རིག་པའི་གནས་མཐའ་དག་ལ་བསླབ་དགོས་པའི་གཏམ་མུཀྟི་ཀའི་ཕྲེང་བ་བློ་གསལ་གདུང་སེལ།

🚧 This website is under continued development. We appreciate your patience!

First text in section. Back to Volume PageNext Text

Wylie title	rig pa'i gnas mtha' dag la bslab dgos pa'i gtam muk+ti ka'i phreng ba blo gsal gdung sel
Location	mkhyen brtse'i bka' 'bum Volume 4, sde tshan 1, Text 1, Pages 1-39 (Folios 1b1 to 20a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rig pa'i gnas mtha' dag la bslab dgos pa'i gtam muk+ti ka'i phreng ba blo gsal gdung sel. In 'jam dbyangs mkhyen brtse'i dbang po'i bka' 'bum, Vol. 4: 1-39. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

1 1-39	རིག་པའི་གནས་མཐའ་དག་ལ་བསླབ་དགོས་པའི་གཏམ་མུཀྟི་ཀའི་ཕྲེང་བ་བློ་གསལ་གདུང་སེལ། rig pa'i gnas mtha' dag la bslab dgos pa'i gtam muk+ti ka'i phreng ba blo gsal gdung sel Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ན་མསྶརྦ་ཛྙཱ་ཡ། གང་གི་མཁྱེན་པའི་ཡེ་ཤེས་ཀྱིས། །རེག་པས་རྨད་བྱུང་སྤོབས་པའི་མཆོག །སྦྱིན་མཁས་འཇམ་མགོན་བླ་མའི་ཞབས། །བྱང་ཆུབ་བར་དུ་བསྙེན་བྱས་ནས། །རང་ངམ་ཐར་འདོད་གཞན་ཀྱང་རུང་། །བློ་གྲོས་སྒོ་འཕར་དབྱེ་བའི་སླད། །སྣ་ཚོགས་གཏམ་གྱི་མུཀྟི་ཀཿ །ཡི་གེའི་སྲད་བུར་བསྟར་འདིའོ། །སྤྱིར་ཐར་པ་དང་ཐམས་ཅད་མཁྱེན་པའི་གོ་འཕང་རིན་པོ་ཆེ་དོན་དུ་གཉེར་བའི་གང་ཟག་དེས་བསླབ་པར་བྱ་བའི་གནས་ཀྱི་གཙོ་བོ་ནི་ཤེས་བྱ་རིག་པའི་གནས་ལྔ་ཡན་ལག་དང་བཅས་པ་སྟེ། དེ་ཡང་ཐོག་མ་ཁོ་ནར་སྒྲ་དང་། དོན་ལ་མཁས་པས་དེ་དང་དེ་ཡི་ལོག་པར་རྟོག་པ་དྲུང་ནས་ཕྱུང་ཞིང་ཡང་དག་པའི་རྣམ་དཔྱོད་ཕུལ་དུ་བྱུང་བའི་རྐང་སྟེགས་མཐོན་པོར་བསྒྲུབས་ཏེ་སྡེ་སྣོད་གསུམ་དང་རྒྱུད་སྡེ་བཞིའི་གྲོང་ཁྱེར་ཆེན་པོར་འཇུག་པར་བྱ་བ་ནི་སྔོན་བྱོན་གྱི་སྐྱེས་བུ་དམ་པ་རྒྱལ་བ་དགྱེས་པའི་ལམ་སྲོལ་ལ་ཞུགས་པ་རྣམས་དང་ཚུལ་མཐུན་པ་ཡིན་ཏེ། བྱང་ཆུབ་སེམས་དཔའ་ཤཱནྟ་དེ་བས། རྒྱལ་སྲས་རྣམས་ཀྱིས་མི་སློབ་པའི། །དངོས་དེ་གང་ན་ཡོད་མིན་པ། །དེ་ལྟ་བས་ན་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་སོ། །འོ་ན་དཔལ་དུས་ཀྱི་འཁོར་ལོར། ཡུལ་གྱི་སྐད་རྣམས་ཀྱིས་ནི་དོན་གོ་ན། བསྟན་བཅོས་སྒྲ་དག་གིས་ནི་ཅི་ཞིག་བྱ། །སོགས་དང་། ལང་གཤེགས་ལས། བྱིས་པ་ངན་པ་རྟོག་གེ་བ། །རོ་དང་འདྲ་བས་རྣམ་པར་བརྟག །ཅེས་སོགས་སྒྲ་ཚད་ལ་སྨད་པར་མཛད་པ་དག་ཅི་ཞེ་ན། དེ་དང་དེ་ལ་མངོན་པར་ཞེན་པའི་ང་རྒྱལ་ཅན་གྱི་ཕྱི་རོལ་པ་དག་གི་ཁེངས་པ་གཞོམ་པ་སོགས་ཀྱི་སླད་དུ་ཡིན་གྱི་སྒྲ་ཇི་བཞིན་དུ་བཟུང་བར་མི་བྱ་ཞིང་། དེ་བཞིན་དུ། སློབ་དཔོན་ཙནྡྲ་གོ་མཱིས། བུད་མེད་ཡན་ལག་རུལ་བ་དྲི་ང་མི་སྡུག་པ་སོགས་གསུངས་པའང་འདོད་པའི་གཏམ་གྱི་སྙན་དངགས་མི་བྱ་བ་ལ་དགོངས་ཀྱི། གཞན་དུ། མདོ་ལས། དམ་པའི་ཆོས་གསལ་བར་བྱ་བའི་ཕྱིར་སྙན་ངག་བྱའོ། །ཞེས་སོགས་གསུངས་པའི་ཕྱིར་རོ། །དེ་ཡང་རིག་པའི་གནས་ཐམས་ཅད་བསྡུ་ན་ཕྱི་ནང་གཉིས་སུ་འདུ་ཞིང་། ཅུང་ཟད་སྤྲོ་ན་ཚར་བཅད་རྗེས་བཟུང་གསུམ་དང་། སྒྲ་ཚད་བཟོ་གསོ་ནང་རིག་པ་སྟེ་ལྔ་དང་། དེ་སྟེང་སྙན་ངག་སྡེབ་སྦྱོར་ཟློས་གར་མངོན་བརྗོད་སྐར་རྩིས་བསྣན་པའི་བཅུ་དང་། འདུལ་བ་ལུང་རྣམ་འབྱེད་ལས་གསུངས་པའི་རིག་པའི་གནས་བཅོ་བརྒྱད་ལ་སོགས་པའི་བར་ཏེ། གཞན་དུ་ན་ཤིན་ཏུ་རྒྱས་པར་དབྱེ་ན་སྒྱུ་རྩལ་རིགས་རྣམས་ཀྱང་འདྲེན་པས། དེའི་ཚེ་རྒྱ་ཆེ་རོལ་པ་ལས་སྒྱུ་རྩལ་༩༨དང་། དེ་ཉིད་ལུང་ཕྲན་ཚེགས་ཀྱི་འགྲེལ་པར་དྲུག་ཅུ་རྩ་བཞིར་བསྡུས་ལ། དེ་ལས་རྣམ་གྲངས་གཞན་པ་བྱེ་བྲག་རྟོགས་བྱེད་དུ་སྡེ་ཚན་བཞིར་བསྡུ་བ་དང་རྗེས་སུ་མཐུན་པར་སློབ་དཔོན་དཱཎྜཱིས་ཀྱང་སྒྱུ་རྩལ་ཡོངས་སུ་བཅད་པ་ཞེས་ལེའུ་བཞི་པ་ཞིག་མཛད་ཡོད་པར་གྲགས་སོ། །གཞན་ཡང་། ཚོང་པ། རྫ་མཁན། ཕྲེང་མཁན། ཆང་འཚོང་། ཕྱུགས་འཚོ་བ། འདྲེག་མཁན། འབྲུ་མར་འཚིར་བ། མགར་བ། ཤིང་མཁན། ཕྱྭ་མཁན། ཐ་ག་པ། ཀོ་པགས་མཁན། རྐྱལ་ཆེན་པ། བཙོ་བླགས་མཁན། སྨྱིག་མ་མཁན། བཤན་པ། གདོལ་བ་མཁན། ཤིང་རྟ་མཁན་ཏེ་བཟོ་སྦྱངས་བཅོ་བརྒྱད་དང་། རིན་པོ་ཆེ། ས་གཞི། གོས། ལྗོན་ཤིང་། རྟ། གླང་པོ། སྐྱེས་པ། བུད་མེད་བརྟག་པ་སྟེ་བརྟག་པ་བརྒྱད་ལ་སོགས་པའང་མདོ་སྡེ་འགའ་ལས་བཤད་ཅིང་། དྲང་སྲོང་ལེའུའི་བུས། སེན་མོས་༡འབྲད་དང་སོས་འདེབས་༢དང་། །འཁྱུད་པ་༣དང་ནི་མཐང་སྦྱར་དང་། །བྱ་བ་༥དང་ནི་ལག་པས་༦གདབ། །སྨྲ་བའི་བྱེ་བྲག་དག་དང་ནི། །སྐྱེས་པའི་སྟེང་དུ་མྱུལ་དང་བརྒྱད། །རེ་རེ་ལ་ཡང་བརྒྱད་བརྒྱད་དེ། །དྲུག་ཅུ་རྩ་བཞིར་ཤེས་པར་བྱ། །ཞེས་ནང་གི་སྒྱུ་རྩལ་དྲུག་ཅུ་རྩ་བཞི་ཞེས་འདོད་པའི་བསྟན་བཅོས་ལས་བཤད་པ་སོགས་མཐའ་ཀླས་མོད། འདིར་རེ་ཞིག་མཁས་པ་ཀུན་ལ་ཡོངས་སུ་གྲགས་པའི་རིག་པའི་གནས་ཆེ་ཆུང་བཅུ་ལས་བརྩམས་ཏེ་ཅུང་ཟད་བཤད་ན་རྣ་བ་བླགས་ཏེ་ཉོན་ཅིག་དང་ཡང་དག་པའི་ངག་སྦྱིན་པར་བྱའོ། །དེ་ལ་དང་པོ་གཞན་རྗེས་སུ་བཟུང་བ་བཟོ་རིག་པ་ནི། གཙོ་བོར་ལུས་ངག་ཡིད་གསུམ་གྱིས་བསྡུས་པ་སྟེ། དང་པོ་ལའང་གཙོ་བོ་དང་ཕལ་པ་གཉིས་ལས། དང་པོ་ནི་སྐུ་གསུང་ཐུགས་ཀྱི་རྟེན་བཞེངས་པ་དང་། དཀྱིལ་འཁོར་བྲི་ཐིག་ལས་རབ་འབྱམས་ཀྱི་བྱ་བ་ཕལ་ཆེར་རོ། །ཕྱི་མ་ནི་བཟོ་སྦྱངས་བཅོ་བརྒྱད་ཀྱི་ནང་ཚན་ལས་ཕལ་མོ་ཆེ་ཞིག་གོ །ངག་བཟོ་ལའང་གཙོ་བོ་ནི། དབྱངས་ཀྱི་ཡན་ལག་དྲུག་དང་ལྡན་པའི་རྡོ་རྗེའི་གླུ་ལ་སོགས་པ་དང་། ཆོས་ཀྱི་འབེལ་གཏམ་གྱིས་མཚོན་པ་དང་། ཕལ་པ་ནི་འཇིག་རྟེན་པ་རྣམས་དགའ་བ་སྐྱེད་པའི་གླུ་དབྱངས་ཀྱི་བརྗོད་པ་དང་། འདོད་པའི་གཏམ་དང་། གཤགས་འབྱེད་པ་ལ་སོགས་པའོ། །ཡིད་བཟོའི་གཙོ་བོ་ནི་ཐོས་བསམ་སྒོམ་པ་གསུམ་དང་། ཕལ་པ་ནི་ལུགས་ཀྱི་བསྟན་བཅོས་ལས་བྱུང་བ་བཞིན་བླང་དོར་གྱི་གནས་ལ་མཁས་ཤིང་སྒྲིན་པའོ། །གསོ་བ་རིག་པ་ནི། རིག་བྱེད་བཞིའི་ནང་ཚན་ཚངས་པའི་ཞལ་དབུས་མ་ལས་བྱུང་བའི་ཚེའི་རིག་བྱེད་དང་དོན་གཅིག་སྟེ། གཞན་དུ་བདག་ཅག་གི་སྟོན་པས་ཀྱང་སྡེ་སྣོད་གསུམ་དང་རྒྱུད་ཀྱི་རྡོ་རྗེའི་གནས་ཆེན་པོ་རྣམས་ལས་ཀྱང་ཟུར་གྱིས་བསྟན་ཏོ། །དེང་སང་གྲགས་པ་བརྟན་པའི་དཔལ་ལྡན་རྒྱུད་བཞི་ཞེས་གྲགས་པ་འདི་མཁས་པའི་དབང་པོ་ལེགས་བཤད་འཚོལ་གྱིས། ཕྱི་ལྟར་བཀའ། ནང་ལྟར་པཎྜི་ཏའི་བསྟན་བཅོས། གསང་བ་བོད་དུ་བརྩམས་པར་བཞེད་པའི་སྒྲུབ་བྱེད་རྒྱས་པར་བཀོད་ལ། རྒྱལ་པོ་པཎྜི་ཏ་བུདྡྷ་ཨབྡྷི་ནི་བདག་ཅག་གི་སྟོན་པས་དྲང་སྲོང་ལྷུང་བ་རི་དྭགས་ཀྱི་ནགས་སུ་གསུངས་པ་ཉིད་བོད་དུ་བཻ་རོ་དང་གཡུ་ཐོག་རྙིང་མས་བསྒྱུར་ཞིང་། གཅིག་ཤོས་གཏེར་དང་། མངའ་བདག་གི་ཞལ་ངོ་ནང་བརྒྱུད་དུ་གནས་པ། གྲྭ་མངོན་པས་གཏེར་ནས་དྲངས་པ་དང་སྙན་བརྒྱུད་གཉིས་ཀ་གཡུ་ཐོག་གསར་མས་གསན་ནས་བོད་ལ་ཉེ་བར་མཁོ་བ་འགའ་ཞིག་བསྣན་པ་སོགས་སུ་བཞེད་དོ། །དེ་ཡང་དཔལ་ལྡན་དཔའ་བོས་མཛད་པའི་ཡན་ལག་བརྒྱད་པར་གནས་དྲུག་ཏུ་བསྡུས་པའི། དང་པོ་མདོ་ག་༡ནས་ལ་ལེའུ༣༠། གཉིས་པ་ལུས་གནས་༦ལ། གསུམ་པ་ནད་གནས་༡༦ལ། བཞི་པ་གསོ་བའི་གནས་༢༢ལ། ལྔ་པ་ཆོ་ག་གྲུབ་པ་༦ལ། དྲུག་པ་ཕྱི་མའི་གནས་ཏེ་བསྡོམས་པས་ལེའུའི་༡༢༠བདག་ཉིད་ཅན་དང་། དེའི་འགྲེལ་པ་ཁ་ཆེ་ཟླ་བ་མངོན་དགས་མཛད་པ་སོགས་མང་ངོ་། །བརྗོད་བྱ་ནི། ཡན་ལག་བརྒྱད་དམ། གསོ་བྱ། གསོ་བྱེད། ཇི་ལྟར་གསོ་བ། གསོ་བ་པོ་རྣམ་པ་བཞིར་འདུས་པའི་ཚུལ་རྒྱས་པར་འཆད་དུ་ཡོད་མོད་ཀྱི་རེ་ཞིག་མ་སྤྲོས་སོ། །ལོག་སྨྲ་ཚར་བཅད་པ་སྒྲ་རིག་པ་ནི། ལུང་དུ་སྟོན་པའི་སྒྲ་ལས་ལེགས་པར་སྦྱར་བའི་སྐད་ཀྱིས་བསྒྲུབ་པའི་ཚུལ་ཏེ། དེ་ལ་ཐུན་མོང་གི་བརྗོད་བྱ་ལ། ངོ་བོ་གཟུགས་དང་བྱེད་ལས་དང་། །ངེས་ཚིག་དབྱེ་བསྡུ་ཀློག་ཚུལ་ལོ། །ཅེས་པས་ཡི་གེ་དང་། དཔང་ལོས། ཡི་གེ་གཉིས་སམ་གསུམ་འདུས་པས། །དོན་གྱི་ངོ་བོ་རྗོད་བྱེད་པ། །མིང་ཡིན་དོན་ལ་བློ་གཞོལ་ཕྱིར། །ཞེས་དང་། སྨྲ་སྒོར། དེ་ཡང་མིང་ནི་ཐོག་མ་དང་། །རྗེས་སུ་གྲུབ་པ་རྣམ་པ་གཉིས། །ཞེས་བཤད་པའི་རྒྱུ་མཚན་ལ་མ་ལྟོས་པར་ཚ་ཞིང་སྲེག་པ་ལ་མེ་ཞེས་བཏགས་པ་ལྟ་བུ་འདོད་རྒྱལ་ཐོག་མའི་མིང་། རྒྱུ་མཚན་ལ་ལྟོས་པ་སྔར་ཐ་སྙད་ལ་གྲགས་ཟིན་ཞིག་གིས་གཞན་ལ་བཏགས་པ་བྲམ་ཟེའི་ཁྱེའུ་ཁ་ཆེ་སྣ་ཉག་ལ་སེངྒེ་ཞེས་བརྗོད་པ་ལྟ་བུ་རྗེས་གྲུབ་བཏགས་པའི་མིང་། ཕྱི་མ་ལའང་བཏགས་པའི་རྗེས་གྲུབ་ཅེས་རླུང་ནད་པུས་མོར་ཞེན་པ་ལ་ལྕེ་སྤྱང་མགོ་ཞེས་བརྗོད་པ་དང་། དངོས་མིང་དང་མཐུན་པར་འཇུག་པ་མཐུན་པའི་རྗེས་གྲུབ་ཕན་བྱེད་ལ་སྨན་ཅེས་པ་ལྟ་བུ། དངོས་བཏགས་གང་དང་ཡང་མ་འབྲེལ་བ་གཟའ་མིག་དམར་ལ་བཀྲ་ཤིས་སུ་བརྗོད་པ་ལྟ་བུ་ལོག་པའི་རྗེས་གྲུབ་སྟེ་གསུམ་དང་། གཞན་ཡང་རྒྱུ་ལ་འབྲས་མིང་བཏགས་པ་བཤལ་སྨན་སྐྱུགས་སྨན། འབྲས་བུར་རྒྱུ་མིང་བཏགས་པ་མཁྲིས་ནད་དང་རླུང་ནད། རྟེན་ལ་བརྟེན་པའི་མིང་སྲོག་གི་རླུང་། ཆ་ཤས་ལ་ཚོགས་པའི་མིང་སྨན་རྣམས་ཚང་། ཡ་གྱལ་གྱི་མིང་ཅུ་གང་བདེ་བྱེད། གཙོ་བོའི་མིང་ག་བུར༢༥། ནུས་པའི་སྒོ་ནས་རིན་ཆེན་ཚ་གྲང་གི་སྦྱོར་བ། བྱེད་ལས་ཀྱི་སྒོ་ནས་གཏར་བསྲེག་ཅེས་པ་ལྟ་བུ་ཡང་ངོ་། །ཚིག་ལ། གསུང་རབ་སྤྱི་ལ་གྲགས་པ་ནི། དཔང་ལོས། མིང་གཉིས་སམ་ནི་མང་པོ་ཡི། །དོན་གྱི་ཁྱད་པར་རྗོད་བྱེད་པ། །དམ་ཆོས་མངོན་པར་གསུངས་པ་ཡི། །ཚིག་ཡིན་ཡི་གེ་འདུས་པ་ཉིད། །ཅེས་སོ། །བརྡ་སྤྲོད་པའི་ལུགས་ལ། འཆི་མེད་མཛོད་ལས། རྗོད་བྱེད་བསྟན་བཅོས་སྒྲ་ལ་ནི། སུཔ྄་དང་ཏིང྄འི་མཐའ་ཅན་ཚིག །ཅེས་སོ། །དེ་ཡང་སློབ་དཔོན་བློ་གྲོས་བརྟན་པས། དོན་གྱི་ངོ་བོ་བརྗོད་པ་མིང་། །དེ་ཡི་ཁྱད་པར་སྟོན་པ་ཚིག །གང་ཡང་མི་སྟོན་ཡི་གེའོ། །ཞེས་སོ། །བརྡ་སྤྲོད་ཐུན་མོང་མ་ཡིན་པའི་བརྗོད་བྱ་ནི། །རང་བཞིན་བྱིངས་དང་མིང་ཡིན་ཏེ། །ཞེས་པ་ལྟར་མདོ་དང་གླེགས་བམ་ལས་བྱུང་བའི་བྱིངས་དང་། བྱིངས་དང་རྣམ་དབྱེ་བོར་བའི་དོན་དང་ལྡན་པ་ནི་རྟགས་སམ་མིང་ངོ་། །རྐྱེན་ནི་སྒྲའི་རང་བཞིན་མིང་ཚིག་གང་རུང་དུ་སྒྲུབ་པར་བྱེད་པ་སྟེ། དབྱེ་ན་བྱིངས་རྟགས་སུ། ཚིག་ཏུ། བྱིངས་སུ་སྒྲུབ་པ་གསུམ། རྟགས་རྟགས་སུ། མིང་དུ། བྱིངས་སུ། ཚིག་ཏུ་སྒྲུབ་པར་བྱེད་པ་སྟེ་བདུན་ནོ། །རང་བཞིན་རྐྱེན་དང་འབྲེལ་བའམ། །ཡི་གེ་ཙམ་དང་འབྲེལ་བ་ཡི། །བསྒྱུར་དང་དབྱི་བ་རྣམ་འགྱུར་ཏེ། །ཞེས་པའི་སྔ་མ་ནི་སུཔ྄་ཏིང྄་ཀྲྀ་ཏ྄་དང་། ཕྱི་མ་ནི་མཚམས་སྦྱོར་གྱི་མདོས་བསྒྱུར་བ་དང་དབྱི་བའོ། །དེ་ལྟ་བུ་སྟོན་པར་བྱེད་པའི་གཞུང་ཡང་། བཅོམ་ལྡན་འདས་ཀྱིས་ལུང་རྒྱས་པ་ཞེས་བྱ་བའི་མདོ་ལས། བདག་གིས་རབ་བཤད་ལེགས་སྦྱར་ཆོས་ཀྱི་གཞུང་། །གསལ་བྱེད་པཱ་ཎི་ནི་འབྱུང་དེ་རྗེས་སུ། །ས་ཡི་དབང་ཕྱུག་ཆོས་ཉིད་མཐོང་མིག་ལྡན། །དགེ་བསྙེན་ཟླ་བ་ཐོགས་མེད་སྤོབས་ལྡན་འབྱུང་། །ཞེས་ལུང་བསྟན་པའི་སློབ་དཔོན་པཱ་ཎི་པར་འཕགས་པ་སྤྱན་རས་གཟིགས་ཀྱིས་སྩལ་བའི་སྒྲ་མདོ་པཱ་ཎི་པ་དང་། ཟླ་ཁོལ་ཀྱིས་མཛད་པའི་དེའི་དོན་གསལ་བར་བྱེད་པ་ཙཱནྡྲ་པ་སྟེ། དེ་ཡང་སློབ་དཔོན་སྐལ་ལྡན་གྲགས་པས། །ཀླུ་སྒྲུབ་ཀྱིས་ནི་ཆོས་རྣམས་རྣམ་ཕྱེ་སྦྱར། །སྒྲ་རྗེས་དོན་མཁས་ཙནྡྲ་གོ་མཱིར་གྲགས། །སྙན་དངགས་མཁན་གཙོ་དཔའ་བོ་ལས་སུ་ཡོད། །སྔགས་ཚུལ་ལ་འདིར་སྐལ་ལྡན་བདག་རྣམས་མཛེས། ཞེས་དང་། ཁ་ཆེ་ཁྲི་བརྟན་གྱི་རྒྱལ་པོས་དུས་སྟོན་གྱི་ཚད། །ཙནྡྲ་གོ་མཱིའི་སྒྲ་ཡི་ལུང་ཚིག་དང་། །དྷརྨ་ཀཱི་རྟིའི་ཡིད་འོང་ཏརྐའི་གཞུང་། །དཔའ་བོའི་སྙན་དངགས་སྦྱོར་བའི་ཕྲེང་རྒྱུད་དེ། །འཇིག་རྟེན་ན་ནི་རིན་ཆེན་རྣམ་པ་གསུམ། ཞེས་གླུར་བླངས་པར་གྲགས་སོ། །དེ་ཡང་པཱ་ཎི་པར་ཀུན་བཤད་དང་། ཙཱནྡྲ་པར་དེ་ཕན། རྒྱལ་པོ་བདེ་སྤྱོད་བཟང་པོའི་དོན་དུ་དབང་ཕྱུག་གོ་ཆ་གཞོན་ནུ་གདོང་དྲུག་གིས་བཤད་པའི་ཀ་ལཱ་པར་ཀྲྀ་ཏ྄་རྒྱས་པར་མངོན། ཡང་འཕགས་ཡུལ་དུ། ཨིནྡྲ་བྱཱ་ཀ་ར་ཎ། པཱི་ཤ་ལི་བྱཱ་ཀ་ར་ཎ། ཤ་ཀཽ་ཊ་ཡན་བྱཱ་ཀ་ར་ཎ། པཱ་ཎི་བྱཱ་ཀ་ར་ཎ། ས་མནྟ་བྷ་དྲ་བྱཱ་ཀ་ར་ཎ། ས་ཏཉྫ་ལི་བྱཱ་ཀ་ར་ཎ། མ་ནུ་ཛེནྡྲ་བྱཱ་ཀ་ར་ཎ། སྭ་ར་སྭ་ཏཱི་བྱཱ་ཀ་ར་ཎ་སྟེ་བརྒྱད་དུ་བསྒྲགས་མོད། བརྟག་པར་བྱ་བའི་གནས་སོ། །ཚད་མ་རིག་པ་ནི། ངོ་བོ། ཡུལ་གྱི་མཚན་ཉིད་ལ་བློས་དཔྱོད་པའི་རིག་ཤེས་ཏེ། རང་གིས་གཞལ་བྱ་མ་འཁྲུལ་བའི་འཇལ་བར་བྱེད་པ། དེ་ཡང་གཞལ་བྱའི་གནས་ཚུལ་འཁྲུལ་མེད་དུ་རྟོགས་པའི་བློ་ཞིག་ལ་མངོན་སུམ་དང་། ཚུལ་གསུམ་པའི་རྟགས་ལས་གཞལ་བྱའི་དོན་ངེས་པའི་བློ་ཞིག་ལ་རྗེས་དཔག་སྟེ་ཚད་མ་གཉིས་དང་། གཞན་ཡང་རབ་བློ་ལྐོག་གྱུར་དུ་འདོད་པའི་ལོག་རྟོག་དང་། བློ་ལ་ཚུལ་གཉིས་དང་རང་རིག་མི་འདོད་པ་སོགས་ཀྱི་ལོག་རྟོག་ཚར་གཅོད་ཅིང་། དངོས་བསྟན་ལ་མེད་པའི་ཤེས་བྱ་ཇི་སྙེད་ཀྱི་གནས་ལ་ལོག་པར་རྟོག་པའི་སྨྲ་ངན་ཐམས་ཅད་ཐལ་འགྱུར་གྱིས་ཚར་གཅོད་ཚུལ་དང་། སྒྲུབ་ངག་གིས་རྗེས་སུ་འཛིན་ཚུལ་རྒྱ་ཆེར་དངོས་སུ་སྟོན་པས་བཟློག་པར་ནུས་ཕྱིར་ལོག་སྨྲ་ཚར་གཅོད་ཀྱི་རིག་པའི་མཆོག་ཏུ་གྲུབ་བོ། །ངེས་ཚིག་ནི། པྲ་མཱ་ཎ་ཞེས་པའི་སྒྲ་ལས་དྲངས་ན་རབ་ཏུ་འཇལ་བ་སྟེ། དོན་ཇི་བཞིན་རྟོགས་པའི་རིག་པ། དེ་ཡང་རྒྱལ་བས་གསུངས་ཚུལ་དང་། ཕྱོགས་གླང་ཡབ་སྲས་ཀྱིས་བཀྲལ་ཚུལ་གཉིས་ལས། དང་པོ་ལ་ཡང་། མངོན་སུམ་དང་། རྗེས་དཔག་གསུང་ཚུལ་ལོ། །དང་པོ་ནི། འཁོར་ལོ་དང་པོའི་སྐབས། དགེ་སློང་དག་མིག་གི་རྣམ་པར་ཤེས་པས་སྔོན་པོ་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །ཞེས་པས་སྔོན་པོ་ཤེས་ཀྱི་ཡན་ཆད་ཀྱིས་མ་འཁྲུལ་པའི་རིག་པ་དེ་བསྟན། དེ་མན་གྱིས་རྟོག་བྲལ་དེ་བསྟན་པས་མངོན་སུམ་གྱི་མཚན་ཉིད་རྫོགས་པར་གསལ་བར་བསྟན་པ་ཡིན་ནོ། །ཡང་མདོ་ལས་དགེ་སློང་དག་གཟུགས་ཞེས་པ་ནི་རྣམ་པ་གཉིས་ཏེ་མིག་༡དང་། ཡིད་ལ་༢བརྟེན་པའོ། །ཞེས་པས་དབང་མངོན་༡དང་། ཡིད་མངོན་༢བསྟན། འཁོར་ལོ་བར་པར། སེམས་ལ་ནི་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་པས་རང་རིག་མངོན་སུམ་དང་། ཡང་། སོ་སོ་རང་གིས་རིག་བྱའི་ཕྱིར། །བཅོམ་ལྡན་འདས་ཀྱིས་ཆོས་བསྟན་པ། །ཞེས་སོ། །མདོ་ལས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བར་རྣམ་པར་དག་ཅེས་པས་རྣལ་འབྱོར་མངོན་སུམ་བསྟན་ཏེ། ཆོས་རྣམས་ཞེས་པས་བདེན་བཞི་བཅུ་དྲུག་གི་རྣམ་པ། ཆོས་ཀྱི་མིག་ཅེས་པས་ཟག་མེད་ཀྱི་ཤེས་རབ། རྡུལ་མེད་ཅེས་པས་བར་ཆད་མེད་ལམ། དྲི་མ་དང་བྲལ་བ་རྣམ་པར་དག་ཅེས་པས་རྣམ་གྲོལ་ལམ་དེ་བསྟན་པ་ཡིན་ནོ། །གཉིས་པ་ནི། གཞལ་བྱ་འདིས་འཇལ་བྱེད་དང་སྒྲུབ་བྱེད་དངོས་སྟོབས་རྗེས་དཔག་གི་རྟེན་དུ་གྱུར་པའི་གཏན་ཚིགས་གསུམ་གསུང་རབས་རྣམས་སུ་བཤད་ལ། དེ་ཡང་། ཆོས་བཅུ་པའི་མདོར། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་སོགས་འབྲས་རྟགས་དང་། སཱ་ལུ་ལྗང་པའི་མདོར། གང་ཅུང་ཟད་སྐྱེ་བའི་བདག་ཉིད་ཅན་དེ་ཐམས་ཅད་ནི་འགགས་པའི་བདག་ཉིད་དོ། །ཞེས་དང། རྣམ་འགྲེལ་ལས༢། ཅུང་ཟད་སྐྱེ་བའི་བདག་ཉིད་ཅན། །གང་དེ་ཐམས་ཅད་འགགས་ཆོས་ཅན། །ཞེས་སོགས་ཀྱིས་རང་བཞིན་གྱི་གཏན་ཚིགས་དང་། དཀོན་བརྩེགས་འོད་སྲུང་གིས་ཞུས་པར། ངའམ་ང་འདྲ་བས་གང་ཟག་གི་ཚོད་བཟུང་བར་ནུས་ཀྱི། གང་ཟག་གིས་གང་ཟག་གི་ཚོད་བཟུང་བར་མི་ནུས་ཏེ་ཉམས་པར་འགྱུར་ཏ་རེ། ཞེས་དང་། རྣམ་འགྲེལ་དུ། ཚད་མ་རྣམས་ནི་མི་འཇུག་པར། །མེད་ལ་མི་འཇུག་འབྲས་བུ་ཅན། །གཏན་ཚིགས་བྱེ་བྲག་ལ་ལྟོས་ནས། །འགའ་ཞིག་མེད་ཤེས་འབྲས་བུ་ཅན། །ཞེས་སོགས་ཀྱིས་མ་དམིགས་པའི་གཏན་ཚིགས་བསྟན་ཏེ། དེ་ཡང་སྔར་གྱི་ཚིག་ཟུར་དང་པོ་ངའམ་སོགས་ཀྱིས་སྣང་རུང་མ་དམིགས་པའི་གཏན་ཚིགས་བསྟན་ཏེ། དཔེར་ན་བུམ་པས་དབེན་པའི་ས་ཕྱོགས་སུ་བུམ་པ་མེད་དེ། དེ་སྣང་རུང་ཚད་མས་མ་དམིགས་པའི་ཕྱིར། གང་ཟག་གིས་སོགས་ཕྱི་མས་མི་སྣང་བ་མ་དམིགས་པའི་གཏན་ཚིགས་བསྟན་ཏེ། བསྒྲུབ་བྱ་དེའི་ཚད་མས་མེད་པར་ཡང་མ་ངེས། མངོན་སུམ་དང་ལུང་སོགས་རྟགས་ཀྱིས་ཡོད་པར་མི་འགྲུབ་པའི་ཤིན་ཏུ་ལྐོག་གྱུར་བསྐལ་དོན་དེ་ལྟར་གྱུར་པས་ཡོད་ངེས་ཀྱི་ཐ་སྙད་དོན་མཐུན་མི་འཇུག་པ་སྟེ། སྤྱིར་ཡོད་སྲིད་ཀྱང་གང་ཟག་དེའི་མངོན་རྗེས་ཚད་མས་ཡོད་མེད་གང་རུང་དུ་མ་གྲུབ་པའི་ཕྱིར་གོང་དུ་ཁྱབ་པ་གྲུབ་སྟེ། མེད་ན་མི་འབྱུང་བའི་མཚན་ཉིད་ཅན་གྱི་རྟགས་ནི་རྗེས་དཔག་གི་རྟེན་ཡིན་ཏེ། རྣམ་འགྲེལ་ལེའུ་གཉིས་པའི་འཇུག་ཏུ། མེད་ན་མི་འབྱུང་མཚན་ཉིད་ཅན། །རྟགས་ནི་རྗེས་དཔག་རྟེན་ཡིན་ནོ། །ཞེས་སོ། །དེ་ལྟ་བུའི་ཚད་མ་རིག་པ་འདི་སྔོན་ཚེ་ལོ་ཉིས་ཁྲི་པའི་དུས་སུ་སངས་རྒྱས་འོད་སྲུང་གི་བསྟན་པ་ལའང་བྱུང་བར་གྲགས་ཤིང་། རང་ལུགས་བསྟན་པ་འདི་ལ་བསྟན་བཅོས་རྩོད་གྲུབ་ལས་སྔ་བར་བྱུང་བར་མ་མངོན་ཏེ། དེ་ཡང་སློབ་དཔོན་དབྱིག་གཉེན་གྱིས་མཛད་མ་མཛད་རྒྱ་གར་དུ་ཐེ་ཚོམ་གྱི་གཞིར་སྣང་ནའང་། དོན་དུ་ཐོགས་མེད་ཀྱི་གཅུང་དེས་ནི་མིན་པར་སེམས་ཤིང་། མངོན་པ་སྡེ་བདུན་གྱི། རབ་ཏུ་བྱེད་པ་དབྱིག་བཤེས་ཀྱིས། ཞེས་བཤད་པ་དེས་མཛད་དམ་སྙམ་ལ། ཕྱི་རོལ་པའི་རྟོག་གེ་ནི་ཐོག་མར་དྲང་སྲོང་ཕུར་བུས་ཚེ་སྔ་ཕྱི་མེད་པའི་བསྟན་བཅོས་བརྩམས། དེ་རྗེས་ཛམ་གླིང་དུ་དྲང་སྲོང་འཇིག་རྟེན་མིག་ཅེས་བྱ་བས་ཚད་མའི་མདོ་བྱས། དེའི་འགྲེལ་པ་དྲང་སྲོང་འཇུག་སྟོབས་ཅན་ཞེས་པས་བྱས་ནས་འཕེལ་བར་གྲགས་པའི་ཚུལ་འགྲེལ་བ་སྤྱན་རས་གཟིགས་བརྟུལ་ཞུགས་ལས་བཤད། རྟག་པར་སྨྲ་བ་ནི་སེར་སྐྱ་པའི་གཞུང་སྟེ་ཤེས་བྱ་ཉི་ཤུ་རྩ་ལྔ་སྟོན་པའི་བསྟན་བཅོས་སོ། །དེ་དག་ཚད་མ་མདོར། གང་ཞིག་རྟོག་གེའི་ལམ་ནས་ཆོས་ཉིད་ལ་འཁྲིད་ན། །དེ་ནི་ཐུབ་པའི་བསྟན་ལས་ཆེས་བསྲིངས་ཉམས་པ་ཡིན། །དེ་ལྟ་ནའང་དེ་བཞིན་གཤེགས་པའི་ཆོས་ཀྱི་མཚན་ཉིད་རྣམས། །གལ་ཏེ་གཞན་དུ་གྱུར་ན་དཔྱད་པར་བྱ་བའི་རིགས། ཞེས་དང། རྣམ་ངེས་ལས་ཀྱང་དེ་མཐུན་དང་། ཇོ་བོས། མངོན་སུམ་རྗེས་དཔག་དགོས་པ་མེད། །ཅེས་པ་ཡང་དེ་དང་ཕྱོགས་མཐུན་པའི་མུ་སྟེགས་པའི་རྟོག་གེ་དེ་དག་ལ་དགོངས་པ་ཡིན་ནོ། །གཉིས་པ་ནི། དུས་ཀྱི་འཁོར་ལོར། ཕྱོགས་ཀྱི་གླང་པོ་གཞན་ལ་ཕན་པའི་བསམ་པ་བཙུན་པ་ཟླ་བའི་པདྨའི་མྱུ་གུ་དང་། །ཞེས་སོགས་མདོ་རྒྱུད་དུ་མ་ནས་ལུང་བསྟན་པའི་སློབ་དཔོན་དབྱིག་གཉེན་གྱི་སློབ་མ། ཚད་མ་རང་ལས་མཁས་པ་ཕྱོགས་ཀྱི་གླང་པོས་ཕར་ཕྱིན་གྲོལ་སྡེ། འདུལ་བ་ཡོན་ཏན་འོད། མངོན་པ་བློ་བསྟན། ཞེས་གྲགས་སོ། །ཚད་མ་ཀུན་བཏུས་དང་། འཇམ་དཔལ་རྩ་རྒྱུད་ལས། ཡི་གེ་དྷ་ཞེས་སྡོམ་བརྩོན་ཉིད། །ལྷོ་ཡི་ཕྱོགས་སུ་རྣམ་པར་གྲགས། །ཕ་རོལ་རྒོལ་བ་བཟློག་ནས་ཀྱང་། །དེ་བཞིན་སྡོམ་བརྩོན་སྔགས་ཀྱང་འགྲུབ། །ཅེས་ལུང་བསྟན་པའི་བྲམ་ཟེའི་རིགས་འཁྲུངས་དཔལ་ཆོས་ཀྱི་གྲགས་པས་ཕྱོགས་གླང་སློབ་མ་རྒོལ་བ་དབང་ཕྱུག་སྡེ་ལས་ཀུན་བཏུས་ཚར་གསུམ་མཉན་པས་དོན་ཇི་བཞིན་ཁོང་དུ་ཆུད། ཕྱིར་རྒོལ་མང་པོ་ཕམ་པར་བྱས། བསྟན་བཅོས་ཚད་མ་རྣམ་འགྲེལ་ལེའུ་བཞིའི་དང་པོ། རང་གི་གཞལ་བྱ་རྟོགས་པའི་ཐབས་ཀྱི་ནང་ནས་ལྐོག་གྱུར་རྟོགས་བྱེད། རང་བཞིན། འབྲས་བུ། མ་དམིགས་པའི་རྟགས་ཡང་དག་གསུམ་གྱི་སྒོ་ནས་རྟགས་ཡང་དག་གི་མཚན་ཉིད། དེའི་ལྡོག་པ་གཏན་ཚིགས་ལྟར་སྣང་དང་བཅས་པའི་དོན་གཏན་ལ་འབེབས་པར། ཕྱོགས་ཆོས་དེ་ཆས་ཁྱབ་པ་ཡི། གཏན་ཚིགས་དེ་ནི་རྣམ་པ་གསུམ། ཞེས་སོགས་རང་དོན་གྱི་ལེའུ། གཉིས་པས་ཐམས་ཅད་མཁྱེན་པ་དངོས་སྟོབས་ཀྱིས་རྟོགས་པར་བྱེད་པའི་ཐབས། ཀུན་བཏུས་ཀྱི་མཆོད་བརྗོད་ཀྱི་དོན་ཚད་མའི་རྣམ་བཞག་གྱུར་པའི་ཚུལ། འགྲོ་ལ་ཕན་པར་བཞེད་པའི་ཚུལ་ལས་སྟོན་པར་གྲུབ་ཚུལ། བདེ་གཤེགས་སུ་གྲུབ་ཚུལ། སྐྱོབ་ཉིད་དུ་སྒྲུབ་པ། དེ་ལས་ཚད་མར་གྲུབ་པའི་ཚུལ་སོགས་ལུགས་དང་མཐུན་པ་དང་། མི་མཐུན་པ་ལུགས་ལྡོག་གི་སྒོ་ནས་བདེན་བཞི་མི་རྟག་སོགས་བཅུ་དྲུག་སྟོན་པ་ཚད་མར་གྱུར་པ་གང་ལས་གཤེགས་པའི་ལམ་རྒྱ་ཆེར་སྟོན་པ་ལ། ཚད་མ་བསླུ་མེད་ཅན་ཤེས་པ། །དོན་བྱེད་ནུས་པར་གནས་པ་ནི། །མི་བསླུ་སྒྲ་ལས་བྱུང་བ་ཡང་། །མངོན་པར་འདོད་པ་སྟོན་ཕྱིར་རོ། །ཞེས་སོགས་ཚད་མ་གྲུབ་པའི་ལེའུ་གསུམ་པ་མངོན་གྱུར་རྟོགས་པའི་ཐབས། དབང་ཡིད་རང་རིག་རྣལ་འབྱོར་མངོན་སུམ་བཞི་སོགས་མངོན་སུམ་གཏན་ལ་འབེབས་པར། གཞལ་བྱ་གཉིས་ཕྱིར་ཚད་མ་གཉིས། །དོན་བྱེད་ནུས་དང་མི་ནུས་ཕྱིར། །ཞེས་སོགས་དང་། །མངོན་སུམ་གྱི་ལེའུ་བཞི་པ་རྟོགས་ནས་གཞན་རྗེས་སུ་འཛིན་པའི་ཡན་ལག་ལ། སྤྱིར་གཞན་དོན་རྗེས་དཔག་གི་མཚན་ཉིད། དབྱེ་བ། ལོག་རྟོག་སྤོང་ཚུལ། བྱེ་བྲག་སོ་སོའི་སྒོ་ནས་རྒྱ་ཆེར་སྟོན་པ་ལ། གཞན་ལ་བསྟན་པར་བྱ་བའི་ཕྱིར། བདག་མཐོང་མིན་ཡང་གཞན་དག་གི །ཞེས་སོགས་གཞན་དོན་གྱི་ལེའུ་རྣམས་དང་། འབྲིང་རྣམ་ངེས་ལ། ལེའུ་དང་པོས་མངོན་སུམ་བཞི། གཉིས་པས་རྗེས་དཔག །གསུམ་པས་གཞན་དོན་རྣམས་བསྟན། བསྡུས་པ་རིག་ཐིགས་ནི་རང་ལུགས་སྙིང་པོར་དྲིལ་ཏེ་ལེའུ་གསུམ་གྱིས་མངོན་རྗེས་གཞན་དོན་གསུམ་བསྟན་པ་སྟེ་གཙོ་བོ་ལུས་ལྟ་བུའི་བསྟན་བཅོས་གསུམ། རང་དོན་རྗེས་དཔག་ལས་འཕྲོས་ནས་རྟགས་བྱེ་བྲག་ཏུ་སྟོན་པ་གཏན་ཚིགས་ཐིགས་པ། མུ་སྟེགས་ཀྱིས་བརྟག་པའི་འབྲེལ་བ་འགོག་པ་ལ་འབྲེལ་བ་བརྟག་པ། གཞན་དོན་རྗེས་དཔག་ལས་འཕྲོས་ནས་སྣང་བ་སེམས་ཡིན་ཡང་གཞན་རྒྱུད་འཐད་པ་རྒྱུད་གཞན་གྲུབ་པ་དང་། རྩོད་པའི་ཚུལ་སྟོན་པ་རྩོད་པའི་རིག་པ་ཞེས་ཡན་ལག་གི་བསྟན་བཅོས་བཞི་སྟེ་སྡེ་བདུན་མཛད། ཚད་མ་སློབ་པ་ན་དང་པོར་རྟགས་ཀྱི་རྣམ་བཞག་གལ་ཆེ་བར་དགོངས་ཤིང་། རྟོགས་དཀའ་བར་གཟིགས་ནས་རྣམ་འགྲེལ་གྱི་རང་དོན་ལེའུ་ལ་རང་འགྲེལ་མཛད་དོ། །དེའི་སློབ་མ་ཀུན་མཁྱེན་ལྷ་དབང་བློ་དང་། དེའི་སློབ་མ་ཤཱཀྱ་བློ་རྣམས་ཀྱིས་འགྲེལ་བཤད་དང་། སློབ་དཔོན་དུལ་བའི་ལྷས་སྡེ་བདུན་ཀ་ལ་འགྲེལ་པ། རྒྱན་མཁན་པོ་ཤེས་རབ་འབྱུང་གནས་ཀྱིས་ཚད་མ་སྟོང་ཕྲག་བཅོ་བརྒྱད་པ་དང་། སློབ་དཔོན་ཆོས་མཆོག་གིས་རྣམ་ངེས་ལ་འགྲེལ་པ་འཐད་ལྡན་ཆེན་མོ་ཞེས་སྟོང་ཕྲག་བཅུ་གཉིས་པ་དང་། རིག་ཐིགས་ལ་འགྲེལ་པ་སློབ་ཕན། རྒྱན་མཁན་པོའི་སློབ་མ་བྲམ་ཟེ་ཛ་མ་ཁ་ཆེ། རིས་རྣམ་འགྲེལ་ལ་འགྲེལ་བཤད། རྒྱལ་དབང་བློས་ཚད་མ་མདོ་ལ་འགྲེལ་བཤད་སོགས་མཛད། དེ་དག་གི་དོན་བསྡུ་ན། ཇི་སྐད་དུ། མངོན་སུམ་དང་ནི་རྗེས་སུ་དཔག །ལྟར་སྣང་དང་བཅས་བདག་རིག་བྱེད། །བསྒྲུབ་པ་དང་ནི་སུན་འབྱིན་ངག །ལྟར་སྣང་བཅས་པས་གཞན་རིག་བྱེད། ཅེས་རྟོག་གེའི་ཚིག་དོན་བརྒྱད་དེ། དེ་ཡང་མངོན་སུམ་ལ་བཞི་ལས་དབང་པོའི་མངོན་སུམ་དབང་ལྔའི་ཡུལ་དུ་གྱུར་པ། དབྱེ་ན། ཡང་དག་ནི་ཟླ་བ་དང་། ལྟར་སྣང་ནི་ཟླ་བ་གཉིས་ལྟ་བུ། ཡིད་མངོན་སོ་སྐྱེའི་ཡིད་ཤེས་ཀྱི་ཡུལ་དུ་གྱུར་པའི་ཆོས། ཚད་མ་ནི་གཞལ་བྱའི་གནས་ལུགས་མ་འཁྲུལ་བར་མཐོང་བ་དང་། ཚད་མིན་ནི་ལོག་རྟོག །རྣལ་འབྱོར་མངོན་སུམ་ནི་འཕགས་རྒྱུད་ཀྱི་ཤེས་པ་དང་། རང་རིག་མངོན་སུམ་ནི་ཡིད་ཤེས་ཆ་ཕྲ་བ་ཞིག་སྟེ་འདི་གཉིས་ཡང་དག་གོ །རྗེས་དཔག་ཚད་མ་ལ་ཡང་དག་དང་ལྟར་སྣང་གཉིས་ལས། དང་པོ་ལ་གསུམ། དངོས་སྟོབས་ཀྱི་རྗེས་དཔག་ཚད་མ་ནི་དུ་བ་མཐོང་བས་མེ་ཡོད་པར་ཤེས་པ་ལྟ་བུ་དང་། གཞན་ལ་ལྟོས་ནས་རང་འཆི་བར་ངེས་པ་ལྟ་བུ། གྲགས་པའི་རྗེས་དཔག་ཚད་མ་ནི། འཇིག་རྟེན་ན་གྲགས་པའི་རྗེས་སུ་འབྲངས་ནས་རི་བོང་ཅན་ཞེས་པས་ཟླ་བ་མཚོན་པ་ལྟ་བུ། ཡིད་ཆེས་པའི་རྗེས་དཔག་ཚད་མ་ནི། རྒྱུ་འབྲས་བསླུ་བ་མེད་པ་ཐམས་ཅད་མཁྱེན་པས་རྗེས་སུ་གདམས་པ་ལ་བརྟེན་སོམ་ཉི་བྲལ་བ་ལྟ་བུ། ཚད་མིན་ནི། སྨིག་རྒྱུ་མཐོང་བ་ལས་ཆུར་འཛིན་པའི་ཤེས་པ་ལྟ་བུ་ལ་བཞག་གོ། །སྒྲུབ་ངག་ཚད་མ་ནི་བྱས་པ་ཡིན་ན་མི་རྟག་པ་ཡིན་པས་ཁྱབ་སྟེ། དཔེར་ན་མར་མེ་འཆི་ཀ་མ་བཞིན་ནོ། །སྒྲ་ཡང་བྱས་སོ། །ཞེས་པའི་སྒྲུབ་ངག་དེ་སྒྲུབ་ངག་ཡང་དག །གཞལ་བྱ་ཡིན་ན་མི་རྟག་པ་ཡིན་པས་ཁྱབ་སྟེ། མར་མེ་འཆི་ཀ་མ་བཞིན་ནོ། །སྒྲ་ཡང་གཞལ་བྱ་ཡིན་ནོ། །ཞེས་པའི་སྒྲུབ་ངག་དེ་སྒྲུབ་ངག་ལྟར་སྣང་། སུན་འབྱིན་ཚད་མ་ནི། ངག་ཆོས་ཅན། མ་བྱས་པར་ཐལ་རྟག་པ་ཡིན་པའི་ཕྱིར། ཞེས་པའི་ཐལ་འགྱུར་དེ་སུན་འབྱིན་ཚད་མ་དང་། ངག་ཆོས་ཅན། རྟག་སྟེ་གཞལ་བྱ་ཡིན་པའི་ཕྱིར། ཞེས་པ་ལྟར་སྣང་ངོ་། །འདི་སྔ་མ་བཞི་བློ་རིག་དང་། ཕྱི་མ་བཞི་རྟགས་རིགས་ཀྱིས་རྒྱས་པར་སྟོན། དེ་ཉིད་བོད་དུ་རྔོག་ལོ་ཆེན་པོས་བསྒྱུར་ཞིང་རྣམ་ངེས་ལ་འགྲེལ་པ་དང་གཞུང་ཕྲན་ཡང་མཛད། རྗེ་བཙུན་ས་སྐྱ་པཎྜི་ཏས་པཎ་ཆེན་ཤཱཀྱ་ཤྲཱི་སོགས་བསྟེན་ནས་གསན་ཅིང་རྣམ་འགྲེལ་གྱི་སྒོ་འཕར་དབྱེ་བ་སོགས་ནས། ཕྱིས་སུ་དགེ་ཕྱོགས་སུ་རྒྱལ་ཚབ་དར་མ་རིན་ཆེན་གྱི་རྣམ་ངེས་འགྲེལ་པ་དགོངས་པ་རབ་གསལ༤༠༢། མཁས་གྲུབ་དགེ་ལེགས་དཔལ་བཟང་གིས་རྣམ་འགྲེལ་རིག་པའི་རྒྱ་མཚོ། པཎ་ཆེན་དགེ་འདུན་གྲུབ་ཀྱི་རིགས་རྒྱན་སོགས་༡༢༤དང་། ཀར་ཕྱོགས་སུ་ཀརྨ་པ་ཆོས་གྲགས་རྒྱ་མཚོས། ཚད་མ་རིག་གཞུང་རྒྱ་མཚོ་སོགས་མང་ངོ་། །བཤད་བྱ་ཀུན་བཏུས། དེ་ཡང་རྔོག་ལོ་ཆེན་པོས། ཆོས་རྣམས་ཐམས་ཅད་སྟོང་པའི་ཚུལ་ལ་འཇུག་པའི་སྒོ། །ཡང་དག་རིགས་ཚོགས་ཀླུ་སྒྲུབ་ཞལ་ནས་གསུངས་པ་དེ། །རིག་པའི་མཐར་ཐུག་རྣམ་འགྲེལ་མཛད་པའི་གཞུང་མཛེས་ལས། །གསལ་བར་རྟོགས་ནས་ལུགས་ངན་གཞན་ཀུན་རྩྭ་བཞིན་དོར། །ཞེས་སོགས་གསུངས་པས་ནང་རིག་པའི་གྲོང་ཁྱེར་དུ་འཇུག་པའི་སྒོ་ལྟ་བུར་ཤེས་པར་བྱའོ། །བདག་ཉིད་ཀུན་ཤེས་པར་བྱེད་པ་ནང་རིག་པ་ལ། ཐོག་མར་བདེན་བཞིའི་ཆོས་འཁོར་གྱི་ནང་ཚན་འདུལ་བའི་སྡེ་སྣོད་ལ་སྡོམ་པ་མ་ཐོབ་པ་ཐོབ་བྱེད། ཐོབ་པ་སྲུང་ཐབས། ཉམས་ན་ཕྱིར་བཅོས་གསུམ་གྱི། དང་པོ་ལ་སྔོན་ཆོག་དང་ད་ཆོག་གཉིས། དང་པོ་ལ་བཅུ་སྟེ། རྫོགས་པའི་སངས་རྒྱས་ནི་ཁྱིམ་ནས་བྱུང་བའི་ཚེ་སྤོང་བདུན་ཐུགས་ལ་འཁྲུངས་ཤིང་། མཆོད་རྟེན་རྣམ་དག་གི་དྲུང་དུ་དབུ་སྐྲ་བཅད་དེ་ངུར་སྨྲིག་གི་གོས་བླངས་པ་དང་། རང་སངས་རྒྱས་ཁྱིམ་ནས་བྱུང་ནས་རབ་བྱུང་གི་རྟགས་བླངས་པའི་སྐབས་དེར་རབ་ཏུ་བྱུང་ཞིང་རང་རྒྱལ་གྱི་བྱང་ཆུབ་མངོན་དུ་བྱས་པའི་སྐབས་སུ་བསྙེན་པར་རྫོགས་པའི་སྡོམ་པ་ཐོབ་པ་སྟེ་རང་བྱུང་གིས་བསྙེན་པར་རྫོགས་པའོ། །གང་དག་སངས་རྒྱས་པའི་ཚེ་དགེ་སློང་གི་སྡོམ་པ་ཐོབ་ཟེར་བ་དེ་དག་གིས་ནི། སྒོམ་སྤང་མཐའ་དག་སྤངས་པའི་སྐབས་དེར་སྒོམ་སྤང་ཞིག་གསར་དུ་རྙེད་ཅེས་འཆད་དགོས་བར་འགྱུར་རོ། །སྟོན་པས་ཝཱ་རཱ་ཎ་སཱིར་བདེན་བཞིར་བཟླས་པ་ལན་གསུམ་དུ་བསྐོར་བའི་སྐབས་སུ་བཟླས་པ་དང་པོ་ལ་ཀུན་ཤེས་ཀཽཎྜི་ནྱས་མཐོང་ལམ་དང་། གཉིས་པར་གཞན་བཞིས་ཀྱང་ཐོབ་པ་དེ་རྣམས་ཀྱི་རྒྱུད་ཀྱི་མཐོང་ལམ་དེ་ཉིད་དགེ་སློང་གི་སྡོམ་པའི་ཐོབ་རྒྱུར་སོང་སྟེ་ཡེ་ཤེས་ཁོང་ཆུད་ཀྱིས་ཏེ། དེའི་རྒྱུད་ཀྱི་མཐོང་ལམ་དང་། དགེ་སློང་གི་སྡོམ་པ་གཉིས་ལྷན་ཅིག་འབྱུང་བའི་རྒྱུ་འབྲས་ཡིན་ནོ། །དེ་ནས་ཤཱ་རིའི་བུ་དང་མཽང་གལ་བུ་སོགས་མང་པོ་ལ། དགེ་སློང་དག་ཚུར་ཤོག་ཚངས་པར་སྤྱོད་ཅིག་ཅེས་གསུངས་པའི་མོད་ལ་སྐྲ་རང་བྱི་བ་སོགས་གྱུར་ཏེ། ལྷ་རྣམས་ཀྱིས་ནམ་མཁའ་ནས་ཆེད་དུ་བརྗོད་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་རྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞི་གནས་གྱུར་ཏེ། སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཅེས་རྗོད་པར་བྱེད་དེ། སྟོན་པའི་དྲུང་དུ་འདི་ཁོ་ནས་བསྙེན་པར་རྫོགས་པ་མང་ངོ་། །ཤཱ་རིའི་བུས་བསྙེན་པར་རྫོགས་ནས་ཞག་བཅོ་ལྔ་ན་དགྲ་བཅོམ། བྲམ་ཟེ་ནྱ་གྲོ་དྷ་སྐྱེས་སམ་འོད་སྲུངས་ཆེན་པོ་ནི་སྟོན་པ་རྒྱལ་པོའི་ཁབ་བུ་མང་མཆོད་རྟེན་གྱི་འགྲམ་ན་བཞུགས་པའི་ཚེ་བདག་གིས་སྟོན་པ་མཐོང་ངོ་སྙམ་ནས་དྲུང་དུ་ཕྱིན་ཏེ་ཕྱག་འཚལ་ཏེ། བཅོམ་ལྡན་འདས་ནི་བདག་གི་སྟོན་པ་ལགས་ལ། བདག་ནི་ཁྱོད་ཀྱི་ཉན་ཐོས་ལགས་སོ་ཞེས་བརྗོད་པར། བཀའ་སྩལ་པ། འོད་སྲུང་ཁྱོད་ནི་ངའི་ཉན་ཐོས་ཡིན་ལ། ང་ནི་ཁྱོད་ཀྱི་སྟོན་པའོ་གསུངས་པས་དགེ་སློང་དུ་གྱུར་ཏེ་སྟོན་པར་ཁས་བླངས་པས་སོ། །དེས་ཉི་མ་དགུ་ནས་དགྲ་བཅོམ་པར་གྱུར་ཏོ། །ཚེ་དང་ལྡན་པ་འཆར་ལྡན་ནམ་ལེགས་བྱིན་ནི་སྟོན་པའི་དྲུང་དུ་འོངས་པར། བཀའ་སྩལ་པ། ལེགས་བྱིན་གཅིག་ཏུ་དགེ་བ་གང་ཡིན། ཐར་པའོ། །དེ་ལ་དགོས་པ་གང་ཡིན། དད་པའོ། །ཞེས་ལན་བཏབ་པས་སྟོན་པ་ཐུགས་མཉེས་པ་དེ་ཉིད་ལེགས་བྱིན་གྱི་དགེ་སློང་གི་སྡོམ་པ་ཐོབ་པའི་རྒྱུར་སོང་སྟེ་དྲི་བས་སོ། །སྟོན་པ་ལྟེངས་རྒྱས་ཀྱི་རས་བལ་ཅན་གྱི་ནགས་ཚལ་ཚང་ཚིང་ཅན་ན་བཞུགས་ཚེ། བཟང་སྡེའི་ཚོགས་དྲུག་ཅུ་འོངས་པ་སྐྱབས་སུ་འགྲོ་བའི་སྒོ་ནས་བསྙེན་རྫོགས་སུ་བཀོད་དེ་སྐྱབས་འགྲོ་ཁས་བླངས་ཀྱིས་སོ། །སྟོན་པ་གྲོང་ཁྱེར་སེར་སྐྱར་བཞུགས་ནས་ཤཱཀྱའི་ཚོགས་མང་པོ་རབ་ཏུ་བྱུང་ཚེ། སྲུ་སྐྱེ་དགུའི་བདག་མོ་བུད་མེད་ལྔ་བརྒྱ་དང་བཅས་པ་རབ་ཏུ་བྱུང་བ་དང་བསྙེན་པར་རྫོགས་པར་འཚལ་ཞེས་ལན་གཉིས་སུ་ཞུས་ཀྱང་མ་གནང་ནས་སྡུག་བསྔལ་བར་གྱུར་པ་ལ། མཐར་ཀུན་དགའ་བོས་ཞུས་པས། ངའི་བསྟན་པ་འདི་ལ་བུད་མེད་རབ་ཏུ་བྱུང་བར་མ་ཞུ་ཞིག །བསྟན་པ་ཡུན་རིང་དུ་གནས་པར་འགྱུར་རོ། །འོན་ཀྱང་གཉིས་ཀའི་དགེ་སློང་ལས་བསྙེན་པར་རྫོགས་པ་དང་། གཉིས་ཀའི་དགེ་འདུན་ལས་དགག་དབྱེ་བྱེད་པ་སོགས་ལྕི་ཆོས་བརྒྱད་བཀའ་སྩལ་ཏེ་འདི་རྣམས་ཁས་བླངས་ན་བསྙེན་པར་རྫོགས་པར་འགྱུར་རོ་ཞེས་བཀའ་སྩལ་པས། ཀུན་དགའ་བོས་དེ་རྣམས་ཀྱི་དྲུང་དུ་ཕྱིན་ནས། སྲིང་མོ་དག་སྟོན་པས་ཁྱེད་རྣམས་བསྙེན་པར་རྫོགས་པར་གནང་མོད་ཀྱི། འོན་ཀྱང་ལྕི་ཆོས་བརྒྱད་བཀའ་སྩལ་ཏོ། །འཕགས་པ་གསུངས་ཤིག་ཅེས་ཉན་ནས། དེས་བརྗོད་པ་དང་། དགེ་སློང་གིས་དགེ་འདུན་ལས་རབ་ཏུ་བྱུང་བ་དང་བསྙེན་པར་རྫོགས་པར་བྱ་བ། དགེ་སློང་ལས་ཟླ་བ་ཕྱེད་ཕྱེད་ཀྱིས་གདམས་པ་དང་རྗེས་སུ་གདམས་པ་བཙལ་བ། དབྱར་དགེ་སློང་མེད་པའི་གནས་སུ་གནས་པར་མི་བྱ་བ། དགག་དབྱེའི་ཚེ་གཉིས་ཀའི་དགེ་འདུན་ལ་དགག་དབྱེ་བྱས། དགེ་སློང་གི་ཉེས་པ་བཞི་མི་སྨེད་པ་དང་། དགེ་སློང་ལ་ཁྲོ་བ་དང་ཚིག་རྩུབ་མི་བྱ་བ་དང་། ལྕི་བའི་ཆོས་ལས་འདས་ན་དགེ་འདུན་གཉིས་ཀ་ལོ་ཟླ་ཕྱེད་ཀྱི་བར་དུ་མགུ་བ་སྤྱོད་པ་དང་། དགེ་སློང་མ་བསྙེན་པར་རྫོགས་ནས་ལོ་རྒྱ་ལོན་པས་ཀྱང་དགེ་སློང་བསྙེན་པར་རྫོགས་མ་ཐག་པ་ལ་ཕྱག་དང་བཀུར་སྟི་བྱེད་པའོ། །མཆན། སྐྱེ་དགུའི་བདག་མོས་འདི་རྣམས་ནི་བདག་གི་ལུས་ངག་ཡིད་ཀྱིས་སྤྱི་བོས་ནོད་དོ། །ཞེས་སྨྲས་ཏེ་དགེ་སློང་མར་གྱུར་པ་དང་སྟོན་པར་གསོལ་པ། བུད་མེད་ལྔ་བརྒྱ་པོ་དེ་དག་བསྙེན་པར་རྫོགས་པར་གྱུར་ཏམ། བཀའ་སྩལ་པ་གྱུར་ཏོ། །ཞེས་གསུངས་ཏེ་ལྕི་ཆོས་ཁས་བླངས་ཀྱིས་སོ། །ཡང་ཁྱིམ་བདག་སྦྱིན་པའི་བུ་མོ་ཆོས་སྦྱིན་མ་སྐྱེས་མ་ཐག་ནས་རི་དྭགས་འཛིན་གྱི་བུ་ས་ག་ལ་སྟེར་བའི་ཆད་བྱས་སོ། །དེ་རབ་ཏུ་འབྱུང་འདོད་པས་ཕ་མར་སྨྲས་པས་མ་གནང་། དེས་དགེ་སློང་ཨུཏྤལ་ལ་སྨྲས་པ་དང་། སྟོན་པར་ཞུས་པས། བུ་མོ་ཆོས་སྦྱིན་མ་ཁྱིམ་ན་འདུག་བཞིན་དུ་རབ་བྱུང་དང་དགེ་ཚུལ་མར་གྱིས་ཤིག་གསུངས་ཏེ་དགེ་སློང་མས་ཆོ་ག་བརྗོད། ཨུཏྤ་ལའི་མདོག་འཕྲིན་པར་གཏོང་སྟེ་དགེ་བསྙེན་དང་དགེ་ཚུལ་མར་བྱས་པས་རྒྱུན་ཞུགས་ཐོབ། ལོ་བཅུ་ལོན་པའི་འཇུག་ཏུ་ཨུཏྤལའི་མདོག་འཕྲིན་པར་བྱས་ཏེ་དགེ་སློང་གི་དགེ་འདུན་གྱིས་དགེ་སློབ་མའི་ཚུལ་ཁྲིམས་ཕོག །དེས་ཕྱིར་འོང་ཐོབ། ལོ་གཉིས་སོང་བ་ན་འཕྲིན་ལ་བརྟེན་ནས་ཚངས་སྤྱོད་ཉེར་གནས་ཀྱི་སྡོམ་པ་ཕོག །དེས་ཕྱིར་མི་འོང་ཐོབ་སྟེ་རྫུ་འཕྲུལ་བསྒྲུབ། དེར་ལོ་བཅུ་གཉིས་ལོན་ཏེ་གཞོན་ནུ་མར་གྱུར་པ་ན་ས་གས་ལེན་པར་བརྩམས་པ་ན། ཨུཏྤ་ལས་འཕྲིན་བྱས་ཏེ། དགེ་སློང་མའི་དགེ་འདུན་གྱིས་དགེ་སློང་མའི་སྡོམ་པ་བྱིན། དེ་དགྲ་བཅོམ་མར་གྱུར། དེ་ནས་ས་གས་བག་མ་ལེན་ཕྱིར་སྒོར་བྱུང་སྟེ་ལག་པ་ནས་བཟུང་བ་ན། དེ་ངང་པའི་རྒྱལ་པོ་བཞིན་དུ་ནམ་མཁའ་ལ་ལྡིང་བས། ས་ག་དད་དེ་སོང་བས། འདི་ནི་འཕྲིན་གྱི་ལས་ཀྱིས་བསྙེན་པར་རྫོགས་པ་ཞེས་བྱའོ། །དེར་བསྙེན་རྫོགས་དོན་གཉེར་ཐག་རིང་ནས་འོང་བ་རྣམས་ལམ་བར་དུ་ཉེར་འཚེས་ཤི་བར་གྱུར་པ་བཅོམ་ལྡན་འདས་ཀྱི་དྲུང་དུ་མ་ཕྱིན་པར་བསྙེན་རྫོགས་ཀྱི་བར་ཆད་དུ་གྱུར་པའི་སྐབས་དེ་གསོལ་པས། ངའི་ཉན་ཐོས་རྣམས་ཐག་རིང་པོ་ནས་འོངས་པས་སྡུག་བསྔལ་བར་འགྱུར་ཏ་རེ་སྙམ་དུ་དགོངས་ནས། དེ་ཕྱི་ན་དགེ་སློང་གི་དགེ་འདུན་གྱིས་རབ་ཏུ་བྱུང་བ་དང་། བསྙེན་པར་རྫོགས་པའི་བྱ་བར་གནང་ངོ་། །ཞེས་གསོལ་བཞིའི་ལས་ཀྱིས་རབ་བསྙེན་གཅིག་ཅར་དུ་སྒྲུབ་པའི་ཆོ་ག་གནང་། དེ་རྣམས་ལ་སྒྲ་ཡངས་པའི་དབང་དུ་བྱས་ན་ཆོ་གའི་སྒྲ་འཇུག་པས་སྔོན་ཆོག་བཅུ་ཞེས་བོད་ཀྱི་འདུལ་འཛིན་ཆེན་པོ་རྣམས་བཞེད། སྒྲ་དོག་པའི་དབང་དུ་ན། ད་ཆོག་གི་ཟླས་ཕྱེ་བའི་སྔོན་ཆོག་ནི་གསོལ་བཞིའི་ལས་ཀྱི་སྔོན་ཆོག་ཁོ་ནའོ། །དེར་དགེ་སློང་རྣམས་ལེགས་པར་མ་སྦྱངས་ཤིང་སྤྱོད་ལམ་རྒོད་བག་ཅན་དུ་གྱུར་པ་ཡང་། སྲིད་པ་ཐ་མ་པའི་གང་ཟག་འགའ་ཞིག་གིས་སྔོན་ཆོག་གིས་རྫོགས་པར་བྱས་པས་བྱུང་བས་ན། ཁྱིམ་པ་རྣམས་མ་དད་མུ་སྟེགས་པ་རྣམས་འཕྱ་བར་གྱུར་པའི་ཚེ། ད་ལྟར་གྱི་ཆོ་ག་གསུམ་སྟེ་ཚིགས་གསུམ་རིམ་གྱིས་ལེན་པ་དང་གནས་དང་གནས་པའི་ཚུལ་ཁྲིམས་སོགས་གསུངས། ཉེར་སྡེས་བསྙེན་པར་རྫོགས་ནས་ལོ་གཉིས་ལས་མ་ལོན་པ་གཞན་གྱི་མཁན་པོར་བྱས་པས་མཁན་པོ་བྱས་པ་ལོ་བཅུ་ལོན་དགོས་པ་དང་། ཡང་ལོ་བཅུ་ལོན་ཡང་འདུལ་བ་མི་ཤེས་པའི་དགེ་སློང་ཞིག་གིས་མཁན་པོར་བྱས་པས་གདམས་ངག་སྟོན་རྒྱུ་མ་བྱུང་བ་ལ་མཁན་པོར་བྱས་པ་ལ་མང་དུ་ཐོས་དགོས་པར་གསུངས་ཏེ། དེ་དག་ལས་འཕྲོས་ནས་ལྔ་ཕྲུགས་ཉི་ཤུ་རྩ་གཉིས་ཀྱི་རྣམ་བཞག་གསུངས་སོ། །འདུལ་བའི་བསྟན་བཅོས་ནི་སློབ་དཔོན་ཡོན་ཏན་འོད་ཀྱིས་མདོ་རྩ་དང་། ལས་བརྒྱ། དེའི་སློབ་མ་ཆོས་ཀྱི་བཤེས་གཉེན་གྱིས་རྒྱ་ཆེར་འགྲེལ། ཤཱཀྱ་འོད་ཀྱིས་སུམ་བརྒྱ་པ། ས་ག་ལྷས་མེ་ཏོག་ཕྲེང་རྒྱུད། ཁ་ཆེ་དགེ་འདུན་བཟང་པོས་ཀཱ་རི་ཀཱ་ལྔ་བཅུ་པ་སོགས་མཛད། བོད་དུའང་ཀུན་མཁྱེན་མཚོ་སྣ་བ་ཤེས་རབ་བཟང་པོས་མཛད་པའི་འདུལ་བའི་རྣམ་བཤད་ཉི་འདི་དང་མཐུན་པར་ཀརྨ་པ་མི་བསྐྱོད་པས་མདོ་རྩའི་འགྲེལ་ཆེན་མཛད་པར་སྣང་། མའི་འོད་ཟེར་དང་། མདོ་རྩའི་མཆན་འགྲེལ། བུ་སྟོན་རིན་ཆེན་གྲུབ་ཀྱི་གླེང་འབུམ་དང་མདོ་འགྲེལ། པཎ་ཆེན་དགེ་འདུན་གྲུབ་ཀྱི་གླེང་འབུམ་དང་། འདུལ་ཊཱིཀ་རིན་ཆེན་ཕྲེང་བ་སོགས་བསྟན་བཅོས་མཐའ་ཀླས། དེ་ཡང་བརྗོད་བྱའི་དབང་དུ་བྱས་ན་གཞི་བཅུ་བདུན་དུ་འདུ་སྟེ། མདོ་རྩ་ལྟར་ན། ༡༽ དང་པོ་རབ་བྱུང་གི་གཞི་ལ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་དུ་བྱས་ཏེ། སོགས་ཀྱིས་རབ་བྱུང་བསྙེན་རྫོགས་གཅིག་ཆར་དུ་བྱེད་པའི་ཆོ་ག་དང་། རབ་ཏུ་བྱུང་བ་དང་བསྙེན་པར་རྫོགས་པ་དེའི་ཕྱིར་སོགས་ད་ལྟར་གྱི་ཆོ་ག་གསོལ་བ་དང་བཞིའི་ལས་ཀྱི་རིམ་ཅན་དུ་སྒྲུབ་ཐབས། རང་བཞིན་ཉམས་པར་བྱས་པ་ཉིད་ནི་ཕུལ་བ་ཉིད་མ་ཡིན་ནོ། །ཞེས་སོགས་སྡོམ་པ་འབུལ་བའི་ཆོ་ག་དང་། བཅུག་རེག་ཉམས་སུ་མྱོང་བར་བྱས་ནའོ། །ཞེས་སོགས་ཐོབ་པ་མི་ཉམས་པར་སྲུང་བ་རྣམ་འབྱེད་ཀྱི་དོན་བཞིན་དགེ་སློང་ཕ་མའི་བསླབ་པ་རྣམས་བཤད་པ་དང་། ཉམས་པ་དང་འཆག་པ་གཉིས་ལྟུང་བ་ལ་སྦྱར་ན་ཉེས་བྱས་སོ། །ཞེས་སོགས་རབ་བྱུང་གི་གཞི་ཕལ་ཆེར་ལ་མཁོ་བ་སྤྱིར་བསྟན་པ་རྣམས་སོ། ༢༽ །གསོ་སྦྱོང་གི་གཞི་ལ། སྤྱོད་ཡུལ་དུ་ཞུགས་པས་རྣལ་འབྱོར་བསྒོམ་པར་མི་བྱའོ། །སོགས་ནས་བཟུང་། གསོ་སྦྱོང་བཅུ་བཞི་པ། བཅོ་ལྔ་པ། གནོད་པ་ཞི་བའི། མཐུན་པའི། བཀྲ་ཤིས་པའི་ཞི་གནས་ཀྱི་གསོ་སྦྱོང་དྲུག་གི་དབྱེ་བསྡུ། གོ་རིམ། སྒྲ་བཤད། ལག་ལེན་སོགས་རྒྱ་ཆེར་བསྟན། ༣༽ དབྱར་གནས་ཀྱི་གཞི་ལ། དབྱར་གནས་པར་ཁས་བླང་པར་བྱའོ། །ཞེས་སོགས་སྲོག་ཆགས་མི་གསོད་པ་སོགས་ཀྱི་ཆེད་དབྱར་གནས་པའི་གཞི། ཆོས་པ། གང་ཟག །དུས། གནས། ཡུལ། བསམ་པ། ཆོ་ག ཁས་བླངས་ཚུལ་ཇི་ལྟར་བྱ་བའོ། །དེ་ཡང་ཞག་༤༥ཁས་བླངས་པ་སྟེ། དབྱེ་ན་སྔ་ཕྱི་གཉིས་སོ། །དགག་དབྱེའི་གཞི་ལ། མི་སྨྲ་བའི་ཡི་དམ་བཅའ་བར་མི་བྱ། ཞེས་སོགས། ཡུལ། གང་ཟག །བྱེད་པ་པོ། དངོས་པོ། དུས། བསམ་པ། ཆོ་ག །དགོས་པ་ཅིའི་ཕྱིར་སོགས་ཀྱིས་བཤད། དབྱར་གྱི་དུས་ལྟུང་བ་གླེང་དྲན་སོགས་དགག་པ་དེ་སྐབས་དབྱེ་བའི་ལས། ༥༽ སྲ་བརྐྱང་གི་བཞི་ལ། སྲ་བརྐྱང་བཏིང་བར་བྱའོ། །ཞེས་སོགས། གདིང་ཚུལ། བརྐྱང་ཚུལ། དབྱུང་བའི་ཆོ་ག་སོགས་ཀྱི་སྒོ་ནས་བསྟན། དེ་ཡང་དགག་དབྱེ་ཟིན་ནས་ཟླ་བ་ལྔ་ཡི་བར་སྲ་བརྐྱང་བཏིང་བའི་སྟེང་དུ་དགེ་འདུན་རྣམས་ཀྱི་ཆོ་གས་སྤུངས་ཏེ་བཞག་པས་དེ་བར་འཆང་འབྲལ་འཇོག་གསུམ་ཁེགས་པ་སོགས་བག་ཡངས་དང་འབྲེལ་བ། ༦༽ གོས་ཀྱི་གཞི་ལ། མཚོན་གྱིས་མ་དྲས་པའི་གོས་བཅང་བར་མི་བྱའོ། །ཞེས་སོགས་གོས་ཇི་ལྟར་བསྒྲུབ་ཚུལ། རྙེད་པའི་གོས་ཀྱི་རྒྱུའི་རྣམ་བཞག །དེ་ལས་གྲུབ་པའི་གོས་ཀྱི་རྣམ་བཞག་སོགས་ཀྱིས་བསྟན། འཚོ་བའི་ཡོ་བྱད༡༣། མཁོ་བའི་ཡོ་བྱད། ལྷག་པའི་ཡོ་བྱད་དེ་གསུམ། ༧༽ ཀོ་པགས་ཀྱི་གཞི་ལ་ཡུལ་དབུས་ཀྱི་མཚམས་སོ། །ཞེས་སོགས་བཅང་དུ་རུང་བའི་ཡུལ་དང་། བཅང་ཚུལ་དངོས་སོགས་གསུངས། ༨༽ སྨན་གྱི་གཞི་ལ། སྨན་བསྟེན་པར་བྱའོ། །དེ་ནི་རྣམ་པ་བཞིའོ། །ཞེས་སོགས་དུས་རུང་། ཐུན་ཚོད་རུང་བ། ཞག་བདུན་པ། འཚོ་བཅང་བཅས་བཞིར་དབྱེ་བ། མཚན་གཞི། མཚན་ཉིད། དགོས་པ། སྒྲ་བཤད། བསྟེན་ཚུལ་སོགས་ཀྱི་སྒོ་ནས་སྨན་ཇི་ལྟར་བསྒྲུབ་ཚུལ། སྨན་དངོས་ཀྱི་སྣོད། བསྟེན་པའི་གང་ཟག །གཞག་པའི་གནས། རུང་བའི་ཁང་པ། སྨན་ལ་འཇུག་ཚུལ། རྒྱུ་མཐུན་ཟག་པ་འདོར་བའི་ཐབས་སོགས་བཤད། ༩༽ ལས་ཀྱི་གཞི་ལ། ཆོ་ག་ལས་འདས་ན་ལས་མི་ཆགས་སོ། །ཞེས་སོགས་དགེ་འདུན་དང་འབྲེལ་བའི་ལས་དངོས་དང་། གང་ཟག་དང་འབྲེལ་བའི་ཞར་བྱུང་དང་བཅས་བཤད། ༡༠༽ ཕྱིར་བཅོས་གཞི་ལ། གཞི་མ་ཞི་བར་ཤེས་ནས་གླེང་བ་པོས་སོ་སོར་ཤེས་པར་བྱས་ཤིང་མངོན་སུམ་དུ་འཇོག་པ་ལ་ནན་ཏུར་གྱི་ལས་བྱས་སོ། །ཞེས་སོགས་མི་མོས་པ་ནན་གྱིས་ཕྱིར་བཅོས་སུ་འཇུག་པ་ལ་ནན་ཏུར་དང་། ཕྱིར་བཅོས་དངོས་ཀྱི་རྣམ་བཞག་སྟེ། རྒྱུ་ནི་ནན་ཏུར་བཅུ་གཅིག་དང་། ངོ་བོ་ནི་རྩོད་པ་ལྟུང་བ་ཞི་བྱེད་གཉིས་སོ། ༡༡༽ །དུས་དང་དུས་མ་ཡིན་པ་བསྡུས་པ་འབྱུང་བའི་གཞི་ལ། འདི་ལ་དགེ་འདུན། ལྷག་མ་མི་ཤེས་པ་ཉིད་དང་བཅས་པའི་སེམས་ཉེ་བར་མ་བཞག་པར་བརྗོད་པ་དང་བྱས་སམ་མ་བྱས་ཅི་ལྟ་བུ་ཞིག་ཡིན་ཞེས་དྲན་པར་མི་ནུས་པ་ཉིད་དང་། ཞེས་སོགས། འཆབ་པའི་གཞི་བསམ་སྦྱོར་བ་མཐར་ཐུག་གི་ཡན་ལག་བཞིའི་སྒོ་ནས་བསྟན། ༡༢༽ ས་གཞན་ན་གནས་པ་སྤྱོད་པའི་གཞི་ལ། ལྷག་མའི་ཕྱིར་བཅོས་དངོས་གཞི་སྤོ་མགུ་དབྱུང་གསུམ་སྟེ། སྤོ་བ་དང་མགུ་བ་བྱ་བ་སྤྱོད་པ་དག་གིས། དགེ་སློང་རང་བཞིན་དུ་གནས་པ་ལ་མངོན་པར་སྨྲ་བ་དང་། ཕྱག་དང་། སྔོན་དུ་ལྡང་བ་དང་། ཐལ་མོ་སྦྱར་བ་དང་། གུས་པའི་ལས་དག་བདག་གིར་མི་བྱའོ། །ཞེས་པ་གཞན་ན་གནས་པའི་དབྱེ་བསྡུ། གྲལ། བསླབ་བྱ། སྒྲ་དོན་སོགས་བཤད། ༡༣༽ ཡོངས་སུ་སྦྱང་བའི་གཞི་ལ། མ་གྲགས་པ་ནི་གཞི་ཉིད་མ་ཡིན་ནོ། །ཞེས་སོགས་ཀྱི། ཡུལ་གང་ལ། གང་ཟག་གང་གིས་བསམ་པ་ཇི་ལྟ་བུས། དངོས་པོ་གང་གིས། དུས་ནམ་གྱི་ཚེ། ཆོ་ག་གང་གིས། དགོས་པ་ཅིའི་ཕྱིར། ཇི་ལྟར་བསྒྲུབ་པ་དགུས་བསྟན། ༡༤༽ ལས་ཕྱེ་བའི་གཞི་ལ། དགེ་འདུན་ཐ་དད་དུ་གནས་པ་ལ་མི་འདོད་པར་གླེང་བ་དང་། གླེང་བར་བྱེད་པ་ན་ལོག་པར་མི་བྱའོ། །ཞེས་སོགས་གཞི་བསམ་སྦྱོར་བ་མཐར་ཐུག་བཞིའི་སྒོ་ནས་ཞི་བྱ། དགེ་འདུན་བྱེ་བའི་རྒྱུ་སྤང་པ། གཉེན་པོ་བསྟེན་པ་གཉིས་ཀྱིས་བྱེ་བ་ཞི་བར་བྱེད་པའི་ཆོས་བཤད། ༡༥༽ འཁོར་ལོའི་དབྱེན་ནི། དགེ་འདུན་གྱི་དགེ་འདུན་ནི་ཆོས་ལས་ཐ་དད་པའི་དངོས་པོར་གསོལ་བས་སམ་དོན་དེས་ཚུལ་ཤིང་ལེན་དུ་གཞུག་པས་སོ། །ཞེས་སོགས་གཞི་བསམ་སྦྱོར་བ་མཐར་ཐུག་ཉེས་དམིགས་གནས་ཚད་གླིང་གང་ན་ཡོད་པའི་སྒོ་ནས་ཞི་བྱ་དང་ཞི་བྱེད་བསྟན། ༡༦༽ །རྩོད་པའི་གཞི་ལ། འཁྲུགས་ལོང་གི་རྒྱུ་བཞིའོ། །ཞེས་སོགས་ངོ་བོ་རྒྱུ་དབྱེ་བ་གསུམ་གྱི་སྒོ་ནས་ཞི་བྱ་དང་ཞི་བྱེད་ཀྱི་ཆོས་ཀྱིས་ཞི་བ་དང་། རང་བཞིན་གྱིས་ཞི་བ་གཉིས་ཀྱི་སྒོ་ནས་ཞི་བྱེད་བསྟན་ནོ། ༡༧༽།གནས་མལ་གྱི་གཞི་ལ། སོ་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ། །ཞེས་སོགས་ཀྱིས་ཕྱག་བྱ་བ་དང་མི་བྱ་བའི་ཚུལ། གཙུག་ལག་ཁང་བརྩིགས་པའི་ཆོ་ག་ཞར་བྱུང་དང་བཅས་པ། གཙུག་ལག་ཁང་བསྐྱང་བའི་ཆོ་ག །ཆོས་དང་ཟང་ཟིང་གི་ལོངས་སྤྱོད་ཇི་ལྟར་བྱ་ཚུལ་རྣམས་ཀྱི་སྒོ་ནས་བཤད་པ། དེ་ཡང་གླེང་གཞི་རྣམས་མེད་པ་ཙམ་མ་གཏོགས་ལུང་སྡེ་བཞིའི་བརྗོད་བྱ་ཐམས་ཅད་ཚང་ལ་མ་ནོར་བར་བཞུགས་ཤིང་། ལུང་གི་བར་སྡོམ་ནས་བྱུང་བ་དང་མཚུངས་ཀྱང་། དེ་དང་གོ་རིམ་ཅུང་ཟད་མི་འདྲ་ཙམ་ཡོད་དོ། །སྡོམ་རྒྱུན་གསུམ་དང་། བཤད་རྒྱུན་ལ་སྔ་འགྱུར་གྱིས་མདོ་རྩ་དང་། ཕྱིས་སུ་པཎ་ཆེན་ཤཱཀྱ་ཤྲཱི་པས་ས་པཎ་ལ་མདོ་རྩ་དང་། ཁྲོ་ཕུར་མེ་ཏོག་ཕྲེང་རྒྱུད་བཤད། ཕྱི་མ་མཁན་པོ་ཟིལ་གནོན་སེང་གེས་ཊཱི་ཀ྄་མཛད་པ་ལྟར་གྱི་གསུང་རྒྱུན་དང་། ཕྱིས་སུ་ཀུན་མཁྱེན་རོང་པོས་པཎ་ཆེན་ནགས་རིན་དང་བཅས་རྒྱ་དཔེ་གསར་དུ་བཅོས་ནས་རྒྱུ་གསུམ་གྱིས་བསྔགས་ཏེ་རྣམ་བཤད་ཀྱིས་བཤད་རྒྱུན་གཏན་ལ་ཕབ་པ་ནས་ཡིག་ཆ་སོགས་རྒྱ་ཆེར་དར་ཀྱང་དེང་སང་རྒྱུན་ནུབ་བོ་སྙམ་ལ། མདོ་རྩ་ནི་བྱང་ཆུབ་སེམས་དཔའི་ཕྲིན་ལས་ཀྱིས་དེང་སང་ཡང་དར་ཞིང་རྒྱས་པར་མཐོང་། འཁོར་ལོ་བར་པའི་དངོས་བསྟན་སྟོང་ཉིད་ཀྱི་རིམ་པ་སྟོན་པ་དབུ་མ་རིག་ཚོགས་དྲུག་སོགས་ཏེ། བོད་སྔ་མ་ཐམས་ཅད་ཀྱིས་རང་རྒྱུད་དང་། པ་ཚབ་ལོ་ཙཱ་བས་ཐལ་འགྱུར་གྱི་སྲོལ་བཏོད། སྦས་དོན་མངོན་རྟོགས་ཀྱི་རིམ་པ་མདོ་སྡེ་མངོན་རྟོགས་རྒྱུན་གྱི་བཤད་སྲོལ་རྔོག་ལོ་ཆེན་པོས་པཎྜི་ཏ་འབུམ་ཕྲག་གསུམ་པ་སོགས་ལས་གསན་ཏེ་དར། འཁོར་ལོ་ཐ་མ་མངོན་པའི་སྡེ་སྣོད་ལས། ཐེག་དམན་གྱི་མངོན་པར་མཛོད་ཚིག་ལེའུར་བྱས་པའི་བཤད་སྲོལ་སྔ་འགྱུར་དུས་སུ་བྱུང་ཡང་བར་སྐབས་སུ་ཆད་པ་ལ། ཕྱིས་སུ་པཎྜི་ཏ་སྨྲྀ་ཏིས་ཁམས་སུ་འཆད་ཉན་གྱིས་སྲོལ་བཏོད་པའི་རྒྱུན་ལས་དར་ཞིང་། མཛོད་ལ། ཁམས་བསྟན་པའི། དབང་པོ་བསྟན་པའི། འཇིག་རྟེན་བསྟན་པའི། ལས་བསྟན་པའི། ཕྲ་རྒྱས་བསྟན་པའི། ལམ་དང་གང་ཟག་བསྟན་པའི། ཡེ་ཤེས་བསྟན་པའི། སྙོམས་འཇུག་བསྟན་པའི། གནས་ཏེ་བརྒྱད་དོ། །ཐེག་ཆེན་མངོན་པའི་བཤད་སྲོལ་ནི་ཆེར་མ་བྱུང་ངོ་། །ཁྱད་པར་གསང་སྔགས་རྡོ་རྗེ་ཐེག་པ་ནི། འདོད་ཆགས་ཀྱི་བྱེ་བྲག་བཞི་དང་མཐུན་པར་བྱ་སྤྱོད་རྣལ་འབྱོར་བཞིར་བསྟན་ལ། དེ་ཡང་སྔ་མ་གཉིས་ཀྱི་བཤད་སྲོལ་ནི་བོད་འདིར་ཆེས་མ་དར་ལ། རྣལ་འབྱོར་གྱི་རྒྱུད་ཀྱི་འགྲེལ་པ་སྐོར་ལོ་ཆེན་རིན་ཆེན་བཟང་པོ་སོགས་ནས་བརྒྱུད་ཅིང་མཁས་གྲུབ་བུ་སྟོན་རིན་པོ་ཆེས་རྩལ་དུ་བཏོན། བླ་མེད་ལ། ཕ་རྒྱུད་གཤེད་སྐོར་དང་གསང་འདུས། མ་རྒྱུད་བདེ་ཀྱེ་གཉིས་སོགས་ཀྱི་བཤད་སྲོལ་དང་། གཉིས་མེད་དམ་རྒྱུད་སྡེ་གཞན་དང་བཤད་སྲོལ་མི་མཐུན་པ་དཔལ་དུས་ཀྱི་འཁོར་ལོ་སོགས་ཀྱི་སྨིན་གྲོལ་བཤད་དཀའི་རིམ་པ་ནི། མར་དཔྱལ་འབྲོག་བཤོས་མལ་དང་རྭ་ལོ་གྱི་གྱོ་སོགས་ཀྱི་ལོ་ཙཱ་བ་མང་པོས་བསྒྱུར་བཤད་ཀྱིས་གཏན་ལ་ཕབ་སྟེ་ཤིན་ཏུ་རྒྱས་པར་གྱུར་ཏོ། །དེ་ཡང་མདོར་བསྡུ་ན་བཀའི་མཚན་ཉིད་ནི། རྒྱུད་བླ་མས། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། །ཁམས་གསུམ་ཀུན་ན་ཉོན་མོངས་སྤོང་བྱེད་གསུངས། །ཞི་བའི་ཕན་ཡོན་བརྗོད་པར་མཛད་པ་གང་། །དེ་ནི་དྲང་སྲོང་གསུང་ཡིན་ལྡོག་པ་གཞན། ཞེས་བརྗོད་བྱ་དོན་ཆེན་པོ་དང་ལྡན་པ། རྗོད་བྱེད་དྲི་མ་མེད་པའི་ཆོས་དང་ཉེ་བར་འབྲེལ་བ། སྤང་བྱ་ཁམས་གསུམ་གྱི་ཉོན་མོང་པ་སྤོང་བྱེད། གཉེན་པོ་ཞི་བ་མྱང་འདས་ཀྱི་ཕན་ཡོན་སྟོན་པ་སྟེ་ངག་མཚན་ཉིད་བཞི་ལྡན། བདག་རྐྱེན་སངས་རྒྱས་འཕགས་པ་ལས་བྱུང་བ། སྒྲ་བཤད་སུ་བྷཱ་ཥི་ཏ་ཞེས་ལེགས་པར་གསུངས་པ། དབྱེ་ན་དུས་ཀྱི་སྒོ་ནས་འཁོར་ལོ་གསུམ། བརྗོད་བྱའི་ཀུན་རྫོབ་དང་། དོན་དམ་བདེན་པ་གཉིས་སྟོན་པའི་དྲང་ངེས་གཉིས། རྗོད་བྱེད་ཀྱི་སྒོ་ནས་གསུང་རབས་ཡན་ལག་བཅུ་གཉིས། གཉེན་པོའི་སྒོ་ནས། ཐེ་ཚོམ་གྱི་གཉེན་པོར་མདོ་སྡེ། མཐའ་གཉིས་ལ་ཞེན་པའི་གཉེན་པོར་འདུལ་བ། རང་ལྟ་མཆོག་འཛིན་གྱི་གཉེན་པོར་མངོན་པའི་སྡེ་སྣོད་གསུམ། གདུལ་བྱའི་སྒོ་ནས་དམན་པ་དང་། རྒྱ་ཆེན་པོ་ལ་མོས་པར་ཐེག་པ་དམན་མཆོག་གཉིས། བདག་རྐྱེན་གྱི་སྒོ་ནས། ཞལ་ནས་གསུངས་པ། རྗེས་སུ་གནང་བ། བྱིན་གྱིས་བརླབས་པ་གསུམ། ཕྱི་མ་ལའང་སྐུ་གསུང་ཐུགས་ཀྱིས་བྱིན་གྱིས་བརླབས་པ་དང་། ཐུགས་ལའང་ཐུགས་ཏིང་ངེ་འཛིན། ཐུགས་ཐུགས་རྗེ། ཐུགས་བདེན་པའི་སྟོབས་ཀྱིས་བྱིན་གྱིས་བརླབས་པ་གསུམ་དུ་དབྱེ། བསྟན་བཅོས་ནི་གང་ཞིག་རྒྱལ་བ་སྟོན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་འབྲེལ་ན། །དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་པ་ལྟར། བཤད་བྱ་རྒྱལ་བ་སངས་རྒྱས་ཀྱི་སྟོན་པ་འབའ་ཞིག་གི་དབང་དུ་བྱས་ནས་སྟོན་གྱི་རང་བཟོ་མིན་པ། འཆད་པ་པོའི་ཁྱད་པར་ཆོས་དང་དོན་ལེགས་པར་ཤེས་ཤིང་། རྙེད་བཀུར་ལ་སོགས་པར་ཆགས་པའི་ཕྱིན་ཅི་ལོག་གི་རྣམ་གཡེངས་མེད་པ། འབྲས་བུའི་ཁྱད་པར་ཐར་པ་བླ་ན་མེད་པའི་མྱང་འདས་ཐོབ་པའི་ཆེད་དང་། ཐབས་ཀྱི་ཁྱད་པར་དེའི་ལམ་སྟོན་པ་དང་རྗེས་སུ་མཐུན་པ་སྟེ་ཡོན་ཏན་བཞི་དང་ལྡན་པ་ནི་བསྟན་བཅོས་ཀྱི་མཚན་ཉིད། བདག་རྐྱེན་བྱང་སེམས་འཕགས་པ་ནས་སོ་སྐྱེའི་བར་གྱི་ངག་ཚིག །སྒྲ་བཤད་ཤཱསྟྲ་ཞེས་པ་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པ། དབྱེ་ན་མཆོག་དམན་གྱི་སྒོ་ནས། དོན་མེད་དོན་ལོག་དོན་ལྡན་དང་། །ངན་གཡོ་བརྩེ་བྲལ་སྡུག་བསྔལ་སྤོང་། །ཐོས་རྩོད་སྒྲུབ་པ་ལྷུར་ལེན་པའི། །བསྟན་བཅོས་དྲུག་བྲལ་གསུམ་དུ་འདོད། །ཅེས་དགུར་བཤད། བྱེད་ལས་ཀྱི་སྒོ་ནས་བཀའ་རྒྱ་ཆེན་པོ་སྡུད་པ། ཟབ་མོ་རྣམ་པར་འབྱེད་པ། འཁྲུགས་པ་བསྡེབས་པ་གསུམ་བརྗོད་པའི་སྒོ་ནས་ཇི་སྙེད་པ། ཇི་ལྟ་བ། ཐར་པ་དང་ཐམས་ཅད་མཁྱེན་པའི་ལམ་སྟོན་པ་གསུམ། བཤད་བྱའི་སྒོ་ནས་བཀའ་སྤྱིའི་དགོངས་འགྲེལ་དང་བྱེ་བྲག་གི་དགོངས་འགྲེལ་གཉིས་སོ། །དེ་ཡང་བཀའ་དང་བསྟན་བཅོས་མི་འགལ་བ་དང་། འགལ་བའི་ལུགས་གཉིས་ལས་འདིར་སྔ་མ་འཐད་ཕྱོགས་སུ་བཟུང་ངོ་། །རིག་གནས་ཆུང་བ་ལྔའི་དང་པོ་ཚིག་རྒྱན་ཤེས་ན་སྙན་དངགས་ལ་མི་རྨོངས་ཞེས་པ་ནི། སྤྱིར་འདིའི་ལམ་སྲོལ་མང་མོད། ཡོངས་སུ་གྲགས་པ་དཔལ་ལྡན་དབྱུག་པ་ཅན་གྱི་རྗེས་སུ་འབྲངས་ན། ལུས་རྒྱན་སྐྱོན་སེལ་གསུམ་དུ་བསྡུ་སྟེ། དང་པོ་ལའང་བཅད་ལྷུག་སྤེལ་གསུམ། གཉིས་པ་ལ་ཐུན་མོང་དང་ཐུན་མོང་མ་ཡིན་པ་གཉིས་སྔ་མ་ལ་ཤར་ལྷོའི་ལམ་སྲོལ་བཅུ་དང་། ཕྱི་མ་ལ་དོན་རྒྱན༣༧། སྒྲ་རྒྱན༢། གབ་ཚིག་གི་རྒྱན་༡༦དང་། གསུམ་པ་སྐྱོན་བཅུ་སྤོང་པའི་ཚུལ་དང་བཅས་པས་སོ། །སྡེབ་སྦྱོར་ཤེས་ན་ཚིགས་བཅད་ལ་མི་རྨོངས་པ་ནི། ཕྱི་རོལ་གྱི་དྲང་སྲོང་དམར་སེར་ཅན་དང་། རྒྱལ་བའི་ལྷས་མཛད་པའི་གཞུང་རྩ་འགྲེལ་དང་། ཕྱིས་སུ་ཡོན་ཏན་བརྒྱད་དང་ལྡན་པ་སློབ་དཔོན་རིན་ཆེན་འབྱུང་གནས་ཞི་བའི་ཞབས་ཀྱི་སྡེབ་སྦྱོར་རིན་ཆེན་འབྱུང་གནས་སྟེ། དེ་ཡང་བྲྀཏྟ་དང་ཛཱ་ཏི་གཉིས་ལ་ནང་གསེས་སུ་དབྱེ་བ་གསུམ་རེ་དང་། དེ་རེ་རེ་ལའང་མཐའ་ཀླས་ཤིང་། མཉམ་པའི་བྲྀཏྟ་ཁོ་ན་ལ་འཇུག་པའི་ངོ་མཚར་རྟོགས་བྱེད་ཀྱི་སྦྱོར་བ་དྲུག་དང་བཅས་པའོ། །མངོན་བརྗོད་ཤེས་ན་མིང་ལ་མི་རྨོངས་པ་ནི་དོན་གཅིག་ལའང་མིང་དུ་མའི་སྒོ་ནས་བསྙད་པ་དང་། མིང་གཅིག་དོན་དུ་མར་འཇུག་པ་སོགས་ཀྱིས་ཤེས་བྱར་སྲིད་དོ་ཅོག་གི་མིང་དོན་ཕལ་མོ་ཆེ་འཆད་པ་དང་བཅས་པ་སྟེ། དེ་ཡང་བསྟན་བཅོས་འཆི་མེད་མཛོད་རྩ་འགྲེལ་དང་། མུ་ཏིག་ཕྲེང་བ་ལ་སོགས་པའོ། །ཟློས་གར་ཤེས་ན་སྐད་རིགས་ལ་མི་རྨོངས་པ་ནི། སྔོན་བྱུང་གི་གཏམ་ལས་བརྩམས་ཏེ་སྐད་རིགས་བཞིས་བརྗོད་པའི་གླུ་དང་། རྐང་ལག་གི་གར་ལ་སོགས་པ་གཙོ་བོར་བྱེད་པ་སྟེ། དེ་ཡང་ལག་པའི་ཟླུམ་སྐོར་དང་པད་སྐོར་ལ་སོགས་པ་ལན་མང་དུ་ཟློས་ཀྱང་མཛེས་ཤིང་ཡིད་དུ་འོང་བའི་གར་དུ་གྱུར་པ་སྟེ་ཡན་ལག་ལྔ་དང་ལྡན་པའོ། །དེ་གང་ཞེ་ན་ཟློས་གར་དང་། མདོ་འཛིན་པ་དང་། རོལ་མོ་བ་དང་། ཆས་ཞུགས་པ་དང་བཞད་གད་པ་སྟེ་ལྔའོ། །དེ་ཡང་ཡང་གི་སྦྱོར་བ་དུ་མ་དང་། ལུས་ཀྱི་རྣམ་འགྱུར་སྣ་ཚོགས་པ་དང་། དབྱངས་ཀྱི་བྱེ་བྲག་ཐ་དད་པ་དང་། ལྷའི་རྗེས་སུ་སྐྱེས་པ་དང་། དྲང་སྲོང་གི་རྗེས་སུ་སྐྱེས་པ་དང་། བློ་གསལ་གྱི་རྗེས་སུ་སྐྱེས་པ་སོགས་དང་། འདྲེན་པ་དང་། དཀྱུས་གཅིག་ཏུ་སྤྱར་བ་དང་། དཀྱུས་གཉིས་པ་དང་། ཕྱེད་ཕྱི་མ་ལ་སོགས་པའི་མཚན་ཉིད་རྣམས་དང་ལྡན་ཞིང་རྗོད་བྱེད་ཀྱི་ཚིག་གལ་ཆེར་སཾ་སྐྲྀ་ཏ། བུད་མེད་ལ་སོགས་པའི་ལད་མོ་བགྱིད་པ་ལ་པྲ་ཀྲྀ་ཏ། བཞད་གད་དང་ཅོ་འདྲི་བ་ལ་སོགས་པར་ཨ་བ་བྷྲམ་ཤ །འབྱུང་པོ་རོ་ལངས་ཀྱི་ཚུལ་དང་། ཁྲོས་ཚིག་དང་སྡིགས་ཚིག་ལ་སོགས་པ་རྣམས་པི་ཤཱ་ཙཱིའི་སྐད་རིགས་ཀྱིས་འདྲེན་པ་སོགས་ཏེ། འོན་ཀྱང་བོད་དུ་དགོས་པ་ཆེར་མ་གཟིགས་ནས་བསྒྱུར་བཤད་ཀྱིས་གཏན་ལ་ཕབ་པར་མ་མཛད་དོ། །སྐར་རྩིས་ཤེས་ན་གྲངས་ཀྱི་གནས་ལ་མི་རྨོངས་པ་ནི། འདི་ལྟར་བརྩམ་བྱ་དུས་དང་། གཟུགས་ཅན་གཉིས་དང་རྩོམ་བྱེད་གྲངས་ཀྱི་གནས་ཏེ་གསུམ་ལས། དང་པོ་དུས་ཀྱི་ཚད་ཇི་ལྟར་བརྩམ་པ་ནི། སེམས་ཀྱི་རྣམ་པར་རྟོག་པ་སྐད་ཅིག་མ་ལ་དུས་མཐའི་སྐད་ཅིག་གཅིག །དེ་བརྒྱ་ཉི་ཤུ་ལ་བྱ་བ་རྫོགས་པའི་སྐད་ཅིག་མ་གཅིག །དེ་དྲུག་ཅུ་ལ་ཐང་གཅིག །དེ་སུམ་ཅུ་ལ་ཡུད་ཙམ་གཅིག །དེ་སུམ་ཅུ་ལ་ཉིན་ཞག་གཅིག །དེ་སུམ་ཅུ་ལ་ཟླ་བ་གཅིག །ཟླ་བ་གཉིས་ལ་དུས་གཅིག །དེ་གསུམ་ལ་བགྲོད་པ་གཅིག །དེ་གཉིས་ལ་ལོ་གཅིག །དེ་ལ་དུས་བཞི་དང་། དུས་བཞི་ཆེན་པོ་དང་། བསྐལ་ཆུང་དང་། བསྐལ་ཆེན་ལ་སོགས་པ་རྣམས་ཀྱི་རྣམ་བཞག་འཇོག་པར་བྱེད་པ་དང་། ཡང་སྐྱེས་བུ་ནད་མེད་ཀྱི་དབུགས་དྲུག་ལ་ཆུ་སྲང་གཅིག །དེ་དྲུག་ཅུ་ལ་ཆུ་ཚོད་གཅིག །དེ་དྲུག་ཅུ་ལ་ཉིན་ཞག་གཅིག་དང་། ཚེས་དང་། རེས་གཟའ། རྒྱུ་སྐར་ལ་སོགས་པ་རྣམས་ཀྱི་རྣམ་བཞག་འཇོག་པར་བྱེད་དོ། །གཉིས་པ་གཟུགས་ཅན་གྱི་ཚད་ཇི་ལྟར་འཇལ་བ་ནི། རྫས་ཀྱི་རྡུལ་ཕྲ་རབ་བདུན་ལ་རྡུལ་ཕྲན་གཅིག །དེ་བཞིན་བདུན་འགྱུར་དུ་བསྒྲེས་ཏེ། ལྕགས་རྡུལ། ཆུ་རྡུལ། རི་བོང་གི་རྡུལ། ལུག་རྡུལ། གླང་རྡུལ། ཉི་ཟེར་གྱི་རྡུལ། སྲོ་མ། ཤིག །ནས། སོར་མོ་ཉེར་བཞི་ཁྲུ་གང་། ཁྲུ་བཞི་གཞུ་འདོམ། དེ་ལྔ་བརྒྱ་རྒྱངས་གྲགས་གཅིག་གམ་དགོན་པ། དེ་བརྒྱད་ལ་དཔག་ཚད་གཅིག་གོ །དེས་འཇིག་རྟེན་གྱི་ཚད་འཇལ་བར་བྱེད་དོ། །ཡང་དཔངས་ཚད་འཇལ་བར་བྱེད་པ་ལ་སོར། ལྕི་ཚད་ལ་སྲང་། བུངས་ཚད་ལ་བྲེ་སོགས་ཀྱང་ངོ་། །གསུམ་པ་རྩི་བྱེད་གྲངས་གནས་དངོས་ནི་རྐྱང་ཁུག་གཉིས་སམ། བྱེ་རྟོག་དང་འཇམ་དཔལ་རྩ་རྒྱུད་སོགས་ལས་འབྱུང་བའི་གྲངས་གནས་སོགས་སོ། །གཞན་ཡང་། ཨངྐི། འབྲི། བསྣན། བགོད་བསྒྱུར་ཏེ་ཡི་གེའི་ཡན་ལག་ལྔ། གཟའ། ཚེས། སྐར་མ། སྦྱོར་བ། བྱེད་པ་སྟེ་རྩིས་ཀྱི་ཡན་ལག་ལྔ་དང་། གཟའ་སོ་སོའི་མྱུར་བ་དང་། བུལ་བ་དང་། དྲང་པོ་དང་། འཁྱོག་པོའི་རྐང་པ་གཉིས་བཙལ་བ་དང་། ཁྱིམ་དང་ལོངས་སྤྱོད་དང་། དེ་དག་གི་དགེ་ལེགས་ཀྱི་རྩིས་དང་། སྒྲ་གཅན་དང་། དུས་མེ་དང་། དེ་དག་གིས་ཉི་ཟླ་འཛིན་པའི་རྩིས་དང་། དུ་བ་མཇུག་རིང་དང་། འཆར་ནུབ་ལ་སོགས་པ་ཕྱིའི་ལས་ཀྱི་རྩིས་དང་། ནང་གི་རྩ་རླུང་དང་། ཉི་མ་དང་། ཟླ་བ་དང་། གཟའ་དང་། རྒྱུ་སྐར་དང་། དབུགས་དང་། ཆུ་སྲང་དང་། དབྱུ་གུ་དང་། འཕོ་བ་དང་། ཐུན་ཚད་དང་། ཉིན་མཚན་དང་། དེ་དག་བརྟེན་པ་ཡེ་ཤེས་འཆར་བ་དང་། ནུབ་པ་ལ་སོགས་པ་དང་། གཞན་ཡང་ཐུན་མོང་མིན་པའི་དབྱེ་བ་སོགས་མངོན་པར་འཚང་རྒྱ་བའི་བར་རྣམས་དུས་ཀྱི་འཁོར་ལོའི་རྒྱུད་འགྲེལ་ལས་རྒྱ་ཆེར་བསྟན་པ་བཞིན་ནོ། །སྨྲས་པ། རྨད་བྱུང་ཚིག་གི་ག་བུར་བཅུད། །གཅུས་པའི་ངག་གི་དཔལ་གྱི་དུམ། །འདི་ཡང་བློ་གསལ་གདུང་སེལ་སླད། །བློ་གྲོས་མ་ལ་ཡ་ལས་འཁྲུངས། ཤུབྷཾ། ཞེས་སྣང་།། །། ༈

[edit]

na mas+sarba dz+nyA ya/__gang gi mkhyen pa'i ye shes kyis/__/reg pas rmad byung spobs pa'i mchog__/sbyin mkhas 'jam mgon bla ma'i zhabs/__/byang chub bar du bsnyen byas nas/__/rang ngam thar 'dod gzhan kyang rung /__/blo gros sgo 'phar dbye ba'i slad/__/sna tshogs gtam gyi muk+ti kaH__/yi ge'i srad bur bstar 'di'o/__/spyir thar pa dang thams cad mkhyen pa'i go 'phang rin po che don du gnyer ba'i gang zag des bslab par bya ba'i gnas kyi gtso bo ni shes bya rig pa'i gnas lnga yan lag dang bcas pa ste/__de yang thog ma kho nar sgra dang /__don la mkhas pas de dang de yi log par rtog pa drung nas phyung zhing yang dag pa'i rnam dpyod phul du byung ba'i rkang stegs mthon por bsgrubs te sde snod gsum dang rgyud sde bzhi'i grong khyer chen por 'jug par bya ba ni sngon byon gyi skyes bu dam pa rgyal ba dgyes pa'i lam srol la zhugs pa rnams dang tshul mthun pa yin te/__byang chub sems dpa' shAn+ta de bas/__rgyal sras rnams kyis mi slob pa'i/__/dngos de gang na yod min pa/__/de lta bas na mkhas pa la/__/bsod nams mi 'gyur gang yang med/__/ces so/__/'o na dpal dus kyi 'khor lor/__yul gyi skad rnams kyis ni don go na/__bstan bcos sgra dag gis ni ci zhig bya/__/sogs dang /__lang gshegs las/__byis pa ngan pa rtog ge ba/__/ro dang 'dra bas rnam par brtag__/ces sogs sgra tshad la smad par mdzad pa dag ci zhe na/__de dang de la mngon par zhen pa'i nga rgyal can gyi phyi rol pa dag gi khengs pa gzhom pa sogs kyi slad du yin gyi sgra ji bzhin du bzung bar mi bya zhing /__de bzhin du/__slob dpon tsan+d+ra go mIs/__bud med yan lag rul ba dri nga mi sdug pa sogs gsungs pa'ang 'dod pa'i gtam gyi snyan dngags mi bya ba la dgongs kyi/__gzhan du/__mdo las/__dam pa'i chos gsal bar bya ba'i phyir snyan ngag bya'o/__/zhes sogs gsungs pa'i phyir ro/__/de yang rig pa'i gnas thams cad bsdu na phyi nang gnyis su 'du zhing /__cung zad spro na tshar bcad rjes bzung gsum dang /__sgra tshad bzo gso nang rig pa ste lnga dang /__de steng snyan ngag sdeb sbyor zlos gar mngon brjod skar rtsis bsnan pa'i bcu dang /__'dul ba lung rnam 'byed las gsungs pa'i rig pa'i gnas bco brgyad la sogs pa'i bar te/__gzhan du na shin tu rgyas par dbye na sgyu rtsal rigs rnams kyang 'dren pas/__de'i tshe rgya che rol pa las sgyu rtsal 98dang /__de nyid lung phran tshegs kyi 'grel par drug cu rtsa bzhir bsdus la/__de las rnam grangs gzhan pa bye brag rtogs byed du sde tshan bzhir bsdu ba dang rjes su mthun par slob dpon dAN+DIs kyang sgyu rtsal yongs su bcad pa zhes le'u bzhi pa zhig mdzad yod par grags so/__/gzhan yang /__tshong pa/__rdza mkhan/__phreng mkhan/__chang 'tshong /__phyugs 'tsho ba/__'dreg mkhan/__'bru mar 'tshir ba/__mgar ba/__shing mkhan/__phywa mkhan/__tha ga pa/__ko pags mkhan/__rkyal chen pa/__btso blags mkhan/__smyig ma mkhan/__bshan pa/__gdol ba mkhan/__shing rta mkhan te bzo sbyangs bco brgyad dang /__rin po che/__sa gzhi/__gos/__ljon shing /__rta/__glang po/__skyes pa/__bud med brtag pa ste brtag pa brgyad la sogs pa'ang mdo sde 'ga' las bshad cing /__drang srong le'u'i bus/__sen mos 1'brad dang sos 'debs 2dang /__/'khyud pa 3dang ni mthang sbyar dang /__/bya ba 5dang ni lag pas 6gdab/__/smra ba'i bye brag dag dang ni/__/skyes pa'i steng du myul dang brgyad/__/re re la yang brgyad brgyad de/__/drug cu rtsa bzhir shes par bya/__/zhes nang gi sgyu rtsal drug cu rtsa bzhi zhes 'dod pa'i bstan bcos las bshad pa sogs mtha' klas mod/__'dir re zhig mkhas pa kun la yongs su grags pa'i rig pa'i gnas che chung bcu las brtsams te cung zad bshad na rna ba blags te nyon cig dang yang dag pa'i ngag sbyin par bya'o/__/de la dang po gzhan rjes su bzung ba bzo rig pa ni/__gtso bor lus ngag yid gsum gyis bsdus pa ste/__dang po la'ang gtso bo dang phal pa gnyis las/__dang po ni sku gsung thugs kyi rten bzhengs pa dang /__dkyil 'khor bri thig las rab 'byams kyi bya ba phal cher ro/__/phyi ma ni bzo sbyangs bco brgyad kyi nang tshan las phal mo che zhig go__/ngag bzo la'ang gtso bo ni/__dbyangs kyi yan lag drug dang ldan pa'i rdo rje'i glu la sogs pa dang /__chos kyi 'bel gtam gyis mtshon pa dang /__phal pa ni 'jig rten pa rnams dga' ba skyed pa'i glu dbyangs kyi brjod pa dang /__'dod pa'i gtam dang /__gshags 'byed pa la sogs pa'o/__/yid bzo'i gtso bo ni thos bsam sgom pa gsum dang /__phal pa ni lugs kyi bstan bcos las byung ba bzhin blang dor gyi gnas la mkhas shing sgrin pa'o/__/gso ba rig pa ni/__rig byed bzhi'i nang tshan tshangs pa'i zhal dbus ma las byung ba'i tshe'i rig byed dang don gcig ste/__gzhan du bdag cag gi ston pas kyang sde snod gsum dang rgyud kyi rdo rje'i gnas chen po rnams las kyang zur gyis bstan to/__/deng sang grags pa brtan pa'i dpal ldan rgyud bzhi zhes grags pa 'di mkhas pa'i dbang po legs bshad 'tshol gyis/__phyi ltar bka'/__nang ltar paN+Di ta'i bstan bcos/__gsang ba bod du brtsams par bzhed pa'i sgrub byed rgyas par bkod la/__rgyal po paN+Di ta bud+d+ha ab+d+hi ni bdag cag gi ston pas drang srong lhung ba ri dwags kyi nags su gsungs pa nyid bod du bai ro dang g.yu thog rnying mas bsgyur zhing /__gcig shos gter dang /__mnga' bdag gi zhal ngo nang brgyud du gnas pa/__grwa mngon pas gter nas drangs pa dang snyan brgyud gnyis ka g.yu thog gsar mas gsan nas bod la nye bar mkho ba 'ga' zhig bsnan pa sogs su bzhed do/_/de yang dpal ldan dpa' bos mdzad pa'i yan lag brgyad par gnas drug tu bsdus pa'i/__dang po mdo ga 1nas la le'u30/__gnyis pa lus gnas 6la/__gsum pa nad gnas 16la/__bzhi pa gso ba'i gnas 22la/__lnga pa cho ga grub pa 6la/__drug pa phyi ma'i gnas te bsdoms pas le'u'i 120bdag nyid can dang /__de'i 'grel pa kha che zla ba mngon dgas mdzad pa sogs mang ngo /__/brjod bya ni/__yan lag brgyad dam/__gso bya/__gso byed/__ji ltar gso ba/__gso ba po rnam pa bzhir 'dus pa'i tshul rgyas par 'chad du yod mod kyi re zhig ma spros so/__/log smra tshar bcad pa sgra rig pa ni/__lung du ston pa'i sgra las legs par sbyar ba'i skad kyis bsgrub pa'i tshul te/__de la thun mong gi brjod bya la/__ngo bo gzugs dang byed las dang /__/nges tshig dbye bsdu klog tshul lo/__/ces pas yi ge dang /__dpang los/__yi ge gnyis sam gsum 'dus pas/__/don gyi ngo bo rjod byed pa/__/ming yin don la blo gzhol phyir/__/zhes dang /__smra sgor/__de yang ming ni thog ma dang /__/rjes su grub pa rnam pa gnyis/__/zhes bshad pa'i rgyu mtshan la ma ltos par tsha zhing sreg pa la me zhes btags pa lta bu 'dod rgyal thog ma'i ming /__rgyu mtshan la ltos pa sngar tha snyad la grags zin zhig gis gzhan la btags pa bram ze'i khye'u kha che sna nyag la seng+ge zhes brjod pa lta bu rjes grub btags pa'i ming /__phyi ma la'ang btags pa'i rjes grub ces rlung nad pus mor zhen pa la lce spyang mgo zhes brjod pa dang /__dngos ming dang mthun par 'jug pa mthun pa'i rjes grub phan byed la sman ces pa lta bu/__dngos btags gang dang yang ma 'brel ba gza' mig dmar la bkra shis su brjod pa lta bu log pa'i rjes grub ste gsum dang /__gzhan yang rgyu la 'bras ming btags pa bshal sman skyugs sman/__'bras bur rgyu ming btags pa mkhris nad dang rlung nad/__rten la brten pa'i ming srog gi rlung /__cha shas la tshogs pa'i ming sman rnams tshang /__ya gyal gyi ming cu gang bde byed/__gtso bo'i ming ga bur25/__nus pa'i sgo nas rin chen tsha grang gi sbyor ba/__byed las kyi sgo nas gtar bsreg ces pa lta bu yang ngo /__/tshig la/__gsung rab spyi la grags pa ni/__dpang los/__ming gnyis sam ni mang po yi/__/don gyi khyad par rjod byed pa/__/dam chos mngon par gsungs pa yi/__/tshig yin yi ge 'dus pa nyid/__/ces so/__/brda sprod pa'i lugs la/__'chi med mdzod las/__rjod byed bstan bcos sgra la ni/__supa? dang tinga?'i mtha' can tshig__/ces so/__/de yang slob dpon blo gros brtan pas/__don gyi ngo bo brjod pa ming /__/de yi khyad par ston pa tshig__/gang yang mi ston yi ge'o/__/zhes so/__/brda sprod thun mong ma yin pa'i brjod bya ni/__/rang bzhin byings dang ming yin te/__/zhes pa ltar mdo dang glegs bam las byung ba'i byings dang /__byings dang rnam dbye bor ba'i don dang ldan pa ni rtags sam ming ngo /__/rkyen ni sgra'i rang bzhin ming tshig gang rung du sgrub par byed pa ste/__dbye na byings rtags su/__tshig tu/__byings su sgrub pa gsum/__rtags rtags su/__ming du/__byings su/__tshig tu sgrub par byed pa ste bdun no/__/rang bzhin rkyen dang 'brel ba'am/__/yi ge tsam dang 'brel ba yi/__/bsgyur dang dbyi ba rnam 'gyur te/__/zhes pa'i snga ma ni supa? tinga? kr-i ta? dang /__phyi ma ni mtshams sbyor gyi mdos bsgyur ba dang dbyi ba'o/__/de lta bu ston par byed pa'i gzhung yang /__bcom ldan 'das kyis lung rgyas pa zhes bya ba'i mdo las/__bdag gis rab bshad legs sbyar chos kyi gzhung /__/gsal byed pA Ni ni 'byung de rjes su/__/sa yi dbang phyug chos nyid mthong mig ldan/__/dge bsnyen zla ba thogs med spobs ldan 'byung /__/zhes lung bstan pa'i slob dpon pA Ni par 'phags pa spyan ras gzigs kyis stsal ba'i sgra mdo pA Ni pa dang /__zla khol kyis mdzad pa'i de'i don gsal bar byed pa tsAn+d+ra pa ste/__de yang slob dpon skal ldan grags pas/__/klu sgrub kyis ni chos rnams rnam phye sbyar/__/sgra rjes don mkhas tsan+d+ra go mIr grags/__/snyan dngags mkhan gtso dpa' bo las su yod/__/sngags tshul la 'dir skal ldan bdag rnams mdzes/__zhes dang /__kha che khri brtan gyi rgyal pos dus ston gyi tshad/__/tsan+d+ra go mI'i sgra yi lung tshig dang /__/d+harma kI rti'i yid 'ong tarka'i gzhung /__/dpa' bo'i snyan dngags sbyor ba'i phreng rgyud de/__/'jig rten na ni rin chen rnam pa gsum/__zhes glur blangs par grags so/__/de yang pA Ni par kun bshad dang /__tsAn+d+ra par de phan/__rgyal po bde spyod bzang po'i don du dbang phyug go cha gzhon nu gdong drug gis bshad pa'i ka lA par kr-i ta? rgyas par mngon/__yang 'phags yul du/__in+d+ra byA ka ra Na/__pI sha li byA ka ra Na/__sha kau Ta yan byA ka ra Na/__pA Ni byA ka ra Na/__sa man+ta b+ha dra byA ka ra Na/__sa tany+dza li byA ka ra Na/__ma nu dzen+d+ra byA ka ra Na/__swa ra swa tI byA ka ra Na ste brgyad du bsgrags mod/__brtag par bya ba'i gnas so/__/tshad ma rig pa ni/__ngo bo/__yul gyi mtshan nyid la blos dpyod pa'i rig shes te/__rang gis gzhal bya ma 'khrul ba'i 'jal bar byed pa/__de yang gzhal bya'i gnas tshul 'khrul med du rtogs pa'i blo zhig la mngon sum dang /__tshul gsum pa'i rtags las gzhal bya'i don nges pa'i blo zhig la rjes dpag ste tshad ma gnyis dang /__gzhan yang rab blo lkog gyur du 'dod pa'i log rtog dang /__blo la tshul gnyis dang rang rig mi 'dod pa sogs kyi log rtog tshar gcod cing /__dngos bstan la med pa'i shes bya ji snyed kyi gnas la log par rtog pa'i smra ngan thams cad thal 'gyur gyis tshar gcod tshul dang /__sgrub ngag gis rjes su 'dzin tshul rgya cher dngos su ston pas bzlog par nus phyir log smra tshar gcod kyi rig pa'i mchog tu grub bo/__/nges tshig ni/__pra mA Na zhes pa'i sgra las drangs na rab tu 'jal ba ste/__don ji bzhin rtogs pa'i rig pa/__de yang rgyal bas gsungs tshul dang /__phyogs glang yab sras kyis bkral tshul gnyis las/__dang po la yang /__mngon sum dang /__rjes dpag gsung tshul lo/__/dang po ni/__'khor lo dang po'i skabs/__dge slong dag mig gi rnam par shes pas sngon po shes kyi sngon po'o snyam du ni ma yin no/__/zhes pas sngon po shes kyi yan chad kyis ma 'khrul pa'i rig pa de bstan/__de man gyis rtog bral de bstan pas mngon sum gyi mtshan nyid rdzogs par gsal bar bstan pa yin no/__/yang mdo las dge slong dag gzugs zhes pa ni rnam pa gnyis te mig 1dang /__yid la 2brten pa'o/_/zhes pas dbang mngon 1dang /__yid mngon 2bstan/__'khor lo bar par/__sems la ni sems ma mchis te/__sems kyi rang bzhin 'od gsal ba'o/__/zhes pas rang rig mngon sum dang /__yang /__so so rang gis rig bya'i phyir/__/bcom ldan 'das kyis chos bstan pa/__/zhes so/__/mdo las/__chos rnams la chos kyi mig rdul med cing dri ma dang bral bar rnam par dag ces pas rnal 'byor mngon sum bstan te/__chos rnams zhes pas bden bzhi bcu drug gi rnam pa/__chos kyi mig ces pas zag med kyi shes rab/__rdul med ces pas bar chad med lam/__dri ma dang bral ba rnam par dag ces pas rnam grol lam de bstan pa yin no/__/gnyis pa ni/__gzhal bya 'dis 'jal byed dang sgrub byed dngos stobs rjes dpag gi rten du gyur pa'i gtan tshigs gsum gsung rabs rnams su bshad la/__de yang /__chos bcu pa'i mdor/__du ba las ni mer shes dang /__/chu skyar las ni chur shes ltar/__/byang chub sems dpa' blo ldan gyi/__/rigs ni mtshan ma dag las shes/__/zhes sogs 'bras rtags dang /__sA lu ljang pa'i mdor/__gang cung zad skye ba'i bdag nyid can de thams cad ni 'gags pa'i bdag nyid do/__/zhes dang/__rnam 'grel las2/__cung zad skye ba'i bdag nyid can/__/gang de thams cad 'gags chos can/__/zhes sogs kyis rang bzhin gyi gtan tshigs dang /__dkon brtsegs 'od srung gis zhus par/__nga'am nga 'dra bas gang zag gi tshod bzung bar nus kyi/__gang zag gis gang zag gi tshod bzung bar mi nus te nyams par 'gyur ta re/__zhes dang /__rnam 'grel du/__tshad ma rnams ni mi 'jug par/__/med la mi 'jug 'bras bu can/__/gtan tshigs bye brag la ltos nas/__/'ga' zhig med shes 'bras bu can/__/zhes sogs kyis ma dmigs pa'i gtan tshigs bstan te/__de yang sngar gyi tshig zur dang po nga'am sogs kyis snang rung ma dmigs pa'i gtan tshigs bstan te/__dper na bum pas dben pa'i sa phyogs su bum pa med de/__de snang rung tshad mas ma dmigs pa'i phyir/__gang zag gis sogs phyi mas mi snang ba ma dmigs pa'i gtan tshigs bstan te/__bsgrub bya de'i tshad mas med par yang ma nges/__mngon sum dang lung sogs rtags kyis yod par mi 'grub pa'i shin tu lkog gyur bskal don de ltar gyur pas yod nges kyi tha snyad don mthun mi 'jug pa ste/__spyir yod srid kyang gang zag de'i mngon rjes tshad mas yod med gang rung du ma grub pa'i phyir gong du khyab pa grub ste/__med na mi 'byung ba'i mtshan nyid can gyi rtags ni rjes dpag gi rten yin te/__rnam 'grel le'u gnyis pa'i 'jug tu/__med na mi 'byung mtshan nyid can/__/rtags ni rjes dpag rten yin no/__/zhes so/__/de lta bu'i tshad ma rig pa 'di sngon tshe lo nyis khri pa'i dus su sangs rgyas 'od srung gi bstan pa la'ang byung bar grags shing /__rang lugs bstan pa 'di la bstan bcos rtsod grub las snga bar byung bar ma mngon te/__de yang slob dpon dbyig gnyen gyis mdzad ma mdzad rgya gar du the tshom gyi gzhir snang na'ang /__don du thogs med kyi gcung des ni min par sems shing /__mngon pa sde bdun gyi/__rab tu byed pa dbyig bshes kyis/__zhes bshad pa des mdzad dam snyam la/__phyi rol pa'i rtog ge ni thog mar drang srong phur bus tshe snga phyi med pa'i bstan bcos brtsams/__de rjes dzam gling du drang srong 'jig rten mig ces bya bas tshad ma'i mdo byas/__de'i 'grel pa drang srong 'jug stobs can zhes pas byas nas 'phel bar grags pa'i tshul 'grel ba spyan ras gzigs brtul zhugs las bshad/__rtag par smra ba ni ser skya pa'i gzhung ste shes bya nyi shu rtsa lnga ston pa'i bstan bcos so/__/de dag tshad ma mdor/__gang zhig rtog ge'i lam nas chos nyid la 'khrid na/__/de ni thub pa'i bstan las ches bsrings nyams pa yin/__/de lta na'ang de bzhin gshegs pa'i chos kyi mtshan nyid rnams/__/gal te gzhan du gyur na dpyad par bya ba'i rigs/__zhes dang/__rnam nges las kyang de mthun dang /__jo bos/__mngon sum rjes dpag dgos pa med/_/ces pa yang de dang phyogs mthun pa'i mu stegs pa'i rtog ge de dag la dgongs pa yin no/_/gnyis pa ni/__dus kyi 'khor lor/__phyogs kyi glang po gzhan la phan pa'i bsam pa btsun pa zla ba'i pad+ma'i myu gu dang /__/zhes sogs mdo rgyud du ma nas lung bstan pa'i slob dpon dbyig gnyen gyi slob ma/__tshad ma rang las mkhas pa phyogs kyi glang pos phar phyin grol sde/__'dul ba yon tan 'od/__mngon pa blo bstan/__zhes grags so/__/tshad ma kun btus dang /__'jam dpal rtsa rgyud las/__yi ge d+ha zhes sdom brtson nyid/__/lho yi phyogs su rnam par grags/__/pha rol rgol ba bzlog nas kyang /__/de bzhin sdom brtson sngags kyang 'grub/__/ces lung bstan pa'i bram ze'i rigs 'khrungs dpal chos kyi grags pas phyogs glang slob ma rgol ba dbang phyug sde las kun btus tshar gsum mnyan pas don ji bzhin khong du chud/__phyir rgol mang po pham par byas/__bstan bcos tshad ma rnam 'grel le'u bzhi'i dang po/__rang gi gzhal bya rtogs pa'i thabs kyi nang nas lkog gyur rtogs byed/__rang bzhin/__'bras bu/__ma dmigs pa'i rtags yang dag gsum gyi sgo nas rtags yang dag gi mtshan nyid/__de'i ldog pa gtan tshigs ltar snang dang bcas pa'i don gtan la 'bebs par/__phyogs chos de chas khyab pa yi/__gtan tshigs de ni rnam pa gsum/__zhes sogs rang don gyi le'u/__gnyis pas thams cad mkhyen pa dngos stobs kyis rtogs par byed pa'i thabs/__kun btus kyi mchod brjod kyi don tshad ma'i rnam bzhag gyur pa'i tshul/__'gro la phan par bzhed pa'i tshul las ston par grub tshul/__bde gshegs su grub tshul/__skyob nyid du sgrub pa/__de las tshad mar grub pa'i tshul sogs lugs dang mthun pa dang /__mi mthun pa lugs ldog gi sgo nas bden bzhi mi rtag sogs bcu drug ston pa tshad mar gyur pa gang las gshegs pa'i lam rgya cher ston pa la/__tshad ma bslu med can shes pa/__/don byed nus par gnas pa ni/__/mi bslu sgra las byung ba yang /__/mngon par 'dod pa ston phyir ro/__/zhes sogs tshad ma grub pa'i le'u gsum pa mngon gyur rtogs pa'i thabs/__dbang yid rang rig rnal 'byor mngon sum bzhi sogs mngon sum gtan la 'bebs par/__gzhal bya gnyis phyir tshad ma gnyis/__/don byed nus dang mi nus phyir/__/zhes sogs dang /__/mngon sum gyi le'u bzhi pa rtogs nas gzhan rjes su 'dzin pa'i yan lag la/__spyir gzhan don rjes dpag gi mtshan nyid/__dbye ba/__log rtog spong tshul/__bye brag so so'i sgo nas rgya cher ston pa la/__gzhan la bstan par bya ba'i phyir/__bdag mthong min yang gzhan dag gi__/zhes sogs gzhan don gyi le'u rnams dang /__'bring rnam nges la/__le'u dang pos mngon sum bzhi/__gnyis pas rjes dpag__/gsum pas gzhan don rnams bstan/__bsdus pa rig thigs ni rang lugs snying por dril te le'u gsum gyis mngon rjes gzhan don gsum bstan pa ste gtso bo lus lta bu'i bstan bcos gsum/__rang don rjes dpag las 'phros nas rtags bye brag tu ston pa gtan tshigs thigs pa/__mu stegs kyis brtag pa'i 'brel ba 'gog pa la 'brel ba brtag pa/__gzhan don rjes dpag las 'phros nas snang ba sems yin yang gzhan rgyud 'thad pa rgyud gzhan grub pa dang /__rtsod pa'i tshul ston pa rtsod pa'i rig pa zhes yan lag gi bstan bcos bzhi ste sde bdun mdzad/__tshad ma slob pa na dang por rtags kyi rnam bzhag gal che bar dgongs shing /__rtogs dka' bar gzigs nas rnam 'grel gyi rang don le'u la rang 'grel mdzad do/__/de'i slob ma kun mkhyen lha dbang blo dang /__de'i slob ma shAkya blo rnams kyis 'grel bshad dang /__slob dpon dul ba'i lhas sde bdun ka la 'grel pa/__rgyan mkhan po shes rab 'byung gnas kyis tshad ma stong phrag bco brgyad pa dang /__slob dpon chos mchog gis rnam nges la 'grel pa 'thad ldan chen mo zhes stong phrag bcu gnyis pa dang /__rig thigs la 'grel pa slob phan/__rgyan mkhan po'i slob ma bram ze dza ma kha che/__ris rnam 'grel la 'grel bshad/__rgyal dbang blos tshad ma mdo la 'grel bshad sogs mdzad/__de dag gi don bsdu na/__ji skad du/__mngon sum dang ni rjes su dpag__/ltar snang dang bcas bdag rig byed/__/bsgrub pa dang ni sun 'byin ngag__/ltar snang bcas pas gzhan rig byed/__ces rtog ge'i tshig don brgyad de/__de yang mngon sum la bzhi las dbang po'i mngon sum dbang lnga'i yul du gyur pa/__dbye na/__yang dag ni zla ba dang /__ltar snang ni zla ba gnyis lta bu/__yid mngon so skye'i yid shes kyi yul du gyur pa'i chos/__tshad ma ni gzhal bya'i gnas lugs ma 'khrul bar mthong ba dang /__tshad min ni log rtog__/rnal 'byor mngon sum ni 'phags rgyud kyi shes pa dang /__rang rig mngon sum ni yid shes cha phra ba zhig ste 'di gnyis yang dag go__/rjes dpag tshad ma la yang dag dang ltar snang gnyis las/__dang po la gsum/__dngos stobs kyi rjes dpag tshad ma ni du ba mthong bas me yod par shes pa lta bu dang /__gzhan la ltos nas rang 'chi bar nges pa lta bu/__grags pa'i rjes dpag tshad ma ni/__'jig rten na grags pa'i rjes su 'brangs nas ri bong can zhes pas zla ba mtshon pa lta bu/__yid ches pa'i rjes dpag tshad ma ni/__rgyu 'bras bslu ba med pa thams cad mkhyen pas rjes su gdams pa la brten som nyi bral ba lta bu/__tshad min ni/__smig rgyu mthong ba las chur 'dzin pa'i shes pa lta bu la bzhag go/__/sgrub ngag tshad ma ni byas pa yin na mi rtag pa yin pas khyab ste/__dper na mar me 'chi ka ma bzhin no/__/sgra yang byas so/__/zhes pa'i sgrub ngag de sgrub ngag yang dag__/gzhal bya yin na mi rtag pa yin pas khyab ste/__mar me 'chi ka ma bzhin no/__/sgra yang gzhal bya yin no/__/zhes pa'i sgrub ngag de sgrub ngag ltar snang /__sun 'byin tshad ma ni/__ngag chos can/__ma byas par thal rtag pa yin pa'i phyir/__zhes pa'i thal 'gyur de sun 'byin tshad ma dang /__ngag chos can/__rtag ste gzhal bya yin pa'i phyir/__zhes pa ltar snang ngo /__/'di snga ma bzhi blo rig dang /__phyi ma bzhi rtags rigs kyis rgyas par ston/__de nyid bod du rngog lo chen pos bsgyur zhing rnam nges la 'grel pa dang gzhung phran yang mdzad/__rje btsun sa skya paN+Di tas paN chen shAkya shrI sogs bsten nas gsan cing rnam 'grel gyi sgo 'phar dbye ba sogs nas/__phyis su dge phyogs su rgyal tshab dar ma rin chen gyi rnam nges 'grel pa dgongs pa rab gsal402/__mkhas grub dge legs dpal bzang gis rnam 'grel rig pa'i rgya mtsho/__paN chen dge 'dun grub kyi rigs rgyan sogs 124dang /__kar phyogs su karma pa chos grags rgya mtshos/__tshad ma rig gzhung rgya mtsho sogs mang ngo /__/bshad bya kun btus/___de yang rngog lo chen pos/__chos rnams thams cad stong pa'i tshul la 'jug pa'i sgo/__/yang dag rigs tshogs klu sgrub zhal nas gsungs pa de/__/rig pa'i mthar thug rnam 'grel mdzad pa'i gzhung mdzes las/__/gsal bar rtogs nas lugs ngan gzhan kun rtswa bzhin dor/__/zhes sogs gsungs pas nang rig pa'i grong khyer du 'jug pa'i sgo lta bur shes par bya'o/__/bdag nyid kun shes par byed pa nang rig pa la/__thog mar bden bzhi'i chos 'khor gyi nang tshan 'dul ba'i sde snod la sdom pa ma thob pa thob byed/__thob pa srung thabs/__nyams na phyir bcos gsum gyi/__dang po la sngon chog dang da chog gnyis/__dang po la bcu ste/__rdzogs pa'i sangs rgyas ni khyim nas byung ba'i tshe spong bdun thugs la 'khrungs shing /__mchod rten rnam dag gi drung du dbu skra bcad de ngur smrig gi gos blangs pa dang /__rang sangs rgyas khyim nas byung nas rab byung gi rtags blangs pa'i skabs der rab tu byung zhing rang rgyal gyi byang chub mngon du byas pa'i skabs su bsnyen par rdzogs pa'i sdom pa thob pa ste rang byung gis bsnyen par rdzogs pa'o/__/gang dag sangs rgyas pa'i tshe dge slong gi sdom pa thob zer ba de dag gis ni/__sgom spang mtha' dag spangs pa'i skabs der sgom spang zhig gsar du rnyed ces 'chad dgos bar 'gyur ro/_/ston pas wA rA Na sIr bden bzhir bzlas pa lan gsum du bskor ba'i skabs su bzlas pa dang po la kun shes kauN+Di n+yas mthong lam dang /__gnyis par gzhan bzhis kyang thob pa de rnams kyi rgyud kyi mthong lam de nyid dge slong gi sdom pa'i thob rgyur song ste ye shes khong chud kyis te/__de'i rgyud kyi mthong lam dang /__dge slong gi sdom pa gnyis lhan cig 'byung ba'i rgyu 'bras yin no/__/de nas shA ri'i bu dang maung gal bu sogs mang po la/__dge slong dag tshur shog tshangs par spyod cig ces gsungs pa'i mod la skra rang byi ba sogs gyur te/__lha rnams kyis nam mkha' nas ched du brjod pa/__de bzhin gshegs pas tshur shog bka' stsal pas/__/skra byi rnam sbyar gyon pa'i lus ldan zhing /__/mod la dbang po rab zhi gnas gyur te/__sangs rgyas dgongs pas lus gzugs bkab par gyur/__/ces rjod par byed de/__ston pa'i drung du 'di kho nas bsnyen par rdzogs pa mang ngo /__/shA ri'i bus bsnyen par rdzogs nas zhag bco lnga na dgra bcom/__bram ze n+ya gro d+ha skyes sam 'od srungs chen po ni ston pa rgyal po'i khab bu mang mchod rten gyi 'gram na bzhugs pa'i tshe bdag gis ston pa mthong ngo snyam nas drung du phyin te phyag 'tshal te/__bcom ldan 'das ni bdag gi ston pa lags la/__bdag ni khyod kyi nyan thos lags so zhes brjod par/__bka' stsal pa/__'od srung khyod ni nga'i nyan thos yin la/__nga ni khyod kyi ston pa'o gsungs pas dge slong du gyur te ston par khas blangs pas so/__/des nyi ma dgu nas dgra bcom par gyur to/__/tshe dang ldan pa 'char ldan nam legs byin ni ston pa'i drung du 'ongs par/__bka' stsal pa/__legs byin gcig tu dge ba gang yin/__thar pa'o/__/de la dgos pa gang yin/__dad pa'o/__/zhes lan btab pas ston pa thugs mnyes pa de nyid legs byin gyi dge slong gi sdom pa thob pa'i rgyur song ste dri bas so/_/ston pa ltengs rgyas kyi ras bal can gyi nags tshal tshang tshing can na bzhugs tshe/__bzang sde'i tshogs drug cu 'ongs pa skyabs su 'gro ba'i sgo nas bsnyen rdzogs su bkod de skyabs 'gro khas blangs kyis so/__/ston pa grong khyer ser skyar bzhugs nas shAkya'i tshogs mang po rab tu byung tshe/__sru skye dgu'i bdag mo bud med lnga brgya dang bcas pa rab tu byung ba dang bsnyen par rdzogs par 'tshal zhes lan gnyis su zhus kyang ma gnang nas sdug bsngal bar gyur pa la/__mthar kun dga' bos zhus pas/__nga'i bstan pa 'di la bud med rab tu byung bar ma zhu zhig__/bstan pa yun ring du gnas par 'gyur ro/__/'on kyang gnyis ka'i dge slong las bsnyen par rdzogs pa dang /__gnyis ka'i dge 'dun las dgag dbye byed pa sogs lci chos brgyad bka' stsal te 'di rnams khas blangs na bsnyen par rdzogs par 'gyur ro zhes bka' stsal pas/__kun dga' bos de rnams kyi drung du phyin nas/__sring mo dag ston pas khyed rnams bsnyen par rdzogs par gnang mod kyi/__'on kyang lci chos brgyad bka' stsal to/__/'phags pa gsungs shig ces nyan nas/__des brjod pa dang /__dge slong gis dge 'dun las rab tu byung ba dang bsnyen par rdzogs par bya ba/__dge slong las zla ba phyed phyed kyis gdams pa dang rjes su gdams pa btsal ba/__dbyar dge slong med pa'i gnas su gnas par mi bya ba/__dgag dbye'i tshe gnyis ka'i dge 'dun la dgag dbye byas/__dge slong gi nyes pa bzhi mi smed pa dang /__dge slong la khro ba dang tshig rtsub mi bya ba dang /__lci ba'i chos las 'das na dge 'dun gnyis ka lo zla phyed kyi bar du mgu ba spyod pa dang /__dge slong ma bsnyen par rdzogs nas lo rgya lon pas kyang dge slong bsnyen par rdzogs ma thag pa la phyag dang bkur sti byed pa'o/__/mchan/__skye dgu'i bdag mos 'di rnams ni bdag gi lus ngag yid kyis spyi bos nod do/__/zhes smras te dge slong mar gyur pa dang ston par gsol pa/__bud med lnga brgya po de dag bsnyen par rdzogs par gyur tam/__bka' stsal pa gyur to/__/zhes gsungs te lci chos khas blangs kyis so/_/yang khyim bdag sbyin pa'i bu mo chos sbyin ma skyes ma thag nas ri dwags 'dzin gyi bu sa ga la ster ba'i chad byas so/__/de rab tu 'byung 'dod pas pha mar smras pas ma gnang /__des dge slong ut+pal la smras pa dang /__ston par zhus pas/__bu mo chos sbyin ma khyim na 'dug bzhin du rab byung dang dge tshul mar gyis shig gsungs te dge slong mas cho ga brjod/__ut+pa la'i mdog 'phrin par gtong ste dge bsnyen dang dge tshul mar byas pas rgyun zhugs thob/__lo bcu lon pa'i 'jug tu ut+pala'i mdog 'phrin par byas te dge slong gi dge 'dun gyis dge slob ma'i tshul khrims phog__/des phyir 'ong thob/__lo gnyis song ba na 'phrin la brten nas tshangs spyod nyer gnas kyi sdom pa phog__/des phyir mi 'ong thob ste rdzu 'phrul bsgrub/__der lo bcu gnyis lon te gzhon nu mar gyur pa na sa gas len par brtsams pa na/__ut+pa las 'phrin byas te/__dge slong ma'i dge 'dun gyis dge slong ma'i sdom pa byin/__de dgra bcom mar gyur/__de nas sa gas bag ma len phyir sgor byung ste lag pa nas bzung ba na/__de ngang pa'i rgyal po bzhin du nam mkha' la lding bas/__sa ga dad de song bas/__'di ni 'phrin gyi las kyis bsnyen par rdzogs pa zhes bya'o/__/der bsnyen rdzogs don gnyer thag ring nas 'ong ba rnams lam bar du nyer 'tshes shi bar gyur pa bcom ldan 'das kyi drung du ma phyin par bsnyen rdzogs kyi bar chad du gyur pa'i skabs de gsol pas/__nga'i nyan thos rnams thag ring po nas 'ongs pas sdug bsngal bar 'gyur ta re snyam du dgongs nas/__de phyi na dge slong gi dge 'dun gyis rab tu byung ba dang /__bsnyen par rdzogs pa'i bya bar gnang ngo /__/zhes gsol bzhi'i las kyis rab bsnyen gcig car du sgrub pa'i cho ga gnang /__de rnams la sgra yangs pa'i dbang du byas na cho ga'i sgra 'jug pas sngon chog bcu zhes bod kyi 'dul 'dzin chen po rnams bzhed/__sgra dog pa'i dbang du na/__da chog gi zlas phye ba'i sngon chog ni gsol bzhi'i las kyi sngon chog kho na'o/__/der dge slong rnams legs par ma sbyangs shing spyod lam rgod bag can du gyur pa yang /__srid pa tha ma pa'i gang zag 'ga' zhig gis sngon chog gis rdzogs par byas pas byung bas na/__khyim pa rnams ma dad mu stegs pa rnams 'phya bar gyur pa'i tshe/__da ltar gyi cho ga gsum ste tshigs gsum rim gyis len pa dang gnas dang gnas pa'i tshul khrims sogs gsungs/__nyer sdes bsnyen par rdzogs nas lo gnyis las ma lon pa gzhan gyi mkhan por byas pas mkhan po byas pa lo bcu lon dgos pa dang /__yang lo bcu lon yang 'dul ba mi shes pa'i dge slong zhig gis mkhan por byas pas gdams ngag ston rgyu ma byung ba la mkhan por byas pa la mang du thos dgos par gsungs te/__de dag las 'phros nas lnga phrugs nyi shu rtsa gnyis kyi rnam bzhag gsungs so/__/'dul ba'i bstan bcos ni slob dpon yon tan 'od kyis mdo rtsa dang /__las brgya/__de'i slob ma chos kyi bshes gnyen gyis rgya cher 'grel/__shAkya 'od kyis sum brgya pa/__sa ga lhas me tog phreng rgyud/__kha che dge 'dun bzang pos kA ri kA lnga bcu pa sogs mdzad/__bod du'ang kun mkhyen mtsho sna ba shes rab bzang pos mdzad pa'i 'dul ba'i rnam bshad nyi 'di dang mthun par karma pa mi bskyod pas mdo rtsa'i 'grel chen mdzad par snang /__ma'i 'od zer dang /__mdo rtsa'i mchan 'grel/__bu ston rin chen grub kyi gleng 'bum dang mdo 'grel/__paN chen dge 'dun grub kyi gleng 'bum dang /__'dul TIka rin chen phreng ba sogs bstan bcos mtha' klas/__de yang brjod bya'i dbang du byas na gzhi bcu bdun du 'du ste/__mdo rtsa ltar na/__1)__dang po rab byung gi gzhi la/__nges par 'byung ba'i tshul khrims kyi dbang du byas te/__dge 'dun thams cad 'dus pa na cha lugs 'di bzhin du byas te/__sogs kyis rab byung bsnyen rdzogs gcig char du byed pa'i cho ga dang /__rab tu byung ba dang bsnyen par rdzogs pa de'i phyir sogs da ltar gyi cho ga gsol ba dang bzhi'i las kyi rim can du sgrub thabs/__rang bzhin nyams par byas pa nyid ni phul ba nyid ma yin no/__/zhes sogs sdom pa 'bul ba'i cho ga dang /__bcug reg nyams su myong bar byas na'o/__/zhes sogs thob pa mi nyams par srung ba rnam 'byed kyi don bzhin dge slong pha ma'i bslab pa rnams bshad pa dang /__nyams pa dang 'chag pa gnyis ltung ba la sbyar na nyes byas so/__/zhes sogs rab byung gi gzhi phal cher la mkho ba spyir bstan pa rnams so/__2)__/gso sbyong gi gzhi la/__spyod yul du zhugs pas rnal 'byor bsgom par mi bya'o/__/sogs nas bzung /__gso sbyong bcu bzhi pa/__bco lnga pa/__gnod pa zhi ba'i/__mthun pa'i/__bkra shis pa'i zhi gnas kyi gso sbyong drug gi dbye bsdu/__go rim/__sgra bshad/__lag len sogs rgya cher bstan/__3)__dbyar gnas kyi gzhi la/__dbyar gnas par khas blang par bya'o/__/zhes sogs srog chags mi gsod pa sogs kyi ched dbyar gnas pa'i gzhi/__chos pa/__gang zag__/dus/__gnas/__yul/__bsam pa/__cho ga__khas blangs tshul ji ltar bya ba'o/__/de yang zhag 45khas blangs pa ste/__dbye na snga phyi gnyis so/__/dgag dbye'i gzhi la/__mi smra ba'i yi dam bca' bar mi bya/__zhes sogs/__yul/__gang zag__/byed pa po/__dngos po/__dus/__bsam pa/__cho ga__/dgos pa ci'i phyir sogs kyis bshad/__dbyar gyi dus ltung ba gleng dran sogs dgag pa de skabs dbye ba'i las/__5)__sra brkyang gi bzhi la/__sra brkyang bting bar bya'o/__/zhes sogs/__gding tshul/__brkyang tshul/__dbyung ba'i cho ga sogs kyi sgo nas bstan/__de yang dgag dbye zin nas zla ba lnga yi bar sra brkyang bting ba'i steng du dge 'dun rnams kyi cho gas spungs te bzhag pas de bar 'chang 'bral 'jog gsum khegs pa sogs bag yangs dang 'brel ba/__6)__gos kyi gzhi la/__mtshon gyis ma dras pa'i gos bcang bar mi bya'o/__/zhes sogs gos ji ltar bsgrub tshul/__rnyed pa'i gos kyi rgyu'i rnam bzhag__/de las grub pa'i gos kyi rnam bzhag sogs kyis bstan/__'tsho ba'i yo byad13/__mkho ba'i yo byad/__lhag pa'i yo byad de gsum/__7)__ko pags kyi gzhi la yul dbus kyi mtshams so/__/zhes sogs bcang du rung ba'i yul dang /__bcang tshul dngos sogs gsungs/__8)__sman gyi gzhi la/__sman bsten par bya'o/__/de ni rnam pa bzhi'o/__/zhes sogs dus rung /__thun tshod rung ba/__zhag bdun pa/__'tsho bcang bcas bzhir dbye ba/__mtshan gzhi/__mtshan nyid/__dgos pa/__sgra bshad/__bsten tshul sogs kyi sgo nas sman ji ltar bsgrub tshul/__sman dngos kyi snod/__bsten pa'i gang zag__/gzhag pa'i gnas/__rung ba'i khang pa/__sman la 'jug tshul/__rgyu mthun zag pa 'dor ba'i thabs sogs bshad/__9)__las kyi gzhi la/__cho ga las 'das na las mi chags so/__/zhes sogs dge 'dun dang 'brel ba'i las dngos dang /__gang zag dang 'brel ba'i zhar byung dang bcas bshad/__10)__phyir bcos gzhi la/__gzhi ma zhi bar shes nas gleng ba pos so sor shes par byas shing mngon sum du 'jog pa la nan tur gyi las byas so/__/zhes sogs mi mos pa nan gyis phyir bcos su 'jug pa la nan tur dang /__phyir bcos dngos kyi rnam bzhag ste/__rgyu ni nan tur bcu gcig dang /__ngo bo ni rtsod pa ltung ba zhi byed gnyis so/__11)__/dus dang dus ma yin pa bsdus pa 'byung ba'i gzhi la/__'di la dge 'dun/__lhag ma mi shes pa nyid dang bcas pa'i sems nye bar ma bzhag par brjod pa dang byas sam ma byas ci lta bu zhig yin zhes dran par mi nus pa nyid dang /__zhes sogs/__'chab pa'i gzhi bsam sbyor ba mthar thug gi yan lag bzhi'i sgo nas bstan/__12)__sa gzhan na gnas pa spyod pa'i gzhi la/__lhag ma'i phyir bcos dngos gzhi spo mgu dbyung gsum ste/__spo ba dang mgu ba bya ba spyod pa dag gis/__dge slong rang bzhin du gnas pa la mngon par smra ba dang /__phyag dang /__sngon du ldang ba dang /__thal mo sbyar ba dang /__gus pa'i las dag bdag gir mi bya'o/__/zhes pa gzhan na gnas pa'i dbye bsdu/__gral/__bslab bya/__sgra don sogs bshad/__13)__yongs su sbyang ba'i gzhi la/__ma grags pa ni gzhi nyid ma yin no/__/zhes sogs kyi/__yul gang la/__gang zag gang gis bsam pa ji lta bus/__dngos po gang gis/__dus nam gyi tshe/__cho ga gang gis/__dgos pa ci'i phyir/__ji ltar bsgrub pa dgus bstan/__14)__las phye ba'i gzhi la/__dge 'dun tha dad du gnas pa la mi 'dod par gleng ba dang /__gleng bar byed pa na log par mi bya'o/__/zhes sogs gzhi bsam sbyor ba mthar thug bzhi'i sgo nas zhi bya/__dge 'dun bye ba'i rgyu spang pa/__gnyen po bsten pa gnyis kyis bye ba zhi bar byed pa'i chos bshad/__15)__'khor lo'i dbyen ni/__dge 'dun gyi dge 'dun ni chos las tha dad pa'i dngos por gsol bas sam don des tshul shing len du gzhug pas so/__/zhes sogs gzhi bsam sbyor ba mthar thug nyes dmigs gnas tshad gling gang na yod pa'i sgo nas zhi bya dang zhi byed bstan/__16)__/rtsod pa'i gzhi la/__'khrugs long gi rgyu bzhi'o/__/zhes sogs ngo bo rgyu dbye ba gsum gyi sgo nas zhi bya dang zhi byed kyi chos kyis zhi ba dang /_rang bzhin gyis zhi ba gnyis kyi sgo nas zhi byed bstan no/__17)/gnas mal gyi gzhi la/__so sor thar pa'i sdom pas mchog la rab tu byung bas phyag bya'o/_/zhes sogs kyis phyag bya ba dang mi bya ba'i tshul/__gtsug lag khang brtsigs pa'i cho ga zhar byung dang bcas pa/__gtsug lag khang bskyang ba'i cho ga__/chos dang zang zing gi longs spyod ji ltar bya tshul rnams kyi sgo nas bshad pa/__de yang gleng gzhi rnams med pa tsam ma gtogs lung sde bzhi'i brjod bya thams cad tshang la ma nor bar bzhugs shing /__lung gi bar sdom nas byung ba dang mtshungs kyang /__de dang go rim cung zad mi 'dra tsam yod do/_/sdom rgyun gsum dang /__bshad rgyun la snga 'gyur gyis mdo rtsa dang /__phyis su paN chen shAkya shrI pas sa paN la mdo rtsa dang /__khro phur me tog phreng rgyud bshad/__phyi ma mkhan po zil gnon seng ges TI ka? mdzad pa ltar gyi gsung rgyun dang /__phyis su kun mkhyen rong pos paN chen nags rin dang bcas rgya dpe gsar du bcos nas rgyu gsum gyis bsngags te rnam bshad kyis bshad rgyun gtan la phab pa nas yig cha sogs rgya cher dar kyang deng sang rgyun nub bo snyam la/__mdo rtsa ni byang chub sems dpa'i phrin las kyis deng sang yang dar zhing rgyas par mthong /__'khor lo bar pa'i dngos bstan stong nyid kyi rim pa ston pa dbu ma rig tshogs drug sogs te/__bod snga ma thams cad kyis rang rgyud dang /__pa tshab lo tsA bas thal 'gyur gyi srol btod/__sbas don mngon rtogs kyi rim pa mdo sde mngon rtogs rgyun gyi bshad srol rngog lo chen pos paN+Di ta 'bum phrag gsum pa sogs las gsan te dar/__'khor lo tha ma mngon pa'i sde snod las/__theg dman gyi mngon par mdzod tshig le'ur byas pa'i bshad srol snga 'gyur dus su byung yang bar skabs su chad pa la/__phyis su paN+Di ta smr-i tis khams su 'chad nyan gyis srol btod pa'i rgyun las dar zhing /__mdzod la/__khams bstan pa'i/__dbang po bstan pa'i/__'jig rten bstan pa'i/__las bstan pa'i/__phra rgyas bstan pa'i/__lam dang gang zag bstan pa'i/__ye shes bstan pa'i/__snyoms 'jug bstan pa'i/__gnas te brgyad do/__/theg chen mngon pa'i bshad srol ni cher ma byung ngo /__/khyad par gsang sngags rdo rje theg pa ni/__'dod chags kyi bye brag bzhi dang mthun par bya spyod rnal 'byor bzhir bstan la/__de yang snga ma gnyis kyi bshad srol ni bod 'dir ches ma dar la/__rnal 'byor gyi rgyud kyi 'grel pa skor lo chen rin chen bzang po sogs nas brgyud cing mkhas grub bu ston rin po ches rtsal du bton/__bla med la/__pha rgyud gshed skor dang gsang 'dus/__ma rgyud bde kye gnyis sogs kyi bshad srol dang /__gnyis med dam rgyud sde gzhan dang bshad srol mi mthun pa dpal dus kyi 'khor lo sogs kyi smin grol bshad dka'i rim pa ni/__mar dpyal 'brog bshos mal dang rwa lo gyi gyo sogs kyi lo tsA ba mang pos bsgyur bshad kyis gtan la phab ste shin tu rgyas par gyur to/__/de yang mdor bsdu na bka'i mtshan nyid ni/__rgyud bla mas/__gang zhig don ldan chos dang nyer 'brel zhing /__/khams gsum kun na nyon mongs spong byed gsungs/__/zhi ba'i phan yon brjod par mdzad pa gang /__/de ni drang srong gsung yin ldog pa gzhan/__zhes brjod bya don chen po dang ldan pa/__rjod byed dri ma med pa'i chos dang nye bar 'brel ba/__spang bya khams gsum gyi nyon mong pa spong byed/__gnyen po zhi ba myang 'das kyi phan yon ston pa ste ngag mtshan nyid bzhi ldan/__bdag rkyen sangs rgyas 'phags pa las byung ba/__sgra bshad su b+hA Shi ta zhes legs par gsungs pa/__dbye na dus kyi sgo nas 'khor lo gsum/__brjod bya'i kun rdzob dang /__don dam bden pa gnyis ston pa'i drang nges gnyis/__rjod byed kyi sgo nas gsung rabs yan lag bcu gnyis/__gnyen po'i sgo nas/__the tshom gyi gnyen por mdo sde/__mtha' gnyis la zhen pa'i gnyen por 'dul ba/__rang lta mchog 'dzin gyi gnyen por mngon pa'i sde snod gsum/__gdul bya'i sgo nas dman pa dang /__rgya chen po la mos par theg pa dman mchog gnyis/__bdag rkyen gyi sgo nas/__zhal nas gsungs pa/__rjes su gnang ba/__byin gyis brlabs pa gsum/__phyi ma la'ang sku gsung thugs kyis byin gyis brlabs pa dang /__thugs la'ang thugs ting nge 'dzin/__thugs thugs rje/__thugs bden pa'i stobs kyis byin gyis brlabs pa gsum du dbye/__bstan bcos ni gang zhig rgyal ba ston pa 'ba' zhig gis/__/dbang byas rnam g.yeng med yid can gyis bshad/_/thar pa thob pa'i lam dang rjes 'brel na/__/de yang drang srong bka' bzhin spyi bos blang /_/zhes pa ltar/__bshad bya rgyal ba sangs rgyas kyi ston pa 'ba' zhig gi dbang du byas nas ston gyi rang bzo min pa/__'chad pa po'i khyad par chos dang don legs par shes shing /__rnyed bkur la sogs par chags pa'i phyin ci log gi rnam g.yengs med pa/__'bras bu'i khyad par thar pa bla na med pa'i myang 'das thob pa'i ched dang /__thabs kyi khyad par de'i lam ston pa dang rjes su mthun pa ste yon tan bzhi dang ldan pa ni bstan bcos kyi mtshan nyid/__bdag rkyen byang sems 'phags pa nas so skye'i bar gyi ngag tshig__/sgra bshad shAs+t+ra zhes pa 'chos skyob kyi yon tan gnyis dang ldan pa/__dbye na mchog dman gyi sgo nas/__don med don log don ldan dang /__/ngan g.yo brtse bral sdug bsngal spong /__/thos rtsod sgrub pa lhur len pa'i/__/bstan bcos drug bral gsum du 'dod/__/ces dgur bshad/__byed las kyi sgo nas bka' rgya chen po sdud pa/__zab mo rnam par 'byed pa/__'khrugs pa bsdebs pa gsum brjod pa'i sgo nas ji snyed pa/__ji lta ba/__thar pa dang thams cad mkhyen pa'i lam ston pa gsum/__bshad bya'i sgo nas bka' spyi'i dgongs 'grel dang bye brag gi dgongs 'grel gnyis so/__/de yang bka' dang bstan bcos mi 'gal ba dang /__'gal ba'i lugs gnyis las 'dir snga ma 'thad phyogs su bzung ngo /__/rig gnas chung ba lnga'i dang po tshig rgyan shes na snyan dngags la mi rmongs zhes pa ni/__spyir 'di'i lam srol mang mod/__yongs su grags pa dpal ldan dbyug pa can gyi rjes su 'brangs na/__lus rgyan skyon sel gsum du bsdu ste/__dang po la'ang bcad lhug spel gsum/__gnyis pa la thun mong dang thun mong ma yin pa gnyis snga ma la shar lho'i lam srol bcu dang /__phyi ma la don rgyan37/__sgra rgyan2/__gab tshig gi rgyan 16dang /__gsum pa skyon bcu spong pa'i tshul dang bcas pas so/__/sdeb sbyor shes na tshigs bcad la mi rmongs pa ni/__phyi rol gyi drang srong dmar ser can dang /__rgyal ba'i lhas mdzad pa'i gzhung rtsa 'grel dang /__phyis su yon tan brgyad dang ldan pa slob dpon rin chen 'byung gnas zhi ba'i zhabs kyi sdeb sbyor rin chen 'byung gnas ste/__de yang br-it+ta dang dzA ti gnyis la nang gses su dbye ba gsum re dang /__de re re la'ang mtha' klas shing /__mnyam pa'i br-it+ta kho na la 'jug pa'i ngo mtshar rtogs byed kyi sbyor ba drug dang bcas pa'o/__/mngon brjod shes na ming la mi rmongs pa ni don gcig la'ang ming du ma'i sgo nas bsnyad pa dang /__ming gcig don du mar 'jug pa sogs kyis shes byar srid do cog gi ming don phal mo che 'chad pa dang bcas pa ste/__de yang bstan bcos 'chi med mdzod rtsa 'grel dang /__mu tig phreng ba la sogs pa'o/__/zlos gar shes na skad rigs la mi rmongs pa ni/__sngon byung gi gtam las brtsams te skad rigs bzhis brjod pa'i glu dang /__rkang lag gi gar la sogs pa gtso bor byed pa ste/__de yang lag pa'i zlum skor dang pad skor la sogs pa lan mang du zlos kyang mdzes shing yid du 'ong ba'i gar du gyur pa ste yan lag lnga dang ldan pa'o/__/de gang zhe na zlos gar dang /__mdo 'dzin pa dang /__rol mo ba dang /__chas zhugs pa dang bzhad gad pa ste lnga'o/__/de yang yang gi sbyor ba du ma dang /__lus kyi rnam 'gyur sna tshogs pa dang /__dbyangs kyi bye brag tha dad pa dang /__lha'i rjes su skyes pa dang /__drang srong gi rjes su skyes pa dang /__blo gsal gyi rjes su skyes pa sogs dang /__'dren pa dang /__dkyus gcig tu spyar ba dang /__dkyus gnyis pa dang /__phyed phyi ma la sogs pa'i mtshan nyid rnams dang ldan zhing rjod byed kyi tshig gal cher saM skr-i ta/__bud med la sogs pa'i lad mo bgyid pa la pra kr-i ta/__bzhad gad dang co 'dri ba la sogs par a ba b+h+ram sha__/'byung po ro langs kyi tshul dang /__khros tshig dang sdigs tshig la sogs pa rnams pi shA tsI'i skad rigs kyis 'dren pa sogs te/__'on kyang bod du dgos pa cher ma gzigs nas bsgyur bshad kyis gtan la phab par ma mdzad do/__/skar rtsis shes na grangs kyi gnas la mi rmongs pa ni/__'di ltar brtsam bya dus dang /__gzugs can gnyis dang rtsom byed grangs kyi gnas te gsum las/__dang po dus kyi tshad ji ltar brtsam pa ni/_sems kyi rnam par rtog pa skad cig ma la dus mtha'i skad cig gcig__/de brgya nyi shu la bya ba rdzogs pa'i skad cig ma gcig__/de drug cu la thang gcig__/de sum cu la yud tsam gcig__/de sum cu la nyin zhag gcig__/de sum cu la zla ba gcig__/zla ba gnyis la dus gcig__/de gsum la bgrod pa gcig__/de gnyis la lo gcig__/de la dus bzhi dang /__dus bzhi chen po dang /__bskal chung dang /__bskal chen la sogs pa rnams kyi rnam bzhag 'jog par byed pa dang /__yang skyes bu nad med kyi dbugs drug la chu srang gcig__/de drug cu la chu tshod gcig__/de drug cu la nyin zhag gcig dang /__tshes dang /__res gza'/__rgyu skar la sogs pa rnams kyi rnam bzhag 'jog par byed do/__/gnyis pa gzugs can gyi tshad ji ltar 'jal ba ni/__rdzas kyi rdul phra rab bdun la rdul phran gcig_/de bzhin bdun 'gyur du bsgres te/__lcags rdul/__chu rdul/__ri bong gi rdul/__lug rdul/__glang rdul/__nyi zer gyi rdul/__sro ma/__shig__/nas/__sor mo nyer bzhi khru gang /__khru bzhi gzhu 'dom/__de lnga brgya rgyangs grags gcig gam dgon pa/__de brgyad la dpag tshad gcig go__/des 'jig rten gyi tshad 'jal bar byed do/__/yang dpangs tshad 'jal bar byed pa la sor/__lci tshad la srang /__bungs tshad la bre sogs kyang ngo /_/gsum pa rtsi byed grangs gnas dngos ni rkyang khug gnyis sam/__bye rtog dang 'jam dpal rtsa rgyud sogs las 'byung ba'i grangs gnas sogs so/__/gzhan yang /__ang+ki/__'bri/__bsnan/__bgod bsgyur te yi ge'i yan lag lnga/__gza'/__tshes/__skar ma/__sbyor ba/__byed pa ste rtsis kyi yan lag lnga dang /__gza' so so'i myur ba dang /__bul ba dang /__drang po dang /__'khyog po'i rkang pa gnyis btsal ba dang /__khyim dang longs spyod dang /__de dag gi dge legs kyi rtsis dang /__sgra gcan dang /__dus me dang /__de dag gis nyi zla 'dzin pa'i rtsis dang /__du ba mjug ring dang /__'char nub la sogs pa phyi'i las kyi rtsis dang /__nang gi rtsa rlung dang /__nyi ma dang /__zla ba dang /__gza' dang /__rgyu skar dang /__dbugs dang /__chu srang dang /__dbyu gu dang /__'pho ba dang /__thun tshad dang /__nyin mtshan dang /__de dag brten pa ye shes 'char ba dang /__nub pa la sogs pa dang /__gzhan yang thun mong min pa'i dbye ba sogs mngon par 'tshang rgya ba'i bar rnams dus kyi 'khor lo'i rgyud 'grel las rgya cher bstan pa bzhin no/__/smras pa/__rmad byung tshig gi ga bur bcud/__/gcus pa'i ngag gi dpal gyi dum/__/'di yang blo gsal gdung sel slad/_/blo gros ma la ya las 'khrungs/__shub+haM/__zhes snang //____//__!