JKW-KABUM-21-ZHA-011

🚧 This website is under continued development. We appreciate your patience!

Previous Section"ZHA" is not a number. Back to Volume Page"ZHA" is not a number.Next Section "ZHA" is not a number.

Wylie title
Location	mkhyen brtse'i bka' 'bum Volume , sde tshan 11, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum "ZHA" is not a number.

1 Texts in this Section (sde tshan or chos tshan)

411-429	གྲུབ་ཆེན་ཐང་སྟོང་རྒྱལ་པོའི་རྡོ་རྗེའི་གསུང་གཡང་འགུགས་བྱིན་རླབས་ཅན། grub chen thang stong rgyal po'i rdo rje'i gsung g.yang 'gugs byin rlabs can Prosperity Rituals - gyang 'gugs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

"ZHA" is not a number.

Tibetan Text

Wylie

[edit]

གྲུབ་ཆེན་ཐང་སྟོང་རྒྱལ་པོའི་རྡོ་རྗེའི་གསུང་གཡང་འགུགས་བྱིན་རླབས་ཅན།

༄༅། །གྲུབ་ཆེན་ཐང་སྟོང་རྒྱལ་པོའི་རྡོ་རྗེའི་གསུང་གཡང་འགུགས་བྱིན་རླབས་ཅན་བཞུགས་སོ།། །། ཨོཾ་སྭ་སྟི་པྲ་ཛེ་བྷྱཿ འཆི་མེད་གྲུབ་པའི་དབང་ཕྱུག་ཐང་སྟོང་རྒྱལ་པོའི་རྡོ་རྗེའི་གསུང་གཡང་འགུགས་བྱིན་རླབས་ཅན་གཏོང་བར་འདོད་པས། ནོར་ལྷ་གཞན་གྱི་ཕྲིན་ལས་དང་འབྲེལ་ན་བཟླས་པའི་མཇུག་སོགས་སྐབས་སུ་བབ་བའི་ཚེ་བྱ། འདི་ཉིད་ཁོ་ན་གློ་བུར་དུ་གཏོང་བའི་ཚེ། འཕྱིང་པ་སོགས་གཞི་གདན་དཀར་པོའི་སྟེང་འབྲུ་དཀར་གྱི་གཡུང་དྲུང་རིས་བྲིས་པར་གཡང་གི་རྟེན་ཡོད་ན་དགྲམ། དམིགས་བསལ་མེད་ཚེ་སྣོད་བཟང་པོར་གཡང་བཤོས་རིན་ཆེན་འབར་བའི་དབྱིབས་ལ་དར་རས་འབྲུ་སྨན་རིན་ཆེན་ཟས་ཕུད་གཙང་མ་ཅི་འབྱོར་པས་ཕྱུར་བུར་གཏམས་པའི་གཡས་སུ་ཕྱེ་མར་དང་། གཡོན་དུ་གཡང་ཆང་མར་གྱི་ཟེ་པྲོག་ཅན། མདུན་དུ་མཆོད་པ་ཇི་ལྟར་རིགས་པས་མཛེས་པར་བསྟར། རང་གི་མདུན་དུ་མདའ་དར་དང་རོལ་མོའི་བྱེ་བྲག་སོགས་ཉེ་བར་མཁོ་བ་རྣམས་བཤམ། བདག་བསྐྱེད་རྒྱས་པར་བྱ་བའམ། བསྡུ་ན། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ། །སངས་རྒྱས་ཆོས་དང་དགེ་འདུན་རྣམས་ལ་སྐྱབས་སུ་མཆིའོ། །བླ་མ་ཡི་དམ་མཁའ་འགྲོའི་ཚོགས་ལ་སྐྱབས་སུ་མཆིའོ། །རང་སེམས་སྟོང་གསལ་ཆོས་ཀྱི་སྐུ་ལ་སྐྱབས་སུ་མཆིའོ། །ཞེས་ཅི་ནུས་དང་། སངས་རྒྱས་ཆོས་ཚོགས་སོགས་ལན་གསུམ་གྱིས་སྐྱབས་སེམས་དང་། །སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། ཨོཾ་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། སྟོང་པའི་ངང་ལས་རང་ཉིད་སྐད་ཅིག་གིས་འཕགས་པ་ཐུགས་རྗེ་ཆེན་པོ་འགྲོ་འདུལ་ཡིད་བཞིན་ནོར་བུ་སྐུ་མདོག་དཀར་གསལ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བའི་བར་དུ་ཡིད་བཞིན་ནོ་བུ་དང་། གཡས་འོག་མས་ཤེལ་ཕྲེང་དང་གཡོན་འོག་མས་མེ་ཏོག་པདྨ་དཀར་པོ་བསྣམས་པ། རི་དྭགས་ཀྲྀཥྞ་སཱ་རིའི་ལྤགས་པས་ནུ་མ་གཡོན་པ་བཀབ་ཅིང་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བའི་གདན་ལ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུར་གྱུར་པར་བསམ་ལ། ཨོཾ་མ་ཎི་པདྨེ་ཧཱུཾ། །ཞེས་ཅི་ནུས་བཟླས་མཐར། འཕགས་པ་ཐུགས་རྗེ་ཆེན་པོས་བདག་དང་སེམས་ཅན་ཐམས་ཅད་ལ་འདོད་རྒུའི་འབྱོར་པ་ཟད་མི་ཤེས་པའི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། མདུན་གྱི་ནམ་མཁར་ལྷ་དང་མིའི་མཆོད་པའི་ཚོགས་དང་། འདོད་རྒུའི་དཔལ་འབྱོར་རྫོགས་ལྡན་དུས་ཀྱི་སྤྲིན་ཕུང་ལྟར་འཁྲིགས་པའི་དབུས་སུ་པད་ཟླའི་གདན་ལ་བླ་མ་དང་གཉིས་སུ་མེད་པའི་བྱང་ཆུབ་སེམས་དཔའ་རིན་ཆེན་མང་སྐུ་མདོག་གསེར་བཙོ་མ་ལྟར་འབར་བ་ཞལ་གཅིག་ཕྱག་གཉིས་པ། ཕྱག་གཡས་མཆོག་སྦྱིན་གྱི་ཕྱག་རྒྱ་ལས་ལོངས་སྤྱོད་ནམ་མཁའ་མཛོད་ཀྱི་ཆར་འབེབས་ཤིང་། གཡོན་མཉམ་བཞག་གི་སྟེང་ན་དགོས་འདོད་ཐམས་ཅད་འབྱུང་བའི་ནོར་བུ་རིན་པོ་ཆེ་དབང་གི་རྒྱལ་པོ་བསྣམས་པ། ཞི་ཞིང་འཛུམ་ལ་སྒེག་པའི་ཉམས་ཅན། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་མཐའ་སྐོར་ཀུན་ཏུ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་དམ་ཅན་སྲུང་མའི་ཚོགས་རྣམས་དང་། ཁྱད་པར་དུ་རྒྱལ་པོ་ཆེན་པོ་རྣམ་མང་ཐོས་སྲས། འཕགས་པ་ཛམྦྷ་ལ། ལྷ་མོ་ནོར་རྒྱུན་མ། གཡང་གི་ལྷ་མོ་དཔལ་ཆེན་མོ། །གནོད་སྦྱིན་ཨ་པ་ར་ཛཱི་ཏ། ལྷ་ཆེན་ཚོགས་ཀྱི་བདག་པོ། ཨཱཪྻ་རེ་མནྟ་སོགས་གནོད་སྦྱིན་ནོར་ལྷ་གཏེར་བདག་དཀར་ཕྱོགས་སྐྱོང་བའི་ཚོགས་བསམ་གྱིས་མི་ཁྱབ་པས་བསྐོར་བ་མངོན་སུམ་བཞིན་ཏུ་བཞུགས་པར་གྱུར། ཅེས་བརྗོད་ཅིང་བསམ་ལ། སྤོས་རོལ་དང་དབྱངས་ཀྱི་འགྱུར་སྙན་པོས། ཀྱེ། དང་པོ་གཡང་ལེན་གར་སྲིད་ན། །སྔོན་གྱི་བསྐལ་པའི་དང་པོ་ལ། །ཁ་བ་ཅན་གྱི་རྒྱལ་ཁམས་སུ། །སྤྱན་རས་གཟིགས་ཀྱི་སྤྲུལ་པ་ལས། །སྤྲེའུ་བྱང་ཆུབ་སེམས་དཔའ་བྱུང་། །ཇོ་མོ་སྒྲོལ་མའི་སྤྲུལ་པ་ལས། །བྲག་སྲིན་ནག་མོ་བྱ་བ་བྱུང་། །དེ་གཉིས་ཐབས་ཤེས་འཕྲད་པ་ལས། །གདོང་དམར་མི་རྣམས་ཐམས་ཅད་བྱུང་། །མི་རྣམས་ཕོངས་པས་མནར་བ་ལས། །སྤྲེའུའི་རྒྱལ་པོ་ཡར་གཤེགས་ཏེ། །པོ་ཏཱ་ལ་ཡི་རྩེ་མོ་ན། །སྤྱན་རས་གཟིགས་དབང་བཞུགས་པ་ལ། །སྤྲེའུའི་རྒྱལ་པོས་འདི་སྐད་ཞུས། །ཀྱེ་མ་ལས་ཀྱི་འབྲས་བུ་སྨིན། །དབོན་སྲས་མང་པོ་འཕེལ་བ་ལ། །དྲན་པ་གསལ་བ་ལྷ་དང་འདྲ། །གདུག་རྩུབ་ཆེ་བ་ལྷ་མིན་འདྲ། །གོས་མེད་གཅེར་བུ་དུད་འགྲོ་འདྲ། །བཀྲེས་སྐོམ་སྡུག་བསྔལ་ཡི་དྭགས་འདྲ། །ཤིན་ཏུ་སྡུག་བསྔལ་དམྱལ་བ་འདྲ། །རིགས་དྲུག་སྡུག་བསྔལ་ངད་པ་ཚ། །འདི་ལ་ལས་ཐབས་ཅི་ཞིག་བྱ། །དེ་སྐད་ཞུས་པས་བཀའ་སྩལ་པ། །སྤྲེའུའི་རྒྱལ་པོ་ལེགས་པར་ཉོན། །ཁྱེད་ཀྱི་བུ་དང་ཚ་བོ་རྣམས། །གདོང་དམར་སྲིན་པོ་ཡིན་ཟེར་ཏེ། །ཁ་བ་ཅན་གྱི་ཞིང་ཁམས་སུ། །བྱིན་གྱིས་རླབས་པའི་སྤྲུལ་པ་ཡིན། །ཟས་ལ་འབྲས་བུ་སྣ་ཚོགས་ཟོ། །སྐོམ་དུ་འབྱུང་བ་ཆུ་ལ་འཐུང་། །གོས་སུ་ལྷ་ཡི་ན་བཟའ་གཏོད། །སྐབས་སུ་གཡང་འགུགས་གཡང་ལེན་བྱ། །སྤྱན་རས་གཟིགས་ཀྱིས་དེ་སྐད་གསུངས། །དེ་ནས་སྤྲེའུའི་རྒྱལ་པོ་དེས། །སྔགས་འཆང་རྒྱལ་པོ་སྤྱན་དྲངས་ནས། །ལྷ་གཞི་དཀར་པོའི་གདན་སྟེང་དུ། །དཀོན་མཆོག་མཆོད་པ་རྒྱ་ཆེར་བཤམས། །རྒོད་སྒྲོ་མདའ་དར་དཀར་པོ་ལ། །དངུལ་དཀར་མེ་ལོང་བཏགས་པས་གཡབ། །ཁུ་ཡེ་བརྗོད་ཅིང་འོ་དོད་པོས། །སྔགས་འཆང་ངག་གི་སྨྲ་འབོད་དང་། །དབུ་ནག་བོད་ཀྱི་བསོད་ནམས་ལས། །འོད་ཟེར་སྣ་ལྔ་སྟེང་དུ་འཕྲོས། །ཚངས་པ་དུང་མདོག་ཐོད་དཀར་པོར། །ལྷ་ཡི་ལོངས་སྤྱོད་ལྡན་པ་ལས། །འོད་རླང་དཀར་པོ་གཅིག་ཏུ་སྤྲུལ། །ལྷ་ཡི་ལོངས་སྤྱོད་བོད་དུ་འོང་། །བོད་ལྷ་ཁམས་འདྲ་བ་དེ་ནས་སྲིད། །འོད་ཟེར་འོག་ཏུ་འཕྲོས་པ་ལས། །ཀླུ་རྒྱལ་གཙུག་ན་རིན་ཆེན་ཕོག །ཀླུ་ཡི་ལོངས་སྤྱོད་འཕེན་པོ་ལས། །ཀླུ་ཡི་ལོངས་སྤྱོད་བོད་དུ་འོང་། །བོད་ཀླུ་ལས་གྲོལ་བ་དེ་ལས་སྲིད། །འོད་ཟེར་བར་སྣང་ཁམས་སུ་འཕྲོས། །གཉེན་གྱི་རྒྱལ་པོ་ཆེན་པོར་ཕོག །གཉེན་གྱི་ལོངས་སྤྱོད་བོད་དུ་འོང་། །བོད་འགྲོལ་ཐབས་གཉན་པ་དེ་ནས་སྲིད། །འོད་ཟེར་ཤར་ཕྱོགས་གླིང་དུ་འཕྲོས། །ཡུལ་འཁོར་སྲུང་གི་རྒྱལ་པོ་ལ། །ལོངས་སྤྱོད་ལྡན་ཞིང་སྐྱེ་བ་བཟང་། །ཤར་ཕྱོགས་གཡང་རྣམས་བོད་དུ་འོང་། །བོད་སྐྱེ་བ་བཟང་བ་དེ་ནས་སྲིད། །འོད་ཟེར་ལྷོ་ཕྱོགས་གླིང་དུ་འཕྲོས། །འཕགས་སྐྱེས་པོ་ཡི་རྒྱལ་པོ་ལ། །ལོངས་སྤྱོད་ལྡན་ཞིང་དཀོར་ནོར་ཕྱུག །ལྷོ་ཕྱོགས་གཡང་རྣམས་བོད་དུ་འོང་། །བོད་དཀོར་ནོར་ཕྱུག་པ་དེ་ནས་སྲིད། །འོད་ཟེར་ནུབ་ཕྱོགས་གླིང་དུ་འཕྲོས། །སྤྱན་མི་བཟང་གི་རྒྱལ་པོ་ལ། །ལོངས་སྤྱོད་ལྡན་ཞིང་མི་འཕེལ་ཆེ། །ནུབ་ཕྱོགས་གཡང་རྣམས་བོད་དུ་འོང་། །བོད་མི་འཕེལ་ཆེ་བ་དེ་ནས་སྲིད། །འོད་ཟེར་བྱང་གི་ཕྱོགས་སུ་འཕྲོས། །རྣམ་ཐོས་སྲས་ཀྱི་རྒྱལ་པོ་ལ། །ལོངས་སྤྱོད་ལྡན་ཞིང་སྐུ་ཚེ་རིང་། །བྱང་ཕྱོགས་གཡང་རྣམས་བོད་དུ་འོང་། །བོད་སྐུ་ཚེ་རིང་བ་དེ་ནས་སྲིད། །འོད་ཟེར་ཕྱོགས་བཅུ་ཀུན་ཏུ་འཕྲོས། །ཕྱོགས་བཅུའི་ནོར་ལྷ་ཀུན་ལ་ཕོག །དེ་རྣམས་ལོངས་སྤྱོད་བོད་དུ་འོང་། །བོད་གཡང་ནོར་འཕེལ་བ་དེ་ནས་སྲིད། །འོད་ཟེར་རྒྱ་གར་ཡུལ་དུ་འཕྲོས། །རྒྱ་གར་ཆོས་རྣམས་བོད་དུ་འོང་། །བོད་ཆོས་ལ་དགའ་བ་དེ་ནས་སྲིད། །འོད་ཟེར་ཏ་ཟིག་ཡུལ་དུ་འཕྲོས། །ཏ་ཟིག་ནོར་རྣམས་བོད་དུ་འོང་། །བོད་དཀོར་ནོར་ཕྱུག་པ་དེ་ནས་སྲིད། །འོད་ཟེར་རྒྱ་ནག་ཡུལ་དུ་འཕྲོས། །རྒྱ་ཡི་ཇ་དར་བོད་དུ་འོང་། །བོད་ཇ་དར་འཕེལ་བ་དེ་ནས་སྲིད། །འོད་ཟེར་ཧོར་གྱི་ཡུལ་དུ་འཕྲོས། །ཧོར་གྱི་རྟ་གཡང་བོད་དུ་འོང་། །བོད་རྟ་དྲེལ་འཕེལ་བ་དེ་ནས་སྲིད། །འོད་ཟེར་བོད་ཀྱི་ཡུལ་དུ་འཕྲོས། །མི་དང་གཡང་གཉིས་ཀྱི་ལི་ལི། །ཕྱྭ་དང་གཡང་གཉིས་སྒ་ར་ར། །ལོངས་སྤྱོད་སྣ་ཚོགས་དེ་ལས་འཚོགས། །སྔོན་གྱི་བཟང་འཕྲོ་དཔལ་བཞིན་དུ། །དར་དཀར་གཡབ་ཅིང་འདིར་འབོད་ནས། །དེ་རིང་ཁུ་ཡེ་ཕྱྭ་གཡང་ལེན། །ཅེས་སྔོན་བྱུང་གི་གླེང་གཞིས་མཚམས་སྦྱར་ནས་གཡང་འགུགས་དངོས་ནི། བསང་ཤིང་གི་དུད་པ་དང་དཀར་མངར་རིན་ཆེན་འབྲུ་སྨན་ཇ་ཆང་ཟས་སྣའི་ཕུད་སོགས་ཀྱིས་མཆོད་ཅིང་། ཨོཾ་ཨཱཿཧཱུྃ། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཀོན་མཆོག་རྣམ་གསུམ་ཐུགས་རྗེའི་གཏེར། །རྩ་བརྒྱུད་བླ་མ་བྱིན་རླབས་ཅན། །ཡི་དམ་ཞི་ཁྲོ་དངོས་གྲུབ་མཛོད། །མཁའ་འགྲོ་ཆོས་སྐྱོང་ཕྲིན་ལས་བདག །ཁྱད་པར་མཚན་ཙམ་འཛིན་པས་ཀྱང་། །རྒུད་ཅིང་ཕོངས་པ་ཀུན་བསལ་ནས། །འདོད་རྒུའི་ལོངས་སྤྱོད་སྩོལ་མཛད་པའི། །བྱང་ཆུབ་སེམས་དཔའ་རིན་ཆེན་མང་། །རྣམ་མང་ཐོས་སྲས་རྟ་བདག་བརྒྱད། །རྨུགས་འཛིན་དབང་པོ་ནོར་རྒྱུན་མ། །ཡབ་ཡུམ་འཁོར་དང་བཅས་པ་དང་། །ཨ་པ་ར་ཛཱི་ཏ་ཚོགས་ཀྱི་བདག །རེ་མནྟ་སོགས་གནོད་སྦྱིན་དང་། །ནོར་ལྷ་གཏེར་བདག་བྱེ་བའི་ཚོགས། །གཙང་རིས་དཔལ་མགོན་དམ་ཚིག་ཅན། །ལྷན་ཅིག་སྐྱེས་དང་འགོ་བའི་ལྷ། །མདོར་ན་དཀར་ཕྱོགས་སྐྱོང་བའི་སྡེ། །སྤྲུལ་དང་ཡང་སྤྲུལ་བཅས་པ་ལ། །ཕྱག་འཚལ་བསྟོད་ཅིང་གསོལ་བ་འདེབས། །དངོས་འབྱོར་ཡིད་སྤྲུལ་མཆོད་པར་འབུལ། །སྨན་ཤིང་སྤོས་ཀྱི་དུད་པས་མཆོད། །ཟས་མཆོག་ཕྱེ་མར་འབྲུ་སྣས་མཆོད། །རིན་ཆེན་དར་ཟབ་རྒྱས་མཚོ་མཆོད། །དཀར་གསུམ་གཙང་མའི་ཕུད་ཀྱིས་མཆོད། །མངར་གསུམ་དྭང་མའི་བཅུད་ཀྱིས་མཆོད། །ཇ་ཆང་འདོད་ཡོན་སྐྱེམས་ཀྱིས་མཆོད། །བདག་ཅག་སྙིགས་མ་ལྔ་ཡི་འགྲོ། །དབུལ་ཞིང་ཕོངས་པས་ཉམས་ཐག་ཚེ། །མོས་གུས་གདུང་བས་གསོལ་འདེབས་ན། །སྔོན་གྱི་དམ་བཅའ་མ་གཡེལ་བར། །ཐུགས་རྗེ་ཐུགས་དམ་ཤུགས་བསྐྱེད་ལ། །ཕྱྭ་གཡང་འགུགས་པའི་ཕྲིན་ལས་མཛོད། །མདའ་དར་གཡབ་ཅིང་། ཀྱེ། སྟེང་ཕྱོགས་ལྷ་ཁམས་རྣམས་ཀྱི་གཡང་། །དེ་རིང་ཁུ་ཡེ་ཕྱྭ་གཡང་ཁུག །བར་སྣང་གཉན་གྱི་རྒྱལ་པོའི་གཡང་། །དེ་རིང་ཁུ་ཡེ་ཕྱྭ་གཡང་ཁུག །ས་འོག་ཀླུ་ཡི་རྒྱལ་པོའི་གཡང་། །དེ་རིང་ཁུ་ཡེ་ཕྱྭ་གཡང་ཁུག །ཤར་ཕྱོགས་ཡུལ་འཁོར་སྲུང་གི་གཡང་། །དེ་རིང་ཁུ་ཡེ་ཕྱྭ་གཡང་༴ ལྷོ་ཕྱོགས་འཕགས་སྐྱེས་པོ་ཡི་གཡང་། །དེ་རིང་ཁུ་ཡེ༴ ནུབ་ཕྱོགས་སྤྱན་མི་བཟང་གི་གཡང་། །དེ་རིང་ཁུ་ཡེ༴ བྱང་ཕྱོགས་རྣམ་ཐོས་སྲས་ཀྱི་གཡང་། །དེ་རིང་ཁུ་ཡེ༴ ཕྱོགས་སྐྱོང་ནོར་ལྷ་རྣམས་ཀྱི་གཡང་། །དེ་རིང་ཁུ་ཡེ༴ ལྷ་འདྲེ་མཐུ་རྩལ་ཅན་གྱི་གཡང་། །དེ་རིང་ཁུ་ཡེ༴ གེ་སར་རྒྱལ་པོའི་དམག་གཡང་དེ། །དེ་རིང་ཁུ་ཡེ༴ བལ་པོའི་སྐྱེ་བཞིན་ལེགས་གཡང་དེ། །དེ་རིང་ཁུ་ཡེ༴ སོག་པོའི་མདའ་རྩལ་ཆེ་བའི་གཡང་། །དེ་རིང་ཁུ་ཡེ༴ དགུང་སྔོན་མཐོན་པོའི་ཕ་གཡང་དེ། །དེ་རིང་ཁུ་ཡེ༴ དོག་མོ་ས་ཡི་མ་གཡང་དེ། །དེ་རིང་ཁུ་ཡེ༴ ཉི་ཟླ་སྐར་གསུམ་བཀྲ་གཡང་དེ། །དེ་རིང་ཁུ་ཡེ༴ འཇའ་ཚོན་སྣ་ལྔའི་བཀྲག་གཡང་དེ། །དེ་རིང་ཁུ་ཡེ༴ ལྷོ་སྤྲིན་སྨུག་པོའི་ཕྱུག་གཡང་དེ། །དེ་རིང་ཁུ་ཡེ༴ རི་རབ་ལྷུན་པོའི་བརྟན་གཡང་དེ། །དེ་རིང་ཁུ་ཡེ༴ གླིང་ཆེན་བཞི་ཡི་བཀོད་གཡང་དེ། །དེ་རིང་ཁུ་ཡེ༴ གླིང་ཕྲན་བརྒྱད་ཀྱི་འཁོར་གཡང་དེ། །དེ་རིང་ཁུ་ཡེ༴ རི་ཕྲན་རྣམས་ཀྱི་བཙུན་གཡང་དེ། །དེ་རིང་ཁུ་ཡེ༴ རྒྱ་མཚོ་ཆེན་པོའི་ཟབ་གཡང་དེ། །དེ་རིང་ཁུ་ཡེ༴ དཔག་བསམ་ཤིང་གི་ལོ་གཡང་དེ། །དེ་རིང་ཁུ་ཡེ༴ རྩི་ཤིང་ནགས་ཚལ་འཕན་གཡང་དེ། །དེ་རིང་ཁུ་ཡེ༴ ཕྱུག་པོ་རྣམས་ཀྱི་ཕྱུག་གཡང་དེ། །དེ་རིང་ཁུ་ཡེ༴ འཕན་པོ་རྣམས་ཀྱི་འཕན་གཡང་དེ། །དེ་རིང་ཁུ་ཡེ༴ བཙན་པོ་རྣམས་ཀྱི་བཙན་གཡང་དེ། །དེ་རིང་ཁུ་ཡེ༴ གཉན་པོ་རྣམས་ཀྱི་གཉན་གཡང་དེ། །དེ་རིང་ཁུ་ཡེ༴ འཆི་མེད་རྡོ་རྗེའི་ཚེ་གཡང་དེ། །དེ་རིང་ཁུ་ཡེ༴ རྒྱལ་བ་རྣམས་ཀྱི་ཐུགས་རྗེའི་གཡང་། །དེ་རིང་ཁུ་ཡེ་ཕྱྭ་གཡང་ཁུག །ཁུ་ཡེ་ཕྱྭ་ཁུག་གཡང་ཁུག་ལ། །གཡང་ལེན་ཕུད་ཀྱིས་ནོར་ལྷ་མཆོད། །གཡང་ལེན་ཕུད་ཀྱིས་ཕྱུག་ལྷ་མཆོད། །གཡང་ལེན་ཕུད་ཀྱིས་ཁྱིམ་ལྷ་མཆོད། །གཡང་ལེན་ཕུད་ཀྱིས་ཚེ་ལྷ་མཆོད། །འཆི་མེད་ཚེ་དང་འཛད་མེད་ནོར། །དཔལ་འབྱོར་ལོངས་སྤྱོད་ཕྱྭ་གཡང་ཀུན། །རི་ལྟར་སྤུངས་ཤིང་མཚོ་ལྟར་བསྐྱིལ། །བདེ་སྐྱིད་བཀྲ་ཤིས་དངོས་གྲུབ་སྩོལ། །རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེ་རྣམས་ཀྱི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་གྲངས་མེད་པ་འཕྲོས་པས། སྲིད་ཞིའི་ཚེ་བསོད་དཔལ་འབྱོར་ཕྱྭ་གཡང་ལོངས་སྤྱོད་བརྟན་གཡོའི་དྭང་བཅུད་ཐམས་ཅད་བཀྲ་ཤིས་རྫས་རྟགས་རྒྱལ་སྲིད་བདུན་དང་འཇའ་ཟེར་ཐིག་ལེའི་རྣམ་པར་སྤྱན་དྲངས། མདུན་གྱི་རྟེན་རྫས་རྣམས་ལ་ཐིམ་པས་འདོད་རྒུ་ཐམས་ཅད་ཡིད་བཞིན་དུ་སྩོལ་བར་གྱུར་པར་བསམ་ལ། སྤྲོ་ན་སྔགས་བཟླ་བ་ནི། ཨོཾ་ཨཱཿགུ་རུ་རཏྣ་སཾ་བྷ་བ་སརྦ་སིདྡྷི་ཧཱུྃ། ཨོཾ་བཻ་ཤྲ་མ་ཎཱ་ཡ་སྭཱ་ཧཱ། ཨོཾ་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ། ཨོཾ་བ་སུ་དྷཱ་རི་ཎཱི་སྭཱ་ཧཱ། །ཨོཾ་ཀ་མ་ལ་བཱ་སི་ནི་ཀ་མ་ལེ་མ་ཧཱ་ལཀྵྨིར་ཛྱཱཾ་མེ་དེ་ཧི་བ་ར་དེ་སྭཱ་ཧཱ། །ཨོཾ་ཨ་པ་ར་ཛཱི་ཏ་རཏྣ་སརྦ་སིདྡྷི་བྷྲཱུྃ། །ཨོཾ་བྷྲཱུྃ་ག་ཎ་པ་ཏ་ཡེ་སྭཱ་ཧཱ། །ཨོཾ་ཨཱཪྻ་རེ་མནྟཱ་ཡ་སྭཱ་ཧཱ། །ཞེས་པ་རྣམས་ཅི་ནུས་བཟླ། ཚར་གྲངས་བྱེད་ན། མཆོད་པ་ཞལ་བསོ། ཨོཾ་ཨཱཿཧཱུྃ། །ཕྱོགས་བཅུའི་འཇིག་རྟེན་སོགས་ནས་འདི་ཡན་བསྐྱར་ཞིང་སྔགས་བཟླ་བ་སྤེལ། དེ་ནས་མཇུག་ཏུ་གཡང་ལེན་པ་ནི། ཀྱེ། །མཐོ་བ་སྲིད་གསུམ་ཡང་རྩེ་ནས། །རླུང་གི་རྒྱ་གྲམ་ཡན་བར་གྱི། །ཁམས་ལྔའི་ནུས་བཅུད་ཚེ་དཔལ་གཡང་། །དེང་འདིར་ཁུ་ཡེ་ཕྱྭ་གཡང་ལེན། །ཕྱོགས་བཅུ་དག་པའི་ཞིང་ཁམས་དང་། །འཛམ་གླིང་རྔ་ཡབ་གཞན་གསུམ་ནས། །དམ་པ་ཆོས་ཀྱི་ཆབ་སྲིད་དེ། །དེང་འདིར་ཁུ་ཡེ་ཕྱྭ་གཡང་ལེན། །ལྷ་གནས་སུ་ཅུ་རྩ་གསུམ་དང་། །ལུས་འཕགས་ལུས་དང་འཕགས་པ་ནས། །མཐོ་རིས་སྙན་གྲགས་རྒྱལ་སྲིད་དེ། །དེང་འདིར་ཁུ་ཡེ༴ གནོད་སྦྱིན་གྲོང་ཁྱེར་ཁང་བཟང་དང་། །བ་གླང་སྤྱོད་གླིང་གཡོ་ལམ་ནས། །བ་ཕྱུགས་ནོར་མཛོད་རྨ་གཡང་དེ། །དེང་འདིར་ཁུ་ཡེ༴ མཐོ་རིས་ནམ་མཁའི་གནས་རྣམས་དང་། །སྒྲ་མི་སྙན་གཉིས་དེའི་ཟླ་ནས། །འཆི་མེད་ཚེ་ཡི་སྲོག་གཡང་དེ། །དེང་འདིར་ཁུ་ཡེ༴ བསམ་གཏན་བཞི་གནས་མན་ཆད་དང་། །ས་འོག་ལྟོ་འཕྱེའི་གནས་ཡན་གྱི། །བདེ་སྐྱིད་མངའ་རིས་ཕུན་ཚོགས་དེ། །དེང་འདིར་ཁུ་ཡེ་ཕྱྭ་གཡང་ལེན། ཀྱེ། །ཕྱོགས་བཅུ་དུས་གསུམ་བྱོན་པ་ཡི། །དཀོན་མཆོག་རིན་ཆེན་རྣམ་གསུམ་དང་། །རྩ་བརྒྱུད་བླ་མའི་བྱིན་རླབས་དེ། །དེང་འདིར་ཁུ་ཡེ་ཕྱྭ་གཡང་ལེན། །ཐེག་པ་རིམ་དགུ་རྒྱུད་སྡེ་བཞི། །ཡི་དམ་དཀྱིལ་འཁོར་ལྷ་ཚོགས་ཀྱི། །མཆོག་དང་ཐུན་མོང་དངོས་གྲུབ་དེ། །དེང་འདིར་ཁུ་ཡེ༴ གནས་གསུམ་དཔའ་བོ་མཁའ་འགྲོ་དང་། །ཆོས་སྲུང་དམ་ཅན་རྒྱ་མཚོའི་སྡེའི། །གང་བཅོལ་གཡེལ་མེད་ཕྲིན་ལས་དེ། །དེང་འདིར་ཁུ་ཡེ༴ གནོད་སྦྱིན་དབུལ་སེལ་ནོར་སྐྱོང་ཚོགས། །མི་ཟད་འདོད་དགུ་དབང་རྣམས་ཀྱི། །དགོས་འབྱུང་ལོངས་སྤྱོད་གཏེར་མཛོད་དེ། །དེང་འདིར་ཁུ་ཡེ༴ རིགས་རུས་སྣག་འབྲང་དང་སྐྱེས་ལྷ། །འགོ་བའི་དགྲ་ལྷ་དཔུང་གཉེན་དུ། །མི་འབྲལ་ཟུང་དུ་འགྲོགས་པའི་གཡང་། །དེང་འདིར་ཁུ་ཡེ༴ དམ་ལྡན་དཀར་པོའི་ཕྱོགས་སྐྱོང་བའི། །ཡུལ་ལྷ་གཞི་བདག་གནས་སྲུང་རྣམས། །རྐྱེན་བསལ་མཐུན་འགྲུབ་མི་འབྲལ་གཡང་། །དེང་འདིར་ཁུ་ཡེ༴ སྣང་སྲིད་སྣོད་བཅུད་དཀྱིལ་འཁོར་ལྷ། །གདོད་ནས་དག་པ་ལྷུན་འགྲུབ་གཤིས། །གནས་ལུགས་ཕྱག་རྒྱ་ཆེན་པོའི་གཡང་། །དེང་འདིར་ཁུ་ཡེ་ཕྱྭ་གཡང་ལེན། །ཀྱེ །ཚེ་སྣང་མཐའ་ཡས་རྣམ་པར་རྒྱལ། །འཕགས་མ་པད་འབྱུང་གྲུབ་རྒྱལ་སོགས། །འཆི་མེད་བརྙེས་རྣམས་ཚེ་དངོས་དེ། །དེང་འདིར་ཁུ་ཡེ་ཕྱྭ་གཡང་ལེན། །བདེ་གཤེགས་མཆེད་ལྔ་སྤྲུལ་པ་ལྔ། །ནང་བ་ལྷ་མི་དྲང་སྲོང་ཕྱིའི། །ན་གསོ་འཆི་སླུ་སྨན་ནུས་དེ། །དེང་འདིར་ཁུ་ཡེ༴ འཇམ་མགོན་ངག་དབང་དབྱངས་ཅན་སོགས། །ཕྱོགས་དུས་རྒྱལ་བ་སྲས་བཅས་ཀྱི། །མཁྱེན་རབ་བློ་གྲོས་སྤོབས་པ་དེ། །དེང་འདིར་ཁུ་ཡེ༴ སྙིང་རྗེའི་སྤྱན་རས་གཟིགས་འགྲོ་མགོན། །ས་དང་ལམ་གནས་བྱང་སེམས་རྣམས། །ཐུགས་བསྐྱེད་གཞན་དོན་ཕྱོགས་མེད་དེ། །དེང་འདིར་ཁུ་ཡེ༴ གསང་བདག་རྡོར་འཛིན་རྟ་མགྲིན་སོགས། །གསང་སྔགས་རིག་གཟུངས་གྲུབ་བརྙེས་པས། །ལོག་འདྲེན་གཞོམ་པའི་མཐུ་སྟོབས་དེ། །དེང་འདིར་ཁུ་ཡེ༴ འདུལ་བ་མདོ་སྡེ་མ་མོ་སྔགས། །གསར་རྙིང་བསྟན་འཛིན་བརྒྱུད་བཅས་ཀྱི། །སྤངས་རྟོགས་བརྟུལ་ཞུགས་སྒྲུབ་འབྲས་དེ། །དེང་འདིར་ཁུ་ཡེ༴ རྒྱ་བོད་མཁན་སློབ་པཎ་གྲུབ་ལོང་། །འཆད་ཉན་རྩོམ་སྒྱུར་བསྒོམ་སྒྲུབ་རྒྱུན། །སངས་རྒྱས་བསྟན་པ་དར་བའི་གཡང་། །དེང་འདིར་ཁུ་ཡེ༴ མོ་རྩིས་རྫས་སྔགས་བསྒོམ་བསྒྲུབ་སོགས། ཟག་བཅས་ཟག་མེད་མངོན་མཁྱེན་ལྔས། །དུས་གསུམ་གསལ་སྟོན་པྲ་གཡང་དེ། །དེང་འདིར་ཁུ་ཡེ༴ སོ་འབྲང་སོགས་ལྔ་པདྨ་འབྱུང་། །ནཱ་གཱ་རྫུ་ནའི་དྲང་སྲོང་སོགས། །སྲི་འདུལ་སྲིད་སྤེལ་སྲུང་སྐྱོབ་གཡང་། །དེང་འདིར་ཁུ་ཡེ༴ ལྷ་ཀླུ་གནོད་སྦྱིན་གཏེར་གྱི་བདག །བརྒྱད་བརྒྱད་བློན་འཁོར་འབངས་བཅས་ཀྱི། །མཛད་མེད་དབྱིག་གི་བང་མཛོད་དེ། །དེང་འདིར་ཁུ་ཡེ༴ ཛམ་ལ་ནོར་བུ་རྣམ་མང་བུ། །གནོད་སྦྱིན་སྡེ་དཔོན་འབྲོག་གནས་སོགས། །རྐང་བཞིའི་ཕྱུགས་གཡང་རྨུ་གཡང་དེ། །དེང་འདིར་ཁུ་ཡེ༴ མཁར་ཁྱིམ་ཐབ་མཛོད་འདོད་འཇོའི་ལྷ། །མ་ཕྱིའི་གྲོགས་རྒྱལ་མཐིང་གེ་སོགས། །བཟའ་བཏུང་ཟས་བཅུད་སྲིད་གཡང་དེ། །དེང་འདིར་ཁུ་ཡེ༴ མ་དྲོས་ཆུང་ཞི་གངས་ཅན་རི། །འབིགས་བྱེད་ཡུལ་དྲུག་འཛམ་གླིང་སྤྱིའི། །སྐོམ་གཤེར་ཡུལ་གནས་བཞི་བདག་གཡང་། །དེང་འདིར་ཁུ་ཡེ༴ ཁྱད་པར་ཏི་སེ་ཐང་ལྷ་རྨ། །མ་ཕམ་གཡུ་མཚོ་ཁྲི་ཤོག་སོགས། །བོད་ཁམས་གནས་བདག་རྨ་གཡང་དེ། །དེང་འདིར་ཁུ་ཡེ༴ ཆོས་རྒྱལ་རིགས་ལྡན་མང་བཀུར་སོགས། །མི་དབང་གསེར་དངུལ་ཟངས་ལྕགས་ཀྱི། །འཁོར་ལོས་བསྒྱུར་རྣམས་ཆབ་སྲིད་བརྟན། །དེང་འདིར་ཁུ་ཡེ༴ གཤེན་རབས་ཕྱྭ་ལྷ་དགུ་ཁྲི་འབུམ། །ཐུགས་དཀར་སུམ་བརྒྱ་དྲུག་ཅུ་སོགས། །གཡུང་དྲུང་བོན་གྱི་ཕྱྭ་གཡང་དེ། །དེང་འདིར་ཁུ་ཡེ༴ འཕགས་བོད་བདེ་འབྱུང་ཨུ་རྒྱན་སོགས། །རྒྱལ་བསྟན་སྤེལ་སྐྱོང་ཆོས་ཀྱི་ཁྲིམས། །བསྟན་འགྲོར་དགེ་བའི་ལེགས་མཛད་དེ། །དེང་འདིར་ཁུ་ཡེ༴ ཏ་ཟིག་རྒྱ་བོད་ཧོར་ཕྲོམ་སོགས། །ནོར་སྤེལ་དགྲ་འདུལ་གཉེན་སྐྱོང་བའི། །ཆེ་བཙུན་བཙན་ཕྱུག་རྒྱལ་སྲིད་གཡང་། །དེང་འདིར་ཁུ་ཡེ༴ མཐའ་ཀླུང་དབུས་ལྗོངས་ཙི་ན་སོགས། །མི་རྒྱུད་ལོ་འབྲས་འཕན་དར་འཕེལ། །རིན་ཆེན་ཇ་དར་གོས་ཟས་གཡང་། །དེང་འདིར་ཁུ་ཡེ་ཕྱྭ་གཡང་ལེན། ། ༈ ཀྱེ། སྟོང་ཁམས་གསུམ་ན་ཡུལ་བདེ་ཞིང་། །རྫོང་བཙན་ཁྲིམས་བརྟན་དུས་ཆར་འབེབས། །ལོ་ལེགས་ཆོས་དར་ཕྱི་ཡི་གཡང་། །དེང་འདིར་ཁུ་ཡེ༴ མི་ཆོས་ཕྱུགས་རྒྱུད་འཕེལ་ནང་གཤིམས། །ཕོ་དཔའ་མོ་འཛངས་འོག་རྟ་མགྱོགས། །གོ་བཙན་མཚོན་རྣོ་ནང་གི་གཡང་། །དེང་འདིར་ཁུ་ཡེ༴ མཁས་གྲུབ་རྩོད་རྒྱལ་དོན་གཉིས་གྲུབ། །ནད་མེད་ཚེ་རིང་རྒྱགས་སྐྱིད་བདེ། །མཐར་ཐུག་འཚང་རྒྱ་དོན་གྱི་གཡང་། །དེང་འདིར་ཁུ་ཡེ༴ ཆོས་དབྱིངས་ཆོས་ཅན་བསླུ་མེད་མཐུས། །བདེན་པའི་ཚིག་ལ་དབང་རྣམས་ཀྱིས། །ཅི་བཏབ་སྨོན་ལམ་འགྲུབ་པའི་གཡང་། །དེང་འདིར་ཁུ་ཡེ༴ ཚོགས་རྫོགས་རྟེན་འབྲེལ་མངའ་ཐང་ལས། །རྫས་རྟགས་རྒྱལ་སྲིད་ཉེར་བཅས་ཀྱི། །འཇིག་རྟེན་དགེ་མཛད་བཀྲ་ཤིས་གཡང་། །དེང་འདིར་ཁུ་ཡེ་ཕྱྭ་གཡང་ལེན། །ལོངས་སྤྱོད་བཀྲ་ཤིས་ཕུན་ཚོགས་ཀུན། །གནས་འདིར་བརྟན་པའི་དངོས་གྲུབ་སྩོལ། །འདོད་རྒུའི་དཔལ་འབྱོར་རྒྱས་པ་དང་། །བསམ་དོན་ཡིད་བཞིན་འགྲུབ་པར་མཛོད། །ཅེས་གསོལ་བ་གདབ། བསྡུ་ན། ཀྱཻ། །སྟོང་ཁམས་གསུམ་ན་སོགས་མན་གྱིས་ཆོག །ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །ཅེས་ནོངས་པ་བཤགས། མདུན་བསྐྱེད་ཀྱི་ལྷ་ཚོགས་རྣམས་རྟེན་རྫས་སམ། རྒྱབ་རི་འཕན་བཟང་ངམ། གནས་ཁང་བང་མཛོད་སོགས་ལ་བརྟན་པར་བཞུགས་ནས་དངོས་གྲུབ་ཐམས་ཅད་སྩལ་བར་བསམ་ལ། ཨོཾ་འདིར་ནི་རྟེན་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། ཞེས་དང་རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར་བས་བརྟན་པར་བྱ། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་སྐུ་ཐོབ་པར་ཤོག །ཐམས་ཅད་ནམ་མཁའི་མཛོད་བཞིན་ཏུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བ་ཡི། །ཡིད་ལ་འདོད་པ་ཀུན་འགྲུབ་ཤོག །ཅེས་སོགས་ཁྱད་པར་གྱི་བསྔོ་སྨོན་དང་། །ཆེ་བའི་ཆེ་མཆོག་སོགས་མདོ་རྒྱུད་ལས་འབྱུང་བ་དང་། འབད་དང་སྩོལ་བས་མ་གོས་ཀྱང་། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །གནས་འདིར་ཉིན་མོ་བདེ་ལེགས་སོགས་སྐབས་སུ་བབ་པའི་བཀྲ་ཤིས་ཀྱི་ཚིགས་སུ་བཅད་པ་དང་བཅས་མེ་ཏོག་གི་ཆར་སིལ་མར་བ་སྙིམ་པར་བྱའོ། །ཡོན་བདག་ལ་གཡང་གཏད་བྱེད་ན་བརྟན་བཞུགས་ཚར་བའི་རྗེས། སྟན་བཟང་པོ་ལ་འབྲུ་དཀར་གྱི་གཡུང་དྲུང་བྲིས་པར་ཡོན་བདག་གོས་རྒྱན་དང་བཅས་ཏེ་འཁོད། སྤྲོ་ན་སྦྱོང་བ་གསུམ་གྱིས་བཀྲ་ཤིས་པའི་ཆོ་ག་བསྒྲུབ་པར་བར་དུ་གཅོད་པའི་བགེགས་བསྐྲད། གང་ལྟར་ཡང་། སྦྱིན་པའི་བདག་པོ་ནོར་སྦྱིན་བྱེ་བའི་སྡེ་དཔོན་ཛམྦྷ་ལའི་སྐུར་གྱུར་པ་ལ་ཕྱྭ་གཡང་ལོངས་སྤྱོད་ཀྱི་རྫས་རྣམས་གཏད་པས་འདོད་རྒུའི་འབྱོར་བའི་དངོས་གྲུབ་ཟད་མི་ཤེས་པ་ལ་ལོངས་སྤྱོད་པའི་དགེ་མཚན་རྒྱས་པར་གྱུར་པའི་མོས་པས། སྔགས་རྣམས་ཀྱི་མཐར་རྟེན་འབྲེལ་སྙིང་པོ་སྦྲེལ་བ་བཟླ་ཞིང་མེ་ཏོག་འཐོར་བ་དང་བཅས་རྟེན་རྫས་རྣམས་ལག་ཏུ་གཏད། སྤྲོ་ན་གཡང་འགུགས་ཚར་གཅིག་བསྐྱར། གང་ལྟར་ཡང་སྨོན་ལམ་དང་བཀྲ་ཤིས་གོང་དུ་སྨོས་པ་ལྟར་རྒྱས་བསྡུས་ཅི་རིགས་པར་བརྗོད་ཅིང་མེ་ཏོག་གི་ཆར་དབབ་རོལ་མོའི་སྒྲ་སྙན་པར་སྦྱར་བས་དགེ་ལེགས་སུ་བྱའོ། །ཞེས་པའང་རྒྱུན་ལྡན་གྱི་བླ་མ་ལས་རྗེ་གྲུབ་ཐོབ་ཆེན་པོའི་གསུང་གི་ལུང་ནོས་ཤིང་། ལག་ལེན་གྱི་ཟིན་བྲིས་རྙིང་པ་མཐོང་བ་ལ་བརྟེན་མདོར་བསྡུས་འཇུག་བདེ་སྙིང་པོར་དྲིལ་བའི་ཚུལ་གྱིས་བྱ་བྲལ་བ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་ཡིད་ཅན་ཐམས་ཅད་ཆོས་དང་མཐུན་པའི་དཔལ་འབྱོར་ནམ་མཁའི་མཛོད་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།།

�

[edit]

grub chen thang stong rgyal po'i rdo rje'i gsung g.yang 'gugs byin rlabs can/ @#/__/grub chen thang stong rgyal po'i rdo rje'i gsung g.yang 'gugs byin rlabs can bzhugs so//__// oM swa sti pra dze b+h+yaH__'chi med grub pa'i dbang phyug thang stong rgyal po'i rdo rje'i gsung g.yang 'gugs byin rlabs can gtong bar 'dod pas/__nor lha gzhan gyi phrin las dang 'brel na bzlas pa'i mjug sogs skabs su bab ba'i tshe bya/__'di nyid kho na glo bur du gtong ba'i tshe/__'phying pa sogs gzhi gdan dkar po'i steng 'bru dkar gyi g.yung drung ris bris par g.yang gi rten yod na dgram/__dmigs bsal med tshe snod bzang por g.yang bshos rin chen 'bar ba'i dbyibs la dar ras 'bru sman rin chen zas phud gtsang ma ci 'byor pas phyur bur gtams pa'i g.yas su phye mar dang /__g.yon du g.yang chang mar gyi ze prog can/__mdun du mchod pa ji ltar rigs pas mdzes par bstar/__rang gi mdun du mda' dar dang rol mo'i bye brag sogs nye bar mkho ba rnams bsham/__bdag bskyed rgyas par bya ba'am/__bsdu na/__ma nam mkha' dang mnyam pa'i sems can thams cad bla ma sangs rgyas rin po che la skyabs su mchi'o/__/sangs rgyas chos dang dge 'dun rnams la skyabs su mchi'o/__/bla ma yi dam mkha' 'gro'i tshogs la skyabs su mchi'o/__/rang sems stong gsal chos kyi sku la skyabs su mchi'o/__/zhes ci nus dang /__sangs rgyas chos tshogs sogs lan gsum gyis skyabs sems dang /_/sems can thams cad bde ba dang sogs tshad med bzhi bsgom/__oM swa b+hA ba shud+d+hAHsarba d+harmAHswa b+hA ba shud+d+ho\u0f85 haM/__stong pa'i ngang las rang nyid skad cig gis 'phags pa thugs rje chen po 'gro 'dul yid bzhin nor bu sku mdog dkar gsal zhal gcig phyag bzhi pa/__phyag dang po gnyis thugs kar thal mo sbyar ba'i bar du yid bzhin no bu dang /__g.yas 'og mas shel phreng dang g.yon 'og mas me tog pad+ma dkar po bsnams pa/__ri dwags kr-iSh+Na sA ri'i lpags pas nu ma g.yon pa bkab cing dar dang rin po che'i rgyan thams cad kyis brgyan pa/__pad+ma dang zla ba'i gdan la zhabs rdo rje'i skyil mo krung gis bzhugs pa'i skur gyur par bsam la/__oM ma Ni pad+me hUM/__/zhes ci nus bzlas mthar/__'phags pa thugs rje chen pos bdag dang sems can thams cad la 'dod rgu'i 'byor pa zad mi shes pa'i dngos grub ma lus pa stsal du gsol/__/zhes gsol ba gdab/__mdun gyi nam mkhar lha dang mi'i mchod pa'i tshogs dang /__'dod rgu'i dpal 'byor rdzogs ldan dus kyi sprin phung ltar 'khrigs pa'i dbus su pad zla'i gdan la bla ma dang gnyis su med pa'i byang chub sems dpa' rin chen mang sku mdog gser btso ma ltar 'bar ba zhal gcig phyag gnyis pa/__phyag g.yas mchog sbyin gyi phyag rgya las longs spyod nam mkha' mdzod kyi char 'bebs shing /__g.yon mnyam bzhag gi steng na dgos 'dod thams cad 'byung ba'i nor bu rin po che dbang gi rgyal po bsnams pa/__zhi zhing 'dzum la sgeg pa'i nyams can/__dar dang rin po che'i rgyan thams cad kyis brgyan cing zhabs rdo rje'i skyil mo krung gis bzhugs pa'i mtha' skor kun tu bla ma yi dam sangs rgyas byang sems dpa' bo mkha' 'gro dam can srung ma'i tshogs rnams dang /__khyad par du rgyal po chen po rnam mang thos sras/__'phags pa dzam+b+ha la/__lha mo nor rgyun ma/__g.yang gi lha mo dpal chen mo/__/gnod sbyin a pa ra dzI ta/__lha chen tshogs kyi bdag po/__AR+Ya re man+ta sogs gnod sbyin nor lha gter bdag dkar phyogs skyong ba'i tshogs bsam gyis mi khyab pas bskor ba mngon sum bzhin tu bzhugs par gyur/__ces brjod cing bsam la/__spos rol dang dbyangs kyi 'gyur snyan pos/__kye/_dang po g.yang len gar srid na/__/sngon gyi bskal pa'i dang po la/__/kha ba can gyi rgyal khams su/__/spyan ras gzigs kyi sprul pa las/__/spre'u byang chub sems dpa' byung /__/jo mo sgrol ma'i sprul pa las/__/brag srin nag mo bya ba byung /__/de gnyis thabs shes 'phrad pa las/__/gdong dmar mi rnams thams cad byung /__/mi rnams phongs pas mnar ba las/__/spre'u'i rgyal po yar gshegs te/__/po tA la yi rtse mo na/__/spyan ras gzigs dbang bzhugs pa la/__/spre'u'i rgyal pos 'di skad zhus/__/kye ma las kyi 'bras bu smin/__/dbon sras mang po 'phel ba la/__/dran pa gsal ba lha dang 'dra/__/gdug rtsub che ba lha min 'dra/__/gos med gcer bu dud 'gro 'dra/__/bkres skom sdug bsngal yi dwags 'dra/__/shin tu sdug bsngal dmyal ba 'dra/__/rigs drug sdug bsngal ngad pa tsha/__/'di la las thabs ci zhig bya/__/de skad zhus pas bka' stsal pa/__/spre'u'i rgyal po legs par nyon/__/khyed kyi bu dang tsha bo rnams/__/gdong dmar srin po yin zer te/__/kha ba can gyi zhing khams su/__/byin gyis rlabs pa'i sprul pa yin/__/zas la 'bras bu sna tshogs zo/__/skom du 'byung ba chu la 'thung /__/gos su lha yi na bza' gtod/__/skabs su g.yang 'gugs g.yang len bya/__/spyan ras gzigs kyis de skad gsungs/__/de nas spre'u'i rgyal po des/__/sngags 'chang rgyal po spyan drangs nas/__/lha gzhi dkar po'i gdan steng du/__/dkon mchog mchod pa rgya cher bshams/__/rgod sgro mda' dar dkar po la/__/dngul dkar me long btags pas g.yab/__/khu ye brjod cing 'o dod pos/__/sngags 'chang ngag gi smra 'bod dang /__/dbu nag bod kyi bsod nams las/__/'od zer sna lnga steng du 'phros/__/tshangs pa dung mdog thod dkar por/__/lha yi longs spyod ldan pa las/__/'od rlang dkar po gcig tu sprul/__/lha yi longs spyod bod du 'ong /__/bod lha khams 'dra ba de nas srid/__/'od zer 'og tu 'phros pa las/__/klu rgyal gtsug na rin chen phog__/klu yi longs spyod 'phen po las/__/klu yi longs spyod bod du 'ong /__/bod klu las grol ba de las srid/__/'od zer bar snang khams su 'phros/__/gnyen gyi rgyal po chen por phog__/gnyen gyi longs spyod bod du 'ong /__/bod 'grol thabs gnyan pa de nas srid/__/'od zer shar phyogs gling du 'phros/__/yul 'khor srung gi rgyal po la/__/longs spyod ldan zhing skye ba bzang /__/shar phyogs g.yang rnams bod du 'ong /__/bod skye ba bzang ba de nas srid/__/'od zer lho phyogs gling du 'phros/__/'phags skyes po yi rgyal po la/__/longs spyod ldan zhing dkor nor phyug__/lho phyogs g.yang rnams bod du 'ong /__/bod dkor nor phyug pa de nas srid/__/'od zer nub phyogs gling du 'phros/__/spyan mi bzang gi rgyal po la/__/longs spyod ldan zhing mi 'phel che/__/nub phyogs g.yang rnams bod du 'ong /__/bod mi 'phel che ba de nas srid/__/'od zer byang gi phyogs su 'phros/__/rnam thos sras kyi rgyal po la/__/longs spyod ldan zhing sku tshe ring /__/byang phyogs g.yang rnams bod du 'ong /__/bod sku tshe ring ba de nas srid/__/'od zer phyogs bcu kun tu 'phros/__/phyogs bcu'i nor lha kun la phog__/de rnams longs spyod bod du 'ong /__/bod g.yang nor 'phel ba de nas srid/__/'od zer rgya gar yul du 'phros/__/rgya gar chos rnams bod du 'ong /__/bod chos la dga' ba de nas srid/__/'od zer ta zig yul du 'phros/__/ta zig nor rnams bod du 'ong /__/bod dkor nor phyug pa de nas srid/__/'od zer rgya nag yul du 'phros/__/rgya yi ja dar bod du 'ong /__/bod ja dar 'phel ba de nas srid/__/'od zer hor gyi yul du 'phros/__/hor gyi rta g.yang bod du 'ong /__/bod rta drel 'phel ba de nas srid/__/'od zer bod kyi yul du 'phros/__/mi dang g.yang gnyis kyi li li/__/phywa dang g.yang gnyis sga ra ra/__/longs spyod sna tshogs de las 'tshogs/__/sngon gyi bzang 'phro dpal bzhin du/__/dar dkar g.yab cing 'dir 'bod nas/__/de ring khu ye phywa g.yang len/__/ces sngon byung gi gleng gzhis mtshams sbyar nas g.yang 'gugs dngos ni/__bsang shing gi dud pa dang dkar mngar rin chen 'bru sman ja chang zas sna'i phud sogs kyis mchod cing /__oM AHhU~M/__/phyogs bcu'i 'jig rten khams bzhugs pa'i/__/dkon mchog rnam gsum thugs rje'i gter/__/rtsa brgyud bla ma byin rlabs can/__/yi dam zhi khro dngos grub mdzod/__/mkha' 'gro chos skyong phrin las bdag__/khyad par mtshan tsam 'dzin pas kyang /__/rgud cing phongs pa kun bsal nas/__/'dod rgu'i longs spyod stsol mdzad pa'i/__/byang chub sems dpa' rin chen mang /__/rnam mang thos sras rta bdag brgyad/__/rmugs 'dzin dbang po nor rgyun ma/__/yab yum 'khor dang bcas pa dang /__/a pa ra dzI ta tshogs kyi bdag__/re man+ta sogs gnod sbyin dang /__/nor lha gter bdag bye ba'i tshogs/__/gtsang ris dpal mgon dam tshig can/__/lhan cig skyes dang 'go ba'i lha/__/mdor na dkar phyogs skyong ba'i sde/__/sprul dang yang sprul bcas pa la/__/phyag 'tshal bstod cing gsol ba 'debs/__/dngos 'byor yid sprul mchod par 'bul/__/sman shing spos kyi dud pas mchod/__/zas mchog phye mar 'bru snas mchod/__/rin chen dar zab rgyas mtsho mchod/__/dkar gsum gtsang ma'i phud kyis mchod/__/mngar gsum dwang ma'i bcud kyis mchod/__/ja chang 'dod yon skyems kyis mchod/__/bdag cag snyigs ma lnga yi 'gro/__/dbul zhing phongs pas nyams thag tshe/__/mos gus gdung bas gsol 'debs na/__/sngon gyi dam bca' ma g.yel bar/__/thugs rje thugs dam shugs bskyed la/__/phywa g.yang 'gugs pa'i phrin las mdzod/__/mda' dar g.yab cing /__kye/_steng phyogs lha khams rnams kyi g.yang /__/de ring khu ye phywa g.yang khug__/bar snang gnyan gyi rgyal po'i g.yang /__/de ring khu ye phywa g.yang khug__/sa 'og klu yi rgyal po'i g.yang /__/de ring khu ye phywa g.yang khug__/shar phyogs yul 'khor srung gi g.yang /__/de ring khu ye phywa g.yang =__lho phyogs 'phags skyes po yi g.yang /__/de ring khu ye=__nub phyogs spyan mi bzang gi g.yang /__/de ring khu ye=__byang phyogs rnam thos sras kyi g.yang /__/de ring khu ye=__phyogs skyong nor lha rnams kyi g.yang /__/de ring khu ye=__lha 'dre mthu rtsal can gyi g.yang /__/de ring khu ye=__ge sar rgyal po'i dmag g.yang de/__/de ring khu ye=__bal po'i skye bzhin legs g.yang de/__/de ring khu ye=__sog po'i mda' rtsal che ba'i g.yang /__/de ring khu ye=__dgung sngon mthon po'i pha g.yang de/__/de ring khu ye=__dog mo sa yi ma g.yang de/__/de ring khu ye=__nyi zla skar gsum bkra g.yang de/__/de ring khu ye=__'ja' tshon sna lnga'i bkrag g.yang de/__/de ring khu ye=__lho sprin smug po'i phyug g.yang de/__/de ring khu ye=__ri rab lhun po'i brtan g.yang de/__/de ring khu ye=__gling chen bzhi yi bkod g.yang de/__/de ring khu ye=__gling phran brgyad kyi 'khor g.yang de/__/de ring khu ye=__ri phran rnams kyi btsun g.yang de/__/de ring khu ye=__rgya mtsho chen po'i zab g.yang de/__/de ring khu ye=__dpag bsam shing gi lo g.yang de/__/de ring khu ye=__rtsi shing nags tshal 'phan g.yang de/__/de ring khu ye=__phyug po rnams kyi phyug g.yang de/__/de ring khu ye=__'phan po rnams kyi 'phan g.yang de/__/de ring khu ye=__btsan po rnams kyi btsan g.yang de/__/de ring khu ye=__gnyan po rnams kyi gnyan g.yang de/__/de ring khu ye=__'chi med rdo rje'i tshe g.yang de/__/de ring khu ye=__rgyal ba rnams kyi thugs rje'i g.yang /__/de ring khu ye phywa g.yang khug__/khu ye phywa khug g.yang khug la/__/g.yang len phud kyis nor lha mchod/__/g.yang len phud kyis phyug lha mchod/__/g.yang len phud kyis khyim lha mchod/__/g.yang len phud kyis tshe lha mchod/__/'chi med tshe dang 'dzad med nor/__/dpal 'byor longs spyod phywa g.yang kun/__/ri ltar spungs shing mtsho ltar bskyil/__/bde skyid bkra shis dngos grub stsol/__/rang gi thugs ka nas 'od zer 'phros/__mdun bskyed kyi thugs rgyud bskul/__de rnams kyi thugs ka nas 'od zer lcags kyu'i dbyibs can grangs med pa 'phros pas/__srid zhi'i tshe bsod dpal 'byor phywa g.yang longs spyod brtan g.yo'i dwang bcud thams cad bkra shis rdzas rtags rgyal srid bdun dang 'ja' zer thig le'i rnam par spyan drangs/__mdun gyi rten rdzas rnams la thim pas 'dod rgu thams cad yid bzhin du stsol bar gyur par bsam la/__spro na sngags bzla ba ni/__oM AHgu ru rat+na saM b+ha ba sarba sid+d+hi hU~M/__oM bai shra ma NA ya swA hA/__oM dzam+b+ha la dza len+d+rA ya swA hA/__oM ba su d+hA ri NI swA hA/__/oM ka ma la bA si ni ka ma le ma hA lak+Sh+mir dz+yAM me de hi ba ra de swA hA/__/oM a pa ra dzI ta rat+na sarba sid+d+hi b+h+rU~M/__/oM b+h+rU~M ga Na pa ta ye swA hA/__/oM AR+Ya re man+tA ya swA hA/__/zhes pa rnams ci nus bzla/__tshar grangs byed na/__mchod pa zhal bso/__oM AHhU~M/__/phyogs bcu'i 'jig rten sogs nas 'di yan bskyar zhing sngags bzla ba spel/__de nas mjug tu g.yang len pa ni/__kye/__/mtho ba srid gsum yang rtse nas/__/rlung gi rgya gram yan bar gyi/__/khams lnga'i nus bcud tshe dpal g.yang /__/deng 'dir khu ye phywa g.yang len/__/phyogs bcu dag pa'i zhing khams dang /__/'dzam gling rnga yab gzhan gsum nas/__/dam pa chos kyi chab srid de/__/deng 'dir khu ye phywa g.yang len/__/lha gnas su cu rtsa gsum dang /__/lus 'phags lus dang 'phags pa nas/__/mtho ris snyan grags rgyal srid de/__/deng 'dir khu ye=__gnod sbyin grong khyer khang bzang dang /__/ba glang spyod gling g.yo lam nas/__/ba phyugs nor mdzod rma g.yang de/__/deng 'dir khu ye=__mtho ris nam mkha'i gnas rnams dang /__/sgra mi snyan gnyis de'i zla nas/__/'chi med tshe yi srog g.yang de/__/deng 'dir khu ye=__bsam gtan bzhi gnas man chad dang /__/sa 'og lto 'phye'i gnas yan gyi/__/bde skyid mnga' ris phun tshogs de/__/deng 'dir khu ye phywa g.yang len/__kye/__/phyogs bcu dus gsum byon pa yi/__/dkon mchog rin chen rnam gsum dang /__/rtsa brgyud bla ma'i byin rlabs de/__/deng 'dir khu ye phywa g.yang len/__/theg pa rim dgu rgyud sde bzhi/__/yi dam dkyil 'khor lha tshogs kyi/__/mchog dang thun mong dngos grub de/__/deng 'dir khu ye=__gnas gsum dpa' bo mkha' 'gro dang /__/chos srung dam can rgya mtsho'i sde'i/__/gang bcol g.yel med phrin las de/__/deng 'dir khu ye=__gnod sbyin dbul sel nor skyong tshogs/__/mi zad 'dod dgu dbang rnams kyi/__/dgos 'byung longs spyod gter mdzod de/__/deng 'dir khu ye=__rigs rus snag 'brang dang skyes lha/__/'go ba'i dgra lha dpung gnyen du/__/mi 'bral zung du 'grogs pa'i g.yang /__/deng 'dir khu ye=__dam ldan dkar po'i phyogs skyong ba'i/__/yul lha gzhi bdag gnas srung rnams/__/rkyen bsal mthun 'grub mi 'bral g.yang /__/deng 'dir khu ye=__snang srid snod bcud dkyil 'khor lha/__/gdod nas dag pa lhun 'grub gshis/__/gnas lugs phyag rgya chen po'i g.yang /__/deng 'dir khu ye phywa g.yang len/__/kye__/tshe snang mtha' yas rnam par rgyal/__/'phags ma pad 'byung grub rgyal sogs/__/'chi med brnyes rnams tshe dngos de/__/deng 'dir khu ye phywa g.yang len/__/bde gshegs mched lnga sprul pa lnga/__/nang ba lha mi drang srong phyi'i/__/na gso 'chi slu sman nus de/__/deng 'dir khu ye=__'jam mgon ngag dbang dbyangs can sogs/__/phyogs dus rgyal ba sras bcas kyi/__/mkhyen rab blo gros spobs pa de/__/deng 'dir khu ye=__snying rje'i spyan ras gzigs 'gro mgon/__/sa dang lam gnas byang sems rnams/__/thugs bskyed gzhan don phyogs med de/__/deng 'dir khu ye=__gsang bdag rdor 'dzin rta mgrin sogs/__/gsang sngags rig gzungs grub brnyes pas/__/log 'dren gzhom pa'i mthu stobs de/__/deng 'dir khu ye=__'dul ba mdo sde ma mo sngags/__/gsar rnying bstan 'dzin brgyud bcas kyi/__/spangs rtogs brtul zhugs sgrub 'bras de/__/deng 'dir khu ye=__rgya bod mkhan slob paN grub long /__/'chad nyan rtsom sgyur bsgom sgrub rgyun/__/sangs rgyas bstan pa dar ba'i g.yang /__/deng 'dir khu ye=__mo rtsis rdzas sngags bsgom bsgrub sogs/__zag bcas zag med mngon mkhyen lngas/__/dus gsum gsal ston pra g.yang de/__/deng 'dir khu ye=__so 'brang sogs lnga pad+ma 'byung /__/nA gA rdzu na'i drang srong sogs/__/sri 'dul srid spel srung skyob g.yang /__/deng 'dir khu ye=__lha klu gnod sbyin gter gyi bdag__/brgyad brgyad blon 'khor 'bangs bcas kyi/__/mdzad med dbyig gi bang mdzod de/__/deng 'dir khu ye=__dzam la nor bu rnam mang bu/__/gnod sbyin sde dpon 'brog gnas sogs/__/rkang bzhi'i phyugs g.yang rmu g.yang de/__/deng 'dir khu ye=__mkhar khyim thab mdzod 'dod 'jo'i lha/__/ma phyi'i grogs rgyal mthing ge sogs/__/bza' btung zas bcud srid g.yang de/__/deng 'dir khu ye=__ma dros chung zhi gangs can ri/__/'bigs byed yul drug 'dzam gling spyi'i/__/skom gsher yul gnas bzhi bdag g.yang /__/deng 'dir khu ye=__khyad par ti se thang lha rma/__/ma pham g.yu mtsho khri shog sogs/__/bod khams gnas bdag rma g.yang de/__/deng 'dir khu ye=__chos rgyal rigs ldan mang bkur sogs/__/mi dbang gser dngul zangs lcags kyi/__/'khor los bsgyur rnams chab srid brtan/__/deng 'dir khu ye=__gshen rabs phywa lha dgu khri 'bum/__/thugs dkar sum brgya drug cu sogs/__/g.yung drung bon gyi phywa g.yang de/__/deng 'dir khu ye=__'phags bod bde 'byung u rgyan sogs/__/rgyal bstan spel skyong chos kyi khrims/__/bstan 'gror dge ba'i legs mdzad de/__/deng 'dir khu ye=__ta zig rgya bod hor phrom sogs/__/nor spel dgra 'dul gnyen skyong ba'i/__/che btsun btsan phyug rgyal srid g.yang /__/deng 'dir khu ye=__mtha' klung dbus ljongs tsi na sogs/__/mi rgyud lo 'bras 'phan dar 'phel/__/rin chen ja dar gos zas g.yang /__/deng 'dir khu ye phywa g.yang len/___/___!_kye/__stong khams gsum na yul bde zhing /__/rdzong btsan khrims brtan dus char 'bebs/__/lo legs chos dar phyi yi g.yang /__/deng 'dir khu ye=__mi chos phyugs rgyud 'phel nang gshims/__/pho dpa' mo 'dzangs 'og rta mgyogs/__/go btsan mtshon rno nang gi g.yang /__/deng 'dir khu ye=__mkhas grub rtsod rgyal don gnyis grub/__/nad med tshe ring rgyags skyid bde/__/mthar thug 'tshang rgya don gyi g.yang /__/deng 'dir khu ye=__chos dbyings chos can bslu med mthus/__/bden pa'i tshig la dbang rnams kyis/__/ci btab smon lam 'grub pa'i g.yang /__/deng 'dir khu ye=__tshogs rdzogs rten 'brel mnga' thang las/__/rdzas rtags rgyal srid nyer bcas kyi/__/'jig rten dge mdzad bkra shis g.yang /__/deng 'dir khu ye phywa g.yang len/__/longs spyod bkra shis phun tshogs kun/__/gnas 'dir brtan pa'i dngos grub stsol/__/'dod rgu'i dpal 'byor rgyas pa dang /__/bsam don yid bzhin 'grub par mdzod/__/ces gsol ba gdab/__bsdu na/__kyai/__/stong khams gsum na sogs man gyis chog__/yi ge brgya pa lan gsum dang /__ma 'byor pa dang nyams pa dang /__/gang yang bdag rmongs blo yis ni/__/bgyis pa dang ni bgyid stsal ba/__/de kun mgon pos bzod par mdzod/__/ces nongs pa bshags/__mdun bskyed kyi lha tshogs rnams rten rdzas sam/__rgyab ri 'phan bzang ngam/__gnas khang bang mdzod sogs la brtan par bzhugs nas dngos grub thams cad stsal bar bsam la/__oM 'dir ni rten dang lhan cig tu/__/'gro ba'i don du bzhugs nas kyang /__/nad med tshe dang dbang phyug dang /__/mchog rnams legs par stsal du gsol/__/oM su pra tiSh+Tha badz+ra ya swA hA/__zhes dang rten 'brel snying po brjod cing me tog 'thor bas brtan par bya/__dge ba 'di yis skye bo kun/__/bsod nams ye shes tshogs rdzogs shing /__/bsod nams ye shes las byung ba'i/__/dam pa gnyis sku thob par shog__/thams cad nam mkha'i mdzod bzhin tu/__/longs spyod zad pa med par shog__/rtsod pa med cing 'tshe med par/__/rang dbang du ni spyod par shog__/'jig rten bde zhing lo legs dang /__/'bru rnams 'phel zhing phyugs 'phel ba/__/dge legs thams cad 'byung ba yi/__/yid la 'dod pa kun 'grub shog__/ces sogs khyad par gyi bsngo smon dang /__/che ba'i che mchog sogs mdo rgyud las 'byung ba dang /__'bad dang stsol bas ma gos kyang /__/yid bzhin nor bu dpag bsam bzhin/__/sems can re ba skong mdzad pa/__/bsam pa 'grub pa'i bkra shis shog__/gnas 'dir nyin mo bde legs sogs skabs su bab pa'i bkra shis kyi tshigs su bcad pa dang bcas me tog gi char sil mar ba snyim par bya'o/__/yon bdag la g.yang gtad byed na brtan bzhugs tshar ba'i rjes/__stan bzang po la 'bru dkar gyi g.yung drung bris par yon bdag gos rgyan dang bcas te 'khod/__spro na sbyong ba gsum gyis bkra shis pa'i cho ga bsgrub par bar du gcod pa'i bgegs bskrad/__gang ltar yang /__sbyin pa'i bdag po nor sbyin bye ba'i sde dpon dzam+b+ha la'i skur gyur pa la phywa g.yang longs spyod kyi rdzas rnams gtad pas 'dod rgu'i 'byor ba'i dngos grub zad mi shes pa la longs spyod pa'i dge mtshan rgyas par gyur pa'i mos pas/__sngags rnams kyi mthar rten 'brel snying po sbrel ba bzla zhing me tog 'thor ba dang bcas rten rdzas rnams lag tu gtad/__spro na g.yang 'gugs tshar gcig bskyar/__gang ltar yang smon lam dang bkra shis gong du smos pa ltar rgyas bsdus ci rigs par brjod cing me tog gi char dbab rol mo'i sgra snyan par sbyar bas dge legs su bya'o/__/zhes pa'ang rgyun ldan gyi bla ma las rje grub thob chen po'i gsung gi lung nos shing /__lag len gyi zin bris rnying pa mthong ba la brten mdor bsdus 'jug bde snying por dril ba'i tshul gyis bya bral ba 'jam dbyangs bla ma dgyes pa'i 'bangs mkhyen brtse'i dbang pos bris pa yid can thams cad chos dang mthun pa'i dpal 'byor nam mkha'i mdzod la dus rtag tu longs spyod pa'i rgyur gyur cig/__//sarba dA mang+ga laM b+ha ba tu// [�]