གཅོད་ཡུལ་མཁའ་འགྲོའི་གད་རྒྱངས་ཀྱི་མན་ངག་ཟབ་མོ།

🚧 This website is under continued development. We appreciate your patience!

Previous Text Back to Volume PageLast text in volume.

Wylie title	gcod yul mkha' 'gro'i gad rgyangs kyi man ngag zab mo
Location	dpal sprul bka' 'bum Volume 4, Text 37, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Tertön	འཇིགས་མེད་གླིང་པ་ ('jigs med gling pa)
Citation
Genre	Pith Instructions - man ngag · Severance Texts - gcod gzhung
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

༄༅། །གཅོད་ཡུལ་མཁའ་འགྲོའི་གད་རྒྱངས་ཀྱི་མན་ངག་ཟབ་མོ་བཞུགས་སོ། །

རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཐེག་པ་ཆེན་པོ་སྡུག་བསྔལ་གཅོད། །མཚོན་ཆ་ཆེན་པོ་ཕཊཿལ་འདུད། །ཕ་རོལ་ཕྱིན་པ་ཀུན་རྫོགས་པ། །ས་རྣམས་ཀུན་གྱི་རྒྱན་དང་ལྡན། །རྣམ་པར་དག་པ་བདག་མེད་ཆོས། །ཟབ་དོན་གཅོད་ཀྱི་ཉམས་ལེན་བྲི། །དེ་ལ་ཟབ་དོན་གྱི་གདམས་པ་ཉམས་སུ་ལེན་པའི་སྐབས་སུ་སྔོན་འགྲོའི་སྦྱང་པ་རྣམས་དང་། དངོས་གཞི་ཡུམ་དོན་ངོ་སྤྲོད་པ། །བདུད་བཞི་དབྱིངས་སུ་གཅོད་པ་སོགས་ཉམས་ལེན་གནད་དུ་ཁེལ་ཞིང་། རྗེས་བོགས་འདོན་སྤྱོད་པས་ལ་ཟླ་བའི་ཆེད་དུ་གཉན་སར་འགྲོ་བའི་ཚེ། ཟིལ་གནོན་དམིགས་པ་སྐོར་གསུམ་དང་། ཉམས་ལེན་ཕུང་པོ་ཟན་བསྐྱུར་རྣམས་གཅོད་ཡུལ་མཁའ་འགྲོའི་གད་རྒྱངས་ལྟར་བྱ་བ་ལ། དང་པོ་སྔ་གནོན་གྱི་དམིགས་པ་ནི། ཕཊཿཅེས་བརྗོད་པས་རང་གི་ཐུགས་ཀ་ནས་གནམ་ལྕགས་ཀྱི་རྡོ་རྗེ་རྩེ་དགུ་པ་སྲ་ཞིང་བརྟན་པ། ལྕི་ཞིང་འཐས་པ་འོད་ཟེར་དང་མེ་དཔུང་གི་ཚྭ་ཚྭ་འཕྲོ་བ་ཞིག་གང་དམིགས་པའི་གཉན་ས་དེར་དཔག་ཆེན་གྱིས་མདའ་འཕངས་པ་ལྟར་སོང་སྟེ་གནམ་ལྕགས་ཀྱི་ཐོག་ལྷུང་བ་ལྟར་བབས་ནས་འོད་དང་འོད་ཟེར་དུ་འཕྲོ་ཞིང་མེ་དཔུང་གི་ཚྭ་ཚྭ་ཐོ་རོ་རོ་འཕྲོས་པས་ས་དེ་ན་གནས་པའི་ལྷ་འདྲེ་སྡེ་དང་དཔུང་དུ་བཅས་པ་ཐམས་ཅད་འཕྲོས་ཤིང་འཁྱར་བའི་དཔང་མེད་པར་དཔའ་ཟིལ་ང་རྒྱལ་ཆག །སྙེམས་པའི་སྟངས་ཤོར་ནས་ཟིལ་ཆུམ་གྱིས་གནས་པར་བསམ། དེ་ནས་འགྲོ་བའི་ཚེ། ཕོ་ཚོད་ལྷ་འདྲེར་བརྙས་སེམས་དང་། །ཆོས་བརྒྱད་བསམ་པས་མ་ཡིན་པར། །ཞེས་པ་ལྟར། བདག་མེད་གནས་ལུགས་རྟོགས་པའི་ལྟ་བའི་གདེང་དང་། འབྲེལ་ཚད་ཐར་ལམ་ལ་འགོད་པའི་ལྷ་འདྲེའི་འགྲོ་དོན་བྱེད་སྙམ་པའི་སྙིང་རྗེ་བྱང་ཆུབ་སེམས་ཀྱི་ཤུགས་དང་ལྡན་པས་འགྲོ། གཉན་སར་ཕྱིན་ནས། བར་གནོན་གྱི་དམིགས་པ་ནི། ཕཊཿཅེས་བརྗོད་པས་རང་ཉིད་སྐད་ཅིག་གིས་གསང་བ་ཡེ་ཤེས་ཀྱི་མཁའ་འགྲོ་བདེ་ཆེན་རྡོ་རྗེ་རྣལ་འབྱོར་མ། ཐུགས་སྙིང་རྗེ་ཆེན་པོས་སེམས་ཅན་ལ་རྗེས་སུ་ཆགས་ཤིང་། ཁམས་གསུམ་དབང་དུ་སྡུད་པའི་བརྡར་སྐུ་མདོག་དམར་མོ་དུས་མཐའི་མེའི་འོད་ཟེར་ལྟར་འབར་བ། ཐུགས་བདེ་བ་ཆེན་པོའི་ཡེ་ཤེས་ཀྱི་ཀློང་དུ་དུག་གསུམ་དབྱིངས་སུ་དག་ཅིང་སྲིད་གསུམ་ཟིལ་གྱིས་གནོན་པའི་བརྡར་ཉི་མ་འབུམ་ལྟར་གཟི་བརྗིད་འབར་ཞིང་ཁྲོ་བའི་ཉམས་དང་ལྡན་པ། ཆེས་ཕྲ་ཡིད་ཀྱི་བག་ཆགས་དབྱིངས་སུ་དག་ཅིང་། ཐུགས་མི་ཟད་པ་རྒྱན་གྱི་འཁོར་ལོ་ལ་མངའ་དབང་འབྱོར་བས་སྐུ་སྟོད་གཟུགས་མེད་སྲིད་པའི་རྩེ་ན་བརྗིད་པ། ཕྲ་བ་ངག་གི་བག་ཆགས་དབྱིངས་སུ་དག་ཅིང་གསུང་མི་ཟད་རྒྱན་གྱི་འཁོར་ལོ་ལ་མངའ་དབང་འབྱོར་བས་སྐུ་སྐེད་གཟུགས་ཀྱི་ཁམས་ན་འགྱིང་བ། རགས་པ་ལུས་ཀྱི་བག་ཆགས་དབྱིངས་སུ་དག་ཅིང་སྐུ་མི་ཟད་པ་རྒྱན་གྱི་འཁོར་ལོ་ལ་མངའ་དབང་འབྱོར་པས་སྐུ་སྨད་འདོད་ཁམས་ཀྱི་གནས་སུ་རོལ་བ། བདེ་ཆེན་སྒྱུ་མའི་གར་གྱིས་སྲིད་གསུམ་ཕྱག་རྒྱས་འགེངས་པའི་རྡོ་རྗེའི་གར་སྟབས་བསྒྱུར་བ། འགྱུར་མེད་ཆོས་སྐུའི་ཀློང་དུ་འཁོར་འདས་ཐིག་ལེ་ཉག་གཅིག་ཏུ་རྫོགས་པས་ཞལ་གཅིག་པ། ཤེས་པས་སྲིད་ལ་མི་གནས་ཤིང་། སྲིད་མཐའི་འཁྲུལ་པ་གཅོད་པའི་བརྡར་གནག་སྣུམ་དབུ་སྐྲའི་ཐོར་ཅོག་བཅིངས་པ། སྙིང་རྗེས་ཞི་མཐར་མི་གནས་ཤིང་ཞི་མཐར་ཞེན་པ་དགག་པའི་བརྡར་རལ་པའི་ཟུར་ཕུད་ཐུར་དུ་འཕྱང་བས་སྐུ་རྒྱབ་ཁེབ་པ། སྐུ་གསུམ་ལྷུན་གྱིས་གྲུབ་ཅིང་ཐུགས་རྗེས་འགྲོ་ལ་གཟིགས་པའི་ཕྱིར་དམར་ལ་ཟླུམ་པའི་སྤྱན་གསུམ་རྒྱས་པ། ཚད་མེད་རྣམ་བཞིས་འགྲོ་དོན་མཛད་ཅིང་འཕྲིན་ལས་རྣམ་བཞི་རྒྱུན་མི་ཆད་པའི་ཕྱིར་མཆེ་བ་བཞི་རྣོ་ངར་དུ་གཙིགས་པཚངས་པའི་དབྱངས་ཀྱི་ཡན་ལག་རྫོགས་ཤིང་འཁྲུལ་སྣང་གདོན་གྱི་མགོ་བོ་འགེམ་པས་གློག་དམར་ལྟ་བུའི་ལྗགས་པ་བརྐྱངས་ཤིང་ཕཊ་དང་ཕེཾ་གྱི་སྒྲ་སྒྲོག་པ། ཐབས་དང་ཤེས་རབ་འདུ་བྲལ་མེད་ཅིང་ཟུང་འཇུག་རྡོ་རྗེའི་ལམ་གྱིས་འཁོར་འདས་དབྱེར་མེད་དུ་སྦྱོར་བའི་ཕྱིར་ཕྱག་གཉིས་པ། སྙིང་རྗེ་ཆེན་པོས་བརླན་ཞིང་བསྡུ་བཞིའི་ཕྲིན་ལས་རྫོགས་པའི་བརྡར་ཕྱག་གཡས་ཁྲག་གིས་གོས་པའི་མི་ལྤགས་ཀྱི་གཡང་གཞི་དམར་ལྷབ་ལྷབ་ཏུ་བརྡེབ་པས་ལྷ་འདྲེ་མི་གསུམ་དབང་དུ་སྡུད་ཅིང་བྲན་དུ་བཀོལ་བར་བྱེད་པ། ཤེས་རབ་སྟོང་ཉིད་ཆོས་ཀྱི་རང་སྒྲས་སྐྱེ་རྒུའི་མ་རིག་གཉིད་ལས་སློང་བའི་བརྡར་ཕྱག་གཡོན་མི་རྐང་གི་གླིང་བུ་དྲག་ཏུ་འབུད་པས་འཇིག་རྟེན་གྱི་དྲེགས་བྱེད་ཟིལ་གྱིས་གནོན་ཅིང་ང་རྒྱལ་འཇོམས་པ། དུག་ལྔ་ལམ་དུ་བྱེད་ཅིང་ཕུང་པོ་ལྔ་དབྱིངས་སུ་དག་སྟེ་སྐུ་ལྔས་འགྲོ་དོན་མཛད་ལ་རིགས་ལྔའི་དབང་བསྐུར་རྫོགས་པས་ཐོད་པ་སྐམ་པོ་ལྔས་དབུ་བརྒྱན་པ། ཤེས་རབ་ཡུམ་གྱི་སྐུ་ལ་ཐབས་ཆེན་སྤྱོད་པའི་ཕྱོགས་ཀྱི་ཕ་རོལ་ཕྱིན་པ་ལྔ་འདུ་འབྲལ་མེད་པའི་བརྡར་རུས་པའི་ཕྱག་རྒྱ་ལྔས་བརྒྱན་པ། ཀློང་དགུའི་དབྱིངས་ལ་རོལ་ཞིང་ས་དགུའི་བག་ཆགས་དག་ནས་ཀུན་སྦྱོར་འཆིང་བ་གཅོད་པས་གར་དགུའི་ཉམས་ཀྱིས་སྒེག་པ། ཚོགས་གཉིས་ཟུང་དུ་འཇུག་ཅིང་སྲིད་ཞིའི་ཡུལ་ལས་འདས་པ་དོན་གཉིས་ལྷུན་གྱིས་གྲུབ་པའི་ཕྱིར་ཞབས་གཉིས་གར་སྟབས་ཀྱིས་རོལ་པའོ། །དེའི་སྟེང་གི་ནམ་མཁར་གཅོད་ཡུལ་བརྒྱུད་པའི་བླ་མ་ཐམས་ཅད་སྐུ་རྡོ་རྗེའི་གར་སྟབས་བསྒྱུར་བ། གསུང་ཚངས་དབྱངས་ཀྱི་མགུར་གླུ་སྒྲོག་པ། ཐུགས་བདེ་ཆེན་གྱི་ཉམས་སྣང་འུར་བ། འཇའ་དང་འོད་ཕུང་གི་ཀློང་ན་བྱིན་འཐིབས་སེ། འོད་སྤུངས་སེ། བག་དྲོ་ཆིལ་ལེར་བཞུགས་པ། བར་གྱི་ནམ་མཁའ་ལ་ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་མེ་རི་མེ་དཔུང་འཇའ་དང་འོད་ཕུང་གི་ཀློང་ན་སྐུ་སྣ་ཚོགས་ཀྱི་ཕྱག་རྒྱ་བསྒྱུར་བ། གསུང་དགྱེས་པའི་གད་མོ་སྒྲོག་པ། ཐུགས་སྙིང་རྗེ་ཆེན་པོའི་དགོངས་པ་ལ་རོལ་པ། ཞི་བ་རྣམས་ཚུལ་དགུའི་ཉམས་ཀྱིས་སྒེག་ཅིང་། ཁྲོ་བོ་རྣམས་གར་དགུའི་སྟབས་ཀྱིས་རོལ་པ། རང་གི་འཁོར་དུ་གནས་ཡུལ་དུར་ཁྲོད་ཀྱི་ཞིང་སྐྱོང་གི་མཁའ་འགྲོ། དཀར་མོ་མཛེས་འཛུམ་སྐུའི་ཌཱ་ཀི་འབུམ་སྡེ། དམར་མོ་རྗེས་ཆགས་གསུང་གི་ཌཱ་ཀི་འབུམ་སྡེ། སྔོན་མོ་གར་བསྒྱུར་ཐུགས་ཀྱི་ཌཱ་ཀི་འབུམ་སྡེ། སེར་མོ་སྒེག་འཆང་ཡོན་ཏན་གྱི་ཌཱ་ཀི་འབུམ་སྡེ། ལྗང་མོ་ཁྲོ་གཏུམ་ཕྲིན་ལས་ཀྱི་ཌཱ་ཀི་འབུམ་སྡེ། ཐམས་ཅད་ཀྱང་ལ་ལ་གཞོན་ཉམས་ལང་ཚོས་སྒེག་ཅིང་། གནག་སྣུམ་དབུ་སྐྲའི་ཟར་བུ་གཡོ་བ་ཐོར་ཚུགས་རུས་རྒྱན་དྲིལ་གཡེར་འཁྲོལ་ཞིང་སྣ་ཚོགས་དར་གྱི་ཅོད་པན་འཕུར་བ། ལ་ལ་བགྲེས་ཉམས་གཟི་བརྗིད་རྔམ་ཞིང་དབུ་སྐྲ་སེར་པོ་ལྟག་པར་བཅིངས་པ། སྣུམ་དང་ཁྲག་གི་ཐིག་ལེས་བརྒྱན་ཅིང་རོ་ཆས་རྙིང་པའི་ན་བཟའ་གསོལ་བ། ཁ་ན་སོ་མེད་ཧ་ཧ་རྒོད་ཅིང་རྐང་པ་གར་སྟབས་འཁྲོལ་ཞིང་འགྲོ་བ། ལ་ལ་ཞི་བའི་འཛུམ་མདངས་གསལ་བ། ལ་ལ་ཁྲོ་བའི་གར་དགུ་ངོམ་པ། ལ་ལ་ཞི་ཁྲོ་ཕྱེད་པའི་ཉམས་ཅན། རྣམ་རྟོག་དབྱིངས་སུ་གསོད་པས་ལ་ལ་གསོད་བྱེད་ཀྱི་ཤན་པ་ལྟར་སྟོན་པ། བག་ཆགས་ཀྱི་དྲི་མ་འཁྲུད་པས་ལ་ལ་དག་བྱེད་ཀྱི་ཁྲུས་མཁན་ལྟར་སྟོན་པ། ཉོན་མོངས་ཡེ་ཤེས་སུ་བསྒྱུར་བས་ལ་ལ་སྒྱུར་བྱེད་ཚོས་མཁན་ལྟར་སྟོན་པ། ཏིང་འཛིན་ཉམས་ཀྱིས་འཚོ་བས་ལ་ལ་འཚོ་བྱེད་གཡོས་མཁན་ལྟར་སྟོན་པ། འགྲོ་དྲུག་རྗེས་སུ་འཛིན་པས་ལ་ལ་སླུ་བྱེད་གཡེམ་མཁན་ལྟར་སྟོན་པ། དེ་དག་ཐམས་ཅད་ཀྱང་རིག་སྟོང་ལྟ་བའི་ཀློང་དུ་ཆོས་སྐུ་དབྱིངས་ཀྱི་མཁའ་འགྲོ་རྫོགས་པ། འཛིན་མེད་སྒོམ་པའི་ཀློང་དུ་ལོངས་སྐུ་ཡེ་ཤེས་ཀྱི་མཁའ་འགྲོ་བཞུགས་པ། ཞེན་མེད་སྤྱོད་པའི་ཀློང་དུ་སྤྲུལ་སྐུ་ལས་ཀྱི་མཁའ་འགྲོ་ལྟར་སྟོན་པ། ཆགས་མེད་འབྲས་བུ་རྫོགས་པའི་ཤ་ཟ་འཇིག་རྟེན་གྱི་མཁའ་འགྲོ་ཐམས་ཅད་བྲན་དུ་ཁོལ་བ། དེ་དག་གི་མཐའ་བསྐོར་དུ་ཡེ་ཤེས་དང་ལས་ལས་གྲུབ་པའི་ཆོས་སྐྱོང་སྲུང་མ་ཐམས་ཅད་སྐུ་མདོག་དང་ཞལ་ཕྱག་གི་རྣམ་འགྱུར་མ་ངེས་ཤིང་། ཞི་ཁྲོའི་ཉམས་སྣ་ཚོགས་སུ་གསལ་བ། ཐམས་ཅད་ཀྱང་སྐུ་བྲོ་དང་གར་གྱི་རྣམ་འགྱུར་ངོམས་ཤིང་། གསུང་ཧཱུྃ་གི་གླུ་དང་ཕཊཿཀྱི་སྒྲ་སྒྲོག་པ། དེ་ལྟར་གཙོ་དང་འཁོར་དུ་བཅས་པ་ཐམས་ཅད་ཀྱང་ཐུགས་བརྟུལ་ཞུགས་སྤྱོད་པའི་ཉམས་དང་ལྡན་པའི་སྒོ་ནས་འཁོར་འདས་དབྱེར་མེད་བརྡལ་ཞིང་གཉིས་འཛིན་འཁོར་བའི་རྣམ་རྟོག་གཞོམ་པའི་ཆེད་དུ། ཤར་ཕྱོགས་བྱམས་པ་ཆེན་པོའི་རང་བཞིན་འཇའ་འོད་དཀར་གསལ་གྱི་བྲོ་ར་ལུས་འཕགས་གླིང་གི་རྣམ་པར་གནས་པའི་དབུས་སུ་ཞེ་སྡང་ཁྲོ་གཏུམ་གྱི་རྟོག་པ་ཐམས་ཅད་ཕོ་གདོན་རྒྱལ་པོའི་རྣམ་པར་ཁ་སྦུབས་སུ་བསྒྱེལ་བའི་སྟེང་དུ་ཞི་བའི་བྲོ་ར་ཟླུམ་འཁྱིལ་དུ་བཅས་ནས་བྲོ་བརྡུངས་པས་ཞེ་སྡང་མེ་ལོང་ཡེ་ཤེས་སུ་དག་སྟེ། རིག་རྩལ་བྱམས་པ་ཆེན་པོའི་ཏིང་ངེ་འཛིན་དུ་ཤར། ལྷོ་ཕྱོགས་སྙིང་རྗེ་ཆེན་པོའི་རང་བཞིན་འཇའ་འོད་མཐིང་གསལ་གྱི་བྲོ་ར་འཛམ་བུའི་གླིང་གི་རྣམ་པར་གནས་པའི་དབུས་སུ་ང་རྒྱལ་ཁེངས་དྲེགས་ཀྱི་རྟོག་པ་ཐམས་ཅད་གསོད་བྱེད་གཤིན་རྗེའི་གདོན་ཚོགས་ཀྱི་རྣམ་པར་ཁ་སྦུབས་སུ་བསྒྱེལ་བའི་སྟེང་དུ་རྒྱས་པའི་བྲོ་ར་གྲུ་བཞིར་བཅས་ནས་བྲོ་བརྡུངས་པས་ང་རྒྱལ་མཉམ་ཉིད་ཡེ་ཤེས་སུ་དག་སྟེ། རིག་རྩལ་སྙིང་རྗེ་ཆེན་པོའི་རྣམ་པར་ཤར། ནུབ་ཕྱོགས་དགའ་བ་ཆེན་པོའི་རང་བཞིན་འཇའ་འོད་དམར་གསལ་གྱི་བྲོ་ར་བ་ལང་སྤྱོད་ཀྱི་རྣམ་པར་གནས་པའི་དབུས་སུ་འདོད་ཆགས་ཞེན་པའི་རྟོག་པ་ཐམས་ཅད་མོ་གདོན་སྲིན་མོའི་རྣམ་པར་གན་རྐྱལ་དུ་བསྒྱེལ་བའི་སྟེང་དུ་དབང་གི་བྲོ་ར་ཟླ་གམ་དུ་བཅས་ནས་བྲོ་བརྡུངས་པས་འདོད་ཆགས་སོར་རྟོག་ཡེ་ཤེས་སུ་དག་སྟེ། རིག་རྩལ་དགའ་བ་ཆེན་པོའི་ཏིང་འཛིན་དུ་ཤར། བྱང་ཕྱོགས་བཏང་སྙོམས་ཆེན་པོའི་རང་བཞིན་འཇའ་འོད་སེར་གསལ་གྱི་བྲོ་ར་སྒྲ་མི་སྙན་གྱི་རྣམ་པར་གནས་པའི་དབུས་སུ་ཕྲག་དོག་གདུག་པའི་རྟོག་པ་ཐམས་ཅད་སླུ་བྱེད་དམ་སྲིའི་གདོན་གྱི་རྣམ་པར་གན་རྐྱལ་དུ་བསྒྱེལ་བའི་སྟེང་དུ་དྲག་པོའི་བྲོ་ར་གྲུ་གསུམ་དུ་བཅས་ནས་བྲོ་བརྡུངས་པས་ཕྲག་དོག་བྱ་གྲུབ་ཡེ་ཤེས་སུ་དག་སྟེ། རིག་རྩལ་བཏང་སྙོམས་ཆེན་པོའི་ཏིང་འཛིན་དུ་ཤར། དབུས་ཕྱོགས་བྱང་ཆུབ་སེམས་ཀྱི་རང་བཞིན་གྱི་བྲོ་ར་གཞི་ཚད་མེད་བཞིའི་རང་འོད་གསལ་ཞིང་བསྡུ་དངོས་བཞིའི་བང་རིམ་བཀྲ་ལ་ཕར་ཕྱིན་དྲུག་གི་ཁ་ཁྱེར་ཡངས་བའི་རི་རྒྱལ་ལྷུན་པོའི་རྣམ་པར་གནས་པའི་སྟེང་དུ་གཏི་མུག་རྨོངས་པས་བསྐྱེད་པའི་ཀུན་རྟོག་འཁྲུལ་བའི་སྣང་བ་ཅི་སྙེད་ཅིག་ཡོད་པ་ཐམས་ཅད་ཤི་འདྲེ་གསོན་འདྲེ་ཡུལ་འདྲེ་འཁྱམས་པོ་གནས་གདོན་ལུས་གདོན་སོགས་སྣང་སྲིད་ལྷ་འདྲེའི་རྣམ་པར་གཅལ་དུ་བཀྲམ་པའི་སྟེང་དུ་ཆོས་ཀྱི་དབྱིངས་ཀྱི་བྲོ་ར་བྱིན་ཆགས་པ་བཅས་ནས་བྲོ་བརྡུངས་པས་གཏི་མུག་ཆོས་དབྱིངས་ཡེ་ཤེས་སུ་དག་སྟེ། རིག་རྩལ་བྱང་ཆུབ་སེམས་སུ་འབར་བས་སྟོང་ཉིད་སྙིང་རྗེ་ཟུང་དུ་འབྲེལ་ཏེ། འཁོར་བ་མྱང་འདས་སུ་དག་སྟེ་རེ་དོགས་སྤང་བླང་གི་རྣམ་རྟོག་ཐམས་ཅད་དབྱིངས་སུ་དག་པར་བསམ་ཞིང་བྲོ་བརྡུང་བར་བྱའོ། །དེ་ནས་སླར་ཡང་རང་གི་ཐུགས་ཀ་ནས་འཕྲོས་པའི་འོད་ཟེར་དང་ལས་བྱེད་མཁའ་འགྲོ་མ་གྲངས་མེད་པ་རྣམས་ཀྱིས་འཁྲུལ་གཟུགས་གདོན་གྱི་རྣམ་པར་ཤར་བའི་སྣང་ཞིང་སྲིད་པའི་ལྷ་འདྲེ་ཐམས་ཅད་དང་། ཁྱད་པར་ཡུལ་ཕྱོགས་འདི་ན་གནས་པའི་ལྷ་འདྲེ་གདུག་པ་ཅན་གང་ཡིན་པ་དེ་རང་དབང་མེད་པར་བཀུག་ནས་གན་རྐྱལ་དུ་བསྒྱེལ་པའི་ཡན་ལག་ལྔར་ཕུར་པ་འདེབས་པ་སྟེ། དེ་ཡང་རང་རིག་ཆོས་དབྱིངས་ཡེ་ཤེས་ཀྱི་རང་གདངས་རྡོ་རྗེ་རིགས་ཀྱི་མཁའ་འགྲོ་དཀར་མོ་ཞི་འཛུམ་མཛེས་པའི་ཉམས་དང་ལྡན་པས་རིག་རྩལ་བྱམས་པ་ཆེན་པོའི་རང་བཞིན་ཞི་བའི་ཕུར་བ་དཀར་པོ་ཟླུམ་པོའི་རྣམ་པ་ཅན་བདག་འཛིན་ལྷ་འདྲེའི་གཟུགས་ཀྱི་ལག་གཡས་ཞེ་སྡང་གི་རང་བཞིན་ལ་བཏབ་པས་ཞེ་སྡང་གནོད་སེམས་ཀྱི་རྟོག་པ་སྐད་ཅིག་ཀྱང་མི་གཡོ་ཞིང་བྱམས་པ་ཆེན་པོའི་ཏིང་འཛིན་རྒྱུད་ལ་ལྷང་གིས་སྐྱེས་པར་བསམ། མཉམ་ཉིད་ཡེ་ཤེས་ཀྱི་རང་གདངས་རིན་ཆེན་རིགས་ཀྱི་མཁའ་འགྲོ་མ་སེར་མོ་དགའ་སྤྲོ་དགྱེས་པའི་ཉམས་དང་ལྡན་པས་རིག་རྩལ་སྙིང་རྗེ་ཆེན་པོའི་ཕུར་བ་སེར་པོ་གྲུ་བཞིའི་རྣམ་པ་ཅན་ང་རྒྱལ་གྱི་རང་བཞིན་ལག་གཡོན་པར་བཏབ་པས་ང་རྒྱལ་རྒྱགས་པའི་རྟོག་པ་སྐད་ཅིག་ཀྱང་མི་གཡོ་ཞིང་སྙིང་རྗེ་ཆེན་པོའི་ཏིང་འཛིན་རྒྱུད་ལ་སྐྱེས་པར་བསམ། རང་རིག་སོར་རྟོག་ཡེ་ཤེས་ཀྱི་རང་གདངས་པདྨ་རིགས་ཀྱི་མཁའ་འགྲོ་མ་དམར་མོ་འཛུམ་ཆགས་བཞད་པའི་ཉམས་དང་ལྡན་པས་དགའ་བ་ཆེན་པོའི་རང་བཞིན་དབང་གི་ཕུར་པ་ཟླ་གམ་གྱི་རྣམ་པ་ཅན་འདོད་ཆགས་ཀྱི་རང་བཞིན་རྐང་པ་གཡོན་པར་བཏབ་པས་འདོད་ཆགས་ཞེན་པའི་རྟོག་པ་སྐད་ཅིག་ཀྱང་མི་གཡོ་ཞིང་དགའ་བ་ཆེན་པོའི་ཏིང་འཛིན་རྒྱུད་ལ་སྐྱེས་པར་བསམ། རང་རིག་བྱ་གྲུབ་ཡེ་ཤེས་རང་གདངས་ལས་ཀྱི་མཁའ་འགྲོ་མ་ལྗང་མོ་ཁྲོ་གཏུམ་འཁྲུགས་པའི་ཉམས་དང་ལྡན་པས་རིག་རྩལ་བཏང་སྙོམས་ཆེན་པོའི་རང་བཞིན་དྲག་པོའི་ཕུར་པ་ནག་པོ་གྲུ་གསུམ་གྱི་རྣམ་པར་ཕྲག་དོག་གི་རང་བཞིན་རྐང་པ་གཡས་པར་བཏབ་པས་ཕྲག་དོག་འགྲན་སེམས་ཀྱི་རྟོག་པ་སྐད་ཅིག་ཀྱང་མི་གཡོ་ཞིང་བཏང་སྙོམས་ཆེན་པོའི་ཏིང་འཛིན་རྒྱུད་ལ་སྐྱེས་པར་བསམ། རང་རིག་ཆོས་དབྱིངས་ཡེ་ཤེས་ཀྱི་རང་གདངས་སངས་རྒྱས་རིགས་ཀྱི་མཁའ་འགྲོ་མ་མཐིང་ག་དགའ་ཁྲོ་ཆགས་པའི་ཉམས་འགྱུར་རྫོགས་པའི་རིག་རྩལ་སྨོན་འཇུག་བྱང་ཆུབ་སེམས་ཀྱི་རང་བཞིན་ཕུར་བུ་ཆངས་ཟུང་ཟླུམ་པོ་རྒྱ་མདུད་གྲུ་བཞི་དབལ་ཁ་ཟླ་གམ་དབལ་རྩེ་གྲུ་གསུམ་སྟེ་ལས་བཞི་ལྷུན་གྲུབ་ཀྱི་རྣམ་པ་ཅན་གཏི་མུག་མ་རིག་པའི་རང་བཞིན་མགོ་བོར་བཏབ་པས་གཟུང་འཛིན་གྱི་དབང་གིས་ལུས་ངག་ཡིད་གསུམ་སྐད་ཅིག་ཀྱང་མི་གཡོ་ཞིང་བྱང་ཆུབ་སེམས་ཀྱི་ངང་དུ་ལྷན་གྱིས་གནས་པར་བསམས་ནས་ཕུར་གདབ་བྱའོ། །དེ་ལྟར་འཁྲུལ་གཟུགས་ལྷ་འདྲེར་སྣང་བ་གནས་རྟེན་དང་བཅས་པ་ཐམས་ཅད་ཡེ་ཤེས་ལྔའི་ཀློང་དུ་སྦྱངས་ནས། ཡུམ་ལྔའི་མཁའ་ཀློང་གི་རང་བཞིན་དུ་རྣམ་པར་དག་པའི་དབྱིངས་སུ་ཅོག་པུ་མཁའ་འགྲོའི་ཕོ་བྲང་བཅས་འཁོར་བ་མ་སྟོང་གི་བར་དུ་གནས་པར་བྱའོ་སྙམ་དུ་ཡང་ཡང་བསམ་ཞིང་མཐར་བདག་གནས་ལྷ་འདྲེ་བཅས་པ་གང་དུའང་མི་དམིགས་ཤིང་། རིག་སྟོང་སྤྲོས་པ་དང་བྲལ་བའི་ངང་དུ་ཡུམ་དོན་ཤེས་རབ་ཕར་ཕྱིན་གྱི་ཉམས་ལེན་ལས་སྐད་ཅིག་ཀྱང་མི་གཡེང་བས་བསྐྱང་བར་བྱའོ། །འདི་གཉིས་ཀ་ལ་བདག་གནས་ལྷ་འདྲེ་ཟིལ་གྱིས་གནོན་པ་གསུམ་ཀ་ཚང་ཡང་གཙོ་ཆེ་བའི་དབང་དུ་བྱས་ནས་བྲོ་བརྡུང་གིས་བདག་དང་གནས་ཟིལ་གྱིས་གནོན་པ་དང་ཕུར་གདབ་ཀྱིས་ལྷ་འདྲེ་ཟིལ་གྱིས་གནོན་པ་གཙོ་བོར་སྟོན་པས་ཟིལ་གནོན་སྐོར་གསུམ་ལོགས་ནས་བཙལ་མི་དགོས། དེ་ལྟར་ཟིལ་གནོན་གྱི་དམིགས་པ་ལ་བརྟེན་ནས་ལྷོང་དང་ཆོ་འཕྲུལ་རྣམས་ཁྲིད་གཞུང་ནས་བཤད་པ་ལྟར་བྱུང་བ་དང་། ཉམས་ལེན་ཕུང་པོ་ཟན་བསྐྱུར་དངོས་ལ་འཇུག་པ་སྟེ། དེ་ལ་ཡང་སྔོན་འགྲོ་དངོས་གཞི་རྗེས་གསུམ་ལས། དང་པོ་སྔོན་འགྲོ་ལ་བཞི་ལས་སྐྱབས་སུ་འགྲོ་བ་ནི། རང་ཉིད་ཐ་མལ་དུ་གནས་པའི་མདུན་གྱི་ནམ་མཁར་རྩ་བའི་བླ་མ་དེ་ཉིད་ཆོས་སྐུ་རྡོ་རྗེ་འཆང་ཆེན་པོའི་རྣམ་པར་བཞུགས་པའི་མཐའ་བསྐོར་དུ་རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུངས་བརྒྱུད་པའི་བླ་མ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་ཐམས་ཅད་ནམ་མཁའ་ལ་སྤྲིན་ཕུང་འཁྲིགས་པ་ལྟར་བཞུགས་པའི་དྲུང་དུ་རང་གི་འཁོར་དུ་གནས་གདོན་ལུས་གདོན་ལས་གདོན་གསུམ་གྱིས་ཐོག་དྲངས་རིགས་དྲུག་གི་སེམས་ཅན་ཐམས་ཅད་ཁྲོམ་འཚོགས་པ་ལྟར་ཚོགས་ནས་ལུས་ངག་ཡིད་གསུམ་ཆུན་གཅིག་དྲིལ་གྱིས་སྐྱབས་འགྲོ་བྱེད་པར་བསམ་ཞིང་སྐྱབས་འགྲོ་བྱ། གཉིས་པ་སེམས་བསྐྱེད་ནི། སྤྱིར་སྨོན་འཇུག་སོགས་ཀྱི་གོ་བ་ཁྲིད་གཞུང་ལྟར་ངེས་པར་བྱ་ཞིང་གསལ་འདེབས་དང་། ཁྱད་པར་རང་གཞན་སེམས་ཅན་ཐམས་ཅད་ཐོག་མ་མེད་པའི་དུས་ནས་ཕྱི་སྣང་བའི་ཡུལ་ལ་དངོས་པོ་བདེན་གྲུབ་ཏུ་ཞེན་ཏེ། དགག་སྒྲུབ་ཆགས་སྡང་གི་དབང་དུ་གྱུར་པས། དེ་ཉིད་རིག་པ་བརྟུལ་ཞུགས་ཀྱི་སྤྱོད་པས་ཚར་བཅད་ནས་ཡང་དག་པའི་གནས་ལུགས་རྟོགས་པར་བྱའོ་སྙམ་དུ་སེམས་བསྐྱེད། གསུམ་པ་མཎྜལ་ནི། གཞུང་གཞན་ནས་བེམ་རིག་ཕྲལ་ཏེ་པགས་པ་བཤུས་ནས་དབང་ཆེན་གསེར་གྱི་ས་གཞིར་བསྒོམ་པ་སོགས་རིམ་བཞིན་གསལ་འདེབས་པར་གསུངས་ཀྱང་། འདིར་བེམ་རིག་ཕྲལ་བ་མ་གསུངས་པ་ལུས་གཅེས་པར་འཛིན་མཁན་གྱི་སེམས་དེ་ཉིད་འབུལ་བ་པོར་བྱས་ནས་གཅེས་པར་བཟུང་རྒྱུའི་ལུས་ཡན་ལག་ཉིང་ལག་ལ་སོགས་པ་གླིང་བཞི་རི་རབ་ཉི་ཟླ་སོགས་བློས་བཏགས་ཏེ་གཅེས་འཛིན་དང་བྲལ་བས་ཚོགས་ཞིང་གི་ལྷ་ཚོགས་རྣམས་ལ་འབུལ་ཏེ་རྣམ་པ་གསལ་ཀྱང་ལེགས་ལ་མ་གསལ་ཀྱང་འདྲ། བཞི་པ་བླ་མའི་རྣལ་འབྱོར་ནི། རང་གཞན་སེམས་ཅན་ཐམས་ཅད་ཀྱི་མདུན་གྱི་ནམ་མཁར་རྩ་བརྒྱུད་བླ་མ་འདུས་པའི་རང་བཞིན་ཨོ་རྒྱན་རྡོ་རྗེ་འཆང་ཧེ་རུ་ཀའི་ཆོས་ཅན་དུ་གསལ་བ་ལ་བདག་གཞན་སེམས་ཅན་ཐམས་ཅད་མགྲིན་གཅིག་ཏུ་སྙིང་ཁོང་རུས་པའི་གཏིང་ནས་གསོལ་བ་གདབ། མཐར་རྩ་བའི་བླ་མའི་གསང་གསུམ་དང་རང་གི་སྒོ་གསུམ་དུ་མ་རོ་གཅིག་ཏུ་གྱུར་པར་བསམ་ལ་གནས་ལུགས་ཀྱི་ངང་ལ་མཉམ་པར་གཞག་གོ །དེ་ཡན་ཆད་སྔོན་འགྲོའི་རྣམ་པ་སོང་ནས། གཉིས་པ་དངོས་གཞི་བེམ་རིག་ཕྲལ་ནས་ཁྲོས་མར་བསྐྱེད་པ། མགྲོན་རྣམས་སྤྱན་འདྲེན་པ། འགྱེད་ཆེན་གསུམ་མམ་བཞི་བྱ་བའོ། །དང་པོ་རང་གི་ལུས་འདི་ཉིད་ཆེ་ལ་ཚོ་ཞིང་སྣུམ་ལ་གཞོན་ཞིང་ལང་ཚོ་མཛེས་པའི་སྙིང་གའི་དབུས་སུ་རང་སེམས་ཀྱི་ངོ་བོ་མ་ཅིག་ཁྲོས་མ་ནག་མོ་གར་སྟབས་ལིང་ངེ་བར་གསལ་བ་དེ་ཉིད་ཕཊཿཅེས་བརྗོད་པས་སྤྱི་བོ་ཚངས་པའི་བུ་ག་ནས་ནམ་མཁར་སྤར། དེའི་ཕྱག་གི་གྲི་གུག་གིས་རང་གི་སྨིན་མཚམས་ནས་བྲེགས་ཏེ་ཕྱག་གཡོན་པས་བླངས་ནས་ཐོད་པའི་སྒྱེད་པུ་རི་རབ་དང་མཉམ་པ་གསུམ་གྱི་སྟེང་དུ་བཀལ་བ་སྟོང་གསུམ་རྒྱ་ཁྱོན་དང་མཉམ་པར་གྱུར་པའི་ནང་དུ་རང་ལུས་རིམ་པ་བཞིན་གྲི་ཁུག་གིས་གཏུབས་ནས་བཅུག་པའི་འོག་ནས་རླུང་གཡོས་མེ་སྦར་ཤ་ཁྲག་རུས་གསུམ་བདུད་རྩིའི་རང་བཞིན་དུ་ཞུ་བར་ཨོཾ་ཨཱཿཧཱུྃ་གིས་བྱིན་གྱིས་བརླབ་པ་གཞུང་ལྟར་བྱ། གཉིས་པ་མགྲོན་འབོད་པ་ནི། རང་ཉིད་ཁྲོས་མའི་ཐུགས་ཀའི་འོད་ཟེར་གྱིས་བཀུག་ནས་ཡར་མཆོད་ཡུལ་དུ་གྱུར་པའི་བླ་མ་ཡི་དམ་མཁའ་འགྲོ་སངས་རྒྱས་བྱང་སེམས་ལ་སོགས་པ་ནས་བཟུང་སྟེ་མར་སྦྱིན་ཡུལ་དུ་གྱུར་པའི་ལྷ་འདྲེ་གདོན་བགེགས་ཡན་ཆད་གནམ་ས་བར་སྣང་ཐམས་ཅད་གང་བར་འདུས་པར་བསམ་ཞིང་། མཆོད་ཡུལ་དམ་ཅན་སོགས་བརྗོད། གསུམ་པ་འགྱེད་ཆེན་གྱི་དམིགས་པ་སྤྱིར་མགྲོན་རིགས་ཐམས་ཅད་ལ་དཀར་འགྱེད་དང་། ཁྲ་འགྱེད་གཉིས་བྱེད་པ་དང་། ཁྱད་པར་ཤ་ཁྲག་ཟ་བའི་རིགས་ལ་དམར་འགྱེད། གདོན་བགེགས་ལ་ནག་འགྱེད་བྱེད་པ་སོགས་དམིགས་པའི་རྣམ་གྲངས་རྣམས་ཤེས་པར་བྱ་ཞིང་། རང་གཞུང་འདོན་ཆ་དང་སྦྲགས་ནས་ཡར་མགྲོན་རྣམས་ལ་དཀར་འགྱེད་བདུད་རྩིའི་རང་བཞིན་དུ་སྩོལ་བ་དང་། མར་མགྲོན་ལྷ་འདྲེ་གདོན་བགེགས་འབྱུང་པོ་ཡི་དྭགས་སྲིན་པོ་སོགས་ལ་དམར་འགྱེད་ཤ་ཁྲག་རུས་གསུམ་སོགས་བསྔོ་བ་དང་། རིགས་དྲུག་གཞན་དང་བུ་ལོན་ལན་ཆགས་ཀྱི་བདག་པོ་རྣམས་ལ་ཁྲ་འགྱེད་གང་ལ་གང་འདོད་དུ་འདོད་རྒུའི་ཆར་འབེབས་པ་སོགས་ཡིན་ཏེ། དམིགས་པའི་རྣམ་གྲངས་ནི་གཅོད་གཞུང་རྣམས་དང་ཁྲིད་ཡིག་ལས་ཤེས་པར་བྱའོ། །གསུམ་པ་རྗེས་བསྔོ་བ་དང་སྨོན་ལམ་བྱ་བ་ནི། གཏོང་ལེན་གྱིས་བདག་གཞན་བརྗེ་བ་ཆོས་ཀྱི་སྦྱིན་པས་སྦྱིན་གཏོང་དོན་ཆེན་པོར་བྱེད་པ་སོགས་རྒྱལ་སྲས་སྤྱིའི་གཞུང་ལམ་ལྟར་ཉམས་སུ་བླང་བར་བྱའོ། །དེ་ལྟར་ཐུན་དྲུག་གམ་བཞི་ལ་སོགས་པར་ལུས་སྦྱིན་བྱ་ཞིང་གཙོ་བོར་ལུས་ལ་གཅེས་འཛིན་དང་། སེམས་ལ་བདག་འཛིན་གྱི་བློ་དྲུང་ནས་ཕྱུང་སྟེ་སུས་འདོད་པ་ཁྱེར། ཅི་ཡོང་བ་ཤོག་སྙམ་དུ་སྙེམ་བྱེད་བདག་གི་འཁྲི་བ་ཆོད་པའི་ལྟ་བའི་ངང་སྐྱོང་ཞིང་། སྟོང་ཉིད་སྙིང་རྗེ་དང་འབྲེལ་བའི་སྒོ་ནས་ཚད་མེད་བཞིའི་ཏིང་ངེ་འཛིན་ལ་གཙོ་བོར་འབད་པར་བྱའོ། །གཅོད་ནི་ཡུམ་དོན་ཤེས་རབ་ཕར་ཕྱིན་གྱི་དགོངས་པ་སྟོང་ཉིད་སྙིང་རྗེའི་སྙིང་པོ་ཅན་ལ་ཉམས་ལེན་གྱི་མཐིལ་དུ་བྱེད་པ་ཡིན་པས་གཙོ་བོར་སྙིང་རྗེ་ཆེན་པོའི་སྒོ་ནས་ཞི་དུལ་བག་ཡོད་དང་ལྡན་པས་ཉམས་སུ་བླང་ཞིང་། འབྲེལ་ཚད་དགེ་ལ་འགྱུར་ཏེ་ལྷ་འདྲེའི་འགྲོ་དོན་ནུས་པ་ཞིག་དགོས་ཀྱི། ཞེ་སྡང་གི་སྡང་མིག་གཡོ་བས་ལྷ་འདྲེ་བསྐྲད་བརྡུང་བྱེད་པ་ནི་གཅོད་ལོག་བདུད་དུ་སོང་ནས་ངན་སོང་དུ་འགྲོ་བ་མ་གཅིག་གི་ལུང་བསྟན་སོགས་ལས་ཤེས་པར་བྱ་ཞིང་། སྔོན་འགྲོའི་སྦྱང་པ་རྣམས་མཐར་ཕྱིན་པ་དང་། དངོས་གཞིའི་ཉམས་ལེན་གཉིས་ལ་མྱོང་བ་ཅུང་ཟད་ཀྱང་མ་སྐྱེས་ཤིང་སྙིང་རྗེ་ཆེན་པོའི་རྩིས་མ་ཟིན་པར་གཉན་ས་སོགས་འགྲིམ་སྔ་ན་ལྷ་འདྲེས་རྒྱུན་བརླམས་ནས་ལྟར་སྣང་གི་མངོན་ཤེས་ངག་ནུས་སོགས་འབྱུང་ཡང་ཤེས་རྒྱུད་ཆོས་དང་ཇེ་འགལ་དུ་འགྲོ་ཞིང་། འདི་སྣང་གི་གྲུབ་ཐོབ་ཆེན་པོ་དམྱལ་བའི་གྲོང་སྒོར་འོ་བརྒྱལ་ཆེ་བ་ཡང་ཤེས་དགོས་སོ། །དེས་ན་དུས་དང་རྣམ་པ་ཐམས་ཅད་དུ་བླ་མ་དཀོན་མཆོག་ལ་ཁྱེད་ཤེས་ཀྱི་དད་པ། འགྲོ་དྲུག་གི་སེམས་ཅན་ལ་བཅོས་མིན་གྱི་སྙིང་རྗེ། རེ་དོགས་ཀྱི་འཛིན་པ་ལ་རོ་སྙོམས་ཀྱི་གདུང་བརྡེག་བྱེད་པ་དང་མ་བྲལ་བའི་ངང་ནས་ཉམས་ལེན་ཕུང་པོ་གཟན་བསྐྱུར་ལ་འབད་ཅིང་། རྒྱལ་བའི་བཀའ་དང་འབྲེལ་བའི་ཆོས་སྦྱིན་དང་། འབྲེལ་ཚད་དགེ་ལ་འགོད་པའི་སྨོན་ལམ་གཉིས་ལ་ནན་ཏན་བྱེད་ཅིང་བདག་ལས་ལྷ་འདྲེ་གཅེས་པར་བཟུང་ནས་རང་གཞན་གཉིས་ཀའི་རྒྱུད་ཀྱི་དུག་ལྔ་ལ་གཅོད་པར་བྱེད་པ་ནི་རྒྱལ་བ་སྲས་བཅས་དགྱེས་པའི་གཅོད་ཡུལ་གྱི་ལམ་བཟང་མ་ནོར་བ་ཡིན་ནོ། །མཚུངས་མེད་དམ་པ་དུ་མའི་བཀའ་དྲིན་ལས། །དབང་ཐོབ་བདུད་རྩི་བཏུང་བས་སྙིང་སིམ་ཡང་། །ཉམས་མྱོང་ཟུངས་སུ་མ་ལོན་སྐལ་དམན་བདག །ཟབ་དོན་མན་ངག་འཆད་ལ་ཇི་ལྟར་དབང་། །དེ་ལྟ་ན་ཡང་སྙིགས་མའི་དུས་མཐའ་འདིར། །རྒྱལ་བ་དགྱེས་པའི་ལམ་ལ་རྒྱབ་ཕྱོགས་པའི། །དྲག་ཤུལ་བདུད་ཀྱིས་བརླམས་པའི་གཅོད་རྒན་ལས། །ཉམ་ཆུང་བདག་འདྲ་སྐལ་པ་བཟང་ངམ་སྙམ། །དེ་འདྲ་དེ་ཡང་བླ་མ་རྗེ་ཡི་དྲིན། །དྲིན་ལན་འཁོར་མཐའ་མེད་དོ་ཆོས་ཀྱི་རྗེ། །རྟག་ཏུ་མི་བརྗེད་དད་པའི་གདུང་ཤུགས་ཀྱིས། །ཡང་ཡང་གསོལ་བ་འདེབས་སོ་བྱིན་གྱིས་རློབས། །དེ་ལྟར་གཅོད་ཡུལ་མཁའ་འགྲོའི་གད་རྒྱངས་འདི་ཉིད་རང་གཞུང་ཞལ་གསལ་བ་དང་། ཁྱད་པར་དཔལ་གྲུབ་པའི་དབང་ཕྱུག་ལག་ན་རྡོ་རྗེ་དང་། སྲས་ཀྱི་ཐུ་བོ་ཨཱརྱ་དེ་བ་སྟེ་གྲུབ་རྗེ་ཡབ་སྲས་གཉིས་ཀྱི་གཞུང་ཁྲིད་རྣམ་བཤད་སོགས་དང་། ཁྱད་པར་དབང་སྡུད་ཟིལ་གནོན་སྐོར་རྒྱས་བསྡུས་ཀྱི་ཡི་གེ་གྲངས་མང་བ་བཅས་ན། ཡན་ལག་བརྒྱད་ལྡན་གྱི་མཚོ་འགྲམ་དུ། བ་ཚྭའི་ཁྲོན་པ་རྐོ་མ་དགོས་ཀྱང་སྐུལ་བ་པོའི་བཀའ་ཕེབས་ལྡོག་ཏུ་མ་ནུས་ནས་ཉམས་སུ་མ་ལོན་པའི་ཆོས་བཤད་འོན་པའི་རོལ་མོ་ལྟ་བུར་བྲིས་པའོ། །དགེའོ། །དགེའོ། །དགེའོ། །