lha bcu gsum ma'i sgrub mchod dang /__de rjes mkha' spyod/__kun rig dgung bdun ring rgyun 'don/__mi 'khrugs sgrub mchod bdun phrag gcig__/dgung tshigs bdun par ngos dbus byas pas kye rdor sgrub mchod dang /__rdzogs pa'i nyin gtsug lag khang bsam 'grub mthong grol chen mor tshogs pa zhib rgyas kyis kun rig cho ga dang 'brel bar yon 'bul rgya cher stob/__ngos 'dus par bcas pas dge rtsa rdzogs byang du bsngo ba'i khul byas/__de dag gi skabs su/__spos mar me zhal zas rnams shin tu rgya che bar phul/__mdor na dngos rdzas thams cad yod dgu rtsal sprugs kyis bla ma rdo rje 'chang gi dgongs pa rdzogs thabs la 'bad pa lhur blangs shing /__gdung rus rnams la rus sbyong gi cho ga grub rjes dri bzang gi chus btul nas sku dang sAts+tsha grangs med btab/__nang rten du gtsug lag khang chen por bzhugs rgyu'i 'jam dpal dbyangs gser zangs las grub pa rgyang mtho brgyad par byon legs rten khyad par 'phags pa du ma dang /__ring bsrel rnam bzhis phyur bur gtams pa dang /__'jigs byed kyi snang brnyan/__bla ma rdo rje 'chang nyid kyi 'dra zhal/__phyi rten khang bu brtsegs pa'i mchod rten bzhengs rgyu sogs rje dbon zung nas mdzad dang mdzad 'gyur yin la 'di skor rgyu 'gros zhib bca' brjod na dge ba ngom pa'i skyon du 'gyur bas ma bris so/__/de ltar zag med chos kyi dbyings su thim yang brtse chen thugs rje'i shugs kyis bskul bas zhing 'di dang gzhan dag tu sprul pa'i rol gar nges pa dang ma nges pa sna tshogs pas gdul bya rgya mtshor gang la gang 'dul gyi thabs mkhas zab mos 'dul bar mdzad pa ni/__gzhan don rgyun mi 'chad pa theg chen 'phags pa'i khyad chos bla na med pa yin te/__spyod 'jug las/__yid bzhin nor bu dpag bsam shing /__/ji ltar re ba yongs skong ba/__/de bzhin gdul byar smon lam gyi/__/dbang gis rgyal ba'i skur snang ngo /__/zhes dang /__rgyud bla ma las/__gzhan gyi dbang gis nges 'byung dang /__/bdag dang sems can mtshangs gzigs dang /__/mdzad pa yongs su ma rdzogs phyir/__/'khor ba srid du mdzad mi 'chad/__/ces dang /__rgyud rdo rje gur las/__'dul ba'i 'jig rten snang nas ni/__/'di yis gzugs ni du mar byed/__/sangs rgyas sems can bskyab bzhed pas/__/sangs rgyas gar ni rol par mdzad/__/ces gsungs pa ltar rnam rol mtha' yas pa 'byung ba ni yang dag pa'i tshad mas nges pa'o/__/gang zhig dad pas bla ma mchod byed na/__/phyogs bcu'i rgyal ba mchod dang bsod nams mnyam/__/de yi phan yon brjod las 'das pa zhig__/bden par smra bas bka' stsal de yi phyir/__/dad gus lhag bsam drag pos brtson pa rnams/__/'di phyi'i don chen da lta nyid nas 'grub/__/bla ma mchog nyid mngon 'tshang rgya ba'i tshe/__/'dus pa dang por skye bar gdon mi za/__/drang don gzugs sku snang bar ma gyur kyang /__/nges pa'i don la skye 'pho'i chos las 'das/__/da ni rang sems bla ma he ru kar/__/shes pa'i ngang nas 'bral med rtag tu mjal/__/'og min zhing zhes ring bar mi sems shing /__/rang snang gar khyab 'og min gzhal med khang /__/de na bla ma bzhugs pas bdag yid spro/__/cir snang thams cad bla ma'i rol par blta/__/zhes rang gis rang la dbugs dbyung bas nyams dga' bar byas so/__/de rnams kyis bla ma rdo rje 'chang gi rnam thar don gyi snying por dril ba las/__gzhan byon bzhugs dang 'gro don mdzad tshul gyi zla tshod tshes grangs sogs zhib cha phyag tho 'khod med par ma zad rje nyid kyis zhal nas/__bla ma rnams kyi rnam thar nang /__rta mdzo sogs 'bul ba byung rabs/__phar bshad tshur bshad byas tshul sogs bri bar 'dug pa dgos pa med ces yang yang phebs pas de 'dra'i ngal ba la zhugs par ma byas so/__/slar smras pa/__bdag blo skyes sbyangs pad snal lta bur ches phra yang /__/dad dang mos gus dbyar rngas bskul ba'i mdong mtha' bzhin/__/shin tu dad spro'i tshul 'di 'bri bar brtson pa las/__/byung ba'i dge ba rgya mtsho'i rdul snyed thob pa rnams/__1/__kun mkhyen kun dga'i rgyal tshab bla ma rje'i/__/zag med thugs kyi dgongs pa rdzogs phyir 'bul/__/bla ma'i byin rlabs sems la zhugs pa dang /__/rdo rje 'chang gi go 'phang myur thob shog2/__skye ba'i phreng ba kun tu bla ma rje'i/__/zhabs mthil bde chen 'khor lor bkod byas nas/__/gsung gsang gdams pa'i ke la sha yi rgyun/__/spyi bo nas zhugs bdag rgyud smin par shog3/__mtha' yas 'gro ba'i sdig ltung tshang tshing ma lus sreg__/ye shes rdo rjes bdag tu rtog pa'i brag ri bcom/__/lus kyi dal la dkyil 'khor bzhi po rab smin nas/__/sku bzhi'i rgyal thabs dka' ba med par rnyed gyur cig4/__bkra shis gang zhig kun 'dus bla ma yid bzhin nor bu'i sprin chen las/__/byung ba'i gru char dal gyis 'bebs pas 'dzam gling yangs pa'i khyon kun khyab/__/phan bde'i snang ba brgya phrag gsar pa bdo bas mi mthun rgud pa zhi/__/bstan dang bstan 'dzin dar zhing rgyas la phun tshogs phyogs las rnam rgyal shog5/__ces mkhan chen rdo rje 'chang ngag dbang bsam gtan blo gros kyi rnam par thar pa snying por dril ba bkra shis 'dod 'jo zhes bya ba 'di'ang rje de nyid la dad pa dang dam tshig 'gyur ba med pa gus slob ye na dge slong shes rab phun tshogs nas bkra shis pa'i lha rdzas/__li me spus ldan gyi skyes dang bcas 'di ltar bris zhes bskul ba na rnam thar rtsa tho byung na de bzhin bgyi bar khas blangs pa bzhin skul ba po nyid nas dka' tshegs chen pos zhib mor bris te rtsa tho byung ba rnams dang /__mkhan chen nyid kyi zhal 'phros gnang ba dang /__gsang ba'i rnam thar bka' drin chen pos stsal ba'i shog dril nyid don gyi snying por bzung ste/__'jam dbyangs bla ma mkhyen brtse'i dbang po'i byin rlabs kyi zegs ma tsam thob cing 'khor lo'i mgon po 'di nyid las zab rgyas chos tshul rgya mtsho tsam thob pa'i bka' drin gyis 'tsho zhing slob 'bangs kyi tha chung chos med snyom las pa rmongs brtul 'jam dbyangs chos kyi blo gros pas lcags lug tha skar zla ba dgu pa'i tshes bcu nas dbu brtsams/__zla ba de'i tshes bcu gnyis snga char grub par bgyis pa'i skabs snga rjes su kun mkhyen bla ma de nyid sa nas sar 'phags pa'i ltas sa chen po snga phyi lan bdun du g.yo ba'i ltas mtshan bzang po dang bcas bris pa tshe rabs thams cad du mgon po mchog des thugs rjes rjes su 'dzin pa'i rgyur gyur cig__/shu b+haM ma stu sarba dza ga taM/__mang+ga laM/__/_!____rdo rje 'chang dang gnyis su mi phyed pa'i/__/khyab bdag dpal ldan bla ma mchog gi sku/__/lcags lug nag pa zla ba nyer bzhi'i dus/__/bde chen chos sku'i dbyings su gshegs par mdzad/__/khu bo chos kyi nyi ma nub pa ni/__/dmus long khang pa chen po'i g.yang du lhung /__/'on kyang zab dgongs yongs su rdzogs pa'i phyir/__/bdog pa'i dngos pos bla ma dam pa la/__/rnam dag mchod pa'i tshul la brtson par byas/__/rnam kun mchog ldan mnyam pa grol mtshams su/__/rgyud sde rnam bzhi'i dkyil 'khor la brten te/__/sku gdung rin chen zhugs la phul ba'i skabs/__/mkha' la ye shes lnga yi 'od 'phro zhing /__/'khor lo dpal be'u la sogs sna tshogs mthong /__/sgal tshigs so gnyis dkyil 'khor sna tshogs byon/__/gdung rus rin po che yi snying por gyur/__/der yang gcig las gnyis chad bsam mi khyab/__/bdag cag dad pa'i zhing du ngo mtshar rmad/__/de lta'i drin chen chos kyi rgyal po la/__/mi phyed snying nas dad pas phyag bgyis te/__/rnam dag 'dus pa'i bye brag sde gsum gyis/__/rnam gsum bsod nams zhing la spyan 'dren nas/__/rnam dkar bla ma mchod pa'i cho ga dang /__/rnam mang thugs dam gtso bo'i sgrub mchod bskor/__/rnam 'dren thams cad rig pa'i dkyil 'khor cher/__/rnam kun dgung bdun bar du sgrub cing mchod/__/rnam mkhyen bla ma'i dgung zhag ma rdzogs bar/__/rnam grol sgrub khag lnga la mchod bsnyen dang /__/khyad par tshogs mang bsnyen bkur brgyad tsam phul/__/gzhan yang gsar rnying dgon gnas so drug dang /__/sgrub brtson dben rir bzhugs pa'i bla ma sogs/__/kun la dngos po'i 'byor pa gya nom phul/__/'gro ba kun gyi bsod nams zhing mchog tu/__/'jam dpal zhi khro gsang ba'i bdag po dang /__/rdor sems yab yum tshe sbyin mgon po dang /__/'phags ma sgrol ma sa skya paN chen zhabs/__/gser zangs las grub ring bsrel snying po can/__/rnam rgyal mchod sdong dam pa'i 'dra zhal sogs/__/sku gsung thugs rten phra rags du ma yang /__/byin rlabs gzi 'od 'bar ba'i rten du bzhugs/__/mdo tsam smos pa'i dge ba'i mchod sprin dang /__/tshogs gnyis rin chen dus gsum bsags pa'i dges/__/drin chen chos kyi rje yi spyan lam du/__/rnam dag mchod sprin rgya mtshor 'gyur bar shog__/slar yang rab 'byams zhing na sku sprul ste/__/bstan 'gro'i don kun lhun gyis grub pa dang /__/bdag kyang 'khor gyi thog mar rjes bzung zhing /__/mgon po khyed dang 'bral ba med par shog__/ces khu bo rdo rje 'chang gi spyan sngar dge ba'i mchod sprin 'bul ba'i bar gyi sho lo ka bcu gnyis 'di rnams rtse gcig tu smon pa'o//____//

Footnotes

Other Information