ཞལ་གསུངས་རྣམ་ཐར་མདོར་བསྡུས་གཞན་བསྐུལ་ངོར་གནང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gsungs rnam thar mdor bsdus gzhan bskul ngor gnang ba
Location	dil mgo mkhyen brtse bka' 'bum Volume 23, Text 2, Pages 195-206 (Folios 1a to 6b5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Zhal gsungs rnam thar mdor bsdus gzhan bskul ngor gnang ba. In Skyabs rje dil mgo mkhyen brtse rin po che'i bka' 'bum, Vol. 23: 195-206. Delhi: Shechen Publications, 1994.
Genre	Biographies - Hagiography - rnam thar

Tibetan Text

Wylie

[edit]

༄༅། །ཞལ་གསུངས་རྣམ་ཐར་མདོར་བསྡུས་གཞན་བསྐུལ་ངོར་གནང་བ་བཞུགས།

༄༅། །ཁོ་བོ་སྐྱེས་པའི་ཡུལ་ནི་བོད་ཆེན་པོ་ཡི་ལྗོངས་མདོ་སྨད་ཆུ་བཞི་སྒང་དྲུག་ལས་ལྷོ་ཟླ་ཟལ་མོའི་སྒང༌། གསེར་གྱི་དཔལ་དང་ལྡན་པའམ་ཆུ་བོ་གསེར་ལྡན་གྱི་འགྲམ་ཡིན་པས་ལྡན་མ། འབྲོག་གནས་མཆེད་ལྔའི་ནང་གསེས་ཇོ་བོ་སྒྱོགས་ཆེན་གདོང་རས་སྲུང་བ། འཕགས་ཡུལ་གྱི་པཎ་ཆེན་གྲུབ་པའི་དབང་པོ་ཤྲཱི་སྨྲྀ་ཏི་ཛྙཱ་ནས་ཞབས་ཀྱིས་བཅགས་ཤིང༌། ཆོས་མངོན་པ་སོགས་འཆད་ཉན་མཛད་དེ་ཐ་མའི་མཛད་པ་བསྟན་པའི་སྐུ་གདུང་རིན་པོ་ཆེ་ད་ལྟའི་བར་བཞུགས། མཐའ་འདུལ་གྱི་གཙུག་ལག་ཁང་གླང་ཐང་སྒྲོལ་མ་བཞུགས་པའི་གནས། ས་སྐྱའི་འགྲོ་མགོན་ཆོས་རྒྱལ་འཕགས་པ་ཧོར་ཡུལ་ཕེབས་སྐབས་ཡར་མར་གཉིས་ཀར་ཕེབས། ངོར་ཆེན་རྡོ་རྗེ་འཆང་གི་དངོས་སློབ་མངའ་རིས་ཚུལ་ཁྲིམས་འོད་ཟེར་གྱིས་རབ་སྲམ་དགོན་པ་བཏབ། རས་རལ་དགོན་སོགས་འབྲི་གུང༌། རྗེ་རིན་པོ་ཆེའི་སློབ་མ་དགོན་ཐོག་བླ་མ་སྟོང་དཔོན་རསྨི་དྷྭ་ཛས་བཏབ་པའི་ལྡེང་དགོན་སོགས་དགེ་ལུགས། ཀརྨ་པ་ཆོས་གྲགས་རྒྱ་མཚེས་བཏབ་པའི་མེ་ལོང་དགོན་སོགས་བཀའ་བརྒྱུད་ཀྱི་དགོན་པ་རྣམས་ཡོད་ཅིང༌། འབྲི་གུང་སྐྱོབ་པ་འཇིག་རྟེན་གསུམ་མགོན། སངས་རྒྱས་མཉན་པ་གྲུབ་ཆེན། མི་འགྱུར་ནམ་མཁའི་རྡོ་རྗེ་སོགས་སྐྱེས་ཆེན་དམ་པ་བཅུ་ཕྲག་ལྷག་ཙམ་འཁྲུངས་པའི་གནས་སུ་ལྷ་རིགས་སྨྱོས་ཀྱི་གདུང་བརྒྱུད་དུ་གྲགས་པའི་སྦྱིན་བདག་སྡེ་དགེའི་གཉེར་ཆེན་དིལ་མགོ་ཞེས་པའི་ཁྱིམ་དུ་རབ་བྱུང་བཅོ་ལྔ་པའི་ཐུན་མོང་ཞེས་པ་ལྕགས་ཁྱི་ལོར་ནག་ཟླའི་ཚེས་ ༡༥་ ནས་འཇམ་པའི་དབྱངས་དངོས་མི་ཕམ་རིན་པོ་ཆེས་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོའིབསྡུས་རྒྱུད་ཀྱི་འགྲེལ་ཆེན་གྱི་བཤད་ཁྲིད་མཛད་པའི་དགའ་སྟོན་གྱི་ཚོགས་འཁོར་ཟླ་བ་བཞི་པའི་ཚེས་སུམ་ཅུ་ལ་མཛད་པའི་ཟླ་བ་གྲོ་བཞིན་གྱི་འགྲུབ་སྦྱོར་ཉིན་སྐྱེས། མ་ཡི་འོ་མ་ཁར་མ་མིད་པའི་སྔ་ལོག་ཏུ་ལྕེ་ལ་ཧྲཱི་དྷཱིས་གདབ་པ་དང༌། འཇམ་དབྱངས་དང་དབྱངས་ཅན་རིལ་བུ་རྣམས་བསྩལ། སྐྱེས་ནས་ཟླ་བ་གཅིག་ཙམ་གྱི་ཚེ་འཇམ་དགོན་མི་ཕམ་རིན་པོ་ཆེའི་གསེར་ཞལ་མཇལ་ཞིང་རྣམ་སྨེའི་བྱབས་ཁྲུས། གླུད། ཚེ་འགུགས་བཅས་མཛད་ཅིང༌། མིང་བཀྲ་ཤིས་དཔལ་འབྱོར་དུ་བསྩལ། དེ་ནས་ཆུ་བྱི་ས་ག་ཟླ་བའི་ཚེས་ ༢༩ ལ་སྐུ་གཤེགས་ཀྱི་བར་འཇམ་དཔལ་རིལ་བུ་བདུད་རྩི་ཆོས་སྨན་མ་ཆད་པར་བསྩལ། བྱིན་རླབས་དང་བཀའ་བསྒོ་སོགས་དུས་དང་དུས་སུ་བསྩལ་ཞིང་ཁྱད་པར་སྐུ་མྱ་ངན་ལས་འདའ་ཁར་ཐུགས་དམ་རྟེན་འཇམ་དཔལ་ཡེ་ཤེས་སེམས་དཔའི་སྐུ་ཡིས་རྡོ་རྗེ་གསུམ་གྱི་བྱིན་རླབས་བསྩལ། རང་དང་ཕ་མ་སྤུན་སྲིང་ཐམས་ཅད་བྱང་ཆུབ་སྙིང་པོའི་བར་སྨོན་ལམ་གྱིས་རྗེས་སུ་འཛིན་པའི་ཞལ་བཞེས་བསྩལ་བའི་བཀའ་དྲིན་བསམ་ལས་འདས། དེ་ནས་རིམ་གྱིས་འབྲི་ཀློག་བསླབ་ཅིང༌། ལོ་གྲངས་བཅུའི་སྟེང་ཞུགས་ཀྱིས་ལུས་འཚིག་སྟེ་ཟླ་བ་དྲུག་ཙམ་དུ་ནད་ཀྱིས་མནར་བས་རྐྱེན་དབང་དགེ་བའི་བསྐུལ་མར་གྱུར་སྟེ་ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་ལས་དགེ་ཚུལ་གྱི་སྡོམ་པ་ནོད། མིང་འགྱུར་མེད་བསླབ་གསུམ་རྒྱན་མཚན་དང༌། དབུ་མ་ལུགས་དང༌། རྒྱ་ཆེན་སྤྱོད་བརྒྱུད་སེམས་བསྐྱེད་ཀྱི་སྡོམ་པ་བསྩལ། མིང་རྒྱལ་སྲས་ཆོས་ཀྱི་མྱུ་གུ །སྔ་འགྱུར་བཀའ་མ་སྒྱུ་འཕྲུལ་ཞི་ཁྲོ། ཚོགས་ཆེན་འདུས་པ། དོང་སྤྲུགས། ཡང་དག་སོགས་དང༌། གཏེར་མ་སྒྲུབ་ཐབས་འདོད་འཇོ་བུམ་བཟང་ཡོངས་རྫོགས། སྨིན་གླིང་རྡོར་སེམས། ཉང་གཏེར་བཀའ་བརྒྱད་བདེ་འདུས་དོན་དབང་པདྨ་ཤེལ་ཕུག །གུ་རུ་ཆོས་དབང་ཕུར་པ་ཡང་གསང་སྤུ་གྲི། རཏ་གླིང་ཚེ་སྒྲུབ་གསང་འདུས། སྨིན་གཏེར་ཐུགས་རྗེ་ཆེན་པོ་བདེ་གཤེགས་ཀུན་འདུས། སྙིང་ཐིག་ཡ་བཞིའི་དབང་ལུང་ཁྲིད་བཅས། འཇམ་མགོན་མི་ཕམ་རིན་པོ་ཆེའི་བཀའ་འབུམ་ཡོངས་རྫོགས་ཀྱི་ལུང༌། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་གདམས་ངག་རིན་པོ་ཆེའི་མཛོད་བཅས་དང༌། དེའི་རྗེས་འཕྲེར་ཕྲན་བུ་འཇམ་དབྱངས་མཁྱེན་བརྩེ་རིན་པོ་ཆེའི་ཐུགས་ཀྱི་སྤྲུལ་པར་དབུག་དབྱུངས། མིང་འགྱུར་མེད་ཐེག་མཆོག་བསྟེན་པའི་རྒྱལ་མཚན་དུ་གནང༌། རྫོགས་ཆེན་མཁན་རིན་པོ་ཆེ་པདྨ་བློ་གསལ་ལས་ཀློང་ཆེན་སྙིང་ཐིགས་རྩ་པོད་གཉིས་ཀྱི་དབང་ལུང་ཁྲིད་བཅས་ཐོབ། རང་གྲོལ་སྐོར་གསུམ་གྱི་ཁྲིད་ལུང་ཡང་ནོད། རྫ་མུ་ར་པདྨ་བདེ་ཆེན་བཟང་པོ་ལས་དཀར་གླིང་ཞི་ཁྲོའི་རྫོགས་རིམ་བར་དོ་དྲུག་ཁྲིད་ཐོབ། ཨ་འཛོམ་འབྲུག་པ་རིན་པོ་ཆེ་སྣ་ཚོགས་རང་གྲོལ་ལས་སྙིང་ཐིག་སྔོན་འགྲོའི་ཟབ་ཁྲིད་ཀྱང་ནོད། དཔལ་སྤུང་དབུ་མཛད་བསྟན་འཛིན་རྡོ་རྗེ་ལས་སུམ་རྟགས། དག་ཡིག །སྙན་ངག་ལེའུ་གསུམ། སྒྲ་ཀ་ལ་པ། དབྱངས་ཅན་སྒྲ་མདོ་བཅས་བསླབ། མཁན་གཞན་དགའ་རིན་པོ་ཆེ་ལས་སྤྱོད་འཇུག །དབུ་མ་འཇུག་པ། དབུ་མ་རྩ་ཤེས། རིག་ཚོགས་ལྔ། བཞི་བརྒྱ་པ་རྣམས་དང༌། ལྕང་མ་མཁན་ཐུབ་བསྟན་ཆོས་འཕེལ་ལས་བྱམས་ཆོས་སྡེ་ལྔ། ཁྱད་པར་སྒྱུ་འཕྲུལ་གསང་བ་སྙིང་པོའི་འགྲེལ་པ་ཕྱོགས་བཅུ་མུན་སེལ་གྱི་ཞིབ་ཁྲིད་ཟླ་བ་དྲུག་གི་བར་ཚར་གསུམ། དགེ་མང་མཁན་ཐེག་མཆོག་ལས་གསང་དག་ཞལ་ལུང༌། དགོངས་རྒྱན། རབ་འབྱམས་ཨོ་རྒྱན་ཆོས་གྲགས་ཀྱི་ཟུར་རྒྱན། རོང་ཟོམ་ལོ་ཙཱའི་དཀོན་མཆོག་འགྲེལ། མཁན་རིག་འཛིན་འོད་ཟེར་ལས་ཡོན་ཏན་རིན་པོ་ཆེའི་མཛོད་རྩ་འགྲེལ། གཅེན་སངས་རྒྱས་མཉན་པ་ལས་སྡོམ་གསུམ་རྣམ་ངེས་མཁན་གུ་ཎའི་མཆན་འགྲེལ། མངོན་པ་མཛོད་ལི་ཐང་ཀརྨ་ངེས་དོན་གྱི་འགྲེལ་བའི་བཤད་ལུང་བཅས་ཐོབ། རྫོང་སར་མཁྱེན་བརྩེ་རིན་པོ་ཆེ་ཆོས་ཀྱི་བློ་གྲོས་ལས་སྔ་འགྱུར་བཀའ་མ་ཡོངས་རྫོགས་ཀྱི་དབང་ལུང་ཁྲིད་བཅས། རིན་ཆེན་གཏེར་མཛོད་ཆེན་པོའི་དབང་ལུང་ཁྲིད་བཅས། སྒྲུབ་ཐབས་རིན་པོ་ཆེ་ཀུན་བཏུས་ཀྱི་དབང་ལུང་ཁྲིད་བཅས། ས་སྐྱའི་ལམ་འབྲས་སློབ་བཤད་ཀྱི་དབང་ཁྲིད་ཡོངས་རྫོགས། ངོར་ལུགས་དཀྱིལ་འཁོར་བདུན་གྱི་དབང་ཆེན། ཞྭ་ལུ་ལུགས་དང་ཇོ་ལུགས་ཀྱི་དུས་འཁོར་དབང་ཆེན་གཉིས། དགྱེས་པ་རྡོ་རྗེའི་བརྟགས་གཉིས་རྔོག་ལུགས་ཀྱི་འགྲེལ་པ་རྔོག་ཞེ་སྡང་རྡོ་རྗེའི་འགྲེལ་པ། དྭགས་པོ་བཀྲ་ཤིས་རྣམ་རྒྱལ་གྱི་བརྟགས་གཉིས་ཀྱི་རྒྱས་འགྲེལ་ཉི་མའི་འོད་ཟེར། འཇམ་མགོན་ཀོང་སྤྲུལ་རིན་པོ་ཆེའི་སྤྱི་དོན་དང༌། འགྲེལ་པ། ས་ལུགས་ཀྱི་སྤྱི་ལྗོན་བརྟགས་གསུམ་གྱི་འགྲེལ་པ། སྤྱི་དོན་བཅས་ཞིབ་རྒྱས། ཀོང་སྤྲུལ་རིན་པོ་ཆེའི་ཤེས་བྱ་ཀུན་ཁྱབ་ཀྱི་རྩ་བའི་བཤད་ཁྲིད། སྙིང་ཐིག་ཡ་བཞི་ཆ་ཚང་བ། ཀློང་སྙིང་པོད་གཉིས་ཀྱི་དབང་ལུང་ཁྲིད། བླ་མ་དགོངས་འདུས་དབང་ཆེན་དང༌། བཀའ་བརྒྱད་བདེ་འདུས་དབང་ཆེན། གཏེར་ཆེན་མཆོག་གླིང་གི་ཆོས་སྐོར་ཡོངས་རྫོགས་ཀྱི་དབང་ལུང་ཁྲིད་བཅས། རྩེ་ལེ་སྣ་ཚོགས་རང་གྲོལ་གྱི་བཀའ་འབུམ་པོད་ལྔའི་ལུང༌། རྗེ་རིན་པོ་ཆེའི་ལམ་རིམ་ཆེན་པོའི་བཤད་ཁྲིད། དགེ་བའི་བཤེས་གཉེན་ཀརྨ་ལྷུན་གྲུབ་ལས་རྒྱལ་བའི་བཀའ་འགྱུར་རིན་པོ་ཆེ་ཡོངས་རྫོགས་ཀྱི་ལུང༌། འཇམ་མགོན་ཀོང་སྤྲུལ་རིན་པོ་ཆེའི་བཀའ་འབུམ་ཡོངས་རྫོགས་བསྟན་བཅོས་ཆེན་པོ་ཤེས་བྱ་ཀུན་ཁྱབ་རྩ་འགྲེལ་ཡོངས་རྫོགས་ཀྱི་ལུང༌། འཇའ་ཚོན་པོད་དྲུག་གི་ལུང༌། གནམ་ཆོས་པོད་ ༡༣ སྤྱི་ལུགས་སྟག་ཤམ་གཏེར་བྱོན་གུ་རུ་རིན་པོ་ཆེ་དང༌། མཚོ་རྒྱལ་རྣམ་ཐར་གྱི་ལུང༌། ཟུར་མང་གཏེར་སྟོན་རོལ་པའི་རྡོ་རྗེའི་མཆོག་སྤྲུལ་ལྔ་པ་ལས་གཏེར་ཆེན་རོལ་རྡོར་གྱི་གཏེར་ཆོས་ཡོངས་རྫོགས་ཀྱི་དབང་ལུང༌། བདེ་མཆོག་མཁའ་འགྲོ་སྙན་བརྒྱུད་ཀྱི་དབང་ཆེན་ཐམས་ཅད། ཟུར་མང་རྟོགས་ལྡན་ཚེ་བརྟན་ལས་ཇོ་ནང་རྗེ་བཙུན་གྱི་བཀའ་འབུམ་ཡོངས་རྫོགས། བླ་བྲོ་ནོར་བུ་སྤྲུལ་སྐུ་ལས་བཀའ་བརྒྱུད་སྔགས་མཛོད་ཀྱི་དབང་ལུང་ཡོངས་རྫོགས། བན་ཆེན་མཁན་པོ་བཟོད་པ་རབ་བརྟན་ལས་དཔལ་སྤྲུལ་རིན་པོ་ཆེའི་བཀའ་འབུམ་ཡོངས་རྫོགས་དང༌། དགེ་མང་མཁན་ཡོན་ཏན་རྒྱ་མཚོས་མཛད་པའི་ཡོན་ཏན་མཛོད་ཀྱི་འགྲེལ་ཆེན་པོད་གཉིས་སོགས་དང༌། རྒྱལ་དབང་ཀརྨ་པའི་སྤྱན་སྔ་ནས་བཀའ་བརྒྱུད་སྔགས་མཛོད་པོད་གསུམ་དང༌། གདམས་ངག་མཛོད་ཀྱི་དབང་ལུང་བཅས་དང༌། ཞེ་ཆེན་མཁན་པོ་བསྟན་འཛིན་དར་རྒྱས་ལས་ཀུན་མཁྱེན་འཇིགས་མེད་གླིང་པའི་བཀའ་འབུམ་པོད་དགུ །ཞེ་ཆེན་ཀོང་སྤྲུལ་རིན་པོ་ཆེ་ལས་སྨིན་གླིང་གཏེར་ཆེན་རིན་པོ་ཆེའི་བཀའ་འབུམ་པོད་བཅུ་གསུམ། སྨིན་གླིང་ལོ་ཆེན་རིན་པོ་ཆེའི་སྡོམ་གསུམ་རྣམ་ངེས་འགྲེལ་པ་དཔག་བསམ་སྙེ་མའི་བཤད་ཁྲིད། ཞེ་ཆེན་འཇམ་དབྱངས་བློ་གསལ་ལས་རྒྱལ་ཚབ་རིན་པོ་ཆེའི་བཀའ་འབུམ་པོད་བཅུ་གསུམ་གྱི་ལུང༌། དྲུང་རྣམ་རྒྱལ་རིན་པོ་ཆེ་ལས་བདེ་མཆོག་མཁའ་འགྲོ་སྙན་བརྒྱུད་ཀྱི་དབང་ཁྲིད་ལུང་བཅས། དྭགས་པོའི་ཐར་རྒྱན་གྱི་ཁྲིད་ལུང༌། རྡོ་གྲུབ་ཆེན་ཐུབ་བསྟན་ཕྲིན་ལས་དཔལ་བཟང་ལས་འཇིགས་མེད་བསྟན་པའི་ཉི་མའི་བཀའ་འབུམ་ལུང་ཡོངས་རྫོགས། ཞར་མགོ་འཇམ་དབྱངས་གྲགས་པ་ལས་ཀློང་ཆེན་མཛོད་བདུན། ངལ་བསོ་སྐོར་གསུམ་གྱི་ལུང༌། སྐྱབས་རྗེ་བདུད་འཇོམས་རིན་པོ་ཆེ་ལས་དགོངས་གཏེར་ཕུར་པའི་དབང་ལུང་སོགས་གཏེར་གསར་དུ་མ་དང༌། མདོ་སྨད་པིས་མདོ་མཁན་ཆེན་བློ་བཟང་བསྟན་འཛིན་རྒྱལ་མཚན་ལས་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་དབང་ཆེན་འགྲེལ་པ་བཞི་སྦྲགས་ཀྱི་བཤད་ལུང༌། དྲིལ་བུ་ལུགས་ཀྱི་བདེ་མཆོག་དབང་ཆེན། རྗེ་རིན་པོ་ཆེའི་འགྲེལ་པ་སྦས་དོན་ཀུན་གསལ་གྱི་ཁྲིད་ལུང་གིས་མཚོན་རིས་མེད་པའི་སྐྱེས་ཆེན་དམ་པ་བདུན་བཅུ་ལྷག་ལས་ཆོས་ཀྱི་བདུད་རྩི་རྒྱ་ཆེར་བཀའ་དྲིན་ཐོབ། འབྲུག་མཁན་ཆེན་འཇམ་དབྱངས་ཡེ་ཤེས་སེང་གེ་ལས་རྡོ་རྗེ་གླིང་པའི་ཆོས་སྐོར་གྱི་དབང་ལུང་ཐོབ་པས། རང་ལོ་བཅོ་བརྒྱད་སྐོར་ནས་དབེན་པའི་གནས་སུ་སྒྲུབ་པ་ལོ་གྲངས་བཅུ་གཉིས་ལས་མི་ཉུང་བར་བྱས་ཏེ་བཀའ་དགོངས་ཕུར་གསུམ། སྨིན་གླིང་གཏེར་ཆོས་ཕལ་ཆེར། ཀློང་ཆེན་སྙིང་ཐིག་རྩ་གསུམ་སྤྱི་བྱེ་བྲག །མཁྱེན་བརྩེ་རིན་པོ་ཆེ་དང༌། མཆོག་གླིང་ཆོས་སྐོར་གནད་གལ་གང་ཟབ། མི་ཕམ་རིན་པོ་ཆེའི་འཇམ་དཔལ་ཞི་དྲག་སོགས་ཀྱི་བསྒོམ་བཟླས་ལ་ཅི་ནུས་སུ་འབད་པ་དང༌། གཤིན་གསོན་གྱི་དཀོར་རྫས་ཆུད་མི་གསོན་པའི་ཆེད། སྨིན་གཏེར་རྡོར་སེམས། རྡོར་སེམས་མངོན་དགའ། གཏེར་ཆེན་མཆོག་གླིང་གི་སྔགས་གསོ། བཀའ་བརྒྱད་བདེ་འདུས། བཀའ་འདུས་ཆོས་ཀྱི་རྒྱ་མཚོ། བླ་མའི་ཐུགས་སྒྲུབ་བར་ཆད་ཀུན་སེལ། ཟབ་བདུན་ཕུར་པ། ཀློང་ཆེན་སྙིང་ཐིག་གི་དཔལ་ཆེན་འདུས་པ་སོགས་ཀྱི་སྒྲུབ་ཆེན་ལན་དུ་མ་ཚོགས་པ་དང༌། མཆོད་མེ་འབུམ་ཕྲག་ཁ་ཤས་སོགས་བསག་སྦྱོང་ཅི་རིགས་དང༌། རིན་ཆེན་གཏེར་མཛོད་ལན་གསུམ། གདམས་ངག་རིན་པོ་ཆེའི་མཛོད་ལན་གསུམ། བཀའ་བརྒྱུད་སྔགས་མཛོད་ལན་གཅིག །རྒྱལ་བའི་བཀའ་འགྱུར་རིན་པོ་ཆེ་ལན་གཅིག །ཀོང་སྤྲུལ་རིན་པོ་ཆེའི་བཀའ་འབུམ་དང་མི་ཕམ་རིན་པོ་ཆེའི་བཀའ་འབུམ་གཉིས་ལན་གཉིས་རེ། དཔལ་སྤྲུལ་བཀའ་འབུམ་ལན་གཅིག །སྙིང་ཐིག་ཡ་བཞི་དང༌། ཀློང་ཆེན་སྙིང་ཐིག་གི་དབང་ལུང་ཁྲིད་བཅས་ལན་གྲངས་བཅུ་ལྷག་ཙམ། སྒྲུབ་ཐབས་ཀུན་བཏུས་ཚར་གཅིག་སོགས་འཆད་ཁུལ་བགྱིས་པ་སྟེ་ད་ལྟ་རང་ལོ་དྲུག་བཅུ་རྩ་བཞི་མ་སླེབ་བར་གྱི་ལེགས་བྱས་ཀྱི་ཕྱོགས་རགས་རིམ་བྲིས་ཏེ་ཕུལ་བ་ལགས།

[edit]

!_zhal gsungs rnam thar mdor bsdus gzhan bskul ngor gnang ba bzhugs/ kho bo skyes pa'i yul ni bod chen po yi ljongs mdo smad chu bzhi sgang drug las lho zla zal mo'i sgang*/_gser gyi dpal dang ldan pa'am chu bo gser ldan gyi 'gram yin pas ldan ma/_'brog gnas mched lnga'i nang gses jo bo sgyogs chen gdong ras srung ba/_'phags yul gyi paN chen grub pa'i dbang po shrI smr-i ti dz+nyA nas zhabs kyis bcags shing*/_chos mngon pa sogs 'chad nyan mdzad de tha ma'i mdzad pa bstan pa'i sku gdung rin po che da lta'i bar bzhugs/_mtha' 'dul gyi gtsug lag khang glang thang sgrol ma bzhugs pa'i gnas/_sa skya'i 'gro mgon chos rgyal 'phags pa hor yul phebs skabs yar mar gnyis kar phebs/_ngor chen rdo rje 'chang gi dngos slob mnga' ris tshul khrims 'od zer gyis rab sram dgon pa btab/_ras ral dgon sogs 'bri gung*/_rje rin po che'i slob ma dgon thog bla ma stong dpon rasmi d+h+wa dzas btab pa'i ldeng dgon sogs dge lugs/_karma pa chos grags rgya mtshes btab pa'i me long dgon sogs bka' brgyud kyi dgon pa rnams yod cing*/_'bri gung skyob pa 'jig rten gsum mgon/_sangs rgyas mnyan pa grub chen/_mi 'gyur nam mkha'i rdo rje sogs skyes chen dam pa bcu phrag lhag tsam 'khrungs pa'i gnas su lha rigs smyos kyi gdung brgyud du grags pa'i sbyin bdag sde dge'i gnyer chen dil mgo zhes pa'i khyim du rab byung bco lnga pa'i thun mong zhes pa lcags khyi lor nag zla'i tshes _15 _nas 'jam pa'i dbyangs dngos mi pham rin po ches rgyud kyi rgyal po dpal dus kyi 'khor lo'ibasdus rgyud kyi 'grel chen gyi bshad khrid mdzad pa'i dga' ston gyi tshogs 'khor zla ba bzhi pa'i tshes sum cu la mdzad pa'i zla ba gro bzhin gyi 'grub sbyor nyin skyes/_ma yi 'o ma khar ma mid pa'i snga log tu lce la hrI d+hIs gdab pa dang*/_'jam dbyangs dang dbyangs can ril bu rnams bstsal/_skyes nas zla ba gcig tsam gyi tshe 'jam dgon mi pham rin po che'i gser zhal mjal zhing rnam sme'i byabs khrus/_glud/_tshe 'gugs bcas mdzad cing*/_ming bkra shis dpal 'byor du bstsal/_de nas chu byi sa ga zla ba'i tshes _29_la sku gshegs kyi bar 'jam dpal ril bu bdud rtsi chos sman ma chad par bstsal/_byin rlabs dang bka' bsgo sogs dus dang dus su bstsal zhing khyad par sku mya ngan las 'da' khar thugs dam rten 'jam dpal ye shes sems dpa'i sku yis rdo rje gsum gyi byin rlabs bstsal/_rang dang pha ma spun sring thams cad byang chub snying po'i bar smon lam gyis rjes su 'dzin pa'i zhal bzhes bstsal ba'i bka' drin bsam las 'das/_de nas rim gyis 'bri klog bslab cing*/_lo grangs bcu'i steng zhugs kyis lus 'tshig ste zla ba drug tsam du nad kyis mnar bas rkyen dbang dge ba'i bskul mar gyur ste zhe chen rgyal tshab rin po che 'gyur med pad+ma rnam rgyal las dge tshul gyi sdom pa nod/_ming 'gyur med bslab gsum rgyan mtshan dang*/_dbu ma lugs dang*/_rgya chen spyod brgyud sems bskyed kyi sdom pa bstsal/_ming rgyal sras chos kyi myu gu_/snga 'gyur bka' ma sgyu 'phrul zhi khro/_tshogs chen 'dus pa/_dong sprugs/_yang dag sogs dang*/_gter ma sgrub thabs 'dod 'jo bum bzang yongs rdzogs/_smin gling rdor sems/_nyang gter bka' brgyad bde 'dus don dbang pad+ma shel phug_/gu ru chos dbang phur pa yang gsang spu gri/_rata gling tshe sgrub gsang 'dus/_smin gter thugs rje chen po bde gshegs kun 'dus/_snying thig ya bzhi'i dbang lung khrid bcas/_'jam mgon mi pham rin po che'i bka' 'bum yongs rdzogs kyi lung*/_sgrub brgyud shing rta chen po brgyad kyi gdams ngag rin po che'i mdzod bcas dang*/_de'i rjes 'phrer phran bu 'jam dbyangs mkhyen brtse rin po che'i thugs kyi sprul par dbug dbyungs/_ming 'gyur med theg mchog bsten pa'i rgyal mtshan du gnang*/_rdzogs chen mkhan rin po che pad+ma blo gsal las klong chen snying thigs rtsa pod gnyis kyi dbang lung khrid bcas thob/_rang grol skor gsum gyi khrid lung yang nod/_rdza mu ra pad+ma bde chen bzang po las dkar gling zhi khro'i rdzogs rim bar do drug khrid thob/_a 'dzom 'brug pa rin po che sna tshogs rang grol las snying thig sngon 'gro'i zab khrid kyang nod/_dpal spung dbu mdzad bstan 'dzin rdo rje las sum rtags/_dag yig_/snyan ngag le'u gsum/_sgra ka la pa/_dbyangs can sgra mdo bcas bslab/_mkhan gzhan dga' rin po che las spyod 'jug_/dbu ma 'jug pa/_dbu ma rtsa shes/_rig tshogs lnga/_bzhi brgya pa rnams dang*/_lcang ma mkhan thub bstan chos 'phel las byams chos sde lnga/_khyad par sgyu 'phrul gsang ba snying po'i 'grel pa phyogs bcu mun sel gyi zhib khrid zla ba drug gi bar tshar gsum/_dge mang mkhan theg mchog las gsang dag zhal lung*/_dgongs rgyan/_rab 'byams o rgyan chos grags kyi zur rgyan/_rong zom lo tsA'i dkon mchog 'grel/_mkhan rig 'dzin 'od zer las yon tan rin po che'i mdzod rtsa 'grel/_gcen sangs rgyas mnyan pa las sdom gsum rnam nges mkhan gu Na'i mchan 'grel/_mngon pa mdzod li thang karma nges don gyi 'grel ba'i bshad lung bcas thob/_rdzong sar mkhyen brtse rin po che chos kyi blo gros las snga 'gyur bka' ma yongs rdzogs kyi dbang lung khrid bcas/_rin chen gter mdzod chen po'i dbang lung khrid bcas/_sgrub thabs rin po che kun btus kyi dbang lung khrid bcas/_sa skya'i lam 'bras slob bshad kyi dbang khrid yongs rdzogs/_ngor lugs dkyil 'khor bdun gyi dbang chen/_zhwa lu lugs dang jo lugs kyi dus 'khor dbang chen gnyis/_dgyes pa rdo rje'i brtags gnyis rngog lugs kyi 'grel pa rngog zhe sdang rdo rje'i 'grel pa/_dwags po bkra shis rnam rgyal gyi brtags gnyis kyi rgyas 'grel nyi ma'i 'od zer/_'jam mgon kong sprul rin po che'i spyi don dang*/_'grel pa/_sa lugs kyi spyi ljon brtags gsum gyi 'grel pa/_spyi don bcas zhib rgyas/_kong sprul rin po che'i shes bya kun khyab kyi rtsa ba'i bshad khrid/_snying thig ya bzhi cha tshang ba/_klong snying pod gnyis kyi dbang lung khrid/_bla ma dgongs 'dus dbang chen dang*/_bka' brgyad bde 'dus dbang chen/_gter chen mchog gling gi chos skor yongs rdzogs kyi dbang lung khrid bcas/_rtse le sna tshogs rang grol gyi bka' 'bum pod lnga'i lung*/_rje rin po che'i lam rim chen po'i bshad khrid/_dge ba'i bshes gnyen karma lhun grub las rgyal ba'i bka' 'gyur rin po che yongs rdzogs kyi lung*/_'jam mgon kong sprul rin po che'i bka' 'bum yongs rdzogs bstan bcos chen po shes bya kun khyab rtsa 'grel yongs rdzogs kyi lung*/_'ja' tshon pod drug gi lung*/_gnam chos pod _13_spyi lugs stag sham gter byon gu ru rin po che dang*/_mtsho rgyal rnam thar gyi lung*/_zur mang gter ston rol pa'i rdo rje'i mchog sprul lnga pa las gter chen rol rdor gyi gter chos yongs rdzogs kyi dbang lung*/_bde mchog mkha' 'gro snyan brgyud kyi dbang chen thams cad/_zur mang rtogs ldan tshe brtan las jo nang rje btsun gyi bka' 'bum yongs rdzogs/_bla bro nor bu sprul sku las bka' brgyud sngags mdzod kyi dbang lung yongs rdzogs/_ban chen mkhan po bzod pa rab brtan las dpal sprul rin po che'i bka' 'bum yongs rdzogs dang*/_dge mang mkhan yon tan rgya mtshos mdzad pa'i yon tan mdzod kyi 'grel chen pod gnyis sogs dang*/_rgyal dbang karma pa'i spyan snga nas bka' brgyud sngags mdzod pod gsum dang*/_gdams ngag mdzod kyi dbang lung bcas dang*/_zhe chen mkhan po bstan 'dzin dar rgyas las kun mkhyen 'jigs med gling pa'i bka' 'bum pod dgu_/zhe chen kong sprul rin po che las smin gling gter chen rin po che'i bka' 'bum pod bcu gsum/_smin gling lo chen rin po che'i sdom gsum rnam nges 'grel pa dpag bsam snye ma'i bshad khrid/_zhe chen 'jam dbyangs blo gsal las rgyal tshab rin po che'i bka' 'bum pod bcu gsum gyi lung*/_drung rnam rgyal rin po che las bde mchog mkha' 'gro snyan brgyud kyi dbang khrid lung bcas/_dwags po'i thar rgyan gyi khrid lung*/_rdo grub chen thub bstan phrin las dpal bzang las 'jigs med bstan pa'i nyi ma'i bka' 'bum lung yongs rdzogs/_zhar mgo 'jam dbyangs grags pa las klong chen mdzod bdun/_ngal bso skor gsum gyi lung*/_skyabs rje bdud 'joms rin po che las dgongs gter phur pa'i dbang lung sogs gter gsar du ma dang*/_mdo smad pis mdo mkhan chen blo bzang bstan 'dzin rgyal mtshan las rgyud kyi rgyal po dpal gsang ba 'dus pa'i dbang chen 'grel pa bzhi sbrags kyi bshad lung*/_dril bu lugs kyi bde mchog dbang chen/_rje rin po che'i 'grel pa sbas don kun gsal gyi khrid lung gis mtshon ris med pa'i skyes chen dam pa bdun bcu lhag las chos kyi bdud rtsi rgya cher bka' drin thob/_'brug mkhan chen 'jam dbyangs ye shes seng ge las rdo rje gling pa'i chos skor gyi dbang lung thob pas/_rang lo bco brgyad skor nas dben pa'i gnas su sgrub pa lo grangs bcu gnyis las mi nyung bar byas te bka' dgongs phur gsum/_smin gling gter chos phal cher/_klong chen snying thig rtsa gsum spyi bye brag_/mkhyen brtse rin po che dang*/_mchog gling chos skor gnad gal gang zab/_mi pham rin po che'i 'jam dpal zhi drag sogs kyi bsgom bzlas la ci nus su 'bad pa dang*/_gshin gson gyi dkor rdzas chud mi gson pa'i ched/_smin gter rdor sems/_rdor sems mngon dga'/_gter chen mchog gling gi sngags gso/_bka' brgyad bde 'dus/_bka' 'dus chos kyi rgya mtsho/_bla ma'i thugs sgrub bar chad kun sel/_zab bdun phur pa/_klong chen snying thig gi dpal chen 'dus pa sogs kyi sgrub chen lan du ma tshogs pa dang*/_mchod me 'bum phrag kha shas sogs bsag sbyong ci rigs dang*/_rin chen gter mdzod lan gsum/_gdams ngag rin po che'i mdzod lan gsum/_bka' brgyud sngags mdzod lan gcig_/rgyal ba'i bka' 'gyur rin po che lan gcig_/kong sprul rin po che'i bka' 'bum dang mi pham rin po che'i bka' 'bum gnyis lan gnyis re/_dpal sprul bka' 'bum lan gcig_/snying thig ya bzhi dang*/_klong chen snying thig gi dbang lung khrid bcas lan grangs bcu lhag tsam/_sgrub thabs kun btus tshar gcig sogs 'chad khul bgyis pa ste da lta rang lo drug bcu rtsa bzhi ma sleb bar gyi legs byas kyi phyogs rags rim bris te phul ba lags/