JKW-KABUM-17-TSA-002-051

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 17, sde tshan 2, Text 51, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 17: . Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

51 424-434	ཡང་མན་ངག་ཉེར་མཁོ་སྣ་ཚོགས་སྐོར། yang man ngag nyer mkho sna tshogs skor Medicine Texts - gso ba rig pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཡང་མན་ངག་ཉེར་མཁོ་སྣ་ཚོགས་སྐོར། མན་ངག་ཉེར་མཁོ་སྣ་ཚོགས་སྐོར་ལས། འབྲུམ་བ་དཀར་པོར་འགྱུར་ཐབས་སི་ཏུའི་འབྲུམ་བཅོས་ལས་བཤད་པ་དེ་རང་གིས་ཡོང་། བསེ་འབྲས་ཀྱི་འབྲུམ་སྲུང་དཔྲལ་བར་བཙུག་སྐབས་རྨ་འབྱུང་བ་འཕྲུགས་མི་ཉན། ། ༈ འབྲོང་མཁྲིས་ཀྱི་སྐྲ་ལོ་སྐྱེ། མཚོན་མཐིང་ཁོང་དུ་སོང་ནས་སྐྱུགས་པ་ལ་ཤ་བསྲེགས་པས་ཕན། རོ་ཐལ་དང་ཕུག་རོན་ཁྲག་གིས་མཛེར་པ་ལ་ཕན། རྟ་ཁྲག་དྲོན་མོས་ཀྱང་ཕན་ངེས། ར་གསེབ་པགས་པས་འདྲེ་ཤིག་སྲུངས། ཤིང་ཀྲི་བའི་འབྲས་བུས་ཀྱང་མཛེར་པ་ལ་ཕན། མགོ་ཆག་དང་རྨ་སྨན་རིགས་གང་ལའང་གསེར་ཐུར་རྒྱལ་མོ་དང་། རྨ་ཆེ་ཆུང་གང་ལའང་བྲག་ལྕམ་མེད་ཐབས་མེད། ཁྱི་དུག་གསང་སྨན་གཡའ་ནག་སྟང་ཟིལ་དང་། མཆོག་ཏུ་ཟབ་པ་འབུ་ཁྱི་ཟེར་བ་དེ་ཡིན། འདིའི་ཚབ་ལུག་ངལ་གྱི་འབུ་དེས་ཀྱང་རུང་ཟེར། འབྲས་ཀྱི་གསང་སྨན་རྟ་ཚེར་ཡིན། ལིང་ཏོག་ལ་ནི་རྨཱ་ལ་བླུགས། ཞིམ་ཐིག་གི་ཕྱེ་མ་རེངས་བུར་སྦྱར་བས་ལེན། ནཱི་ལ་ཐོ་ཐས་ལོན་ངེས་ཀྱང་གཞན་ལ་རེག་མི་ཉན། རྟ་ཟོག་རྩ་དུག་ལ་བེ་ཁྲག་གིས་ཕན་ཆེ། ལྷོག་པ་ལ་དང་པོ་སྐྱེར་ཤུན་ཐང་བཏང་། ཕྱི་ནས་དཀར་གསུམ་བྱུགས། དེ་རྗེས་གླང་ཆེན་སྨྱོན་པ་དང་། །ཁྱུང་ལྔ་མཉམ་སྦྱོར་བཏང་། དམར་ཆེན་རྡོ་རྗེ་ཕ་ལམ་ཟབ། ཕོ་ཐོག་ལ་ཟས་སྤྱོད་སྨན་དཔྱད་དྲོད་དང་། མགུལ་འགགས་བསིལ་ཤས་ཆེ་བས་བཅོས། མིག་གི་འགྲིབ་རྩ་ཕྱི་མ་གཅོད་ལུགས། མིག་ཟུར་ནས་ཕྱིར་ཚོན་གང་སར་བཙག་བུས་གཤགས། ལྕགས་ཀྱུས་དཀྲུགས་པས་རྩ་ཞིག་དོན་སོང་། དེ་སྲན་མ་ཟ་དུས་འགུལ་ཞིང་། མདོག་སྐྱ་ན་དེ་མི་བཅད། མི་འགུལ་ཞིང་མདོག་སེར་པོ་ཞིག་ཡོད་པས་དེ་བཅད། ཤུལ་ཚུག་གིས་མནན། ཤ་གདན་མ་བསྣད་པ་གལ་ཆེ། རྟ་ཤུ་ལ་རྟ་ཡི་སློ་དྲོན་ནམ། སྲབ་མདུད་གཏུགས་ཀྱང་ཕན་པ་ལག་བླངས། རྒྱ་ཐོར་ལ་འོལ་མོ་སེ་གཅིག་པུ་བྱུགས་པས་ཕན་ཟེར། འབམ་གྱི་གསང་སྨན་ནི་གུར་ཏིག འདི་མཁྲིས་པཀྵཡ་ཟབ། ཀྲྀ་ཎཾ། འབམ་པོ་རྣམས་ཡིན། ཁྲོག་ཆུང་ནི་དཀོན་པ་གབ་སྐྱེས་ཏེ་ཁྲག་ཆོད་ཆིག་སྡུམ། མཛེར་སྡུམ་གྱིས་དྲེག་ལ་འབྱར་བྱས་པས་ཕན། གཡའ་རུག་ཞེས་པ་ཧོང་ལེན་ཡིན། ལྷོག་པའི་གསང་སྨན་དུག་ཆུག་གམ་ཏའུ་ཆུང་ངམ་ཨ་བྲའི་ཉུང་མ་ཟེར་བ་དེ་ཡིན། སྟོད་འཚང་ལ། ལུས་གནད་རྣམ་སྣང་ཆོས་བདུན་དང་ལྡན་པར་བྱས། ནད་ཐམས་ཅད་སྙིང་གར་ཧ་ཡིག་ནག་པོ་ཞིག་ལ་བསྡུས་ནས་གཟེར་སར་བསྒོམས། ནམ་མཁའི་མཐོང་དུ་ཨཿདཀར་པོ་ཞིག་བསམ། ཧ་ཞེས་བརྩེགས་མར་བརྗོད་ལ་ལག་པ་གཉིས་བསྒྲད། དམིགས་པ་ཧ་དེ་སྙིང་ཁ་ནས་བརྒྱུད། ནམ་མཁའི་ཨཿལ་ཐིམ་པར་བསམ་ནས་མི་དམིགས་པའི་ངང་དུ་བཞག །འདི་ལ་དམིགས་པ་བཀའ་རྒྱ་མ་ཟེར་གསུངས། རཀྴའི་ཕྲེང་བས་མིག་ལ་གནོད། ཤིང་དངར་གྱིས་དངུལ་ཆུའི་དུག་ལ་ཕན། ས་མུ་དྲ་ཕ་སྒོག་པ་དང་མཉམ་དུ། ལ་ཁར་བཟུང་བས་དངུལ་ཆུའི་སོ་ནད་མི་འབྱུང་། རྐང་པ་སྦྲིད་པ་ལ་གོ་ལྡོག་མིག་ལ་མཆིལ་མ་བྱུགས་པས་ཕན། ཅོང་ཞི་འོ་མ་དང་སྦྱར་བའམ། དབང་ལག་བ་འོ་དང་སྦྱར་བ་ཟླ་ཕྱེད་བསྟེན་པས་ཤ་མདངས་ཟླ་བ་ལྟར་འགྱུར། སོ་འབམ་ལ་སོ་ཕག་གོ་ཡུའི་ཐང་གིས་ཕུལ། གླང་ཐབས་ལ་སྲོག་ཆགས་ནག་པོ་ཀོག་པ་ཅན་གཏོང་། ར་གསེབ་ཁྲག་བླུད། ཅིས་ཀྱང་མ་ཕན་ན་ལང་རྩ་གཏར། སྨན་ཟླ་ཤེལ་དང་། གཡུ་དྲིལ། ཕན་པ་ཀུན་ལྡན་རྣམས་ཟབ། རྐང་ལག་འགྱུར་བ་ལ་བུ་མོ་སྟག་ལོ་མས་སོ་བཏབ་པས་ཕན། རྟ་ཟོག་རྩ་དུག་ན་བ་ལ། རྔ་སྙིང་སོ་ཡིས་ཁྲག་མ་བྱུང་བར་འཛིན་པས་ཕན་ངེས། རྐང་ནད་ལ་གུར་གུམ་བཅོ་བརྒྱད་ཟབ། མེས་ཚིགས་ཚབ་ཆུང་ལ་སྤྱིན་བསྐུས་བས་ཆུ་བུར་འཕྲལ་དུ་འབྱུང་ཞིང་ཕན། ཁྱི་རུས་ཚིག་ཡག་མ་རེད་པའི་ཕྱེ་མ་པར་བུར་བཅངས། ཕག་ཚིལ་དང་སྦྱར་ནས་བྱུགས་པས་ཀྱང་ཕན། སོ་བརྡུངས་པ་སོགས་ཀྱིས་འགུལ་ན་གཟེ་མའི་རྩ་བ་མེར་བསྲེགས་ཐལ་བྱུགས། བྱིས་པ་མཚན་ངུས་བྱེད་པ་ལ་མར་མེའི་རོས་ཐོ་སླར་ཡང་བསྲེགས་པ་ནུ་མར་བྱུགས་པས་ཕན། ཕག་བྲུན་བསྲེགས་ཐལ་བོང་བུའི་གཅིན་དང་སྦྱར་ནས་སྣར་བླུགས་ན་ཡམ་ཀླད་གཟེར་ལ་ཕན། ཀ་རཉྫ་བ་འོར་བཏབ་པས་ཁོང་སྲིན་དང་གཞང་སྲིན་ལ་ཕན། ཤ་འབྲས་དང་བྱེ་མ་ཀ་ར་ཞིབ་བཏགས་ཞོ་དང་སྦྱར་ན་ཚད་འཁྲུ་གཅོད། མགྲོན་བུ་བསྲེགས་ཐལ་ནུ་ཞོ་དང་སྦྱར་བས་རྣ་བའི་རྣག་ཁྲག་ཆོད། སྐྱུ་རུ་ར་ཨ་རག་གི་ནང་དུ་སྦངས་པའི་ཁུ་བས་བྱུགས་ན་སྐྲ་ཚན་ཆེ། ཕུར་མོང་ནག་པོ་ཤ་ཡི་གསེབས་ལ་བརྫོང་བས་འབུ་མི་འབྱུང་ཞིང་ཤིང་ཀུན་གྱི་དྲི་མས་ཀྱང་ཐུབ་བོ། །ལ་ལ་ཕུད་མེར་བསྲེགས་པའི་དུ་བ་ཁར་གཏོང་ན་སོ་སྲིན་ལ་ཕན། གཉན་འབུར་གྱིས་སྐྲངས་པ་ལ་བ་ལྕི་རློན་པ་སྣུམ་བསྲེས་པའི་སྐྱོ་མ་དྲོན་མོ་བྱུགས། དེ་རས་ཀྱིས་བསྡམས། གྲང་བ་དང་ཡང་ཡང་བརྗེ་བ་སོགས་བྱས་པས་མྱུར་དུ་རྣག་ཏུ་སྨིན། དེ་བརྟོལ་བ་སྒ་སེར་མེར་བསྲེགས་པ་ཆུར་བརྔར་ལ་གང་བརྡོལ་སར་བུག་པ་ཆེ་ཆུང་ཇི་ལྟར་འདོད་པའི་རྒྱར་ཡང་བྱུགས་པས་མྱུར་དུ་བརྟོལ་ངེས་སོ། །སྤྲ་ཚིལ་བཞུ་སྟེ་རས་ལ་བཙགས། དེ་སྟེང་བ་མར་བཙག་བླུགས་ཏེ་དཀྲུགས་པ་བྱུགས་ན་རྐང་ལག་གས་པ་ལ་འཕྲལ་དུ་ཕན་པ་མྱོང་གྲུབ། རྡོ་ཐལ་ཆུ་ལ་སྦྱངས་པ་དང་སོ་ཕག་རྙིང་པ་གཉིས་བསྲེགས་པའི་ཁུ་བ་གང་རུང་གི་གདུས་ཐང་གཏོང་བས་ཉྭ་ལོག་འཁྲུ་སྐྱུགས་ཀྱིས་སྐྱུགས་པ་སོགས་སྐྱུགས་པའི་རིགས་ཐམས་ཅད་གཅོད། རི་སྒོག་རྩ་རྩེ་མ་རྙིང་མ་རུལ་པ་གྲིབ་སྐམ་བྱས་ལ་ཞིབ་པར་བཏགས་པ་མར་གསར་པས་རྟ་བྱས་ནས་རིལ་བུ་སྐྱུ་རུ་ར་ཙམ་གཏོང་ན་གྲང་རླུང་གི་རིགས་མཐའ་དག་ལ་ཕན། ལུས་སྟོབས་བསྐྱེད། འདོད་པ་མཆོག་ཏུ་སྤྱོད་ནུས་པར་འགྱུར་རོ། །དེ་ཉིད་སྦྲང་རྩིས་རྟ་བྱས་ནས་གཏོང་ན་བུད་མེད་ཟླ་མཚན་མ་བབས་པའི་ཁྲག་ནད་ལ་ཕན་ནོ། །ཆུ་གྲང་གིས་རྟ་བྱས་ནས་སྣར་བླུགས་ན་སྣ་ཁྲག་ཅིས་ཀྱང་མ་ཆོད་པ་ཆོད་པར་འགྱུར་རོ། །ཡང་སྣ་ཁྲག་ཀྱང་འཛག་ཅིང་མགོ་བོ་ན་ན། རི་སྒོག་གི་འབྲས་བུ་བཙག་བཅད་པའི་མར་ཁུའི་ནང་དུ་མ་ཚིགས་བར་བཙོས་པ་དང་། པི་ལིང་ཆ་མཉམ་ཞིབ་པར་བཏགས་ལ་དུས་རེར་ཐུན་ཚད་གསུམ་རེ་ཙམ་གཏོང་བས་ཁྲག་ཆོད་ཅིང་ནད་ཀྱང་ཕན་ནོ། །ཞུམ་བུའི་ལྕེ་གྲིབ་སྐམ་བྱས་ལ་ཞིབ་པར་བཏགས་ལ་སེ་བ་བཅུ་དྲུག་ཙམ་རེ་གཏོང་ན་མ་ཡི་ཁོང་ནས་སྨྲ་མི་ཤེས་པའི་ལྐུགས་པ་ཁ་ཕྱེ་བར་འགྱུར་ཞིང་། དབང་པོ་ཡང་གསལ་བར་འགྱུར་རོ། །ཞུམ་བུའི་ཁྲག་མ་རུལ་བ་གྲིབ་སྐམ་ཞིབ་བཏགས་མིག་ལ་བཏབ་པས་ཤ་འཛེར་ལིང་ཏོག་སོགས་མིག་ནད་ཐམས་ཅད་ལ་ཕན་ནོ། །མགོ་བོའི་ནད་སྨན་གང་གིས་ཀྱང་མི་ཕན་པ་ལ་ཞུམ་བུའི་པགས་པའི་ཞྭ་གྱོན་ན་ཕན་པར་ངེས་སོ། །སྐྲ་དང་ཁ་སྤུ་སོགས་མེད་པར་འདོད་ན་ཐོག་མར་ལེགས་པར་བཞར། དེ་ནས་ཕ་ཝཾ་གི་ཀླད་པས་བསྐུ་མཉེ་ཐེངས་གསུམ་ཙམ་རེ་བྱས་ན་ཕྱིས་མི་སྐྱེ་བར་ངེས་སོ། །ཕ་ཝང་གི་ཕྲུ་གུའི་རོ་མ་མེར་བསྲེགས་ཐལ་མིག་ལ་བྱུགས་ན་སྟོང་འགྲིབ། བར་འགྲིབ། ཤ་འཛེར། ལིང་ཏོག །སྐྲངས་པ་སོགས་མིག་ནད་ཐམས་ཅད་ལ་ཕན་ནོ། །སྦྲུལ་གྱི་ལྤགས་པ་མེར་བསྲེགས་ཐལ་གྱིས་མིག་དམར་པོར་འོང་ཞིང་ན་བ་ལ་ཕན་ནོ། །རྔ་བོང་ཀླད་པ་སེ་བ་བཅུ་དྲུག་ཙམ་རེ་ཁོང་དུ་གཏོང་ན་རླུང་གི་ནད་ཐམས་ཅད་ལ་ཕན་ཞིང་མིག་ཤེད་ཆུང་བའང་ཆེ་བར་འགྱུར་རོ། །སྦྲུལ་དང་བྱི་ལའི་ཁྲག་བསྲེས་པ་སྣ་མདོག་དམར་པོར་འགྱུར་ཞིང་ཟ་འཕྲུག་གིས་ན་བ་ལ་མྱུར་དུ་ཕན་ནོ། །རྔ་བོང་གི་སྤུ་མེར་བསྲེགས་ཐལ་སྣ་བུག་ཏུ་བཏབ་ན་སྣ་ཁྲག་ཆོད་པར་འགྱུར་རོ། །གོ་ཐལ་བསྲེགས་ཐལ་ཀྱང་དེ་དང་འདྲའོ། །ཆུ་བལ་སྔོན་པོ་སྤྱི་བོར་བཀབ་ཀྱང་ངོ་། །མཁན་པའི་དུག་བྱས་ན་ཕོ་ལོང་སྦོ་འཁྲོག་མྱུར་དུ་ཞི་བར་འགྱུར་རོ། སྤ་ཡག་པས་སྐྲངས་པ་དང་རྨ་ལ་ཕན་པ་ཉིད་དོ། །དཔྱད་ཀྱི་རིམ་པ་ལ། ཚིགས་པ་དྲུག་པའི་ཕན་ཚུན་སོར་བཞི་རེ་གཞལ་སར་རྩ་ཧྲང་ངེ་ཡོད་པ་དེའི་ནང་འདེབས་སུ་མེ་བཙའ་བཞག་པས་རླུང་ཁྲག་གིས་མགོ་བོ་ན་བ་དང་རྩ་དཀར་ལ་ཕན། བཅོ་བརྒྱད་པའི་གཡས་གཡོན་དུ་སོར་གསུམ་རེ་གཞལ་བ་དང་། བཅོ་བརྒྱད་པ་རང་སྟེ་ཁ་གསུམ་དུ་བཞག་པས་རླུང་། གྲང་བ། རྐེད་པ་ན་བ། མཁལ་རྩ་བྲལ་བ་རྣམས་ལ་ཕན། ཚིག་པ་ལྔ་པ། དྲུག་པ། བདུན་པ། གསུམ་དང་། མདུན་གྱི་དཀར་ནག་མཚམས་སུ་མེ་བཙའ་རེ་བཞག་པས་ཁྲག་མཁྲིས་བྲང་ཚ་བ་དང་། སྟོད་ན་བ་སོགས་ལ་ཕན། སྟོད་འཚང་ལ་དེ་སྟོང་སྐེ་སྟེང་ཅ་ར་ཁུག་ཏུའང་གཅིག་བཞག་པས་ཕན། ལྷེན་ལྷེན་རྩེ་དབུས་སུ་བཞག་པའི་རྒྱ་གྲམ་སོར་གསུམ་བསྲེགས་པས་མཁྲིས་པ་བད་ཀན་མཆིན་སྐྲན་རླུང་རྣམས་ལ་ཕན། མེ་ཉམས་གསང་གི་གཡས་གཡོན་ཚོན་རེར་ཚུགས་རེ་བཞག་པས་རླུང་ཁྲག་དང་ཁྲག་སྐྲན་ལ་ཕན། པུས་མོར་ཚིགས་ཆུ་འཁོར་ན་མེ་ལོང་རུ་བཞིར་ཚུགས་རེ་བཞག་པས་ཁྲག་རླུང་དང་ཆུ་སེར་སོགས་སེལ་ཞིང་ཁྱད་པར་བརྐྱང་བསྐུམ་མི་ཐུབ་པ་ལ་ཕན། ཟས་འགྲངས་ལྟོག་མ་སྙོམས་པའི་མ་ཞུ་གླང་ཐབས་ལ་མཐིལ་ བཞིར་ལྕགས་ལེབ་མེ་ལ་དམར་པོར་སོང་བའི་འོད་མ་རེག་ཙམ་དང་། རས་ཀྱིས་དར་བ་བྱུགས་པ་རེས་འཇོག་ཏུ་བྱས་པས་དྲི་ཤིན་ཏུ་ངན་པ་ཞིག་དོན་ཡོང་ཞིང་དེས་མྱུར་དུ་ཕན་པར་འགྱུར་རོ། །ཉྭ་ལོག་འཁྲུ་སྐྱུགས་ཀྱི་ནད་ལ་ཞག་བཞི་ཚུན་དུ་མཁྲིག་མ་གཉིས་སམ། དེ་འོག་བསྒྲད་མཁྱིད་གང་གིས་དཔུང་འོག་གི་ཉྭ་གཉིས། སོག་པའི་མཐིལ་གཉིས་བརླའི་ནང་གི་ཉྭ་གཉིས། བྱིན་དཀྱིལ་གྱི་ཉྭ་གཉིས་རྣམས་ལ་ལྕགས་མདའ་སོར་གསུམ་པ་ཞིག་གིས་སེར་མདོག་ཐོན་ཙམ་བསྲེགས་པས་ཕན་ཞིང་ཚབ་ཆེན་ལྟག་ཁུང་སྤུ་འཁྱིལ་གྱི་ཐད ་ཀྱི་ལྟག་པའི་ཆུ་ལེབ་གཉིས་དང་། རྐང་མཐིལ་གཉིས་བསྲེགས་ན་དེས་ཕན་ངེས་སོ། །སྔར་སྤྱོད་ཀྱི་སྐྱོན་ཡོན་དང་ལུས་ཀྱི་གཟི་མདངས་གཞན་དུ་འགྱུར་བ་སོགས་ཀླུ་གདོན་གྱི་ནད་གཞི་ཞུགས་པའི་རྟགས་ཡིན་པས་སོར་མོ་ཉི་ཤུའི་སེན་སྙིང་གི་མཚམས་དང་སྐྲ་མཚམས་སུ་འཕྲེད་ལ་སོར་ལྔ་སེར་མདོག་ཐོན་ཙམ་བསྲེགས་པ་ཕན་པར་ངེས་སོ། །ཨི་ཏི་ཨཱཪྻ་བིཥ་ཡཱ་ནཱཾ་མཱ་ཙརློ་པ་དེ་ཤ་བི་ཤེ་ཥི་ཀཾ། ། ༈ ཨུག་ཆོས་རྩ་བ་མེ་ཏོག་འབྲས་བུར་བཅས་པ་གྲིབ་སྐམ་ཐུན་གཅིག་ལ། བུལ་ཏོག་ཐུན་གཅིག་སྦྱར་བས་གླང་ཐབས་ཀྱི་རིགས་ཚ་གྲང་གང་ཡིན་ཡང་འཕྲལ་དུ་འཇོམས་པ་ལག་བླངས་མའོ། །རྟ་ཕྱུགས་ཀྱི་འབུ་ཚག་ལ། ཐང་ལ་ཤུགས་སྐྱེས་ཀྱི་ཁུ་བ་དྲོ་འཇམ་གྱིས་ལན་གསུམ་ཙམ་བཀྲུས་པས་ཕན། གོ་བོའི་མཆུ་བཅངས་པས་གག་པ་སྲུངས། ཤ་བའི་མིག་ཆུང་བདུག་པས་མགོ་སྲིན་གདོང་སྲིན་ལ་ཕན་ངེས་མྱོང་གྲུབ། གྲེ་བའི་འབྲུམ་པ་མཐའ་དག་ལ། །ཀྱི་ཀྱེ་དཀར་པོ་སྤང་རྩི་དང་། །སྤང་རྒྱན་དཀར་པོ་གསུམ་གྱི་སྟེང་། །རྒྱམ་ཚྭ་ཅོང་ཞི་དྲག་བཏུལ་གྱི། །ཐལ་བ་སྨྱུག་སྦུབ་ནང་བླུགས་ནས། །གྲེ་འབྲུམ་གར་ཡོད་སྟེང་དུ་འཕུལ། །བྱ་རྫོགས་སྐད་ཅིག་བར་ཉིད་དུ། །ཟས་སྐོམ་མི་གཏོང་བཞག་པ་སོགས། །ཉིན་རེར་ལན་གྲངས་མང་དུ་བྱེད། །རྒྱ་ནག་འཇབ་ཙེའི་ཡུ་བ་ཡིས། །འབྲུམ་པ་གང་བྱུང་ཉིན་དེར་བཞར། །བྲག་ཁྱུང་སྨན་ནད་ལྡང་ཙམ་བྱིན། །འདིས་ནི་ཕན་པ་མྱོང་བས་གྲུབ། །ཨྠིྀ། །གཉན་ནད་ཕོ་བར་བབས་པའི་གླང་ཐབས་ལ། །ཨ་རག་བཟང་པོ་ཕོར་གང་འཐུང་བའི་རྗེས། །ཆུ་གྲང་ནང་དུ་འདར་ཐོན་ཙམ་དུ་བསྡད། །དེས་ནི་ནད་ལས་གྲོལ་བ་མྱོང་བས་གྲུབ། །མཛོ་གཡག་དར་མའི་བཙོ་ཁྲག་དྲོན་མོ་བཏང་། །དེ་ཡང་ཕན་ཡོན་བཤད་མ་ཐག་དང་འདྲ། །ཞེས་སོ། ། ༈ འོག་སྒོར་སྲིན་བུས་ཟ་བ་དང་། ཚ་བ་དང་། ཁྲག་ཟག་པ་དང་། གཞང་རྒྱུ་དོན་པ་སོགས་བྱུང་ན། རྫས་ནི། སྒོག་གཅིག །དྭ་བའི་རྩ་བ། ཐང་ཕྲོམ་འབྲུ། བཅའ་སྒ། ཕོ་རིས། བྱི་ཏང་ཀ །ཐར་ནུ། དེ་རྣམས་ཆ་མཉམ་པར་ཚིལ་དུ ལ་མའམ། ཕག་ཚིལ་ལམ། མར་རྙིང་གང་རུང་དང་སྦྱར། བལ་དང་རྫས་བསྲེས་པའི་རེང་བུ་གཤང་ལམ་དུ་ཕུལ། གྲང་ནད་དང་སྲིན་བུ་སོགས་འོག་སྒོ་ཚ་བྲབས་ལ་རྫས་འདིས་སླེབ་ཆོག་གོ ༈ །ཁ་ལྕེ་མི་བདེ་ཞིང་དིག་པ་ལ། ཚྭ་ལ། ནག་ཚུར། ཨ་རུ་གསེར་མདོག །ཞུ་མཁན། ག་དུར་རྣམས་ཆུར་སྦངས་པའི་ཁུ་བས་མཁུར་བཀང་ཡང་ཡང་བཏང་། དེ་ནས་ལྕེ་རྩ་གཏར་བས་སྐྱོན་ཞི་བར་འགྱུར་རོ། ། ༈ ལུས་ཀྱི་རྔུལ་ནག་སྲུང་བ་ལ། སྒ་པི་ཕོ་གསུམ་མར་དཀར་དང་སྦྱར་ནས་བྱུགས། རྫ་གསར་གྱི་ཕྱེ་མ་དང་སྲན་ཕྱེ་ཞོ་ལ་སྦྱར་ནས་དྲིལ་ཕྱིས་བྱས་པས་ལུས་སྐམ་སིང་གིས་འགྲོའོ། ། ༈ ཤོ་མོང་ཞིབ་བཏགས་ཆུ་སྣ་གསུམ་དང་སྦྱར་ནས་ཁྱིམ་དུ་གཏོར་ན་བསྲེ་དྲི་དང་སྦུར་པ་ཐུབ་བོ། ། ༈ རམ་བུ་དང་། ཉའི་མགོ་བོ་ཞིབ་པར་བཏགས་ནས་མར་དང་སྦྱར་ལ་ལུས་ལ་བྱུགས་པས་ཤིག་དང་ལྗི་བའི་གནོད་པ་ཐུབ་བོ། ། ༈ ཤ་བའི་ཁྲག་དྲོན་ལ་ཚ་བཏབ་ནས་འཐུང་ན་ཆང་ནད་གཏན་ནས་མི་འབྱུང་། ། ༈ སྐྱེར་པའི་བར་ཤུན་ཐང་གིས་སྣ་ཁྲག་ཆོད། ། ༈ སྣ་ཤུ་ལ། རྒུན་འབྲུམ་ནུས་བསྲེགས། ལི་ཤི། མཚལ་དཀར། ཡུ་གུ་ཤིང་། ཅུ་གང་རྣམས་ཀྱི་ཕྱེ་མ་མར་དཀར་ལ་སྦྱར་ནས་བྱུགས་པས་ཕན། ། ༈ མཚེར་པ་ལྤགས་དུག་ལ་ར་ཁྲག་དྲོན་མོ་བྱུགས། ། ༈ གནའ་བའི་ཁྲག་དྲོན་མོ་བཏུང་བས་གདོང་སྲིན་ལ་ཕན་ཟེར། ། ༈ རྔ་མོང་སྤུ་མེར་བསྲེག་ནས་བདུག་ན་སྣ་ཁྲག་གཅོད། ། ༈ ཛཱ་ཏིའི་ཕྱེ་མ་དྲི་ཆུར་སྦྱར་ནས་མིག་ལ་བྱུགས་ན་ཁ་བས་མིག་ཕྱིད་པ་ལ་བྱུགས་ཀྱང་ཕན་ནོ། ། ༈ ཁ་ཆེ། སྐྱེར་པའི་བར་ཤུན་གྱི་ཁཎྜ། མཚལ་དཀར། རྒྱ་ཚྭ། དོམ་མཁྲིས་རྣམས་ཆ་མཉམ་པར་ཟངས་ཀྱི་སྣོད་གཙང་མར་སྦྱར། གཡའ་སྔོན་པོ་མ་བྱུང་བར་བཞག །དེ་ནས་མཛུབ་མོས་སྣུར་ཏེ་བྱིའུའི་སྒྲོས་བྱུགས་པས་མིག་ནད་སྤྱི་དང་ཁྱད་པར་འགྲིབ་རིགས་ལ་ཟབ་བོ། ། ༈ ལྕི་བ་རི་ལྕི་འཇམ་པོ་བསྲེགས་པའི་ཐལ་བར། ཐལ་རྡུལ་གཞན་མ་འདྲེས་པར་བྱས་ཏེ་སྣོད་གཙང་མར་ཆུར་སྦྱངས་ནས་བཞག་པས། ཁར་ཆུ་དངོས་འབྱུང་བ་ཕོ། དེ་འོག་ཏུ་ཆགས་པའི་དཀར་འཇམ་ཅན་དེ་བྱིའུའི་སྒྲོས་བླངས་ལ་བྱུགས་པས་མིག་དམར་ཚག་ཤིན་ཏུ་ཚབས་ཆེ་བ་ལ་ཕན། ། ༈

[edit]

yang man ngag nyer mkho sna tshogs skor/ man ngag nyer mkho sna tshogs skor las/__'brum ba dkar por 'gyur thabs si tu'i 'brum bcos las bshad pa de rang gis yong /__bse 'bras kyi 'brum srung dpral bar btsug skabs rma 'byung ba 'phrugs mi nyan/__/_!_'brong mkhris kyi skra lo skye/__mtshon mthing khong du song nas skyugs pa la sha bsregs pas phan/__ro thal dang phug ron khrag gis mdzer pa la phan/__rta khrag dron mos kyang phan nges/__ra gseb pags pas 'dre shig srungs/__shing kri ba'i 'bras bus kyang mdzer pa la phan/__mgo chag dang rma sman rigs gang la'ang gser thur rgyal mo dang /__rma che chung gang la'ang brag lcam med thabs med/__khyi dug gsang sman g.ya' nag stang zil dang /__mchog tu zab pa 'bu khyi zer ba de yin/__'di'i tshab lug ngal gyi 'bu des kyang rung zer/__'bras kyi gsang sman rta tsher yin/__ling tog la ni rmA la blugs/__zhim thig gi phye ma rengs bur sbyar bas len/__nI la tho thas lon nges kyang gzhan la reg mi nyan/__rta zog rtsa dug la be khrag gis phan che/__lhog pa la dang po skyer shun thang btang /__phyi nas dkar gsum byugs/__de rjes glang chen smyon pa dang /__/khyung lnga mnyam sbyor btang /__dmar chen rdo rje pha lam zab/__pho thog la zas spyod sman dpyad drod dang /__mgul 'gags bsil shas che bas bcos/__mig gi 'grib rtsa phyi ma gcod lugs/__mig zur nas phyir tshon gang sar btsag bus gshags/__lcags kyus dkrugs pas rtsa zhig don song /__de sran ma za dus 'gul zhing /__mdog skya na de mi bcad/__mi 'gul zhing mdog ser po zhig yod pas de bcad/__shul tshug gis mnan/__sha gdan ma bsnad pa gal che/__rta shu la rta yi slo dron nam/__srab mdud gtugs kyang phan pa lag blangs/__rgya thor la 'ol mo se gcig pu byugs pas phan zer/__'bam gyi gsang sman ni gur tig__'di mkhris pak+Shaya zab/__kr-i NaM/__'bam po rnams yin/__khrog chung ni dkon pa gab skyes te khrag chod chig sdum/__mdzer sdum gyis dreg la 'byar byas pas phan/__g.ya' rug zhes pa hong len yin/__lhog pa'i gsang sman dug chug gam ta'u chung ngam a bra'i nyung ma zer ba de yin/__stod 'tshang la/__lus gnad rnam snang chos bdun dang ldan par byas/__nad thams cad snying gar ha yig nag po zhig la bsdus nas gzer sar bsgoms/__nam mkha'i mthong du aHdkar po zhig bsam/__ha zhes brtsegs mar brjod la lag pa gnyis bsgrad/__dmigs pa ha de snying kha nas brgyud/__nam mkha'i aHla thim par bsam nas mi dmigs pa'i ngang du bzhag__/'di la dmigs pa bka' rgya ma zer gsungs/__rak+sha'i phreng bas mig la gnod/__shing dngar gyis dngul chu'i dug la phan/__sa mu dra pha sgog pa dang mnyam du/__la khar bzung bas dngul chu'i so nad mi 'byung /__rkang pa sbrid pa la go ldog mig la mchil ma byugs pas phan/__cong zhi 'o ma dang sbyar ba'am/__dbang lag ba 'o dang sbyar ba zla phyed bsten pas sha mdangs zla ba ltar 'gyur/__so 'bam la so phag go yu'i thang gis phul/__glang thabs la srog chags nag po kog pa can gtong /__ra gseb khrag blud/__cis kyang ma phan na lang rtsa gtar/__sman zla shel dang /__g.yu dril/__phan pa kun ldan rnams zab/__rkang lag 'gyur ba la bu mo stag lo mas so btab pas phan/__rta zog rtsa dug na ba la/__rnga snying so yis khrag ma byung bar 'dzin pas phan nges/__rkang nad la gur gum bco brgyad zab/__mes tshigs tshab chung la spyin bskus bas chu bur 'phral du 'byung zhing phan/__khyi rus tshig yag ma red pa'i phye ma par bur bcangs/__phag tshil dang sbyar nas byugs pas kyang phan/__so brdungs pa sogs kyis 'gul na gze ma'i rtsa ba mer bsregs thal byugs/__byis pa mtshan ngus byed pa la mar me'i ros tho slar yang bsregs pa nu mar byugs pas phan/__phag brun bsregs thal bong bu'i gcin dang sbyar nas snar blugs na yam klad gzer la phan/__ka rany+dza ba 'or btab pas khong srin dang gzhang srin la phan/__sha 'bras dang bye ma ka ra zhib btags zho dang sbyar na tshad 'khru gcod/__mgron bu bsregs thal nu zho dang sbyar bas rna ba'i rnag khrag chod/__skyu ru ra a rag gi nang du sbangs pa'i khu bas byugs na skra tshan che/__phur mong nag po sha yi gsebs la brdzong bas 'bu mi 'byung zhing shing kun gyi dri mas kyang thub bo/__/la la phud mer bsregs pa'i du ba khar gtong na so srin la phan/__gnyan 'bur gyis skrangs pa la ba lci rlon pa snum bsres pa'i skyo ma dron mo byugs/__de ras kyis bsdams/__grang ba dang yang yang brje ba sogs byas pas myur du rnag tu smin/__de brtol ba sga ser mer bsregs pa chur brngar la gang brdol sar bug pa che chung ji ltar 'dod pa'i rgyar yang byugs pas myur du brtol nges so/__/spra tshil bzhu ste ras la btsags/__de steng ba mar btsag blugs te dkrugs pa byugs na rkang lag gas pa la 'phral du phan pa myong grub/__rdo thal chu la sbyangs pa dang so phag rnying pa gnyis bsregs pa'i khu ba gang rung gi gdus thang gtong bas nywa log 'khru skyugs kyis skyugs pa sogs skyugs pa'i rigs thams cad gcod/__ri sgog rtsa rtse ma rnying ma rul pa grib skam byas la zhib par btags pa mar gsar pas rta byas nas ril bu skyu ru ra tsam gtong na grang rlung gi rigs mtha' dag la phan/__lus stobs bskyed/__'dod pa mchog tu spyod nus par 'gyur ro/__/de nyid sbrang rtsis rta byas nas gtong na bud med zla mtshan ma babs pa'i khrag nad la phan no/__/chu grang gis rta byas nas snar blugs na sna khrag cis kyang ma chod pa chod par 'gyur ro/__/yang sna khrag kyang 'dzag cing mgo bo na na/__ri sgog gi 'bras bu btsag bcad pa'i mar khu'i nang du ma tshigs bar btsos pa dang /__pi ling cha mnyam zhib par btags la dus rer thun tshad gsum re tsam gtong bas khrag chod cing nad kyang phan no/__/zhum bu'i lce grib skam byas la zhib par btags la se ba bcu drug tsam re gtong na ma yi khong nas smra mi shes pa'i lkugs pa kha phye bar 'gyur zhing /__dbang po yang gsal bar 'gyur ro/__/zhum bu'i khrag ma rul ba grib skam zhib btags mig la btab pas sha 'dzer ling tog sogs mig nad thams cad la phan no/__/mgo bo'i nad sman gang gis kyang mi phan pa la zhum bu'i pags pa'i zhwa gyon na phan par nges so/__/skra dang kha spu sogs med par 'dod na thog mar legs par bzhar/__de nas pha waM gi klad pas bsku mnye thengs gsum tsam re byas na phyis mi skye bar nges so/__/pha wang gi phru gu'i ro ma mer bsregs thal mig la byugs na stong 'grib/__bar 'grib/__sha 'dzer/__ling tog__/skrangs pa sogs mig nad thams cad la phan no/__/sbrul gyi lpags pa mer bsregs thal gyis mig dmar por 'ong zhing na ba la phan no/__/rnga bong klad pa se ba bcu drug tsam re khong du gtong na rlung gi nad thams cad la phan zhing mig shed chung ba'ang che bar 'gyur ro/__/sbrul dang byi la'i khrag bsres pa sna mdog dmar por 'gyur zhing za 'phrug gis na ba la myur du phan no/__/rnga bong gi spu mer bsregs thal sna bug tu btab na sna khrag chod par 'gyur ro/__/go thal bsregs thal kyang de dang 'dra'o/__/chu bal sngon po spyi bor bkab kyang ngo /__/mkhan pa'i dug byas na pho long sbo 'khrog myur du zhi bar 'gyur ro/__spa yag pas skrangs pa dang rma la phan pa nyid do/__/dpyad kyi rim pa la/__tshigs pa drug pa'i phan tshun sor bzhi re gzhal sar rtsa hrang nge yod pa de'i nang 'debs su me btsa' bzhag pas rlung khrag gis mgo bo na ba dang rtsa dkar la phan/__bco brgyad pa'i g.yas g.yon du sor gsum re gzhal ba dang /__bco brgyad pa rang ste kha gsum du bzhag pas rlung /__grang ba/__rked pa na ba/__mkhal rtsa bral ba rnams la phan/__tshig pa lnga pa/__drug pa/__bdun pa/__gsum dang /__mdun gyi dkar nag mtshams su me btsa' re bzhag pas khrag mkhris brang tsha ba dang /__stod na ba sogs la phan/__stod 'tshang la de stong ske steng ca ra khug tu'ang gcig bzhag pas phan/__lhen lhen rtse dbus su bzhag pa'i rgya gram sor gsum bsregs pas mkhris pa bad kan mchin skran rlung rnams la phan/__me nyams gsang gi g.yas g.yon tshon rer tshugs re bzhag pas rlung khrag dang khrag skran la phan/__pus mor tshigs chu 'khor na me long ru bzhir tshugs re bzhag pas khrag rlung dang chu ser sogs sel zhing khyad par brkyang bskum mi thub pa la phan/__zas 'grangs ltog ma snyoms pa'i ma zhu glang thabs la mthil _bzhir lcags leb me la dmar por song ba'i 'od ma reg tsam dang /__ras kyis dar ba byugs pa res 'jog tu byas pas dri shin tu ngan pa zhig don yong zhing des myur du phan par 'gyur ro/__/nywa log 'khru skyugs kyi nad la zhag bzhi tshun du mkhrig ma gnyis sam/__de 'og bsgrad mkhyid gang gis dpung 'og gi nywa gnyis/__sog pa'i mthil gnyis brla'i nang gi nywa gnyis/__byin dkyil gyi nywa gnyis rnams la lcags mda' sor gsum pa zhig gis ser mdog thon tsam bsregs pas phan zhing tshab chen ltag khung spu 'khyil gyi thad_ kyi ltag pa'i chu leb gnyis dang /__rkang mthil gnyis bsregs na des phan nges so/__/sngar spyod kyi skyon yon dang lus kyi gzi mdangs gzhan du 'gyur ba sogs klu gdon gyi nad gzhi zhugs pa'i rtags yin pas sor mo nyi shu'i sen snying gi mtshams dang skra mtshams su 'phred la sor lnga ser mdog thon tsam bsregs pa phan par nges so/__/i ti AR+Ya biSha yA nAM mA tsarlo pa de sha bi she Shi kaM/__/_!_ug chos rtsa ba me tog 'bras bur bcas pa grib skam thun gcig la/__bul tog thun gcig sbyar bas glang thabs kyi rigs tsha grang gang yin yang 'phral du 'joms pa lag blangs ma'o/__/rta phyugs kyi 'bu tshag la/__thang la shugs skyes kyi khu ba dro 'jam gyis lan gsum tsam bkrus pas phan/__go bo'i mchu bcangs pas gag pa srungs/__sha ba'i mig chung bdug pas mgo srin gdong srin la phan nges myong grub/__gre ba'i 'brum pa mtha' dag la/__/kyi kye dkar po spang rtsi dang /__/spang rgyan dkar po gsum gyi steng /__/rgyam tshwa cong zhi drag btul gyi/__/thal ba smyug sbub nang blugs nas/__/gre 'brum gar yod steng du 'phul/__/bya rdzogs skad cig bar nyid du/__/zas skom mi gtong bzhag pa sogs/__/nyin rer lan grangs mang du byed/__/rgya nag 'jab tse'i yu ba yis/__/'brum pa gang byung nyin der bzhar/__/brag khyung sman nad ldang tsam byin/__/'dis ni phan pa myong bas grub/__/a+thi+-i/__/gnyan nad pho bar babs pa'i glang thabs la/__/a rag bzang po phor gang 'thung ba'i rjes/__/chu grang nang du 'dar thon tsam du bsdad/__/des ni nad las grol ba myong bas grub/__/mdzo g.yag dar ma'i btso khrag dron mo btang /__/de yang phan yon bshad ma thag dang 'dra/__/zhes so/__/_!_'og sgor srin bus za ba dang /__tsha ba dang /__khrag zag pa dang /__gzhang rgyu don pa sogs byung na/__rdzas ni/__sgog gcig__/dwa ba'i rtsa ba/__thang phrom 'bru/__bca' sga/__pho ris/__byi tang ka__/thar nu/__de rnams cha mnyam par tshil du_la ma'am/__phag tshil lam/__mar rnying gang rung dang sbyar/__bal dang rdzas bsres pa'i reng bu gshang lam du phul/__grang nad dang srin bu sogs 'og sgo tsha brabs la rdzas 'dis sleb chog go__!__/kha lce mi bde zhing dig pa la/__tshwa la/__nag tshur/__a ru gser mdog__/zhu mkhan/__ga dur rnams chur sbangs pa'i khu bas mkhur bkang yang yang btang /__de nas lce rtsa gtar bas skyon zhi bar 'gyur ro/__/_!_lus kyi rngul nag srung ba la/__sga pi pho gsum mar dkar dang sbyar nas byugs/__rdza gsar gyi phye ma dang sran phye zho la sbyar nas dril phyis byas pas lus skam sing gis 'gro'o/__/_!_sho mong zhib btags chu sna gsum dang sbyar nas khyim du gtor na bsre dri dang sbur pa thub bo/__/_!_ram bu dang /__nya'i mgo bo zhib par btags nas mar dang sbyar la lus la byugs pas shig dang lji ba'i gnod pa thub bo/__/_!_sha ba'i khrag dron la tsha btab nas 'thung na chang nad gtan nas mi 'byung /__/_!_skyer pa'i bar shun thang gis sna khrag chod/__/_!_sna shu la/__rgun 'brum nus bsregs/__li shi/_mtshal dkar/__yu gu shing /__cu gang rnams kyi phye ma mar dkar la sbyar nas byugs pas phan/__/_!_mtsher pa lpags dug la ra khrag dron mo byugs/__/_!_gna' ba'i khrag dron mo btung bas gdong srin la phan zer/__/_!_rnga mong spu mer bsreg nas bdug na sna khrag gcod/__/_!_dzA ti'i phye ma dri chur sbyar nas mig la byugs na kha bas mig phyid pa la byugs kyang phan no/__/_!_kha che/__skyer pa'i bar shun gyi khaN+Da/__mtshal dkar/__rgya tshwa/__dom mkhris rnams cha mnyam par zangs kyi snod gtsang mar sbyar/__g.ya' sngon po ma byung bar bzhag__/de nas mdzub mos snur te byi'u'i sgros byugs pas mig nad spyi dang khyad par 'grib rigs la zab bo/__/_!_lci ba ri lci 'jam po bsregs pa'i thal bar/__thal rdul gzhan ma 'dres par byas te snod gtsang mar chur sbyangs nas bzhag pas/___khar chu dngos 'byung ba pho/___de 'og tu chags pa'i dkar 'jam can de byi'u'i sgros blangs la byugs pas mig dmar tshag shin tu tshabs che ba la phan/__/_!_