JKW-KABUM-15-BA-010-008

From Khyentse Lineage - A Tsadra Foundation Project

‎‎

གཏེར་གསར་བསམ་པ་ལྷུན་གྲུབ་མའི་དབང་གི་ཟིན་ཐོ།
Wylie title gter gsar bsam pa lhun grub ma'i dbang gi zin tho JKW-KABUM-15-BA-010.pdf
Location mkhyen brtse'i bka' 'bum
Volume 15, sde tshan 10, Text 8, Pages 248-268 (Folios 12b3 to 22b5)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön མཆོག་གྱུར་གླིང་པ་ (mchog gyur gling pa)
Citation 'jam dbyangs mkhyen brtse'i dbang po. gter gsar bsam pa lhun grub ma'i dbang gi zin tho. In 'jam dbyangs mkhyen brtse'i dbang po'i bka' 'bum, Vol. 15: 248-268. Khams sde dge rdzong sar dgon: Rdzong sar blo gros phun tshogs, 2020.
Genre Notes - zin bris  ·  Empowerment Ritual - dbang chog - dbang skur
Cycle བླ་མའི་ཐུགས་སྒྲུབ་ཡིད་བཞིན་ནོར་བུ་ (bla ma'i thugs sgrub yid bzhin nor bu)
Colophon

།ཞེས་པའང་དོན་གཉེར་ཅན་དག་གི་ཆེད་དུ་ཟིན་བྲིས་མདོ་ཙམ་སྟེ། རྒྱས་པར་ཆོས་ཀྱི་སྤྱན་རྡུལ་དང་བྲལ་བའི་ཟབ་གཏེར་གྱི་གསང་བ་འཛིན་པའི་བདག་པོ་རྣམས་ཀྱིས་ལེགས་པར་བཤད་པའི་རྡོ་རྗེའི་དབྱངས་ཀྱི་ཏམྦུ་ར་བསྒྲེང་བར་འགྱུར་བ་ལས་མཁྱེན་པར་འཚལ་ལོ། །མངྒ་ལཾ།།

zhes pa'ang don gnyer can dag gi ched du zin bris mdo tsam ste/__rgyas par chos kyi spyan rdul dang bral ba'i zab gter gyi gsang ba 'dzin pa'i bdag po rnams kyis legs par bshad pa'i rdo rje'i dbyangs kyi tam+bu ra bsgreng bar 'gyur ba las mkhyen par 'tshal lo/__/mang+ga laM//

[edit]
༄༅། །གཏེར་གསར་བསམ་པ་ལྷུན་གྲུབ་མའི་དབང་གི་ཟིན་ཐོ་བཞུགས་སོ། །ཨོཾ་སྭ་སྟི། གཏེར་ཆེན་མཆོག་གྱུར་བདེ་ཆེན་གླིང་པའི་ཟབ་གཏེར་བླ་མའི་ཐུགས་སྒྲུབ་ཡིད་བཞིན་ནོར་བུ་བསམ་པ་ལྷུན་གྲུབ་མའི་དབང་བསྐུར་བ་ལ་གཉིས། སྟ་གོན་ཁ་སྐོང་ནས་ཤིན་ཏུ་རྒྱས་པར་བསྐུར་བའི་ཚུལ་སྤྱིར་བསྟན། དངོས་གཞིའི་དབང་རྒྱས་འབྲིང་བསྡུས་པ་ཙམ་རང་གཞུང་ལྟར་བསྐུར་བའི་ཚུལ་ལོ། །དང་པོ་ནི། སྤྲོ་ན་དམ་རྫས་མྱོང་གྲོལ་གྱི་སྒྲུབ་ཁོག་ལྟར་རམ། འཇམ་མགོན་རྡོ་རྗེ་འཆང་པདྨ་གར་དབང་གི་ལྗགས་བསྒྲིགས་ཐུགས་སྒྲུབ་བར་ཆད་ཀུན་སེལ་གྱི་དབང་ཆོག་ལ་ལྷ་སྔགས་སོགས་འདོར་ལེན་བྱས་ཏེ། ལྷ། བུམ་པ། སློབ་མ་སྟ་གོན་རྣམས་བྱ། དངོས་གཞི་ནི་འོག་ནས་འབྱུང་བ་ལྟར་ལས་རྒྱས་བསྡུས་ཀྱི་འདོར་ལེན་མེད། འོན་ཀྱང་གཏེར་ཆེན་རིན་པོ་ཆེའི་ཕྱག་ལེན་དཀྱུས་ལ་སྟ་གོན་དང་འབྲེལ་བ་ཆེར་མི་གནང་བས། སློབ་མ་སྔོན་དུ་དཀྱིལ་འཁོར་ཆེན་པོ་གང་རུང་དུ་སྨིན་པ་ལ་ནི། འཇུག་པ་དང་བཅས་པའི་དངོས་གཞིའི་དབང་རང་གཞུང་ལྟར་ཁོ་ནས་དོན་གྲུབ་པ་ཡིན་ནོ། །གཉིས་པ་ལ་གསུམ། བསྒྲུབ་གཞི་གཟུགས་བརྙན་གྱི་དཀྱིལ་འཁོར་འདུ་བྱ་བ། སྒྲུབ་ཆོས་ཏིང་ངེ་འཛིན་གྱི་དཀྱིལ་འཁོར་གསལ་གདབ་པ། བསྒྲུབས་པའི་འབྲས་བུ་སློབ་མ་རྗེས་སུ་བཟུང་བའི་ཚུལ་དངོས་སོ། །དང་པོ་ནི། རྣམ་པར་དུལ་བའི་གནས་སུ་སྟེགས་བུའི་དབུས་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་མཚན་ཉིད་ཚང་བ་དགྲམ། དེའི་ལྟེ་བར་མཉྫིའི་ཁར་རྣམ་བུམ། གསང་རྫས། མེ་ལོང་དྲི་མེད་ལ་སིདྡྷུ་རའི་ཐིག་ལེ་ལྔ་ཚོམ་བྃ་ཧ་རི་ནི་སས་མཚན་པ། གུ་རུ་བདེ་བ་ཆེན་པོའི་སྐུ་འབག་རྣམས་བརྩེགས་མ་དང་། མདུན་དུ་གཏོར་ཆེན་རི་རབ་མ། ལྷ་གནས་སོ་སོའི་ཐད་དུ་དངོས་གྲུབ་ཀྱི་རྫས་བཅུ་གསུམ་དང་། སྐུ་ཙཀ །སྔགས་ཕྲེང་། མེ་ལོང་། གཞན་ཡང་ཚེའི་འབྲང་རྒྱས། ཚེ་ཆང་། ཚེ་རིལ། ཚེ་མདའ། མཐར་སྨན་རག་གཏོར་ཚོགས་ཉེར་སྤྱོད་དང་། སློབ་དཔོན་གྱི་མདུན་དུ་ལས་བུམ་སོགས། གཞན་ཡང་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱ། དར་འཕན་བླ་རེ་སོགས་ཀྱི་རྒྱན་དགྲམ། དབང་རྫས་བཤམ་པ་དང་། དངོས་གཞིའི་སྒྲུབ་མཆོད་ཀྱི་བར་ཞག་གིས་ཆོད་ན་བདག་ཉིད་ལྷའི་ང་རྒྱལ་དང་བཅས་ཆོ་ག་རྒྱས་བསྡུས་གང་རུང་གིས་བྱིན་དབབ་པ་བཅས་བྱའོ། །གཉིས་པ་ནི། ལས་བྱང་དགོས་འདོད་ཀུན་འབྱུང་གི་གཞུང་བསྲང་ལ་བཟླས་པའི་བར་དང་། བར་འདིར་འོག་ནས་འབྱུང་བ་ལྟར་དམིགས་པ་གསལ་བཏབ་ཚེ་ཛཔ྄་བཟླ་བ་དང་། ཛཔ྄་ཁང་བསྡུས་རྗེས་ཚེ་འགུགས་བསྐུལ་བ་བཅས་བགྱིས་ནའང་ལེགས། མཆན། རྣམ་བུམ་དང་ལས་བུམ་ཆོ་ག་རྒྱས་བསྡུས་ཅི་རིགས་པའི་སྒོ་ནས་བསྒྲུབ། དེ་ནས་གསོལ་འདེབས་དང་ཛཔ྄་ཁང་བསྡུ་བ། ཆོས་སྲུང་སྤྱི་བྱེ་བྲག་གི་གཏོར་བསྔོ། ཚོགས་བསྒྲལ་མཆོད་ཡན་གྲུབ་ནས་བདག་འཇུག་རྒྱས་པར་བླང་བའམ། རིག་པའི་མེ་ཏོག་དོར་བ་ཙམ་གྱིས་བདག་ཉིད་འཇུག་པ་དང་། སློབ་མ་འཇུག་པར་གནང་བ་ནོད་པ་རྣམས་བྱའོ། །གསུམ་པ་ལ་གསུམ། དབང་རྒྱས་པ་སྟོད་ལས་སྨད་ལས་ཀྱི་ཚུལ་དུ་བསྐུར་བ་དང་། འབྲིང་པོ་སྐུ་གསུང་ཐུགས་ཡོངས་རྫོགས་ཀྱི་དབང་བསྐུར་བ་དང་། བསྡུས་པ་བྱིན་རླབས་གཏོར་མའི་དབང་བསྐུར་བའོ། །དང་པོ་ལ་གཉིས། སྟོད་ལས་མཆོག་གི་དབང་བཞི་བསྐུར་བ་དང་། སྨད་ལས་ཐུན་མོང་གི་དངོས་གྲུབ་སྣ་ཚོགས་པའི་རྗེས་སུ་གནང་བ་སྦྱིན་པའོ། །དང་པོ་ལ་གཉིས། འཇུག་པ་དང་། དབང་བསྐུར་བ་དངོས་སོ། །དང་པོ་ལ་དབང་གཞུང་གི་དངོས་བསྟན་ལས་ཕྱི་ནང་གི་འཇུག་པ་སོ་སོར་གསལ་བར་མ་གསུངས་ཀྱང་། འོག་ཏུ། དེ་ལྟར་མཆོག་དང་ཐུན་མོང་དངོས་གྲུབ་ཕྱིར༔ དབང་གི་ཁྱད་ཆོས་སྙིང་པོར་བསྟན་པ་སྟེ༔ ཐུན་མོང་དཀྱིལ་འཁོར་ཕྱི་ནང་འཇུག་པ་སོགས༔ རིགས་མཐུན་བླ་མའི་དབང་གཞུང་སྤྱི་ལྟར་སྦྱར༔ ཞེས་གསུངས་པ་ལྟར་ཅུང་ཟད་ཁ་སྐོང་བའི་དབང་དུ་བྱས་ན་གཉིས། ཕྱི་འཇུག་དང་། ནང་འཇུག་གོ། །དང་པོ་ལ་སྡོམ་ནི། ཁྲུས༡་བྱས་བགེགས་༢ཕྲལ་སྲུང་འཁོར་༣བསྒོམ། །ལོ་རྒྱུས་མཚམས་སྦྱར་མཎྜལ་༤ཕུལ། །ཆས་༥འཇུག་གསོལ་གདབ་གནང་༦བ་སྦྱིན། །རྒྱུད་༨སྦྱོང་སྡོམ་༩བཟུང་ནང་སེམས་༡༠བསྐྱེད། །ཅེས་ཆོས་བཅུ་ལས། དང་པོ་ནི། སློབ་མ་རྣམས་ལ་ཕྱི་རོལ་དུ་ལས་ཆུས་ཁྲུས་བྱས། གཉིས་པ་ནི། ནང་དུ་འོངས་པ་ན་བགེགས་ལ་གཏོར་མ་སྦྱིན་ཅིང་བསྐྲད། གསུམ་པ་ནི། གྲལ་དུ་འཁོད་ནས་སྲུང་འཁོར་བསྒོམ། བཞི་པ་ནི། ཆོས་བཤད་ཅི་རིགས་པ་དང་། ལོ་རྒྱུས་ཀྱི་ཁྱད་པར་དབང་གཞུང་ལས། ཨེ་མ༔ དུས་གསུམ་སངས་རྒྱས་ཀུན་གྱི་ནིཿ སོགས་དང་། ཨེ་མ༔ བྱིན་རླབས་མཐུ་མྱུར་དངོས་གྲུབ་ཆེ་བའི་དཔལ༔ ཅེས་སོགས་རྒྱས་བསྡུས་ཇི་ལྟར་འོས་པས་མཚམས་སྦྱར་ཏེ་འཇུག་པའི་ཕྱིར་མཎྜལ་འབུལ་དུ་གཞུག །ལྔ་པ་ནི། མྱོང་གྲོལ་སྒྲུབ་ཁོག་ལས་སོ། །མ་རིག་པའི་སྒྲིབ་གཡོགས་ཀྱིས་རིག་པ་ཡེ་ཤེས་ཀྱི་མཐོང་བ་བསྒྲིབ་པར་མཚོན་པའི་ཕྱིར་ཨོཾ་ཨཱཿཧཱུྃ་གིས་མིག་དར་བཅིངས༔ དཔའ་བོ་འབྲུ་ལྔ་ལས་སྐྱེས་པའི་མེ་ཏོག༔ ཧཱུྃ༔ ཡེ་ཤེས་དཔའ་བོ་འབྲུ་ལྔའི་དངོས༔ བདེ་ཆེན་ཐིག་ལེ་མེ་ཏོག་ཕྲེང་༔ རིགས་ཀྱི་ལྷ་དང་མཇལ་བའི་ཕྱིར༔ སྐལ་ལྡན་ཁྱོད་ཀྱི་སྙིམ་པར་ཟུངས༔ ཨཱ་ཁྃ་ཝཱི་ར་ཧཱུྃ༔ པུཥྤེ་བཛྲ་ས་མ་ཡ་སྟྭཾ༔ ཞེས་སྦྱིན། དྲུག་པ་ནི། འདྲེན་པ་སངས་རྒྱས་སོགས་དང་། བདུན་པ་ནི། བུ་ཁྱོད་སྐལ་བ་སོགས་དབང་གཞུང་ལྟར། བརྒྱད་པ་ནི། དམིགས་པ་སྤྱི་ལྟར་བརྡ་སྤྲད་ལ། སྐྱབས་འགྲོ། སེམས་བསྐྱེད། ཚོགས་བསགས་རྣམས་ལས་བྱང་ལྟར། དགུ་པ་ནི། སྡོམ་པ་གསུམ་སོ་སོར་བཟུང་བའམ། བསྡུ་ན། ཐུགས་སྒྲུབ་བར་ཆད་ཀུན་སེལ་གྱི་དབང་ཆོག་ལྟར། ཨོ་རྒྱན་གདུང་འཛིན་རྒྱལ་བའི་སྲས་སོགས་ཀྱིས་བཟུང་། བཅུ་པ་ནི། སོ་སོའི་སྙིང་གར་སྙིང་རྗེ་ཆེན་པོའི་ཟླ་བ་སྟོང་པ་ཉིད་རྡོ་རྗེ་མཚན་པར་གསལ་བཏབ་ནས་ཟུང་འཇུག་ཏུ་སེམས་བསྐྱེད་པར་བགྱིའོ་སྙམ་པས། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི༔ ཞེས་བརྗོད་དུ་གཞུག་ཅིང་། དེ་བརྟན་པར་བྱ་བའི་ཕྱིར། སློབ་དཔོན་གྱིས། ཨོཾ༔ དེ་རིང་སྟོང་པ་ཉིད་དང་སྙིང་རྗེ་ཆེ༔ དབྱེར་མེད་ཟུང་འཇུག་སྙིང་གི་དབུས་སུ་བསྐྱེད༔ ཇི་ལྟར་དགའ་བའི་སྤྱོད་ལམ་མི་འདའ་བས༔ རྡོ་རྗེའི་དམ་ཚིག་བླ་མེད་འགྲུབ་གྱུར་ཅིག༔ བོ་དྷི་ཙིཏྟ་ས་མ་ཡ་སིདྡྷི་ཧོ༔ ཞེས་བརྗོད་ཅིང་རྡོ་རྗེ་སྙིང་གར་བཞག །གཉིས་པ་ལ། ཡོལ་བའི་ནང་༡གཞུག་ཕྱག་བཞི་པ༢། །དམ་ལ་༣བཞག་ཅིང་ཡེ་ཤེས་དབབ༤། །མེ་ཏོག་༥དོར་ཞིང་སྤྱི་བོར་འཆིང་། །གདོང་གཡོགས་༦དགྲོལ་ཞིང་དཀྱིལ་འཁོར་༧བསྟན། །ཅེས་བདུན་ལས། དང་པོ་ནི། སློབ་དཔོན་གྱིས། ཧོ༔ མི་གནས་ཡེ་ཤེས་རང་བྱུང་བ༔ རྣམ་པར་ཐར་པའི་སྒོ་བཞི་ནས༔ ཚད་མེད་བཞི་ཡི་འཇུག་པ་ཡིས༔ རྡོ་རྗེའི་སློབ་མ་གཞུག་པར་བགྱི༔ ས་མ་ཡ་པྲ་ཝེ་ཤ་ཡ་ཕཊ༔ ཅེས་པས་དཀྱིལ་འཁོར་གྱི་ཁང་པའི་སྒོ་ཕྱེ་ནས་ནང་དུ་ཁྲིད། གཉིས་པ་ནི། སློབ་མས་དཀྱིལ་འཁོར་ལ་བསྐོར་ཞིང་སྒོ་བཞི་ནས་ཕྱག་བྱ་ཞིང་། ཧོ༔ རང་རིག་མཐའ་དབུས་མེད་པའི་དཀྱིལ༔ ཡེ་ཤེས་བཞི་འཕྲོ་འཁོར་ལོའི་ཚུལ༔ སྐུ་གསུང་ཐུགས་ཀྱི་དཀྱིལ་འཁོར་བར༔ སྒོ་གསུམ་གུས་པས་ཕྱག་འཚལ་ལོ༔ ཨོཾ་ན་མཿཏེ་ཧཱུྃ༔ ཨོཾ་ན་མཱ་མི་ཧཱུྃ༔ ཨོཾ་ན་མོ་ན་མ་ཧཱུྃ༔ ཞེས་བརྗོད། གསུམ་པ་ནི། སླར་ཡང་སློབ་མ་ཤར་སྒོར་འཁོད་པ་ལ། སློབ་དཔོན་གྱིས་རྡོ་རྗེ་སྤྱི་བོར་བཞག་ལ། ཨོཾ༔ དེང་ཁྱོད་རྡོ་རྗེའི་དཀྱིལ་འཁོར་ཆེར༔ གཞུག་ཅིང་ཡེ་ཤེས་བསྐྱེད་པ་ལས༔ དངོས་གྲུབ་རྣམ་གཉིས་ཐོབ་འགྱུར་ཏེ༔ གཞན་དུ་སྨྲས་ན་ཉམས་པར་འགྱུར༔ སྙིང་གར་བཞག་ལ། ཨཱཿ ཡེ་ཤེས་རྣམ་པ་ཐམས་ཅད་པ༔ ཁྱོད་ཀྱི་སྙིང་ལ་དེ་རིང་ཞུགས༔ ཚུལ་མིན་གསང་བ་བསྒྲགས་པ་ན༔ དེ་མ་ཐག་ཏུ་བྲལ་ཏེ་གཤེགས༔ བདུད་རྩིའི་ཆུ་ནན་བྱིན་ལ། ཧཱུྃ༔ སྔགས་ཀྱི་རྩ་བ་དམ་ཚིག་སྟེ༔ བསྲུང་ན་དངོས་གྲུབ་རྣམ་གཉིས་ཐོབ༔ མ་བསྲུང་ཚེ་འདིས་དམྱལ་བར་འགྲོ༔ དམ་སྲུང་རྡོ་རྗེའི་ཆུ་འཐུངས་ཤིག༔ ཅེས་གདམས་པ་ལ། སློབ་མས་ཀྱང་། བཛྲ་ས་མ་ཡ་ཨི་དཾ་ན་ར་ཀ་ན༔ ཞེས་རྡོ་རྗེའི་བྲོ་བོར༔ སླར་ཡང་སློབ་དཔོན་གྱིས་རྡོ་རྗེ་གདེངས་ཤིང་། ཧོཿ དེ་རིང་ཕྱིན་ཆད་བུ་ཁྱོད་ཀྱིས༔ རིགས་ཀྱི་བདག་པོ་ང་ཡིན་པས༔ བླ་མས་གསུངས་པ་རྡོ་རྗེའི་ཚིག༔ ནམ་ཡང་མི་འདའ་སྒྲུབ་པར་གྱིས༔ ཞེས་གདམས་སོ། །བསྡུ་ན་དམ་ཆུ་སྦྱིན་པ་ཁོ་ནས་ཀྱང་རུང་། བཞི་པ་ནི། དབང་གཞུང་ལྟར་སློབ་མ་གུ་རུ་བདེ་བ་ཆེན་པོར་བསྐྱེད། གནས་གསུམ་བརླབ། སྤྱན་འདྲེན་བསྐུལ་ཞིང་ཡེ་ཤེས་དབབ། ཏིཥྛ་བཛྲས་བརྟན་པར་བྱ་བ་རྣམས་སྤྱི་ལྟར་བྱའོ། །ལྔ་པ་ནི། སློབ་མས་སྔར་གཏད་པའི་མེ་ཏོག་ཐོགས་ལ། ཧོཿ ཚེ་རབས་འབྲེལ་བའི་རིགས་ཀྱི་ལྷར༔ ཡེ་ཤེས་རིག་པའི་མེ་ཏོག་འབུལ༔ སྔོན་ནས་ལས་འཕྲོ་གང་ཡོད་པའི༔ ལྷག་པའི་ལྷ་དེར་འབབས་པར་ཤོག༔ བཛྲ་པུཥྤེ་ས་མ་ཡ་ཧོཿ ཞེས་དོར་བས་གཙོ་འཁོར་གང་ལ་ཕོག་པའི་ལྷག་པའི་ལྷར་ངེས་པར་བྱ༔ ཡང་ན་དེ་ཐམས་ཅད་རིགས་ལྔར་འདུས་ཏེ༔ དབུས་སུ་མི་འགྱུར་རྡོ་རྗེའི་རིགས༔ ཤར་དུ་དྲི་མེད་བདེ་གཤེགས་རིགས༔ ལྷོ་རུ་འདོད་འབྱུང་རིན་ཆེན་རིགས༔ ནུབ་ཏུ་ཆགས་མེད་པདྨའི་རིགས༔ བྱང་དུ་ཐོགས་མེད་ལས་ཀྱི་རིགས༔ ཞེས་རིགས་ལྔར་ངེས་པར་བྱས་ཏེ་སོ་སོའི་རིགས་དང་མཐུན་པའི་མིང་གདགས༔ མེ་ཏོག་སྤྱི་བོར་བཅིངས་ཤིང་༔ ཧོཿ སྔོན་ཚེ་གོང་ནས་བསྙེན་པའི་ལྷས༔ སྐུ་གསུང་ཐུགས་ཀྱི་དངོས་གྲུབ་ནི༔ དེང་འདིར་ཁྱོད་ལ་དབབ་པ་ཡིས༔ རིགས་ཀྱི་སྲས་སུ་འགྱུར་བར་ཤོག༔ པུཥྤེ་སིདྡྷི་ས་མ་ཡ་སྟྭཾ༔ ཞེས་མེ་ཏོག་སྤྱི་བོར་བཞག་པས་ལྷ་སོ་སོའི་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ༔ དྲུག་པ་ནི། གསེར་གྱི་ཐུར་མ་ཐོགས་ཏེ༔ ཧོཿ རང་བྱུང་འོད་གསལ་སྙིང་པོ་ལ༔ གློ་བུར་འཁྲུལ་པའི་སྒྲིབ་གཡོགས་ཀུན༔ རིག་པ་ཡེ་ཤེས་ཐུར་མས་དབྱེ༔ རྡོ་རྗེའི་དཀྱིལ་འཁོར་མངོན་གྱུར་ཤོག༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ ཅེས་པས་མིག་དར་བསལ༔ བདུན་པ་ནི། ལས་བྱང་ལྟར་རྟེན་དང་བརྟེན་པའི་དཀྱིལ་འཁོར་རྒྱས་བསྡུས་གང་རུང་གི་སྒོ་ནས་བརྡ་སྤྲད་ཅིང་བསྟན༔ གཉིས་པ་དབང་དངོས་ལ། མཎྜལ་ཕུལ། བྱང་ཆུབ་རྡོ་རྗེས་རྒྱལ་བ་ལྔར༔ དགོངས་ཤིང་ཇི་ལྟར་སྩལ་བ་བཞིན༔ ཡེ་ཤེས་དབང་བསྐུར་བདུད་རྩིའི་ཆུས༔ བདག་རྒྱུད་སྨིན་པར་མཛད་དུ་གསོལ༔ ཅེས་གསོལ་བ་གདབ། དབང་གི་ངོ་བོ། སྒྲ་དོན། དབྱེ་བ་སོགས་སྤྱི་ལྟར་རྒྱས་བསྡུས་གང་རུང་བཤད། ཁྱད་པར་དབྱེ་བ་ལ། གཞུང་ལས། དེ་ལ་ཐོག་མར་སྨིན་བྱེད་ཀྱི༔ ཞེས་སོགས་གསུངས་པ་ལྟར་དབང་རབ་འཇུག་པ་དོན་དམ་རྡོ་རྗེ་ཡེ་ཤེས་འཕོ་བའི་དབང་དང་། དབང་པོ་འབྲིང་མན་ཆད་ཐུན་མོང་དུ་འཇུག་པ་མཚན་མ་རྫས་ཀྱི་དབང་གཉིས་སུ་མཆིས་ནའང་། དེ་གཉིས་ཀ་དོན་གྱིས་དབང་བཞིར་འདུ་བ་ལས། དང་པོ་བུམ་པའི་དབང་ལ། སྦྱོར་བ་དབང་ལྷ་སྤྱན་དྲངས་ཤིང་ཤིས་པ་བརྗོད་པ། དངོས་གཞི་བུམ་པའི་དབང་བསྐུར་ཞིང་བརྡ་དོན་ངོ་སྤྲད་པ། རྗེས་དག་པ་བརྗོད་ཅིང་མངའ་དབུལ་བ་རྣམས་སུ་ཡོད་པ་ལས། ཐོག་མར་དབང་གཞུང་ལྟར། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་ཆོས་ཀྱི་དབྱིངས་དང་ནམ་མཁའི་མཐས་གཏུགས་པའི་ཞིང་ཁམས་ཀུན་ན་གཤེགས་ཤིང་བཞུགས་ལ་འབྱོན་པར་འགྱུར་བའི་དུས་གསུམ་གྱི་བདེ་བར་གཤེགས་པ་རྩ་གསུམ་དཀྱིལ་འཁོར་རབ་འབྱམས་ཀྱི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་བཀྲ་ལམ་གྱིས་སད་པར་བསམས་ལ། མཆོད་ཅིང་བསྟོད་རྡོ་རྗེ་ཅན་གྱི་སངས་རྒྱས་ལ་སོགས་སྤྱི་ལྟར་གསོལ་བ་གདབ་པས། ནམ་མཁར་བཞུགས་པའི་ལྷ་རྣམས་དབང་གི་བྱ་བ་ལ་དགྱེས་ཤིང་མེ་ཏོག་གི་ཆར་འབེབས་པ་དང་བཅས་རྒྱལ་བར་བྱ་བའི་སླད་དུ་བཀྲ་ཤིས་པའི་ཚིགས་སུ་བཅད་པས་དབུགས་དབྱུང་བར་བསམས་ལ། ལས་བྱང་ལྟར། ཨོཾ། དགེ་ལེགས་ཀུན་གྱི་སོགས་དཀོན་མཆོག་གསུམ་གྱི་བཀྲ་ཤིས་བརྗོད་པ་སྔོན་དུ་འགྲོ་བས། དངོས་གཞིའི་དབང་བསྐུར་བ་ནི། ནམ་མཁར་བཞུགས་པའི་དབང་གི་ལྷ་དང་སློབ་དཔོན་ལྷན་ཅིག་པས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བྱང་ཆུབ་སེམས་ཀྱི་བདུད་རྩིས་གང་བས་དབང་བསྐུར་བར་བསམས་ལ། ཧཱུྃ་ཧྲཱིཿ བཀྲ་ཤིས་འོད་གསལ་སོགས་དབང་གཞུང་ལྟར། བུམ་པའི་ཆུས་ལུས་གང་ཞིང་དྲི་མ་དག །རིགས་ཀྱི་བདག་པོས་རྒྱས་གདབ་པ་སོགས་སྤྱི་ལྟར། བརྡ་བུམ་པའི་དབང་བསྐུར་བས་དོན། སྣོད་གཞལ་ཡས་ཁང་། བཅུད་དཀྱིལ་འཁོར་གྱི་འཁོར་ལོ། རྒྱུད་ཕུང་ཁམས་སྐྱེ་མཆེད་གདན་གསུམ་ཚང་བའི་ལྷ་ཚོགས་སུ་ངོ་སྤྲད་ཅིང་གསལ་བརྟན་དག་གསུམ་གྱི་ཉམས་བསྐྱང་དུ་གཞུག །རྗེས་ནི། དེས་བུམ་པའི་དབང་ཐོབ་སོགས་དག་པ་བརྗོད་པ་རྒྱས་བསྡུས་གང་རིགས་ཀྱི་མཐར། འབྲས་བུ་སྤྲུལ་པའི་སྐུ་འགྲུབ་པའི་སྐལ་བ་རྒྱུད་ལ་བཞག་པ་ལ་ཤིས་པ་བརྗོད་པའི་ཚིག་གིས་ཀྱང་མངའ་གསོལ་བས་བརྟན་པར་བྱས་པའི་མོས་པ་མཛོད། མ་ཧཱ་གུ་རུ་སོགས་གཞུང་ལྟར། གཉིས་པ་གསང་དབང་ལ། སྦྱོར་བ་གསང་བའི་རྫས་བསྒྲུབ་ཅིང་ཤིས་པ་བརྗོད་པ། དངོས་གཞི་གསང་བའི་དབང་བསྐུར་ཞིང་ཉམས་མྱོང་ངོ་སྤྲོད་པ། རྗེས་དག་པ་བརྗོད་ཅིང་མངའ་དབུལ་བ་རྣམས་དབང་གཞུང་ལྟར་ཚིག་གི་མཚམས་སྦྱོར་ཇི་ལྟར་རིགས་པས་བརྡ་སྤྲད། སྦྱོར་བའི་སྐབས་ཀྱི་ཤིས་བརྗོད། བྱིན་རླབས་མཁའ་ལ་སོགས་དང་། མཇུག་གི་ཤིས་བརྗོད་བུམ་དབང་ལྟར་ལ། འཆི་མེད་རྡོ་རྗེའི་གསུང་གི་བཀྲ་ཤིས་ཤོག༔ ཅེས་བསྒྱུར། གསུམ་པ་ཤེར་དབང་ལ། སྦྱོར་བ་ཕྱག་རྒྱ་བྱིན་གྱིས་བརླབ་ཅིང་ཤིས་པ་བརྗོད་པ། དངོས་གཞི་ཤེས་རབ་ཡེ་ཤེས་ཀྱི་དབང་བསྐུར་ཞིང་ཉམས་མྱོང་ངོ་སྤྲད་པ། རྗེས་དག་པ་བརྗོད་ཅིང་མངའ་གསོལ་བ་རྣམས་དབང་གཞུང་ལྟར་དང་། ཤིས་བརྗོད། མ་བཅོས་སྤྲོས་མེད་སོགས་དང་། འཆི་མེད་རྡོ་རྗེའི་ཐུགས་ཀྱི་ཞེས་བསྒྱུར། དབང་བཞི་པ་ལ། སྦྱོར་བ་ཚིག་གིས་མཚོན་པས་དོན་དམ་གྱི་ལྟ་བ་ངོ་སྤྲད་པ། དངོས་གཞི་བྱིན་རླབས་འཕོ་བས་ཉམས་མྱོང་བསྒོམ་པའི་དྲོད་གཏད་པ། རྗེས་བརྟུལ་ཞུགས་ཀྱི་སྤྱོད་པ་བསྐྱང་ཞིང་དག་པ་བརྗོད་པ་མངའ་དབུལ་བ་དང་བཅས་པ་རྣམས་སུ་ཡོད་པ་ལས། དང་པོ་ནི། བླ་སློབ་གཉིས་ཀ་སྒོ་གསུམ་གྱི་གནད་གཅུན་ལ། ཨཱཿ ཡེ་ནས་སོགས་དབང་གཞུང་ལྟར་ངོ་སྤྲད། གཉིས་པ་ནི་ཐུགས་ཡིད་བསྲེ་ཞིང་། སྐུ་འབག་གི་དབང་བསྐུར་ཏེ་ཡེ་ཤེས་ཀྱི་སྐུ་བསྟིམ། གསུམ་པ་ནི། གཞུང་ལས། ཞེས་བརྗོད་བླ་སློབ་གཉིས་ཀས་མོས་གུས་བསྐྱེད༔ ཅེས་སོགས་ཀྱི་དོན་ངོ་སྤྲད་ལ་མོས་གུས་རྫོགས་པ་ཆེན་པོའི་ཉམས་བྱུང་རྒྱལ་དུ་བསྐྱང་ཞིང་ཐོད་ཕྲེང་རྩལ་གྱི་ཛཔ྄་དབྱངས་བྱ། དག་བརྗོད་སྤྱི་ལྟར་དང་། འཆི་མེད་ཡེ་ཤེས་རྡོ་རྗེའི་བཀྲ་ཤིས་ཤོག༔ ཅེས་བསྒྱུར་ནས་ཤིས་བརྗོད་ཀྱིས་མངའ་གསོལ། དེས་སྟོད་ལས་བྱང་ཆུབ་སྒྲུབ་པའི་དབང་གི་དངོས་གཞི་གྲུབ་ནས། དེ་དང་འབྲེལ་བར་སྨད་ལས་དངོས་གྲུབ་སྣ་ཚོགས་པའི་རྗེས་སུ་གནང་བ་སྦྱིན་པ་ལ་གསུམ། སྦྱོར་བ་དངོས་གྲུབ་ཀྱི་རྫས་འདུ་བྱ་བ། དངོས་གཞི་སོ་སོའི་དབང་བསྐུར་བ། རྗེས་བསླབ་བྱ་བསྟན་པའོ། །དང་པོ་ནི། གཞུང་ལས། རིག་འཛིན་བླ་མའི་རྣམ་འཕྲུལ་བཅུ་གསུམ་པོ༔ ཞེས་སོགས་ཀྱི་དགོངས་པ་ལྟར་མདུན་བསྐྱེད་རིག་འཛིན་བཅུ་གསུམ་ལྷག་པར་གསལ་གདབ་ཅིང་། དཔོན་སློབ་གཉིས་ཀས་བསམ་པ་ལྷུན་གྲུབ་མའི་སྒོ་ནས་གསོལ་བ་གདབ་པས་རྒྱུད་བསྐུལ་ཏེ་ཡེ་ཤེས་པ་བསྟིམ་པ་སོགས་གཞུང་ལྟར་བྱ། གཉིས་པ་ནི། ཧཱུྃ་ཧྲཱིཿ ང་ནི་ཕྱི་ནང་སོགས་སོ་སོར་དབང་བསྐུར། གསུམ་པ་ནི། དེས་ཀྱང་རིན་ཆེན་སྒྲོམ་བུར་བཅུག་བྱས་ཏེ༔ ཞེས་སོགས་གཞུང་ལྟར་གདམས། དེའང་སྐབས་འདིའི་དབང་རྫས་བཅུ་གསུམ་པོ་དངོས་སམ་རི་མོར་བྲིས་པ་སློབ་མའི་གྲངས་མཉམ་འདུ་བྱས་ལ། སློབ་མ་རེ་རེ་བཞིན་དུ་གཏད་ནས་སོ་སོའི་བླ་རྡོའི་ཚུལ་དུ་འཆང་བ་གཞུང་གི་དགོངས་པ་དང་། གཏེར་ཆེན་རིན་པོ་ཆེས་ཀྱང་ཕྱག་ལེན་ངེས་པར་མཛད་དོ། །གཉིས་པ་དབང་འབྲིང་པོ་སྐུ་གསུང་ཐུགས་ཡོངས་རྫོགས་དང་བཅས་པའི་དབང་བསྐུར་བ་ལ། ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་སོགས་ཀྱིས་གསོལ་བ་གདབ། རྒྱལ་པོ་ཁྲི་སྲོང་ལྡེའུ་བཙན་སོགས་དང་། ཨོ་རྒྱན་པདྨའི་དབང་བསྐུར་སྦྱིན་པར་བྱ༔ ཞེས་གནང་བ་སྦྱིན་པ་སྔོན་དུ་འགྲོ་བས། དངོས་གཞི་ལ་སྐུ་ཕྱག་རྒྱའི་འཁོར་ལོ་བསྟིམ་ཞིང་དབང་བསྐུར་བ། གསུང་བཟླས་པའི་ལུང་སྦྱིན་ཞིང་དབང་བསྐུར་བ། ཐུགས་འོད་གསལ་གྱི་དགོངས་པ་ངོ་སྤྲད་ཅིང་དབང་བསྐུར་བ། ཡོངས་རྫོགས་བླ་མ་གཏོར་ཆེན་ལ་བརྟེན་ནས་བྱིན་རླབས་འཕོ་བའི་དབང་བསྐུར་བ་རྣམས་སུ་ཡོད་པ་ལས། དང་པོ་ནི། དཀྱིལ་འཁོར་བ་སོ་སོའི་སྐུ་གཉིས་པ་བསྟིམ་པའི་དམིགས་པ་ངོ་སྤྲད་ལ་ལྷ་དབང་ཡོངས་རྫོགས་བསྐུར་ཚུལ་ལྟར་བསྐུར། གཉིས་པ་ནི། བཟླས་ལུང་གི་དམིགས་པ་སྤྱི་ལྟར་ཕོག །གཙོ་འཁོར་ཡོངས་རྫོགས་ཀྱི་སྔགས་རྗེས་ཟློས་ལན་གསུམ་མཐར་ཕྲེང་བ་མགྲིན་པར་བཞག་ལ། ཨཱཿ ཇི་སྙེད་བརྗོད་པ་སོགས་ཐུགས་སྒྲུབ་བར་ཆད་ཀུན་སེལ་ལྟར། གསུམ་པ་ནི། ལྷ་སྔགས་སེམས་སུ་ངོ་སྤྲད་ལ། མེ་ལོང་གི་དབང་བསྐུར་ཞིང་། ཧཱུྃ༔ མེ་ལོང་ནང་དུ་སོགས་བར་ཆད་ཀུན་སེལ་ལྟར། བཞི་པ་ནི། ལས་རྡོར་གྱིས་གཏོར་ཆེན་བཏེག །སློབ་དཔོན་གྱིས་གཏོར་མ་རིན་ཆེན་གཞལ་ཡས་ཁང་སོགས་རང་གཞུང་ལྟར་དམིགས་པ་ཕོག་ལ་ཐོད་རྔ་འཁྲོལ་ཞིང་། ཧཱུྃ་ཧྲཱིཿ དངོས་གྲུབ་ཀུན་བདག་སོགས་རང་གཞུང་ལྟར་བརྗོད། དེ་ནས་གཏོར་མ་སོ་སོའི་སྤྱི་བོར་བཞག་པ་དང་བསྟུན། དུས་གསུམ་སངས་རྒྱས་གུ་རུ་རིན་པོ་ཆེ༔ ཞེས་སོགས་གསོལ་འདེབས་དང་ཐོད་ཕྲེང་རྩལ་གྱི་ཛཔ྄་དབྱངས་བྱ། གཏོར་རྫས་སྦྱིན། སྨིན་སློབ་ལ། མཐར་གཏོར་མའི་ལྷ་འོད་དུ་ཞུ་ནས་ཐིམ་པར་བསམ་མོ། །དབང་འབྲིང་པོ་འདི་ཁོ་ན་ཟུར་དུ་བསྐུར་ན། ཁྲུས་བྱ། བགེགས་བསྐྲད། སྲུང་འཁོར་བསྒོམ། ལོ་རྒྱུས་ཀྱིས་མཚམས་སྦྱར་ནས་མཎྜལ་ཕུལ། གསོལ་བ་གདབ། གནང་བ་སྦྱིན། སྐྱབས་སེམས་ཚོགས་བསག །སྡོམ་བཟུང་། ཡེ་ཤེས་དབབ་བརྟན་བཅས་ཀྱི་རྗེས་སྐུ་གསུང་ཐུགས་ཡོངས་རྫོགས་ཀྱི་དབང་བསྐུར་བ་བཅས་གོང་ལྟར་དང་། མཐར་ཚེ་འགུགས་སོགས་འོག་ནས་འབྱུང་བ་ལྟར་བྱའོ། །གསུམ་པ་བསྡུས་པ་བྱིན་རླབས་གཏོར་མའི་དབང་བསྐུར་བ་ནི། དབང་རྒྱས་འབྲིང་གཉིས་སྦྲེལ་ཏེ་བསྐུར་བའི་ཚེ་གོང་གི་ཡོངས་རྫོགས་གཏོར་མའི་དབང་བསྐུར་བ་དེ་ཀས་འཐུས་པ་ལས་ལོགས་སུ་མི་དགོས། གཏོར་དབང་རྐྱང་པའི་སྐབས་སུ། ཁྲུས་བྱ་བ་སོགས་ནས་ཡེ་ཤེས་དབབ་བརྟན་གྱི་བར་གོང་གི་དབང་འབྲིང་པོ་ཟུར་དུ་བསྐུར་བའི་སྐབས་ལྟར་སྦྱར། དེ་ནས་གཏོར་ཆེན་བཏེག །གཏོར་མ་རིན་ཆེན་གཞལ་ཡས་སོགས་རྒྱས་པར་བརྡ་སྤྲོད་ལ། དབང་ཚིག་རྒྱས་པ་བསམ་པ་ལྷུན་གྲུབ་ཚང་མ་ལྷ་དབང་གི་སྐབས་ལྟར་ལ། བར་གྱི་སྔགས་རྣམས་བཞག་ནས་ཚིགས་བཅད་རྣམས་སྦྲེལ་བའི་མཐར་བཛྲ་གུ་རུ་དང་། ཐོད་ཕྲེང་རྩལ་གྱི་ཛཔ྄་དབྱངས་དང་བཅས་ཏེ་དབང་བསྐུར་བའམ། འབྲིང་པོ། ཨེ་མ་ཧོཿ ནུབ་ཕྱོགས་བདེ་བ་ཅན་སོགས་ནས། འགྲོ་དོན་སྟོབས་ཆེན་མཛད་པའི་ཐུགས་རྗེ་ཅན༔ ཨོ་རྒྱན་པདྨ་འབྱུང་གནས་དབང་བསྐུར་རོ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཧོར་སོག་འཇིག་པའི་དམག་དཔུང་ཟློག་པར་ཤོག༔ དུས་མིན་འཆི་བའི་བར་ཆད་ཞི་བར་ཤོག༔ དབུལ་ཕོངས་སྡུག་བསྔལ་སེལ་བའི་དབང་ཐོབ་ཤོག༔ དངོས་གྲུབ་གཏེར་ལ་སྤྱོད་པའི་དབང་ཐོབ་ཤོག༔ ཕྱི་ནང་ལམ་སྣ་ཟིན་པའི་དབང་ཐོབ་ཤོག༔ ཐོགས་བཅས་བདུད་རྣམས་སྐྲོད་པའི་དབང་ཐོབ་ཤོག༔ འབྱུང་བཞི་འཁྲུགས་པའི་བར་ཆད་ཀུན་སེལ་ཤོག༔ མི་མཐུན་ཚོགས་ཀུན་འཆིང་བའི་དབང་ཐོབ་ཤོག༔ བར་ཆད་གཡུལ་ལས་རྒྱལ་བའི་དབང་ཐོབ་ཤོག༔ དབྱིངས་རིག་དབྱེར་མེད་འཕོ་བའི་དབང་ཐོབ་ཤོག༔ འཁྲུལ་སྣང་རང་སར་གྲོལ་བའི་དབང་ཐོབ་ཤོག༔ སྐྱེ་ཤི་རྩད་ནས་གཅོད་པའི་དབང་ཐོབ་ཤོག༔ སྡུག་བསྔལ་ཀུན་སེལ་བསམ་དོན་ལྷུན་གྲུབ་ཤོག༔ ཅེས་པའི་མཐར་བཛྲ་གུ་རུ་དང་ཐོད་ཕྲེང་རྩལ་གྱི་ཛཔ྄་བརྗོད། བསྡུ་ན། འགྲོ་དྲུག་སྡུག་བསྔལ་ཆེན་པོས་སོགས་ནས། གུ་རུའི་ཐུགས་རྗེས་འཕོ་འགྱུར་མེད་པར་གཟིགས༔ ཨོ་རྒྱན་པདྨ་འབྱུང་གནས་དབང་བསྐུར་རོ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཞེས་སམ། དུས་གསུམ་སངས་རྒྱས་གུ་རུ་རིན་པོ་ཆེ༔ ཞེས་སོགས་གསོལ་འདེབས་རྡོ་རྗེའི་ཚིག་དྲུག་ཛཔ྄་དབྱངས་དང་བཅས་དབང་བསྐུར་བར་གསུངས་པ་རྣམས་གང་རིགས་བྱ། མཐར་ཚེ་འགུགས་སོགས་འོག་ནས་འབྱུང་བ་ལྟར་རམ། བསྡུ་ན། གཏོར་རྫས་འཆི་མེད་ཚེའི་བདུད་རྩི་དངོས་གྲུབ་སྣ་ཚོགས་པའི་རང་བཞིན་དུ་བསམས་ལ་ཚེ་ཛཔ྄་དང་བཅས་སྦྱིན་ཅིང་ཤིས་བརྗོད་ཀྱིས་མངའ་གསོལ། རྗེས་དམ་ཚིག་ཁས་བླངས་སོགས་དཀྱུས་ལྟར་བྱའོ། །མཐའ་བརྟེན་ནི། གཞུང་ལས། གང་ཡང་ཀུན་གྱི་ཐ་མར་འཆི་མེད་ཀྱི༔ ཞེས་སོགས་གསུངས་པའི་དོན། མཐའ་བརྟེན་བཀྲ་ཤིས་ཚེའི་དབང་བསྐུར་བའི་སླད་དུ། རྩ་གསུམ་རྒྱལ་བ་འདུས་པའི་དངོས༔ མ་ཧཱ་གུ་རུ་པདྨ་འབྱུང་༔ བདག་ལ་བརྩེ་བས་ཉེར་དགོངས་ཏེ༔ འཆི་མེད་ཚེ་ཡི་དབང་མཆོག་སྩོལ༔ ཅེས་ལན་གསུམ་གྱིས་གསོལ་བ་བཏབ། སློབ་དཔོན་གུ་རུ་བདེ་བ་ཆེན་པོ་འཆི་མེད་པདྨ་སཾ་བྷཱ་ཝར་གསལ་བའི་གནས་ལྔར་ཕྱག་མཚན་ལྔ་དང་ཡིག་འབྲུ་ལྔས་མཚན་པ་ལ་འོད་ཟེར་བསམ་གྱིས་མི་ཁྱབ་པ་དང་། ལྷ་མོ་མགྱོགས་མའི་སྤྲུལ་པ་ཉི་ཟེར་གྱི་རྡུལ་ལྟར་སྤྲོས་པས་ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་དྭངས་མ། འཁོར་འདས་ཀྱི་བཅུད་དང་དགེ་མཚན་ཐམས་ཅད་འཆི་མེད་ཚེའི་བདུད་རྩི་འོད་ཟེར་ཁ་དོག་སྣ་ཚོགས་པའི་རྣམ་པར་སྤྱན་དྲངས། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་འཆི་མེད་ཚེའི་དངོས་གྲུབ་ཐོབ། མདུན་གྱི་ཚེ་རྫས་རྣམས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པའི་མོས་པ་མཛོད། ཅེས་དང་། མདའ་དར་གཡབ་ལ། ཧྲཱིཿ འོད་གསལ་ཆོས་སྐུའི་ཕོ་བྲང་ནས༔ ལོངས་སྤྱོད་ཡོངས་རྫོགས་སྤྲུལ་པའི་སྐུ༔ འཆི་མེད་པདྨ་སཾ་བྷ་ཝ༔ རྩ་གསུམ་རྒྱ་མཚོའི་འཁོར་དང་བཅས༔ སྒྲུབ་ལ་ཚེ་དབང་མཆོག་སྩོལ་ཕྱིར༔ ཐུགས་དམ་བསྐུལ་ལོ་དབྱིངས་ནས་བཞེངས༔ རྣལ་འབྱོར་བདག་ཅག་འཁོར་བཅས་ཀྱི༔ བླ་ཚེ་ཆད་ཉམས་ཡར་བ་དང་༔ ཕྱི་སྣོད་འབྱུང་བ་བཞི་ཡི་བཅུད༔ ནང་བཅུད་འགྲོ་བའི་ཚེ་བསོད་དཔལ༔ གསང་བ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་པའི་ཡོན་ཏན་ཀུན༔ འོད་ཟེར་བདུད་རྩིའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་སྟིམས༔ རྒས་མེད་ལང་ཚོའི་དངོས་གྲུབ་སྩོལ༔ ནད་མེད་བདེ་བའི་དངོས་གྲུབ་སྩོལ༔ འཆི་མེད་ཚེ་ཡི་དངོས་གྲུབ་སྩོལ༔ ཡེ་ཤེས་མཆོག་གི་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥེ་ཧཱུྃ་ནྲྀ་ཛ༔ དེ་ནས་ཚེའི་འབྲང་རྒྱས་ཐོགས་ལ། དེ་ལྟར་ཚེ་འགུགས་ཤིང་བཅུད་བསྡུས་ནས། ཚེའི་འབྲང་རྒྱས་འདི་ཉིད་རྩ་གསུམ་ཀུན་འདུས་འཆི་མེད་པདྨ་སཾ་བྷ་ཝ་གུ་རུ་བདེ་བ་ཆེན་པོའི་རྣམ་པ། ཕྱག་གཉིས་མཉམ་གཞག་གི་སྟེང་ན་འཆི་མེད་ཚེའི་བདུད་རྩིས་གང་བའི་བྷནྡྷ་དང་ཚེ་བུམ་བསྣམས་པར་གསལ་བའི་གནས་ལྔར་ཕྱག་མཚན་སོགས་གོང་ལྟར་ལ། རྣམ་པར་སྤྱན་དྲངས། ཕྱག་གི་བྷནྡྷ་དང་བུམ་པའི་ནང་དུ་ཞུགས་ཤིང་འཁྱིལ་པ་ལས་འཆི་མེད་ཚེའི་བདུད་རྩི་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགས། ལུས་ཀྱི་ནང་ཐམས་ཅད་གང་། དུས་མ་ཡིན་པའི་འཆི་བ་བག་ཆགས་དང་བཅས་པ་བྱང་། འཆི་མེད་ཚེའི་དངོས་གྲུབ་ཐོབ། དྭངས་མ་སྙིང་གི་དབུས་སུ་སྣ་ཚོགས་རྡོ་རྗེའི་ལྟེ་བར་ཉི་ཟླའི་གྭའུ་ཁ་སྦྱོར་གྱི་ནང་དུ་ཧཱུྃ་གི་ཁོག་པར་ནྲྀ་ཡིག་ཨས་མཚན་པ་ལ་ཐིམ་པས་རྡོ་རྗེའི་སྲོག་འགྲུབ་པའི་མོས་པ་མཛོད། ཅེས་དང་། ཨོཾ། བཀྲ་ཤིས་འོད་གསལ་གཞོན་ནུ་བུམ་པའི་དབྱིངས༔ ཡེ་ཤེས་རང་སྣང་པདྨ་སཾ་བྷ་ཝ༔ ཟུང་འཇུག་བདེ་བ་ཆེན་པོའི་དབང་བསྐུར་བས༔ སྐྱེ་འཆི་བགྲེས་རྒུད་བྲལ་བའི་དབང་ཐོབ་ཤོག༔ སྔགས་མཐར་ཀཱ་ཡ་ཨ་བྷི་ཥིཉྩ་ཨོཾ༔ ཚེ་ཆང་སྦྱིན་ལ། ཨཱཿ རང་བྱུང་མཚན་ལྡན་རྡོ་རྗེའི་ཀ་པཱ་ལར༔ བརྟན་དང་གཡོ་བའི་བཅུད་ཀུན་གཅིག་ཏུ་འཁྱིལ༔ བྱང་ཆུབ་སེམས་ཀྱི་བདུད་རྩིས་དབང་བསྐུར་བས༔ ནད་མེད་བདེ་བའི་དབང་མཆོག་ཐོབ་པར་ཤོག༔ སྔགས་མཐར་ཝཱ་ཀ་ཨ་བྷི་ཥིཉྩ་ཨཱཿ ཚེ་རིལ་སྦྱིན་ལ། ཧཱུྃ༔ ངོ་བོ་སྲིད་ཞིའི་དྭངས་མ་འདུས་པའི་བཅུད༔ རྣམ་པ་ལྷན་སྐྱེས་ཡེ་ཤེས་སེམས་དཔའི་གཟུགས༔ སྙིང་དབུས་ཉི་ཟླའི་གྭའུར་རྒྱས་གདབ་པས༔ འཆི་མེད་རྡོ་རྗེ་ཚེ་ཡི་དབང་ཐོབ་ཤོག༔ སྔགས་མཐར་ཙིཏྟ་ཨ་བྷི་ཥིཉྩ་ཧཱུྃ༔ ཚེ་མདའ་སྤྱི་བོར་རྒྱ་གྲམ་དུ་བཞག །རྡོ་རྗེའི་གོ་ཆས་རྒྱས་གདབ་ཅིང་འཆི་མེད་གཉུག་མའི་དོན་ལ་མཉམ་པར་འཇོག་ཏུ་བཅུག །ཨཿ སྤྲོས་པ་འཁོར་འདས་ཁྱབ་པའི་ཚེ༔ བསྡུས་པས་འོད་གསལ་ཐིག་ལེའི་ཀློང་༔ རྡོ་རྗེའི་སྲོག་ཏུ་ཡོངས་གྲུབ་པར༔ མི་འགྱུར་བརྟན་པའི་རྒྱས་གདབ་བོ༔ ཛྙཱ་ན་བཛྲ་ཨཱ་ཡུ་ཥེ་རཀྵ་རཀྵ་བྷྲཱུྃ༔ ཞེས་བརྗོད། དེ་ནས་བཀྲ་ཤིས་རྒྱས་པར་བརྗོད། རྗེས་དམ་ཚིག་ཁས་བླང་སོགས་དང་། ཆོ་གའི་རྗེས་རིམ་ཚོགས་ལ་རོལ་པ་སོགས་དཀྱུས་ལྟར་བྱའོ། །ཚེ་དབང་འདི་ཉིད་ཁོ་ན་ཟུར་དུ་བསྐུར་ན། སྒྲུབ་པའི་སྐབས་རྩ་བའི་བཟླས་པའི་རྗེས། བདག་མདུན་སྐད་ཅིག་གིས་གུ་རུ་བདེ་བ་ཆེན་པོ་འཆི་མེད་པདྨ་སཾ་བྷཱ་ཝའི་རྣམ་པར་གསལ་བཏབ་ལ། ཚེ་བཅུད་བསྡུ་བསྟིམ་གྱི་དམིགས་པ་དང་བཅས་གོང་གི་ཚེ་ཛཔ྄་གཙོ་བོར་བཟླ། ཐུན་མཚམས་སུ་ཚེ་འགུགས་བསྐུལ། དབང་དངོས་ལ་ཁྲུས་སོགས་ནས་མཎྜལ། གསོལ་འདེབས། སྐྱབས་སེམས། ཚོགས་བསགས་དང་། སྤྲོ་ན་སྡོམ་བཟུང་། གུ་རུ་བདེ་བ་ཆེན་པོ་འཆི་མེད་པདྨ་སཾ་བྷཱ་ཝའི་རྣམ་པར་གསལ་བཏབ་ཅིང་ཡེ་ཤེས་པ་དབབ་བརྟན་རྗེས། ཚེ་འགུགས་མན་གོང་ལྟར་སྦྱར་བས་གྲུབ་བོ། ། ༈ གཞན་ཡང་དབང་གཞུང་ལས་འཕྲོས་དོན་གྱི་ཚུལ་དུ། དེ་ལྟར་རྒྱས་པ་དབང་བསྐུར་སོགས་གསུངས་པའི་དོན། དབང་བསྐུར་འབྲིང་པོ་ཅུང་ཟད་རྒྱས་པར་སྤྲོ་ན། སྟོད་ལས་བྱང་ཆུབ་སྒྲུབ་པའི་དབང་བཞི་ཡོངས་རྫོགས་ཀྱི་རྗེས་སུ་སྐུ་གསུང་ཐུགས་ཡོངས་རྫོགས་དང་བཅས་པའི་དབང་སྦྲེལ་བ་དང་། བསྡུ་ན། མཆོག་དབང་ལྔ་ཞེས་པ་དབང་བཞི་པ་ལ། ལྟ་བ་དང་། བསྒོམ་པའི་དབང་སོ་སོར་བགྲངས་པ་སྟེ། མདོར་ན་དབང་བཞི་ཡོངས་རྫོགས་མཐའ་བརྟེན་གྱི་ཚུལ་དུ་གཏོར་དབང་དང་བཅས་པ་བསྐུར་བ་ཡིན་ལ། དེར་མ་ཟད་དབང་རྒྱས་འབྲིང་བསྡུས་གསུམ་སྦྲེལ་ཏེ་བསྐུར་བའི་ཚེ་ཕྱག་བཞེས་ལུགས་གཅིག་ལ་གསང་བ་སྤྱིའི་འགྲོས་དང་བསྟུན་ཏེ། བུམ་དབང་དངོས་གཞི་བརྡ་དོན་ངོ་སྤྲད་པ་ཡན་ཆད་ཕྱི་ཕན་པའི་དབང་དུ་བྱས། དེའི་རྗེས་སུ་ནང་ནུས་པ་འཇུག་པའི་དབང་སྐུ་གསུང་ཐུགས་དབང་བསྐུར། བུམ་དབང་གི་དག་པ་དང་བཀྲ་ཤིས་བརྗོད། དེ་ནས་གསང་བ་ཟབ་མོའི་དབང་གསུམ་དང་། མཐའ་བརྟེན་དངོས་གྲུབ་སྣ་ཚོགས་པའི་རྗེས་གནང་སྦྱིན་པ་དང་། དབང་དོན་གྱི་ཡེ་ཤེས་བརྟན་པར་བྱེད་པ་བྱིན་རླབས་གཏོར་མའི་དབང་རྣམས་རིམ་པར་བསྐུར་ནའང་ལེགས་ཤིང་འབྲེལ་ཆགས་པར་འགྱུར་ལ། འོན་ཀྱང་གཏེར་གཞུང་གི་དངོས་བསྟན་དང་རྒྱུན་གྱི་ཕྱག་བཞེས་ནི་གོང་དུ་སྨོས་པ་ལྟར་ཡིན་ནོ། །ཞེས་པའང་དོན་གཉེར་ཅན་དག་གི་ཆེད་དུ་ཟིན་བྲིས་མདོ་ཙམ་སྟེ། རྒྱས་པར་ཆོས་ཀྱི་སྤྱན་རྡུལ་དང་བྲལ་བའི་ཟབ་གཏེར་གྱི་གསང་བ་འཛིན་པའི་བདག་པོ་རྣམས་ཀྱིས་ལེགས་པར་བཤད་པའི་རྡོ་རྗེའི་དབྱངས་ཀྱི་ཏམྦུ་ར་བསྒྲེང་བར་འགྱུར་བ་ལས་མཁྱེན་པར་འཚལ་ལོ། །མངྒ་ལཾ།། །། ༈
[edit]

gter gsar bsam pa lhun grub ma'i dbang gi zin tho/ @#/_/gter gsar bsam pa lhun grub ma'i dbang gi zin tho bzhugs so/__/oM swa sti/__gter chen mchog gyur bde chen gling pa'i zab gter bla ma'i thugs sgrub yid bzhin nor bu bsam pa lhun grub ma'i dbang bskur ba la gnyis/__sta gon kha skong nas shin tu rgyas par bskur ba'i tshul spyir bstan/__dngos gzhi'i dbang rgyas 'bring bsdus pa tsam rang gzhung ltar bskur ba'i tshul lo/__/dang po ni/__spro na dam rdzas myong grol gyi sgrub khog ltar ram/__'jam mgon rdo rje 'chang pad+ma gar dbang gi ljags bsgrigs thugs sgrub bar chad kun sel gyi dbang chog la lha sngags sogs 'dor len byas te/__lha/__bum pa/__slob ma sta gon rnams bya/__dngos gzhi ni 'og nas 'byung ba ltar las rgyas bsdus kyi 'dor len med/__'on kyang gter chen rin po che'i phyag len dkyus la sta gon dang 'brel ba cher mi gnang bas/__slob ma sngon du dkyil 'khor chen po gang rung du smin pa la ni/__'jug pa dang bcas pa'i dngos gzhi'i dbang rang gzhung ltar kho nas don grub pa yin no/__/gnyis pa la gsum/__bsgrub gzhi gzugs brnyan gyi dkyil 'khor 'du bya ba/__sgrub chos ting nge 'dzin gyi dkyil 'khor gsal gdab pa/__bsgrubs pa'i 'bras bu slob ma rjes su bzung ba'i tshul dngos so/__/dang po ni/__rnam par dul ba'i gnas su stegs bu'i dbus rdul tshon nam ras bris kyi dkyil 'khor mtshan nyid tshang ba dgram/_de'i lte bar many+dzi'i khar rnam bum/__gsang rdzas/__me long dri med la sid+d+hu ra'i thig le lnga tshom ba~M ha ri ni sas mtshan pa/__gu ru bde ba chen po'i sku 'bag rnams brtsegs ma dang /__mdun du gtor chen ri rab ma/__lha gnas so so'i thad du dngos grub kyi rdzas bcu gsum dang /__sku tsaka__/sngags phreng /__me long /__gzhan yang tshe'i 'brang rgyas/__tshe chang /__tshe ril/__tshe mda'/__mthar sman rag gtor tshogs nyer spyod dang /__slob dpon gyi mdun du las bum sogs/__gzhan yang 'og tu dgos pa'i yo byad thams cad 'du bya/__dar 'phan bla re sogs kyi rgyan dgram/__dbang rdzas bsham pa dang /__dngos gzhi'i sgrub mchod kyi bar zhag gis chod na bdag nyid lha'i nga rgyal dang bcas cho ga rgyas bsdus gang rung gis byin dbab pa bcas bya'o/__/gnyis pa ni/__las byang dgos 'dod kun 'byung gi gzhung bsrang la bzlas pa'i bar dang /__bar 'dir 'og nas 'byung ba ltar dmigs pa gsal btab tshe dzapa? bzla ba dang /__dzapa? khang bsdus rjes tshe 'gugs bskul ba bcas bgyis na'ang legs/__mchan/__rnam bum dang las bum cho ga rgyas bsdus ci rigs pa'i sgo nas bsgrub/__de nas gsol 'debs dang dzapa? khang bsdu ba/__chos srung spyi bye brag gi gtor bsngo/__tshogs bsgral mchod yan grub nas bdag 'jug rgyas par blang ba'am/__rig pa'i me tog dor ba tsam gyis bdag nyid 'jug pa dang /__slob ma 'jug par gnang ba nod pa rnams bya'o/__/gsum pa la gsum/__dbang rgyas pa stod las smad las kyi tshul du bskur ba dang /__'bring po sku gsung thugs yongs rdzogs kyi dbang bskur ba dang /__bsdus pa byin rlabs gtor ma'i dbang bskur ba'o/__/dang po la gnyis/__stod las mchog gi dbang bzhi bskur ba dang /__smad las thun mong gi dngos grub sna tshogs pa'i rjes su gnang ba sbyin pa'o/__/dang po la gnyis/__'jug pa dang /__dbang bskur ba dngos so/__/dang po la dbang gzhung gi dngos bstan las phyi nang gi 'jug pa so sor gsal bar ma gsungs kyang /__'og tu/__de ltar mchog dang thun mong dngos grub phyir:__dbang gi khyad chos snying por bstan pa ste:__thun mong dkyil 'khor phyi nang 'jug pa sogs:__rigs mthun bla ma'i dbang gzhung spyi ltar sbyar:__zhes gsungs pa ltar cung zad kha skong ba'i dbang du byas na gnyis/__phyi 'jug dang /__nang 'jug go/__/dang po la sdom ni/__khrus1 byas bgegs 2phral srung 'khor 3bsgom/__/lo rgyus mtshams sbyar maN+Dal 4phul/__/chas 5'jug gsol gdab gnang 6ba sbyin/__/rgyud 8sbyong sdom 9bzung nang sems 10bskyed/__/ces chos bcu las/__dang po ni/__slob ma rnams la phyi rol du las chus khrus byas/__gnyis pa ni/__nang du 'ongs pa na bgegs la gtor ma sbyin cing bskrad/__gsum pa ni/__gral du 'khod nas srung 'khor bsgom/__bzhi pa ni/__chos bshad ci rigs pa dang /__lo rgyus kyi khyad par dbang gzhung las/__e ma:__dus gsum sangs rgyas kun gyi niH__sogs dang /__e ma:__byin rlabs mthu myur dngos grub che ba'i dpal:__ces sogs rgyas bsdus ji ltar 'os pas mtshams sbyar te 'jug pa'i phyir maN+Dal 'bul du gzhug__/lnga pa ni/__myong grol sgrub khog las so/__/ma rig pa'i sgrib g.yogs kyis rig pa ye shes kyi mthong ba bsgrib par mtshon pa'i phyir oM AHhU~M gis mig dar bcings:__dpa' bo 'bru lnga las skyes pa'i me tog:__hU~M:__ye shes dpa' bo 'bru lnga'i dngos:__bde chen thig le me tog phreng :__rigs kyi lha dang mjal ba'i phyir:__skal ldan khyod kyi snyim par zungs:__A kha~M wI ra hU~M:__puSh+pe badz+ra sa ma ya s+t+waM:__zhes sbyin/__drug pa ni/__'dren pa sangs rgyas sogs dang /__bdun pa ni/__bu khyod skal ba sogs dbang gzhung ltar/__brgyad pa ni/__dmigs pa spyi ltar brda sprad la/__skyabs 'gro/__sems bskyed/__tshogs bsags rnams las byang ltar/__dgu pa ni/__sdom pa gsum so sor bzung ba'am/__bsdu na/__thugs sgrub bar chad kun sel gyi dbang chog ltar/__o rgyan gdung 'dzin rgyal ba'i sras sogs kyis bzung /__bcu pa ni/__so so'i snying gar snying rje chen po'i zla ba stong pa nyid rdo rje mtshan par gsal btab nas zung 'jug tu sems bskyed par bgyi'o snyam pas/__oM sarba yo ga tsit+ta ut+pA da yA mi:__zhes brjod du gzhug cing /__de brtan par bya ba'i phyir/__slob dpon gyis/__oM:__de ring stong pa nyid dang snying rje che:__dbyer med zung 'jug snying gi dbus su bskyed:__ji ltar dga' ba'i spyod lam mi 'da' bas:__rdo rje'i dam tshig bla med 'grub gyur cig:__bo d+hi tsit+ta sa ma ya sid+d+hi ho:__zhes brjod cing rdo rje snying gar bzhag___/gnyis pa la/__yol ba'i nang 1gzhug phyag bzhi pa2/__/dam la 3bzhag cing ye shes dbab4/__/me tog 5dor zhing spyi bor 'ching /__/gdong g.yogs 6dgrol zhing dkyil 'khor 7bstan/__/ces bdun las/__dang po ni/__slob dpon gyis/__ho:__mi gnas ye shes rang byung ba:__rnam par thar pa'i sgo bzhi nas:__tshad med bzhi yi 'jug pa yis:__rdo rje'i slob ma gzhug par bgyi:__sa ma ya pra we sha ya phaT:__ces pas dkyil 'khor gyi khang pa'i sgo phye nas nang du khrid/__gnyis pa ni/__slob mas dkyil 'khor la bskor zhing sgo bzhi nas phyag bya zhing /__ho:__rang rig mtha' dbus med pa'i dkyil:__ye shes bzhi 'phro 'khor lo'i tshul:__sku gsung thugs kyi dkyil 'khor bar:__sgo gsum gus pas phyag 'tshal lo:__oM na maHte hU~M:__oM na mA mi hU~M:__oM na mo na ma hU~M:__zhes brjod/__gsum pa ni/__slar yang slob ma shar sgor 'khod pa la/__slob dpon gyis rdo rje spyi bor bzhag la/__oM:__deng khyod rdo rje'i dkyil 'khor cher:__gzhug cing ye shes bskyed pa las:__dngos grub rnam gnyis thob 'gyur te:__gzhan du smras na nyams par 'gyur:__snying gar bzhag la/__AH__ye shes rnam pa thams cad pa:__khyod kyi snying la de ring zhugs:__tshul min gsang ba bsgrags pa na:__de ma thag tu bral te gshegs:__bdud rtsi'i chu nan byin la/__hU~M:__sngags kyi rtsa ba dam tshig ste:__bsrung na dngos grub rnam gnyis thob:__ma bsrung tshe 'dis dmyal bar 'gro:__dam srung rdo rje'i chu 'thungs shig:__ces gdams pa la/__slob mas kyang /__badz+ra sa ma ya i daM na ra ka na:__zhes rdo rje'i bro bor:__slar yang slob dpon gyis rdo rje gdengs shing /__hoH__de ring phyin chad bu khyod kyis:__rigs kyi bdag po nga yin pas:__bla mas gsungs pa rdo rje'i tshig:__nam yang mi 'da' sgrub par gyis:__zhes gdams so/__/bsdu na dam chu sbyin pa kho nas kyang rung /__bzhi pa ni/__dbang gzhung ltar slob ma gu ru bde ba chen por bskyed/__gnas gsum brlab/__spyan 'dren bskul zhing ye shes dbab/__tiSh+Tha badz+ras brtan par bya ba rnams spyi ltar bya'o/__/lnga pa ni/__slob mas sngar gtad pa'i me tog thogs la/__hoH__tshe rabs 'brel ba'i rigs kyi lhar:__ye shes rig pa'i me tog 'bul:__sngon nas las 'phro gang yod pa'i:__lhag pa'i lha der 'babs par shog:__badz+ra puSh+pe sa ma ya hoH__zhes dor bas gtso 'khor gang la phog pa'i lhag pa'i lhar nges par bya:__yang na de thams cad rigs lngar 'dus te:__dbus su mi 'gyur rdo rje'i rigs:__shar du dri med bde gshegs rigs:__lho ru 'dod 'byung rin chen rigs:__nub tu chags med pad+ma'i rigs:__byang du thogs med las kyi rigs:__zhes rigs lngar nges par byas te so so'i rigs dang mthun pa'i ming gdags:__me tog spyi bor bcings shing :__hoH__sngon tshe gong nas bsnyen pa'i lhas:__sku gsung thugs kyi dngos grub ni:__deng 'dir khyod la dbab pa yis:__rigs kyi sras su 'gyur bar shog:__puSh+pe sid+d+hi sa ma ya s+t+waM:__zhes me tog spyi bor bzhag pas lha so so'i sku gsung thugs kyi dngos grub thob par bsam:__drug pa ni/__gser gyi thur ma thogs te:__hoH__rang byung 'od gsal snying po la:__glo bur 'khrul pa'i sgrib g.yogs kun:__rig pa ye shes thur mas dbye:__rdo rje'i dkyil 'khor mngon gyur shog:__dz+nyA na tsak+Shu pra we sha ya phaT:__ces pas mig dar bsal:__bdun pa ni/__las byang ltar rten dang brten pa'i dkyil 'khor rgyas bsdus gang rung gi sgo nas brda sprad cing bstan:__gnyis pa dbang dngos la/__maN+Dal phul/__byang chub rdo rjes rgyal ba lngar:__dgongs shing ji ltar stsal ba bzhin:__ye shes dbang bskur bdud rtsi'i chus:__bdag rgyud smin par mdzad du gsol:__ces gsol ba gdab/__dbang gi ngo bo/__sgra don/__dbye ba sogs spyi ltar rgyas bsdus gang rung bshad/__khyad par dbye ba la/__gzhung las/__de la thog mar smin byed kyi:__zhes sogs gsungs pa ltar dbang rab 'jug pa don dam rdo rje ye shes 'pho ba'i dbang dang /__dbang po 'bring man chad thun mong du 'jug pa mtshan ma rdzas kyi dbang gnyis su mchis na'ang /__de gnyis ka don gyis dbang bzhir 'du ba las/__dang po bum pa'i dbang la/__sbyor ba dbang lha spyan drangs shing shis pa brjod pa/__dngos gzhi bum pa'i dbang bskur zhing brda don ngo sprad pa/__rjes dag pa brjod cing mnga' dbul ba rnams su yod pa las/__thog mar dbang gzhung ltar/__slob dpon gyi thugs ka nas 'od zer 'phros pas chos kyi dbyings dang nam mkha'i mthas gtugs pa'i zhing khams kun na gshegs shing bzhugs la 'byon par 'gyur ba'i dus gsum gyi bde bar gshegs pa rtsa gsum dkyil 'khor rab 'byams kyi lha tshogs thams cad mdun gyi nam mkhar badz+ra sa mA dzaHsa bkra lam gyis sad par bsams la/__mchod cing bstod rdo rje can gyi sangs rgyas la sogs spyi ltar gsol ba gdab pas/__nam mkhar bzhugs pa'i lha rnams dbang gi bya ba la dgyes shing me tog gi char 'bebs pa dang bcas rgyal bar bya ba'i slad du bkra shis pa'i tshigs su bcad pas dbugs dbyung bar bsams la/__las byang ltar/__oM/__dge legs kun gyi sogs dkon mchog gsum gyi bkra shis brjod pa sngon du 'gro bas/__dngos gzhi'i dbang bskur ba ni/__nam mkhar bzhugs pa'i dbang gi lha dang slob dpon lhan cig pas bkra shis pa'i rnam pa du ma dang ldan pas rin po che'i bum pa byang chub sems kyi bdud rtsis gang bas dbang bskur bar bsams la/__hU~M hrIH__bkra shis 'od gsal sogs dbang gzhung ltar/__bum pa'i chus lus gang zhing dri ma dag__/rigs kyi bdag pos rgyas gdab pa sogs spyi ltar/__brda bum pa'i dbang bskur bas don/__snod gzhal yas khang /__bcud dkyil 'khor gyi 'khor lo/__rgyud phung khams skye mched gdan gsum tshang ba'i lha tshogs su ngo sprad cing gsal brtan dag gsum gyi nyams bskyang du gzhug__/rjes ni/__des bum pa'i dbang thob sogs dag pa brjod pa rgyas bsdus gang rigs kyi mthar/__'bras bu sprul pa'i sku 'grub pa'i skal ba rgyud la bzhag pa la shis pa brjod pa'i tshig gis kyang mnga' gsol bas brtan par byas pa'i mos pa mdzod/__ma hA gu ru sogs gzhung ltar/__gnyis pa gsang dbang la/__sbyor ba gsang ba'i rdzas bsgrub cing shis pa brjod pa/__dngos gzhi gsang ba'i dbang bskur zhing nyams myong ngo sprod pa/__rjes dag pa brjod cing mnga' dbul ba rnams dbang gzhung ltar tshig gi mtshams sbyor ji ltar rigs pas brda sprad/__sbyor ba'i skabs kyi shis brjod/__byin rlabs mkha' la sogs dang /__mjug gi shis brjod bum dbang ltar la/__'chi med rdo rje'i gsung gi bkra shis shog:__ces bsgyur/__gsum pa sher dbang la/__sbyor ba phyag rgya byin gyis brlab cing shis pa brjod pa/__dngos gzhi shes rab ye shes kyi dbang bskur zhing nyams myong ngo sprad pa/__rjes dag pa brjod cing mnga' gsol ba rnams dbang gzhung ltar dang /__shis brjod/__ma bcos spros med sogs dang /__'chi med rdo rje'i thugs kyi zhes bsgyur/__dbang bzhi pa la/__sbyor ba tshig gis mtshon pas don dam gyi lta ba ngo sprad pa/__dngos gzhi byin rlabs 'pho bas nyams myong bsgom pa'i drod gtad pa/__rjes brtul zhugs kyi spyod pa bskyang zhing dag pa brjod pa mnga' dbul ba dang bcas pa rnams su yod pa las/__dang po ni/__bla slob gnyis ka sgo gsum gyi gnad gcun la/__AH__ye nas sogs dbang gzhung ltar ngo sprad/__gnyis pa ni thugs yid bsre zhing /__sku 'bag gi dbang bskur te ye shes kyi sku bstim/__gsum pa ni/__gzhung las/__zhes brjod bla slob gnyis kas mos gus bskyed:__ces sogs kyi don ngo sprad la mos gus rdzogs pa chen po'i nyams byung rgyal du bskyang zhing thod phreng rtsal gyi dzapa? dbyangs bya/__dag brjod spyi ltar dang /__'chi med ye shes rdo rje'i bkra shis shog:__ces bsgyur nas shis brjod kyis mnga' gsol/__des stod las byang chub sgrub pa'i dbang gi dngos gzhi grub nas/__de dang 'brel bar smad las dngos grub sna tshogs pa'i rjes su gnang ba sbyin pa la gsum/__sbyor ba dngos grub kyi rdzas 'du bya ba/__dngos gzhi so so'i dbang bskur ba/__rjes bslab bya bstan pa'o/__/dang po ni/__gzhung las/__rig 'dzin bla ma'i rnam 'phrul bcu gsum po:__zhes sogs kyi dgongs pa ltar mdun bskyed rig 'dzin bcu gsum lhag par gsal gdab cing /__dpon slob gnyis kas bsam pa lhun grub ma'i sgo nas gsol ba gdab pas rgyud bskul te ye shes pa bstim pa sogs gzhung ltar bya/__gnyis pa ni/__hU~M hrIH__nga ni phyi nang sogs so sor dbang bskur/__gsum pa ni/__des kyang rin chen sgrom bur bcug byas te:__zhes sogs gzhung ltar gdams/__de'ang skabs 'di'i dbang rdzas bcu gsum po dngos sam ri mor bris pa slob ma'i grangs mnyam 'du byas la/__slob ma re re bzhin du gtad nas so so'i bla rdo'i tshul du 'chang ba gzhung gi dgongs pa dang /__gter chen rin po ches kyang phyag len nges par mdzad do/__/gnyis pa dbang 'bring po sku gsung thugs yongs rdzogs dang bcas pa'i dbang bskur ba la/__e ma ho:__nub phyogs bde ba can gyi sogs kyis gsol ba gdab/__rgyal po khri srong lde'u btsan sogs dang /__o rgyan pad+ma'i dbang bskur sbyin par bya:__zhes gnang ba sbyin pa sngon du 'gro bas/__dngos gzhi la sku phyag rgya'i 'khor lo bstim zhing dbang bskur ba/__gsung bzlas pa'i lung sbyin zhing dbang bskur ba/__thugs 'od gsal gyi dgongs pa ngo sprad cing dbang bskur ba/__yongs rdzogs bla ma gtor chen la brten nas byin rlabs 'pho ba'i dbang bskur ba rnams su yod pa las/__dang po ni/__dkyil 'khor ba so so'i sku gnyis pa bstim pa'i dmigs pa ngo sprad la lha dbang yongs rdzogs bskur tshul ltar bskur/__gnyis pa ni/__bzlas lung gi dmigs pa spyi ltar phog__/gtso 'khor yongs rdzogs kyi sngags rjes zlos lan gsum mthar phreng ba mgrin par bzhag la/__AH__ji snyed brjod pa sogs thugs sgrub bar chad kun sel ltar/__gsum pa ni/__lha sngags sems su ngo sprad la/__me long gi dbang bskur zhing /__hU~M:__me long nang du sogs bar chad kun sel ltar/__bzhi pa ni/__las rdor gyis gtor chen bteg__/slob dpon gyis gtor ma rin chen gzhal yas khang sogs rang gzhung ltar dmigs pa phog la thod rnga 'khrol zhing /_hU~M hrIH__dngos grub kun bdag sogs rang gzhung ltar brjod/__de nas gtor ma so so'i spyi bor bzhag pa dang bstun/__dus gsum sangs rgyas gu ru rin po che:__zhes sogs gsol 'debs dang thod phreng rtsal gyi dzapa? dbyangs bya/__gtor rdzas sbyin/__smin slob la/__mthar gtor ma'i lha 'od du zhu nas thim par bsam mo/__/dbang 'bring po 'di kho na zur du bskur na/__khrus bya/__bgegs bskrad/__srung 'khor bsgom/__lo rgyus kyis mtshams sbyar nas maN+Dal phul/__gsol ba gdab/__gnang ba sbyin/__skyabs sems tshogs bsag__/sdom bzung /__ye shes dbab brtan bcas kyi rjes sku gsung thugs yongs rdzogs kyi dbang bskur ba bcas gong ltar dang /__mthar tshe 'gugs sogs 'og nas 'byung ba ltar bya'o/__/gsum pa bsdus pa byin rlabs gtor ma'i dbang bskur ba ni/__dbang rgyas 'bring gnyis sbrel te bskur ba'i tshe gong gi yongs rdzogs gtor ma'i dbang bskur ba de kas 'thus pa las logs su mi dgos/__gtor dbang rkyang pa'i skabs su/__khrus bya ba sogs nas ye shes dbab brtan gyi bar gong gi dbang 'bring po zur du bskur ba'i skabs ltar sbyar/__de nas gtor chen bteg__/gtor ma rin chen gzhal yas sogs rgyas par brda sprod la/__dbang tshig rgyas pa bsam pa lhun grub tshang ma lha dbang gi skabs ltar la/__bar gyi sngags rnams bzhag nas tshigs bcad rnams sbrel ba'i mthar badz+ra gu ru dang /__thod phreng rtsal gyi dzapa? dbyangs dang bcas te dbang bskur ba'am/__'bring po/__e ma hoH__nub phyogs bde ba can sogs nas/__'gro don stobs chen mdzad pa'i thugs rje can:__o rgyan pad+ma 'byung gnas dbang bskur ro:__bsam pa lhun gyis 'grub par byin gyis rlobs:__hor sog 'jig pa'i dmag dpung zlog par shog:__dus min 'chi ba'i bar chad zhi bar shog:__dbul phongs sdug bsngal sel ba'i dbang thob shog:__dngos grub gter la spyod pa'i dbang thob shog:__phyi nang lam sna zin pa'i dbang thob shog:__thogs bcas bdud rnams skrod pa'i dbang thob shog:__'byung bzhi 'khrugs pa'i bar chad kun sel shog:__mi mthun tshogs kun 'ching ba'i dbang thob shog:__bar chad g.yul las rgyal ba'i dbang thob shog:__dbyings rig dbyer med 'pho ba'i dbang thob shog:__'khrul snang rang sar grol ba'i dbang thob shog:__skye shi rtsad nas gcod pa'i dbang thob shog:__sdug bsngal kun sel bsam don lhun grub shog:__ces pa'i mthar badz+ra gu ru dang thod phreng rtsal gyi dzapa? brjod/__bsdu na/__'gro drug sdug bsngal chen pos sogs nas/__gu ru'i thugs rjes 'pho 'gyur med par gzigs:__o rgyan pad+ma 'byung gnas dbang bskur ro:__bsam pa lhun gyis 'grub par byin gyis rlobs:__zhes sam/__dus gsum sangs rgyas gu ru rin po che:__zhes sogs gsol 'debs rdo rje'i tshig drug dzapa? dbyangs dang bcas dbang bskur bar gsungs pa rnams gang rigs bya/__mthar tshe 'gugs sogs 'og nas 'byung ba ltar ram/__bsdu na/__gtor rdzas 'chi med tshe'i bdud rtsi dngos grub sna tshogs pa'i rang bzhin du bsams la tshe dzapa? dang bcas sbyin cing shis brjod kyis mnga' gsol/__rjes dam tshig khas blangs sogs dkyus ltar bya'o/__/mtha' brten ni/__gzhung las/__gang yang kun gyi tha mar 'chi med kyi:__zhes sogs gsungs pa'i don/__mtha' brten bkra shis tshe'i dbang bskur ba'i slad du/__rtsa gsum rgyal ba 'dus pa'i dngos:__ma hA gu ru pad+ma 'byung :__bdag la brtse bas nyer dgongs te:__'chi med tshe yi dbang mchog stsol:__ces lan gsum gyis gsol ba btab/__slob dpon gu ru bde ba chen po 'chi med pad+ma saM b+hA war gsal ba'i gnas lngar phyag mtshan lnga dang yig 'bru lngas mtshan pa la 'od zer bsam gyis mi khyab pa dang /__lha mo mgyogs ma'i sprul pa nyi zer gyi rdul ltar spros pas khyed rang rnams kyi bla tshe chad nyams yar ba dang /__'byung ba bzhi'i dwangs ma/__'khor 'das kyi bcud dang dge mtshan thams cad 'chi med tshe'i bdud rtsi 'od zer kha dog sna tshogs pa'i rnam par spyan drangs/__khyed rang rnams kyi spyi bo nas zhugs/__lus kyi nang thams cad gang bas 'chi med tshe'i dngos grub thob/__mdun gyi tshe rdzas rnams la thim pas rdo rje tshe'i bcud len du gyur pa'i mos pa mdzod/__ces dang /__mda' dar g.yab la/__hrIH__'od gsal chos sku'i pho brang nas:__longs spyod yongs rdzogs sprul pa'i sku:__'chi med pad+ma saM b+ha wa:__rtsa gsum rgya mtsho'i 'khor dang bcas:__sgrub la tshe dbang mchog stsol phyir:__thugs dam bskul lo dbyings nas bzhengs:__rnal 'byor bdag cag 'khor bcas kyi:__bla tshe chad nyams yar ba dang :__phyi snod 'byung ba bzhi yi bcud:__nang bcud 'gro ba'i tshe bsod dpal:__gsang ba rgyal ba sras bcas kyi:__mkhyen brtse nus pa'i yon tan kun:__'od zer bdud rtsi'i rnam par bsdus:__bdag dang sgrub pa'i rdzas la stims:__rgas med lang tsho'i dngos grub stsol:__nad med bde ba'i dngos grub stsol:__'chi med tshe yi dngos grub stsol:__ye shes mchog gi dngos grub stsol:__oM AHhU~M badz+ra gu ru pad+ma sid+d+hi A yu She hU~M nr-i dza:__de nas tshe'i 'brang rgyas thogs la/__de ltar tshe 'gugs shing bcud bsdus nas/__tshe'i 'brang rgyas 'di nyid rtsa gsum kun 'dus 'chi med pad+ma saM b+ha wa gu ru bde ba chen po'i rnam pa/__phyag gnyis mnyam gzhag gi steng na 'chi med tshe'i bdud rtsis gang ba'i b+han+d+ha dang tshe bum bsnams par gsal ba'i gnas lngar phyag mtshan sogs gong ltar la/__rnam par spyan drangs/__phyag gi b+han+d+ha dang bum pa'i nang du zhugs shing 'khyil pa las 'chi med tshe'i bdud rtsi dpag tu med pa byung /__khyed rang rnams kyi spyi bo tshangs pa'i bu ga nas zhugs/__lus kyi nang thams cad gang /__dus ma yin pa'i 'chi ba bag chags dang bcas pa byang /__'chi med tshe'i dngos grub thob/__dwangs ma snying gi dbus su sna tshogs rdo rje'i lte bar nyi zla'i gwa'u kha sbyor gyi nang du hU~M gi khog par nr-i yig as mtshan pa la thim pas rdo rje'i srog 'grub pa'i mos pa mdzod/__ces dang /__oM/__bkra shis 'od gsal gzhon nu bum pa'i dbyings:__ye shes rang snang pad+ma saM b+ha wa:__zung 'jug bde ba chen po'i dbang bskur bas:__skye 'chi bgres rgud bral ba'i dbang thob shog:__sngags mthar kA ya a b+hi Shiny+tsa oM:__tshe chang sbyin la/__AH__rang byung mtshan ldan rdo rje'i ka pA lar:__brtan dang g.yo ba'i bcud kun gcig tu 'khyil:__byang chub sems kyi bdud rtsis dbang bskur bas:__nad med bde ba'i dbang mchog thob par shog:__sngags mthar wA ka a b+hi Shiny+tsa AH__tshe ril sbyin la/__hU~M:__ngo bo srid zhi'i dwangs ma 'dus pa'i bcud:__rnam pa lhan skyes ye shes sems dpa'i gzugs:__snying dbus nyi zla'i gwa'ur rgyas gdab pas:__'chi med rdo rje tshe yi dbang thob shog:__sngags mthar tsit+ta a b+hi Shiny+tsa hU~M:__tshe mda' spyi bor rgya gram du bzhag__/rdo rje'i go chas rgyas gdab cing 'chi med gnyug ma'i don la mnyam par 'jog tu bcug__/aH_spros pa 'khor 'das khyab pa'i tshe:__bsdus pas 'od gsal thig le'i klong :__rdo rje'i srog tu yongs grub par:__mi 'gyur brtan pa'i rgyas gdab bo:__dz+nyA na badz+ra A yu She rak+Sha rak+Sha b+h+rU~M:__zhes brjod/__de nas bkra shis rgyas par brjod/__rjes dam tshig khas blang sogs dang /__cho ga'i rjes rim tshogs la rol pa sogs dkyus ltar bya'o/__/tshe dbang 'di nyid kho na zur du bskur na/__sgrub pa'i skabs rtsa ba'i bzlas pa'i rjes/__bdag mdun skad cig gis gu ru bde ba chen po 'chi med pad+ma saM b+hA wa'i rnam par gsal btab la/__tshe bcud bsdu bstim gyi dmigs pa dang bcas gong gi tshe dzapa? gtso bor bzla/__thun mtshams su tshe 'gugs bskul/__dbang dngos la khrus sogs nas maN+Dal/__gsol 'debs/__skyabs sems/__tshogs bsags dang /__spro na sdom bzung /__gu ru bde ba chen po 'chi med pad+ma saM b+hA wa'i rnam par gsal btab cing ye shes pa dbab brtan rjes/__tshe 'gugs man gong ltar sbyar bas grub bo/___/__!__gzhan yang dbang gzhung las 'phros don gyi tshul du/__de ltar rgyas pa dbang bskur sogs gsungs pa'i don/__dbang bskur 'bring po cung zad rgyas par spro na/__stod las byang chub sgrub pa'i dbang bzhi yongs rdzogs kyi rjes su sku gsung thugs yongs rdzogs dang bcas pa'i dbang sbrel ba dang /__bsdu na/__mchog dbang lnga zhes pa dbang bzhi pa la/__lta ba dang /__bsgom pa'i dbang so sor bgrangs pa ste/__mdor na dbang bzhi yongs rdzogs mtha' brten gyi tshul du gtor dbang dang bcas pa bskur ba yin la/__der ma zad dbang rgyas 'bring bsdus gsum sbrel te bskur ba'i tshe phyag bzhes lugs gcig la gsang ba spyi'i 'gros dang bstun te/__bum dbang dngos gzhi brda don ngo sprad pa yan chad phyi phan pa'i dbang du byas/__de'i rjes su nang nus pa 'jug pa'i dbang sku gsung thugs dbang bskur/__bum dbang gi dag pa dang bkra shis brjod/__de nas gsang ba zab mo'i dbang gsum dang /__mtha' brten dngos grub sna tshogs pa'i rjes gnang sbyin pa dang /__dbang don gyi ye shes brtan par byed pa byin rlabs gtor ma'i dbang rnams rim par bskur na'ang legs shing 'brel chags par 'gyur la/__'on kyang gter gzhung gi dngos bstan dang rgyun gyi phyag bzhes ni gong du smos pa ltar yin no/__/zhes pa'ang don gnyer can dag gi ched du zin bris mdo tsam ste/__rgyas par chos kyi spyan rdul dang bral ba'i zab gter gyi gsang ba 'dzin pa'i bdag po rnams kyis legs par bshad pa'i rdo rje'i dbyangs kyi tam+bu ra bsgreng bar 'gyur ba las mkhyen par 'tshal lo/__/mang+ga laM//___//__!

Footnotes

Other Information