JKW-KABUM-24-YA-010

🚧 This website is under continued development. We appreciate your patience!

Previous Section"YA" is not a number. Back to Volume Page"YA" is not a number.Next Section "YA" is not a number.

Wylie title
Location	mkhyen brtse'i bka' 'bum Volume , sde tshan 10, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum "YA" is not a number.

1 Texts in this Section (sde tshan or chos tshan)

303-315	རྫོགས་པ་ཆེན་པོ་ཀློང་ཆེན་སྙིང་ཐིག་གི་འཕོ་བའི་མཚམས་སྦྱོར་ཉུང་གསལ། rdzogs pa chen po klong chen snying thig gi 'pho ba'i mtshams sbyor nyung gsal Transference of Consciousness - 'pho ba	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

"YA" is not a number.

Tibetan Text

Wylie

[edit]

རྫོགས་པ་ཆེན་པོ་ཀློང་ཆེན་སྙིང་ཐིག་གི་འཕོ་བའི་མཚམས་སྦྱོར་ཉུང་གསལ།

༄༅། །རྫོགས་པ་ཆེན་པོ་ཀློང་ཆེན་སྙིང་ཐིག་གི་འཕོ་བའི་མཚམས་སྦྱོར་ཉུང་གསལ་བཞུགས་སོ།། །། ན་མཿཤྲཱི་གུ་ར་ཝེ། འདིར་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཐུན་མོང་གི་འཕོ་བའི་མཚམས་སྦྱོར་ཅུང་ཟད་སྤྲོ་ན། ཀུན་མཁྱེན་རིན་པོ་ཆེ་རང་ཉིད་ཀྱིས་སྩལ་བའི་མཚམས་སྦྱོར་ལས། སྐྱེ་བ་སྔ་ཕྱིའི་ཉིང་མཚམས་སྦྱོར་བ་ཡིན་པས་ཞེས་པའི་མཚམས། ཐོག་མར་རྒྱུད་སྦྱང་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་སྐྱབས་གནས་དཀོན་མཆོག་རྒྱ་མཚོའི་ཚོགས་མངོན་སུམ་ལྟ་བུར་བཞུགས་ཡོད་སྙམ་པའི་མོས་པས་སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ་སོགས་ཚིག་གི་རྗེས་སུ་དོན་དྲན་པས་ངེད་ཀྱི་རྗེས་ཟློས་རྩེ་གཅིག་ཏུ་བགྱིད་པའི་འདུན་པ་སྐྱེད་མཛོད། ཅེས་བརྡ་སྦྱར་ལ་སྐྱབས་སེམས་སོགས་སྔོན་འགྲོ་རྒྱས་བསྡུས་ཇི་ལྟར་རིགས་པ་དང་། སངས་རྒྱས་ཀྱི་མཚན་བརྗོད་པ། སྲས་གཅིག་གི་རྒྱུད་ཀློག་པ། གཟུངས་སྔགས་ཁྱད་པར་ཅན་བཟླ་བ་སོགས་སྐབས་དང་བསྟུན་པ་བྱས་རྗེས། དེ་ལྟར་ཐུན་མོང་ལམ་གྱི་རིམ་པས་རྒྱུད་དག་པར་བྱ་བ་སྔོན་དུ་སོང་ནས། བཙན་ཐབས་འཕོ་བའི་མཚམས་སྦྱོར་དངོས་བསྟན་པ་ཡིན་པས་སེམས་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། ཨོཾ་མ་ཧཱ་ཤུནྱ་ཏཱ་སོགས། གཟུང་འཛིན་གཉིས་སྣང་གིས་བསྡུས་པའི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་སྐད་ཅིག་གིས་ཁྱེད་རང་གི་གཞི་ལུས་ཀྱི་བཀོད་པ་རྒྱལ་ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། གཡས་གྲི་གུག་དང་གཡོན་ཐོད་པ་ཁྲག་གིས་གང་བ་འཛིན་པ། མཆན་ཁུང་གཡོན་ན་ཡབ་ཧེ་རུ་ཀའི་ངོ་བོ་ཁ་ཊྭཱྃ་ག་འཁྱུད་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་གཡས་ཅུང་ཟད་བསྐུམ་ཞིང་། གཡོན་བརྐྱངས་པའི་དོར་སྟབས་ཀྱིས་པདྨ་ཉི་མ་བམ་རོའི་སྟེང་ན་བཞུགས་པར་གསལ་བའི་སྐུའི་དབྱིབས་ཕྲུ་མ་ཕུས་བཏབ་པ་ལྟ་བུའི་ནང་དུ་རྩ་དབུ་མ་སྦོམ་ཕྲ་མདའ་སྨྱུགས་ཙམ་པ་སྟོང་སང་ངེ་འོད་ཀྱི་སྦུ་གུའི་རྣམ་པར་གསལ་བའི་ཡར་སྣེ་ཚངས་བུག་གི་གནས་སུ་རྒྱ་མཐོངས་ཁ་བྱེ་བ་ལྟར་ཧ་རེ་ཡོད་པ། མར་སྣེ་ལྟེ་འོག་སོར་བཞིའི་གནས་སུ་ཁ་ཟུམ་པ། སྙིང་གའི་ཐད་སྨྱུག་མ་ཚིགས་ཀྱིས་བཅད་པ་ལྟ་བུའི་སྟེང་དུ་རླུང་གི་རང་བཞིན་ཐིག་ལེ་ལྗང་སྐྱ་སྲན་མ་ཙམ་པ་ཅུང་ཟད་གཡོ་བ་དང་བཅས་པ་ལ་རིག་པའི་ངོ་བོ་ཡི་གེ་ཧྲཱིཿདམར་པོ་འབྲུ་མར་གྱི་སྡོང་བུ་ལྟར་འབར་བས་མཚན་པར་གསལ་བཏབ། སྤྱི་བོར་ཁྲུ་གང་ཙམ་གྱིས་མཐོ་བའི་ནམ་མཁར་ཆོས་དབྱིངས་དོན་གྱི་འོག་མིན་ཆེན་པོར་རིག་པ་རྡོ་རྗེ་ལུ་གུ་རྒྱུད་འཇའ་ཟེར་ཐིག་ལེར་འཁྲིགས་པའི་ཀློང་དུ་པདྨ་ཟླ་བའི་གདན་ལ་སྐྱབས་གནས་ཀུན་འདུས་དྲིན་ཅན་རྩ་བའི་བླ་མ་དང་དབྱེར་མ་མཆིས་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཉིས་མཉམ་གཞག་གི་ཕྱག་རྒྱ་མཛད་པའི་སྟེང་ན་འཆི་མེད་བདུད་རྩིས་གང་བའི་ལྷུང་བཟེད་འཛིན་པ། ན་བཟའ་ཆོས་གོས་རྣམ་གསུམ་ངུར་སྨྲིག་ཏུ་གསོལ་ཞིང་མཚན་དཔེའི་གཟི་བྱིན་མཆོག་ཏུ་འབར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གཡས་སུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ་པ་ལ་སོགས་སངས་རྒྱས་དང་བྱང་ཆུབ་སེམས་དཔའ་རྩ་གསུམ་རྒྱལ་བ་རབ་འབྱམས་ཀྱི་འཁོར་གྱིས་བསྐོར་ཏེ་ཁྱེད་རང་གི་ཐར་པའི་ལམ་སྟོན་ཆེན་པོར་མངོན་སུམ་ལྟ་བུར་བཞུགས་ཡོད་སྙམ་པའི་མོས་པས། བདག་གིས་བླ་མ་ལ་གསོལ་བ་བཏབ་ཅིང་ཧྲཱིཿལྔ་ཚར་བརྗོད་པའི་ཚེ། ཁྱེད་རང་གིས་ཀྱང་སྤྱི་བོའི་བླ་མ་ལ་མོས་གུས་གདུང་ཤུགས་དྲག་པོས་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གསོལ་བ་བཏབ་པས་སྙིང་གའི་རླུང་སེམས་ཀྱི་ངོ་བོ་ཐིག་ལེ་ཡིག་འབྲུ་དང་བཅས་པ་དེ་ཉིད་དབུ་མའི་ལམ་བརྒྱུད་ནས་ཤོག་སྐྱ་རླུང་གིས་བཏེགས་པ་བཞིན་ཡར་ཡར་འགྲོ་བའི་ངང་ལ་ཕཊཿཅེས་དྲག་ཏུ་བརྗོད་པ་དང་ལྷན་ཅིག་ཏུ་མདའ་འཕངས་པ་བཞིན་དུ་སོང་ནས་བླ་མའི་ཐུགས་ཀར་སིབ་ཀྱིས་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་སྤྲོས་བྲལ་བློ་འདས་ཀྱི་དབྱིངས་སུ་མཉམ་པར་ཞོག་མཛོད། ཞེས་བརྗོད་པ། གཙོ་བོར་རང་ཉིད་ཀྱིས་འདུན་པ་རྩེ་གཅིག་ཏུ་གསོལ་བ་བཏབ་ནས། ཨེ་མ་ཧོཿ གནས་རང་སྣང་དོན་གྱི་འོག་མིན་ན༔ ཡིད་དད་བརྒྱའི་འཇའ་གུར་འཁྲིགས་པའི་ཀློང་༔ སྐྱབས་ཀུན་འདུས་རྩ་བའི་བླ་མ་ནི༔ སྐུ་ཐ་མལ་མ་ཡིན་དྭངས་མའི་ལུས༔ དཔལ་སངས་རྒྱས་སྣང་མཐའི་ངོ་བོར་བཞུགས༔ ཡིད་མོས་གུས་གདུང་བས་གསོལ་བ་འདེབས༔ ལམ་འཕོ་བ་འབྱོངས་པར་བྱིན་གྱིས་རློབས༔ གནས་འོག་མིན་བགྲོད་པར་བྱིན་གྱིས་རློབས༔ དབྱིངས་ཆོས་སྐུའི་རྒྱལ་ས་ཟིན་པར་ཤོག༔ ཧྲཱིཿཧྲཱིཿཧྲཱིཿཧྲཱིཿཧྲཱིཿ ཞེས་རྐན་གྱི་སྦུབས་ནས་བརྗོད་པའི་མཐར། ཕ྄ཊཿ ཕ྄ཊཿ ཕ྄ཊཿ ཕ྄ཊཿ ཕ྄ཊཿ ཅེས་པས་བླ་མ་འོད་དཔག་མེད་ཀྱི་སྐུ་ལྔ་ཡེ་ཤེས་ལྔ་དབྱེར་མེད་བདེ་བ་ཆེན་པོའི་ཀློང་དུ་འཕོའོ། །དེ་ལྟ་བུའི་དམིགས་པའི་རྟེན་གོམས་ཡིད་ཆེས་པའི་རྟགས་མ་བྱུང་བར་དུ་བསྐྱར་ནས། མཐར་འཁོར་གསུམ་སྤྲོས་པ་དང་བྲལ་བའི་སྟོང་པ་ཉིད་ཀྱི་ངང་དུ་མཉམ་པར་བཞག་ཅིང་། དེ་ལས་ལྡང་བ་ན་རྗེས་ཐོབ་སྙིང་རྗེ་ཆེན་པོའི་བློས་བསྔོ་སྨོན་གྱིས་མཚམས་སྦྱོར་རྒྱས་པར་བྱའོ། །ཡང་གནས་ལུང་གི་སྐབས་སུ། འོ་ཚེ་ལས་འདས་པ་མིང་འདི་ཞེས་བྱ་བ་ཁྱོད་ཉིད་འཆི་བ་ཡིན་ནོ། །དེ་ཡང་འཆི་བ་ཞེས་བྱ་བ་དེ་ཁྱོད་གཅིག་པུ་ལ་བྱུང་བ་མ་ཡིན་ཞེས་སོགས་ནས། སྨོན་འཇུག་གི་སེམས་བསྐྱེད་སྒོམས་ཤིགཿ ཅེས་པའི་བར་གཞུང་ལྟར་ལ། དེ་དག་གནད་དུ་འགྲོ་བའི་རྟེན་འབྲེལ་དུ། བདག་གིས་ཀྱང་བཅོམ་ལྡན་འདས་ཞེས་བྱ་བའི་དཀྱིལ་འཁོར་ཆེན་པོ་ཞལ་ཕྱེས་ནས་གནས་ལུང་དབང་བསྐུར་གྱི་ཆོ་ག་ཟབ་མོའི་སྒོ་ནས་ཐར་པའི་ལམ་སྟོན་པ་སྐབས་སུ་བབ་པ་ཡིན་པས། ཕུང་པོའམ་མིང་བྱང་འདི་ཉིད་ལ་རྣམ་ཤེས་ཀྱི་རྟེན་ཆོས་ལ། ལུས་ཀྱིས་ཕྱག་འཚལ་བ་དང་། ངག་གིས་སྐྱབས་འགྲོ་གསོལ་འདེབས། ཡིད་ཆགས་སྡང་རྨོངས་གསུམ་གྱི་རྟོག་པ་ཐམས་ཅད་སྤངས་ནས་བླ་མ་དང་དཀྱིལ་འཁོར་གྱི་ལྷ་ཚོགས་ཐ་མི་དད་པ་ལ་མི་ཕྱེད་དད་པའི་གདུང་ཤུགས་དྲག་པོས་གསོལ་བ་རྩེ་གཅིག་ཏུ་ཐོབ་མཛོད། ཅེས་བརྡ་སྦྱར་ལ་ཕྱག་འཚལ་ཞིང་སྐྱབས་སུ་འགྲོ་བ་དང་། དབང་བསྐུར་སོགས་རང་རང་གི་གཞུང་ལྟར་བྱའོ། །གལ་ཏེ་གནས་ལུང་དང་འཕོ་བ་སྦྲེལ་མར་བྱེད་ན། རྟེན་བསྐྱེད་ནས་བཟུང་སྟེ་ཟས་བསྔོའི་བར་གྲུབ་ནས། དེ་ལྟར་སྡིག་པ་སྦྱངས་ཤིང་དབང་བསྐུར་བ་སྔོན་དུ་སོང་ནས། སླར་ཡང་མྱུར་ལམ་ཟབ་མོ་འཕོ་བའི་རྣལ་འབྱོར་ལ་བརྟེན་ནས་དག་པའི་ཞིང་ཁམས་ཆེན་པོར་བཙན་ཐབས་དབུགས་དབྱུང་བའི་སྐབས་སུ་བབ་པ་ཡིད་གཞན་དུ་མ་ཡེངས་བར་དམིགས་པ་འདི་བཞིན་དུ་མཛོད། ཨོཾ་མ་ཧཱ་ཤུནྱ་ཏཱ་སོགས་སྔར་བཞིན་སྦྱར། ཡང་སྐབས་སུ་འགའ་ཞིག་ཏུ་གསོན་པོ་ལ་འཕོ་བའི་དམིགས་རིམ་འབོག་པའི་ཚེ། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་ཕན་འདོད་ཀྱི་ལྷག་བསམ་ཡིད་ལ་མཆོག་ཏུ་བཅགས་ཏེ་དམ་པའི་ཆོས་ཉན་པ་ལ་ཞུགས་པ་ནི་སྐྱེས་བུ་ཆེན་པོའི་ལམ་བསོད་ནམས་ཚད་མེད་པའི་འཇུག་ངོགས་དམ་པ་ཡིན་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་པ། །ཕན་འདོད་དེ་ནི་དེ་འདྲའོ། །ཞེས་གསུངས་པ་ལྟར་སེམས་ཅན་ཐམས་ཅད་ཐུགས་ལ་བཅངས་ཏེ་གསན་པར་ཞུ། དེ་ལ་གང་གསན་པར་བྱ་བའི་ཆོས་ནི། སློབ་དཔོན་ཆེན་པོ་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནི་ཡང་དག་འབྱོར་བར་ག་ལ་འགྱུར། །ཞེས་གསུངས་པ་ལྟར་ད་རེས་ཡིད་བཞིན་གྱི་ནོར་བུ་རིན་པོ་ཆེ་ལག་ཏུ་ལོན་པའི་དཔེས་བརྒྱ་སྟོང་གི་ཆར་ཡང་མི་ཕོད་པའི་དལ་བའི་རྟེན་བཟང་པོ་འདི་ལྟ་བུ་རྙེད་པའི་སྐབས་སུ་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བའི་ཐབས་ལྷུར་ལེན་དགོས། དེ་ལ་ཡང་དག་པར་རྫོགས་པའི་སངས་རྒྱས་རྣམས་ནི་ཐབས་མཁས་ཤིང་ཐུགས་རྗེ་ཚད་མེད་པས་སེམས་ཅན་གྱི་ཁམས་ཡལ་བར་མི་འདོར་བའི་ཕྱིར། གདུལ་བྱ་རྣམས་ཀྱི་ཁམས་དབང་བསམ་པ་བག་ལ་ཉལ་གྱི་རིམ་པ་དང་རྗེས་སུ་མཐུན་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱི་ནང་ནས་མཆོག་དང་། ཕུལ་དང་རབ་ཏུ་གྱུར་པ་ནི་རྡོ་རྗེ་ཐེག་པ་བླ་མེད་ཀྱི་ལམ་ཁོ་ན་ཡིན་ཅིང་། དེ་ལས་ཀྱང་ཇི་སྐད་དུ་དཔལ་རྡོ་རྗེ་གདན་བཞིའི་རྒྱུད་ལས། ཉེས་པ་ཀུན་གྱིས་གོས་པ་ཡང་། །འཕོ་བའི་སྦྱོར་བ་སྦྱོང་བས་གྲོལ། །སྡིག་གིས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། ཞེས་སོགས་རྒྱལ་བ་ཁྱབ་བདག་རྡོ་རྗེ་འཆང་ཆེན་པོས་ལན་གཅིག་མ་ཡིན་པར་བསྔགས་པའི་མ་བསྒོམས་སངས་རྒྱས་འཕོ་བའི་མྱུར་ལམ་ལ་བརྟེན་ནས་མཁའ་སྤྱོད་ཀྱི་གོ་འཕང་བདེ་བླག་ཏུ་སྒྲུབ་པའི་གདམས་པ་ཟབ་མོས་རྗེས་སུ་གཟུང་བའི་སྐབས་ཡིན། དེ་ལའང་མན་ངག་གི་རྣམ་གྲངས་མཐའ་ཀླས་ཀྱང་བསྡུ་ན་ལྔར་འདུས་ཏེ། རབ་ཆོས་སྐུ་གཏན་མེད་ཀྱི་འཕོ་བ། འབྲིང་ལོངས་སྐུ་ཟུང་འཇུག་གི་འཕོ་བ། ཐ་མ་སྤྲུལ་སྐུ་རྩལ་སྦྱོང་གི་འཕོ་བ། རང་དོན་དུ་འདུ་ཤེས་སུམ་ལྡན་གྱི་འཕོ་བ། གཞན་དོན་དུ་ཐུགས་རྗེའི་ལྕགས་ཀྱུའི་འཕོ་བ་སྟེ་རྣམ་པ་ལྔར་ཡོད་པ་ལས། འདིར་སྤྲུལ་སྐུ་རྩལ་སྦྱོང་གི་འཕོ་བའི་གདམས་པ་ཉམས་སུ་བླངས་པ་ལའང་སྔོན་འགྲོ། དངོས་གཞི། རྗེས་དང་གསུམ་ལས། ཐོག་མར་སྔོན་འགྲོས་རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་སྐྱབས་གནས་དཀོན་མཆོག་རྒྱ་མཚོའི་ཚོགས་རྣམས་མངོན་སུམ་ལྟ་བུར་བཞུགས་ཡོད་སྙམ་པའི་མོས་པས། དེ་རྣམས་ཀྱི་སྤྱན་སྔར་རང་གཞན་སེམས་ཅན་ཐམས་ཅད་འཁོད་དེ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཅི་མཛད་ཁྱེད་མཁྱེན་སྙམ་པའི་རེ་ལྟོས་ལིང་སྒྱུར་གྱིས་སྐྱབས་སུ་འགྲོ་བ་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཟབ་ལམ་འཕོ་བའི་རྣལ་འབྱོར་ཟབ་མོ་ཉམས་སུ་བླང་བར་བགྱིའོ་སྙམ་པའི་ཡིད་ཀྱིས་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། ཅེས་བརྡ་སྦྱར་ལ། ན་མོཿ དཀོན་མཆོག་གསུམ་དངོས་བདེ་གཤེགས་རྩ་བ་གསུམཿ སོགས་སྐྱབས་སེམས་ལན་གསུམ། སྤྲོ་ན། སླར་ཡང་ཚོགས་ཞིང་དེ་རྣམས་ཀྱི་སྤྱན་སྔར་བསགས་སྦྱངས་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་འདིའི་རྗེས་ཟློས་མཛོད། ཧྲཱིཿ ཆུ་ལས་ཆུ་བུར་ཇི་བཞིན་དུཿ ཡེ་ཤེས་དབྱིངས་ལས་སྤྲུལ་པའི་ལྷརཿ བདག་ལུས་ཞིང་གི་རྡུལ་སྙེད་དུཿ རྣམ་པར་འཕྲུལ་པས་ཕྱག་འཚལ་ལོཿ སོགས་ནས། བྱང་ཆུབ་ཆེན་པོའི་རྒྱུ་རུ་བསྔོཿ བར་ལན་གསུམ། དེ་ལྟར་ཐུན་མོང་གི་སྔོན་འགྲོས་རྒྱུད་སྦྱང་བ་སོང་ནས། དངོས་གཞིའི་མྱུར་ལམ་ཟབ་མོ་ལ་འཇུག་པའི་སླད་དུ། ལུས་གནད་སྐྱིལ་ཀྲུང་དྲང་པོར་བསྲང་། ངག་གནད་རླུང་རྒྱུ་བ་རང་སོར་བཞག །སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། ཨོཾ་མ་ཧཱ་ཤུནྱ་ཏ་སོགས་ནས། ཁྱེད་རང་རྣམས་ཀྱི་ཕུང་ཁམས་དང་སྐྱེ་མཆེད་ཀྱི་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་ས་ཕྱོགས་འདི་ཉིད་དག་པ་རབ་འབྱམས་འོག་མིན་མཁའ་སྤྱོད་རྡོ་རྗེ་བཙུན་མོའི་གྲོང་ཁྱེར་ཆེན་པོར་གསལ་བའི་དབུས་སུ་ཁྱེད་རང་རྣམས་སྐད་ཅིག་གིས་གཞི་ལུས་ཀྱི་བཀོད་པ་རྒྱལ་ཡུམ་རྡོ་རྗེ་རྣལ་འབྱོར་མ་སོགས་སྔར་བཞིན་དུ་སྦྱར་ལ། གསོལ་འདེབས་དང་དམིགས་པའི་བརྟེན་གོམས་ཇི་ལྟར་རིགས་པའི་མཐར། དེའི་དངོས་གཞིའི་ཆོས་རྣམས་གྲུབ་ནས་རྗེས་ཀྱི་རིམ་པ་ནི། སྤྱི་བོའི་བླ་མ་འོད་དཔག་མེད་པའི་ཐུགས་ཀ་ནས་རླུང་སེམས་ཀྱི་ཐིག་ལེ་ཡི་གེ་དང་བཅས་པ་མར་བབ་ནས་སྙིང་དབུས་པདྨའི་གདན་ལ་གཡོ་མེད་དུ་གནས་པ་ལ་སེམས་ཡུན་རིང་དུ་བཟུང་ནས། མཐར་སྤྱི་བོའི་ལྷ་ཚོགས་རྣམས་ཀྱི་འཁོར་རྣམས་གཙོ་བོ་ལ་ཐིམ། གཙོ་བོ་འོད་དམར་པོ་བདུད་རྩིའི་རྣམ་པར་ལྟེམས་ཀྱིས་ཞུ་ནས་རང་ལ་ཐིམ་པས། རང་ཉིད་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཉིས་མཉམ་བཞག་གི་སྟེང་ན་འཆི་མེད་ཀྱི་བདུད་རྩིས་གང་བའི་ཚེའི་བུམ་པ་བསྣམས་པ། དར་དང་རིན་པོ་ཆེའི་རྒྱན་ཅན་མཚན་དཔེའི་གཟི་བྱིན་མཆོག་ཏུ་འབར་བའི་སྐུར་གྱུར་པའི་དབུ་མའི་ཡར་སྣ་ཟླ་དཀྱིལ་དང་སྣ་ཚོགས་རྡོ་རྗེས་བཀག་པར་གསལ་བཏབ་ལ། སླར་ཡང་ཐུགས་ཀ་ནས་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས་པས་འཁོར་འདས་ལམ་གསུམ་གྱི་ཚེ་བཅུད་ཐམས་ཅད་འོད་དང་འོད་ཟེར་གྱི་རྣམ་པར་སྤྱན་དྲངས་ནས་རང་ལ་སིབ་སིབ་ཐིམ་པས་འཆི་མེད་རྡོ་རྗེའི་སྐུར་གྱུར་པའི་མོས་པ་མཛོད། ཅེས་དང་། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། བརྒྱ་རྩ་བརྒྱད་ལྷན་གཅིག་ཏུ་བཟླ། དེས་ཟབ་ལམ་འཕོ་བའི་གདམས་པ་ལེགས་པར་ཐོབ་པ་ཡིན་པས་གནས་སྐབས་ཀུན་ཏུ་དམིགས་པའི་རྟེན་གོམས་ལ་བསླབ་པ་དང་། ནམ་ཞིག་འཆི་ངེས་པའི་དུས་ལ་བབ་པའི་ཚེ་ན། རང་དོན་འདུ་ཤེས་སུམ་ལྡན་གྱི་འཕོ་བས་ལས་ལ་སྦྱར་བ་ནི། ཚེ་འདིར་སྣང་གི་ཆགས་སྡང་གི་འཁྲི་བ་ཐམས་ཅད་རྦད་ཀྱིས་བཅད་ལ། རྩ་དབུ་མ་ལམ་གྱི་འདུ་ཤེས། རང་ཉིད་ལམ་དེར་འགྲོ་བའི་འདུ་ཤེས། བླ་མའི་ཐུགས་ཀར་འཕོ་བའི་འདུ་ཤེས་གསུམ་ལྡན་གྱི་སྒོ་ནས་སྙིང་གའི་རླུང་སེམས་ཀྱི་ཐིག་ལེ་ཡིག་འབྲུ་དང་བཅས་སྔར་བཞིན་དུ་འཕོས་ནས་བླ་མའི་ཐུགས་དང་རང་སེམས་དབྱེར་མེད་དུ་འདྲེས་པའི་ངང་ལ་མཉམ་པར་བཞག་པ་དང་། གཞན་ཡང་འཇིག་རྟེན་འདི་ནས་ཕ་རོལ་ཏུ་ཉིང་མཚམས་སྦྱར་བའི་དམིགས་ཡུལ་གྱི་སླད་དུ་ཐུགས་རྗེའི་ལྕགས་ཀྱུའི་འཕོ་བས་དག་པའི་ཞིང་ཁམས་སུ་དབུགས་དབྱུང་བ་སོགས་དོན་གཉིས་རླབས་པོ་ཆེ་སྒྲུབ་པའི་ཐབས་ལ་མཁས་པར་བྱའོ། །དེ་ལྟར་གདམས་པ་ཟབ་མོ་ཉམས་སུ་བླངས་པ་ལས་བྱུང་བའི་དགེ་བའི་རྩ་བས་མཚོན་དུས་གསུམ་དུ་བསགས་པའི་དགེ་བ་རྩ་བ་ཅི་མཆིས་པ་རྣམས་རང་གཞན་མཁའ་ཁྱབ་སེམས་ཅན་ཐམས་ཅད་ཀྱི་དོན་དུ་ཟག་པ་མེད་པའི་བསྔོ་བས་རྒྱས་འདེབས་མཛད་པར་ཞུ། བསྔོ་སྨོན་རྒྱས་བསྡུས་ཇི་ལྟར་རིགས་པར་བྱའོ། །ཞེས་པའང་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་འཕོ་བ་མ་བསྒོམས་སངས་རྒྱས་དང་། ངོ་སྤྲོད་ཀྱི་མཚམས་སྦྱོར་ཉུང་ངུ་དམིགས་བསལ་གྱི་ཁྱད་ཆོས་སྦྱར་བར་འོས་པ་རྣམས་ཅུང་ཟད་སྤྲོས་པ་ཕྱོགས་དང་དུས་ཐམས་ཅད་དུ་ཕན་པ་དང་བདེ་བའི་ཉེར་འཚོའི་གཞི་བླ་ན་མེད་པར་གྱུར་ཅིག །ཅེས་པའང་མཁྱེན་བརྩེའི་དབང་པོས་སོ།། །།

�

[edit]

rdzogs pa chen po klong chen snying thig gi 'pho ba'i mtshams sbyor nyung gsal/ @#/__/rdzogs pa chen po klong chen snying thig gi 'pho ba'i mtshams sbyor nyung gsal bzhugs so//__// na maHshrI gu ra we/__'dir rdzogs pa chen po klong chen snying gi thig le'i thun mong gi 'pho ba'i mtshams sbyor cung zad spro na/__kun mkhyen rin po che rang nyid kyis stsal ba'i mtshams sbyor las/__skye ba snga phyi'i nying mtshams sbyor ba yin pas zhes pa'i mtshams/__thog mar rgyud sbyang ba'i slad du mdun gyi nam mkhar bla ma dang gnyis su med pa'i skyabs gnas dkon mchog rgya mtsho'i tshogs mngon sum lta bur bzhugs yod snyam pa'i mos pas skyabs su 'gro ba dang /__byang chub mchog tu sems bskyed pa sogs tshig gi rjes su don dran pas nged kyi rjes zlos rtse gcig tu bgyid pa'i 'dun pa skyed mdzod/__ces brda sbyar la skyabs sems sogs sngon 'gro rgyas bsdus ji ltar rigs pa dang /__sangs rgyas kyi mtshan brjod pa/__sras gcig gi rgyud klog pa/__gzungs sngags khyad par can bzla ba sogs skabs dang bstun pa byas rjes/__de ltar thun mong lam gyi rim pas rgyud dag par bya ba sngon du song nas/__btsan thabs 'pho ba'i mtshams sbyor dngos bstan pa yin pas sems gzhan du ma yengs par dmigs pa 'di bzhin du mdzod/__oM ma hA shun+ya tA sogs/__gzung 'dzin gnyis snang gis bsdus pa'i chos thams cad mi dmigs pa stong pa nyid du gyur/__stong pa'i ngang las skad cig gis khyed rang gi gzhi lus kyi bkod pa rgyal yum rdo rje rnal 'byor ma sku mdog dmar mo zhal gcig phyag gnyis ma/__g.yas gri gug dang g.yon thod pa khrag gis gang ba 'dzin pa/__mchan khung g.yon na yab he ru ka'i ngo bo kha T+wA~M ga 'khyud pa/__dar dang rin po che dang rus pa'i rgyan gyis brgyan pa/__zhabs g.yas cung zad bskum zhing /__g.yon brkyangs pa'i dor stabs kyis pad+ma nyi ma bam ro'i steng na bzhugs par gsal ba'i sku'i dbyibs phru ma phus btab pa lta bu'i nang du rtsa dbu ma sbom phra mda' smyugs tsam pa stong sang nge 'od kyi sbu gu'i rnam par gsal ba'i yar sne tshangs bug gi gnas su rgya mthongs kha bye ba ltar ha re yod pa/__mar sne lte 'og sor bzhi'i gnas su kha zum pa/__snying ga'i thad smyug ma tshigs kyis bcad pa lta bu'i steng du rlung gi rang bzhin thig le ljang skya sran ma tsam pa cung zad g.yo ba dang bcas pa la rig pa'i ngo bo yi ge hrIHdmar po 'bru mar gyi sdong bu ltar 'bar bas mtshan par gsal btab/__spyi bor khru gang tsam gyis mtho ba'i nam mkhar chos dbyings don gyi 'og min chen por rig pa rdo rje lu gu rgyud 'ja' zer thig ler 'khrigs pa'i klong du pad+ma zla ba'i gdan la skyabs gnas kun 'dus drin can rtsa ba'i bla ma dang dbyer ma mchis pa'i bcom ldan 'das mgon po 'od dpag tu med pa sku mdog dmar po zhal gcig phyag gnyis pa/__phyag gnyis mnyam gzhag gi phyag rgya mdzad pa'i steng na 'chi med bdud rtsis gang ba'i lhung bzed 'dzin pa/__na bza' chos gos rnam gsum ngur smrig tu gsol zhing mtshan dpe'i gzi byin mchog tu 'bar ba/__zhabs rdo rje'i skyil mo krung gis bzhugs pa'i g.yas su byang chub sems dpa' spyan ras gzigs dbang phyug dang /__g.yon du byang chub sems dpa' mthu chen thob pa la sogs sangs rgyas dang byang chub sems dpa' rtsa gsum rgyal ba rab 'byams kyi 'khor gyis bskor te khyed rang gi thar pa'i lam ston chen por mngon sum lta bur bzhugs yod snyam pa'i mos pas/__bdag gis bla ma la gsol ba btab cing hrIHlnga tshar brjod pa'i tshe/__khyed rang gis kyang spyi bo'i bla ma la mos gus gdung shugs drag pos shes pa gzhan du ma yengs par rtse gcig tu gsol ba btab pas snying ga'i rlung sems kyi ngo bo thig le yig 'bru dang bcas pa de nyid dbu ma'i lam brgyud nas shog skya rlung gis btegs pa bzhin yar yar 'gro ba'i ngang la phaTaHces drag tu brjod pa dang lhan cig tu mda' 'phangs pa bzhin du song nas bla ma'i thugs kar sib kyis thim pas bla ma'i thugs dang rang sems dbyer med du 'dres pa'i spros bral blo 'das kyi dbyings su mnyam par zhog mdzod/__zhes brjod pa/__gtso bor rang nyid kyis 'dun pa rtse gcig tu gsol ba btab nas/__e ma hoH__gnas rang snang don gyi 'og min na:__yid dad brgya'i 'ja' gur 'khrigs pa'i klong :_skyabs kun 'dus rtsa ba'i bla ma ni:__sku tha mal ma yin dwangs ma'i lus:_dpal sangs rgyas snang mtha'i ngo bor bzhugs:__yid mos gus gdung bas gsol ba 'debs:__lam 'pho ba 'byongs par byin gyis rlobs:_gnas 'og min bgrod par byin gyis rlobs:_dbyings chos sku'i rgyal sa zin par shog:_hrIHhrIHhrIHhrIHhrIH__zhes rkan gyi sbubs nas brjod pa'i mthar/__pha?TaH_pha?TaH_pha?TaH_pha?TaH_pha?TaH__ces pas bla ma 'od dpag med kyi sku lnga ye shes lnga dbyer med bde ba chen po'i klong du 'pho'o/__/de lta bu'i dmigs pa'i rten goms yid ches pa'i rtags ma byung bar du bskyar nas/__mthar 'khor gsum spros pa dang bral ba'i stong pa nyid kyi ngang du mnyam par bzhag cing /__de las ldang ba na rjes thob snying rje chen po'i blos bsngo smon gyis mtshams sbyor rgyas par bya'o/__/yang gnas lung gi skabs su/__'o tshe las 'das pa ming 'di zhes bya ba khyod nyid 'chi ba yin no/__/de yang 'chi ba zhes bya ba de khyod gcig pu la byung ba ma yin zhes sogs nas/__smon 'jug gi sems bskyed sgoms shigaH__ces pa'i bar gzhung ltar la/__de dag gnad du 'gro ba'i rten 'brel du/__bdag gis kyang bcom ldan 'das zhes bya ba'i dkyil 'khor chen po zhal phyes nas gnas lung dbang bskur gyi cho ga zab mo'i sgo nas thar pa'i lam ston pa skabs su bab pa yin pas/__phung po'am ming byang 'di nyid la rnam shes kyi rten chos la/__lus kyis phyag 'tshal ba dang /__ngag gis skyabs 'gro gsol 'debs/__yid chags sdang rmongs gsum gyi rtog pa thams cad spangs nas bla ma dang dkyil 'khor gyi lha tshogs tha mi dad pa la mi phyed dad pa'i gdung shugs drag pos gsol ba rtse gcig tu thob mdzod/__ces brda sbyar la phyag 'tshal zhing skyabs su 'gro ba dang /__dbang bskur sogs rang rang gi gzhung ltar bya'o/__/gal te gnas lung dang 'pho ba sbrel mar byed na/__rten bskyed nas bzung ste zas bsngo'i bar grub nas/__de ltar sdig pa sbyangs shing dbang bskur ba sngon du song nas/__slar yang myur lam zab mo 'pho ba'i rnal 'byor la brten nas dag pa'i zhing khams chen por btsan thabs dbugs dbyung ba'i skabs su bab pa yid gzhan du ma yengs bar dmigs pa 'di bzhin du mdzod/__oM ma hA shun+ya tA sogs sngar bzhin sbyar/__yang skabs su 'ga' zhig tu gson po la 'pho ba'i dmigs rim 'bog pa'i tshe/__'o/_nam mkha' dang mnyam pa'i sems can thams cad la phan 'dod kyi lhag bsam yid la mchog tu bcags te dam pa'i chos nyan pa la zhugs pa ni skyes bu chen po'i lam bsod nams tshad med pa'i 'jug ngogs dam pa yin te/__rin chen phreng ba las/__sems can khams ni tshad med pa/__/phan 'dod de ni de 'dra'o/__/zhes gsungs pa ltar sems can thams cad thugs la bcangs te gsan par zhu/__de la gang gsan par bya ba'i chos ni/__slob dpon chen po zhi ba lhas/__dal 'byor 'di ni shin tu rnyed par dka'/__/skyes bu'i don sgrub thob par gyur pa la/__/gal te 'di la phan pa ma bsgrubs na/__/phyis ni yang dag 'byor bar ga la 'gyur/__/zhes gsungs pa ltar da res yid bzhin gyi nor bu rin po che lag tu lon pa'i dpes brgya stong gi char yang mi phod pa'i dal ba'i rten bzang po 'di lta bu rnyed pa'i skabs su thar pa dang thams cad mkhyen pa'i go 'phang don du gnyer ba'i thabs lhur len dgos/__de la yang dag par rdzogs pa'i sangs rgyas rnams ni thabs mkhas shing thugs rje tshad med pas sems can gyi khams yal bar mi 'dor ba'i phyir/__gdul bya rnams kyi khams dbang bsam pa bag la nyal gyi rim pa dang rjes su mthun par dam pa'i chos kyi bdud rtsi bsam gyis mi khyab pa zhig gsungs pa thams cad kyi nang nas mchog dang /__phul dang rab tu gyur pa ni rdo rje theg pa bla med kyi lam kho na yin cing /__de las kyang ji skad du dpal rdo rje gdan bzhi'i rgyud las/__nyes pa kun gyis gos pa yang /__/'pho ba'i sbyor ba sbyong bas grol/__/sdig gis kun nas mi gos te/__/'khor ba'i pha rol mchog tu 'gro/__zhes sogs rgyal ba khyab bdag rdo rje 'chang chen pos lan gcig ma yin par bsngags pa'i ma bsgoms sangs rgyas 'pho ba'i myur lam la brten nas mkha' spyod kyi go 'phang bde blag tu sgrub pa'i gdams pa zab mos rjes su gzung ba'i skabs yin/__de la'ang man ngag gi rnam grangs mtha' klas kyang bsdu na lngar 'dus te/__rab chos sku gtan med kyi 'pho ba/__'bring longs sku zung 'jug gi 'pho ba/__tha ma sprul sku rtsal sbyong gi 'pho ba/__rang don du 'du shes sum ldan gyi 'pho ba/__gzhan don du thugs rje'i lcags kyu'i 'pho ba ste rnam pa lngar yod pa las/__'dir sprul sku rtsal sbyong gi 'pho ba'i gdams pa nyams su blangs pa la'ang sngon 'gro/__dngos gzhi/__rjes dang gsum las/__thog mar sngon 'gros rgyud dag par bya ba'i slad du mdun gyi nam mkhar bla ma dang gnyis su med pa'i skyabs gnas dkon mchog rgya mtsho'i tshogs rnams mngon sum lta bur bzhugs yod snyam pa'i mos pas/__de rnams kyi spyan sngar rang gzhan sems can thams cad 'khod de/__dus 'di nas bzung ste ji srid byang chub snying po la mchis kyi bar du ci mdzad khyed mkhyen snyam pa'i re ltos ling sgyur gyis skyabs su 'gro ba dang /__sems can thams cad kyi don du rdzogs pa'i sangs rgyas kyi go 'phang rin po che thob par bya/__de'i ched du zab lam 'pho ba'i rnal 'byor zab mo nyams su blang bar bgyi'o snyam pa'i yid kyis skyabs su 'gro ba dang sems bskyed pa 'di'i rjes zlos mdzod/__ces brda sbyar la/__na moH__dkon mchog gsum dngos bde gshegs rtsa ba gsumaH__sogs skyabs sems lan gsum/__spro na/__slar yang tshogs zhing de rnams kyi spyan sngar bsags sbyangs spel gsum gyi gnad bsdus pa yan lag bdun pa 'di'i rjes zlos mdzod/__hrIH__chu las chu bur ji bzhin duH__ye shes dbyings las sprul pa'i lharaH__bdag lus zhing gi rdul snyed duH__rnam par 'phrul pas phyag 'tshal loH__sogs nas/__byang chub chen po'i rgyu ru bsngoH__bar lan gsum/__de ltar thun mong gi sngon 'gros rgyud sbyang ba song nas/__dngos gzhi'i myur lam zab mo la 'jug pa'i slad du/__lus gnad skyil krung drang por bsrang /__ngag gnad rlung rgyu ba rang sor bzhag__/sems kyi gnad gzhan du ma yengs par dmigs pa 'di bzhin du mdzod/__oM ma hA shun+ya ta sogs nas/__khyed rang rnams kyi phung khams dang skye mched kyi mtshon pa'i ma dag pa'i snang ba thams cad mi dmigs te stong pa nyid du gyur/__stong pa'i ngang las sa phyogs 'di nyid dag pa rab 'byams 'og min mkha' spyod rdo rje btsun mo'i grong khyer chen por gsal ba'i dbus su khyed rang rnams skad cig gis gzhi lus kyi bkod pa rgyal yum rdo rje rnal 'byor ma sogs sngar bzhin du sbyar la/__gsol 'debs dang dmigs pa'i brten goms ji ltar rigs pa'i mthar/__de'i dngos gzhi'i chos rnams grub nas rjes kyi rim pa ni/__spyi bo'i bla ma 'od dpag med pa'i thugs ka nas rlung sems kyi thig le yi ge dang bcas pa mar bab nas snying dbus pad+ma'i gdan la g.yo med du gnas pa la sems yun ring du bzung nas/__mthar spyi bo'i lha tshogs rnams kyi 'khor rnams gtso bo la thim/__gtso bo 'od dmar po bdud rtsi'i rnam par ltems kyis zhu nas rang la thim pas/__rang nyid skad cig gis bcom ldan 'das mgon po tshe dpag tu med pa sku mdog dmar po zhal gcig phyag gnyis pa/__phyag gnyis mnyam bzhag gi steng na 'chi med kyi bdud rtsis gang ba'i tshe'i bum pa bsnams pa/__dar dang rin po che'i rgyan can mtshan dpe'i gzi byin mchog tu 'bar ba'i skur gyur pa'i dbu ma'i yar sna zla dkyil dang sna tshogs rdo rjes bkag par gsal btab la/__slar yang thugs ka nas 'od zer gyi tshogs bsam gyis mi khyab pa 'phros pas 'khor 'das lam gsum gyi tshe bcud thams cad 'od dang 'od zer gyi rnam par spyan drangs nas rang la sib sib thim pas 'chi med rdo rje'i skur gyur pa'i mos pa mdzod/__ces dang /__oM a mA ra Ni dzI ban+ti ye swA hA/__brgya rtsa brgyad lhan gcig tu bzla/__des zab lam 'pho ba'i gdams pa legs par thob pa yin pas gnas skabs kun tu dmigs pa'i rten goms la bslab pa dang /__nam zhig 'chi nges pa'i dus la bab pa'i tshe na/_rang don 'du shes sum ldan gyi 'pho bas las la sbyar ba ni/__tshe 'dir snang gi chags sdang gi 'khri ba thams cad rbad kyis bcad la/__rtsa dbu ma lam gyi 'du shes/__rang nyid lam der 'gro ba'i 'du shes/__bla ma'i thugs kar 'pho ba'i 'du shes gsum ldan gyi sgo nas snying ga'i rlung sems kyi thig le yig 'bru dang bcas sngar bzhin du 'phos nas bla ma'i thugs dang rang sems dbyer med du 'dres pa'i ngang la mnyam par bzhag pa dang /__gzhan yang 'jig rten 'di nas pha rol tu nying mtshams sbyar ba'i dmigs yul gyi slad du thugs rje'i lcags kyu'i 'pho bas dag pa'i zhing khams su dbugs dbyung ba sogs don gnyis rlabs po che sgrub pa'i thabs la mkhas par bya'o/__/de ltar gdams pa zab mo nyams su blangs pa las byung ba'i dge ba'i rtsa bas mtshon dus gsum du bsags pa'i dge ba rtsa ba ci mchis pa rnams rang gzhan mkha' khyab sems can thams cad kyi don du zag pa med pa'i bsngo bas rgyas 'debs mdzad par zhu/__bsngo smon rgyas bsdus ji ltar rigs par bya'o/__/zhes pa'ang rdzogs pa chen po klong chen snying gi thig le'i 'pho ba ma bsgoms sangs rgyas dang /__ngo sprod kyi mtshams sbyor nyung ngu dmigs bsal gyi khyad chos sbyar bar 'os pa rnams cung zad spros pa phyogs dang dus thams cad du phan pa dang bde ba'i nyer 'tsho'i gzhi bla na med par gyur cig__/ces pa'ang mkhyen brtse'i dbang pos so//__// [�]