JKW-KABUM-20-WA-006

🚧 This website is under continued development. We appreciate your patience!

Previous Section Back to Volume PageLast section in volume.

Wylie title
Location	mkhyen brtse'i bka' 'bum Volume 20, sde tshan 6, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 20: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

575-579	ཀླུ་གཏོར་དང་འབྲེལ་བའི་ཆར་འབེབས་ཁྱེར་བདེ་ཉུང་ངུ་། klu gtor dang 'brel ba'i char 'bebs khyer bde nyung ngu Torma-offering Rituals - gtor chog   ·   Activity Practices - las tshogs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཀླུ་གཏོར་དང་འབྲེལ་བའི་ཆར་འབེབས་ཁྱེར་བདེ་ཉུང་ངུ་།

༄༅། །ཀླུ་གཏོར་དང་འབྲེལ་བའི་ཆར་འབེབས་ཁྱེར་བདེ་ཉུང་ངུ་བཞུགས་སོ། ། ཨོཾ་སྭ་སྟི། ཀླུ་གཏོར་དང་འབྲེལ་བའི་ཆར་འབེབས་ཁྱེར་བདེ་བྱ་བའི་ཚུལ་ལ་གསུམ། སྦྱོར་བ། དངོས་གཞི་ཡན་ལག་གོ །དང་པོ་ནི། གཟའ་སྐར་འབྱུང་ཁམས་ཆུ་ནང་འཕྲད་པ་དང་། ཀླུ་ཐེབས་སོགས་ཡོད་པའི་དུས་ཚེས་དགེ་བར་དཀར་ཕྱོགས་ཀྱི་ཀླུ་གནས་ངེས་པའི་ཆུ་མིག་འཕན་བཟང་གི་དཀྱིལ་ལམ། ཉེ་ལོགས་སོགས་གང་བདེར་ཀླུ་གཏོར་གྱི་བཅའ་གཞི་རྒྱས་བསྡུས་གང་རིགས་གཞུང་ལྟར་བཤམ་པའི་མདུན་དུ། དཀར་གསུམ། མངར་གསུམ། ཀླུ་སྨན། བག་ཕྱེ་རྣམས་སྦྱར་བའི་རིལ་བུ་བརྒྱ་རྩ་བརྒྱད་ཟངས་སོགས་རིན་པོ་ཆེའི་སྣོད་དུ་བཤམས། བདག་བསྐྱེད་སོགས་ནས་བརྩམས་ཀླུ་གཏོར་གྱི་འབུལ་བའི་བར་ཀླུ་གཏོར་གྱི་གཞུང་ནས་འབྱུང་བ་ལྟར་རྒྱས་བསྡུས་གང་རུང་བྱའོ། །གཉིས་པ་ནི། རྫས་རྣམས་ཀླུའི་རེ་བ་ཡིད་བཞིན་ཏུ་སྐོང་བའི་བདུད་རྩིའི་རང་བཞིན་དུ་བབས་པས་ཀླུའི་སྡུག་བསྔལ་ཐམས་ཅད་བསལ། ཕན་བདེའི་དཔལ་ལ་བཀོད། མཉེས་ཤིང་ཚིམས་ནས་འཇིག་རྟེན་གྱི་ཁམས་ཀྱི་སྤྲིན་རྣམས་བསྡུས་ཆར་གྱི་རྒྱུན་ཆེན་པོ་འབེབས་པར་གྱུར། ཅེས་བརྗོད་ཅིང་བསམས་ལ། ཨོཾ་ནཱ་ག་ཀཱ་ལ་ཧཱུྃ། ནཱ་ག་ལེ་ལེ། དུམ་པ་ལེ་ལེ། ནཱ་ག་རཱ་ཛ་ཧཱུྃ་ཕཊྲ། ཅེས་བརྒྱ་རྩ་བརྒྱད་བཟླས་རིལ་བུ་གཅིག་ཆུ་མིག་ཏུ་བསྐྱུར། དེ་བཞིན་ཏུ་རིལ་བུ་རེ་ལ་སྔགས་བརྒྱ་དང་བརྒྱད་རེ་ལོངས་པར་བཏབ་ནས་ཆུ་མིག་བསྐྱུར་ལུགས་སྔར་བཞིན་བྱ། རིལ་བུ་རྫོགས་པ་དང་། ཨོཾ་མ་ཧཱ་ནཱ་ག་རཱ་ཛ་ས་པ་རི་ཝཱ་ར་ཨརྒྷཾ་ནས། ཤབྡྷ་པྲ་ཏཱི་ཙྪ་སྭཱ་ཧཱ། ཞེས་མཆོད། གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པ་མ་ལུས་སེལ་མཛད་ཅིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་བསྟོད། ཅེས་བསྟོད། ཡི་གེ་བརྒྱ་པ་དང་། མ་རྙེད་ཡོངས་སུ་མ་ཚང་དང་། །གཙོ་བོར་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། ཞེས་ནོངས་པ་བཟོད་པར་གསོལ། ཀླུ་གཏོར་གྱི་མཇུག་ནས་འབྱུང་བ་ལྟར། འོད་ཀྱི་ར་བ་མི་དམིགས་པར་བསམས་ལ། གཤེགས་གསོལ་དང་། བསྔོ་སྨོན་བཀྲ་ཤིས་གང་རིགས་བྱ། དེ་དག་གི་ཚེ་རང་ཉིད་གཅིག་པུ་ལས་མེད་ན་མཆོད་བསྟོད་རྫོགས་པའི་བར་མཚམས་དང་། སྒྲུབ་གྲོགས་གཞན་ཡོད་ན་ཆོ་ག་དང་ལྷན་ཅིག་ཀླུའི་དཔང་ཀོང་དང་། སྤྲིན་ཆེན་འདོན། གཞན་ཡང་བསང་དང་གསེར་སྐྱེམས་སོགས་མཆོད་སྦྱིན་གྱི་རིམ་པའང་ཅི་རིགས་སུ་བྱའོ། །གསུམ་པ་ལ་གསུམ། འབྲུག་བསྐུལ། སྤྲིན་སྡུད། རླུང་གནོན་ནོ། །དང་པོ་ནི། ཐུན་མཚམས་གང་རིགས་སུ། རང་ཉིད་གཡུ་འབྲུག་སྔོན་པོ་འབྲུག་སྒྲས་ནམ་མཁའ་འགེང་བར་གྱུར་པར་བསམས་ལ། ཨོཾ་ཏྲ་གི་ཞིམ་གྱི་ཆི་བར་ན་ལེ་དྷེ་ཤ་ཕ་ཚ་ཕ་ཚ་ཧཱུྃ་ཕ྄ཊ། ཅེས་བཟླ། གཉིས་པ་ནི། རང་ཉིད་ལྷར་གསལ་བའི་ཞལ་གྱི་རླངས་པ་ནམ་མཁའི་ཁམས་སུ་སྤྲིན་དུ་འཁྲིགས་པར་གྱུར་པའི་མོས་པས། ཧཱུྃ་སབ་སབ་ཧཱུྃ། ཧཱུྃ་སོབ་སོབ། ཅེས་བཟླ། གསུམ་པ་ནི། བག་ཟན་ལ་རླུང་ལྷ་ཤ་བ་ལ་ཞོན་པ་ལག་ན་བ་དན་ལྗང་གུ་བསྐལ་ཐབས་སུ་འཛིན་ཅིང་མྱོས་པའི་རྣམ་པ་ཅན་དུ་བྱས་ལ་རང་ཉིད་ལྷའི་ང་རྒྱལ་བརྟན་པོ་དང་བཅས། ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཡི་དམ་ཞི་ཁྲོའི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུས། དུས་མ་ཡིན་པའི་རླུང་གིས་ཆར་པ་འབབ་པ་ལ་བར་དུ་གཅོད་པའི་གནོད་བྱེད་པ་བྱུང་པོ་བགེགས་ཀྱི་རིགས་རྣམས་དམིགས་པའི་རྟེན་འདི་ལ་མཆིས་པར་གྱུར་ཅིག །ཨོཾ་ཡཾ་སརྦ་བིགྷྣཱན་ཛཿཧཱུྃ་བྃ་ཧོཿ ཞེས་ཡང་ཡང་བརྗོད་པས་བསྟིམ། ནུབ་བྱང་གི་ཕྱོགས་སུ་རྫ་གསར་ཁ་གཅོད་འགྲིགས་པར་བཅུག་པའི་སྟེང་ནས་རྡོ་རྗེ་རྒྱ་གྲམ་བྲི། སཱཙྪ་སེར་པོས་མནན། རླུང་ལྷའི་སྟོབས་དང་ནུས་པ་ཐམས་ཅད་བཅོམ་པར་བསམ། ཆར་ཡ་ཆུར་ཡ་ཏི་ཏི་ལ་ཡཾ་ནན། ཞེས་བཟླ་ཞིང་བྲོ་བརྡུང་། ལས་གྲུབ་པ་ན་རླུང་ལྷའི་གཟུགས་འོ་མས་བཀྲུ་ཞིང་། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ན་སརྦ་ཨརྠ་སཱ་དྷ་ནི་སྭཱ་ཧཱ། ཞེས་སྤྱན་མའི་གཟུངས་མང་དུ་བཟླས་པར་གསོ་བར་བྱའོ། །ཞེས་པའང་ཉེར་མཁོའི་ཡན་ལག་ཏུ་ལུགས་འདི་ལ་ཚད་མར་གྱུར་པའི་གཞུང་ལས་ཟུར་དུ་ཕྱུངས་ཏེ་བྲིས་པ་དགེ་ལེགས་མཆོག་ཏུ་གྱུར་ཅིག །མངྒ་ལཾ། །

ཤེས་རབ་ནས་ཞུ་བཅུག་ཐེངས་གསུམ་བྱས།

[edit]

klu gtor dang 'brel ba'i char 'bebs khyer bde nyung ngu / @#/___/klu gtor dang 'brel ba'i char 'bebs khyer bde nyung ngu bzhugs so/_/ oM swa sti/___klu gtor dang 'brel ba'i char 'bebs khyer bde bya ba'i tshul la gsum/___sbyor ba/_dngos gzhi yan lag go__/dang po ni/___gza' skar 'byung khams chu nang 'phrad pa dang /___klu thebs sogs yod pa'i dus tshes dge bar dkar phyogs kyi klu gnas nges pa'i chu mig 'phan bzang gi dkyil lam/___nye logs sogs gang bder klu gtor gyi bca' gzhi rgyas bsdus gang rigs gzhung ltar bsham pa'i mdun du/___dkar gsum/___mngar gsum/___klu sman/___bag phye rnams sbyar ba'i ril bu brgya rtsa brgyad zangs sogs rin po che'i snod du bshams/___bdag bskyed sogs nas brtsams klu gtor gyi 'bul ba'i bar klu gtor gyi gzhung nas 'byung ba ltar rgyas bsdus gang rung bya'o/___/gnyis pa ni/___rdzas rnams klu'i re ba yid bzhin tu skong ba'i bdud rtsi'i rang bzhin du babs pas klu'i sdug bsngal thams cad bsal/___phan bde'i dpal la bkod/___mnyes shing tshims nas 'jig rten gyi khams kyi sprin rnams bsdus char gyi rgyun chen po 'bebs par gyur/___ces brjod cing bsams la/___oM nA ga kA la hU~M/___nA ga le le/___dum pa le le/___nA ga rA dza hU~M phaT+ra/___ces brgya rtsa brgyad bzlas ril bu gcig chu mig tu bskyur/___de bzhin tu ril bu re la sngags brgya dang brgyad re longs par btab nas chu mig bskyur lugs sngar bzhin bya/___ril bu rdzogs pa dang /___oM ma hA nA ga rA dza sa pa ri wA ra ar+g+haM nas/___shab+d+ha pra tI ts+tsha swA hA/___zhes mchod/___gdengs ka nor bu 'bar ba'i 'od zer gyis/___/sa 'og mun pa ma lus sel mdzad cing /___/bstan la rab dga' mthu stobs bsam mi khyab/___/klu rgyal 'khor dang bcas la phyag 'tshal bstod/___ces bstod/___yi ge brgya pa dang /___ma rnyed yongs su ma tshang dang /___/gtso bor nus pa ma mchis pa/___/'dir ni bgyi ba gang nongs pa/___/de kun khyod kyis bzod mdzad rigs/___zhes nongs pa bzod par gsol/___klu gtor gyi mjug nas 'byung ba ltar/___'od kyi ra ba mi dmigs par bsams la/___gshegs gsol dang /___bsngo smon bkra shis gang rigs bya/___de dag gi tshe rang nyid gcig pu las med na mchod bstod rdzogs pa'i bar mtshams dang /___sgrub grogs gzhan yod na cho ga dang lhan cig klu'i dpang kong dang /___sprin chen 'don/___gzhan yang bsang dang gser skyems sogs mchod sbyin gyi rim pa'ang ci rigs su bya'o/___/gsum pa la gsum/___'brug bskul/___sprin sdud/___rlung gnon no/___/dang po ni/___thun mtshams gang rigs su/___rang nyid g.yu 'brug sngon po 'brug sgras nam mkha' 'geng bar gyur par bsams la/___oM tra gi zhim gyi chi bar na le d+he sha pha tsha pha tsha hU~M pha?T/___ces bzla/___gnyis pa ni/___rang nyid lhar gsal ba'i zhal gyi rlangs pa nam mkha'i khams su sprin du 'khrigs par gyur pa'i mos pas/___hU~M sab sab hU~M/___hU~M sob sob/___ces bzla/___gsum pa ni/___bag zan la rlung lha sha ba la zhon pa lag na ba dan ljang gu bskal thabs su 'dzin cing myos pa'i rnam pa can du byas la rang nyid lha'i nga rgyal brtan po dang bcas/___na mo/___dkon mchog gsum la phyag 'tshal lo/___dkon mchog gsum gyi bden pa dang /___chos nyid rnam par dag pa'i bden pa dang /___chos can rgyu 'bras bslu ba med pa'i bden pa dang /___yi dam zhi khro'i lha tshogs rnams kyi bden pa dang /___sprul pa yang sprul phyag brnyan dang bcas pa rnams kyi bden pa dang /___bden pa chen po'i mthus/___dus ma yin pa'i rlung gis char pa 'bab pa la bar du gcod pa'i gnod byed pa byung po bgegs kyi rigs rnams dmigs pa'i rten 'di la mchis par gyur cig__/oM yaM sarba big+h+nAn dzaHhU~M ba~M hoH__zhes yang yang brjod pas bstim/___nub byang gi phyogs su rdza gsar kha gcod 'grigs par bcug pa'i steng nas rdo rje rgya gram bri/___sAts+tsha ser pos mnan/___rlung lha'i stobs dang nus pa thams cad bcom par bsam/___char ya chur ya ti ti la yaM nan/___zhes bzla zhing bro brdung /___las grub pa na rlung lha'i gzugs 'o mas bkru zhing /___oM ru ru s+phu ru dz+wa la tiSh+Tha sid+d+hi lo tsa na sarba ar+tha sA d+ha ni swA hA/___zhes spyan ma'i gzungs mang du bzlas par gso bar bya'o/___/zhes pa'ang nyer mkho'i yan lag tu lugs 'di la tshad mar gyur pa'i gzhung las zur du phyungs te bris pa dge legs mchog tu gyur cig__/mang+ga laM/_/_

shes rab nas zhu bcug thengs gsum byas/