JKW-KABUM-17-TSA-002-003

Previous Text Back to Volume PageNext Text

རྩ་དཀར་གྱི་བཅོས་ཚུལ་སྙིང་པོར་དྲིལ་བ་ཕན་བདེའི་ཕྲེང་བ།

Wylie title	rtsa dkar gyi bcos tshul snying por dril ba phan bde'i phreng ba
Location	mkhyen brtse'i bka' 'bum Volume 17, sde tshan 2, Text 3, Pages 164-180 (Folios 9b3 to 17b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rtsa dkar gyi bcos tshul snying por dril ba phan bde'i phreng ba. In 'jam dbyangs mkhyen brtse'i dbang po'i bka' 'bum, Vol. 17: 164-180. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa
Colophon	།ཅེས་རྩ་དཀར་གྱིས་བཅོས་ཚུལ་དོན་ཚང་སྙིང་པོར་དྲིལ་བ་ཕན་བདེའི་ཕྲེང་བ་ཞེས་བྱ་བ་འདི་ནི་དཔལ་ལྡན་བླ་མ་དམ་པ་ཆོས་ཉིད་མཚན་ཅན་གྱིས་ལྷ་རྫས་རེག་བྱ་དང་བཅས་ཏེ་བཀའ་སྩལ་གྱིས་ཡང་ཡང་བསྐུལ་བ་ལྟར་ཀུན་རྨོངས་པ་འཇིགས་མེད་མཁྱེན་བརྩེའི་མྱུ་གུས་མྱུར་དུ་སྦྱར་བ་སརྦ་ས་མནྟ་མངྒ་ལཾ།
	ces rtsa dkar gyis bcos tshul don tshang snying por dril ba phan bde'i phreng ba zhes bya ba 'di ni dpal ldan bla ma dam pa chos nyid mtshan can gyis lha rdzas reg bya dang bcas te bka' stsal gyis yang yang bskul ba ltar kun rmongs pa 'jigs med mkhyen brtse'i myu gus myur du sbyar ba sarba sa man+ta mang+ga laM

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྩ་དཀར་གྱི་བཅོས་ཚུལ་སྙིང་པོར་དྲིལ་བ་ཕན་བདེའི་ཕྲེང་བ་ཞེས་བྱ་བ་བཞུགས་སོ། །ཨོཾ་སྭ་སྟི་ཨརྠ། །རྒྱལ་ཀུན་མཁྱེན་རབ་ཉི་མ་གཞོན་ནུའི་བཅུད། །ཁྱོད་ཐུགས་གུ་རྒུམ་གསར་པས་བཏུང་བ་ལས། །ལེགས་བཤད་དམར་སེར་རལ་བའི་འཇོ་སྒེག་ཅན། །རྗེ་བཙུན་ཡོན་ཏན་མགོན་པོས་བདག་སྐྱོངས་ཤིག །རྣམ་པར་མ་གྱུར་ལུས་གནས་རྩ་དཀར་ཉིད། །འཕྲལ་བྱུང་རྐྱེན་གྱིས་འགྲམས་དང་འཁྲུགས་པ་ལས། །མི་བཟད་གདུང་བའི་ཞགས་པས་དམ་བཅིང་པར། །འགྲོལ་བྱེད་ཟབ་དོན་ནོར་བུའི་ཕྲེང་བ་སྤེལ། །ཞེས་པ་གྱེ༷ས་༡ཚུལ༷་རྒྱུ་༢རྐྱེན༷་ད༷བྱེ་བ༷་༣དང་། །བརྟ༷ག་༤ད༷ང་བཅོ༷ས་ཐབ༷ས་རྣམ་པ་ལྔ་ཡིས་བསྟན། །གྱེས༷་ཚུལ༷་སྲོག་རྩ་དཀར་ནག་གཉིས་པོ་སྟེ། །སྲོག་རྩ་ལས་བྱུང་ཁྲག་གི་ངོ་བོ་ཅན། །རོ་མ་དང་འབྲེལ་རྩ་ནག་གྱེན་དུ་གྱེས། །ཀླད་པ་ལས་བྱུང་ཆུ་ཁམས་རྩ་དཀར་ཏེ། །རྐྱང་མ་དང་འབྲེལ་ཡལ་ག་ཐུར་དུ་ཟུག །དེ་ཉིད་ནང་དུ་དོན་སྣོད་འབྲེལ་པ་དང་། །ཕྱི་རྩ་ཡན་ལག་འབྲེལ་བ་རྣམ་པ་གཉིས། །ནང་རྩ་དར་གྱི་དཔྱང་ཐག་བཅུ་གསུམ་སྟེ། །རླུང་གི་བཞི་ལས་གཉིས་པོ་བདུན་པ་ནས། །སྙིང་དང་འབྲེལ་ཞིང་གཞན་གཉིས་བཅུ་བདུན་ནས། །རྒྱུ་མར་འབྲེལ་དང་དེ་བཞིན་མཁྲིས་པའི་རྩ། །ཚིགས་པ་ལྔ་ནས་གློ་བར་འབྲེལ་བ་དང་། །བཅུ་དྲུག་དགུ་དང་བཅུ་གཅིག་གོ་རིམ་བཞིན། །ལོང་དང་མཆིན་མཁྲིས་དག་ལ་རྣམ་པར་འབྲེལ། །བད་ཀན་རྩ་བཞི་བཅུ་གཉིས་བཅུ་གཅིག་དང་། བཅུ་བཞི་བཅོ་བརྒྱད་པ་ནས་ཕོ་མཚེར་མཁལ། །ལྒང་པ་དང་འབྲེལ་དེ་ཀུན་འདུས་པ་ཡི། །རྩ་གཅིག་བཅུ་གསུམ་པ་ནས་བསམ་སེར་འབྲེལ། དེ་དག་མགྲིན་པ་ནས་བརྒྱུད་ཕྱི་རོལ་དུ། །བལྟར་མི་མངོན་ཕྱིར་ནང་གི་རྩ་རུ་བརྗོད། །ཕྱི་རྩ་སྦུ་གུ་འཇའ་བྱེད་རཏྣ་ཏེ། །རྩ་རྒྱུད་གསུམ་ལ་གཉིས་རེ་བྱེ་བས་དྲུག །དེ་ཡང་ཁོང་སྟོང་སྦུ་གུ་ཅན་གྱི་རྩ། །ཀླད་སྙིང་ལས་བྱུང་ལྟག་པའི་སྡུད་སྒོར་དོན། །ཚིགས་པ་དང་པོའི་གཡས་གཡོན་ཚོན་རེ་འགྲིམ། །ཚིགས་པ་ལྔ་ནས་གཞུངས་པའི་རྩ་དང་འབྲེལ། །བཅུ་གཉིས་ནས་ཐོན་བསམ་སེའུ་མཁལ་མར་འབྲེལ། །གཞུག་ཆུང་དཔྱི་ལེབ་མཚམས་བརྒྱུད་དཔྱི་མིག་དོན། །གུང་མཐེབ་བརྒྱུད་ནས་རྐང་མཐིལ་ནང་ངོས་འགྲོ། །གཉིས་ནི་བཅུ་བཞི་པ་ཡི་ཐད་ནས་གྱེས། །བརླ་སྒང་པུས་ཚིགས་ངར་གདོང་ཐུར་བར་འགྲིམ། །པིར་མགོར་རྐང་བའི་མཐེ་བོང་གིས་ངོས་འབྲེལ་ནས་གོང་དང་རྐང་མཐིལ་འདུས། བྱིན་བརླའི་ཕྱི་སུལ་སྲེ་ལོང་དང་དཔྱི་ལོང་གི་བར། འཇའ་བྱེད་ཀླད་མཁར་ནས་བྱུང་ལྟག་པ་ཡི། །སྤུ་འཁྱིལ་གཉིས་སུ་དོན་ནས་ཨན་སྟོང་འགྲིམ། །དེ་ནས་ཕྲག་བརྒྱུད་དཔུང་སོག་མཚམས་སུ་ནུབ། །སླར་ཡང་གཉིས་གྱེས་གཅིག་ནི་དཔུང་འཛུམ་གྱི། །ཚིགས་དམིག་ལུག་གཞུག་བརྒྱུད་ནས་གྲུ་མོར་སོང་། །གཅིག་ཤོས་ཕྱི་མཆན་ནས་འགྲིམ་གྲུ་མོར་བསྐོར། །དེ་ནས་ལག་པའི་མཐེ་བོང་འབྲེལ་བ་ཡིན། །རཏྣ་ཀླད་གཞུངས་ནས་བརྒྱུད་རྣ་ཤལ་གྱིས། །འོག་རོལ་ནས་ཐོན་སྒྲོག་རུས་ནང་དུ་ནུབ། །མཆན་ཁུང་ནས་འགྲིམ་གྲུ་མོའི་ཁུག་བརྒྱུད་ནས། །གཞུ་མཆོག་བར་དུ་ཐུར་བར་འགྲིམ་བྱས་ཏེ། །སྲིན་ལག་རྩེར་འབྲེལ་ལག་མཐིལ་གཉེར་མའི་འོག །གོང་གི་འཇའ་བྱེད་ཅན་དང་རྩ་སྣ་འབྲེལ། །དེ་ཕྱིར་ནང་གི་རྩ་རྒྱུད་འགྲམས་པ་ཡིས། །དོན་སྣོད་ལ་བབས་ན་ལུགས་སྣ་ཚོགས་སྟོན། །ཕྱི་རོལ་ཤ་ཆུ་རུས་ཚིགས་འབྲེལ་བའི་ཕྱིར། །སྦོམ་དང་འབྲི་ཞིང་ཞ་རེངས་བྱེད་པར་འགྱུར། །དེ་ལ༷་རྒྱུ་༢རྐྱེན༷་དྲག་ཤུལ་སྤྱོད་ལམ་གྱིས། །འགྲམས་དང་འཁྲུགས་སོགས་རིམས་དུག་ཚ་བའི་ནད། །རྩ་ལ་བབ་དང་མཚོན་གྱིས་བཅད་དམ་བརྡུངས། །རླུང་འཁྲུགས་རྩར་ཞུགས་རྩ་དཀར་ནད་དུ་འགྱུར། །དབྱེ༷་བ༷་༣ཚ་རྐྱེན་གྲང་རྐྱེན་རྣམ་པ་གཉིས། །རིམས་དུག་འགྲམས་སོགས་ལས་བྱུང་ཚ་བ་སྟེ། །བད་རླུང་ལས་བྱུང་རྩ་དཀར་གྲང་བ་འདོད། །དུས་ཀྱི་གསར་རྙིང་བབ་པས་ཐ་དད་དོན་སྣོད་མགོ་དང་ཡན་ལག་བཞི་སོགས་འགྱུར། །དེ་རྟགས་མགོ་དང་ཁ་མིག་ཡོ་ཞིང་འཕྲིག །དྲན་ཉམས་ལྐུགས་སམ་ཡང་ན་དབང་པོ་འཁྲུལ། །མགོ་འཁོར་ཡན་ལག་བཤལ་སྦྲིད་སྙིང་ལག་འདར། །གཞོག་གཅིག་བེམ་པས་ཚོར་བྲལ་སྐྲངས་སམ་སྙམ། །རྒྱུན་གཉིས་བསྡམས་སམ་ཡང་ན་སྐབས་མིན་རླུག །རེངས་འཁུམ་གཞུ་ལྟར་འགུག་གམ་རྭ་ལྟར་གྱོང་། །གཡོ་སྙམ་དྲན་མེད་བརྒྱལ་ལམ་ཟ་ཟི་འབྱུང་། །མེ་ལྟར་ཚའམ་རྡོ་ལྟར་གྲང་བ་སོགས། །ངོ་མཚར་ནད་རྟགས་སྣ་ཚོགས་སྟོན་པར་བྱེད། །བྱེ་བྲག་ཚ་རྐྱེན་རྩ་གྲིབ་ཆུ་མདོག་སེར། །གཟེར་ཟུག་ཆེ་ཞིང་ཡན་ལག་ཚ་དང་སྐམ། །གྲང་རྐྱེན་རྩ་དལ་ཆུ་ནི་དཀར་སེར་དྭངས། །ལུས་ཀུན་གཡོ་ཞིང་གྲང་ལ་བརྒྱལ་བ་འབྱུང་། །བབ་ས་སོ་སོར་དྲིས་པ་ཙམ་གྱིས་རྟོགས། །སྟོབས་ལྡན་འཆི་ལ་འབྲིང་པོ་བཅོས་ཀྱིས་འཚོ། །ཐ་མ་ཡུན་ལོན་རང་བཞིན་འཚོ་བར་གསུངས། །བཅོས་ཐབས་སྨན༷་དཔྱད༷་ཟས༷་སྤྱོད༷་རྣམ་པ་བཞི། །དེ་ཡང་དང་པོ་སྤྱི་དང་བྱེ་བྲག་གཉིས། །སྤྱི་བཅོས་ཚ་ཤས་ཆེ་ན་ཉ་ཕྱིས་དང་། །བཟང་དྲུག་གི་ཝཾ་ཨ་རུ་ཙནྡན་གཉིས། །ཨ་གར་བསེ་རུ་གླ་རྩི་རུ་རྟ་དང་། །པི་ལིང་ཤིང་ཚ་སྡིག་སྲིན་འབྲས་བུ་གསུམ། །གསེར་བྱེ་ལྕམ་པ་འབྲི་རྟ་ཟི་ར་གཉིས། །སྦྱར་བའི་ཉི་ཤུ་རྩ་ལྔའི་ཕྱེ་མ་བསྟེན། །ཡང་ན་རིན་ཆེན་གསེར་ཟངས་གཡུ་རྙིང་དང་། །ཐོག་ལྕགས་བྱེ་རུ་ཉ་ཕྱིས་རྣམ་པ་དྲུག །རྡོ་སྨན་སྦལ་རྒྱབ་དཀར་སྨུག་ཕོ་མོ་བཞི། །རྩི་སྨན་བཟང་པོ་དྲུག་དང་མ་གི་ཏ། །སྔོ་སྨན་འབྲི་རྟ་ས་འཛིན་ལྕམ་པ་སྟེ། །རིན་ཆེན་རྡོ་རྩི་སྔོ་སྦྱོར་ཟབ་མོ་བསྟེན། །གྲང་ཤས་ཆེ་ན་བསེ་རུ་སྨན་ཆེན་དང་། །ཨ་རུ་ཆུ་སེར་སྨན་གསུམ་མུ་ཟི་སེར། །མ་ནུ་ལ་སོགས་ནུས་ལྡན་བསྲེགས་ཐལ་བསྔགས། །ཚ་གྲང་སྟོད་སྨད་དོན་སྣོད་གར་བབ་ཀྱང་། །ཟུག་གཟེར་ཆེ་ན་བྱ་ཁྱུང་ལྔ་པ་ལ། །བྱི་རུ་མུ་ཏིག་རྒྱན་བཏགས་ལི་ཤི་དང་། །ཛྭ་ཏི་ཨ་ག་རུ་ཡིས་ལུས་དྲོད་རྒྱས། །སིནྡྷུ་ར་དང་ཁབ་ལེན་ཤིང་མངར་གྱི། །སྒྲོ་མཆུ་ལྡན་ལ་མཚལ་གྱི་ན་བཟའ་གསོལ། །ཚ་གྲང་སྦྱོར་སྡེ་གནད་དང་ལྡན་པ་དང་། །ཚ་ན་ཆུ་བསྐོལ་རླུང་ལྡན་མྱོས་ཁུས་ཕུལ། །སྨན་ནད་ཐོན་པ་ལན་འགའ་བཏང་བ་ཡིས། །ཕྱི་ནང་རྩ་དཀར་ནད་རིགས་ཀུན་ལ་བསྔགས། གཟའ་དང་ཀླུ་གདོན་བཅོས་རྡུག་གཉེན་པོར་འགྲོ། །འདི་ལ་སཱ་རིའི་བྱ་ཁྱུང་བཅུ་མི་དབང་སངས་རྒྱས་རྒྱ་མཚོའི་ལུགས་ཡིན་གསུམ་ཟེར། །དེ་སྟེང་དབང་ལག་ཨ་ཝ་རྡོ་རྒྱུས་དང་། །ཡུངས་ཀར་ཀླུ་བདུད་གུ་གུལ་དཀར་ནག་སྦྱར། །ཉི་ཤུའི་སྦྱོར་བས་ཆུ་རྒྱུས་རེངས་འཁུམ་དང་། །སྨྱོ་འབོག་བརྒྱལ་ནད་ཀུན་ལ་མཆོག་ཏུ་ཤིས། །ཁྱད་པར་སྤྱི་སྨན་བཟང་དྲུག་ཙནྡན་གཉིས། །ཨར་ནག་གི་ཝཾ་གླ་རྩི་ཉ་ཕྱིས་དང་། །བསེ་རུ་འབྲས་གསུམ་སྒ་པི་ཟི་ར་གཉིས། །རྒྱ་ཚྭ་སྡིག་སྲིན་ཤིང་མངར་ཤིང་ཚ་དང་། །འབྲི་རྟ་ས་འཛིན་ཉི་དགའ་བཅས་པ་ཡི། །སྦྱོར་བ་འདི་ལ་ནོར་བུ་བསམ་འཕེལ་ཟེར། །རིམས་འཁྲུགས་ཚ་བ་རྩ་དཀར་རྙིང་པ་དང་། །དྲེག་གྲུམ་མཛེ་དང་རེངས་འཁུམ་མཁལ་རྩ་བསྣད། །འགྲམས་འཁྲུགས་རྩ་ལ་བྱེར་ཞིང་ཞེན་པ་དང་། །གསོ་དཀའི་རིགས་ཀྱི་ནད་གཞི་ཀུན་ལ་ཕན། །དེ་སྟེང་གསེར་ཟངས་གཡུ་རྙིང་བྱི་རུ་དང་། །ཐོག་ལྕགས་ཉ་ཕྱིས་སྦལ་རྒྱབ་དཀར་སྨུག་བཞི། །དུག་འདོན་ལ་སོགས་ཚད་ལྡན་ལེགས་སྦྱར་ཏེ། །བཞི་ཐང་ཁུ་བས་འདམ་བཏགས་འཐེམ་པར་བྱ། །རིལ་བུ་སྲན་མ་ཙམ་དྲིལ་པར་བུར་བླུག །བྱིན་རླབས་རྟེན་འབྲེལ་སྙིང་པོས་ཤིས་པ་བརྗོད། །འདི་ནི་བསམ་འཕེལ་རཏྣའི་སྦྱོར་བ་སྟེ། །བཞི་བརྒྱ་རྩ་བཞིའི་ནད་ཀུན་མི་འཇོམས་མེད། །ཁྱད་པར་དུག་སྨུག་ཚར་བ་བྱེར་རྙིང་དང་། །རྩ་ནད་ཚ་གྲང་དྲེག་གྲུམ་ཆུ་སེར་མཛེ། །སྟེང་འོག་འབྱུང་པོའི་གདོན་ཀུན་ངེས་པར་འཇོམས། །ཡང་ན་བཟང་དྲུག་ཐུན་རེ་ཤིང་མངར་གཉིས། །གཙང་མའི་བྱང་སེམས་དཀར་དམར་ནེ་ཙོའི་ཀླད། །ཐུན་ཕྱེད་ཀུན་མཉམ་རྒྱ་མཚལ་ལྕོག་ལ་མ། །དེ་དག་ཀུན་དང་མཉམ་པའི་ཉ་ཕྱིས་ཏེ། །གྲང་ན་གར་ཆང་ཚ་ན་སྤྱི་བཞུར་གྱིས། །བསྒྲུངས་ཆུའི་ཕུལ་བས་རྩ་ནད་ཀུན་ལ་བསྔགས། །འདི་ལ་བྱང་ལུགས་འཕྲུལ་གྱི་སྡེར་མོ་ཟེར། །བྱེ་བྲག་མགོར་བབ་ཕྱི་རྩ་ལུམ་གྱིས་གདུལ། །ནང་རྩར་བབ་ན་སྦལ་མདུང་གངས་ཐིག་དང་། །ཅོང་ཞི་དོམ་མཁྲིས་གླ་གུལ་ཨ་རུ་ར། །རུ་རྟ་ཨ་བྱག་ཆུ་རྩ་བོང་ང་དཀར། །པྲ་གུ་སྦྱར་བ་ཚ་གྲང་རྟ་ཡིས་ཕུལ། །ཐུན་མོང་ཁྱུང་སྟེང་བྱི་རུ་མུ་ཏིག་དང་། །ཉ་ཕྱིས་ལི་ཤི་ཛཱ་ཏི་ཨ་གར་ནག །ཁབ་ལེན་ལུག་མིག་ཨུཏྤལ་སིནྡྷུ་ར། །བིལ་བ་ཨ་འབྲས་ཏིག་ཏ་གངས་ཐིག་པ། །མཚལ་དཀར་འབྲུག་རུས་རྡོ་ཡི་ཀླད་པ་དང་། །གུ་རྒུམ་ཤིང་མངར་ཨ་བྱག་ཀ་ར་སྦྱར། །ཁྱུང་ཆེན་ཉེར་ལྔས་མགོ་ཡི་རྩ་ནད་དང་། །རྩ་དཀར་ཀླད་གཟེར་མགོ་འཁོར་གཉའ་རེངས་དང་། །ལྟག་པ་དགྱེ་རྒུ་མི་ཤེས་རྭ་ལྟར་གྱོང་། །བརྒྱལ་འཐིབ་སྨྱོ་འབོག་སེལ་བའི་བདུད་རྩི་སྟེ། །སྔོན་མེད་ངོ་མཚར་གདམས་པའི་བཅུད་ཐིག་ཡིན། །དར་རྩ་བསྣད་འགྲམས་མགོ་ལྕི་ས་འཛིན་དང་། །རྒྱ་ཚྭ་ཤུ་དག་རུ་རྟ་ཤིང་མངར་རྣམས། །བ་ཆུར་སྦྱར་བའི་སྣ་སྦྱངས་བཏང་བ་བསྔགས། །ནང་རྩར་བབ་ན་སྦལ་མདུང་གངས་ཐིག་མཚལ། །ཅོང་ཞི་མུ་ཏིག་ཨ་ཝ་རྡོ་རྒྱུས་དང་། །མཐིང་རྒྱུས་ཆ་མཉམ་ཤིང་མངར་བཟང་པོ་དྲུག །དོམ་མཁྲིས་ལ་སོགས་མཁྲིས་སྣ་ཚོགས་ཚད་ཀུན། ཁ་ཚར་བཏབ་པ་གར་ཆང་དག་གིས་ཕུལ། །དེ་དང་འཕྲུལ་གྱི་སྡེར་མོ་ལྟག་པ་སྤྲད། །དོན་སྣོད་གར་བབ་གོང་བཤད་སྦྱོར་བའི་སྟེང་། །སྙིང་ལ་ཛཱ་ཏི་རུ་རྟ་ཨར་ནག་བསྣན། །གློ་ལ་ཤིང་མངར་རྒུན་འབྲུམ་གླ་སྒང་བསྣན། །མཆིན་པར་ཨུཏྤལ་བྲག་ཞུན་བ་ཤ་ཀ །མཚེར་པར་མ་ནུ་པ་ཏོལ་པི་པི་ལིང་། མཁལ་མར་བཙོད་དང་ཞུ་མཁན་རྒྱ་སྐྱེགས་བསྣན། །ཕོ་བར་མ་ནུ་རྒྱ་ཚྭ་པ་ཏོ་ལ། །རྒྱུ་ལོང་བོང་དཀར་དུག་ཉུང་གླ་སྒང་བསྣན། །མཁྲིས་པར་ཏིག་ཏ་དུག་ཉུང་གསེར་མེ་ཏོག །ལྒང་པར་ལྕམ་པ་རྒྱ་ཚྭ་སྡིག་པ་བསྣན། །ཡན་ལག་རྩ་དཀར་ད་ལིས་ཀྱི་ལྕེ་དང་། །ཤིང་མངར་གསུམ་པོ་ཁཎྜར་སྦྱར་བའི་སྟེང་། །བཟང་དྲུག་འབྲས་གསུམ་ཨར་ནག་ཙནྡན་གཉིས། །ཚོས་གསུམ་ཚོས་ཞུ་མཁན་བཙོད་ཀ་ར་བསྣན་པའི་སྨན་མཆོག་འདིས། །རྩ་ནད་སྤྱི་དང་ཡན་ལག་ཞ་སྦྲིད་སྐམ། །སེལ་བྱེད་ད་ལིས་བཅོ་བརྒྱད་ཞེས་སུ་གྲགས། །གཞན་ཡང་གཉན་དང་བསྡོངས་ན་གོང་བཤད་ཀྱི། །ཁྱུང་ལྔའི་སྦྱོར་བ་ཐ་དད་བསྟེན་པའམ། །ཁྱུང་སྟེང་གི་ཝཾ་དོམ་མཁྲིས་སྦལ་རྒྱབ་དང་། །རྒྱ་མཚལ་བསེ་རུ་ཉ་ཕྱིས་ཙནྡན་གཉིས། །ལི་ཤི་ཆུ་སེར་སྨན་གསུམ་ཨ་གར་ནག །འབྲི་རྟ་ས་འཛིན་གུ་གུལ་སྟག་ཤ་སྦྱར། །ལོ་བརྒྱད་ཨེ་ཀྲོས་འདམ་བཏགས་རིལ་བུར་དྲིལ། །མང་ཉུང་ནད་སྟོབས་སྦྱར་ལ་བཏང་བ་ཡིས། །རྩ་དཀར་བྱེར་འགྲམས་ཁྱད་པར་གཉན་ནད་དང་། །བསྡོངས་ཏེ་སྐེ་མཇིང་ཡན་ལག་སྐྲངས་པ་སེལ། །ཁྲག་རླུང་ལྡན་པས་སྟོད་དུ་དབུགས་འཚང་ཞིང་། །དཔུང་མིག་གཟེར་དང་ལག་པ་བསྒུལ་སྐྱོད་དཀའ། །དེ་ལ་གོང་གི་ཕྱེ་མ་གང་རིགས་དང་། །ཨ་གར་སྦྱོར་བ་ལྟག་པ་སྤྲད་ལ་བཏང་། ཨ་གར་བཅོ་ལྔ། ཁྱད་པར་ཨ་གར་ཉི་ཤུ། ཀོ་བྱི་བཅོ་ལྔ་སོགས། །ཁྱད་པར་མཁལ་མར་བབས་སམ་མཁལ་རྩ་འགྲམས། །དེ་ལ་ཨ་རུ་བཟང་དྲུག་ཉ་ཕྱིས་དང་། །ས་འཛིན་དམར་གསུམ་མཁལ་ཞོ་འབྲས་སྣ་གསུམ། །བསེ་རུ་ཤིང་ཚ་ཤུག་ཚེར་ཨརྫ་ཀ །རུ་རྟ་ཟི་ར་བྲག་ཞུན་སྡིག་སྲིན་དང་། །ཤིང་མངར་སྦྱོར་བའི་གསེར་མདོག་ཉེར་ལྔ་སྟེ། །ཕན་ཡོན་མཁལ་འགྲམས་རྩ་དཀར་གྲང་རིགས་དང་། །རྐང་རྐེད་རུས་ཚིགས་དཔྱི་མིག་ཡན་ལག་ཟུག །ཁྲག་གིས་བསྐྱེད་པའི་མཁལ་འབྲས་གཟེར་བ་འཇོམས། །གཞན་ཡང་འདུ་བའི་རིགས་ཀུན་མི་སེལ་མེད། །ཞལ་གདམས་སྙན་བརྒྱུད་མན་ངག་ཟབ་མོ་ཡིན། །གྲང་ཤས་ཆེ་དང་ཤ་སྐམ་རིགས་ཀུན་ལ། །འབྲས་བུ་གསུམ་གྱི་སྨན་མར་ཚད་ལྡན་སྟེང་། །བཟང་དྲུག་ཤིང་མངར་དབང་ལག་འདམ་བུ་བཅས། ཁ་ཚར་བཏབ་པ་དགོང་དང་ཐོ་རངས་བསྟེན། །ཀུན་ལ་ཚ་ན་བདུད་རྩི་རྣམ་ལྔའི་སྟེང་། །གླ་རིལ་བསྲེ་ཞིང་གྲང་ན་ལུག་རིལ་བསྣན། །ཆང་གི་ཁུ་བས་བཞུར་དང་འདུས་པ་ལ། །རྩ་བ་ལྔ་དང་གླ་བའི་རིལ་མ་བསྣན། །མྱོས་བྱེད་སྙིང་ཁུར་ཚོས་པར་བཙོས་པ་དེས། །རླངས་ལུམས་ཆུ་ལུམས་བཅིང་ལུམས་གང་རིགས་བྱ། །ཡང་ན་རང་བྱུང་ཆུ་ཚན་མུ་ཟི་ཅོང་ཞི་བྲག་ཞུན་གསུམ་གྱི་ཆུ་ཚན་མཆོག་ཏུ་བཤད་བསྟེན་ཡང་ཤིས། །བྱུག་པ་སྤང་སྤོས་ཤུག་ཚེར་གོ་སྙོད་དང་། །སྤོས་དཀར་རྡོ་རྒྱུས་ཤུ་དག་གཡེར་མ་བུལ། །ཤིང་མངར་སྦྱར་བ་མར་རམ་ཕག་ཚིལ་གྱིས། །བྱུག་ཅིང་ཚབས་ཆེ་བྱང་བ་དུད་པ་དང་། །བོང་ང་ནག་པོ་བསྣན་པས་མཆོག་ཏུ་ཕན། །ཙན་གཉིས་ཆུ་སེར་སྨན་གསུམ་དབང་པོ་ལག །གུ་གུལ་དེ་ཝ་ད་རུ་རྒྱ་སྤོས་དང་། །སྤང་སྤོས་སླེ་ཏྲེས་གོ་སྙོད་ཤུག་ཚེར་ཅན། །སེང་ལྡེང་ཁཎྜ་མར་གསར་དག་གིས་བྱུག །ཟས་སྤྱོད་གྲིབ་གདོན་གིས་བསྐྱེད་རྩ་དཀར་སེལ། །གྲང་ཤས་ཆེ་ན་ཙནྡན་དཀར་པོ་ཕྲི། །ལན་ཚྭ་སྡེབས་ཏེ་ཏིལ་གྱི་མར་ཁུས་བྱུག །ཤིན་ཏུ་རེངས་འཁུམ་གསོ་དཀའ་གངས་ཐིག་དང་། །སྦལ་མདུང་བྱིའུ་མགོ་ཁབ་ལེན་རྡོ་རྒྱུས་གཉིས། །བ་ནུ་ལ་སོགས་ཚད་ལྡན་སྦྱར་བའི་སྟེང་། །ཁ་ཚར་ཆུ་སེར་སྨན་གསུམ་རུ་རྟ་དང་། །ཛཱ་ཏི་ལི་ཤི་གོ་སྙོད་བསྣན་པ་ཡི། །རྩི་མར་རྙིང་པ་ལོ་ལོན་བསྐོལ་བར་བཏབ། །བྱུག་པས་རྩ་དཀར་རེངས་འཁུམ་རྩ་འགྲམས་དང་། །གཟའ་གདོན་ཀླུ་གདོན་རྩ་བྱེར་འཁུམ་པ་སེལ། །བཟོད་མེད་ཟུག་ཆེ་གོང་བཤད་བྱ་ཁྱུང་ཉི་ཤུ་པ་ཁྱུང་ལྔ་ཡང་། །དྲི་ཆུས་བྱུག་པས་ཕྲལ་དུ་གཟེར་ཟུག་གཅོག །ཀུན་ཀྱང་མ་ཐུབ་རྙིང་ན་རྩ་སྦྱོང་བཏང་། །དཔྱད་དུ་སྤྱི་ལ་གསར་དུས་ཚབས་ཆེ་ན། །མཐིལ་༤བཞི་བཅུ་གསུམ་༥ལྟག་ཟུར་༦སྤུ་འཁྱིལ་དང་། །མཐེ་བོང་པིར་མགོ་སོར་མོ་ཉི་ཤུའི་མདུན། །ནེ་འུ་ལེ་རྣམས་སྤྲ་མེས་བསྲེག་པར་འོག་ནས་འབྱུང་བ་ལྟར་བྱ། །ཚ་ཤས་ཆེ་ན་སྟོད་བབ་རུ་ཐུང་དང་། །སྨད་བབ་ལོང་རྩ་ལ་སོགས་སྐབས་སྦྱར་གཏར། །གྲང་ན་དྲུག་༡བདུན་༢དཀར་ནག་༣མཚམས་རྣམས་བསྲེག །གཏར་ག་སྤང་ཞིང་བྱེ་བྲག་མགོར་བབ་ན། །ཕྱི་རྩར་ཨན་༡སྟོང་འགྲམ་དང་སྡུད་༢སྒོ་དང་། །ལྟག་༣པའི་སྤུ་འཁྱིལ་བསྲེགས་ཅིང་ནང་རྩ་ལ། །སྤྱི་གཙུག་༡དཀར་ནག་༢མཚམས་དང་མེ་ལོང་༣མཐིལ། །རྐང་ལག་མཐིལ་༩བཞི་སྲིན་ལག་བཞི་༡༡ཡི་རྩེར། །སྡུད་སྒོ་༡༠བཞི་རྣམས་གསེར་གྱི་ཏེལ་པས་བསྲུངས། །ལུས་ཀྱི་ལས་དང་དྲོད་ཉམས་སྤྱི་༡གཙུག་དང་། །ལྟེ་བ་༢མཚན་བར་༣རྣམས་སུ་མེ་བཙའ་གདབ། །གཞོག་རེངས་དེ་ཡི་ཕྱོགས་ཀྱི་རྩེ་མགོ་༡དང་། །ཡན་ལག་སོ་སོའི་སོར་མོའི་ངོས་རྣམས་བསྲེགས། །སྨྲ་བྱེད་ལྐུག་ན་གཡས་རྩེ་མགོ་དང་སོར་མོ་གཡོན་གཉིས་ཀར་༡༢བསྲེགས། །ཁ་མིག་ཡོ་ན་དེ་ཕྱོགས་རྣ་བའི་རྒྱབ། །ལྟག་ཟུར་སྤུ་འཁྱིལ་༡བསྲེགས་ཅིང་བྱང་ཁོག་ལ། །སྡུད་༢སྒོ་དྲུག་༣པ་ཨན་སྟོང་དང་པོའི་འགྲམ། །སྒྲོག་༤རུས་གཤོང་དང་སྐེ་སྟོང་༥དཀར་ནག་༨མཚམས། །སོག་པའི་མཐིལ་༧བསྲེགས་ཁྱད་པར་དོན་སྣོད་ལ། །སྙིང་ལ་སྣོད་ཀ་༡གཏར་ཞིང་མཐེ་བོང་༢བསྲེགས། །དེ་བཞིན་གློ་བར་དྲུག་༣མགོ་མཛུབ་མོ་དང་༤། །མཆིན་པར་རུ་ཐུང་༥གུང་མོ་༦མཚེར་པ་ལ། །རྟ་མཐུར་༧སྲིན་ལག་༨མཁལ་མར་བྱིན་གཞུག་༩དང་། །མཐེའུ་ཆུང་༡༠ཕོ་བར་རྭ་༡༡དང་སྲིན་ལག་༡༢ཏེ། །མཁྲིས་པར་གཤའ་༡༢རིང་གུང་མོ་རྒྱུ་མ་༡༣ལ། །དེ་ཡི་རྩ་༡༤དང་མཐེ་བོང་༡༥བསམ་སེ་འུར། །བྱིན་ཀྱོག་ལྒང་པར་ལོང་རྩ་༡༧མཐེབ་༡༨ཆུང་དང་། །ལོང་ལ་མཛུབ་༡༩མོ་དེ་རྣམས་གཏར་ཞིང་བསྲེགས། །ཁྱད་པར་སྙིང་ལ་ཚིགས་པ་བདུན་༡པ་དང་། །དེ་བཞིན་གློ་བར་བཞི་༢དང་མཆིན་པར་དགུ༣། །མཚེར་པར་བཅུ་གཅིག་༤མཁལ་མར་བཅུ་བཞི་པ ༥། །མཁྲིས་པར་བཅུ་༦པ་ཕོ་བར་བཅུ་གཉིས་༧པ། །བསམ་སེར་བཅུ་གསུམ་༨ལོང་ལ་བཅུ་དྲུག་༩སྟེ། །རྒྱུ་མར་བཅུ་བདུན་༡༠ལྒང་པར་བཅོ་༡༡བརྒྱད་པ། །རང་རང་གསང་ཡིན་ཚད་དང་བསྟུན་ལ་བསྲེགས། །རྐང་པ་བཤལ་ན་ཚིག་པ་བཅུ་བཞི་༡པ། །གཡས་གཡོན་རྩ་ནག་༢གཉིས་དང་ན་གུ་༥གཉིས། །དཔྱི་མིག་༦པུས་ཚིགས་༧ཕྱི་ནང་རྐང་མཐིལ་བསྲེགས། །ལག་པར་སྒྲོག་༡རུས་༢གཤོང་དང་འཇའ་༤བྱེད་གཉིས། །དཔུང་ཚིགས་༦ཕྱི་ནང་རཏྣ་༨ལག་མཐིལ་༡༠བསྲེགས། །རླུང་ཤས་ཆེ་ན་དང་པོ་ཁ་གསུམ་གདབ། །མདོར་ན་ནད་མིག་གར་ཡོད་སྤྲ་བས་བསྲེགས། །ཡང་ན་རྒྱ་ནག་འཕྲུལ་གྱི་མེ་བཙལ་ནི། །ཤུག་པའི་བྱང་བུར་རཾ་ཡིག་བཞི་ལྟག་སྤྲད། །བྲིས་ལ་དར་དམར་སྟེང་བཀབ་ནད་མིག་སྟེང་། །བཞག་པའི་རཾ་དཀྱིལ་དར་ཐོག་སྤྲ་མེས་བསྲེགས། །དུ་བ་མ་ཆད་བར་དུ་སྔགས་ཨ་ན་ཡ། འདི་གདབ། །དེ་ཡི་རྩ་འབྲུམ་རྩ་དཀར་རིགས་ཀུན་འཇོམས། །རྒྱ་གར་མེ་བཙའ་ཉི་མས་བསྲེགས་པ་ནི། །ནད་དམིགས་སྟེང་དུ་ཤོག་དམར་དར་དམར་བཀབ། །དེ་སྟེང་ཤུག་དམར་བྱང་བུ་ཤོག་བུ་ཙམ། །ཚ་བ་གསུམ་གྱི་ཆུ་ལ་ཞག་གཅིག་སྦངས། །སྐམ་ནས་མཚལ་གྱིས་རཾ་བརྒྱད་མགོ་རུབ་བྲི། །སྔགས་ཨོཾ་ཨ་ན་ལར་ཀ་ཛ་རཾ། སརྦ་རོ་ག་ད་ཧ་ན་རཾ། སརྦ་གྲ་ཧ་ན་ད་ཧ་ན་རཾ། འདི་ཉེར་གཅིག་བགྲང་ལ་ཕུ་ཡིས་བཏབ། །སྔ་དྲོའི་དུས་སུ་ཤར་བལྟས་ཤེལ་གྱི་མེ། །ཉི་མའི་དཀྱིལ་འཁོར་བསམ་ལ་དེ་འོད་ཀྱི། །གདོན་བགེགས་ནད་ཀུན་ལྷག་མེད་བསྲེག་པར་བསམས། །གཟའ་ནད་ཆུ་སེར་རྩ་ནད་ཀུན་ལ་ཕན། །རྟེན་འབྲེལ་མེ་བཙའ་རང་ཉིད་ལྷ་མོའི་སྐུ། །དམར་གསལ་ཞལ་གཅིག་ཕྱག་གཉིས་སྤྱན་གསུམ་གཡོ། །ཕྱག་གཡས་མེ་ཡི་ཞགས་པ་གཡོན་པ་ཡི། །སྡིགས་མཛུབ་མཛད་པས་ནད་གདོན་ཚར་བཅད་བསྒོམ། །ནད་དམིགས་སྟེང་དུ་དར་དམར་ཆུང་ངུ་དང་། །དེ་སྟེང་ཤོག་དམར་ཤུག་པའི་འཁོར་ལོ་རྣམས། །རིམ་བཞིན་བརྩེགས་མར་དཔེ་འུ་རིས་ལྟར་འབྲི། ཨོཾ་ཧྐྐྵྨླྺྼྻྃ་ཧཱུྃ། སྤྲ་མེའམ་ནི་ཤེལ་གྱི་མེ་འོད་ཀྱིས། །བསྲེགས་བྱས་སྔགས་ཨོཾ་ཤྲཱི་མ་ཧཱ་ཀཱ་ལ་ཧཱུྃ། འདི་ཉི་ཤུ་རྩ་གཅིག་བཟླས། །ཧ་ཧ་ཞེས་པའི་སྒྲ་དང་བཅས་ཏེ་སྦར། །དེ་ཚེ་མཁའ་མཐས་གཏུགས་པའི་འགྲོ་ཀུན་དང་། །ཁྱད་པར་ནད་པ་དེ་ཡི་ནད་གདོན་ཀུན། །ནད་དམིགས་དེར་ཐིམ་ཌཱཀྐི་ཡེ་ཤེས་མེས། །དུག་གསུམ་རྒྱུ་དང་བཅས་པ་བསྲེགས་པར་བསམ། །དེ་ནས་མི་ལྡོག་ཕྱིར་དུ་སྔགས་ཨོཾ་ཧ་ཀྵ་མ་ལ་ཝ་ར་ཡྃ་སྭཱ་ཧཱ། འདི་ཉིད། །ཉེར་གཅིག་བཟླས་མཐར་བྱུང་ཚོར་སྤྲོས་པ་ཡིས། །མ་བཅིངས་རྣམ་ཀུན་མཆོག་ལྡན་སྟོང་ཉིད་ཀློང་། །བསམ་གཞག་བྲལ་བའི་ངང་ནས་ཅི་བདེར་བཞག །གར་མིག་འབྲས་མ་གཏོགས་ཡང་བཏབ་རུང་རྒྱས་ཚད་མ་གཏོགས་པའི། །ནད་རྣམས་ཀུན་འཇོམས་ཁྱད་པར་གདོན་ལ་བསྔགས། །གཞན་ཡང་ཆུ་དང་རྭ་དང་རིན་པོ་ཆེ། །རྡོ་ཡི་མེ་བཙའ་ལ་སོགས་སྐབས་བསྟུན་སྦྱར། །ཁྲག་ཤས་ཆེ་ན་གང་ཉེའི་རྩ་ལ་གཏར། །ཁྱད་པར་ཟབ་མོའི་སྔགས་ཀྱི་བཅོས་པ་ནི། རྩ་དཀར་ཀྲ་ག་སོད། དམར་ཀྲ་སོད། དམར་ཤིག་ཤིག་སོད། །ཅེས་བཟླས་མདའ་འཕང་གོ་ལྡོག་མནན་པས་སེལ། །ཡང་ན་རྒྱ་ཤོག་གཙང་མར་རྒྱ་སྣག་གིས། །སྔགས་སི་ཏི་མཱ་ར་ཡ་ཕཊ྄ཿ འདི་བྲིས་ནས་ལྟོ་སྟོང་དུས་སུ་བཏང་། །ཀུན་གྱི་སེལ་དཀའ་དངུལ་ཆུ་བྱང་བ་དང་། །རྒྱ་ཚ་ཆ་མཉམ་དུར་བྱིད་རེ་རལ་པ། །གུར་གུམ་མ་གི་ཤུག་ཚེར་དེ་ཡི་སྟེང་། ཤིང་མངར་ཉ་ཕྱིས་དྲི་ཆུས་རིལ་བུར་དྲིལ། །རྩ་སྦྱོངས་ལག་འདི་ཡི་ལག་ལེན་བུ་ཡིག་ལས་གསལ་ལེན་ཚུལ་བཞིན་བཏང་བ་གཅེས། ཁ་ཟས་བསིལ་དང་ཡང་བའི་རིགས་རྣམས་སྤངས། །དྲོད་བཅུད་ལྡན་པ་བསྟེན་ཞིང་ཁྱད་པར་དུ། །ཚ་བ་བྲི་ནས་སྦྲང་ཆང་སྦྱར་བ་འམ། །གར་ཆང་བུ་རམ་བཏབ་བཏང་མཆོག་ཏུ་ཤིས། །སྐེམ་པོ་རྒྱས་ཕྱིར་བཅུད་ལྡན་སྨན་མར་བཟའ། །སྤྱོད་ལམ་མི་ཐེག་ཁུར་སོགས་དྲག་ཤུལ་ལས། །རོལ་སིལ་ཆུ་ཀླུང་སྒྲ་དང་བརླན་སྟེང་ཉལ། །ལྟོ་དང་གཉིད་ཆག་ཁྱད་པར་སློང་རྐྱེན་སྤངས། །ཤིན་ཏུ་དྲོ་ཞིང་ཡིད་མཐུན་དབེན་པ་རུ། །ལུས་ངག་ཡིད་གསུམ་མ་འཁྲུགས་དལ་བར་འདུག །མདོར་ན་རླུང་ལྡན་བཅུད་བསྟེན་མེ་ཚུགས་བྱ། །མཁྲིས་པར་རྩ་དང་ལྟོ་ནས་སྦྱངས་བྱ་ཞིང་། །བད་ཀན་རང་བྱུང་བཅོས་མའི་ཆུ་ཚན་ཞུགས། །འདུས་པའི་ནད་ལ་དེ་ཀུན་འདྲེས་པར་བཅོས། །ཁྱད་པར་མ་ནོར་ངོས་ཟིན་བརྟགས་པའི་ཚུལ། །ཤིན་ཏུ་གཅེས་ཕྱིར་ཡོན་ཏན་རྒྱུད་ལས་ཀྱང་། །གང་ཞིག་རྩ་དཀར་ནད་ཚུལ་མི་ཤེས་པར། །གཟའ་ཕོག་ཟེར་བའི་སྨན་པ་བླུན་པོ་སྟེ། །ཞེས་དང་དེ་བཞིན་ཚུལ་འདིར་གོམས་བྱས་ནས། །ནད་གཞན་ཕལ་གྱི་བཅོས་ཚུལ་རྟོགས་འགྱུར་ཕྱིར། །ཐབས་འདི་རྨ་རྣམས་ཀུན་གྱི་ལོག་གནོན་དང་། །རིམས་དུག་བརླ་གཉན་ནད་ཀྱི་མདེ་ཁ་ཡིན། །ཞེས་གསུངས་དེ་ཕྱིར་ཞིབ་མོའི་བློ་ཡིས་སྤྱོད། །ཚུལ་འདིར་ཚད་མེད་སྙིང་རྗེའི་གདོང་པ་བཞིར། །ལུང་རྟོགས་འདྲེན་བྱེད་བརྒྱད་ཀྱི་འཇོ་སྒེག་ཅན། །གང་གི་བཀའ་སྩལ་ཨུཏྤལ་གཞོན་ནུའི་ཆུན། །གྲུབ་པར་མཛོད་ཅེས་རྣ་བའི་རྒྱན་དུ་བྱིན། །དེ་ཕྱིར་རྒྱུད་དང་མན་ངག་ཆུ་གཏེར་ལས། །ལེགས་འོངས་ཕན་བདེ་ནོར་བུའི་འཁྲི་ཤིང་མཆོག །གཞན་ཕན་བརྩོན་པའི་ཤིང་རྟས་ཉེར་དྲངས་ཏེ། །ངོ་མཚར་པདྨ་གསར་པའི་ཕྲེང་བར་སྤེལ། །སླར་ཡང་དེ་ལས་བྱུང་བའི་རྣམ་དཀར་དགེ །ཕུན་ཚོགས་དོན་གཉིས་སྤྲིན་གྱི་རོལ་མོ་ཡིས། །འགྲོ་ཀུན་རྣམ་འགྱུར་གདུང་བ་ཡོངས་བསལ་ཏེ། །ཐར་པ་མཆོག་གི་དགའ་ཚལ་འཕེལ་གྱུར་ཅིག །ཅེས་རྩ་དཀར་གྱིས་བཅོས་ཚུལ་དོན་ཚང་སྙིང་པོར་དྲིལ་བ་ཕན་བདེའི་ཕྲེང་བ་ཞེས་བྱ་བ་འདི་ནི་དཔལ་ལྡན་བླ་མ་དམ་པ་ཆོས་ཉིད་མཚན་ཅན་གྱིས་ལྷ་རྫས་རེག་བྱ་དང་བཅས་ཏེ་བཀའ་སྩལ་གྱིས་ཡང་ཡང་བསྐུལ་བ་ལྟར་ཀུན་རྨོངས་པ་འཇིགས་མེད་མཁྱེན་བརྩེའི་མྱུ་གུས་མྱུར་དུ་སྦྱར་བ་སརྦ་ས་མནྟ་མངྒ་ལཾ།། །། ༈

[edit]

rtsa dkar gyi bcos tshul snying por dril ba phan bde'i phreng ba/ rtsa dkar gyi bcos tshul snying por dril ba phan bde'i phreng ba zhes bya ba bzhugs so/__/oM swa sti ar+tha/__/rgyal kun mkhyen rab nyi ma gzhon nu'i bcud/__/khyod thugs gu rgum gsar pas btung ba las/__/legs bshad dmar ser ral ba'i 'jo sgeg can/__/rje btsun yon tan mgon pos bdag skyongs shig__/rnam par ma gyur lus gnas rtsa dkar nyid/__/'phral byung rkyen gyis 'grams dang 'khrugs pa las/__/mi bzad gdung ba'i zhags pas dam bcing par/__/'grol byed zab don nor bu'i phreng ba spel/__/zhes pa gyeXs 1tshulaX rgyu 2rkyenaX daXbye baX 3dang /__/brtaXg 4daXng bcoXs thabaXs rnam pa lnga yis bstan/__/gyesaX tshulaX srog rtsa dkar nag gnyis po ste/__/srog rtsa las byung khrag gi ngo bo can/__/ro ma dang 'brel rtsa nag gyen du gyes/__/klad pa las byung chu khams rtsa dkar te/__/rkyang ma dang 'brel yal ga thur du zug__/de nyid nang du don snod 'brel pa dang /__/phyi rtsa yan lag 'brel ba rnam pa gnyis/__/nang rtsa dar gyi dpyang thag bcu gsum ste/__/rlung gi bzhi las gnyis po bdun pa nas/__/snying dang 'brel zhing gzhan gnyis bcu bdun nas/_/rgyu mar 'brel dang de bzhin mkhris pa'i rtsa/__/tshigs pa lnga nas glo bar 'brel ba dang /__/bcu drug dgu dang bcu gcig go rim bzhin/__/long dang mchin mkhris dag la rnam par 'brel/__/bad kan rtsa bzhi bcu gnyis bcu gcig dang /__bcu bzhi bco brgyad pa nas pho mtsher mkhal/__/lgang pa dang 'brel de kun 'dus pa yi/__/rtsa gcig bcu gsum pa nas bsam ser 'brel/__de dag mgrin pa nas brgyud phyi rol du/__/bltar mi mngon phyir nang gi rtsa ru brjod/__/phyi rtsa sbu gu 'ja' byed rat+na te/__/rtsa rgyud gsum la gnyis re bye bas drug__/de yang khong stong sbu gu can gyi rtsa/__/klad snying las byung ltag pa'i sdud sgor don/__/tshigs pa dang po'i g.yas g.yon tshon re 'grim/__/tshigs pa lnga nas gzhungs pa'i rtsa dang 'brel/__/bcu gnyis nas thon bsam se'u mkhal mar 'brel/__/gzhug chung dpyi leb mtshams brgyud dpyi mig don/__/gung mtheb brgyud nas rkang mthil nang ngos 'gro/__/gnyis ni bcu bzhi pa yi thad nas gyes/__/brla sgang pus tshigs ngar gdong thur bar 'grim/__/pir mgor rkang ba'i mthe bong gis ngos 'brel nas gong dang rkang mthil 'dus/__byin brla'i phyi sul sre long dang dpyi long gi bar/__'ja' byed klad mkhar nas byung ltag pa yi/__/spu 'khyil gnyis su don nas an stong 'grim/__/de nas phrag brgyud dpung sog mtshams su nub/__/slar yang gnyis gyes gcig ni dpung 'dzum gyi/__/tshigs dmig lug gzhug brgyud nas gru mor song /__/gcig shos phyi mchan nas 'grim gru mor bskor/_/de nas lag pa'i mthe bong 'brel ba yin/__/rat+na klad gzhungs nas brgyud rna shal gyis/__/'og rol nas thon sgrog rus nang du nub/__/mchan khung nas 'grim gru mo'i khug brgyud nas/__/gzhu mchog bar du thur bar 'grim byas te/__/srin lag rtser 'brel lag mthil gnyer ma'i 'og__/gong gi 'ja' byed can dang rtsa sna 'brel/__/de phyir nang gi rtsa rgyud 'grams pa yis/__/don snod la babs na lugs sna tshogs ston/__/phyi rol sha chu rus tshigs 'brel ba'i phyir/__/sbom dang 'bri zhing zha rengs byed par 'gyur/__/de laX rgyu 2rkyenaX drag shul spyod lam gyis/__/'grams dang 'khrugs sogs rims dug tsha ba'i nad/__/rtsa la bab dang mtshon gyis bcad dam brdungs/__/rlung 'khrugs rtsar zhugs rtsa dkar nad du 'gyur/__/dbyeX baX 3tsha rkyen grang rkyen rnam pa gnyis/__/rims dug 'grams sogs las byung tsha ba ste/__/bad rlung las byung rtsa dkar grang ba 'dod/__/dus kyi gsar rnying bab pas tha dad don snod mgo dang yan lag bzhi sogs 'gyur/__/de rtags mgo dang kha mig yo zhing 'phrig__/dran nyams lkugs sam yang na dbang po 'khrul/__/mgo 'khor yan lag bshal sbrid snying lag 'dar/__/gzhog gcig bem pas tshor bral skrangs sam snyam/__/rgyun gnyis bsdams sam yang na skabs min rlug__/rengs 'khum gzhu ltar 'gug gam rwa ltar gyong /__/g.yo snyam dran med brgyal lam za zi 'byung /__/me ltar tsha'am rdo ltar grang ba sogs/__/ngo mtshar nad rtags sna tshogs ston par byed/__/bye brag tsha rkyen rtsa grib chu mdog ser/__/gzer zug che zhing yan lag tsha dang skam/__/grang rkyen rtsa dal chu ni dkar ser dwangs/__/lus kun g.yo zhing grang la brgyal ba 'byung /__/bab sa so sor dris pa tsam gyis rtogs/__/stobs ldan 'chi la 'bring po bcos kyis 'tsho/__/tha ma yun lon rang bzhin 'tsho bar gsungs/__/bcos thabs smanaX dpyadaX zasaX spyodaX rnam pa bzhi/__/de yang dang po spyi dang bye brag gnyis/__/spyi bcos tsha shas che na nya phyis dang /__/bzang drug gi waM a ru tsan+dan gnyis/__/a gar bse ru gla rtsi ru rta dang /__/pi ling shing tsha sdig srin 'bras bu gsum/__/gser bye lcam pa 'bri rta zi ra gnyis/__/sbyar ba'i nyi shu rtsa lnga'i phye ma bsten/__/yang na rin chen gser zangs g.yu rnying dang /__/thog lcags bye ru nya phyis rnam pa drug__/rdo sman sbal rgyab dkar smug pho mo bzhi/__/rtsi sman bzang po drug dang ma gi ta/__/sngo sman 'bri rta sa 'dzin lcam pa ste/__/rin chen rdo rtsi sngo sbyor zab mo bsten/__/grang shas che na bse ru sman chen dang /__/a ru chu ser sman gsum mu zi ser/__/ma nu la sogs nus ldan bsregs thal bsngags/__/tsha grang stod smad don snod gar bab kyang /__/zug gzer che na bya khyung lnga pa la/__/byi ru mu tig rgyan btags li shi dang /__/dz+wa ti a ga ru yis lus drod rgyas/__/sin+d+hu ra dang khab len shing mngar gyi/__/sgro mchu ldan la mtshal gyi na bza' gsol/__/tsha grang sbyor sde gnad dang ldan pa dang /__/tsha na chu bskol rlung ldan myos khus phul/__/sman nad thon pa lan 'ga' btang ba yis/__/phyi nang rtsa dkar nad rigs kun la bsngags/__gza' dang klu gdon bcos rdug gnyen por 'gro/__/'di la sA ri'i bya khyung bcu mi dbang sangs rgyas rgya mtsho'i lugs yin gsum zer/__/de steng dbang lag a wa rdo rgyus dang /__/yungs kar klu bdud gu gul dkar nag sbyar/__/nyi shu'i sbyor bas chu rgyus rengs 'khum dang /__/smyo 'bog brgyal nad kun la mchog tu shis/__/khyad par spyi sman bzang drug tsan+dan gnyis/__/ar nag gi waM gla rtsi nya phyis dang /__/bse ru 'bras gsum sga pi zi ra gnyis/__/rgya tshwa sdig srin shing mngar shing tsha dang /__/'bri rta sa 'dzin nyi dga' bcas pa yi/__/sbyor ba 'di la nor bu bsam 'phel zer/__/rims 'khrugs tsha ba rtsa dkar rnying pa dang /__/dreg grum mdze dang rengs 'khum mkhal rtsa bsnad/__/'grams 'khrugs rtsa la byer zhing zhen pa dang /__/gso dka'i rigs kyi nad gzhi kun la phan/__/de steng gser zangs g.yu rnying byi ru dang /__/thog lcags nya phyis sbal rgyab dkar smug bzhi/__/dug 'don la sogs tshad ldan legs sbyar te/__/bzhi thang khu bas 'dam btags 'them par bya/__/ril bu sran ma tsam dril par bur blug__/byin rlabs rten 'brel snying pos shis pa brjod/__/'di ni bsam 'phel rat+na'i sbyor ba ste/__/bzhi brgya rtsa bzhi'i nad kun mi 'joms med/__/khyad par dug smug tshar ba byer rnying dang /__/rtsa nad tsha grang dreg grum chu ser mdze/__/steng 'og 'byung po'i gdon kun nges par 'joms/__/yang na bzang drug thun re shing mngar gnyis/__/gtsang ma'i byang sems dkar dmar ne tso'i klad/__/thun phyed kun mnyam rgya mtshal lcog la ma/__/de dag kun dang mnyam pa'i nya phyis te/__/grang na gar chang tsha na spyi bzhur gyis/__/bsgrungs chu'i phul bas rtsa nad kun la bsngags/__/'di la byang lugs 'phrul gyi sder mo zer/__/bye brag mgor bab phyi rtsa lum gyis gdul/__/nang rtsar bab na sbal mdung gangs thig dang /__/cong zhi dom mkhris gla gul a ru ra/__/ru rta a byag chu rtsa bong nga dkar/__/pra gu sbyar ba tsha grang rta yis phul/__/thun mong khyung steng byi ru mu tig dang /__/nya phyis li shi dzA ti a gar nag__/khab len lug mig ut+pal sin+d+hu ra/__/bil ba a 'bras tig ta gangs thig pa/__/mtshal dkar 'brug rus rdo yi klad pa dang /__/gu rgum shing mngar a byag ka ra sbyar/__/khyung chen nyer lngas mgo yi rtsa nad dang /__/rtsa dkar klad gzer mgo 'khor gnya' rengs dang /__/ltag pa dgye rgu mi shes rwa ltar gyong /__/brgyal 'thib smyo 'bog sel ba'i bdud rtsi ste/__/sngon med ngo mtshar gdams pa'i bcud thig yin/__/dar rtsa bsnad 'grams mgo lci sa 'dzin dang /__/rgya tshwa shu dag ru rta shing mngar rnams/__/ba chur sbyar ba'i sna sbyangs btang ba bsngags/__/nang rtsar bab na sbal mdung gangs thig mtshal/__/cong zhi mu tig a wa rdo rgyus dang /__/mthing rgyus cha mnyam shing mngar bzang po drug__/dom mkhris la sogs mkhris sna tshogs tshad kun/__kha tshar btab pa gar chang dag gis phul/__/de dang 'phrul gyi sder mo ltag pa sprad/__/don snod gar bab gong bshad sbyor ba'i steng /__/snying la dzA ti ru rta ar nag bsnan/__/glo la shing mngar rgun 'brum gla sgang bsnan/__/mchin par ut+pal brag zhun ba sha ka__/mtsher par ma nu pa tol pi pi ling /__mkhal mar btsod dang zhu mkhan rgya skyegs bsnan/__/pho bar ma nu rgya tshwa pa to la/__/rgyu long bong dkar dug nyung gla sgang bsnan/__/mkhris par tig ta dug nyung gser me tog__/lgang par lcam pa rgya tshwa sdig pa bsnan/__/yan lag rtsa dkar da lis kyi lce dang /__/shing mngar gsum po khaN+Dar sbyar ba'i steng /__/bzang drug 'bras gsum ar nag tsan+dan gnyis/__/tshos gsum tshos zhu mkhan btsod ka ra bsnan pa'i sman mchog 'dis/_/rtsa nad spyi dang yan lag zha sbrid skam/__/sel byed da lis bco brgyad zhes su grags/_/gzhan yang gnyan dang bsdongs na gong bshad kyi/__/khyung lnga'i sbyor ba tha dad bsten pa'am/__/khyung steng gi waM dom mkhris sbal rgyab dang /__/rgya mtshal bse ru nya phyis tsan+dan gnyis/__/li shi chu ser sman gsum a gar nag__/'bri rta sa 'dzin gu gul stag sha sbyar/__/lo brgyad e kros 'dam btags ril bur dril/__/mang nyung nad stobs sbyar la btang ba yis/__/rtsa dkar byer 'grams khyad par gnyan nad dang /__/bsdongs te ske mjing yan lag skrangs pa sel/__/khrag rlung ldan pas stod du dbugs 'tshang zhing /__/dpung mig gzer dang lag pa bsgul skyod dka'/__/de la gong gi phye ma gang rigs dang /__/a gar sbyor ba ltag pa sprad la btang /_a gar bco lnga/_khyad par a gar nyi shu/_ko byi bco lnga sogs/_/khyad par mkhal mar babs sam mkhal rtsa 'grams/__/de la a ru bzang drug nya phyis dang /__/sa 'dzin dmar gsum mkhal zho 'bras sna gsum/__/bse ru shing tsha shug tsher ardza ka__/ru rta zi ra brag zhun sdig srin dang /__/shing mngar sbyor ba'i gser mdog nyer lnga ste/__/phan yon mkhal 'grams rtsa dkar grang rigs dang /__/rkang rked rus tshigs dpyi mig yan lag zug__/khrag gis bskyed pa'i mkhal 'bras gzer ba 'joms/__/gzhan yang 'du ba'i rigs kun mi sel med/__/zhal gdams snyan brgyud man ngag zab mo yin/__/grang shas che dang sha skam rigs kun la/__/'bras bu gsum gyi sman mar tshad ldan steng /__/bzang drug shing mngar dbang lag 'dam bu bcas/__kha tshar btab pa dgong dang tho rangs bsten/__/kun la tsha na bdud rtsi rnam lnga'i steng /__/gla ril bsre zhing grang na lug ril bsnan/__/chang gi khu bas bzhur dang 'dus pa la/__/rtsa ba lnga dang gla ba'i ril ma bsnan/__/myos byed snying khur tshos par btsos pa des/__/rlangs lums chu lums bcing lums gang rigs bya/__/yang na rang byung chu tshan mu zi cong zhi brag zhun gsum gyi chu tshan mchog tu bshad bsten yang shis/__/byug pa spang spos shug tsher go snyod dang /__/spos dkar rdo rgyus shu dag g.yer ma bul/__/shing mngar sbyar ba mar ram phag tshil gyis/__/byug cing tshabs che byang ba dud pa dang /__/bong nga nag po bsnan pas mchog tu phan/__/tsan gnyis chu ser sman gsum dbang po lag__/gu gul de wa da ru rgya spos dang /__/spang spos sle tres go snyod shug tsher can/__/seng ldeng khaN+Da mar gsar dag gis byug__/zas spyod grib gdon gis bskyed rtsa dkar sel/__/grang shas che na tsan+dan dkar po phri/__/lan tshwa sdebs te til gyi mar khus byug__/shin tu rengs 'khum gso dka' gangs thig dang /__/sbal mdung byi'u mgo khab len rdo rgyus gnyis/__/ba nu la sogs tshad ldan sbyar ba'i steng /__/kha tshar chu ser sman gsum ru rta dang /__/dzA ti li shi go snyod bsnan pa yi/__/rtsi mar rnying pa lo lon bskol bar btab/__/byug pas rtsa dkar rengs 'khum rtsa 'grams dang /__/gza' gdon klu gdon rtsa byer 'khum pa sel/__/bzod med zug che gong bshad bya khyung nyi shu pa khyung lnga yang /__/dri chus byug pas phral du gzer zug gcog__/kun kyang ma thub rnying na rtsa sbyong btang /__/dpyad du spyi la gsar dus tshabs che na/__/mthil 4bzhi bcu gsum 5ltag zur 6spu 'khyil dang /__/mthe bong pir mgo sor mo nyi shu'i mdun/__/ne 'u le rnams spra mes bsreg par 'og nas 'byung ba ltar bya/__/tsha shas che na stod bab ru thung dang /__/smad bab long rtsa la sogs skabs sbyar gtar/__/grang na drug 1bdun 2dkar nag 3mtshams rnams bsreg__/gtar ga spang zhing bye brag mgor bab na/__/phyi rtsar an 1stong 'gram dang sdud 2sgo dang /__/ltag 3pa'i spu 'khyil bsregs cing nang rtsa la/__/spyi gtsug 1dkar nag 2mtshams dang me long 3mthil/__/rkang lag mthil 9bzhi srin lag bzhi 11yi rtser/__/sdud sgo 10bzhi rnams gser gyi tel pas bsrungs/__/lus kyi las dang drod nyams spyi 1gtsug dang /__/lte ba 2mtshan bar 3rnams su me btsa' gdab/__/gzhog rengs de yi phyogs kyi rtse mgo 1dang /__/yan lag so so'i sor mo'i ngos rnams bsregs/__/smra byed lkug na g.yas rtse mgo dang sor mo g.yon gnyis kar 12bsregs/__/kha mig yo na de phyogs rna ba'i rgyab/__/ltag zur spu 'khyil 1bsregs cing byang khog la/__/sdud 2sgo drug 3pa an stong dang po'i 'gram/__/sgrog 4rus gshong dang ske stong 5dkar nag 8mtshams/__/sog pa'i mthil 7bsregs khyad par don snod la/__/snying la snod ka 1gtar zhing mthe bong 2bsregs/__/de bzhin glo bar drug 3mgo mdzub mo dang 4/__/mchin par ru thung 5gung mo 6mtsher pa la/__/rta mthur 7srin lag 8mkhal mar byin gzhug 9dang /__/mthe'u chung 10pho bar rwa 11dang srin lag 12te/__/mkhris par gsha' 12ring gung mo rgyu ma 13la/__/de yi rtsa 14dang mthe bong 15bsam se 'ur/__/byin kyog lgang par long rtsa 17mtheb 18chung dang /__/long la mdzub 19mo de rnams gtar zhing bsregs/__/khyad par snying la tshigs pa bdun 1pa dang /__/de bzhin glo bar bzhi 2dang mchin par dgu3/__/mtsher par bcu gcig 4mkhal mar bcu bzhi pa_5/__/mkhris par bcu 6pa pho bar bcu gnyis 7pa/__/bsam ser bcu gsum 8long la bcu drug 9ste/__/rgyu mar bcu bdun 10lgang par bco 11brgyad pa/__/rang rang gsang yin tshad dang bstun la bsregs/__/rkang pa bshal na tshig pa bcu bzhi 1pa/__/g.yas g.yon rtsa nag 2gnyis dang na gu 5gnyis/__/dpyi mig 6pus tshigs 7phyi nang rkang mthil bsregs/__/lag par sgrog 1rus 2gshong dang 'ja' 4byed gnyis/__/dpung tshigs 6phyi nang rat+na 8lag mthil 10bsregs/__/rlung shas che na dang po kha gsum gdab/__/mdor na nad mig gar yod spra bas bsregs/__/yang na rgya nag 'phrul gyi me btsal ni/__/shug pa'i byang bur raM yig bzhi ltag sprad/__/bris la dar dmar steng bkab nad mig steng /__/bzhag pa'i raM dkyil dar thog spra mes bsregs/__/du ba ma chad bar du sngags a na ya/__'di gdab/__/de yi rtsa 'brum rtsa dkar rigs kun 'joms/__/rgya gar me btsa' nyi mas bsregs pa ni/__/nad dmigs steng du shog dmar dar dmar bkab/__/de steng shug dmar byang bu shog bu tsam/__/tsha ba gsum gyi chu la zhag gcig sbangs/__/skam nas mtshal gyis raM brgyad mgo rub bri/__/sngags oM a na lar ka dza raM/__sarba ro ga da ha na raM/__sarba gra ha na da ha na raM/__'di nyer gcig bgrang la phu yis btab/__/snga dro'i dus su shar bltas shel gyi me/__/nyi ma'i dkyil 'khor bsam la de 'od kyi/__/gdon bgegs nad kun lhag med bsreg par bsams/__/gza' nad chu ser rtsa nad kun la phan/__/rten 'brel me btsa' rang nyid lha mo'i sku/__/dmar gsal zhal gcig phyag gnyis spyan gsum g.yo/__/phyag g.yas me yi zhags pa g.yon pa yi/__/sdigs mdzub mdzad pas nad gdon tshar bcad bsgom/__/nad dmigs steng du dar dmar chung ngu dang /__/de steng shog dmar shug pa'i 'khor lo rnams/__/rim bzhin brtsegs mar dpe 'u ris ltar 'bri/__oM h+k+k+Sh+m+l+W+R+Ya~M hU~M/_spra me'am ni shel gyi me 'od kyis/_/bsregs byas sngags oM shrI ma hA kA la hU~M/__'di nyi shu rtsa gcig bzlas/__/ha ha zhes pa'i sgra dang bcas te sbar/__/de tshe mkha' mthas gtugs pa'i 'gro kun dang /__/khyad par nad pa de yi nad gdon kun/__/nad dmigs der thim DAk+ki ye shes mes/__/dug gsum rgyu dang bcas pa bsregs par bsam/__/de nas mi ldog phyir du sngags oM ha k+Sha ma la wa ra ya~M swA hA/__'di nyid/__/nyer gcig bzlas mthar byung tshor spros pa yis/__/ma bcings rnam kun mchog ldan stong nyid klong /__/bsam gzhag bral ba'i ngang nas ci bder bzhag__/gar mig 'bras ma gtogs yang btab rung rgyas tshad ma gtogs pa'i/__/nad rnams kun 'joms khyad par gdon la bsngags/__/gzhan yang chu dang rwa dang rin po che/__/rdo yi me btsa' la sogs skabs bstun sbyar/__/khrag shas che na gang nye'i rtsa la gtar/__/khyad par zab mo'i sngags kyi bcos pa ni/__rtsa dkar kra ga sod/__dmar kra sod/__dmar shig shig sod/__/ces bzlas mda' 'phang go ldog mnan pas sel/__/yang na rgya shog gtsang mar rgya snag gis/__/sngags si ti mA ra ya phaTa?H__'di bris nas lto stong dus su btang /__/kun gyi sel dka' dngul chu byang ba dang /____/rgya tsha cha mnyam dur byid re ral pa/__/gur gum ma gi shug tsher de yi steng /__shing mngar nya phyis dri chus ril bur dril/__/rtsa sbyongs lag 'di yi lag len bu yig las gsal len tshul bzhin btang ba gces/__kha zas bsil dang yang ba'i rigs rnams spangs/__/drod bcud ldan pa bsten zhing khyad par du/__/tsha ba bri nas sbrang chang sbyar ba 'am/__/gar chang bu ram btab btang mchog tu shis/__/skem po rgyas phyir bcud ldan sman mar bza'/__/spyod lam mi theg khur sogs drag shul las/__/rol sil chu klung sgra dang brlan steng nyal/__/lto dang gnyid chag khyad par slong rkyen spangs/__/shin tu dro zhing yid mthun dben pa ru/__/lus ngag yid gsum ma 'khrugs dal bar 'dug__/mdor na rlung ldan bcud bsten me tshugs bya/__/mkhris par rtsa dang lto nas sbyangs bya zhing /__/bad kan rang byung bcos ma'i chu tshan zhugs/__/'dus pa'i nad la de kun 'dres par bcos/__/khyad par ma nor ngos zin brtags pa'i tshul/__/shin tu gces phyir yon tan rgyud las kyang /__/gang zhig rtsa dkar nad tshul mi shes par/__/gza' phog zer ba'i sman pa blun po ste/__/zhes dang de bzhin tshul 'dir goms byas nas/__/nad gzhan phal gyi bcos tshul rtogs 'gyur phyir/__/thabs 'di rma rnams kun gyi log gnon dang /__/rims dug brla gnyan nad kyi mde kha yin/__/zhes gsungs de phyir zhib mo'i blo yis spyod/__/tshul 'dir tshad med snying rje'i gdong pa bzhir/__/lung rtogs 'dren byed brgyad kyi 'jo sgeg can/__/gang gi bka' stsal ut+pal gzhon nu'i chun/__/grub par mdzod ces rna ba'i rgyan du byin/__/de phyir rgyud dang man ngag chu gter las/__/legs 'ongs phan bde nor bu'i 'khri shing mchog__/gzhan phan brtson pa'i shing rtas nyer drangs te/__/ngo mtshar pad+ma gsar pa'i phreng bar spel/__/slar yang de las byung ba'i rnam dkar dge__/phun tshogs don gnyis sprin gyi rol mo yis/__/'gro kun rnam 'gyur gdung ba yongs bsal te/__/thar pa mchog gi dga' tshal 'phel gyur cig__/ces rtsa dkar gyis bcos tshul don tshang snying por dril ba phan bde'i phreng ba zhes bya ba 'di ni dpal ldan bla ma dam pa chos nyid mtshan can gyis lha rdzas reg bya dang bcas te bka' stsal gyis yang yang bskul ba ltar kun rmongs pa 'jigs med mkhyen brtse'i myu gus myur du sbyar ba sarba sa man+ta mang+ga laM//__//_!