JKCL-KABUM-02-KHA-073

🚧 This website is under continued development. We appreciate your patience!

Previous Text"KHA" is not a number. Back to Volume Page"KHA" is not a number.Next Text "KHA" is not a number.

Wylie title
Location	chos kyi blo gros bka' 'bum Volume , Text 73, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"KHA" is not a number.

1 Texts in this Section (sde tshan or chos tshan)

601-605	སྐྱབས་མགོན་ཐམས་ཅད་མཁྱེན་གཟིགས་ཀཿཐོག་སི་ཏུ་པཎྜི་ཏ་ལ་བསྟོད་པ་གཞོན་ནུ་རོལ་དགའི་དབྱངས། skyabs mgon thams cad mkhyen gzigs kaH thog si tu paN+Di ta la bstod pa gzhon nu rol dga'i dbyangs Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"KHA" is not a number.

Tibetan Text

Wylie

[edit]

སྐྱབས་མགོན་ཐམས་ཅད་མཁྱེན་གཟིགས་ཀཿཐོག་སི་ཏུ་པཎྜི་ཏ་ལ་བསྟོད་པ་གཞོན་ནུ་རོལ་དགའི་དབྱངས་ཞེས་བྱ་བའོ། །ན་མོ་གུ་རུ་མཻ་ཏྲི་པ་དཱ་ཡ། བྱམས་པ་ཆེན་པོའི་དཔལ་གྱིས་རབ་མཛེས་ཤིང་། །རྒྱལ་བའི་རྒྱལ་ཚབ་མགོན་པོ་མ་ཕམ་པ། །དགའ་བ་བརྒྱ་ལྡན་འཆི་མེད་གྲོང་ཁྱེར་གྱི། །དབུས་ན་རབ་ཏུ་མཛེས་པའི་སེམས་དཔའ་ཆེ། །གང་གི་གསང་གསུམ་ཐིག་ལེའི་གོང་བུ་ནི། །བྱང་ཆུབ་ལྗོན་པས་མཚན་པའི་འཛམ་གླིང་གི། བྱང་ཕྱོགས་ཁ་བ་རི་པའི་བསོད་ནམས་ཀྱིས། །འཇིག་རྟེན་མུན་སེལ་ཟླ་གཞོན་གསར་དུ་ཚེས། །དེ་ཚེ་ས་ཆེན་འདི་ཡང་དཔལ་དང་ལྡན། །སྐྱེ་འགྲོའི་ཚོགས་ཀྱིས་དགའ་སྟོན་རོལ་མོ་འཁྲོལ། །ལྷ་དང་བཅས་པའི་དཀར་པོའི་ཕྱོགས་རྣམས་ཀྱིས། །ངོ་མཚར་གཏམ་གྱི་སྦྱོར་བས་བསྔགས་ལ་བྲེལ། །རྒྱལ་སྲས་ཐུ་བོ་འཇམ་པའི་དཔལ་ཆེན་པོ། །བྱང་སེམས་ཉི་ཟླ་རྒྱུ་སྐར་གྲངས་སྙེད་ཀྱིས། །ཁྱོད་ཀྱི་དབུ་ལ་བདུད་རྩིས་ཁྲུས་གསོལ་ཞིང་། །ཤིས་བརྗོད་པད་མ་དཀར་པོའི་ཕྲེང་བ་བཅིང་། །གཞོན་ནུ་ཉིད་ནས་རིགས་ཁམས་མཐུ་བརྟས་པས། །མཁྱེན་རབ་མ་དྲོས་རྒྱ་མཚོ་བཞིན་དུ་རྒྱས། །ཡོངས་སུ་དག་པ་ལྷ་ཡི་སྤྱན་མངའ་བས། །སྣོད་བཅུད་རྩ་གསུམ་རྒྱལ་བའི་དལ་དུ་གཟིགས། །བཅོས་མར་གྱུར་པའི་ཨོ་ཌཱིའི་སློབ་དཔོན་གྱི། །མཚན་དཔེའི་གཟུགས་བརྙན་ཡེ་ཤེས་ཕྱག་རྒྱའི་སྐུ། །དངོས་སུ་གྱུར་ནས་བྱིན་གྱིས་བརླབས་པ་ཡི། །རྡོ་རྗེའི་ཟིལ་ཆེན་གང་གི་གསང་གསུམ་ཞུགས། །འཕགས་པའི་ཡུལ་དུ་སྐྱེས་པའི་རབས་མང་པོ། །ཇི་བཞིན་གཟིགས་པ་སྒྱུ་མའི་རོལ་རྩེད་སྟོང་། །རྣམ་པར་ངོམ་པས་དག་པའི་སྐྱེ་བ་ནི། །གར་མཁན་བཞིན་དུ་ཅིར་ཡང་འཆར་བར་སྟོན། །རྒྱལ་སྲས་གཞོན་ནུ་ནོར་བཟང་རྣམ་ཐར་གྱི། །ངང་ཚུལ་ལྷུར་བཞེས་གངས་ལྗོངས་ཐུབ་པ་ཆེའི། །རིང་ལུགས་ཇི་སྙེད་ཐམས་ཅད་ཚོལ་བའི་ཕྱིར། །གཙུག་ནོར་བརྒྱ་ཕྲག་ལྷག་གི་ཞབས་པད་བསྙེན། །ཁྱད་པར་འཕགས་པའི་སར་བཞུགས་མཆོག་རྣམས་དང་། །ཚེ་རབས་འབྲེལ་བའི་རིགས་བདག་འཇམ་པའི་དབྱངས། །མཁྱེན་བརྩེའི་དབང་པོས་ཉིད་དང་དབྱེར་མེད་པར། །བྱིན་གྱིས་བརླབས་པས་སྲིད་གསུམ་མཚུངས་ཟླ་དབེན། །མདོ་སྔགས་རིག་གནས་བྱེ་བ་མ་ལུས་པ། །ཐུགས་མཚོར་བསྐྱིལ་བས་རྩོད་དུས་ཐམས་ཅད་མཁྱེན། །ངེས་པར་གྲགས་ཤིང་གྲུབ་ལ་གཟུར་གནས་ཀྱི། །དཔྱོད་ལྡན་མཁས་པའི་ཡི་ག་དབང་མེད་འགུགས། །འདི་ན་ཕྱོགས་རེ་ཤེས་པས་ཁེངས་གྱུར་ན། །ཁྱོད་ཀྱི་མཁྱེན་རབ་མཁའ་དང་མཉམ་པ་ལ། །ལྷུན་པོ་ལྟ་བུའི་གཟི་བརྗིད་ཆེར་བསྐྱེད་ནས། །ཕྱོགས་ལས་རྣམ་རྒྱལ་རྔ་ཆེན་ཅིས་མི་བརྡུངས། །ཁྱད་པར་ཀུན་བཟང་རྡོ་རྗེ་འཆང་དབང་གི། ཏནྟྲ་འཆད་ལ་གསང་བའི་བདག་པོ་དང་། །སྐལ་ལྡན་རྒྱལ་པོ་ཛཿཉིད་དངོས་སུ་སྣང་། །མཁས་གྲུབ་རྒྱ་མཚོའི་དབུས་ན་རྟ་ལྗང་བཞིན། །འཆོད་དང་རྩོད་དང་རྩོམ་པ་གང་ལ་ཡང་། །ཀླུ་སྒྲུབ་ཐོགས་མེད་དབྱིག་གཉེན་ཆོས་གྲགས་དང་། །མ་ཁོལ་སོགས་ཀྱི་རྣམ་དཔྱོད་དཔལ་མངའ་ཞིང་། །སྨྲ་བ་གཞན་རྣམས་མེ་ཁྱེར་སྒྲོན་དང་མཚུངས། །ཁྱོད་ཀྱི་ཐུགས་བསྐྱེད་གཞན་ལས་ཆེས་འཕགས་པས། །བཤད་དང་སྒྲུབ་པའི་སྡེ་ཆེན་འཛུག་པ་ཡི། །ལམ་སྲོལ་བཟང་པོའི་སྒོ་འཕར་གསར་དུ་ཕྱེས། །དེ་ཡི་དྲིན་ལས་རིས་མེད་ཆོས་གྲྭ་རྒྱས། །གཞན་དག་ཟང་ཟིང་ནོར་གྱི་དངོས་པོ་འགུགས། །ཁྱོད་ཀྱིས་སྔར་མེད་མཁའ་འགྲོའི་གསང་མཛོད་ལས། །ཟབ་རྒྱས་ཆོས་ཀྱི་གླེགས་བམ་དྲངས་པ་འདིས། །གཏེར་འབྱིན་རྒྱ་མཚོའི་སྤྱི་རྗེར་ཅིས་མ་གྲུབ། །རལ་པའི་ཁུར་ཆེན་མགོ་ལ་བཏེགས་པ་དང་། །སྲེད་པས་དམན་མོའི་ཚོགས་སྦྱོར་ལན་ཆགས་འཕེལ། །ས་རྡོ་རློག་པའི་ངལ་བ་བྱེད་པ་ཡི། །བརྫུན་གྱི་རི་མོ་མཁན་དང་འདི་མི་འདྲ། །དེས་ན་བྱམས་ཆེན་ཤིང་རྟས་དྲངས་པ་ཡི། །གསང་ཆེན་ཆོས་ཀྱི་པུསྟི་འདི་རྣམས་ཀྱིས། །རྗེ་བཙུན་བླ་མ་སྲིད་ཞིའི་རྒྱན་དུ་འཕགས། །བསྟན་འགྲོའི་མཆོད་སྡོང་ཆེན་པོ་ཟླ་མེད་དེས། །འདུལ་བ་རྣམ་བཞིའི་ཆོ་འཕྲུལ་རོལ་མོ་ནི། །ཞིང་ཁམས་ཀུན་ཏུ་ཁྱབ་པར་སྒྲོགས་པ་ལས། །གཟུགས་ཅན་གཟུགས་མེད་གདུལ་བྱ་མཐའ་ཡས་པ། །དངོས་དང་བརྒྱུད་ནས་རྣམ་གྲོལ་ལམ་ལ་བཀྲི། །སྐུ་ཡི་གཟི་བརྗིད་མཐོང་དང་གསུང་ཟེར་གྱི། །ཕྲ་མོས་རེག་པའང་ཐར་པའི་མིག་ཕྱེད་ཅིང་། །འབྲེལ་ཚད་དོན་ལྡན་འཕགས་པའི་སྐྱེས་བུ་ནི། །ས་ཆེན་འདི་ཡིས་ཐེག་པ་ཤིན་ཏུ་དཀའ། །དཀོན་མཆོག་གསུམ་གྱི་རྟེན་གསུམ་མཐའ་ཡས་པ། །འབད་པ་སྤངས་པའི་རང་བཞིན་ལྷུན་གྱིས་གྲུབ། །དགེ་འདུན་རྒྱ་མཚོ་ཕྱོགས་བཅུར་ལྷགས་པ་ལ། །བསྙེན་བཀུར་ཀུན་ཏུ་བཟང་པོའི་མཆོད་སྤྲིན་སྟོབས། །གངྒཱའི་རྡུལ་གྱི་གྲངས་སྙེད་གྲོལ་བ་བཞིས། །དག་པའི་ཞིང་དུ་བགྲོད་པའི་ས་བོན་ཐེབས། །བྱང་ཆུབ་སེམས་དཔའི་སྨོན་ལམ་རླབས་ཆེན་གྱིས། །ལྗོངས་འདིའི་འཁོར་བ་གཏིང་ནས་སྤྲུགས་པར་མཛད། །སླར་ཡང་རང་གི་གནས་སུ་བདེར་གཤེགས་ནས། །མི་ཕམ་རལ་པའི་མཆོད་རྟེན་རྒྱན་དུ་ཐོགས། །བརྒྱད་ཁྲིའི་དུས་ན་ཀླུ་ཤིང་ལྗོན་པའི་དྲུང་། །མངོན་པར་འཚང་རྒྱའི་མཛད་པ་སྟོན་ལ་འདུད། །དེ་ཚེ་བདག་ཅག་བློ་གྲོས་རབ་ཏུ་བཟང་། །སྐུ་ཡི་གྲིབ་མས་བཟུང་བའི་སེམས་ཅན་རྣམས། །འཁོར་དུ་སྐྱེས་ནས་བྱང་ཆུབ་ལུང་བསྟན་མཛད། །འཇིག་རྟེན་གསུམ་གྱི་མགོན་པོར་ཕྱག་འཚལ་ལོ། །དེ་ལྟར་རབ་བསྔགས་བསྟོད་པ་འདི་ཉིད་ལ། །སྡེབས་ལེགས་ཚིག་གི་སྦྱོར་བ་མ་མཆིས་ཀྱང་། །གཞོན་ནུ་རོལ་དགའི་དབྱངས་སུ་སྒྲོགས་པ་འདི། །ཡབ་གཅིག་ཆོས་ཀྱི་རྒྱ་མཚོ་མཉེས་ཕྱིར་འབུལ། །འདི་ལས་བྱུང་བའི་དགེ་ཚོགས་ཁ་བ་ལྟར། །རབ་ཏུ་དཀར་བས་བསྟན་དང་འགྲོ་བ་ཡི། །རྒུད་པའི་གདུང་བ་ཐམས་ཅད་གཞིལ་གྱུར་ནས། །བྱམས་ཆེན་ཆོས་ཀྱི་ཟླ་བས་ཁྱབ་གྱུར་ཅིག །ཅེས་པའང་ཀཿཐོག་མཁན་པོ་ཨ་ཤེར་གྱིས་གསུང་བསྐུལ་གནང་བས་མཚམས་སྦྱར་ཏེ། མགོན་པོ་གང་གི་བཀའ་འབངས་ཀྱི་ཐ་ཆུང་འཇམ་དབྱངས་བློ་གྲོས་རྒྱ་མཚོ་གཙུག་ལག་ལུང་རིགས་སྨྲ་བའི་སེང་གེས་དད་གུས་ཆེན་པོས་ཤར་མར་བྲིས་པ་སིདྡྷི་རསྟུ། ། །།

[edit]

skyabs mgon thams cad mkhyen gzigs kaHthog si tu paN+Di ta la bstod pa gzhon nu rol dga'i dbyangs zhes bya ba'o/____/na mo gu ru mai tri pa dA ya/__byams pa chen po'i dpal gyis rab mdzes shing /____/rgyal ba'i rgyal tshab mgon po ma pham pa/____/dga' ba brgya ldan 'chi med grong khyer gyi/____/dbus na rab tu mdzes pa'i sems dpa' che/____/gang gi gsang gsum thig le'i gong bu ni/____/byang chub ljon pas mtshan pa'i 'dzam gling gi/__byang phyogs kha ba ri pa'i bsod nams kyis/____/'jig rten mun sel zla gzhon gsar du tshes/____/de tshe sa chen 'di yang dpal dang ldan/____/skye 'gro'i tshogs kyis dga' ston rol mo 'khrol/____/lha dang bcas pa'i dkar po'i phyogs rnams kyis/____/ngo mtshar gtam gyi sbyor bas bsngags la brel/____/rgyal sras thu bo 'jam pa'i dpal chen po/____/byang sems nyi zla rgyu skar grangs snyed kyis/____/khyod kyi dbu la bdud rtsis khrus gsol zhing /____/shis brjod pad ma dkar po'i phreng ba bcing /____/gzhon nu nyid nas rigs khams mthu brtas pas/____/mkhyen rab ma dros rgya mtsho bzhin du rgyas/____/yongs su dag pa lha yi spyan mnga' bas/____/snod bcud rtsa gsum rgyal ba'i dal du gzigs/____/bcos mar gyur pa'i o DI'i slob dpon gyi/____/mtshan dpe'i gzugs brnyan ye shes phyag rgya'i sku/____/dngos su gyur nas byin gyis brlabs pa yi/____/rdo rje'i zil chen gang gi gsang gsum zhugs/____/'phags pa'i yul du skyes pa'i rabs mang po/____/ji bzhin gzigs pa sgyu ma'i rol rtsed stong /____/rnam par ngom pas dag pa'i skye ba ni/____/gar mkhan bzhin du cir yang 'char bar ston/____/rgyal sras gzhon nu nor bzang rnam thar gyi/____/ngang tshul lhur bzhes gangs ljongs thub pa che'i/____/ring lugs ji snyed thams cad tshol ba'i phyir/____/gtsug nor brgya phrag lhag gi zhabs pad bsnyen/____/khyad par 'phags pa'i sar bzhugs mchog rnams dang /____/tshe rabs 'brel ba'i rigs bdag 'jam pa'i dbyangs/____/mkhyen brtse'i dbang pos nyid dang dbyer med par/____/byin gyis brlabs pas srid gsum mtshungs zla dben/____/mdo sngags rig gnas bye ba ma lus pa/____/thugs mtshor bskyil bas rtsod dus thams cad mkhyen/____/nges par grags shing grub la gzur gnas kyi/____/dpyod ldan mkhas pa'i yi ga dbang med 'gugs/____/'di na phyogs re shes pas khengs gyur na/____/khyod kyi mkhyen rab mkha' dang mnyam pa la/____/lhun po lta bu'i gzi brjid cher bskyed nas/____/phyogs las rnam rgyal rnga chen cis mi brdungs/____/khyad par kun bzang rdo rje 'chang dbang gi/__tan+t+ra 'chad la gsang ba'i bdag po dang /____/skal ldan rgyal po dzaHnyid dngos su snang /____/mkhas grub rgya mtsho'i dbus na rta ljang bzhin/____/'chod dang rtsod dang rtsom pa gang la yang /____/klu sgrub thogs med dbyig gnyen chos grags dang /____/ma khol sogs kyi rnam dpyod dpal mnga' zhing /____/smra ba gzhan rnams me khyer sgron dang mtshungs/____/khyod kyi thugs bskyed gzhan las ches 'phags pas/____/bshad dang sgrub pa'i sde chen 'dzug pa yi/____/lam srol bzang po'i sgo 'phar gsar du phyes/____/de yi drin las ris med chos grwa rgyas/____/gzhan dag zang zing nor gyi dngos po 'gugs/____/khyod kyis sngar med mkha' 'gro'i gsang mdzod las/____/zab rgyas chos kyi glegs bam drangs pa 'dis/____/gter 'byin rgya mtsho'i spyi rjer cis ma grub/____/ral pa'i khur chen mgo la btegs pa dang /____/sred pas dman mo'i tshogs sbyor lan chags 'phel/____/sa rdo rlog pa'i ngal ba byed pa yi/____/brdzun gyi ri mo mkhan dang 'di mi 'dra/____/des na byams chen shing rtas drangs pa yi/____/gsang chen chos kyi pusti 'di rnams kyis/____/rje btsun bla ma srid zhi'i rgyan du 'phags/____/bstan 'gro'i mchod sdong chen po zla med des/____/'dul ba rnam bzhi'i cho 'phrul rol mo ni/____/zhing khams kun tu khyab par sgrogs pa las/____/gzugs can gzugs med gdul bya mtha' yas pa/____/dngos dang brgyud nas rnam grol lam la bkri/____/sku yi gzi brjid mthong dang gsung zer gyi/____/phra mos reg pa'ang thar pa'i mig phyed cing /____/'brel tshad don ldan 'phags pa'i skyes bu ni/____/sa chen 'di yis theg pa shin tu dka'/____/dkon mchog gsum gyi rten gsum mtha' yas pa/____/'bad pa spangs pa'i rang bzhin lhun gyis grub/____/dge 'dun rgya mtsho phyogs bcur lhags pa la/____/bsnyen bkur kun tu bzang po'i mchod sprin stobs/____/gang+gA'i rdul gyi grangs snyed grol ba bzhis/____/dag pa'i zhing du bgrod pa'i sa bon thebs/____/byang chub sems dpa'i smon lam rlabs chen gyis/____/ljongs 'di'i 'khor ba gting nas sprugs par mdzad/____/slar yang rang gi gnas su bder gshegs nas/____/mi pham ral pa'i mchod rten rgyan du thogs/____/brgyad khri'i dus na klu shing ljon pa'i drung /____/mngon par 'tshang rgya'i mdzad pa ston la 'dud/____/de tshe bdag cag blo gros rab tu bzang /____/sku yi grib mas bzung ba'i sems can rnams/____/'khor du skyes nas byang chub lung bstan mdzad/____/'jig rten gsum gyi mgon por phyag 'tshal lo/____/de ltar rab bsngags bstod pa 'di nyid la/____/sdebs legs tshig gi sbyor ba ma mchis kyang /____/gzhon nu rol dga'i dbyangs su sgrogs pa 'di/____/yab gcig chos kyi rgya mtsho mnyes phyir 'bul/____/'di las byung ba'i dge tshogs kha ba ltar/____/rab tu dkar bas bstan dang 'gro ba yi/____/rgud pa'i gdung ba thams cad gzhil gyur nas/____/byams chen chos kyi zla bas khyab gyur cig__/ces pa'ang kaHthog mkhan po a sher gyis gsung bskul gnang bas mtshams sbyar te/__mgon po gang gi bka' 'bangs kyi tha chung 'jam dbyangs blo gros rgya mtsho gtsug lag lung rigs smra ba'i seng ges dad gus chen pos shar mar bris pa sid+d+hi rastu/__/____//__