JKW-KABUM-18-TSHA-002-003

🚧 This website is under continued development. We appreciate your patience!

Previous Section Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ལེགས་པར་སྦྱར་བའི་བསྟན་བཅོས་ཀྱི་བྱུང་ཚུལ་ཅུང་ཟད་བཤད་པ་ངོ་མཚར་ཟླ་ཞུན་གསར་བའི་འཛུམ་ཕྲེང་། ༄༅། །ལེགས་པར་སྦྱར་བའི་བསྟན་བཅོས་ཀྱི་བྱུང་ཚུལ་ཅུང་ཟད་བཤད་པ་ངོ་མཚར་ཟླ་ཞུན་གསར་བའི་འཛུམ་ཕྲེང་ཞེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། ངག་གི་རང་བཞིན་མིང་ཚིག་བརྗོད་པའི་སྒོ། །སྨྲ་བ་ཀུན་གྱི་མཆོག་གྱུར་འཇམ་མགོན་དང་། །དབྱེར་མེད་དཔལ་ལྡན་བླ་མར་གུས་བཏུད་ནས། །ལེགས་པར་སྦྱར་བའི་བྱུང་ཚུལ་ཅུང་ཟད་དབྱེ། །འདི་ལ་གཉིས། ཐོག་མར་ལྷ་ཡུལ་དུ་དར། དེ་ནས་མི་ཡུལ་དུ་དར་ཚུལ་ལོ། །དང་པོ་ནི། སྔོན་སརྦ་ཛྙ་ཞེས་པའི་སྒྲ་མཁས་པ་ཞིག་བྱུང་བས། དེས་ལྷའི་དབང་པོ་བརྒྱ་བྱིན་དང་། དྲང་སྲོང་ཕུར་བུ་ལ་བསླབས། གཉིས་པ་ནི། འདུལ་བ་ལུང་ནས་ཤཱ་རིའི་བུས་དབང་པོའི་བརྡ་སྤྲོད་ལོ་བཅུ་གཉིས་སུ་བསླབས་པར་གསུངས་ཤིང་། རྒྱལ་པོ་ཙནྡན་སྐྱོང་གི་སྐབས་སུ་བྲམ་ཟེ་ཨིནྡྲ་བྷཱུ་བ་ཞེས་པས་ལྷའི་དབང་པོ་བསྒྲུབས་པས་མཐོང་སྟེ་སྒྲའི་ངེས་གནས་གསུངས་ཏེ། ལྷའི་དབང་པོས་བསྟན་པ་བཞིན་བྲིས་པའི། ཨིནྡྲ་བྱཱ་ཀ་ར་ཎ་ཞེས་པ་བརྩམས་ཤིང་། བོད་ཀྱི་ལྷའི་དབང་པོས་བརྩམ་པར་བཤད་པ་ཡང་དེར་ཐུག་གོ །གཞན་ཡང་སྟག་རྐང་རིགས་ཀྱི་དྲང་སྲོང་མ་ལྷག་ཉི་མས་མཛད་པའི་གཞུང་བཅུ་པ་ཞེས་བྱ་བ་ཞིག་ཡོད་པ་སྒྲ་འགྲེལ་རྣམས་སུ་ལུང་འདྲེན་པ་ཡང་ཡོད་ལ། དྲང་སྲོང་ཏཉྫ་ལིས་མཛད་པ། བ་ཏཉྫ་ལི་བྱཱ་ཀ་ར་ཎ་སྟེ་ཐལ་མོ་ལྷུང་གི་བརྡ་སྤྲོད་པ་ཞེས་པའང་འདུལ་བ་སོགས་ལས་ཆུར་ལྷུང་གི་རིག་པ་ཞེས་བཤད་པའང་དེ་ཡིན་ཏེ། འདི་གཉིས་ནི་སྔ་མོ་ཞིག་ནས་ཡོད་པར་མངོན་ནོ། །འཇམ་དཔལ་རྩ་རྒྱུད་ནས་ལུང་བསྟན་པའི་བྲམ་ཟེ་པཱ་ཎི་ནིས་མཛད་པའི་པཱ་ཎི་བྱཱ་ཀ་ར་ཎའི་མདོ་བརྒྱད་པ་ཞེས་ཤློ་ཀ་སྟོང་ཡོད་པ་དང་། བྱེ་བྲག་འབྱེད་པའི་མདོ་ཤློ་ཀ་སྟོང་ཡོད་པ་མཛད་ཅིང་། དེ་ལ་དག་འབྱེད་ཟླ་བའི་འགྲེལ་པ་ཟླ་ཟེར་ཞེས་པ་ཡོད་ལ། འདར་ལོས་བསྒྱུར་བར་གྲགས་པའི་དཔེ་འདི་ཡང་རྒྱ་དཔེ་འདི་ལ་བརྟེན་ཁུལ་ཡིན་ཡང་ཟླ་ཟེར་ཞེས་པའི་མིང་ཡང་མ་ཤེས་འདུག་གོ །རྒྱལ་པོ་བདེ་བྱེད་ཀྱིས་སྒྲ་སློབ་པའི་ཕྱིར་བྲམ་ཟེ་མཆོག་སྲེད་ཀྱིས་རིག་སྔགས་ཀྱི་ནུས་པས་ཀླུའི་རྒྱལ་པོ་ལྷག་མ་ཅན་བཀུག་སྟེ། པཱ་ཎིའི་འགྲེལ་པ་ཤློ་ཀ་འབུམ་ཡོད་པ་འཆད་ཉན་བྱས་པའི་སྐབས་སློབ་དཔོན་དང་ཀླུའི་བར་ཡོལ་བས་བཅད་དེ་གནས་པ་ལས། སྐབས་ཤིག་ཡོལ་བ་བཏེག་ནས་བལྟས་པས་ཀླུའི་ལུས་ལ་སྦྲུལ་ཆེན་པོ་འཁྱིལ་བ་མཐོང་སྟེ་ཀླུ་སྐྱེངས་ནས་བྲོས། འགྲེལ་པ་ཤློ་ཀ་སྟོང་ཕྲག་ལྔ་ལས་མ་ཟིན། ལྷག་མ་སྟོང་ཕྲག་བཅུ་གཉིས་ཀྱི་ཚད་དུ་ལོངས་པ་བརྩམས་བསམ་ཧཱ་བྷཱ་ཥ་ཟེར། གཞུང་འགྲེལ་པ་དང་བཅས་པའི་འཆད་ཉན་ད་ལྟའི་བར་ཡོད་ཅིང་། སི་ཏུ་རིན་པོ་ཆེའི་ཞལ་ནས་ཀྱང་གླེགས་བམ་རྣམས་གཟིགས་ཚུལ་གསུངས་ཤིང་། འགྲེལ་པ་དེ་ལ་འཆད་ཉན་བྱེད་པ་མ་བྱུང་ཡང་། འགྲེལ་པ་ཀཽ་མུ་དཱིའི་སྟེང་ནས། ཏི་ཏ་བྷུཀྟའི་བྲམ་ཟེ་པྲ་དྱུམྤཱ་སྟེ་རབ་སྟོབས་ལས་ལེགས་པར་གསན་ཞིང་། སྔ་སོར་དགུང་ལོ་ཉེར་ལྔའི་སྟེང་དུ་བལ་ཡུལ་ལྷོ་ཕྱོགས་ཀྱི་པཎྜི་ཏ་པིཥྞུ་པ་ཏི་ཁྱབ་འཇུག་བདག་པོ་ལ་འགྲེལ་པ་བདུད་རྩི་དང་ཚིག་ཟླའི་སྟེང་ནས་ཨ་མཱ་ར་ཀོ་ཥའི་དཀའ་གནས་ཐམས་ཅད་ལེགས་པར་བསླབ་པ་ཡིན་ཅེས་གསུངས། དེའི་དོན་འགྲེལ་དུ་སློབ་དཔོན་ཙཱནྡྲ་གཽ་མིས་ཙཱནྡྲ་བྱཱ་ཀ་ར་ཎ་སྐབས་དྲུག་པ་འདི་མཛད་ཅིང་། སློབ་དཔོན་ཟླ་བ་གྲགས་པས་ས་མནྟ་བྷ་དྲ་ཞེས་པའི་སྒྲ་ཡི་བསྟན་བཅོས་མཛད་པ་གཟིགས་པས། རང་ཉིད་ཀྱི་གླེགས་བམ་ཁྲོན་པར་བསྒྱུར་བར་གྲགས་པའི་སྒྲ་མདོ་ཀུན་བཟང་སྟེ། བཻ་དཀར་སོགས་སུ། སུ་མནྟ་བྷ་ར་ཞེས་བྲིས་ནོར་བ་དེ་ཡིན་ནོ། །སློབ་དཔོན་ཨ་ནུ་བྷཱུ་ཏི་ལ་དབྱངས་ཅན་མས་དངོས་སུ་བསྩལ་བའི་སཱ་ར་སྦ་ཏཱི་བྱཱ་ཀ་ར་ཎ་སྟེ་མཚོ་ལྡན་མའི་བརྡ་སྤྲོད་པ་ཞེས། ཇོ་ནང་རྗེ་བཙུན་གྱིས་མདོ་གཞུང་བོད་སྐད་དུ་བསྒྱུར་ནས་འགྲེལ་པ་གསར་བརྩམས་མཛད་པ་འདི་ལའང་བ་ལ་བྷ་དྲས་རྫུན་བཤད་ཞུས་པ་དང་འགྱུར་ནོར་པའང་ཅི་རིགས་འདུག་ཅེས་ཀུན་མཁྱེན་སི་ཏུ་རིན་པོ་ཆེས་གསུངས། གཞན་ཡང་པཎྜི་ཏ་སཱ་དྷུ་ཀཱིརྟིས་མཛད་པའི་འཇམ་དཔལ་དབྱངས་ཀྱི་བརྡ་སྤྲོད་པ་ཞེས་ལོ་ཆེན་ཆོས་སྐྱོང་བཟང་པོས་འགྱུར་བ་འདི། བོད་རྣམས་ཀྱིས་དུས་འཁོར་གྱི་དབྱངས་གསལ་ལ་བརྟེན་ནས་འཇམ་དཔལ་གྱིས་མཛད་པ་ཞིག་ཡོད་ཟེར་རྒྱུ་དེའི་འཁྲུལ་གཞི་དེ་ཡིན་ནམ་སྙམ། སྐྱེས་བུ་མཆོག་གིས་མཛད་པའི་མ་ཧཱ་བྷཱ་ཥ་རྩ་འགྲེལ་གཉིས་ཡོད་པའི་རྩ་བ་ཞྭ་ལུས་པཱ་ཎི་པའི་མདོ་ཡིན་རྒྱུར་མཛད་ནས་བོད་སྐད་དུ་བསྒྱུར་བ་འདི་ལ་འདར་ལོས་བསྒྱུར་བའི་མིང་བཏགས་བྱས་པ་ཡིན་འདུག །ཕྱི་རོལ་གྱི་པཎྜི་ཏ་དྷརྨ་ཀིརྟི་ཞེས་པས་བྱས་པའི་གཟུགས་ཀྱི་འཇུག་པ་ཞེས་པའི་སྒྲ་གཞུང་ཞིག་ཀྱང་འདུག་པ་དེ་གཉིས་ཀའི་རྒྱ་དཔེ་ཀུན་མཁྱེན་སི་ཏུ་རིན་པོ་ཆེའི་ཕྱག་ཁར་བཞུགས་པར་སྣང་། དྲང་སྲོང་ཤཱ་ཀ་ཊས་མཛད་པའི་ཤཱ་ཀ་ཊ་ཡཱ་ན་ཞེས་པའི་བརྡ་སྤྲོད་པ་ཞེས་དང་། དྲང་སྲོང་ཀ་ཏིའི་བུས་བྱས་པའི་བརྡ་སྤྲོད་པ་རྣམས་འཕགས་ཡུལ་དུ་ཡོངས་སུ་གྲགས་ཀྱང་བསྟན་བཅོས་རྣམས་སུ་ལུང་དྲངས་པ་ཙམ་ལས་བོད་འདིར་མ་འགྱུར་རོ། །རྒྱལ་པོ་མ་ནུ་ཛེནྡྲས་མཛད་པའི་མི་སྐྱེས་དབང་པོའི་བརྡ་སྤྲོད་པ་དང་། དྲང་སྲོང་པི་ཤ་ལིས་མཛད་པའི་པི་ཤ་ལིའི་བརྡ་སྤྲོད་པ་ཞེས་བ་དག་ཡོད་པར་བོད་རྣམས་འདོད་པ་ནི་གང་ཡིན་མ་ཤེས་ཤིང་། རྒྱ་གཞུང་རྣམས་ལས་མིང་ཙམ་ཡང་མི་འབྱུང་ལ། ཙཱནྡྲ་བྱཱ་ཀ་ར་ཎ་ནི་ལྷའི་བུ་ཟླ་བས་མཛད་ཟེར་བ་ཡང་ཇི་བཞིན་མ་ཡིན་ཏེ་འཕགས་ཡུལ་དུ་ཡེ་མ་གྲགས་པའི་ཕྱིར་རོ། །སྤྱིར་ཡང་གྲགས་ཆེན་སྒྲ་མདོ་ཆེན་པོ་བརྒྱད་ཀྱི་གྲངས་འདྲེན་པ་ནི་བོད་རྣམས་ཀྱི་གསར་སྤྲོས་ལས་འཕགས་ཡུལ་དུ་དེ་ལྟ་བུའི་གྲངས་ངེས་བྱེད་པ་ཀུན་ཏུ་མ་གྲགས་སོ། །སྤྱིར་ལེགས་སྦྱར་གྱི་གཞུང་དང་བསྟན་བཅོས་བསམ་གྱིས་མི་ཁྱབ་པའི་ཕྱིར། དེ་ལྟར་ཡང་བོད་ཡུལ་འདིར་རྣ་བའི་ལམ་དུ་མ་གྲགས་པའི་དཔལ་སྒྲ་ཡི་རྒྱ་མཚོ་ཟེར་བའི་རྣམ་དབྱེའི་མཐའ་དཔྱོད་ཀྱི་བསྟན་བཅོས་ཆེན་པོ་ཞིག་དང་། ཤབྡ་མི་མམྤ་ཟེར་བའི་སྒྲ་སྤྱི་ཡི་མཐའ་དཔྱད་ཀྱི་བསྟན་བཅོས་ཤིན་ཏུ་རྒྱས་པ་ཞིག་ཀྱང་ཡོད་ཅེས་བླ་མ་མཆོག་གིས་སི་ཏུ་རིན་པོ་ཆེས་གསུངས་ཤིང་། ཡང་སྤེལ་བྱེད་ཀྱིས་བྱས་པའི་བྱ་བྱེད་ལས་གསུམ་སོགས་བྱེད་རྐྱེན་དྲུག་གི་རྣམ་བཤད་འགྲེལ་པ་ལ་མཁས་པ་ཞེས་དང་། མཆོག་སྲེད་ཀྱིས་མཛད་པའི་རྟགས་ཀྱི་བསྟན་བཅོས་གཉིས་ཀུན་མཁྱེན་སི་ཏུ་རིན་པོ་ཆེས་བསྒྱུར་བ་དང་། དེ་ཞབས་ཀྱི་ཕྱག་ཏུ་རྒྱ་དཔེ་ཡོད་རིགས་ཀྱང་། བ་མ་ཧ་སྟེ་མིའུ་ཐུང་གི་མངོན་བརྗོད། མངོན་བརྗོད་ཀྱི་བསྟན་བཅོས་མེ་དཱི་ནཱི་ཀ་ར་དང་། སྣ་ཚོགས་གསལ་བ་དང་། ཧ་ཏཱ་པཱ་ལཱི་དང་། དྲག་པོ་འབངས་ཀྱིས་སྦྱར་བའི་མངོན་བརྗོད་དང་། འབྱོར་འཕེལ་གྱིས་བྱས་པའི་ཚིག་སྡུད་ཀྱི་སྙིང་པོ་དང་། འཆི་མེད་མཛོད་ཀྱི་འགྲེལ་བ་བྱཱ་ཁྱཱ་སུ་དྷཱ་སྟེ། རྣམ་བཤད་བདུད་རྩི་དང་། པཱ་ད་ཙནྡྲི་ཀཱ་སྟེ་ཚིག་གི་ཟླ་བ་རྣམས་བཞུགས་ཤིང་། གཞན་ཡང་། ཀཽ་མུ་དཱི་ཟེར་བའི་སྒྲ་མདོ་ཞིག་བྱང་ཕྱོགས་གུ་ཛི་ར་ཐ་སོགས་སུ་ཆོས་དར་བར་ཡོད་ཅེས་ཇོ་ནང་སྒྲོལ་མགོན་གྱིས་གསུངས་འདུག་པ་དེ་དང་། པཎྜི་ཏ་བྷཊྚ྄ས་མཛད་པའི་མ་དྷྱ་ཀཽ་མོ་དི་ཟེར་བ་ཞིག་དང་། དབང་ཕྱུག་ཆེན་པོའི་ཌཱ་མ་རུའི་སྒྲ་ལས་བྱུང་བར་གྲགས་པའི། སིདྡྷི་ཀཽ་མོ་དཱི་སྟེ། རྟག་པའི་ཟེར་ཏེ་ཟླ་ཟེར་རྣམ་པ་གསུམ་ཡོད་ཅེས་བལ་པོ་པཎྜི་ཏ་ཀུན་བཟང་གིས་ཟེར་གྱིན་འདུག་གོ །ཁྱད་པར་ཀཱ་ལཱ་པའི་བྱུང་ཚུལ་ནི། འཕགས་པ་ཀླུའི་སྦྱིན་བདག་རྒྱལ་པོ་བདེ་སྤྱོད་བཟང་པོའི་བཙུན་མོ་ཐ་ཆུང་ཞིག་གིས་སྒྲའི་གནས་ཅུང་ཟད་ཤེས་པ་ལ། སྐྱེད་མོས་ཚལ་དུ་རྩེ་བའི་ཚེ་བཙུན་མོ་ལ་ཆུ་གཏོར་བས། བཙུན་མོས། མ་མོ་དཱ་ཀ་པིཉྩ་ཞེས། བདག་ལ་ཆུ་གཏོར་ཅིག་ཅེས་སྨྲས་པས། རྒྱལ་པོས་ལྷོ་ཕྱོགས་ཀྱི་ཡུལ་སྐད་དུ་འཁྲུལ་ནས། བལ་སྲན་གྱི་ཁུར་བ་ཏིལ་མར་དུ་བཙོས་པ་བྱིན་ཅིག་ཟེར་བར་གོ་སྟེ་བྱིན་པས། བཙུན་མོའི་བསམ་པར། བདག་གི་ཁྱོ་ག་འདི་ཅི་ཡང་མི་ཤེས་པའི་སྐྱེ་བོ་བ་ལང་ལྟ་བུ་ཞིག་གོ་བསམ་སྟེ། ལྕེབ་པར་བརྩམས་པས་རྒྱལ་པོས་བཟུང་སྟེ་སྒྲ་སློབ་པར་དམ་བཅས་ཏེ། བྲམ་ཟེ་མཆོག་སྲེད་ལས་ལེགས་པར་བསླབ་བོ། །འོན་ཀྱང་གོང་དུ་བཤད་པའི་མཆོག་སྲེད་ཀྱི་འགྲེལ་པ་ལ་ཡིད་མ་ཆེས་ཏེ། རྒྱལ་པོ་རང་གི་ཞང་པོ་ཤརྨ་ཝརྨ་སྟེ་འཚེ་བའི་གོ་ཆ་འམ། སརྦ་ཝརྨ་སྟེ་ཐམས་ཅད་གོ་ཆ་སྟེ། ཇོ་ནང་རྗེ་བཙུན་ལ་པ་ལ་བྷ་དྲས་སཔྟ་ཝརྨ་སྟེ་བདུན་པའི་གོ་ཆ་ཡིན་ཚུལ་ཞུས་ཡོད་འདུག་ཀྱང་བྱིངས་མདོའི་འགྲེལ་པའི་རྒྱ་དཔེ་སོགས་སུ་རྒྱ་དཔེ་གསུམ་ཙམ་མཚུངས་པར་ཤརྨ་ཝརྨ་ཞེས་ཡོད་པས་བོད་བླུན་ཁ་ཅིག་གིས་དབང་ཕྱུག་གོ་ཆ་ཞེས་ཟེར་བ་ནི་ནོར་བའོ། །དེ་ལ་གཞོན་ནུ་གདོང་དྲུག་སྒྲུབ་བཅུག་པས་ཤརྨ་ཝརྨས་ཀྱང་གཞོན་ནུ་གདོང་དྲུག་བསྒྲུབས་ནས་ཞལ་མཐོང་བས། དངོས་གྲུབ་ཅི་འདོད་གསུངས་པས། ཨིནྡྲ་བྱཱ་ཀ་ར་ཎ་ཤེས་པར་འཚལ་ཞུས་པས། སིདྡྷོ་ཝརྞ་པ་མཱཾ་ནཱ་ཡཿ ཞེས་གསུངས་པའི་མོད་ལ་ལྷའི་བྱིན་རླབས་ཀྱིས་སྒྲ་རིག་ཐམས་ཅད་དེ་མ་ཐག་ཏུ་ཤེས་པ་བྱུང་ངོ་། །དེ་ནས་ཤརྨ་ཝརྨས་སྒྲ་ཡི་གཞུང་རྣམས་ཀྱི་ལེགས་པའི་ཆ་ཤས་ཐམས་ཅད་བསྡུས་ནས་བསྟན་བཅོས་འདི་མཛད་པས་ཀཱ་ལཱ་པ་སཱུ་ཏྲ་སྟེ་ཆ་ཤས་བསགས་པའི་མདོ་ཞེས་གསུང་སོ། །དེ་ལྟར་ཡང་སློབ་ཕན་ལས། སློབ་དཔོན་སརྦ་ཝརྨ་དག་གི་འདོད་པ་འཇོ་བ་དག་སྐྱོང་བས་མཛད་པའོ། །ཞེས་གསལ་བར་བསྟན་ཏོ། །དེ་ནི་ཨིནྡྲ་བྱཱ་ཀ་ར་ཎའི་ལུགས་ཡིན་པར་བཞེད་དོ། །དེས་རང་གི་ཚ་བོ་རྒྱལ་པོ་བདེ་སྤྱོད་ལ་བསླབས་པས་ལེགས་སྦྱར་ལ་མཁས་པར་གྱུར། ཅེས་འཕགས་ཡུལ་བ་རྣམས་ཀྱི་ངག་སྒྲོས་རྣམ་པར་དག་པ་ལས་འབྱུང་ཞིང་། བོད་རྣམས་ཀྱིས་ཀུན་བཤད་རྐང་པ་བཞི་པ་ནི་ལྷས་གསུངས་པས། ལྷ་ཆོག་པར་འཚལ་ཞུས་པས་རྨ་བྱའི་ཁ་གྱེན་དུ་ཕྱོགས་པ་དང་། བསྟན་བཅོས་དེའི་མིང་གང་ལགས་ཟེར་རྒྱུར། ཤཱསྟྲ་ནཱ་མ་ཀི་ཧོ། ཞེས་དྲིས་པས། རྨ་བྱའི་མཇུག་སྒྲོ་ཁྲ་ཚུབས་ཀྱིས་སོང་བས་མིང་ཀཱ་ལཱ་པ་བཏགས་ཟེར་གྱིན་འདུག་ལ། ཀཱ་ལཱ་པ་ཞེས་པ་རྨ་བྱ་སྒྲོ་མདོངས་ཅན་ལ་འཇུག་པ་ཡིན་པས་དེ་སྐད་དུ་སྒྲོགས་སོ། །རང་ལུགས་ནི་སྔ་མ་དེ་ལྟར་འདོད་པ་ཡིན་ཞིང་། ཀཏནྟྲ་སྟེ་རྒྱུད་ཉུང་ངུའང་རབ་ཏུ་གྲགས་སོ། །དེ་ཡང་ཇི་སྐད་དུ། བགྲོད་དཀའ་སིཾ་ཧས། ཤརྨ་ཝརྨས་རྣམ་བཤད་པའི། །རྒྱུད་ཉུང་བ་དག་གིས་བཤད་པར་བྱ། །ཞེས་གསུངས་སོ། །འདིའི་ལུགས་ལ་ཀུན་བཤད་རྐང་པ་དྲུག་པ་ཕྱིན་ཆད་ནི་འཚེ་བའི་གོ་ཆས་བརྩམ་པར་འདོད་ཀྱང་ཇི་བཞིན་མ་ཡིན་ནོ། །མདོ་དེ་ལ་སློབ་དཔོན་དུ་རྒ་སིཾ་ཧས་བརྩམས་པའི་འགྲེལ་པ་དུ་སྲ་སིང་དང་། སློབ་དཔོན་གྲགས་འབྱོར་གྱིས་མཛད་པའི་སློབ་མ་ལ་ཕན་པ་དང་། སྤྱན་གསུམ་འབངས་ཀྱིས་དུར་སིང་གི་ཡང་འགྲེལ་བོད་དུ་འགྱུར་བར་གསུངས་ཀྱང་མ་མཐོང་ལ། ཁ་ཆེར་ཙྪ་ཏྲ་སྟེ་གསལ་བའི་གདུགས་སམ། རྒྱལ་པོའི་གདུགས་ཀྱིས་མཛད་པའི་འགྲེལ་པའང་བོད་དུ་འགྱུར་བར་གྲགས་ཀྱང་དེང་སང་མི་འདུག་ཅིང་། དེ་ལ་རིན་ཆེན་གདུགས་སུ་བསྒྱུར་བ་ནི་བླུན་གཏམ་མོ། །རི་སོགས་ཀྱི་བྱ་བ་སརྦ་དྷཱ་རས་མཛད་པ་དང་། མ་དྷི་ཀ་ནི་དང་། འཇམ་དཔལ་གྲགས་པས་མཛད་པའི་སི་སོགས་ཀྱི་མཐའ་དཔྱད་གཉིས་བོད་དུ་འགྱུར་ཀྱང་འགྱུར་སྐྱོན་ཤིན་ཏུ་ཆེ་བར་སྣང་། དུར་སིང་གིས་མཛད་པའི་རྒྱུད་ཉུང་གི་བྱིངས་མདོ་འདིའང་གུར་སྟོན་གྱིས་བསྒྱུར་ཀྱང་འགྱུར་སྐྱོན་ཆེ་བས། སླར་སི་ཏུ་རིན་པོ་ཆེས་བྱིངས་མདོའི་འགྲེལ་པ་འགྱུར་སྐབས་འགྱུར་བཅོས་ལེགས་པར་མཛད་དོ། །བོད་ཡུལ་འདིར་ཡང་ཀཱ་ལཱ་པའི་འཆད་ཉན་ཤིན་ཏུ་དར་བར་བྱུང་བས་བུ་སྟོན་དང་། ས་སྐྱ་བླ་མ་དམ་པ་དང་། ལོ་ཆེན་བྱང་རྩེ་དང་། ས་བཟང་འཕགས་པ་དང་། ཐུགས་རྗེ་དཔལ་དང་། བློ་བརྟན་བཞི་པ་དང་། སྟག་ཚང་ལོ་ཙཱ་བ་དང་། ཞྭ་ལུ་ལོ་ཆེན་དང་། ཀརྨ་པ་མི་བསྐྱོད་རྡོ་རྗེ་རྣམས་ཀྱི་འགྲེལ་པ་རྣམས་ཡོད་ཅིང་། དམ་དུམ་ཙམ་ནི་སྨོས་ཀྱིས་མི་ལངས་ལ། ཁྱད་པར། མིང་གི་མཚམས་སྦྱོར་གཙོར་སྟོན་མཚམས་སྦྱོར་རྐང་པ་ལྔ་སློབ་ཕན་ལས་དྲུག་ཏུ་བཤད། མིང་ལས་ཚིག་ཏུ་བསྒྲུབ་པ་མིང་གི་རྐང་པ་བཞི་སྟེ་མིང་བཞི་ཞེས་སོ་གསུངས། མིང་ལས་མིང་དུ་བསྒྲུབ་པ་ཚིག་སྡུད་དང་དེ་ཕན་ལ་མདོ་རྐང་པ་རེ་རེ་དང་། སློབ་ཕན་ལས་བུད་མེད་མདོ་རྐང་པ་གཅིག་བཅས་དང་། བྱིངས་ལས་ཚིག་ཏུ་བསྒྲུབ་པ་ཀུན་བཤད་རྐང་པ་བརྒྱད་དང་། བྱིངས་ལས་མིང་དུ་བསྒྲུབ་པ་ཀྲྀཏ་རྐང་པ་དྲུག་རྣམས་སུ་བཀྲལ་བའི་འགྲེལ་པ། ཀཱ་ལཱ་པའི་མདོ་ཡི་རྣམ་པར་བཤད་པ་ཟླ་བའི་འོད་ཟེར་ཞེས། རྒྱ་འགྲེལ་གཉིས་པ་སུ་པྲ་ཏི་དྲ་གི་མཐའ་དང་། མཛོད་འགྲེལ་སོགས་ལ་བརྟེན་ཅིང་སི་ཏུ་རིན་པོ་ཆེའི་ཞལ་ལུང་ལྟར་བཀོད་པའི་ལེགས་བཤད་རྨད་དུ་བྱུང་བ་ཞིག་༼༢༨༨༽སྣང་ཞིང་། དེའི་བརྒྱུད་རིམ་ཡང་། ལྷ་ཐམས་ཅད་མཁྱེན་པ། དྲང་སྲོང་ཕུར་བུ། གཞོན་ནུ་གདོང་དྲུག །སློབ་དཔོན་ཤརྨ་ཝརྨ། རྒྱལ་པོ་བདེ་སྤྱོད་བཟང་པོ། ཇོ་བ་གྲགས་འབྱོར། སློབ་དཔོན་ཙཱནྡྲ་གཽ་མི། སློབ་དཔོན་དྷརྨ་ནཱ་དཱ། མཁས་པ་རཏྣ་མ་ཏི། སློབ་དཔོན་གང་བའི་ཟླ་བ། འཆི་མེད་སེང་གེ །དེ་ཡན་ཆད་ནི་བོད་རྣམས་ཀྱི་ངག་སྒྲོས་དག་སྦྱོར་བ་ཡིན་ཞིང་། དེ་ནས་པཎ་ཆེན་ལཀྵྨཱི་ཀ་ར། ཤོང་ལོ་རྡོ་རྗེ་རྒྱལ་མཚན། ཤོང་ལོ་བློ་གྲོས་བརྟན་པ། ལོ་ཆེན་མཆོག་ལྡན་ལེགས་པའི་བློ་གྲོས། དཔང་ལོ་བློ་གྲོས་བརྟན་པ། ལོ་ཆེན་བྱང་ཆུབ་རྩེ་མོ། སྒྲ་བསྒྱུར་ནམ་མཁའ་བཟང་པོ། ལོ་ཆེན་ཐུགས་རྗེ་དཔལ། དཔལ་ལྡིང་ལོ་ཙཱ་བ་གྲགས་པའི་མཚན་ཅན། ཞྭ་ལུ་ཆོས་སྐྱོང་བཟང་པོ། དབོན་པོས་དཀར་ཆོས་སྐྱོང་། སྐྱོགས་སྟོན་ཀརྨ་ལོ་ཙཱ་བ་རིན་ཆེན་བཀྲ་ཤིས། དཔལ་ཁང་ལོ་ཙཱ་བ་དབྱངས་ཅན་སྙེམས་པའི་སྡེ། སྒང་ར་ལོ་ཙཱ་བ་འོད་ཟེར་མཚན་ཅན། སྨོན་འགྲོ་པཎྜི་ཏ་ཚེ་དབང་དོན་གྲུབ། འཇམ་དབྱངས་དབང་རྒྱལ་རྡོ་རྗེ། རྒྱལ་དབང་བློ་བཟང་རྒྱ་མཚོ། རྣམ་པཎ་དཀོན་མཆོག་ཆོས་གྲགས། ཆབ་མདོ་བྱམས་པ་གླིང་གི་མཁས་པ་ཀུན་དགའ་ལེགས་པ། ཟུར་མང་ཆེ་ཚང་སྤྲུལ་སྐུ་གསུང་རབ་རྒྱ་མཚོ། བླ་མ་རིན་པོ་ཆེ། དེས་པཎྜི་ཏ་ཚེ་དབང་ཀུན་ཁྱབ་ལ་གོ་དོན་དང་རི་མོ་ལན་གསུམ་བསྩལ་ཞིང་། སི་ཏུ་རིན་པོ་ཆེའི་མདུན་ནས་ཀྱང་ཙཱནྡྲ་པའི་ས་རིས་གོ་དོན་དང་བཅས་པ། མངོན་བརྗོད་ཀྱི་བསྟན་བཅོས་ཨ་མཱ་ར་ཀོ་ཤ་འགྲེལ་བཅས་ལན་གསུམ་བཞིར་ཞིབ་པར་ཞུས་ཤིང་། ཀཱ་ལཱ་པའི་གོ་དོན་དཀའ་གནས་ཀྱང་ལན་གཉིས་སུ་ལེགས་པར་ཞུས་པ་སྟེ། དེ་ལྟར་ཀཱ་ཙཱ་ན་གཉིས་ཆར་ཆུ་བོ་གཅིག་འདྲེས་ཀྱི་བརྒྱུད་པ་ནི། ཞྭ་ལུ་ལོ་ཆེན་ཆོས་སྐྱོང་བཟང་པོ། དབོན་པད་དཀར་ཆོས་སྐྱོང་། འབྲུག་པ་ལོ་ཙཱ་བ་སྤྱང་མོ་ངག་དབང་གྲགས་པ། ལོ་ཆེན་དབང་ཕྱུག་ཞབས། ལོ་ཆེན་སངས་རྒྱས་དཔལ་བཟང་། འབྲུག་པ་སངས་རྒྱས་རྡོ་རྗེ། ཀྱེ་རེ་ལོ་ཆེན་བསྟན་འཛིན་བཟང་པོ། ཀྱེ་རེ་ལོ་ཆུང་བཀྲ་ཤིས་རྣམ་རྒྱལ། ཀཿཐོག་རིག་པ་འཛིན་པ་ཚེ་དབང་ནོར་བུ། ཀུན་མཁྱེན་དྷརྨཱ་ཀ་ར། དེས་ཀརྨ་ཚེ་དབང་ཀུན་ཁྱབ་ལ་སྩལ་བའོ། །དམ་པ་འདི་ཉིད་ཀྱི་འགྲེལ་པ་བོད་སྔ་མ་དག་གིས་ཇི་བཞིན་མ་མཁྱེན་པ་དང་། རྩ་འགྲེལ་གྱི་འགྱུར་ནོར་བ་སོགས་ཀྱང་དཔྱད་གསུམ་དག་པས་བཅོས་སྣང་བར་ཤིན་ཏུ་ཚད་མའི་ཡུལ་ལོ། །དེ་ལྟར་ལེགས་སྦྱར་ཨུཏྤ་ལ། །རོལ་པའི་བསྟན་བཅོས་ཆུ་གཏེར་ཆེའི། །རླབས་ཕྲེང་སྲིད་འདིར་འཕེལ་བའི་ཚུལ། །ཉུང་ངུའི་ངག་གིས་འདོམས་པར་བྱས། །ཞེས་པའང་ངེས་པ་དོན་གྱི་པཎྜི་ཏ་ཚེ་དབང་ཀུན་ཁྱབ་ཀྱི་གསུང་ཇི་ལྟ་བར་གུད་དུ་བཀོལ་ཏེ་བྲིས་པ་སརྦ་ས་མནྟ་མངྒ་ལ་བྷ་བནྟུ།། །།ས་སྐྲྀ་ཏ་སྱ་ཤསྟྲ་ད་གི་ཀཱ་ལ་སརྦེ་ཥུ་པྲ་བརྡྡྷ་ཀུརྦནྟུ།། །།དགེའོ། །དགེའོ། །དགེའོ།། །།

[edit]

legs par sbyar ba'i bstan bcos kyi byung tshul cung zad bshad pa ngo mtshar zla zhun gsar ba'i 'dzum phreng / @#/_/legs par sbyar ba'i bstan bcos kyi byung tshul cung zad bshad pa ngo mtshar zla zhun gsar ba'i 'dzum phreng zhes bya ba bzhugs so/__/oM swasti sid+d+haM/__ngag gi rang bzhin ming tshig brjod pa'i sgo/__/smra ba kun gyi mchog gyur 'jam mgon dang /__/dbyer med dpal ldan bla mar gus btud nas/__/legs par sbyar ba'i byung tshul cung zad dbye/__/'di la gnyis/__thog mar lha yul du dar/__de nas mi yul du dar tshul lo/__/dang po ni/__sngon sarba dz+nya zhes pa'i sgra mkhas pa zhig byung bas/__des lha'i dbang po brgya byin dang /__drang srong phur bu la bslabs/__gnyis pa ni/__'dul ba lung nas shA ri'i bus dbang po'i brda sprod lo bcu gnyis su bslabs par gsungs shing /__rgyal po tsan+dan skyong gi skabs su bram ze in+d+ra b+hU ba zhes pas lha'i dbang po bsgrubs pas mthong ste sgra'i nges gnas gsungs te/__lha'i dbang pos bstan pa bzhin bris pa'i/__in+d+ra byA ka ra Na zhes pa brtsams shing /__bod kyi lha'i dbang pos brtsam par bshad pa yang der thug go__/gzhan yang stag rkang rigs kyi drang srong ma lhag nyi mas mdzad pa'i gzhung bcu pa zhes bya ba zhig yod pa sgra 'grel rnams su lung 'dren pa yang yod la/__drang srong tany+dza lis mdzad pa/__ba tany+dza li byA ka ra Na ste thal mo lhung gi brda sprod pa zhes pa'ang 'dul ba sogs las chur lhung gi rig pa zhes bshad pa'ang de yin te/__'di gnyis ni snga mo zhig nas yod par mngon no/__/'jam dpal rtsa rgyud nas lung bstan pa'i bram ze pA Ni nis mdzad pa'i pA Ni byA ka ra Na'i mdo brgyad pa zhes sh+lo ka stong yod pa dang /__bye brag 'byed pa'i mdo sh+lo ka stong yod pa mdzad cing /__de la dag 'byed zla ba'i 'grel pa zla zer zhes pa yod la/__'dar los bsgyur bar grags pa'i dpe 'di yang rgya dpe 'di la brten khul yin yang zla zer zhes pa'i ming yang ma shes 'dug go__/rgyal po bde byed kyis sgra slob pa'i phyir bram ze mchog sred kyis rig sngags kyi nus pas klu'i rgyal po lhag ma can bkug ste/__pA Ni'i 'grel pa sh+lo ka 'bum yod pa 'chad nyan byas pa'i skabs slob dpon dang klu'i bar yol bas bcad de gnas pa las/__skabs shig yol ba bteg nas bltas pas klu'i lus la sbrul chen po 'khyil ba mthong ste klu skyengs nas bros/__'grel pa sh+lo ka stong phrag lnga las ma zin/__lhag ma stong phrag bcu gnyis kyi tshad du longs pa brtsams bsam hA b+hA Sha zer/__gzhung 'grel pa dang bcas pa'i 'chad nyan da lta'i bar yod cing /__si tu rin po che'i zhal nas kyang glegs bam rnams gzigs tshul gsungs shing /__'grel pa de la 'chad nyan byed pa ma byung yang /__'grel pa kau mu dI'i steng nas/__ti ta b+huk+ta'i bram ze pra d+yum+pA ste rab stobs las legs par gsan zhing /__snga sor dgung lo nyer lnga'i steng du bal yul lho phyogs kyi paN+Di ta piSh+Nu pa ti khyab 'jug bdag po la 'grel pa bdud rtsi dang tshig zla'i steng nas a mA ra ko Sha'i dka' gnas thams cad legs par bslab pa yin ces gsungs/__de'i don 'grel du slob dpon tsAn+d+ra gau mis tsAn+d+ra byA ka ra Na skabs drug pa 'di mdzad cing /__slob dpon zla ba grags pas sa man+ta b+ha dra zhes pa'i sgra yi bstan bcos mdzad pa gzigs pas/__rang nyid kyi glegs bam khron par bsgyur bar grags pa'i sgra mdo kun bzang ste/__bai dkar sogs su/__su man+ta b+ha ra zhes bris nor ba de yin no/__/slob dpon a nu b+hU ti la dbyangs can mas dngos su bstsal ba'i sA ra sba tI byA ka ra Na ste mtsho ldan ma'i brda sprod pa zhes/__jo nang rje btsun gyis mdo gzhung bod skad du bsgyur nas 'grel pa gsar brtsams mdzad pa 'di la'ang ba la b+ha dras rdzun bshad zhus pa dang 'gyur nor pa'ang ci rigs 'dug ces kun mkhyen si tu rin po ches gsungs/__gzhan yang paN+Di ta sA d+hu kIrtis mdzad pa'i 'jam dpal dbyangs kyi brda sprod pa zhes lo chen chos skyong bzang pos 'gyur ba 'di/__bod rnams kyis dus 'khor gyi dbyangs gsal la brten nas 'jam dpal gyis mdzad pa zhig yod zer rgyu de'i 'khrul gzhi de yin nam snyam/__skyes bu mchog gis mdzad pa'i ma hA b+hA Sha rtsa 'grel gnyis yod pa'i rtsa ba zhwa lus pA Ni pa'i mdo yin rgyur mdzad nas bod skad du bsgyur ba 'di la 'dar los bsgyur ba'i ming btags byas pa yin 'dug__/phyi rol gyi paN+Di ta d+harma kirti zhes pas byas pa'i gzugs kyi 'jug pa zhes pa'i sgra gzhung zhig kyang 'dug pa de gnyis ka'i rgya dpe kun mkhyen si tu rin po che'i phyag khar bzhugs par snang /__drang srong shA ka Tas mdzad pa'i shA ka Ta yA na zhes pa'i brda sprod pa zhes dang /__drang srong ka ti'i bus byas pa'i brda sprod pa rnams 'phags yul du yongs su grags kyang bstan bcos rnams su lung drangs pa tsam las bod 'dir ma 'gyur ro/__/rgyal po ma nu dzen+d+ras mdzad pa'i mi skyes dbang po'i brda sprod pa dang /__drang srong pi sha lis mdzad pa'i pi sha li'i brda sprod pa zhes ba dag yod par bod rnams 'dod pa ni gang yin ma shes shing /__rgya gzhung rnams las ming tsam yang mi 'byung la/__tsAn+d+ra byA ka ra Na ni lha'i bu zla bas mdzad zer ba yang ji bzhin ma yin te 'phags yul du ye ma grags pa'i phyir ro/__/spyir yang grags chen sgra mdo chen po brgyad kyi grangs 'dren pa ni bod rnams kyi gsar spros las 'phags yul du de lta bu'i grangs nges byed pa kun tu ma grags so/__/spyir legs sbyar gyi gzhung dang bstan bcos bsam gyis mi khyab pa'i phyir/__de ltar yang bod yul 'dir rna ba'i lam du ma grags pa'i dpal sgra yi rgya mtsho zer ba'i rnam dbye'i mtha' dpyod kyi bstan bcos chen po zhig dang /__shab+da mi mam+pa zer ba'i sgra spyi yi mtha' dpyad kyi bstan bcos shin tu rgyas pa zhig kyang yod ces bla ma mchog gis si tu rin po ches gsungs shing /__yang spel byed kyis byas pa'i bya byed las gsum sogs byed rkyen drug gi rnam bshad 'grel pa la mkhas pa zhes dang /__mchog sred kyis mdzad pa'i rtags kyi bstan bcos gnyis kun mkhyen si tu rin po ches bsgyur ba dang /__de zhabs kyi phyag tu rgya dpe yod rigs kyang /__ba ma ha ste mi'u thung gi mngon brjod/__mngon brjod kyi bstan bcos me dI nI ka ra dang /__sna tshogs gsal ba dang /__ha tA pA lI dang /__drag po 'bangs kyis sbyar ba'i mngon brjod dang /__'byor 'phel gyis byas pa'i tshig sdud kyi snying po dang /__'chi med mdzod kyi 'grel ba byA khyA su d+hA ste/__rnam bshad bdud rtsi dang /__pA da tsan+d+ri kA ste tshig gi zla ba rnams bzhugs shing /__gzhan yang /__kau mu dI zer ba'i sgra mdo zhig byang phyogs gu dzi ra tha sogs su chos dar bar yod ces jo nang sgrol mgon gyis gsungs 'dug pa de dang /__paN+Di ta b+haT+Ta?s mdzad pa'i ma d+h+ya kau mo di zer ba zhig dang /__dbang phyug chen po'i DA ma ru'i sgra las byung bar grags pa'i/__sid+d+hi kau mo dI ste/__rtag pa'i zer te zla zer rnam pa gsum yod ces bal po paN+Di ta kun bzang gis zer gyin 'dug go__/khyad par kA lA pa'i byung tshul ni/__'phags pa klu'i sbyin bdag rgyal po bde spyod bzang po'i btsun mo tha chung zhig gis sgra'i gnas cung zad shes pa la/__skyed mos tshal du rtse ba'i tshe btsun mo la chu gtor bas/__btsun mos/__ma mo dA ka piny+tsa zhes/__bdag la chu gtor cig ces smras pas/__rgyal pos lho phyogs kyi yul skad du 'khrul nas/__bal sran gyi khur ba til mar du btsos pa byin cig zer bar go ste byin pas/__btsun mo'i bsam par/__bdag gi khyo ga 'di ci yang mi shes pa'i skye bo ba lang lta bu zhig go bsam ste/__lceb par brtsams pas rgyal pos bzung ste sgra slob par dam bcas te/__bram ze mchog sred las legs par bslab bo/__/'on kyang gong du bshad pa'i mchog sred kyi 'grel pa la yid ma ches te/__rgyal po rang gi zhang po sharma warma ste 'tshe ba'i go cha 'am/__sarba warma ste thams cad go cha ste/__jo nang rje btsun la pa la b+ha dras sap+ta warma ste bdun pa'i go cha yin tshul zhus yod 'dug kyang byings mdo'i 'grel pa'i rgya dpe sogs su rgya dpe gsum tsam mtshungs par sharma warma zhes yod pas bod blun kha cig gis dbang phyug go cha zhes zer ba ni nor ba'o/__/de la gzhon nu gdong drug sgrub bcug pas sharma warmas kyang gzhon nu gdong drug bsgrubs nas zhal mthong bas/__dngos grub ci 'dod gsungs pas/__in+d+ra byA ka ra Na shes par 'tshal zhus pas/__sid+d+ho war+Na pa mAM nA yaH__zhes gsungs pa'i mod la lha'i byin rlabs kyis sgra rig thams cad de ma thag tu shes pa byung ngo /__/de nas sharma warmas sgra yi gzhung rnams kyi legs pa'i cha shas thams cad bsdus nas bstan bcos 'di mdzad pas kA lA pa sU tra ste cha shas bsags pa'i mdo zhes gsung so/__/de ltar yang slob phan las/__slob dpon sarba warma dag gi 'dod pa 'jo ba dag skyong bas mdzad pa'o/__/zhes gsal bar bstan to/__/de ni in+d+ra byA ka ra Na'i lugs yin par bzhed do/__/des rang gi tsha bo rgyal po bde spyod la bslabs pas legs sbyar la mkhas par gyur/__ces 'phags yul ba rnams kyi ngag sgros rnam par dag pa las 'byung zhing /__bod rnams kyis kun bshad rkang pa bzhi pa ni lhas gsungs pas/__lha chog par 'tshal zhus pas rma bya'i kha gyen du phyogs pa dang /__bstan bcos de'i ming gang lags zer rgyur/__shAs+t+ra nA ma ki ho/__zhes dris pas/__rma bya'i mjug sgro khra tshubs kyis song bas ming kA lA pa btags zer gyin 'dug la/__kA lA pa zhes pa rma bya sgro mdongs can la 'jug pa yin pas de skad du sgrogs so/__/rang lugs ni snga ma de ltar 'dod pa yin zhing /__katan+t+ra ste rgyud nyung ngu'ang rab tu grags so/__/de yang ji skad du/__bgrod dka' siM has/__sharma warmas rnam bshad pa'i/__/rgyud nyung ba dag gis bshad par bya/__/zhes gsungs so/__/'di'i lugs la kun bshad rkang pa drug pa phyin chad ni 'tshe ba'i go chas brtsam par 'dod kyang ji bzhin ma yin no/__/mdo de la slob dpon du rga siM has brtsams pa'i 'grel pa du sra sing dang /__slob dpon grags 'byor gyis mdzad pa'i slob ma la phan pa dang /__spyan gsum 'bangs kyis dur sing gi yang 'grel bod du 'gyur bar gsungs kyang ma mthong la/__kha cher ts+tsha tra ste gsal ba'i gdugs sam/__rgyal po'i gdugs kyis mdzad pa'i 'grel pa'ang bod du 'gyur bar grags kyang deng sang mi 'dug cing /__de la rin chen gdugs su bsgyur ba ni blun gtam mo/_/ri sogs kyi bya ba sarba d+hA ras mdzad pa dang /__ma d+hi ka ni dang /__'jam dpal grags pas mdzad pa'i si sogs kyi mtha' dpyad gnyis bod du 'gyur kyang 'gyur skyon shin tu che bar snang /__dur sing gis mdzad pa'i rgyud nyung gi byings mdo 'di'ang gur ston gyis bsgyur kyang 'gyur skyon che bas/__slar si tu rin po ches byings mdo'i 'grel pa 'gyur skabs 'gyur bcos legs par mdzad do/__/bod yul 'dir yang kA lA pa'i 'chad nyan shin tu dar bar byung bas bu ston dang /__sa skya bla ma dam pa dang /__lo chen byang rtse dang /__sa bzang 'phags pa dang /__thugs rje dpal dang /__blo brtan bzhi pa dang /__stag tshang lo tsA ba dang /__zhwa lu lo chen dang /__karma pa mi bskyod rdo rje rnams kyi 'grel pa rnams yod cing /__dam dum tsam ni smos kyis mi langs la/__khyad par/__ming gi mtshams sbyor gtsor ston mtshams sbyor rkang pa lnga slob phan las drug tu bshad/__ming las tshig tu bsgrub pa ming gi rkang pa bzhi ste ming bzhi zhes so gsungs/__ming las ming du bsgrub pa tshig sdud dang de phan la mdo rkang pa re re dang /__slob phan las bud med mdo rkang pa gcig bcas dang /__byings las tshig tu bsgrub pa kun bshad rkang pa brgyad dang /__byings las ming du bsgrub pa kr-ita rkang pa drug rnams su bkral ba'i 'grel pa/__kA lA pa'i mdo yi rnam par bshad pa zla ba'i 'od zer zhes/__rgya 'grel gnyis pa su pra ti dra gi mtha' dang /__mdzod 'grel sogs la brten cing si tu rin po che'i zhal lung ltar bkod pa'i legs bshad rmad du byung ba zhig (288)snang zhing /__de'i brgyud rim yang /__lha thams cad mkhyen pa/__drang srong phur bu/__gzhon nu gdong drug__/slob dpon sharma warma/__rgyal po bde spyod bzang po/__jo ba grags 'byor/__slob dpon tsAn+d+ra gau mi/__slob dpon d+harma nA dA/__mkhas pa rat+na ma ti/__slob dpon gang ba'i zla ba/__'chi med seng ge__/de yan chad ni bod rnams kyi ngag sgros dag sbyor ba yin zhing /__de nas paN chen lak+Sh+mI ka ra/__shong lo rdo rje rgyal mtshan/__shong lo blo gros brtan pa/__lo chen mchog ldan legs pa'i blo gros/__dpang lo blo gros brtan pa/__lo chen byang chub rtse mo/__sgra bsgyur nam mkha' bzang po/__lo chen thugs rje dpal/__dpal lding lo tsA ba grags pa'i mtshan can/__zhwa lu chos skyong bzang po/__dbon pos dkar chos skyong /__skyogs ston karma lo tsA ba rin chen bkra shis/__dpal khang lo tsA ba dbyangs can snyems pa'i sde/__sgang ra lo tsA ba 'od zer mtshan can/__smon 'gro paN+Di ta tshe dbang don grub/__'jam dbyangs dbang rgyal rdo rje/__rgyal dbang blo bzang rgya mtsho/__rnam paN dkon mchog chos grags/__chab mdo byams pa gling gi mkhas pa kun dga' legs pa/__zur mang che tshang sprul sku gsung rab rgya mtsho/__bla ma rin po che/__des paN+Di ta tshe dbang kun khyab la go don dang ri mo lan gsum bstsal zhing /__si tu rin po che'i mdun nas kyang tsAn+d+ra pa'i sa ris go don dang bcas pa/__mngon brjod kyi bstan bcos a mA ra ko sha 'grel bcas lan gsum bzhir zhib par zhus shing /__kA lA pa'i go don dka' gnas kyang lan gnyis su legs par zhus pa ste/__de ltar kA tsA na gnyis char chu bo gcig 'dres kyi brgyud pa ni/__zhwa lu lo chen chos skyong bzang po/__dbon pad dkar chos skyong /__'brug pa lo tsA ba spyang mo ngag dbang grags pa/__lo chen dbang phyug zhabs/__lo chen sangs rgyas dpal bzang /__'brug pa sangs rgyas rdo rje/__kye re lo chen bstan 'dzin bzang po/__kye re lo chung bkra shis rnam rgyal/__kaHthog rig pa 'dzin pa tshe dbang nor bu/__kun mkhyen d+harmA ka ra/__des karma tshe dbang kun khyab la stsal ba'o/__/dam pa 'di nyid kyi 'grel pa bod snga ma dag gis ji bzhin ma mkhyen pa dang /__rtsa 'grel gyi 'gyur nor ba sogs kyang dpyad gsum dag pas bcos snang bar shin tu tshad ma'i yul lo/__/de ltar legs sbyar ut+pa la/__/rol pa'i bstan bcos chu gter che'i/__/rlabs phreng srid 'dir 'phel ba'i tshul/__/nyung ngu'i ngag gis 'doms par byas/__/zhes pa'ang nges pa don gyi paN+Di ta tshe dbang kun khyab kyi gsung ji lta bar gud du bkol te bris pa sarba sa man+ta mang+ga la b+ha ban+tu//_//sa skr-i ta s+ya shas+t+ra da gi kA la sarbe Shu pra bar+d+d+ha kurban+tu//__//dge'o/__/dge'o/__/dge'o//__//