DKR-KABUM-17-TSA-033

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 17, Text 33, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	ས་ར་ཧ་ (Saraha)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 17: . Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	གྲུབ་ཐོབ་ཆེན་པོ་ས་ར་ཧའི་ཐུགས་སྒྲུབ་ (rgrub thob chen po sa ra ha'i thugs sgrub)

Tibetan Text

Wylie

[edit]

༄༅། །གྲུབ་ཐོབ་ཆེན་པོ་ས་ར་ཧའི་ཐུགས་སྒྲུབ་ཀྱི་སྨིན་གྲོལ་ཆིག་རྫོགས་སུ་འབོག་ཚུལ་འོད་གསལ་སྣང་བ་བཞུགས།། ༄༅། །ན་མོ་གུ་རུ་མ་ཧཱ་མུ་དྲ་ཡེ། གཙང་མའི་གནས་སུ་མཎྜལ་པདྨ་འདབ་བརྒྱད་ཀྱི་ལྟེ་བར་འབྲུའི་ཚོམ་བུ་གཅིག་བཀོད་པའི་སྟེང༌། བུམ་པ་མགུལ་ཆིངས་དཀར་པོ་ཅན་སོ་ལྔའི་རྫས་ཀྱིས་གཏམས་པ། ཐོད་ཆང་བདུད་རྩི་རིལ་བུ་དང་དངར་གསུམ་སྦྱར་བ། རིག་ཙཀ །བླ་གཏོར་རྒྱན་ལྡན་རྣམས་ལ་ཉེར་སྤྱོད་ཀྱིས་བསྐོར་བ་དང༌། ཚོགས་ཀྱི་དམ་རྫས་བཅས་འདུ་བྱ། སྒྲུབ་པ་པོའི་མདུན་དུ་འཐོར་ནས། ཌཱ་མ་རུ། རྡོར་དྲིལ། ནང་མཆོད་བཅས་འདུ་བྱས་ལ། ངེས་འབྱུང་དང་དད་མོས་དང༌། ཁྱད་པར་བདེ་སྟོང་ཕྱག་རྒྱ་ཆེན་པོའི་དགོངས་པ་ལས་མི་གཡོ་བའི་ངང་ནས། སྐྱབས་སེམས་ནི། ན་མོ༔ བླ་མ་སངས་རྒྱས་རིན་པོ་ཆེ༔ སྐྱབས་གནས་རྒྱ་མཚོའི་ཡེ་ཤེས་སྐུ༔ མཁྱེན་བརྩེ་ནུས་པའི་བདག་ཉིད་ལ༔ མི་ཕྱེད་དད་པས་སྐྱབས་སུ་མཆི༔ ལན་གསུམ། ཧོ༔ ནམ་མཁའ་མཉམ་པའི་སེམས་ཅན་རྣམས༔ མེད་སྣང་འཁོར་བའི་ཆོས་ལ་ཞེན༔ སྡུག་བསྔལ་མཚོ་ལས་བསྒྲལ་བའི་ཕྱིར༔ བྱང་ཆུབ་སྒྲུབ་པར་སེམས་བསྐྱེད་དོ༔ ལན་གསུམ། གནས་ཡོ་བྱིན་བརླབ་ནི། ཧཱུྃ་ཧྲཱིཿ སྣང་སྲིད་ཀུན་བཟང་རོལ་བའི་ཞིང༔ རྡོ་རྗེ་བདེ་བ་ཆེན་པོའི་དལ༔ ཟག་མེད་མཆོད་པའི་སྤྲིན་ཆེན་པོ༔ རང་བཞིན་ཉིད་དུ་ལྷུན་གྱིས་གྲུབ༔ ཨོཾ་ཛྙཱན་སརྦ་པཱུ་ཛ་ཨརྒྷཾ་ནས་ཤབྡ་ཨཱཿཧཱུྃ༔ དངོས་གཞི་རྟེན་བསྐྱེད་ནི། ཨཿ སྣང་སྲིད་བླ་མའི་དཀྱིལ་འཁོར་ཏེ༔ གདོད་ནས་དག་པ་ཆེན་པོའི་ཀློང༔ འོད་གསལ་རྒྱུན་མི་ཆད་པ་ཡི༔ སྣང་ཆ་སྐུ་དང་ཡེ་ཤེས་ཤར༔ ཚོགས་བརྒྱད་བསྒྲལ་བའི་དུར་ཁྲོད་ཆེ༔ ངོ་མཚར་རང་སྣང་དཔལ་གྱི་རི༔ ལྷུན་གྲུབ་ནགས་ཚལ་མེ་ཏོག་རྒྱས༔ ཡན་ལག་བརྒྱད་པའི་ཆུ་རྒྱུན་འབབ༔ དབུས་སུ་རྟོག་མེད་རོ་ཡི་སྟེང༔ སྟོང་ཉིད་ནམ་མཁའི་རྣལ་འབྱོར་པ༔ བྲམ་ཟེ་ཆེན་པོ་སྔོ་སངས་བརྗིད༔ གཅེར་བུ་ཡེ་ཤེས་གཟི་བྱིན་འབར༔ རབ་དཀར་དབུ་སྐྲའི་ཐོར་ཚུགས་ཅན༔ སྨ་ར་སྨིན་མ་སེ་ཁྱུག་གེ༔ ཞི་བའི་ལྟ་སྟངས་མི་གཡོ་བས༔ ཕྱག་གཉིས་མདའ་རྣོན་གསོར་ཞིང་བསྒྲིལ༔ ཞབས་ཟུང་ཕྱེད་པའི་སྐྱིལ་ཀྲུང་ཅན༔ རུས་པའི་ཕྱག་རྒྱ་ལྔ་ཡིས་བརྒྱན༔ གཡས་གཡོན་གསང་བ་ཡེ་ཤེས་དང༔ སྒྲོལ་མཛད་དཔའ་མོ་ཌཱ་ཀི་ཟུང༔ གཅེར་བུ་དར་གྱི་ཨང་རག་ཅན༔ རུས་པའི་ཕྱག་རྒྱ་ལྔ་ཡིས་བརྒྱན༔ གཞོན་ནུའི་ལང་ཚོ་རྒྱས་པའི་ཉམས༔ བདུད་རྩིའི་བྷནྡྷ་ཡབ་ལ་སྟོབ༔ འཛུམ་བཞད་རོལ་པའི་སྟབས་སུ་འཁོད༔ གཞན་ཡང་སངས་རྒྱས་བྱང་ཆུབ་སེམས༔ རབ་འབྱམས་དཔའ་བོ་རྣལ་འབྱོར་མ༔ རྒྱུད་སྡེ་དྲུག་གི་ཡི་དམ་ལྷ༔ གྲུབ་ཐོབ་ཕོ་མོ་བརྒྱད་ཅུ་བཞི༔ རྡུལ་གཅིག་སྟེང་ན་རྡུལ་ཇི་སྙེད༔ ཡེ་ཤེས་གཅིག་གི་རོལ་པ་ལས༔ རྣམ་འགྱུར་ཆ་ལུགས་མ་ངེས་པ༔ གང་འདུལ་སྒྱུ་མའི་གར་དུ་སྟོན༔ སྤྱན་འདྲེན་མཆོད་བསྟོད་གཞུང་དུ་མེད་ཀྱང་གསང་བ་གཞན་དང་སྒོ་བསྟུན་ན་གདུང་ཤུགས་སྤོས་རོལ་དབྱངས་དང་བཅས་ཏེ། དབྱིངས་བདེ་གསལ་མི་རྟོགས་གྲོང་ཁྱེར་ནས། །རྗེ་རྡོ་རྗེ་འཆང་ཆེན་འགྲོ་བའི་མགོན། །དེ་རང་ངོར་སྣང་བ་སྐྱབས་ཀྱི་གཙོ། །ཕ་དྲིན་ཆེན་རྩ་བའི་བླ་མ་ཉིད། །ཡུལ་དབུས་གྱུར་མ་ག་དྷ་ཡི་ལྷོ། །ལྗོངས་དཔལ་གྱི་རི་ཡི་ནགས་ཀླུང་དུ། །རྗེ་བྲམ་ཟེ་ཆེན་པོ་ས་ར་ཧ། །ཕོ་རྟོགས་ཤིང་གྲོལ་བ་བརྒྱད་ཅུ་དང༌། །མོ་རྟོགས་ཤིང་གྲོལ་བའི་སྲིང་མོ་བཞི། །ཡབ་ཧེ་རུ་ཀ་དཔལ་རྒྱུད་སྡེ་བཞི། །ཡུམ་གནས་གསུམ་མཁའ་འགྲོ་བཀའ་སྲུང་ཚོགས། །ཁྱེད་རྣམ་འཕྲུལ་མཁའ་ལ་སྤྲིན་བཞིན་གཏིབས། །བདག་མོས་པའི་གནས་འདིར་གཤེགས་སུ་གསོལ། །གནས་ཁང་འདི་རུ་བྱིན་ཕོབ་ལ། །འདིར་འདུས་རྣལ་འབྱོར་བདག་ཅག་ལ། །མཆོག་དང་ཐུན་མོང་དངོས་གྲུབ་སྩོལ། །ཨོཾ་མ་ཧཱ་གུ་རུ་ཙ་ཏུ་རཱ་ཤཱི་ཏི་སིདྡྷི་ལབྡྷ་ཛྙཱ་ན་ཨ་བེ་ཤ་ཡ་ཨ་ཨ། ཞེས་པས་སྤྱན་དྲང་པ་ཉིད། །གྲུབ་པ་ཆེན་པོའི་ཡེ་ཤེས་སྐུ། །མཁའ་ལྟར་ཁྱབ་ཀྱང་དག་པའི་ངོར། །ཆུ་ཟླ་བཞིན་དུ་མངོན་སྣང་བས། །དགྱེས་ཤིང་བརྟན་པར་བཞུགས་སུ་གསོལ། །ཨོཾ་པདྨ་ཨཱ་ས་ན་སྟྭྃ། །ཡོན་ཏན་ཀུན་གྱི་གཏེར་གྱུར་པས། །གང་གི་མཚན་ཙམ་དྲན་པས་ཀྱང༌། །བདག་བློའི་རྒུད་པ་ཞི་མཛད་པ། །གྲུབ་པའི་དབང་ཕྱུག་ཁྱོད་ཕྱག་འཚལ། །གུ་རུ་ན་མོ་ཧཱུྃ། དྲི་མེད་ཡིད་འོང་ལྷ་ཡི་རྫས། །རྡོ་རྗེའི་འདོད་ཡོན་བསམ་མི་ཁྱབ། །བདེ་བ་ཆེན་པོའི་ལོངས་སྤྱོད་སྤྲིན། །གྲུབ་པའི་དབང་ཕྱུག་མཉེས་ཕྱིར་འབུལ། །ཨོཾ་ཨཱཿཧྲཱི་པྲ་ཝ་ར་སཏྐ་རཾ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ། བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །སྒྲོན་མ་ལྔ་ཡི་བཟའ་བ་ནི། །སངས་རྒྱས་ཀུན་གྱི་དམ་ཚིག་གཙོ། །གྲུབ་པ་ཆེན་པོའི་རྣལ་འབྱོར་དབང༌། །འབུལ་ལོ་དངོས་གྲུབ་དགའ་སྟོན་སྩོལ། །པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། སྙོམས་འཇུག་འཕོ་མེད་བདེ་ཆེན་ཐོབ། །རང་བཞིན་སྣང་བ་ཡོངས་དག་པ། །ཞུ་བདེའི་ཁམས་གསུམ་ཀུན་ཁྱབ་པ། །གསང་བའི་མཆོད་པས་མཉེས་པར་བགྱི། །ཨ་ནུ་རཀྟོ་མ་ཧཱ་སུ་ཁ་ཧོ། །འོད་གསལ་བསམ་མི་ཁྱབ་པའི་དབྱིངས། །མཆོད་པའི་བྱ་བྱེད་ཐམས་ཅད་ཀྱང༌། །ཡེ་ཤེས་གཅིག་གི་རོལ་མོ་སྟེ། །སྤྲོས་བྲལ་བདེ་བ་ཆེན་པོས་མཆོད། །དྷརྨ་དྷཱ་ཏུ་པཱུ་ཛ་ཧོ། བསྟོད་པ་ནི། གུ་རུ་ན་མོ་ཧཱུྃ། སྙིང་རྗེ་ཆེན་པོ་སེམས་ཆེན་པོ། །དམིགས་པ་ཆེན་པོ་བློ་ཆེན་པོ། །གོ་ཆ་ཆེན་པོ་མཚོན་ཆེན་པོ། །དཔའ་ཆེན་ཁྱོད་ལ་ཕྱག་འཚལ་བསྟོད། །དད་པ་ཆེན་པོ་གུས་ཆེན་པོ། །དམ་ཚིག་ཆེན་པོ་བརྟུལ་ཞུགས་ཆེ། །བརྩོན་འགྲུས་ཆེན་པོ་སྟོབས་ཆེན་པོ། །སྐྱེས་མཆོག་ཁྱོད་ལ་ཕྱག་འཚལ་བསྟོད། །ཤེས་རབ་ཆེན་པོ་ཐབས་ཆེན་པོ། །བདེ་བ་ཆེན་པོ་གསལ་བ་ཆེ། །སྟོང་པ་ཆེན་པོ་རྒྱ་ཆེན་པོ། །ཐུབ་ཆེན་ཁྱོད་ལ་ཕྱག་འཚལ་བསྟོད། །ཐེག་པ་ཆེན་པོ་ས་ཆེན་པོ། །ལམ་ཆེན་ཡེ་ཤེས་ཆེན་པོ་སྟེ། །ཡོན་ཏན་ཆེན་པོ་སྙན་གྲགས་ཆེ། །བདག་ཆེན་ཁྱོད་ལ་ཕྱག་འཚལ་བསྟོད། །ཞིང་ཁམས་ཆེན་པོ་སྣང་བ་ཆེ། །རྫུ་འཕྲུལ་ཆེན་པོ་གདུལ་བྱ་ཆེ། །བྱིན་རླབས་ཆེན་པོ་དོན་ཆེན་པོ། །སྐྱབས་ཆེན་ཁྱོད་ལ་ཕྱག་འཚལ་བསྟོད། །སྐུ་ཆེན་གཟི་བརྗིད་ཆེན་པོ་པ། །གསུང་དབྱངས་ཆེན་པོ་དགོད་པ་ཆེ། །མཁྱེན་པ་ཆེན་པོ་མཐུ་སྟོབས་ཆེ། །དཔའ་ཆེན་ཁྱོད་ལ་ཕྱག་འཚལ་བསྟོད། །བྲམ་ཟེའི་རིགས་ལས་གཉིས་རྟོག་ཆོད། །ཕྱག་རྒྱ་ཆེན་པོ་མཐར་ཐུག་རྟོགས། །དངོས་གྲུབ་མཆོག་བརྙེས་ས་ར་ཧ། །རྣལ་འབྱོར་དབང་ཕྱུག་ཞབས་ལ་འདུད། །བཟླས་པ་ལ་གསོལ་འདེབས་ཀྱི་ཚུལ་དུ། དཔལ་སངས་རྒྱས་ཐམས་ཅད་འདུས་པའི་སྐུ༔ རྗེ་བྲམ་ཟེ་ཆེན་པོ་ས་ར་ཧ༔ ཁྱེད་འོད་གསལ་དབུ་མའི་ཕོ་བྲང་ནས༔ དབྱིངས་ཆོས་སྐུའི་རྒྱལ་ས་ཟིན་ལགས་ཀྱང༔ བུ་མ་རྟོགས་འཁོར་བར་འཁྱམས་པའི་ཚེ༔ དོན་ཡིན་ལུགས་འཁྲུལ་པའི་སྣང་བས་བསྒྲིབས༔ གནད་འོད་གསལ་མ་རྟོགས་འཁོར་བར་འཁྱམས༔ རྗེ་ཁྱེད་ལས་རེ་ས་མ་མཆིས་པས༔ ཕ་ཐུགས་རྗེ་ཅན་གྱི་བླ་མ་ལ༔ ཡིད་གདུང་བས་འབོད་དོ་བཀའ་དྲིན་ཅན༔ སྟན་འདི་རུ་མཆོག་གི་དངོས་གྲུབ་སྩོལ༔ རྒྱུད་སྨིན་གྲོལ་མཛོད་ཅིག་གྲུབ་པའི་རྗེ༔ ཞེས་མོས་གུས་རྩེ་གཅིག་པས། ཨོཾ་ཨཱཿམ་ཧཱ་གུ་རུ་ས་ར་ཧ་ཛྙཱ་ན་སིདྡྷི་ཧཱུྃ། ཞེས་ཐུགས་ཡིད་བསྲེས་ཏེ་བཟླ། མན་ངག་གི་བཟླས་པ་སྤྲོ་ན། རྣལ་འབྱོར་དབང་ཕྱུག་ཐུགས་དབུས་སུ༔ ཡེ་ཤེས་སེམས་དཔའ་སྤྱན་རས་གཟིགས༔ སེམས་ཉིད་ངལ་གསོ་ཟླ་བའི་མདངས༔ ཕྱག་གཉིས་མཆོག་སྦྱིན་པད་དཀར་བསྣམས༔ སེམས་སྐྱིལ་པད་ཟླའི་སྟེང་ན་བཞུགས༔ ཐུགས་དབུས་ཉི་ཟླའི་གྭའུའི་སྦུབས༔ ཧྲཱིཿལ་ཡི་གེ་དྲུག་པས་བསྐོར༔ དེ་ལས་བྱུང་བའི་འོད་ཟེར་ཕྲེང༔ སྟོན་ཀའི་ཟླ་བ་ལྟ་བུ་འཕྲོས༔ སྲས་བཅས་རྒྱལ་བའི་ཐུགས་རྗེ་བསྐུལ༔ མཁའ་ཁྱབ་འགྲོ་བ་ཀུན་ལ་ཁྱབ༔ ལས་ཉོན་སྡུག་བསྔལ་མུན་པ་བསལ༔ ཀུན་ཀྱང་འཕགས་པའི་སྐུར་གྱུར་ཏེ༔ གསུང་མཆོག་ཆོས་ཀྱི་སྒྲ་དབྱངས་ཀྱིས༔ འཇིག་རྟེན་ཀུན་ཁྱབ་སྣང་སྲིད་ཀུན༔ འཕགས་པའི་སྐུ་གསུང་ཐུགས་མཆོག་གི༔ བདེ་ཆེན་ཡེ་ཤེས་རོལ་པ་ཡི༔ ཕྱག་རྒྱ་ཆེན་པོའི་དབྱིངས་སུ་སད༔ ཨོཾ་མ་ཎི་པདྨེ་ཧཱུྃ་ཧྲཱིཿ ཞེས་ཅི་ནུས་སུ་བཟླའོ། །རྗེས་ཚོགས་མཆོད་བྱ་བར་འདོད་ན་ཐབས་ཤེས་ཀྱི་རྫས་བྱིན་གྱིས་བརླབ་པ་ནི། བསང་སྦྱང༌། མ་དག་དྲི་སྦྱངས་ཡེ་ཤེས་བྷནྡྷའི་ནང༌། །ཚོགས་རྫས་དམ་ཡེ་དབྱེར་མེད་བདུད་རྩིའི་མཚོ། །འདོད་ཡོན་རྣམ་པ་དཔག་མེད་འཆར་བ་ཡི། །བླ་མེད་བླ་མའི་དཀྱིལ་འཁོར་མཉེས་བྱེད་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ། གནས་འོག་མིན་ཆོས་དབྱིངས་ཕོ་བྲང་ནས། །རིགས་ཀུན་གྱི་ཁྱབ་བདག་རྡོ་རྗེ་འཆང༌། །ཐབས་སྙིང་རྗེས་གང་འདུལ་སྐུར་བཞེངས་ནས། །འབྲས་ཟུང་འཇུག་བརྙེས་པའི་རྣལ་འབྱོར་པ། །རྗེ་བྲམ་ཟེ་ཆེན་པོ་ས་ར་ཧ། །འཁོར་གྲུབ་ཐོབ་ཕོ་མོ་ཐམས་ཅད་དང༌། །ལྷ་ཧེ་རུ་ཀ་དཔལ་ཡབ་དང་ཡུམ། །དཔལ་མགོན་པོ་ལྕམ་དྲལ་འཁོར་དང་བཅས། །རིགས་ཀྱི་ཅོད་པན་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །རྒྱན་ཆ་མང་པོ་ཁྲ་ལ་ལ། །རོལ་མོ་མང་པོ་དི་རི་རི། །གླུ་ལེན་གར་བྱེད་ཁྱུགས་སེ་ཁྱུག །འཁོར་ཚོགས་འབུམ་སྡེ་ཤ་ར་ར། །སྒྱུ་མའི་རང་སྣང་ལྗེན་ནེ་ནེ། །གཏད་མེད་རིག་པ་ས་ལ་ལ། །བརྗོད་མེད་དབྱིངས་སུ་ཐ་ལ་ལ། །བདེ་བ་ཆེན་པོ་ཕྲི་ལི་ལི། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །མཆོག་དང་ཐུན་མོང་དངོས་གྲུབ་སྩོལ། །གུ་རུ་དེ་ཝ་ཌཱ་ཀི་ནི་ཛྙཱ་ན་ཨ་བེ་ཤ་ཡ་ཨ་ཨཿ ཚོགས་ཕུད་དཀྱིལ་འཁོར་དུ་ཕུལ་ལ། ཧོ། བླ་ན་མེད་པའི་དམ་ཚིག་རྫས། །ཡེ་ཤེས་བདུད་རྩི་འདོད་ཡོན་གཏེར། །རྩ་གསུམ་ལྷ་ཚོགས་རབ་འབྱམས་ལ། །འབུལ་གྱིས་དངོས་གྲུབ་མཐའ་དག་སྩོལ། །གུ་རུ་དེ་ཝ་ཌཱ་ཀི་ནི་ས་པ་རི་ཝ་ར་ག་ཎ་ཙཀྲ་པཱུ་ཛ་ཧོ། ཧཱུྃ། སྣང་སྲིད་སྒྱུ་མའི་བཀོད་པ་ལ། །གཏད་མེད་ཆོས་སྐུའི་དཀྱིལ་འཁོར་རྫོགས། །མཚན་འཛིན་བྲལ་བའི་དམ་ཚིག་རྫས། །ཡེ་ཤེས་མཆོག་གི་རོལ་པར་ཤར། །ངོ་མཚར་སྣང་སྟོང་ཚོགས་མཆོད་འདིས། །སྐུ་ཡི་དམ་ཚིག་ཉམས་ཆག་བཤགས། །གཟུང་འཛིན་ཉམས་པའི་དགྲ་བགེགས་སྒྲོལ། །སྐུ་ཡི་རྡོ་རྗེའི་ལྷ་ཚོགས་བསྐང༌། །ཐུགས་རྗེ་སྤྲུལ་སྐུའི་བྱིན་རླབས་སྩོལ། །འདོད་ཡོན་ཕྱི་ཡི་ཡུལ་ལྔའི་ཡུམ། །རྡོ་རྗེ་དབང་ལྔའི་དཔའ་བོས་སྦྱོར། །གཉིས་མེད་བདག་འཛིན་བླང་དོར་བྲལ། །བདེ་ཆེན་རོལ་པའི་ཚོགས་མཆོད་འདིས། །གསུང་གི་དམ་ཚིག་ཉམས་ཆག་བཤགས། །སྲེད་ལེན་འཁྲུལ་པའི་དགྲ་བགེགས་སྒྲོལ། །གསུང་གི་རྡོ་རྗེའི་ལྷ་ཚོགས་བསྐང༌། །རང་བཞིན་ལོངས་སྐུའི་དངོས་གྲུབ་སྩོལ། །རྡོ་རྗེའི་རྩ་རླུང་ཐིག་ལེའི་ཁམས། །བདེ་ཆེན་མཆོག་ཏུ་མི་འགྱུར་རྟེན། །ཐབས་ཤེས་སྡོམ་པ་ཆེན་པོ་ཡི། །ངོ་མཚར་རྨད་བྱུང་མཆོད་པ་ཆེས། །ཐུགས་ཀྱི་དམ་ཚིག་ཉམས་ཆག་བཤགས། །སྒོ་གསུམ་ཟག་ཕུང་དགྲ་བགེགས་སྒྲོལ། །ཐུགས་ཀྱི་རྡོ་རྗེའི་ལྷ་ཚོགས་བསྐང༌། །ངོ་བོ་ཆོས་སྐུའི་དངོས་གྲུབ་སྩོལ། །སྟོང་ཆེན་དབྱིངས་ཀྱི་བྷནྡྷ་རུ། །འོད་གསལ་ལྷུན་གྲུབ་དམ་རྫས་བཤམས། །ཟུང་འཇུག་ཟག་མེད་དབྱིངས་བརྡལ་བའི། །ཡེ་ཤེས་རང་སྣང་ཚོགས་མཆོད་འདིས། །ཡེ་ཤེས་དམ་ཚིག་ཉམས་ཆག་བཤགས། །སྣང་གསུམ་འཕོ་བའི་དགྲ་བགེགས་སྒྲོལ། །ཡེ་ཤེས་རྡོ་རྗེའི་ལྷ་ཚོགས་བསྐང༌། །ངོ་བོ་ཉིད་སྐུའི་དངོས་གྲུབ་སྩོལ། །དམན་པའི་ཡུལ་ལས་རབ་འདས་ཤིང༌། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་པར་བགྱི། །སྒྲིབ་པའི་དྲི་མ་ཀུན་སེལ་ཞིང༌། །རྟོག་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཡིག་བརྒྱ་བཟླ། ནང་གི་སྲེག་བླུག་གི་ཚུལ་གྱིས་དམ་ཚིག་རྫས་ལ་རོལ། ལྷག་མ། ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧ་ཧོ་ཧྲཱིཿས་བྱིན་རླབས་བྱས་ལ། ཧོ། ལྷ་ཚོགས་དགྱེས་པའི་ལྷག་མ་འདི། །དཀྱིལ་འཁོར་མུ་རན་སྐྱོང་བ་ཡི། །ཌཱ་ཀི་དམ་ཅན་རྣམས་ལ་འབུལ། །རྡོ་རྗེའི་དངོས་གྲུབ་གྲོགས་མཛོད་ཅིག །ཨོཾ་ཨུཙྪིཥྚ་བྷ་ལིཾ་ཏ་བྷཀྵ་སི་སྭཱ་ཧཱ། ཧེ་རུ་ཀ་དཔལ་དཀྱིལ་འཁོར་དུ། །ཚོགས་ཀྱི་མཆོད་པ་ཕུལ་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །མོས་གུས་རྩལ་གྱིས་སྣོད་དང་བཅུད། །བླ་མའི་ལྷ་ཚོགས་འོད་དུ་ཞུ། །གཉིས་མེད་བདེ་ཆེན་ཀློང་ཡངས་སུ། །གདོད་མ་ཉིད་ནས་འདུ་འབྲལ་མེད། །ཨ་ཨ་ཨ། སླར་ཡང་སྣང་གྲགས་རྟོག་པའི་ཚོགས། །བླ་མ་ལྷ་ཡི་ཞིང་དང་སྐུ། །རྡོ་རྗེ་སྔགས་དང་བདེ་སྟོང་གི། །ཡེ་ཤེས་ཉག་གཅིག་རོལ་པར་ཤར། །ཨོཾ་ཨཱཿཧཱུྃ། བསྔོ་སྨོན་ནི། སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང༌། །སྙིང་རྗེ་ཆེ་ཞིང་བླ་མ་ལ་གུས་ལྡན། །རྡོ་རྗེ་ཐེག་པའི་དམ་ཚིག་ལ་གནས་ཤོག །རྡོ་རྗེ་དྲིལ་བུ་ལ་སོགས་རྟག་ཏུ་བཅང༌། །ཟབ་དང་རྒྱ་ཆེའི་ཆོས་དོན་རྟོགས་པ་དང༌། །གོ་ཀུ་ཤུ་ཀྲ་ལ་སོགས་རྟག་བཟའ་ཞིང༌། །མཐར་ཐུག་བདེ་ཆེན་འགྲུབ་པའི་སྐལ་ལྡན་ཤོག །བདེ་གཤེགས་སྤྱན་སྔར་གནས་གསུམ་མཁའ་འགྲོ་ཡི། །དམ་བཅས་སྲུང་ཞིང་དངོས་གྲུབ་མཆོག་སྩོལ་བར། །ཐུགས་དམ་བཅས་ཤིང་རྟག་སྲུང་དངོས་གྲུབ་ནི། །རྣམ་གསུམ་ཚེ་འདི་ཉིད་ལ་མཐོང་བར་ཤོག །ཤིས་བརྗོད་ནི། ཆོས་དབྱིངས་དགོངས་པ་མཁའ་ལྟར་དག །དངོས་གྲུབ་འདོད་དགུའི་དཔལ་ལ་སྤྱོད། །གྲུབ་པ་ཆེན་པོ་འཇིག་རྟེན་རྒྱན། །འདུ་འབྲལ་མེད་པའི་བཀྲ་ཤིས་ཤོག །ཅེས་བརྗོད་རྡོ་རྗེའི་དོ་ཧ་ཀློག་པ་དང་དོན་ལ་སེམས་ཤིང༌། སྐལ་མཉམ་མོས་ལྡན་ལ་འཆད་པ་སོགས་བྱའོ། ༈ ཚུལ་འདིའི་བྱིན་རླབས་བྱེད་ན་གཙང་མའི་གནས་སུ་མཎྜལ་ཚོམ་བུ་གཅིག་མའི་སྟེང་རྣམ་བུམ་བཅུད་ལྡན། གཡས་སུ་གསང་ཐོད། གཡོན་དུ་རིག་ཙཀ །མདུན་དུ་གཏོར་མ། ཉེར་སྤྱོད་གཡས་བསྐོར། ཚོགས་ཀྱི་ཡོ་བྱད་དང༌། ལས་བུམ། རྡོར་དྲིལ། ཌཱ་མ་རུ་བཅས་འདུ་བྱས་ལ། ལས་གཞུང་བསྲང༌། སྣང་སྲིད་བླ་མའི་དཀྱིལ་འཁོར་དུ་ཤེས་པའི་དག་སྣང་ལས་བདག་མདུན་སོ་སོར་མ་བྱས་ཀྱང་རུང༌། བུམ་བཟླས་ཀྱང་དམིགས་གསལ་མི་དགོས། སྣང་གྲགས་རིག་པ་བླ་མའི་རྡོ་རྗེ་གསུམ་དུ་དག་པའི་ངེས་ཤེས་དང་བཅས་བཀའ་གཏེར་བླ་མེད་ཀྱི་དབང་བཞི་ཐོབ་ངེས་པའི་སློབ་མ་དད་མོས་དྲག་པོ་དང་ལྡན་པ་ཁྲུས་ནས་དབྱུང༌། ནང་དུ་འཁོད་པ་ལ། དེ་ལ་སྤྱིར་ཐེག་པ་ཆེན་པོའི་ལམ་གྱི་ཡོན་ཏན་ཐམས་ཅད་དགེ་བའི་བཤེས་གཉེན་བསྟེན་པ་ལ་རག་ལས་ཤིང༌། ཁྱད་པར་རྡོ་རྗེ་ཐེག་པའི་ལམ་གྱི་མངོན་རྟོགས་མཐའ་དག་བླ་མའི་བྱིན་རླབས་ལམ་དུ་བྱེད་པ་ལས་འབྱུང་བའི་ཚུལ། རྒྱུད་ལས། ཡོན་ཏན་རྒྱ་མཚོ་བླ་མ་ལ། །དད་པའི་ཡིད་ཀྱིས་མཆོད་བྱས་ན། །མཆོག་དང་ཐུན་མོང་ཐམས་ཅད་ནི། །དངོས་གྲུབ་མྱུར་དུ་ཐོབ་པར་འགྱུར། །ཞེས་གསུངས་པ་ལྟར་སྐལ་ལྡན་དབང་པོ་ཡང་རབ་འགའ་ཞིག་བླ་མའི་བྱིན་རླབས་ཀྱི་སྟོབས་ཀྱིས་སྐད་ཅིག་གིས་གྲོལ་བ་ཡང༌། བླ་མའི་ཐུགས་རྗེ་དང་སློབ་མའི་མོས་གུས་གཉིས་འཛོམ་པ་ལས་བྱུང་བ་ཡིན་ཏེ། འཕགས་བོད་དུ་སྔོན་བྱུང་བའི་གྲུབ་པའི་དབང་པོ་བརྡ་དང་དགོངས་པ་གཏད་པས་གྲོལ་བའི་ལོ་རྒྱུས་མང་དུ་བྱུང་བ་ལྟར། རྒྱ་གར་ནུབ་ཕྱོགས་སཽ་རཥྚའི་རྒྱལ་པོས་རང་གི་མ་ཡི་ཁ་ཆེམས་ལྟར་གཙུག་ལག་ཁང་བརྩིགས་ཏེ་ཡེ་ཤེས་མཁའ་འགྲོ་གཉིས་ཀྱིས་གྲོགས་བྱས་ཏེ་གྲུབ་ཐོབ་བརྒྱད་ཅུ་རྩ་བཞི་སྐད་ཅིག་གིས་བྱོན་སྟེ་ཚོགས་ཀྱི་འཁོར་ལོ་རྒྱ་ཆེན་པོ་བསྐོར་ནས་ཡུན་དུ་བཞུགས་པར་ཞུས་ཀྱང་མ་གནང༌། གྲུབ་ཐོབ་རེ་རེའི་རྡོ་རྗེའི་གླུ་བླང་ནས་གར་གཤེགས་ཆ་མེད་དུ་གཤེགས་པས། གྲུབ་བརྙེས་སོ་སོའི་སྐུ་བཞེངས་ཏེ་རང་རང་གི་དོ་ཧ་རྣམས་སོ་སོའི་མདུན་དུ་བཞག་སྟེ་མཆོད་པ་བྱས་པའི་ལོ་རྒྱུས་བཞིན་ཕྱག་རྒྱ་ཆེན་པོའི་གནས་ལུགས་སྒྲ་ཇི་བཞིན་དུ་རྟོགས་པས་རྡོ་རྗེའི་དོ་ཧ་བཞེངས་པ་འཕགས་བོད་མཁས་གྲུབ་ཀུན་གྱི་གཙུག་ནོར་བྲམ་ཟེ་ཆེན་པོ་ས་ར་ཧས་བདག་ཉིད་ལ་སྐལ་བཟང་གི་བཙས་སུ་གནང་བའི་བླ་མའི་རྣལ་འབྱོར་འོད་གསལ་གཉུག་མའི་ཐིག་ལེའི་བྱིན་རླབས་དང་དབང་གཞི་སྒྲུབ་པའི་དོན་དུ་མཎྜལ་ཕུལ། མདུན་གྱི་མཎྜལ་འདི་ཉིད་བདེ་ཆེན་ཡེ་ཤེས་ཀྱི་རང་སྣང་ལྷོ་ཕྱོགས་དཔལ་གྱི་རི་ནགས་ཚལ་དང་མེ་ཏོག་རབ་ཏུ་རྒྱས་ཤིང༌། ཚོར་བ་ཙམ་གྱིས་ཏིང་འཛིན་འབྱེད་ནུས་པའི་སྤོས་ཀྱི་དྲི་བསུང་འཐུལ་བ། བདུད་རྩིའི་ཆར་འབེབས་པའི་སྤྲིན་དང་ན་བུན་གཡོ་བའི་མགུལ་དུ་པད་ཟླ་བམ་རོའི་སྟེང་དུ་དཔལ་ས་ར་ཧ་པ་སྐུ་མདོག་སྔོ་སངས་བགྲེས་ཉམས་ཅན། དབུ་སྐྲ་ཐོར་ཅོག་དང་སྨར་སྨིན་སེ་ཁྱུག་གེ་བ། ཞབས་ཕྱེད་སྐྱིལ་གྱིས་བཞུགས་པ་དང༌། རས་དམར་པོའི་ཨང་རག་གསོལ་ནས། ཕྱག་གཉིས་ཀྱི་མདའ་བསྲིང་པའི་ཚུལ་གྱིས་ལྷན་སྐྱེས་དེ་ཁོ་ན་ཉིད་ཀྱི་ཡེ་ཤེས་མ་ནོར་དྲང་ཐད་སྟོན་པའི་བརྡ་མཚོན་ཅིང༌། སྐུའི་གཡས་གཡོན་དུ་ཞིང་གི་རྣལ་འབྱོར་མ་དཀར་སྔོན་སྨྱུག་མདའ་མཁན་མོའི་ཚུལ་གྱིས་བསྟེན་པ། འཁོར་དུ་རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི་སོགས་རྩ་བརྒྱུད་ཀྱི་བླ་མ། རྒྱུད་སྡེ་དྲུག་གི་ཡི་དམ། གནས་ཡུལ་གྱི་དཔའ་བོ་ཌཱ་ཀི་ཆོས་སྲུང་དང་བཅས་པས་བསྐོར་ཏེ་མངོན་སུམ་བཞིན་དུ་བཞུགས་པ་ཡིད་ཆེས་ཀྱི་དད་པ་རྩེ་གཅིག་པས་དབང་དང་བྱིན་རླབས་དངོས་གྲུབ་བསྩལ་དུ་གསོལ་སྙམ་པས་མཎྜལ་ཕུལ། དེ་ནས་ཁྱེད་རང་རྣམས་ལུས་ཞིང་རྡུལ་གྱི་གྲངས་དང་མཉམ་པར་སྤྲུལ་ཏེ་བླ་མའི་ཞབས་ཀྱི་པདྨོར་སྤྱི་བོས་གཏུགས་ཏེ་གུས་པས་ཕྱག་འཚལ་བའི་མོས་པས་ཐལ་མོ་སྦྱར་ཏེ་འདིའི་རྗེས་ཟློས་མཛོད། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང༌། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ལན་གསུམ། དེ་ལྟར་ཕྱག་བྱས་ཏེ་དད་མོས་དྲག་པོ་སྔོན་དུ་འགྲོ་བ་དང་བཅས། །སྐྱབས་ཡུལ་རྒྱ་མཚོ་བླ་མའི་སྐུ་གསུང་ཐུགས་ལ་རྫོགས་པས་རང་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་དྲིལ་གྱིས་སྐྱབས་སུ་འགྲོ་བར་མོས་ལ་འདིའི་རྗེས་ཟློས་མཛོད། ན་མོཿ བླ་མ་སངས་རྒྱས་རིན་པོ་ཆེ་སོགས་ལན་གསུམ། མཁའ་མཉམ་གྱི་སེམས་ཅན་རྡོ་རྗེ་ཐེག་པའི་མྱུར་ལམ་ཟབ་མོར་འཇུག་སྟེ་སྲིད་ཞིའི་མཐའ་ལས་སྒྲོལ་ཕྱིར་བདེན་གཉིས་དབྱེར་མེད་དུ་སེམས་བསྐྱེད་བཞིན་གཡར་དམ་བཟུང་སྙམ་པས་སེམས་བསྐྱེད་པ་འདིའི་རྗེས་ཟློས་མཛོད། ཧོཿ ནམ་མཁའ་མཉམ་པའི་སོགས། ལན་གསུམ། བསགས་སྦྱང་གི་སྙིང་པོ་ཡན་ལག་བདུན་གྱི་དམིགས་རྣམ་ཚིག་རྗེས་སུ་དོན་དྲན་བཞིན་པས་འདིའི་རྗེས་ཟློས་མཛོད། རང་སེམས་བླ་མར་རྟོགས་པས་གུས་ཕྱག་འཚལ། །ཚོགས་དྲུག་ཞེན་པ་བྲལ་བའི་མཆོད་པ་འབུལ། །གཉིས་འཛིན་ཨ་འཐས་རང་རིག་ཀློང་དུ་བཤགས། །ཐུགས་རྗེ་རྒྱུན་ཆད་མེད་ལ་ཡི་རང་ངོ༌། །ཁྱབ་བརྡལ་ཡེ་ཤེས་ཆོས་འཁོར་བསྐོར་དུ་གསོལ། །མཆོག་ཏུ་མི་འགྱུར་ཆོས་སྐུར་བཞུགས་གསོལ་འདེབས། །མཁའ་ཁྱབ་འགྲོ་ཀུན་སྐུ་གསུམ་ཐོབ་ཕྱིར་བསྔོ། །འཁོར་བ་དོང་སྤྲུགས་འགྲོ་དོན་འགྲུབ་པར་ཤོག །ལན་གསུམ། དེ་ནས་བྱིན་རླབས་ཀྱི་གཞི་འགོད་པའི་ཆེད་དུ་དམིགས་པ་འདི་ལྟར་དུ་མཛོད། བསངས་སྦྱངས་ཏེ། སྟོང་པའི་ངང་ལས་སྣོད་བཅུད་རྣམ་དག་འོག་མིན་རྡོ་རྗེ་དབྱིངས་ཀྱི་ཞིང་གི་བཀོད་པ་ལྷུན་གྱིས་རྫོགས་པའི་དབུས་སུ་པད་ཉིར་བམ་རོ་དམར་སེར་མགོ་བོ་གཡོན་དུ་བསྟན་པའི་སྟེང་རྣམ་ཀུན་མཆོག་ལྡན་རྒྱལ་ཡུམ་རྡོ་རྗེ་བཙུན་མོ་རྡོ་རྗེ་ཕག་མོ་སྐུ་མདོག་དམར་སེར་མཚམས་སྤྲིན་གྱི་ཁ་དོག་ཅན། ཁྲོ་འཛུམ་སྒེག་ཆགས་ཀྱི་ཉམས་ལྡན་པའི་ཞལ་གཅིག་སྤྱན་གསུམ་བགྲད་པ། ལྗགས་འདྲིལ་ཞིང་ཚེམས་ཀྱི་མྱུ་གུ་ཡིད་ཙམ་མངོན་པ་གཅེར་བུ་ནུ་མ་བྷ་ག་རབ་ཏུ་རྒྱས་ཤིང་མཁྲེགས་པ། སྐེད་སྐབས་ཕྲ་ཞིང་ཕྱག་གཡས་གྲི་གུག་ཕྱར་ཞིང༌། གཡོན་ཀ་པཱ་ལ་ཁྲག་གིས་གང་བ་ཐུགས་ཀར་གཏོད་པ། ཞབས་གཡས་བསྐུམ་པའི་རྟིང་པ་བྷ་གར་གཏད་ཅིང༌། གཡོན་བརྐྱང་བའི་སོར་རྩེ་རོ་ཡི་སྙིང་གར་བརྫིས་པ། མཆན་ཁུང་གཡོན་དུ་རྡོ་རྗེའི་ཁ་ཊྭཱྃ་ག་འཆང་བ། དབུ་ལ་ཐོད་སྐམ་ལྔ་དང༌། སྤྱི་གཙུག་ཏུ་ཕག་ཞལ་ནག་པོ་གདོང་གྱེན་དུ་ཕྱོགས་པས་ངུར་བ། མི་མགོ་རློན་པའི་དོ་ཤལ་དང༌། རུས་པའི་ཕྱག་རྒྱ་ལྔས་བརྒྱན་པའི་དཔྲལ་མགྲིན་སྙིང་གར་ཨོཾ་དཀར། ཨཱཿདམར། ཧཱུྃ་མཐིང་གིས་མཚན་པ་ལས་འོད་ཟེར་བསམ་མི་ཁྱབ་པ་འཕྲོས་པས་སྐུ་གསུམ་དག་པའི་ཞིང་ཁམས་རབ་འབྱམས་ཁྱད་པར་ནུབ་ཕྱོགས་ཨོ་རྒྱན་གྱི་ཡུལ། རྡོ་རྗེའི་གནས་ཡུལ་དུར་ཁྲོད་ཆེན་པོ་བརྒྱད་ལ་སོགས་པ་ནས་བླ་མ་བྲམ་ཟེ་ཆེན་པོ་ལ་ཕོ་རྟོགས་ཤིང་གྲོལ་བ་བརྒྱད་ཅུ། མོ་རྟོགས་ཤིང་གྲོལ་བ་བཞི་ལ་སོགས་རྡོ་རྗེའི་རྣལ་འབྱོར་ཕོ་མོ། ཡི་དམ་རྒྱུད་སྡེ་བཞི་དྲུག །གནས་གསུམ་དཔའ་བོ་མཁའ་འགྲོ། སངས་རྒྱས་བྱང་ཆུབ་སེམས་དཔའ་བསམ་གྱིས་མི་ཁྱབ་པ་ཁ་ཆར་བུ་ཡུག་འཚུབས་པ་བཞིན་བྱོན་ཏེ་སློབ་མའི་ལུས་ངག་ཡིད་གསུམ་ལ་རྡོ་ཚན་ལ་ཁ་བ་བབ་པ་བཞིན་ཐིམ་པར་བསམ་ལ་ཌཱ་དྲིལ་དབྱངས་དང༌། སྤོས་བཏུལ་ཞིང༌། གདུང་ཤུགས་དང་བཅས་ཏེ། ཧཱུྃ། དབྱིངས་བདེ་གསལ་མི་རྟོགས་ཕོ་བྲང་ཆེ། །སྐུ་གསུམ་གྱི་ཞིང་ཁམས་རབ་འབྱམས་དང༌། །ཁྱད་པར་དུ་འཛམ་གླིང་ཡུལ་གྱི་དབུས། །གནས་རྡོ་རྗེ་གདན་ནས་ཨུ་རྒྱན་ཡུལ། །དཔལ་དྷཱུ་མ་ཐ་ལའི་ཕྱོགས་མཚམས་སུ། །ས་རབ་ཏུ་དགའ་དང་དྲི་མ་མེད། །གནས་དང་ཉེ་བའི་གནས་ཡིན་ཏེ། །དེ་བཞིན་འོད་བྱེད་འོད་འཕྲོ་ལ། །ཞིང་དང་ཉེ་ཞིང་ཞེས་སུ་གྲགས། །སྦྱངས་དཀའ་བ་དང་མངོན་བྱེད་པ། །ཚནྡྷོ་ཉེ་བའི་ཚནྡྷོ་སྟེ། །རིང་དུ་སོང་དང་མི་གཡོ་བ། །འདུ་དང་ཉེ་བའི་འདུ་བ་དང༌། །ལེགས་པའི་བློ་གྲོས་ཆོས་ཀྱི་སྤྲིན། །འཐུང་སྤྱོད་ཉེ་བའི་འཐུང་སྤྱོད་སྟེ། །དཔེ་མེད་དཔེ་མེད་ཡེ་ཤེས་ཆེ། །རྡོ་རྗེ་འཛིན་དབང་ས་རྣམས་ལ། །དབང་བསྒྱུར་རྡོ་རྗེའི་བརྟུལ་ཞུགས་ཀྱིས། །བགྲོད་དེ་རྡོ་རྗེའི་རིགས་ཅན་གྱི། །དཔའ་བོ་དང་ནི་དཔའ་མོ་དང༌། །མཁའ་འགྲོ་དང་ནི་མཁའ་འགྲོ་མ། །ཚོམ་བུ་འབུམ་སྡེའི་ཚོགས་དང་བཅས། །རིགས་མ་ངེས་གདོལ་པ་གཡུང་པོའི་ཚུལ། །ཆས་མ་ངེས་སོ་ནམ་ཏིལ་བརྡུང་སོགས། །ཐབས་གང་འདུལ་བཀོད་པའི་བརྡ་ཐབས་ཀྱིས། །མ་འགྲོ་དྲུག་མཐོང་ཐོས་དྲན་པས་སྒྲོལ། །ཐུགས་འོད་གསལ་དགོངས་ཀློང་མཁའ་ལྟར་དག །གསུང་རྡོ་རྗེའི་དོ་ཧ་ཟབ་རྒྱས་སྒྲོག། །སྐུ་འཆི་མེད་གྲུབ་པའི་ཡེ་ཤེས་གཟུགས། །དད་མོས་པའི་གདུང་བས་བསྐུལ་ལགས་ན། །ཁྱོད་སྲིད་ཞི་ཀུན་ཁྱབ་ནམ་མཁའི་སྐུ། །རྩལ་སྙིང་རྗེས་གདུལ་དཀའ་སྒྲོལ་མཛད་པ། །བུ་གདུང་ཤུགས་ཅན་ལ་བྱིན་གྱིས་རློབས། །མཆོག་ཐུན་མོང་དངོས་གྲུབ་ད་སྩོལ་ཅིག །ཨོཾ་མ་ཧཱ་གུ་རུ་ཡོ་གི་ཤྭ་ར་དེ་ཝ་ཌཱ་ཀི་ནི་ས་པ་རི་ཝཱ་ར་ཛྙཱ་ན་ས་མ་ཡ་ཛཿཛཿ ཞེས་སྔགས་ཡང་ཡང་བརྗོད་པས་དབབ་ལ། ཏིཥྛ་བཛྲས་བརྟན་པར་བྱ། དེ་ནས་དངོས་གཞིའི་དབང་གི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེས་སངས་རྒྱས་ལ། སོགས་ལན་གསུམ། དེ་ལྟར་དད་མོས་ཀྱི་གདུང་ཤུགས་དྲག་པོས་གསོལ་བ་བཏབ་པའི་རྐྱེན་གྱིས་བླ་མ་བྲམ་ཟེ་ཆེན་པོའི་སྨིན་མཚམས་ནས་གདན་གསུམ་ཚང་བའི་དབང་ལྷ་སྤྲོས་ཏེ་རིན་པོ་ཆེའི་བུམ་པ་བདུད་རྩིའི་གང་བས་སྤྱི་བོ་ནས་མངོན་པར་དབང་སྐུར་བའི་མོས་པ་མཛོད། བུམ་པ་སྤྱི་བོར་བཞག་སྟེ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ༔ ཞེས་དབང་བསྐུར་ཏེ་བུམ་ཆུ་སྦྱིན། དེ་ལྟར་དབང་བསྐུར་བའི་ཆུ་རྒྱུན་གྱིས་ལུས་ཐམས་ཅད་གང་བ་དང༌། རྣལ་འབྱོར་གྱི་དབང་ཕྱུག་ཆེན་པོའི་དཔྲལ་བ་ནས་སྐུ་ཡི་བྱིན་རླབས་ཀྱི་རང་བཞིན་གཡོན་རྐྱང་མ་དང་རྗེས་སུ་འབྲེལ་བའི་ཀུནྡ་བྱང་སེམས་དཀར་པོའི་རྒྱུན་བྱུང་བ་ཁྱོད་རང་རྣམས་ཀྱི་དཔྲལ་བར་ཐིམ། ལུས་ཀྱི་དྲི་མ་དག །བུམ་པའི་དབང་ཐོབ། སྐུ་རྡོ་རྗེའི་བྱིན་རླབས་ཞུགས། ལམ་བསྐྱེད་རིམ་བསྒོམ་པ་ལ་དབང༌། འབྲས་བུ་སྤྲུལ་སྐུ་ཐོབ་པའི་ནུས་པ་ཁྱད་པར་ཅན་རྒྱུད་ལ་བཞག་པའི་མོས་པ་མཛོད། ཡང་བླ་མ་རྣལ་འབྱོར་གྱི་དབང་ཕྱུག་གསང་བའི་ཕྱག་རྒྱ་དང་སྙོམས་པར་ཞུགས་པའི་དགའ་བའི་སྒྲ་དང་ཐུགས་ཀའི་འོད་ཀྱིས་ཕྱོགས་བཅུའི་སངས་རྒྱས་རྣམས་སྤྱན་དྲངས། ཞལ་དུ་ཞུགས་རྗེས་སུ་ཆགས་པས་ཞུ། དཀར་དམར་བྱང་སེམས་བདུད་རྩིའི་རང་བཞིན་མཁའ་གསང་ནས་བབས། ཐོད་པའི་བདུད་རྩི་དང་རོ་གཅིག་པ་དེ་ལྕེ་སྟེང་དུ་མྱོང་བས་གསང་བའི་དབང་སྐུར་ཐོབ་པའི་མོས་པ་མཛོད་ཅིག །ཅེས་ཐོད་པར་གནས་པའི་ནང་མཆོད་ཁྱོར་བ་གཡོན་དུ་སྦྱིན་ལ། ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་ལ་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་རིང་ཁྱོད་ལ་དབང་བསྐུར་རོ། །ཨོཾ་ཨཱཿཧཱུྃ། སློབ་མས་ཀྱང༌། ཨ་ཧོ་མ་ཧཱ་སུ་ཁ་ཧོ། ཞེས་བརྗོད་དེ་མྱངས་པས་རྣལ་འབྱོར་དབང་ཕྱུག་ཆེན་པོའི་མགྲིན་པ་ནས་གསུང་གི་བྱིན་རླབས་ཀྱི་ངོ་བོ་གཡས་རོ་མ་དང་རྗེས་སུ་འབྲེལ་བའི་རཀྟ་བྱང་སེམས་དམར་པོའི་རྒྱུན་བྱུང་བ་ཁྱེད་རང་རྣམས་ཀྱི་མགྲིན་པར་ཐིམ། ངག་གི་དྲི་མ་དག །གསང་བའི་དབང་ཐོབ། གསུང་རྡོ་རྗེའི་བྱིན་རླབས་ཞུགས། ལམ་རང་ལུས་ཐབས་ལྡན་བསྒོམ་པ་ལ་དབང༌། འབྲས་བུ་གསུང་རྡོ་རྗེ་ལོངས་སྐུ་འགྲུབ་པའི་ནུས་བ་ཅན་རྒྱུད་ལ་བཞག་པའི་མོས་པ་མཛོད། ཡང་རྣལ་འབྱོར་དབང་ཕྱུག་ཆེན་པོའི་སྐུའི་གཡོན་དུ་བཞུགས་པའི་རིག་མ་གཏད་པར་མོས་ལ། དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །ཞེས་རིག་ཙཀ་གཏད། ཁྱེད་རང་རྣམས་ཧེ་རུ་ཀའི་སྐུར་གནས་གྱུར་པ་ལ། རིག་མ་རྡོ་རྗེ་རྣལ་འབྱོར་མའི་རྣམ་པར་གནས་པ་མཁའ་གསང་བྱིན་གྱིས་བརླབ་པ་ལ་སོགས་པའི་འདུ་ཤེས་གསུམ་གྱི་སྒོ་ནས་སྙོམས་པར་ཞུགས་པས། བྱང་སེམས་གནས་བཞིར་བབ་པས། ཡས་བབ་དང༌། ལྡོག་པའི་རིམ་པས་མས་བརྟན་གྱི་དགའ་བཞི་ཉམས་སུ་མྱོང་བ་རང་རིག་བདེ་སྟོང་བརྗོད་བྲལ་གྱི་ངང་དུ་མཉམ་པར་བཞག །རྣལ་འབྱོར་དབང་ཕྱུག་གི་སྨིན་མཚམས་ནས་ཐུགས་ཀྱི་བྱིན་རླབས་དབུ་མ་དང་རྗེས་སུ་འབྲེལ་བའི་ཁུ་ཁྲག་འདྲེས་པའི་བྱང་སེམས་བྱོན། ཁྱེད་རང་རྣམས་ཀྱི་སྨིན་མཚམས་སུ་ཐིམ། ཡིད་ཀྱི་དྲི་མ་དག །ཤེས་རབ་ཡེ་ཤེས་ཀྱི་དབང་ཐོབ། ཐུགས་རྡོ་རྗེའི་བྱིན་རླབས་ཞུགས། ལམ་གཞན་ལུས་ཤེས་རབ་ཕོ་ཉའི་ལམ་བསྒོམ་པ་ལ་དབང༌། འབྲས་བུ་ཆོས་སྐུ་འགྲུབ་པའི་ནུས་པ་རྒྱུད་ལ་བཞག་པར་མོས་མཛོད། དེ་ལྟར་དབང་གསུམ་པའི་སྐབས་སུ་ཉམས་སུ་མྱོང་བའི་དཔེའི་ཡེ་ཤེས་དེ་ཉིད། དོན་གྱི་གནས་ལུགས་རིག་པ་རང་བཞིན་གྱི་ངོ་བོ་འདུས་མ་བྱས་པ་འཁོར་འདས་ཐམས་ཅད་ཀྱི་སྲོག་ཏུ་གནས་པ་དེ་རང་ངོ་ཚུལ་བཞིན་ཤེས་པས་གློ་བུར་བག་ཆགས་ཀྱི་དྲི་མ་ཐམས་ཅད་རང་སངས་ཏེ། བྲལ་འབྲས་མངོན་དུ་བྱེད་པ་སྟེ། སངས་རྒྱས་ཐམས་ཅད་ཀྱི་ཆོས་ཀྱི་སྐུ་རང་རིག་གཅེར་མཐོང་དུ་ངོ་སྤྲད་པའི་མོས་པས་ལུས་གནད་ལྟ་སྟངས། སེམས་དུས་གསུམ་གྱི་རྣམ་རྟོག་གི་སྤྲོ་བསྡུས་མ་བསླད་པར་རང་རིག་བདེ་སྟོང་མ་བཅོས་པའི་ངང་དུ་མཉམ་པར་འཇོག་པར་ཞུ། ཡེ་ཤེས་འདི་ནི་ཆེས་ཕྲ་ཞིང༌། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་ཀྱི་ཕ་ནི་ཁྱོད་ཉིད་དོ། །དེས་སྒོ་གསུམ་གྱི་དྲི་མ་དག །དབང་བཞི་པ་ཐོབ། ཡེ་ཤེས་རྡོ་རྗེའི་བྱིན་བརླབ་ཞུགས། ལམ་ཕྱག་རྒྱ་ཆེན་པོ་སྒོམ་པ་ལ་དབང༌། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་ཐོབ་པའི་ནུས་པ་ཁྱད་པར་ཅན་བཞག་པའི་མོས་པ་མཛོད། དེ་ནས་དོན་གྱི་དབང་བཞིའི་གནས་ལུགས་ངོ་སྤྲོད་པའི་ཚུལ་དུ་བླ་མ་རྣལ་འབྱོར་གྲུབ་པའི་དབང་ཕྱུག་ཆེན་པོའི་རང་གི་རྟོགས་པ་བརྗོད་པ་དོ་ཧ་རྡོ་རྗེའི་གླུ་ཡི་གདམས་ངག་འདི་ལྟར་བསྩལ་བའི་མོས་པ་མཛོད། ཀྱེ་ཧོཿརང་རིག་གཉུག་མ་ཆེ༔ འོད་གསལ་རྒྱུན་མི་ཆད་པ་ཡི༔ གཉུག་མ་གཤིས་ཀྱི་དེ་ཉིད་དབང༔ རང་ལ་འདུ་འབྲལ་མེད་པར་བཞུགས༔ ནམ་མཁའ་ལྟ་བུའི་ཆོས་ཉིད་ལ༔ འཁོར་འདས་ཐམས་ཅད་འུབ་ཀྱིས་ཆུབ༔ སྤང་བླང་མེད་པ་རྒྱ་རེ་ཆེ༔ དབྱེ་བསལ་མེད་པ་བག་རེ་བྲོ༔ བདག་དང་ཁྱོད་ལ་བཟང་ངན་མེད༔ ཐམས་ཅད་སངས་རྒྱས་དག་པ་ཆེ༔ ལྟོས་ཤིག་ལྟོས་ཤིག་སེམས་ལ་ལྟོས༔ མཐོང་བ་མེད་པའི་གཤིས་ལ་ལྟོས༔ ངོ་བོ་སྟོང་པ་ས་ལེ་བ༔ སྣང་བ་མ་འགག་ཅིར་ཡང་བཀྲ༔ དབྱེ་བསལ་མེད་པའི་ཆོས་ཉིད་འདི༔ ངེས་པ་དོན་གྱི་བུམ་དབང་ཡིན༔ གཤིས་ལ་སྒྲིབ་པས་མ་གོས་ཤིང༔ རང་རིག་འོད་གསལ་རྒྱུན་ཆད་མེད༔ རང་ངོ་རང་གིས་ཤེས་པ་འདི༔ ཡང་དག་གསང་བའི་དབང་སྐུར་ཡིན༔ བཅིངས་གྲོལ་མེད་པའི་ཡེ་ཤེས་ལ༔ ཅི་ཤར་བདེ་བ་ཆེན་པོ་སྟེ༔ འདུས་མ་བྱས་པའི་བདག་ཆེན་པོ༔ བརྟེན་པར་གྱིས་ཤིག་གསུམ་པའི་དབང༔ ཐ་མལ་ཤེས་པ་རྒྱ་ཡན་འདི༔ འདུ་བྱེད་བློ་ཡིས་རྟོགས་མི་ནུས༔ དཔེ་དང་ཚིག་ལས་འདས་པས་ན༔ དགོངས་པས་སད་བྱས་བཞི་པའོ༔ རང་སེམས་ལྷར་མཐོང་བསྐྱེད་རིམ་སྟེ༔ བདེ་གསལ་མི་རྟོག་རྫོགས་པའི་རིམ༔ གདམས་པ་གནད་ཀྱི་གཟེར་བུ་འདིས༔ སྨིན་གྲོལ་ཡོངས་སུ་རྫོགས་པའོ༔ ཞེས་གདམས་པ་བསྩལ་བ་དང༌། སླར་ཡང་བདག་ལ་བྱིན་གྱིས་བརླབ་ཏུ་གསོལ་སྙམ་དུ་མོས་གུས་དྲག་པོ་བྱས་པའི་རྐྱེན་གྱིས། བླ་མ་གྲུབ་ཐོབ་རྣལ་འབྱོར་གྱི་དབང་ཕྱུག་སྐུ་འོད་ཕུང་གི་རྣམ་པར་ལྟེམས་ཀྱིས་ཞུ་ནས་ཁྱེད་རང་ལ་ཐིམ་པ་དང་སྐུ་གསུང་ཐུགས་ཀྱི་བྱིན་རླབས་ཐམས་ཅད་པར་བཏབ་པ་བཞིན་ཐུགས་རྒྱུད་ལ་འཕོས་པའི་མོས་པ་མཛོད། རྒྱལ་བ་རིགས་ཐམས་ཅད་ཀྱི་ཁྱབ་བདག་དྲུག་པ་རྡོ་རྗེ་འཆང་ཆེན་པོ་ནས་བརྩམས་རྡོ་རྗེ་ཐེག་པ་གསང་སྔགས་ཀྱི་ལམ་ནས་མཆོག་གི་དངོས་གྲུབ་བརྙེས་པའི་གྲུབ་ཐོབ་ཕོ་མོའི་ཚོགས་ཐམས་ཅད་དང༌། ཁྱར་པར་རྣལ་འབྱོར་གྱི་དབང་ཕྱུག་ཆེན་པོ་ས་ར་ཧ་པ་ལ་སོགས་གྲུབ་ཐོབ་བརྒྱད་ཅུ་རྩ་བཞིས་རྡོ་རྗེའི་སློབ་མ་འདི་རྣམས་ལ་བྱིན་གྱིས་རློབས་ཤིག །ལུས་ལ་རྡོ་རྗེའི་སྐུ་ཡི་སྒོ་ནས་བྱིན་གྱིས་རློབས་ཤིག །ངག་ལ་རྡོ་རྗེའི་གསུང་གི་སྒོ་ནས་བྱིན་གྱིས་རློབས་ཤིག །ཡིད་ལ་རྡོ་རྗེའི་ཐུགས་ཀྱི་སྒོ་ནས་བྱིན་གྱིས་རློབས་ཤིག །ཡོན་ཏན་མི་ཟད་པ་རྒྱན་གྱི་འཁོར་ལོའི་སྒོ་ནས་བྱིན་གྱིས་རློབས་ཤིག །ཕྲིན་ལས་རྣམ་པ་བཞིའི་སྒོ་ནས་བྱིན་གྱིས་རློབས་ཤིག །གསང་བ་བསམ་གྱིས་མི་ཁྱབ་པའི་སྒོ་ནས་བྱིན་གྱིས་རློབས་ཤིག །ད་ལྟ་ཉིད་དུ་བྱིན་གྱིས་རློབས་ཤིག །མྱུར་བ་ཉིད་དུ་བྱིན་གྱིས་རློབས་ཤིག །སྟན་ཐོག་འདི་རུ་བྱིན་གྱིས་རློབས་ཤིག །ཛཿཧཱུྃ་བྃ་ཧོ། དེས་གྲུབ་པའི་དབང་ཕྱུག་ཆེན་པོ་མདའ་བསྣུན་ཞབས་ཀྱི་ཐུགས་སྒྲུབ་ཞི་བའི་ཐིག་ལེའི་དབང་བསྐུར་བྱིན་རླབས་ཀྱི་རིམ་པ་ལེགས་པར་གྲུབ་པ་ཡིན་པས་སྐུ་གསུང་ཐུགས་ཀྱི་དམ་ཚིག་སྤྱི་དང༌། ཁྱད་པར་བླ་མའི་རྣལ་འབྱོར་འབྲལ་མེད་གཡར་དམ་དུ་བཟུང་བར་བགྱིའོ་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང༌། གཏང་རག་མཎྜལ། ལུས་འབུལ། བསྔོ་བ་སོགས་སྤྱི་ལྟར་བྱའོ། །སློབ་མ་རྣམས་གྱེས་ཏེ། སློབ་དཔོན་གྱིས་ཚོགས་ལྷག་མ་མན་ཆད་ལས་རིམ་མཐར་དབྱུང་བས་གྲུབ་པའོ། །དབང་གྱུར་ཆོས་སྤྱན་ལྡན་རྣམས་དབྱིངས་སུ་མནལ། །བླུན་པོས་རྒྱལ་ཁམས་གང་ཚེ་ལམ་འདི་ཡང༌། །རང་བྲིས་རང་ཀློག་མི་བྱེད་ཀ་མེད་བྱུང༌། །ལེགས་ཚོགས་མཆིས་ན་བསྟན་འགྲོར་སྨན་གྱུར་ཅིག །ཅེས་པའང་མདོ་ཁམས་ཟུར་མང་བཀྲ་ཤིས་བདུད་རྩིའི་དིལ་ནས་དྲུང་པ་མཆོག་སྤྲུལ་གཟིམ་ཆུང་དུ་གཏེར་ཆེན་རོལ་རྡོར་མཆོག་སྤྲུལ་ལྔ་པ་ཀརྨ་དྲི་མེད་འོད་ཟེར་སོགས་ལ་སྨིན་གྲོལ་ཐོག་མར་འབུལ་སྐབས་འདི་བཞིན་ཆོག་ཁྲིགས་འོས་ཞེས་བཀའ་བསྩལ་བཞིན་ཡིད་ལ་བཅགས་ཀྱང་དུས་ཀྱི་འགྱུར་བས་འདུས་བྱས་མི་རྟག་པའི་བརྡ་སྟོན་གྱིས་རྒྱལ་ཁམས་ཆུ་བཞིན་ཉུལ་བས་བཏང་སྙོམས་སུ་ཐལ་བ་ན་ལོ་འདི་སྤྲིན་བར་གྱི་ཉི་ཞུར་བཞིན་གསལ་བའི་ཚེ་སླར་འབྲི་འདོད་བྱུང་བ་བཞིན་ལྷོ་ཕྱོགས་ནགས་མའི་ལྗོངས་སུ་སྤ་གྲོ་སྐྱེར་ཆུའི་མཐའ་འདུལ་གྱི་གཙུག་ལག་ཁང་ནས་དབུ་བརྩམས་སྤུང་ཐང་བདེ་བ་ཆེན་པོའི་ཕོ་བྲང་ནས་བླ་མ་བདེ་མཆོག་འཁོར་ལོའི་ཚོགས་སྒྲུབ་སྐབས་གྲུབ་པར་བགྱིས་པ་པོ་མངྒ་ལ་ཤྲཱི་བྷཱུ་ཏི་སྟེ་འབྲེལ་ཚད་གནས་ལུགས་ཕྱག་རྒྱ་ཆེན་པོའི་གྲོལ་ཚད་མངོན་དུ་འགྱུར་བའི་རྟེན་འབྱུང་དུ་གྱུར་ཅིག །སརྦ་དཱ་མངྒ་ལཾ། །དགེའོ།། །།

[edit]

@#/__/grub thob chen po sa ra ha'i thugs sgrub kyi smin grol chig rdzogs su 'bog tshul 'od gsal snang ba bzhugs// @#/____/na mo gu ru ma hA mu dra ye/_gtsang ma'i gnas su maN+Dal pad+ma 'dab brgyad kyi lte bar 'bru'i tshom bu gcig bkod pa'i steng*/_bum pa mgul chings dkar po can so lnga'i rdzas kyis gtams pa/_thod chang bdud rtsi ril bu dang dngar gsum sbyar ba/_rig tsaka_/bla gtor rgyan ldan rnams la nyer spyod kyis bskor ba dang*/_tshogs kyi dam rdzas bcas 'du bya/_sgrub pa po'i mdun du 'thor nas/_DA ma ru/_rdor dril/_nang mchod bcas 'du byas la/_nges 'byung dang dad mos dang*/_khyad par bde stong phyag rgya chen po'i dgongs pa las mi g.yo ba'i ngang nas/_skyabs sems ni/_na mo:_bla ma sangs rgyas rin po che:_skyabs gnas rgya mtsho'i ye shes sku:_mkhyen brtse nus pa'i bdag nyid la:_mi phyed dad pas skyabs su mchi:_lan gsum/_ho:_nam mkha' mnyam pa'i sems can rnams:_med snang 'khor ba'i chos la zhen:_sdug bsngal mtsho las bsgral ba'i phyir:_byang chub sgrub par sems bskyed do:_lan gsum/_gnas yo byin brlab ni/_hU~M hrIH_snang srid kun bzang rol ba'i zhing:_rdo rje bde ba chen po'i dal:_zag med mchod pa'i sprin chen po:_rang bzhin nyid du lhun gyis grub:_oM dz+nyAn sarba pU dza ar+g+haM nas shab+da AHhU~M:_dngos gzhi rten bskyed ni/_aH_snang srid bla ma'i dkyil 'khor te:_gdod nas dag pa chen po'i klong:_'od gsal rgyun mi chad pa yi:_snang cha sku dang ye shes shar:_tshogs brgyad bsgral ba'i dur khrod che:_ngo mtshar rang snang dpal gyi ri:_lhun grub nags tshal me tog rgyas:_yan lag brgyad pa'i chu rgyun 'bab:_dbus su rtog med ro yi steng:_stong nyid nam mkha'i rnal 'byor pa:_bram ze chen po sngo sangs brjid:_gcer bu ye shes gzi byin 'bar:_rab dkar dbu skra'i thor tshugs can:_sma ra smin ma se khyug ge:_zhi ba'i lta stangs mi g.yo bas:_phyag gnyis mda' rnon gsor zhing bsgril:_zhabs zung phyed pa'i skyil krung can:_rus pa'i phyag rgya lnga yis brgyan:_g.yas g.yon gsang ba ye shes dang:_sgrol mdzad dpa' mo DA ki zung:_gcer bu dar gyi ang rag can:_rus pa'i phyag rgya lnga yis brgyan:_gzhon nu'i lang tsho rgyas pa'i nyams:_bdud rtsi'i b+han+d+ha yab la stob:_'dzum bzhad rol pa'i stabs su 'khod:_gzhan yang sangs rgyas byang chub sems:_rab 'byams dpa' bo rnal 'byor ma:_rgyud sde drug gi yi dam lha:_grub thob pho mo brgyad cu bzhi:_rdul gcig steng na rdul ji snyed:_ye shes gcig gi rol pa las:_rnam 'gyur cha lugs ma nges pa:_gang 'dul sgyu ma'i gar du ston:_spyan 'dren mchod bstod gzhung du med kyang gsang ba gzhan dang sgo bstun na gdung shugs spos rol dbyangs dang bcas te/_dbyings bde gsal mi rtogs grong khyer nas/_/rje rdo rje 'chang chen 'gro ba'i mgon/_/de rang ngor snang ba skyabs kyi gtso/_/pha drin chen rtsa ba'i bla ma nyid/_/yul dbus gyur ma ga d+ha yi lho/_/ljongs dpal gyi ri yi nags klung du/_/rje bram ze chen po sa ra ha/_/pho rtogs shing grol ba brgyad cu dang*/_/mo rtogs shing grol ba'i sring mo bzhi/_/yab he ru ka dpal rgyud sde bzhi/_/yum gnas gsum mkha' 'gro bka' srung tshogs/_/khyed rnam 'phrul mkha' la sprin bzhin gtibs/_/bdag mos pa'i gnas 'dir gshegs su gsol/_/gnas khang 'di ru byin phob la/_/'dir 'dus rnal 'byor bdag cag la/_/mchog dang thun mong dngos grub stsol/_/oM ma hA gu ru tsa tu rA shI ti sid+d+hi lab+d+ha dz+nyA na a be sha ya a a/_zhes pas spyan drang pa nyid/_/grub pa chen po'i ye shes sku/_/mkha' ltar khyab kyang dag pa'i ngor/_/chu zla bzhin du mngon snang bas/_/dgyes shing brtan par bzhugs su gsol/_/oM pad+ma A sa na s+t+wa~M/_/yon tan kun gyi gter gyur pas/_/gang gi mtshan tsam dran pas kyang*/_/bdag blo'i rgud pa zhi mdzad pa/_/grub pa'i dbang phyug khyod phyag 'tshal/_/gu ru na mo hU~M/_dri med yid 'ong lha yi rdzas/_/rdo rje'i 'dod yon bsam mi khyab/_/bde ba chen po'i longs spyod sprin/_/grub pa'i dbang phyug mnyes phyir 'bul/_/oM AHhrI pra wa ra sat+ka raM ar+g+haM nas shab+da pra tIts+tsha swA hA/_bdud rtsi lnga yi bza' ba ni/_/dngos grub kun gyi de nyid mchog_/sgron ma lnga yi bza' ba ni/_/sangs rgyas kun gyi dam tshig gtso/_/grub pa chen po'i rnal 'byor dbang*/_/'bul lo dngos grub dga' ston stsol/_/pany+tsa a mr-i ta rak+ta ba liM ta khA hi/_snyoms 'jug 'pho med bde chen thob/_/rang bzhin snang ba yongs dag pa/_/zhu bde'i khams gsum kun khyab pa/_/gsang ba'i mchod pas mnyes par bgyi/_/a nu rak+to ma hA su kha ho/_/'od gsal bsam mi khyab pa'i dbyings/_/mchod pa'i bya byed thams cad kyang*/_/ye shes gcig gi rol mo ste/_/spros bral bde ba chen pos mchod/_/d+harma d+hA tu pU dza ho/_bstod pa ni/_gu ru na mo hU~M/_snying rje chen po sems chen po/_/dmigs pa chen po blo chen po/_/go cha chen po mtshon chen po/_/dpa' chen khyod la phyag 'tshal bstod/_/dad pa chen po gus chen po/_/dam tshig chen po brtul zhugs che/_/brtson 'grus chen po stobs chen po/_/skyes mchog khyod la phyag 'tshal bstod/_/shes rab chen po thabs chen po/_/bde ba chen po gsal ba che/_/stong pa chen po rgya chen po/_/thub chen khyod la phyag 'tshal bstod/_/theg pa chen po sa chen po/_/lam chen ye shes chen po ste/_/yon tan chen po snyan grags che/_/bdag chen khyod la phyag 'tshal bstod/_/zhing khams chen po snang ba che/_/rdzu 'phrul chen po gdul bya che/_/byin rlabs chen po don chen po/_/skyabs chen khyod la phyag 'tshal bstod/_/sku chen gzi brjid chen po pa/_/gsung dbyangs chen po dgod pa che/_/mkhyen pa chen po mthu stobs che/_/dpa' chen khyod la phyag 'tshal bstod/_/bram ze'i rigs las gnyis rtog chod/_/phyag rgya chen po mthar thug rtogs/_/dngos grub mchog brnyes sa ra ha/_/rnal 'byor dbang phyug zhabs la 'dud/_/bzlas pa la gsol 'debs kyi tshul du/_dpal sangs rgyas thams cad 'dus pa'i sku:_rje bram ze chen po sa ra ha:_khyed 'od gsal dbu ma'i pho brang nas:_dbyings chos sku'i rgyal sa zin lags kyang:_bu ma rtogs 'khor bar 'khyams pa'i tshe:_don yin lugs 'khrul pa'i snang bas bsgribs:_gnad 'od gsal ma rtogs 'khor bar 'khyams:_rje khyed las re sa ma mchis pas:_pha thugs rje can gyi bla ma la:_yid gdung bas 'bod do bka' drin can:_stan 'di ru mchog gi dngos grub stsol:_rgyud smin grol mdzod cig grub pa'i rje:_zhes mos gus rtse gcig pas/_oM AHma hA gu ru sa ra ha dz+nyA na sid+d+hi hU~M/_zhes thugs yid bsres te bzla/_man ngag gi bzlas pa spro na/_rnal 'byor dbang phyug thugs dbus su:_ye shes sems dpa' spyan ras gzigs:_sems nyid ngal gso zla ba'i mdangs:_phyag gnyis mchog sbyin pad dkar bsnams:_sems skyil pad zla'i steng na bzhugs:_thugs dbus nyi zla'i gwa'u'i sbubs:_hrIHla yi ge drug pas bskor:_de las byung ba'i 'od zer phreng:_ston ka'i zla ba lta bu 'phros:_sras bcas rgyal ba'i thugs rje bskul:_mkha' khyab 'gro ba kun la khyab:_las nyon sdug bsngal mun pa bsal:_kun kyang 'phags pa'i skur gyur te:_gsung mchog chos kyi sgra dbyangs kyis:_'jig rten kun khyab snang srid kun:_'phags pa'i sku gsung thugs mchog gi:_bde chen ye shes rol pa yi:_phyag rgya chen po'i dbyings su sad:__oM ma Ni pad+me hU~M hrIH_zhes ci nus su bzla'o/_/rjes tshogs mchod bya bar 'dod na thabs shes kyi rdzas byin gyis brlab pa ni/_bsang sbyang*/_ma dag dri sbyangs ye shes b+han+d+ha'i nang*/_/tshogs rdzas dam ye dbyer med bdud rtsi'i mtsho/_/'dod yon rnam pa dpag med 'char ba yi/_/bla med bla ma'i dkyil 'khor mnyes byed gyur/_/oM AHhU~M ha ho hrIH_lan gsum/_gnas 'og min chos dbyings pho brang nas/_/rigs kun gyi khyab bdag rdo rje 'chang*/_/thabs snying rjes gang 'dul skur bzhengs nas/_/'bras zung 'jug brnyes pa'i rnal 'byor pa/_/rje bram ze chen po sa ra ha/_/'khor grub thob pho mo thams cad dang*/_/lha he ru ka dpal yab dang yum/_/dpal mgon po lcam dral 'khor dang bcas/_/rigs kyi cod pan ldems se ldem/_/dar gyi cod pan pu ru ru/_/rgyan cha mang po khra la la/_/rol mo mang po di ri ri/_/glu len gar byed khyugs se khyug_/'khor tshogs 'bum sde sha ra ra/_/sgyu ma'i rang snang ljen ne ne/_/gtad med rig pa sa la la/_/brjod med dbyings su tha la la/_/bde ba chen po phri li li/_/byin gyis brlab phyir gshegs su gsol/_/gnas mchog 'di ru byin phob la/_/sgrub mchog bdag la dbang bzhi bskur/_/mchog dang thun mong dngos grub stsol/_/gu ru de wa DA ki ni dz+nyA na a be sha ya a aH_tshogs phud dkyil 'khor du phul la/_ho/_bla na med pa'i dam tshig rdzas/_/ye shes bdud rtsi 'dod yon gter/_/rtsa gsum lha tshogs rab 'byams la/_/'bul gyis dngos grub mtha' dag stsol/_/gu ru de wa DA ki ni sa pa ri wa ra ga Na tsakra pU dza ho/_hU~M/_snang srid sgyu ma'i bkod pa la/_/gtad med chos sku'i dkyil 'khor rdzogs/_/mtshan 'dzin bral ba'i dam tshig rdzas/_/ye shes mchog gi rol par shar/_/ngo mtshar snang stong tshogs mchod 'dis/_/sku yi dam tshig nyams chag bshags/_/gzung 'dzin nyams pa'i dgra bgegs sgrol/_/sku yi rdo rje'i lha tshogs bskang*/_/thugs rje sprul sku'i byin rlabs stsol/_/'dod yon phyi yi yul lnga'i yum/_/rdo rje dbang lnga'i dpa' bos sbyor/_/gnyis med bdag 'dzin blang dor bral/_/bde chen rol pa'i tshogs mchod 'dis/_/gsung gi dam tshig nyams chag bshags/_/sred len 'khrul pa'i dgra bgegs sgrol/_/gsung gi rdo rje'i lha tshogs bskang*/_/rang bzhin longs sku'i dngos grub stsol/_/rdo rje'i rtsa rlung thig le'i khams/_/bde chen mchog tu mi 'gyur rten/_/thabs shes sdom pa chen po yi/_/ngo mtshar rmad byung mchod pa ches/_/thugs kyi dam tshig nyams chag bshags/_/sgo gsum zag phung dgra bgegs sgrol/_/thugs kyi rdo rje'i lha tshogs bskang*/_/ngo bo chos sku'i dngos grub stsol/_/stong chen dbyings kyi b+han+d+ha ru/_/'od gsal lhun grub dam rdzas bshams/_/zung 'jug zag med dbyings brdal ba'i/_/ye shes rang snang tshogs mchod 'dis/_/ye shes dam tshig nyams chag bshags/_/snang gsum 'pho ba'i dgra bgegs sgrol/_/ye shes rdo rje'i lha tshogs bskang*/_/ngo bo nyid sku'i dngos grub stsol/_/dman pa'i yul las rab 'das shing*/_/rgyal ba kun gyi dam tshig mchog_/dngos grub kun gyi gzhir gyur pa/_/bdud rtsi mchog gis mchod par bgyi/_/sgrib pa'i dri ma kun sel zhing*/_/rtog pa kun las rnam grol ba/_/bla na med pa'i byang chub sems/_/bde ba chen pos mnyes gyur cig_/yig brgya bzla/_nang gi sreg blug gi tshul gyis dam tshig rdzas la rol/__lhag ma/_oM AHhU~M pany+tsa a mr-i ta ha ho hrIHsa byin rlabs byas la/_ho/_lha tshogs dgyes pa'i lhag ma 'di/_/dkyil 'khor mu ran skyong ba yi/_/DA ki dam can rnams la 'bul/_/rdo rje'i dngos grub grogs mdzod cig_/oM uts+tshiSh+Ta b+ha liM ta b+hak+Sha si swA hA/_he ru ka dpal dkyil 'khor du/_/tshogs kyi mchod pa phul ba yis/_/bdag gzhan 'gro ba ma lus pa/_/dkyil 'khor gcig tu 'grub par shog_/mos gus rtsal gyis snod dang bcud/_/bla ma'i lha tshogs 'od du zhu/_/gnyis med bde chen klong yangs su/_/gdod ma nyid nas 'du 'bral med/_/a a a/_slar yang snang grags rtog pa'i tshogs/_/bla ma lha yi zhing dang sku/_/rdo rje sngags dang bde stong gi/_/ye shes nyag gcig rol par shar/_/oM AHhU~M/_bsngo smon ni/_skye zhing skye ba dag ni thams cad du/_/rigs bzang blo gsal nga rgyal med pa dang*/_/snying rje che zhing bla ma la gus ldan/_/rdo rje theg pa'i dam tshig la gnas shog_/rdo rje dril bu la sogs rtag tu bcang*/_/zab dang rgya che'i chos don rtogs pa dang*/_/go ku shu kra la sogs rtag bza' zhing*/_/mthar thug bde chen 'grub pa'i skal ldan shog_/bde gshegs spyan sngar gnas gsum mkha' 'gro yi/_/dam bcas srung zhing dngos grub mchog stsol bar/_/thugs dam bcas shing rtag srung dngos grub ni/_/rnam gsum tshe 'di nyid la mthong bar shog_/shis brjod ni/_chos dbyings dgongs pa mkha' ltar dag_/dngos grub 'dod dgu'i dpal la spyod/_/grub pa chen po 'jig rten rgyan/_/'du 'bral med pa'i bkra shis shog_/ces brjod rdo rje'i do ha klog pa dang don la sems shing*/_skal mnyam mos ldan la 'chad pa sogs bya'o/__!__tshul 'di'i byin rlabs byed na gtsang ma'i gnas su maN+Dal tshom bu gcig ma'i steng rnam bum bcud ldan/_g.yas su gsang thod/_g.yon du rig tsaka_/mdun du gtor ma/_nyer spyod g.yas bskor/_tshogs kyi yo byad dang*/_las bum/_rdor dril/_DA ma ru bcas 'du byas la/_las gzhung bsrang*/_snang srid bla ma'i dkyil 'khor du shes pa'i dag snang las bdag mdun so sor ma byas kyang rung*/_bum bzlas kyang dmigs gsal mi dgos/_snang grags rig pa bla ma'i rdo rje gsum du dag pa'i nges shes dang bcas bka' gter bla med kyi dbang bzhi thob nges pa'i slob ma dad mos drag po dang ldan pa khrus nas dbyung*/_nang du 'khod pa la/_de la spyir theg pa chen po'i lam gyi yon tan thams cad dge ba'i bshes gnyen bsten pa la rag las shing*/_khyad par rdo rje theg pa'i lam gyi mngon rtogs mtha' dag bla ma'i byin rlabs lam du byed pa las 'byung ba'i tshul/_rgyud las/_yon tan rgya mtsho bla ma la/_/dad pa'i yid kyis mchod byas na/_/mchog dang thun mong thams cad ni/_/dngos grub myur du thob par 'gyur/_/zhes gsungs pa ltar skal ldan dbang po yang rab 'ga' zhig bla ma'i byin rlabs kyi stobs kyis skad cig gis grol ba yang*/_bla ma'i thugs rje dang slob ma'i mos gus gnyis 'dzom pa las byung ba yin te/_'phags bod du sngon byung ba'i grub pa'i dbang po brda dang dgongs pa gtad pas grol ba'i lo rgyus mang du byung ba ltar/_rgya gar nub phyogs sau raSh+Ta'i rgyal pos rang gi ma yi kha chems ltar gtsug lag khang brtsigs te ye shes mkha' 'gro gnyis kyis grogs byas te grub thob brgyad cu rtsa bzhi skad cig gis byon ste tshogs kyi 'khor lo rgya chen po bskor nas yun du bzhugs par zhus kyang ma gnang*/_grub thob re re'i rdo rje'i glu blang nas gar gshegs cha med du gshegs pas/_grub brnyes so so'i sku bzhengs te rang rang gi do ha rnams so so'i mdun du bzhag ste mchod pa byas pa'i lo rgyus bzhin phyag rgya chen po'i gnas lugs sgra ji bzhin du rtogs pas rdo rje'i do ha bzhengs pa 'phags bod mkhas grub kun gyi gtsug nor bram ze chen po sa ra has bdag nyid la skal bzang gi btsas su gnang ba'i bla ma'i rnal 'byor 'od gsal gnyug ma'i thig le'i byin rlabs dang dbang gzhi sgrub pa'i don du maN+Dal phul/_mdun gyi maN+Dal 'di nyid bde chen ye shes kyi rang snang lho phyogs dpal gyi ri nags tshal dang me tog rab tu rgyas shing*/_tshor ba tsam gyis ting 'dzin 'byed nus pa'i spos kyi dri bsung 'thul ba/_bdud rtsi'i char 'bebs pa'i sprin dang na bun g.yo ba'i mgul du pad zla bam ro'i steng du dpal sa ra ha pa sku mdog sngo sangs bgres nyams can/_dbu skra thor cog dang smar smin se khyug ge ba/_zhabs phyed skyil gyis bzhugs pa dang*/_ras dmar po'i ang rag gsol nas/_phyag gnyis kyi mda' bsring pa'i tshul gyis lhan skyes de kho na nyid kyi ye shes ma nor drang thad ston pa'i brda mtshon cing*/_sku'i g.yas g.yon du zhing gi rnal 'byor ma dkar sngon smyug mda' mkhan mo'i tshul gyis bsten pa/_'khor du rnal 'byor gyi dbang phyug brgyad cu rtsa bzhi sogs rtsa brgyud kyi bla ma/_rgyud sde drug gi yi dam/_gnas yul gyi dpa' bo DA ki chos srung dang bcas pas bskor te mngon sum bzhin du bzhugs pa yid ches kyi dad pa rtse gcig pas dbang dang byin rlabs dngos grub bstsal du gsol snyam pas maN+Dal phul/_de nas khyed rang rnams lus zhing rdul gyi grangs dang mnyam par sprul te bla ma'i zhabs kyi pad+mor spyi bos gtugs te gus pas phyag 'tshal ba'i mos pas thal mo sbyar te 'di'i rjes zlos mdzod/_gang gi drin gyis bde chen nyid/_/skad cig nyid la 'char ba gang*/_/bla ma rin chen lta bu'i sku/_/rdo rje can zhabs pad la 'dud/_/lan gsum/_de ltar phyag byas te dad mos drag po sngon du 'gro ba dang bcas/__/skyabs yul rgya mtsho bla ma'i sku gsung thugs la rdzogs pas rang gzhan sems can thams cad sgo gsum 'jug pa gcig dril gyis skyabs su 'gro bar mos la 'di'i rjes zlos mdzod/_na moH_bla ma sangs rgyas rin po che sogs lan gsum/_mkha' mnyam gyi sems can rdo rje theg pa'i myur lam zab mor 'jug ste srid zhi'i mtha' las sgrol phyir bden gnyis dbyer med du sems bskyed bzhin g.yar dam bzung snyam pas sems bskyed pa 'di'i rjes zlos mdzod/_hoH_nam mkha' mnyam pa'i sogs/_lan gsum/_bsags sbyang gi snying po yan lag bdun gyi dmigs rnam tshig rjes su don dran bzhin pas 'di'i rjes zlos mdzod/_rang sems bla mar rtogs pas gus phyag 'tshal/_/tshogs drug zhen pa bral ba'i mchod pa 'bul/_/gnyis 'dzin a 'thas rang rig klong du bshags/_/thugs rje rgyun chad med la yi rang ngo*/_/khyab brdal ye shes chos 'khor bskor du gsol/_/mchog tu mi 'gyur chos skur bzhugs gsol 'debs/_/mkha' khyab 'gro kun sku gsum thob phyir bsngo/_/'khor ba dong sprugs 'gro don 'grub par shog_/lan gsum/_de nas byin rlabs kyi gzhi 'god pa'i ched du dmigs pa 'di ltar du mdzod/_bsangs sbyangs te/_stong pa'i ngang las snod bcud rnam dag 'og min rdo rje dbyings kyi zhing gi bkod pa lhun gyis rdzogs pa'i dbus su pad nyir bam ro dmar ser mgo bo g.yon du bstan pa'i steng rnam kun mchog ldan rgyal yum rdo rje btsun mo rdo rje phag mo sku mdog dmar ser mtshams sprin gyi kha dog can/_khro 'dzum sgeg chags kyi nyams ldan pa'i zhal gcig spyan gsum bgrad pa/_ljags 'dril zhing tshems kyi myu gu yid tsam mngon pa gcer bu nu ma b+ha ga rab tu rgyas shing mkhregs pa/_sked skabs phra zhing phyag g.yas gri gug phyar zhing*/_g.yon ka pA la khrag gis gang ba thugs kar gtod pa/_zhabs g.yas bskum pa'i rting pa b+ha gar gtad cing*/_g.yon brkyang ba'i sor rtse ro yi snying gar brdzis pa/_mchan khung g.yon du rdo rje'i kha T+wA~M ga 'chang ba/_dbu la thod skam lnga dang*/_spyi gtsug tu phag zhal nag po gdong gyen du phyogs pas ngur ba/_mi mgo rlon pa'i do shal dang*/_rus pa'i phyag rgya lngas brgyan pa'i dpral mgrin snying gar oM dkar/_AHdmar/_hU~M mthing gis mtshan pa las 'od zer bsam mi khyab pa 'phros pas sku gsum dag pa'i zhing khams rab 'byams khyad par nub phyogs o rgyan gyi yul/_rdo rje'i gnas yul dur khrod chen po brgyad la sogs pa nas bla ma bram ze chen po la pho rtogs shing grol ba brgyad cu/_mo rtogs shing grol ba bzhi la sogs rdo rje'i rnal 'byor pho mo/_yi dam rgyud sde bzhi drug_/gnas gsum dpa' bo mkha' 'gro/_sangs rgyas byang chub sems dpa' bsam gyis mi khyab pa kha char bu yug 'tshubs pa bzhin byon te slob ma'i lus ngag yid gsum la rdo tshan la kha ba bab pa bzhin thim par bsam la DA dril dbyangs dang*/_spos btul zhing*/_gdung shugs dang bcas te/_hU~M/_dbyings bde gsal mi rtogs pho brang che/_/sku gsum gyi zhing khams rab 'byams dang*/_/khyad par du 'dzam gling yul gyi dbus/_/gnas rdo rje gdan nas u rgyan yul/_/dpal d+hU ma tha la'i phyogs mtshams su/_/sa rab tu dga' dang dri ma med/_/gnas dang nye ba'i gnas yin te/_/de bzhin 'od byed 'od 'phro la/_/zhing dang nye zhing zhes su grags/_/sbyangs dka' ba dang mngon byed pa/_/tshan+d+ho nye ba'i tshan+d+ho ste/_/ring du song dang mi g.yo ba/_/'du dang nye ba'i 'du ba dang*/_/legs pa'i blo gros chos kyi sprin/_/'thung spyod nye ba'i 'thung spyod ste/_/dpe med dpe med ye shes che/_/rdo rje 'dzin dbang sa rnams la/_/dbang bsgyur rdo rje'i brtul zhugs kyis/_/bgrod de rdo rje'i rigs can gyi/_/dpa' bo dang ni dpa' mo dang*/_/mkha' 'gro dang ni mkha' 'gro ma/_/tshom bu 'bum sde'i tshogs dang bcas/_/rigs ma nges gdol pa g.yung po'i tshul/_/chas ma nges so nam til brdung sogs/_/thabs gang 'dul bkod pa'i brda thabs kyis/_/ma 'gro drug mthong thos dran pas sgrol/_/thugs 'od gsal dgongs klong mkha' ltar dag_/gsung rdo rje'i do ha zab rgyas sgrog/_/sku 'chi med grub pa'i ye shes gzugs/_/dad mos pa'i gdung bas bskul lags na/_/khyod srid zhi kun khyab nam mkha'i sku/_/rtsal snying rjes gdul dka' sgrol mdzad pa/_/bu gdung shugs can la byin gyis rlobs/_/mchog thun mong dngos grub da stsol cig_/oM ma hA gu ru yo gi shwa ra de wa DA ki ni sa pa ri wA ra dz+nyA na sa ma ya dzaHdzaH_zhes sngags yang yang brjod pas dbab la/_tiSh+Tha badz+ras brtan par bya/_de nas dngos gzhi'i dbang gi don du gsol ba gdab pa 'di'i rjes zlos mdzod/_byang chub rdo rjes sangs rgyas la/_sogs lan gsum/_de ltar dad mos kyi gdung shugs drag pos gsol ba btab pa'i rkyen gyis bla ma bram ze chen po'i smin mtshams nas gdan gsum tshang ba'i dbang lha spros te rin po che'i bum pa bdud rtsi'i gang bas spyi bo nas mngon par dbang skur ba'i mos pa mdzod/_bum pa spyi bor bzhag ste/_dbang bskur rdo rje chen po ni/_khams gsum kun gyis phyag byas pa/_/sangs rgyas kun gyi gsang gsum gyi/_/gnas las byung ba sbyin par bya/_/oM sarba ta thA ga ta a b+hi She ka te sa ma ya shrI ye hU~M:_zhes dbang bskur te bum chu sbyin/_de ltar dbang bskur ba'i chu rgyun gyis lus thams cad gang ba dang*/_rnal 'byor gyi dbang phyug chen po'i dpral ba nas sku yi byin rlabs kyi rang bzhin g.yon rkyang ma dang rjes su 'brel ba'i kun+da byang sems dkar po'i rgyun byung ba khyod rang rnams kyi dpral bar thim/_lus kyi dri ma dag_/bum pa'i dbang thob/_sku rdo rje'i byin rlabs zhugs/_lam bskyed rim bsgom pa la dbang*/_'bras bu sprul sku thob pa'i nus pa khyad par can rgyud la bzhag pa'i mos pa mdzod/_yang bla ma rnal 'byor gyi dbang phyug gsang ba'i phyag rgya dang snyoms par zhugs pa'i dga' ba'i sgra dang thugs ka'i 'od kyis phyogs bcu'i sangs rgyas rnams spyan drangs/_zhal du zhugs rjes su chags pas zhu/_dkar dmar byang sems bdud rtsi'i rang bzhin mkha' gsang nas babs/_thod pa'i bdud rtsi dang ro gcig pa de lce steng du myong bas gsang ba'i dbang skur thob pa'i mos pa mdzod cig_/ces thod par gnas pa'i nang mchod khyor ba g.yon du sbyin la/_ji ltar 'das pa'i sangs rgyas kyis/_/byang chub sras la dbang bskur ltar/_/de bzhin byang chub sems rgyun gyis/_/de ring khyod la dbang bskur ro/_/oM AHhU~M/_slob mas kyang*/_a ho ma hA su kha ho/_zhes brjod de myangs pas rnal 'byor dbang phyug chen po'i mgrin pa nas gsung gi byin rlabs kyi ngo bo g.yas ro ma dang rjes su 'brel ba'i rak+ta byang sems dmar po'i rgyun byung ba khyed rang rnams kyi mgrin par thim/_ngag gi dri ma dag_/gsang ba'i dbang thob/_gsung rdo rje'i byin rlabs zhugs/_lam rang lus thabs ldan bsgom pa la dbang*/_'bras bu gsung rdo rje longs sku 'grub pa'i nus ba can rgyud la bzhag pa'i mos pa mdzod/_yang rnal 'byor dbang phyug chen po'i sku'i g.yon du bzhugs pa'i rig ma gtad par mos la/_dga' ster gnas ster lha mo ni/_/sna tshogs gzugs can yid 'ong ma/_/khyer cig khyer cig sems dpa' che/_/khyer la mchod pa rtag tu gyis/_/zhes rig tsaka gtad/_khyed rang rnams he ru ka'i skur gnas gyur pa la/_rig ma rdo rje rnal 'byor ma'i rnam par gnas pa mkha' gsang byin gyis brlab pa la sogs pa'i 'du shes gsum gyi sgo nas snyoms par zhugs pas/_byang sems gnas bzhir bab pas/_yas bab dang*/_ldog pa'i rim pas mas brtan gyi dga' bzhi nyams su myong ba rang rig bde stong brjod bral gyi ngang du mnyam par bzhag_/rnal 'byor dbang phyug gi smin mtshams nas thugs kyi byin rlabs dbu ma dang rjes su 'brel ba'i khu khrag 'dres pa'i byang sems byon/_khyed rang rnams kyi smin mtshams su thim/_yid kyi dri ma dag_/shes rab ye shes kyi dbang thob/_thugs rdo rje'i byin rlabs zhugs/_lam gzhan lus shes rab pho nya'i lam bsgom pa la dbang*/_'bras bu chos sku 'grub pa'i nus pa rgyud la bzhag par mos mdzod/_de ltar dbang gsum pa'i skabs su nyams su myong ba'i dpe'i ye shes de nyid/_don gyi gnas lugs rig pa rang bzhin gyi ngo bo 'dus ma byas pa 'khor 'das thams cad kyi srog tu gnas pa de rang ngo tshul bzhin shes pas glo bur bag chags kyi dri ma thams cad rang sangs te/_bral 'bras mngon du byed pa ste/_sangs rgyas thams cad kyi chos kyi sku rang rig gcer mthong du ngo sprad pa'i mos pas lus gnad lta stangs/_sems dus gsum gyi rnam rtog gi spro bsdus ma bslad par rang rig bde stong ma bcos pa'i ngang du mnyam par 'jog par zhu/_ye shes 'di ni ches phra zhing*/_/rdo rje nam mkha'i dkyil lta bu/_/rdul bral mthar phyin zhi ba nyid/_/khyod kyi pha ni khyod nyid do/_/des sgo gsum gyi dri ma dag_/dbang bzhi pa thob/_ye shes rdo rje'i byin brlab zhugs/_lam phyag rgya chen po sgom pa la dbang*/_'bras bu ye shes rdo rje ngo bo nyid sku thob pa'i nus pa khyad par can bzhag pa'i mos pa mdzod/_de nas don gyi dbang bzhi'i gnas lugs ngo sprod pa'i tshul du bla ma rnal 'byor grub pa'i dbang phyug chen po'i rang gi rtogs pa brjod pa do ha rdo rje'i glu yi gdams ngag 'di ltar bstsal ba'i mos pa mdzod/_kye hoHrang rig gnyug ma che:_'od gsal rgyun mi chad pa yi:_gnyug ma gshis kyi de nyid dbang:_rang la 'du 'bral med par bzhugs:_nam mkha' lta bu'i chos nyid la:_'khor 'das thams cad 'ub kyis chub:_spang blang med pa rgya re che:_dbye bsal med pa bag re bro:_bdag dang khyod la bzang ngan med:_thams cad sangs rgyas dag pa che:_ltos shig ltos shig sems la ltos:_mthong ba med pa'i gshis la ltos:_ngo bo stong pa sa le ba:_snang ba ma 'gag cir yang bkra:_dbye bsal med pa'i chos nyid 'di:_nges pa don gyi bum dbang yin:_gshis la sgrib pas ma gos shing:_rang rig 'od gsal rgyun chad med:_rang ngo rang gis shes pa 'di:_yang dag gsang ba'i dbang skur yin:_bcings grol med pa'i ye shes la:_ci shar bde ba chen po ste:_'dus ma byas pa'i bdag chen po:_brten par gyis shig gsum pa'i dbang:_tha mal shes pa rgya yan 'di:_'du byed blo yis rtogs mi nus:_dpe dang tshig las 'das pas na:_dgongs pas sad byas bzhi pa'o:_rang sems lhar mthong bskyed rim ste:_bde gsal mi rtog rdzogs pa'i rim:_gdams pa gnad kyi gzer bu 'dis:_smin grol yongs su rdzogs pa'o:_zhes gdams pa bstsal ba dang*/_slar yang bdag la byin gyis brlab tu gsol snyam du mos gus drag po byas pa'i rkyen gyis/_bla ma grub thob rnal 'byor gyi dbang phyug sku 'od phung gi rnam par ltems kyis zhu nas khyed rang la thim pa dang sku gsung thugs kyi byin rlabs thams cad par btab pa bzhin thugs rgyud la 'phos pa'i mos pa mdzod/_rgyal ba rigs thams cad kyi khyab bdag drug pa rdo rje 'chang chen po nas brtsams rdo rje theg pa gsang sngags kyi lam nas mchog gi dngos grub brnyes pa'i grub thob pho mo'i tshogs thams cad dang*/_khyar par rnal 'byor gyi dbang phyug chen po sa ra ha pa la sogs grub thob brgyad cu rtsa bzhis rdo rje'i slob ma 'di rnams la byin gyis rlobs shig_/lus la rdo rje'i sku yi sgo nas byin gyis rlobs shig_/ngag la rdo rje'i gsung gi sgo nas byin gyis rlobs shig_/yid la rdo rje'i thugs kyi sgo nas byin gyis rlobs shig_/yon tan mi zad pa rgyan gyi 'khor lo'i sgo nas byin gyis rlobs shig_/phrin las rnam pa bzhi'i sgo nas byin gyis rlobs shig_/gsang ba bsam gyis mi khyab pa'i sgo nas byin gyis rlobs shig_/da lta nyid du byin gyis rlobs shig_/myur ba nyid du byin gyis rlobs shig_/stan thog 'di ru byin gyis rlobs shig_/dzaHhU~M ba~M ho/_des grub pa'i dbang phyug chen po mda' bsnun zhabs kyi thugs sgrub zhi ba'i thig le'i dbang bskur byin rlabs kyi rim pa legs par grub pa yin pas sku gsung thugs kyi dam tshig spyi dang*/_khyad par bla ma'i rnal 'byor 'bral med g.yar dam du bzung bar bgyi'o snyam pas 'di'i rjes zlos mdzod/_gtso bos ji ltar sogs dang*/_gtang rag maN+Dal/_lus 'bul/_bsngo ba sogs spyi ltar bya'o/_/slob ma rnams gyes te/_slob dpon gyis tshogs lhag ma man chad las rim mthar dbyung bas grub pa'o/__/dbang gyur chos spyan ldan rnams dbyings su mnal/_/blun pos rgyal khams gang tshe lam 'di yang*/_/rang bris rang klog mi byed ka med byung*/_/legs tshogs mchis na bstan 'gror sman gyur cig_/ces pa'ang mdo khams zur mang bkra shis bdud rtsi'i dil nas drung pa mchog sprul gzim chung du gter chen rol rdor mchog sprul lnga pa karma dri med 'od zer sogs la smin grol thog mar 'bul skabs 'di bzhin chog khrigs 'os zhes bka' bstsal bzhin yid la bcags kyang dus kyi 'gyur bas 'dus byas mi rtag pa'i brda ston gyis rgyal khams chu bzhin nyul bas btang snyoms su thal ba na lo 'di sprin bar gyi nyi zhur bzhin gsal ba'i tshe slar 'bri 'dod byung ba bzhin lho phyogs nags ma'i ljongs su spa gro skyer chu'i mtha' 'dul gyi gtsug lag khang nas dbu brtsams spung thang bde ba chen po'i pho brang nas bla ma bde mchog 'khor lo'i tshogs sgrub skabs grub par bgyis pa po mang+ga la shrI b+hU ti ste 'brel tshad gnas lugs phyag rgya chen po'i grol tshad mngon du 'gyur ba'i rten 'byung du gyur cig__/sarba dA mang+ga laM/___/dge'o//__//