JKW-KABUM-04-NGA-001-032

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	mkhyen brtse'i bka' 'bum Volume 4, sde tshan 1, Text 32, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 4: 155-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

32 530-551	རྒྱུད་སྡེ་བཞི་ཡི་རྣམ་གཞག་དང་གནས་ཡུལ་གྱི་བཤད་པ། rgyud sde bzhi yi rnam gzhag dang gnas yul gyi bshad pa Notes - zin bris · Pilgrimage Guides - gnas yig · Detailed Classification - rnam bzhag	Text page View PDF
	[[\|འཇམ་དབྱངས་མཁྱེན་བརྩེའི་དབང་པོ་ ()]]

[edit]

རྒྱུད་སྡེ་བཞི་ཡི་རྣམ་གཞག་དང་གནས་ཡུལ་གྱི་བཤད་པ།

བདག་ཅག་གི་སྟོན་པས་གདུལ་བྱའི་ཁམས་དབང་བསམ་པའི་རིམ་པ་དང་འཚམས་པར་ཆོས་ཕུང་མཐའ་ཀླས་པར་སྤྲོས་པ་ཉིད་བསྡུ་ན་ཐེག་པ་དམན་པ་དང་། ཐེག་པ་ཆེན་པོ་གཉིས་སུ་འདུ་ཞིང་། ཕྱི་མ་ལ་ཕར་ཕྱིན་དང་། རིག་འཛིན་སྡེ་སྣོད་གཉིས་རིག་པ་འཛིན་པའི་སྡེ་སྣོད་ལ་རེ་ཞིག་རྒྱུད་སྡེ་ཆེན་པོ་བཞི་ལས། དང་པོ་བྱ་བའི་རྒྱུད་ནི། ཕར་ཕྱིན་གྱི་ཐེག་པ་ལས་བྱ་རྒྱུད་ཁྱད་པར་འཕགས་ཚུལ། ཁྱད་པར་དུ་འཕགས་པའི་བྱ་རྒྱུད་ཀྱི་དབྱེ་བ། ཕྱེ་བ་སོ་སོའི་དོན་གཏན་ལ་དབབ་པའོ། །དང་པོ་ནི། ཕར་ཕྱིན་གྱི་ཐེག་པར་བསྐལ་པ་གྲངས་མེད་སུམ་ཅུ་རྩ་གསུམ་དང་། བཅུ་དང་། ཉན་རང་སླར་ལོག་ནས་ཐེག་ཆེན་གྱི་ལམ་དུ་ཞུགས་པས་གྲངས་མེད་བཞི་དང་། གཞན་གྱིས་གྲངས་མེད་གསུམ་ན་སངས་རྒྱས་པར་གསུངས་ན། འདིར་རྒྱུ་རྐྱེན་ཐམས་ཅད་ཚོགས་ན་སྐྱེ་བ་གཅིག་དང་། རྐྱེན་འགའ་ཞིག་མ་ཚང་ན་ཡང་ཚེ་གསུམ་གྱིས་གྲུབ་པར་གསུངས་པས། དུས་མྱུར་པོར་འགྲུབ་པ་ནི་ཁྱད་པར་གྱི་འཕགས་ཆོས་ཡིན་ནོ། །ཕྱུགས་ཀྱི་ཤིང་རྟ་དང་། ཉི་ཟླའི་བགྲོད་པའམ་རྐང་མགྱོགས་ལྟ་བུའི་ཁྱད་ཡོད། མཆན། འོ་ན་སྐྱེ་བ་འདི་ཉིད་དུ་འགྲུབ་པ་ལ་ལམ་ཁྱད་པར་ཅན་ཞིག་དགོས་ན། དེ་གང་ཡིན་ཞེས་དོགས་པ་བཀོད་དེ། དེའི་ལན་ལ། འཇུག་པའི་སྤྱོད་པ་དང་། སྦྱོང་བའི་སྤྱོད་པ་དང་། །སྒྲུབ་པའི་སྤྱོད་པ་སྟེ་གསུམ་ཡིན་ནོ། །འོ་ན་རྣལ་འབྱོར་བླ་མེད་དང་ཁྱད་མེད་དུ་འགྱུར་རོ་སྙམ་ན། དེ་ནི་ཚེ་འདིར་སྐུ་གསུམ་དབྱེར་མེད་རྟོགས་པའི་སངས་རྒྱས་ཀྱི་གོ་འཕང་ཐོབ་པ་ཡིན་ལ། འདིར་ནི་ལམ་གསུམ་ལ་བརྟེན་ནས་ས་བཅུ་པ་སྐྱེ་བ་འདི་མངོན་དུ་བྱེད་ཅིང་། རྟེན་དེས་སངས་རྒྱས་འགྲུབ་པའི་ཕྱིར་ཁྱད་པར་ཆེའོ། །གཉིས་པ་ནི། དེ་ལྟ་བུའི་བྱ་བའི་རྒྱུད་དེ་ལ་དབྱེ་ན་སྒོ་དྲུག་ཏུ་ཡོད་ཅིང་། དེ་བཞིན་གཤེགས་པ། པདྨ། རྡོ་རྗེ། ནོར་བུ། རྒྱས་པ། འཇིག་རྟེན་པའི་རིགས་དྲུག་དང་། སྤྱི་རྒྱུད་བཞི། དེ་བསྡུ་ན་གསུམ་དང་། བསྡུ་ན་ནོར་ཅན་པདྨའི་རིགས་ཀྱིས་བསྡུས། རྒྱས་པ་རྡོ་རྗེའི་རིགས་ཀྱིས། འཇིག་རྟེན་པའི་རིགས་ཀྱང་དེ་དག་གི་ནང་ཚན་ཅི་རིགས་པར་རོ། །དེ་ཡང་བསྡུ་ན་ཐབས་གཙོ་ཆེ་བ་གསང་སྔགས་དང་། ཤེས་རབ་གཙོ་ཆེ་བ་རིག་སྔགས་གཉིས་སུ་འདུའོ། །མཆན། དེའང་ཐབས་ཤེས་གཉིས་སུ་འདུ་བ་ཡིན་ལ། དེ་ཐམས་ཅད་ཀྱི་ལམ་དང་འབྲས་བུའི་མངོན་རྟོགས་ཀྱང་བཞིར་འདུས་པ་ཡིན་ཏེ། དེ་ལ་དང་པོ་འཇུག་པའི་སྤྱོད་པ་ནི། ཐོག་མར་འཇིག་རྟེན་པའི་ཡང་དག་པའི་ལྟ་བ་དང་། སོ་སོར་ཐར་པའི་ཚུལ་ཁྲིམས་དང་། སྨོན་འཇུག་གི་སེམས་བསྐྱེད་པས་འཇུག་པའི་གང་ཟག་གི་རྒྱུད་ཡོངས་སུ་སྦྱངས་ནས། གསང་བ་སྤྱི་རྒྱུད་ལས་གསུངས་པའི་ཆོས་གོས། རིགས་གསུམ་སྤྱིའམ་སོ་སོའི་དལ་དུ་སྔོན་དུ་བསྙེན་པ་དང་། སའི་ཆོ་ག་དང་། སྟ་གོན་གྱི་ཆོ་ག་དང་། འཇུག་པའི་ཆོ་ག་བཞིས་དབང་བསྐུར་བས་སྔགས་ཀྱི་སྡོམ་ལྡན་དུ་བྱས་ནས། དམ་ཚིག་དང་སྡོམ་པའི་ཚོགས་ནན་ཏན་དུ་འཛིན་པའོ། །གཉིས་པ་སྦྱོར་བའི་སྤྱོད་པ་ནི། ལེགས་པར་གྲུབ་པའི་རྒྱུད་ལས་གསུངས་པ་ལྟར་བདག་གི་དེ་ཁོ་ན་ཉིད་སྟོང་པ་ཉིད་མངོན་སུམ་དུ་བྱས་ནས་མདུན་དུ་རང་འདོད་པའི་དཀྱིལ་འཁོར་གྱི་ལྷ་ཚོགས་སྤྱན་དྲངས་ཏེ། དེ་རྣམས་ལ་མཆོད་པ་དང་། བསྟོད་པ་དང་། བཟླས་པས་མཉེས་པར་བྱ་བ་ལ་སོགས་པ་མཚན་བཅས་ཀྱི་རྣལ་འབྱོར་ལ་བྱ་བའོ། །གསུམ་པ་བསྒྲུབ་པའི་སྤྱོད་པ་ནི། བསམ་གཏན་ཕྱི་མ་ལས་གསུངས་པ་ལྟར། མཐུན་རྐྱེན་འཛོམ་པའི་གནས་སུ་འགལ་རྐྱེན་མཐའ་དག་སྤངས་ནས་མེར་གནས་དང་། སྒྲར་གནས་དང་། སྒྲ་མཐའི་དེ་ཁོ་ན་ཉིད་ལ་སོགས་པ་མཚན་མེད་ཀྱི་ཏིང་ངེ་འཛིན་ལ་རྩེ་གཅིག་ཏུ་མཉམ་པར་འཇོག་པར་བྱ་བའོ། །བཞི་པ་གྲུབ་པའི་སྤྱོད་པ་ནི། དེ་ལྟར་མཚན་བཅས་དང་མཚན་མེད་ཀྱི་རྣལ་འབྱོར་གཉིས་ཀྱིས་ས་དང་པོ་བསྒྲུབས་ནས། དེ་གྲུབ་པའི་བྱང་སེམས་དེས་ས་ལྷག་མ་རྣམས་བསྒྲུབ་པའི་ཕྱིར་གནས་སྐབས་སུ་ས་བཅུའི་སྤྱོད་པ་མངོན་བྱང་དང་འཇམ་དཔལ་རྩ་རྒྱུད་སོགས་ལས་རྒྱ་ཆེར་གསུངས་པ་ལྟར་སྤྱད་པས། མཐར་ཐུག་སྐུ་གསུམ་དབྱེར་མེད་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའོ། །གསུམ་པ་ནི། དེ་ཡང་སྒོ་དྲུག་སོ་སོའི་རྒྱུད་ཐམས་ཅད་གྱི་བཤད་རྒྱུད་ལྟ་བུར་སྔར་སྨོས་པའི་དོན་བཞི་པོ་ཚང་ལ་མ་ནོར་པར་སྟོན་པ་དཔུང་བཟང་དང་། ཁྱད་པར་དུ་འཇུག་པ་དང་། སྦྱོར་བ་དང་། སྒྲུབ་པའི་སྤྱོད་པ་གསུམ་པོ་གསུམ་པོས་རྒྱ་ཆེར་སྟོན་པའི་ཕྱིར། སྤྱི་རྒྱུད་དང་། ལེགས་གྲུབ་དང་། བསམ་གཏན་ཕྱི་མ་གསུམ་རིམ་པར་གསུངས་ཏེ། འདི་རྣམས་ལ་བྱ་བ་སྤྱིའི་རྒྱུད་སྡེ་བཞི་ཞེས་གྲགས་པས། རྒྱས་པར་དེ་དག་དང་། སློབ་མ་བྱང་ཆུབ་མཆོག་གི་བཤད་སྲོལ་ལས་རྟོགས་པར་བྱའོ། །རིགས་དྲུག་གི་རྒྱུད་སྡེ་སོ་སོ་བ་དང་། སྤྱི་རྒྱུད་བཞི། དེ་རྣམས་ཀྱི་འགྲེལ་པ། སྒྲུབ་ཐབས། ལམ་རིམ་སོགས་དང་། ཁྱད་པར་བྱ་བ་སྤྱིའི་རྒྱུད་བཞི་དང་། སློབ་དཔོན་བྱང་ཆུབ་མཆོག་གི་གཞུང་ལ་བལྟའོ།། །། ༈ སྤྱོད་པའི་རྒྱུད་ནི། བྱ་བའི་རྒྱུད་ལས་འཇུག་པ་སོགས་གསུམ་གྱི་སྟེང་། རང་ཉིད་སངས་རྒྱས་ཀྱི་གཟུགས་སྐུ་མཚན་དཔེས་སྤྲས་པའི་ང་རྒྱལ་བསྒོམ་པས་ཁྱད་པར་དུ་འཕགས་པ་ཡིན་ལ། དེ་ཡང་ཕྱི་ལུས་ངག་གི་བྱ་བ་དང་ནང་ཏིང་ངེ་འཛིན་ཆ་མཉམ་དུ་སྤྱོད་པས་སྤྱོད་རྒྱུད་ཅེས་བྱ་ཞིང་། དབྱེ་ན། དེ་བཞིན་གཤེགས་པ། པདྨ། རྡོ་རྗེའི་རིགས་ཀྱི་རྒྱུད་གསུམ་ཡོད་ཅིང་། རྒྱུད་དེ་རྣམས་ཀྱི་དོན་གཏན་ལ་དབབ་པར། ཚིག་དང་། དོན་གྱི་ཉམས་ལེན་གཏན་ལ་དབབ་པ་གཉིས་ལས། དང་པོ་ནི། མངོན་བྱང་གི་བསྡུས་འགྲེལ་ལས་བཤད་པ་ལྟར་དང་། གཉིས་པ་ནི། རྒྱུ་རྟེན་གྱི་གང་ཟག རྐྱེན་ལམ་རིམ། འབྲས་བུ་སངས་རྒྱས་ཀྱིས་བཤད་པ་སྟེ་གསུམ་ལས། དང་པོ་ནི། སྐྱེ་བ་སྔ་མ་རྣམས་སུ་མི་དགེ་བ་བཅུ་སྤང་བས་ལུས་མཚན་དང་ལྡན་ཞིང་། ངག་སྙན་ལ། སེམས་དུག་གསུམ་ཤས་ཆུང་བའོ། །གཉིས་པ་ནི། མངོན་བྱང་གི་བསྡུས་འགྲེལ་ལས། དེ་ལ་སྒྲུབ་པ་པོའི་སྤྱོད་པ་ནི་རྣམ་པ་གསུམ་སྟེ། འདི་ལྟ་སྟེ། གསང་སྔགས་མཉེས་པར་བྱ་བ་ལ་འཇུག་པའི་སྤྱོད་པ་དང་། གསང་སྔགས་མཉེས་པར་བྱ་བའི་ཕྱིར་སྔགས་བསྙེན་པའི་ཆོ་གའི་མཚན་ཉིད་ཅན་གྱི་སྦྱོར་བའི་སྤྱོད་པ་དང་། དེ་བཞིན་དུ་སྤྱོད་པ་གསུམ་པ་གསང་སྔགས་བསྒྲུབས་པས་གསང་སྔགས་ཀྱི་འབྲས་བུ་བསྒྲུབ་པ་སྟེ། འབྲས་བུ་ནི་གསང་སྔགས་ཀྱི་འབྲས་བུ་ངོ་བོ་ཉིད་ཀྱི་དངོས་གྲུབ་ཀྱི་མཚན་ཉིད་བསྟན་པ་ཡིན་ནོ། །ཞེས་སོ། །དེ་ལ་དང་པོ་འཇུག་པའི་སྤྱོད་པ་ལ་གཉིས། ཕྱིའི་འཇུག་པ་དང་། ནང་གི་འཇུག་པའོ། །དང་པོ་ནི། དཀྱིལ་འཁོར་དུ་འཇུག་ཅིང་དབང་བླང་བ་དང་། དམ་ཚིག་དང་སྡོམ་པ་ལ་གནས་པར་བྱ་བའོ། །དང་པོ་ནི། སྤྱོད་པའི་རྒྱུད་ལས་གསུངས་པའི་སྙིང་རྗེ་ཆེན་པོ་ཅན་ལ་སོགས་པའི་དཀྱིལ་འཁོར་དུ་འཇུག་པ་དང་། དབང་བསྐུར་བ་དང་། དམ་ཚིག་དང་སྡོམ་པ་ལ་སོགས་པ་བྱིན་པས་ལམ་བསྒོམ་པའི་སྣོད་རུང་དུ་བྱ་ཞིང་། རང་འདོད་པའི་ལྷའི་བཟླས་ལུང་ཡང་སྦྱིན་པར་བྱའོ། །དེའི་ཚེ་དབང་ཇི་ཙམ་བསྐུར་སྙམ་ན། རྒྱུད་སྡེ་གོང་མ་དང་ཕྱག་རྡོར་དབང་བསྐུར་གྱི་རྒྱུད་ལས། ཆུ་དང་། དབུ་རྒྱན། རྡོ་རྗེ། དྲིལ་བུ། མིང་དབང་ལྔར་བཤད་ཅིང་། མངོན་བྱང་ལས་དངོས་བསྟན། ཆུ་དབང་། ཐུར་མ། མེ་ལོང་། ཆོས་བཤད་པའི་རྗེས་གནང་ཙམ་ལས་མ་བཤད་དོ། །གཉིས་པ་ནང་འཇུག་ལ། མཚན་མེད་པ་དང་། མཚན་དང་བཅས་པའི་རྣལ་འབྱོར་གཉིས་ཀྱི། དང་པོ་ནི། ཆོས་ཐམས་ཅད་ངོ་བོ་ཉིད་མེད་པར་རྟོགས་པའི་ངང་དུ་ཇི་ཙམ་གནས་ཀྱི་བར་མཉམ་པར་བཞག་པ་དང་། གཉིས་པ་ནི། ཐོག་མར་བདག་དང་གནས་བསྲུང་བ་སོགས་སྔོན་དུ་འགྲོ་བས། ཡི་གེ་དང་པོ་བྱང་ཆུབ་ཀྱི་སེམས་སྟོང་པ་ཉིད་བསྒོམ་པ་དང་། ཡི་གེ་གཉིས་པ་སྔགས་ཀྱི་སྒྲར་ལྡང་བ་དང་། གཞི་དང་པོ་རང་སངས་རྒྱས་ཀྱི་སྐུར་བསྐྱེད་ལ་སྔགས་རྒྱས་བརླབ་པ་དང་། གཞི་གཉིས་པ་མདུན་དུ་སངས་རྒྱས་ཀྱི་སྐུ་བསྐྱེད་ལ་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་པར་སེམས་བརྟན་པའོ། །གཉིས་པ་སྦྱོར་བའི་སྤྱོད་པ་ནི། མཚན་མ་དང་བཅས་པ་དང་། མཚན་མེད་ཀྱི་རྣལ་འབྱོར་གཉིས་ཏེ། དང་པོ་ལའང་ཕྱིའི་བཟླས་བརྗོད་ཀྱི་ཡན་ལག་བཞི་པའོ། །གསུམ་པ་བསྒྲུབས་པའི་སྤྱོད་པ་ནི་ཕྱིའི་དངོས་གྲུབ་དང་། ནང་གི་དངོས་གྲུབ་བསྒྲུབ་པ་གཉིས་ལས། དང་པོ་ནི། རལ་གྲི་ལ་སོགས་པའི་རྫས་བླངས་ནས་བཟླས་བརྗོད་བྱས་པས་རྫས་དེ་འབར་བ་དང་ལག་ཏུ་བླངས་ན་རིག་འཛིན་ལ་སོགས་པའི་དངོས་གྲུབ་གྲུབ་པར་འགྱུར་རོ། །གཉིས་པ་ནི། ནང་གི་རླུང་མེ་ཆུ་ས་དཀྱིལ་འཁོར་བསྒོམས་པས། །མངོན་ཤེས་ལྔ་སོགས་དང་ཞར་ལ་མཚན་བཅས་ཀྱི་དངོས་གྲུབ་རྣམས་ཀྱང་འགྲུབ་པའོ། །གསུམ་པ་འབྲས་བུ་སངས་རྒྱས་པའི་བཤད་པ་ལ། གང་གིས་སྒྲུབ་པའི་རྒྱུ་དང་། དེས་བསྒྲུབས་པའི་འབྲས་བུའོ། །དང་པོ་ནི། དོན་དམ་པའི་བྱང་ཆུབ་ཀྱི་སེམས་འཇུག་གནས་ལྡང་གསུམ་གྱི་མཚན་ཉིད་ཅན་བསྒོམ་ཞིང་། ཕ་རོལ་ཏུ་ཕྱིན་པ་དྲུག་དང་བསྡུ་དངོས་བཞི་ལ་སྤྱོད་པས་ཆོས་སྤྱོད་དང་། ངེས་པར་རྫོགས་པའི་ས་བཅུ་ལ་འཇུག་པར་བྱེད་པའོ། །གཉིས་པ་ནི། དེ་ལྟར་དཔའ་བོ་ཆེན་པོ་རྫོགས་པར་བྱང་ཆུབ་པའི་ཏིང་འཛིན་གྱིས་བདུད་བཞི་བཅོམས་ནས་ཁམས་གསུམ་ལས་འདས་ཏེ། འོག་མིན་ལྟུག་པོ་བཀོད་པར་སྐྱེས་ནས་བྱང་ཆུབ་ཆེན་པོ་མངོན་སུམ་དུ་བྱ་བ་དང་དགོངས་པས་རྣལ་འབྱོར་གྱི་རྒྱུད་ནས་འབྱུང་བ་ལྟར་མངོན་བྱང་ལྔའི་རིམ་པས་མངོན་པ་བྱང་ཆུབ་པ་དང་བཅས་པའི་སྐུ་བཞི་གོ་འཕང་དམ་པ་བརྙེས་དེ་སྐུ་གསུང་ཐུགས་མི་ཟད་རྒྱན་གྱི་འཁོར་ལོས་འགྲོ་བའི་དོན་ལྷུན་གྱིས་གྲུབ་པར་མཛད་པའོ། །ཞེས་བཞེད།། ༈ །། བྱ་རྒྱུད་སྐབས། དབྱེ་བ་སོ་སོའི་དོན་བཏན་ལ་དབབ་པ་ལ་གཉིས། སྔོན་བྱུང་སངས་རྒྱས་ཀྱི་རྣམ་འཕྲུལ་ལྟར་རྒྱུད་ཀྱི་ཚིག་བཤད་པ་དང་། རྗེས་འཇུག་གང་ཟག་གི་ལམ་མངོན་པར་རྟོགས་པའི་རིམ་པ་ཉམས་སུ་བླང་བའོ། །དེ་སྐད་དུ་བུདྡྷ་གུ་ཧྱས་འདིའི་དོན་རྣམས་མདོར་བསྡུས་ན་སྔོན་བྱུང་སངས་རྒྱས་རྣམ་འཕྲུལ་དང་། རྗེས་འཇུག་མངོན་རྟོགས་མན་ངག་གོ །ཞེས་གསུངས། དང་པོ་ནི། སྔོན་སྟོན་པས་ཕུན་སུམ་ཚོགས་པ་ལྔའི་སྒོ་ནས་རྒྱུད་ལེགས་པར་གསུངས་པ་ལྟར། འདིར་ཡང་དེ་དང་མཚུངས་པར་བཤད་པར་བྱ་ཞིང་། གཞུང་ཚིག་རེ་རེ་ནས་འཆད་པའི་མན་ངག་ཀྱང་། སྔ་མས། དགོས་པ་རྣམ་པ་གཉིས་སུ་བསྟན། །ཚིག་དོན་བརྒལ་ལན་མཚམས་སྦྱར་བ། །རྣམ་པ་ལྔས་ནི་འདིར་ཤེས་བྱ། །ཞེས་མདོ་འཆད་ལུགས་དང་མཐུན་པ་དང་། རྒྱུད་སྤྱི་ལ་ཐུན་མོང་དུ་མཁོ་བ། བརྗོད་བྱ། རྗོད་བྱེད། དགོས་པ། ཉིང་དགོས། འགྲེལ་པ་སྟེ་རྣམ་པ་ལྔས་སྦྱར། གཉིས་པ་ནི། དཔུང་བཟང་གི་བསྡུས་དོན་ལས་གསུངས་པ་ལྟར་རིགས་ཐམས་ཅད་མཉེས་པར་བྱ་བའི་ཐབས་སུ་གྱུར་པ། འཇུག་པ། སྦྱོར་བ། སྒྲུབ་པ། གྲུབ་པའི་སྤྱོད་པ་བསྟན་པ་བཞིའོ།། །། ༈ རྣལ་འབྱོར་གྱི་རྒྱུད་ཀྱི་དམ་ཚིག་ལ་རིགས་ལྔ་སྤྱི་དང་སོ་སོའི་དམ་ཚིག་གཉིས་ལས། དང་པོ་ནི། གཞན་དོན་དུ་རྫོགས་བྱང་ཐོབ་པར་འདོད་པ་སྨོན་སེམས་དང་། དེའི་ཆེད་དུ་ཚུལ་ཁྲིམས་གསུམ་ལ་ཅི་ནུས་བསླབ་པར་དམ་བཅའ་བ་འཇུག་སེམས་གཉིས། གཉིས་པ་ནི། དཀོན་མཆོག་གསུམ་འཛིན་པ་རྣམ་སྣང་གི །རྡོ་རྗེ་དྲིལ་བུ་ཕྱག་རྒྱ་བླ་མ་བཞི་འཛིན་པ་མི་བསྐྱོད་པའི། ཟང་ཟིང་མི་འཇིགས་ཆོས་དང་བྱམས་པའི་སྦྱིན་པ་རྣམ་བཞི་གཏོང་བ་རིན་འབྱུང་། ཕྱི་བྱ་སྤྱོད། གསང་བ་རྣལ་འབྱོར། ཉན་རང་བྱང་སེམས་ཀྱི་ཐེག་པ་རྣམས་འཛིན་པ་སྣང་མཐའ། དམ་ཚིག་དང་སྡོམ་པ་ནན་ཏན་དུ་འཛིན་པའི་སྟེང་དཀོན་མཆོག་གསུམ་མཆོད་ལ་བརྩོན་པ་དོན་གྲུབ་ཀྱི་དམ་ཚིག་སྟེ་ལྔའོ།། །། ༈ གསང་སྔགས་ཕྱི་འགྱུར་གྱི་བཞེད་པར། རྒྱུད་སྡེ་གསུམ་དུ་བཞེད་པ་ནི། སློབ་དཔོན་སངས་རྒྱས་གསང་བས། རྣལ་འབྱོར་སྤྱོད་དང་བྱ་དབྱེ་བས། །རྒྱུད་སྡེ་རྣམ་པ་གསུམ་དུ་འགྱུར། །ཞེས་བླ་མེད་ཀྱང་ཏིང་ངེ་འཛིན་གཙོ་བོར་གྱུར་པ་ལ་དགོངས་ནས་རྣལ་འབྱོར་དུ་བསྡུས་པའོ། །ལྔར་དབྱེ་བ་ལ། སློབ་དཔོན་ཀླུ་སོགས་ཡེ་ཤེས་རྡོ་རྗེ་ཀུན་བཏུས་ཀྱི་རྗེས་སུ་འབྲངས་ཏེ་མདོ་སྡེ་རྟོག་པའི་རྒྱུད་དང། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོ་བླ་ན་མེད་པའི་རྒྱུད་སྡེ་ལྔར་བཞེད་པ་ལས། རྟོག་པའི་རྒྱུད་ནི་སྔགས་དང་སྦྱིན་སྲེག་སོགས་ཕྱིའི་བྱ་བ་གཙོ་བོར་སྟོན་ཕྱིར་ངོ་བོ་བྱ་རྒྱུད་དུ་བསྡུའོ། །ཡང་ཀྱཻ་རྡོར་ལས། དགོད་དང་ལྟ་བ་བདག་གིས་ངང་། །འཁྱུད་དང་དེ་བཞིན་གཉིས་གཉིས་ཀྱིས། །རྒྱུད་ཀྱང་རྣམ་པ་བཞི་རྣམས་ཀྱིས། །དགོངས་པའི་སྐད་ནི་མ་བསྒྲགས་པ། ཞེས་བཞིར་གསུངས་པའི་ཤུགས་ལས་ལྔ་པ་ཞེས་སྟོན་པས་སློབ་དཔོན་བིཪྺ་པ་སོགས། བྱ་སྤྱོད་རྣལ་འབྱོར་གསུམ། རྣལ་འབྱོར་བླ་མ་དང་བླ་མེད་གཉིས་ཏེ་ལྔར་དབྱེ་བའང་གཉིས་ཀ་གསང་བའི་ཡེ་ཤེས་བླ་ན་མེད་པ་སྟོན་པས་བླ་མེད་དུ་བསྡུའོ། །དྲུག་ཏུ་སྟོན་པ་ནི། བདེ་མཆོག་རྩ་རྒྱུད་ལས། །ཇི་སྲིད་མདོ་བྱ་སྤྱོད་པ་དང་། །རྣལ་འབྱོར་གསང་མཐའི་དབྱེ་བ་ལས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། ཞེས་པས། སློབ་དཔོན་ཀཱ་མ་ལ་ཤཱི་ལ་སོགས་མདོ་སྡེ་རྟོག་པའི་རྒྱུད་དང་། བྱ་སྤྱོད་རྣལ་འབྱོར། རྣལ་འབྱོར་གསང་བ་དང་། གསང་མཐའི་རྒྱུད་སྡེ། དེ་ལྟ་ནའང་། དང་པོ་ནི་བྱ་རྒྱུད་དུ་འདུ་ལ། ཕྱི་མ་ནི་རྣལ་འབྱོར་མའི་རྒྱུད་རྗོད་བྱེད་རྟོགས་དཀའ་བ་ཙམ་ལ་དགོངས་ནས་ལོགས་སུ་བྱས་པ་ཡིན་གྱི། དོན་གསང་བའི་ཡེ་ཤེས་བླ་ན་མེད་པ་ལས་ལོགས་སུ་གྱུར་པ་མེད་ཕྱིར་རྒྱུད་སྡེ་བཞིར་འདུ་བ་སྟེ། དེ་ཡང་གུར་ལས། དམན་པ་རྣམས་ལ་བྱ་བའི་རྒྱུད། སོགས་དང་། ས་པཎྜི་ཏས། མི་རིགས་བཞི་དང་དུས་ཚོད་བཞིས། སོགས་གསུངས་སོ།། །། ༈ རྩ་རྒྱུད་ལས། །དེ་ལྟར་འཁོར་བར་འདོད་པ་ཡི། །ཡོན་ཏན་ལྔ་ལྡན་རིན་པོ་ཆེ། །མ་དག་པས་ན་དུག་ཏུ་འགྱུར། །དག་པས་བདུད་རྩི་ལྟ་བུར་འགྱུར། །ཞེས་དང་། རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་འཁོར་བ་དག་པས་ན། །འཁོར་བ་མྱ་ངན་འདས་པར་འགྱུར། །བྱང་ཆུབ་སེམས་ནི་མྱ་ངན་འདས། ཞེས་སོགས་ཀྱིས་འཁོར་འདས་དབྱེར་མེད་དུ་བསྟན་ནོ། །རྗེ་ས་སྐྱ་པས། ཡེ་ཤེས་རྣམ་པར་རྟོག་པ་ཡིས། །དབང་དུ་གྱུར་ན་གྲོལ་བ་མེད། །ཅེས་དང་། ཆོས་ཉིད་འཛིན་པས་དཀྲིས་པ་ལ། །མི་རྟོག་པ་ཡང་འཁྲུལ་སྣང་ཡིན། །དེ་ཡིས་མི་རྟོག་བསྒོམས་ན་ཡང་། །རྣམ་རྟོག་མཚན་མའི་འཁྲུལ་འཁོར་ཡིན། །ཞེས་སོ། །སམྦུ་ཊར། དང་པོར་སྟོང་ཉིད་བསྒོམས་ནས་ནི། །ལུས་ཅན་རྣམས་ཀྱི་དྲི་མ་བཀྲུ། །ལུས་སོགས་སྟོང་པའི་ཞིང་ས་ལ། །བློ་དང་ལྡན་པས་ས་བོན་གདབ། །ཅེས་བསྐྱེད་རྫོགས་བསྒོམས་པའི་སྔོན་དུ་ལྟ་བ་བསྟན་པར་མཛད། རྗེ་ས་སྐྱ་པས། འཁོར་བ་བཙལ་བས་མ་རྙེད་པ། །མྱ་ངན་འདས་པའི་རང་བཞིན་ཡིན། །འཁོར་བ་མེད་པར་གོ་བ་དེ། །འཁོར་འདས་དབྱེར་མེད་ལྟ་བ་ཡིན། ཞེས་བཤད། རྗེ་བཙུན་རིན་པོ་ཆེས། །དམིགས་མེད་འཇིགས་དང་བྲལ་བའི་སྐྱབས་སུ་འགྲོ། །ཚད་མེད་དམིགས་ཡུལ་སྤངས་པའི་སེམས་བསྐྱེད་བྱ། །དེ་ཡི་ཆོས་ཉིད་རང་བཞིན་ནམ་མཁའ་འདྲ། །བསགས་པ་མེད་པའི་དགེ་རྩ་བྱང་ཆུབ་བསྔོ། །ཞེས་དམ་པ་གསུམ་གྱི་རང་བཞིན་ཁྱད་པར་དུ་བསྟན་ནོ།། །། ༈

ཡུལ་ཆེན་ཉེར་བཞི་དང་། །གནས་སོ་བདུན་གྱི་རྣམ་པར་བཞག་པ་ལ། གནས་སོགས་བསྟན་པའི་དགོས་པ། དགོས་པ་དེ་ལྡན་གྱི་རྣམ་བཞག་དངོས། དེ་དག་གཞི་ལམ་འབྲས་གསུམ་སྦྱོར་ཚུལ་ལོ། །དང་པོ་ནི། སམྦུ་ཊར། །ཕ་རོལ་ཕྱིན་བཅུའི་ས་རྣམས་ནི། །རྣལ་འབྱོར་མ་ཡིས་ཀླ་ཀློའི་སྐད། །བཱུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་གནས། ཞེས་ཕར་ཕྱིན་ནས་རབ་དགའ་སོགས་ལམ་ལྔ་ས་བཅུ་བགྲོད་བྱར་བསྟན་པ་གང་ཞིག །སྔགས་སུ་གནས་ལ་སོགས་པའི་མིང་གིས་བཏགས་ནས་བསྟན་ཏེ། དེ་ཡང་ཕྱི་རོལ་དཔའ་བོ་དཔའ་མོ་འདུ་བའི་ཡུལ་པཱུལླི་ར་སོགས་ནང་རྡོ་རྗེའི་ལུས་ལ་གནས་པའི་ཚུལ་ལ་མཁས་པ་དང་། དེ་ལྟར་གནས་པར་ཤེས་ཤིང་ལམ་དུ་བྱས་པས། དཔའ་བོ་དང་རྣལ་འབྱོར་མ་རྣམས་དང་རྗེས་སུ་མཐུན་པའི་རླུང་དང་ཐིག་ལེའི་རྣམ་པ་དབུ་མར་ཐིམ་སྟེ་སའི་རྟོགས་པ་སྐྱེ་ཞིང་། སར་གནས་ཀྱི་ཚུལ་བཟུང་བའི་དཔའ་བོ་དང་དཔའ་མོ་རྣམས་བདག་གི་དབང་དུ་འདུ་བ་དང་། བརྟན་པ་ཐོབ་པས་སྤྱོད་པའི་ཕྱིར་རྒྱུ་བའི་ཡུལ་ཤེས་པ་ལ་སོགས་དགོས་པ་བསམ་གྱིས་མི་ཁྱབ་པ་ཉིད་དོ། །གཉིས་པ་ལ་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཧེ་བཛྲ་ལས། ཀྱེ་བཅོམ་ལྡན་འདས་འདུ་བའི་གནས་དུ་ལགས། ཞེས་པའི་ལན་དུ་བཅོམ་ལྡན་འདས་ཀྱིས་བཀའ་སྩལ་པ། གནས་ལྷ། དང་ཉེ་བའི་དྲི་ཟ། གནས་དང་ནི། །ཞིང་གནོད་སྦྱིན། དང་ཉེ་བའི་ཞིང་ཉིད་དང་། ། ཚནྡོ་སྲིན་པོ། ཉེ་བའི་དང་། །དེ་བཞིན་ཀླུ་འདུ་བ་ཉེ་འདུ་བ། །འཐུང་སྤྱོད་ཉེ་བའི་འཐུང་སྤྱོད་དང་། །དུར་ལྷ་མིན། ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། ཞེས་མདོར་བསྡུ་ན། དབྱེ་གཞི་བཅུ་གཉིས་སུ་གནས་པ་ཡིན་ནོ། །གཉིས་པ་ལ་གསུམ། གནས་ཉེར་བཞི་བསྟན་པ། ཡུལ་སོ་གཉིས་བསྟན་པ། ཡུལ་སོ་བདུན་བསྟན་པའོ། །དང་པོ་ལའང་གྲངས་ངེས་ཀྱི་སྒོ་ནས་སྤྱིར་བཤད་པ་དང་། གནས་སོགས་བྱེ་བྲག་ཏུ་བཤད་པའོ། །དང་པོ་ནི། སྔོན་བྱུང་དང་སྦྱར་ན། རྩོད་པའི་དུས་ཀྱི་མགོ་བརྩམས་པའི་ཚེ། སེམས་ཅན་རྣམས་གཅིག་གིས་གཅིག་གསོད་པར་བརྩམས་པ་བྱུང་སྟེ། དེའི་བསད་པའི་རོ་རྣམས་ཕྱོགས་མཚམས་བརྒྱད་དུ་བསྐྱལ་བ་ལས་དུར་ཁྲོད་བརྒྱད་ཆགས་ཤིང་། དེ་ནས་རིམ་པར་གནས་ཡུལ་རྣམས་ཀྱང་ཆགས་པ་ལས། རི་རབ་ཀྱི་རྩེར་དྲག་པོ་ཡབ་ཡུམ་བྱུང་ཞིང་། དེའི་སྐུ་གསུང་ཐུགས་ཀྱི་སྤྲུལ་པ་དྲག་པོ་འཇིགས་བྱེད་བརྒྱད་གསུམ་ཉེར་བཞི་བྱུང་བས་པཱུལླི་ར་སོགས་ཡུལ་ཉེར་བཞི་བཟུང་ནས་འཇིག་རྟེན་གྱི་ཁམས་སུ་མི་དགེ་བའི་ཚུལ་ལ་སྤྱོད་པར་བྱེད་པ་ན། འོག་མིན་སྟུག་པོ་བཀོད་པར་བཞུགས་པའི་རྒྱུའི་ཧེ་རུ་ཀཿལས། རི་རབ་ཀྱི་རྩེ་མོར་སྤྲུལ་སྐུ་འབྲས་བུའི་ཧེ་རུ་ཀར་བཞེངས་ནས། འདུལ་བྱེད་དེ་དག་གདུལ་བྱ་དང་མཐུན་པའི་ཆ་ལུགས་སུ་བསྒྱུར་ནས་ལུས་དབང་དུ་བྱས་ཤིང་གདན་དུ་བཏིང། འཇིག་རྟེན་པའི་ཐོད་པའི་དུམ་བུ་སོགས་ཀྱི་སྲོག་སྔགས་ཀ་ར་ཀ་ར་སོགས། འཇིག་རྟེན་ལས་འདས་པའི་གཉེན་པོ་ཨོཾ་དང་ཧཱུྃ་ཕཊ་ཀྱི་བར་དུ་བཅུག་ནས་ལྷ་སོ་སོའི་སྔགས་སུ་བྱིན་གྱིས་བརླབས་པས་ངག་དབང་དུ་མཛད། གདུལ་བྱ་དེ་རྣམས་རྣམ་པར་མི་རྟོག་པའི་ངང་དུ་བརྒྱལ་བར་མཛད་པས་ཡིད་དབང་དུ་བྱས། བཙུན་མོ་རྣམས་ལ་དགའ་བཞིས་ལོངས་སྤྱོད། རུས་པའི་རྒྱན་ཕྲོགས་ཏེ་སྐུར་གསོལ། ལོངས་སྤྱོད་ཕྲོགས་ཏེ་ཚོགས་འཁོར་དུ་རོལ་ལག་ཆ་ཕྲོགས་ཏེ་ཕྱག་མཚན་དུ་མཛད། རོ་གདན་སོགས་ཕྲོགས་ཏེ་གདན་དུ་བཏིང་། འདུག་པའི་ཡུལ་ཕྲོགས་ཏེ་ཕོ་བྲང་དུ་བྱས་པ་དང་། སྒྲིབ་པ་རྣམ་པར་དག་པ་སྲོག་ཐིམ་པ་སྟེ་སྤངས་བ་དང་། སེམས་འོད་གསལ་དུ་འདྲེས་ཏེ་ཟུང་འཇུག་ཏུ་བཞེངས་པ་སེམས་ཐིམ་པ་སྟེ་རྟོགས་པ་ཕུན་སུམ་ཚོགས་པར་མཛད་པ་སོགས་ཙཀྲ་སམྦར་ལས་འབྱུང་བ་དང་ཚུལ་མཐུན་པར་གསང་སྔགས་སྔ་འགྱུར་གྱི་གཞུང་དུའང་བཤད་དོ། །གཉིས་པ་ནི། ཕྱི་རོལ་དུ།། །། ༈སྐུ་པཱུལླིར་ཤར་མ་ལ་ཞེས་ཏེ་༡རྒྱས་པའི་རི། བྱང་ཛཱ་ལནྡྷ་ར་དྲ་བ་མཁའ་སྤྱོད་འཛིན་པ༡། ཨཽཌཱི་ཨཱ་ནུབ་ནཱ་རྣ་བ་གཡོན་པ་འཕུར་འགྲོ༡། ཨརྦུ་ལྷོ་ད་མཆོད་འོས་ལྟག་པ། ཤར་ལྷོ་གོ་དཱ་བ་རི་བའི་མཆོག་༢རྣ་གཡས། སྦྱིན། ལྷོ་ནུབ་ར་མེ་སྨིན་མཚམས་ཤྭ་ར་དགའ་བའི་དབང་༢ཕྱུག །དེ་བཱི་ནུབ་བྱང་ཀོ་མིག་གཉིས་ཊ་ལྷ་མོ་མཁར། མཱ་བྱང་ཤར་ལ་ཕྲེང་༢ཅན། ཕྲག་པ་གཉིས།། །། ༈ ཀཱ་གསུང་མ་མཆན་ཁུང་གཉིས་རཱུ་ཤར་པ་འདོད་པའི་གཟུགས་༣། ཨེ་ཏྲེ་བྱང་རོལ་པ་ནུ་མ་གཉིས་ཅན། ཏྲི་ཤ་ཀུན་༤ལྟེ་བ་འདབ་ཆགས་གསུམ་པ། ལྷོ་ཀོ་ས་ལ་སྣ་རྩེ་མཛོད་༤ལན་ནམ་དགེ་བ་ཅན། ཀ་ཤར་ལྷོ་ལིངྐ་ཙི་ཁ་མཚན་ནམ་སྨྲ་༥བའི་རྟགས། ལམྦ་ཀ་ལྷོ་ནུབ་འཕྱང་མགྲིན་པ་བ་ཅན། སྙིང་ག་ཀཱཉྩི་ཀ་ནུབ་བྱང་སྐྱུར་བག་ཅན༦། བྱང་ཤར་ཧཱི་མ་འདོམས་པར་ལ་ཡ་ས་སྤྱོད་གངས་ཅན༦།། །། ༈ ཐུགས་པྲེ་ཏ་ཤར་པཱུ་མཚན་མ་རི་ཡི་དྭགས་གྲོང་ཁྱེར། བྱང་གྲྀ་ཧ་དེ་གཤང་ལམ་ཝ་ཁྱིམ་༧གྱི་ལྷ། ནུབ་སཽ་རཱ་ཥྟ་བརླ་གཉིས་ཡུལ་འཁོར་བཟང་པོ་༨། ལྷོ་སུ་ཝརྞྞཱ་བྱིན་པ་དྭཱི་པ་གསེར་གླིང་། ཤར་ལྷོ་ན་ག་ར་སོར་མོ་བཅུ་དྲུག་གྲོང་༩ཁྱེར། ལྷོ་ནུབ་སིནྡྷུ་ནི་བོལ་གོང་རྒྱ་༩མཚོ། མ་ནུབ་བྱང་རོ་མྱ་མཐེ་བོང་བཞི། ང་མ་༡༠ཐང་བྱང་ཤར་ཀུ་༡༡པུས་མོ་གཉིས་ལུ་ཏ་རིགས་ས་འོག་སྤྱོད་ལྡན་ཞེས་བྱ་བ་༨རྣམས་སོ། །དེ་རྣམས་ནང་དུ་སྤྱི་བོ་པཱུལླི་ར་མ། སྤྱི་གཙུག་ཛ་ལནྡྷ་ར་སོགས་ཏེ་ཤེས་པར་སླའོ། །གཞན་དུ་ས་བཅུ་གཉིས་དང་སྦྱར་ན། ཧེ་བཛྲ་ལས། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚནྡ་མངོན་དུ་གྱུར་པ་སྟེ། ཉེ་བའི་ཚནྡོ་སྦྱོང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཞེས་པས་བསྟན་ཅིང་། འཐུང་སྤྱོད་དང་། ཉེ་བའི་འཐུང་སྤྱོད་གཉིས་ནི་དཔེ་མེད་པའི་ས་དང་། ཡེ་ཤེས་ཆེན་པོའི་སར་སྦྱོར་དགོས་པར་རྒྱུད་རྒྱས་པའི་ལུང་ཀུ་མུ་ཏིར་དྲངས་པ་ལས་གསལ་ལོ། །གཉིས་པ་ནི། ཧེ་བཛྲ་རྩ་རྒྱུད་ལས། ཀྱེ་བཅོམ་ལྡན་འདས། གནས་ལ་སོགས་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གནས་ནི་ཛ་ལནྡྷཱ་རར་བཤད་༡། །དེ་བཞིན་དུ་ནི་ཨོཌྱནྡྲ༢། །༦གནས་ནི་ཀོལླ་གི་རི་ཉིད༣། །དེ་བཞིན་དུའང་ཀཱ་མ་རུ་ཉིད༤། ༡ །ཉེ་གནས་མ་ལ་ཝ་ཞེས་བརྗོད༥། །སིནྡྷུ་ན་ག་ར་ཉིད་དོ། ༢ །ཞིང་ནི་མུམྨུ་ནིར་བཤད་༧དེ། །ཞིང་ནི་བྱེད་པའི་བྲང་ཉིད་དོ། །དེ་བཱི་ཀོ་ཊ་དེ་བཞིན་ཞིང་༩། །ཞིང་ནི་ལྕགས་པའི་བྲང་༡༠ཉིད་དོ། ༣ །ཉེ་ཞིང་ཀུ་ལུ་ཏ་ཞེས་༡༡བརྗོད། །དེ་བཞིན་ཨརྦུ་ད་ཉིད་དོ་༡༢། །བ་ཡི་མཆོག་སྦྱིན་ཁ་བའི་རི་༡༤། །ཉེ་བའི་ཞིང་ནི་མདོར་བསྡུས་པའོ། ༤ །ཚནྡོ་ཧ་ནི་ཀེ་ལ་དང་། །ལན་ཚྭ་རྒྱ་མཚོའི་ནང་སྐྱེས་དང་། །ལམྦ་ཀ་དང་ཀཱཉྩི་ཉིད། །དེ་བཞིན་སཽ་རཱཥྟ་ཉིད་དོ། ༥ །ཉེ་བའི་ཚནྡོ་ཀ་ལིངྒ། གསེར་དང་ལྡན་པའི་གླིང་དང་ནི། །ཀོངྐ་ན་ཡང་ཉེ་ཚནྡོ། །མདོར་བསྡུས་པས་ནི་བརྗོད་པར་བྱ། ༦ །འཐུང་སྤྱོད་གྲོང་ཁྱེར་གྱི་དང་ཡང་། །འཐུང་སྤྱོད་གྲོང་གི་མཐར་གནས་པ། །ཙ་རི་ཏྲ་དང་ཀོ་ས་ལ། །བིནྡྷྱ་གཞོན་ནུའི་གྲོང་ཁྱེར་རོ། །རྡོ་རྗེ་སྙིང་པོ་སྙིང་རྗེ་ཆེ། །ཉེ་བའི་འཐུང་སྤྱོད་དེ་ཉེ་བའོ། །དུར་ཁྲོད་རབ་སོན་དགེ་འདུན་དང་། །དུར་ཁྲོད་རྒྱ་མཚོའི་འགྲམ་ཉིད་དོ། །སྐྱེད་ཚལ་ར་བའི་རྫིང་བུའི་འགྲམ། །ཉེ་བའི་དུར་ཁྲོད་བརྗོད་པར་བྱ། །ཞེས་སུམ་ཅུ་རྩ་གཉིས་སུ་བསྟན་ཏོ། །གསུམ་པ་ཡུལ་སོ་བདུན་ལ་གཉིས་ཏེ། །བསྟན་བཅོས་ཆེན་པོ་ལས་འབྱུང་བ། །དུས་ཀྱི་འཁོར་ལོ་ལས་འབྱུང་བའོ། །དང་པོ་ནི། ཀྱཻ་རྡོར་ལ་མི་ཕྱེད་མ་སོགས་རྩ་སོ་གཉིས་དང་། དེ་སྟེང་སྦས་པའི་རྩ་ལྔ་བསྣན་པས་སོ་བདུན་ཡོད་པ། དེ་བཞིན་དུ་ཕྱི་རོལ་གྱི་ཡུལ་ཡ་གྱལ་སྦྱོང་བྱེད་དང་སྦྱངས་འབྲས་ལ་སོགས་པ་སོ་བདུན་དུ་འགྱུར་བའི་འཐད་པས་ཏེ། དེ་ཡང་འདུ་བ་དང་ཉེ་བའི་འདུ་བ་བཞི་དང་། མི་སློབ་པའི་ཕྱི་རོལ་གྱི་གནས་འོག་མིན་ནམ། རྡོ་རྗེ་གདན་དང་སོ་བདུན་ཏེ། དེ་ཡང་ཕྱག་ཐིག་ལས། འདུ་བ་ལ་ཀརྨ་རཱ་སཊ་ཀ་དང་། གསེར་གླིང་གཉིས་དང་། ཉེ་བའི་འདུ་བ་ཀོངྐ་ན་དང་འབིགས་བྱེད་གཉིས་ཏེ་བཞིར་བཤད་དོ། །བདེ་མཆོག་ལས། འདུ་བ་པྲེ་ཏ་པུ་རི། གྲྀ་ཧ་དེ་ཝ། ཉེ་འདུ་སཽ་རཱཥྟ། སུ་བརྞྭཱ་དྭཱི་པར་བཤད་དོ། །དེ་བཞི་པོའི་ནང་དུ་སོ་གཉིས་པར་ཟིན་པའི་མིང་ཅན་འགའ་རེ་ཡོད་ནའང་ཟློས་པར་མི་བཟུང་སྟེ། དོན་ས་ཐ་དད་མི་འདྲ་བ་སྦྱོར་དགོས་པའི་ཕྱིར་རོ། །ཡང་ན་སྔར་སྨོས་སོ་གཉིས་སྟེང་། བདེ་མཆོག་ལས་བཤད་པའི། ར་མེ། ཨོ་ཊེ། ཏྲི་ཤ །སྲེ་ཏ། གྲྀ་ཧ་ལྔ་བསྣན་པས་སློབ་པའི་གནས་ཁོ་ནར་སོ་བདུན་དུ་བགྲང་ངོ་། །ཡང་ན་བདེ་མཆོག་གི་ཡུལ་ཉེར་བཞིའི་སྟེང་དུ། སྔར་སྨོས། མུམྨུ་ནི་ར། བྱེད་པའི་བྲང་། ལྕགས་པའི་བྲང་། ཧ་རི་ཀེ་ལ། རྒྱ་མཚོའི་ནང་སྐྱེས། ཀོངྐ་ན། གྲོང་གི་མཐའ། རྩྭ་རི། བིནྡྷྱ། གཞོན་ནུའི་གྲོང་ཁྱེར། རབ་སོན། རྒྱ་མཚོའི་འགྲམ། སྐྱེད་ཚལ་ར་བའི་རྫིང་བུའི་འགྲམ་རྣམས་ཏེ་བཅུ་གསུམ་པོ་བསྣན་པ་སྟེ། བདེ་མཆོག་གི་ཡུལ་ཉེར་བཞིའི་དཔའ་བོ་དང་རྣལ་འབྱོར་མའི་སྟེང་། བདེ་ཆེན་འཁོར་ལོའི་ལྷ་ལྔ་དང། སྒོ་མཚམས་མ་བརྒྱད་དེ་བཅུ་གསུམ་བསྣན་པའི་དག་སྦྱོར་དུ་བཤད་དོ། །སྒོ་མཚམས་མ་བརྒྱད་ཀྱི་གནས་ནི་དུར་ཁྲོད་བརྒྱད་དང་། བདེ་ཆེན་འཁོར་ལོའི་དཀྱིལ་འཁོར་གྱི་ལྷ་མོ་བཞིའི་གནས་ནི། རི་རབ་ཀྱི་བྱང་ཤར་དང་། དབུས་དང་། གཞན་འཕྲུལ་དབང་བྱེད་དང། རྡོ་རྗེ་གདན་རྣམས་སུ་བཛྲ་ཌཱ་ཀིའི་འགྲེལ་པར་བཤད་དོ། །གཉིས་པ་ནི། གནས་ལ་སོགས་པའི་དབྱེ་གཞི་དུས་འཁོར་ལས། དཔལ་ལྡན་ལྷུན་པོའི་ཕྱོགས་རྣམས་ཀུན་ཏུ་ས་ཡི་དཀྱིལ་འཁོར་ལ་སོན་གནས་རྣམས་ཀུན་དང་ཉེ་བའི་གནས། །ཞེས་པའི་འགྲེལ་པར། གནས་ནི་ཕྱོགས་བཞིར་རླུང་དང་། མེ་དང། ཆུ་དང་། སའི་རང་བཞིན་གྱིས་གནས་པ། ཤར་གྱི་ལུས་འཕགས་དང་། ཛམ་བུའི་གླིང་ཆུང་ངུ་དང་། བྱང་གི་སྒྲ་མི་སྙན་དང་། ནུབ་ཀྱི་བ་ལང་སྤྱོད་དོ། །ཉེ་བའི་གནས་ནི་རང་བཞིན་དེ་ཉིད་ཀྱི་ཕྱོགས་མཚམས་རྣམས་སུ་སྟེ། མེ་དང་། བདེན་བྲལ་དང་། དབང་ལྡན་དང་། རླུང་གི་ཕྱོགས་སུའོ། །དེ་བཞིན་དུ། ཞིང་དང་ཉེ་བའི་ཞིང་ནི་རྒྱ་མཚོའི་ཕྱེད་ལའོ། །འདུན་པ་དང་ཉེ་བའི་འདུན་པ་ནི་རྒྱ་མཚོའི་ཕྱེད་གཞན་ལའོ། །འདུས་པ་ཅན་དང་ཉེ་བའི་འདུས་པ་ཅན་ནི་མེའི་དཀྱིལ་འཁོར་གྱི་ཕྱེད་ལའོ། །ཁང་པ་དང་ཉེ་བའི་ཁང་པ་ནི་མེའི་ཕྱེད་གཞན་ལའོ། །དུར་ཁྲོད་དང་ཉེ་བའི་དུར་ཁྲོད་ནི་རླུང་གི་དཀྱིལ་འཁོར་གྱི་ཕྱེད་ལའོ། །དུར་ཁྲོད་ཆེན་པོ་བརྒྱད་ནི་རླུང་གི་དཀྱིལ་འཁོར་གྱི་མཐའ་ལ་སྟེ། དེ་ལྟར་གནས་ལ་སོགས་པ་རྣམས་བཅུ་གཉིས་སུ་རིག་པར་བྱ་སྟེ། ལུས་ལ་ཡང་བཅུ་གཉིས་ནི་ལག་པ་དང་རྐང་པ་དག་གི་ཚིགས་བཅུ་གཉིས་སོ། །ཞེས་གནས་ལ་སོགས་པའི་དབྱེ་གཞི་བཅུ་གཉིས་པོ་འབུམ་ཕྲག་བཞི་འཇིག་རྟེན་ཁམས་རྫོགས་པ་ལ་གནས་པར་གསུངས་སོ། །དེས་ན་ཕྱི་ནང་མཐུན་པར་སྦྱར་བའི་ཕྱིར་གསུངས་པ་ཡིན་གྱི། སྤྱོད་པ་སྤྱོད་པས་རྒྱུའི་གནས་ཁོ་ན་མ་ཡིན་པར་ཤེས་པར་བྱའོ། །དབྱེ་བའི་ཡ་༢གྱལ་ནི། སུམ་ཅུ་རྩ་བདུན་རབ་ཏུ་དབྱེ་བས་སྲིད་པ་གསུམ་གྱི་གནས་སུ་བྱང་ཆུབ་ཕྱོགས་ཀྱི་ཆོས་རྣམས་ཏེ། །དེ་རྣམས་མཐའ་དག་རྣལ་འབྱོར་མ་རྣམས་ས་ཡི་སྟེང་གི་གནས་སུ་རྣལ་འབྱོར་པ་ཡིས་རིག་པར་བྱ། །དེ་ལྟར་གནས་ལ་སོགས་པ་ཐམས་ཅད་མི་ཡི་བདག་པོ་ཕྱི་དང་ལུས་ལ་ཡང་ནི་དེ་བཞིན་འགྱུར། །ཞེས་པ་ཙམ་ལས་ཡུལ་གང་ན་ཡོད་ཀྱི་ངེས་པ་མ་བསྟན་ལ། དེ་ཡང་རྣལ་འབྱོར་མ་སོ་དྲུག་གི་དབྱེ་བས་གནས་སོ་དྲུག་ཏུ་བཤད་པ། ནང་ལྟར་ཁམས་དང་སྐྱེ་མཆེད་རྒྱུ་མ་སོགས་ཀྱི་དབྱེ་བས་སོ་སོར་སྦྱར་བ་དང་། ཕྱིའི་གནས་ལ་དྲང་དོན་དུ། ཨོ་རྒྱན་སོགས་རྒྱུད་སྡེ་གཞན་ནས་བཤད་པ་དེ་དག་དང་། ངེས་དོན་བོད་ཡུལ་ལྟ་བུའི་ཡུལ་ཁམས་རེ་རེ་དང་། མཉན་ཡོད་ལྟ་བུའི་གྲོང་ཁྱེར་རེ་རེ་ནའང་རྣལ་འབྱོར་མ་སོ་དྲུག་གི་དབྱེ་བས་ཡུལ་༢༦དང་། དེ་ཐམས་ཅད་ལ་ཁྱབ་བྱེད་རྡོ་རྗེ་སེམས་དཔའི་གནས་དང་པོ་བདུན་པོ་ཐམས་ཅད་ཚང་བར་བཤད་དེ། དྲི་མེད་འོད་ལས། ད་ནི་གནས་ཞེས་པ་ལ་སོགས་པས་ཉེ་བའི་གནས་ལ་སོགས་པའི་གནས་རྣམས་གསུངས་ཏེ། འདིར་ཐུན་མོང་བྱིས་པ་རྣམས་ཡུལ་འཁྱམས་པའི་དོན་དུ། ཛ་ལནྡྷཱ་ར་ལ་སོགས་པ་རྣམས་གནས་ལ་སོགས་པར་གསུངས་སོ། །དེ་ཉིད་ནི་ཐམས་ཅད་དུ་ཁྱབ་པར་བྱེད་པར་མི་འགྱུར་ཏེ། རྣལ་འབྱོར་མ་རྣམས་ཀྱི་རིགས་སུམ་ཅུ་རྩ་དྲུག་ནི་གྲོང་ཁྱེར་གཅིག་ཏུའང་གནས་སོ། །གང་གིས་ན་འདིར་མཆོག་གི་དང་པོའི་སངས་རྒྱས་ཐམས་ཅད་ལ་ཁྱབ་པར་བྱེད་པའི་ཕྱིར་ན། བོད་ལ་སོགས་པ་དང་། རྒྱ་ནག་ལ་སོགས་པའི་ཡུལ་རྣམས་ན་ཡང་གནས་ལ་སོགས་པ་རྣམས་ཡོད་དོ། །དེ་ཉིད་ནི་བསྡུས་པའི་རྒྱུད་གཞན་དུ་མ་བསྟན་ཏོ། །ཡུལ་ཐམས་ཅད་དང་གྲོང་ཐམས་ཅད་དུ་གནས་ལ་སོགས་པ་གསུངས་པ་ནི། གནས་ནི་སྒྲོལ་མ་ལ་སོགས་པ་རྣམས་ཀྱི་ཁྱིམ་སྟེ་རྣམ་པ་བཞིའོ། །དེ་བཞིན་དུ་སྒྲ་རྡོ་རྗེ་མ་ལ་སོགས་པ་རྣམས་ཀྱི་ཁྱིམ་ནི་རྣམ་པ་དྲུག་གོ །ཙཪྩི་ཀཱ་ལ་སོགས་པ་རྣམས་ཀྱི་ཁྱིམ་ནི་ཚནྡོ་ཧ་རྣམ་པ་བརྒྱད་དོ། །རྨུགས་བྱེད་མ་ལ་སོགས་པ་རྣམས་ཀྱི་ཁྱིམ་ནི་འདུས་པ་རྣམ་པ་བཅུའོ། །ཁྱི་གདོང་མ་ལོགས་པ་རྣམས་ཀྱི་ཁྱིམ་ནི་དུར་ཁྲོད་རྣམ་པ་བརྒྱད་དོ། །ཞེས་སོ། །གསུམ་པ་གཞི་ལམ་འབྲས་བུར་སྦྱར་ན། གཞི་འཁོར་བའི་གནས་སྐབས་སྦྱང་བྱ། ཕུང་པོ༥། འབྱུང་བ༥། སྐྱེ་མཆེད༦། ཡུལ༦། དཔུང་པ༢། ཁ༡། གསང་བ་༡། ལག༢ །ངར་༢། པུས་མོ༢། སྤྱི་བོ་༡༦། རྐང་མཐིལ་གཉིས་གཅིག་ཏུ་བརྩི་བ་སྟེ་བཅུ། ཉོན་མོངས་པ་ལྔ་སྟེ་སོ་བདུན་ནོ། །ལམ་སྦྱོང་བྱེད་ལ། ཐུན་མོང་ཕ་རོལ་ཏུ་ཕྱིན་པ་ལྟར་ན་དྲན་པ་ཉེ་བར་བཞག་པ་སོགས་དང་། ཁྱད་པར་རྡོ་རྗེ་ཐེག་པའི་ལུགས་ལ་བསྐྱེད་རྫོགས་གཉིས་ལས། དང་པོ་ལའང་། རྟེན་གཞལ་ཡས་ཁང་གི་ཁྱད་ཆོས་རྣམས་བྱང་ཕྱོགས་སོ་བདུན་དུ་རྫོགས་པ་དང་། བརྟེན་པ་དེ་བཞིན་གཤེགས་པ་ཡབ་ཡུམ་བཅུ། གཏི་མུག་རྡོ་རྗེ་མ་༦སོགས། གཟུགས་རྡོ་རྗེ་མ་༦སོགས། གཤིན་རྗེའི་གཤེད་སོགས་ཁྲོ་བོ་བཅུ། མངོན་བྱང་༥སྟེ་སོ་བདུན་ནོ། །ཕྱི་མ་ལ་ཡང་། རྟེན་དཀྱིལ་འཁོར་བཞི་དང་སྦྱར་ན། དགྱེས་རྡོར་གྱི་ལུགས་སུ་རྩ་སོ་བདུན་དང་། བདེ་མཆོག་ལས་པཱུ་ཛ་སོགས་པའི་རྩ་ཡི་གེའི་རྣམ་པ་༢༤། དེ་སྟེང་ཧཱུྃ་རིང་བརྒྱད། བྷྲཱུྃ་ཨཾ་ཛིཾ་ཁཾ་ཧཱུྃ་བསྣན་པ་སྟེ། རྩ་དེ་དག་གི་ནང་ན་གནས་པའི་ཁམས་རྣམས་ནི་ཁམས་བདུད་རྩིའི་དཀྱིལ་འཁོར་སོ་བདུན། དེ་དག་ལ་དབང་བསྒྱུར་བའི་རླུང་རྣམས་ནི་སྙིང་པོ་ཡེ་ཤེས་རླུང་གི་དཀྱིལ་འཁོར་སོ་བདུན་ནོ། །བརྟེན་པ་ཡེ་ཤེས་ལྔ་དང་སྦྱར་ན། རྟེན་དེ་དག་ལས་སྐྱེས་པའི་མཚོན་བྱེད་དཔེ་ཡི་ཡེ་ཤེས་དང་༣༧། མཚོན་བྱ་དོན་གྱི་ཡེ་ཤེས་༣༠སོ། སྦྱངས་འབྲས་མཐར་ཐུག་སངས་ རྒྱས་ཀྱི་ས་ལ་མངོན་དུ་གྱུར་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔ། ཚད་མེད་བཞི། རྣམ་པར་གྲོལ་བའི་ཡེ་ཤེས་ལྔ། མངོན་ཤེས་དྲུག །ཟག་པ་མེད་པའི་ཡུལ་དྲུག །སྟོབས་བཅུ། ཡེ་ཤེས་ལྔ་སྟེ་སོ་བདུན་ནོ། །དེ་དག་གིས་ནི་གནས་ཡུལ་གྱི་དབྱེ་བ་མདོ་ཙམ་བཤད་ཟིན་ཏོ། ། ༈

[edit]

rgyud sde bzhi yi rnam gzhag dang gnas yul gyi bshad pa/__ bdag cag gi ston pas gdul bya'i khams dbang bsam pa'i rim pa dang 'tshams par chos phung mtha' klas par spros pa nyid bsdu na theg pa dman pa dang /__theg pa chen po gnyis su 'du zhing /__phyi ma la phar phyin dang /__rig 'dzin sde snod gnyis rig pa 'dzin pa'i sde snod la re zhig rgyud sde chen po bzhi las/__dang po bya ba'i rgyud ni/__phar phyin gyi theg pa las bya rgyud khyad par 'phags tshul/__khyad par du 'phags pa'i bya rgyud kyi dbye ba/__phye ba so so'i don gtan la dbab pa'o/__/dang po ni/__phar phyin gyi theg par bskal pa grangs med sum cu rtsa gsum dang /__bcu dang /__nyan rang slar log nas theg chen gyi lam du zhugs pas grangs med bzhi dang /__gzhan gyis grangs med gsum na sangs rgyas par gsungs na/__'dir rgyu rkyen thams cad tshogs na skye ba gcig dang /__rkyen 'ga' zhig ma tshang na yang tshe gsum gyis grub par gsungs pas/__dus myur por 'grub pa ni khyad par gyi 'phags chos yin no/__/phyugs kyi shing rta dang /__nyi zla'i bgrod pa'am rkang mgyogs lta bu'i khyad yod/__mchan/__'o na skye ba 'di nyid du 'grub pa la lam khyad par can zhig dgos na/__de gang yin zhes dogs pa bkod de/__de'i lan la/__'jug pa'i spyod pa dang /__sbyong ba'i spyod pa dang /_/sgrub pa'i spyod pa ste gsum yin no/__/'o na rnal 'byor bla med dang khyad med du 'gyur ro snyam na/__de ni tshe 'dir sku gsum dbyer med rtogs pa'i sangs rgyas kyi go 'phang thob pa yin la/__'dir ni lam gsum la brten nas sa bcu pa skye ba 'di mngon du byed cing /__rten des sangs rgyas 'grub pa'i phyir khyad par che'o/__/gnyis pa ni/__de lta bu'i bya ba'i rgyud de la dbye na sgo drug tu yod cing /__de bzhin gshegs pa/__pad+ma/__rdo rje/__nor bu/__rgyas pa/__'jig rten pa'i rigs drug dang /__spyi rgyud bzhi/__de bsdu na gsum dang /_bsdu na nor can pad+ma'i rigs kyis bsdus/__rgyas pa rdo rje'i rigs kyis/__'jig rten pa'i rigs kyang de dag gi nang tshan ci rigs par ro/__/de yang bsdu na thabs gtso che ba gsang sngags dang /__shes rab gtso che ba rig sngags gnyis su 'du'o/_/mchan/__de'ang thabs shes gnyis su 'du ba yin la/__de thams cad kyi lam dang 'bras bu'i mngon rtogs kyang bzhir 'dus pa yin te/__de la dang po 'jug pa'i spyod pa ni/__thog mar 'jig rten pa'i yang dag pa'i lta ba dang /__so sor thar pa'i tshul khrims dang /__smon 'jug gi sems bskyed pas 'jug pa'i gang zag gi rgyud yongs su sbyangs nas/__gsang ba spyi rgyud las gsungs pa'i chos gos/__rigs gsum spyi'am so so'i dal du sngon du bsnyen pa dang /__sa'i cho ga dang /__sta gon gyi cho ga dang /__'jug pa'i cho ga bzhis dbang bskur bas sngags kyi sdom ldan du byas nas/_dam tshig dang sdom pa'i tshogs nan tan du 'dzin pa'o/__/gnyis pa sbyor ba'i spyod pa ni/__legs par grub pa'i rgyud las gsungs pa ltar bdag gi de kho na nyid stong pa nyid mngon sum du byas nas mdun du rang 'dod pa'i dkyil 'khor gyi lha tshogs spyan drangs te/__de rnams la mchod pa dang /__bstod pa dang /__bzlas pas mnyes par bya ba la sogs pa mtshan bcas kyi rnal 'byor la bya ba'o/__/gsum pa bsgrub pa'i spyod pa ni/__bsam gtan phyi ma las gsungs pa ltar/__mthun rkyen 'dzom pa'i gnas su 'gal rkyen mtha' dag spangs nas mer gnas dang /__sgrar gnas dang /__sgra mtha'i de kho na nyid la sogs pa mtshan med kyi ting nge 'dzin la rtse gcig tu mnyam par 'jog par bya ba'o/__/bzhi pa grub pa'i spyod pa ni/__de ltar mtshan bcas dang mtshan med kyi rnal 'byor gnyis kyis sa dang po bsgrubs nas/__de grub pa'i byang sems des sa lhag ma rnams bsgrub pa'i phyir gnas skabs su sa bcu'i spyod pa mngon byang dang 'jam dpal rtsa rgyud sogs las rgya cher gsungs pa ltar spyad pas/__mthar thug sku gsum dbyer med pa rdzogs pa'i sangs rgyas kyi go 'phang thob pa'o/__/gsum pa ni/__de yang sgo drug so so'i rgyud thams cad gyi bshad rgyud lta bur sngar smos pa'i don bzhi po tshang la ma nor par ston pa dpung bzang dang /__khyad par du 'jug pa dang /__sbyor ba dang /__sgrub pa'i spyod pa gsum po gsum pos rgya cher ston pa'i phyir/__spyi rgyud dang /__legs grub dang /__bsam gtan phyi ma gsum rim par gsungs te/__'di rnams la bya ba spyi'i rgyud sde bzhi zhes grags pas/__rgyas par de dag dang /__slob ma byang chub mchog gi bshad srol las rtogs par bya'o/_/rigs drug gi rgyud sde so so ba dang /__spyi rgyud bzhi/__de rnams kyi 'grel pa/__sgrub thabs/__lam rim sogs dang /__khyad par bya ba spyi'i rgyud bzhi dang /__slob dpon byang chub mchog gi gzhung la blta'o//____//__! spyod pa'i rgyud ni/__bya ba'i rgyud las 'jug pa sogs gsum gyi steng /__rang nyid sangs rgyas kyi gzugs sku mtshan dpes spras pa'i nga rgyal bsgom pas khyad par du 'phags pa yin la/__de yang phyi lus ngag gi bya ba dang nang ting nge 'dzin cha mnyam du spyod pas spyod rgyud ces bya zhing /__dbye na/__de bzhin gshegs pa/__pad+ma/__rdo rje'i rigs kyi rgyud gsum yod cing /__rgyud de rnams kyi don gtan la dbab par/__tshig dang /__don gyi nyams len gtan la dbab pa gnyis las/__dang po ni/__mngon byang gi bsdus 'grel las bshad pa ltar dang /__gnyis pa ni/__rgyu rten gyi gang zag__rkyen lam rim/__'bras bu sangs rgyas kyis bshad pa ste gsum las/__dang po ni/__skye ba snga ma rnams su mi dge ba bcu spang bas lus mtshan dang ldan zhing /__ngag snyan la/__sems dug gsum shas chung ba'o/__/gnyis pa ni/__mngon byang gi bsdus 'grel las/__de la sgrub pa po'i spyod pa ni rnam pa gsum ste/__'di lta ste/__gsang sngags mnyes par bya ba la 'jug pa'i spyod pa dang /__gsang sngags mnyes par bya ba'i phyir sngags bsnyen pa'i cho ga'i mtshan nyid can gyi sbyor ba'i spyod pa dang /__de bzhin du spyod pa gsum pa gsang sngags bsgrubs pas gsang sngags kyi 'bras bu bsgrub pa ste/__'bras bu ni gsang sngags kyi 'bras bu ngo bo nyid kyi dngos grub kyi mtshan nyid bstan pa yin no/__/zhes so/__/de la dang po 'jug pa'i spyod pa la gnyis/__phyi'i 'jug pa dang /__nang gi 'jug pa'o/__/dang po ni/__dkyil 'khor du 'jug cing dbang blang ba dang /__dam tshig dang sdom pa la gnas par bya ba'o/__/dang po ni/__spyod pa'i rgyud las gsungs pa'i snying rje chen po can la sogs pa'i dkyil 'khor du 'jug pa dang /__dbang bskur ba dang /__dam tshig dang sdom pa la sogs pa byin pas lam bsgom pa'i snod rung du bya zhing /__rang 'dod pa'i lha'i bzlas lung yang sbyin par bya'o/__/de'i tshe dbang ji tsam bskur snyam na/__rgyud sde gong ma dang phyag rdor dbang bskur gyi rgyud las/__chu dang /__dbu rgyan/__rdo rje/__dril bu/__ming dbang lngar bshad cing /__mngon byang las dngos bstan/__chu dbang /__thur ma/__me long /__chos bshad pa'i rjes gnang tsam las ma bshad do/__/gnyis pa nang 'jug la/__mtshan med pa dang /__mtshan dang bcas pa'i rnal 'byor gnyis kyi/__dang po ni/__chos thams cad ngo bo nyid med par rtogs pa'i ngang du ji tsam gnas kyi bar mnyam par bzhag pa dang /__gnyis pa ni/__thog mar bdag dang gnas bsrung ba sogs sngon du 'gro bas/__yi ge dang po byang chub kyi sems stong pa nyid bsgom pa dang /__yi ge gnyis pa sngags kyi sgrar ldang ba dang /__gzhi dang po rang sangs rgyas kyi skur bskyed la sngags rgyas brlab pa dang /__gzhi gnyis pa mdun du sangs rgyas kyi sku bskyed la thugs kar zla dkyil la sngags phreng bkod par sems brtan pa'o/__/gnyis pa sbyor ba'i spyod pa ni/__mtshan ma dang bcas pa dang /__mtshan med kyi rnal 'byor gnyis te/__dang po la'ang phyi'i bzlas brjod kyi yan lag bzhi pa'o/__/gsum pa bsgrubs pa'i spyod pa ni phyi'i dngos grub dang /__nang gi dngos grub bsgrub pa gnyis las/__dang po ni/__ral gri la sogs pa'i rdzas blangs nas bzlas brjod byas pas rdzas de 'bar ba dang lag tu blangs na rig 'dzin la sogs pa'i dngos grub grub par 'gyur ro/__/gnyis pa ni/__nang gi rlung me chu sa dkyil 'khor bsgoms pas/__/mngon shes lnga sogs dang zhar la mtshan bcas kyi dngos grub rnams kyang 'grub pa'o/__/gsum pa 'bras bu sangs rgyas pa'i bshad pa la/__gang gis sgrub pa'i rgyu dang /__des bsgrubs pa'i 'bras bu'o/__/dang po ni/__don dam pa'i byang chub kyi sems 'jug gnas ldang gsum gyi mtshan nyid can bsgom zhing /__pha rol tu phyin pa drug dang bsdu dngos bzhi la spyod pas chos spyod dang /__nges par rdzogs pa'i sa bcu la 'jug par byed pa'o/__/gnyis pa ni/__de ltar dpa' bo chen po rdzogs par byang chub pa'i ting 'dzin gyis bdud bzhi bcoms nas khams gsum las 'das te/__'og min ltug po bkod par skyes nas byang chub chen po mngon sum du bya ba dang dgongs pas rnal 'byor gyi rgyud nas 'byung ba ltar mngon byang lnga'i rim pas mngon pa byang chub pa dang bcas pa'i sku bzhi go 'phang dam pa brnyes de sku gsung thugs mi zad rgyan gyi 'khor los 'gro ba'i don lhun gyis grub par mdzad pa'o/__/zhes bzhed//__!_// bya rgyud skabs/__dbye ba so so'i don btan la dbab pa la gnyis/__sngon byung sangs rgyas kyi rnam 'phrul ltar rgyud kyi tshig bshad pa dang /__rjes 'jug gang zag gi lam mngon par rtogs pa'i rim pa nyams su blang ba'o/__/de skad du bud+d+ha gu h+yas 'di'i don rnams mdor bsdus na sngon byung sangs rgyas rnam 'phrul dang /__rjes 'jug mngon rtogs man ngag go__/zhes gsungs/__dang po ni/__sngon ston pas phun sum tshogs pa lnga'i sgo nas rgyud legs par gsungs pa ltar/__'dir yang de dang mtshungs par bshad par bya zhing /__gzhung tshig re re nas 'chad pa'i man ngag kyang /__snga mas/__dgos pa rnam pa gnyis su bstan/__/tshig don brgal lan mtshams sbyar ba/__/rnam pa lngas ni 'dir shes bya/__/zhes mdo 'chad lugs dang mthun pa dang /__rgyud spyi la thun mong du mkho ba/__brjod bya/__rjod byed/__dgos pa/__nying dgos/__'grel pa ste rnam pa lngas sbyar/__gnyis pa ni/__dpung bzang gi bsdus don las gsungs pa ltar rigs thams cad mnyes par bya ba'i thabs su gyur pa/__'jug pa/__sbyor ba/__sgrub pa/__grub pa'i spyod pa bstan pa bzhi'o//____//__! rnal 'byor gyi rgyud kyi dam tshig la rigs lnga spyi dang so so'i dam tshig gnyis las/__dang po ni/__gzhan don du rdzogs byang thob par 'dod pa smon sems dang /__de'i ched du tshul khrims gsum la ci nus bslab par dam bca' ba 'jug sems gnyis/__gnyis pa ni/__dkon mchog gsum 'dzin pa rnam snang gi__/rdo rje dril bu phyag rgya bla ma bzhi 'dzin pa mi bskyod pa'i/__zang zing mi 'jigs chos dang byams pa'i sbyin pa rnam bzhi gtong ba rin 'byung /__phyi bya spyod/__gsang ba rnal 'byor/__nyan rang byang sems kyi theg pa rnams 'dzin pa snang mtha'/__dam tshig dang sdom pa nan tan du 'dzin pa'i steng dkon mchog gsum mchod la brtson pa don grub kyi dam tshig ste lnga'o//____//__! gsang sngags phyi 'gyur gyi bzhed par/__rgyud sde gsum du bzhed pa ni/__slob dpon sangs rgyas gsang bas/__rnal 'byor spyod dang bya dbye bas/__/rgyud sde rnam pa gsum du 'gyur/__/zhes bla med kyang ting nge 'dzin gtso bor gyur pa la dgongs nas rnal 'byor du bsdus pa'o/__/lngar dbye ba la/__slob dpon klu sogs ye shes rdo rje kun btus kyi rjes su 'brangs te mdo sde rtog pa'i rgyud dang/__bya ba'i rgyud dang /__spyod pa'i rgyud dang /__rnal 'byor gyi rgyud dang /__rnal 'byor chen po bla na med pa'i rgyud sde lngar bzhed pa las/__rtog pa'i rgyud ni sngags dang sbyin sreg sogs phyi'i bya ba gtso bor ston phyir ngo bo bya rgyud du bsdu'o/__/yang kyai rdor las/__dgod dang lta ba bdag gis ngang /__/'khyud dang de bzhin gnyis gnyis kyis/__/rgyud kyang rnam pa bzhi rnams kyis/__/dgongs pa'i skad ni ma bsgrags pa/__zhes bzhir gsungs pa'i shugs las lnga pa zhes ston pas slob dpon biR+Wa pa sogs/__bya spyod rnal 'byor gsum/__rnal 'byor bla ma dang bla med gnyis te lngar dbye ba'ang gnyis ka gsang ba'i ye shes bla na med pa ston pas bla med du bsdu'o/__/drug tu ston pa ni/__bde mchog rtsa rgyud las/__/ji srid mdo bya spyod pa dang /__/rnal 'byor gsang mtha'i dbye ba las/__/sems can mos pa sna tshogs pa/__/de dang de la dga' ba yin/__zhes pas/__slob dpon kA ma la shI la sogs mdo sde rtog pa'i rgyud dang /__bya spyod rnal 'byor/__rnal 'byor gsang ba dang /__gsang mtha'i rgyud sde/__de lta na'ang /__dang po ni bya rgyud du 'du la/__phyi ma ni rnal 'byor ma'i rgyud rjod byed rtogs dka' ba tsam la dgongs nas logs su byas pa yin gyi/__don gsang ba'i ye shes bla na med pa las logs su gyur pa med phyir rgyud sde bzhir 'du ba ste/__de yang gur las/__dman pa rnams la bya ba'i rgyud/__sogs dang /__sa paN+Di tas/__mi rigs bzhi dang dus tshod bzhis/__sogs gsungs so//____//__! rtsa rgyud las/__/de ltar 'khor bar 'dod pa yi/_/yon tan lnga ldan rin po che/__/ma dag pas na dug tu 'gyur/__/dag pas bdud rtsi lta bur 'gyur/__/zhes dang /___rmongs phyir 'khor ba'i gzugs can nyid/__/rmongs med 'khor ba dag pas na/__/'khor ba mya ngan 'das par 'gyur/__/byang chub sems ni mya ngan 'das/__zhes sogs kyis 'khor 'das dbyer med du bstan no/__/rje sa skya pas/___ye shes rnam par rtog pa yis/__/dbang du gyur na grol ba med/__/ces dang /___chos nyid 'dzin pas dkris pa la/__/mi rtog pa yang 'khrul snang yin/__/de yis mi rtog bsgoms na yang /__/rnam rtog mtshan ma'i 'khrul 'khor yin/_/zhes so/__/sam+bu Tar/___dang por stong nyid bsgoms nas ni/_/lus can rnams kyi dri ma bkru/__/lus sogs stong pa'i zhing sa la/__/blo dang ldan pas sa bon gdab/__/ces bskyed rdzogs bsgoms pa'i sngon du lta ba bstan par mdzad/__rje sa skya pas/__'khor ba btsal bas ma rnyed pa/__/mya ngan 'das pa'i rang bzhin yin/__/'khor ba med par go ba de/__/'khor 'das dbyer med lta ba yin/__zhes bshad/__rje btsun rin po ches/_/dmigs med 'jigs dang bral ba'i skyabs su 'gro/__/tshad med dmigs yul spangs pa'i sems bskyed bya/_/de yi chos nyid rang bzhin nam mkha' 'dra/_/bsags pa med pa'i dge rtsa byang chub bsngo/__/zhes dam pa gsum gyi rang bzhin khyad par du bstan no//____//__! yul chen nyer bzhi dang /___/gnas so bdun gyi rnam par bzhag pa la/__gnas sogs bstan pa'i dgos pa/__dgos pa de ldan gyi rnam bzhag dngos/__de dag gzhi lam 'bras gsum sbyor tshul lo/__/dang po ni/__sam+bu Tar/__/pha rol phyin bcu'i sa rnams ni/__/rnal 'byor ma yis kla klo'i skad/__/bU la sogs pa ci gsungs pa/__/phyi dang nang du yang dag gnas/__zhes phar phyin nas rab dga' sogs lam lnga sa bcu bgrod byar bstan pa gang zhig__/sngags su gnas la sogs pa'i ming gis btags nas bstan te/__de yang phyi rol dpa' bo dpa' mo 'du ba'i yul pUl+li ra sogs nang rdo rje'i lus la gnas pa'i tshul la mkhas pa dang /__de ltar gnas par shes shing lam du byas pas/__dpa' bo dang rnal 'byor ma rnams dang rjes su mthun pa'i rlung dang thig le'i rnam pa dbu mar thim ste sa'i rtogs pa skye zhing /__sar gnas kyi tshul bzung ba'i dpa' bo dang dpa' mo rnams bdag gi dbang du 'du ba dang /__brtan pa thob pas spyod pa'i phyir rgyu ba'i yul shes pa la sogs dgos pa bsam gyis mi khyab pa nyid do/__/gnyis pa la mdor bstan pa dang /__rgyas par bshad pa'o/__/dang po ni/__he badz+ra las/__kye bcom ldan 'das 'du ba'i gnas du lags/__zhes pa'i lan du bcom ldan 'das kyis bka' stsal pa/__gnas lha/__dang nye ba'i dri za/__gnas dang ni/__/zhing gnod sbyin/__dang nye ba'i zhing nyid dang /__/_tshan+do srin po/__nye ba'i dang /__/de bzhin klu 'du ba nye 'du ba/__/'thung spyod nye ba'i 'thung spyod dang /__/dur lha min/__khrod nye ba'i dur khrod nyid/__/'di rnams sa ni bcu gnyis te/__zhes mdor bsdu na/__dbye gzhi bcu gnyis su gnas pa yin no/__/gnyis pa la gsum/__gnas nyer bzhi bstan pa/__yul so gnyis bstan pa/__yul so bdun bstan pa'o/__/dang po la'ang grangs nges kyi sgo nas spyir bshad pa dang /__gnas sogs bye brag tu bshad pa'o/__/dang po ni/__sngon byung dang sbyar na/__rtsod pa'i dus kyi mgo brtsams pa'i tshe/__sems can rnams gcig gis gcig gsod par brtsams pa byung ste/__de'i bsad pa'i ro rnams phyogs mtshams brgyad du bskyal ba las dur khrod brgyad chags shing /__de nas rim par gnas yul rnams kyang chags pa las/__ri rab kyi rtser drag po yab yum byung zhing /__de'i sku gsung thugs kyi sprul pa drag po 'jigs byed brgyad gsum nyer bzhi byung bas pUl+li ra sogs yul nyer bzhi bzung nas 'jig rten gyi khams su mi dge ba'i tshul la spyod par byed pa na/__'og min stug po bkod par bzhugs pa'i rgyu'i he ru kaHlas/__ri rab kyi rtse mor sprul sku 'bras bu'i he ru kar bzhengs nas/__'dul byed de dag gdul bya dang mthun pa'i cha lugs su bsgyur nas lus dbang du byas shing gdan du bting/__'jig rten pa'i thod pa'i dum bu sogs kyi srog sngags ka ra ka ra sogs/__'jig rten las 'das pa'i gnyen po oM dang hU~M phaT kyi bar du bcug nas lha so so'i sngags su byin gyis brlabs pas ngag dbang du mdzad/__gdul bya de rnams rnam par mi rtog pa'i ngang du brgyal bar mdzad pas yid dbang du byas/__btsun mo rnams la dga' bzhis longs spyod/__rus pa'i rgyan phrogs te skur gsol/__longs spyod phrogs te tshogs 'khor du rol lag cha phrogs te phyag mtshan du mdzad/__ro gdan sogs phrogs te gdan du bting /__'dug pa'i yul phrogs te pho brang du byas pa dang /__sgrib pa rnam par dag pa srog thim pa ste spangs ba dang /__sems 'od gsal du 'dres te zung 'jug tu bzhengs pa sems thim pa ste rtogs pa phun sum tshogs par mdzad pa sogs tsakra sam+bar las 'byung ba dang tshul mthun par gsang sngags snga 'gyur gyi gzhung du'ang bshad do/_/gnyis pa ni/__phyi rol du//____//__!sku pUl+lir shar ma la zhes te 1rgyas pa'i ri/__byang dzA lan+d+ha ra dra ba mkha' spyod 'dzin pa1/__auDI A nub nA rna ba g.yon pa 'phur 'gro1/__arbu lho da mchod 'os ltag pa/__shar lho go dA ba ri ba'i mchog 2rna g.yas/__sbyin/__lho nub ra me smin mtshams shwa ra dga' ba'i dbang 2phyug__/de bI nub byang ko mig gnyis Ta lha mo mkhar/__mA byang shar la phreng 2can/__phrag pa gnyis//____//__!_kA gsung ma mchan khung gnyis rU shar pa 'dod pa'i gzugs 3/__e tre byang rol pa nu ma gnyis can/__tri sha kun 4lte ba 'dab chags gsum pa/__lho ko sa la sna rtse mdzod 4lan nam dge ba can/__ka shar lho ling+ka tsi kha mtshan nam smra 5ba'i rtags/__lam+ba ka lho nub 'phyang mgrin pa ba can/__snying ga kAny+tsi ka nub byang skyur bag can6/__byang shar hI ma 'doms par la ya sa spyod gangs can6//____//__!_thugs pre ta shar pU mtshan ma ri yi dwags grong khyer/__byang gr-i ha de gshang lam wa khyim 7gyi lha/__nub sau rA Sh+ta brla gnyis yul 'khor bzang po 8/__lho su war+N+NA byin pa dwI pa gser gling /__shar lho na ga ra sor mo bcu drug grong 9khyer/__lho nub sin+d+hu ni bol gong rgya 9mtsho/__ma nub byang ro mya mthe bong bzhi/__nga ma 10thang byang shar ku 11pus mo gnyis lu ta rigs sa 'og spyod ldan zhes bya ba 8rnams so/__/de rnams nang du spyi bo pUl+li ra ma/__spyi gtsug dza lan+d+ha ra sogs te shes par sla'o/__/gzhan du sa bcu gnyis dang sbyar na/__he badz+ra las/__/gnas ni rab tu dga' ba'i sa/__/de bzhin nye gnas dri ma med/__/zhing ni 'od byed shes par bya/__/nye ba'i zhing ni 'od 'phro can/__/tshan+da mngon du gyur pa ste/__nye ba'i tshan+do sbyong dka' ba/__/'du ba ring du song ba ste/_/nye ba'i 'du ba mi g.yo ba/__/dur khrod legs pa'i blo gros te/__/nye ba'i dur khrod chos kyi sprin/__/zhes pas bstan cing /__'thung spyod dang /__nye ba'i 'thung spyod gnyis ni dpe med pa'i sa dang /__ye shes chen po'i sar sbyor dgos par rgyud rgyas pa'i lung ku mu tir drangs pa las gsal lo/__/gnyis pa ni/__he badz+ra rtsa rgyud las/__kye bcom ldan 'das/__gnas la sogs pa gang lags/__bcom ldan 'das kyis bka' stsal pa/__gnas ni dza lan+d+hA rar bshad 1/_/de bzhin du ni oD+yan+d+ra2/__/6gnas ni kol+la gi ri nyid3/__/de bzhin du'ang kA ma ru nyid4/__1__/nye gnas ma la wa zhes brjod5/__/sin+d+hu na ga ra nyid do/__2__/zhing ni mum+mu nir bshad 7de/__/zhing ni byed pa'i brang nyid do/__/de bI ko Ta de bzhin zhing 9/_/zhing ni lcags pa'i brang 10nyid do/__3__/nye zhing ku lu ta zhes 11brjod/__/de bzhin arbu da nyid do 12/__/ba yi mchog sbyin kha ba'i ri 14/__/nye ba'i zhing ni mdor bsdus pa'o/__4__/tshan+do ha ni ke la dang /__/lan tshwa rgya mtsho'i nang skyes dang /_/lam+ba ka dang kAny+tsi nyid/__/de bzhin sau rASh+ta nyid do/__5__/nye ba'i tshan+do ka ling+ga/__gser dang ldan pa'i gling dang ni/__/kong+ka na yang nye tshan+do/__/mdor bsdus pas ni brjod par bya/__6_/'thung spyod grong khyer gyi dang yang /__/'thung spyod grong gi mthar gnas pa/__/tsa ri tra dang ko sa la/__/bin+d+h+ya gzhon nu'i grong khyer ro/__/rdo rje snying po snying rje che/__/nye ba'i 'thung spyod de nye ba'o/_/dur khrod rab son dge 'dun dang /__/dur khrod rgya mtsho'i 'gram nyid do/__/skyed tshal ra ba'i rdzing bu'i 'gram/__/nye ba'i dur khrod brjod par bya/__/zhes sum cu rtsa gnyis su bstan to/__/gsum pa yul so bdun la gnyis te/__/bstan bcos chen po las 'byung ba/_/dus kyi 'khor lo las 'byung ba'o/__/dang po ni/__kyai rdor la mi phyed ma sogs rtsa so gnyis dang /__de steng sbas pa'i rtsa lnga bsnan pas so bdun yod pa/__de bzhin du phyi rol gyi yul ya gyal sbyong byed dang sbyangs 'bras la sogs pa so bdun du 'gyur ba'i 'thad pas te/__de yang 'du ba dang nye ba'i 'du ba bzhi dang /__mi slob pa'i phyi rol gyi gnas 'og min nam/__rdo rje gdan dang so bdun te/__de yang phyag thig las/__'du ba la karma rA saT ka dang /__gser gling gnyis dang /__nye ba'i 'du ba kong+ka na dang 'bigs byed gnyis te bzhir bshad do/__/bde mchog las/__'du ba pre ta pu ri/__gr-i ha de wa/__nye 'du sau rASh+ta/__su bar+N+wA dwI par bshad do/__/de bzhi po'i nang du so gnyis par zin pa'i ming can 'ga' re yod na'ang zlos par mi bzung ste/__don sa tha dad mi 'dra ba sbyor dgos pa'i phyir ro/__/yang na sngar smos so gnyis steng /__bde mchog las bshad pa'i/__ra me/__o Te/__tri sha__/sre ta/__gr-i ha lnga bsnan pas slob pa'i gnas kho nar so bdun du bgrang ngo /__/yang na bde mchog gi yul nyer bzhi'i steng du/__sngar smos/__mum+mu ni ra/__byed pa'i brang /__lcags pa'i brang /__ha ri ke la/__rgya mtsho'i nang skyes/__kong+ka na/__grong gi mtha'/__rtswa ri/__bin+d+h+ya/__gzhon nu'i grong khyer/__rab son/__rgya mtsho'i 'gram/__skyed tshal ra ba'i rdzing bu'i 'gram rnams te bcu gsum po bsnan pa ste/__bde mchog gi yul nyer bzhi'i dpa' bo dang rnal 'byor ma'i steng /__bde chen 'khor lo'i lha lnga dang/__sgo mtshams ma brgyad de bcu gsum bsnan pa'i dag sbyor du bshad do/__/sgo mtshams ma brgyad kyi gnas ni dur khrod brgyad dang /__bde chen 'khor lo'i dkyil 'khor gyi lha mo bzhi'i gnas ni/__ri rab kyi byang shar dang /__dbus dang /__gzhan 'phrul dbang byed dang/__rdo rje gdan rnams su badz+ra DA ki'i 'grel par bshad do/__/gnyis pa ni/__gnas la sogs pa'i dbye gzhi dus 'khor las/__dpal ldan lhun po'i phyogs rnams kun tu sa yi dkyil 'khor la son gnas rnams kun dang nye ba'i gnas/__/zhes pa'i 'grel par/__gnas ni phyogs bzhir rlung dang /__me dang/__chu dang /__sa'i rang bzhin gyis gnas pa/__shar gyi lus 'phags dang /__dzam bu'i gling chung ngu dang /__byang gi sgra mi snyan dang /__nub kyi ba lang spyod do/__/nye ba'i gnas ni rang bzhin de nyid kyi phyogs mtshams rnams su ste/__me dang /__bden bral dang /__dbang ldan dang /__rlung gi phyogs su'o/__/de bzhin du/__zhing dang nye ba'i zhing ni rgya mtsho'i phyed la'o/__/'dun pa dang nye ba'i 'dun pa ni rgya mtsho'i phyed gzhan la'o/__/'dus pa can dang nye ba'i 'dus pa can ni me'i dkyil 'khor gyi phyed la'o/_/khang pa dang nye ba'i khang pa ni me'i phyed gzhan la'o/_/dur khrod dang nye ba'i dur khrod ni rlung gi dkyil 'khor gyi phyed la'o/__/dur khrod chen po brgyad ni rlung gi dkyil 'khor gyi mtha' la ste/__de ltar gnas la sogs pa rnams bcu gnyis su rig par bya ste/__lus la yang bcu gnyis ni lag pa dang rkang pa dag gi tshigs bcu gnyis so/__/zhes gnas la sogs pa'i dbye gzhi bcu gnyis po 'bum phrag bzhi 'jig rten khams rdzogs pa la gnas par gsungs so/_/des na phyi nang mthun par sbyar ba'i phyir gsungs pa yin gyi/__spyod pa spyod pas rgyu'i gnas kho na ma yin par shes par bya'o/__/dbye ba'i ya 2gyal ni/__sum cu rtsa bdun rab tu dbye bas srid pa gsum gyi gnas su byang chub phyogs kyi chos rnams te/__/de rnams mtha' dag rnal 'byor ma rnams sa yi steng gi gnas su rnal 'byor pa yis rig par bya/_/de ltar gnas la sogs pa thams cad mi yi bdag po phyi dang lus la yang ni de bzhin 'gyur/__/zhes pa tsam las yul gang na yod kyi nges pa ma bstan la/__de yang rnal 'byor ma so drug gi dbye bas gnas so drug tu bshad pa/__nang ltar khams dang skye mched rgyu ma sogs kyi dbye bas so sor sbyar ba dang /__phyi'i gnas la drang don du/__o rgyan sogs rgyud sde gzhan nas bshad pa de dag dang /__nges don bod yul lta bu'i yul khams re re dang /__mnyan yod lta bu'i grong khyer re re na'ang rnal 'byor ma so drug gi dbye bas yul 26dang /__de thams cad la khyab byed rdo rje sems dpa'i gnas dang po bdun po thams cad tshang bar bshad de/__dri med 'od las/__da ni gnas zhes pa la sogs pas nye ba'i gnas la sogs pa'i gnas rnams gsungs te/__'dir thun mong byis pa rnams yul 'khyams pa'i don du/__dza lan+d+hA ra la sogs pa rnams gnas la sogs par gsungs so/__/de nyid ni thams cad du khyab par byed par mi 'gyur te/__rnal 'byor ma rnams kyi rigs sum cu rtsa drug ni grong khyer gcig tu'ang gnas so/_/gang gis na 'dir mchog gi dang po'i sangs rgyas thams cad la khyab par byed pa'i phyir na/__bod la sogs pa dang /__rgya nag la sogs pa'i yul rnams na yang gnas la sogs pa rnams yod do/__/de nyid ni bsdus pa'i rgyud gzhan du ma bstan to/__/yul thams cad dang grong thams cad du gnas la sogs pa gsungs pa ni/__gnas ni sgrol ma la sogs pa rnams kyi khyim ste rnam pa bzhi'o/_/de bzhin du sgra rdo rje ma la sogs pa rnams kyi khyim ni rnam pa drug go__/tsaR+tsi kA la sogs pa rnams kyi khyim ni tshan+do ha rnam pa brgyad do/_/rmugs byed ma la sogs pa rnams kyi khyim ni 'dus pa rnam pa bcu'o/__/khyi gdong ma logs pa rnams kyi khyim ni dur khrod rnam pa brgyad do/__/zhes so/__/gsum pa gzhi lam 'bras bur sbyar na/__gzhi 'khor ba'i gnas skabs sbyang bya/__phung po5/__'byung ba5/__skye mched6/__yul6/__dpung pa2/__kha1/__gsang ba 1/__lag2_/ngar 2/__pus mo2/__spyi bo 16/__rkang mthil gnyis gcig tu brtsi ba ste bcu/__nyon mongs pa lnga ste so bdun no/__/lam sbyong byed la/__thun mong pha rol tu phyin pa ltar na dran pa nye bar bzhag pa sogs dang /__khyad par rdo rje theg pa'i lugs la bskyed rdzogs gnyis las/__dang po la'ang /__rten gzhal yas khang gi khyad chos rnams byang phyogs so bdun du rdzogs pa dang /__brten pa de bzhin gshegs pa yab yum bcu/__gti mug rdo rje ma 6sogs/__gzugs rdo rje ma 6sogs/__gshin rje'i gshed sogs khro bo bcu/__mngon byang 5ste so bdun no/__/phyi ma la yang /__rten dkyil 'khor bzhi dang sbyar na/__dgyes rdor gyi lugs su rtsa so bdun dang /__bde mchog las pU dza sogs pa'i rtsa yi ge'i rnam pa 24/__de steng hU~M ring brgyad/__b+h+rU~M aM dziM khaM hU~M bsnan pa ste/__rtsa de dag gi nang na gnas pa'i khams rnams ni khams bdud rtsi'i dkyil 'khor so bdun/__de dag la dbang bsgyur ba'i rlung rnams ni snying po ye shes rlung gi dkyil 'khor so bdun no/__/brten pa ye shes lnga dang sbyar na/__rten de dag las skyes pa'i mtshon byed dpe yi ye shes dang 37/__mtshon bya don gyi ye shes 30so/__sbyangs 'bras mthar thug sangs _rgyas kyi sa la mngon du gyur pa'i sku gsung thugs yon tan phrin las lnga/__tshad med bzhi/__rnam par grol ba'i ye shes lnga/__mngon shes drug__/zag pa med pa'i yul drug__/stobs bcu/__ye shes lnga ste so bdun no/__/de dag gis ni gnas yul gyi dbye ba mdo tsam bshad zin to/___/_!_

Footnotes

Other Information