JKW-KABUM-04-NGA-001-031

Previous Text Back to Volume PageNext Text

བཀའ་བརྒྱད་ཀྱི་གཏོང་ཐུན་མདོར་བསྡུས།

Wylie title	bka' brgyad kyi gtong thun mdor bsdus
Location	mkhyen brtse'i bka' 'bum Volume 4, sde tshan 1, Text 31, Pages 524-530 (Folios 262b4 to 265b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bka' brgyad kyi gtong thun mdor bsdus. In 'jam dbyangs mkhyen brtse'i dbang po'i bka' 'bum, Vol. 4: 524-530. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

Tibetan Text

Wylie

[edit]

ན་མོ་གུ་རུ་བྷྱཿ རིག་སྔགས་འཆང་བའི་སྡེ་སྣོད་ཐམས་ཅད་ཀྱི་རྩ་བར་གྱུར་པ་བྱ་བའི་རྒྱུད་ཀྱི་དམ་ཚིག་ནི། སྤྱིའི་དམ་ཚིག་དང་། དབང་གི་དམ་ཚིག་གཉིས་ལས། དང་པོ་ལ་ཡང་གསུམ་གྱི། དང་པོ་ཆོས་འདི་པའི་དམ་ཚིག་སྲུང་བ་ནི། ཐེག་པ་ཆེན་པོའི་དཀོན་མཆོག་གསུམ། དུས་ཐམས་ཅད་དུ་མི་གཏོང་ཞིང་། དེ་དག་ལ་སྐྱབས་སུ་སོང་བའི་བསླབ་བྱ་རྣམས་བཟུང་བའོ། །གཉིས་པ་བྱང་ཆུབ་སེམས་དཔའི་སྡོམ་པ་བསྲུང་བ་ནི། བྱང་ཆུབ་སེམས་དཔའ་རྣམས་དང་། དེའི་སྡེ་སྣོད་དུ་གསུངས་པའི་ཚུལ་ཁྲིམས་གསུམ་ལ་སོགས་པའི་བསླབ་པ་ལ་ཡང་དག་པར་བསླབ་པར་བྱ་བའོ། །གསུམ་པ་ལྷ་རྣམས་ལ་དད་པར་བྱ་བ་ནི། གསང་སྔགས་ཕོ་དང་རིག་སྔགས་མོ་ཡིས་བསྡུས་པའི་ལྷ་ཚོགས་རྣམས་ལ་བཟང་ངན་དང་མཆོག་དམན་དུ་འཛིན་པའི་མ་དད་པ་སྤངས་ནས་དད་པར་བྱ་བའོ། །གཉིས་པ་ལ་བཅུ་གསུམ་གྱི། དང་པོ་ནི། དུས་རྟག་པར་ཕྱག་རྒྱ་ཆེན་པོ་སྟེ་རང་གི་ལྷ་ལ་ལྷ་གཞན་ལས་ཁྱད་པར་དུ་གུས་པའི་མོས་པ་བྱ་ཞིང་། ལྷ་བསྒྲུབ་པས་མ་གྲུབ་ན་དེ་ལ་ཁྲོས་པས་རིག་སྔགས་བཅིངས་པ་ལ་སོགས་པའི་སྤོག་ཆོག་ཀྱང་ལྷ་ལ་མ་གུས་པ་ཡིན་པས་མི་བྱ་བའོ། །གཉིས་པ་ནི། དམ་ཚིག་ཅན་གྱི་བྱ་རྒྱུད་ཀྱི་སྒོར་ཞུགས་པའི་གང་ཟག་དབང་ཐོབ་ཅིང་དམ་ཚིག་དང་སྡོམ་པར་ལྡན་པ་ལ་གུས་པར་བྱ་བ་ལས། དེའི་སྐྱོན་བརྗོད་པ་དང་། ལུས་སྲོག་ལ་མཐོ་འཚམས་པའི་བར་གྱི་གནོད་པར་འགྱུར་པའི་ལས་མི་བྱེད་པའོ། །གསུམ་པ་ནི། སངས་རྒྱས་ཀྱི་བསྟན་པ་ལ་ཞུགས་པའི་གང་ཟག་ལས་འབྲས་དང་བྱང་ཆུབ་ཀྱི་སེམས་ལ་ནན་ཏན་དུ་བྱེད་པ་རྣམས་ནི་རང་གི་མཛའ་བོ་ཡིན་ལ། དེ་རྣམས་ལ་གུས་པར་བྱ་ཡི་སྐྱོན་བརྗོད་པ་སོགས་མི་བྱེད་པའོ། །བཞི་པ་ནི། རང་ལ་དབང་དང་། རྒྱུད་དང་། ཐུན་མོང་དང་། མཆོག་གི་དངོས་གྲུབ་སྒྲུབ་པའི་མན་ངག་སྟེར་བའི་བླ་མ་ལ་གུས་པར་བྱ་ཞིང་། རིགས་དང་། ཚུལ་ཁྲིམས་དང་། ཡོན་ཏན་ལ་སོགས་པའི་སྒོ་ནས་སྨད་པར་མི་བྱ་བའོ། །ལྔ་པ་ནི། དབང་དང་ནོར་རྒྱས་ལ་སོགས་པའི་ཕྱིར་གནོད་གནས་ལ་སོགས་པའི་ལྷ་བསྒྲུབས་པས། ཆོ་ག་ཚུལ་བཞིན་མ་གྲུབ་པ་ལ་བརྟེན་ནས་དངོས་གྲུབ་དེ་རྣམས་མ་བྱུང་ན། ལྷ་ལ་ཁྲོས་ཤིང་ཞེ་སྡང་བའི་སེམས་མི་བྱའོ། །དྲུག་པ་ནི། ཚེས་བརྒྱད་ལ་སོགས་པའི་དུས་མཚམས་བཟང་པོ་དག་ལ་འདོད་པའི་ལྷ་དང་། དཀོན་མཆོག་ལ་མཆོད་པ་རྒྱ་ཆེན་པོས་མཆོད་པར་བྱ་བའོ། །བདུན་པ་ནི། དབང་ཕྱུག་དང་ཁྱབ་འཇུག་ལ་སོགས་པའི་སྟོན་པ་གཞན་རྣམས་ཀྱི་གཞུང་ནས་འབྱུང་བ་ལྟར་མི་མཆོད་ཅིང་། དེའི་མན་ངག་དང་། དཀྱིལ་འཁོར་ལ་ཉམས་ལེན་མི་བྱེད་པའོ། །དགུ་པ་ནི། སྲོག་ཆགས་ཕྲ་མོ་གྲོག་སྦུར་གྱི་བར་རྣམས་ལ་བྱམས་པའི་སེམས་བསྐྱེད་ནས་ཕན་པ་ཁོ་ན་བྱའོ། །གནོད་པའི་ལས་རྣམས་ཐམས་ཅད་དུ་མི་བྱེད་པའི་སྡོམ་སེམས་རབ་ཏུ་བརྟན་པར་བྱ་བའོ། །བཅུ་པ་ནི། ཐེག་ཆེན་གསང་སྔགས་ལ་ཞུགས་པའི་གང་ཟག་བྱང་ཆུབ་སེམས་དཔའི་སྤྱོད་པ་ལ་དགའ་བ་རྣམས་ཀྱི་བསོད་ནམས་འཕེལ་བར་བྱེད་པའི་ཐབས་བཟླས་བརྗོད་དང་། སྡོམ་པ་བཟུང་བ་ལ་སོགས་པ་ལ་ནན་ཏན་བསྐྱེད་པའོ། །བཅུ་གཅིག་པ་ནི། བཟླས་བརྗོད་བྱེད་པ་ལ་འབད་པའི་རྣལ་འབྱོར་པས། གསང་སྔགས་བཟླས་པའི་སྤྱོད་ལམ་དང་ལྡན་པས་ཟློས་དགོས་ཏེ། ཟློས་པའི་ཆོ་ག་ལ་གནས་པ། གླུ་གར་རྩེད་མོ་མི་བྱ་སྟེ། ཞེས་སོགས་རྒྱ་ཆེར་གསུངས་པ་ལྟར་རོ། །བཅུ་གཉིས་པ་ནི། གསང་སྔགས་སོ་སོའི་རྒྱུད་དམ་ཚིག་གསུམ་བཀོད་སོགས་ནས་བསྟན་པའི་དམ་ཚིག །དམ་པའི་ཆོས་ཀྱང་སྤང་མི་བྱ། ཞེས་སོགས་རྣམས་ཀྱང་འབད་པས་བསྲུང་བར་བྱའོ། །བཅུ་གསུམ་པ་ནི། དབང་བསྐུར་མ་ཐོབ་པའམ། ཐོབ་ཀྱང་ཉམས་པའི་དམ་ཚིག་མེད་པ་རྣམས་ལ། གསང་སྔགས་ཀྱི་ཆོ་ག་ཞིབ་མོ་དང་། རྒྱུད་དང་། མན་ངག་རྣམས་ལེགས་པར་བསྲུང་ཞིང་སྦ་བར་བྱའོ། །དེ་སྐད་དུ། གསང་བ་སྤྱི་རྒྱུད་ལས། །དམ་ཚིག་འདི་དག་བསྒོ་བར་བྱ། །དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་༢རྣམས་དང་ནི། །རིག་༣སྔགས་གསང་སྔགས་ཚོགས་རྣམས་ལ། །དད་པ་རབ་ཏུ་བརྟན་པར་བྱ། །རྟག་པར་༡ཕྱག་རྒྱ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་༢དང་མཛའ་བོ་དང་༣། །བླ་མ་ལ་༤ཡང་གུས་པར་བྱའོ། །ལྷ་༥རྣམས་ཀུན་ལ་སྡང་མི་བྱ། །དུས་༦མཚམས་དག་ཏུ་མཆོད་པར་བྱ། །སྟོན་༧པ་གཞན་གྱི་གཞུང་མི་མཆོད། །རྟག་༨ཏུ་གློ་བུར་མགྲོན་མཆོད་བྱ། །སྲོག་ཆགས་༩རྣམས་ལ་བྱམས་པའི་སེམས། །རྟག་ཏུ་བརྟན་པ་ཉེ་བར་བཞག །ཐེག་པ་༡༠ཆེ་ལ་དགའ་རྣམས་ཀྱི། །བསོད་ནམས་དག་ནི་ནན་ཏན་བསྐྱེད། །བཟླས་༡༡བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་༡༢སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་བསྲུངས་ཤིང་། །དེའང་བདག་གིས་རྟོགས་པར་བྱ། །དེ་ལྟར་དམ་ཚིག་བསྒོས་ནས་ནི། །ཞེས་གསུངས་པ་ལྟར་རོ། །དེ་ལྟར་སྤྱི་དང་ཁྱད་པར་གྱི་དམ་ཚིག་དེ་དག་སྲོག་དང་བསྡོས་ཏེ་བསྲུངས་ལ་ཉེས་པས་མ་གོས་པར་བྱ། གལ་ཏེ་བག་མེད་པའི་དབང་གིས་ཉེས་པ་དེ་དག་གང་ཡང་རུང་བ་གཅིག་བྱུང་ན། ལེགས་གྲུབ་ཏུ། འདི་དག་བྱས་ནས་འདི་བྱའོ། །མི་གཡེལ་བར་ནི་གྱུར་པར་བྱ། །ཉིན་པར་བག་མེད་བྱས་པ་དག །མཚན་མོ་སོ་སོར་བཤགས་པར་བྱ། །ནུབ་མོ་བྱས་པ་ནོངས་པར་བཤགས། །ལེགས་པར་བྱས་ལ་མངོན་དགའ་བྱ། །ཞེས་པ་ལྟར་རྟེན་དང་ཡུལ་སྡོམ་ལྡན་གྱི་མདུན་དུ་ལྟུང་བའི་མིང་ནས་སྨོས་ཏེ། སྟོབས་བཞི་ཚང་བའི་བཤགས་པ་བྱ། དེའི་སྟེང་དུ་ཉོན་མོངས་ཆེ་འབྲིང་ཆུང་གསུམ་གྱིས་ཀུན་ནས་བསླངས་པའི་ཉེས་པ་ཆེ་འབྲིང་ཆུང་གསུམ་དུ་ཤེས་པར་བྱས་ལ། ཆུང་ངུ་ལ་རང་གི་ལྷའི་སྙིང་པོ་འབུམ་མམ། མེ་ལྟར་རྨོངས་བྱེད་མའི་གཟུངས་སྟོང་བཟླ་བ་དང་། འབྲིང་པོ་ལ་ཞི་བའི་སྦྱིན་སྲེག་མང་དུ་བྱ། ཉེས་པ་ཆེན་པོ་ལ་སླར་ཡང་དཀྱིལ་འཁོར་དུ་དབང་བསྐུར་ཞུས་པས་དག་པར་བྱེད་དགོས་ཏེ། སྤྱི་རྒྱུད་དུ། ཇི་སྐད་བཤད་པའི་དམ་ཚིག་རྣམས། །གལ་ཏེ་ཉམས་པ་གང་གྱུར་པ། །དེས་ནི་རང་གི་སྙིང་པོ་སྔགས། །ཆིག་འབུམ་དུ་ནི་བཟླས་བརྗོད་བྱ། །ཡང་ན་མེས་རྨོངས་བྱེད་པའི་གཟུངས། །སྟོང་དུ་བཟླས་བརྗོད་བྱས་ཀྱང་རུང་། །ཡང་ན་ཞི་བའི་སྦྱིན་སྲེག་བྱ། །ཡང་ན་དཀྱིལ་འཁོར་དུ་ཡང་འཇུག །ཅེས་གསུངས་སོ། །གཉིས་པ་སྤྱོད་རྒྱུད་ཀྱི་དམ་ཚིག་ནི། ཐུན་མོང་གི་བསླབ་བྱ་མི་དགེ་བ་བཅུ་སྤོང་བ་དང་། བྱང་ཆུབ་སེམས་དཔའི་སྡོམ་པ་ཡང་དག་པར་འཛིན་པ་རྣམས་ཡིན་ལ། ཐུན་མོང་མ་ཡིན་པ་ནི། །མངོན་བྱང་ལས། དེ་ལ་དམ་ཚིག་བསྟན་པར་བྱ། །དེ་རིང་ཕན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །ཡོངས་སུ་གཏོང་བར་མི་བྱའོ། །ཁྱོད་ཀྱིས་སེར་སྣ་དང་ནི་གང་། །སེམས་ཅན་གནོད་པར་མི་བྱའོ། །དམ་ཚིག་འདི་དག་སངས་རྒྱས་ཀྱིས། །བརྟུལ་ཞུགས་བཟང་པོ་ཁྱོད་ལ་བཤད། །ཇི་ལྟར་རང་གི་སྲོག་བསྲུང་བ། །དེ་ལྟར་ཁྱོད་ཀྱིས་འདི་དག་སྲུངས། །ཞེས་གསུངས་པ་ལྟར་རྩ་དམ་པའི་ཆོས་སྤང་བ། བྱང་ཆུབ་ཀྱི་སེམས་གཏོང་བ། སེར་སྣ་བྱེད་པ། སེམས་ཅན་ལ་གནོད་པའི་ལས་བྱེད་པ་ནི་རྩ་བའི་ལྟུང་བར་བཤད་ཅིང་སླར་གསོར་མེད་པར་གསུངས་སོ། །ལྟུང་བཞི་ཡིན་ལ། དེས་ན་ཐུན་མོང་དང་ཐུན་མིན་གྱི་ལྟུང་བ་དེ་དག་གིས་རང་རྒྱུད་ལ་མ་གོས་པར་བྱ། གལ་ཏེ་བག་མེད་པས་ལྟུང་བ་བྱུང་ན་དུས་ཀྱི་ཆ་དྲུག་ལས་ཐལ་དུ་མི་གཞུག་པར་ཕྱིར་ཆོས་ཀྱི་ཐབས་ཀྱིས་སྦྱངས་ལ། རྒྱུད་ལྟུང་མེད་དུ་གནས་པས་ལམ་བསྒོམ་པ་ནི་གནད་ཀྱི་དོན་དུ་བཟུང་ངོ་།། །། ༈

[edit]

bka' brgyad kyi gtong thun mdor bsdus/__ na mo gu ru b+h+yaH__rig sngags 'chang ba'i sde snod thams cad kyi rtsa bar gyur pa bya ba'i rgyud kyi dam tshig ni/__spyi'i dam tshig dang /__dbang gi dam tshig gnyis las/__dang po la yang gsum gyi/__dang po chos 'di pa'i dam tshig srung ba ni/__theg pa chen po'i dkon mchog gsum/__dus thams cad du mi gtong zhing /__de dag la skyabs su song ba'i bslab bya rnams bzung ba'o/__/gnyis pa byang chub sems dpa'i sdom pa bsrung ba ni/__byang chub sems dpa' rnams dang /__de'i sde snod du gsungs pa'i tshul khrims gsum la sogs pa'i bslab pa la yang dag par bslab par bya ba'o/__/gsum pa lha rnams la dad par bya ba ni/__gsang sngags pho dang rig sngags mo yis bsdus pa'i lha tshogs rnams la bzang ngan dang mchog dman du 'dzin pa'i ma dad pa spangs nas dad par bya ba'o/__/gnyis pa la bcu gsum gyi/__dang po ni/__dus rtag par phyag rgya chen po ste rang gi lha la lha gzhan las khyad par du gus pa'i mos pa bya zhing /__lha bsgrub pas ma grub na de la khros pas rig sngags bcings pa la sogs pa'i spog chog kyang lha la ma gus pa yin pas mi bya ba'o/_/gnyis pa ni/__dam tshig can gyi bya rgyud kyi sgor zhugs pa'i gang zag dbang thob cing dam tshig dang sdom par ldan pa la gus par bya ba las/__de'i skyon brjod pa dang /__lus srog la mtho 'tshams pa'i bar gyi gnod par 'gyur pa'i las mi byed pa'o/__/gsum pa ni/__sangs rgyas kyi bstan pa la zhugs pa'i gang zag las 'bras dang byang chub kyi sems la nan tan du byed pa rnams ni rang gi mdza' bo yin la/__de rnams la gus par bya yi skyon brjod pa sogs mi byed pa'o/__/bzhi pa ni/__rang la dbang dang /__rgyud dang /__thun mong dang /__mchog gi dngos grub sgrub pa'i man ngag ster ba'i bla ma la gus par bya zhing /__rigs dang /__tshul khrims dang /__yon tan la sogs pa'i sgo nas smad par mi bya ba'o/_/lnga pa ni/__dbang dang nor rgyas la sogs pa'i phyir gnod gnas la sogs pa'i lha bsgrubs pas/__cho ga tshul bzhin ma grub pa la brten nas dngos grub de rnams ma byung na/__lha la khros shing zhe sdang ba'i sems mi bya'o/__/drug pa ni/__tshes brgyad la sogs pa'i dus mtshams bzang po dag la 'dod pa'i lha dang /__dkon mchog la mchod pa rgya chen pos mchod par bya ba'o/__/bdun pa ni/__dbang phyug dang khyab 'jug la sogs pa'i ston pa gzhan rnams kyi gzhung nas 'byung ba ltar mi mchod cing /__de'i man ngag dang /__dkyil 'khor la nyams len mi byed pa'o/__/dgu pa ni/__srog chags phra mo grog sbur gyi bar rnams la byams pa'i sems bskyed nas phan pa kho na bya'o/__/gnod pa'i las rnams thams cad du mi byed pa'i sdom sems rab tu brtan par bya ba'o/__/bcu pa ni/__theg chen gsang sngags la zhugs pa'i gang zag byang chub sems dpa'i spyod pa la dga' ba rnams kyi bsod nams 'phel bar byed pa'i thabs bzlas brjod dang /__sdom pa bzung ba la sogs pa la nan tan bskyed pa'o/__/bcu gcig pa ni/__bzlas brjod byed pa la 'bad pa'i rnal 'byor pas/__gsang sngags bzlas pa'i spyod lam dang ldan pas zlos dgos te/__zlos pa'i cho ga la gnas pa/__glu gar rtsed mo mi bya ste/__zhes sogs rgya cher gsungs pa ltar ro/__/bcu gnyis pa ni/__gsang sngags so so'i rgyud dam tshig gsum bkod sogs nas bstan pa'i dam tshig__/dam pa'i chos kyang spang mi bya/__zhes sogs rnams kyang 'bad pas bsrung bar bya'o/__/bcu gsum pa ni/__dbang bskur ma thob pa'am/__thob kyang nyams pa'i dam tshig med pa rnams la/__gsang sngags kyi cho ga zhib mo dang /__rgyud dang /__man ngag rnams legs par bsrung zhing sba bar bya'o/__/de skad du/__gsang ba spyi rgyud las/__/dam tshig 'di dag bsgo bar bya/__/de ring phyin chad khyed rnams kyis/__/sangs rgyas chos dang dge 'dun dang /__/byang chub sems dpa' 2rnams dang ni/_/rig 3sngags gsang sngags tshogs rnams la/__/dad pa rab tu brtan par bya/__/rtag par 1phyag rgya chen po la/__/khyad par du ni mos par bya/__/dam tshig can 2dang mdza' bo dang 3/__/bla ma la 4yang gus par bya'o/__/lha 5rnams kun la sdang mi bya/__/dus 6mtshams dag tu mchod par bya/__/ston 7pa gzhan gyi gzhung mi mchod/__/rtag 8tu glo bur mgron mchod bya/__/srog chags 9rnams la byams pa'i sems/__/rtag tu brtan pa nye bar bzhag__/theg pa 10che la dga' rnams kyi/__/bsod nams dag ni nan tan bskyed/__/bzlas 11brjod byed la 'bad pa yis/__/gsang sngags spyod la brtson par bya/__/gsang 12sngags rgyud las bstan pa yi/__/dam tshig rnams kyang bsrung bar bya/_/dam tshig med pa rnams la ni/__/sngags dang phyag rgya mi sbyin no/__/gsang sngags rgyud ni legs bsrungs shing /__/de'ang bdag gis rtogs par bya/__/de ltar dam tshig bsgos nas ni/__/zhes gsungs pa ltar ro/__/de ltar spyi dang khyad par gyi dam tshig de dag srog dang bsdos te bsrungs la nyes pas ma gos par bya/__gal te bag med pa'i dbang gis nyes pa de dag gang yang rung ba gcig byung na/__legs grub tu/_'di dag byas nas 'di bya'o/__/mi g.yel bar ni gyur par bya/__/nyin par bag med byas pa dag__/mtshan mo so sor bshags par bya/__/nub mo byas pa nongs par bshags/__/legs par byas la mngon dga' bya/__/zhes pa ltar rten dang yul sdom ldan gyi mdun du ltung ba'i ming nas smos te/__stobs bzhi tshang ba'i bshags pa bya/___de'i steng du nyon mongs che 'bring chung gsum gyis kun nas bslangs pa'i nyes pa che 'bring chung gsum du shes par byas la/__chung ngu la rang gi lha'i snying po 'bum mam/__me ltar rmongs byed ma'i gzungs stong bzla ba dang /__'bring po la zhi ba'i sbyin sreg mang du bya/__nyes pa chen po la slar yang dkyil 'khor du dbang bskur zhus pas dag par byed dgos te/__spyi rgyud du/__ji skad bshad pa'i dam tshig rnams/__/gal te nyams pa gang gyur pa/__/des ni rang gi snying po sngags/_/chig 'bum du ni bzlas brjod bya/__/yang na mes rmongs byed pa'i gzungs/__/stong du bzlas brjod byas kyang rung /__/yang na zhi ba'i sbyin sreg bya/__/yang na dkyil 'khor du yang 'jug__/ces gsungs so/__/gnyis pa spyod rgyud kyi dam tshig ni/__thun mong gi bslab bya mi dge ba bcu spong ba dang /__byang chub sems dpa'i sdom pa yang dag par 'dzin pa rnams yin la/__thun mong ma yin pa ni/__/mngon byang las/__de la dam tshig bstan par bya/__/de ring phan chad bu khyod kyis/__/dam pa'i chos dang byang chub sems/_/srog gi phyir yang da phyin chad/__/yongs su gtong bar mi bya'o/__/khyod kyis ser sna dang ni gang /__/sems can gnod par mi bya'o/__/dam tshig 'di dag sangs rgyas kyis/_/brtul zhugs bzang po khyod la bshad/__/ji ltar rang gi srog bsrung ba/__/de ltar khyod kyis 'di dag srungs/__/zhes gsungs pa ltar rtsa dam pa'i chos spang ba/__byang chub kyi sems gtong ba/__ser sna byed pa/__sems can la gnod pa'i las byed pa ni rtsa ba'i ltung bar bshad cing slar gsor med par gsungs so/__/ltung bzhi yin la/__des na thun mong dang thun min gyi ltung ba de dag gis rang rgyud la ma gos par bya/__gal te bag med pas ltung ba byung na dus kyi cha drug las thal du mi gzhug par phyir chos kyi thabs kyis sbyangs la/__rgyud ltung med du gnas pas lam bsgom pa ni gnad kyi don du bzung ngo //____//__!