ཁྲག་རླུང་སྟོད་འཚང་གི་བཅོས་ཚུལ་ངོ་མཚར་སྲོག་སྟེར།

🚧 This website is under continued development. We appreciate your patience!

Previous Text Back to Volume PageNext Text

Wylie title	khrag rlung stod 'tshang gi bcos tshul ngo mtshar srog ster
Location	mkhyen brtse'i bka' 'bum Volume 17, sde tshan 2, Text 2, Pages 157-164 (Folios 6a4 to 9b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. khrag rlung stod 'tshang gi bcos tshul ngo mtshar srog ster. In 'jam dbyangs mkhyen brtse'i dbang po'i bka' 'bum, Vol. 17: 157-164. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa
Colophon	།ཞེས་ཁྲག་རླུང་གིས་བཅོས་ཚུལ་ཉུང་ངུ་འདི་ཡང་དཔལ་ལྡན་བླ་མ་དམ་པའི་གསུང་གི་བསྐུལ་བ་བཞིན་གཞོན་ནུ་ཨ་བྷ་ཡས་སྦྱར་བའོ།།
	zhes khrag rlung gis bcos tshul nyung ngu 'di yang dpal ldan bla ma dam pa'i gsung gi bskul ba bzhin gzhon nu a b+ha yas sbyar ba'o

1 Texts in this Section (sde tshan or chos tshan)

2 157-164	ཁྲག་རླུང་སྟོད་འཚང་གི་བཅོས་ཚུལ་ངོ་མཚར་སྲོག་སྟེར། khrag rlung stod 'tshang gi bcos tshul ngo mtshar srog ster Medicine Texts - gso ba rig pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཁྲག་རླུང་སྟོད་འཚང་གི་བཅོས་ཚུལ་ངོ་མཚར་སྲོག་སྟེར་ཞེས་བྱ་བ་བཞུགས་སོ། །གཞན་སྲོག་འཚོ་བའི་རིག་པའི་ཆུ་གཏེར་ལས། །ཡན་ལག་བརྒྱད་ལྡན་ཟླ་ཤེལ་གཞོན་ནུའི་དཔྱིད། །མཁྱེན་དཔྱོད་དཔུངས་པས་ལེགས་དྲངས་ཕན་དང་བདེའི། །དགའ་སྟོན་སྩོལ་མཛད་རྣམས་ཀྱི་ཤིས་པས་སྐྱོངས། །བྲང་ལ་གནས་པའི་ཁྱབ་རྒྱུའི་རླུང་འཁྲུགས་པའི། །སྟོད་འཚང་ཞེས་གྲགས་འདི་ལ༷་༡རྒྱུ༷་རྐྱེན༷་༢དང་། །དབྱེ་༣བ༷་རྟག༷ས་༤བཅོ༷ས་༥རྣམ་པ་ལྔ་ཡིས་བསྟན། །རྒྱུ༷་༡ནི་རྣམ་པར་མ་གྱུར་རླུང་དང་ཁྲག །དེ་ཉིད་འཁྲུགས་རྐྱེན༷་༢གཉིད་ཆག་རྩོལ་བས་དུབ། །མང་དུ་སྨྲས་ཤིང་བསིལ་བའི་ཟས་སྤྱོད་ཐལ། །དེ་ཡི་རླུང་ཤས་ཆེ་བའི་སྟོད་འཚང་སྐྱེད། །དྲག་ཤུལ་ལས་དང་མེ་ཉིས་ཤིན་ཏུ་དྲོས། །ཆང་མང་འཐུང་བས་ཁྲག་ཤས་ཆེ་བ་ཡིས། །སྟོད་འཚང་འབྱུང་བས་དེ་ཕྱིར་དབྱེ༷་བ༷་༣ཡང་། །ཁྲག་དང་རླུང་གཉིས་ཤས་ཆེ་ཐ་དད་འགྱུར། །རྟགས་ནི་རྩ་རྒྱུད་སྟོང་རྒྱུག་མནན་མི་བཟོད། །ཆུ་མདོག་སྔོའམ་ཡང་ན་དམར་ལ་དྭངས། །ལྦུ་བ་མེ་ལྕེ་ཆད་འདྲ་མྱུར་དུ་ཡལ། །མགོ་དང་མིག་རུས་མུར་འགྲམ་དཔྱི་རྐེད་ན། །གྲང་ཤུམ་བྱེད་ཅིང་གཉིད་མེད་མེ་ཉིར་སྙེགས། །སྨིན་ནས་བྲང་རྒྱབ་གཟེར་ཞིང་ལྟག་མདུད་ན། །མཇུག་རླུང་རྔུབ་དཀའ་རྔམ་རྒོད་དབུག་མི་བདེ། །སྟོད་དུ་ཆེར་འཚང་རེས་འགའ་ཚིག་མི་ཐོན། །བྱེ་བྲག་ཁྲག་ཤས་མཐོ་ན་ཟུག་གཟེར་ཆེ། །རླུང་ཤས་ཆེ་ན་སྟོད་ལ་ཤིན་ཏུ་འཚང་། །དེ་ཕྱིར་ངོས་ཟིན་སླ་ཡང་སྟོད་ཚད་དང་། །འདི་གཉིས་མ་ནོར་ཕྱེ་བ་གནད་དུ་གལ། བཅོས་ཐབས་དང་པོ་འབྲས་གསུམ་མ་ནུ་བཞི། །ཀོ་བྱི་ལ་དང་གཟེར་འཇོམས་གྲང་ཐང་བཏང་། །དེ་ཡིས་མི་བྱེར་ལམ་ནས་ལྡོག་པར་འབྱུང་། །དེ་རྗེས་རླུང་ཤས་ཆེ་ན་ཨ་གར་ནག །ཤིང་ཀུན་ཛཱ་ཏི་སུག་སྨེལ་ཁ་རུ་ཚྭ། །ལི་ཤི་ཀོ་བྱི་གཟེར་འཇོམས་བསྣན་པ་བཏང་། །ཚ་ཤས་ཆེ་ན་ཤིང་ཀུན་ཁ་རུ་ཚྭ། །སུག་སྨེལ་ཕྲི་ནས་སྙིང་ཞོ་ལང་ཐང་རྩེ། །ཤ་ཆེན་བསྣན་པའི་མན་ངག་ཤེས་པར་བྱ། །ཁྲག་གི་གཟེར་ཆེ་ཨ་གར་སྙིང་ཞོ་ཤ །ཛཱ་ཏི་ཅུ་གང་གུ་རྒུམ་ཙན་དན་གཉིས། །སྲོ་ལོ་སྦྱར་བའི་དྲང་སྲོང་ཨར་བརྒྱད་སྟེང་། །རུ་རྟ་ཧོང་ལེན་མ་ནུ་གཟེར་སྨན་བསྣན། །ཤིན་ཏུ་གཟེར་ཆེ་གསང་སྨན་སྔོན་པོ་ཀོ་བྱི་ལ་དང་། །རླུང་ལ་བོང་ང་ཁྲག་ལ་འཛིམ་པ་སྟེ། །ཚ་གྲང་བརྟགས་ཏེ་གོང་མར་བསྣན་ལ་བཏང་། །འབྲས་གསུམ་མ་ནུ་བཞི་དང་ཨ་གར་གསུམ། །ཀོ་བྱི་སྙིང་ཞོ་ཛཱ་ཏི་ལི་ཤི་དང་། །ནཱ་ག་གེ་སར་ཨ་བྱག་མིང་ཅན་སེར། །རུ་རྟ་སྦྱར་བའི་ཨ་གར་བཅུ་དགུ་འདི། །རླུང་ཤས་ཆེ་ན་ཆང་གསར་ཁྲག་ཆེ་ན། །གཟེར་འཇོམས་ཐང་གིས་ཕུལ་བས་སྟོད་འཚང་འཇོམས། །ཡང་ན་ལྕི་སྣུམ་བསིལ་བའི་ཨ་གར་གསུམ། །བཟང་དྲུག་འབྲས་གསུམ་ཙནྡན་དཀར་དམར་གཉིས། །གཙོར་སྨོས་མ་ནུ་སླེ་ཏྲེས་སྒ་སྐྱ་དང་། །ཀཎྜ་ཀ་རི་ཏིག་ཏ་བ་ཤ་ཀ །གུ་གུལ་དཀར་ནག་གླ་རྩི་ཀོ་བྱི་ལ། །ཤ་ཆེན་འཛིམ་པ་ཚེར་སྔོན་སྙིང་ཞོ་ཤ །གེ་སར་རུ་རྟ་ཧོང་ལེན་ཨ་བྱག་གཉིས། །མིང་ཅན་སེ་འབྲུ་སྲོ་ལོ་ཀ་ར་སྦྱར། །སྦྱོར་བ་འདི་མིང་ཨ་གར་སུམ་ཅུ་ལྔ། །ཚང་ཞིང་ཟློས་མེད་ཚད་ལྡན་སྦྱར་བ་ཉིད། །རུས་ཁུ་ཆུ་ཆང་འདུ་བ་བསྟུན་ལ་ཕུལ། །ནད་རིགས་སྤྱི་དང་ཁྱད་པར་རི་ཐང་མཚམས། །གཉན་ཚད་རླུང་གསུམ་འཐབ་ལ་བདུད་རྩི་འདྲ། །སྟོད་གཟེར་ཁྲག་རླུང་རིགས་ཀུན་འཇོམས་པའི་མཆོག །སྨན་བཏང་ལོག་པའི་ཉེས་པ་འདིར་མི་འབྱུང་། །རུ་རྟ་ཨ་བྱག་གཟེར་འཇོམས་ཧོང་ལེན་སྦྱར། །བདུད་རྩི་གསུམ་སྦྱོར་ཞེས་གྲགས་སྟོད་འཚང་སེལ། །གཞན་ཡང་ཨ་གར་བརྒྱད་ཕྱི་རྒྱུད་ཨར་བརྒྱད་སྟེང་མ་ནུ་བཞི། །བར་སྐྱུར་ཙནྡན་དམར་པོ་བསྣན་པ་ཡི། །བཅོ་ལྔའི་སྦྱོར་བ་དག་ཀྱང་སྐབས་འདིར་འཕྲོད། །ཡང་ན་གོང་ཨར་བརྒྱད་སྟེང་ཀོ་བྱི་བསྣན་པ་ཡི། །སྲོག་འཛིན་དགུ་པ་ཞེས་གྲགས་སྟོད་འཚང་སེལ། །དེ་སྟེང་ཨ་བྱག་ཚེར་སྔོན་མིང་ཅན་དང་། །གཟེར་འཇོམས་ལི་ཤི་ཤ་ཆེན་ལི་ག་དུར། །ཙནྡན་གི་ཝཾ་སྨན་ཆེན་སྲོ་ལོ་དཀར། །གུ་གུལ་ཧོང་ལེན་སྦྱར་སྲོག་འཛིན་ནོར་བུ་ཟེར། བ་ཆུ་བསྐོལ་དབུལ། །སྟོད་ཚད་སྟོད་འཚང་ངོས་མ་ཟིན་ལ་བསྔགས། །མ་ནུ་བདུན་སྟེང་གསང་སྨན་བསྣན་པ་ཡི། །རཏྣ་བརྒྱད་པས་འབམ་ནད་སྟོད་བབས་སེལ། །ཀོ་བྱི་བདུན་སྟེང་བདུད་རྩི་སྙོམ་ལྡན་བསྣན། །རཏྣ་བརྒྱད་པས་ཁྲག་རླུང་སྟོད་འཚང་སེལ། །སྙན་ནས་བརྒྱུད་པའི་ཟབ་མོའི་མན་ངག་གོ །ཁྱད་པར་གཙོ་བོ་ནཱ་ག་གེ་སར་ལ། །བཟང་དྲུག་མ་ནུ་བཞི་དང་འབྲས་བུ་གསུམ། །རུ་རྟ་སྙིང་ཞོ་ཨ་བྱག་གུ་གུལ་གཉིས། །ཙནྡན་དཀར་དམར་ཨ་གར་བྲག་ཞུན་དང་། །མིང་ཅན་རྣམ་གཉིས་སྦྱར་བའི་ཉེར་ལྔ་ཡིས། །འདུ་འཁྲུགས་ཁྲག་རླུང་སྙིང་གཟེར་སྨྱོ་འབོག་སེལ། །ཁྲག་ཤས་ཤིན་ཏུ་ཆེ་ན་དེ་ཡི་སྟེང་། །འབྲི་མོག་ཧོང་ལེན་ཚོས་བཙོད་མཛོ་མོ་ཤིང་། །བ་ཤ་ཀ་བསྣན་ཆུ་གྲང་དག་གིས་དབུལ། །ཨ་བྱག་གཟེར་འཇོམས་ཤ་ཆེན་གསང་སྨན་གསུམ། །ཁོང་དུ་བཏང་དང་བདུག་པས་སྟོད་དུ་རླུང་། །མཐའ་དག་འཕུལ་ནས་ཁ་ལྐུག་པ་ཡང་འབྱེད། །ཀོ་བྱི་ཨ་རུའི་མཇུག་མ་རུ་རྟ་དང་། །དབང་ལག་སྒོག་སྐྱ་འཛིམ་པ་ཁ་རུ་ཚྭ། །ཨར་ནག་ལི་ཤི་ཚེར་སྔོན་གུ་གུལ་ནག །རུས་ཞུན་ཁཎྜ་དང་བཅས་བུ་རམ་གྱི། །རིལ་བུ་དྲིལ་བ་རྒོད་པོ་རབ་འཇོམས་ཏེ། །རླུང་ཁྲག་བསྟུན་ལ་ཆུ་ཆང་གང་འོས་ཕུལ། །ཁྱད་པར་འཁྲུལ་འཁོར་ཟབ་མོའི་མན་ངག་ནི། །རང་ལུས་རྣམ་སྣང་ཆོས་བདུན་ལྡན་པའི་ངང་། །ནད་གདོན་ཧ་ཡིག་ནག་པོར་བསྡུས་བྱས་ཏེ། །གཟེར་མིག་སྟེང་དུ་བསྒོམ་ཞིང་རང་མདུན་གྱི། །ནམ་མཁའི་དབུས་སུ་ཨ་ཡིག་དཀར་པོ་གསལ། །ལག་གཉིས་བགྲད་དེ་པུས་མོའི་སྟེང་དུ་བཀབ། །སྟེང་རླུང་མནན་ཞིང་སྙིང་ཁར་ཡུད་ཙམ་བསྐྱིལ། །སླར་ཡང་ལྷག་མེད་སྣ་བུག་གཉིས་ནས་འབུད། །དེ་དང་མཉམ་དུ་ཧ་སྒྲ་བསྟུད་མར་བརྗོད། །ནད་གདོན་ཧ་ཡིག་རྣམ་པར་བསྡུས་པ་དེ། །སྙིང་ཁ་ནས་ཐོན་ཨ་ལ་ཐིམ་པར་བསམས། །སྐྱེ་འགག་གནས་གསུམ་བྲལ་བའི་རང་རིག་པ། །སྟོང་གསལ་བརྗོད་དུ་མེད་པའི་ངང་ལ་བཞག །ཤིན་ཏུ་ཕན་པའི་མན་ངག་མཐར་ཐུག་ཡིན། །དཔྱད་དུ་རླུང་ཤས་ཆེ་ན་དྲུག་བདུན་དང་། །དཀར་ནག་མཚམས་རྣམས་རྒྱབ་མདུན་གཟེར་དང་བསྟུན། །མེ་བཙའ་གདབ་ཞིང་ཁྲག་ཤས་ཆེ་གྱུར་ན། །དྲུག་མགོའམ་ནི་སྒང་རྩ་གཏར་བར་བྱ། །རླུང་ཁྲག་གང་ཤས་ཆེ་ཡང་དཔྱད་ཀྱི་མཆོག །བུམ་པ་ཁྱུད་འཁོར་སོར་ནི་བཅོ་བརྒྱད་དང་། །སྲིད་སོར་བཅུ་གཉིས་ཁ་ཟླུམ་སོར་བཞི་སྟེ། །མཚན་ཉིད་ལྡན་པའི་ལྟོ་བར་གྲོ་གའམ། །ཤོག་བུ་གང་རུང་མེ་སྦར་དེ་ཉིད་ཀྱང་། །སྦྲང་བུ་དམར་ཁྲ་མེ་ཡི་རང་བཞིན་བསྐྱེད། །ནད་གདོན་ཤ་རུས་གཏིང་ནས་དྲང་བར་བསམས། །སྔགས་འདི་ཨོཾ་མེ་རི་དམར་པོ་སོད། བཟླས་ལ་ཅུང་ཟད་བསྐོར་ཚུལ་གྱིས། །གཟེར་མིག་དེ་ཡི་མདུན་རྒྱབ་གཉིས་དཀར་གདབ། །རླུང་འཁྱིལ་ཕྱིར་དྲངས་གཟེར་ཟུག་ཡུད་ལ་གཅོག །གཞན་ཡང་ནགས་མའི་རིགས་ཀྱི་ཤེལ་ཏ་དང་། །ཁྱི་རུས་ལྕགས་རི་སྔོན་པོ་སོད། ཐམ་སོད། ཐུམ་སོད། གིས་གཙོས་རུས་སྣ་ཡོངས་རྫོགས་དང་། །ཆ་མཉམ་ཁུ་བ་འདྲེས་པར་དཀྲུགས་བྱས་ཏེ། །ཞོ་ཙམ་སོང་དུས་བླངས་ལ་ཤོག་བུར་བཅུག །དགོས་ཚེ་དམིགས་ཀྱི་སྟེང་དུ་སྦྱར་བ་ཡིས། །སྐྲངས་དང་འབྲུ་མཐོར་འཇོམས་ཞིང་ཁྱད་པར་དུ། །ནང་གི་ཆུ་སེར་ཕྱིར་འདྲེན་རླུང་གཟེར་གཅོག །བརྡབ་དང་གཡང་ལྷུང་ཟུག་ཀུན་སེལ་བར་ལག་ལེན་ཞིབ་པར་བུ་ཡིག་ལས་ཤེས། བྱེད། །སློབ་དཔོན་ཞལ་གདམས་སྙན་རྒྱུད་ཟབ་མོ་ཡིན། །གཟེར་ཆེ་ཅ་ར་ཁུག་ཏུ་ཆུ་མདའ་དང་། །གནམ་མ་མཐོང་བའི་ཆུ་རྡོས་གཟེར་སྟེང་བདུག །མར་གསར་ལ་སོགས་བཀུ་མཉེས་རླུང་གསང་གསོ། ཁ་ཟས་བཅུད་བསྟེན་རྩུབ་དང་ཡང་བ་སྤངས། །སྤྱོད་ལམ་གོས་དྲོ་བགོ་ཞིང་དལ་བར་བསྡད། །མཐུན་པའི་གྲོགས་བསྟེན་སྙིང་ལ་འབབ་པར་སྨྲ། །རྗེས་གཅོད་སྔར་བཤད་གསང་གསུམ་མེ་ཡིས་བསྡམས། །དེས་ཀྱང་མ་ཞི་བཟོད་མེད་ཟུག་གཟེར་ལྡན། །ཟུང་གིས་ཐུབ་པ་འཆི་ལ་ཐུག་པའི་ཚེ། །ཨར་ནག་ལི་ཤི་ཛཱ་ཏི་སྒ་སྐྱ་དང་། །རྒྱམ་ཚྭ་པི་ལིང་ཨ་རུ་ཐར་དུར་གཉིས། །རྒྱ་ཚྭ་འོལ་མོ་རེ་ལྕག་ཆ་མཉམ་ལ། །གཙོ་བོ་དར་མའི་གྲི་ཤ་ཐུན་གསུམ་སྡེབས། །རླུང་ཁ་མཐོ་ན་གོ་སྙོད་རྩི་བོ་ཆེ། །མཁྲིས་པར་དུག་ཉུང་གསེར་མེ་བད་ཀན་ལ། །ལྕུམ་དཀར་རྩ་བ་སྙིང་རླུང་ཞོ་ཤ་དང་། །སྨན་ཆེན་འབྲི་ཚིལ་ཁ་ཚར་བཏབ་པ་དེ། །བུར་སྨུག་གིས་བསྒྲིལ་རིལ་བུ་ཆང་གིས་ཕུལ། །གཉིས་གསུམ་འཁྲུས་ན་རུས་ཁུའི་ལྕག་གིས་འཕུལ། །རྗེས་གཅོད་སྤྱི་མཐུན་སྦྱར་བས་བད་ཁྲག་རླུང་། །སྟོད་དུ་འཚང་ནས་བཟོད་པར་དཀའ་བའི་ནད། །སེལ་བྱེད་རྒྱལ་དབང་རང་བྱུང་རྡོ་རྗེ་ལ། །ཡེ་ཤེས་ཌཱཀྐིས་ཕུལ་བའི་སྙིང་ཐིག་ཡིན། །ནད་གཞན་ལྡང་ན་སོ་སོའི་ཁ་འཛིན་དང་། །སྦྱར་ཏེ་སྔར་སྨོས་ཞི་བྱེད་ཚོགས་རྣམས་བསྟེན། །དེ་ལྟར་གདམས་པ་རྒྱ་མཚོའི་ཉི་གཞོན་གྱིས། །ལེགས་པར་ཕྱེ་བའི་ཟ༷བ་དོ༷ན་ཨུཏྤལ་ལ། །གཅིག་བསྡུས་ངོ༷་མཚ༷ར་ཕྲེ༷ང་བ༷་གསར་པ་འདིས། །འགྲོ་རྣམས་དུས་མིན་འཆི་བ་ལས་སྒྲོལ་ཤོག །ཞེས་ཁྲག་རླུང་གིས་བཅོས་ཚུལ་ཉུང་ངུ་འདི་ཡང་དཔལ་ལྡན་བླ་མ་དམ་པའི་གསུང་གི་བསྐུལ་བ་བཞིན་གཞོན་ནུ་ཨ་བྷ་ཡས་སྦྱར་བའོ།། །། ༈

[edit]

khrag rlung stod 'tshang gi bcos tshul ngo mtshar srog ster zhes bya ba/ khrag rlung stod 'tshang gi bcos tshul ngo mtshar srog ster zhes bya ba bzhugs so/__/gzhan srog 'tsho ba'i rig pa'i chu gter las/__/yan lag brgyad ldan zla shel gzhon nu'i dpyid/__/mkhyen dpyod dpungs pas legs drangs phan dang bde'i/__/dga' ston stsol mdzad rnams kyi shis pas skyongs/__/brang la gnas pa'i khyab rgyu'i rlung 'khrugs pa'i/__/stod 'tshang zhes grags 'di laX 1rgyuX rkyenaX 2dang /__/dbye 3baX rtagaXs 4bcoXs 5rnam pa lnga yis bstan/__/rgyuX 1ni rnam par ma gyur rlung dang khrag__/de nyid 'khrugs rkyenaX 2gnyid chag rtsol bas dub/__/mang du smras shing bsil ba'i zas spyod thal/__/de yi rlung shas che ba'i stod 'tshang skyed/__/drag shul las dang me nyis shin tu dros/__/chang mang 'thung bas khrag shas che ba yis/__/stod 'tshang 'byung bas de phyir dbyeX baX 3yang /__/khrag dang rlung gnyis shas che tha dad 'gyur/__/rtags ni rtsa rgyud stong rgyug mnan mi bzod/__/chu mdog sngo'am yang na dmar la dwangs/__/lbu ba me lce chad 'dra myur du yal/__/mgo dang mig rus mur 'gram dpyi rked na/__/grang shum byed cing gnyid med me nyir snyegs/__/smin nas brang rgyab gzer zhing ltag mdud na/__/mjug rlung rngub dka' rngam rgod dbug mi bde/_/stod du cher 'tshang res 'ga' tshig mi thon/__/bye brag khrag shas mtho na zug gzer che/__/rlung shas che na stod la shin tu 'tshang /__/de phyir ngos zin sla yang stod tshad dang /__/'di gnyis ma nor phye ba gnad du gal/__bcos thabs dang po 'bras gsum ma nu bzhi/__/ko byi la dang gzer 'joms grang thang btang /__/de yis mi byer lam nas ldog par 'byung /__/de rjes rlung shas che na a gar nag__/shing kun dzA ti sug smel kha ru tshwa/__/li shi ko byi gzer 'joms bsnan pa btang /__/tsha shas che na shing kun kha ru tshwa/__/sug smel phri nas snying zho lang thang rtse/__/sha chen bsnan pa'i man ngag shes par bya/__/khrag gi gzer che a gar snying zho sha__/dzA ti cu gang gu rgum tsan dan gnyis/__/sro lo sbyar ba'i drang srong ar brgyad steng /__/ru rta hong len ma nu gzer sman bsnan/__/shin tu gzer che gsang sman sngon po ko byi la dang /__/rlung la bong nga khrag la 'dzim pa ste/__/tsha grang brtags te gong mar bsnan la btang /__/'bras gsum ma nu bzhi dang a gar gsum/__/ko byi snying zho dzA ti li shi dang /__/nA ga ge sar a byag ming can ser/__/ru rta sbyar ba'i a gar bcu dgu 'di/__/rlung shas che na chang gsar khrag che na/__/gzer 'joms thang gis phul bas stod 'tshang 'joms/__/yang na lci snum bsil ba'i a gar gsum/__/bzang drug 'bras gsum tsan+dan dkar dmar gnyis/__/gtsor smos ma nu sle tres sga skya dang /__/kaN+Da ka ri tig ta ba sha ka__/gu gul dkar nag gla rtsi ko byi la/__/sha chen 'dzim pa tsher sngon snying zho sha__/ge sar ru rta hong len a byag gnyis/__/ming can se 'bru sro lo ka ra sbyar/__/sbyor ba 'di ming a gar sum cu lnga/__/tshang zhing zlos med tshad ldan sbyar ba nyid/__/rus khu chu chang 'du ba bstun la phul/__/nad rigs spyi dang khyad par ri thang mtshams/__/gnyan tshad rlung gsum 'thab la bdud rtsi 'dra/__/stod gzer khrag rlung rigs kun 'joms pa'i mchog__/sman btang log pa'i nyes pa 'dir mi 'byung /__/ru rta a byag gzer 'joms hong len sbyar/__/bdud rtsi gsum sbyor zhes grags stod 'tshang sel/__/gzhan yang a gar brgyad phyi rgyud ar brgyad steng ma nu bzhi/__/bar skyur tsan+dan dmar po bsnan pa yi/__/bco lnga'i sbyor ba dag kyang skabs 'dir 'phrod/__/yang na gong ar brgyad steng ko byi bsnan pa yi/__/srog 'dzin dgu pa zhes grags stod 'tshang sel/__/de steng a byag tsher sngon ming can dang /__/gzer 'joms li shi sha chen li ga dur/__/tsan+dan gi waM sman chen sro lo dkar/__/gu gul hong len sbyar srog 'dzin nor bu zer/__ba chu bskol dbul/__/stod tshad stod 'tshang ngos ma zin la bsngags/__/ma nu bdun steng gsang sman bsnan pa yi/__/rat+na brgyad pas 'bam nad stod babs sel/__/ko byi bdun steng bdud rtsi snyom ldan bsnan/____/rat+na brgyad pas khrag rlung stod 'tshang sel/__/snyan nas brgyud pa'i zab mo'i man ngag go__/khyad par gtso bo nA ga ge sar la/__/bzang drug ma nu bzhi dang 'bras bu gsum/__/ru rta snying zho a byag gu gul gnyis/__/tsan+dan dkar dmar a gar brag zhun dang /__/ming can rnam gnyis sbyar ba'i nyer lnga yis/__/'du 'khrugs khrag rlung snying gzer smyo 'bog sel/___/khrag shas shin tu che na de yi steng /__/'bri mog hong len tshos btsod mdzo mo shing /__/ba sha ka bsnan chu grang dag gis dbul/__/a byag gzer 'joms sha chen gsang sman gsum/__/khong du btang dang bdug pas stod du rlung /__/mtha' dag 'phul nas kha lkug pa yang 'byed/__/ko byi a ru'i mjug ma ru rta dang /__/dbang lag sgog skya 'dzim pa kha ru tshwa/__/ar nag li shi tsher sngon gu gul nag__/rus zhun khaN+Da dang bcas bu ram gyi/__/ril bu dril ba rgod po rab 'joms te/__/rlung khrag bstun la chu chang gang 'os phul/__/khyad par 'khrul 'khor zab mo'i man ngag ni/__/rang lus rnam snang chos bdun ldan pa'i ngang /__/nad gdon ha yig nag por bsdus byas te/__/gzer mig steng du bsgom zhing rang mdun gyi/__/nam mkha'i dbus su a yig dkar po gsal/__/lag gnyis bgrad de pus mo'i steng du bkab/__/steng rlung mnan zhing snying khar yud tsam bskyil/__/slar yang lhag med sna bug gnyis nas 'bud/__/de dang mnyam du ha sgra bstud mar brjod/__/nad gdon ha yig rnam par bsdus pa de/__/snying kha nas thon a la thim par bsams/__/skye 'gag gnas gsum bral ba'i rang rig pa/__/stong gsal brjod du med pa'i ngang la bzhag__/shin tu phan pa'i man ngag mthar thug yin/__/dpyad du rlung shas che na drug bdun dang /__/dkar nag mtshams rnams rgyab mdun gzer dang bstun/__/me btsa' gdab zhing khrag shas che gyur na/__/drug mgo'am ni sgang rtsa gtar bar bya/__/rlung khrag gang shas che yang dpyad kyi mchog__/bum pa khyud 'khor sor ni bco brgyad dang /__/srid sor bcu gnyis kha zlum sor bzhi ste/__/mtshan nyid ldan pa'i lto bar gro ga'am/__/shog bu gang rung me sbar de nyid kyang /__/sbrang bu dmar khra me yi rang bzhin bskyed/__/nad gdon sha rus gting nas drang bar bsams/__/sngags 'di oM me ri dmar po sod/__bzlas la cung zad bskor tshul gyis/__/gzer mig de yi mdun rgyab gnyis dkar gdab/__/rlung 'khyil phyir drangs gzer zug yud la gcog__/gzhan yang nags ma'i rigs kyi shel ta dang /__/khyi rus lcags ri sngon po sod/__tham sod/__thum sod/__gis gtsos rus sna yongs rdzogs dang /__/cha mnyam khu ba 'dres par dkrugs byas te/__/zho tsam song dus blangs la shog bur bcug__/dgos tshe dmigs kyi steng du sbyar ba yis/__/skrangs dang 'bru mthor 'joms zhing khyad par du/__/nang gi chu ser phyir 'dren rlung gzer gcog__/brdab dang g.yang lhung zug kun sel bar lag len zhib par bu yig las shes/__byed/__/slob dpon zhal gdams snyan rgyud zab mo yin/__/gzer che ca ra khug tu chu mda' dang /__/gnam ma mthong ba'i chu rdos gzer steng bdug__/mar gsar la sogs bku mnyes rlung gsang gso/__kha zas bcud bsten rtsub dang yang ba spangs/__/spyod lam gos dro bgo zhing dal bar bsdad/__/mthun pa'i grogs bsten snying la 'bab par smra/__/rjes gcod sngar bshad gsang gsum me yis bsdams/__/des kyang ma zhi bzod med zug gzer ldan/__/zung gis thub pa 'chi la thug pa'i tshe/__/ar nag li shi dzA ti sga skya dang /__/rgyam tshwa pi ling a ru thar dur gnyis/__/rgya tshwa 'ol mo re lcag cha mnyam la/__/gtso bo dar ma'i gri sha thun gsum sdebs/__/rlung kha mtho na go snyod rtsi bo che/__/mkhris par dug nyung gser me bad kan la/__/lcum dkar rtsa ba snying rlung zho sha dang /__/sman chen 'bri tshil kha tshar btab pa de/__/bur smug gis bsgril ril bu chang gis phul/__/gnyis gsum 'khrus na rus khu'i lcag gis 'phul/__/rjes gcod spyi mthun sbyar bas bad khrag rlung /__/stod du 'tshang nas bzod par dka' ba'i nad/__/sel byed rgyal dbang rang byung rdo rje la/__/ye shes DAk+kis phul ba'i snying thig yin/__/nad gzhan ldang na so so'i kha 'dzin dang /__/sbyar te sngar smos zhi byed tshogs rnams bsten/__/de ltar gdams pa rgya mtsho'i nyi gzhon gyis/_/legs par phye ba'i zaXb doXn ut+pal la/__/gcig bsdus ngoX mtshaXr phreXng baX gsar pa 'dis/__/'gro rnams dus min 'chi ba las sgrol shog__/zhes khrag rlung gis bcos tshul nyung ngu 'di yang dpal ldan bla ma dam pa'i gsung gi bskul ba bzhin gzhon nu a b+ha yas sbyar ba'o//__//_!