ཡང་གསང་མཁའ་འགྲོ་ཐུགས་ཐིག་ལསཿ མཁའ་འགྲོའི་གསང་སྒྲུབ་ནོར་བུའི་བང་མཛོདཿ

🚧 This website is under continued development. We appreciate your patience!

Previous Text Back to Volume Page Next Text

Wylie title	yang gsang mkha' 'gro thugs thig las mkha' 'gro'i gsang sgrub nor bu'i bang mdzod
Location	mdo mkhyen brtse bka' 'bum Volume 5, Text 6, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre	Sadhanas - Evocation Ritual - sgrub thabs
Cycle	ཡང་གསང་མཁའ་འགྲོའི་ཐུགས་ཐིག་ (yang gsang mkha' 'gro'i thugs thig)
Colophon	འཇའ་ལུས་རྡོ་རྗེས་ཕབ་པ་བཞིནཿ རིག་པའི་ཡེ་ཤེས་ཀྱིས་བྲིས་སོཿ
Colophon	'ja' lus rdo rjes phab pa bzhin: rig pa'i ye shes kyis bris so:

[edit]

༄༅། «།ཡང་གསང་མཁའ་འགྲོ་ཐུགས་ཐིག་ལསཿ མཁའ་འགྲོའི་གསང་སྒྲུབ་ནོར་བུའི་བང་མཛོད་བཞུགསཿ ཡུམ་གྱི་དགོངས་པ་ཀུན་ཏུ་བཟངཿ ཨ་ཏི་རང་བྱུང་དཔལ་ལ་འདུདཿ རྒྱལ་བ་ཀུན་གྱི་ཡུམ་ཆེན་མོཿ མཁའ་འགྲོ་རྒྱ་མཚོའི་སྒྲུབ་ཐབས་བསྟནཿ སྐྱབས་སེམས་ཡན་ལག་བདུན་པ་ནིཿ» ན་མོཿ བླ་མ་ཡི་དམ་མཁའ་འགྲོ་སྤྱན་འདྲེན་གཤེགསཿ སྤྱི་གཙུག་ཉི་ཟླ་པདྨའི་གདན་ལ་བཞུགསཿ བྱང་ཆུབ་སྙིང་པོའི་བར་དུ་སྐྱབས་སུ་མཆིཿ འགྲོ་བའི་དོན་དུ་སྨོན་འཇུག་སེམས་མཆོག་བསྐྱེདཿ སྒོ་གསུམ་གུས་པ་ཆེན་པོས་ཕྱག་འཚལ་ལོཿ ཕྱི་ནང་གསང་བའི་མཆོད་པ་དཔག་མེད་འབུལཿ ཉམས་ཆགས་སྡིག་སྒྲིབ་ཐམས་ཅད་མཐོལ་ལོ་བཤགསཿ གསང་སྔགས་མཛད་པ་སྒྲུབ་ལ་རྗེས་ཡི་རངསཿ སྨིན་གྲོལ་ཆོས་ཀྱི་འཁོར་ལོ་བསྐོར་བར་བསྐུལཿ འགྲོ་བའི་དོན་དུ་མྱ་ངན་མི་འདའ་བཞུགསཿ དགེ་ཚོགས་བླ་མེད་བྱང་ཆུབ་ཆེན་པོར་བསྔོཿ ཨཱཿ སྤྲོས་བྲལ་ངང་ལས་རང་བྱུང་རྩལཿ མཁའ་ལ་འཇའ་ཚོན་ཤར་བ་བཞིནཿ བདག་ཉིད་ཀུན་བཟང་ཡུམ་ཆེན་མོཿ མཐིང་གསལ་སྐྱེ་མེད་ནམ་མཁའི་མདོགཿ ཞལ་གཅིག་ཞི་མ་ཁྲོ་ཡི་ཉམས། སྤྱན་གསུམ་དབུས་མ་དབྱིངས་སུ་གཏོདཿ ཐབས་ཤེས་སྤྱན་ཟུང་འབྲུ་ཚུགས་གཟིགས༔ དབུ་སྐྲ་ཐོར་ཅོག་སྐུ་རྒྱབ་ཁེབཿ ཕྱག་གཡས་གསེར་རྡོར་རྩེ་ལྔ་ཕྱརཿ གཡོན་པས་གྲི་གུག་དཀུ་ལ་བསྟེནཿ ནུ་འབུར་བྷ་ག་ལང་ཚོས་རྒྱསཿ གཅེར་མོ་རིན་ཆེན་རུས་རྒྱན་སྤུདཿ ཞབས་གཉིས་བདེ་ཆེན་རོལ་སྟབས་བགྲདཿ པདྨ་ཉི་མ་རོ་ཡི་སྟེང་ཿ འོད་དང་གཟི་བརྗིད་འབར་བར་རོལཿ ཤར་ཕྱོགས་ཚེ་ཡི་ལྷ་མོ་དཀརཿ མདའ་དར་དང་ནི་བུམ་པ་འཛིནཿ ལྷོ་རུ་འདོད་དགུའི་དཔལ་སྟེར་སེརཿ ཡིད་བཞིན་ནོར་དང་ཞགས་པ་འཛིནཿ ནུབ་ཏུ་དབང་བྱེད་བདེ་སྟེར་མཿ ཅང་ཏེའུ་གཡས་ལ་དྲིལ་བུ་གཡོནཿ བྱང་དུ་ལས་ལ་དབང་སྒྱུར་ལྗངཿ གྲི་གུག་ཐོད་ཁྲག་ཁམས་གསུམ་སྒྲོལཿ ཀུན་ཀྱང་ཆ་ལུགས་གཙོ་མོར་མཐུནཿ ཐུགས་ཀའི་འོད་ཀྱིས་འཕྲོ་འདུ་ལསཿ ཡེ་ཤེས་ལྷ་ཚོགས་སྤྱན་དྲངས་བསྟིམསཿ ཕྱག་འཚལ་ཡུལ་དྲུག་མཆོད་པར་འབུལཿ སྟོང་ཆེན་ཀ་དག་ཀུན་བཟང་མོཿ ཡེ་ཤེས་ལྔར་ཤར་ཡུམ་ལ་བསྟོདཿ ཐུགས་ཀར་དགའ་བ་འཁྱིལ་བའི་དབུསཿ བཾཿཡིག་མཐིང་གསལ་རྭ་བཞི་པོརཿ ཧ་རི་ནི་ས་རང་མདོག་གསལཿ འཕྲོ་འདུ་འོད་ཀྱིས་སྣོད་བཅུད་སྦྱངསཿ དབང་དང་དངོས་གྲུབ་བྱིན་བརླབ་བསྡུསཿ སྣང་སྲིད་རྣམ་དག་ཡུམ་ལྔར་ཤརཿ རྩལ་སྣང་དག་པ་རབ་འབྱམས་ངངཿ བཾཿཛྙཱ་ན་ཌཱཀྐི་ནི་ཧ་རི་ནི་ས་སིདྡྷི་ཧཱུཾ༔ «བདེ་སྟོང་ཡེ་ཤེས་རྩལ་སྦྱངས་ཤིངཿ འོད་གསལ་ཐོད་རྒལ་ཆེན་པོར་བལྟཿ སྐྱབས་སུ་སྣང་བར་རྩལ་སྦྱངས་ཤིངཿ གང་ལའང་ཞེན་པ་བྲལ་བའི་ཚེཿ མ་ཡི་དངོས་གྲུབ་ཐོབ་པ་སྟེཿ གང་ཤར་འགྲོ་བའི་དོན་ལས་མེདཿ མཁའ་འགྲོའི་ཆོས་ཁམས་རྒྱ་མཚོ་ལསཿ བཅུད་བསྡུས་ཡིད་བཞིན་ནོར་བུའོཿ རྗེས་ལ་མཆོད་བསྟོད་བཟོད་གསོལ་བྱཿ ཡེ་ནས་སྣང་སྲིད་ཡུམ་ལྔའི་ངངཿ སྤྲོ་བསྡུ་མཁན་པོ་ལོག་ན་མེདཿ ཡང་ཞུན་གསེར་གྱི་ཐིག་པ་འདིཿ སྐལ་ལྡན་རྣལ་འབྱོར་ཕོ་མོའི་དོནཿ པདྨ་ཐོད་ཕྲེང་བདག་གིས་བཀོདཿ བློ་ཆུང་དག་གི་སྤྱོད་ཡུལ་མིནཿ བྱིན་རླབ་བདེན་རྫུན་གསལ་བར་ངེསཿ སྒོམ་པཙམ་གྱིས་གྲོལ་བ་སྟེཿ ཇི་སྲིད་བསྐལ་བར་མ་སྟོང་བརཿ ཆོས་འདིས་འགྲོ་དོན་མཐར་ཕྱིན་ཤོགཿ བཀའ་དང་གཏེར་གྱི་སྲུང་མའི་ཚོགསཿ ཐུབ་པར་སྲུངས་ཤིག་ས་མ་ཡཱཿ རྒྱ་རྒྱཿ ཁ་ཐཾཿ གུ་ཧྱཿ འཇའ་ལུས་རྡོ་རྗེས་ཕབ་པ་བཞིནཿ རིག་པའི་ཡེ་ཤེས་ཀྱིས་བྲིས་སོཿ