JKCL-KABUM-10-THA-037

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 10, Text 37, Pages (Folios 1a to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: . Bir, H.P.: Khyentse Labrang, 2012.
Genre	Pilgrimage Guides - gnas yig  ·  Place or Sacred Site Guides - gnas bshad - skor tshad

1 Texts in this Section (sde tshan or chos tshan)

331-336	བྱང་རྭ་སྒྲེང་རྒྱལ་བའི་དབེན་གནས་ལ་བསྟོད་ཅིང་སྨོན་ལམ་དུ་བྱ་བ་རྒྱལ་བ་དགྱེས་པའི་མཆོད་སྤྲིན། byang rwa sgreng rgyal ba'i dben gnas la bstod cing smon lam du bya ba rgyal ba dgyes pa'i mchod sprin Place or Sacred Site Guides - gnas bshad - skor tshad   ·   Prayers - smon lam   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །བྱང་རྭ་སྒྲེང་རྒྱལ་བའི་དབེན་གནས་ལ་བསྟོད་ཅིང་སྨོན་ལམ་དུ་བྱ་བ་རྒྱལ་བ་དགྱེས་པའི་མཆོད་སྤྲིན་ཞེས་བྱ་བ་བཞུགས་སོ། ། ན་མོ་གུ་རུ་ཤཱཀྱ་མུ་ནི་ཡེ། རྒྱལ་བ་ཉི་མ་འཇིག་རྟེན་གསུམ་གྱི་མགོན། །ཐུབ་པའི་དབང་པོ་བྱམས་པ་འཇམ་དབྱངས་དང་། །པད་དཀར་འཆང་བ་འཕགས་མ་སྒྲོལ་མ་སོགས། །དགྱེས་པར་རོལ་པའི་དགའ་བའི་ཚལ་ཆེན་པོ། །འཕགས་ཚོགས་བཞུགས་པའི་བསྟི་གནས་ཉམས་དགའ་བ། །ས་ཡི་དཔྱད་ལེགས་དྲི་ཞིམ་ངད་པ་འཐུལ། །ལྷ་ཤུག་ལྗོན་པའི་ཚལ་ཆེན་སྟུགས་པོ་འཁྲིགས། །སྤྲུལ་པའི་བྱ་རིགས་སྣ་ཚོགས་སྐད་སྙན་སྒྲོགས། །ཡན་ལག་བརྒྱད་ལྡན་ཆུ་ཀླུང་དལ་གྱིས་འབབ། །སྤང་ལྗང་གཡུ་ཡི་མཎྜལ་བཀྲམ་པ་ལ། །ལྷ་མིའི་མེ་ཏོག་མཚར་སྡུག་མཛེས་པས་ཁེངས། །རིན་ཆེན་སྣ་ཚོགས་ཁམས་ཀྱི་རྡོ་བ་བཀྲ། །མཁའ་འགྲོ་དཔའ་བོ་བུང་བའི་གླུ་དབྱངས་སྒྲོགས། །དྲང་སྲོང་རིག་འཛིན་གྲུབ་པ་ཏིལ་གོང་ལྟར། །མངོན་སུམ་བཞུགས་པའི་གནས་འདི་བདེ་བ་ཅན། །ས་འདིར་འཕོས་པ་ལྟ་བུའི་ངོ་མཚར་བྱིན། །ལྷར་བཅས་ཀུན་ཏུ་དགའ་བའི་དོ་ར་འདིར། །སྣང་མཐའ་པདྨ་ལས་གྲོལ་དངོས་སྣང་བ། །དཱི་པཾ་ཀཱ་རའི་ཐུགས་ཀྱི་སྲས་གཅིག་པུ། །དཀོན་མཆོག་འབངས་ཞེས་རྒྱལ་བའི་འབྱུང་གནས་ཆེ། །བྱིན་བརླབས་སྤྲུལ་པའི་ལྷ་ཁང་འཇམ་པའི་དབྱངས། །མངོན་སུམ་བཞུགས་པའི་འཛམ་གླིང་རྟེན་མཆོག་འདི། །ཁ་བ་རི་པའི་བསོད་ནམས་དཔལ་དུ་འཁྲུངས། །ཀྱེ་མ་འདི་ནི་འོག་མིན་ཞིང་ཁམས་ཆེ། །ཕྱོགས་བཞི་མཚམས་བརྒྱད་ལྗོན་ཤིང་རིན་པོ་ཆེ། །སངས་རྒྱས་བྱང་སེམས་དཔག་མེད་དགྱེས་པའི་འཛུམ། །འོད་ཟེར་དྲྭ་བས་ཀུན་ཏུ་རབ་མཛེས་ཤིང་། །བདུད་རྩིའི་ཆུ་གཏེར་ནད་གདོན་སྡིག་སྒྲིབ་སེལ། །ནོར་བུའི་བྲག་རི་བ་གམ་བཀོད་པ་མཛེས། །ཆོས་དང་ནོར་གྱི་གཏེར་ཁས་རབ་ཏུ་གཏམས། །རྒྱལ་བ་དགྱེས་པའི་དགའ་ཚལ་ཆེན་པོ་འདི། །ཆོས་བཟང་ལྷ་ཡི་འདུན་ས་དངོས་དང་མཚུངས། །འཇམ་པའི་རྡོ་རྗེ་གུར་གུམ་ལྷུན་པོ་ལ། །འཆར་ཁའི་ཉི་གཞོན་གསར་པས་འཁྱུད་པ་འདྲ། །བལྟ་བས་མི་ངོམས་མཚན་དཔེ་དཔལ་དུ་འབར། །སྲིད་ཞི་ཀུན་གྱི་ཁྱབ་བདག་ཆེན་པོར་སྣང་། །རྒྱལ་བ་དཀོན་མཆོག་འབངས་ཀྱི་རྣམ་པར་འཕྲུལ། །རྒྱལ་བའི་འབྱུང་གནས་མཐོང་ན་དགའ་བ་ལ། །རིགས་གསུམ་འཕགས་ཚོགས་སྤྲུལ་པའི་འཁོར་གྲངས་མེད། །གསེར་རི་ཚར་དུ་དངར་བ་རིམ་པར་བརྒྱུད། །རྒྱལ་བའི་གསང་བ་གསུམ་གྱིས་བྱིན་བརླབས་པའི། །རྟེན་མཆོག་ནོར་བུའི་ལྷུན་པོ་ལྟར་སྤུངས་པ། །འཛམ་གླིང་འགྲོ་བ་ཀུན་གྱི་བསོད་ནམས་རྟེན། །ཚོགས་གཉིས་ཡོངས་སུ་རྫོགས་པའི་དཔལ་དུ་གྲུབ། །ངུར་སྨྲིག་འཛིན་པའི་འདུས་སྡེ་ངང་པའི་ཚོགས། །ཆོས་སྤྱོད་རྣམ་བཅུར་གཡེལ་བ་མེད་པ་དང་། །ཞི་དུལ་བག་ཡོད་ལྡན་པའི་ཕྲེང་བ་ཆེ། །ལྷ་མི་ཀུན་གྱིས་ཕྱག་བྱར་འོས་པའི་གནས། །རྟེན་དང་བརྟེན་པ་ས་དང་ལྷུན་པོ་འདི། །ཇི་སྲིད་གནས་པར་དེ་སྲིད་མི་ཉམས་པར། །རྡོ་རྗེ་གདན་ལྟར་བརྟན་པར་བཞུགས་གསོལ་འདེབས། །བདག་གིས་བསགས་དང་གཞན་གྱིས་བསགས་པ་ཡི། །དུས་གསུམ་དགེ་བའི་ཚོགས་རྣམས་བློས་བླངས་ཏེ། །རྒྱལ་བ་དགྱེས་པའི་མཆོད་སྤྲིན་ཆེན་པོར་སྟོབས། །ཀུན་ཀྱང་བསྟན་པ་རྒྱས་པའི་རྒྱུ་རུ་བསྔོ། །བདག་ཀྱང་སྐྱེ་དང་ཚེ་རབས་ཐམས་ཅད་དུ། །བཀའ་གདམས་རྣམ་ཐར་གཙང་མ་འཛིན་པ་དང་། །ཇོ་བོ་ཡབ་སྲས་སྙིང་གི་ཟེ་འབྲུར་བཞུགས། །དངོས་ཉམས་རྨི་ལམ་ཀུན་ཏུ་མཇལ་བར་ཤོག །ཐེག་མཆོག་གསུང་གི་བདུད་རྩིས་འཚོ་བ་དང་། །བདག་གི་སྒོ་གསུམ་བྱ་བ་ཅི་བགྱིད་པ། །ཕ་མ་སེམས་ཅན་དོན་དུ་འགྱུར་བ་དང་། །ཇི་སྲིད་འཁོར་བ་མ་སྟོང་བར་གནས་ཤོག །འབྲེལ་པ་ཐོབ་དང་མིང་ཙམ་ཐོས་པ་ཡང་། །ངན་སོང་སྡུག་བསྔལ་མཚོ་ལས་རབ་སྒྲོལ་ཞིང་། །ཐར་པའི་ས་བོན་རྒྱུད་ལ་ཐེབས་པ་དང་། །མཐར་གྱིས་བྱང་ཆུབ་ཆེན་པོའི་འབྲས་ཐོབ་ཤོག །ཀུན་མཁྱེན་རྒྱལ་བའི་བསྟན་པ་དར་ཞིང་རྒྱས། །བསྟན་འཛིན་སྐྱེས་བུའི་ཞབས་པད་བརྟན་པ་དང་། །འཇིག་རྟེན་ཀུན་ཏུ་དགེ་ལེགས་དཔལ་འབྱོར་རྒྱས། །མི་མཐུན་དུས་ཀྱི་རྒུད་པ་ཞི་གྱུར་ཅིག །ཅེས་པའང་རང་ཉིད་བགྲང་བྱ་རེ་གསུམ་དུ་སོན་པ་ན་བྱང་རྭ་སྒྲེང་རྒྱལ་བའི་དབེན་གནས་སུ་འབྱོར་སྐབས་སྙིང་ནས་དད་ཅིང་གུས་པས་གསོལ་བ་འདེབས་པ་པོ་འཇམ་དབྱངས་ཆོས་ཀྱི་བློ་གྲོས་ཏེ། དེ་བཞིན་འགྲུབ་པར་བྱིན་གྱིས་བརླབ་ཏུ་གསོལ།། །།

[edit]

@#/__/byang rwa sgreng rgyal ba'i dben gnas la bstod cing smon lam du bya ba rgyal ba dgyes pa'i mchod sprin zhes bya ba bzhugs so/__/ na mo gu ru shAkya mu ni ye/__rgyal ba nyi ma 'jig rten gsum gyi mgon/__/thub pa'i dbang po byams pa 'jam dbyangs dang /__/pad dkar 'chang ba 'phags ma sgrol ma sogs/__/dgyes par rol pa'i dga' ba'i tshal chen po/__/'phags tshogs bzhugs pa'i bsti gnas nyams dga' ba/__/sa yi dpyad legs dri zhim ngad pa 'thul/__/lha shug ljon pa'i tshal chen stugs po 'khrigs/__/sprul pa'i bya rigs sna tshogs skad snyan sgrogs/__/yan lag brgyad ldan chu klung dal gyis 'bab/__/spang ljang g.yu yi maN+Dal bkram pa la/__/lha mi'i me tog mtshar sdug mdzes pas khengs/__/rin chen sna tshogs khams kyi rdo ba bkra/__/mkha' 'gro dpa' bo bung ba'i glu dbyangs sgrogs/__/drang srong rig 'dzin grub pa til gong ltar/__/mngon sum bzhugs pa'i gnas 'di bde ba can/__/sa 'dir 'phos pa lta bu'i ngo mtshar byin/__/lhar bcas kun tu dga' ba'i do ra 'dir/__/snang mtha' pad+ma las grol dngos snang ba/__/dI paM kA ra'i thugs kyi sras gcig pu/__/dkon mchog 'bangs zhes rgyal ba'i 'byung gnas che/__/byin brlabs sprul pa'i lha khang 'jam pa'i dbyangs/__/mngon sum bzhugs pa'i 'dzam gling rten mchog 'di/__/kha ba ri pa'i bsod nams dpal du 'khrungs/__/kye ma 'di ni 'og min zhing khams che/__/phyogs bzhi mtshams brgyad ljon shing rin po che/__/sangs rgyas byang sems dpag med dgyes pa'i 'dzum/__/'od zer drwa bas kun tu rab mdzes shing /__/bdud rtsi'i chu gter nad gdon sdig sgrib sel/__/nor bu'i brag ri ba gam bkod pa mdzes/__/chos dang nor gyi gter khas rab tu gtams/__/rgyal ba dgyes pa'i dga' tshal chen po 'di/__/chos bzang lha yi 'dun sa dngos dang mtshungs/__/'jam pa'i rdo rje gur gum lhun po la/__/'char kha'i nyi gzhon gsar pas 'khyud pa 'dra/__/blta bas mi ngoms mtshan dpe dpal du 'bar/__/srid zhi kun gyi khyab bdag chen por snang /__/rgyal ba dkon mchog 'bangs kyi rnam par 'phrul/__/rgyal ba'i 'byung gnas mthong na dga' ba la/__/rigs gsum 'phags tshogs sprul pa'i 'khor grangs med/__/gser ri tshar du dngar ba rim par brgyud/__/rgyal ba'i gsang ba gsum gyis byin brlabs pa'i/__/rten mchog nor bu'i lhun po ltar spungs pa/__/'dzam gling 'gro ba kun gyi bsod nams rten/__/tshogs gnyis yongs su rdzogs pa'i dpal du grub/__/ngur smrig 'dzin pa'i 'dus sde ngang pa'i tshogs/__/chos spyod rnam bcur g.yel ba med pa dang /__/zhi dul bag yod ldan pa'i phreng ba che/__/lha mi kun gyis phyag byar 'os pa'i gnas/__/rten dang brten pa sa dang lhun po 'di/__/ji srid gnas par de srid mi nyams par/__/rdo rje gdan ltar brtan par bzhugs gsol 'debs/__/bdag gis bsags dang gzhan gyis bsags pa yi/__/dus gsum dge ba'i tshogs rnams blos blangs te/__/rgyal ba dgyes pa'i mchod sprin chen por stobs/__/kun kyang bstan pa rgyas pa'i rgyu ru bsngo/__/bdag kyang skye dang tshe rabs thams cad du/__/bka' gdams rnam thar gtsang ma 'dzin pa dang /__/jo bo yab sras snying gi ze 'brur bzhugs/__/dngos nyams rmi lam kun tu mjal bar shog__/theg mchog gsung gi bdud rtsis 'tsho ba dang /__/bdag gi sgo gsum bya ba ci bgyid pa/__/pha ma sems can don du 'gyur ba dang /__/ji srid 'khor ba ma stong bar gnas shog__/'brel pa thob dang ming tsam thos pa yang /__/ngan song sdug bsngal mtsho las rab sgrol zhing /__/thar pa'i sa bon rgyud la thebs pa dang /__/mthar gyis byang chub chen po'i 'bras thob shog__/kun mkhyen rgyal ba'i bstan pa dar zhing rgyas/__/bstan 'dzin skyes bu'i zhabs pad brtan pa dang /__/'jig rten kun tu dge legs dpal 'byor rgyas/__/mi mthun dus kyi rgud pa zhi gyur cig__/ces pa'ang rang nyid bgrang bya re gsum du son pa na byang rwa sgreng rgyal ba'i dben gnas su 'byor skabs snying nas dad cing gus pas gsol ba 'debs pa po 'jam dbyangs chos kyi blo gros te/__de bzhin 'grub par byin gyis brlab tu gsol//___//