JKW-KABUM-04-NGA-001-002

🚧 This website is under continued development. We appreciate your patience!

Previous Text Back to Volume PageNext Text

གསང་འདུས་སྤྱི་དོན་ལས་ཁོལ་བཏུས།

Wylie title	gsang 'dus spyi don las khol btus
Location	mkhyen brtse'i bka' 'bum Volume 4, sde tshan 1, Text 2, Pages 39-53 (Folios 20a5 to 27a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gsang 'dus spyi don las khol btus. In 'jam dbyangs mkhyen brtse'i dbang po'i bka' 'bum, Vol. 4: 39-53. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris; Tantras - rgyud

1 Texts in this Section (sde tshan or chos tshan)

2 39-53	གསང་འདུས་སྤྱི་དོན་ལས་ཁོལ་བཏུས། gsang 'dus spyi don las khol btus Notes - zin bris   ·   Tantras - rgyud	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

དཔལ་གསང་བ་འདུས་པའི་རྒྱུད་ཀྱི་སྤྱི་དོན་ལས་ཁོལ་བཏུས་སོ།། །། ༈ དཔལ་འབྲུག་པ་ཐམས་ཅད་མཁྱེན་པ་མི་ཕམ་པདྨ་དཀར་པོའི་ཞབས་ཀྱི་གསུངས་ལས། གསང་བ་འདུས་པའི་རྒྱན་ཞེས་བྱ་བ་མར་ལུགས་ཐུན་མོང་མ་ཡིན་པའི་བཤད་པར། གང་བཤད་བྱ་དཔལ་གསང་བ་འདུས་པའི་རྒྱུད་ཀྱི་ལུས། གང་གིས་འཆད་བྱེད་རྒྱན་བདུན་གྱིས་བརྒྱན་ཏེ་འཆད་པར། སྔ་མ་ལའང་ཐ་སྙད་ལ་བརྟེན་ནས་དོན་རྟོགས་པའི་ཕྱིར་མཚན། དེས་ཇི་ལྟར་གསུངས་ཤིང་བཀྲལ་བ། རྒྱུད་རང་གི་ངོ་བོ་གཏན་ལ་དབབས་པའོ། །ཞེས་གསུངས། གསང་འདུས་རྩ་རྒྱུད་ལ་བཤད་རྒྱུད་བདུན་གྱིས་འགྲེལ་ཏེ་ལྷ་མོ་བཞིས་ཞུས་ལྟ་བུ་རྩ་རྒྱུད་དུ་ཐིག་ལེའི་གནས་ཚུལ་འགའ་ཞིག་སྦས་པ་གསལ་བར་བྱེད་པ་མི་གསལ་བར་བྱེད་པ། ལྷ་གྲངས་དང་ཆོ་ག་༢༠མ་ཚང་བ་ཁ་སྐང་བ་མ་ཚང་བ་ཁ་སྐོང་བའི་རྒྱུད་རྡོར་འཕྲེང་གླིང་གཞི་དང་། ལྷ་ལ་སོགས་པ་འདྲ་མི་འདྲར་སྟོན་པ་རྡོ་རྗེ་སྙིང་པོ་རྒྱན་གྱི་རྒྱུད་ལྟ་བུ་ཚུལ་མི་འདྲ་བ། རྒྱུད་ཕྱི་མ་རྩ་རྒྱུད་ཀྱི་ལེའུ་བཅུ་བདུན་པོ་བསྙེན་སྒྲུབ་ཡན་ལག་བཞིར་བསྡུས་ནས་སྟོན་པ་དོན་བསྡུས་པ། རྣམ་སྣང་སྒྱུ་དྲྭ་ལྟ་བུ་སྔགས་དང་ལས་ཚོགས་རྩ་མཐུན་དུ་སྟོན་པ། ཡེ་ཤེས་རྡོ་རྗེ་ཀུན་ལས་བཏུས་ལྟ་བུ་ཚིག་དོན་རྒྱན་བདུན་གྱི་སྒོ་ནས་བཤད་ཚུལ་སྟོན་པ། དགོངས་པ་ལུང་སྟོན་ལྟ་བུ་དགོངས་པའི་དོན་གསལ་བར་སྟོན་པའོ། །ཞེས་བཤད། ། ༈

སློབ་དཔོན་ཀླུ་བྱང་གིས། གསོལ་བ། ཉོན་མོངས་པ་ཐམས་ཅད་སྤངས་པའི་སངས་རྒྱས་དང་བྱང་ཆུབ་སེམས་དཔའ་སྟོབས་བཅུ་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་བརྙེས་པ་རྣམས་འདིར་ཐ་མལ་པའི་ལུས་ལ་དགོད་པ་མི་འགལ་བ་ལགས་སམ། བཀའ་སྩལ་པ། ཇི་སྲིད་དུ་བཀྲུ་བཤལ་གྱི་སྣོད་ཡིན་པའི་དུས་སུ་ནི་མཆིལ་མ་འདོར་ལ། གཞོང་པའི་གནས་སྐབས་སུ་ནི་འཇིག་རྟེན་པ་རྣམས་ཟས་ཟའོ། །གཟུགས་བརྙན་སྐབས་སུ་ནི་མཆོད་པ་བྱེད་དོ། །དེ་བཞིན་དུ་ཐ་མལ་པའི་ལུས་ལ་འདོད་ཆགས་དང་ཞེ་སྡང་དང་གཏི་མུག་ལ་སོགས་པས་བརླན་པའི་སྔོན་གྱི་གནས་སྐབས་སུ་འཁོར་བའི་རྒྱུ་ཡིན་ལ། ཕྱིས་རང་བཞིན་ཡོངས་སུ་ཤེས་ཤིང་ཡོངས་སུ་དག་པས་ཐམས་ཅད་མཁྱེན་པ་གྲུབ་པའི་རྒྱུར་འགྱུར་བ་ལ་སྐྱོན་མེད་དོ། །ཞེས་དང་། འདིར་བསྟན་གྱི་སྦྱོར་དྲུག་དང་། དུས་ཀྱི་འཁོར་ལོ་ནས་བཤད་པའི་སྦྱོར་དྲུག་མིང་མཐུན་པ་ཙམ་ཡིན་གྱི། དོན་མི་གཅིག་གོ་ཞེས་སྨྲ་བ་ནི་འཐད་པ་མ་ཡིན་ཏེ་འདིར་ཡང་ཐ་མལ་གྱི་སྣང་བ་སྡུད་ཅིང་ཡེ་ཤེས་ཀྱི་སྣང་བ་སྤྲོ་བ་སོར་སྡུད། དེ་སྦྱངས་པ་རབ་ཀྱི་མཐར་ཕྱིན་པའི་སེམས་རྩེ་གཅིག་པ་བསམ་གཏན། རྡོ་རྗེ་བཟླས་པ་སྲོག་རྩོལ། སྲོག་རྩོལ་གྱི་ཡོན་པོ་འགགས་ནས་དབང་བསྐུར་བཟུང་བ་ལ་འཛིན་པ། སྟོང་པ་ཉིད་ཀྱི་གཟུགས་བརྙན་རྗེས་སུ་དྲན་པར་བྱེད་པ་ལ་རྗེས་དྲན། བདེན་གཉིས་གཅིག་ཏུ་སྦྱོར་བ་ལ་ཏིང་ངེ་འཛིན་ཞེས་བཤད་ཅིང་། དུས་ཀྱི་འཁོར་ལོར་ཡང་དེ་ཉིད་ལས་དོན་ཟུར་པ་ཅི་ཡང་མ་གསུངས་སོ།། །། ༈ རྒྱན་བདུན་ལས་དང་པོ་གླེང་བསླང་བ་ཡི་གྲངས་ནི་ལྔ། ཞེས་པས། རྒྱུད་འདིའི་མཚན་ནི་ཅི་ཞིག་ཡིན། །གང་གི་དོན་དུ་འདི་ཉིད་མཛད། །སུ་ཞིག་བྱེད་པ་འདིའི་ཚད་ཅི། །ཚིག་འདིའི་དགོས་པ་ཅི་ཞིག་ཡིན། ཞེས་སོ། །གཉིས་པ་ཚུལ་ནི་རྣམ་པ་བཞི་དང་ཡང་། ཞེས་པ། རྒྱུད་དང་གླེང་གཞི་ཞེས་པ་དང་། ངེས་པའི་ཚིག་དང་རྒྱུ་ཡང་ངོ་། །ཞེས་པར་འདོད་ཆགས་དང་བྲལ་བ་དང་། འདོད་ཆགས་ཀྱི་ཆོས་ཀྱི་དབྱེ་བ་གཉིས། དང་པོ་ལ་ཡང་། རྒྱུད་གླེང་གཞི། ངེས་ཚིག །རྒྱུ་བཞིའོ། །དང་པོ་ནི་མི་གདུལ་བྱ་ཡིན་པས་འདྲ་བའི་སྐྱེ་བ་བཟུང་བ་ནི་རིགས་པ་ཁོ་ནའོ་ཞེས་དགོངས་པས་སོ། །གཉིས་པ་ནི། ཆགས་བྲལ་ལ་མ་བརྟེན་པར་སེམས་ཅན་རྣམས་མ་འདུལ་བའི་ཕྱིར་བཙུན་མའི་འཁོར་གྱི་ནང་ནས་ངེས་པར་འབྱུང་བའོ། །གསུམ་པ་ནི། དགོན་པར་གནས་པ་ལ་ཡང་འདོད་ཆགས་འབྱུང་བའི་ཕྱིར་དེ་བཟློག་སླད་འདུལ་བའི་བསླབ་གཞི་སྣ་ཚོགས་སུ་སྤྱོད་པའོ། །བཞི་པ་ནི། འབྲས་བུའི་བཞེད་པ་ཡོད་པས་བཅོམ་ལྡན་འདས་དགའ་བ་སྤྱོད་པ་ལ་སོགས་པའི་ཆོས་སྤྱོད་པར་མཛད་པ་དེ་ནི་རྒྱུ་ཡིན་ཏེ། འབྲས་བུ་ཐོབ་པར་བྱ་བ་ལ་ཐབས་ཡིན་པའི་ཕྱིར་རོ། །གཉིས་པ་ལའང་བཞི་ལས། དང་པོ་ནི། རྣམ་ཤེས། ཕུང་པོ། རླུང་། འབྱུང་བ་ཆེན་པོ་ལྔ་རྣམ་པར་དག་པའི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོ་དེ་བཞིན་གཤེགས་པ་ལྔའི་རིགས་ཀྱི་སྐུར་བཟུང་བའོ། །གཉིས་པ་ནི། རིགས་ལྔར་བསྟན་པ་ཀུན་རྫོབ་སྟེ་དེ་བཟློག་པའི་ཕྱིར་རྡོ་རྗེ་འཆང་ཆེན་པོའི་རིགས་ཀྱི་ངོ་བོ་གཅིག་ཏུ་མཛད་པའོ། །འདི་གཉིས་རང་དོན་ཕུན་ཚོགས། གསུམ་པ་ནི། སེམས་ཅན་ཁམས་དང་མོས་པ་སྣ་ཚོགས་པ་ཡིན་པས་དེ་དག་རྗེས་སུ་བཟུང་སླད་རྡོ་རྗེ་ལེགས་པའི་མཚོན་ཆ་བསྣམས་པ་དེ་དག་ཀྱང་ཡེ་ཤེས་རྣམ་པར་དག་པ་ཡིན་ནོ། །བཞི་པ་ནི། བཅོམ་ལྡན་འདས་ཁྲོ་ཆགས་ཀྱི་དབང་དུ་མཛད་ནས་སྒེག་པ་ལ་སོགས་པའི་གར་དགུའི་ཉམས་ཀྱི་སྤྱོད་པ་མཛད་ནས། གཞན་དག་ལ་ཡང་དེ་ལྟར་སྟོན་པར་མཛད་པའོ། །གསུམ་པ་ནི། རྒྱས་བཤད་མཐའ་ནི་རྣམ་པ་དྲུག །ཞེས་དང། དབྱེ་བ་དྲང་བ་ངེས་དོན་དང་། །དགོངས་པས་བཤད་དང་དགོངས་མིན་དང་། །ཇི་བཞིན་སྒྲ་དང་སྒྲ་མིན་ཏེ། །མཐར་ནི་དྲུག་ཅེས་བྱ་བར་གྲགས། ཞེས་པས་དང་པོ་ནི། སྐལ་པ་ངན་པའི་སློབ་མ་རང་བཞིན་གྱི་དོན་ལས་གཞན་པ་ཉིད་དུ་འཁྲིད་པ་དེ་དག་ལ་ནི་དེ་ཙམ་གྱིས་དོན་དུ་འགྱུར་བ་ཡིན་ནོ། །གཉིས་པ་ནི། མཆོག་འདོད་པའི་སྐལ་ལྡན་ལ་ཡང་དག་པའི་དོན་གྱི་བདེན་པ་དེ་ཁོ་ན་ཉིད་ཇི་ལྟ་བ་རབ་ཏུ་སྟོན་པའོ། །གསུམ་པ་ནི། མོས་པ་སྣ་ཚོགས་པའི་འཁོར་གྱི་ནང་དུ་བརྗོད་པར་མི་རུང་བའི་ཕྱིར་འཇིག་རྟེན་ལས་འགལ་བའི་ཚིག་གི་སྦྱོར་བས་གསུངས་པའོ། །བཞི་པ་ནི། དབང་པོ་དམན་པ་ནི་སྟོན་པའི་སྣོད་དུ་རུང་བ་མ་ཡིན་ནོ། །འོན་ཀྱང་བླ་མར་གུས་ཤིང་བདེན་པ་དང་། དཀོན་མཆོག་གསུམ་ལ་སོགས་པའི་ཡུལ་ལ་གུས་པ་དང་བཅས་ཤིང་སྦྱིན་པ་ལ་སོགས་པའི་ཡོན་ཏན་དང་ལྡན་པའི་ཚུལ་ཅན་དེ་ཁོ་ན་ཉིད་ཀྱི་སྣོད་དུ་རུང་བ་དེ་དག་ལ། མཆོག་ཏུ་གསལ་བས་བཅོམ་ལྡན་འདས་དེ་ཁོ་ན་ཉིད་སྟོན་པ་གང་ཡིན་པ་དེ་ནི་དགོངས་པ་མ་ཡིན་པ། ཞེས་སོ། །ལྔ་པ་ནི། དཀྱིལ་འཁོར་གྱི་ཆོ་ག་དང་། རྟོག་པ་དང་། སྤྱོད་པ་སྒྲས་ཇི་ལྟར་བཤད་པ་དེ་ཁར་དོན་གནས་པའོ། །དྲུག་པ་ནི། བ་ལང་ཅེས་སོགས་འཇིག་རྟེན་ན་གྲགས་པ་དང་། དེ་བཞིན་ཅེས་སོགས་བསྟན་བཅོས་ལ་གྲགས་པའི་སྒྲ། ཀོ་ཊ་ཁྱཱ་ལ་སོགས་པའི་སྒྲ་ལུགས་གཉིས་དེ་གང་དུའང་མ་གྲགས་པས་བཅོམ་ལྡན་འདས་ཀྱིས་རྟོག་གེ་པ་དང་སྒྲ་པ་རྣམས་ཀྱིས་རྟོགས་པར་དཀའ་བའི་དོན་དུ་དེ་བཞིན་གཤེགས་པ་ལྔའི་མཚན་ནམ་སྲོག་ལ་སོགས་པ་རླུང་གི་མིང་དུ་མཛད་པ་ལྟ་བུའོ། །དེ་ཡང་དགོངས་པ་དྲང་དོན་གྱི་ཁྱད་པར་ནི་སྒྲ་དང་དོན་གྱི་ཁྱད་པར། །དགོངས་པ་དང་ཇི་བཞིན་མ་ཡིན་པའི་སྒྲའི་ཁྱད་པར་ནི་འགལ་བ་དང་གྲགས་པ་མ་ཡིན་པའི་ཕྱིར་དང་། དགོངས་པ་དང་ཇི་བཞིན་པ་ནི་འགལ་བ་དང་མི་འགལ་བ་དང་ངེས་དོན་དང་དགོངས་མིན་གྱིས་ཁྱད་པར་ནི་དབང་པོ་རྣོ་རྟུལ་གྱི་བྱེ་བྲག་གིས་སོ། །བཞི་པ་ནི། འཆད་ཚུལ་ཡང་ནི་རྣམ་པ་བཞིས། །ཞེས་པར། འཆད་ཚུལ་དབྱེ་བ་བརྗོད་པར་བྱ། །ཡི་གེའི་དོན་དང་སྤྱིའི་དོན། །སྦས་དང་དེ་བཞིན་མཐར་ཐུག་པའོ། །ཞེས་པའི། དང་པོ་ནི། རང་བཞིན་རྐྱེན་དང་རྣམ་འགྱུར་མིང་ཡི་གེའི་ངེས་པ་སྒྲ་པས་བཞག་པ་དང་མཐུན་པར་སྟོན་པ། གཉིས་པ་ནི། མདོ་སྡེ་ལ་སོགས་པར་རབ་ཏུ་ཞུགས་པར་སྔགས་ཀྱི་ལམ་ལ་འཇུག་པའི་ཚེ་དམ་ཚིག་དང་སྤྱོད་པ་སོགས་ལ་སོམ་ཉིར་གྱུར་པའི་ཚེ་དེ་བཟློག་ཕྱིར་མདོ་སྡེ་དེ་དག་གི་རྗེས་སུ་སྟོན་པ་དང་། བསྐྱེད་པའི་རིམ་པ་སྟོན་པ་གཉིས། གསུམ་པ་ནི། འདོད་ཆགས་ཀྱིས་འདོད་ཆགས་རྣམ་པར་སྦྱོང་བ་དང་། བདག་བྱིན་གྱིས་བརླབས་པ་དང་། སེམས་རྣམ་པར་བདེན་པ་ཙམ་སྟོན་པ་གསུམ། བཞི་པ་ནི། འོད་གསལ་བ་དང་ཟུང་འཇུག་སྟོན་པ་གཉིས་སོ། །དེ་ཡང་ཡིག་དོན་ལ་དགོངས་མིན་དང་སྒྲ་ཇི་བཞིན་པ་གཉིས་སྤྱི་དོན་ལ་དྲང་ངེས། སྦས་དོན་གྱིས་དགོངས་བཤད། མཐར་ཐུག་པས་སྒྲ་ཇི་བཞིན་མ་ཡིན་པ་བསྡུས་ལ། ཡང་དང་པོ་གཉིས་ཀྱིས་བསྐྱེད་རིམ། སྦས་དོན་གྱིས་རྡོར་བཟླས་དང་སེམས་དབེན་རང་བྱིན་རླབས། མཐར་ཐུག་གིས་མངོན་བྱང་དང་ཟུང་འཇུག་བསྡུས་སོ། །ལྔ་པ་ནི། ལྔ་པའི་དབྱེ་བ་རྣམ་པ་གཉིས། ཞེས་དང་། འཆད་དང་ཉན་པར་འདོད་པ་ལ། །དབྱེ་བ་ཡང་ནི་གཉིས་ཡོད་དེ། །ཚོགས་ལ་བཤད་པར་བསྟན་པ་དང་། །གཉིས་པ་སློབ་མར་བཤད་པའོ། ཞེས་དང་། ཇི་བཞིན་སྒྲ་དང་དགོངས་མིན་དང་། །དྲང་བའི་དོན་དུའང་གང་གྱུར་དང་། །ཡི་གེའི་དོན་དང་སྤྱི་དོན་རྣམས། །ཚོགས་པ་ལ་ནི་བཤད་པར་འདོད། །ཇི་བཞིན་མིན་སྒྲ་ངེས་དོན་དང་། །དེ་བཞིན་དགོངས་ཏེ་བཤད་པ་དང་། །སྦས་པ་མཐར་ཐུག་པ་རྣམས་ནི། །སློབ་མ་ལ་ནི་བཤད་པར་འདོད། ཞེས་སོ། །དྲུག་པ་ནི། དྲུག་པ་དབྱེ་བ་ལྔ་དང་ལྡན། ཞེས་པས། །རྣམ་པ་ཀུན་ཏུ་སྟན་འདོད་འདིས། །འཇིག་རྟེན་ངེས་པར་གྱུར་པ་ནི། །བློ་ནི་རྣམ་པ་དཔག་མེད་ལས། །གང་ཟག་རྣམ་པ་ལྔར་འདོད་དོ། །ཨུཏྤལ་པདྨ་དཀར་པོ་དང་། །ཙནྡན་རིན་པོ་ཆེ་ཡི་དཔེ། ཞེས་པས། ཙནྡན་ནི་བེམ་པོ། ཨུཏྤལ་ནི་ཐ་མ། པད་དཀར་འབྲིང་། པདྨ་མཆོག །རིན་པོ་ཆེ་ནི་ཡང་རབ་སྟེ། སྔ་མ་བཞི་ནི་ཚོགས་བཤད་དང་། ཕྱི་མ་གཅིག་ནི་སློབ་བཤད་ཀྱི་སྣོད་ཡིན་ནོ། །བདུན་པ་ནི། བདུན་པའི་དབྱེ་བ་རྣམ་གཉིས་ཏེ། །རྒྱན་རྣམས་མདོ་རུ་བསྡུས་པའོ། །ཞེས་པ། རྒྱན་ནི་དྲུག་པོ་དེ་རྣམས་ཀྱིས། །བདེན་གཉིས་རྣམ་པར་ངེས་བྱས་པ། །དེ་ནི་རྒྱན་གྱུར་བདུན་པ་སྟེ། །རྫོགས་པའི་རིམ་པ་སྒྲུབ་པའོ། །རྒྱན་དྲུག་པོ་མཐར་ཕྱིན་པས་བསྟན་བཅོས་ཀྱི་ལུས་རིམ་པ་གཉིས་སུ་ཕྱིན་པར་འགྱུར་རོ། །དེའི་ཕྱིར་རྒྱན་བདུན་ལ་རྣམ་པར་དབྱེ་བ་ཉི་ཤུ་རྩ་བརྒྱད་པ། །རྒྱན་དེས་ཇི་ལྟར་བརྒྱན་པའི་ཚུལ་ནི། ཤྲཱདྡྷཱས། གླེང་བསླངས་ལྔ་དང་མཐའ་དྲུག་རྒྱན། །བརྡ་ཡི་རྒྱུད་ལ་འཇུག་པ་ཡིན། །རིག་པ་རྣམ་བཞི་བཤད་པ་བཞི། །བདེན་གཉིས་ངེས་པའི་རྒྱན་དག་ནི། །དོན་ལ་འཇུག་པའི་རྒྱན་ཡིན་ནོ། །ཞེས་དང་། ཀུ་མཱ་རས། མཐའ་དྲུག་ལ་ཚིག་དང་དོན་གྱི་རྒྱན་གཉིས་ཀ་དང་། རྒྱན་ཐོག་མ་དང་གཉིས་པ་ཀུན་འཇུག་པ་དང་། ཐ་མ་བསྡུས་པའི་རྒྱན་ཞེས་བཞེད་ལ། འཆད་ཚུལ་གཉིས་སྨྲ་བ་པོ་དང་། གང་ཟག་ལྔ་ཉན་པ་པོའི་རྒྱན་ནོ། །གསང་བ་འདུས་པ་ཞེས་པའི་དོན་ལ་ཤྲཱི་ནི་གཉིས་མེད་ཡེ་ཤེས་ཏེ། ཞེས་དང་། རྒྱུད་ཕྱི་མར། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་སུ་བསྟན་པ་ཡིན། །སངས་རྒྱས་ཐམས་ཅད་ཅེས་བྱ་བ། །ཚོགས་པ་འདུས་པ་ཡིན་པར་བཤད། ཞེས་པའི་དོན་སྒྲོན་གསལ་ལས། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ནི་དམ་ཚིག་དང་སྡོམ་པ་ལ་སོགས་པའི་རིགས་གསུམ་ཡོངས་སུ་གྱུར་པ་སྟེ་ཡི་གེའི་དོན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ནི་ཡི་གེ་གསུམ་སྤྱིའི་དོན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ནི་ཡེ་ཤེས་གསུམ་པོ་རང་བཞིན་གྱི་སྣང་བ་ནི་རླུང་གི་བཞོན་པ་ཅན་ཏེ་སྦས་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ནི་ཡེ་ཤེས་ཀྱི་རང་བཞིན་གྱི་སྐུ་སྟེ་མཐར་ཐུག་པའོ། །ཞེས་དང་། འདུས་པ་ཞེས་པ་ནི་གཉིས་གཅིག་ཏུ་གྱུར་པ་ནི་འདུས་པ་སྟེ་ཡི་གེའི་དོན་ཏོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི་འདུས་པ་སྟེ་སྤྱིའི་དོན་ཏོ། །ཤེས་རབ་དང་ཐབས་ཡང་དག་པར་སྦྱོར་བ་ནི་འདུས་པ་སྟེ་སྦས་པའོ། །ཀུན་རྫོབ་དང་དོན་དམ་པའི་བདེན་པ་དག་འདྲེས་པ་ནི་འདུས་པ་སྟེ་མཐར་ཐུག་པའོ། །ཞེས་བཤད་ལ། དང་པོའི་དངོས་པོའི་གནས་ལུགས་དང་། དེ་ཁྱད་པར་དུ་བྱེད་པ་དབང་། གཉིས་པ་དང་གསུམ་པས་རིམ་བཞིན་བསྐྱེད་རྫོགས་ཏེ་ལམ། བཞི་པས་འབྲས་བུ་སྟེ། འདི་ཙམ་གྱིས་དབང་རྣོན་གྱིས་རྒྱུད་ཀྱི་དོན་གོ་བར་ནུས་པའོ། །ཞེས་བཤད།། །། ༈

ཡང་རྒྱུད་རང་གི་ངོ་བོ་གཏན་ལ་དབབ་པར་རྒྱུད་དེ་རྣམ་པ་གསུམ་དུ་འགྱུར། ཞེས་སོགས། གཞི་ལམ་འབྲས་བུའི་རྒྱུད་དུ་བསྡུས་ནས་འཆད་པ། དང་པོ་ལའང་གཉུག་མ་དོན་གྱི་རྩ་རླུང་ཐིག་ལེ་གསུམ་དབྱེ་མི་ཕྱེད་པ་རོ་མཉམ་ཕྱག་རྒྱ་ཆེན་པོ། །དེ་གཏན་ལ་འབེབས་པར་བྱེད་པ་ལ། རྩ་བའི་རྒྱུད་ལས། ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་པར་སྤངས། །ཆོས་བདག་མེད་པ་མཉམ་པ་ཉིད། །རང་སེམས་གདོད་ནས་མ་སྐྱེས་པ། སྟོང་པ་ཉིད་ཀྱི་རང་བཞིན་ནོ། །ཞེས་པའི་དོན། སློབ་དཔོན་ཀླུ་སྒྲུབ་སེམས་འགྲེལ་དུ། དངོས་པོ་ཐམས་ཅད་དང་བྲལ་བས་མུ་སྟེགས་དང་། ཕུང་ཁམས་སྐྱེ་མཆེད་དང་བྲལ་བས་ཉན་ཐོས་དང་། གཟུང་བ་དང་འཛིན་པ་རྣམ་པར་སྤངས་པས་སེམས་ཙམ་གྱི་ལྟ་བ་སུན་ཕྱུང་ནས་ལྷག་མ་དབུ་མ་རང་ལུགས་བསྟན་པའི་ཚུལ་བཤད། གཉིས་པ་ལམ་ལ། སྨིན་བྱེད་དབང་དང་གྲོལ་བྱེད་གཉིས། དང་པོ་ལའང་ངོ་བོ་དབྱེ་བ་གཉིས། ཕྱི་མ་ལ། གང་གིས་དབང་བསྐུར་བའི་སློབ་དཔོན། གང་དུ་དབང་བསྐུར་བའི་དཀྱིལ་འཁོར། གང་བསྐུར་བའི་དབང་། གང་གི་གྲོགས་དམ་ཚིག་དང་སྡོམ་པ་རྣམ་པར་བཞག་པའོ། །ཞེས་དང་། སྒྲོན་གསལ་ལས་དཀྱིལ་ནི་སྙིང་པོ་ཀུན་རྫོབ་ཀྱི་བདེན་པའོ། །འཁོར་ནི་དེ་ལེན་ཅིང་འཛིན་པས་དྲྭ་དཀྱིལ་འཁོར་ཏེ་དྲྭ་བའི་དོན་ནོ། །དཀྱིལ་ནི་སྙིང་པོ་སྟེ་དོན་དམ་པའི་བདེན་པའོ། །འཁོར་ནི་དེ་ལེན་ཅིང་འཛིན་པའི་དཀྱིལ་འཁོར་ཏེ། ཞེས་བཤད། དེ་ཡང་ཀླུའི་བློས་ཆོ་ག་ཉི་ཤུས་འགྲུབ་པར་བཤད། གཉིས་པ་གྲོལ་བྱེད་ལ། མཆོག་གི་བསྙེན་སྒྲུབ་ཡན་ལག་བཞི་ལས། དང་པོ་ནི། སའི་ཆ་བསྐྱེད་པ་ནས་སྟག་མོས་བསྒོམ་པ་རྫོགས་པའི་བར་བསྙེན་པར་བྱ་ཞིང་བྱང་ཆུབ་ཀྱི་སེམས་ལ་དམིགས་པར་བྱ་བས་བསྟེན་པའི་ཡན་ལག་གོ། །དེ་ནས་རྡོ་རྗེ་སེམས་དཔའ་རྫོགས་པའི་བར་ནི་ཉེ་བར་གནད་དུ་བསྒྲུབ་པར་བྱ་ཞིང་བསྐྱེད་པར་བྱ་བ་ཉེ་བར་སྒྲུབ་པའི་ཡན་ལག །སྤྱི་བོར་རྣམ་སྣང་གི་རང་བཞིན་ཨོཾ་བཀོད་པ་ནས་ཏིང་ངེ་འཛིན་རྒྱལ་མཆོག་རྫོགས་པའི་བར་ནི་ཉེ་བར་བཞག་པའི་དོན་དུ་གསོལ་བ་འདེབས་པ་ཡིན་པས་རང་གི་དོན་བསྒྲུབ་པས་བསྒྲུབ་པའི་ཡན་ལག །དཀྱིལ་འཁོར་རྒྱལ་མཆོག་དང་ལས་རྒྱལ་མཆོག་ནི་གཞན་དོན་གྱི་སྒྲུབ་པ་ཆེན་པོ་སྟེ་དེ་དག་ཀྱང་དང་པོ་སྦྱོར་བའི་ཏིང་འཛིན་ལ་རྒྱལ་མཆོག །དཀྱིལ་འཁོར་རྒྱལ་པོ་མཆོག །ལས་རྒྱལ་པོ་མཆོག་སྟེ་གསུམ་ལས། དང་པོ་ལའང་རྣལ་འབྱོར་སོགས་བཞི་སྟེ། ཚོགས་བསགས། སྙིང་རྗེ་བསྒོམ་པ། སྲུང་འཁོར་བསྒོམ་པ། གཙོ་བོ་བསྒོམ་པ། མི་བསྐྱོད་པ་སྤྲུལ་ནས་བདག་ཉིད་ཞེ་སྡང་རྡོ་རྗེར་བསྒྱུར་བ། ཁྲོ་བོ་སྤྲོ་བ། བཀའ་བསྒོས་ཏེ་བགེགས་འཇོམས་པ། སྟོང་པ་ཉིད་བསྒོམ་པ། གཞལ་ཡས་ཁང་བསྒོམ་པ། །དཀྱིལ་འཁོར་དགོད་པ། དོན་དམ་པའི་དཀྱིལ་འཁོར་ལ་འཇུག་པ། ལྡང་བ། ཉི་མའི་དཀྱིལ་འཁོར་ལ་དམིགས་པ། ཟླ་བའི་དཀྱིལ་འཁོར་ལ་དམིགས་པ་བཅོ་ལྔས་ནི་རྣལ་འབྱོར། ཡི་གེ་དང་། ཕྱག་འཚན་དང་། རྡོ་རྗེ་འཆང་བསྐྱེད་པ་གསུམ་རྗེས་སུ་རྣལ་འབྱོར། མདུན་དུ་མི་བསྐྱོད་པ་སྤྲུལ་པ། དེར་བདག་ཉིད་ལ་ཞུགས་པ། རྡོ་རྗེ་སེམས་དཔའ་སྤྲུལ་པའི་སྐུར་བསྒྱུར་བ། ཕུང་པོ་ཁམས་སྐྱེ་མཆེད། ཡན་ལག་ལ་དགོད་པ་བདུན་ཤིན་ཏུ་རྣལ་འབྱོར། སྐུ་གསུང་ཐུགས་བྱིན་གྱིས་བརླབ་པ། དེ་གསུམ་དབྱེར་མི་ཕྱེད་པ། ཡེ་ཤེས་སེམས་དཔའ། རྒྱས་བཏབ། ཏིང་འཛིན་སེམས་དཔའ་བསྒོམ་པ་གསུམ་རྣལ་འབྱོར་ཆེན་པོ་ལྡན་པའི་འདུས་བྱས། རྡོ་རྗེ་པདྨ་འདུས་བྱས། རྗེས་སུ་ཆགས་པའི་རྡོ་རྗེ་བྱིན་གྱིས་བརླབ་པ། པདྨའི་ནང་དུ་སྔགས་ཀྱི་དཀྱིལ་འཁོར་ཕྱུང་བ། ཕྱིར་ལྷའི་དཀྱིལ་འཁོར་བྱུང་བ་ལྔ་དཀྱིལ་འཁོར་རྒྱལ་མཆོག །ཕྲ་མོ་བཟླས་པ་ནི་དོན་ལ་ཞུགས་པ། གླུ་བསྐུལ། སླར་བཞེངས། བསྟོད་པ། ཉེར་བསྡུ། ཚིམ་པར་བྱེད་པའི་ཆོ་ག །ནང་གི་སྦྱིན་སྲེག་གཤེགས་གསོལ་གཏོར་མ། གཉིད་ལོག་པའི་ཆོ་གའི་དེ་ཉིད་བཞི་བཅུ་རྩ་དགུའོ། །རྡོ་རྗེ་ཕྲེང་བར་རྣལ་འབྱོར་དང་། །ཤིན་ཏུ་རྣལ་འབྱོར་རྣལ་འབྱོར་ཆེ། །དེ་ཉིད་དབྱེ་བ་བཅོ་ལྔ་ཡིན། །དང་པོ་སྦྱོར་བ་བསྒོམ་པར་བྱ། །བཅུ་བདུན་རྗེས་སུ་རྣལ་མན་ཆད་འབྱོར་སོགས། །དེ་ནས་དཀྱིལ་འཁོར་རྒྱལ་མཆོག་གི །རྣལ་འབྱོར་མཆོག་ལ་དབྱེ་བ་ལྔ། །དེ་ལས་ཀྱང་ནི་ལས་རྒྱལ་མཆོག །རྣལ་འབྱོར་དབྱེ་བ་བཅུ་གཉིས་སོ། །དེ་ཉིད་དབྱེ་བ་བཞི་བཅུ་དགུ། བསྐྱེད་པའི་རིམ་པ་མདོར་བསྡུས་པའོ། །ཞེས་སོ། །གཉིས་པ་ནི། རིམ་པ་མཉམ་བཞག་བཞི་གཙོ་བོར་བསྟན་པ་སྦྱོར་བ་དྲུག་ལ་སོགས་པ་རྣམ་གྲངས་སུ་བཤད་པ་བོགས་འདོན་དུ་སྤྱོད་པ་རྣམ་པར་དབྱེ་བ་གསུམ་ལས། དང་པོ་ནི། སེམས་དབེན་ལ་སྟེང་སྒོ་རྣམ་གྲོལ་རང་ལུས་ཐབས་ལྡན། འོག་སྒོ་གཞན་ལུས་ཤེས་རབ། རིན་ཆེན་འཁོར་ལོའི་འཁྲུལ་འཁོར་ཐུན་མོང་དུ་འཇུག་པ། སྤྲོས་བྲལ་རྟོགས་མེད་དུ་འཆར་བར་བྱེད་པ་ཕྱག་རྒྱ་ཆེན་པོའི་གདམས་ངག་བཞི། རིམ་པ་གསུམ་པ་སྒྱུ་མ་ལ། མཉམ་བཞག་དང་། རྗེས་ཐོབ་སྒྱུ་མ། ཕྱི་མ་ལ། སྣང་བ་རྨི་ལམ། བར་དོ་སྒྱུ་མ་གསུམ། རིམ་པ་བཞིས་མངོན་པར་བྱང་ཆུབ་པ་འོད་གསལ་གྱི་རིམ་པ་ལ། ཉིན་མོར་ལམ་དང་རང་བཞིན་བསྲེ་བ། མཚན་མོར་ལམ་དང་རང་བཞིན་བསྲེ་བ། བར་དོར་ལམ་དང་རང་བཞིན་བསྲེ་བ་གསུམ། རིམ་པ་ལྔ་ཟུང་འཇུག་ལ་སློབ་པ་དང་མི་སློབ་པ་གཉིས་སོ། །སྤྱོད་པ་ལ་ཀུན་ཏུ་བཟང་པོའི་སྤྱོད་པའམ་རྣལ་འབྱོར་གྱི་སྤྱོད་པ། གསང་བའི་སྤྱོད་པའམ་རྨད་དུ་བྱུང་བའི་སྤྱོད་པ། རིག་པ་བརྟུལ་ཞུགས་ཀྱི་སྤྱོད་པའམ་ཀུན་ཏུ་སྤྱོད་པ། ཕྱོགས་ལས་རྣམ་རྒྱལ་གྱི་སྤྱོད་པའམ་སྔགས་ཀྱི་སྤྱོད་པ་རྣམས་སོ། །དེ་ཡང་གཉུག་མའི་ལུས་ངག་སེམས་གསུམ་དབྱེར་མི་ཕྱེད་པའི་ཕྱག་རྒྱ་ཆེན་པོའི་རང་བཞིན་གྱི་རྒྱུའི་རྒྱུད་དང་། ཤེས་རབ་ནི་སྨིན་པ་དང་གྲོལ་བ་རབ་ཏུ་ཤེས་པ་ཡིན་ལ། ཏིང་ངེ་འཛིན་ནི་ཤེས་རབ་ཀྱིས་རབ་ཏུ་དབྱེ་བ་ལ་དེ་སེམས་རྩེ་གཅིག་ཏུ་གྱུར་པ་སྟེ། དེས་ན་དེ་ཡོན་ཏན་ཐམས་ཅད་ཀྱི་གཞིར་གྱུར་ཕྱིར་གཞི་རྒྱུད་དང་། རྡོ་རྗེ་འཆང་ཆེན་པོ་ཐོབ་པར་བྱེད་པའི་ཐབས་ཡིན་པས་ནས་ཐབས་རྒྱུད་དེ། མི་གནས་པའི་མྱང་འདས་རྡོ་རྗེ་འཆང་ཟུང་འཇུག་གི་སྐུ་གང་ཡིན་པ་གཞན་གྱིས་འཕྲོག་པར་མི་ནུས་པ་ནི་རིག་པའི་སྐྱེས་བུ་སྟེ། ཡོན་ཏན་བརྒྱད་ཀྱི་དབང་ཕྱུག་དང་ལྡན་པ་ནི་འབྲས་བུའི་རྒྱུད་དོ། །ཞེས་སོ། །དེ་ཡང་། རྒྱུད་དེ་རྣམ་པ་གསུམ་དུ་འགྱུར་གཞི་དང་དེའི་རང་བཞིན་ཏེ། །མི་འཕྲོག་པ་ཡིས་རབ་ཕྱེ་བས། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བར་བརྗོད། །དེ་བཞིན་མི་འཕྲོག་འབྲས་བུ་སྟེ། །གསུམ་གྱིས་རྒྱུད་དོན་བསྡུས་པའོ། །ཞེས་སོ། །རྒྱན་བདུན་གྱིས་བརྒྱན་ཚུལ་ལ། འཆད་བྱེད་རྒྱན་གྱི་རྣམ་བཞག །རྒྱན་དེས་ཇི་ལྟར་བརྒྱན་ཚུལ། རྒྱན་གྱིས་མཛེས་པའི་རྒྱུད་དངོས་གསུམ་ལས། སྔ་མ་གཉིས་ནི་སྨོས་ཟིན་ལ། ཕྱི་མ་ནི་བསྡུས་པའི་དོན་དང་། ཡང་དག་གི་དོན་གཉིས། དེ་ལའང་ལེའུ་བཅུ་བདུན་པོ་རེ་རེ་ནས་བསྡུས་དོན་དང་། ཡང་དག་གི་དོན་འཆད་པའོ། །ཟླ་བ་འདུས་པའི་ཕྱག་གི་རྩེ། །ནུས་སྟེར་རྒྱུད་ཀུན་འཕེལ་བགྱིད་ཚེ། །བསྡུས་དོན་ཀུ་མུད་སར་པའི་འཛུམ། །རྣ་རྒྱན་གྱི་ནི་བརྫུ་བས་འོང་། ཞེས་ཀྱང་སྨྲས་སོ། །ཤུབྷཾ།། །། ༈

[edit]

gsang 'dus spyi don las khol btus/__ dpal gsang ba 'dus pa'i rgyud kyi spyi don las khol btus so//____//_!_dpal 'brug pa thams cad mkhyen pa mi pham pad+ma dkar po'i zhabs kyi gsungs las/__gsang ba 'dus pa'i rgyan zhes bya ba mar lugs thun mong ma yin pa'i bshad par/__gang bshad bya dpal gsang ba 'dus pa'i rgyud kyi lus/__gang gis 'chad byed rgyan bdun gyis brgyan te 'chad par/__snga ma la'ang tha snyad la brten nas don rtogs pa'i phyir mtshan/__des ji ltar gsungs shing bkral ba/__rgyud rang gi ngo bo gtan la dbabs pa'o/__/zhes gsungs/__gsang 'dus rtsa rgyud la bshad rgyud bdun gyis 'grel te lha mo bzhis zhus lta bu rtsa rgyud du thig le'i gnas tshul 'ga' zhig sbas pa gsal bar byed pa mi gsal bar byed pa/__lha grangs dang cho ga 20ma tshang ba kha skang ba ma tshang ba kha skong ba'i rgyud rdor 'phreng gling gzhi dang /__lha la sogs pa 'dra mi 'drar ston pa rdo rje snying po rgyan gyi rgyud lta bu tshul mi 'dra ba/__rgyud phyi ma rtsa rgyud kyi le'u bcu bdun po bsnyen sgrub yan lag bzhir bsdus nas ston pa don bsdus pa/__rnam snang sgyu drwa lta bu sngags dang las tshogs rtsa mthun du ston pa/__ye shes rdo rje kun las btus lta bu tshig don rgyan bdun gyi sgo nas bshad tshul ston pa/__dgongs pa lung ston lta bu dgongs pa'i don gsal bar ston pa'o/_/zhes bshad/____/_! slob dpon klu byang gis/__gsol ba/__nyon mongs pa thams cad spangs pa'i sangs rgyas dang byang chub sems dpa' stobs bcu dang mi 'jigs pa la sogs pa sangs rgyas kyi yon tan brnyes pa rnams 'dir tha mal pa'i lus la dgod pa mi 'gal ba lags sam/__bka' stsal pa/__ji srid du bkru bshal gyi snod yin pa'i dus su ni mchil ma 'dor la/__gzhong pa'i gnas skabs su ni 'jig rten pa rnams zas za'o/_/gzugs brnyan skabs su ni mchod pa byed do/__/de bzhin du tha mal pa'i lus la 'dod chags dang zhe sdang dang gti mug la sogs pas brlan pa'i sngon gyi gnas skabs su 'khor ba'i rgyu yin la/__phyis rang bzhin yongs su shes shing yongs su dag pas thams cad mkhyen pa grub pa'i rgyur 'gyur ba la skyon med do/__/zhes dang /__'dir bstan gyi sbyor drug dang /__dus kyi 'khor lo nas bshad pa'i sbyor drug ming mthun pa tsam yin gyi/__don mi gcig go zhes smra ba ni 'thad pa ma yin te 'dir yang tha mal gyi snang ba sdud cing ye shes kyi snang ba spro ba sor sdud/__de sbyangs pa rab kyi mthar phyin pa'i sems rtse gcig pa bsam gtan/__rdo rje bzlas pa srog rtsol/__srog rtsol gyi yon po 'gags nas dbang bskur bzung ba la 'dzin pa/__stong pa nyid kyi gzugs brnyan rjes su dran par byed pa la rjes dran/__bden gnyis gcig tu sbyor ba la ting nge 'dzin zhes bshad cing /__dus kyi 'khor lor yang de nyid las don zur pa ci yang ma gsungs so//____//__! rgyan bdun las dang po gleng bslang ba yi grangs ni lnga/__zhes pas/__rgyud 'di'i mtshan ni ci zhig yin/__/gang gi don du 'di nyid mdzad/__/su zhig byed pa 'di'i tshad ci/_/tshig 'di'i dgos pa ci zhig yin/__zhes so/__/gnyis pa tshul ni rnam pa bzhi dang yang /__zhes pa/__rgyud dang gleng gzhi zhes pa dang /__nges pa'i tshig dang rgyu yang ngo /__/zhes par 'dod chags dang bral ba dang /__'dod chags kyi chos kyi dbye ba gnyis/__dang po la yang /__rgyud gleng gzhi/__nges tshig__/rgyu bzhi'o/__/dang po ni mi gdul bya yin pas 'dra ba'i skye ba bzung ba ni rigs pa kho na'o zhes dgongs pas so/__/gnyis pa ni/__chags bral la ma brten par sems can rnams ma 'dul ba'i phyir btsun ma'i 'khor gyi nang nas nges par 'byung ba'o/__/gsum pa ni/__dgon par gnas pa la yang 'dod chags 'byung ba'i phyir de bzlog slad 'dul ba'i bslab gzhi sna tshogs su spyod pa'o/__/bzhi pa ni/__'bras bu'i bzhed pa yod pas bcom ldan 'das dga' ba spyod pa la sogs pa'i chos spyod par mdzad pa de ni rgyu yin te/__'bras bu thob par bya ba la thabs yin pa'i phyir ro/__/gnyis pa la'ang bzhi las/__dang po ni/__rnam shes/__phung po/__rlung /__'byung ba chen po lnga rnam par dag pa'i phyir bcom ldan 'das rdo rje 'chang chen po de bzhin gshegs pa lnga'i rigs kyi skur bzung ba'o/__/gnyis pa ni/__rigs lngar bstan pa kun rdzob ste de bzlog pa'i phyir rdo rje 'chang chen po'i rigs kyi ngo bo gcig tu mdzad pa'o/__/'di gnyis rang don phun tshogs/__gsum pa ni/__sems can khams dang mos pa sna tshogs pa yin pas de dag rjes su bzung slad rdo rje legs pa'i mtshon cha bsnams pa de dag kyang ye shes rnam par dag pa yin no/__/bzhi pa ni/__bcom ldan 'das khro chags kyi dbang du mdzad nas sgeg pa la sogs pa'i gar dgu'i nyams kyi spyod pa mdzad nas/__gzhan dag la yang de ltar ston par mdzad pa'o/__/gsum pa ni/__rgyas bshad mtha' ni rnam pa drug__/zhes dang/__dbye ba drang ba nges don dang /__/dgongs pas bshad dang dgongs min dang /__/ji bzhin sgra dang sgra min te/__/mthar ni drug ces bya bar grags/__zhes pas dang po ni/__skal pa ngan pa'i slob ma rang bzhin gyi don las gzhan pa nyid du 'khrid pa de dag la ni de tsam gyis don du 'gyur ba yin no/__/gnyis pa ni/__mchog 'dod pa'i skal ldan la yang dag pa'i don gyi bden pa de kho na nyid ji lta ba rab tu ston pa'o/__/gsum pa ni/__mos pa sna tshogs pa'i 'khor gyi nang du brjod par mi rung ba'i phyir 'jig rten las 'gal ba'i tshig gi sbyor bas gsungs pa'o/__/bzhi pa ni/__dbang po dman pa ni ston pa'i snod du rung ba ma yin no/__/'on kyang bla mar gus shing bden pa dang /__dkon mchog gsum la sogs pa'i yul la gus pa dang bcas shing sbyin pa la sogs pa'i yon tan dang ldan pa'i tshul can de kho na nyid kyi snod du rung ba de dag la/__mchog tu gsal bas bcom ldan 'das de kho na nyid ston pa gang yin pa de ni dgongs pa ma yin pa/__zhes so/__/lnga pa ni/__dkyil 'khor gyi cho ga dang /__rtog pa dang /__spyod pa sgras ji ltar bshad pa de khar don gnas pa'o/__/drug pa ni/__ba lang ces sogs 'jig rten na grags pa dang /__de bzhin ces sogs bstan bcos la grags pa'i sgra/__ko Ta khyA la sogs pa'i sgra lugs gnyis de gang du'ang ma grags pas bcom ldan 'das kyis rtog ge pa dang sgra pa rnams kyis rtogs par dka' ba'i don du de bzhin gshegs pa lnga'i mtshan nam srog la sogs pa rlung gi ming du mdzad pa lta bu'o/__/de yang dgongs pa drang don gyi khyad par ni sgra dang don gyi khyad par/__/dgongs pa dang ji bzhin ma yin pa'i sgra'i khyad par ni 'gal ba dang grags pa ma yin pa'i phyir dang /__dgongs pa dang ji bzhin pa ni 'gal ba dang mi 'gal ba dang nges don dang dgongs min gyis khyad par ni dbang po rno rtul gyi bye brag gis so/_/bzhi pa ni/__'chad tshul yang ni rnam pa bzhis/__/zhes par/__'chad tshul dbye ba brjod par bya/__/yi ge'i don dang spyi'i don/__/sbas dang de bzhin mthar thug pa'o/__/zhes pa'i/__dang po ni/__rang bzhin rkyen dang rnam 'gyur ming yi ge'i nges pa sgra pas bzhag pa dang mthun par ston pa/__gnyis pa ni/__mdo sde la sogs par rab tu zhugs par sngags kyi lam la 'jug pa'i tshe dam tshig dang spyod pa sogs la som nyir gyur pa'i tshe de bzlog phyir mdo sde de dag gi rjes su ston pa dang /__bskyed pa'i rim pa ston pa gnyis/__gsum pa ni/__'dod chags kyis 'dod chags rnam par sbyong ba dang /__bdag byin gyis brlabs pa dang /__sems rnam par bden pa tsam ston pa gsum/__bzhi pa ni/__'od gsal ba dang zung 'jug ston pa gnyis so/__/de yang yig don la dgongs min dang sgra ji bzhin pa gnyis spyi don la drang nges/__sbas don gyis dgongs bshad/__mthar thug pas sgra ji bzhin ma yin pa bsdus la/__yang dang po gnyis kyis bskyed rim/__sbas don gyis rdor bzlas dang sems dben rang byin rlabs/__mthar thug gis mngon byang dang zung 'jug bsdus so/__/lnga pa ni/__lnga pa'i dbye ba rnam pa gnyis/__zhes dang /__'chad dang nyan par 'dod pa la/__/dbye ba yang ni gnyis yod de/__/tshogs la bshad par bstan pa dang /__/gnyis pa slob mar bshad pa'o/__zhes dang /__ji bzhin sgra dang dgongs min dang /_/drang ba'i don du'ang gang gyur dang /__/yi ge'i don dang spyi don rnams/_/tshogs pa la ni bshad par 'dod/__/ji bzhin min sgra nges don dang /__/de bzhin dgongs te bshad pa dang /__/sbas pa mthar thug pa rnams ni/__/slob ma la ni bshad par 'dod/__zhes so/__/drug pa ni/__drug pa dbye ba lnga dang ldan/__zhes pas/__/rnam pa kun tu stan 'dod 'dis/__/'jig rten nges par gyur pa ni/__/blo ni rnam pa dpag med las/__/gang zag rnam pa lngar 'dod do/__/ut+pal pad+ma dkar po dang /__/tsan+dan rin po che yi dpe/__zhes pas/__tsan+dan ni bem po/__ut+pal ni tha ma/__pad dkar 'bring /__pad+ma mchog__/rin po che ni yang rab ste/__snga ma bzhi ni tshogs bshad dang /__phyi ma gcig ni slob bshad kyi snod yin no/__/bdun pa ni/__bdun pa'i dbye ba rnam gnyis te/_/rgyan rnams mdo ru bsdus pa'o/__/zhes pa/__rgyan ni drug po de rnams kyis/__/bden gnyis rnam par nges byas pa/__/de ni rgyan gyur bdun pa ste/__/rdzogs pa'i rim pa sgrub pa'o/__/rgyan drug po mthar phyin pas bstan bcos kyi lus rim pa gnyis su phyin par 'gyur ro/__/de'i phyir rgyan bdun la rnam par dbye ba nyi shu rtsa brgyad pa/__/rgyan des ji ltar brgyan pa'i tshul ni/__shrAd+d+hAs/__gleng bslangs lnga dang mtha' drug rgyan/__/brda yi rgyud la 'jug pa yin/__/rig pa rnam bzhi bshad pa bzhi/__/bden gnyis nges pa'i rgyan dag ni/__/don la 'jug pa'i rgyan yin no/__/zhes dang /__ku mA ras/__mtha' drug la tshig dang don gyi rgyan gnyis ka dang /__rgyan thog ma dang gnyis pa kun 'jug pa dang /__tha ma bsdus pa'i rgyan zhes bzhed la/__'chad tshul gnyis smra ba po dang /__gang zag lnga nyan pa po'i rgyan no/__/gsang ba 'dus pa zhes pa'i don la shrI ni gnyis med ye shes te/__zhes dang /__rgyud phyi mar/__sku gsung thugs ni rnam pa gsum/__/gsang ba zhes su bstan pa yin/__/sangs rgyas thams cad ces bya ba/__/tshogs pa 'dus pa yin par bshad/__zhes pa'i don sgron gsal las/_/de bzhin gshegs pa thams cad kyi sku dang gsung dang thugs kyi gsang ba ni dam tshig dang sdom pa la sogs pa'i rigs gsum yongs su gyur pa ste yi ge'i don no/__/de bzhin gshegs pa thams cad kyi sku dang gsung dang thugs kyi gsang ba ni yi ge gsum spyi'i don no/__/de bzhin gshegs pa thams cad kyi sku dang gsung dang thugs kyi gsang ba ni ye shes gsum po rang bzhin gyi snang ba ni rlung gi bzhon pa can te sbas pa'o/_/de bzhin gshegs pa thams cad kyi sku dang gsung dang thugs kyi gsang ba ni ye shes kyi rang bzhin gyi sku ste mthar thug pa'o/__/zhes dang /__'dus pa zhes pa ni gnyis gcig tu gyur pa ni 'dus pa ste yi ge'i don to/__/rdo rje dang pad+ma yang dag par sbyor ba ni 'dus pa ste spyi'i don to/_/shes rab dang thabs yang dag par sbyor ba ni 'dus pa ste sbas pa'o/_/kun rdzob dang don dam pa'i bden pa dag 'dres pa ni 'dus pa ste mthar thug pa'o/__/zhes bshad la/__dang po'i dngos po'i gnas lugs dang /__de khyad par du byed pa dbang /__gnyis pa dang gsum pas rim bzhin bskyed rdzogs te lam/__bzhi pas 'bras bu ste/__'di tsam gyis dbang rnon gyis rgyud kyi don go bar nus pa'o/__/zhes bshad//____//_! yang rgyud rang gi ngo bo gtan la dbab par rgyud de rnam pa gsum du 'gyur/__zhes sogs/__gzhi lam 'bras bu'i rgyud du bsdus nas 'chad pa/__dang po la'ang gnyug ma don gyi rtsa rlung thig le gsum dbye mi phyed pa ro mnyam phyag rgya chen po/__/de gtan la 'bebs par byed pa la/__rtsa ba'i rgyud las/__phung po khams dang skye mched dang /__/gzung dang 'dzin pa rnam par spangs/__/chos bdag med pa mnyam pa nyid/__/rang sems gdod nas ma skyes pa/__stong pa nyid kyi rang bzhin no/__/zhes pa'i don/__slob dpon klu sgrub sems 'grel du/__dngos po thams cad dang bral bas mu stegs dang /__phung khams skye mched dang bral bas nyan thos dang /__gzung ba dang 'dzin pa rnam par spangs pas sems tsam gyi lta ba sun phyung nas lhag ma dbu ma rang lugs bstan pa'i tshul bshad/__gnyis pa lam la/__smin byed dbang dang grol byed gnyis/__dang po la'ang ngo bo dbye ba gnyis/__phyi ma la/__gang gis dbang bskur ba'i slob dpon/__gang du dbang bskur ba'i dkyil 'khor/__gang bskur ba'i dbang /__gang gi grogs dam tshig dang sdom pa rnam par bzhag pa'o/__/zhes dang /__sgron gsal las dkyil ni snying po kun rdzob kyi bden pa'o/__/'khor ni de len cing 'dzin pas drwa dkyil 'khor te drwa ba'i don no/__/dkyil ni snying po ste don dam pa'i bden pa'o/__/'khor ni de len cing 'dzin pa'i dkyil 'khor te/__zhes bshad/__de yang klu'i blos cho ga nyi shus 'grub par bshad/__gnyis pa grol byed la/__mchog gi bsnyen sgrub yan lag bzhi las/__dang po ni/__sa'i cha bskyed pa nas stag mos bsgom pa rdzogs pa'i bar bsnyen par bya zhing byang chub kyi sems la dmigs par bya bas bsten pa'i yan lag go/__/de nas rdo rje sems dpa' rdzogs pa'i bar ni nye bar gnad du bsgrub par bya zhing bskyed par bya ba nye bar sgrub pa'i yan lag__/spyi bor rnam snang gi rang bzhin oM bkod pa nas ting nge 'dzin rgyal mchog rdzogs pa'i bar ni nye bar bzhag pa'i don du gsol ba 'debs pa yin pas rang gi don bsgrub pas bsgrub pa'i yan lag__/dkyil 'khor rgyal mchog dang las rgyal mchog ni gzhan don gyi sgrub pa chen po ste de dag kyang dang po sbyor ba'i ting 'dzin la rgyal mchog__/dkyil 'khor rgyal po mchog__/las rgyal po mchog ste gsum las/__dang po la'ang rnal 'byor sogs bzhi ste/__tshogs bsags/__snying rje bsgom pa/__srung 'khor bsgom pa/__gtso bo bsgom pa/__mi bskyod pa sprul nas bdag nyid zhe sdang rdo rjer bsgyur ba/__khro bo spro ba/__bka' bsgos te bgegs 'joms pa/__stong pa nyid bsgom pa/__gzhal yas khang bsgom pa/__/dkyil 'khor dgod pa/__don dam pa'i dkyil 'khor la 'jug pa/__ldang ba/__nyi ma'i dkyil 'khor la dmigs pa/__zla ba'i dkyil 'khor la dmigs pa bco lngas ni rnal 'byor/__yi ge dang /__phyag 'tshan dang /__rdo rje 'chang bskyed pa gsum rjes su rnal 'byor/__mdun du mi bskyod pa sprul pa/__der bdag nyid la zhugs pa/__rdo rje sems dpa' sprul pa'i skur bsgyur ba/__phung po khams skye mched/__yan lag la dgod pa bdun shin tu rnal 'byor/__sku gsung thugs byin gyis brlab pa/__de gsum dbyer mi phyed pa/__ye shes sems dpa'/__rgyas btab/__ting 'dzin sems dpa' bsgom pa gsum rnal 'byor chen po ldan pa'i 'dus byas/__rdo rje pad+ma 'dus byas/__rjes su chags pa'i rdo rje byin gyis brlab pa/__pad+ma'i nang du sngags kyi dkyil 'khor phyung ba/__phyir lha'i dkyil 'khor byung ba lnga dkyil 'khor rgyal mchog__/phra mo bzlas pa ni don la zhugs pa/__glu bskul/__slar bzhengs/__bstod pa/__nyer bsdu/__tshim par byed pa'i cho ga__/nang gi sbyin sreg gshegs gsol gtor ma/__gnyid log pa'i cho ga'i de nyid bzhi bcu rtsa dgu'o/__/rdo rje phreng bar rnal 'byor dang /__/shin tu rnal 'byor rnal 'byor che/__/de nyid dbye ba bco lnga yin/__/dang po sbyor ba bsgom par bya/__/bcu bdun rjes su rnal man chad 'byor sogs/__/de nas dkyil 'khor rgyal mchog gi__/rnal 'byor mchog la dbye ba lnga/__/de las kyang ni las rgyal mchog__/rnal 'byor dbye ba bcu gnyis so/__/de nyid dbye ba bzhi bcu dgu/__bskyed pa'i rim pa mdor bsdus pa'o/__/zhes so/__/gnyis pa ni/__rim pa mnyam bzhag bzhi gtso bor bstan pa sbyor ba drug la sogs pa rnam grangs su bshad pa bogs 'don du spyod pa rnam par dbye ba gsum las/__dang po ni/__sems dben la steng sgo rnam grol rang lus thabs ldan/__'og sgo gzhan lus shes rab/__rin chen 'khor lo'i 'khrul 'khor thun mong du 'jug pa/_spros bral rtogs med du 'char bar byed pa phyag rgya chen po'i gdams ngag bzhi/__rim pa gsum pa sgyu ma la/__mnyam bzhag dang /__rjes thob sgyu ma/__phyi ma la/__snang ba rmi lam/__bar do sgyu ma gsum/__rim pa bzhis mngon par byang chub pa 'od gsal gyi rim pa la/__nyin mor lam dang rang bzhin bsre ba/__mtshan mor lam dang rang bzhin bsre ba/__bar dor lam dang rang bzhin bsre ba gsum/__rim pa lnga zung 'jug la slob pa dang mi slob pa gnyis so/__/spyod pa la kun tu bzang po'i spyod pa'am rnal 'byor gyi spyod pa/__gsang ba'i spyod pa'am rmad du byung ba'i spyod pa/__rig pa brtul zhugs kyi spyod pa'am kun tu spyod pa/__phyogs las rnam rgyal gyi spyod pa'am sngags kyi spyod pa rnams so/__/de yang gnyug ma'i lus ngag sems gsum dbyer mi phyed pa'i phyag rgya chen po'i rang bzhin gyi rgyu'i rgyud dang /__shes rab ni smin pa dang grol ba rab tu shes pa yin la/__ting nge 'dzin ni shes rab kyis rab tu dbye ba la de sems rtse gcig tu gyur pa ste/__des na de yon tan thams cad kyi gzhir gyur phyir gzhi rgyud dang /__rdo rje 'chang chen po thob par byed pa'i thabs yin pas nas thabs rgyud de/__mi gnas pa'i myang 'das rdo rje 'chang zung 'jug gi sku gang yin pa gzhan gyis 'phrog par mi nus pa ni rig pa'i skyes bu ste/__yon tan brgyad kyi dbang phyug dang ldan pa ni 'bras bu'i rgyud do/__/zhes so/__/de yang /__rgyud de rnam pa gsum du 'gyur gzhi dang de'i rang bzhin te/__/mi 'phrog pa yis rab phye bas/__/rang bzhin rnam pa rgyu yin te/__/gzhi ni thabs zhes bya bar brjod/__/de bzhin mi 'phrog 'bras bu ste/__/gsum gyis rgyud don bsdus pa'o/__/zhes so/__/rgyan bdun gyis brgyan tshul la/__'chad byed rgyan gyi rnam bzhag__/rgyan des ji ltar brgyan tshul/__rgyan gyis mdzes pa'i rgyud dngos gsum las/__snga ma gnyis ni smos zin la/__phyi ma ni bsdus pa'i don dang /__yang dag gi don gnyis/__de la'ang le'u bcu bdun po re re nas bsdus don dang /__yang dag gi don 'chad pa'o/__/zla ba 'dus pa'i phyag gi rtse/_/nus ster rgyud kun 'phel bgyid tshe/__/bsdus don ku mud sar pa'i 'dzum/__/rna rgyan gyi ni brdzu bas 'ong /__zhes kyang smras so/__/shub+haM//____//__!