བསང་མཆོད་ཀྱི་རྣམ་གཞག།

🚧 This website is under continued development. We appreciate your patience!

Previous Text Back to Volume PageNext Text

Wylie title	bsang mchod kyi rnam gzhag
Location	mkhyen brtse'i bka' 'bum Volume 4, sde tshan 1, Text 33, Pages 551-561 (Folios 276a3 to 281a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bsang mchod kyi rnam gzhag. In 'jam dbyangs mkhyen brtse'i dbang po'i bka' 'bum, Vol. 4: 551-561. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Smoke Offerings - bsangs mchod - lha bsang

1 Texts in this Section (sde tshan or chos tshan)

33 551-561	བསང་མཆོད་ཀྱི་རྣམ་གཞག། bsang mchod kyi rnam gzhag Notes - zin bris   ·   Smoke Offerings - bsangs mchod - lha bsang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

བསང་༢༧༢མཆོད་ཀྱི་རྣམ་བཤད་ཚོགས་༢༩༨གཉིས་ཆུ་གཏེར་འཕེལ་བའི་ཟླ་བར༢༧། བསང་མཆོད་ཀྱི་བྱུང་ཁུངས་བསྟན་པ། བསང་མཆོད་ཀྱི་རྣམ་བཞག་དངོས། མཇུག་ཕན་ཡོན་བསྟན་པའོ། །དང་པོ་ལ་གཉིས་ཏེ། མདོར་བསྟན་པ་དང་། དབྱེ་བ་རྒྱས་པར་བཤད་པའོ། །དང་པོ་ནི། བསང་མཆོད་འབུལ་བའི་ཆོ་ག་འདི་དག་མཆོད་ཡུལ་མཆོད་པས་མཉེས་ཤིང་། སྦྱིན་ཡུལ་སྦྱིན་པས་ཚིམས་པར་བྱེད་པའི་སྒོ་ནས་ཚོགས་བསགས་སྒྲིབ་སྦྱོང་གི་ཐབས་ཁྱད་པར་བ་སྟེ། དཔེར་ན་ཆུ་ལ་བརྟེན་ནས་གཏོར་མ་གཏོང་བ། མེ་ལ་བརྟེན་ནས་སྦྱིན་སྲེག་བྱེད་པ། བཟའ་བཅའ་ལ་བརྟེན་ནས་མཆོད་གཏོར་འབུལ་བ་སོགས་དང་མཚུངས་པར། འདིར་ཡང་དྲི་ཞིམ་ངད་པ་ལ་བརྟེན་ནས་མཆོད་པ་འབུལ་བ་སྟེ། བསང་མཆོད་བོན་གཏོའི་ལུགས་དང་གློ་བུར་དུ་བྱུང་བ་ཞིག་ཡིན་པར་སྨྲ་ན། དེ་དག་སོགས་ཀྱང་དེ་དང་མཚུངས་ཏེ་ཁྱད་མེད་པའི་ཕྱིར། གཉིས་པ་ལ། ངོ་བོ། ངེས་ཚིག །དབྱེ་བ། དབྱེ་གཞིའོ། །དང་པོ་ནི། དག་བྱེད་དྲི་ཞིམ་གྱི་མཆོད་པའི་ཆོ་ག་གང་ཞིག །ཉེས་སྐྱོན་གྱི་སྒྲིབ་བྱེད་ཐམས་ཅད་སྦྱངས་ཤིང་། །བདེ་ལེགས་སྟེར་བའི་ནུས་པ་དང་ལྡན་པའོ། །གཉིས་པ་ནི། ཤོ་དྷ་ན། མིཪྵྚ། ཤུདྡྷ་ཞེས་པ་རྣམས་དག་བྱེད་དང་། མྲྀ་ཛ། མཱརྫན། སྣཱ་ཏ། པཱུ་ཏ། ཤཽདྡྷཿཞེས་པ་རྣམས་གཙང་བྱེད་ལ་འཇུག་སྟེ། དེས་ན་དག་བྱེད་ཀྱི་རྫས་དང་ལྷན་ཅིག་པར་མཆོད་པའི་ཆོ་ག་ལ་བརྟེན་ནས་བདག་གཞན་ཀུན་གྱི་ཉེས་སྐྱོན་ཐམས་ཅད་སྦྱངས་ནས་དག་ཅིང་གཙང་བར་བྱེད་པའི་ཕྱིར་དང་། དྷཱུ་པ། དྷཱུ་པ་ན། དྷཱུ་པ་ཡ་ཏི། པྲ་བོདྡྷ་ནཾ། བཱནྟི་ཀྲི་ཏ་ཞེས་པ་རྣམས་བདུག་པ་དང་། བདུག་པར་བྱེད་པ་དང་། རབ་ཏུ་བསང་བར་བྱེད་པ་དང་། སྦྱོང་བར་བྱེད་པ་རྣམས་ལ་འཇུག་སྟེ། དེ་ལྟར་ན་སྤོས་དང་སྤོས་ཀྱི་བདུག་པ་སོ་སོར་མ་ཕྱེ་བར་བསང་བར་བྱེད་པའི་ཆོ་གས་ཉེས་སྐྱོན་ཐམས་ཅད་ཁྲུས་ཀྱིས་དྲི་མ་འཁྲུལ་པ་ལྟར་བསལ་ཞིང་སྦྱོང་བ་དང་། གཙང་ཞིང་དག་པར་བྱེད་པའི་དོན་ནམ། ཡང་ན་མེ་དྷ་དང་། མེ་དྷྱཱ་ཞེས་པ་མཆོད་སྦྱིན་གྱི་ཆོ་ག་ལ་འཇུག་སྟེ། མཆོད་སྦྱིན་གྱི་ཡུལ་དུ་གྱུར་པ་གང་དག་དྲི་ཞིམ་སྤོས་ཀྱི་ངད་པར་བརྟེན་པའི་མཆོད་རྫས་གྱ་ནོམ་པས་དགྱེས་ཤིང་ཚིམ་པར་བྱེད་པའི་དོན་ཏོ། །གསུམ་པ་ལ་ཐབས་ཀྱིས་མ་ཟིན་པ་དང་། ཟིན་པའི་གནས་སྐབས་ལས། དང་པོ་ནི། ཇི་ལྟར་འཁོར་བར་རྣམ་པར་འཁྱམས་པའི་དུས་སུའང་རྐྱེན་གྱི་རྒྱུ་འདོད་པའི་ཡོན་ཏན་ལྔ་སྟེ། དེའི་ཚེའང་དྲི་བཟང་པོ་ལ་དོན་དུ་གཉེར་པ་དང་། གཙང་ཞིང་དག་པར་བྱེད་པའི་ཡུལ་ལ་ཞེན་ཅིང་གཅིག་ཤོས་འདོར་བའི་ཚུལ་དང་བཅས་པས་སྟོབ་ཅིང་ལེན་པ་དག་ཡོད་ན། ཐབས་ཀྱིས་མ་ཟིན་པ་ལས་དོན་དུ་བསང་གི་ཆོ་ག་དང་རྣམ་པ་མཚུངས་པའི་ཕྱིར་རོ། །གཉིས་པ་ལའང་། དམན་པ་དང་། མཆོག་གི་ཐབས་ཀྱིས་ཟིན་པའོ། །དང་པོ་ནི། དེ་ལྟ་བུའི་ཡུལ་དེ་དག་ལམ་དུ་བྱེད་པ་ལ་མུ་སྟེགས་པ་དག་རིག་བྱེད་ལ་ཚད་མར་འཛིན་པའི་དབང་གིས་ལོག་པར་རྟོག་པའི་འཇུག་ཚུལ་བཞི་ཡོད་དེ། དེ་རྣམས་ཀྱང་ཕལ་ཆེར་ཁྲུས་དང་། གཙང་སྦྲ་དང་། སྨྱུང་བར་བརྟེན་པ་དང་། སྦྱིན་སྲེག་དང་། མཆོད་སྦྱིན་གྱི་ཆོ་ག་སོགས་ལ་འབད་པར་བྱེད་པའི་ཕྱིར། དེ་དག་ཀྱང་དོན་ཐོབ་ཏུ་དག་པར་བྱེད་པ་དང་། ཚིམ་པར་བྱེད་པའི་ཚུལ་ཅན་ཡིན་ཕྱིར་བསང་གི་མཆོད་པ་དང་མཚུངས་པར་བལྟའོ། །གཉིས་པ་ལའང་། གཞི་དེ་དག་སྤང་བ་ལམ་དུ་བྱེད་པ་དང་། མི་སྤོང་བར་ལམ་དུ་བྱེད་པ་གཉིས་ལས། དང་པོ། ཉན་ཐོས་རྣམས་ཀྱིས་ཡུལ་ལ་མངོན་པར་ཞེན་པ་ནི་སྲིད་པའི་རྩ་བར་མཐོང་བས་སྤངས་ཏེ། ཉེས་སྤྱོད་བསྡམས་ཤིང་གཙང་བར་བྱེད་པའི་ཚུལ་ཁྲིམས་ཀྱི་བསླབ་པ་ཕུན་སུམ་ཚོགས་པས་རྒྱལ་བ་དགྱེས་པའི་ལམ་ལ་འཇུག་པ་ནི་དག་བྱེད་བསུང་ཞིམ་གྱི་མཆོད་པ་ཁྱད་པར་དུ་གྱུར་པ་སྟེ། ཚིག་ལེར། དེ་ལ་འདིར་ནི་རྣམ་ཀུན་ཏུ། །འདུལ་བ་མིན་པས་དག་པ་མེད། །ཅེས་དང་། གཞན་དུའང་། ཚུལ་ཁྲིམས་འདི་ནི་གཙང་བ་སྟེ། ཞེས་སོགས་བསྟན་པར་མ་ཟད། ས་གའི་ལྷས། འཇིག་རྟེན་མགོན་པོས་འཇིག་རྟེན་གྱི། །ཡམས་ཀྱི་འཚེ་བ་ཞི་བྱའི་ཕྱིར། །སངས་རྒྱས་སྐུ་གཟུགས་དྲོ་སོགས་སུ། །སྤྱན་དྲངས་པར་ནི་གསུངས་པ་ཡིན། །དེར་ནི་ཆག་ཆག་བྱུགས་པ་དང་། །སྲང་གི་གཞི་མདོར་ས་གཞི་ལ། །སྣ་ཚོགས་མེ་ཏོག་བཀོད་པ་ཡིས། །རབ་ཏུ་མཛེས་པར་བྱ་བ་ཡིན། །ཙནྡན་ཨ་གར་ག་བུར་གྱི། །བདུག་སྤོས་ཀུན་ནས་དབུལ་བར་བྱ། །ཕྱོགས་ཀྱི་སྒོ་ནས་དྲི་ཞིམ་དག །དལ་ཞིང་དལ་བའི་རླུང་གིས་བསྐྱོད། །ཅེས་སོགས་ཀྱིས་བསྟན་ལ། ཁྱད་པར་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་ཀྱིས། མཐའ་ཡས་པའི་སེམས་ཅན་ཐམས་ཅད་སྒྲོལ་བར་འདོད་པའི་བསམ་པས་སྨོན་པ་དང་འཇུག་པའི་བསླབ་པ་ཡང་དག་པར་བླངས་ཏེ། ཐུན་མཚམས་སུ་ཡན་ལག་བདུན་པ་སོགས་ཆོས་བཞིན་དུ་སྤྱོད་པ་དང་། ཐུན་གྱི་དངོས་གཞི་ཕ་རོལ་ཏུ་ཕྱིན་པ་དྲུག་སོགས་ལ་སློབ་པར་བྱེད་པའི། དང་པོ་ལྟར་ན་ཕྱག་འཚལ་བ་སྔོན་དུ་འགྲོ་བས། མཆོད་པའི་ཁྱད་པར་སྤྱི་དང་། ཁྱད་པར་དུ། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་གཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུགས་པར་བགྱི། །ཞེས་དང་། སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞེས་སོགས་ཀྱིས་བསྟན་ལ། ཕྱི་མ་ལྟར། བསང་གི་ཆོ་ག་ལའང་ཕར་ཕྱིན་དྲུག་ཏུ་བགྲང་དུ་ཡོད་དེ། མཐའ་ཀླས་པའི་མཆོད་སྦྱིན་གྱི་ཡུལ་དུ་གྱུར་པ་རྣམས་དྲི་ཞིམ་པོའི་དུད་པས་མཚོན་པའི་འདོད་ཡོན་གྱིས་མཉེས་པར་བྱེད་པ་སྦྱིན་པ། དག་བྱེད་ཀྱི་ཆོ་ག་དེས་རྒྱལ་བ་རྣམས་ཀྱི་སྐུ་ལ་ཉོན་མོངས་པའི་དག་བྱ་མི་མངའ་ཡང་། བདག་གཞན་ཀུན་གྱི་སྒོ་གསུམ་གྱི་སྡིག་ལྟུང་ཉེས་ཚོགས་ཐམས་ཅད་དག་པར་བྱེད་པའི་མཆོག་ཏུ་འགྱུར་བའི་ཕྱིར་ཚུལ་ཁྲིམས། དཀོན་མཆོག་གསུམ་མཉེས་པའི་ཐབས་ཀྱི་དཀའ་བ་དང་དུ་ལེན་ཞིང་། ལྷ་སྲིན་སོགས་རང་ལ་གནོད་པར་བྱེད་པ་ལའང་ཁོང་ཁྲོ་བ་མེད་པར་སྦྱིན་པའི་དགའ་སྟོན་སྟེར་ཕྱིར་བཟོད་པ། སྦྱོར་དངོས་རྗེས་གསུམ་གྱིས་མགྲོན་རིགས་རྣམས་དགྱེས་པའི་ཐབས་ལ་རྩོལ་བ་བསྐྱེད་པ་བརྩོན་འགྲུས། ཀུན་རྫོབ་འཇིག་འདས་ཀྱི་ཡུལ་ལ། དམན་མཆོག་གི་མཆོད་པ་མཐའ་ཀླས་པ་སྟོབ་པའི་སེམས་རྩེ་གཅིག་པ་བསམ་གཏན། དོན་དམ་འཁོར་གསུམ་ཡང་དག་ཆེན་པོར་ཤེས་པ་ཤེས་རབ་བོ། །དེས་ན་གཞི་སྤོང་བའི་ཚུལ་ལའང་། འདོད་ཡོན་ལ་སོགས་པས་རང་འཆིང་བར་བྱེད་པའི་ཕྱིར་སྲེད་ཞེན་སྤངས་པ་ལས། མཆོད་སྦྱིན་གྱི་ཡུལ་ལ་ཚོགས་རྫོགས་པའི་ཕྱིར་དབུལ་བ་ལ་ནི་ནམ་ཡང་བཀག་པ་མེད་དོ། །གཞི་མི་སྤོང་བ་རྡོ་རྗེ་ཐེག་པའི་ལུགས་ལ་ནི་དངོས་པོ་གང་ཡང་ཐབས་མཁས་ཀྱིས་སྤྱད་ན་འཆིང་བ་མེད་པའི་ཕྱིར། དཀྱིལ་འཁོར་འཁོར་ལོ་བསྒྲུབས་ཤིང་མཆོད་པའི་ཚེའང་། ཉེར་སྤྱོད་བདུན་དང་། འདོད་པའི་ཡོན་ཏན་ལྔ་དང་། རྡོ་རྗེ་ལྷ་མོ་བཅུ་དྲུག་ལ་སོགས་པ་འབུལ་བ་དང་། ཚོགས་ཀྱི་འཁོར་ལོ་དང་། སྦྱིན་སྲེག་དང་། གཏོར་མ་ལ་སོགས་པ་དང་། ནང་དུ་ཁ་ཟས་ཀྱི་སྲེག་བླུགས་དང་། སྙོམས་འཇུག་གི་ཚོགས་འཁོར་ལ་སོགས་པ་ཕར་ཕྱིན་པས་བསྐལ་པ་དུ་མར་བསགས་པའི་ཚོགས་གང་ཡིན་པ་སྐད་ཅིག་ལ་འདུམས་པའི་ཐབས་ལ་མཁས་པ་དང་ལྡན་པའི་ཕྱིར་ཅིའི་སླད་དུ་བཀག །དེས་ན་མདོ་སྔགས་གང་གི་ཕྱོགས་སུའང་དགག་བྱ་མེད་ཅིང་བླང་བའི་འོས་སུ་བསྟན་ཏོ། །གཉིས་པ་བསང་མཆོད་ཀྱི་རྣམ་བཞག་དངོས་ལ། ལུགས་སྲོལ་གང་དུ་གཏོགས་ངོས་བཟུང་། དེ་ལ་རྣམ་པར་དཔྱད། ཆོ་ག་དངོས་བཤད་པའོ། །དང་པོ་ནི། སྔར་སྨོས་པ་ལྟར་ཕྱི་ནང་གང་གི་གྲུབ་མཐའ་ལའང་མཚན་དངོས་མ་སྨོས་པ་མ་གཏོགས་མཚན་གཞི་བསང་གི་ཆོ་ག་སྒྲ་ཇི་བཞིན་པ་ཡོད་ལ། ཁྱད་པར་སྐབས་སུ་བབས་པའི་དབང་དུ་བྱས་ན་བསང་མཆོད་གྱི་ཆོ་ག་འདི་མདོ་སྔགས་ཐུན་མོང་བའི་ཆོ་ག་སྟེ། མཎྜལ་དང་ཆུ་གཏོར་ལ་སོགས་པ་བཞིན་ནོ། །གཉིས་པ་ནི། ཁ་ཅིག་བོན་ལུགས་སུ་འཆད་མོད། དེ་ལྟ་ནའང་གསས་མཁར་དང་བོང་སོ་བརྩིགས་པ་སོགས་ཐོར་བུར་འདྲེས་པ་ཡོད་ན་མ་གཏོགས། དངོས་གཞི་བོན་གྱི་སྟོན་པ་ལས་བརྒྱུད་པའམ། བོན་ལུགས་ཀྱི་དཀྱིལ་འཁོར་མཆོད་ཡུལ་གྱི་གཙོ་བོར་བཞག་པ་སོགས་མེད་པའི་ཕྱིར་ངེས་པ་མ་མཐོང་ལ། འགའ་ཞིག་སློབ་དཔོན་པདྨ་བསང་བརྔན་གྱི་གཞུང་བོད་དུ་མཛད་པ་བསྒྲགས་ནའང་། བོད་ཀྱི་ལྷ་སྲིན་དྲེགས་པ་དང་གཞི་བདག་སོགས་དམིགས་བསལ་གྱི་ཁ་སྐོང་ཙམ་མ་གཏོགས། དངོས་གཞི་འཕགས་ཡུལ་དུ་མེད་པར་ཁས་བླང་མི་བཏུབ་ཅིང་། སློབ་དཔོན་རིན་པོ་ཆེས་ཀྱང་སྔར་གཏན་ནས་མེད་པ་ཞིག་གློ་བུར་དུ་མཛད་པ་མི་འཐད་པ་དང་། གལ་ཏེ་བོན་གྱི་གཞུང་ལ་གཞིར་བྱས་སོ་ཞེ་ན། སྐྱབས་ཡུལ་དཀོན་མཆོག་གསུམ་བཟུང་བ་སོགས་སྔ་མ་དང་མཚུངས་སོ། །དེས་ན་རང་ལུགས་འཕགས་ཡུལ་གྱི་བཀའ་དང་དགོངས་འགྲེལ་ཁྲོད་ན་དམིགས་གསལ་མི་བཞུགས་པའི་ཁ་ཚོན་ཀྱང་ག་ལ་ཆོད་ཅིང་། བྱེ་བྲག་ཏུ་སྔར་བསམ་པ་ལྟར་རྒྱུའི་ཐེག་པ་དང་། ག་བུར་ཨ་གར་ཛཱ་ཏི་ལ་སོགས་པ། །ལེགས་པར་སྦྱར་བ་ལས་བྱུང་དྲི་ཡི་ཚོགས། །རྣམ་གསུམ་དྲི་ཡི་རྡོ་རྗེ་མར་བྱས་ནས། །དཀྱིལ་འཁོར་ལྷ་ཚོགས་རྣམས་ལ་དབུལ་བར་བགྱི། །ཞེས་གསུངས་པ་སོགས་སྤྱི་དང་བྱེ་བྲག་ཏུ་བསྟན་པའི་ཚོགས་དེ་དག་ལས། སློབ་དཔོན་པདྨ་ལ་སོགས་མཁས་གྲུབ་རྣམས་ཀྱིས་བསང་མཆོད་ཆོ་ག་ཟུར་དུ་བཀར་བའི་ཚོགས་བསགས་ཀྱི་ཁྱད་པར་དུ་བྱས་པ་ཞིག་ཏུ་ཁས་བླང་བར་རིགས་སོ། །གཉིས་པ་ནི། གཙང་བྱེད་དྲི་ཞིམ་གྱི་མཆོད་སྤྲིན་དེ་ལའང་ལྡོག་ཆས་དབྱེ་ན། བསང་དུད་ཀྱི་ཁ་དོག་བཟང་ཞིང་དྭངས་གསལ་སྒྲིབ་པ་མེད་ཅིང་རྣམ་འགྱུར་སྣ་ཚོགས་སུ་སྟོན་པའི་གཟུགས། ཆོ་གའི་ཚིག་སྦྱོར་དང་། འབུད་དཀྲོལ་བརྡུང་བའི་རོལ་མོའི་འགྱུར་ཁུགས་སོགས་སྒྲ། སྐྱེས་སྦྱར་གྱི་བདུག་སྤོས་བཏུལ་བའི་དྲི། དཀར་མངར་ཇ་ཆང་ཟས་མཆོག་སོགས་དཔག་ཏུ་མེད་པ་སྟོབ་པའི་བཅུད་འཁྱིལ་བའི་རོ། །ཕུན་སུམ་ཚོགས་པའི་དྲི་བསུང་འཇམ་པོས་ལུས་དབང་ལ་རེག་པ་ཙམ་ནས་བདེ་བ་ཁྱད་པར་དུ་སྟེར་བར་བྱེད་པའི་རེག་བྱ་སྟེ་འདོད་ཡོན་ལྔ་དང་། དེས་ཀྱང་མི་མཚོན་པའི་ཏིང་ངེ་འཛིན་གྱི་སྟོབས་ལས་དུད་སྤྲིན་རེ་རེའི་རྩེར་ཡང་ཉེར་སྤྱོད་འདོད་ཡོན་བཀྲ་ཤིས་རྫས་རྟགས་རྒྱལ་སྲིད་བདུན་སོགས་བསམ་གྱིས་མི་ཁྱབ་པའི་རང་བཞིན་དུ་བློས་སྤྲུལ་ནས་འབུལ་བ་སྟེ། རྒྱུ་མཚན་དེ་ལྟ་བུའི་བྱེད་པས་མགྲོན་བཞི་མཉེས་ནས་རང་རང་གི་རྗེས་མཐུན་གྱི་དངོས་གྲུབ་སྟེར་བ་དང་ཚོགས་གཉིས་བདེ་བླག་ཏུ་འདུམས་པར་བྱེད་པ་ལ། སྦྱོར་བ་དངོས་གཞི་རྗེས་ཀྱི་ཆོ་ག་གསུམ་ལས། དང་པོ་ནི། གཞུང་སོ་སོ་ནས་འབྱུང་བའི་ཡོ་བྱད་ཉེར་བསྡོགས་སུ་བྱ་བའོ། །གཉིས་པ་ལ། དངོས་གཞིར་བདག་བསྐྱེད་སྤྱན་དྲངས་མཆོད། །ཕྲིན་ལས་ཞུ་ཞིང་ཕྱྭ་གཡང་འགུགས། །ཞེས་པའི་དང་པོ་ལའང་། སྔོན་དངོས་གཉིས་ལས། དང་པོ་ལ་ཡང་། མཆོད་རྫས་རྣམས་སྔགས་དྲུག་ཕྱག་དྲུག་གིས་བྱིན་གྱིས་བརླབ་པ་དང་། བསོད་ནམས་ཀྱི་ཚོགས་བསག་པའི་ཕྱིར་སྐྱབས་སེམས་བྱ་བའོ། །གཉིས་པ་ནི། ཡེ་ཤེས་ཀྱི་ཚོགས་ཀྱི་སླད་སྭ་བྷཱ་བས་སེམས་འོད་གསལ་དུ་བཅུག་སྟེ། དེ་ལས་རང་ཉིད་ཐུགས་རྗེ་ཆེན་པོའམ། པདྨ་སཾ་བྷ་བ་སོགས་ཟུང་འཇུག་གི་སྐུར་ལྡང་བའི་ཐུགས་ཀར་སྔགས་ཕྲེང་བཀོད་པ་སྤྲོ་བསྡུ་དང་བཅས་པས་བཟླས་པ་ཅུང་ཟད་བྱ་བའོ། །གཉིས་པ་ནི། རང་གི་ཐུགས་ཀའི་འོད་ཟེར་གྱིས་མགྲོན་བཞིའི་ཚོགས་བཀུག་སྟེ་མདུན་དུ་དགྱེས་བཞིན་བཞུགས་པར་གསལ་གདབ། གསུམ་པ་ལ། འདོད་དགུ་འབུལ་བའི་མཆོད་པ། ཉམས་གྲིབ་སྦྱང་བའི་བསང་མཆོད། བཤགས་པ་འབུལ་པའི་མཆོད་པའོ། །དང་པོ་ནི། བདེན་སྟོབས་བརྗོད་པས་སོ་སོར་བསྔོས་ནས། བྱེ་བྲག་འདོད་ཡོན་རྒྱ་མཚོའི་སྤྲིན་གྱིས་མཉེས་པར་བལྟ་བ་དང་། གཉིས་པ་ནི། ཁྱད་པར་དྲི་ཞིམ་སྤོས་ཀྱི་མཆོད་སྤྲིན་སྐྱེས་སྦྱར་ལས་བྱུང་དུད་པའི་སྣེ་ལས་འདོད་ཡོན་རྒྱ་མཚོའི་ཆར་དུ་བབས་པས་འགྲོན་བཞི་སོ་སོར་དགྱེས་པ་བསྐྱེད་པ་དང་། གསུམ་པ་ནི། རང་དང་སྦྱིན་བདག་འཁོར་བཅས་ཀྱི་ཉམས་གྲིབ་དང་། སྣོད་བཅུད་ཀྱི་ཕྱྭ་བཅུད་ལོག་པ་སོགས་རྒྱུ་འབྲས་ཀྱི་མཐུས་དག་ཅིང་སླད་ནས་མི་བྱ་བར་བསྡོམས་པ་སོགས་ཀྱི་སྒོ་ནས་ཉམས་གྲིབ་ཐམས་ཅད་བསང་བར་བྱེད་པའོ། །བཞི་པ་ནི། མགྲོན་བཞི་སོ་སོའི་བྱེད་ལས་དང་མཐུན་པའི་ཕྲིན་ལས་ཞུ་བ་སྟེ་རྟོགས་པར་སླའོ། །ལྔ་པ་ནི། དེ་ལྟར་མཆོད་པའི་མཐུས་མགྲོན་རིགས་རྣམས་དགྱེས་ཤིང་། རྒྱུ་འབྲས་མི་བསླུ་བའི་རྟེན་འབྱུང་གིས་སྣོད་བཅུད་སྡེ་བཞིའི་དཔལ་འབྱོར་ཐམས་ཅད་པདྨར་བུང་བ་འདུ་བ་ལྟར་བསྡུ་བའི་དམིགས་རྣམ་བྱེད་པའོ། །གསུམ་པ་རྗེས་ལ། རྗེས་ནི་བཟོད་གསོལ་གཤེགས་སུ་གསོལ། བཀྲ་ཤིས་བསྔོ་བའི་རྒྱས་གདབ་བོ། །ཞེས་འབྱུང་ངོ་། །སྤྱི་དོན་གསུམ་པ། དེ་ལྟར་སྦྱིན་པ་རྣམ་བཞིས་བསྡུས་པའི་མཆོད་ཚུལ་གྱི་ཆོ་ག་དེས་ནི། གནས་སྐབས་བདག་གཞན་གྱི་སྡིག་སྒྲིབ་ཉེས་ལྟུང་དང་། དམེ་ཡུག་རྩོག་དང་རོ་གྲིབ་ལ་སོགས་གྲིབ་དང་མི་གཙང་བའི་ཉེས་སྒྲིབ་ཀྱིས་ཕོག་པ་ཐམས་ཅད་སྦྱངས་ཤིང་། མཁར་ཁང་བརྩེགས་པ། ཆེ་སར་དབང་བསྐུར་བ། གཞིར་སྡོད་པ། བྱེས་སུ་འགྲོ་བ་ལ་སོགས་པའི་རྣམ་པ་ཀུན་ཏུ་བར་གཅོད་ཐམས་ཅད་ཞི་བ་དང་། མཐུན་རྐྱེན་བྱ་བ་གང་བརྩམས་ཡིད་བཞིན་དུ་འགྲུབ་པར་འཇིག་འདས་ཀྱི་ལྷ་སྲུང་རྣམས་ཀྱིས་གྲོགས་བྱེད་པའི་མཐུ་དང་། མཐར་ཐུག་ཚོགས་གཉིས་ཀྱི་ས་བོན་ལ་བརྟེན་ཆོས་དང་གཟུགས་ཀྱི་སྐུ་དམ་པ་གཉིས་པོ་ཐོབ་པར་འགྱུར་བ་སོགས་མཐའ་ཀླས་པར་བཤད་དོ། །དེས་ནི་བསང་གི་ཆོ་གའི་རྣམ་པར་བཤད་པ་བྱེ་བྲག་པའི་དོན་ཉུང་ངུར་བསྡུས་ཏེ་བཤད་ཟིན་ཏོ།། །། ༈ གཞན་ཡང་བསང་གི་ཆོ་གའི་རྣམ་པར་བཤད་པ་མང་དུ་མཐོང་མོད། ཅུང་ཟད་ལེགས་བཤད་མང་བ་ནི་མོ་གོལ་གྱི་བླ་མ་ཐུ་འུ་བཀྭན་ཆོས་ཀྱི་རྡོ་རྗེས་མཛད་པ་ཉིད་ལེགས་པར་འཁུམས་ལ། སྨོས་མ་ཐག་པ་ནི་གསར་མའི་ལུགས་གཙོར་བཏོན་གྱི་བཤད་པར་སྣང་ནའང་། ཀུན་གྱི་ཁུངས་སློབ་དཔོན་པདྨ་སཾ་བྷ་བས་མཛད་པ་ཉིད་ལ་སྙེགས་པར་བསྙོན་དུ་མེད་ན། དེ་ཉིད་ཀྱིས་མཛད་པའི་གཏེར་གཞུང་ཚད་ལྡན་ལས་འབྱུང་བའི་རྣམ་བཤད་དང་། ཆོ་གའི་ཁྲིད་རིམ་གཙོ་བོར་བཟུང་དགོས་པར་སྣང་མོད། འོན་ཀྱང་དེང་སང་ནི་འདི་རིགས་ལ་རང་འདོད་ཕྱོགས་ལྷུང་གི་གཏམ་གྱིས་ཡིད་ཚིམ་པ་མང་བའི་ཕྱིར། བདག་ཀྱང་རེ་ཞིག་ལེགས་བཤད་སྨྲ་བ་ལ་སྨྲ་བཅད་བྱེད་པ་ཉིད་ཡི་དམ་དུ་བྱས་སོ། །ཨི་ཏི་པཱ་དི་སཱུཪྻ་ལི་ཁི་ཏཾ།། །། ༈

[edit]

bsang mchod kyi rnam gzhag_/ bsang 272mchod kyi rnam bshad tshogs 298gnyis chu gter 'phel ba'i zla bar27/__bsang mchod kyi byung khungs bstan pa/__bsang mchod kyi rnam bzhag dngos/__mjug phan yon bstan pa'o/__/dang po la gnyis te/__mdor bstan pa dang /__dbye ba rgyas par bshad pa'o/__/dang po ni/__bsang mchod 'bul ba'i cho ga 'di dag mchod yul mchod pas mnyes shing /__sbyin yul sbyin pas tshims par byed pa'i sgo nas tshogs bsags sgrib sbyong gi thabs khyad par ba ste/__dper na chu la brten nas gtor ma gtong ba/__me la brten nas sbyin sreg byed pa/__bza' bca' la brten nas mchod gtor 'bul ba sogs dang mtshungs par/__'dir yang dri zhim ngad pa la brten nas mchod pa 'bul ba ste/__bsang mchod bon gto'i lugs dang glo bur du byung ba zhig yin par smra na/__de dag sogs kyang de dang mtshungs te khyad med pa'i phyir/__gnyis pa la/__ngo bo/__nges tshig__/dbye ba/__dbye gzhi'o/__/dang po ni/__dag byed dri zhim gyi mchod pa'i cho ga gang zhig__/nyes skyon gyi sgrib byed thams cad sbyangs shing /__/bde legs ster ba'i nus pa dang ldan pa'o/_/gnyis pa ni/__sho d+ha na/__miR+Sh+Ta/__shud+d+ha zhes pa rnams dag byed dang /__mr-i dza/__mArdzan/__snA ta/__pU ta/__shaud+d+haHzhes pa rnams gtsang byed la 'jug ste/__des na dag byed kyi rdzas dang lhan cig par mchod pa'i cho ga la brten nas bdag gzhan kun gyi nyes skyon thams cad sbyangs nas dag cing gtsang bar byed pa'i phyir dang /__d+hU pa/__d+hU pa na/__d+hU pa ya ti/__pra bod+d+ha naM/__bAn+ti kri ta zhes pa rnams bdug pa dang /__bdug par byed pa dang /__rab tu bsang bar byed pa dang /__sbyong bar byed pa rnams la 'jug ste/__de ltar na spos dang spos kyi bdug pa so sor ma phye bar bsang bar byed pa'i cho gas nyes skyon thams cad khrus kyis dri ma 'khrul pa ltar bsal zhing sbyong ba dang /__gtsang zhing dag par byed pa'i don nam/__yang na me d+ha dang /__me d+h+yA zhes pa mchod sbyin gyi cho ga la 'jug ste/__mchod sbyin gyi yul du gyur pa gang dag dri zhim spos kyi ngad par brten pa'i mchod rdzas gya nom pas dgyes shing tshim par byed pa'i don to/__/gsum pa la thabs kyis ma zin pa dang /__zin pa'i gnas skabs las/__dang po ni/__ji ltar 'khor bar rnam par 'khyams pa'i dus su'ang rkyen gyi rgyu 'dod pa'i yon tan lnga ste/__de'i tshe'ang dri bzang po la don du gnyer pa dang /__gtsang zhing dag par byed pa'i yul la zhen cing gcig shos 'dor ba'i tshul dang bcas pas stob cing len pa dag yod na/__thabs kyis ma zin pa las don du bsang gi cho ga dang rnam pa mtshungs pa'i phyir ro/__/gnyis pa la'ang /__dman pa dang /__mchog gi thabs kyis zin pa'o/__/dang po ni/__de lta bu'i yul de dag lam du byed pa la mu stegs pa dag rig byed la tshad mar 'dzin pa'i dbang gis log par rtog pa'i 'jug tshul bzhi yod de/__de rnams kyang phal cher khrus dang /__gtsang sbra dang /__smyung bar brten pa dang /__sbyin sreg dang /__mchod sbyin gyi cho ga sogs la 'bad par byed pa'i phyir/__de dag kyang don thob tu dag par byed pa dang /__tshim par byed pa'i tshul can yin phyir bsang gi mchod pa dang mtshungs par blta'o/__/gnyis pa la'ang /__gzhi de dag spang ba lam du byed pa dang /__mi spong bar lam du byed pa gnyis las/__dang po/__nyan thos rnams kyis yul la mngon par zhen pa ni srid pa'i rtsa bar mthong bas spangs te/__nyes spyod bsdams shing gtsang bar byed pa'i tshul khrims kyi bslab pa phun sum tshogs pas rgyal ba dgyes pa'i lam la 'jug pa ni dag byed bsung zhim gyi mchod pa khyad par du gyur pa ste/__tshig ler/__de la 'dir ni rnam kun tu/__/'dul ba min pas dag pa med/_/ces dang /__gzhan du'ang /__tshul khrims 'di ni gtsang ba ste/__zhes sogs bstan par ma zad/__sa ga'i lhas/__'jig rten mgon pos 'jig rten gyi/__/yams kyi 'tshe ba zhi bya'i phyir/__/sangs rgyas sku gzugs dro sogs su/__/spyan drangs par ni gsungs pa yin/_/der ni chag chag byugs pa dang /__/srang gi gzhi mdor sa gzhi la/__/sna tshogs me tog bkod pa yis/__/rab tu mdzes par bya ba yin/__/tsan+dan a gar ga bur gyi/__/bdug spos kun nas dbul bar bya/__/phyogs kyi sgo nas dri zhim dag__/dal zhing dal ba'i rlung gis bskyod/__/ces sogs kyis bstan la/__khyad par theg pa chen po pha rol tu phyin pa'i lugs kyis/__mtha' yas pa'i sems can thams cad sgrol bar 'dod pa'i bsam pas smon pa dang 'jug pa'i bslab pa yang dag par blangs te/__thun mtshams su yan lag bdun pa sogs chos bzhin du spyod pa dang /__thun gyi dngos gzhi pha rol tu phyin pa drug sogs la slob par byed pa'i/__dang po ltar na phyag 'tshal ba sngon du 'gro bas/__mchod pa'i khyad par spyi dang /__khyad par du/__stong gsum kun tu dri ngad ldang ba yi/__/dri mchog rnams kyis thub dbang rnams kyi sku/__/gser sbyangs gtso ma byi dor byas pa ltar/__/'od chags 'bar ba de dag byugs par bgyi/__/zhes dang /__spos mchog yid 'phrog dri ngad khyab pa yi/__/bdug pa'i sprin tshogs rnams kyang de la dbul/__/zhes sogs kyis bstan la/__phyi ma ltar/__bsang gi cho ga la'ang phar phyin drug tu bgrang du yod de/__mtha' klas pa'i mchod sbyin gyi yul du gyur pa rnams dri zhim po'i dud pas mtshon pa'i 'dod yon gyis mnyes par byed pa sbyin pa/__dag byed kyi cho ga des rgyal ba rnams kyi sku la nyon mongs pa'i dag bya mi mnga' yang /__bdag gzhan kun gyi sgo gsum gyi sdig ltung nyes tshogs thams cad dag par byed pa'i mchog tu 'gyur ba'i phyir tshul khrims/__dkon mchog gsum mnyes pa'i thabs kyi dka' ba dang du len zhing /__lha srin sogs rang la gnod par byed pa la'ang khong khro ba med par sbyin pa'i dga' ston ster phyir bzod pa/__sbyor dngos rjes gsum gyis mgron rigs rnams dgyes pa'i thabs la rtsol ba bskyed pa brtson 'grus/__kun rdzob 'jig 'das kyi yul la/__dman mchog gi mchod pa mtha' klas pa stob pa'i sems rtse gcig pa bsam gtan/_don dam 'khor gsum yang dag chen por shes pa shes rab bo/__/des na gzhi spong ba'i tshul la'ang /__'dod yon la sogs pas rang 'ching bar byed pa'i phyir sred zhen spangs pa las/__mchod sbyin gyi yul la tshogs rdzogs pa'i phyir dbul ba la ni nam yang bkag pa med do/__/gzhi mi spong ba rdo rje theg pa'i lugs la ni dngos po gang yang thabs mkhas kyis spyad na 'ching ba med pa'i phyir/__dkyil 'khor 'khor lo bsgrubs shing mchod pa'i tshe'ang /__nyer spyod bdun dang /__'dod pa'i yon tan lnga dang /__rdo rje lha mo bcu drug la sogs pa 'bul ba dang /__tshogs kyi 'khor lo dang /__sbyin sreg dang /__gtor ma la sogs pa dang /__nang du kha zas kyi sreg blugs dang /__snyoms 'jug gi tshogs 'khor la sogs pa phar phyin pas bskal pa du mar bsags pa'i tshogs gang yin pa skad cig la 'dums pa'i thabs la mkhas pa dang ldan pa'i phyir ci'i slad du bkag__/des na mdo sngags gang gi phyogs su'ang dgag bya med cing blang ba'i 'os su bstan to/__/gnyis pa bsang mchod kyi rnam bzhag dngos la/__lugs srol gang du gtogs ngos bzung /__de la rnam par dpyad/__cho ga dngos bshad pa'o/__/dang po ni/__sngar smos pa ltar phyi nang gang gi grub mtha' la'ang mtshan dngos ma smos pa ma gtogs mtshan gzhi bsang gi cho ga sgra ji bzhin pa yod la/__khyad par skabs su babs pa'i dbang du byas na bsang mchod gyi cho ga 'di mdo sngags thun mong ba'i cho ga ste/__maN+Dal dang chu gtor la sogs pa bzhin no/__/gnyis pa ni/__kha cig bon lugs su 'chad mod/__de lta na'ang gsas mkhar dang bong so brtsigs pa sogs thor bur 'dres pa yod na ma gtogs/__dngos gzhi bon gyi ston pa las brgyud pa'am/__bon lugs kyi dkyil 'khor mchod yul gyi gtso bor bzhag pa sogs med pa'i phyir nges pa ma mthong la/__'ga' zhig slob dpon pad+ma bsang brngan gyi gzhung bod du mdzad pa bsgrags na'ang /__bod kyi lha srin dregs pa dang gzhi bdag sogs dmigs bsal gyi kha skong tsam ma gtogs/__dngos gzhi 'phags yul du med par khas blang mi btub cing /__slob dpon rin po ches kyang sngar gtan nas med pa zhig glo bur du mdzad pa mi 'thad pa dang /__gal te bon gyi gzhung la gzhir byas so zhe na/__skyabs yul dkon mchog gsum bzung ba sogs snga ma dang mtshungs so/__/des na rang lugs 'phags yul gyi bka' dang dgongs 'grel khrod na dmigs gsal mi bzhugs pa'i kha tshon kyang ga la chod cing /__bye brag tu sngar bsam pa ltar rgyu'i theg pa dang /__ga bur a gar dzA ti la sogs pa/__/legs par sbyar ba las byung dri yi tshogs/__/rnam gsum dri yi rdo rje mar byas nas/__/dkyil 'khor lha tshogs rnams la dbul bar bgyi/__/zhes gsungs pa sogs spyi dang bye brag tu bstan pa'i tshogs de dag las/__slob dpon pad+ma la sogs mkhas grub rnams kyis bsang mchod cho ga zur du bkar ba'i tshogs bsags kyi khyad par du byas pa zhig tu khas blang bar rigs so/__/gnyis pa ni/__gtsang byed dri zhim gyi mchod sprin de la'ang ldog chas dbye na/__bsang dud kyi kha dog bzang zhing dwangs gsal sgrib pa med cing rnam 'gyur sna tshogs su ston pa'i gzugs/__cho ga'i tshig sbyor dang /__'bud dkrol brdung ba'i rol mo'i 'gyur khugs sogs sgra/__skyes sbyar gyi bdug spos btul ba'i dri/__dkar mngar ja chang zas mchog sogs dpag tu med pa stob pa'i bcud 'khyil ba'i ro/__/phun sum tshogs pa'i dri bsung 'jam pos lus dbang la reg pa tsam nas bde ba khyad par du ster bar byed pa'i reg bya ste 'dod yon lnga dang /__des kyang mi mtshon pa'i ting nge 'dzin gyi stobs las dud sprin re re'i rtser yang nyer spyod 'dod yon bkra shis rdzas rtags rgyal srid bdun sogs bsam gyis mi khyab pa'i rang bzhin du blos sprul nas 'bul ba ste/__rgyu mtshan de lta bu'i byed pas mgron bzhi mnyes nas rang rang gi rjes mthun gyi dngos grub ster ba dang tshogs gnyis bde blag tu 'dums par byed pa la/__sbyor ba dngos gzhi rjes kyi cho ga gsum las/__dang po ni/__gzhung so so nas 'byung ba'i yo byad nyer bsdogs su bya ba'o/__/gnyis pa la/__dngos gzhir bdag bskyed spyan drangs mchod/__/phrin las zhu zhing phywa g.yang 'gugs/__/zhes pa'i dang po la'ang /__sngon dngos gnyis las/__dang po la yang /__mchod rdzas rnams sngags drug phyag drug gis byin gyis brlab pa dang /__bsod nams kyi tshogs bsag pa'i phyir skyabs sems bya ba'o/__/gnyis pa ni/__ye shes kyi tshogs kyi slad swa b+hA bas sems 'od gsal du bcug ste/__de las rang nyid thugs rje chen po'am/__pad+ma saM b+ha ba sogs zung 'jug gi skur ldang ba'i thugs kar sngags phreng bkod pa spro bsdu dang bcas pas bzlas pa cung zad bya ba'o/__/gnyis pa ni/__rang gi thugs ka'i 'od zer gyis mgron bzhi'i tshogs bkug ste mdun du dgyes bzhin bzhugs par gsal gdab/__gsum pa la/__'dod dgu 'bul ba'i mchod pa/__nyams grib sbyang ba'i bsang mchod/__bshags pa 'bul pa'i mchod pa'o/__/dang po ni/__bden stobs brjod pas so sor bsngos nas/__bye brag 'dod yon rgya mtsho'i sprin gyis mnyes par blta ba dang /__gnyis pa ni/__khyad par dri zhim spos kyi mchod sprin skyes sbyar las byung dud pa'i sne las 'dod yon rgya mtsho'i char du babs pas 'gron bzhi so sor dgyes pa bskyed pa dang /__gsum pa ni/__rang dang sbyin bdag 'khor bcas kyi nyams grib dang /__snod bcud kyi phywa bcud log pa sogs rgyu 'bras kyi mthus dag cing slad nas mi bya bar bsdoms pa sogs kyi sgo nas nyams grib thams cad bsang bar byed pa'o/__/bzhi pa ni/__mgron bzhi so so'i byed las dang mthun pa'i phrin las zhu ba ste rtogs par sla'o/__/lnga pa ni/__de ltar mchod pa'i mthus mgron rigs rnams dgyes shing /__rgyu 'bras mi bslu ba'i rten 'byung gis snod bcud sde bzhi'i dpal 'byor thams cad pad+mar bung ba 'du ba ltar bsdu ba'i dmigs rnam byed pa'o/__/gsum pa rjes la/__rjes ni bzod gsol gshegs su gsol/__bkra shis bsngo ba'i rgyas gdab bo/_/zhes 'byung ngo /__/spyi don gsum pa/__de ltar sbyin pa rnam bzhis bsdus pa'i mchod tshul gyi cho ga des ni/__gnas skabs bdag gzhan gyi sdig sgrib nyes ltung dang /__dme yug rtsog dang ro grib la sogs grib dang mi gtsang ba'i nyes sgrib kyis phog pa thams cad sbyangs shing /__mkhar khang brtsegs pa/__che sar dbang bskur ba/__gzhir sdod pa/__byes su 'gro ba la sogs pa'i rnam pa kun tu bar gcod thams cad zhi ba dang /__mthun rkyen bya ba gang brtsams yid bzhin du 'grub par 'jig 'das kyi lha srung rnams kyis grogs byed pa'i mthu dang /__mthar thug tshogs gnyis kyi sa bon la brten chos dang gzugs kyi sku dam pa gnyis po thob par 'gyur ba sogs mtha' klas par bshad do/__/des ni bsang gi cho ga'i rnam par bshad pa bye brag pa'i don nyung ngur bsdus te bshad zin to//__//__! gzhan yang bsang gi cho ga'i rnam par bshad pa mang du mthong mod/__cung zad legs bshad mang ba ni mo gol gyi bla ma thu 'u bkwan chos kyi rdo rjes mdzad pa nyid legs par 'khums la/__smos ma thag pa ni gsar ma'i lugs gtsor bton gyi bshad par snang na'ang /__kun gyi khungs slob dpon pad+ma saM b+ha bas mdzad pa nyid la snyegs par bsnyon du med na/__de nyid kyis mdzad pa'i gter gzhung tshad ldan las 'byung ba'i rnam bshad dang /__cho ga'i khrid rim gtso bor bzung dgos par snang mod/__'on kyang deng sang ni 'di rigs la rang 'dod phyogs lhung gi gtam gyis yid tshim pa mang ba'i phyir/__bdag kyang re zhig legs bshad smra ba la smra bcad byed pa nyid yi dam du byas so/__/i ti pA di sUR+Ya li khi taM//____//__!