JKW-KABUM-13-PA-023-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 13, sde tshan 23, Text 6, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 13: . Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

6 488-490	བྱད་གྲོལ་གསེར་གྱི་ལྡེ་མིག་གི་རྒྱུན་ཁྱེར་ཟབ་དོན་སྙིང་པོ། byad grol gser gyi lde mig gi rgyun khyer zab don snying po Daily Practice - rgyun khyer	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བྱད་གྲོལ་གསེར་གྱི་ལྡེ་མིག་གི་རྒྱུན་ཁྱེར་ཟབ་དོན་སྙིང་པོ། ༄༅། །བྱད་གྲོལ་གསེར་གྱི་ལྡེ་མིག་གི་རྒྱུན་ཁྱེར་ཟབ་དོན་སྙིང་པོ་བཞུགས། ན་མོ་གུ་རུ་བཛྲོཥྞཱིཥཱ་ཡ། སྐྱབས་སེམས་ནི། །བླ་མ་མཆོག་གསུམ་ཡི་དམ་ལྷར། གུས་པས་སྐྱབས་མཆི་མཁའ་མཉམ་འགྲོ། །བླ་མེད་བྱང་ཆུབ་མཆོག་ཐོབ་ཕྱིར། །རྡོ་རྗེ་གཙོ་འཁོར་བསྒོམ་པར་བགྱི། །ལན་གསུམ། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ཚད་མེད་བཞི་བསྒོམ། དངོས་གཞི་ནི། སྟོང་པའི་ངང་ལས་སྐད་ཅིག་གིས་རང་ཉིད་ཁྲོ་བོའི་རྒྱལ་པོ་རྡོ་རྗེ་གཙུག་ཏོར་དབུ་སྟོང་དང་ལྡན་པ། སྤྱན་བྱེ་བ་བརྒྱ་ཕྲག་འབུམ་གྱིས་མཚན་པ། ཕྱག་སྟོང་གིས་གཅོད་བྱེད་ཀྱི་རལ་གྲི་འབར་བ་བསྣམས་པ། མེ་དཔུང་འབར་བའི་དཀྱིལ་ན་བརྐྱང་བསྐུམ་གྱད་ཀྱི་རོལ་པས་བཞུགས་པ་ཁྲོ་བོའི་རྒྱན་ཐམས་ཅད་ཀྱིས་བརྒྱན་ཅིང་སྲིད་གསུམ་ཟིལ་གྱིས་གནོན་པའི་བདག་ཉིད་དུ་གསལ་བའི་སྤྱི་བོར་ཨོཾ་དཀར་པོ་ལས་རྣམ་པར་སྣང་མཛད། མགྲིན་པར་ཨཱཿདམར་པོ་ལས་སྣང་བ་མཐའ་ཡས། ཐུགས་ཀར་ཧཱུྃ་སྔོན་པོ་ལས་རྡོ་རྗེ་སེམས་དཔའ། ཡ་སོ་ཧཱུྃ་ལས་ཁྲོ་བོ་བཅུ། མ་སོ་ཧྲཱིཿལས་ཁྲོ་མོ་བཅུ། ལྕེ་རལ་གྲི་ངར་མ། སྨ་ར་མེ་དཔུང་འབར་བ། མགྲིན་པར་ཉི་མ་དང་ཟླ་བས་མཚན་པ། སྔགས་བཟླས་པ་ཙམ་གྱིས་སྐུའི་ཆ་ཐམས་ཅད་ལས་མེ་དཔུང་འབར་ཞིང་འཁྲུགས་པས་ལུས་ངག་ཡིད་གསུམ་ལ་གནོད་པའི་རིགས་ཐམས་ཅད་བྱ་སྒྲོ་མེས་བསྲེག་པ་བཞིན་ཐལ་བ་བུན་བུན་དུ་སོང་བར་གྱུར། སྤྲོ་ཞིང་ནུས་ན་གཟུངས་རིང་དང་། གང་ལྟར་ཡང་། ཏ་དྱ་ཐཱ། ཨོཾ་ཨ་ན་ལེ་ཨ་ན་ལེ༔ བྷི་ཤ་དྷེ་བྷི་ཤ་དྷེཿ བྷི་ར་བྷི་ར༔ བཛྲ་དྷཱ་ར་ཎིཿ བྷནྡྷ་བྷནྡྷ༔ བཛྲ་པཱ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱཿཧཱུྃ་དྲུཾ་བྷནྡྷ་ཕཊ་སྭཱ་ཧཱ༔ བདག་ཅག་འཁོར་དང་བཅས་ལ་རཀྵ་རཀྵ་སྭཱ་ཧཱ། ལུས་ངག་ཡིད་གསུམ་བཅིངས་པ་ཕྱེ་ཕྱེ་ཁྲོལ་ཁྲོལ༔ ཞེས་རྩ་སྔགས་ཅི་ནུས་དང་། མཐར། ཨོཾ་བཛྲ་ཀཱ་ཡ་གླིང་བཟློག༔ ལུས་བཅིངས་པ་ཕྱེ་ཕྱེ་ཁྲོལ་ཁྲོལཿ ཨོཾ་བཛྲ་ཧི་བཾ་གརྦྷ་ཡ་བཟློག༔ ངག་བཅིངས་པ་ཕྱེ་ཕྱེ་ཁྲོལ་ཁྲོལཿ ཨོཾ་བཛྲ་ཧི་ཀ་ནན་བཟློག༔ ཡིད་བཅིངས་པ་ཕྱེ་ཕྱེ་ཁྲོལ་ཁྲོལ༔ ལུས་ངག་ཡིད་གསུམ་བཅིངས་པ་ཐམས་ཅད་སརྦ་ཨ་པ་ན་ཡེ་སྭཱ་ཧཱ། ཞེས་སྐུ་གསུང་ཐུགས་ཀྱི་སྙིང་པོའི་བྱད་འགྲོལ་དང་། ཨོཾ་ཨཱཿཧཱུྃ། ཀཱ་ཡ་ཝཀྩིཏྟ་ཡཀྵ་བཛྲ་ཚིནྡྷ་ཙ་ཧ༔ ཤནྟིང་ཤནྟིང་ཤག་བྱེར༔ ཡར་ཡར་སྟྭཾ་བྷ་ཡ་བྱེརཿ མོ་ཧ་བྱེརཿ ཛི་བྷ་བྱེརཿ ཡར་བཟློག་བྷྱོ༔ ཞེས་བྱད་འགྲོལ་ཡང་སྙིང་རྣམས་ཀྱང་བཟླས་མཐར། བན་བོན་སྔགས་པའི་བསམ་སྦྱོར་ངན་པས་མནན་པ་དང་༔ བཅིངས་པ་དངཿ བསྡམས་པ་དངཿ གཟིར་བ་དངཿ བྱད་དུ་བཅུག་པ་ཐམས་ཅད་ཕྱེ་ཕྱེ་ཁྲོལ་ཁྲོལ་སྭཱ་ཧཱ༔ གནོད་པའི་རིགས་ཐམས་ཅད་ཞི་བ་ཤཱནྟི་ཀུ་རུ་ཡེ་སྭཱ་ཧཱ༔ ཕྱེ་ཕྱེ་ཁྲོལ་ཁྲོལཿ མི་མཐུན་པའི་ཕྱོགས་ཐམས་ཅད་སརྦ་ཨ་པ་ན་ཡེ་སྭཱ་ཧཱ༔ ཞེས་གཤམ་འདོགས་དང་བཅས་པའང་ཅུང་ཟད་བཟླས་ལ། ཚུལ་བཞིན་བསྒྲུབས་པའི་བུམ་ཆུ་ཡོད་ན་རང་གཞན་ལ་ཁྲུས་བྱ། རྗེས་བསྡུ་རིམ་ནི། རང་གི་ཐུགས་ཀ་ནས་འོད་ཟེར་འཕྲོས་པས་སྣང་ཆའི་ལྷ་སྐུ་འོད་གསལ་ཕྱག་རྒྱ་ཆེན་པོའི་དབྱིངས་སུ་ཐིམ་པར་བསམས་ལ་གནས་ལུགས་ཀྱི་ངང་དུ་མཉམ་པར་བཞག །ཐུན་མཚམས་ལ་འཇུག་པའི་ཚེ། སླར་ཡང་རང་སྐད་ཅིག་གིས་ཁྲོ་རྒྱལ་རྡོ་རྗེ་གཙུག་ཏོར་གྱི་སྐུར་གྱུར། །དགེ་བ་འདི་ཡིས་མྱུར་དུ་བདག །རྡོ་རྗེ་གཙུག་ཏོར་འགྲུབ་གྱུར་ནས། སོགས་བསྔོ་སྨོན་ཤིས་བརྗོད་ཇི་ལྟར་རིགས་པ་བྱའོ། །ཞེས་པའང་གཏེར་གཞུང་རྩ་བའི་དགོངས་པ་བརྒྱུད་ལྡན་བླ་མའི་ཞལ་ལུང་ལྟར་སྙིང་པོར་དྲིལ་བ་དགེ། །། ༈

[edit]

byad grol gser gyi lde mig gi rgyun khyer zab don snying po/ @#/_/byad grol gser gyi lde mig gi rgyun khyer zab don snying po bzhugs/__na mo gu ru badz+roSh+NIShA ya/__skyabs sems ni/__/bla ma mchog gsum yi dam lhar/__gus pas skyabs mchi mkha' mnyam 'gro/__/bla med byang chub mchog thob phyir/__/rdo rje gtso 'khor bsgom par bgyi/__/lan gsum/__/sems can bde dang ldan gyur cig__/sdug bsngal kun dang bral bar shog__/bde dang rtag tu mi 'bral zhing /__/chos kun mnyam nyid rtogs par shog__/ces tshad med bzhi bsgom/__dngos gzhi ni/__stong pa'i ngang las skad cig gis rang nyid khro bo'i rgyal po rdo rje gtsug tor dbu stong dang ldan pa/__spyan bye ba brgya phrag 'bum gyis mtshan pa/__phyag stong gis gcod byed kyi ral gri 'bar ba bsnams pa/__me dpung 'bar ba'i dkyil na brkyang bskum gyad kyi rol pas bzhugs pa khro bo'i rgyan thams cad kyis brgyan cing srid gsum zil gyis gnon pa'i bdag nyid du gsal ba'i spyi bor oM dkar po las rnam par snang mdzad/__mgrin par AHdmar po las snang ba mtha' yas/__thugs kar hU~M sngon po las rdo rje sems dpa'/__ya so hU~M las khro bo bcu/__ma so hrIHlas khro mo bcu/__lce ral gri ngar ma/__sma ra me dpung 'bar ba/__mgrin par nyi ma dang zla bas mtshan pa/__sngags bzlas pa tsam gyis sku'i cha thams cad las me dpung 'bar zhing 'khrugs pas lus ngag yid gsum la gnod pa'i rigs thams cad bya sgro mes bsreg pa bzhin thal ba bun bun du song bar gyur/__spro zhing nus na gzungs ring dang /__gang ltar yang /__ta d+ya thA/__oM a na le a na le:__b+hi sha d+he b+hi sha d+heH__b+hi ra b+hi ra:__badz+ra d+hA ra NiH__b+han+d+ha b+han+d+ha:__badz+ra pA Ni hU~M hU~M phaT phaT swA hAHhU~M druM b+han+d+ha phaT swA hA:__bdag cag 'khor dang bcas la rak+Sha rak+Sha swA hA/__lus ngag yid gsum bcings pa phye phye khrol khrol:__zhes rtsa sngags ci nus dang /__mthar/__oM badz+ra kA ya gling bzlog:__lus bcings pa phye phye khrol khrolaH__oM badz+ra hi baM gar+b+ha ya bzlog:__ngag bcings pa phye phye khrol khrolaH__oM badz+ra hi ka nan bzlog:__yid bcings pa phye phye khrol khrol:__lus ngag yid gsum bcings pa thams cad sarba a pa na ye swA hA/__zhes sku gsung thugs kyi snying po'i byad 'grol dang /__oM AHhU~M/__kA ya wak+tsit+ta yak+Sha badz+ra tshin+d+ha tsa ha:__shan+ting shan+ting shag byer:__yar yar s+t+waM b+ha ya byeraH__mo ha byeraH__dzi b+ha byeraH__yar bzlog b+h+yo:__zhes byad 'grol yang snying rnams kyang bzlas mthar/__ban bon sngags pa'i bsam sbyor ngan pas mnan pa dang :__bcings pa dngaH__bsdams pa dngaH__gzir ba dngaH__byad du bcug pa thams cad phye phye khrol khrol swA hA:__gnod pa'i rigs thams cad zhi ba shAn+ti ku ru ye swA hA:__phye phye khrol khrolaH__mi mthun pa'i phyogs thams cad sarba a pa na ye swA hA:__zhes gsham 'dogs dang bcas pa'ang cung zad bzlas la/__tshul bzhin bsgrubs pa'i bum chu yod na rang gzhan la khrus bya/__rjes bsdu rim ni/__rang gi thugs ka nas 'od zer 'phros pas snang cha'i lha sku 'od gsal phyag rgya chen po'i dbyings su thim par bsams la gnas lugs kyi ngang du mnyam par bzhag__/thun mtshams la 'jug pa'i tshe/__slar yang rang skad cig gis khro rgyal rdo rje gtsug tor gyi skur gyur/__/dge ba 'di yis myur du bdag__/rdo rje gtsug tor 'grub gyur nas/__sogs bsngo smon shis brjod ji ltar rigs pa bya'o/__/zhes pa'ang gter gzhung rtsa ba'i dgongs pa brgyud ldan bla ma'i zhal lung ltar snying por dril ba dge/___//__!