JKW-KABUM-22-ZA-012-065

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 65, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

65 531-534	ཉམས་ལེན་ཐུན་མོང་དུ་གདམས་པའི་རྡོ་རྗེའི་ཐོལ་གླུ་དྲང་སྲོང་གི་གཏམ། nyams len thun mong du gdams pa'i rdo rje'i thol glu drang srong gi gtam Spiritual Instructions - gdams ngag   ·   Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཉམས་ལེན་ཐུན་མོང་དུ་གདམས་པའི་རྡོ་རྗེའི་ཐོལ་གླུ་དྲང་སྲོང་གི་གཏམ། ཉམས་ལེན་ཐུན་མོང་དུ་གདམས་པའི་རྡོ་རྗེའི་ཐོལ་གླུ་དྲང་སྲོང་གི་གཏམ་ཅེས་བྱ་བ། ཨ་ཧོ། སྐུ་བཞིའི་དབང་ཕྱུག་རྗེ་བཙུན་རྡོ་རྗེ་འཆང་ཆེན་པོ། །ཚུར་མཐོང་འགྲོ་བའི་མོས་ངོར་གཟུགས་སྐུ་རུ་བཞེངས་པའི། །ཁྱབ་བདག་འཁོར་ལོའི་མགོན་པོ་སྙིང་དབུས་ནས་མཁྱེན་ནོ། །ཆོས་བརྒྱད་འཁྲུལ་པ་ཟད་པར་བྱིན་གྱིས་རང་རློབས་ཤིག །རྙེད་དཀའི་དལ་བརྒྱད་འབྱོར་བཅུའི་མི་ལུས་དེ་ཐོབ་ཀྱང་། །ངེས་ལེགས་ཐར་པའི་གོ་འཕང་སྒྲུབ་འདོད་དང་བྲལ་ཞིང་། །རྟག་ཏུ་དགྲ་གཉེན་ཕྱོགས་ཆའི་བརྟུལ་ཞུགས་ལ་གོམས་པའི། །སྣང་ཚུལ་འདི་ཡང་འཇིག་རྟེན་སྤྱི་མཐུན་གྱི་སྤྱོད་ཚུལ། །བཟློག་མེད་གཤིན་རྗེའི་ཕོ་ཉས་རང་གཞན་ཀུན་བཏབ་ཚེ། །བསགས་པའི་ནོར་དང་མཛའ་བའི་གཉེན་བཤེས་ཀྱིས་བོར་ཏེ། །གཅིག་པུར་དབང་མེད་ལས་ཀྱི་ཕྱི་བཞིན་དུ་འབྲངས་ཚེ། །ཐུགས་རྗེས་ཟུང་ཞིག་རྗེ་བཙུན་བླ་མ་དེ་མཁྱེན་ནོ། །ཆགས་པས་རང་ཉིད་བསླུ་བའི་བདོག་པ་དེ་བསྐྱུར་ཐོང་། །ཁོང་ཁྲོས་གཞན་སེམས་མནར་བའི་ཚིག་རྩུབ་ཀྱང་སྤོངས་མཛོད། །རྟག་ཏུ་གཞན་ཕན་སྤྱོད་ཅིང་དུལ་བ་ལ་གོམས་པའི། །བག་ཡོད་ཆོག་ཤེས་འབྱོར་པས་ཕྱུག་པ་རུ་མཛོད་ཅིག །སྐྱབས་སུ་སོང་ཡང་བསླབ་བྱའི་ཡོན་ཏན་དང་བྲལ་ཞིང་། །སྨོན་འཇུག་སེམས་བསྐྱེད་བདག་གཞན་ཕྱོགས་རིས་སུ་དབྱེ་བ། །ཚོགས་དྲུག་དངོས་པོར་བཅིངས་པའི་ཀུན་རྟོག་དེ་སྤོངས་ལ། །རྒྱལ་སྲས་འཕགས་པའི་རྣམ་ཐར་ཇི་བཞིན་དུ་བསྙེན་ཅིག །དག་རྫོགས་སྨིན་གསུམ་བྲལ་བའི་མངོན་ཞེན་གྱི་བསྐྱེད༷་རི༷མ། །རླུང་ནུས་ཅུང་ཟད་ཐོན་པ་རྫོག༷ས་རི༷མ་གྱི་མཐར་ཐུག །སེམས་འཛིན་གཉེན་པོས་རྒྱས་བཏབ་ཟུང་འཇུག་ཏུ་འདོད་པས། །ཡང་དག་ལམ་དང་བྲལ་བ་དུས་ཀུན་ཏུ་སྤོངས་ཤིག །ཆས་དང་བསྒྲིགས་ལ་རེ་བའི་རིག་གྲོལ་གྱི་ཡོན་ཏན། །རྔ་རོལ་གཏོར་དབྱངས་གར་མཆམས་གསང་སྔགས་ཀྱི་སྙིང་པོ། །ཐོ་ཅོའི་སྤྱོད་པ་གྲུབ་པའི་རྣམ་ཐར་དུ་རློམ་པ། །གཞན་མགོ་གདུགས་ལྟར་བསྐོར་བའི་ཇོ་བརྫུ་རང་ཡིན་འདྲ། །རླུང་སེམས་དབུ་མར་མ་འདུས་རས་དཀར་གྱི་གོས་དང་། །གདོད་མའི་བཙན་ས་མ་ཟིན་རལ་པ་ཡི་ཟུར་ཕུད། །དོན་བརྒྱུད་བྱིན་རླབས་མེད་པའི་གླེགས་བམ་གྱི་དཀྱིལ་འཁོར། །སྙིང་པོས་དབེན་པ་རི་མོའི་མར་མེ་དང་འདྲ་བྱུང་། །དབང་བསྐུར་སྲང་མདོར་བཙུགས་པ་སྙིགས་མ་ཡི་སྤྱོད་ཚུལ། །གསང་སྔགས་ཁྱབ་གདལ་སྒྲོགས་པ་དམ་ཚིག་དང་རྒྱབ་འགལ། །ལོག་འཚོའི་གཟི་བྱིན་སྒྲུབ་པས་སྤངས་རྟོགས་ནི་མི་འབྱུང་། །བསྟན་པའི་ནང་དབྱེན་རླབས་ཆེན་དེ་ག་རང་ཡིན་མོད། །གཞན་དོན་ཕྱོགས་མེད་བསྒྲུབ་པའི་བགྱི་བ་རང་བྲལ་ཡང་། །རང་ཉིད་དགེ་བཅུའི་དོན་ལ་འབྲལ་མེད་དུ་སྤྱོད་ཅིང་། །སེམས་བསྐྱེད་བསྔོ་སྨོན་བཙན་པོའི་མཚམས་སྦྱོར་དང་འབྲེལ་ན། །ཐོག་ཐ་བར་གསུམ་རྣམ་དཀར་བྱང་ཆུབ་ཀྱི་ཤུལ་ལམ། །མཛའ་བའི་གྲོགས་དང་འགྲོགས་པ་ལྷ་བདུད་ཀྱི་གཡབ་མོ། །ལོང་གཏམ་བག་མེད་སྨྲ་བ་ཉེས་ལྟུང་གི་འབྱུང་ཁུངས། །གྲགས་སྙན་སྲིད་རྩེར་ཁྱབ་པ་ང་རྒྱལ་གྱི་ཕོ་ཉ། །བྱང་ཆུབ་སྒྲུབ་འདོད་ཀུན་གྱི་དེ་ག་རང་སྤོངས་མཛོད། །ཆགས་སྡང་ཆུ་ལྟར་འཁྲུགས་པའི་འཆད་རྩོད་དང་རྩོམ་པ། །བག་མེད་དཀོར་ལ་སྤྱོད་པ་ཐར་པ་ཡི་སྲོག་གཅོད། །ཤེས་བཞིན་ལེ་ལོར་འཁྱམས་པ་མདོ་མེད་ཀྱི་དྲེད་པོ། །འདི་འདྲས་རང་ཕུང་གཞན་བརླག་ངན་སོང་དེ་སྒྲུབ་འདུག །མི་ཚེའི་ཉི་མ་ནུབ་རིའི་གཟིམ་མལ་ལ་གཤེགས་ཏེ། །འཆི་བདག་མུན་པ་སྟུག་པོས་དབང་མེད་དུ་འདེད་ཚེ། །ག་ཙུག་དྲག་ཏུ་སྐྱོ་བའི་གདུང་དབྱངས་ཀྱིས་འབོད་ཀྱང་། །དེ་ལ་ཕན་དང་བཤོལ་བའི་ཐབས་ཚུལ་ནི་མི་འདུག །སྐྱེད་མོའི་ཚལ་དུ་རྩེ་བ་གནས་སྐབས་ཀྱི་སྒྱུ་མ། །ཤ་ཆང་ཟས་ལ་རོལ་ཀྱང་འདུ་བྱེད་ཀྱི་སྡུག་བསྔལ། །བེར་གོས་ཁྲི་རྐང་མཐོན་པོ་དུར་ཁྲོད་དུ་བསྐྱལ་ཚེ། །ཕན་པ་མེད་པའི་ངང་ཚུལ་འདི་ཉིད་ལ་གཟིགས་མཛོད། །ཅི་ཙམ་སྨྲས་ཀྱང་སྐྱོ་ཤས་ངེས་འབྱུང་དང་བྲལ་བའི། །རང་རྩིས་དྲེགས་པས་མྱོས་པའི་སྐྱེ་བོ་ལ་ཅི་ཞུ། །ཐར་པའི་ཕྱོགས་ལ་འདུན་པའི་སྐལ་མཉམ་གྱི་གྲོགས་པོར། །ལོངས་སྤྱོད་འཁོར་ལོའི་མཛོད་ནས་རང་གྲོལ་དུ་བླངས་སོ། །དགེ་བ་དེ་ཡིས་སྲིད་ལམ་དུབ་པ་ཡི་འགྲོ་ཀུན། །དབེན་པར་ཚུགས་ཐུབ་བསླབ་གསུམ་བདུད་རྩི་ལ་རོལ་ཞིང་། །བློ་བྲལ་རྫོགས་པ་ཆེན་པོའི་གསེང་ལམ་ལ་བརྟེན་ཏེ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། །། ༈

[edit]

nyams len thun mong du gdams pa'i rdo rje'i thol glu drang srong gi gtam/__ nyams len thun mong du gdams pa'i rdo rje'i thol glu drang srong gi gtam ces bya ba/__a ho/__sku bzhi'i dbang phyug rje btsun rdo rje 'chang chen po/__/tshur mthong 'gro ba'i mos ngor gzugs sku ru bzhengs pa'i/__/khyab bdag 'khor lo'i mgon po snying dbus nas mkhyen no/__/chos brgyad 'khrul pa zad par byin gyis rang rlobs shig__/rnyed dka'i dal brgyad 'byor bcu'i mi lus de thob kyang /__/nges legs thar pa'i go 'phang sgrub 'dod dang bral zhing /__/rtag tu dgra gnyen phyogs cha'i brtul zhugs la goms pa'i/__/snang tshul 'di yang 'jig rten spyi mthun gyi spyod tshul/__/bzlog med gshin rje'i pho nyas rang gzhan kun btab tshe/__/bsags pa'i nor dang mdza' ba'i gnyen bshes kyis bor te/__/gcig pur dbang med las kyi phyi bzhin du 'brangs tshe/__/thugs rjes zung zhig rje btsun bla ma de mkhyen no/__/chags pas rang nyid bslu ba'i bdog pa de bskyur thong /__/khong khros gzhan sems mnar ba'i tshig rtsub kyang spongs mdzod/__/rtag tu gzhan phan spyod cing dul ba la goms pa'i/__/bag yod chog shes 'byor pas phyug pa ru mdzod cig__/skyabs su song yang bslab bya'i yon tan dang bral zhing /__/smon 'jug sems bskyed bdag gzhan phyogs ris su dbye ba/__/tshogs drug dngos por bcings pa'i kun rtog de spongs la/__/rgyal sras 'phags pa'i rnam thar ji bzhin du bsnyen cig__/dag rdzogs smin gsum bral ba'i mngon zhen gyi bskyedaX riXm/__/rlung nus cung zad thon pa rdzogaXs riXm gyi mthar thug__/sems 'dzin gnyen pos rgyas btab zung 'jug tu 'dod pas/__/yang dag lam dang bral ba dus kun tu spongs shig__/chas dang bsgrigs la re ba'i rig grol gyi yon tan/__/rnga rol gtor dbyangs gar mchams gsang sngags kyi snying po/__/tho co'i spyod pa grub pa'i rnam thar du rlom pa/__/gzhan mgo gdugs ltar bskor ba'i jo brdzu rang yin 'dra/__/rlung sems dbu mar ma 'dus ras dkar gyi gos dang /__/gdod ma'i btsan sa ma zin ral pa yi zur phud/__/don brgyud byin rlabs med pa'i glegs bam gyi dkyil 'khor/__/snying pos dben pa ri mo'i mar me dang 'dra byung /__/dbang bskur srang mdor btsugs pa snyigs ma yi spyod tshul/__/gsang sngags khyab gdal sgrogs pa dam tshig dang rgyab 'gal/__/log 'tsho'i gzi byin sgrub pas spangs rtogs ni mi 'byung /_/bstan pa'i nang dbyen rlabs chen de ga rang yin mod/__/gzhan don phyogs med bsgrub pa'i bgyi ba rang bral yang /__/rang nyid dge bcu'i don la 'bral med du spyod cing /__/sems bskyed bsngo smon btsan po'i mtshams sbyor dang 'brel na/__/thog tha bar gsum rnam dkar byang chub kyi shul lam/__/mdza' ba'i grogs dang 'grogs pa lha bdud kyi g.yab mo/__/long gtam bag med smra ba nyes ltung gi 'byung khungs/__/grags snyan srid rtser khyab pa nga rgyal gyi pho nya/__/byang chub sgrub 'dod kun gyi de ga rang spongs mdzod/__/chags sdang chu ltar 'khrugs pa'i 'chad rtsod dang rtsom pa/__/bag med dkor la spyod pa thar pa yi srog gcod/__/shes bzhin le lor 'khyams pa mdo med kyi dred po/__/'di 'dras rang phung gzhan brlag ngan song de sgrub 'dug__/mi tshe'i nyi ma nub ri'i gzim mal la gshegs te/__/'chi bdag mun pa stug pos dbang med du 'ded tshe/__/ga tsug drag tu skyo ba'i gdung dbyangs kyis 'bod kyang /__/de la phan dang bshol ba'i thabs tshul ni mi 'dug__/skyed mo'i tshal du rtse ba gnas skabs kyi sgyu ma/__/sha chang zas la rol kyang 'du byed kyi sdug bsngal/__/ber gos khri rkang mthon po dur khrod du bskyal tshe/__/phan pa med pa'i ngang tshul 'di nyid la gzigs mdzod/__/ci tsam smras kyang skyo shas nges 'byung dang bral ba'i/__/rang rtsis dregs pas myos pa'i skye bo la ci zhu/__/thar pa'i phyogs la 'dun pa'i skal mnyam gyi grogs por/__/longs spyod 'khor lo'i mdzod nas rang grol du blangs so/__/dge ba de yis srid lam dub pa yi 'gro kun/__/dben par tshugs thub bslab gsum bdud rtsi la rol zhing /__/blo bral rdzogs pa chen po'i gseng lam la brten te/__/gdod ma'i btsan sa zin pa'i smon lam zhig zhu'o//__//___!__